CNI International News
ဆိုးလ်၊ ဇန်နဝါရီ ၁၆
တောင်ကိုရီးယား၏ စုံစမ်းစစ်ဆေးသူများသည် စစ်အုပ်ချုပ်ရေးအမိန့် ကြေညာခဲ့မှုကြောင့် စွပ်စွဲပြစ်တင် ခံထားရသည့် သမ္မတယွန်းဆော့ရွဲ (Yoon Suk Yeol) ကို ဇန်နဝါရီ ၁၅ ရက်က ၎င်း၏ နေအိမ်တွင် ဖမ်းဆီး ထိန်းသိမ်းခဲ့ကြောင်း ယွန်ဟက်သတင်းအေဂျင်စီမှ ဖော်ပြခဲ့သည်။
တောင်ကိုရီးယားသမိုင်းတွင် အာဏာလက်ဝယ်ရှိနေစဉ် ဖမ်းဆီးခံရသည့် ပထမဆုံးသမ္မတ ဖြစ်လာခဲ့သည့် ယွန်းကို ဆိုးလ် (Seoul) မြို့တော် တောင်ဘက် ဂွာချောင် (Gwacheon) မြို့ရှိ အဂတိလိုက်စားမှု စုံစမ်းစစ်ဆေး ရေးရုံး (CIO) ၏ စုံစမ်းစစ်ဆေးသူများက စစ်ဆေးမေးမြန်းမည်ဖြစ်သည်။
မကြာသေးမီ ရက်ပိုင်းများအတွင်းက စုံစမ်းစစ်ဆေးသူများနှင့် ရဲအရာရှိများသည် ယွန်း၏ နေအိမ်သို့ ဝင်ရောက် ဖမ်းဆီးရန် ကြိုးပမ်းခဲ့သော်လည်း သမ္မတလုံခြုံရေးအဖွဲ့များက တားဆီးပိတ်ပင်ခဲ့၍ အောင်မြင်ခဲ့ခြင်းမရှိပေ။
ဇန်နဝါရီ ၁၅ ရက်တွင်မူ အင်အား ၃၀၀၀ ကျော်ရှိသည့် ရဲတပ်ဖွဲ့ဝင်များသည် ယွန်း၏ နေအိမ်အတွင်းသို့ ဝင်ရောက်ဖမ်းဆီးရန် ချီတက်လာသဖြင့် သွေးထွက်သံယို မဖြစ်စေရန်အတွက် စစ်ဆေးမေးမြန်းမှုခံယူရန် ယွန်းက သဘောတူခဲ့ခြင်းဖြစ်သည်။
တောင်ကိုရီးယားသမ္မတ ယွန်းဆော့ရွဲကို ဖမ်းလာသော ကားများကို တွေ့ရစဉ်
ယွန်းသည် စစ်ဆေးမေးမြန်းမှု ခံယူပြီးနောက် CIO ရုံး အနီးရှိ ယူအီဝမ် (Uiwang) မြို့ရှိ ဆိုးလ် ထိန်းသိမ်းရေး စင်တာတွင် ထိန်းသိမ်းခံရဖွယ်ရှိကြောင်း ဒေသခံမီဒီယာများက ဖော်ပြခဲ့သည်။
ယွန်းသည် ဒီဇင်ဘာ ၃ ရက်က စစ်အုပ်ချုပ်ရေးအမိန့် ကြေညာခဲ့မှုကြောင့် ဒီဇင်ဘာ ၁၄ ရက်တွင် လွှတ်တော်၏ စွပ်စွဲပြစ်တင်ခြင်းကို ခံခဲ့ရပြီး သမ္မတတာဝန်များမှ ဆိုင်းငံ့ခံခဲ့ရသည်။
ထို့နောက် ယွန်းသည် ပုန်ကုန်မှု၊ အာဏာအလွဲသုံးမှု စွဲချက်များဖြင့် ရင်ဆိုင်နေရပြီး CIO အရာရှိများ၏ စစ်ဆေး မေးမြန်းမှုကို ခံနေရခြင်းဖြစ်သည်။
သီးခြားဖြစ်စဉ် တစ်ခုအဖြစ် အခြေခံဥပဒေဆိုင်ရာ ခုံရုံးကလည်း ယွန်း၏ စွပ်စွဲပြစ်တင်မှုကို ၆ လအတွင်း ဆုံးဖြတ်ချက် ချသွားမည်ဖြစ်ပြီး ယွန်းကို သမ္မတရာထူးမှ ဖယ်ရှားမည် သို့မဟုတ် သမ္မတအဖြစ် ဆက်လက် ထားရှိမည်ဆိုခြင်းကို စီရင်ချက်ချမည်ဖြစ်သည်။
ယွန်းအနေဖြင့် CIO ၏ စစ်ဆေးမေးမြန်းမှုများတွင် ၎င်းအား စွဲဆိုထားသည့် စွဲချက်များနှင့်ပတ်သက်ပြီး ပြစ်မှုထင်ရှားခဲ့မည်ဆိုပါက ထောင်ဒဏ် ချမှတ်ခံရဖွယ်ရှိသည်။
Source: ယွန်ဟက်
