CNI International News

ဘန်ကောက်၊ ဇန်နဝါရီ ၂၄

ထိုင်းနိုင်ငံတွင် ပြည်သူများကို ဒစ်ဂျစ်တယ်ငွေကြေး ထောက်ပံ့ပေးမည့် အစီအစဉ်ကို အချိန်ဆွဲရန် ဆုံးဖြတ်ခဲ့သည့် ဝန်ကြီးချုပ် ဆရီသာ သာဗီဆင် (Srettha Thavisin) ၏ ဆုံးဖြတ်ချက်ကြောင့် နိုင်ငံ့စီးပွားရေး အခြေအနေနှင့် ပတ်သက်ပြီး ပြည်သူများ၏ စိုးရိမ်မှုများ မြင့်တက်စေခဲ့သည်ဟု အတိုက်အခံများက ယူဆထားကြောင်း Thai PBS World မှ ဖော်ပြခဲ့သည်။

ထို့ပြင် နိုင်ငံကို အုပ်ချုပ်မှုအပိုင်းတွင် ဆရီသာ အစိုးရအဖွဲ့၏ မူဝါဒပိုင်းဆိုင်ရာ အားနည်းမှုများကိုလည်း အတိုက်အခံများက ဝေဖန်ခဲ့ကြသည်။

ဆရီသာ ဦးဆောင်သည့် ၅ လသက်တမ်းရှိ အစိုးရအဖွဲ့သည် ရှင်းလင်းပြတ်သားသည့် မူဝါဒ ရည်မှန်းချက်များကို ချပြရန် ပျက်ကွက်ခဲ့သည်ဟု အတိုက်အခံ Move Forward (MFP)ပါတီ၏ ဒုတိယခေါင်းဆောင် သီရိကန်ယာ သန်ဆာကူလ် (Sirikanya Tansakul)က Thai PBS World နှင့် ပြုလုပ်သည့် အင်တာဗျူးတစ်ခုတွင် ပြောကြားခဲ့ သည်။ 

ထိုင်းဝန်ကြီးချုပ် ဆရီသာသာဗီဆင်ကို တွေ့ရစဉ်

"ကျမအနေနဲ့ ဆရီသာရဲ့ စွမ်းဆောင်ရည်ကို အဆင့် မသတ်မှတ်နိုင်ပါဘူး။ ဘာလို့လဲဆိုတော့ သူဟာ လွှတ်တော် မှာ သိသာထင်ရှားတဲ့ ရည်ရွယ်ချက်တွေကို ဘယ်တုန်းကမှ အဆိုတင်သွင်းခဲ့ခြင်း မရှိလို့ပါပဲ။ စာမေးပွဲတစ်ပွဲ အနေနဲ့ ပြောရမယ်ဆိုရင် ဆရီသာရဲ့ အစိုးရအဖွဲ့ဟာ အောင်မြင်သလား ဒါမှမဟုတ် ကျရှုံးသလားဆိုတာ ပြောဖို့ ခက်ပါတယ်။ ဒါပေမယ့် သူတို့ဟာ စီးပွားရေးကဏ္ဍနဲ့ အခြားကဏ္ဍတွေမှာ သူတို့ အမှန်တကယ်လုပ်ချင်တဲ့ မဟာဗျူဟာကို ချမပြခဲ့ဘူးလို့ ယူဆရတဲ့အတွက် ဖြစ်ပါတယ်" ဟု သီရိကန်ယာက ပြောကြားခဲ့သည်။ 

ထို့ပြင် ဆရီသာ အစိုးရအဖွဲ့သည် အခြေအနေနှင့် လိုက်လျောညီထွေ ဖြစ်စေရန် ရေလိုက်ငါးလိုက် လုပ်ဆောင် နေပြီး ၎င်းတို့ကို ချဉ်းကပ်သည့် မည်သူ့ကိုမဆို ဆွေးနွေးမှုများသာ ပြုလုပ်နေသည်ဟု ၎င်းက ဆက်လက် ပြောကြားခဲ့သည်။ 

ဆရီသာ၏ မဲဆွယ်စည်းရုံးချိန်ကာလက ကတိကဝတ်ဖြစ်သည့် ပြည်သူများကို ဒစ်ဂျစ်တယ်ငွေကြေး ထောက်ပံ့ ပေးမည့် အစီအစဉ်အပေါ် ထင်မြင်ယူဆချက် အမျိုးမျိုး ထွက်ပေါ်လျက်ရှိသည်။ 

ထိုင်းဗဟိုဘဏ်ကိုတွေ့ရစဉ်

စီးပွားရေးခေါင်းဆောင်အချို့ကမူ ထိုအစီအစဉ်သည် နိုင်ငံ၏ စီးပွားရေးကို လှုံ့ဆော်နိုင်လိမ့်မည်ဟု ယူဆထား သော်လည်း ထိုင်းဗဟိုဘဏ် (Bank of Thailand)၏ ထိပ်သီးခေါင်းဆောင်များကမူ ထိုအစီအစဉ်အပေါ် သံသယ ရှိကြောင်း ဖော်ပြခဲ့သည်။
ထို့နောက် အစိုးရအနေနှင့် ပိုမိုအကျိုးရှိစေမည့် ရင်းနှီးမြှုပ်နှံမှုများအတွက် ငွေကြေးများ တိုက်ရိုက်ထောက်ပံ့ရန် ထိုင်းဗဟိုဘဏ်က အကြံပြုထားသည်။

ထိုင်း၏ နိုင်ငံတော်ကောင်စီကလည်း ထိုအစီအစဉ်အပေါ် ယုံကြည်မှု ကင်းမဲ့နေသော်လည်း ဆရီသာကမူ အဆိုပါ အစီအစဉ်ကို ဆက်လက် အကောင်အထည် ဖော်သွားမည်ဖြစ်ကြောင်း၊ သို့သော် နှောင့်နှေးကြန့်ကြာ လိမ့်မည်ဖြစ် ကြောင်း ပြောကြားခဲ့သည်။

ထိုကဲ့သို့ နှောင့်နှေးကြန့်ကြာမှုသည် နိုင်ငံ၏ အခြားဘတ်ဂျက် လျာထားငွေများအပေါ် သက်ရောက်မှု ရှိလာနိုင် ကြောင်း MFP ၏ ဒုတိယခေါင်းဆောင် သီရိကန်ယာက ပြောကြားခဲ့သည်။

Source: Thai PBS 

CNI International News

နယူးဒေလီ၊ ဇန်နဝါရီ ၂၃ 

အိန္ဒိယနိုင်ငံသည် မြန်မာနိုင်ငံနှင့် ထိစပ်နေသည့် နယ်စပ်တစ်လျှောက် ခြံစည်းရိုးကာရန် စီစဉ်နေပြီး နှစ်နိုင်ငံ အကြား နယ်စပ်ဒေသတွင် လွတ်လပ်စွာ သွားလာခွင့် အစီအစဉ်ကိုလည်း ပယ်ဖျက်ရန် စီစဉ်နေသည် Thai PBS World မှ ဖော်ပြခဲ့သည်။

ရာနှင့်ချီသည့် မြန်မာစစ်သားများသည် အိန္ဒိယနိုင်ငံအတွင်းသို့ ထွက်ပြေးဝင်ရောက် လာခဲ့ပြီးနောက် အိန္ဒိယ ပြည်ထဲရေးဝန်ကြီး အမစ် ရှား (Amit Shah) က ထိုအစီအစဉ်ကို ကြေညာခဲ့ခြင်းဖြစ်သည်ဟု အိန္ဒိယမီဒီယာများ က ဇန်နဝါရီ ၂၁ ရက်တွင် ဖော်ပြခဲ့သည်။ 

အိန္ဒိယအစိုးရသည် ကီလိုမီတာ ၁၂၀၀ အရှည်ရှိသည့် အိန္ဒိယ-မြန်မာ နယ်စပ်တစ်လျှောက်လုံးကို ခြံစည်းရိုးကာရန် ဆုံးဖြတ်ခဲ့ကြောင်း ရှားက ဇန်နဝါရီ ၂၀ ရက်တွင် နိုင်ငံအရှေ့မြောက်ပိုင်း အာသံ (Assam) ပြည်နယ်သို့ သွားရောက်ခဲ့သော ခရီးစဉ်အတွင်း ပြောကြားခဲ့သည်။ 

ထို့ပြင် အိန္ဒိယအစိုးရသည် မြန်မာနှင့် လွတ်လပ်စွာ သွားလာရေး သဘောတူညီချက်ကိုလည်း အဆုံးသတ်ရန် စီစဉ်နေကြောင်း ရှားက ပြောကြားခဲ့သော်လည်း သဘောတူညီချက် အဆုံးသတ်မည့် အချိန်အတိအကျကိုမူ ထုတ်ပြန်ခဲ့ခြင်းမရှိပေ။

ထိုသဘောတူညီချက်အရ အိန္ဒိယနှင့် မြန်မာ နယ်စပ်ဒေသများတွင် နေထိုင်သူများသည် ဗီဇာမလိုဘဲ တစ်ဖက်နှင့် တစ်ဖက် သတ်မှတ်ထားသည့် နေရာဒေသများကို သွားလာခွင့် ရရှိထားသည်။

နယ်စပ်ဒေသများတွင် နေထိုင်သူအများစုသည် ယဉ်ကျေးမှုနှင့် ဘာသာရေး ဆက်ဆံရေးများ နီးစပ်နေပြီး ထိုသဘောတူညီချက်ကို အဆုံးသတ်မည်ဟု ရှားက ပြောကြားခဲ့ကြောင်း Times of India သတင်းစာက ဖော်ပြခဲ့သည်။

အိန္ဒိယသည် ပါကစ္စတန်နှင့်ထိစပ်နေသည့် ကီလိုမီတာ ၂၀၀၀ ကျော် အရှည်ရှိသည့် နယ်စပ်ဒေသ၊ ဘင်္ဂလားဒေ့ရှ် နှင့် ထိစပ်နေသည့် ကီလိုမီတာ ၃၁၀၀ အရှည်ရှိသည့် နယ်စပ်များကိုလည်း ခြံစည်းရိုးကာခဲ့ကြောင်း ၂၀၂၁ ခုနှစ်က ထုတ်ပြန်သည့် အစိုးရ၏ အချက်အလက်များတွင် ဖော်ပြထားသည်။

ပြီးခဲ့သည့် နိုဝင်ဘာလက အိန္ဒိယ-မြန်မာနယ်စပ်အနီးရှိ မြန်မာ၏ နယ်မြေများတွင် ရခိုင်ပြည်နယ်၏ AA လက်နက်ကိုင်တပ်ဖွဲ့နှင့် မြန်မာ့တပ်မတော်အကြား တိုက်ပွဲများဖြစ်ပွားခဲ့သည်။

ယခုလအစောပိုင်းက မြန်မာ့တပ်မတော်နှင့် တိုင်းရင်းသား လက်နက်ကိုင်အဖွဲ့များအကြား တရုတ်၏ ကြားဝင် စေ့စပ်ပေးမှုဖြင့် အပစ်အခတ်ရပ်စဲရေး သဘောတူညီချက် ရရှိခဲ့သော်လည်း ထိုသဘောတူညီချက်သည် အိန္ဒိယ နယ်စပ် ဒေသများအနီးတွင် ဖြစ်ပွားနေသည့် တိုက်ပွဲများအပေါ် အကျုံးဝင်ခဲ့ခြင်းမရှိဘဲ တိုက်ခိုက်မှုများ ဆက်လက် ဖြစ်ပွားနေသည်။

Source: Thai PBS World

CNI International News

တိုင်ပေ၊ ဇန်နဝါရီ ၂၃

ဇန်နဝါရီ ၂၂ ရက်က ထိုင်ဝမ်ရေလက်ကြားပေါ်တွင် ပျံသန်းနေသည့် တရုတ်၏ မိုးပျံပူဖောင်း ၆ လုံးကို ထောက်လှမ်းတွေ့ရှိခဲ့သည်ဟု ထိုင်ဝမ်ကာကွယ်ရေး ဝန်ကြီးဌာနက ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထိုမိုးပျံပူဖောင်းများအနက် တစ်လုံးသည် ထိုင်ဝမ်ကျွန်းပေါ်တွင် ဖြတ်သန်းသွားခဲ့ကြောင်း ထိုင်ဝမ်ကာကွယ်ရေး ဝန်ကြီးဌာနက ပြောသည်။

တရုတ်သည် ဇန်နဝါရီ ၁၃ ရက်က ကျင်းပခဲ့သည့် ထိုင်ဝမ်ရွေးကောက်ပွဲများမတိုင်မီ ရက်ပိုင်းအလိုတွင် ထိုင်ဝမ် လူထုကို မိုးပျံပူဖောင်းများအသုံးပြုပြီး စိတ်ဓာတ်စစ်ဆင်ရေး ဆင်နွှဲခဲ့ကာ လေကြောင်းလုံခြုံရေးအား ခြိမ်းခြောက် ခဲ့ကြောင်း ထိုင်ဝမ်မှ ယခုလအစောပိုင်း၌ စွပ်စွဲခဲ့သည်။

ယခုဖြစ်စဉ်နှင့်ပတ်သက်ပြီး တရုတ်ကာကွယ်ရေးဝန်ကြီးဌာနကမူ မှတ်ချက်ပေးရန် ငြင်းဆိုခဲ့သည်။ 

တရုတ်သည် ပြီးခဲ့သည့် လအတွင်းကလည်း မိုးပျံပူဖောင်းများနှင့်ပတ်သက်ပြီး ထိုင်ဝမ်၏ စွပ်စွဲချက်များကို ငြင်းဆိုခဲ့သည်။

ပြီးခဲ့သည့်နှစ် ဖေဖော်ဝါရီလက အမေရိကန်သည် ၎င်း၏ နယ်နိမိတ်အပေါ်တွင် ပျံသန်းနေသည့် တရုတ်မိုးပျံ ပူဖောင်းတစ်လုံးကို ပစ်ချခဲ့ပြီးနောက် တရုတ်သည် ကင်းထောက်လှမ်းမှုများ ပြုလုပ်ရန်အတွက် မိုးပျံပူဖောင်း များကို အသုံးပြုနေခြင်း ရှိ/မရှိဆိုသည့် အချက်အပေါ် ကမ္ဘာလုံးဆိုင်ရာ စိုးရိမ်မှုများ မြင့်တက်ခဲ့သည်။ 

တရုတ်နဲ့ ထိုင်ဝမ်ကို တွေ့ရစဉ်

အမေရိကန်ကမူ ၎င်းတို့ ပစ်ချခဲ့သည့် မိုးပျံပူဖောင်းသည် တရုတ်၏ ကင်းထောက် မိုးပျံပူဖောင်းဖြစ်သည်ဟု ပြောကြားခဲ့သော်လည်း တရုတ်ကမူ ထိုမိုးပျံပူဖောင်းသည် အရပ်ဖက်သုံး မိုးပျံပူဖောင်းဖြစ်ပြီး မတော်တဆ လမ်းလွဲသွားခဲ့ခြင်းဖြစ်သည်ဟု ပြောကြားခဲ့သည်။ 

ထိုင်ဝမ်ကာကွယ်ရေးဝန်ကြီးဌာနက ယခုနောက်ဆုံးဖြစ်စဉ်ကို ပြီးခဲ့သည့် ၂၄ နာရီအတွင်း တရုတ်စစ်တပ်၏ လှုပ်ရှားမှုများကို ထောက်လှမ်း သိရှိခဲ့ကြောင်း၊ ထိုင်ဝမ်ရေလက်ကြားပေါ်၌ တရုတ်၏ မိုးပျံပူဖောင်း ၆ လုံး ပျံသန်းခဲ့ကြောင်း ဇန်နဝါရီ ၂၂ ရက်တွင် ထုတ်ပြန်ခဲ့သည်။ 

ထိုမိုးပျံပူဖောင်းများထဲမှ ၁ လုံးသည် ထိုင်ဝမ်ကျွန်းပေါ်တွင် ဖြတ်ပျံခဲ့ပြီး ကျန် ၅ လုံးသည် အရှေ့ဘက်စွန်းစွန်းသို့ ဦးတည်ပျံသန်း၍ မြင်ကွင်းမှ ပျောက်ကွယ်သွားကြောင်း ထုတ်ပြန်ချက်တွင် ဖော်ပြခဲ့သည်။ 

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် သတ်မှတ်ထားပြီး လိုအပ်ပါက အင်အားသုံး သိမ်းယူ မည်ဟု ပြောကြားထားသည်။

သို့သော် ထိုင်ဝမ်ကမူ တရုတ်၏ အချုပ်အခြာအာဏာပိုင်ကြောင်း ကြေညာချက်များကို ငြင်းဆိုခဲ့သည်။

Source: ရိုက်တာ

CNI International News

အယုဒ္ဓယ၊ ဇန်နဝါရီ ၂၃

အိန္ဒိယဝန်ကြီးချုပ် မိုဒီ (Narendra Modi)သည် နိုင်ငံမြောက်ပိုင်း အယုဒ္ဓယမြို့တွင် သမိုင်းဝင် ဗလီတစ်ခု ပျက်စီးခဲ့သည့် နေရာပေါ်၌ တည်ဆောက်ထားသော အငြင်းပွားဖွယ် ဟိန္ဒူဘုရားကျောင်းကို ဇန်နဝါရီ ၂၂ ရက်က ဖွင့်လှစ်ခဲ့သည်ဟု အေပီမှ ဖော်ပြခဲ့သည်။ 

ထိုလုပ်ဆောင်ချက်သည် အိန္ဒိယနိုင်ငံကို ဒီမိုကရေစီနိုင်ငံအဖြစ်မှ ဟိန္ဒိူနိုင်ငံအဖြစ် အသွင်ပြောင်းလဲရန် ကြိုးပမ်း နေသည့် မိုဒီ၏ အားထုတ်ကြိုပမ်းမှုအတွက် နိုင်ငံရေးဆိုင်ရာ ဂုဏ်ယူစရာကောင်းသော လုပ်ဆောင်မှုတစ်ခု ဖြစ်ခဲ့သည်။

အဆိုပါ ဘုရားကျောင်းသည် ဟိန္ဒူဘာသာ၏ အရှင် ရာမ (Lord Ram) အတွက် ရည်စူးဆောက်လုပ်ခဲ့ခြင်းဖြစ်ပြီး အရှင် ရာမကို ကြည်ညိုကိုင်းရှိုင်းသည့် သန်းနှင့်ချီသော ဟိန္ဒိူဘာသာဝင်များ၏ ဘုရားဝတ်ပြုခွင့်ရရန် တောင်းဆို မှုများကို ဖြည့်ဆည်းပေးရာ ရောက်ခဲ့သည်။ 

 ဟိန္ဒူဘုရားကျောင်း ဖွင့်ပွဲကိုတွေ့ရစဉ်

မိုဒီ၏ အာဏာရ BJP ပါတီနှင့် ဟိန္ဒိူအမျိုးသားရေး အုပ်စုများသည် မွန်ဂိုနှင့် ဗြိတိသျှကိုလိုနီ လက်အောက်သို့ ကျရောက်ခဲ့သည့် အိန္ဒိယနိုင်ငံတွင် ဖိနှိပ်ခံခဲ့ရသော ဟိန္ဒူဘာသာ၏ ဂုဏ်သိက္ခာကို ပြန်လည်မြှင့်တင်ရန် ကြိုးပမ်း လုပ်ဆောင်နေကြောင်း ပြောကြားခဲ့သည်။ 

မိုဒီနှင့် BJP ပါတီကမူ ထိုဘုရားကျောင်းဖွင့်ပွဲသည် ယခုနှစ် နွေရာသီတွင် ပြုလုပ်မည့် ရွေးကောက်ပွဲ၌ ၎င်းတို့အား သုံးနှစ်ဆက်တိုက် အနိုင်ရရှိစေရန် အထောက်အကူ ဖြစ်စေလိမ့်မည်ဟု မျှော်လင့်ထားကြသည်။ 

သို့သော် ထိုဘုရားကျောင်းသည် အပြီးသတ် တည်ဆောက်ရခြင်း မရှိသေးဘဲ ဆောက်လုပ်ရေးလုပ်ငန်းများ ဆက်လက် လုပ်ဆောင်နေဆဲဖြစ်သဖြင့် မိုဒီသည် မဲဆန္ဒရှင်များ၏ ထောက်ခံမှုကို ရရှိရန် အလျင်စလို လုပ်ဆောင်ခဲ့ခြင်းဖြစ်သည်ဟု ဝေဖန်ရေးသမားများက သုံးသပ်ခဲ့ကြသည်။ 

ဟိန္ဒူဘုရားကျောင်း ဖွင့်ပွဲကိုတွေ့ရစဉ်

ဘုရားကျောင်းဖွင့်ပွဲ အခမ်းအနားတွင် ဟိန္ဒူဘုန်းတော်ကြီးများက ဓမ္မတေးများ ရွတ်ဖတ်ပူဇော်နေချိန်၌ မိုဒီသည် ရိုးရာဝတ်စုံကို ဝတ်ဆင်ပြီး ဘုရားကျောင်းအတွင်းရှိ အမြင့် ၄ ပေ ၃ လက်မရှိသည့် အရှင်ရာမ၏ ရုပ်တုကို ပူဇော် နေသည်ကို မြင်တွေ့ရသည်။ 

ထိုဘုရားကျောင်းဖွင့်ပွဲ အခမ်းအနားကို စက်မှုလုပ်ငန်းရှင်များ၊ နိုင်ငံရေးသမားများ၊ နာမည်ကြီး အနုပညာရှင်များ အပါအဝင် လူပေါင်း ၇၅၀၀ နီးပါးက တက်ရောက်ကြည့်ရှုခဲ့ပုံများအား ရုပ်သံမှ ထုတ်လွှင့်ပြသခဲ့သည်။

Source: အေပီ

CNI International News

ဆိုးလ်၊ ဇန်နဝါရီ ၂၂

အမေရိကန်ကို ရင်ဆိုင်ဆန့်ကျင်ရန်နှင့် ဝင်ရိုးစုံ ကမ္ဘာ့အခင်းအကျင်း အသစ်တစ်ခု ဖော်ဆောင်ရန် ရုရှားနှင့် နည်းဗျူဟာမြောက်/မဟာဗျူဟာမြောက် ပူးပေါင်းဆောင်ရွက်မှုအား မြှင့်တင်သွားမည်ဟု မြောက်ကိုရီးယားက ပြောကြားခဲ့ကြောင်း အေပီမှ ဖော်ပြခဲ့သည်။ 

ထို့ပြင် မြောက်ကိုရီးယား နိုင်ငံခြားရေးဝန်ကြီး ချိုးဆွန်ဟွီ (Choe Son Hui) သည် ပြီးခဲ့သည့် သီတင်းပတ်က ရုရှားနိုင်ငံ၊ မော်စကိုမြို့တော်တွင် ရုရှားသမ္မတ ဗလာဒီမာ ပူတင် (Vladimir Putin)၊ ရုရှားနိုင်ငံခြားရေးဝန်ကြီး ဆာဂျေ လာဗရော့ဗ် (Sergey Lavrov)တို့နှင့် အစည်းအဝေး ပြုလုပ်ခဲ့သည်။

ထိုအစည်းအဝေးတွင် ပူတင်က မြောက်ကိုရီးယားသို့ မကြာမီအချိန်အတွင်း လာရောက်မည့်အကြောင်းကို ထပ်လောင်း အတည်ပြုခဲ့သည်ဟု မြောက်ကိုရီးယားနိုင်ငံခြားရေးဝန်ကြီးဌာနမှ ဖော်ပြခဲ့သည်။

ပြီးခဲ့သည့် စက်တင်ဘာလက မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) ၏ ရုရှားခရီးစဉ်တွင် ပူတင်နှင့် ထိပ်သီး အစည်းအဝေး ပြုလုပ်ခဲ့ခြင်းအားဖြင့် မြောက်ကိုရီးယားသည် ရုရှားနှင့် ဆက်ဆံရေးများ မြှင့်တင်နေသည့် အခြေအနေကို ပြသခဲ့သည်။

ကင်မ်သည် နိုင်ငံတကာ အသိုင်းအဝိုင်းတွင် သံတမန်ရေးအရ ဝိုင်းပယ်ခံထားရသည့် အခြေအနေကို ချိုးဖျက်ရန် နှင့် အမေရိကန်၊ တောင်ကိုရီးယား၊ ဂျပန်တိုနှင့် နျူကလီးယား ထိပ်တိုက်တွေ့မှုများ၌ မြောက်ကိုရီးယား၏ ရပ်တည်ချက်ကို ပိုမိုခိုင်မာစေရန် ကြိုးပမ်းလျက်ရှိသည်။

ထို့ပြင် မြောက်ကိုရီးယား၏ နောက်ဆုံးအကြိမ် ပဲ့ထိန်းဒုံးကျည် စမ်းသပ်မှုနှင့်ပတ်သက်ပြီး အရေးပေါ် အစည်းအဝေး ခေါ်ယူခဲ့သည့် ကုလသမဂ္ဂ လုံခြုံရေးကောင်စီကို ဝေဖန်ရှုတ်ချထားသည့် အစီရင်ခံစာ တစ်စောင်ကို မြောက်ကိုရီးယားနိုင်ငံခြားရေးဝန်ကြီးဌာနက ဇန်နဝါရီ ၂၁ ရက်တွင် ထုတ်ပြန်ခဲ့သည်။

ကင်မ်ဂျုံအန်နဲ့ ပူတင်ကို တွေ့ရစဉ်

ဇန်နဝါရီ ၁၄ ရက်က လောင်စာတောင့်သုံး တာလတ်ပစ် ပဲ့ထိန်းဒုံးကျည် စမ်းသပ်ပစ်လွှတ်မှုသည် မြောက်ကိုရီးယား၏ ကာကွယ်ရေး စွမ်းဆောင်ရည်များကို မြှင့်တင်သည့် ပုံမှန်လုပ်ဆောင်ချက်တစ်ခုဖြစ်ပြီး အိမ်နီးချင်းနိုင်ငံများကို ခြိမ်းခြောက်ခြင်း မဟုတ်ကြောင်း ထုတ်ပြန်ချက်တွင် ဖော်ပြခဲ့သည်။

မြောက်ကိုရီးယား၏ ဒုံးကျည်စမ်းသပ်မှုများနှင့် ခြိမ်းခြောက်မှုများ မြင့်တက်လာသည့် အခြေအနေအပေါ် နှုတ်ဆိတ်နေခြင်း မပြုရန် တောင်ကိုရီးယားက ဇန်နဝါရီ ၁၈ ရက်တွင် ကုလသမဂ္ဂ လုံခြုံရေးကောင်စီကို တိုက်တွန်းခဲ့သည်။

လုံခြုံရေးကောင်စီ အမြဲတမ်းအဖွဲ့ဝင် နိုင်ငံများဖြစ်သည့် ရုရှားနှင့် တရုတ်တို့ကမူ မကြာသေးမီက မြောက်ကိုရီးယား၏ လက်နက် စမ်းသပ်မှုများနှင့်ပတ်သက်ပြီး လုံခြုံရေးကောင်စီတွင် ပိတ်ဆို့မှုများချမှတ်ရန် အမေရိကန်၏ ကြိုးပမ်းမှုများကို တားမြစ်ပိတ်ပင်ခဲ့သည်။

အမေရိကန်နှင့် ၎င်း၏ မဟာမိတ်များကမူ မြောက်ကိုရီးယားသည် ယူကရိန်းစစ်ပွဲတွင် ရုရှားကို လက်နက်များ ထောက်ပံ့ပေးနေပြီး အပြန်အလှန်အနေဖြင့် ရုရှားနိုင်ငံထံမှ စီးပွားရေးနှင့် စစ်ရေး အထောက်အပံ့များ ရယူနေဖွယ် ရှိကြောင်း စွပ်စွဲခဲ့သော်လည်း ထိုစွပ်စွဲချက်များကို မြောက်ကိုရီးယားနှင့် ရုရှားက ငြင်းဆိုခဲ့သည်။

Source: အေပီ

CNI International News

မော်စကို၊ ဇန်နဝါရီ ၂၂

ရုရှားလေကြောင်းရန် ကာကွယ်ရေးတပ်ဖွဲ့သည် စမိုလန့်စ်ခ် (Smolensk)ဒေသတွင် ယူကရိန်း၏ တိုက်ခိုက်ရေး ဒရုန်းများကို ပစ်ချနိုင်ခဲ့ကြောင်း ရုရှားကာကွယ်ရေးဝန်ကြီးဌာနက  ဇန်နဝါရီ ၂၁ ရက်တွင် ထုတ်ပြန်ခဲ့သည်ဟု တာ့စ်သတင်းဌာနမှ ဖော်ပြခဲ့သည်။

ဇန်နဝါရီ ၂၀ ရက်က မော်စကိုစံတော်ချိန် ည ၁၁ နာရီ ၅၀ မိနစ် အချိန်တွင် စမိုလန့်စ်ခ်ဒေသ၏ ကောင်းကင်ယံ ပေါ်၌ ယူကရိန်း၏ တိုက်ခိုက်ရေး ဒရုန်းတစ်စင်းကို ပစ်ချခဲ့ကြောင်း ရုရှားကာကွယ်ရေးဝန်ကြီးဌာနက ထုတ်ပြန်ခဲ့ သည်။

ရုရှားလေကြောင်းရန်ကာကွယ်ရေးကိုတွေ့ရစဉ်

ဇန်နဝါရီ ၂၁ ရက် မော်စကိုစံတော်ချိန် မနက် ၁ နာရီခွဲတွင် ရုရှား၏ အဆောက်အအုံများကို ပစ်မှတ်ထားသည့် ယူကရိန်းတပ်ဖွဲ့များက လွှတ်တင်လိုက်သော ဒရုန်းတစ်စင်းအား ထပ်မံ ပစ်ချနိုင်ခဲ့သည်ဟု ထုတ်ပြန်ချက်မှာ ဖော်ပြခဲ့သည်။

"စမိုလန့်စ်ခ်ဒေသပေါ်မှာ ပျံသန်းနေတဲ့ ယူကရိန်းရဲ့ ဒရုန်း ၃ စင်းကို လေကြောင်းကာကွယ်ရေးတပ်ဖွဲ့တွေက ထပ်မံပစ်ချနိုင်ခဲ့ပါတယ်"ဟု ရုရှားကာကွယ်ရေးဝန်ကြီးဌာနက ပြောသည်။

ဇန်နဝါရီ ၂၀ ရက်က ယူကရိန်း၏ ပထမအကြိမ် ဒရုန်းတိုက်ခိုက်မှုကြောင့် ထိခိုက်၊ သေဆုံးသူနှင့် အဆောက်အအုံ များ  ပျက်စီးမှု တစ်စုံတစ်ရာ မရှိခဲ့ကြောင်း စမိုလန့်စ်ခ်ဒေသ အုပ်ချုပ်ရေးမှူး ဗစ်စီလီ အနိုခင် (Vasily Anokhin) က ၎င်း၏ Telegram ချန်နယ်တွင် ပြောကြားခဲ့သည်။

Source: တာ့စ်

CNI International News

မနီလာ၊ ဇန်နဝါရီ ၂၂ 

တောင်တရုတ်ပင်လယ်တွင် ရေပြင်နယ်နိမိတ် ပိုင်ဆိုင်မှုများနှင့် ပတ်သက်ပြီး ကာလကြာရှည် အငြင်းပွားနေခဲ့ သည့် ဖိလစ်ပိုင်နှင့်တရုတ်နိုင်ငံအကြား တင်းမာမှုများ မြင့်တက်လာနိုင်ကြောင်း Japan Times မှ ဖော်ပြခဲ့သည်။ 

ထိုင်ဝမ်အရေးသည် အမေရိကန်နှင့် တရုတ်အကြား အလှည့်အပြောင်း တစ်ခုအဖြစ် ယူဆခံထားရချိန်တွင် တောင်တရုတ်ပင်လယ် ပိုင်ဆိုင်မှု အငြင်းပွားသည့် ပြဿနာသည် အမေရိကန်အတွက် ပထဝီနိုင်ငံရေးအရ နောက်ထပ် ဖိအားတစ်ခုဖြစ်လာနိုင်ကြောင်း ကျွမ်းကျင်သူများက သုံးသပ်ခဲ့သည်။

လက်ရှိတွင် ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr.) သည် ဂျပန်နှင့်် သြစတြေးလျ နိုင်ငံများကဲ့သို့ အမေရိကန်နှင့် ကာကွယ်ရေးကဏ္ဍ ဆက်ဆံမှုများကို တိုးမြှင့်ပြီး ဖိလစ်ပိုင်၏ ကာကွယ်ရေး စွမ်းဆောင်ရည်များအား မြှင့်တင်လျက်ရှိသည်။ 

မကြာသေးမီ ရက်ပိုင်းအတွင်းကလည်း ဖိလစ်ပိုင်သည် တောင်တရုတ်ပင်လယ်အတွင်းတွင် ကျွန်းများ တည်ဆောက်မည့် အစီအစဉ်ကို ပြောကြားခဲ့သဖြင့် တရုတ်အား ဒေါသထွက်စေခဲ့သည်။

ထိုကျွန်းများကို ဖိလစ်ပိုင်၏ နယ်နိမိတ်အတွင်း ထည့်သွင်း သတ်မှတ်မည်ဖြစ်ပြီး ထိုကျွန်းများပေါ်တွင် စစ်သား များ ဖြန့်ကြက်ချထားမည့် အစီအစဉ်ရှိကြောင်း ဖိလစ်ပိုင်းစစ်တပ် အကြီးအကဲ ရိုမီရို ဘရော်နာ (Romeo Brawner)က ပြီးခဲ့သည့် သီတင်းပတ်၌ ပြောကြားခဲ့သည်။ 

ဖိလစ်ပိုင်နဲ့ တရုတ်အားပြိုင်မှုကိုတွေ့ရစဉ်

ဖိလစ်ပိုင်သည် တရုတ်နှင့် ပိုင်ဆိုင်မှု အငြင်းပွားနေသည့် Second Thomas သောင်ခုံအနီးတွင် ၁၉၉၉ ခုနှစ် ကတည်းက စစ်သင်္ဘော အပျက်တစ်စီးကို ကျောက်ချရပ်နားထားကာ ထိုသင်္ဘောပေါ်တွင် ဖိလစ်ပိုင်စစ်သား များအား စခန်းချထားခဲ့သည်။

"ကျနော်တို့အနေနဲ့ ပိုပြီး သက်သောင့်သက်သာ ရှိစေမယ့် နေရာတွေ၊ ကျနော်တို့ စစ်သားတွေ နေထိုင်လို့ရမယ့် နေရာတွေကို ဖန်တီးပေးဖို့ ကြိုးပမ်းနေပါတယ်" ဟု ဘရော်နာက ပြောကြားခဲ့သည်။

ထို့ပြင် ဖိလစ်ပိုင်စစ်တပ်သည် စစ်သင်္ဘောများ၊ ရေဒါများ၊ လေယာဉ်များကို ထပ်မံဝယ်ယူရန် စီစဉ်နေပြီး မိမိတို့၏ နယ်နိမိတ်များအား ကာကွယ်ရန် အာရုံစိုက် လုပ်ဆောင်သွားမည်ဟု ဘရော်နာက ပြောသည်။

တရုတ်သည် နှစ်စဉ် ကုန်သွယ်မှုတန်ဖိုး ဒေါ်လာ ၃ ထရီလျံရှိသည့် ပင်လယ်ကူး သင်္ဘောများ ဖြတ်သန်းသော တောင်တရုတ်ပင်လယ်၏ ရေပြင်နယ်နိမိတ် အားလုံးနီးပါးကို ပိုင်ဆိုင်ကြောင်း ကြေညာထားသဖြင့် ဖိလစ်ပိုင်၊ ဘရူနိုင်း၊ မလေးရှား၊ ဗီယက်နမ်၊ ထိုင်ဝမ်တို့နှင့် နယ်မြေပိုင်ဆိုင်မှုများ အငြင်းပွားလျက်ရှိသည်။

Source: Japan Times

CNI International News

ဘဂ္ဂဒက်၊ ဇန်နဝါရီ ၂၂ 

အီရတ်နိုင်ငံရှိ အမေရိကန်စစ်စခန်းတစ်ခုကို အီရန်က ကျောထောက်နောက်ခံ ပေးထားသည့် လက်နက်ကိုင်အဖွဲ့ များက တိုက်ခိုက်ခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ဆီးရီးယားနိုင်ငံ၊ ဒမတ်စကတ် (Damascus) မြို့တော်တွင် အီရန်လက်ရွေးစင်တပ်ဖွဲ့များ နေထိုင်သည့် အဆောက် အအုံ တစ်ခုကို အစ္စရေးက ပြင်းထန်စွာ တိုက်ခိုက်ခဲ့သည့် ဖြစ်စဉ်အား လက်တုန့်ပြန်သွားမည်ဟု အီရန်က သတိ ပေးခဲ့ပြီးနောက် ထိုတိုက်ခိုက်မှုများ ဖြစ်ပွားခဲ့သည်။

ထိုတိုက်ခိုက်မှုကြောင့် အီရတ်နှင့် အမေရိကန်နိုင်ငံသားများ ထိခိုက်နိုင်ခြေရှိကြောင်း အမေရိကန် ဗဟိုစစ်ဌာန ချုပ် (CENTCOM) က ဇန်နဝါရီ ၂၀ ရက်တွင် ပြောကြားခဲ့သည်။

ဆီးရီးယားနိုင်ငံရှိ အီရန်တော်လှန်ရေး အစောင့်တပ်ဖွဲ့ကို အစ္စရေးက ပစ်မှတ်ထား တိုက်ခိုက်ခဲ့ပြီးနောက် နာရီပိုင်း အကြာတွင် အီရတ်ရှိ အမေရိကန်စစ်သားများ တိုက်ခိုက်ခံခဲ့ရခြင်း ဖြစ်သည်။

"အီရတ်နိုင်ငံ အနောက်ပိုင်းက အယ် အာဆက် လေတပ်စခန်း (al-Assad Airbase)ကို အီရန်က ကျောထောက် နောက်ခံပေးထားတဲ့ စစ်သွေးကြွတွေက ပဲ့ထိန်းဒုံးကျည်တွေ၊ ရော့ကတ်တွေနဲ့ ပစ်ခတ်တိုက်ခိုက်ခဲ့ပါတယ်" ဟု CENTCOM က X လူမှုမီဒီယာတွင် ရေးသားဖော်ပြခဲ့သည်။

 တိုက်ခိုက်ခံရလို့ ပျက်စီးနေစဉ်

ထိုဒုံးကျည်များနှင့် ရော့ကတ်အများစုကို လေတပ်စခန်း၏ လေကြောင်းရန် ကာကွယ်ရေးစနစ်များက ကြားဖြတ် ပစ်ချနိုင်ခဲ့သော်လည်း အချို့ဒုံးကျည်များသည် လေတပ်စခန်းကို ထိမှန်မှုများ ရှိခဲ့သည်ဟုလည်း CENTCOM က ထုတ်ပြန်ခဲ့သည်။

ပြီးခဲ့သည့်နှစ် အောက်တိုဘာ ၇ ရက်က အစ္စရေးနှင့် ဟားမာ့စ်စစ်ပွဲ စတင်ဖြစ်ပွားခဲ့ချိန်မှစပြီး အီရတ်နှင့် ဆီးရီးယားနိုင်ငံရှိ အမေရိကန်တပ်ဖွဲ့များအပေါ် တိုက်ခိုက်မှုများ မြင့်တက်လာခဲ့သည်။ 

အစ္စရေးကလည်း ဂါဇာကို ထိုးစစ်ဆင် တိုက်ခိုက်မှုများ ပြုလုပ်နေချိန်တွင် ဆီးရီးယားနှင့် လက်ဘနွန်နိုင်ငံတို့ရှိ အီရန်နှင့် ဆက်နွှယ်မှုရှိသည့် လက်နက်ကိုင်အဖွဲ့များကို ပစ်မှတ်ထား တိုက်ခိုက်ခဲ့သည်။

အပြန်အလှန်အနေဖြင့် အီရန်က ထောက်ပံ့ပေးထားသည့် တော်လှန်ရေးဝင်ရိုးစွန်းအဖွဲ့တွင် ပါဝင်သော ယီမင် နိုင်ငံရှိ ဟူရ်သီ (Houthi)သူပုန်အဖွဲ့ကလည်း ပင်လယ်နီ (Red Sea)၌ အစ္စရေးနှင့် ဆက်နွှယ်မှုရှိသည့် ကုန်တင် သင်္ဘောများကို တိုက်ခိုက်လျက်ရှိသည်။

အစ္စရေးအနေနှင့် ဂါဇာဒေသတွင် ဆင်နွှဲနေသည့် စစ်ပွဲကို ရပ်တန့်ရန်၊ ပိတ်ဆို့ထားသော ဂါဇာဒေသအတွင်းသို့ အစားအစာ၊ ဆေးဝါးများ အပါအဝင် အရေးတကြီး လိုအပ်နေသည့် လူသားချင်းစာနာ ထောက်ထားမှုဆိုင်ရာ အကူအညီများပေးရန် ဟူရ်သီအဖွဲ့က တောင်းဆိုထားသည်။

Source: အယ်လ်ဂျာဇီးယား

CNI International News

ဘန်ကောက်၊ ဇန်နဝါရီ ၂၀

ထိုင်းနိုင်ငံတွင် ပြည်သူအားလုံးကို ဒစ်ဂျစ်တယ်ငွေကြေး ထောက်ပံ့ပေးမည်ဟု ကတိပြုခဲ့သည့် ဖြူးထိုင်း (Pheu Thai) ပါတီသည် ၎င်း၏ ကတိစကားကြောင့် နိုင်ငံရေးအရ စိန်ခေါ်မှုများနှင့် ရင်ဆိုင်ရနိုင်ခြေရှိသည်ဟု Thai PBS World မှ ဖော်ပြခဲ့သည်။

လက်ရှိတွင် ဆိုင်းငံ့ထားရသည့် ဒစ်ဂျစ်တယ်ငွေကြေး ထောက်ပံ့မှု အစီအစဉ်နှင့် ဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) သည် အကျဉ်းထောင်ပြင်ပ၌ ဆေးဝါးကုသမှု ခံယူနေသည့် အခြေအနေများ သည် သက်ဆင်နှင့် ဆက်နွှယ်မှုရှိသော ဖြူးထိုင်းပါတီအတွက် ခေါင်းခဲစရာ အခြေအနေများ ဖြစ်နေသည်ဟု ကျွမ်းကျင်သူများက ပြောသည်။

သက်ဆင်သည် အလုံးစုံ လွတ်ငြိမ်းချမ်းသာခွင့်နှင့် ပြန်လည် လွတ်မြောက်တော့မည့် အခြေအနေအပေါ် နိုင်ငံရေး ပါတီများက မေးခွန်းထုတ်နေချိန်တွင် ဖြူးထိုင်းပါတီသည် ဒစ်ဂျစ်တယ်ငွေကြေး ထောက်ပံ့မှု အစီအစဉ်အတွက် ဘတ် ၅၀၀ ဘီလျံချေးယူရန် စီစဉ်လျက်ရှိသည်။

နိုင်ငံ့ဘတ်ဂျက်နှင့်ပတ်သက်ပြီး နောက်ဆုံးအကြိမ် ပြုလုပ်သည့် အချေအတင် ဆွေးနွေးမှုများတွင် အတိုက်အခံ ဖြစ်သည့် Move Forward ပါတီ (MFP) က သက်ဆင်၏ အရေးကိစ္စနှင့် ဒစ်ဂျစ်တယ်ငွေကြေး အစီအစဉ် ပြဿနာ များသည် အလွယ်တကူ ပေါ်ပေါက်လာနိုင်ကြောင်း အရိပ်အမြွက် ပြောကြားခဲ့သည်။

ထိုအခြေအနေမျိုးတွင် နိုင်ငံတော်ဘဏ္ဍာများ ဆုံးရှုံးမှုများ ဖြစ်နိုင်ကြောင်းနှင့် ထင်ရှားသည့် ဥပမာတစ်ခုမှာ သက်ဆင်၏ ဆေးကုသစရိတ်အတွက် ထိုင်းအခွန်ထမ်း ပြည်သူများ၏ ငွေကြေးများကို အသုံးပြုနေရသည့် အချက်အား MFP က ထောက်ပြပြောခဲ့သည်။

ထို့ပြင် ယခင်က မျှော်မှန်းထားခဲ့ဖူးခြင်းမရှိသည့် ရှပ်ဝါနှင့် လိမ္မော်ရောင် ဆန္ဒပြသူများသည်လည်း သက်ဆင် လွတ်မြောက်မည့် အရေးကိစ္စအပေါ် ကျေနပ်မှုမရှိဘဲ လမ်းများပေါ်ထွက်ကာ ဆန္ဒပြဖွယ်ရှိနေသည်။

အဘယ်ကြောင့်ဆိုသော် ရှပ်ဝါ တက်ကြွလှုပ်ရှားသူများသည် သက်ဆင်နှင့်တကွ သူနှင့်ဆက်နွှယ်မှုရှိသည့် လူထုအကျိုးမျှော်ဝါဒီများကို နှစ်သက်ခြင်း မရှိသောကြောင့်ဖြစ်သည်။

ယခင်က သက်ဆင်ကို ထောက်ခံခဲ့သည့် လိမ္မော်ရောင် ဆန္ဒပြလှုပ်ရှားသူများကလည်း လက်ရှိတွင် Move Forward ပါတီနှင့်အတူ ဖြူးထိုင်းပါတီ၏ ဒစ်ဂျစ်တယ်ငွေကြေး ထောက်ပံ့မှုအစီအစဉ်ကို ထောက်ခံတော့မည် မဟုတ်ကြောင်း နိုင်ငံရေးလေ့လာစောင့်ကြည့်သူများက ပြောကြားခဲ့သည်။

Source: Thai PBS World