CNI International News

နယူးဒေလီ၊ ဇူလိုင် ၄

အိန္ဒိယနှင့် မွန်ဂိုလီးယား စစ်တပ်များအကြား ၁၆ ကြိမ်မြောက် Nomadic Elephant အမည်ရှိ ပူးတွဲစစ်ရေး လေ့ကျင့်မှုကို အိန္ဒိယ၏ မက်ဂါလာယာ (Meghalaya) ပြည်နယ်၊ အွမ်ရိုအီ (Umroi) မြို့တွင် ဇူလိုင် ၃ ရက်မှ စတင်ပြီး ၁၆ ရက်အထိ ပြုလုပ်သွားမည်ဖြစ်ကြောင်း အိန္ဒိယစစ်တပ်က ကြေညာခဲ့သည်ဟု Economic Times မှ ဖော်ပြခဲ့သည်။

မက်ဂါလာယာပြည်နယ်တွင် ပြုလုပ်မည့် စစ်ရေးလေ့ကျင့်မှုများသည် နှစ်နိုင်ငံစစ်တပ်အကြား မြို့ပြနှင့် တောင်တန်းဒေသများ၌ သမားရိုးကျ စစ်ဆင်ရေးများ ပြုလုပ်ရာမှာ ပူးပေါင်းဆောင်ရွက်နိုင်စွမ်းကို မြှင့်တင်ရန် ရည်ရွယ်ကြောင်း အိန္ဒိယ ကာကွယ်ရေးဝန်ကြီးဌာန၏ ပြည်သူ့ပြန်ကြားရေးဦးစီးဌာနက X လူမှုမီဒီယာတွင် ထုတ်ပြန်ခဲ့သည်။

Nomadic Elephant စစ်ရေး လေ့ကျင့်မှုသည် မွန်ဂိုလီးယားနှင့် အိန္ဒိယနိုင်ငံများတွင် တစ်လှည့်စီ ပြုလုပ်လေ့ ရှိသည့် နှစ်စဉ်စစ်ရေးလေ့ကျင့်မှုဖြစ်သည်။

၁၅ ကြိမ်မြောက် Nomadic Elephant စစ်ရေးလေ့ကျင့်မှုကို မွန်ဂိုလီးယားနိုင်ငံ၊ အူလန်ဘာတာ (Ulaanbaatar) မြို့တွင် ပြုလုပ်ခဲ့ကြောင်း အိန္ဒိယကာကွယ်ရေးဝန်ကြီးဌာနက ထုတ်ပြန်ခဲ့သည်။

၂၀၂၃ ခုနှစ်က ပြုလုပ်ခဲ့သည့် အဆိုပါ စစ်ရေးလေ့ကျင့်မှုတွင် မွန်ဂိုလီးယားစစ်တပ်၏ တပ်ဖွဲ့ ၀၈၄ နှင့် အိန္ဒိယ၏ ဂျမူးနှင့် ကက်ရှ်မီးယား (Jammu and Kashmir) ခြေမြန်တပ်ရင်းမှ စစ်သားများ ပါဝင်ခဲ့သည်။

မွန်ဂိုလီးယားနဲ့ အိန္ဒိယ ပူးတွဲစစ်ရေးလေ့ကျင့်မှုမှာ ပါတဲ့ စစ်သားတွေကိုတွေ့ရစဉ်

ယခုနှစ် မေလ ၁၆ ရက်နှင့် ၁၇ ရက်ကလည်း အိန္ဒိယ ကာကွယ်ရေးဝန်ကြီးနှင့် မွန်ဂိုလီးယား ကာကွယ်ရေးဝန်ကြီး တို့အကြား ၁၂ ကြိမ်မြောက် ပူးတွဲလုပ်ငန်းအဖွဲ့ (JWG) အစည်းအဝေးကို ပြုလုပ်ခဲ့ပြီး နှစ်နိုင်ငံအကြား ပူးပေါင်း ဆောင်ရွက်မှုကို တိုးမြှင့်ရန် များပြားသည့် ကာကွယ်ရေး ပူးပေါင်းဆောင်ရွက်မှု အစီအစဉ်များ၏ တိုးတက်မှု အလားအလာကို သုံးသပ်ခဲ့ကြသည်။

ထိုအစည်းအဝေးကို အိန္ဒိယ ကာကွယ်ရေးဝန်ကြီးဌာန၏ နိုင်ငံတကာ ပူးပေါင်းဆောင်ရွက်မှုဆိုင်ရာ တွဲဖက် အတွင်းဝန် အမီတာပရာဆက် (Amitabh Prasad) နှင့် မွန်ဂိုလီးယား ဗိုလ်မှူးချုပ် ဂန်ခူယက် ဒါဗက်ဒေါ့ဂျ် (Gankhuyag Davagdori) တို့က သဘာပတိအဖြစ် ကြီးမှူးကျင်းပခဲ့သည်။

ထိုအစည်းအဝေးကို မွန်ဂိုလီးယားနိုင်ငံဆိုင်ရာ အိန္ဒိယသံအမတ်လည်း တက်ရောက်ခဲ့ပြီး ကာကွယ်ရေး ပူးပေါင်း ဆောင်ရွက်မှုများနှင့်ပတ်သက်ပြီး အားရကျေနပ်မှုရှိကြောင်း အစည်းအဝေး တက်ရောက်လာသည့် နှစ်နိုင်ငံ ကိုယ်စားလှယ်များက ဖော်ပြခဲ့သည်။

မွန်ဂိုလီးယား တာဝန်ရှိသူများက အိန္ဒိယ၏ စက်မှုလုပ်ငန်းကဏ္ဍ၏ စွမ်းဆောင်ရည်အပေါ် ယုံကြည်မှုရှိကြောင်း ဖော်ပြခဲ့ပြီး နှစ်နိုင်ငံအကြား ဆက်ဆံရေးများ မြင့်တက်နေသည့် အခြေအနေကို နှစ်ဖက်စလုံးက အသိအမှတ်ပြု လက်ခံခဲ့ကြသည်။

Source: Economic Times 

CNI International News

အက်စ်တာနာ၊ ဇူလိုင် ၄

ရုရှားသမ္မတ ပူတင် (Vladimir Putin) နှင့် တရုတ်သမ္မတ ရှီကျင့်ဖျင် (Xi Jinping) တို့သည် ကာဇက်စတန်နိုင်ငံ၌ ပြုလုပ်သည့် ရှန်းဟိုင်း ပူးပေါင်းဆောင်ရွက်ရေးအဖွဲ့ (SCO) ညီလာခံတွင် တွေ့ဆုံမည်ဖြစ်ကြောင်း ရိုက်တာမှ ဖော်ပြခဲ့သည်။

ရုရှား၊ တရုတ်နှင့် ဗဟိုအာဏာနိုင်ငံများသည် အမေရိကန်နှင့် ၎င်း၏ မဟာမိတ်များ၏ လွှမ်းမိုးမှုကို တန်ပြန်ရန် အတွက် ၂၀၀၁ ခုနှစ်က SCO ကို ဖွဲ့စည်းခဲ့ခြင်းဖြစ်သည်။ ထို့နောက် အီရန်၊ အိန္ဒိယနှင့် ပါကစ္စတန်တို့ပါ ပါဝင် လာခဲ့သည်။

ပူတင်သည် ကာဇက်စတန်နိုင်ငံ အက်စ်တာနာ (Astana) မြို့တော်တွင် ဇူလိုင် ၃ ရက်နှင့် ၄ ရက်၌ ပြုလုပ်မည့် SCO ညီလာခံမှာ အခြားနိုင်ငံများမှ ခေါင်းဆောင်များနှင့်လည်း သီးသန့် တွေ့ဆုံမှုများ ပြုလုပ်မည်ဖြစ်သည်။

ယခုလကုန်ပိုင်းတွင် ရုရှားသို့ သွားရောက်မည့် အိန္ဒိယဝန်ကြီးချုပ် မိုဒီ (Narendra Modi) ကမူ ယခုပြုလုပ်နေ သည့် SCO အစည်းအဝေးကို တက်ရောက်မည် မဟုတ်ကြောင်း အိန္ဒိယနိုင်ငံက ပြောကြားခဲ့သည်။

ပူတင်နဲ့ရှီကျင့်ဖျင်ကိုတွေ့ရစဉ်

မိုဒီသည် ၎င်းကိုယ်စား နိုင်ငံခြားရေးဝန်ကြီး ဆူဘရာမန်ယမ် ဂျိုင်ရှန်ကာ (Subrahmanyam Jaishankar) ကို စေလွှတ်ခဲ့သည်။

SCO အဖွဲ့ဝင်နိုင်ငံများမှ ခေါင်းဆောင်များသည် လက်ရှိဖြစ်ပွားနေသည့် အခြေအနေနှင့် အဖွဲ့အစည်းအတွင်း အပြန်အလှန် ပူးပေါင်းဆောင်ရွက်မှုများကို တိုးမြှင့်ရေးအတွက် အလားအလာများကို ဆွေးနွေးကြမည်ဖြစ် ကြောင်း ကရင်မလင် (Kremlin) က ထုတ်ပြန်ခဲ့သည်။

ပြီးခဲ့သည့်နှစ်က ဗွီဒီယို ဆက်သွယ်မှုမှတဆင့် ပြုလုပ်သည့် SCO အစည်းအဝေးတွင် သက်ဆိုင်ရာ တစ်နိုင်ငံချင်းစီ အလိုက် သို့မဟုတ် နိုင်ငံအုပ်စုအလိုက် ကမ္ဘာလုံးဆိုင်ရာ ဒုံးကျည်ကာကွယ်ရေးစနစ်များကို အကန့်အသတ်မရှိ ချဲ့ထွင်နေသည့် ဆိုးကျိုးများအား ဝေဖန်ကြောင်း အစီအရင်ခံစာ ထုတ်ပြန်ခဲ့သည်။

ထိုအစီရင်ခံစာသည် နေတိုး၏ အင်အားချဲ့ထွင်မှုနှင့် အနောက်နိုင်ငံများက ယူကရိန်းကို စစ်ရေးအကူအညီများ ပေးနေမှုအား ရည်ညွှန်းပြောဆိုခဲ့ခြင်း ဖြစ်သည်ဟု ယူဆခံခဲ့ရသည်။

၂၀၂၂ ခုနှစ်၊ ဖေဖော်ဝါရီလကလည်း တရုတ်နှင့် ရုရှားသည် နှစ်နိုင်ငံအကြား အကန့်အသတ် မရှိသည့် ဆက်ဆံရေး ကို ကြေညာခဲ့ပြီး ပူတင်နှင့်ရှီအကြား မိတ်ဖက်ဆက်ဆံမှုများ ပိုမိုနက်ရှိုင်းခဲ့သည်။

Source: ရိုက်တာ

CNI International News

ဝါရှင်တန်၊ ဇူလိုင် ၄

အမေရိကန်သမ္မတ ဂျိုးဘိုင်ဒန် (Joe Biden) သည် သမ္မတအဖြစ် ဆက်လက် တာဝန်ထမ်းဆောင်ရန် စိတ်ပိုင်း ဆိုင်ရာနှင့် ရုပ်ပိုင်းဆိုင်ရာ ကျန်းမာကြံ့ခိုင်မှု ရှိသည်ဆိုသည့် အချက်ကို သက်သေပြရန် ပါတီတွင်း ဖိအားများနှင့် ရင်ဆိုင်နေရကြောင်း အယ်လ်ဂျာဇီးယားမှ ဖော်ပြခဲ့သည်။

ဒီမိုကရက်တစ် လွှတ်တော်အမတ် တစ်ဦးဖြစ်သူ လွိုက် ဒေါ့ဂက် (Lloyd Doggett) က ဘိုင်ဒန်ကို သမ္မတ ရွေးကောက်ပွဲ ထပ်မံဝင်ရောက် ယှဉ်ပြိုင်ခြင်း မပြုတော့ရန် ပထမဆုံးအကြိမ်အဖြစ် လူသိရှင်ကြား တောင်းဆိုခဲ့ ပြီးနောက် ဘိုင်ဒန်အပေါ် ဖိအားများ မြင့်တက်ခဲ့ခြင်းဖြစ်သည်။

ဘိုင်ဒန်သည် ဇွန်လ ၂၇ ရက်က ဂျော်ဂျီယာ (Georgia) ပြည်နယ်၊ အတ္တလန္တာ (Atlanta) မြို့တွင် ပြုလုပ်ခဲ့သည့် ပထမဆုံးအကြိမ် စကားစစ်ထိုးပွဲ၌ ရီပတ်ဘလစ်ကန်ပါတီမှ ပြိုင်ဘက်ဖြစ်သူ ဒေါ်နယ်ထရမ့်(Donald Trump) ကို ကောင်းမွန်စွာ ချေပပြောဆိုနိုင်ခဲ့ခြင်း မရှိသည့်အတွက် ဝေဖန်ခံနေရခြင်းဖြစ်သည်။

ဘိုင်ဒန်နဲ့ ဒေါ်နယ်ထရမ့်ကိုတွေ့ရစဉ်

ဇွန်လ ၂ ရက်တွင် တက္ကဆက် (Texas) ပြည်နယ်မှ အောက်လွှတ်တော် ကိုယ်စားလှယ် လွိုက်ဒေါ့ဂတ်က ဘိုင်ဒန် ကို ရွေးကောက်ပွဲမှ နုတ်ထွက်ရန် လူသိရှင်ကြား တောင်းဆိုခဲ့သည့် ပထမဆုံး ဒီမိုကရက်တစ် လွှတ်တော်အမတ် ဖြစ်လာခဲ့သည်။

“လင်ဒန်ဂျွန်ဆင် (Lyndon Johnson) - (အမေရိကန်သမ္မတဟောင်း) ရဲ့ ဖြစ်စဉ်ကို ကျနော် တင်ပြချင်ပါတယ်။ အရမ်းခက်ခဲနေတဲ့ အခြေအနေမှာ သူဟာ ရွေးကောက်ပွဲကနေ နုတ်ထွက်ဖို့ နာကျင်စရာကောင်းတဲ့ ဆုံးဖြတ်ချက် ကို ချမှတ်ခဲ့ပါတယ်။ ဘိုင်ဒန်လည်း အဲဒီလို လုပ်သင့်ပါတယ်”ဟု ဒေါ့ဂက်က ပြောကြားခဲ့သည်။

ဝါရှင်တန် (Washington) ပြည်နယ်မှ နောက်ထပ် အောက်လွှတ်တော် ကိုယ်စားလှယ် မာရီ ဂလူဆန်ကမ့် ပီးရက်ဇ် (Marie Gluesenkamp Perez) ကလည်း ဘိုင်ဒန် ရွေးကောက်ပွဲမှ နုတ်ထွက်ရန် ပြောကြားခဲ့ခြင်း မရှိသည့်တိုင် ဇွန်လ ၂၇ ရက်က ပြုလုပ်ခဲ့သည့် စကားစစ်ထိုးပွဲသည် ဘိုငဒန်ကို အထိနာစေလိမ့်မည်ဖြစ်ကြောင်း ပြောကြားခဲ့သည်။

ဒီမိုကရက်တစ် လွှတ်တော်အမတ် တစ်ဦးဖြစ်သူ လွိုက်ဒေါ့ဂက်ကို တွေ့ရစဉ်

“ကျမတို့ မြင်ခဲ့တာတွေက ငြင်းလို့မရပါဘူး။ ဒါက အမှန်တရားပါပဲ။ ဘိုင်ဒန်ဟာ ထရမ့်ကို ရှုံးတော့မယ်လို့ ထင်ပါ တယ်။ ဒါက ခက်ခဲမှန်းသိပါတယ်။ ဒါပေမယ့် စကားစစ်ထိုးပွဲမှာ ထိခိုက်ခဲ့ရတာကတော့ အသေအချာပါပဲ” ဟု ပီးရက်ဇ်က ပြောကြားခဲ့သည်။

မိန်း (Maine) ပြည်နယ်မှ အောက်လွှတ်တော် ကိုယ်စားလှယ် ဂျရက် ဂိုးလ်ဒန် (Jared Golden) ကလည်း ဒေါ်နယ်ထရမ့်သည် အနိုင်ရနိုင်ကြောင်း ပြောကြားခဲ့သည်။

“ဒီမိုကရက် အများအပြားက ဂျိုးဘိုင်ဒန်ကို ပါတီကိုယ်စားပြု ကိုယ်စားလှယ်အဖြစ်က ဆင်းသင့်၊ မဆင်းသင့်နဲ့ ပတ်သက်ပြီး ထိတ်ထိတ်လန့်လန့်တွေ ဖြစ်နေကြပါပြီ” ဟု ဂိုးလ်ဒန်က ပြောကြားခဲ့သည်။

Source: အယ်လ်ဂျာဇီးယား

CNI International News

ဝါရှင်တန်၊ ဇူလိုင် ၃

အမေရိကန်သမ္မတဟောင်း ဒေါ်နယ်ထရမ့် (Donald Trump)က သူသည် အမေရိကန်သမ္မတအဖြစ် နောက်တစ်ကြိမ် ရွေးကောက်ခံရမည်ဆိုပါက ရုရှား-ယူကရိန်းစစ်ပွဲကို တစ်ရက်အတွင်း ပြေလည်မှုရရှိစေရန် လုပ်ဆောင်ပေးနိုင်သည်ဟု ပြောကြားခဲ့ကြောင်း အေပီမှ ဖော်ပြခဲ့သည်။

သို့သော် ကုလသမဂ္ဂဆိုင်ရာ ရုရှားသံအမတ် ဗက်စီလီ နီဘန်ဇီယာ (Vassily Nebenzia) ကမူ ဒေါ်နယ်ထရမ့်၏ ပြောကြားချက်ကို မဖြစ်နိုင်ကြောင်း ငြင်းဆိုခဲ့သည်။

ဒေါ်နယ်ထရမ့်၏ ပြောကြားချက်များနှင့် ပတ်သက်ပြီး သတင်းထောက်များ၏ မေးမြန်းမှုကိုခံရချိန်တွင် ရုရှား သံအမတ် နီဘန်ဇီယာက “ယူကရိန်းပဋိပက္ခကို တစ်ရက်တည်းနဲ့ မဖြေရှင်းနိုင်ပါဘူး” ဟု ပြန်လည်ဖြေကြားခဲ့ သည်။

၂၀၂၃ ခုနှစ်၊ မေလက CNN town hall အစီအစဉ်တွင် ဒေါ်နယ်ထရမ့်က “သူတို့တွေ သေကြေနေကြပါပြီ။ ရုရှား တွေနဲ့ ယူကရိန်းတွေပေါ့။ အဲဒီလို သေကြေပျက်စီးနေတာကို ရပ်တန့်စေချင်ပါတယ။ ကျနော်သာဆိုရင် ၂၄ နာရီ အတွင်း ရပ်တန့်ပစ်နိုင်ပါလိမ့်မယ်” ဟု ပြောကြားခဲ့သည်။

ထို့ပြင် ဒေါ်နယ်ထရမ့်က သူသည် ယူကရိန်းသမ္မတ ဇာလန်းစကီး (Volodymyr Zelenskyy) ၊ ရုရှားသမ္မတ ပူတင် (Vladimir Putin) တို့နှင့် တွေ့ဆုံပြီးမှသာ ယူကရိန်း-ရုရှားစစ်ပွဲ အဆုံးသတ်လိမ့်မည်ဟုလည်း ပြောကြားခဲ့သည်။

 ရုရှားသံအမတ် နီဘန်ဇီယာကို တွေ့ရစဉ်

ဒေါ်နယ်ထရမ့်သည် ထိုစကားကို မဲဆွယ်စည်းရုံးချိန် ကာလတစ်လျှောက်လုံး ထပ်တလဲလဲ ပြောကြားခဲ့ပြီး ပြီးခဲ့သည့် သီတင်းပတ်က ဘိုင်ဒန်နှင့်ပြုလုပ်သည့် စကားစစ်ထိုးပွဲတွင်လည်း ထိုအကြောင်းအရာကို ထည့်သွင်း ပြောကြားခဲ့သည်။

“တကယ်လို့ ကျနော်တို့မှာ သမ္မတစစ်စစ်တစ်ဦး၊ ပူတင်က လေးစားရတဲ့ သမ္မတတစ်ဦး ရှိခဲ့မယ်ဆိုရင် သူ (ပူတင်) ဟာ ယူကရိန်းကို ဘယ်တော့မှ ကျူးကျော်မှာ မဟုတ်ပါဘူး”ဟု ဒေါ်နယ်ထရမ့်က ပြောကြားခဲ့သည်။

ရုရှားသံအမတ် နီဘန်ဇီယာကမူ ၂၀၂၂ ခုနှစ်၊ ဧပြီလက တူရကီနိုင်ငံ၊ အစ္စတန်ဘူလ် (Istanbul) မြို့တွင် ရုရှားနှင့် ယူကရိန်းအကြား သဘောတူညီမှုရကာနီး အခြေအနေအထိဖြစ်ခဲ့သည်။

ထိုအချိန်ကတော့ ယူကရိန်းစစ်ပွဲသည် အဆုံးသတ်ရန် ဖြစ်ကောင်းဖြစ်နိုင်ခဲ့လိမ့်မည်ဟု ပြောကြားခဲ့သည်။

သို့သော် အနောက်နိုင်ငံများသည် ၂၀၂၂ ခုနှစ်၊ ဧပြီလ ငြိမ်းချမ်းရေး သဘောတူညီချက်ကို တားမြစ်ခဲ့ကာ ရုရှားအား ဆက်လက်တိုက်ခိုက်ရန် ယူကရိန်းကို တိုက်တွန်းခဲ့သည်ဟု နီဘန်ဇီယာက ဝေဖန်ပြောကြားခဲ့သည်။

Source: အေပီ

CNI International News

ဝါရှင်တန်၊ ဇူလိုင် ၃

သမ္မတဟောင်း ဒေါ်နယ်ထရမ့် (Donald Trump) အနေဖြင့် သမ္မတအဖြစ် တာဝန်ထမ်းဆောင်ခဲ့ချိန်က ၎င်း၏ ဖွဲ့စည်းပုံဆိုင်ရာ အခွင့်အာဏာများအရ လုပ်ဆောင်ခဲ့သည့် မည်သည့် လုပ်ရပ်မျိုးအတွက်နှင့်မျှ တရားစွဲဆိုခံရမည် မဟုတ်ကြောင်း အမေရိကန်တရားရုံးချုပ်က ဇူလိုင် ၁ ရက်တွင် အမိန့်ချမှတ်ခဲ့သည်ဟု ရိုက်တာမှ ဖော်ပြခဲ့သည်။

တရားရုံးချုပ်၏ ဆုံဖြတ်ချက်သည် တရားစွဲဆိုခံရမှုမှ ကာကွယ်ပေးထားသည့် သမ္မတဆိုင်ရာ လွတ်ငြိမ်းချမ်းသာ ခွင့်ကို ပထမဆုံးအကြိမ်အဖြစ် အသိအမှတ်ပြုသည့် စီရင်ချက်တစ်ခုဖြစ်ခဲ့သည်။

ဒေါ်နယ်ထရမ့်ကို သမ္မတဆိုင်ရာ ကင်းလွတ်ခွင့်ပြုရန်အတွက် တရားသူကြီးချုပ် ဂျွန် ရောဘတ် (John Roberts) က ပြုလုပ်ခဲ့သည့် မဲခွဲဆုံးဖြတ်မှုတွင် တရားသူကြီး ၆ ဦးမှ ထောက်ခံမဲပေးခဲ့ပြီး ၃ ဦးမှာ ကန့်ကွက်မဲပေးခဲ့သည်။

တရားရုံးဆုံးဖြတ်ချက်ကိုတွေ့ရစဉ်

ထို့ကြောင့် ဒေါ်နယ်ထရမ့်သည် ၂၀၂၀ ပြည့်နှစ်က သမ္မတ ဂျိုးဘိုင်ဒန် (Joe Biden) ကို ရှုံးနိမ့်ခဲ့သည့် ရွေးကောက် ပွဲတွင် မဲရလဒ်များအား ပြောင်းပြန်လှန်ရန် အားထုတ်ကြိုးပမ်းမှု အပါအဝင် ဖက်ဒရယ် ရာဇဝတ်မှုဆိုင်ရာ စွဲချက် များမှ ကင်းလွတ်ခွင့်မရှိကြောင်း ငြင်းဆိုခဲ့သည့် အောက်တရားရုံး၏ ဆုံးဖြတ်ချက်မှာ ပျက်ပြယ်သွားခဲ့သည်။

ရီပတ်ဘလစ်ကန်ပါတီ ကိုယ်စားလှယ်လောင်းဖြစ်သည့် ဒေါ်နယ်ထရမ့်သည် ဒီမိုကရက်တစ်ပါတီ ကိုယ်စားလှယ် လောင်းဖြစ်သော ဘိုင်ဒန်နှင့် နိုဝင်ဘာ ၅ ရက်တွင် ပြုလုပ်မည့် သမ္မတရွေးကောက်ပွဲတွင် မကျေပွဲ ထပ်မံယှဉ်ပြိုင် ရမည်ဖြစ်သည်။

“ကျနော်တို့ဟာ ဒီအမှုကို ဖွဲ့စည်းပုံဆိုင်ရာ တရားရေးစနစ်အောက်မှာ လုပ်ဆောင်ခဲ့တာ ဖြစ်ပါတယ်။ သမ္မတ ဆိုင်ရာ လုပ်ပိုင်ခွင့်အာဏာရဲ့ သဘောသဘာဝအရ သမ္မတဟာ သူတာဝန် ထမ်းဆောင်နေချိန်အတွင်း တရားဝင်မှု ရှိတဲ့ လုပ်ရပ်တွေအတွက် ပြစ်မှုဆိုင်ရာ တရားစွဲဆိုခံရမှုကနေ ကင်းလွတ်ခွင့်ရှိပါတယ်” ဟု ရောဘတ်က ပြော ကြားခဲ့သည်။

 ဒေါ်နယ်ထရမ့်ကို တွေ့ရစဉ်

ထို့ပြင် ဖွဲ့စည်းပုံအခြေခံဥပဒေဆိုင်ရာ လုပ်ပိုင်ခွင့်များနှင့်အညီ ဒေါ်နယ်ထရမ့်အတွက် သမ္မတဆိုင်ရာ လွတ်ငြိမ်း ချမ်းသာခွင့် အပြည့်အဝရှိကြောင်း၊ ဒေါ်နယ်ထရမ့်သည် ၎င်း၏ လုပ်ပိုင်ခွင့်အတွင်း လုပ်ဆောင်ခဲ့သည့် လုပ်ရပ်များ အတွက် တရားစွဲဆိုခံရမည် မဟုတ်ကြောင်း ၎င်းက ပြောကြားခဲ့သည်။

ဘိုင်ဒန်ကမူ တရားရုံးချုပ်၏ ဆုံးဖြတ်ချက်သည်  အန္တရာယ်များသည့် စီရင်ထုံးတစ်ခုဖြစ်ကြောင်း၊ အဘယ်ကြောင့် ဆိုသော် သမ္မတ၏ လုပ်ပိုင်ခွင့်အာဏာကို ဥပဒေဖြင့် ထိန်းချုပ်၍ မရနိုင်တော့ခြင်းကြောင့်ဖြစ်သည်ဟု ပြောကြား ခဲ့သည်။

“အမေရိကန်မှာ ဘုရင်တွေ မရှိဘူးဆိုတဲ့ မူဝါဒအပေါ်မှာ ဒီနိုင်ငံကို တည်ထောင်ခဲ့တာ ဖြစ်ပါတယ်။ ဥပဒေရဲ့ အထက်မှာ ဘယ်သူမှ မရှိပါဘူး။ ဥပဒေရဲ့ အထက်မှာ အမေရိကန်သမ္မတတောင် မရှိရပါဘူး” ဟု ဘိုင်ဒန်က ပြောကြားခဲ့သည်။

Source: ရိုက်တာ

CNI International News

နယူးဒေလီ၊ ဇူလိုင် ၂

အိန္ဒိယ၏ Act East မူဝါဒ၏ အလွန်အပြုသဘောဆောင်သည့် အကျိုးသက်ရောက်မှုသည် လာအိုနှင့် ဆက်ဆံရေး ကို ပိုမိုခိုင်မာစေကြောင်း လာအိုနိုင်ငံဆိုင်ရာ အိန္ဒိယသံအမတ် ပရာရှန့် အက်ဂရာဝယ်လ်  (Prashant Agrawal) က ပြောကြားခဲ့ကြောင်း Devdiscourse မှ ဖော်ပြခဲ့သည်။

ထိုမူဝါဒကြောင့် နှစ်နိုင်ငံအကြား ယဉ်ကျေးမှု အမွေအနှစ်များ ဖလှယ်မှု၊ မဟာဗျူဟာမြောက် ဖွံ့ဖြိုးတိုးတက်ရေး ပူးပေါင်းဆောင်ရွက်မှုတို့ရှိခဲ့ပြီး အဓိက အချက် ၃ ချက်ဖြစ်သည့် လုပ်အားစွမ်းဆောင်ရည် တည်ထောင်မှု၊ လေ့ကျင့်မှုနှင့် ကျွမ်းကျင်မှုတို့ ဖြစ်ထွန်းခဲ့သည်ဟု အက်ဂရာဝယ်လ်က ပြောကြားခဲ့သည်။

အိန္ဒိယနှင့် လာအိုတို့သည် ဘာသာရေး၊ ယဉ်ကျေးမှု၊ ပြည်သူအချင်းချင်း ထိတွေ့ဆက်ဆံမှုတို့သည် လွန်လေပြီး သည့် ရှည်လျားသော သမိုင်းအဆက်ဆက်ကတည်းက ရှိခဲ့သည်ဟု ဆိုသည်။

"ကျနော်တို့နဲ့ လာအိုနိုင်ငံရဲ့ ဆက်ဆံရေးဟာ တိုးတက်ယဉ်ကျေးမှုတွေ ရှိခဲ့ပါတယ်။ သမိုင်းကြောင်းအရ နီးစပ်တဲ့ ဆက်ဆံရေးလည်းရှိပြီး ဗုဒ္ဓဘာသာနဲ့ပတ်သက်တဲ့ ဖလှယ်မှုတွေနဲ့ လာအိုရဲ့ ရာမာယနယဉ်ကျေးမှု ပျံ့နှံ့မှုတွေ ကြောင့် ဆက်ဆံရေးတွေကို ခိုင်မာခဲ့ပါတယ်" ဟု သံအမတ်အက်ဂရာဝယ်လ်က ပြောသည်။

နှစ်နိုင်ငံအကြား Quick Impact ပရောဂျက်များ၊ စွန့်ဦးတီထွင်မှု ဖွံ့ဖြိုးတိုးတက်ရေးစင်တာ၊ ဆော့ဖ်ဝဲ သင်တန်း လေ့ကျင့်ရေးစင်တာ အပါအဝင် ပရောဂျက် အများအပြားရှိကြောင်းနှင့် ထိုကဲ့သို့ ပူးတွဲအစီအစဉ်များသည် Act East မူဝါဒ၏ တစ်စိတ်တစ်ပိုင်းဖြစ်ကြောင်း အက်ဂရာဝယ်လ်က ပြောကြားခဲ့သည်။

အိန္ဒိယနဲ့လာအို ဆက်ဆံရေးကိုတွေ့ရစဉ်

Act East မူဝါဒသည် အာဆီယံကို ဗဟိုပြုကာ အင်ဒို-ပစိဖိတ်ဒေသတွင် အိမ်နီးချင်းနိုင်ငံများနှင့် ဆက်ဆံရေး များကို ချဲ့ထွင်ရန် အာရုံစိုက် လုပ်ဆောင်သည့် မူဝါဒဖြစ်သည်။

ထို့ပြင် UNESCO ၏ ကမ္ဘာ့အမွေအနှစ် စာရင်းဝင်ဖြစ်သည့် လာအို၏ Vat Phou ဘုရားကျောင်း ပြုပြင်ထိန်းသိမ်း ရေးကဲ့သို့ ပရောဂျက်များဖြင့် နှစ်နိုင်ငံအကြား ယဉ်ကျေးမှုဆိုင်ရာ ဆက်ဆံရေးများကိုလည်း တိုးမြှင့်ရန် ဆွေးနွေး ခဲ့သည်ဟု အက်ဂရာဝယ်လ်က ဆိုသည်။

"ဒစ်ဂျစ်တယ် အခြေခံ အဆောက်အအုံတွေကို ဖန်တီးဖို့ ကျနော်တို့ရဲ့ ပူးပေါင်းဆောင်ရွက်မှုဟာ လာအို အပါအဝင် အာဆီယံအဖွဲ့ဝင် နိုင်ငံတွေနဲ့အတူ လုပ်ဆောင်သွားမယ့် ဦးစားပေး အစီအစဉ်တွေထဲက တစ်ခု ဖြစ်ပါတယ်" ဟု ၎င်းက ဆိုသည်။

လုံခြုံရေး၊ တည်ငြိမ်ရေးတို့နှင့် ပတ်သက်ပြီး အိန္ဒိယနှင့် လာအိုတို့သည် အာဆီယံအဖွဲ့ဝင် နိုင်ငံများ၏ ကြိုဆို ထောက်ခံမှုနှင့်အတူ ဒေသတွင်း လုံခြုံရေးနှင့်တည်ငြိမ်ရေးကို မြင့်တက်စေရန် ကြိုးပမ်းဆောင်ရွက်နေ သည်ဟုလည်း အက်ဂရာဝယ်လ်က ပြောကြားခဲ့သည်။

Source: Devdiscourse

CNI International News

ဝါရှင်တန်၊ ဇူလိုင် ၂

အမေရိကန်တွင် နိုဝင်ဘာ ၅ ရက်တွင် ကျင်းပမည့် သမ္မတရွေးကောက်ပွဲမတိုင်မီ ဇွန်လ ၂၇ ရက်က ပြုလုပ်ခဲ့သော စကားစစ်ထိုးပွဲ၌ လက်ရှိသမ္မတ ဂျိုးဘိုင်ဒန် (Joe Biden) ၏ ပြင်ဆင်မှုအားနည်းခြင်း၊ ချေပပြောဆိုနိုင်မှု အားနည်းခြင်းတို့အပေါ် ဝေဖန်မှုများ ထွက်ပေါ်ခဲ့သည်ဟု ရိုက်တာမှ ဖော်ပြခဲ့သည်။

ဂျော်ဂျီယာ (Georgia) ပြည်နယ်၊ အတ္တလန္တာ (Atlanta) မြို့တွင် ပြုလုပ်ခဲ့သည့် ပထမဆုံး စကားစစ်ထိုးပွဲ၌ ဘိုင်ဒန်၏ ပြိုင်ဘက်ဖြစ်သော သမ္မတဟောင်း ဒေါ်နယ်ထရမ့် (Donald Trump) က ၎င်း၏ ထုံးစံအတိုင်း လေလုံးထွားပြောဆိုမှုများ၊ မုသားစကားများဖြင့် ဘိုင်ဒန်ကို ဝေဖန်ထိုးနှက်ခဲ့ခြင်းဖြစ်သည်။ 

ထိုစကားစစ်ထိုးပွဲတွင် ဘိုင်ဒန်သည် စကားထစ်ခြင်း၊ အသံဝင်သွားခြင်းတို့ဖြစ်ခဲ့ပြီး ထရမ့်၏ ဝေဖန်ထိုးနှက် ချက်များကို ကောင်းမွန်စွာ ချေပပြောဆိုနိုင်ခဲ့ခြင်း မရှိသဖြင့် ဒီမိုကရက်များအကြား ဝေဖန်သံများ ကျယ်လောင်စွာ ထွက်ပေါ်လာခဲ့ခြင်းဖြစ်သည်။

ဘိုင်ဒန်နဲ့ ဒေါ်နယ်ထရမ့်ကို တွေ့ရစဉ်

"ဘိုင်ဒန် အနေနဲ့ စကားစစ်ထိုးပွဲ မတိုင်ခင်မှာ ပြည့်ပြည့်ဝဝ အနားယူဖို့ ကျနော် သေချာပြောခဲ့ပါတယ်။ ဒါပေမယ့် သူ့ကိုကြည့်ရတာ အားမရှိဘဲ ပင်ပန်းနွမ်းနယ်နေပုံပါပဲ။ သူကောင်းကောင်း မစွမ်းဆောင်နိုင်ခဲ့ပါဘူး" ဟု စကားစစ် ထိုးပွဲတွင် အထိမနာစေရန် ဘိုင်ဒန်၏ ထိပ်သီးလက်ထောက်များကို အကြံပြုခဲ့သည့် အမည်မဖော်လိုသူတစ်ဦးက  ပြောကြားခဲ့သည်။

"သူ့ကို အခုလို လူမမာပုံစံမျိုးနဲ့ စကားစစ်ထိုးတဲ့ စင်မြင့်ပေါ် တက်ခွင့်ပေးလိုက်တာဟာ တော်တော်ဆိုးရွားတဲ့ ဆုံးဖြတ်ချက်ဖြစ်ပါတယ်" ဟု ၎င်းက ဆက်လက် ပြောကြားခဲ့သည်။

ထို့ပြင် ဘိုင်ဒန်အနေဖြင့် မဲဆန္ဒရှင်များကို ပိုမိုဆွဲဆောင်နိုင်ရန်နှင့် ထောက်ခံမဲများကို လုံလောက်စွာ ရရှိနိုင်ရန် ပြင်ဆင်မှုများကို ပိုမိုအာရုံစိုက်သင့်ကြောင်း၊ စကားစစ်ထိုးပွဲများ မတိုင်မီ လုံလောက်စွာ အနားယူရန် လိုအပ် ကြောင်း ဝေဖန်သူများက ထောက်ပြခဲ့သည်။

ဘိုင်ဒန်ကို တွေ့ရစဉ်

ထိုကဲ့သို့ ဝေဖန်မှုများ ထွက်ပေါ်နေချိန်တွင် ဘိုင်ဒန်၏ လက်ထောက်တစ်ဦးက ဘိုင်ဒန်သည် စကားစစ်ထိုးပွဲ ပြုလုပ်သည့် အချိန်၌ အနည်းငယ် အအေးမိနေဖွယ်ရှိကြောင်း၊ သူသည် မကြာခဏ အအေးမိတတ်ကြောင်း ပြောကြားခဲ့ကာ ဝေဖန်မှုကို ခုခံကာကွယ်ပြောဆိုခဲ့သည်။

ဒေါ်နယ်ထရမ့်သည် ယခုနှစ်တွင် ပြုလုပ်မည့် ရွေးကောက်ပွဲ၌ ၂၀၂၀ ပြည့်နှစ် ရွေးကောက်ပွဲကထက် စကား စစ်ထိုးပွဲများမှာ အသာစီးရရှိရန် ပြင်ဆင်ထားဖွယ် ရှိသည်ဟုလည်း ဘိုင်ဒန်၏ ထောက်ခံသူများက ယူဆထား သည်။

ဒေါ်နယ်ထရမ့်သည် ၂၀၂၀ ပြည့်နှစ်က ရွေးကောက်ပွဲ ကျင်းပရန် ရက်အနည်းအငယ်အလို ပထမဆုံး စကားစစ်ထိုး ပွဲတွင် COVID-19 ကူးစက်ခံထားရကြောင်း စစ်ဆေးတွေ့ရှိခဲ့သည့်တိုင် စကားစစ်ထိုးပွဲကို  တက်ရောက်ခဲ့မှု အပါအဝင် စည်းကမ်းချိုးဖောက်မှုများ ရှိခဲ့သည်။ 

Source: ရိုက်တာ

CNI International News

ဘန်ကောက်၊ ဇူလိုင် ၂

ထိုင်းနိုင်ငံတွင် အတိုက်အခံပါတီဖြစ်သည့် Move Forward (MFP) ပါတီ ဖျက်သိမ်းခံရပါက ထိုင်းနိုင်ငံ၏ ဒီမိုကရေစီစနစ်ကို ဆုတ်ယုတ်စေလိမ့်မည်ဟု အာဆီယံလွှတ်တော်ဆိုင်ရာ လူ့အခွင့်အရေးအဖွဲ့ (APHR) ၏ ဥက္ကဋ္ဌဖြစ်သူ မာစီ ခရစ္စတီ ဘာရန်းစ် (Mercy Chriesty Barends) က သတိပေးခဲ့သည်ဟု Thai PBS World မှ ဖော်ပြခဲ့သည်။

"ထိုင်းအစိုးရရဲ့ အထက်တန်းလွှာက သူတို့အကျိုးစီးပွားကြောင့်သော်လည်းကောင်း၊ MFP ကို မနှစ်မြို့ခြင်းကြောင့် သော်လည်းကောင်း အဲဒီပါတီကို ဖျက်သိမ်းဖို့ လုပ်ဆောင်တာဟာ ဒီမိုကရေစီကို သတ်ပစ်တာနဲ့ အတူတူပါပဲ" ဟု မာစီက ပြောကြားခဲ့သည်။

ထို့ပြင် ဒီမိုကရေစီ၏ ကောင်းမွန်သည့် အခြေခံ သဘောတရားများနှင့် နိုင်ငံရေး လုပ်ငန်းစဉ်များအောက်တွင် နေထိုင်သော မျိုးဆက်သစ်လူငယ်များ၏ အနာဂတ်ကို ပျောက်ကွယ် သွားစေနိုင်သည်ဟုလည်း ၎င်းက ပြောကြား ခဲ့သည်။

 မာစီ ခရစ္စတီ ဘာရန်းစ်ကို တွေ့ရစဉ်

MFP သည် တော်ဝင်အသရေဖျက်မှုဥပဒေကို ပြုပြင်ပြောင်းလဲရန် ရည်ရွယ်ခဲ့သည်ဟုဆိုကာ ရွေးကောက်ပွဲ ကော်မရှင်က ဖွဲ့စည်းပုံအခြေခံဥပဒေဆိုင်ရာခုံရုံးအား တိုင်ကြားစာ တင်ခဲ့ပြီးနောက် MFP သည် ဖျက်သိမ်းခံမည့် အခြေအနေနှင့် ရင်ဆိုင်နေရသည်။

အကယ်၍  MFP ကို ဖျက်သိမ်းရန် တရားရုံး အမှုအခင်းကို ဆက်လက် လုပ်ဆောင်မည်ဆိုပါက ထိုင်းနိုင်ငံ၏ ဂုဏ်သတင်းကို ဆိုးရွားစွာ ထိခိုက်စေနိုင်သည်ဟုလည်း မာစီက Thai PBS World နှင့်ပြုလုပ်သည့် အင်တာဗျူး တွင် ပြောကြားခဲ့သည်။

"တကယ်လို့ ဒီမိုကရေစီက ဆက်လက် ကျဆင်းသွားမယ်ဆိုရင် နိုင်ငံတကာမှာ လက်ရှိ ထိုင်းအစိုးရအဖွဲ့ရဲ့ ဂုဏ်သတင်းအပေါ် ကြီးမားစွာ သက်ရောက်စေနိုင်ပြီး နိုင်ငံ့စီးပွားရေးကိုလည်း ထိခိုက်စေပါလိမ့်မယ်" ဟု ၎င်းက ပြောသည်။

မာစီ ခရစ္စတီ ဘာရန်းစ်နဲ့ Thai PBS အင်တာဗျူးလုပ်နေစဉ်

MFP ၏အမှုသည် ပြည်တွင်းရေးကိစ္စ ဖြစ်နေသည့်တိုင် ပါတီဖျက်သိမ်းခံရမည့် အခြေအနေသည် ဒေသတွင်း နိုင်ငံရေး၊ ဒီမိုကရေစီနှင့် ဂေဟစနစ်များ၏ အခြေခံ သဘောတရားများ ယုတ်လျော့ကျဆင်းစေမည့် အခြေအနေ အထိ ဖြစ်လာနိုင်သည်ဟုလည်း APHR ဥက္ကဋ္ဌက ပြောသည်။

နိုင်ငံတကာ အဖွဲ့အစည်းများနှင့် အစိုးရများအနေဖြင့် ဒေသတွင်း ဒီမိုကရေစီ၏ စံတန်ဖိုးများနှင့် နိုင်ငံရေး တရားမျှတမှုတို့ကို ထိန်းသိမ်းသင့်ကြောင်း၊ အဘယ်ကြောင့်ဆိုသော် ထိုင်းနိုင်ငံတွင် ဖြစ်ပွားနေသည့် MFP ၏ အမှုသည် ဒီမိုကရေစီ ယုတ်လျော့လာသည့် ရှင်းလင်းသော လက္ခဏာတစ်ရပ်ဖြစ်ကြောင်း မာစီက ပြောကြားခဲ့ သည်။

MFP သည် ၂၀၂၃ ခုနှစ် အထွေထွေရွေးကောက်ပွဲတွင် နေရာအများဆုံး အနိုင်ရခဲ့သော်လည်း တော်ဝင်အသရေ ဖျက်မှုဥပဒေကို ပြင်ဆင်လိုသည့် ရည်ရွယ်ချက်ကြောင့် အထက်လွှတ်တော်၏ ထောက်ခံမှုကို မရခဲ့ဘဲ အစိုးရ ဖွဲ့နိုင်ခဲ့ခြင်းမရှိကာ အတိုက်အခံအဖြစ်နှင့်သာ ရပ်တည်ခဲ့ရသည်။

Source: Thai PBS World

CNI International News

တိုင်ပေ၊ ဇူလိုင် ၂

တရုတ်နှင့်ထိုင်ဝမ်အကြား တင်းမာမှုများ မြင့်တက်နေချိန်တွင် ထိုင်ဝမ်က Tuo Chiang အမျိုးအစား Corvette သင်္ဘောနှစ်စင်းကို ရေတပ်သို့ တပ်တော်ဝင် အခမ်းအနားနှင့်တကွ တာဝန်အပ်နှင်းမှု ပြုလုပ်မည်ဟု The Print သတင်းဝက်ဘ်ဆိုက်မှ ဖော်ပြခဲ့သည်။

တရုတ်၏ ရန်လိုမှုများကို ဆန့်ကျင်ရန် ထိုင်ဝမ်သည် ၎င်း၏ရေတပ် ကာကွယ်ရေးကဏ္ဍအား မြှင့်တင်သည့် အနေဖြင့် An Chiang နှင့် Wan Chiang အမည်ရှိ Corvette သင်္ဘောနှစ်စင်းကို ယခုသီတင်းပတ်အတွင်း တပ်တော်ဝင် အခမ်းအနား ပြုလုပ်မည်ဟု ထိုင်မ်စစ်တပ်အရာရှိတစ်ဦးက ကြေညာခဲ့သည်။

ထိုသင်္ဘောများသည် ဇူလိုင် ၃ ရက်တွင် တပ်တော်ဝင် အခမ်းအနား ပြုလုပ်ပြီးနောက် တိုက်ပွဲဝင်ကင်းလှည့်မှု မစ်ရှင်များ ပြုလုပ်လိမ့်မည်ဖြစ်ကြောင်း Liberty Times ၏သတင်းကို ကိုးကားပြီး Taiwan News မှ ဖော်ပြခဲ့ သည်။

ထိုင်ဝမ်၏ ရေပြင်များအတွင်း တရုတ်ရေတပ်၏ ကျူးကျော် ဝင်ရောက်မှုများကို တန်ပြန်ရန် ထို Corvette သင်္ဘောများတွင် Hsiung Feng II နှင့် Hsiung Feng III သင်္ဘောဖျက် ဒုံးကျည်များ တပ်ဆင်ထားကြောင်း သိရသည်။

 Chiang corvettes စစ်သင်္ဘောကို ထိုင်ဝမ်သမ္မတဟောင်း ဆိုင်အင်ဝမ် စစ်ဆေးနေစဉ်

An Chiang နှင့် Wan Chiang အမည်ရှိ Corvette သင်္ဘောနှစ်စင်း တပ်တော်ဝင်ပြီးချိန်တွင် ထိုင်ဝမ်ရေတပ်၌ Tuo Chiang အမျိုးအစား Corvette သင်္ဘော ၇ စင်းအထိ ရှိလာတော့မည်ဖြစ်သည်။

ထိုင်ဝမ်ရေတပ်၏ အစီအစဉ်အရ ဒုတိယအသုတ် Corvette သင်္ဘော ၅ စင်းအတွက် ဒုံးကျည်များ တပ်ဆင်မှုကို ပြုပြင်ပြောင်းလဲမှုများ ပြုလုပ်ဖွယ်ရှိနေသည်။

အစောပိုင်းက ထိုင်ဝမ်ရေတပ်သည် သက်တမ်း အိုဟောင်းနေပြီဖြစ်သည့် Ching Chiang အမျိုးအစား ကင်းလှည့် သင်္ဘောများ၏ နေရာတွင် Corvette သင်္ဘောများဖြင့် အစားထိုးရန် စီစဉ်ခဲ့ခြင်းဖြစ်သည်။

သို့သော် တရုတ်ရေတပ်၏ လှုပ်ရှားမှုများ မြင့်တက်လာသဖြင့် ထိုင်ဝမ်ရေတပ်သည် တရုတ်ရေတပ်နှင့် သင်္ဘော တစ်စင်းချင်းစီ ယှဉ်ပြိုင်နိုင်ရန်အတွက် မဟာဗျူဟာအသစ် ချမှတ်ခဲ့သည်။

ထိုမဟာဗျူဟာတွင် သက်တမ်းရင့်နေပြီဖြစ်သည့် သင်္ဘောများကို အနားမပေးဘဲ နောက်ထပ် သင်္ဘောအသစ်များ ထပ်မံထုတ်လုပ်ပြီး ရေတပ်ကို သင်္ဘောများ ပိုမိုဖြန့်ကြက်ရန် စီစဉ်ခဲ့ခြင်းဖြစ်သည်။

Source: The Print