CNI International News

မနီလာ၊ ဒီဇင်ဘာ ၁၇

ဖိလစ်ပိုင်နိုင်ငံတွင် သမ္မတ ဖာဒီနန်မားကို့စ် ဂျူနီယာ (Ferdinand Marcos Jr. ) နှင့် ဒုတိယသမ္မတ ဆာရာ ဒူတာတေး (Sara Duterte) တို့အကြား နိုင်ငံရေး သဘောထား ကွဲလွဲမှုမှာ မြင့်တက်လာခဲ့ပြီး ပိုမိုရှုပ်ထွေး လာခဲ့သည်ဟု Nikkei Asia မှ ဖော်ပြခဲ့သည်။

မားကို့စ်-ဒူတာတေး မဟာမိတ်ကို ၂၀၂၂ ခုနှစ် ရွေးကောက်ပွဲမတိုင်မီ မဟာဗျူဟာမြောက် မိတ်ဖက်ဆက်ဆံရေး အဖြစ် စတင်ထူထောင်ခဲ့သည်။

ထိုမဟာမိတ်ဖက်ဆံရေးမှတဆင့် ဆာရာဒူတာတေး၏ဖခင် သမ္မတဟောင်း ရိုဒီရီဂို ဒူတာတေး (Rodrigo Duterte) အပေါ် လူကြိုက်များမှုနှုန်းသည် မားကို့စ်အတွက် အကျိုးရှိခဲ့ပြီး ဆာရာဒူတာတေးသည်လည်း နိုင်ငံတစ်ဝန်း ထင်ရှားလာခဲ့သည်။

ဖိလစ်ပိုင်ဘတ်ဂျက်ကို ရည်ညွန်းထားစဉ်

သို့သော် ဆာရာဒူတာတေးသည် အစိုးရအဖွဲ့အတွင်း ဩဇာလွှမ်းမိုးလာချိန်တွင် မားကို့စ်ဘက်က ဆက်ဆံရေး အခြေအနေ စတင်ပြောင်းလဲလာခဲ့ပြီး ဆာရာဒူတာတေးသည် အစိုးရအဖွဲ့ဝင် ဝန်ကြီးရာထူးနှင့် ပါတီ ခေါင်းဆောင် အဖြစ်မှ နုတ်ထွက်ခဲ့သည်။

ထို့ပြင် လွှတ်တော်တွင်းရှိ မားကို့စ်၏ မဟာမိတ်များက ဆာရာဒူတာတေး၏ ဘတ်ဂျက်ကို လျှော့ချဖြတ်တောက် ခြင်း၊ ဒူတာတေးနှင့် ဆက်နွှယ်သည့် အရာရှိများကို အဓိကရာထူး နေရာများမှ ဖယ်ရှားခြင်းတို့ ဖြစ်ပွားလာချိန်တွင် တင်းမာမှုများ အရှိန်မြင့်တက်လာခဲ့သည်။

ထို့နောက် ဆာရာဒူတာတေးသည် သတင်းစာ ရှင်းလင်းပွဲတစ်ခုတွင် မားကို့စ်အား လုပ်ကြံသတ်ဖြတ်မည်ဆိုသည့် အဓိပ္ပာယ်မျိုး သက်ရောက်သော မှတ်ချက်စကားများကို ပြောကြားခဲ့ချိန်တွင် ၎င်းတို့ ၂ ဦးအကြား ဆက်ဆံရေး တင်းမာမှု အမြင့်ဆုံး ဖြစ်လာခဲ့သည်။

၎င်းတို့ ၂ ဦးအကြား အကွဲအပြဲက ပုဂ္ဂိုလ်ရေးနှင့် နိုင်ငံရေးဆိုင်ရာ ယှဉ်ပြိုင်မှုများကို မြင့်တက်စေခဲ့ပြီး ၂ ဘက်စလုံး က ၂၀၂၈ သမ္မတရွေးကောက်ပွဲတွင် အနိုင်ရရန် ကြိုးပမ်းလာခဲ့ကြသည်။

ဆာရာဒူတာတေးနဲ့ မားကို့စ်တွေ့ရစဉ်

နိုင်ငံခြားရေးမူဝါဒတွင်လည်း အမြင်မတူမှုများရှိခဲ့ပြီး ဒူတာတေး မိသားစုသည် တရုတ်နှင့် နီးကပ်သည့် ဆက်ဆံရေးရှိခဲ့ကာ မားကို့စ်ကမူ အမေရိကန်နှင့် ဆက်ဆံရေး ပြန်လည်ကောင်းမွန်ရန် လုပ်ဆောင်ခဲ့သည်။

ထိုကဲ့သို့ အားပြိုင်မှုများက အစိုးရအဖွဲ့၏ တည်ငြိမ်ရေးအတွက် အန္တရာယ်များ ဖြစ်လာခဲ့ပြီး ဆာရာဒူတာတေးကို စွပ်စွဲပြစ်တင်မည့် ခြိမ်းခြောက်မှုများ၊ တရားရေး အမှုအခင်းများ ပေါ်ပေါက်လာခဲ့သည်။

ထို့ပြင် ၎င်းတို့ ၂ ဦးအကြား ရန်စသည် ဖိလစ်ပိုင်၏ အနာဂတ်၊ အုပ်ချုပ်ပုံစနစ်၊ ပြည်ပဆက်ဆံရေးနှင့် ၂၀၂၅ သက်တမ်းဝက် ရွေးကောက်ပွဲတို့ကို ပုံဖော်ပေးနိုင်လိမ့်မည်ဟု ကျွမ်းကျင်သူများက ပြောကြားခဲ့သည်။

ထို့ပြင် ၎င်းတို့  ၂ ဦး၏ အာဏာလွန်ဆွဲမှုသည် ဖိလစ်ပိုင်နိုင်ငံတွင် အာဏာကို မျိုးရိုးအစဉ်အဆက် ဆက်ခံသည့် ပြိုင်ဘက်မိသားစုများ၏ အားပြိုင်မှုများနှင့် ကျိုးပျက်လွယ်သော နိုင်ငံရေး မဟာမိတ်ဆက်ဆံရေး သဘော သဘာ၀ကို မီးမောင်း ထိုးပြသရာလည်း ရောက်ခဲ့သည်။

Source: Nikkei Asia