CNI International News

တိုင်ပေ၊ မတ်လ ၂၅

တရုတ်အခြေစိုက် ကုမ္ပဏီတစ်ခုက ပိုင်ဆိုင်သည့် လူမှုမီဒီယာ အက်ပလီကေးရှင်း TikTok သည် ထိုင်ဝမ်၏ အမျိုးသားလုံခြုံရေးအတွက် သိသာသည့် ခြိမ်းခြောက်မှုတစ်ခုဖြစ်သည်ဟု ထိုင်ဝမ် ဒစ်ဂျစ်တယ်ရေးရာဝန်ကြီး အော်ဒရေးတန် (Audrey Tang)က ကြေညာခဲ့ကြောင်း NDTV မှ ဖော်ပြခဲ့သည်။

ပြည်ပရန်သူများနှင့် ဆက်စပ်မှုရှိသည့် TikTok အက်ပလီကေးရှင်းနှင့်ပတ်သက်ပြီး ထိုင်ဝမ်၏ အမြင်သည် အမေရိကန်၏ အမြင်နှင့် တူညီမှုရှိကြောင်း တန်က ပြောသည်။ 

အမေရိကန်ကလည်း TikTok ကို ဖြစ်လာနိုင်ခြေရှိသည့် အမျိုးသားလုံခြုံရေး အန္တရာယ်တစ်ခုအဖြစ် ရှုမြင်ထား သည်။

"ထိုင်ဝမ်ဟာ TikTok ကို အန္တရာယ်ရှိတဲ့ ထုတ်ကုန်တစ်ခုအဖြစ် သတ်မှတ်ခဲ့ပါတယ်"ဟု တန်က လွှတ်တော် ကြားနာစစ်ဆေးမှုတွင် ပြောကြားခဲ့သည်။

ထိုင်ဝမ်၏ စံသတ်မှတ်ချက်များနှင့် ကြည့်မည်ဆိုပါက ပြည်ပရန်ဘက်များ၏ ထိန်းချုပ်မှုကို အလွယ်တကူခံရ သည့် မည်သည့် ထုတ်ကုန်မဆို အမျိုးသားသတင်းအချက်အလက်နှင့် ဆက်သွယ်ရေးလုံခြုံမှုအတွက် ခြိမ်းခြောက် မှုတစ်ခု ဖြစ်သည်ဟု တန်က ပြောကြားခဲ့သည်။

 တရုတ်အလံ နောက်ခံနဲ့ Tik Tok ကိုတွေ့ရစဉ်

ထိုင်ဝမ်၏ ကြေညာချက်သည် အမေရိကန်တွင် ရေပန်းစားနေသည့် TikTok အား ပိတ်ပင်ရေးလှုပ်ရှားမှုနှင့် တူညီမှုရှိနေသည်။ 

အမေရိကန်အောက်လွှတ်တော်သည် မကြာသေးမီက TikTok ၏ မိခင်ကုမ္ပဏီဖြစ်သည့် ByteDance ကို ပစ်မှတ်ထားသည့် ဥပဒေမူကြမ်းကို အတည်ပြုခဲ့သည်။

ထိုဥပဒေမူကြမ်းတွင် ByteDance အနေဖြင့် အမေရိကန်တွင် TikTok ကို ၆ လကြာ အသုံးပြုခွင့်မပေးရန် သို့မဟုတ်ပါက တစ်နိုင်ငံလုံးတွင် ပိတ်ပင်ခံရမည်ဖြစ်ကြောင်း ဖော်ပြထားသည်။

ထိုင်ဝမ် ဒစ်ဂျစ်တယ်ရေးရာဝန်ကြီး (MODA) ကလည်း အမေရိကန်၏ ဥပဒေမူကြမ်းနှင့် ဆင်တူရိုးမှားဖြစ်သည့် ဆိုက်ဘာလုံခြုံရေး စီမံခန့်ခွဲမှု အက်ဥပဒေကို ပြဋ္ဌာန်းရန် အဆိုပြုခဲ့သည်ဟု တန်က ပြောကြားခဲ့သည်။

ထိုဥပဒေပြဋ္ဌာန်းမှုသည် ထိုင်ဝမ်၏ ဒစ်ဂျစ်တယ် အခြေခံအဆောက်အအုံများကို ပြည်ပ၏ ကြားဝင်စွက်ဖက်မှုများ ရန်မှ ကာကွယ်လိုသည့် ထိုင်ဝမ်အစိုးရ၏ ကတိကဝတ်များကို ထင်ဟပ်စေခဲ့သည်။

ထိုင်ဝမ်အစိုးရ အေဂျင်စီများနှင့် အစိုးရရုံး ခြံဝင်းများအတွင်း TikTok အသုံးပြုမှုကို ယခင်ကတည်းက တားမြစ် ကန့်သတ်ထားပြီး လက်ရှိတွင် TikTok ကို စာသင်ကျောင်းများ၊ အစိုးရမဟုတ်သည့် အေဂျင်စီများ၊ ပြည်သူပိုင် နေရာများတွင်ပါ ပိတ်ပင်နိုင်ခြေရှိသည်ဟု တန်က ပြောကြားခဲ့သည်။

Source: NDTV

CNI International News

ဟဲလ်ဆင်ကီ၊ မတ်လ ၂၅

အမေရိကန်လွှတ်တော်သည် ယခုနှစ်အတွင်း ဘော်လ်တစ် ၃ နိုင်ငံဖြစ်သည့် အက်စတိုးနီးယား၊ လတ်ဗီးယားနှင့် လစ်သူယေးနီးယားနိုင်ငံတို့ကို စုစုပေါင်း ဒေါ်လာ ၂၂၈ သန်း တန်ကြေးရှိ စစ်ရေးနှင့် ကာကွယ်ရေး အကူအညီများ ပေးရန် ပါဝင်သည့် ဥပဒေမူကြမ်းကို အတည်ပြုခဲ့သည်ဟု အက်စတိုးနီးယား ကာကွယ်ရေးအရာရှိများက မတ်လ ၂၃ ရက်တွင် ပြောကြားခဲ့သည်ဟု အေပီမှ ဖော်ပြခဲ့သည်။

မတ်လ ၂၃ ရက်က လွှတ်တော်တွင် အတည်ပြုခဲ့သည့် အမေရိကန်အစိုးရ၏ ရန်ပုံငွေ ဥပဒေထုတ်ပြန်မှု၌ နေတိုး အဖွဲ့ဝင်နိုင်ငံများဖြစ်ပြီး ရုရှား၏ အိမ်နီးချင်းနိုင်ငံများဖြစ်သည့် ဘော်လ်တစ် ၃ နိုင်ငံကို စစ်ရေးအထောက်အပံ့များ ပေးမည့် အစီအစဉ် ပါဝင်ခဲ့သည်။

"အမေရိကန်ရဲ့ ကူညီထောက်ပံ့မှုတွေဟာ အက်စတိုနီးယား၊ လတ်ဗီးယားနဲ့ လစ်သူယေးနီယားနိုင်ငံတွေမှာ စစ်ရေး အခြေခံ အဆောက်အအုံတွေနဲ့ ဖွံ့ဖြိုးတိုးတက်ရေး စီမံကိန်းတွေကို အလျင်အမြန် အကောင်အထည်ဖော်ဖို့ သိသိသာသာ အထောက်အကူ ဖြစ်စေပါတယ်။ ပြီးခဲ့တဲ့နှစ်ကထက် အကူအညီတွေ နည်းနည်း ပိုများလာတာ ကလည်း သတင်းကောင်းပါပဲ" ဟု အက်စတိုးနီးယား ကာကွယ်ရေးဝန်ကြီး ဟန်နို ပက်ဗ်ကူအာ (Hanno Pevkur) က ပြောကြားခဲ့သည်။

"ဒီဘဏ္ဍာရေး အထောက်အပံ့ဟာ နေတိုးမဟာမိတ်အဖွဲ့ထဲမှာ အင်အားအကြီးဆုံး မဟာမိတ်ဖြစ်တဲ့ အမေရိကန် က ကျနော်တို့ ဒေသရဲ့ လုံခြုံရေးနဲ့ တည်ငြိမ်ရေးတို့အတွက် ကတိကဝတ်အတိုင်း လုပ်ဆောင်နေတယ်ဆိုတာကို ပြသရာရောက်ပါတယ်"ဟု ၎င်းက ပြောသည်။

 အမေရိကန် အိမ်ဖြူတော်ကိုတွေ့ရစဉ်

၂၀၂၀ ပြည့်နှစ်က ဖန်တီးခဲ့သည့် ဘော်လ်တစ် လုံခြုံရေး အစီအစဉ် (BSI) သည် အမေရိကန် ကာကွယ်ရေးဝန်ကြီး ဌာနက အက်စတိုးနီးယား၊ လတ်ဗီးယားနှင့် လစ်သူယေးနီးယား စစ်တပ်များ၏ စစ်ရေးစွမ်းဆောင်ရည်များနှင့် ပူးပေါင်း ဆောင်ရွက်နိုင်ငံစွမ်းများကို တိုးတက်စေရန် ရည်ရွယ်ခဲ့သည့် အစီအစဉ်တစ်ခုဖြစ်သည်။

အမေရိကန်၏ ငွေကြေးထောက်ပံ့မှုသည် ဘော်လ်တစ်နိုင်ငံများ၏ လေကြောင်းကာကွယ်ရေး၊ ပင်လယ် ရေကြောင်းဆိုင်ရာ အခြေအနေ စောင့်ကြည့်လေ့လာမှုနှင့် မြေပြင်တပ်ဖွဲ့များကို ဖွံ့ဖြိုးတိုးတက်စေရန်ဖြစ်ပြီး ၂၀၂၃  ခုနှစ်ကလည်း ဒေါ်လာ ၂၂၅ သန်း တန်ကြေးရှိ စစ်ရေးအကူအညီပေးခဲ့ကြောင်း အက်စတိုးနီးယား ကာကွယ်ရေးဝန်ကြီးဌာနက ပြောကြားခဲ့သည်။

ဒီဇင်ဘာလကလည်း အမေရိကန်နှင့် ဘော်လ်တစ်နိုင်ငံများသည် ၂၀၂၈ ခုနှစ်အထိ နိုင်ငံများအကြား ကာကွယ်ရေး နှင့် အမျိုးသားလုံခြုံရေးအတွက် ပူးပေါင်းဆောင်ရွက်မှုရှိသည့် ဆက်ဆံရေးများကို လမ်းညွှန်ရန် ရည်ရွယ်ထား သည့် ၅ နှစ်သက်တမ်းရှိ ကာကွယ်ရေး ပူးပေါင်းဆောင်ရွက်ရေး လမ်းပြမြေပုံတစ်ခု ဖော်ဆောင်ရန် သဘောတူ ခဲ့ကြသည်။

Source: အေပီ

CNI International News

ပို့အော်ပရင့်စ်၊ မတ်လ ၂၅

ဟေတီနိုင်ငံတစ်ဝန်းတွင် လူဆိုးဂိုဏ်းများ၏ အကြမ်းဖက်တိုက်ခိုက်မှုများ ကျယ်ကျယ်ပြန့်ပြန့် ဖြစ်ပွားနေချိန်တွင် နိုင်ငံသားများ၏ ထက်ဝက်နီးပါးသည် စားသောက်နေထိုင်ရန် ရုန်းကန်နေရပြီး နေရာ အများအပြားတွင် အငတ်ဘေးဆိုက်လုနီးပါး ဖြစ်နေသည်ဟု နိုင်ငံတကာအဖွဲ့အစည်းများက မတ်လ ၂၂ ရက်၌ ပြောကြားခဲ့ကြောင့် ရိုက်တာမှ ဖော်ပြခဲ့သည်။

ငွေကြေးဖောင်းပွမှုနှင့် ဆင်းရဲချို့တဲ့မှုသည် ဟေတီနိုင်ငံသားများအား ငတ်မွတ်မှု အခြေအနေကို အဆိုးဆုံးအဆင့် အထိ ရောက်ရှိစေခဲ့သည်ဟု ပြောကြားခဲ့သည်။

"ဆာလောင်ငတ်မွတ်မှု မြင့်တက်လာတာဟာ နိုင်ငံကို အထိနာစေတဲ့ လုံခြုံရေး အကျပ်အတည်းကြောင့် ဖြစ်ပါ တယ်။ ကျနော်တို့အနေနဲ့ ချက်ချင်းအရေးတယူ ဆောင်ရွက်ဖို့ လိုအပ်ပါတယ်။ အခြေအနေတစ်ခုကို စောင့်နေတာ ဟာ ရွေးချယ်စရာတစ်ခု မဟုတ်ပါဘူး"ဟု ကမ္ဘာ့စားနပ်ရိက္ခာအစီအစဉ်၏ ဟေတီနိုင်ငံဆိုင်ရာ ညွှန်ကြားရေးမှူး ယန်းမာတင်ဘော်ရာ(Jean-Martin Bauer)က ပြောကြားခဲ့သည်။

ငတ်မွတ်မှု အခြေအနေကို အကဲဖြတ်ရန် ကုလသမဂ္ဂနှင့် အစိုးရများက အသုံးပြုသော အတိုင်းအတာတစ်ခုကို သတ်မှတ်ပေးသည့် အဖွဲ့အစည်းတစ်ခုဖြစ်သော The Integrated Food Security Phase Classification (IPC)၏ ထုတ်ပြန်ချက်အရ လူဦးရေ ၁၁.၅ သန်းတွင် လူ ၄.၉၇ သန်းခန့်သည် အကျပ်အတည်း သို့မဟုတ် အစားအစာ မလုံလောက်မှု၏ အဆိုးရွားဆုံး အဆင့်များကို ရင်ဆိုင်ကြုံတွေ့နေရသည်ဟု ပြောကြားခဲ့သည်။

 ဟေတီနိုင်ငံသူနှစ်ဦးကို အစားအစာများနဲ့အတူ တွေ့ရစဉ်

လက်ရှိတွင် နေရာ ၈ နေရာကို ငတ်မွတ်မှု အခြေအနေမတိုင်မီ အဆိုးဆုံးအဆင့်ဖြစ်သည့် အရေးပေါ်ကာလအဖြစ် သတ်မှတ်အကဲဖြတ်ခဲ့ကြသည်ဟု ထုတ်ပြန်ထားသည်။

ဟေတီနိုင်ငံသည် ရဲစခန်းများနှင့် နိုင်ငံတကာလေဆိပ်ကို ဝင်ရောက်စီးနင်း တိုက်ခိုက်ခြင်း အပါအဝင် ယခုလ အတွင်း ပြိုင်ဘက်လူဆိုးဂိုဏ်းများ၏ ဆက်တိုက်တိုက်ခိုက်မှု ဖြစ်စဉ်များကြောင့် အထိနာလျက်ရှိသည်။

ထိုတိုက်ခိုက်မှုများကြောင့် လူပေါင်းထောင်ချီ သေဆုံးခဲ့ကာ လူပေါင်းသန်းချီ ဘေးလွတ်ရာ ရွှေ့ပြောင်း နေထိုင်ခဲ့ ကြသည်။

ဒေသဆိုင်ရာ ခေါင်းဆောင်များသည် အသွင်ကူးပြောင်းရေးကောင်စီ တစ်ရပ်ကို ဖွဲ့စည်းရန် ကြိုးပမ်းလျက်ရှိပြီး ဝန်ကြီးချုပ် အေရီရယ်ဟန်နရီ(Ariel Henry) က ထိုကောင်စီကို ဖွဲ့စည်းသည်နှင့် တစ်ပြိုင်နက် ရာထူးမှ နုတ်ထွက် မည်ဟု ကတိပြုထားသည်။

သို့သော် သူသည် လက်ရှိတွင် နိုင်ငံတကာလုံခြုံရေးတပ်ဖွဲ့ကို တပ်ဖြန့်ချထားပေးရန်အတွက် ဆွေးနွေးမှု လုပ်ဆောင်ရန် ကင်ညာနိုင်ငံသို့ ရောက်ရှိနေပြီးနောက် ထိုနိုင်ငံတွင် ဆက်လက် နေထိုင်လျက်ရှိသည်။

Source: ရိုက်တာ

CNI International News

နယူးဒေလီ၊ မတ်လ ၂၅

အိန္ဒိယရေတပ်သည် ၂၀၂၃ ခုနှစ်၊ ဒီဇင်ဘာလလယ်ပိုင်းကစပြီး Operation Sankalp အမည်ဖြင့် ပင်လယ် ရေကြောင်း လုံခြုံရေးနှင့် ပင်လယ်ဓားပြ တိုက်ဖျက်ရေး စစ်ဆင်ရေးကို ဆက်လက်ဆင်နွှဲနေကြောင်း Mantras TV မှ ဖော်ပြခဲ့သည်။

အိန္ဒိယရေတပ်သည် ပြီးခဲ့သည့်နှစ် ဒီဇင်ဘာ ၁၄ ရက်က မော်လ်တာနိုင်ငံ အလံတင်သင်္ဘော MV Ruen ပြန်ပေးဆွဲ ခံရချိန်အတွင်း ကယ်ဆယ်ရေး လုပ်ငန်းစဉ်များကို တက်ကြွစွာ ပါဝင်လုပ်ဆောင်ခဲ့သည်ဟု တာဝန်ရှိသူများက ပြောကြားခဲ့သည်။

 အိန္ဒိယရေတပ်က MV Ruen သင်္ဘောပေါ်ပါသူတွေကို ကယ်ထုတ်ခဲ့စဉ်

"ဒီနေ့ မတ်လ ၂၃ ရက်ဟာ Operation Sankalp စစ်ဆင်ရေးစတင်တဲ့ ရက် ၁၀၀ ပြည့် နေ့ရက်ဖြစ်ပါတယ်။ ရက်ပေါင်း ၁၀၀ အတွင်း အိန္ဒိယရေတပ်ဟာ ဖြစ်စဉ် ၁၈ ခုကို တုန့်ပြန် ဆောင်ရွက်ပေးခဲ့ပြီး အိန္ဒိယသမုဒ္ဒရာ ဒေသမှာ ပထမဆုံး တုန့်ပြန်ဆောင်ရွက်သူနဲ့ ယုံကြည်အားကိုးရတဲ့ လုံခြုံရေးမိတ်ဖက်တစ်ဦးအဖြစ် အရေးကြီးတဲ့ အခန်းကဏ္ဍကနေ ပါဝင်ခဲ့ပါတယ်"ဟု တရားဝင် သတင်းထုတ်ပြန်ချက်တွင် ဖော်ပြခဲ့သည်။

ပင်လယ်ဓားပြများ၏ ပြန်ပေးဆွဲခံထားရသည့် MV Ruen သင်္ဘောကို အပြီးသတ် ကယ်တင်နိုင်မှုက အိန္ဒိယရေတပ် ၏ ကြိုးပမ်းလုပ်ဆောင်မှုများကို မီးမောင်းထိုးပြသရာ ရောက်ခဲ့သည်ဟု ပြောသည်။

"ပြီးခဲ့တဲ့ ရက်ပေါင်း ၁၀၀ အတွင်း ရေတပ်သင်္ဘောတွေ၊ လေယာဉ်တွေနဲ့ အထူးတပ်ဖွဲ့တွေဟာ ပင်လယ်ပြင်တွေ ကို ဘေးကင်းလုံခြုံစေဖို့ မမှိတ်မသုန် ကြိုပမ်းဆောင်ရွက်ခဲ့ပြီး ပင်လယ်ရေကြောင်း အဖွဲ့အစည်းကို ဒေသတွင်း ပုံမှန်မဟုတ်တဲ့ ခြိမ်းခြောက်မှုတွေရန်ကနေ ကာကွယ်ပေးခဲ့ပါတယ်" ဟု ထုတ်ပြန်ချက်တွင် ဖော်ပြခဲ့သည်။

 အိန္ဒိယရေတပ်က MV Ruen သင်္ဘောပေါ်ပါသူတွေကို ကယ်ထုတ်ခဲ့စဉ်

ဘက်ကမ်းလွန် ဒေသများတွင် ပင်လယ်ရေကြောင်းဆိုင်ရာ လုံခြုံရေး စစ်ဆင်ရေးများကို လုပ်ဆောင်နေကြောင်း ထုတ်ပြန်ချက်၌ ဖော်ပြခဲ့သည်။

ဒီဇင်ဘာ ၂၃ ရက်မှစပြီး အိန္ဒိယ၏ ခက်ခဲသည့် အားထုတ်ကြိုးပမ်းမှုများထဲတွင် ပင်လယ်ပြင်၌ စစ်မှုထမ်း ၅၀၀၀ ကျော်၊ သင်္ဘော ၂၁ စင်း ဖြန့်ကြက်ချထားခဲ့ပြီး ပင်လယ်ရေကြောင်း ကင်းထောက်လေယာဉ်ဖြင့် ပျံသန်းချိန် နာရီ ၉၀၀ ရှိခဲ့သည် တရားဝင် ထုတ်ပြန်ချက်တွင် ဖော်ပြခဲ့သည်။

"အိန္ဒိယ သင်္ဘောသား ၄၅ ယောက် အပါအဝင် လူပေါင်း ၁၁၀ ကျော်ရဲ့ အသက်ကို ကယ်တင်ပေးခဲ့ပြီး ဓာတ်မြေ သြဇာ၊ ရေနံစိမ်းနဲ့ ကုန်စည်တွေ အပါအဝင် ကုန်တန်ချိန်ပေါင်း ၁၅၀ တန်ကျော်ကို အစောင့်အကြပ်အဖြစ် လိုက်ပါ စောင့်ကြပ်ပြီး ပို့ဆောင်ပေးခဲ့ကြောင်း” ထုတ်ပြန်ချက်တွင် ဖော်ပြခဲ့သည်။ 

၂၀၂၃ ခုနှစ်၊ ဒီဇင်ဘာလကတည်းက ဂုရုဂရမ် (Gurugram) မြို့ရှိ အိန္ဒိယရေတပ်၏ သတင်းအချက်အလက် စုဆောင်းရေးစင်တာ-အိန္ဒိယသမုဒ္ဒရာဒေသ (IFC-IOR) သည် အိန္ဒိယသမုဒ္ဒရာဒေသတွင် သတင်းအချက် ဖလှယ်မှုများ၌ အဓိကနေရာမှ ပါဝင်ခဲ့သည်ဟု ထုတ်ပြန်ချက်မှာ ဖော်ပြခဲ့သည်။

Source: Mantras TV

CNI International News

ပို့အူပရင့်စ်၊ မတ်လ ၂၃

ဟေတီနိုင်ငံ၊ ပို့အူပရင့်စ် (Port-au-Prince) မြို့တော်တွင် မတ်လ ၂၁ ရက်က ပစ်ခတ်တိုက်ခိုက်မှုများအတွင်း လူဆိုးဂိုဏ်း ခေါင်းဆောင်တစ်ဦး သေဆုံးခဲ့သည်ဟု ရိုက်တာမှ ဖော်ပြခဲ့သည်။ 

ဟေတီတွင် အစိုးရအဖွဲ့ယန္တရား လည်ပတ်မှု ရပ်တန့်ခဲ့သဖြင့် အသွင်ကူးပြောင်းရေးကောင်စီကို အပြီးသတ် ဖွဲ့စည်းနိုင်ရန် အချိန်နီးကပ်လာချိန်တွင် Delmas 95 လူဆိုးဂိုဏ်းခေါင်းဆောင် အားနက်စ် ဂျူလ်မီ (Ernst Julme) သေဆုံးသွားခဲ့သည်။

၎င်းသည် ရဲတပ်ဖွဲ့၏ စစ်ဆင်ရေးအတွင်း သေဆုံးခဲ့ခြင်းဖြစ်သည်။

တိုင်ဂရက်စ်ဟုလည်း လူသိများသည့် ဂျူလ်မီသည် ပို့အူပရင်စ်မြို့တော်တွင် အခြားလူဆိုးဂိုဏ်း ခေါင်းဆောင် တစ်ဦး သေဆုံးခဲ့ပြီးနောက် တစ်ရက်အကြာတွင် ရဲတပ်ဖွဲ့၏ ချေမှုန်းခြင်းခံခဲ့ရသည့် နောက်ထပ် လူဆိုးဂိုဏ်း ခေါင်းဆောင်ဖြစ်သည်ဟု ဒေသခံမီဒီယာများက ဖော်ပြခဲ့သည်။

Delmas 95 လူဆိုးဂိုဏ်းခေါင်းဆောင် အားနက်စ် ဂျူလ်မီကို တွေ့ရစဉ်

ဟေတီ၏ သြဇာကြီးမားသည့် လူဆိုးဂိုဏ်းခေါင်းဆောင်ကြီး ဂျင်မီ ဘာဘီကျူး ချီရီဇီယာ (Jimmy "Barbeque" Cherizier) ၏ ဒုစရိုက်ဂိုဏ်း မဟာမိတ်အုပ်စုဖြစ်သည့် Viv Ansanm အဖွဲ့ဝင်ဖြစ်သည့် ဂျူလ်မီ၏ သေဆုံးမှုသည် မြို့တော်အတွင်း လုံခြုံရေးတပ်ဖွဲ့များ လူဆိုးဂိုဏ်းများကို ပြန်လည်တိုက်ထုတ်နေသည့် အားထုတ်ကြိုးပမ်းမှုများ ကို ဖော်ပြရာရောက်ခဲ့သည်။

ဂျူလ်မီသည် မကြာသေးမီက ဟေတီ၏ အကြီးဆုံး အကျဉ်းထောင်တွင် ထောင်သားအများအပြား ထောင်ဖောက်ပြေးခဲ့သည့် ဖြစ်စဉ်၌ လွတ်မြောက်သွားခဲ့သူဖြစ်သည်။ 

ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က (Antonio Guterres)မူ ဟေတီတွင် အနာဂတ် ရွေးကောက်ပွဲများ မပြုလုပ်မီ သမ္မတအာဏာကို ထိန်းသိမ်းရန် အသွင်ကူးပြောင်းရေးကောင်စီ ဖွဲ့စည်းနေသည့် နိုင်ငံရေး အင်အားစုများကို ကြိုဆိုကြောင်း ပြောကြားခဲ့သည်။ 

ဟေတီလုံခြုံရေးတပ်ဖွဲ့ကိုတွေ့ရစဉ်

ဟေတီတွင် နိုင်ငံအတွင်းမှ တိမ်းရှောင်နေသည့် ဝန်ကြီးချုပ် အေရီယယ် ဟင်နရီ (Ariel Henry) သည် မတ်လ ၁၁ ရက်က ရာထူးမှနုတ်ထွက်ကြောင်း ကြေညာခဲ့သည်။

ထို့နောက် ဟေတီ၏ နိုင်ငံရေးအင်အားစုများကို ပြန်လည် ပေါင်းစည်းရန်အတွက် အသွင်ကူးပြောင်းရေးကောင်စီ ဖွဲ့စည်းရန် စီစဉ်ခဲ့ကြသည်။

"ကုလအတွင်းရေးမှူးချုပ်ဟာ ဟေတီမှာ သမ္မတဆိုင်ရာ အသွင်ကူးပြောင်းရေးကောင်စီအတွက် ကိုယ်စားလှယ် တွေ ရွေးချယ်ပေးနေတဲ့ တိုင်းပြုပြည်ပြု နိုင်ငံရေးအင်အားစုတွေကို လှိုက်လှိုက်လှဲလှဲ ကြိုဆိုပါတယ်" ဟု ဂူတာရက်စ်၏ ပြောရေးဆိုခွင့်ရှိသူ ဟာဟန်ဟက်က ပြောကြားခဲ့သည်။ 

အဖွဲ့ဝင် ၉ ဦး ပါဝင်သည့် အဆိုပါ အသွင်ကူးပြောင်းရေးကောင်စီသည် လာမည့် ရက်ပိုင်းအတွင်း အပြီးသတ် ဖွဲ့စည်းပြီးလိမ့်မည်ဟု ဆိုသည်။

Source: ရိုက်တာ

CNI International News

ဝါရှင်တန်၊ မတ်လ ၂၃ 

အမေရိကန်အစိုးရသည် အာရုနာချယ်ပရာဒေ့ရှ် (Arunachal Pradesh) ဒေသကို အိန္ဒိယ၏ နယ်နိမိတ်တစ်ခု အဖြစ် အသိအမှတ်ပြုထားပြီး ထိုဒေသကို ပိုင်ဆိုင်ကြောင်း ကြေညာသည့် တရုတ်၏ တစ်ဖက်သတ် အားထုတ် ကြိုးပမ်းမှုများကို ပြင်းထန်စွာ ဆန့်ကျင်ကန့်ကွက်ကြောင်း အမေရိကန်နိုင်ငံခြားရေးဝန်ကြီးဌာန၏ လက်ထောက် ပြောရေးဆိုခွင့်ရှိသူ ဗီဒန့် ပက်တယ်လ် (Vedant Patel) က ပြောကြားခဲ့သည်ဟု DND India သတင်းဝက်ဘ်ဆိုက် မှ ဖော်ပြခဲ့သည်။

အိန္ဒိယဝန်ကြီးချုပ်မိုဒီ (Narendra Modi)သည် အာရုနာချယ်ပရာဒေ့ရှ်ပြည်နယ်ကို သွားရောက်ခဲ့ပြီး ဒေသတွင်း ဖွံ့ဖြိုးတိုးတက်ရေး စီမံကိန်းများ စတင်လုပ်ဆောင်ခဲ့သည်။

ထို့နောက် တရုတ်စစ်တပ်က ထိုဒေသကို ၎င်းတို့ ပိုင်ဆိုင်ကြောင်း ထပ်မံကြေညာခဲ့ခြင်း ဖြစ်သည်။ 

တရုတ်၏ ကြေညာချက် ထွက်ပေါ်လာပြီး ရက်ပိုင်းအကြာတွင် အမေရိကန်က တရုတ်၏ ကြေညာချက်ကို ပြင်းပြင်းထန်ထန် ဆန့်ကျင်ကြောင်း ထုတ်ပြန်ခဲ့ခြင်းဖြစ်သည်။

 အာရုနာချယ်ပရာဒေ့ရှ် ဒေသကို အိန္ဒိယပြည်ထဲရေး၀န်ကြီး လာရောက်စဉ်

ယခုသီတင်းပတ် အစောပိုင်းက တရုတ်ကာကွယ်ရေးဝန်ကြီးဌာနက တရုတ်သည် အာရုနာချယ်ပရာဒေ့ရှ်ဒေသကို ပိုင်ဆိုင်ကြောင်း ထပ်မံပြောကြားခဲ့သလို ထိုဒေသသည် တရုတ်နယ်နိမိတ်၏ ရှိရင်းစွဲ ဇန်ဂန် (Zangan) ဒေသ ဖြစ်သည်ဟု ပြောကြားခဲ့သည်။ 

ထို့ပြင် တရုတ်အစိုးရအနေဖြင့် အာရုနာချယ်ပရာဒေ့ရှ်ဟူသည့် အမည်ဖြင့် ပြည်နယ်ထူထောင်ခဲ့သည့် အိန္ဒိယ၏ တရားမဝင် လုပ်ဆောင်ချက်ကို မည်သည့်အခါကမျှ အသိအမှတ်မပြုခဲ့ဘဲ ပြင်းထန်စွာ ဆန့်ကျင်ကြောင်းလည်း တရုတ်စစ်တပ်က ပြောကြားခဲ့သည်။

"ဇန်ဂန်ဟာ တရုတ်ရဲ့ ရှိရင်းစွဲ နယ်မြေတစ်ခု ဖြစ်ပါတယ်။ တရုတ်ဟာ အာရုနာချယ်ပရာဒေ့ရှ် လို့ခေါ်တဲ့ အိန္ဒိယရဲ့ တရားမဝင် ပြည်နယ်ထူထောင်မှုကို ဘယ်တုန်းကမှ အသိအမှတ်မပြုဘဲ ပြင်းထန်စွာ ကန့်ကွက်ပါတယ်" ဟု တရုတ်အမျိုးသားကာကွယ်ရေးဝန်ကြီးဌာန၏ ဗိုလ်မှူးချုပ် ကျန်းရှောင်ကန် (Zhang Xiaogang) က မတ်လ ၁၅ ရက်တွင် ပြောကြားခဲ့သည်။

 အာရုနာချယ်ပရာဒေ့ရှ် ဒေသက တစ်နေရာကို တွေ့ရစဉ်

ထိုပြောကြားချက်နှင့်ပတ်သက်ပြီး အမေရိကန်နိုင်ငံခြားရေးဝန်ကြီးဌာန၏ အမြင်ကို သတင်းထောက်များက မေးမြန်းရာတွင် ပက်တယ်လ်က "အမေရိကန်ပြည်ထောင်စုဟာ အာရုနာချယ်ပရာဒေ့ရှ်ဒေသကို အိန္ဒိယရဲ့ နယ်မြေတစ်ခုအဖြစ် အသိအမှတ် ပြုထားပါတယ်။ ပြီးတော့ နယ်စပ်ဒေသတစ်လျှောက် စစ်ဘက်အရ သော်လည်း ကောင်း အရပ်ဘက်အရသော်လည်းကောင်း အဲဒီဒေသကို သိမ်းပိုက်ဖို့ ဒါမှမဟုတ် ထိပါးဖို့ လုပ်ဆောင်တဲ့ တစ်ဖက်သတ် ကြိုးပမ်းမှုတွေကို ပြင်းပြင်းထန်ထန် ဆန့်ကျင်ကန့်ကွက်ပါတယ်" ဟု ဖြေကြားခဲ့သည်။ 

အိန္ဒိယအစိုးရကလည်း အာရုနာချယ်ပရာဒေ့ရှ်ဒေသကို ပိုင်ဆိုင်ကြောင်း ထွက်ဆိုထားသည့် တရုတ်၏ ကြေညာ ချက်များကို မကြာခဏ ငြင်းဆိုခဲ့ပြီး ထိုပြည်နယ်သည် အိန္ဒိယ၏ ခွဲခြားမရနိုင်သည့် နယ်မြေအစိတ်အပိုင်း ဖြစ်ကြောင်း  ပြောကြားခဲ့သည်။  

"အာရုနာချယ်ပရာဒေ့ရှ်ဟာ အိန္ဒိယရဲ့ ခွဲခြားမရနိုင်တဲ့ အစိတ်အပိုင်းတစ်ခုအဖြစ် အမြဲတမ်း တည်ရှိနေမှာပါ။ အဲဒီ ပြည်နယ်မှာ နေထိုင်သူတွေဟာ အိန္ဒိယအစိုးရရဲ့ စီမံကိန်းတွေကြောင့် ဖွံ့ဖြိုးတိုးတက်မှုတွေကို ရရှိခံစားရပါ လိမ့်မယ်" ဟု အိန္ဒိယပြည်ပရေးရာဝန်ကြီးဌာနက မတ်လ ၁၉ ရက်တွင် ထုတ်ပြန်ခဲ့သည်။ 

Source: DND India

CNI International News

နယူးဒေလီ၊ မတ်လ ၂၃ 

အိန္ဒိယဝန်ကြီးချုပ် မိုဒီ (Narendra Modi) က ဒီမိုကရေစီအပေါ်ထားရှိသည့် အိန္ဒိယ၏ ခိုင်မာသည့် ကတိကဝတ် များကို မတ်လ ၂၀ ရက်နေ့တွင် အလေးထားပြောဆိုခဲ့သည်ဟု Big News Network သတင်းဝက်ဘ်ဆိုက်မှ ဖော်ပြခဲ့သည်။

အိန္ဒိယသည် မိမိတို့ နိုင်ငံသား ၁ ဒသမ ၄ ဘီလျံအတွက် ပြင်းပြသည့် ဆန္ဒနှင့် ရည်မှန်းချက်များကို ဖြည့်ဆည်း ပေးရုံသာမကဘဲ ကမ္ဘာပေါ်တွင် ဒီမိုကရေစီကို ကယ်တင်သူများကိုလည်း အထောက်အကူ ပြုပေးနေကြောင်း မိုဒီက ပြောကြားခဲ့သည်။

လာမည့်လတွင် ပြုလုပ်မည့် လွှတ်တော် ရွေးကောက်ပွဲများနှင့်ပတ်သက်ပြီး မိုဒီက ကမ္ဘာကြီးအနေဖြင့် အကြီးမား ဆုံး ဒီမိုကရေစီပွဲတော်ကြီးကို မြင်တွေ့ရလိမ့်မည်ဖြစ်ပြီး ပြည်သူများသည် ဒီမိုကရေစီအပေါ် ၎င်းတို့၏ ခိုင်မာသည့် ယုံကြည်မှုကို နောက်တစ်ကြိမ် ပြသလိမ့်မည်ဖြစ်ကြောင်း ပြောကြားခဲ့သည်။

မိုဒီသည် မတ်လ ၂၀ ရက်တွင် တောင်ကိုရီးယားက အိမ်ရှင်အဖြစ် လက်ခံကျင်းပသည့် ဒီမိုကရေစီညီလာခံကို ဗွီဒီယို ဆက်သွယ်မှုမှတစ်ဆင့် တက်ရောက်ခဲ့ပြီး မိန့်ခွန်းပြောကြားခဲ့ခြင်း ဖြစ်သည်။ 

ထိုညီလာခံသည် ကမ္ဘာတစ်ဝန်းရှိ ဒီမိုကရေစီနိုင်ငံများအကြား အတွေ့အကြုံများကို ဖလှယ်ရန်နှင့် တစ်နိုင်ငံ၏ အတွေ့အကြုံများကို အခြားနိုင်ငံများက လေ့လာသင်ယူနိုင်ရန်အတွက် အဓိကကျသည့် ပလက်ဖောင်းတစ်ခု ဖြစ်သည်ဟု မိုဒီက ပြောကြားခဲ့သည်။

ယခင်က အမေရိကန်မှ အိမ်ရှင်အဖြစ် လက်ခံကျင်းပလေ့ရှိသည့် ဒီမိုကရေစီညီလာခံ၏ တတိယအကြိမ်မြောက် ညီလာခံကို ယခုနှစ်တွင် တောင်ကိုရီးယားနိုင်ငံ ဆိုးလ်မြို့တော်၌ ကျင်းပခဲ့ခြင်းဖြစ်သည်။

ပြည်သူများ၏ ပြင်းပြသည့် ရည်မှန်းချက်များကို ဖြည့်ဆည်းပေးရာတွင် ဒီမိုကရေစီ၏ အောင်မြင်မှုများအား မိုဒီက အလေးထား ပြောဆိုခဲ့ပြီး နိုင်ငံတကာ စနစ်များနှင့် အင်စတီကျူးရှင်းများကို ဘက်ပေါင်းစုံပါဝင်မှု၊ ဒီမိုကရေစီ ဆန်မှု၊ ပူးပေါင်းဆောင်ရွက်မှုနှင့် တရားမျှတမှုများ ပိုရှိစေရန် လုပ်ဆောင်သင့်သည်ဟုလည်း တိုက်တွန်းခဲ့သည်။

ထို့ပြင် အိန္ဒိယသည် ရှေးခေတ်ကာလများကတည်းက ကျိုးပျက်ခဲ့ခြင်းမရှိသည့် ဒီမိုကရေစီ ယဉ်ကျေးမှုရှိခဲ့သည်။

ဒီမိုကရေစီသည် အိန္ဒိယယဉ်ကျေးမှု လူ့အဖွဲ့အစည်း၏ အသက်သွေးကြော တစ်ခုဖြစ်ကြောင်း မိုဒီက ပြောကြားခဲ့ သည်ဟု အိန္ဒိယပြည်ပရေးရာဝန်ကြီးဌာန ပြောရေးဆိုခွင့်ရှိသူ ရန်ဒီယာ ဂျိုင်စဝယ် (Randhir Jaiswal) က ပြောကြားခဲ့သည်။

Source: Big News Network

CNI International News

ပေကျင်း၊ မတ်လ ၂၂

တရုတ်သည် တိဘက် တက်ကြွလှုပ်ရှားသူများအပေါ် ဆိုက်ဘာသူလျှိုလုပ်မှုဖြင့် တိုက်ခိုက်မှုများကို ဆက်လက် အရှိန်မြှင့်တင်နေပြီး တရုတ်နိုင်ငံပြင်ပတွင် နေထိုင်သည့် တိဘက်လူမျိုးများသည် Trojan ဗိုင်းရပ်စ်များဖြင့် တိုက်ခိုက်ခံနေရသည်ဟု ဟောင်ကောင်ပို့စ်မှ ဖော်ပြခဲ့သည်။ 

တရုတ်အစိုးရ၏ ဟက်ကာအဖွဲ့များသည် ဗုဒ္ဓဘာသာကို ယုံကြည်မှုရှိသည့် ဝက်ဘ်ဆိုက်များကို အဖျက်ဆော့ဖ်ဝဲ များအသုံးပြုပြီး ဆိုက်ဘာတိုက်ခိုက်ခဲ့ကာ အချက်အလက်များ စုဆောင်းနေသည်ဟု ကနေဒါနိုင်ငံအခြေစိုက် ကမ္ဘာလုံးဆိုင်ရာ လုံခြုံရေးကုမ္ပဏီတစ်ခုဖြစ်သည့် ESES က ပြောကြားခဲ့သည်။

ထိုဆိုက်ဘာစစ်ဆင်ရေးသည် အမေရိကန်၊ ဟောင်ကောင်၊ သြစတြေးလျနှင့် အိန္ဒိယနိုင်ငံတို့တွင် နေထိုင်သည့် တိဘက်လူမျိုးများကို တိုက်ခိုက်နေဖြင်း ဖြစ်သည်ဟု ဆိုသည်။

တရုတ်အစိုးရက ထောက်ခံပေးထားသည့် ဟက်ကာအဖွဲ့များသည် ထိုကဲ့သို့ လျှို့ဝှက်သည့် ဆိုက်ဘာတိုက်ခိုက်မှု များဖြင့် Kagyu International Monlam Trust အဖွဲ့ ၏ ဝက်ဘ်ဆိုက်များကို Trojan ဗိုင်းရပ်စ်များဖြင့် တိုက်ခိုက် ခဲ့သည်ဟု ESES က ပြောကြားခဲ့သည်။

 Kagyu International Monlam Trust အဖွဲ့သည် တိဘက် ဗုဒ္ဓဘာသာကို နိုင်ငံတကာက သိစေရန် မြှင့်တင် ပေးနေသည့် အဖွဲ့ဖြစ်သည်။ 

တိဘက်လူမျိုးများကိုတွေ့ရစဉ်

"တရုတ်နဲ့ ဆက်နွှယ်မှုရှိတဲ့ Evasive Panda APT အဖွဲ့ရဲ့ လှုပ်ရှားမှုဟာ ဘာသာရေး စုရုံးမှုဖြစ်တဲ့ Molam ပွဲတော် ကို အမှီပြုပြီး အခြားနိုင်ငံတွေနဲ့ နယ်မြေတွေမှာနေထိုင်တဲ့ တိဘက်လူမျိုးတွေကို ပစ်မှတ်ထားနေပါတယ်" ဟု ESES က ထုတ်ပြန်ခဲ့သည်။ 

၂၀၂၄ ခုနှစ်၊ ဇန်နဝါရီလက ဖြစ်ပွားခဲ့သည့် တရုတ်ဟက်ကာအဖွဲ့များ၏ "Watering Hole attack" အမည်ရှိ ဆိုက်ဘာတိုက်ခိုက်မှုသည်  Kagyu International Monlam Trust အဖွဲ့၏ ဝက်ဘ်ဆိုက်ကို ပစ်မှတ်ထားခဲ့ခြင်း ဖြစ်သည်။ 

ပြီးခဲ့သည့်နှစ် အနည်းငယ်ကလည်း ဗဟိုတိဘက် အုပ်ချုပ်ရေးအဖွဲ့ (CTA) က စီမံကိုင်တွယ်သည့် အီးမေးလ်စနစ် တစ်ခုသည် အဖျက်ဆော့ဖ်ဝဲဖြင့် တိုက်ခိုက်ခံခဲ့ရပြီး အချက်အလက်များ ခိုးယူခံခဲ့ရသည်ဟု ထုတ်ပြန်ချက်တွင် ဖော်ပြခဲ့သည်။ 

ထိုတိုက်ခိုက်မှုသည် တရုတ်အစိုးရက စပွန်ဆာပေးထားသည့် ဟက်ကာများ၏ ဆန်းပြားရှုပ်ထွေးသော ဆိုက်ဘာ တိုက်ခိုက်မှုများထဲတွင် တစ်ခု အပါအဝင်ဖြစ်ကြောင်း တိဘက် မူဝါဒ အင်စတိကျူမှ သုတေသနပညာရှင် တန်ဇင် ဒယ်လ်ဟာက ပြောကြားခဲ့သည်။

Source: ဟောင်ကောင်ပို့စ်

CNI International News

အော့တဝါ၊ မတ်လ ၂၂

ကနေဒါ၏ ဥပဒေနှင့််အညီ အသုံးပြုမည့် အချိန်အထိ အစ္စရေးကို လက်နက်များတင်ပို့ခွင့် ပိတ်ပင်ထားမည်ဟု ကနေဒါအစိုးရက မတ်လ ၂၀ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

ဇန်နဝါရီလ ၈ ရက် မတိုင်မီ အချိန်အထိ ခွင့်ပြုပေးခဲ့သည့် အစ္စရေးသို့ လက်နက်တင်ပို့ ရောင်းချခွင့်များကို ဆက်လက် ပိတ်ပင်ထားမည်ဟု ကနေဒါနိုင်ငံခြားရေးဝန်ကြီး မီလာနိုင် ဂျိုလီ(Melanie Joly) က ပြောကြား ခဲ့သည်။

ကနေဒါ၏ လူနည်းစု လစ်ဘရယ်အစိုးရ၏ နိုင်ငံရေးအရ အသက်ရှင် ရပ်တည်နိုင်မှုသည် လက်ဝဲယိမ်း နယူးဒီမိုကရက်ပါတီ၏ ထောက်ခံမှုအပေါ် မူတည်နေသည်။ 

နယူးဒီမိုကရက်ပါတီကမူ ဂါဇာစစ်ပွဲနှင့်ပတ်သက်ပြီး အစ္စရေးအပေါ် ပြင်းထန်သည့် အရေးယူ လုပ်ဆောင်မှုများ ပြုလုပ်ရန် တောင်းဆိုလျက်ရှိသည်။

"ကနေဒါဟာ ကမ္ဘာပေါ်မှာ ပို့ကုန်ကဏ္ဍ ခွင့်ပြုချက် အတင်းကျပ်ဆုံး နိုင်ငံတွေထဲမှာ ပါဝင်နေပါတယ်။ အစ္စရေး အတွက် အသက်သေစေနိုင်တဲ့ ထုတ်ကုန်တွေ တင်ပို့ခွင့်ကို ဖွင့်ပေးမထားပါဘူး" ဟု ဂျိုလီက ထုတ်ပြန်ခဲ့သည်။

အစ္စရေးအလံကို တွေ့ရစဉ်

ဇန်နဝါရီ ၈ ရက်ကစပြီး အစိုးရသည် အစ္စရေးသို့ လက်နက် တင်ပို့ရောင်းချခွင့် ပါမစ်အသစ်များကို အတည်မပြု ခဲ့ဘဲ မိမိတို့ အစိုးရအဖွဲ့၏ စည်းကမ်းများအတိုင်း လိုက်နာမှု ရှိ/မရှိ မသေချာမချင်း အစ္စရေးသို့ လက်နက်များ တင်ပို့ရောင်းချခွင့် ပါမစ်များကို ပိတ်ပင်သွားမည်ဟု ထုတ်ပြန်ချက်တွင် ဖော်ပြခဲ့သည်။

ကနေဒါဥပဒေအရ ကနေဒါမှ တင်ပို့သည့် လက်နက်များကို နိုင်ငံတကာ လူသားချင်းစာနာ ထောက်ထားမှုဆိုင်ရာ ဥပဒေ သို့မဟုတ် အမျိုးသမီးများနှင့် ကလေးသူငယ်များအပေါ် ဆန့်ကျင်သည့် အကြမ်းဖက်မှုများတွင် အသုံးပြု မည်ဆိုပါက ထိုလက်နက်များ တင်ပို့မှုကို တားမြစ်ပိတ်ပင်ထားသည်။

ထို့ကြောင့် ကနေဒါအစိုးရအနေဖြင့် တင်ပို့ရောင်းချလိုက်သည့် လက်နက်များသည် ငြိမ်းချမ်းရေးနှင့် လုံခြုံရေးကို အထောက်အကူပြုနိုင်မည်လော၊ သို့မဟုတ် လျော့ပါးစေလိမ့်မည်လောဆိုသည့် အချက်ကို ထည့်သွင်း စဉ်းစားရ မည်ဟု ဂျိုလီက ပြောကြားခဲ့သည်။

ကနေဒါလွှတ်တော်သည် မတ်လ ၁၈ ရက်က ဂါဇာပဋိပက္ခနှင့်ပတ်သက်ပြီး အလွတ်သဘော တောင်းဆိုချက် တစ်ခုကို ကြေညာခဲ့ပြီး အစိုးရအနေဖြင့် အစ္စရေးအား လက်နက်များ ပို့ဆောင်မှုကို ခွင့်ပြုမပေးရန် တိုက်တွန်း ခဲ့သည်။

Source: ရိုက်တာ