CNI International News

ဘန်ကောက်၊ သြဂုတ် ၃၁

စစ်တပ်နှင့် ဆက်နွှယ်သော ပါတီများဖြင့် ညွန့်ပေါင်းအစိုးရဖွဲ့ရန် ဆုံးဖြတ်ခဲ့သဖြင့် ဖြူးထိုင်းပါတီ ခေါင်းဆောင် ဒေါက်တာ ချိုနန် သီရိကော (Cholnan Srikaew) က သြဂုတ် ၃၀ ရက်တွင် ပါတီခေါင်းဆောင်ရာထူးနေရာမှ နုတ်ထွက်ခဲ့သည်ဟု ဘန်ကောက်ပို့စ်တွင် ဖော်ပြထားသည်။ 

၎င်း၏ ကတိစကားကိုတည်ကြောင်း ပြသသည့်အနေဖြင့် ယခုကဲ့သို့ နုတ်ထွက်ခဲ့ခြင်းဖြစ်သည်။

Nan ပြည်နယ်မှ ဝါရင့်နိုင်ငံရေးသမားတစ်ဦးဖြစ်သူ ချိုနန်သည် ရွေးကောက်ပွဲမတိုင်မီ ဧပြီ ၂၈ ရက်က ဖြူးထိုင်းပါတီအတွက် မဲဆွယ်စည်းရုံးခဲ့ချိန်တွင် ၎င်း၏ပါတီသည် စစ်တပ်နှင့်ဆက်နွှယ်သည့် PPRP (Palang Pracharath) ပါတီနှင့် ညွန့်ပေါင်းအစိုးရဖွဲ့မည်ဆိုလျှင် ပါတီမှ နုတ်ထွက်မည်ဟု ကတိပြုခဲ့ခြင်းဖြစ်သည်။

ရာထူးမှ ထွက်ခွာတော့မည့် ဗိုလ်ချုပ်ကြီး ပရာဝပ် ဝေါင်ဆူဝမ် (Prawit Wongsuwon) နှင့် ဝန်ကြီးချုပ်ဟောင်း ပရာယွတ် ချန်အိုချာ (Prayut Chan-o-cha) တို့ဦးဆောင်သည့် ပါတီတို့ ညွန့်ပေါင်းအစိုးရအဖွဲ့ထဲတွင် နေရာရ လိမ့်မည်ဟု ထင်ကြေးပေးခံထားရသည်။

ဖြူးထိုင်းပါတီခေါင်းဆောင် ဒေါက်တာ ချိုနန်သီရိကောကို တွေ့ရစဉ်(gettyimages)

အသက် ၆၂ နှစ်အရွယ် ဆရာဝန်တစ်ဦးဖြစ်သည့် ချိုနန်က ပါတီမှ နုတ်ထွက်မှုသည် ၎င်း၏ လွှတ်တော်အမတ် နေရာအပေါ် သက်ရောက်မှုရှိမည်မဟုတ်ကြောင်းလည်း ပြောသည်။
ထို့အပြင် ချိုနန်သည် ညွန့်ပေါင်းအစိုးရအဖွဲ့အတွင်း ပြည်သူ့ကျန်းမာရေးဝန်ကြီးအဖြစ် ခန့်အပ်ခံရလိမ့်မည်ဟု ယူဆခံထားရသူလည်းဖြစ်သည်။

ထို့နောက် ဖြူးထိုင်းပါတီ၏ လက်ထောက်ခေါင်းဆောင် ချူဆက် သီရိနီလ် (Chusak Sirinil) သည် ပါတီခေါင်းဆောင်ရာထူးကို ယာယီတာဝန်ထမ်းဆောင်မည်ဖြစ်ကြောင်း ပါတီအတွင်းရေးမှူးချုပ် ပရာဆက် ချန်သာရာရွန်သွန်း (Prasert Chanthararuangthong) က ပြောသည်။

ဝန်ကြီးချုပ်ဟောင်းပရာယွတ်နဲ့ ဗိုလ်ချုပ်ကြီး ပရာဝပ်ကို တွေ့ရစဉ်(gettyimages)

လာမည့်ရက်ပေါင်း ၆၀ အတွင်း ပါတီခေါင်းဆောင်သစ်တစ်ဦးရွေးချယ်ပြီး အမှုဆောင် ဘုတ်အဖွဲ့ အစည်းအဝေးကျင်းပသွားမည်ဟုလည်း ၎င်းကဆက်လက်ပြောကြားသည်။

ဖြူးထိုင်းပါတီသည် အစိုးရအဖွဲ့အတွင်း နေရာ ၁၇ နေရာရရှိမည်ဖြစ်ပြီး အစိုးရအဖွဲ့၏ ဖွဲ့စည်းပုံကို အပြီးသတ် ရေးဆွဲခဲ့ပြီး ဖြစ်သည့်အတွက် ၎င်း၏ နုတ်ထွက်မှုသည် အချိန်မှန်ကန်ကြောင်း ဒေါက်တာ ချိုနန်က ပြောကြားခဲ့သည်။

"တာဝန်တွေကို အပြီးသတ်လုပ်ဆောင်ခဲ့ပြီးပါပြီ။ ဖြူးထိုင်းပါတီအနေနဲ့ PPRP (Palang Pracharath) ပါတီနဲ့ အစိုးရဖွဲ့မယ်ဆိုရင် ပါတီခေါင်းဆောင်ရာထူးနေရာက ထွက်မယ်ဆိုတဲ့ ကျွန်တော့်ရဲ့ ကတိကို တည်ကြောင်း ပြသခဲ့ပြီးပါပြီ" ဟု ချိုနန်က ပြောသည်။

သြဂုတ် ၂၁ ရက်က ဖြူးထိုင်းပါတီသည် ညွန့်ပေါင်းမဟာမိတ်အသစ်ကို ကြေညာခဲ့ပြီးနောက် ဒေါက်တာချိုနန်ကို ပါတီခေါင်းဆောင်ရာထူးမှ နုတ်ထွက်ရန် နိုင်ငံရေးပြိုင်ဘက်များက ဖိအားပေးတောင်းဆိုခဲ့ခြင်းဖြစ်သည်။

မည်သို့ပင်ဆိုစေ ချိုနန်က အစိုးရအဖွဲ့သစ်၏ ဖွဲ့စည်းပုံကို အပြီးသတ်ရေးဆွဲပြီးသည့်အချိန်အထိ ပါတီ ခေါင်းဆောင်အဖြစ် ဆက်လက်တာဝန်ထမ်းဆောင်မည်ဟု ပြောကြားခဲ့ပြီး သြဂုတ် ၃၀ ရက်တွင် ယခုကဲ့သို့ ရာထူးမှ နုတ်ထွက်ကြောင်း ကြေညာခဲ့ခြင်းဖြစ်သည်။

Source:ဘန်ကောက်ပို့စ်

CNI International News 

ဆော်ပိုလို၊ သြဂုတ် ၃၁

ဝဂ်နာအုပ်စု အကြီးအကဲ ယက်ဗ်ဂျီနီ ပရီဂေါ့ဇင် (Yevgeny Prigozhin) သေဆုံးခဲ့သည့် ဂျက်လေယာဉ် ပျက်ကျမှုကို နိုင်ငံတကာဥပဒေများအရ စုံစမ်းစစ်ဆေးမည်မဟုတ်ကြောင်း ရုရှားအစိုးရက ဘရာဇီးနိုင်ငံ၏ လေယာဉ် စုံစမ်းစစ်ဆေးရေး အာဏာပိုင်အဖွဲ့ကို အကြောင်းကြားခဲ့သည်ဟု ရိုက်တာမှ ဖော်ပြခဲ့သည်။

ဝဂ်နာသည် ရုရှားနိုင်ငံက ကြေးစားစစ်သားငှားရမ်းသည့် အုပ်စုဖြစ်ပြီး ပျက်ကျခဲ့သည့် ဂျက်လေယာဉ်မှာ ဘရာဇီးနိုင်ငံလုပ် Embraer ဖြစ်သည်။

ပြီးခဲ့သည့် သီတင်းပတ်က မော်စကိုမြို့တော် မြောက်ပိုင်းတွင် Embraer Legacy 600 လေယာဉ်ပျက်ကျမှု၌ ပရီဂေါ့ဇင်နှင့်အတူ ဝဂ်နာအုပ်စု၏ ဗိုလ်နှစ်ဦး၊ သက်တော်စောင့်လေးဦး အပါအဝင် လူ ၁၀ ဦးသေဆုံးခဲ့သည်။

ပရီဂေါ့ဇင်သည် ၁၉၉၉ ခုနှစ်ကတည်းက အာဏာရလာခဲ့သည့် ရုရှားသမ္မတ ဗလာဒီမာ ပူတင် (Vladimir Putin) ကို ဆန့်ကျင်သည့် တစ်ရက်ကြာ ပုန်ကန်မှုအပြီး နှစ်လနီးပါးအကြာတွင် လေယာဉ်ပျက်ကျ၍ သေဆုံးခဲ့ခြင်း ဖြစ်သည်။

PMC Wagner ရုံးရှေ့မှ ပရီဂေါ့ဇင်တို့အတွက် အောက်မေ့ဖွယ်မြင်ကွင်း(gettyimages)

၎င်းလေယာဉ်ပျက်ကျမှုအား နိုင်ငံတကာ ဥပဒေများအောက်တွင် စုံစမ်းစစ်ဆေးရန် ဖိတ်ကြားခံရမည်ဆိုပါက ရုရှားဦးဆောင်သည့် စုံစမ်းစစ်ဆေးမှုကို ပူးပေါင်းပါဝင်မည်ဟု ဘရာဇီး၏ လေကြောင်း မတော်တဆမှု တားဆီးရေးနှင့် သုတေသနစင်တာ (CENIPA) က ပြောကြားခဲ့သည်။ 

သို့သော် ရုရှား၏ လေကြောင်းအာဏာပိုင်အဖွဲ့မှ CENIPA ကို ဖိတ်ကြားခဲ့ခြင်းမရှိခဲ့ဘဲ သြဂုတ် ၂၃ ရက်က ဖြစ်ပွားခဲ့သည့် Embraer Legacy 600 လေယာဉ်ပျက်ကျမှုနောက်ကွယ်၌ ရုရှားအစိုးရ ရှိနေနိုင်သည်ဟု အမေရိကန်နှင့် အခြား အနောက်နိုင်ငံများမှ အစိုးရများက သံသယရှိနေကြသည်။

ရုရှားအစိုးရအနေဖြင့် ထိုလေယာဉ်ပျက်ကျမှုတွင် ပါဝင်ပတ်သက်ခြင်းမရှိကြောင်း ငြင်းဆိုခဲ့သည်။

ပရီဂေါ့ဇင်သည် ယူကရိန်းစစ်ပွဲအတွင်း ရုရှားစစ်တပ်၏ စွမ်းဆောင်ရည်များအပေါ် လူသိရှင်ကြား ဝေဖန်ခဲ့သူဖြစ်သည်။ 

ဝဂ်နာကြေးစားစစ်သားများသည် ယူကရိန်းစစ်ပွဲတွင် ရုရှားစစ်သားများဘက်မှ ပါဝင်တိုက်ခိုက်ပေးခဲ့သည်။

ပျက်ကျသွားသည့် Embraer Legacy 600 လေယာဉ် အစိတ်အပိုင်းတစ်ခု(gettyimages)

ကနေဒါနိုင်ငံ မွန်ထရီယယ်မြို့ အခြေစိုက် နိုင်ငံတကာ မြို့ပြလေကြောင်း အဖွဲ့ (ICAO) ၏ အဆိုအရ Embraer Legacy 600 လေယာဉ်သည် မော်စကိုမှ စိန့် ပီတာစဘတ်ချ်မြို့သို့ ပျံသန်ချိန်အတွင်း ပျက်ကျခဲ့သဖြင့် ပြည်တွင်းလေကြောင်းခရီးစဉ် ပျက်ကျမှုဖြစ်ကာ နိုင်ငံတကာ ဥပဒေများအရ စုံစမ်းစစ်ဆေးစရာမလိုကြောင်း သိရသည်။

ထိုလေယာဉ်ပျက်ကျမှုကို နိုင်ငံတကာဥပဒေများဖြင့် မဖြစ်မနေ စုံစမ်းစစ်ဆေးရန်မလိုသော်လည်း ရုရှား အနေဖြင့် နိုင်ငံတကာဥပဒေများအောက်တွင် စုံစမ်းစစ်ဆေးမှုများ ပြုလုပ်ရန် ခွင့်ပြုမည်ဆိုပါက မိမိတို့ ပူးပေါင်း ပါဝင်သွားမည်ဟု CENIPA အကြီးအကဲ မာဆယ်လို မိုရီနို (Marcelo Moreno) က ပြောကြားခဲ့သည်။

ရုရှား၏ ပြည်တွင်း စုံစမ်းစစ်ဆေးမှုတွင် ပျက်ကျခဲ့သည့် လေယာဉ်ကို ထုတ်လုပ်ခဲ့သည့် ဘရာဇီးနိုင်ငံ ပါဝင်ခြင်းမရှိခဲ့သဖြင့် မေးခွန်းထုတ်စရာ ဖြစ်နေသည်ဟုလည်း အမေရိကန် လေကြောင်း လုံခြုံရေး အတိုင်ပင်ခံပုဂ္ဂိုလ် ဂျွန်ကော့စ် (John Cox) က ပြောသည်။

CNI International News

ဘန်ကောက်၊ သြဂုတ် ၃၀

ဖခင်ဖြစ်သူ သက်ဆင်ရှင်နာဝပ် (Thaksin Shinawatra) ၏ နှလုံးရောဂါအခြေအနေကို စိုးရိမ်ရကြောင်း သမီးဖြစ်သူ ပေတုန်တန် ရှင်နာဝပ် (Paetongtarn Shinawatra) က သြဂုတ် ၃၀ ရက်တွင် ပြောကြားခဲ့သည်ဟု ဘန်ကောက်ပို့စ်တွင် ဖော်ပြခဲ့သည်။

သို့သော် သက်ဆင်အနေဖြင့် ပုဂ္ဂလိကဆေးရုံသို့ ပြောင်းရွှေ့မည် မဟုတ်ဘဲ ရဲတပ်ဖွဲ့ အထွေထွေ ဆေးရုံတွင်သာ ဆက်လက် ကုသမှုခံယူမည်ဟုလည်း သမီးဖြစ်သူ ပေတုန်တန်က ပြောသည်။

ပေတုန်တန်သည် သြဂုတ် ၂၉ ရက် နံနက်ပိုင်းက ရဲတပ်ဖွဲ့ဆေးရုံရှိ သက်ဆင်ဆီသို့ နောက်တစ်ကြိမ် သွားရောက် ခဲ့သည်။ 

ထို့နောက် ဖြူးထိုင်းပါတီဌာနချုပ်၌ သတင်းထောက်များနှင့် တွေ့ဆုံခဲ့ချိန်တွင် ဖခင်သည် မောပန်းနွမ်းနယ်နေ သော်လည်း ၎င်းအား စကားပြန်ပြောနိုင်ကြောင်း ပြောကြားခဲ့သည်။

ပြည်တော်ပြန် ရောက်ရှိလာသည့် သက်ဆင်အား တွေ့ရစဉ်(AP)

"အဖေ့ရဲ့ နှလုံးရောဂါကို ကျွန်မ စိုးရိမ်မိပါတယ်။ သူ့မှာ အဆုတ်ရောဂါလည်း ရှိနေပါတယ်။ ဒါပေမယ့် အဲဒါဟာ အရင်က ဖြစ်ခဲ့တဲ့ ရောဂါဖြစ်ပြီး အရမ်းမဆိုးပါဘူး။ နှလုံးရောဂါကို ကျွန်မ ပိုပြီး စိုးရိမ်ပါတယ်"ဟု ပေတုန်တန်က ပြောသည်။ 

သက်ဆင်သည် ထိုင်းသို့ ပြန်လည်ရောက်ရှိခဲ့ချိန်ကတည်းက ပင်ပန်းနေပြီး စိတ်ဖိစီးမှုကို ခံစားခဲ့ရကြောင်းလည်း ၎င်းက ဆက်လက်ပြောကြားသည်။

သက်ဆင်သည် အစောပိုင်းက Covid-19 ကူးစက်ခံခဲ့ရပြီး ဆေးဝါးကုသမှုခံယူခဲ့ရကြောင်း၊ ကိုဗစ်ကူးစက်ခံခဲ့ရ ချိန်တွင် သက်ဆင်သည် ဆေးရုံ၏ အထူးကြပ်မတ်ကုသဆောင်၌ ၉ ရက်ကြာ ကုသမှုခံယူခဲ့ရပြီး ဆေးရုံတွင် တစ်လနေခဲ့ရကြောင်းနှင့် လက်ရှိအချိန်အထိ သက်ဆင်၏ အဆုတ်သည် ကိုဗစ်ကြောင့် ထိခိုက်မှုများ ရှိနေဆဲ ဖြစ်ကြောင်း ပေတုန်တန်ကပြောကြားခဲ့သည်။ 

သက်ဆင်၏ စိတ်ပိုင်းဆိုင်ရာ အခြေအနေသည် ကြံ့ခိုင်နေဆဲဖြစ်ပြီး မိမိနှင့် တွေ့ရှိချိန်တွင် အလွန် ပျော်ရွှင်နေ ကြောင်းနှင့် ပုဂ္ဂလိကဆေးရုံသို့ ပြောင်းရွှေ့ရန် အစီအစဉ်မရှိဘဲ ရဲတပ်ဖွဲ့ဆေးရုံမှာပင် ဆက်လက် ကုသမှု ခံယူမည်ဖြစ်ကြောင်း ပေတုန်တန်က ပြောသည်။

နိုင်ငံရေးသမားတစ်ဦးဖြစ်သူ သီရိဆုဝမ် ဂျန်ယာအား တွေ့ရစဉ် (Thai PBS)

သက်ဆင်အနေဖြင့် ထိုင်းဘုရင်ထံမှ တော်ဝင်လွတ်ငြိမ်းချမ်းသာခွင့်ရရှိရန် တောင်းဆိုမည် ဟုတ်၊ မဟုတ် သတင်းထောက်များမှ မေးမြန်းရာတွင် လွတ်ငြိမ်းချမ်းသာခွင့်နှင့်ပတ်သက်၍ ဖခင်ဖြစ်သူ ကိုယ်တိုင်ဆုံးဖြတ် လိမ့်မည်ဖြစ်ကြောင်းနှင့် ၎င်း၏ ဆုံးဖြတ်ချက်အတိုင်း မိသားစုက သဘောတူကြောင်း ပြန်လည်ဖြေကြားခဲ့ သည်။

သက်ဆင်၏ ကျန်းမာရေးအခြေအနေသည် အမှန်တကယ် စိုးရိမ်ရခြင်း ရှိ၊ မရှိနှင့် အကျဉ်းထောင်တွင် မဟုတ်ဘဲ ဆေးရုံတွင် ကုသမှုခံယူရန် သင့်၊ မသင့်ကို စုံစမ်းစစ်ဆေးပေးရန် အစိုးရက ခန့်ထားသော အရာရှိထံ (Ombudsman) လျှောက်ထားစာ တင်သွင်းရန် စီစဉ်နေသည်ဟု နိုင်ငံရေးသမားတစ်ဦးဖြစ်သူ သီရိဆုဝမ် ဂျန်ယာ (Srisuwan Janya) က ပြောကြားခဲ့သည်။

ထို့အပြင် ၎င်းတင်သွင်းမည့် လျှောက်ထားစာထဲတွင် အစိုးရဌာနများအပေါ် မကျေနပ်ချက်များအားလည်း စုံစမ်းတင်ပြရန်ဆိုသည့်အချက်လည်း ပါရှိကြောင်း သိရသည်။

သက်ဆင်သည် ပြည်ပြေး ဘဝဖြင့် ၁၅ နှစ်ကြာ ပြည်ပတွင် နေထိုင်ခဲ့ပြီးနောက် သြဂုတ် ၂၂ ရက်တွင် ထိုင်းနိုင်ငံသို့ ပြန်လည်ရောက်ရှိခဲ့ခြင်းဖြစ်သည်။ 

ထိုင်းသို့ ပြန်ရောက်သည့်နေ့မှာပင် တရားရုံးချုပ်က သက်ဆင်ကို ဆင့်ခေါ်ကာ ပြစ်မှုဆိုင်ရာ စွဲချက်များနှင့် ပတ်သက်၍ ထောင်ဒဏ် ၈ နှစ်ချမှတ်ခံခဲ့ရသည်။

သက်ဆင် ထောင်ဒဏ်ကျခံရသည့် ညမှာပင် သွေးတိုးရောဂါနှင့် အခြားရောဂါ ဝေဒနာများကြောင့် Bangkok Remand အကျဉ်းထောင်မှ ရဲတပ်ဖွဲ့ဆေးရုံသို့ ပြောင်းရွှေ့ပြီး ဆေးဝါးကုသမှု ခံယူခဲ့ရခြင်းဖြစ်သည်။

Source: ဘန်ကောက်ပို့

CNI International News

ဆိုးလ်၊ သြဂုတ် ၃၀

မြောက်ကိုရီးယားစစ်တပ်အနေဖြင့် အမေရိကန်ဦးဆောင်သည့် ကျူးကျော်ရေး အစီအစဉ်များကို ချေမှုန်းရေးအတွက် အသင့်ပြင်ထားရန် မြောက်ကိုရီးယားခေါင်းဆောင်ကင်မ်ဂျုံအန် (Kim Jong-Un) က တိုက်တွန်းခဲ့ကြောင်း အေပီ သတင်းတွင် ဖော်ပြခဲ့သည်။

အမေရိကန်၊ တောင်ကိုရီးယားနှင့် ဂျပန်တို့သည် မြောက်ကိုရီးယား၏ နျူကလီးယားခြိမ်းခြောက်မှုကို ရင်ဆိုင်ရန် သုံးပွင့်ဆိုင် ရေတပ် စစ်ရေးလေ့ကျင့်မှုများ ပြုလုပ်နေချိန်တွင် ကင်မ်၏ တိုက်တွန်းချက် ထွက်ပေါ်ခဲ့ခြင်း ဖြစ်သည်ဟု နိုင်ငံပိုင် KCNA သတင်းအေဂျင်စီက ဖော်ပြထားသည်။ 

အမေရိကန်နှင့် တောင်ကိုရီးယား စစ်တပ်များသည် ပြီးခဲ့သည့် သီတင်းပတ်ကတည်းက သီးခြားစစ်ရေး လေ့ကျင့်မှုအား ပြုလုပ်ခဲ့ခြင်းဖြစ်သည်။

မြောက်ကိုရီးယားအနေဖြင့် ၎င်း စစ်ရေးလေ့ကျင့်မှုများသည် ကျူးကျော်ရန် အစမ်းလေ့ကျင့် ပြင်ဆင်နေခြင်း ဖြစ်သည်ဟု ရှုမြင်ထားပြီး အမေရိကန်ကမူ ၎င်းတို့၏ စစ်ရေးလေ့ကျင့်မှုများသည် ခုခံရေးအတွက်သာ ဖြစ်သည်ဟု ပြောသည်။

ကင်မ်သည် သြဂုတ် ၂၈ ရက်တွင် ကျရောက်သည့် မြောက်ကိုရီးယားတပ်မတော်၏ ရေတပ်နေ့ အထိမ်းအမှတ် အခမ်းအနားအဖြစ် မိန့်ခွန်းပြောကြားရာတွင် အမေရိကန်ဦးဆောင်သည့် ရန်လိုမှုများကြောင့် ကိုရီးယား ကျွန်းဆွယ်၏ ကမ်းလွန်ရေပြင်များသည် နျူကလီးယားစစ်ပွဲဖြစ်ပွားမည့် အန္တရာယ်နှင့်အတူ တည်ငြိမ်မှု ယိုယွင်းလာသည်ဟု ပြောကြားခဲ့သည်။

တောင်ကိုရီးယားစစ်တပ် အထူးစစ်ဆင်ရေးကွပ်ကဲမှု အဖွဲ့ဝင်အချို့ကိုတွေ့ရစဉ်(AP)

အမေရိကန်သည် မကြာသေးမီက ကိုရီးယားကျွန်းဆွယ်အနီးရှိ ရေပြင်များတွင် အင်အားကြီးမားသည့် စစ်လက်နက်ပစ္စည်းများကို ဖြန့်ကြက်ချထားခဲ့သည်ဟုလည်း ကင်မ်က ပြောကြားခဲ့သည်။

မကြာသေးမီက အမေရိကန်၊ ဂျပန်နှင့် တောင်ကိုရီးယားတို့ သုံးပွင့်ဆိုင်အစည်းအဝေးပြုလုပ်ခဲ့ပြီး မြောက်ကိုရီးယား၏ နျူကလီးယားအစီအစဉ်ကို တန်ပြန်ရေးအတွက် ကာကွယ်ရေး ပူးပေါင်းဆောင်ရွက်မှု များကို မြှင့်တင်ရန်သဘောတူညီခဲ့ကြသည်။

သို့သော် ကင်မ်က အမေရိကန်သမ္မတ ဂျိုးဘိုင်ဒန် (Joe Biden) ၊ တောင်ကိုရီးယားသမ္မတ ယွန်ဆော့ခ်ယွဲ (Yoon Suk Yeol) နှင့် ဂျပန်ဝန်ကြီးချုပ် ဖူမီယို ကီရှီဒါ (Fumio Kishida) တို့သည် လူဆိုးဂိုဏ်းခေါင်းဆောင်များ ဖြစ်သည်ဟု ပြောကြားခဲ့သည်။

ကင်မ်ဂျုံအန်နှင့် သမီးဖြစ်သူတို့ ရေတပ်ဌာနချုပ်သို့ သွားရောက်စဉ်(AP)

"လက်ရှိဖြစ်ပေါ်နေတဲ့ အခြေအနေအရ ကျွန်တော်တို့ ရေတပ်ဟာ စစ်ပွဲအတွက် စဉ်ဆက်မပြတ် တပ်လှပ် နှိုးဆော်ထားမှုအခြေအနေကို ထိန်းသိမ်းထားဖို့လိုအပ်ပြီး ရန်သူတွေရဲ့ စစ်ရေးဆန္ဒကို ရိုက်ချိုးဖို့ အသင့်ပြင် ထားရပါလိမ့်မယ်"ဟု ကင်မ်က ပြောသည်။

သြဂုတ် ၂၉ ရက်တွင် တောင်ကိုရီးယား၊ အမေရိကန်နှင့် ဂျပန်နိုင်ငံများသည် တောင်ကိုရီးယား၏ ဂျယ်ဂျူကျွန်း ကမ်းလွန်ရေပြင်များတွင် စစ်ရေးလေ့ကျင့်မှုများ ပြုလုပ်ခဲ့ပြီး အဆိုပါ စစ်ရေးလေ့ကျင့်မှုများတွင် သုံးနိုင်ငံလုံး၏ ရေတပ်များမှ ဖျက်သင်္ဘောများလည်း ပါဝင်ခဲ့သည်။

Source: အေပီ

CNI International News

ဝါရှင်တန်၊ သြဂုတ် ၃၀ 

ရုရှားသည် အမေရိကန်၏ သံရုံးဝန်ထမ်းများအား ခြိမ်းခြောက်ရန်ကြိုးပမ်းနေသည်ဟု အမေရိကန်က စွပ်စွဲခဲ့ကြောင်း အယ်လ်ဂျာဇီးယားတွင် ဖော်ပြခဲ့သည်။

အမေရိကန် ကောင်စစ်ဝန်ရုံး၏ ဝန်ထမ်းဟောင်းတစ်ဦးသည် အမေရိကန်ကိုယ်စား ယူကရိန်းစစ်ပွဲနှင့် ပတ်သက်သော သတင်းအချက်အလက်များအား စုဆောင်းမှုဖြင့် ဖမ်းဆီးထိန်းသိမ်းခံရကြောင်း ရုရှားနိုင်ငံပိုင် မီဒီယာက ဖော်ပြခဲ့ပြီးနောက်တွင် ယခုကဲ့သို့ အမေရိကန်၏ စွပ်စွဲချက်ထွက်ပေါ်ခဲ့ခြင်းဖြစ်သည်။

ရုရှားနိုင်ငံသားဖြစ်သည့် ရောဘတ် ရှိုနော့ဗ် (Robert Shonov) အမည်ရှိ အမျိုးသားသည် ယူကရိန်းစစ်ပွဲအတွက် ရုရှား၏ စစ်မှုထမ်းဥပဒေနှင့် ပတ်သက်သည့် အချက်အလက်များအား မော်စကိုမြို့တော်ရှိ အမေရိကန်သံရုံးသို့ ထောက်ပံ့ပေးခဲ့သည်ဟု ရုရှား၏ FSB ထောက်လှမ်းရေးအဖွဲ့က ပြောကြားခဲ့ကြောင်း ရုရှားနိုင်ငံပိုင် တာ့စ် သတင်းဌာနက ဖော်ပြခဲ့သည်။

ဖမ်းဆီးခံထားရသည့် မစ္စတာရောဘတ် ရှိုနော့ဗ်အား တွေ့ရစဉ်(The Moscow Times)

၎င်းလုပ်ဆောင်မှုကြောင့် ရုရှားတွင် ကျင်းပမည့် ၂၀၂၄ ခုနှစ် သမ္မတရွေးကောက်ပွဲမတိုင်မီ နိုင်ငံအတွင်း၌ နိုင်ငံရေးအရ သဘောထားကွဲလွဲမှုများကို ဖြစ်ပွားစေခဲ့သည်ဟု ရုရှားအာဏာပိုင်များက ပြောသည်။

မစ္စတာ ရှိုနော့ဗ်ကို ပြည်ပနိုင်ငံနှင့် လျှို့ဝှက်ပူးပေါင်းဆောင်ရွက်မှုဖြင့် တရားစွဲဆိုထားပြီး ပြစ်မှုထင်ရှားကြောင်း စီရင်ခံရမည်ဆိုပါက ထောင်ဒဏ် ၈ နှစ်အထိ ချမှတ်ခံရနိုင်သည်။

FSB ဌာနချုပ်ရှေ့တွင် အမျိုးသားများ လမ်းလျှောက်နေကြစဉ်(AFP)

လျှို့ဝှက်ပူးပေါင်းဆောင်ရွက်မှုဆိုသည့် ခေါင်းစဉ်အောက်တွင် ရှိုနော့ဗ်ကို ပစ်မှတ်ထား ဖမ်းဆီးခြင်းသည် ရုရှားအစိုးရအနေဖြင့် ၎င်း၏နိုင်ငံသားများကိုပင် ဖိနှိပ်နေသည့် လုပ်ရပ်အား ဖော်ပြရာ ရောက်ကြောင်း အမေရိကန် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မက်သရူး မီလာ (Matthew Miller) က သြဂုတ် ၂၈ ရက်တွင်ပြောကြားခဲ့သည်။

ရှိုနော့ဗ်သည် ရုရှား၏ တင်းကျပ်သည့် တရားဥပဒေနှင့်အညီ မော်စကိုရှိ အမေရိကန်သံရုံးအား ဝန်ဆောင်မှု ပေးခဲ့ခြင်းဖြစ်သည်ဟု မီလာက ပြောသည်။

အမေရိကန် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မက်သရူး မီလာ

"ရုရှား ထောက်လှမ်းရေးအဖွဲ့ရဲ့ ကြိုးပမ်းမှုတွေကို ကျွန်တော်တို့ ပြင်းထန်စွာ ဆန့်ကျင်ပါတယ်။ ဒါ့အပြင် ကျွန်တော်တို့ ဝန်ထမ်းတွေကို ခြိမ်းခြောက်ပြီး နှောင့်ယှက်တဲ့ ရုရှား နိုင်ငံပိုင် မီဒီယာကိုလည်း ဆန့်ကျင်ကန့်ကွက်ပါတယ်"ဟု မီလာက အစီရင်ခံစာ ထုတ်ပြန်ခဲ့သည်။

ထို့နောက် ရှိုနော့ဗ်၏ အမှုနှင့်ဆက်နွှယ်ပြီး FSB ထောက်လှမ်းရေးအဖွဲ့သည် မော်စကိုမြို့တော်ရှိ အမေရိကန်သံရုံးတွင် အလုပ်လုပ်နေသည့် သံတမန်နှစ်ဦးကိုလည်း ဆင့်ခေါ်ကြောင်း ကြားသိခဲ့ရသည်ဟု မီလာက ထပ်လောင်းပြောကြားခဲ့သည်။

ရှိုနော့ဗ်သည် ရုရှားနိုင်ငံအရှေ့ပိုင်း ဗလာဒီဗော့စ်တော့ခ် (Vladivostok) မြို့ရှိ အမေရိကန် ကောင်စစ်ဝန်ရုံး၌ ၂၅ နှစ်ကြာ အလုပ်လုပ်ခဲ့ပြီး မေလကတည်းက ဖမ်းဆီးခံခဲ့ရခြင်းဖြစ်သည်။

Source:အယ်လ်ဂျာဇီးယား

CNI International News

ဟာရာရီ ၊ သြဂုတ် ၂၉

ဇင်ဘာဘွေနိုင်ငံတွင် သမ္မတ အီမာဆန် မန်ဂါဝါ(Emmerson Mnangagwa)သည် သမ္မတရွေးကောက်ပွဲ၌ အနိုင် ရရှိကြောင်း ကြေညာခဲ့ပြီး နောက် ထိုရွေးကောက်ပွဲအတွင်း ဗြောင်ကျပြီး ကြီးမားသည့် အမှားအယွင်းများ ရှိခဲ့ ကြောင်း အတိုက်အခံ ခေါင်းဆောင်က စွပ်စွဲခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။ 

နိုင်ငံတကာမှ ရွေးကောက်ပွဲ လေ့လာစောင့်ကြည့် သူများကလည်း ဇင်ဘာဘွေ သမ္မတရွေးကောက်ပွဲတွင် မဲဆန္ဒ ရှင်များကို ခြိမ်းခြောက်သည့် အခြေအနေများရှိခဲ့ကြောင်း သတင်းထုတ်ပြန်ခဲ့သည်။

သြဂုတ် ၂၅ ရက် နှောင်းပိုင်းတွင် ဇင်ဘာဘွေရွေးကောက်ပွဲ ကော်မရှင် (ZEC) က အသက် ၈၀ အရွယ် မန်ဂါဝါ သည် ရွေးကောက်ပွဲ၌ မဲရလဒ် ၅၂ ဒသမ ၆ ရာခိုင်နှုန်းဖြင့် ဒုတိယသက်တမ်းကို အနိုင်ရခဲ့ကြောင်း ကြေညာခဲ့ သည်။ 

ထို့ပြင် အတိုက်အခံပါတီဖြစ်သည့် (CCP) ပါတီ၏ ကိုယ်စားလှယ်လောင်းဖြစ်သူ နယ်လ်ဆင် ချာမီဆာ (Nelson Chamisa) သည် မဲရလဒ် ၄၄ ရာခိုင်နှုန်း ရရှိကြောင်း ရွေးကောက်ပွဲကော်မရှင်က ကြေညာခဲ့သည်။

ဇင်ဘာဘွေသမ္မတ အီမာဆန် မန်ဂါဝါကို တွေ့ရစဉ်

ချာမီဆာကမူ အတိုက်အခံများအနေနှင့် ရွေးကောက်ပွဲရလဒ်များကို အတည်မပြုကြောင်း၊ တိကျသည့် စိစစ် အတည်ပြုချက်များမရှိဘဲ မဲရလဒ်ကို ကြေညာခဲ့ခြင်း ဖြစ်သည်ဟု ပြောကြားခဲ့သည်။ 

"သူတို့ဟာ သင်တို့ရဲ့ ဆန္ဒနဲ့ မဲတွေကို ခိုးယူသွားခဲ့ပါတယ်။ ဒါပေမယ့် သင့်ရဲ့ မျှော်လင့်ချက်ကိုတော့ ဘယ်တော့မှ ခိုးယူလို့ မရပါဘူး"ဟု ချာမီဆာက ယခင်က Twitter ဟု လူသိများသည့် X လူမှုမီဒီယာတွင် ရေးသားဖော်ပြခဲ့ သည်။ 

မန်ဂါဝါသည် သမ္မတနန်းတော်မှ အမှာစကား ပြောကြားခဲ့ရာတွင် အတိုက်အခံများ၏ စွပ်စွဲချက်များကို ငြင်းဆို ခဲ့ပြီး သူ့ကို စွပ်စွဲခဲ့သူများအား အရေးယူမည်ဖြစ်ကြောင်း သတိပေးခဲ့သည်။

ဇင်ဘာဘွေတွင် သြဂုတ် ၂၃ ရက်နှင့် သြဂုတ် ၂၄ ရက်၌ ရွေးကောက်ပွဲ ကျင်းပခဲ့သည်။

အဆိုပါ ရွေးကောက်ပွဲသည် ဇင်ဘာဘွေနိုင်ငံကို ၄၃ နှစ်ကြာ အုပ်ချုပ်ခဲ့သည့် မန်ဂါဝါ၏ ZANU-PF ပါတီအပေါ် လူထု၏ ထောက်ခံမှုကို စမ်းသပ်ချက် တစ်ခုဖြစ်ခဲ့သည်။

မဲဆန္ဒရှင်များကို ခြိမ်းခြောက်သည်ဟု သတင်းထုတ်ပြန်ခဲ့သည့် ရွေးကောက်ပွဲ လေ့လာစောင့်ကြည့်သူများအား ဖမ်းဆီးမှု၊ မဲဆန္ဒရှင်များအား ခြိမ်းခြောက်မှု၊ အကြမ်းဖက် ခြိမ်းခြောက်မှု၊ နှောင့်ယှက်မှုနှင့် အကြပ်ကိုင်မှုများနှင့် ပတ်သက်ပြီး ထွက်ပေါ်နေသည့် သတင်းများအပေါ် စိုးရိမ်ကြောင်း ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် (Antonio Guterres) က ပြောကြားခဲ့သည်။

Source: အယ်လ်ဂျာဇီးယား

CNI International News

ဘန်ကောက်၊ သြဂုတ် ၂၉

ထိုင်းနိုင်ငံတွင် ဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) သည် ထိုင်းဘုရင်၏ တော်ဝင် လွတ်ငြိမ်းချမ်းသာခွင့်ရရှိရန် ကြိုးပမ်းနေသည့် အခြေအနေကို ဆန့်ကျင်ကန့်ကွက်ကြောင်း Thai Pakdee ပါတီ က အမှားပြုပြင်ရေးဌာန၏ ညွှန်ကြားရေးမှူးချုပ်ထံသို့ အသနားခံစာ တင်သွင်းခဲ့သည်။

ထောင်ဒဏ် ၈ နှစ် ချမှတ်ခံထားရပြီး လက်ရှိတွင် ရဲတပ်ဖွဲ့ အကျဉ်းထောင်၌ ဆေးကုသမှု ခံယူနေသည့် သက်ဆင် သည် တော်ဝင်မိသားစု၏ လွတ်ငြိမ်းချမ်းသာခွင့်ကို ရရှိရန် ကြိုးပမ်းနေသည်ဆိုသည့် သတင်းများ ကျယ်ကျယ် ပြန့်ပြန့် ထွက်ပေါ်နေသဖြင့် Thai Pakdee ပါတီက ယခုကဲ့သို့ အသနားခံစာ တင်သွင်းခဲ့ခြင်း ဖြစ်သည်။

Thai Pakdee ပါတီ၏ အကြီးအကဲတစ်ဦးဖြစ်သူ အာနန် ဆာကွန်ချာရွန် (Anand Sakorncharoen) က သက်ဆင် သည် နိုင်ငံ့အုပ်ချုပ်ရေးနှင့် နိုင်ငံ့ဂုဏ်သိက္ခာကို ထိခိုက်စေသည့် အကျင့်ပျက်ခြစားမှု စွဲချက်လေးခုဖြင့် စီရင်ချက် ချမှတ်ခံထားရသဖြင့် ယခုကဲ့သို့ အသနားခံစာ တင်သွင်းခဲ့ခြင်းဖြစ်သည်ဟု ပြောကြားခဲ့သည်။

Thai Pakdee ပါတီကိုတွေ့ရစဉ်

"သက်ဆင်ဟာ ပြည်ပမှာ ကာလအကြာကြီး ထွက်ပြေးတိမ်းရှောင်ခဲ့ပြီး ပြစ်ဒဏ်ကို ရှောင်တိမ်းခဲ့ပါတယ်။ အဲဒါက ဘာကို ပြသလဲဆိုရင် သူဟာ ထိုင်းနိုင်ငံရဲ့ တရားရေးစနစ်ကို လေးစားမှုမရှိတာကို ပြသနေပါတယ်။ ဒါကြောင့် သက်ဆင်ရဲ့ တော်ဝင်လွတ်ငြိမ်းချမ်းသာခွင့် ရရှိဖို့ လျှောက်ထားချက်ဟာ ထိုင်းဘုရင်ကို စိတ်အနှောင့်အယှက် ဖြစ်စေပါတယ်"ဟု အာနန်က ပြောကြားခဲ့သည်။

သက်ဆင်အနေနှင့် တော်ဝင် လွတ်ငြိမ်းချမ်းသာခွင့် ရရှိမည်ဆိုပါက တရားမျှတမှု ရှိမည်မဟုတ်ဘဲ နိုင်ငံအတွင်း တရားရေးနှင့် လူမှုရေး သာတူညီမျှမှုမရှိသည့် အခြေအနေကို ဖော်ပြရာ ရောက်လိမ့်မည်ဖြစ်ပြီး အကျဉ်းထောင် စနစ်၏ အားနည်းမှုကို ပြသရာ ရောက်လိမ့်မည်ဟုလည်း ၎င်းက ပြောသည်။

ထိုင်း၏ တရားရေးဝန်ကြီးဖြစ်သည့် ဗိုလ်ချုပ်ကြီး ပိုင်ဘွန် ကွမ်ချာယာ (Paiboon Koomchaya) ကမူ သူသည် အကျင့်ပျက်ခြစားမှု စွဲချက်ဖြင့် စီရင်ချက် ချခံခဲ့ရသူများအတွက် တော်ဝင်လွတ်ငြိမ်းချမ်းသာခွင့်ကို အလွယ်တကူ ရရှိစေလိမ့်မည် မဟုတ်ကြောင်း ပြောကြားခဲ့သည်။ 

သက်ဆင် ထိုင်းဘုရင်ကို ဂါဝရပြုနေစဉ်

အာနန်ကမူ သက်ဆင်၏ ကျန်းမာရေး အခြေအနေသည် သတင်းများတွင် ဖော်ပြနေသကဲ့သို့ အလွန်အမင်း ဆိုးရွားနေသည်ဟု မယုံကြည်ကြောင်းနှင့် သက်ဆင်၏ ဆေးကုသမှုခံယူနေရသည့် အခြေအနေသည် အခြား အကျဉ်းသားများနှင့်မတူဘဲ အခွင့်ထူးခံ ဖြစ်နေသည်ဟု ပြောကြားခဲ့သည်။

Thai Pakdee ပါတီ၏ လက်ထောက် ခေါင်းဆောင် သွတ်ဆာဖွန် ပရွမ်ကက် (Thoksaphon Promket) ကလည်း သက်ဆင်ကို စွဲဆိုထားသည့် ကျန်ရှိနေသော စွဲချက်များကို တရားရေးအရ ဆက်လက် လုပ်ဆောင်ရန် အစိုးရ ရှေ့နေချုပ်ရုံး (OAG) ကို အသနားခံစာ တင်သွင်းခဲ့သည်။ 

ထိုင်းစစ်တပ်ကလည်း ၎င်းကို နိုင်ငံတော် ငြိမ်ဝပ်ပိပြားရေး ကောင်စီ (NCPO) အား အသရေဖျက်မှုဖြင့် တရားစွဲ ဆိုခဲ့သည်ဟု သက်ဆင်က ၂၀၁၅ ခုနှစ်တွင် တောင်ကိုရီးယားမီဒီယာတစ်ခုနှင့် ပြုလုပ်သည့် အင်တာဗျူးတစ်ခု၌ ပြောကြားခဲ့သည်။

Source: Thai PBS World

CNI International News

တိုင်ပေ၊ သြဂုတ် ၂၉

လာမည့်နှစ်(၂၀၂၄ ခုနှစ်) ဇန်နဝါရီလတွင် ပြုလုပ်မည့် ထိုင်ဝမ်သမ္မတ ရွေးကောက်ပွဲကို ဝင်ရောက်ယှဉ်ပြိုင်မည်ဟု Foxconn ကုမ္ပဏီ တည်ထောင်သူ တယ်ရီ ဂူး (Terry Gou) က သြဂုတ် ၂၈ ရက်တွင် ကြေညာခဲ့သည်ဟု ရိုက်တာ မှ ဖော်ပြခဲ့သည်။ 

ထို့ပြင် ထိုင်ဝမ်သည် နောက်ထပ် ယူကရိန်းဖြစ်လာမည် မဟုတ်ကြောင်းလည်း ဂူးက ပြောသည်။ 

၎င်း တည်ထောင်ခဲ့သည့် Foxconn ကုမ္ပဏီသည် Apple ကုမ္ပဏီအတွက် လိုအပ်သည့် လျှပ်စစ်ပစ္စည်းများ ထောက်ပံ့ပေးနေသည့် ကုမ္ပဏီဖြစ်သည်။

ဘီလျံနာတစ်ဦးဖြစ်သည့် ဂူးသည် ရွေးကောက်ပွဲဝင်မည်ဟု ကြေညာခဲ့သည့် စတုတ္ထမြောက် နိုင်ငံရေးသမား ဖြစ်သော်လည်း လူထုသဘောဆန္ဒ စစ်တမ်းကောက်ယူမှုများတွင် လက်ရှိ ထိုင်ဝမ်ဒုတိယသမ္မတအဖြစ် တာဝန် ထမ်းဆောင်နေသည့် ဝီလျံလိုင် (William Lai) နှင့် နှိုင်းယှဉ်ပါက လူကြိုက်နည်းနေသည်။

ထိုင်ဝမ်ဒုတိယသမ္မတ ဝီလျံလိုင်ကို တွေ့ရစဉ်

အာဏာရ ဒီမိုကရက်တစ် တိုးတက်ရေး(DPP)ပါတီ၏ ကိုယ်စားလှယ်လောင်း လိုင်သည် ရွေးကောက်ပွဲတွင် အနိုင်ရရန် ရေပန်းစားနေသူ ဖြစ်သည်။

အသက် ၇၂ နှစ်အရွယ် ဂူးသည် ၂၀၁၉ ခုနှစ်က Foxconn ကုမ္ပဏီ အကြီးအကဲရာထူးမှ နုတ်ထွက်ခဲ့ပြီး ထိုအချိန် ကတည်းက သမ္မတရွေးကောက်ပွဲဝင်ရန် ကြိုးပမ်းခဲ့သည်။

သို့သော် ဂူးသည် ထိုင်ဝမ်၏ အဓိက အတိုက်အခံ ပါတီဖြစ်သည့် ကူမင်တန်ပါတီ (KMT) ၏ ကိုယ်စားလှယ်အဖြစ် အမည်စာရင်း တင်သွင်းခံခဲ့ရခြင်း မရှိပေ။

ထိုင်ဝမ်ရွေးကောက်ပွဲ အနိုင်ရသူများကို ကြေညာနေစဉ်

ကူမင်တန်ပါတီသည် အစဉ်အလာအရ တရုတ်အစိုးရနှင့် နီးစပ်သည့် ဆက်ဆံရေးကို ထိန်းသိမ်းထားပြီး တရုတ် သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ပြောကြားခဲ့သည်။

ယခုနှစ် အစောပိုင်းကလည်း ဂူးသည် လာမည့်နှစ် သမ္မတရွေးကောက်ပွဲအတွက် ကူမင်တန်ပါတီ ကိုယ်စားပြု ဝင်ရောက်ယှဉ်ပြိုင်ရန် ကြိုးပမ်းခဲ့သော်လည်း ကူမင်တန်ပါတီကမူ နယူးတိုင်ပေမြို့တော်ဝန် ဟိုယုအင် (Hou Yu-ih) ကို ပါတီကိုယ်စားလှယ်လောင်းအဖြစ် ရွေးချယ်ခဲ့သည်။ 

ဂူးသည် ပြီးခဲ့သည့် သီတင်းပတ် အနည်းငယ်က ထိုင်ဝမ်နိုင်ငံတစ်ဝန်း လှည့်လည်ပြီး မဲဆွယ်စည်းရုံးမှုကဲ့သို့ လူထုတွေ့ဆုံပွဲများ ပြုလုပ်ခဲ့သဖြင့် သူသည် တစ်သီးပုဂ္ဂလ ကိုယ်စားလှယ်လောင်းအဖြစ် ဝင်ရောက် ယှဉ်ပြိုင် ဖွယ်ရှိသည်ဟု ထင်ကြေးပေးမှုများ ထွက်ပေါ်ခဲ့သည်။

"ပြီးခဲ့တဲ့ ခုနစ်နှစ်အတွင်း DPP ပါတီရဲ့ အုပ်ချုပ်မှုအောက်မှာ ထိုင်ဝမ်ဟာ စစ်ပွဲဖြစ်ပွားမယ့် အန္တရာယ်နဲ့ ရင်ဆိုင်ခဲ့ ရပါတယ်။ ပြည်တွင်းမှာလည်း သူတို့ချမှတ်ခဲ့တဲ့ မူဝါဒတွေဟာ အမှားတွေနဲ့ ပြည့်နေပါတယ်။ စီးပွားရေး လုပ်ငန်း ရှင်ရဲ့ အုပ်ချုပ်မှုခေတ် စတင်ပါပြီ"ဟု ဂူးက ပြောကြားခဲ့သည်။

Source: ရိုက်တာ

CNI International News

ဘန်ကောက်၊ သြဂုတ် ၂၉ 

ဖြူးထိုင်းပါတီ ဦးဆောင်သည့် ထိုင်းအစိုးရအဖွဲ့သစ်၏ လုပ်ငန်းများကို လာမည့် စက်တင်ဘာလ လလယ်တွင် စတင်မည်ဖြစ်သည်။

ထိုင်းနိုင်ငံတွင် ဝန်ကြီးချုပ်အဖြစ် ခန့်အပ်ခံခဲ့ရသည့် ဆရီသာ သာဗင်စင် (Srettha Thavisin)က အစိုးရအဖွဲ့တွင် ပါဝင်မည့် ရာထူးနေရာစာရင်းကို အပြီးသတ်ရေးဆွဲခဲ့ပြီး အစိုးရအဖွဲ့အတွင်းဝန်များရုံးထံသို့ လွှဲပြောင်းပေးအပ် ခဲ့သည်ဟု The Nation မှ ဖော်ပြခဲ့သည်။

ဆရီသာသည် ၎င်းအား ဂုဏ်ပြုရန် လာရောက်ခဲ့သည့် ကြံစိုက်ပျိုးသည့် တောင်သူများကို ကိုယ်စားပြုသည့် ကိုယ်စားလှယ်များနှင့် တွေ့ဆုံခဲ့ပြီးနောက် သြဂုတ် ၂၈ ရက် နံနက်ပိုင်းတွင် ဖြူးထိုင်းပါတီ ဌာနချုပ်၌ သတင်းထောက်များနှင့် တွေ့ဆုံခဲ့သည်။

ဖြူးထိုင်းပါတီ ဦးဆောင်သည့် ထိုင်းအစိုးရအဖွဲ့ကိုတွေ့ရစဉ်

ဆရီသာက ညွန့်ပေါင်းအစိုးရအဖွဲ့တွင် ပါဝင်သည့် ပါတီ ၁၁ ခုနှင့်  တွေ့ဆုံဆွေးနွေးမှုများ ပြုလုပ်ခဲ့ပြီးနောက် အစိုးရအဖွဲ့၌ ပါဝင်မည့် ရာထူးနေရာများအတွက် သြဂုတ် ၂၇ ရက် ညပိုင်းမှာ အပြီးသတ်စာရင်း ရေးဆွဲခဲ့ကြောင်း သတင်းထောက်များကို ပြောကြားခဲ့သည်။

"ဒီနေ့မှာတော့ အစိုးရအဖွဲ့ အတွင်းဝန်ချုပ်ဟာ ကျနော်တင်သွင်းခဲ့တဲ့ အစိုးရအဖွဲ့ဝင် ရာထူးစာရင်းကို စစ်ဆေးမှာ ဖြစ်ပါတယ်။ ကျေးဇူးပြုပြီး အချိန်နည်းနည်းလောက် စောင့်ဆိုင်းကြပါ။ လာမယ့် လလယ်လောက်မှာ အစိုးရအဖွဲ့ သစ်ဟာ မူဝါဒအသစ်တွေကို လွှတ်တော်မှာ ချပြသွားမှာဖြစ်ပါတယ်" ဟု ဆရီသာက ပြောကြားခဲ့သည်။

မည်သို့ပင်ဆိုစေ ကာကွယ်ရေးဝန်ကြီး ရာထူးနေရာအတွက် ဖြူးထိုင်းပါတီ၏ လွှတ်တော်အမတ် ဆူတင် ကလန် ဆန်း (Sutin Klungsang) သို့မဟုတ် အမျိုးသားလုံခြုံရေးကောင်စီ အတွင်းရေးမှူးချုပ်ဟောင်း ဗိုလ်ချုပ်ကြီး နက်တာပိုလ် နက်ဖန်နစ် (Nattapol Nakphanit) ကို ရွေးချယ်မည် ဟုတ်/မဟုတ် သတင်းထောက်များ၏ မေးမြန်းချက်ကို ဆရီသာက ဖြေကြားခဲ့ခြင်းမရှိပေ။

 Move Forward ပါတီခေါင်းဆောင် ပီတာ လင်ဂျာရိုရတ်ကို တွေ့ရစဉ်

"အစိုးရအဖွဲ့ဝင် ဝန်ကြီးနေရာတွေ ခန့်အပ်တဲ့ စာရင်းအတွက် အချိန် အနည်းငယ်လောက်ပဲ စောင့်ဆိုင်းပေးကြပါ" ဟု ဆရီသာက ပြောကြားခဲ့သည်။

ထို့ပြင် အသစ်ခန့်အပ်မည့် ကာကွယ်ရေးဝန်ကြီးသည် ပြည်သူများကို စိတ်ပျက်စေလိမ့်မည် မဟုတ်ကြောင်းလည်း ၎င်းက ပြောသည်။ 

စစ်တပ်ကို ပြုပြင်ပြောင်းလဲရန် အစိုးရအဖွဲ့သစ်အား တောင်းဆိုထားသည့် Move Forward ပါတီခေါင်းဆောင် ပီတာ လင်ဂျာရိုရတ် (Pita Limjaroenrat) ၏ တောင်းဆိုချက်နှင့် ပတ်သက်ပြီး သတင်းထောက်များက မေးမြန်း ခဲ့ရာတွင် ဆရီသာက "ကျနော်ကတော့ ပြုပြင်ပြောင်းလဲမှုထက် ပူးပေါင်းဆောင်ရွက်မှုကို ပိုပြီး အားပေးချင်ပါ တယ်"ဟု ဖြေကြားခဲ့သည်။

Source: The Nation