CNI International News 

မော်စကို၊ မတ်လ ၁၄

၃ နှစ်တာ ကာလထဲသို့ ဝင်ရောက်လာခဲ့သည့် ယူကရိန်းစစ်ပွဲကြောင့် ရုရှားသည် စစ်ပန်းနေသည့်တိုင် ယခု သီတင်းပတ်အတွင်း ပြုလုပ်မည့် သမ္မတရွေးကောက်ပွဲတွင် လက်ရှိသမ္မတ ဗလာဒီမာ ပူတင် (Vladimir Putin) သည် နောက်ထပ် ၆ နှစ်သက်တမ်းအတွက် အနိုင်ရရှိရန် သေချာသလောက်ရှိနေသည်ဟု အေပီမှ ဖော်ပြခဲ့သည်။

ပူတင်သည် ၂၄ နှစ်ကြာ အာဏာကို ကိုင်စွဲထားမှုနှင့်အတူ ဆိုဗီယက်ခေါင်းဆောင် ဂျိုးဆက်ဖ် စတာလင် (Josef Stalin) နောက်ပိုင်း သက်တမ်းအရှည်ဆုံး ရုရှားခေါင်းဆောင်တစ်ဦး ဖြစ်လာမည်ဖြစ်သည်။

အသက် ၇၁ နှစ်အရွယ် ပူတင်သည် ၎င်း၏ နိုင်ငံရေး အတိုက်အခံအားလုံးကို ပြင်းထန်သည့် ဥပဒေများ ထုတ်ပြန် ပြီး ကြီးလေးသော ဒဏ်ငွေများချမှတ်ခြင်း၊ ထောင်ဒဏ် ချမှတ်ခြင်းတို့ဖြင့် ၎င်းအပေါ် ဝေဖန်သံများအား တိတ်ဆိတ်သွားစေရန် လုပ်ဆောင်ခဲ့သည်။

သို့သော် ပူတင်အနေဖြင့် ရွေးကောက်ပွဲတွင် အနိုင်ရရှိမည်ဆိုသည့်တိုင်  ရွေးကောက်ပွဲ၏ သက်ရောက်မှုရှိသည့် နယ်ပယ်ကဏ္ဍများနှင့် အဓိကဖြေရှင်းရမည့် အကြောင်းအရာများရှိနေသည်ဟု ကျွမ်းကျင်သူများက ပြောကြားခဲ့ သည်။

အထူးသဖြင့် ရွေးကောက်ပွဲသည် ယူကရိန်းစစ်ပွဲအပေါ် တစ်နည်းတစ်ဖုံ သက်ရောက်မှု ရှိနေသည်။ 

 ယူကရိန်းစစ်ပွဲအတွင်း ရုရှားကို ဆန့်ကျင်ကြသူများကိုတွေ့ရစဉ်

ပူတင်က သူသည် ယူကရိန်းစစ်ပွဲတွင် ရည်မှန်းချက် ပန်းတိုင်များကို အောင်မြင်သည်အထိ တိုက်ခိုက်သွားမည် ဖြစ်ကြောင်းနှင့် လက်ရှိတွင် ရုရှားတပ်များက အသာစီးရနေကြောင်း ထပ်တလဲလဲ ပြောကြားခဲ့သည်။

သို့သော်လည်း ယူကရိန်းစစ်ပွဲတွင် ရုရှားစစ်တပ်၏ ထိခိုက်ဆုံးရှုံးမှုများကို ရုရှားပြည်သူများအကြား သိရှိသူ နည်းပါးလှပြီး ရုရှားစစ်သားများ ထိခိုက်သေဆုံးမှုအား အများသိစေရန် ရှင်းလင်းထုတ်ပြန်မှုသည် စိန်ခေါ်မှုတစ်ခု ဖြစ်နေသည်။

ထို့ပြင် ရွေးကောက်ပွဲကာလအတွင်း ရုရှား၏ စီးပွားရေး ဖွံ့ဖြိုးတိုးတက်မှု အခြေအနေသည်လည်း ပူတင်အတွက် အဓိကဖြေရှင်းရမည့် အချက်တစ်ခုဖြစ်သည်။ 

ယူကရိန်းစစ်ပွဲ စတင်ဖြစ်ပွားခဲ့ချိန်ကတည်းက ရုရှားသည် အနောက်နိုင်ငံများ၏ ပြင်းထန်သည့် ပိတ်ဆို့မှုများကို ရင်ဆိုင်ခဲ့ရသည်။ 

ပူတင်ကမူ မဲဆွယ်စည်းရုံးမှုများအတွင်း အများပြည်သူ၏ ကျန်းမာရေးစောင့်ရှောက်မှု၊ ပညာရေး၊ သိပ္ပံ၊ ယဉ်ကျေးမှုနှင့် အားကစားကဏ္ဍများကို တိုးတက်အောင် လုပ်ဆောင်မည်ဖြစ်ပြီး ဆင်းရဲမွဲတေမှုကို တိုက်ဖျက် သွားမည်ဟု ကတိပြုခဲ့သည်။

နောက်ထပ် ဖြေရှင်းရမည့် အချက်များမှာ နိုင်ငံရေး အတိုက်အခံများကို ဖိနှိပ်မှုတွင် လူထု၏ ယုံကြည်ကိုးစားမှု အား ပြန်လည်ရယူရန်နှင့် ယူကရိန်းစစ်ပွဲကြောင့် သက်ရောက်မှုရှိခဲ့သည့် ရုရှား၏ မူဝါဒများကို ပြန်လည် ထိန်းသိမ်းရန်ဖြစ်သည်ဟု ကျွမ်းကျင်သူများက ပြောကြားခဲ့ကြသည်။

Source: အေပီ

CNI International News

အစ္စလာမ်မာဘက်၊ မတ်လ ၁၃

ပါကစ္စတန်နိုင်ငံ၏ PTI ပါတီခေါင်းဆောင် အိုမာ အာယွဘ် (Omar Ayub)က ဖေဖော်ဝါရီ ၈ ရက်တွင် ကျင်းပခဲ့ သည့် စစ်မှန်မှုမရှိသော ရွေးကောက်ပွဲကို ဆန့်ကျင်ဖို့ နိုင်ငံတစ်ဝန်း ငြိမ်းချမ်းစွာ ဆန္ဒပြကြရန် တိုက်တွန်းခဲ့သည် ဟု The Print သတင်းဝက်ဘ်ဆိုက်မှ ဖော်ပြခဲ့သည်။

အစ္စလာမ်မာဘက် (Islamabad) မြို့တော်တွင် ပြုလုပ်သည့် သတင်းစာ ရှင်းလင်းပွဲ၌ အာယွဘ်က အမှာစကား ပြောကြားခဲ့ရာတွင် နိုင်ငံ၏အာဏာသည် ခိုးယူခံခဲ့ရကြောင်းနှင့် ၎င်း၏ PTI ပါတီသည် ဖေဖော်ဝါရီ ရွေးကောက်ပွဲ အတွင်း အမျိုးသားလွှတ်တော်၌ နေရာ ၁၈၀ ကို အနိုင်ရခဲ့ကြောင်း ထပ်လောင်းပြောကြားခဲ့သည်။

ထိုရွေးကောက်ပွဲသည် အကွက်ဆင်ထားခဲ့သည့် ရွေးကောက်ပွဲဖြစ်ကြောင်း အာယွဘ်က ပြောကြားခဲ့ပြီး ရဲတပ်ဖွဲ့ သည် PTI ပါတီ၏ ထိပ်သီးခေါင်းဆောင် ၁၀၀ ကျော်ကို တရားမဝင် ဖမ်းဆီးခဲ့သည်ဟုလည်း ဝေဖန်ခဲ့သည်။

ရဲတပ်ဖွဲ့၏ အပြုအမူများနှင့် ပတ်သက်၍ အာယွဘ်က အစိုးရသည် ဖက်စစ် အမူအကျင့်များကို ကျင့်သုံးခဲ့ ကြောင်း စွပ်စွဲခဲ့ပြီး အခြေခံလူ့အခွင့်အရေးများ ချိုးဖောက်ခံခဲ့ရသည်ဟု ပြောကြားခဲ့သည်။

PTI ပါတီသည် တရားရေး စံချိန်စံနှုန်းများနှင့် ဖွဲ့စည်းပုံအခြေခံဥပဒေကို လိုက်နာမှုရှိကြောင်း၊ ပါတီအနေဖြင့် နိုင်ငံ တစ်ဝန်းနှင့် ဥပဒေပြု လွှတ်တော်များထဲတွင် ငြိမ်းချမ်းသည့် ရည်ရွယ်ချက်ဖြင့် ဆန္ဒပြသွားမည်ဖြစ်ကြောင်း အာယွဘ်က ပြောသည်။

ပါကစ္စတန်၀န်ကြီးချုပ်ဟောင်း အမ်မရာခမ်းနဲ့ အိုမာ အာယွဘ်ကို တွေ့ရစဉ်

ထို့ပြင် အာယွဘ်သည် နိုငိင်ရေးပြိုင်ဘက်များ အထူးသဖြင့် ပါကစ္စတန် ဒီမိုကရက်တစ် လှုပ်ရှားမှု (PDM) ကိုလည်း ဝေဖန်ခဲ့ပြီး ၎င်းတို့၏ ပြိုင်ဘက်များသည် နိုင်ငံအတွင်း ငွေကြေးဖောင်းပွမှုနှင့် အစိုးရမူဝါဒများကို ထိခိုက်စေခဲ့ကာ စီးပွားရေးအတွက် စိန်ခေါ်မှုများကို ပေါ်ပေါက်စေခဲ့ကြောင်း ပြောကြားခဲ့သည်။

ဝန်ကြီးချုပ်နှင့် ပန်ဂျပ် (Punjab)ပြည်နယ် ဝန်ကြီးချုပ်တို့သည်လည်း တရားရေးမူဘောင် အပြင်ဘက်မှ လုပ်ကိုင် ဆောင်ရွက်နေသည်ဟု ၎င်းက စွပ်စွဲခဲ့သည်။

ဖေဖော်ဝါရီ ၉ ရက်က ရွေးကောက်ပွဲဆိုင်ရာ စည်းကမ်းပြဋ္ဌာန်းချက် Form 45 ကို ပြင်ဆင်ခဲ့ပြီး နောက်ထပ် စည်းကမ်း Form 47  ကို ထည့်သွင်းခဲ့ခြင်းသည် ၂၀၂၄ ခုနှစ် အထွေထွေရွေးကောက်ပွဲ ကာလအတွင်း ရွေးကောက် ပွဲ မဲမသမာမှုနှင့် အကျင့်ပျက်ခြစားမှုများကို ဖော်ထုတ်ဖြေရှင်းရန် အခြေအနေကို ရှုပ်ထွေးသွားစေခဲ့သည်ဟုလည်း အာယွဘ်က စွပ်စွဲခဲ့သည်။

ထို့ပြင် လူမှုမီဒီယာများ အသုံးပြုခွင့် ကန့်သတ်မှုများကို အဆုံးသတ်ရန်၊ နိုင်ငံအတွင်း လူမှုမီဒီယာ ပလက်ဖောင်း များကို တားမြစ်ပိတ်ပင်မှုများကို ပြန်လည်ရုပ်သိမ်းရန်နှင့် လွတ်လပ်စွာ ထုတ်ဖော်ခွင့်ကို မြှင့်တင်ပေးရန်လည်း အာယွဘ်က တိုက်တွန်းခဲ့သည်။

Source: The Print

CNI International News

ဗီယင်နာ၊ မတ်လ ၁၃

ဩစတြေးလျနိုင်ငံမှ တိဘက်အဖွဲ့အစည်း၏ လက်အောက်မှ တိဘက်လူမျိုးများသည် စေတနာ့ဝန်ထမ်း တိဘက် ထောက်ခံရေးအဖွဲ့များ (V-TAGs) နှင့်အတူ ဗီယင်နာ (Vienna) မြို့တော်ရှိ တရုတ်သံရုံး အပြင်ဘက်တွင် မတ် ၁၀ ရက်က ဆန္ဒပြခဲ့ကြသည်ဟု Dailyhunt သတင်းတွင် ဖော်ပြခဲ့သည်။

တိဘက်ကို တရုတ်က သိမ်းပိုက်မှု၊ တရုတ်၏ ဖိနှိပ်မှုတို့ကို ဆန့်ကျင်ကြောင်း ဖော်ပြသည့်အနေဖြင့် တိဘက်လူမျိုး များသည် (၆၅)ကြိမ်မြောက် တိဘက်အမျိုးသား အုံကြွမှုနေ့၏ အထိမ်းအမှတ်အဖြစ် စုရုံးဆန္ဒပြခဲ့ကြခြင်း ဖြစ်သည်။

ဆန္ဒပြသူ ၂၀၀ ခန့်သည် တိဘက်အလံများနှင့် တိဘက်တွင် တရုတ်၏ ဖိနှိပ်မှုများကို ဆန့်ကျင်ကြောင်း ရေးသား ထားသည့် ပိုစတာများအား ကိုင်ဆောင်ပြီး ဆန္ဒပြခဲ့ကြသည်ဟု တရားဝင် ထုတ်ပြန်ချက်၌ ဖော်ပြထားသည်။

ဆန္ဒပြသူများက “တိဘက်ဒေသကို တိဘက်လူမျိုးတွေ ပိုင်တယ်”၊ “ဒလိုင်းလားမား (Dalai Lama) သက်တော် ရှည်ပါစေ” ၊ “တိဘက်ဒေသက တရုတ်ထွက်သွား” ဟူသည့် ကြွေးကြော်သံများကို ဟစ်ကြွေးခဲ့ကြသည်။

ဒိုလိုရက်စ် ဘာကို့စ်ကို တွေ့ရစဉ်

ဩစတြီးယား နိုင်ငံရေးသမားတစ်ဦးဖြစ်ပြီး ဩစတြီးယားနိုင်ငံတော် ပါလီမန်နှင့် ဗီယင်နာမြို့ကောင်စီ အဖွဲ့ဝင် ဖြစ်သည့် ဒိုလိုရက်စ် ဘာကို့စ် (Dolores Bakos)ကလည်း “တိဘက်ကို လွှတ်ပေးပါ” ဟု ရေးသားထားသည့် ပိုစတာနှင့်အတူ ဆန္ဒပြမှုတွင် ပါဝင်ခဲ့သည်။

မစ္စစ် ဘာကို့စ်က ဩစတြီးယားပြည်သူများသည် တိဘက်လူမျိုုးများနှင့် စည်းလုံညီညွတ်စွာရှိကြောင်း၊ ၎င်းတို့ ပါတီသည် ဩစတြေးလျရှိ တိဘက်လူမျိုးအတွက် ဆက်လက် ရပ်တည်ပေးမည် ဖြစ်ကြောင်းနှင့် တိဘက်လူမျိုး များအတွက် တရားမျှတမှုကို ဆောင်ကြဉ်းပေးရန်နှင့် တရုတ်ကို ၎င်း၏လုပ်ဆောင်ချက်များအတွက် တာဝန်ယူမှု ရှိစေရန် ပူးပေါင်းဆောင်ရွက် သွားမည်ဖြစ်ကြောင်း ပြောကြားခဲ့သည်။

တိဘက်ဒေသတွင် တိဘက်လူမျိုးများ၏ ယဉ်ကျေးမှုနှင့် ဘာသာရေး လွတ်လပ်ခွင့်များသည် ချိုးဖောက်ခံနေရပြီး လူသားချင်း စာနာထောက်ထားမှုဆိုင်ရာ အခြေအနေမှာလည်း စိုးရိမ်စရာကောင်းသည်ဟု ၎င်းက ဆက်လက် ပြောကြားခဲ့သည်။

ဘာကို့စ်သည် New Austria and Liberal Forum (NEOS) ပါတီမှဖြစ်ပြီး မကြာသေးမီက NEOS ပါတီသည် တိဘက် ကလေးငယ်များကို ဘော်ဒါဆောင် စာသင်ကျောင်းများတွင် အတင်းအကျပ် နေရာရွှေ့ပြောင်းပေးခဲ့သော တရုတ်၏ လုပ်ဆောင်ချက်ကို ရှုတ်ချသည့် ကြေညာချက်အား လွှတ်တော်မှာ တင်ပြခဲ့သည်။

Source: Dailyhunt

CNI International News

နယူးဒေလီ၊ မတ်လ ၁၂

အိန္ဒိယနိုင်ငံ၏ တရားရုံးချုပ်က နိုင်ငံရေးပါတီများကို ငွေကြေးထောက်ပံ့ရန် ရွေးကောက်ပွဲဆိုင်ရာ အငြင်းပွားဖွယ် ငွေတိုက်စာချုပ်များနှင့်ပတ်သက်ပြီး အသေးစိတ် အချက်အလက်များကို ထုတ်ပြန်ရန် အိန္ဒိယအစိုးရပိုင် SBI ဘဏ်ကို ပြောကြားခဲ့သည်ဟု Nikkei Asia မှ ဖော်ပြခဲ့သည်။

ထိုငွေတိုက် စာချုပ်များကို ဝယ်ယူသည့် လူပုဂ္ဂိုလ်များနှင့် ကုမ္ပဏီများ၏ အသေးစိတ် အချက်အလက်များကို ထုတ်ပြန်ရန် အချိန်အနည်းငယ်ပိုပေးရန် မေတ္တာရပ်ခံထားသည့် အစိုးရ၏ လျှောက်လဲချက်ကို တရားရုံးချုပ်က ပယ်ချခဲ့ပြီးနောက် ယခုကဲ့သို့ ပြောကြားခဲ့ခြင်း ဖြစ်သည်။

SIB ဘဏ်အနေဖြင့် မတ်လ ၁၂ ရက်တွင် တရားရုံးက တောင်းဆိုထားသည့် ထိုအချက်အလက်များကို ထုတ်ပြန် ပေးရန်နှင့် ထိုအချက်အလက်များအား အိန္ဒိယရွေးကောက်ပွဲကော်မရှင် (ECI)နှင့် မျှဝေသင့်ကြောင်း တရားရုံးချုပ် က ထုတ်ပြန်ခဲ့သည်။

ECI အနေနှင့်လည်း ထိုအချက်အလက်များကို စုဆောင်းပြီး အသေးစိတ် အချက်အလက်များကို ၎င်း၏ ဝက်ဘ်ဆိုက်တွင် မတ်လ ၁၅ ရက် မွန်းလွဲ ၅ နာရီထက် နောက်မကျဘဲ ထုတ်ပြန်ပေးရန် တရားရုံးချုပ်က အမိန့်ချမှတ်ခဲ့သည်။

SBI ရုံးကို တွေ့ရစဉ်

SBI အနေနှင့် ယခု သတ်မှတ်ချက်များကို လိုက်နာခြင်းမရှိပါကာ တရားရေးအရ လုပ်ထုံးလုပ်နည်းများအား ဆက်လက် လုပ်ဆောင်သွားမည့်အကြောင်းကို မိမိတို့ တရားသူကြီးများက အသိပေး အကြောင်းကြားထားသည် ဟုလည်း တရားရုံး၏ ထုတ်ပြန်ချက်တွင် ဖော်ပြခဲ့သည်။

အိန္ဒိယတွင် လူပုဂ္ဂိုလ်တစ်ဦးချင်းစီနှင့် ကုမ္ပဏီများက နိုင်ငံရေးပါတီများကို ငွေကြေး အကန့်အသတ်မရှိ၊ အမည် မဖော်ဘဲ လှူဒါန်းမှုများ ပြုလုပ်ခွင့်ပေးထားသည့် ၇ နှစ်သက်တမ်းရှိသော ရန်ပုံငွေ ထောက်ပံ့ရေးစနစ်ကို တရားရုံးချုပ်က ဖေဖော်ဝါရီ ၁၅ ရက်တွင် ဖျက်သိမ်းခဲ့သည်။

ထိုစနစ်သည် ဖွဲ့စည်းပုံနှင့်မညီကြောင်း ပြောကြားခဲ့သည်။

ထိုဆုံးဖြတ်ချက်ကြောင့် ၂၀၁၇ ခုနှစ်ကတည်းက ထိုရန်ပုံငွေ ထောက်ပံ့ရေးစနစ်ဖြင့် ငွေကြေး အများဆုံးရရှိခဲ့သည့် ဝန်ကြီးချုပ် မိုဒီ (Narendra Modi) ၏ BJP ပါတီအတွက် ကြီးမားသည့် ထိုးနှက်ချက်တစ်ခု ဖြစ်ခဲ့သည်။

Electoral Bonds ဟု အမည်ပေးထားသည့် ထိုစနစ်ကို အတိုက်အခံများနှင့် လူမှုရေးအဖွဲ့အစည်းများက ဝေဖန်ခဲ့ ကြပြီး ပြည်သူများအနေဖြင့် မည်သည့်ပါတီကို မည်သူက ငွေကြေးထောက်ပံ့နေသည် ဆိုသည်အချက်ကို သိရှိပိုင်ခွင့်ရှိကြောင်း စောဒကတက်ခဲ့ကြသည်။

Source:  Nikkei Asia

CNI International News

ဘန်ကောက်၊ မတ်လ ၁၂

ထိုင်းနိုင်ငံ၏ Move Forward (MFP) ပါတီက တော်ဝင်အသရေဖျက်မှုဥပဒေကို ဆန့်ကျင်သည့် ၎င်းတို့ပါတီ၏ ရပ်တည်ချက်ကြောင့် ဖျက်သိမ်းခံရနိုင်ခြေရှိသော အလားအလားအပေါ် ထင်ကြေးပေးမှုများ ထွက်ပေါ်နေမှုနှင့် ပတ်သက်ပြီး MFP ပါတီခေါင်းဆောင် ချိုင်သာဝပ် တူလာသွန်း (Chaithawat Tulathon) က ကာကွယ်ပြောဆိုခဲ့ သည်ဟု ဘန်ကောက်ပို့စ်မှ ဖော်ပြခဲ့သည်။

ချိုင်သာဝပ်သည် မွတ်ဒါဟန် (Mukdahan) မြို့တွင် ပါတီဝင်များနှင့် ထောက်ခံသူများ တက်ရောက်သည့် အစည်းအဝေး၌ ထိုကဲ့သို့ ပြောကြားခဲ့ခြင်းဖြစ်ပြီး MFP အနေဖြင့် ထိုအခြေအနေကို ဖြေရှင်းရန် အသင့်ရှိသည်ဟု ဆိုသည်။

ထိုအစည်းအဝေးတွင် ပါတီဝင်တစ်ဦးက ပါတီဖျက်သိမ်းခံရမည့် အလားအအလာနှင့်ပတ်သက်ပြီး မေးမြန်းခဲ့ချိန်၌ ချိုင်သာဝပ်က ထိုစိုးရိမ်ပူပန်မှုများကို လျော့ကျစေမည့် မှတ်ချက်စကားများဖြင့် ပြန်လည် ဖြေကြားခဲ့သည်။

MFP ပါတီကို မဲဆွယ်နေစဉ်

“ပါတီကို ကာကွယ်ဖို့ ကျနော်တို့ အကောင်းဆုံး လုပ်ဆောင်သွားရမှာပါ။ ဖြစ်ပေါ်လာနိုင်တဲ့ ဘယ်လို အခြေအနေ မျိုးမဆိုအတွက် ကျနော်တို့ ပြင်ဆင်ရမှာပါ။ ပြီးခဲ့တဲ့ အတိတ်က ၅ နှစ်တာ ကာလအတွင်း ဖြစ်ပျက်ခဲ့တာတွေကို ပြန်လည်သုံးသပ်ဖို့ လူတိုင်းကို ကျနော်ပြောလိုပါတယ်။ အခုဖျက်သိမ်းခံလိုက်ရတဲ့ Future Forward (FFP) ပါတီ နဲ့ Move Forward ပါတီဟာ အခုအချိန်အထိ အပြောင်းအလဲတွေလုပ်ဖို့ တွန်းအားပေး လုပ်ဆောင်လာခဲ့တာပါ”ဟု ချိုင်သာဝပ်က ပြောကြားခဲ့သည်။

FFP ပါတီသည် ဖျက်သိမ်းခံခဲ့ရပြီးနောက် MFP ပါတီအဖြစ် ပြန်လည်ဖွဲ့စည်းခဲ့ပြီး ပြီးခဲ့သည့်နှစ်က ပြုလုပ်ခဲ့သည့် ရွေးကောက်ပွဲတွင် နေရာအများအပြား အနိုင်ရရှိခဲ့သည်။

“ကျနော်တို့ရဲ့ အောင်မြင်မှုတွေကြောင့် အခုလို စိန်ခေါ်မှုတွေကို ကျနော်တို့ ရင်ဆိုင်နေရတာပါ။ ကျနော်တို့ရဲ့ အောင်မြင်မှုတွေဟာ ပြိုင်ဘက်တွေအတွက် မြန်ဆန်လွန်းလှပါတယ်” ဟု ၎င်းက ပြောကြားခဲ့သည်။

MFP ပါတီခေါင်းဆောင် ချိုင်သာဝပ် တူလာသွန်းကို တွေ့ရစဉ်

ထို့ပြင် ထိုင်းနိုင်ငံရေးနှင့် လူမှုရေး အခင်းအကျင်းသည် လျင်မြန်စွာ ပြောင်းလဲနေသဖြင့် မိမိတို့ ပြိုင်ဘက်များသည် ၎င်းတို့၏ အာဏာကို ထိခိုက်စေမည်ကို ကြောက်ရွံ့နေကြကြောင်း၊ ထို့ကြောင့် ပြိုင်ဘက်များသည် လွတ်လပ် သည့် အေဂျင်စီများနှင့် ဥပဒေများကို အသုံးချပြီး မိမိတို့အား ဖယ်ရှားချင်နေကြောင်း ချိုင်သာဝပ်က ပြောသည်။

MFP ပါတီကို ဖျက်သိမ်းရန် အမှုအခင်းသည် ရှိလာလိမ့်မည် မဟုတ်ကြောင်း ရွေးကောက်ပွဲ ကော်မရှင်က အစောပိုင်းတွင် ပြောကြားခဲ့သော်လည်း ထိုအမှုနှင့်ပတ်သက်ပြီး သေချာရေရာသည့် အချိန်ကန့်သတ်ချက် မချမှတ်ရသေးပေ။

တော်ဝင်အသရေဖျက်မှုဥပဒေကို ပြင်ဆင်ရန် MFP ၏ ကြိုးပမ်းအားထုတ်မှုသည် စည်းမျဉ်းခံဘုရင်စနစ်ကို လျော့ပါးစေကြောင်း စွပ်စွဲထားသည့် အမှုနှင့်ပတ်သက်ပြီး ဖွဲ့စည်းပုံအခြေခံဥပဒေခုံရုံးက ဇန်နဝါရီ ၃၁ ရက်တွင် စီရင်ချက်ချခဲ့ပြီး MFP အနေဖြင့် ထိုကြိုပမ်းအားထုတ်မှုများကို ရပ်တန့်ရန် အမိန့်ထုတ်ပြန်ခဲ့သည်။

Source: ဘန်ကောက်ပို့စ်

CNI International News

ဒူဘိုင်း၊ မတ်လ ၁၂

ယီမင်နိုင်ငံရှိ အယ်လ်ကိုင်ဒါ (Al-Qaida) အဖွဲ့ခွဲခေါင်းဆောင် ခါလစ် အယ်လ် ဘာတာဖီ (Khalid al-Batarfi) သည် သေဆုံးသွားကြောင်း ထိုအဖွဲ့က မတ်လ ၁၀ ရက်နှောင်းပိုင်းတွင် ထုတ်ပြန်ခဲ့သည်ဟု အေပီမှဖော်ပြခဲ့သည်။

သို့သော် သေဆုံးရသည့် အကြောင်းရင်းကို အသေးစိတ် မထုတ်ပြန်ခဲ့ပေ။

အာရေဗျ ကျွန်းဆွယ် (Arabian Peninsula) ရှိ အယ်လ်ကိုင်ဒါအဖွဲ့ကို ဦးဆောင်သည့် အယ်လ် ဘာတာဖီကို အမေရိကန်က ဆုကြေးငွေ ဒေါ်လာ ၅ သန်း ထုတ်ထားသူဖြစ်သည်။

သူသည် ထောင်ဒဏ် ချမှတ်ခံခဲ့ရသော်လည်း ထောင်ဖောက်ပြေးခဲ့ကာ ယီမင်ရှိ အယ်လ်ကိုင်ဒါအဖွဲ့ကို အုပ်ချုပ်ခဲ့သူဖြစ်သည်။

မကြာသေးမီ နှစ်များအတွင်း အမေရိကန်၏ ဒရုန်းတိုက်ခိုက်မှုများကြောင့် ထိုအဖွဲ့၏ ခေါင်းဆောင်များ တစ်ဦးပြီး တစ်ဦး သေဆုံးခဲ့ကြောင်း ထင်ကြေးပေးမှုများ ထွက်ပေါ်ခဲ့ကာ AQAP ဟု လူသိများသည့် ထိုအဖွဲ့သည် အယ်လ်ကိုင်ဒါ အဖွဲ့ထူထောင်သူ အိုစမာ ဘင်လာဒင် (Osama bin Laden) သေဆုံးခဲ့ပြီးနောက်ပိုင်း အန္တရာယ် အများဆုံး အယ်လ်ကိုင်ဒါအဖွဲ့ခွဲတစ်ခု ဖြစ်လာခဲ့သည်။

အယ်လ်ကိုင်ဒါအဖွဲ့က ထုတ်ပြန်သည့် ဗွီဒီယိုထဲတွင် အယ်လ် ဘာတာဖီ၏ အလောင်းကို အသုဘချသည့် အဝတ်ဖြူစနှင့် အယ်လ်ကိုင်ဒါ အလံတို့နှင့်ပတ်ထားပြီး ဈာပနအခမ်းအနားကို ဖော်ပြခဲ့သည်။

ဆာအက် ဘင် အအက်တက်ဖ် အယ်လ် အော်လာကီကို တွေ့ရစဉ်

အယ်လ်ဘာတာဖီ သေဆုံးရသည့် အသေးစိတ် အချက်အလက်ကို ထုတ်ပြန်ခဲ့ခြင်းမရှိဘဲ သူသည် သေဆုံးချိန်တွင် အသက် ၄၀ ခန့်ရှိပြီဟု ယူဆရသည်။

အယ်လ်ကိုင်ဒါအဖွဲ့သည် အယ်လ်ဘာတာဖီ သေဆုံးသည့်သတင်းကို မွတ်ဆလင်ဘာသာဝင်များ ရာမဒန် ဥပုသ် ကာလမတိုင်မီ ကြေညာခဲ့ခြင်းဖြစ်ပြီး ယီမင်နိုင်ငံတွင် ရာမဒန် ဥပုသ်ကာလသည် မတ်လ ၁၁ ရက်တွင် စတင်ခဲ့ ခြင်းဖြစ်သည်။

လစ်လပ်သွားသည့် ခေါင်းဆောင်နေရာကို ဆာအက် ဘင် အအက်တက်ဖ် အယ်လ် အော်လာကီ (Saad bin Atef al-Awlaki) က တာဝန်ယူ ထမ်းဆောင်သွားမည်ဖြစ်ကြောင်း အယ်လ်ကိုင်ဒါအဖွဲ့က ကြေညာခဲ့သည်။

အမေရိကန်သည် အယ်လ် အော်လာကီကို ဆုကြေးငွေ ဒေါ်လာ ၆ သန်း ထုတ်ထားပြီး သူသည် အမေရိကန်နှင့် မဟာမိတ်များကို တိုက်ခိုက်ရန် လူသိရှင်ကြား လှုံ့ဆော်ခဲ့သူဖြစ်ကြောင်း ပြောကြားခဲ့သည်။

ယီမင်နိုင်ငံ၏ အယ်လ်ကိုင်ဒါအဖွဲ့သည် ၂၀၀၉ ခုနှစ်က အမေရိကန် လေကြောင်းလိုင်းတစ်ခုကို ဗုံးထောင်ရန် ကြိုးပမ်းခဲ့ပြီးနောက် ထိုအကြမ်းဖက်ကွန်ရက်ကို အန္တရာယ်အများဆုံး အယ်လ်ကိုင်ဒါ အဖွဲ့ခွဲအဖြစ် အမေရိကန်က သတ်မှတ်ခဲ့သည်။

Source: အေပီ

CNI International News

ပေကျင်း၊ မတ်လ ၁၂

တရုတ်၏ အာဏာရကွန်မြူနစ်ပါတီအား အစိုးရအဖွဲ့ဖြစ်သည့် နိုင်ငံတော်ကောင်စီအပေါ် ပိုမိုထိန်းချုပ်ခွင့် ရရှိစေ မည့် ဥပဒေတစ်ရပ်ကို လွှတ်တော်က မတ်လ ၁၁ ရက်တွင် စိစစ်အတည်ပြုခဲ့သည်ဟု ရိုက်တာမှ ဖော်ပြခဲ့သည်။

တရုတ်တွင် ဆယ်စုနှစ် ၃ စုအတွင်း ပထမဆုံးအကြိမ်အဖြစ် လွှတ်တော် အစည်းအဝေးအပြီး ဝန်ကြီးချုပ်၏ သတင်းစာရှင်းလင်းပွဲကို ဖျက်သိမ်းခဲ့ပြီးနောက် ထိုဥပဒေကို ပြဋ္ဌာန်းခဲ့ခြင်းဖြစ်သည်။

ဘေကျင်းမြို့တော်တွင် ပြုလုပ်သည့် အမျိုးသားပြည်သူ့လွှတ်တော် အစည်းအဝေး၏ ပိတ်ပွဲနီးကပ်လာချိန်တွင် State Council Organic Law အမည်ရှိ ထိုဥပဒေ ပြင်ဆင်ပြောင်းလဲမှုကို ကိုယ်စားလှယ်များ၏ ထောက်ခံမဲ ၂၈၈၃ မဲ၊ ကန့်ကွက်မဲ ၈ မဲ၊ ပယ်မဲ ၉ မဲဖြင့် အတည်ပြုခဲ့ခြင်း ဖြစ်သည်။

တရုတ်အလံကို တွေ့ရစဉ်

ထိုဥပဒေပြဋ္ဌာန်းမှုသည် မကြာသေးမီ နှစ်များအတွင်း ဝန်ကြီးချုပ် လီချင် (Li Qiang) ဦးဆောင်သည့် နိုင်ငံတော် ကောင်စီ၏ အုပ်ချုပ်ခွင့်အာဏာကို တစ်စထက်တစ်စ လျော့ပါးစေသည့် စီမံလုပ်ဆောင်မှုများအနက် နောက်ဆုံးလှုပ်ရှားမှုတစ်ခုဖြစ်သည်။

နိုင်ငံတော်ကောင်စီသည် ပုံမှန်အားဖြင့် တရုတ်၏ ဒေသန္တရ အစိုးရများနှင့် အစိုးရဝန်ကြီးဌာန ၂၁ ခုကို ကြီးကြပ်ရသည့် အဖွဲ့ဖြစ်သည်။

၁၉၈၂ ခုနှစ်နောက်ပိုင်း ပထမဆုံးအကြိမ်အဖြစ် ထိုဥပဒေကို ပြင်ဆင်ပြောင်းလဲမှုသည် ကွန်မြူနစ်ပါတီအား လုပ်ပိုင်ခွင့်အာဏာများ ပိုမိုအပ်နှင်းသည့် ပုံစံဖြစ်ပြီး ပါတီ၏ လမ်းညွှန်ချက်များအတိုင်း အစိုးရအဖွဲ့က အကောင်အထည်ဖော်ပေးရသည့် အခြေအနေသို့ ရောက်ရှိစေခဲ့သည်။

တရုတ်ကွန်မြူနစ်ပါတီညီလာခံကို တွေ့ရစဉ်

အသစ်ထည့်သွင်းပြဋ္ဌာန်းခဲ့သည့် ဥပဒေအပိုဒ်ခွဲတွင် “နိုင်ငံတော်ကောင်စီအနေဖြင့် ပါတီဗဟိုကော်မတီ၏ အာဏာနှင့် အကြွင်းမဲ့ ခေါင်းဆောင်မှုအောက်တွင် တိတိကျကျ လိုက်နာဆောင်ရွက်ရမည်”ဟု ရေးသားဖော်ပြခဲ့သည်။

“ဒါဟာ တရုတ်နိုင်ငံမှာ အုပ်ချုပ်ရေးအာဏာကို ပြန်လည်ဖွဲ့စည်းမှုရဲ့ သိသာထင်ရှားတဲ့ အပြောင်းအလဲ တစ်ခုဖြစ် ပါတယ်”ဟု တရုတ်၏ ဟောင်ကောင်တက္ကသိုလ်မှ ဥပဒေပါမောက္ခ ရိုင်ယန် မစ်ချဲလ် (Ryal Mitchell) က ပြောကြားခဲ့သည်။

ထို့ပြင် ထိုလုပ်ဆောင်ချက်သည် ပါတီအနေဖြင့် နိုင်ငံ၏ အဓိက ယန္တရားများကို အပြည့်အဝ ထိန်ချုပ်လိုသည့် ရည်ရွယ်ချက်ကို ပြသခြင်းလည်းဖြစ်သည်ဟု အမေရိကန်နိုင်ငံ၊ ဝါရှင်တန် (Washington) ရှိ ဂျော့ချ်တောင်း တက္ကသိုလ်မှ အာရှရေးရာ ဥပဒေပါမောက္ခ သောမတ်စ် ကယ်လ်လော့ဂ် (Thomas Kellogg) က ပြောကြားခဲ့သည်။

Source: ရိုက်တာ

CNI International News

ကိုင်ရို၊ မတ်လ ၁၁

ဂါဇာကို အကူအညီပေးရန်အတွက် ဂါဇာကမ်းမြောင်ဒေသ၏ ကမ်းရိုးတန်းတွင် ယာယီဆိပ်ကမ်းတစ်ခု တည် ဆောက်မည်ဟု အမေရိကန်သမ္မတ ဂျိုးဘိုင်ဒန် (Joe Biden)က ပြောကြားခဲ့ပြီးနောက် ရက်ပိုင်းအကြာတွင် အမေရိကန်ကျည်းတပ်မှ ဂါဇာသို့ လူသားချင်းစာနာ ထောက်ထားမှုဆိုင်ရာ အကူအညီပေးသည့် သင်္ဘောတစ်စင်း စေလွှတ်ခဲ့သည်ဟု ဘန်ကောက်ပို့စ်က ဖော်ပြခဲ့သည်။

အမေရိကန်က ဂါဇာကို လူသားချင်းစာနာ ထောက်ထားမှုဆိုင်ရာ အကူအညီများ ထောက်ပံ့ပေးမည်ဟု သမ္မတ ဘိုင်ဒန်က ကြေညာခဲ့ပြီးနောက် ၃၆ နာရီ မပြည့်မီအချိန်မှာပင် General Frank S. Besson သင်္ဘောသည် ဗာဂျီးနီးယားပြည်နယ် လန်ဂလေ-ဩစတစ် ပူးတွဲစစ်စခန်း(Joint Base Langley-Eustis)မှ ထွက်ခွာသွားခဲ့သည် ဟု အမေရိကန်ဗဟိုစစ်ဌာနချုပ် (CENTCOM)က ထုတ်ပြန်ခဲ့သည်။

ထောက်ပို့သင်္ဘောသည် လူသားချင်းစာနာထောက်ထားမှု အကူအညီများ ထောက်ပံ့ပေးရန်အတွက် ယာယီ ဆိပ်ကမ်းတစ်ခု တည်ဆောက်ရန် လိုအပ်သသည့်ပစ္စည်း ကိရိယာများကို တင်ဆောင်ပြီး ထွက်ခွာသွားခဲ့ခြင်း ဖြစ်သည်ဟု ထုတ်ပြန်ချက်တွင် ဖော်ပြခဲ့သည်။

ဘိုင်ဒန်ကို တွေ့ရစဉ်

အစ္စရေး၏ ၅ လကြာ စစ်ဆင်ရေးကြောင့် ဂါဇာဒေသ၏ ပါလက်စတိုင်း ၂ ဒသမ ၃ သန်းသည် အစာရေစာ ငတ်မွတ် ခေါင်းပါးမှု အန္တရာယ်နှင့် ရင်ဆိုင်နေရကြောင်း ကုလသမဂ္ဂက မတ်လ ၈ ရက်တွင် သတိပေးခဲ့ပြီးနောက် ဘိုင်ဒန်၏ နိုင်ငံတော်အခြေပြမိန့်ခွန်းတွင် ဂါဇာအား အကူအညီပေးမည့် အစီအစဉ်ကို ကြေညာခဲ့ခြင်းဖြစ်သည်။

ဂါဇာကမ်းမြောင်ဒေသတွင် ဆိပ်ကမ်းများမရှိပေ။ အမေရိကန်သည် ယခင်က အစ္စရေးအရာရှိများ ပါဝင်သည့် ကုန်စည်များကို စကန်ဖတ်သော လုပ်ငန်းစဉ်အတွက် ဆိုက်ပရပ်စ် နိုင်ငံမှတစ်ဆင့် ဂါဇာကို အကူအညီပေးရန် စီစဉ်ခဲ့သော်လည်း နောက်ပိုင်းတွင် ဂါဇာကို တိုက်ရိုက်အကူအညီပေးရန် စီစဉ်ခဲ့ခြင်းဖြစ်သည်။

ဂါဇာဒေသခံ အများစုသည် လက်ရှိတွင် အိမ်ပစ်ရာပစ် ထွက်ပြေးတိမ်းရှောင်နေရပြီး ဂါဇာသို့ ပေးပို့သည့် အကူအညီများမှာလည်း စစ်ဆေးရေးဂိတ်များတွင် နှောင့်နှေးကြန့်ကြာလျက်ရှိသည်။

ဂါဇာကမ်းမြောင်ဒေသတွင် ဟားမာ့စ်တို့ အာဏာရလာခဲ့ပြီးနောက် ၂၀၀၇ ခုနှစ်ကတည်းက အစ္စရေး၏ ပိတ်ဆို့မှု ကို ခံခဲ့ရသည်။ 

ထိုအချိန်ကတည်းက ဂါဇာကမ်းမြောင်ဒေသသို့ ရေလမ်းကြောင်းမှတစ်ဆင့် တိုက်ရိုက်သွားရောက်သည့် ရေကြောင်းခရီးစဉ် အနည်းငယ်သာ ရှိခဲ့သည်။

Source: ဘန်ကောက်ပို့စ်

CNI International News

ပေကျင်း၊ မတ်လ ၁၁

တရုတ်သည် တိဘက် ဘော်ဒါဆောင် စာသင်ကျောင်းများတွင် တိဘက်ဘာသာစကားအစား မန်ဒရင်း တရုတ်ဘာသာစကားဖြင့် အစားထိုးသင်ကြားပြသရန် လုပ်ဆောင်နေသည်ဟု ဘီဘီစီမှ ဖော်ပြခဲ့သည်။

မန်ဒရင်း တရုတ်ဘာသာစကားကို ကျွမ်းကျင်စွာ ပြောဆိုနိုင်သည့် တိဘက်ပညာရေး လူမှုဗေဒပညာရှင် ကီယယ် လို (Gyal Lo) ကမူ တရုတ်သည် တိဘက်ဒေသတွင် ပညာရေးဆိုင်ရာ ပြုပြင်ပြောင်းလဲမှုများစွာ ပြုလုပ်ခဲ့ပြီး သူသည် မန်းဒရင်းကို တက်မြောက်သော်လည်း ထိုဘာသာစကားကို ပြောဆိုခြင်းမရှိကြောင်း ပြောကြားခဲ့သည်။

တရုတ်ကမူ ထိုပြုပြင်ပြောင်းလဲမှုများသည် တိဘက်ကလေးများ အရွယ်ရောက်လာပါက တရုတ်နိုင်ငံ၏ အဓိက ဘာသာစကားဖြစ်သည့် မန်ဒရင်း တရုတ်ဘာသာစကားကို ကျွမ်းကျင်တတ်မြောက်စွာဖြင့် ဆက်သွယ် ပြောဆိုနိုင် စေရန် ပြင်ဆင်ပေးခြင်းဖြစ်ကြောင်း ပြောကြားခဲ့သည်။

တိဘက်ပညာရေး လူမှုဗေဒပညာရှင် ကီယယ်လိုကို တွေ့ရစဉ်

သို့သော် ဒေါက်တာ ကီယယ်ကမူ တရုတ်၏ စစ်မှန်သည့် ရည်ရွယ်ချက်မှာ တိဘက်လူ့အဖွဲ့အစည်း၏ လူငယ် များကို ပစ်မှတ်ထားခြင်းအားဖြင့် တိဘက်တို့၏ ကိုယ်ပိုင်လက္ခဏာကို လျော့ပါးပျောက်ကွယ်စေရန် လုပ်ဆောင်ခြင်း ဖြစ်သည်ဟု ယူဆထားသည်။

“သူတို့က လူငယ်တွေကို အနာဂတ်မှာ တိဘက် ဘာသာစကားနဲ့ ယဉ်ကျေးမှုတွေ လေ့လာသင်ကြားခွင့် မရနိုင် တော့မယ့် သင်ရိုးတွေကို ရေးဆွဲပြဋ္ဌာန်းခဲ့ပါတယ်။ တရုတ်ဟာ တိဘက် လူမှုရေး စွမ်းဆောင်ရည်တွေကို အနည်း ဆုံးအထိ လျှော့ချဖို့ ပညာရေးကို လက်ကိုင်တုတ်သဖွယ် အသုံးချနေပါတယ်”ဟု ကီယယ်က ပြောကြားခဲ့သည်။

ပြည်ပလူ့အခွင့်အရေးအဖွဲ့များကမူ တရုတ်သည် တိဘက်ဒေသတွင် အနိုင်ကျင့် ဗိုလ်ကျမှုများကို ပြုလုပ်ခဲ့ ကြောင်း ဆယ်စုနှစ်များစွာကြာ ပြောဆိုခဲ့ကြသော်လည်း ထိုပြောဆိုမှုများသည် မကြာသေးမီ နှစ်များအတွင်း လျော့ကျသွားခဲ့သည်။

တိဘက်ဒေသ စာသင်ကျောင်းမှာ တရုတ် မန်ဒရင်းဘာသာစကားကို ရေးသားထားစဉ်

အဘယ်ကြောင့်ဆိုသော် တရုတ်အစိုးရ၏ အနောက်မြောက်ပိုင်းက ရှင်ကျန်း (Xinjiang) ဒေသရှိ ဝီဂါ မွတ်ဆလင် များအပေါ်  ဆက်ဆံမှုနှင့် ဟောင်ကောင်၏ ဒီမိုကရေစီလိုလားသည့် လှုပ်ရှားမှုများအပေါ် နိုင်ငံတကာက အာရုံ ပြောင်းလဲသွားခြင်းကြောင့် ဖြစ်သည်။

သို့သော် တရုတ်အရာရှိများသည် တိဘက်တွင်လည်း ခြေရှုပ်ခဲ့ကြသည်ဟု တက်ကြွလှုပ်ရှားသူများက ပြောကြားခဲ့ သည်။

မကြာသေးမီနှစ်များအတွင်း တရုတ်အစိုးရသည် တိဘက်ဘာသာစကား သင်ကြားသည့် ကျေးရွာ စာသင်ကျောင်း များနှင့် ပုဂ္ဂလိက စာသင်ကျောင်း တစ်ကျောင်းကို ပိတ်ခဲ့ပြီး ဘော်ဒါဆောင် စာသင်ကျောင်းများ ဖွင့်လှစ် သင်ကြားမှုကို တိုးမြှင့်ခဲ့သည်။

Source: ဘီဘီစီ