CNI International News
၂၀၂၅ ခုနှစ်၊ ဇန်နဝါရီ ၁၇
အမေရိကန်တွင် အာဏာရှင်စနစ်ပေါ်ပေါက်လာခြင်းက ဒီမိုကရေစီကို ခြိမ်းခြောက်နေသည်ဟု အမေရိကန်သမ္မတ ဂျိုးဘိုင်ဒန်(Joe Biden)က ပြောကြားခဲ့သည်ဟု ရိုက်တာမှ ဖော်ပြခဲ့သည်။
အမေရိကန်၏ နည်းပညာလုပ်ငန်းရှင်များသည် နိုင်ငံရေးအာဏာ ဆုပ်ကိုင်ထားသော လူနည်းစု အသိုင်းအဝိုင်း ဖြစ်လာခဲ့ပြီး မိမိတို့၏ ဒီမိုကရေစီကို ခြိမ်းခြောက်နေကြောင်း ၎င်းက သတိပေးခဲ့သည်။
အိမ်ဖြူတော်၏ ဘဲဥပုံရုံးခန်းတွင် ပြောကြားခဲ့သည့် မိန့်ခွန်းအတွင်း ဘိုင်ဒန်က လူမှုမီဒီယာကုမ္ပဏီပိုင်ရှင်များသည် အချက်အလက်များကို မှန်/မမှန် စစ်ဆေးခြင်းမရှိဘဲ အမေရိကန်နိုင်ငံသားများကို သတင်းအမှားများဖြင့် ဖြန့်ဝေ နေကြောင်း ဝေဖန်ခဲ့သည်။
“လူနည်းစု အုပ်စိုးတဲ့အစိုးရပုံစံဟာ ကျနော်တို့ရဲ့ ဒီမိုကရေစီတစ်ခုလုံး၊ ကျနော်တို့ရဲ့ အခြေခံ အခွင့်အရေးတွေ၊ လွတ်လပ်မှုတွေကို တကယ် ခြိမ်းခြောက်နေပါတယ်” အသက် ၈၂ နှစ်အရွယ် သမ္မတဂျိုးဘိုင်ဒန်က ပြောကြား ခဲ့သည်။
ဘိုင်ဒန်၏ မှတ်ချက်စကားများသည် X နှင့် Facebook ကုမ္ပဏီများကို ပိုင်ဆိုင်သည့် ဘီလျံနာများ ဖြစ်ကြသော အီလွန်မာ့စ် (Elon Musk) နှင့် မာ့ခ်ဇူကာဘက်ချ် (Mark Zuckerberg) တို့ကို ရည်ညွှန်းပြောဆိုခြင်း ဖြစ်နိုင် ကြောင်း ကျွမ်းကျင်သူများက ပြောကြားခဲ့သည်။
အမေရိကန်သမ္မတ ဂျိုးဘိုင်ဒန်ကို တွေ့ရစဉ်
မာ့စ်နှင့် ဇူကာဘက်ချ်တို့သည် ၎င်းတို့၏ လူမှုမီဒီယာ ပလက်ဖောင်းများတွင် အချက်အလက် စစ်ဆေးသူများသည် လွတ်လပ်စွာ ပြောဆိုခွင့်များအတွက် အဟန့်အတား ဖြစ်စေသည်ဟု အကြောင်းပြကာ အချက်အလက် စစ်ဆေး သူများကို ဖယ်ရှားခဲ့ခြင်းဖြစ်သည်။
ထို့ပြင် နည်းပညာလုပ်ငန်း၏ ရှုပ်ထွေးမှုများ မြင့်တက်လာမှုသည် အမေရိကန်၏ ဒီမိုကရေစီကို လျော့ပါးစေရန် ခြိမ်းခြောက်နေကြောင်းလည်း ဘိုင်ဒန်က အမေရိကန်သမ္မတဟောင်း အိုက်စင်ဟောင်ဝါ (Dwight Eisenhower) ၏ မှတ်ချက်ကို ကိုးကားပြီး သတိပေးခဲ့သည်။
စစ်ဗိုလ်ချုပ်ကြီးဟောင်း တစ်ဦးဖြစ်သည့် အိုက်စင်ဟောင်ဝါသည် ၁၉၆၁ ခုနှစ်က သမ္မတရာထူးမှ ထွက်ခွာကာနီး နှုတ်ဆက်မိန့်ခွန်းတွင် စစ်ဘက်-စက်မှုလုပ်ငန်း အရှုပ်အထွေး မြင့်တက်လာသည့် အကြောင်းအရာကို ထည့်သွင်း ပြောဆိုခဲ့သည်။
"အမေရိကန်နိုင်ငံသားတွေဟာ သတင်းအမှားတွေအောက်ကို နစ်မြှုပ်ခံနေရပါတယ်။ အဲဒီအချိန်မှာ အာဏာ အလွဲသုံးမှုတွေ ဖြစ်လာနိုင်ပါတယ်။ စာနယ်ဇင်း လွတ်လပ်ခွင့်က ဆုံးရှုံးနေပါတယ်။ သတင်းအယ်ဒီတာတွေလည်း ပျောက်ကွယ်ကုန်ပါတယ်။ လူမှုမီဒီယာဟာ အချက်အလက် မှန်/မမှန် မဆန်းစစ်ကြတော့ပါဘူး”ဟု ဘိုင်ဒန်က ပြောကြားခဲ့သည်။
Source: ရိုက်တာ
