CNI International News

ဘန်ကောက်၊ ဇန်နဝါရီ ၁၈ 

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ရဲတပ်ဖွဲ့ အထွေထွေဆေးရုံတွင် ဆက်ရှိနေဆဲဖြစ်ကြောင်းနှင့် ပြစ်ဒဏ်ကာလမစေ့မီ ကတိခံဝန်ဖြင့် ပြန်လည်လွတ်မြောက်ရန် လျှောက်ထား နိုင်ကြောင်း တရားရေးအာဏာပိုင်များက ဇန်နဝါရီ ၁၇ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့ သည်။ 

သက်ဆင်သည် အမှန်တကယ် နာမကျန်းဖြစ်နေခြင်း ဟုတ်/မဟုတ်နှင့် ဆေးရုံ၏ ဆေးကုသဆောင်တွင် တကယ် ရှိ/မရှိ အတည်ပြုရန် နိုင်ငံရေးပါတီများက ကြိုးပမ်းနေချိန်တွင် တရားရေးဝန်ကြီး၏ အကြံပေးပုဂ္ဂိုလ် ဆွမ်ဘွန် မူအန်ကလမ် (Somboon Muangklum) က တရားရေးဝန်ကြီးဌာန၌ ပြုလုပ်သည့် သတင်းစာ ရှင်းလင်းပွဲမှာ အထက်ပါအတိုင်း ပြောကြားခဲ့သည်။

အစိုးရဌာနများအပေါ် မကျေနပ်ချက်များကို စုံစမ်းတင်ပြရန် အစိုးရက ခန့်ထားသည့် အရာရှိ (ombudsman)၏ ကိုယ်စားလှယ်တစ်ဦးသည် ရဲတပ်ဖွဲ့ အထွေထွေဆေးရုံသို့ လာရောက်ခဲ့ပြီး ဆေးရုံဝင်းအတွင်းရှိ မဟာ ဘူမီဘော ရာချာနူဆွန်း ၈၈ ပန်ဆာ အဆောက်အအုံ (Maha Bhumibol Rachanusorn 88 Phansa Building) ၏ ၁၄ လွှာ တွင် သက်ဆင်နှင့် တွေ့ဆုံခဲ့ကြောင်း ဆွမ်ဘွန်က ပြောကြားခဲ့သည်။

သက်ဆင်နဲ့ ထိုင်းရဲတပ်ဖွဲ့အကြီးအကဲကိုတွေ့ရစဉ်

သက်ဆင်သည် ဆေးရုံတွင် ဆက်ရှိနေပြီး အခြားသူများ ထင်နေသကဲ့သို့ လူနေတိုက်ခန်းထဲတွင် နေထိုင်နေခြင်း မဟုတ်ကြောင်း မစ္စတာဆွမ်ဘွန်က ပြောသည်။

အကျဉ်းသားများ အကျင့်စာရိတ္တ ပြန်လည်ထူထောင်ရေးဌာနမှ လက်ထောက်ညွှန်ကြားရေးမှူးချုပ် စစ်သီ သုတိဗွန် (Sitthi Sutivong) လည်း ထိုသတင်းစာ ရှင်းလင်းပွဲကို တက်ရောက်ခဲ့ပြီး သက်ဆင်သည် အသက်အရွယ် ကြီးရင့်ပြီး နာမကျန်းဖြစ်နေ၍ ခံဝန်ဖြင့် ပြန်လည်လွတ်မြောက်ရန် လျှောက်ထားခွင့်ရှိကြောင်း သတင်းထောက် များကို ပြောကြားခဲ့သည်။

မည်သို့ပင်ဆိုစေ အကျဉ်းသားများသည် ၎င်းတို့ကိုယ်တိုင် ခံဝန်ဖြင့် လွတ်မြောက်ရန် လုပ်ဆောင်ခွင့်မရှိသဖြင့် အကျဉ်းသားများကို ခံဝန်ဖြင့် ပြန်လွှတ်ပေးရန် အကျဉ်းထောင် အုပ်ချုပ်ရေးမှူး၏ ခံဝန်လျှောက်ထားပေးမှုကို လိုအပ်ကြောင်း စစ်သီက ပြောကြားခဲ့သည်။

သက်ဆင်နဲ့ သမီး ၂ ဦးကိုတွေ့ရစဉ်

သက်ဆင်ကို အကျဉ်းချခဲ့သည့် ဘန်ကောက် ရမန်အကျဉ်းထောင်၏ အုပ်ချုပ်ရေးမှူးသည် လက်ရှိအချိန်အထိ သက်ဆင်ကို ခံဝန်ဖြင့် ပြန်လွှတ်ပေးရန် တောင်းဆိုခြင်းမရှိသေးကြောင်း ၎င်းက ထပ်လောင်း ပြောကြားခဲ့သည်။

အသက် ၇၄ နှစ်အရွယ် သက်ဆင်သည် ပြီးခဲ့သည့်နှစ် သြဂုတ်လ ၂၂ ရက်က ထိုင်းနိုင်ငံသို့ ပြန်လည် ရောက်ရှိခဲ့ ပြီးနောက် အကျင့်ပျက်ခြစားမှု၊ အာဏာအလွဲသုံးမှုများဖြင့် ထောင်ဒဏ် ၁၅ နှစ် ချမှတ်ခံခဲ့ရသည်။ 

သို့သော် သက်ဆင်က ထိုင်းဘုရင်ထံတွင် အသနားခံစာတင်ခဲ့ပြီးနောက် ထိုင်းဘုရင်က ၎င်း၏ ထောင်ဒဏ်ကို ၁ နှစ်အထိ လျှော့ချပေးခဲ့သည်။

ထိုင်းအထက်လွှတ်တော် အမတ်တစ်ဦးကမူ သက်ဆင်သည် လာမည့်လတွင် ပြန်လည်လွတ်မြောက် လာနိုင် ကြောင်း ခန့်မှန်းပြောကြားခဲ့သည်။ 

Source: ဘန်ကောက်ပို့စ်

CNI International News

မော်စကို၊ ဇန်နဝါရီ ၁၈

စစ်ပွဲဆက်လက် ဖြစ်ပွားနေမည်ဆိုပါက ယူကရိန်း၏ အချုပ်အခြာအာဏာကို ပြင်းထန်စွာ ထိခိုက်စေလိမ့်မည် ဖြစ်ကြောင်း ရုရှားသမ္မတ ဗလာဒီမာပူတင် (Vladimir Putin)က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထို့နောက် ရုရှားသည် မိမိတို့ရရှိထားသည် နယ်နိမိတ်များကို မည်သည့်အခါမျှ စွန့်လွှတ်မည်မဟုတ်ကြောင်း ရုရှားသမ္မတ ပူတင် (Vladimir Putin) က ဇန်နဝါရီ ၁၆ ရက်တွင် ပြောကြားခဲ့သည်။

ယူကရိန်းသမ္မတ  ဇာလန်းစကီး (Volodymyr Zelenskiy) ၏ တောင်းဆိုမှုဖြင့် ကမ္ဘာလုံးဆိုင်ရာ ညီလာခံတစ်ခုကို လက်ခံကျင်းပရန် ဆွစ်ဇာလန်နိုင်ငံက သဘောတူခဲ့ပြီးနောက် တစ်ရက်အကြာတွင် ပူတင်၏ မှတ်ချက်စကားများ ထွက်ပေါ်ခဲ့ခြင်းဖြစ်သည်။

အနောက်နိုင်ငံများနှင့် ယူကရိန်းအကြား ဆွေးနွေးနေသည့် ငြိမ်းချမ်းရေးဖော်မြူလာများကို ပူတင်က ပယ်ချခဲ့ပြီး ထိုငြိမ်းချမ်းရေးဖော်မြူလာများထဲတွင် လက်မခံနိုင်ဖွယ် တောင်းဆိုချက်များ ပါဝင်နေသည်ဟု ပြောကြားခဲ့သည်။

 ဇာလန်းစကီးကို တွေ့ရစဉ်

"ကောင်းပြီလေ။ သူတို့က မဆွေးနွေးချင်ဘူးဆိုလည်း မဆွေးနွေးရုံပဲပေါ့။ ယူကရိန်းရဲ့ တန်ပြန်ထိုးစစ်က ကျရှုံးရုံ တင် မကပါဘူး။ အခြေအနေက ရုရှားစစ်တပ်ရဲ့ လက်ထဲကို အလုံးစုံရောက်ရှိနေပါပြီ။ ဒီအတိုင်းသာ ဆက်သွား မယ်ဆိုရင် ယူကရိန်းရဲ့ အချုပ်အခြာအာဏာပိုင်မှုကို အစားထိုး မရလောက်တဲ့အထိ အကြီးအကျယ် ထိခိုက်စေ ပါလိမ့်မယ်"ဟု ပူတင်က ပြောကြားခဲ့သည်။

ယူကရိန်း၏ တန်ပြန်ထိုးစစ် အောင်မြင်ခြင်း မရှိမှုနှင့်အတူ မကြာသေးမီ လများအတွင်းက စစ်ပွဲနှင့်ပတ်သက်ပြီး ထုတ်ပြန်ခဲ့သည့် ပူတင်၏ အစီရင်ခံစာများထဲတွင် ၎င်းကိုယ်ကိုယ် ပိုမိုယုံကြည်မှုရှိလာသည့် လက္ခဏာများကို ပြသခဲ့သလို ပိုမိုရန်လိုလာသည့် အသွင်ကို မြင်တွေ့ရသည်။

လက်ရှိအချိန်တွင် ရုရှားသည် ယူကရိန်း၏ နယ်မြေ ၁၇ ဒသမ ၅ ရာခိုင်နှုန်းကို ထိန်းချုပ်ထားသည်။ 

ယူကရိန်းစစ်သားတွေကိုတွေ့ရစဉ်

ဆွေးနွေးညှိနှိုင်းမှုများအတွက် ပြောဆိုမှုများသည် ယူကရိန်းတွင် မိမိတို့ ထိန်းချုပ်ထားသည့် နယ်မြေများကို စွန့်လွှတ်ရန် ကြိုးပမ်းချက် တစ်ခုဖြစ်သည်။

ထိုကြိုးပမ်းချက်သည် မဖြစ်နိုင်ကြောင်း၊ အောင်မြင်လိမ့်မည် မဟုတ်သည်ကို လူတိုင်းက သိရှိထားကြောင်း ပူတင် က ပြောကြားခဲ့သည်။  

ဇာလန်းစကီးက အဆိုပြုခဲ့သည့် ငြိမ်းချမ်းရေး ဖော်မြူလာတစ်ခုတွင် ယူကရိန်း၏ နယ်မြေတည်တံ့ခိုင်မြဲရေးကို ပြန်လည်ထိန်းသိမ်းရန်၊ ရန်လိုမှုများကို ရပ်နားရန်၊ ရုရှားစစ်သားများ ယူကရိန်းမှ ထွက်ခွာရန်နှင့် အခြားအချက် များ ပါဝင်သည်။ 

ရုရှားကမူ ဆွေးနွေးညှိနှိုင်းမှုများသည် မြေပြင်တွင် ရုရှားတပ်ဖွဲ့များ ဖန်တီးခဲ့သည့် လက်တွေ့ကျသော အခြေအနေ အသစ်များကိုပါ ထည့််သွင်း ဆွေးနွေးရမည်ဖြစ်ကြောင်း ပြောကြားခဲ့သည်။

Source: ရိုက်တာ

ဘဂ္ဂဒက်၊ ဇန်နဝါရီ ၁၇

အီရတ်နိုင်ငံရှိ တစ်စိတ်တစ်ပိုင်း ကိုယ်ပိုင်အုပ်ချုပ်ခွင့်ရ ကာ့ဒ်ဒေသတွင် အစ္စရေး၏ စပိုင်ဌာနချုပ်ကို အီရန်၏ တော်လှန်ရေးအစောင့်တပ်ဖွဲ့က တိုက်ခိုက်ခဲ့ကြောင်း အီရန်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် အီရန်တော်လှန်ရေး အစောင့်တပ်ဖွဲ့သည် ဆီးရီးယားနိုင်ငံတွင် အိုင်အက်စ် စစ်သွေးကြွများကိုလည်း တိုက်ခိုက်ခဲ့သည်ဟု အီရန်နိုင်ငံပိုင်မီဒီယာက ဇန်နဝါရီ ၁၅ ရက်တွင် ဖော်ပြခဲ့သည်။

အောက်တိုဘာ ၇ ရက်က စတင်ဖြစ်ပွားခဲ့သည့် အစ္စရေး-ဟားမာ့စ် စစ်ပွဲအတွင်း ယခုကဲ့သို့ တိုက်ခိုက်မှုများသည် အရှေ့အလယ်ပိုင်းဒေသအနှံ့ ပဋိပက္ခများ ဖြစ်ပွားမည့်အရေးကို စိုးရိမ်မှုများ ပိုမိုမြင့်တက်စေခဲ့သည်။

အီရတ်ရှိ မော့ဆက်ဌာနချုပ် တိုက်ခိုက်ခံရစဉ်

"မကြာသေးခင်က အီရန်ထိပ်သီး တပ်မှူးတစ်ဦးနဲ့ တော်လှန်ရေးအင်အားစုတွေရဲ့ တပ်မှူးတွေကို သတ်ဖြတ်ခဲ့တဲ့ အစ္စရေးရဲ့ ရက်စက်ကြမ်းကြုတ်မှုတွေကို တုန့်ပြန်တဲ့အနေနဲ့ အီရတ်နိုင်ငံ ကာ့ဒ်ဒေသမှာရှိတဲ့ အစ္စရေး ထောက် လှမ်းရေးအဖွဲ့ မော့ဆက် (Mossad) ရဲ့ ဌာနချုပ်တွေထဲက တစ်ခုကို ပဲ့ထိန်းဒုံးကျည်တွေနဲ့ တိုက်ခိုက်ခဲ့ပါတယ်" ဟု အီရန်တော်လှန်ရေးအစောင့်တပ်ဖွဲ့က ထုတ်ပြန်ခဲ့သည်။

ထိုဖြစ်စဉ်နှင့်ပတ်သက်ပြီး မှတ်ချက်ပေးရန် တောင်းဆိုမှုကို အစ္စရေး အစိုးရအရာရှိများက ချက်ချင်းတုန့်ပြန်ခဲ့ခြင်း မရှိပေ။ 

ကာ့ဒ်ဒေသရှိ အာဘီလ် (Erbil) မြို့တော်တွင် အမေရိကန်ကောင်စစ်ဝန်ရုံးအနီးရှိ လူနေရပ်ကွက်များ၏ အရှေ့ မြောက်ပိုင်းတွင် ဖြစ်ပွားခဲ့သည့် ထိုတိုက်ခိုက်မှုများအပြင် အီရန်တပ်ဖွဲ့များသည် ဆီးရီးယားနိုင်ငံရှိ အိုင်အက်စ် စစ်သွေးကြွများ အပါအဝင် အီရန်တွင် အကြမ်းဖက်မှုများ လုပ်ဆောင်နေသည့် အကြမ်းဖက်သမားများကို ပဲ့ထိန်းဒုံးကျည်များဖြင့် ပစ်ခတ်တိုက်ခိုက်ခဲ့သည်ဟု ထုတ်ပြန်ချက်တွင် ဖော်ပြခဲ့သည်။ 

သေဆုံးသွားပြီးဖြစ်သည့် အီရန်တပ်မှူး ဆိုလေမာနီကို တွေ့ရစဉ်

အိုင်အက်စ်အဖွဲ့သည် အီရန်တွင် ယခုလအတွင်း လူပေါင်း ၁၀၀ နီးပါး သေဆုံးခဲ့သည့် ဖောက်ခွဲတိုက်ခိုက်မှုနှစ်ခုကို ၎င်းတို့ လုပ်ဆောင်ခဲ့ခြင်းဖြစ်ကြောင်း တာဝန်ခံ ထွက်ဆိုခဲ့သည်။

အမေရိကန်၏ ဒရုန်းတိုက်ခိုက်မှုကြောင့် သေဆုံးခဲ့သည့် အီရန်ထိပ်သီးတပ်မှူး ကက်ဆမ် ဆိုလေမာနီ (Qassam Soleimani) ၏ ဝမ်းနည်းအောင့်မေ့ဖွယ် နှစ်ပတ်လည် အခမ်းအနားတွင် အိုင်အက်စ်အဖွဲ့က ဖောက်ခွဲတိုက်ခိုက်ခဲ့ ခြင်းဖြစ်သည်။

အီရန်ကမူ မိမိတို့ အာဇာနည်များ၏ နောက်ဆုံးသွေးစက်များ မကုန်မခမ်းမချင်း လက်တုန့်ပြန်မှုများကို ဆက်လက် လုပ်ဆောင်သွားမည်ဖြစ်ပြီး တော်လှန်ရေး အစောင့်တပ်ဖွဲ့၏ ထိုးစစ်ဆန်သည့် စစ်ဆင်ရေးများကို ဆက်လက် ပြုလုပ်သွားမည်ဟု ထုတ်ပြန်ချက်တွင် ဖော်ပြခဲ့သည်။

Source: ရိုက်တာ

CNI International News

ဘန်ကောက်၊ ဇန်နဝါရီ ၁၇

ထိုင်းအစိုးရသည် မြန်မာနိုင်ငံအတွင်းရှိ ခုခံနိုင်စွမ်းအားနည်းသည့် လူဦးရေကို လူသားချင်း စာနာထောက်ထားမှု ဆိုင်ရာ အကူအညီများ ထောက်ပံ့ပေးရန် စဉ်းစားနေကြောင်း ဘန်ကောက်ပို့စ်မှ ဖော်ပြခဲ့သည်။

ထို့ပြင် မြန်မာနိုင်ငံ၏ ပဋိပက္ခကို အဖြေရှာရန် မြန်မာခေါင်းဆောင်များ၊ တိုင်းရင်းသား လူနည်းစုများနှင့်အတူ ဆွေးနွေးမှုများကို ဦးဆောင်ပြုလုပ်ရန် စဉ်းစားနေသည်ဟုလည်း ထိုအစီအစဉ်နှင့်ပတ်သက်ပြီး သိရှိထားသည့် ထိုင်းစစ်ဘက်ဆိုင်ရာ သတင်းရင်းမြစ်တစ်ခုက ပြောကြားခဲ့သည်။

ထိုင်းဝန်ကြီးချုပ် ဆရီသာ သာဗီဆင် (Srettha Thavisin) သည် နိုင်ငံခြားရေးဝန်ကြီး ပန်ပရီ ဘာဟီဒါ နျူကာရာ (Parnpree Bahiddha-nukara) ၊ စစ်တပ် အကြီးအကဲများနှင့်တွေ့ဆုံပြီး မြန်မာနိုင်ငံ၏ ပဋိပက္ခကို ဆွေးနွေးခဲ့ သည်။ 

ထိုင်းဝန်ကြီးချုပ် ဆရီသာသာဗီဆင်ကို တွေ့ရစဉ်

မြန်မာနိုင်ငံ၏ ပဋိပက္ခသည် ရေရှည်ကြာမြင့်မည်ဆိုပါက ထိုင်းနိုင်ငံအပေါ်ကိုလည်း ကြီးမားစွာ ဂယက် ရိုက်ခတ် စေလိမ့်မည်ဟု ထိုသတင်းရင်းမြစ်က ပြောကြားခဲ့သည်။       

ထို့ကြောင့် မြန်မာ၏ အိမ်နီးချင်းဖြစ်သည့် ထိုင်းနိုင်ငံသည် ဝန်ကြီးချုပ် ဆရီသာ၏ ဦးဆောင်မှုအောက်တွင် မြန်မာနိုင်ငံကို လူသားချင်းစာနာ ထောက်ထားမှုဆိုင်ရာ အကူအညီများ ပေးအပ်ခြင်းအားဖြင့် မြန်မာ့အရေးနှင့် ပတ်သက်သည့် အာဆီယံ၏ အချက် ၅ ချက်ပါ သဘောထားဆန္ဒ ထုတ်ပြန်ချက်ကို အကောင်အထည်ဖော် ဆောင်ရွက်သွားရန် စဉ်းစားနေသည်။ 

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီလ၌ တပ်မတော်က အာဏာရယူခဲ့ပြီးနောက် လအနည်းငယ် အကြာမှာ ပဲ အာဆီယံက အချက် ၅ ချက်ပါ သဘောဆန္ဒ ထုတ်ပြန်ချက်ကို အကောင်အထည်ဖော်ရန် မြန်မာ့တပ်မတော် ခေါင်းဆောင်များကို အဆိုပြုခဲ့သည်။ 

မြန်မာနိုင်ငံသားများ ထိုင်းနိုင်ငံထဲရောက်နေစဉ်

သို့သော်လည်း မြန်မာနိုင်ငတွင် တပ်မတော်နှင့် လက်နက်ကိုင်တပ်ဖွဲ့များအကြား တိုက်ပွဲများ ဖြစ်ပွားခဲ့သဖြင့် အာဆီယံ၏ အစီအစဉ်သည် အကောင်အထည် ပေါ်လာခဲ့ခြင်းမရှိပေ။

"ထိုင်းအစိုးရဟာ နိုင်ငံခြားရေးဝန်ကြီးဌာနကတစ်ဆင့် မြန်မာအစိုးရနဲ့ ပူးပေါင်းဆောင်ရွက်ပြီး လိုအပ်တဲ့ ကူညီ ထောက်ပံ့မှုတွေ ပြုလုပ်သွားမှာပါ" ဟု ထိုသတင်းရင်းမြစ်က ဘန်ကောက်ပို့စ် သတင်းစာကို ပြောကြားခဲ့သည်။

ပြီးခဲ့သည့်နှစ် ဒီဇင်ဘာလက ပန်ပရီသည် ၎င်းတို့ နိုင်ငံခြားရေးဝန်ကြီးဌာနအနေဖြင့် ထိုင်း-မြန်မာ နယ်စပ် တစ်လျှောက် မြန်မာတိုက်ပွဲရှောင်များအတွက် လူသားချင်း စာနာထောက်ထားမှုဆိုင်ရာ  အကူအညီများ ထောက်ပံ့ပေးရန် အစီအစဉ်တစ်ရပ် စတင်လုပ်ဆောင်ဖို့ စဉ်းစားခဲ့သည်ဟု ပြောကြားခဲ့သည်။

မစ္စတာပန်ပရီ၏ အဆိုအရ မြန်မာသည် ထိုင်းနိုင်ငံခြားရေးဝန်ကြီးဌာနနှင့် တွေ့ဆုံရန် လုပ်ငန်းတာဝန်အဖွဲ့ကို ထိုင်းသို့ စေလွှတ်ရခြင်း မရှိသေးကြောင်း သိရသည်။ 

Source: ဘန်ကောက်ပို့စ်

CNI International News

ဆိုးလ်၊ ဇန်နဝါရီ ၁၇

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) က ဖွဲ့စည်းပုံအခြေခံဥပဒေတွင် တောင်ကိုရီးယား ကို "အဓိကရန်သူ၊ ထာဝရရန်သူ" အဖြစ် အဓိပ္ပာယ်ဖွင့်ဆို သတ်မှတ်ရန် တိုက်တွန်းခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထို့ပြင် မြောက်ကိုရီးယားလွှတ်တော်ကလည်း တောင်ကိုရီးယားနှင့် ဆွေးနွေးပွဲများပြုလုပ်ရန် တိုက်တွန်းနေသည့် အဖွဲ့အစည်းများကို စွန့်လွှတ်ဖို့ ဆုံးဖြတ်ခဲ့သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီက ဇန်နဝါရီ ၁၆ ရက်တွင် ဖော်ပြခဲ့သည်။

ဇန်နဝါရီ ၁၅ ရက်က ပြုလုပ်သည့် ပြည်သူ့လွှတ်တော်ချုပ်၏ အစည်းအဝေးတွင် ကင်မ်က မိန့်ခွန်းပြောကြားခဲ့ရာ၌ မြောက်ကိုရီးယားသည် တောင်ကိုရီးယားပြည်သူများကို တစ်နိုင်ငံတည်းသားများအဖြစ် မရည်ညွှန်းသင့်ကြောင်း တောင်ကိုရီးယားသည် ရန်သူဖြစ်သည်ဆိုသည့် အတွေးအခေါ်ကို ပျံ့နှံ့စေရန် ပညာရေးကဏ္ဍကို တင်းကျပ်သည့် ဥပဒေတစ်ရပ် ထုတ်ပြန်သင့်ကြောင်း ပြောကြားခဲ့သည်။

မြောက်ကိုရီးယား ခေါင်းဆောင် ကင်မ်ဂျုံအန်ကို တွေ့ရစဉ်

ထို့ပြင် ဖွဲ့စည်းပုံအခြေခံဥပဒေ ပြန်လည်ပြင်ဆင်မှုကို နောက်တစ်ကြိမ် ပြုလုပ်မည့် အစည်းအဝေးတွင် ဆွေးနွေး သင့်ကြောင်းလည်း ကင်မ်က ပြောကြားခဲ့သည်။

တောင်ကိုရီးယားနှင့် မြောက်ကိုရီးယားသည် နှစ်နိုင်ငံ ပင်လယ်ရေကြောင်း နယ်စပ်အနီးတွင် ကျည်အစစ်များဖြင့် စစ်ရေးလေ့ကျင့်မှုများ ပြုလုပ်ခဲ့ပြီးနောက် တင်းမာမှုများ မြင့်တက်နေချိန်တွင် ကင်မ်၏ မှတ်ချက်စကားများ ထွက်ပေါ်လာခြင်းဖြစ်သည်။

တောင်ကိုရီးယားသမ္မတ ယွန်းဆော့ရွဲ(Yoon Suk Yeol) ကလည်း ဇန်နဝါရီ ၁၆ ရက်တွင် ပြုလုပ်သည့်် အစိုးရ အဖွဲ့အစည်းအဝေး၌ မြောက်ကိုရီးယား၏ လုပ်ဆောင်မှုများကို ဝေဖန်ခဲ့သည်။

ထို့နောက် ကိုရီးယားနှစ်နိုင်ငံအကြား ရန်သူများအဖြစ် အဓိပ္ပာယ်ဖွင့်ဆိုမှုသည် မြောက်ကိုရီးယား၏ အမျိုးသားရေး နှင့် သမိုင်းကြောင်းကို ဆန့်ကျင်သည့် သဘောသဘာဝကို ပြသရာရောက်ကြောင်း ၎င်းက ပြောကြားခဲ့သည်။

တောင်ကိုရီးယားကို တွေ့ရစဉ်

ကင်မ်ကမူ ဖွဲ့စည်းပုံအခြေခံဥပဒေထဲတွင် ကိုရီးယားကျွန်းဆွယ်၌ စစ်ပွဲဖြစ်ပွားလာသည့် အချိန်တွင် တောင်ကိုရီးယားကို အလုံးစုံသိမ်းပိုက်မည့် အခြေအနေအား သတ်မှတ်ပြဋ္ဌာန်းနိုင်သည်ဟုလည်း ပြောကြားခဲ့ သည်။

ကိုရီးယားနှစ်နိုင်ငံအကြား တရားမဝင် ပင်လယ်ရေကြောင်း နယ်စပ်အဖြစ် ရှုမြင်ခံထားရသည့် NLL စည်းသည် တရားမဝင်ကြောင်း၊ တောင်ကိုရီးယားအနေဖြင့် မိမိတို့၏ လေပိုင်နက်၊ ရေပိုင်နက်နှင့် ကုန်မြေပိုင်နက်များကို အနည်းငယ်မျှပင် ချိုးဖောက်ဝင်ရောက်ခဲ့မည်ဆိုပါက စစ်ကြေညာခြင်းအဖြစ် ယူဆသွားမည်ဟုလည်း ကင်မ်က ပြောကြားခဲ့သည်။

မြောက်ပိုင်း ကန့်သတ်စည်း (Northern Limit Line- NLL) ကို ၁၉၅၀-၁၉၅၃ ခုနှစ် ကိုရီးယားစစ်ပွဲ အဆုံးသတ် ချိန်တွင် အမေရိကန်ဦးဆောင်သည့် ကုလသမဂ္ဂတပ်ဖွဲ့များက သတ်မှတ်ရေးဆွဲခဲ့ခြင်းဖြစ်သည်။

Source: ဘန်ကောက်ပို့စ်

CNI International News

ဝါရှင်တန်၊ ဇန်နဝါရီ ၁၇

၂၀၂၄ ခုနှစ် အမေရိကန် သမ္မတရွေးကောက်ပွဲအတွက် အိုင်အိုဝါ (Iowa) ပြည်နယ်တွင် ဇန်နဝါရီ ၁၅ ရက်က ပြုလုပ်ခဲ့သည့် ရီပတ်ဘလစ်ကန်ပါတီ ကိုယ်စားပြု ဝင်ရောက်ယှဉ်ပြိုင်ရန် ကိုယ်စားလှယ်လောင်း ရွေးချယ်သည့် အစည်းအဝေးတွင် သမ္မတဟောင်း ဒေါ်နယ်ထရမ့်က ပြတ်သားစွာ အနိုင်ရရှိခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ထရမ့်သည် ပြိုင်ဘက် ရီပတ်ဘလစ်ကန်များဖြစ်သည့် ဖလော်ရီဒါ (Florida) ပြည်နယ်အုပ်ချုပ်ရေးမှူး ရွန် ဒီဆန်းတစ် (Ron DeSantis) ၊ တောင်ကာရိုလိုင်းနား (South Carolina) ပြည်နယ် အုပ်ချုပ်ရေးမှူးဟောင်း နစ်ကီ ဟာလေး (Nikki Haley) တို့ကို အလွယ်တကူ အနိုင်ရခဲ့ခြင်းဖြစ်ပြီး ပါတီကိုယ်စားပြု ကိုယ်စားလှယ်လောင်းအဖြစ် ရွေးချယ်ခံရရန် ခြေလှမ်းတစ်လှမ်း ပိုမိုနီးစပ်လာခဲ့သည်။

ထရမ့်သည် ရီပတ်ဘလစ်ကန် ကိုယ်စားလှယ် ၄၀ အနက် ၂၀ ၏ ထောက်ခံမှုကို ရရှိခဲ့ပြီး ဒီဆန်းတစ်က ၈ ဦး၏ ထောက်ခံမှု၊ ဟာလေးက ၇ ဦး၏ ထောက်ခံမှုကိုသာ ရရှိခဲ့သည်။

နစ်ကီဟာလေး အမည်ကိုတွေ့ရစဉ်

နည်းပညာ စွန့်ဦးတီထွင်ပညာရှင် ဗီဗက် ရာမာဆွာမိ (Vivek Ramaswamy) ကမူ ကိုယ်စားလှယ် ၂ ဦး၏ ထောက်ခံမှုကိုသာရရှိခဲ့သဖြင့် သူသည် ရီပတ်ဘလစ်ကန်ပါတီ ကိုယ်စားပြုသည့်် ကိုယ်စားလှယ်လောင်း နေရာအတွက် ဆက်လက် ယှဉ်ပြိုင်မည် မဟုတ်တော့ကြောင်း ကြေညာခဲ့ပြီး ထရမ့်ကို ထောက်ခံသွားမည်ဟု ပြောကြားခဲ့သည်။

ထရမ့်၏ ထောက်ခံမှုနှုန်း ရလဒ်များအရ သူသည် တရားရေးဆိုင်ရာ အမှုအခင်းများနှင့် ရင်ဆိုင်နေရသည့်တိုင် ရီပတ်ဘလစ်ကန်ပါတီကို ဆက်လက် လွှမ်းမိုးထားနိုင်ဆဲဖြစ်ကြောင်း ပြသရာရောက်ခဲ့သည်။ 

ထို့ပြင် ထရမ့်၏ တရားရေးဆိုင်ရာ အမှုအခင်းများသည် ၎င်းအား ထောက်ခံသူများ၏ ထောက်ခံမှုနှုန်းကို ကြီးကြီးမားမား လျော့ကျသွားစေခဲ့ခြင်းမရှိဘဲ ထရမ့် ထောက်ခံသူအများစုက ထိုအမှုအခင်းများသည် နိုင်ငံရေး စေ့ဆော်မှုကြောင့်သာဖြစ်သည်ဟု ယူဆထားကြသည်။

ဒေါ်နယ်ထရမ့်ကို တွေ့ရစဉ်

အိုင်အိုဝါပြည်နယ်သည် ရီပတ်ဘလစ်ကန်ကိုယ်စားပြု ကိုယ်စားလှယ်လောင်းများကို သမ္မတရွေးကောက်ပွဲတွင် ရွေးချယ်မှုများအနက် ရှုပ်ထွေးသည့် မှတ်တမ်းများရှိခဲ့သည်။

ထိုပြည်နယ်တွင် ထရမ့် မတိုင်မီ ရီပတ်ဘလစ်ကန်ကိုယ်စားပြု ကိုယ်စားလှယ်လောင်းတစ်ဦး သမ္မတအဖြစ် အနိုင် ရရှိခဲ့သည့် နောက်ဆုံးမှတ်တမ်းမှာ ၂၀၀၀ ပြည့်နှစ်ကဖြစ်ပြီး ထိုအချိန်က ဂျော့ချ် ဒဗလျူဘုရ် (George W Bush) အနိုင်ရခဲ့ခြင်းဖြစ်သည်။

ထို့နောက် ထရမ့်သည် ၂၀၁၆ ခုနှစ် သမ္မတရွေးကောက်ပွဲတွင် အိုင်အိုဝါပြည်နယ်တွင် အနိုင်ရရှိခဲ့ပြီး ဘုရှ်ပြီးလျှင် ထိုပြည်နယ်၌ အနိုင်ရပြီး သမ္မတဖြစ်လာခဲ့သည်။

သို့သော် ထရမ့်သည် ၂၀၂၀ ပြည့်နှစ် သမ္မတရွေးကောက်ပွဲတွင် အိုင်အိုဝါပြည်နယ်တွင် လက်ရှိသမ္မတ ဂျိုးဘိုင်ဒန် (Joe Biden)ကို အနိုင်ရခဲ့သော်လည်း ပြည်နယ်အားလုံး၏ မဲရာခိုင်နှုန်း စုစုပေါင်းတွင်မူ ဘိုင်ဒန်က အနိုင်ရခဲ့ပြီး သမ္မတဖြစ်လာခဲ့ခြင်းဖြစ်သည်။

Source: အယ်လ်ဂျာဇီးယား

CNI International News

မနီလာ၊ ဇန်နဝါရီ ၁၆

တောင်တရုတ်ပင်လယ်အတွင်းရှိ ဖိလစ်ပိုင်၏ ရေပိုင်နက်အတွင်း စစ်သားများ စခန်းချနေထိုင်နိုင်မည့် ကျွန်းများ ကို တည်ဆောက်သွားမည်ဟု ဖိလစ်ပိုင် စစ်တပ်အကြီးအကဲ ရိုမီရို ဘရော်နာ (Romeo Brawner)က ဇန်နဝါရီ ၁၅ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

ထိုအစီအစဉ်သည် မဟာဗျူဟာမြောက် အရေးကြီးသည့် ပင်လယ်ကူးသင်္ဘောများ ဖြတ်သန်းသွားလာနေသော တောင်တရုတ်ပင်လယ်၏ ရေပြင်နယ်နိမိတ်များကို ပိုင်ဆိုင်ကြောင်း အငြင်းပွားနေသည့် တရုတ်နှင့် ဖိလစ်ပိုင် အကြား တင်းမာမှုများကို ပိုမိုမြင့်တက်စေမည်ဖြစ်သည်။ 

ဖိလစ်ပိုင်နိုင်ငံတွင် Ayungin ဟု လူသိများသည့် Second Thomas သောင်ခုံမှလွဲပြီး တောင်တရုတ်ပင်လယ် အတွင်းရှိ ရေပြင်နယ်နိမိတ် ၈ ခုကို ဖိလစ်ပိုင်က သိမ်းပိုက်ထားသည်။ ထိုရေပြင်နယ်နိမိတ်များသည် ဖိလစ်ပိုင်၏ အထူးစီးပွားရေးဇုန်အတွင်းတွင် တည်ရှိကြောင်း ပြောကြားခဲ့သည်။

"ကျနော်တို့ဟာ အဲဒီ နယ်နိမိတ်တွေအားလုံးကို ကျွန်းတွေဆောက်လုပ်ပြီး အဆင့်မြှင့်တင် မွမ်းမံသွားမှာပါ" ဟု ဘရော်နာက ဖိလစ်ပိုင်စစ်ဌာနချုပ်တွင် ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr.) ဦးဆောင်ပြုလုပ်သည့် ညီလာခံကို တက်ရောက်အပြီး ပြောကြားခဲ့သည်။

ဖိလစ်ပိုင်စစ်သားကို တွေ့ရစဉ်

ထိုရေပြင်နယ်နိမိတ်များထဲတွင် တောင်တရုတ်ပင်လယ်အတွင်း အကြီးဆုံးနှင့် မဟာဗျူဟာအရ အရေးအပါဆုံး Thitu ကျွန်းလည်း ပါဝင်နေသည်။ ထိုကျွန်းကို ဖိလစ်ပိုင်တွင် Pag-asa ဟု လူသိများကာ ဖိလစ်ပိုင်၏ ပါလာဝမ် (Palawan) ပြည်နယ်မှ အနောက်ဘက် ၄၈၀ ကီလိုမီတာခန့်အကွာတွင် တည်ရှိသည်။

ဖိလစ်ပိုင်စစ်တပ်သည် Second Thomas သောင်ခုံအနီးတွင် ၁၉၉၉ ခုနှစ်ကစပြီး ကျောက်ချရပ်နားထားသည့် အမေရိကန်စစ်သင်္ဘော အဟောင်းတစ်စင်းပေါ်တွင် ဖိလစ်ပိုင်စစ်သားများကို စခန်းချတပ်စွဲထားပြီး နယ်မြေ ပိုင်ဆိုင်ကြောင်း ကြေညာချက်ကို ခိုင်မာစေရန် ကြိုးပမ်းခဲ့သည်။ 

ဖိလစ်ပိုင်စစ်တပ်၏ အဆင့်မြှင့်တင်မွမ်းမံရေး အစီအစဉ်တွင် သင်္ဘောများ၊ ရေဒါများနှင့် လေယာဉ်များ ဝယ်ယူရရှိ ရေး အပါအဝင် နယ်မြေပိုင်ဆိုင်မှုကို အာရုံစိုက်ပြီး ပြည်တွင်းကာကွယ်ရေးကဏ္ဍအား မြှင့်တင်ရန်ဖြစ်သည်ဟု ဘရော်နာက ပြောကြားခဲ့သည်။

တရုတ်သည် နှစ်စဉ် ကုန်သွယ်မှုတန်ဖိုး ဒေါ်လာ ၃ ထရီလျံ တန်ဖိုးရှိသည့် ပင်လယ်ကူးသင်္ဘောများ ဖြတ်သန်း သွားလာရာ လမ်းကြောင်းများရှိသော တောင်တရုတ်ပင်လယ်တွင် နယ်မြေပိုင်ဆိုင်မှုများနှင့် ပတ်သက်ပြီး ဖိလစ်ပိုင်၊ ဘရူနိုင်း၊ မလေးရှား၊ ထိုင်ဝမ်၊ ဗီယက်နမ်တို့နှင့် အငြင်းပွားလျက်ရှိသည်။ 

Source: ဘန်ကောက်ပို့စ်

CNI International News

ဝါရှင်တန်၊ ဇန်နဝါရီ ၁၆

အမေရိကန် သမ္မတရွေးကောက်ပွဲများတွင် ဒီမိုကရက်တစ်ပါတီနှင့် ရီပတ်ဘလစ်ကန်ပါတီတို့အကြား အကြိတ် အနယ် ယှဉ်ပြိုင်ရလေ့ရှိသည့် မဲယိမ်းပြည်နယ်ဟု လူသိများသည့် swing states များတွင် သမ္မတဟောင်း ဒေါ်နယ်ထရမ့် (Donald Trump)က ဦးဆောင်နေကြောင်း Japan Times မှ ဖော်ပြခဲ့သည်။

မဲယိမ်းပြည်နယ်များဆိုသည်မှာ ပါတီတစ်ခုကို သတ်သတ်မှတ်မှတ် ထောက်ခံခြင်းမရှိဘဲ ထောက်ခံမှု ပြောင်းလဲ တတ်သည့် ပြည်နယ်များဖြစ်သဖြင့် သမ္မတရွေးကောက်ပွဲများတွင် အဆုံးအဖြတ်ပေးသည့် ပြည်နယ်များအဖြစ် လည်း လူသိများသည်။

လက်ရှိတွင် ဒေါ်နယ်ထရမ့်သည် ပြစ်မှုဆိုင်ရာ စွဲချက်များနှင့် ရင်ဆိုင်နေရသည့်တိုင် ၂၀၂၄ သမ္မတရွေးကောက်ပွဲ၌ ရီပတ်ဘလစ်ကန်ပါတီ၏ ပြိုင်ဘက်များကို ကျော်ဖြတ်ပြီး ပါတီကိုယ်စားပြုသည့် ရွေးကောက်ပွဲဝင် ကိုယ်စား လှယ်လောင်း ဖြစ်လာလိမ့်မည်ဟု ရေပန်းစားနေသည်။

ဘိုင်ဒန်ကို တွေ့ရစဉ်

ဒေါ်နယ်ထရမ့် ရင်ဆိုင်နေရသည့် အမှုများထဲတွင် ၂၀၂၁ ခုနှစ်၊ ဇန်နဝါရီ ၆ ရက်က ၎င်းအား ထောက်ခံသူများကို လွှတ်တော် အဆောက်အအုံအား ဝင်ရောက်စီးနင်းရန် သွေးထိုးလှုံ့ဆော်မှုလည်း ပါဝင်နေသည်။

အမေရိကန်ရွေးကောက်ပွဲများတွင် ဒီမိုကရက်တစ်ပါတီနှင့် ရီပတ်ဘလစ်ကန်ပါတီအကြား အကြိတ်အနယ် ယှဉ်ပြိုင်ရသည့် ပြည်နယ်များဖြစ်သည့် နီဗားဒါး (Nevada)၊ဂျော်ဂျီယာ (Georgia)၊ အရီဇိုးနား (Arizona) ၊ ပင်ဆယ်ဗေးနီးယား (Pennsylvania)နှင့် မီချီဂန် (Michigan) ပြည်နယ်များတွင် နေထိုင်သည့် ဒေါ်နယ်ထရမ့်အား ထောက်ခံသူများကို သတင်းထောက်များက စစ်တမ်းကောက်ယူမှုများ ပြုလုပ်ခဲ့သည်။

ရွေးကောက်ပွဲမတိုင်မီ ပြုလုပ်သည့် အဆိုပါ လူထုဆန္ဒ သဘောထား ကောက်ယူမှု စစ်တမ်းများအရ ဒေါ်နယ်ထရမ့်သည် မဲယိမ်းပြည်နယ်အချို့တွင် လက်ရှိ ဒီမိုကရက်တစ်သမ္မတ ဂျိုးဘိုင်ဒန် (Joe Biden) ကို အသာစီးရထားသည်။

နစ်ကီဟာလေးကိုတွေ့ရစဉ်

ဒေါ်နယ်ထရမ့်သည် နိုဝင်ဘာလ ရွေးကောက်ပွဲတွင် ဘိုင်ဒန်နှင့် မကြေပွဲနွှဲမည့် ကိုယ်စားလှယ်လောင်း တစ်ဦး အဖြစ် ဖြစ်နိုင်ခြေ အများဆုံးဖြစ်ကြောင်း ရလဒ်များ ထွက်ပေါ်ခဲ့သည်။ 

ရီပတ်ဘလစ်ကန်ပါတီသည် လာမည့် သမ္မတရွေးကောက်ပွဲအတွက် ပါတီကိုယ်စားပြု ဝင်ရောက်ယှဉ်ပြိုင်မည့် ကိုယ်စားလှယ်လောင်း ရွေးချယ်မှုကို ဇန်နဝါရီ ၁၅ ရက်တွင် အိုင်အိုဝါ (Iowa) ပြည်နယ်၌ စတင်ရွေးချယ်မည် ဖြစ်သည်။ 

လက်ရှိတွင် ရီပတ်ဘလစ်ကန်ပါတီအတွက် ကိုယ်စားပြုယှဉ်ပြိုင်ရန် ကိုယ်စားလှယ်လောင်းအဖြစ် ရွေးချယ်ခံ ရမည့် ရေပန်းစား နေသူများစာရင်းတွင် ဒေါ်နယ်ထရမ့်၊ ဖလော်ရီဒါ(Florida)ပြည်နယ် အုပ်ချုပ်ရေးမှူး ရွန် ဒီဆန်းတစ် (Ron DeSantis)၊ တောင်ကာရိုလိုင်းနား (South Carolina) ပြည်နယ် အုပ်ချုပ်ရေးမှူးဟောင်း နစ်ကီ ဟာလေး (Nikki Haley)၊ နည်းပညာ စွန့်ဦးတီထွင်ပညာရှင် ဗီဗက် ရာမာဆွာမိ (Vivek Ramaswamy) နှင့် အာကန်ဆပ် (Arkansas) ပြည်နယ် အုပ်ချုပ်ရေးမှူးဟောင်း အက်ဆာ ဟွတ်ချင်ဆန် (Hutchinson) တို့ ဖြစ် သည်။ 

Source: Japan Times

CNI International News

တိုင်ပေ၊ ဇန်နဝါရီ ၁၆

တရုတ်နှင့်စစ်ပွဲ ဖြစ်ပွားမည်ကို စိုးရိမ်နေသည့်တိုင် ဂျပန်သည် ထိုင်ဝမ်သမ္မတအဖြစ် ရွေးကောက်ခံခဲ့ရသည့် လိုင်ချင်တေး (Lai Ching-te) နှင့် စိတ်တူကိုယ်တူရှိသော မဟာမိတ်အဖြစ် တည်ထောင်ရန် ကြိုးပမ်းသွားလိမ့် မည်ဟု Japan Times မှ ဖော်ပြခဲ့သည်။

လိုင်သည်လည်း ဂျပန်နှင့် ဆက်ဆံရေးကို ပိုမိုခိုင်မာစွာ တည်ထောင်ရန် မျှော်လင့်ထားပြီး လိုင်နှင့် ဂျပန်အစိုးရ တို့က တရုတ်၏ လှုပ်ရှားမှုများကို စိုးရိမ်လျက်ရှိသည်။

ဇန်နဝါရီ ၁၃ ရက်က ထိုင်ဝမ်သမ္မတရွေးကောက်ပွဲတွင် အနိုင်ရရှိခဲ့သည့် လိုင်က ၎င်း၏ အနိုင်ရရှိမှုသည် ဒီမိုကရေစီ အသိုင်းအဝိုင်းအတွက် အောင်ပွဲတစ်ရပ်ဖြစ်သည်ဟု ပြောကြားခဲ့သည်။

ထို့နောက် ၎င်း(လိုင်ချင်တေး)၏ အစိုးရအဖွဲ့သည် ဂျပန်နှင့် ပူးပေါင်းဆောင်ရွက်မှုကို ပိုမိုတိုးမြှင့်သွားမည့် လက္ခဏာများကို ပြသခဲ့သည်။

လိုင်သည် ရွေးကောက်ပွဲအပြီး တစ်ရက်အကြာ ဇန်နဝါရီ ၁၄ ရက်တွင် ဂျပန်လွှတ်တော်အမတ်တစ်ဦးနှင့် အစည်းအဝေး ပြုလုပ်ခဲ့ခြင်းအားဖြင့် ဂျပန်နှင့် ဆက်ဆံရေးကို ပိုမိုခိုင်မာအောင် လုပ်ဆောင်မည့် လက္ခဏာများကို ပြသခဲ့သည်။

ထိုင်ဝမ်ဒုသမ္မတလောင်း ဟီရှောင်ပီကင်ကို တွေ့ရစဉ်

ဂျပန်-ထိုင်ဝမ် ဆက်ဆံရေးအသင်း၏ အကြီးအကဲ မစ်ဆူအို အိုဟာရှီ (Mitsuo Ohashi) သည် လိုင်နှင့်တကွ ထိုင်ဝမ်ဒုသမ္မတလောင်း ဟီရှောင်ပီကင် (Hsiao Bi-khim) တို့နှင့် ထိုင်ဝမ်၏ အာဏာရပါတီဖြစ်သည့် ဒီမိုကရက်တစ်တိုးတက်ရေးပါတီ (DPP) ဌာနချုပ်တွင် အစည်းအဝေး ပြုလုပ်ခဲ့ခြင်းဖြစ်သည်။

ထိုအစည်းအဝေးတွင် လိုင်က ဒေသတွင်း ငြိမ်းချမ်းရေး၊ တည်ငြိမ်းရေးတို့နှင့် ပတ်သက်ပြီး ထိုင်ဝမ်နှင့် ဂျပန်တို့က စိုးရိမ်နေကြောင်း ပြောကြားခဲ့သည်ဟု DPP က ထုတ်ပြန်ခဲ့သည်။

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် သတ်မှတ်ထားပြီး လိုအပ်လာပါက အင်အားသုံး၍ သိမ်းယူ သွားမည်ဟု မကြာခဏ ပြောကြားခဲ့သည်။ ထို့ကြောင့် တရုတ်သည် ထိုင်ဝမ်ကို ကျူးကျော်နိုင်မည့် အလားအလာ အပေါ် စိုးရိမ်မှုများ မြင့်တက်စေခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden) ကမူ ထိုင်ဝမ်အနေဖြင့် တိုက်ခိုက်ခံရမည်ဆိုပါက အမေရိကန်သည် ထိုင်ဝမ်ကို ကူညီပေးသွားမည်ဖြစ်ကြောင်း အရိပ်အမြွက်ပြောကြားထားသည်။

ဇန်နဝါရီ ၁၅ ရက်ကလည်း လိုင်သည် ထိုင်ဝမ်သို့ ရောက်ရှိလာသည့် အမေရိကန်အရာရှိဟောင်းများ ဦးဆောင် သော ကိုယ်စားလှယ်အဖွဲ့နှင့် တွေ့ဆုံခဲ့သည်။

အမေရိကန်သည် ထိုင်ဝမ်ကို ဆက်လက် ထောက်ခံသွားလိမ့်မည်ဟု မျှော်လင့်ကြောင်း လိုင်က အမေရိကန် ကိုယ်စားလှယ်များကို ပြောကြားခဲ့သည်။

Source: Japan Times