CNI International News 

မော်စကို၊ အောက်တိုဘာ ၂၇

အစ္စရေး-ဟားမာ့စ် စစ်ပွဲသည် အရှေ့အလယ်ပိုင်းဒေသထက် ပိုမိုကျော်လွန်ပြီး ပျံ့နှံ့လာနိုင်သည်ဟု ရုရှားသမ္မတ ပူတင် (Vladimir Putin) က သတိပေးခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။
 
ထို့ပြင် အခြားသူများ၏ ရာဇဝတ်မှုများကြောင့် ဂါဇာတွင် ပါလက်စတိုင်း အမျိုးသမီးများ၊ ကလေးသူငယ်များနှင့် သက်ကြီးရွယ်အိုများပါ ရောနှောပြီး အပြစ်ပေးခံနေရခြင်းသည် မှားယွင်းသည်ဟုလည်း ပူတင်က ပြောကြား ခဲ့သည်။  

"ဒီနေ့ ကျနော်တို့ရဲ့ အဓိက တာဝန်ကတော့ သွေးထွက်သံယိုမှုတွေနဲ့ အကြမ်းဖက်မှုတွေကို ရပ်တန့်ဖို့ ဖြစ်ပါ တယ်" ဟု ပူတင်က အောက်တိုဘာ ၂၅ ရက်က ရုရှားဘာသာရေး ခေါင်းဆောင်များနှင့် ကရင်မလင်နန်းတော်တွင် အစည်းအဝေး ပြုလုပ်ချိန်အတွင်း ပြောကြားခဲ့သည်။

အကယ်၍ အစ္စရေးအနေနှင့် ဂါဇာကမ်းမြောင်ဒေသတွင် စစ်ဆင်ရေးများကို ရပ်တန့်ခြင်းမရှိပါက ထိုပဋိပက္ခသည် ပိုမိုကြီးမား ကျယ်ပြန့်လာလိမ့်မည်ဟုလည်း ပူတင်က အခြားနိုင်ငံများမှ ခေါင်းဆောင်များနှင့် ဖုန်းဆက်သွယ် ပြောဆိုမှုအတွင်း ပြောကြားခဲ့သည်။

 အရှေ့အလယ်ပိုင်းဒေသ နိုင်ငံများကို တွေ့ရစဉ်

"ဒီပဋိပက္ခ ပိုပြီး အရှိန်မြင့်လာခဲ့မယ်ဆိုရင် အန္တရာယ်ကြီးမားပြီး ထိခိုက်ပျက်စီးမှုတွေ ဖြစ်ပွားလာမယ့် အကျိုး ဆက်တွေကို မြင်တွေ့ရမှာ ဖြစ်ပါတယ်။ ဒါဟာ အရှေ့အလယ်ပိုင်း ဒေသမှာတင် မဟုတ်ပါဘူး။ အရှေ့အလယ်ပိုင်း ထက် ကျော်လွန်တဲ့ နေရာတွေအထိပါ ပျံ့နှံ့သွားနိုင်ပါလိမ့်မယ်" ဟု ပူတင်က ပြောကြားခဲ့သည်။ 

ထို့ပြင် အခြား အင်အားစုများသည်လည်း ပဋိ့ပက္ခကို ပိုမိုအရှိန်မြင့်တက်စေရန် ကြိုးပမ်းနေပြီး အခြားနိုင်ငံများကို ပါ အစ္စရေး-ဟားမာ့စ် စစ်ပွဲအတွင်း ပါဝင်လာစေရန် လုပ်ဆောင်နေသည်ဟု ပူတင်က အနောက်နိုင်ငံများကို ရည်ရွယ်ပြောကြားခဲ့သည်။ 

ထိုအင်အားစုများ၏ ရည်ရွယ်ချက်မှာ အရှေ့အလယ်ပိုင်းတွင်သာမက အရှေ့အလယ်ပိုင်းထက် ကျော်လွန်သည့် နေရာဒေသများတွင်ပါ အပြန်အလှန် မုန်းတီးမှုများနှင့် ပရမ်းပတာ အခြေအနေများကို ဖန်တီးရန် ဖြစ်သည်ဟု လည်း ပူတင်က ပြောသည်။ 

 အစ္စရေးစစ်သားတွေကို တွေ့ရစဉ်

အောက်တိုဘာ ၂၅ ရက်က ကုလသမဂ္ဂ လုံခြုံရေးကောင်စီတွင် အမေရိကန်က အဆိုပြုသည့် လူသားချင်း စာနာထောက်ထားမှုဆိုင်ရာ အပစ်အခတ်ရပ်စဲရေး၊ အရပ်သားများကို ကာကွယ်ရေး၊ ဂါဇာဒေသကို ထိန်းချုပ် ထားသည့်် ဟားမာ့စ်အဖွဲ့နှင့်အခြား လက်နက်ကိုင်အဖွဲ့များကို လက်နက်ထောက်ပံ့မှုများအား ရပ်တန့်ရေး တောင်းဆိုထားသည့် ကြေညာချက် မူကြမ်းတစ်စောင်ကို ရုရှားနှင့်တရုတ်က ဗီတိုအာဏာဖြင့် ပယ်ချခဲ့သည်။ 

လူသားချင်း စာနာထောက်ထားမှုဆိုင်ရာ အပစ်ရပ်မှုသည် ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က ထောက်ခံထားသည့် သမားရိုးကျ အပစ်အခတ်ရပ်စဲရေးနှင့် တူညီမှုမရှိကြောင်း သံတမန်များက ပြောကြားခဲ့သည်။ 

အဘယ်ကြောင့်ဆိုသော် လူသားချင်း စာနာထောက်ထားမှုဆိုင်ရာ အပစ်ရပ်မှုသည် နာရီပိုင်းသာ ကြာမြင့်သော ကြောင့် ဖြစ်သည်။

Source: အယ်လ်ဂျာဇီးယား

CNI International News

ဝါရှင်တန်၊ အောက်တိုဘာ ၂၇

အစ္စရေး-ဟားမာ့စ် စစ်ပွဲသည် အစ္စရေးနှင့် နယ်စပ်ချင်း ထိစပ်နေသည့် အီဂျစ်၊ ဂျော်ဒန်နှင့် လက်ဘနွန်နိုင်ငံတို့တွင် စီးပွားရေး အကျပ်အတည်းများ ဖြစ်ပွားစေနိုင်သည်ဟု အေပီမှ ဖော်ပြခဲ့သည်။

ထို့အပြင် အဆိုပါ သုံးနိုင်ငံအတွင်း ဘဏ္ဍာရေးနှင့် နိုင်ငံရေး မတည်ငြိမ်မှုများလည်း ပိုမို ဆိုးရွားစေနိုင်သည်ဟု ကျွမ်းကျင်သူများက သုံးသပ်နေကြသည်။ 

အီဂျစ်၊ ဂျော်ဒန်နှင့်် လက်ဘနွန်နိုင်ငံတို့တွင် လူမှုနိုင်ငံရေး တည်ငြိမ်မှုကို ဆုံးရှုံးနိုင်ကြောင်း နိုင်ငံတကာ ငွေကြေး ရန်ပုံငွေအဖွဲ့ (IMF) က စက်တင်ဘာလအတွင်း သတိပေးခဲ့ပြီးနောက် အစ္စရေး-ဟားမာ့စ် ပဋိပက္ခ ဖြစ်ပွားလာချိန် တွင် ထိုနိုင်ငံများ၏ စီးပွားရေးဖိအားများ ပိုမိုမြင့်တက်လာခဲ့သည်။ 

ဟားမာ့စ်တို့က အစ္စရေးကို ဝင်ရောက်တိုက်ခိုက်ခဲ့သည့် အောက်တိုဘာ ၇ ရက် နောက်ပိုင်းတွင် ထိုစစ်ပွဲသည် စီးပွားရေး အကျပ်အတည်းတစ်ခုကို အလွယ်တကူ ဖြစ်ပေါ်စေနိုင်သည်ဟု ဥရောပသမဂ္ဂနှင့် အမေရိကန်သမ္မတ ဂျိုးဘိုင်ဒန် (Joe Biden) တို့က သတိပေးခဲ့သည်။

 အမေရိကန် နိုင်ငံခြားရေး၀န်ကြီး ဘလင်ကင်နဲ့ အမေရိကန် ဘဏ္ဍာရေးဝန်ကြီးကို တွေ့ရစဉ်

ထိုသတိပေးချက်ကို လက်ရှိတွင် ကမ္ဘာ့ခေါင်းဆောင်များနှင့် နိုင်ငံရေး ကျွမ်းကျင်သူများက စတင် လက်ခံလာခဲ့ ကြသည်။ 

အစ္စရေး-ဟားမာ့စ် စစ်ပွဲကြောင့် စီးပွားရေး အကျပ်အတည်းများ ဖြစ်ပွားလာနိုင်သလို ဒေသတွင်းနိုင်ငံများ၏ အစိုးရများ ပြုတ်ကျမည့်အရေးမှ ကာကွယ်ရန် အမေရိကန်အစိုးရအနေနှင့် ထိုပဋိပက္ခကို အဆုံးသတ်ဖို့ လုပ်ဆောင်ရမည် ဖြစ်သည်။

"စီးပွားရေး မတည်ငြိမ်မှု ဖြစ်ပွားလာရင် ဒေသတွင်းက အဖျက်သမားတွေက အဲဒီအခြေအနေကို ပိုပြီးဆိုးရွား အောင် လှုံ့ဆော်ဖို့ လွယ်ကူလာပါလိမ့်မယ်" ဟု အမေရိကန် ဘဏ္ဍာရေးဝန်ကြီးဌာန၏ အရာရှိဟောင်း တစ်ဦး ဖြစ်ပြီး နိုင်ငံတကာ ရှေ့နေတစ်ဦးဖြစ်သူ ခရစ္စတိုဖာ ဆွစ်ဖ် (Christopher Swift) က ပြောကြားခဲ့သည်။

ကမ္ဘာ့ဘဏ် အကြီးအကဲ အာဂျေး ဘန်ဂါ (Ajay Banga) ကလည်း ယခုသီတင်းပတ်အတွင်း ဆော်ဒီနိုင်ငံတွင် ပြုလုပ်ခဲ့သည့် ညီလာခံတစ်ခု၌ အစ္စရေး-ဟားမာ့စ်စစ်ပွဲသည် စီးပွားရေးဖွံ့ဖြိုးတိုးတက်မှုအတွက် အလွန် အန္တရာယ်ရှိစေနိုင်သည်ဟု သတိပေးခဲ့သည်။ 

 ကမ္ဘာ့ဘဏ် အကြီးအကဲ အာဂျေး ဘန်ဂါကို တွေ့ရစဉ်

အထူးသဖြင့် ဂါဇာဒေသရှိ ပါလက်စတိုင်းများနှင့် ဆူဒန်ပြည်တွင်းစစ်ကြောင့် ထွက်ပြေး တိမ်းရှောင်လာသည့် စစ်ဘေးဒုက္ခသည်များအား လက်ခံရဖွယ်ရှိသော အီဂျစ်နိုင်ငံအတွက် စီးပွားရေးဖိအားများကို ဖြေရှင်းရာတွင် ကူညီထောက်ပံ့မှုများ ပိုမိုပေးဆောင်ရန် ဥရောပကောင်စီဥက္ကဋ္ဌ ချားလ်စ် မိုက်ကယ် (Charles Michel) က ပြီးခဲ့သည့် သီတင်းပတ်အတွင်း IMF နှင့် တွေ့ဆုံချိန်တွင် ပြောကြားခဲ့သည်။ 

"အီဂျစ်ကို ထောက်ပံ့ကြစို့။ အီဂျစ်ဟာ ကျနော်တို့ရဲ့ ကူညီထောက်ပံ့မှုကို လိုအပ်ပြီး ကျနော်တို့ကလည်း အီဂျစ်ကို ထောက်ပံ့ဖို့ လိုအပ်ပါတယ်" ဟု မိုက်ကယ်က IMF နှင့် တွေ့ဆုံမှု အပြီးတွင် သတင်းထောက်များကို ပြောကြား ခဲ့သည်။ 

လက်ရှိအချိန်တွင် ဂါဇာကမ်းမြောင် ဒေသအတွင်း ပါလက်စတိုင်း ၁ သန်းကျော်သည် အစ္စရေး၏ လေကြောင်း တိုက်ခိုက်မှုများကြောင့် အိုးမဲ့အိမ်မဲ့ဖြစ်ခဲ့ရပြီး လက်ဘနွန်နှင့် အစ္စရေး နယ်စပ်တွင်လည်း အပြန်အလှန် ပစ်ခတ်တိုက်ခိုက်မှုများ ဖြစ်ပွားနေသဖြင့် စစ်ပွဲသည် ပိုမိုအရှိန်မြင့် လာနိုင်သည်ဟု သုံးသပ်မှုများ ထွက်ပေါ်ခဲ့ သည်။ 

Source: အေပီ

CNI International News

ဘန်ကောက်၊ အောက်တိုဘာ ၂၆

ထိုင်းနိုင်ငံမှ Move Forward ပါတီ (MFP) ခေါင်းဆောင်ဟောင်း ပီတာ လင်မ်ဂျာရွန်ရတ် (Pita Limjaroenrat) သည် အမေရိကန်နိုင်ငံ၊ နယူးယောက်မြို့တွင် လှုပ်ရှားသွားလာနေသည့် ဓာတ်ပုံများ ထွက်ပေါ်လာခဲ့သည်ဟု Thai PBS World မှ ဖော်ပြခဲ့သည်။

လူမြင်ကွင်းကနေ ပျောက်ကွယ်နေသည့် ပီတာသည် ယခုအခါမှာတော့ ပြန်လည်ထွက်ပေါ်လာခြင်းကြောင့် ထိုင်း သတင်းဌာနများက ပီတာ ပြန်လာပြီဟု ဖော်ပြနေကြသည်။

ပီတာသည် ၂၀၁၃ ခုနှစ်အတွက် TIME မဂ္ဂဇင်း၏ ထင်ရှားကျော်ကြားပုဂ္ဂိုလ် အယောက် ၁၀၀ (Time 100 Next) စာရင်းတွင် နောက်ထပ် မျိုးဆက်သစ်အတွက် ခေါင်းဆောင်မှုကဏ္ဍကို အဓိပ္ပာယ်ဖွင့်ဆိုခဲ့သည့် ခေါင်းဆောင် တစ်ဦးအဖြစ် ညစာစားပွဲကို တက်ရောက်ရန် နယူးယောက်မြို့သို့ ရောက်ရှိခဲ့ခြင်း ဖြစ်သည်။

သူသည် စက်တင်ဘာလက MFP ပါတီ ခေါင်းဆောင်အဖြစ်မှ နုတ်ထွက်ခဲ့ပြီးကတည်းက လူမြင်ကွင်းမှ ပျောက်ကွယ်ခဲ့သူ ဖြစ်သည်။ 

ပီတာကို တွေ့ရစဉ်

ပီတာ၏ Instagram အကောင့်တွင် တင်ထားသည့် ဓာတ်ပုံများထဲမှာ နယူးယောက်မြို့၌ ရှိခဲ့သည့်အချိန်က ရိုက်ကူးခဲ့သော ဓာတ်ပုံများကို တင်ထားခဲ့ပြီး ရာနှင့်ချီသည့် like များနှင့် comment များကို မြင်တွေ့ရသည်။

ထိုဓာတ်ပုံများထဲတွင် ပီတာသည် နယူးယောက် မြေအောက်ရထားကို စီးနေပုံ၊ နယူးယောက်မြို့၏ လမ်းပေါ်တွင် တစ်ဦးတည်း လမ်းလျှောက်နေပုံ၊ လမ်းဘေး စားသောက်ဆိုင် တစ်ဆိုင်တွင် အအေးသောက်နေပုံနှင့် Times Square တွင် မတ်တပ်ရပ်နေပုံတို့ ပါဝင်သည်။

ပီတာကို ထောက်ခံသည့် ဖော်လိုဝါများကလည်း ပီတာကို ချစ်ခင်နှစ်သက်သည့် မှတ်ချက်များ ရေးသားခဲ့ကြ သည်။ 

"ခင်ဗျားဟာ ထိုင်းဝန်ကြီးချုပ် မဖြစ်နိုင်ပေမယ့်လည်း ကျနော်တို့ ရင်ထဲက ထာဝရ ဝန်ကြီးချုပ်ပါ၊ နိုင်ငံရေးကို လက်မလျှော့လိုက်ပါနဲ့ ကျနော်တို့ ခင်ဗျားကို အမြဲတမ်း ထောက်ခံသွားမှာပါ" အစရှိသည့်  မှတ်ချက်များကို မြင်တွေ့ရသည်။

ပီတာကို တွေ့ရစဉ်

"သင့်အနေနဲ့ နိုင်ငံရေးလောကထဲက ထွက်ခွာသွားရင်တောင် မော်ဒယ်တစ်ယောက် ဖြစ်နိုင်ပါသေးတယ်" ဟု ပီတာ၏ ပရိသတ်တစ်ဦးက မှတ်ချက်ရေးသားခဲ့သည်။

ပီတာသည် နယူးယောက်တွင် ထိုဓာတ်ပုံများ ရိုက်ကူးရန်အတွက် ထိုင်းဓာတ်ပုံ ဆရာတစ်ဦးကို ငှားရမ်းခဲ့ သည်ဟုလည်း သတင်းများ ထွက်ပေါ်ခဲ့သည်။ 

ထိုဓာတ်ပုံများ ထွက်ပေါ်လာခဲ့ပြီးနောက် ထိုင်းနိုင်ငံ၏ မီဒီယာအားလုံးနီးပါးတွင် ပီတာ၏ ဓာတ်ပုံများနှင့်တကွ "ပီတာ ပြန်လာပြီ" ၊ "သူ့ရဲ့ ဂုဏ်သတင်းကို ပြန်ယူဖို့အတွက် ပီတာ ပြန်လာပြီ" ဟူသည့် သတင်းခေါင်းစဉ်များနှင့် ဖော်ပြခဲ့သည်။ 

Source: Thai PBS World

CNI International News

ဝါရှင်တန်၊ အောက်တိုဘာ ၂၆

ကုလသမဂ္ဂလုံခြုံရေးကောင်စီတွင် လက်ရှိဖြစ်ပွားနေသည့် အစ္စရေး-ဟားမာ့စ်စစ်ပွဲနှင့် ပတ်သက်ပြီး အပစ်အခတ် ရပ်စဲရေး ဆွေးနွေးခဲ့ရာ အမေရိကန်က လက်မခံခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ထိုဆွေးနွေးမှုတွင် အဖွဲ့ဝင်နိုင်ငံ အများစုက အစ္စရေး၏ ဗုံးကြဲတိုက်ခိုက်မှုကို ခံနေရသည့် ဂါဇာဒေသအတွင်းရှိ ပါလက်စတိုင်းများထံ လူသားချင်း စာနာထောက်ထားမှု အကူအညီများ ပေးပို့နိုင်ရန်အတွက် ချက်ချင်း အပစ် အခတ်ရပ်စဲရန် တောင်းဆိုခဲ့ကြသည်။

သို့သော် အမေရိကန်နှင့် ရုရှား အပါအဝင် ဗီတိုအာဏာရှိသည့် အမြဲတမ်းအဖွဲ့ဝင် ၅ နိုင်ငံပါရှိသည့် ၁၅ နိုင်ငံပါ လုံခြုံရေးကောင်စီသည် အစ္စရေး-ဟားမာ့စ် ပဋိပက္ခကို အဆုံးသတ်ရန် ကြေညာချက် တစ်စောင် ထုတ်ပြန်နိုင်ခဲ့ ခြင်း မရှိပေ။

အစ္စရေး၏ ခိုင်မာသည့် မဟာမိတ်ဖြစ်သော အမေရိကန်သည် ပြီးခဲ့သည့် သီတင်းပတ်က အပစ်အခတ်ရပ်စဲရန် တောင်းဆိုခဲ့သည့် လုံခြုံရေးကောင်စီ အဖွဲ့ဝင် ၁၂ နိုင်ငံ၏ ကြေညာချက်တစ်စောင်ကို ဗီတိုအာဏာဖြင့် ပယ်ချခဲ့ သည်။

ထို့ပြင် အစောပိုင်းက ရုရှားက အဆိုပြုတင်သွင်းခဲ့သည့် ကြေညာချက် တစ်စောင်လည်း ပယ်ချခံခဲ့ရသည်။

အီဂျစ်နိုင်ငံခြားရေးဝန်ကြီး ဆာမက် ရှောက်ကရီကို တွေ့ရစဉ်

အောက်တိုဘာ ၂၄ ရက်က ပြုလုပ်ခဲ့သည့် အချေအတင် ဆွေးနွေးမှုတွင် နိုင်ငံခြားရေးဝန်ကြီးများနှင့် ဒုဝန်ကြီး ၃၀ ခန့် အပါအဝင် နိုင်ငံပေါင်း ၉၀ က အမှာစကား ပြောကြားခွင့်ရသည့် စာရင်းတွင် ပါဝင်ခဲ့သည်။

ထိုကဲ့သို့ အမှာစကား ပြောကြားခွင့်ရသည့် ကိုယ်စားလှယ်များထဲမှ အများစုသည် ဂါဇာဒေသတွင် လူသေဆုံးမှု များနှင့် ထိခိုက်ပျက်စီးမှုများ မြင့်တက်နေချိန်တွင် ပါလက်စတိုင်း အရပ်သားများကို တိုက်ခိုက်မှုများအား ရပ်တန့် ရန်နှင့် အပစ်အခတ်ရပ်စဲရန် တောင်းဆိုခဲ့ကြသည်။

"ကျနော်တို့ အနေနဲ့ ဒီစစ်ပွဲကို အဆုံးသတ်စေဖို့ အပစ်အခတ်ရပ်စဲရေးကို တောင်းဆိုမှုတွေ ဒါမှမဟုတ် ပြတ်သား တဲ့ ကြေညာချက်တစ်စောင် ထုတ်ပြန်ဖို့ ကြိုးပမ်းမှုတွေ နှစ်ကြိမ်တိုင်တိုင် ပယ်ချခံခဲ့ရတာကို ဝမ်းနည်းမိပါတယ်" ဟု အီဂျစ်နိုင်ငံခြားရေးဝန်ကြီး ဆာမက် ရှောက်ကရီ (Sameh Shoukry) က ပြောကြားခဲ့သည်။

ဂျော်ဒန်နိုင်ငံခြားရေးဝန်ကြီး အိုင်မန် ဆာဖာဒီ (Ayman Safadi)ကလည်း ကုလသမဂ္ဂရှိ အဖွဲ့ဝင် ၂၂ နိုင်ငံပါဝင် သည့် အာရပ်နိုင်ငံအုပ်စု၏ ကိုယ်စား အမှာစကား ပြောကြားရာတွင် အစ္စရေးသည် ဂါဇာကို မြေလှန်နေကြောင်း စွပ်စွဲခဲ့ပြီး အပစ်အခတ်ရပ်စဲစေရန် စွမ်းဆောင်နိုင်ခြင်း မရှိခဲ့သည့်  လုံခြုံရေးကောင်စီ၏ ပျက်ကွက်မှုကိုလည်း စိတ်ပျက်စရာကောင်းကြောင်း ပြောကြားခဲ့သည်။

Source: အယ်လ်ဂျာဇီးယား

CNI International News

မော်စကို၊ အောက်တိုဘာ ၂၆

ပြီးခဲ့သည့် ရက်ပိုင်းအတွင်းက ရုရှားတပ်ဖွဲ့များသည် ယူကရိန်းစစ်လေယာဉ် ၂၄ စင်းကို ပစ်ချနိုင်ခဲ့သည့် လက်နက် စနစ်များအား ရရှိခဲ့သည်ဟု ရုရှားကာကွယ်ရေးဝန်ကြီး ဆာဂျေ ရွိူင်ဂူ (Sergei Shoigu)က အရှေ့ပိုင်း တိုက်ခိုက် ရေးတပ်ဖွဲ့ဝင်များအား ဂုဏ်ထူးဆောင်ဆုများ ပေးအပ်သည့် အခမ်းအနားတွင် ပြောကြားခဲ့သည်ဟု တာ့စ်သတင်း ဌာနမှ ဖော်ပြခဲ့သည်။

ပြီးခဲ့သည့် သီတင်းပတ်အတွင်း ယူကရိန်းလေတပ်သည် တိုက်ခိုက်ရေး လေယာဉ်များ ပစ်ချခံခဲ့ရမှုနှင့်အတူ ပျက်စီးဆုံးရှုံးမှု များပြားခဲ့သည်ဟု တပ်ဖွဲ့ဝင်များနှင့် တွေ့ဆုံသည့် အခမ်းအနားတွင် ရွိူင်ဂူက ပြောသည်။

ယူကရိန်းသမ္မတ ဇာလန်းစကီးနဲ့ တိုက်လေယာဉ်တစ်စီးကို တွေ့ရစဉ်

"ငါးရက်အတွင်းမှာပဲ ယူကရိန်းလေယာဉ် ၂၄ စင်းကို ပစ်ချနိုင်ခဲ့တဲ့ လက်နက်စနစ်တွေကို ကျနော်တို့ ရရှိခဲ့ပါ တယ်"ဟု ရုရှားကာကွယ်ရေးဝန်ကြီးက ပြောသည်။

ထို့ပြင် ရုရှားစစ်မှုထမ်းများ ဂုဏ်ထူးဆောင်ဆုများ ရရှိခဲ့မှုကိုလည်း ရွိူင်ဂူက ချီးကျူးဂုဏ်ပြုခဲ့သည်။

"သင်တို့ကို လှိုက်လှိုက်လှဲလှဲ ဂုဏ်ပြုပါတယ်။ သင်တို့ဟာ တန်ဖိုးကြီးမားစွာ တိုက်ပွဲဝင်နေတာပါ" ဟု ရုရှား ကာကွယ်ရေးဝန်ကြီးက ပြောကြားခဲ့သည်။

ထိုအခမ်းအနားအတွင်း ရုရှားတပ်ဖွဲ့များသည် ယူကရိန်းစစ်ဆင်ရေးတွင် အမေရိကန်လုပ် M777 ဟောင်ဝပ်ဇာ (Howitzers) အမြောက်များကို အောင်မြင်စွာ ဖျက်ဆီးနိုင်ခဲ့သည်ဟုလည်း ရွိူင်ဂူက ရုရှားစစ်မှုထမ်းများကို ပြောကြားခဲ့သည်။ 

Source: တာ့စ်

CNI International News

ဟောင်ကောင်၊ အောက်တိုဘာ ၂၆

အမေရိကန်နှင့် ရုရှားကို တရုတ်က ပဲ့ထိန်းဒုံးကျည် တပ်ဆင်ထားသော ရေငုပ်သင်္ဘောများ ထုတ်လုပ်ခြင်းဖြင့် အမီ လိုက်နေကြောင်း ရိုက်တာမှ ဖော်ပြခဲ့သည်။

တရုတ်သည် ၎င်း၏ ပထမဆုံး နျူကလီးယားစွမ်းအင်သုံး ပဲ့ထိန်းဒုံးကျည် တပ်ဆင်ထားသည့် ရေငုပ်သင်္ဘောများ ကို ရေချခဲ့သည်ဟု အမေရိကန်ကာကွယ်ရေးဝန်ကြီးဌာန၏ တရုတ်စစ်တပ်နှင့် ပတ်သက်သည့် နှစ်ပတ်လည် အစီအရင်ခံစာတွင် ရေးသားခဲ့သည်။

အောက်တိုဘာ ၂၀ ရက်က ထုတ်ပြန်ခဲ့သည့် ပင်တဂွန် (အမေရိကန်ကာကွယ်ရေးဝန်ကြီးဌာန) ၏ ထုတ်ပြန်ချက် တွင် လွန်ခဲ့သည့် ၁၈ လအတွင်း တရုတ်၏ သင်္ဘောကျင်းများ၌ အဆင့်မြှင့်တင်နေသည့် ရေငုပ်သင်္ဘောများသည် Type 093B ပဲ့ထိန်းစနစ်တပ် ရေငုပ်သင်္ဘောများ ဖြစ်သည်ဟု ဖော်ပြခဲ့သည်။ 

တရုတ်၏ အရှေ့မြောက်ဘက် ဟူလူတောင်း (Huludao) သင်္ဘောကျင်းကို ရိုက်ကူးထားသည့် ဂြိုဟ်တုဓာတ်ပုံ များတွင် ရေငုပ်သင်္ဘော အသစ်များနှင့် ရှိရင်းစွဲ ရေငုပ်သင်္ဘောများအား အဆင့်မြှင့်တင်နေပုံများကို ရိုက်တာ သတင်းဌာနက ၂၀၂၂ ခုနှစ်၊ မေလက ထုတ်ပြန်ခဲ့သည်။
 
တရုတ်ရေတပ်သည် ရေငုပ်သင်္ဘောများမှတစ်ဆင့် မြေပြင်ပေါ်ရှိ တာဝေးပစ်မှတ်များကို တိကျစွာ ပစ်ခတ်နိုင် သည့် စွမ်းဆောင်ရည်နှင့် မြေပြင်တိုက်ခိုက်ရေး ခရုစ်ဒုံးကျည်များအား အသုံးပြုသည့် စစ်သင်္ဘောအင်အားကို ပိုင်ဆိုင်လာတော့မည် ဖြစ်ကြောင်း ပင်တဂွန်၏ အစီရင်ခံစာထဲတွင် ဖော်ပြခဲ့သည်။ 

SSGN ဟု လူသိများသည့် သမားရိုးကျ ဒုံးကျည်များ တပ်ဆင်ထားသော ထိုရေငုပ်သင်္ဘောများကို စစ်အေးကာလ တွင်း အမေရိကန် လေယာဉ်တင် သင်္ဘောများအား ပစ်မှတ်ထားရန် ဆိုဗီယက်ယူနီယံက တီထွင် ထုတ်လုပ်ခဲ့ခြင်း ဖြစ်သည်။

အမေရိကန်သမ္မတ ဘိုင်ဒန်နဲ့ ရုရှားသမ္မတ ပူတင်ကို တွေ့ရစဉ်

အမေရိကန် ရေတပ်ကလည်း အရွယ်အစား ကြီးမားသည့် တိုမဟော့ခ် ဒုံးကျည်များ (Tomohawk Missile) ကို တင်ဆောင်နိုင်ရန်အတွက် ပဲ့ထိန်းဒုံးကျည်များ တပ်ဆင်သည့် ရေငုပ်သင်္ဘောများကို တီထွင်ထုတ်လုပ်ခဲ့သည်။ 

ခရုစ်ဒုံးကျည်များသည် ပုံမှန်အားဖြင့် တာဝေးပစ် ဒုံးကျည်များဖြစ်ပြီး ပစ်မှတ်ကို တိကျစွာ ထိမှန်သည့် ဒုံးကျည်များ ဖြစ်သည်။

ပဲ့ထိန်းဒုံးကျည်များ၏ မတူသည့်အချက်မှာ ခရုစ်ဒုံးကျည်များသည် အမြင့်ပေ အနိမ့်တွင် သို့မဟုတ် ပင်လယ် ရေမျက်နှာပြင်ပေါ်တွင် လျှပ်တိုက်ပြီး ပျံသန်းသည့် ဒုံးကျည်အမျိုးအစား ဖြစ်သည်။

တရုတ်ပြည်သူ့ လွတ်မြောက်ရေး တပ်မတော် (PLA) သည် လေယာဉ်တင်သင်္ဘောများ၊ မြေပြင်ပစ်မှတ်များကို တိုက်ခိုက်နိုင်သည့် စစ်သင်္ဘောများကို ပိုမိုထုတ်လုပ်ရန် ရည်မှန်းချက် ပြင်းပြနေဖွယ်ရှိသည်ဟု ကျွမ်းကျင်သူများ က ပြောကြားခဲ့သည်။ 

Source: ရိုက်တာ

CNI International News

ခိုဟီမာ၊ အောက်တိုဘာ ၂၅

ကသည်းနှင့် တန်ကူလ်နာဂ လူမျိုးစုသည် ညီအစ်ကိုများဖြစ်သည်ဟု မဏိပူရ်ပြည်နယ်ဝန်ကြီးချုပ် အန် ဘိုင်ရန်ဆင်း (N Biren Singh)က ပြောကြားခဲ့သည့်အပေါ် နာဂအမျိုးသား ဆိုရှယ်လစ်ကောင်စီ-အိုက်ဇက်/ ဗွီးဗာ (NSCN-IM)မှ ပြန်လည်တုန့်ပြန်ခဲ့သည်ဟု Northeast Now မှ ဖော်ပြခဲ့သည်။

"ဟွန်ဒေါင်း (Hundung) တော်ဝင် မိသားစုနဲ့ ကသည်းတွေအကြား သွေးသားနှီးနွှယ်မှုကို လျော့ပါးသွားအောင် မလုပ်နိုင်သလို နောက်တစ်နည်း ပြောရရင် ဒါက အဓိပ္ပာယ်မှားပြီး ဖွင့်ဆိုလို့မရပါဘူး"ဟု NSCN-IM ခေါင်းဆောင် ဗွီးဗာက ပြောသည်။

ကသည်းလူမျိုးများကိုတွေ့ရစဉ်

"နာဂတွေ၊ ကသည်းတွေနဲ့ ကူကီးတွေဟာ ဘုံတူညီတဲ့ သမိုင်းကြောင်းတွေ ရှိခဲ့ပါတယ်။ သူတို့တွေဟာ မွန်ဂို မိသားစုဝင် ညီရင်းအစ်ကိုတွေ ဖြစ်ကြပါတယ်။ ဒါဟာ လူတိုင်းသိတဲ့အရာပါ"ဟု NSCM-IM က ထုတ်ပြန်ခဲ့သည်။

"တန်ကူလ်နဲ့ ကသည်း ညီအစ်ကိုကိစ္စ ပြောရမယ်ဆိုရင် သမိုင်းကြောင်းကတော့ ရှင်းလင်းနေပါတယ်။ ဘာပဲဖြစ် ဖြစ် ဒါက ဟွမ်ဒေါင်း ကျေးရွာနဲ့ပဲ တွက်ပြီးပြောဖြစ်တယ်။ တန်ကူလ်တွေနဲ့ လုံးဝမသက်ဆိုင်ပါဘူး" ဟု NSCN-IM ခေါင်းဆောင် ဗွီးဗာက ပြောသည်။

Source: Northeast Now

CNI International News

ဝါရှင်တန်၊ အောက်တိုဘာ ၂၅

အီရတ်နှင့် ဆီးရီးယားနိုင်ငံများရှိ အမေရိကန်တပ်ဖွဲ့များကို အီရန်က ကျောထောက်နောက်ခံ ပေးထားသည့် လက်နက်ကိုင်အဖွဲ့များက ဒုံးကျည်များ၊ ဒရုန်းများဖြင့် တိုက်ခိုက်မှုများအား အဆင်ပြေချောမွေ့စေရန် အီရန်က တက်ကြွစွာ ကူညီပေးခဲ့သည်ဟု အမေရိကန်မှ စွပ်စွဲခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

အစ္စရေး-ဟားမာ့စ် စစ်ပွဲကြောင့် ဒေသတွင်း တင်းမာမှုများ မြင့်တက်နေချိန်တွင် ပြီးခဲ့သည့် သီတင်းပတ်က အရှေ့အလယ်ပိုင်းရှိ အမေရိကန်စစ်စခန်းများအပေါ် တိုက်ခိုက်မှုများ မြင့်တက်လာခဲ့ကြောင်းနှင့် အမေရိကန် အနေဖြင့် ထိုခြိမ်းခြောက်မှုများကို ခွင့်ပြုမည်မဟုတ်ကြောင်း အိမ်ဖြူတော် အမျိုးသားလုံခြုံရေး ပြောရေးဆိုခွင့်ရှိ သူ ဂျွန်ကာဘီ (John Kirby)က အောက်တိုဘာ ၂၃ ရက်တွင် ပြောကြားခဲ့သည်။

ဟားမာ့စ်အဖွဲ့က အစ္စရေးကို စတင်တိုက်ခိုက်ခဲ့သည့် အောက်တိုဘာ ၇ ရက်နေ့က စတင်ဖြစ်ပွားခဲ့သော  စစ်ပွဲ အတွင်း အမေရိကန်သည် အစ္စရေးကို ကူညီထောက်ပံ့ရန် အရှေ့အလယ်ပိုင်းဒေသတွင် စစ်အင်အားများကို တိုးမြှင့် ချထားခဲ့သည်။

အိမ်ဖြူတော် အမျိုးသားလုံခြုံရေး ပြောရေးဆိုခွင့်ရှိသူ ဂျွန်ကာဘီကို တွေ့ရစဉ်

ထို့ပြင် အမေရိကန်သည် အစ္စရေး-ဟားမာ့စ်အကြား အပစ်အခတ်ရပ်စဲရန် တောင်းဆိုမှုများကို ငြင်းပယ်ခဲ့ပြီး အစ္စရေးအနေဖြင့် မိမိကိုယ်ကိုယ် ခုခံကာကွယ်ပိုင်ခွင့်ရှိကြောင်း ပြောကြားခဲ့သည်။

"အီရန်က ဟားမာ့စ်နဲ့ ဟစ်ဇ်ဘိုလာကို ဆက်လက် ထောက်ပံ့နေပါတယ်။ ပြီးတော့ ဒီအခြေအနေကို အီရန်က အနီးကပ် စောင့်ကြည့် နေတယ်ဆိုတာလည်း ကျနော်တို့ သိပါတယ်။ တစ်ချို့ ဖြစ်စဉ်တွေမှာဆိုရင် အီရန်ဟာ အစ္စရေးအပေါ် တိုက်ခိုက်တဲ့ စစ်သွေးကြွတွေရဲ့ တိုက်ခိုက်မှုတွေကို အဆင်ပြေချောမွေ့စေဖို့ ပါဝင် ဆောင်ရွက် ပေးနေတယ်ဆိုတာကိုလည်း ကျနော်တို့ သိထားပါတယ်"ဟု ဂျွန်ကာဘီက အိမ်ဖြူတော်တွင် သတင်းထောက်များ ကို ပြောကြားခဲ့သည်။

ထို့ပြင် အီရန်သည် အစ္စရေး-ဟားမာ့စ် ပဋိပက္ခတွင် ၎င်း ပါဝင်ပတ်သက်ခြင်း မရှိကြောင်း ငြင်းပယ်နိုင်သည့် အခန်းကဏ္ဍ၌ ဆက်လက် ထိန်းသိမ်းထားရန် ရည်ရွယ်သော်လည်း မိမိတို့အနေနှင့် အီရန်၏ သဘောဆန္ဒအတိုင်း ဖြစ်ပွားခွင့်ပြုမည် မဟုတ်ကြောင်း၊ အမေရိကန်သည် အစ္စရေးသို့ အတွေ့အကြုံ ရင့််ကျက်သည့် စစ်ဘက်ဆိုင်ရာ အကြံပေးပုဂ္ဂိုလ်များ စေလွှတ်ထားကြောင်း ဂျွန်ကာဘီက ပြောသည်။

ဂျွန်ကာဘီ၏ ပြောကြားချက်များနှင့်ပတ်သက်ပြီး အီရန်အစိုးရက မှတ်ချက်ပေးခဲ့ခြင်း မရှိပေ။

အီရန်တပ်ဖွဲ့ကို တွေ့ရစဉ်

အီရန်သည် ဟားမာ့စ်နှင့် ဟစ်ဇ်ဘိုလာ အဖွဲ့အပြင် အီရတ်ရှိ ရှီးယိုက် (Shia) အုပ်စုများကို နိုင်ငံရေးအရ ထောက်ခံ ထားသော်လည်း စစ်ရေးအကူအညီများ မပေးကြောင်း ငြင်းဆိုခဲ့သည်။

သို့သော် မကြာသေးမီ ရက်များအတွင်း အီရန်ခေါင်းဆောင်များက အစ္စရေးအနေဖြင့် ဂါဇာဒေသကို မြေပြင် ထိုးစစ် ဆင်နွှဲမည်ဆိုပါက အခြား စစ်မျက်နှာများမှ တုန့်ပြန်မှုများနှင့်ပါ ရင်ဆိုင်ရမည်ဖြစ်ကြောင်း သတိပေးခဲ့သည်။ 

Source: အယ်လ်ဂျာဇီးယား

CNI International News

တဲလ်အဗစ်၊ အောက်တိုဘာ ၂၅

အစ္စရေးသည် ၂၀၁၁ ခုနှစ်က Iron Dome ဒုံးကျည် ကာကွယ်ရေးစနစ်ကို စတင်အသုံးပြုခဲ့ချိန်ကစပြီး ဂါဇာ ကမ်းမြောင် ဒေသအတွင်းမှ ပစ်လွှတ်သည့် ထောင်သောင်းချီသည့် ဒုံးကျည်များကို ကြားဖြတ် ပစ်ချနိုင်ခဲ့သည်ဟု အေပီမှ ဖော်ပြခဲ့သည်။

ထိုဒုံးကျည် ကာကွယ်ရေးစနစ်သည် အစ္စရေးပြည်သူများကို လုံခြုံမှုရရှိစေသည့် စိတ်ခံစားချက်များကို ပေးစွမ်း နိုင်ခဲ့ပြီး အစ္စရေး၏ ကောင်းကင်ယံတွင် ပျံဝဲလာသော ဒုံးကျည်များအား Iron Dome စနစ်က ကြားဖြတ် ပစ်ချ နိုင်ခဲ့သည့် မြင်ကွင်းများကိုလည်း မကြာခဏ မြင်တွေ့ခဲ့ရသည်။

သို့သော် လက်ရှိ ဟားမာ့စ် စစ်သွေးကြွအဖွဲ့နှင့် ဖြစ်ပွားနေသည့် စစ်ပွဲတွင်မူ အစ္စရေး၏ Iron Dome ဒုံးကျည် ကာကွယ်ရေးစနစ်အပေါ် မေးခွန်းများ ထွက်ပေါ်လာခဲ့သည်။

ဟားမာ့စ်တို့သည် သီတင်းနှစ်ပတ်အတွင်း အစ္စရေးကို ဒုံးကျည်အစင်းရေ ၇၀၀၀ ခန့် ပစ်ခတ်ခဲ့သည်ဟု အစ္စရေး စစ်တပ်က ထုတ်ပြန်ခဲ့သည်။

ဟားမာ့စ်က အစ္စရေးကို ဒုံးကျည်ပစ်လွှတ်တိုက်ခိုက်နေစဉ်

ထိုဒုံးကျည် အရေအတွက်သည် ၂၀၀၇ ခုနှစ်က ဂါဇာတွင် ဟားမာ့စ်တို့ အာဏာရလာပြီးနောက်ပိုင်း အစ္စရေးနှင့် ဟားမာ့စ်အကြား ဖြစ်ပွားခဲ့သည့် ယခင်စစ်ပွဲ ၄ ပွဲတွင် ပစ်လွှတ်ခဲ့သော ဒုံးကျည် အရေအတွက်ထက် ပိုမိုများပြား ခဲ့သည်။ 

စစ်ပွဲစတင်သည့်် ပထမဆုံးနေ့ဖြစ်သော အောက်တိုဘာ ၇ ရက်နေ့မှာပင် ဟားမာ့စ်အဖွဲ့သည် ဒုံးကျည်ပေါင်း ၂၀၀၀ ခန့် ပစ်လွှတ်ခဲ့ပြီး လက်ဘနွန်နိုင်ငံအတွင်းရှိ ဟစ်ဇ်ဘိုလာ (Hezbollah) အဖွဲ့ကလည်း အစ္စရေးနိုင်ငံ မြောက်ပိုင်းကို ဒုံးကျည်များဖြင့် ပစ်ခတ်လျက်ရှိသည်။
 
ထိုဒုံးကျည်အများစုကို Iron Dome ဒုံးကျည် ကာကွယ်ရေးစနစ်ဖြင့် ကြားဖြတ်ပစ်ချ နိုင်ခဲ့သော်လည်း ဒုံးကျည် အချို့သည် ကာကွယ်ရေးစနစ်ကို ဖြတ်သန်းနိုင်ခဲ့ကာ အစ္စရေးမြေပေါ်သို့ ကျရောက်ပေါက်ကွဲခဲ့သဖြင့် လူ ၁၁ ဦး ထက်မနည်း သေဆုံးခဲ့ပြီး အဆောက်အအုံများ ထိခိုက်ပျက်စီးခဲ့သည်ဟု အစ္စရေး အရာရှိများက ပြောကြားခဲ့သည်။

ထို့ကြောင့် Iron Dome ဒုံးကျည် ကာကွယ်ရေးစနစ်၏ ထိရောက်မှုအပေါ် မေးခွန်းများ ထွက်ပေါ်လာခဲ့ခြင်း ဖြစ် သည်။

အစ္စရေးရဲ့ Iron Dome က ဒုံးကျည်များကို ပစ်ချနေစဉ်

စင်စစ်မှာမူ Iron Dome ဒုံးကျည် ကာကွယ်ရေးစနစ်တွင် ရေဒါများကို အသုံးပြုသည့် အမြောက်အုပ်စုများပါဝင်ပြီး တာတိုပစ် ဒုံးကျည်များကို ကြားဖြတ်ပစ်ချနိုင်စွမ်းရှိသည်။ 

အမြောက်အုပ်စု တစ်စုချင်းစီတွင် ရေဒါတစ်ခုနှင့်အတူ ဒုံးပစ်လောင်ချာ သုံးခုမှ လေးခုအထိ ပါဝင်ပြီး ဒုံးကျည် ၂၀ ကို ပစ်ခတ်နိုင်စွမ်းရှိသည်ဟု Iron Dome စနစ်ကို အစ္စရေး၏ Rafael Defense Systems ကုမ္ပဏီနှင့်အတူ ပူးတွဲ ထုတ်လုပ်သည့် အမေရိကန်ကာကွယ်ရေးကုမ္ပဏီမှ Raytheon က ပြောကြားခဲ့သည်။ 

သို့သော် ဟားမာ့စ်တို့သည်  ဒုံးကျည်အများအပြားကို တစ်ပြိုင်နက်တည်း ပစ်လွှတ်ခဲ့ချိန်တွင် ဟားမာ့စ်တို့၏ ဒုံးကျည်များသည် Iron Dome စနစ်က ကြားဖြတ်ပစ်ချနိုင်သည့် အရေအတွက်ထက် ပိုမိုများပြားခဲ့သဖြင့် ဒုံးကျည်အချို့သည် ကြားဖြတ်ပစ်ချခြင်း မခံရဘဲ အစ္စရေးနယ်မြေများအတွင်းသို့ ကျရောက် ပေါက်ကွဲခဲ့ခြင်း ဖြစ်နိုင်သည်ဟု ကျွမ်းကျင်သူများက ယူဆထားကြသည်။ 

အစ္စရေးစစ်တပ်ကမူ လက်ရှိအချိန်အထိ Iron Dome ဒုံးကျည်ကာကွယ်ရေးစနစ် မည်မျှ ဖြန့်ကြက် ချထားသည် ဆိုခြင်းကိုမူ မှတ်ချက်ပေးရန် ငြင်းဆိုခဲ့သည်။

Source: အေပီ