CNI Sport News

၂၀၂၄ ခုနှစ်၊ ဖေဖော်ဝါရီ ၁၅

ရာသီသစ်မစတင်ခင် ပြင်ဆင်မှုတွေ ပြုလုပ်နေတဲ့ မြန်မာနေရှင်နယ်လိဂ်ကလပ် ရခိုင်ယူနိုက်တက်အသင်းဟာ မြန်မာ့လက်ရွေးစင် ကစားသမားဟောင်း ကြည်လင်းကို ခေါ်ယူခဲ့ပြီလို့ ကြေညာခဲ့ပါတယ်။

ရန်ကုန်ယူနိုက်တက်အသင်းနဲ့အတူ မြန်မာနေရှင်နယ်လိဂ်ဖလား ၃ ကြိမ် ရယူနိုင်ခဲ့တဲ့ ကြည်လင်းဟာ ၂၀၂၀ ခုနှစ် ဘောလုံးရာသီအပြီးမှာ ကစားသမားဘဝက အနားယူခဲ့တာပါ။

ကြည်လင်းဟာ မကြာသေးခင်က အပျော်တမ်းပြိုင်ပွဲကနေ မြန်မာနေရှင်နယ်လိဂ်-၂ ကို တန်းတက်ဖို့ ယှဉ်ပြိုင်ခဲ့တဲ့ ရန်ကုန်ဂလက်ဇီအသင်းမှာ ပါဝင်ကစားခဲ့ပြီး ခြေစွမ်းပြသနိုင်ခဲ့တာ ဖြစ်ပါတယ်။ 

ကြည်လင်းဟာ အခုအချိန်မှာတော့ ရခိုင်ယူနိုက်တက်အသင်းနဲ့ ဖေဖော်ဝါရီ ၁၅ ရက်က စာချုပ်ချုပ်ခဲ့ပြီး အသင်းရဲ့ လေ့ကျင့်ခန်း အစီအစဉ်တွေမှာ ပါဝင်နေပြီဖြစ်ပါတယ်။

ကြည်လင်း၊ ကျော်ကိုကို၊ ကောင်းစည်သူတို့ကို တွေ့ရစဉ်

ရခိုင်ယူနိုက်တက်အသင်းဟာ မကြာသေးခင်ကလည်း ကြည်လင်းရဲ့ ရန်ကုန်ယူနိုက်တက်အသင်းဖော်ဟောင်း ကျော်ကိုကို ကိုခေါ်ယူထားတာ ဖြစ်ပါတယ်။ 

ဒါအပြင် ရခိုင်ယူနိုက်တက်အသင်းဟာ တိုက်စစ်မှူး ကောင်းစည်သူကိုလည်း ၁ နှစ် စာချုပ်ချုပ်ဆိုခဲ့တယ်လို့ ကြေညာခဲ့တာပါ။

ကောင်းစည်သူဟာ ပြီးခဲ့တဲ့ရာသီရဲ့ ရာသီဝက်မှာ ရခိုင်ယူနိုက်တက်အသင်းကို ရောက်ရှိလာခဲ့ပြီး ခြေစွမ်းပြနိုင်ခဲ့ တာကြောင့် နောက်ထပ် စာချုပ်သစ် ချုပ်ဆိုနိုင်ခဲ့တာ ဖြစ်ပါတယ်။

ရခိုင်ယူနိုက်တက်အသင်းဟာ ဒီရာသီမှာ နာမည်ကြီး ပြည်တွင်း ကစားသမားတွေ အပါအဝင် နိုင်ငံခြားသား နည်းပြနဲ့ နိုင်ငံခြား ကစားသမားတွေကိုလည်း ခေါ်ယူထားတာပါ။ 

ပြီးခဲ့တဲ့ရာသီက မြန်မာနေရှင်နယ်လိဂ်ပြိုင်ပွဲမှာ အဆင့် ၈ နေရာနဲ့သာ ရာသီအဆုံးသတ်နိုင်ခဲ့တဲ့ ရခိုင်ယူနိုက်တက် အသင်းဟာ ဒီရာသီ ထိပ်တန်းအဆင့်မှာ ရပ်တည်နိုင်ဖို့ ပစ်မှတ်ထားနေတာ ဖြစ်ပါတယ်။

CNI Sport News

၂၀၂၄ ခုနှစ်၊ ဖေဖော်ဝါရီ ၁၅

ကမ္ဘာ့နံပါတ် ၁ တင်းနစ်ကစားသမားဟောင်း ရာဖေးလ်နာဒယ်လ်က အခုနှစ်ထဲ ကျင်းပမယ့် ပြင်သစ်အိုးပန်းနဲ့ အိုလံပစ်ပြိုင်ပွဲမှာ ပါဝင်ယှဉ်ပြိုင်ဖို့ ရည်မှန်းထားတယ်လို့ ဖေဖော်ဝါရီ ၁၄ ရက်က ပြောလိုက်ပါတယ်။

ရာဖေးလ်နာဒယ်လ်က “ကျနော် ဘယ်ပြိုင်ပွဲတွေကစားဖို့ ကျန်ရှိနေသေးလဲဆိုတာ မသိပေမယ့် ပြင်သစ်အိုးပန်း ကတော့ ကျနော်ရည်မှန်းထားတဲ့ ပြိုင်ပွဲတွေထဲက တစ်ခုဖြစ်ပါတယ်။ ပြီးတော့ အိုလံပစ်ပြိုင်ပွဲမှာလည်း ကျနော် ပါဝင်ကစားချင်ပါတယ်။ ဒါတွေက ကျနော် အခုအတည်ပြုလို့ရတဲ့ အရာမဟုတ်ပေမယ့် ကျနော် ပါဝင်ယှဉ်ပြိုင် နိုင်မယ်ဆိုတာ မျှော်လင့်ပါတယ်”လို့ စပိန်ရုပ်သံ La Sexta နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

အသက် ၃၇ နှစ်အရွယ်ရှိ စပိန်တင်းနစ်သမား ရာဖေးလ်နာဒယ်လ်ဟာ ပြင်သစ်အိုးပန်း ချန်ပီယံဆုကို စံချိန်တင် ၁၄ ကြိမ် ရရှိထားတာ အပါအဝင် ဂရမ်းဆလမ်း တစ်ဦးချင်း ချန်ပီယံဆု ၂၂ ကြိမ်အထိ ရရှိထားတာ ဖြစ်ပါတယ်။ 

ဒါပေမယ့် ရာဖေးလ်နာဒယ်လ်ဟာ နောက်ပိုင်းနှစ်တွေမှာ ဒဏ်ရာတွေကြောင့် ရုန်းကန်ခဲ့ရပြီး လာမယ့်အပတ်မှာ ကျင်းပမယ့် ကာတာအိုးပန်းပြိုင်ပွဲကနေလည်း နုတ်ထွက်ထားခဲ့တာပါ။

ရာဖေးလ်နာဒယ်လ်ဟာ ပြီးခဲ့တဲ့လက ဘရစ်စဘိန်းပြိုင်ပွဲမှာရရှိခဲ့တဲ့ ကြွက်သားစုတ်ပြဲ ဒဏ်ရာကနေ ပြန်ကောင်းမွန်လာခြင်း မရှိသေးတဲ့အတွက် တင်းနစ်ပြိုင်ပွဲတွေကို ပြန်လည်ယှဉ်မပြိုင်သေးဖို့ ဆုံးဖြတ်ခဲ့ပါတယ်။

ရာဖေးလ်နာဒယ်လ်ကို တွေ့ရစဉ်

စပိန်တင်းနစ်သမားဟာ ပြီးခဲ့တဲ့လက ဆော်ဒီတင်းနစ်အဖွဲ့ချုပ်ရဲ့ သံတမန်အဖြစ် ခန့်အပ်ခံခဲ့ရပါတယ်။ 

ရာဖေးလ်နာဒယ်လ်ဟာ ဆော်ဒီနိုင်ငံရဲ့ တင်းနစ်အားကစားနည်းကို တိုးတက်အောင် ကူညီပေးဖို့၊ မျိုးဆက်သစ် တင်းနစ်ကစားသမားတွေ ထွက်ပေါ်လာဖို့နဲ့ နိုင်ငံအတွင်းမှာ သူ့ရဲ့အကယ်ဒမီကို ဖန်တီးဖို့ စီစဉ်ထားတာပါ။

ရာဖေးလ်နာဒယ်လ်က “ကျနော့်ရဲ့ ကတိကဝတ်က တင်းနစ်ကို မြှင့်တင်ပေးဖို့နဲ့ ရည်မှန်းချက်တွေကို အောင်မြင် အောင် ကြိုးစားဖို့ပါ။ ဆော်ဒီက သူ့ရဲ့ပုံရိပ်ကို ဆေးကြောဖို့ ကျနော့်ကို မလိုအပ်ဘူးလို့ ထင်ပါတယ်။ ဒါကလည်း ကျနော့် ရည်မှန်းချက် မဟုတ်ပါဘူး။ လူတွေက မေးခွန်းတွေမမေးဘဲ သူတို့ရဲ့ ထင်မြင်ယူဆချက်တွေကို ပေးကြ ပါတယ်”လို့ ပြောခဲ့ပါတယ်။

ဆော်ဒီနိုင်ငံဟာ ဘောလုံး၊ စက်ဘီးနဲ့ ဂေါက်သီးရိုက် အားကစားပြိုင်ပွဲတွေ အပါအဝင် ကမ္ဘာလုံးဆိုင်ရာ အားကစားကဏ္ဍတွေမှာ ဘီလီယံနဲ့ချီပြီး ရင်းနှီးမြှုပ်နှံကာ လူ့အခွင့်အရေး ချိုးဖောက်မှုတွေကို အာရုံလွှဲစေဖို့ ကြိုးပမ်းနေတယ်ဆိုပြီး ဝေဖန်မှုတွေ ပြင်းပြင်းထန်ထန် ခံနေရတာဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဖေဖော်ဝါရီ ၁၅

ဘိုင်ယန်မြူးနစ်အသင်းဟာ ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်မှာ လာဇီယိုအသင်းကို အရေးနိမ့်ခဲ့ ပေမယ့် နည်းပြ တူချယ်လ်က ဘိုင်ယန်မြူးနစ်အနာဂတ်အပေါ် စိုးရိမ်မှုမရှိဘူးလို့ ပြောခဲ့ပါတယ်။

တူချယ်လ်က “ကျနော့်အနာဂတ် ဒါမှမဟုတ် ဖြစ်နိုင်ဖွယ်ရှိတဲ့ ထုတ်ပယ်ခံရမှုအတွက် စိုးရိမ်မှုမရှိပါဘူး။ ကျနော် တို့ ဒီပွဲမှာ ရှုံးနိမ့်ခဲ့ပေမယ့် အရာအားလုံးကို လုပ်ခဲ့ပါတယ်။ ပထမပိုင်းမှာ ကျနော်တို့ဟာ ပွဲကိုထိန်းချုပ်နိုင်ခဲ့ ပေမယ့် ဒုတိယပိုင်းမှာတော့ စွမ်းဆောင်ရည်ဟာ သိသိသာသာကို ကျဆင်းသွားခဲ့ပါတယ်။ ကျနော်တို့ဟာ တစ်ဦး ချင်း အမှား အများအပြားကို လုပ်ခဲ့ပြီးတော့ အာရုံစူးစိုက်မှုတွေလည်း ဆုံးရှုံးခဲ့ပါတယ်။ ဒါပေမယ့် နောက်တစ်ဆင့် တက်နိုင်ဖို့အတွက် ကျနော်တို့လက်ထဲမှာ အခွင့်အရေး ရှိပါသေးတယ်”လို့ ပြောကြားခဲ့ပါတယ်။

ဘိုင်ယန်မြူးနစ်အသင်းဟာ ဒီပွဲမှာ လာဇီယိုအသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တာဖြစ်ပြီး လာဇီယိုအသင်း အတွက် ဂိုးကို တိုက်စစ်မှူး အင်မိုဘီလီက ပွဲချိန် ၆၉ မိနစ်မှာ ပင်နယ်တီကနေ သွင်းယူခဲ့တာ ဖြစ်ပါတယ်။ 

ဘိုင်ယန်မြူးနစ်အသင်းဟာ ပင်နယ်တီအပြင် နောက်ခံလူ အူပါမီကာနိုပါ ထုတ်ပယ်ခံခဲ့ရလို့ လာဇီယိုအသင်းကို ချေပဂိုး သွင်းယူနိုင်ဖို့ ခက်ခဲသွားခဲ့ပြီး ရှုံးပွဲနဲ့ ကြုံတွေ့ခဲ့ရတာပါ။ 

 ဟာရီကိန်းကို တွေ့ရစဉ်

ဂျာမန်ချန်ပီယံအသင်းဟာ လာဇီယိုအသင်းနဲ့ပွဲမှာ ဂိုးပေါက်ကန်သွင်းမှု ၁၇ ကြိမ်အထိရှိခဲ့ပေမယ့် ဂိုးပေါက်တည့်မှု ၁ ကြိမ်မှ မရှိတဲ့အထိ အခြေအနေ ဆိုးရွားခဲ့တာ ဖြစ်ပါတယ်။

ဘိုင်ယန်မြူးနစ်အသင်းဟာ ပြီးခဲ့တဲ့ ဘွန်ဒစ်လီဂါပွဲစဉ်မှာ လေဗာကူဆင်အသင်းကို ဂိုးပြတ်အရေးနိမ့်ပြီး အခု လာဇီယိုအသင်းကိုပါ ထပ်ပြီး အရေးနိမ့်ခဲ့တာကြောင့် နည်းပြ တူချယ်လ်အတွက် ဖိအားတွေပိုပြီးများလာခဲ့တာပါ။ 

ဘိုင်ယန်မြူးနစ်အသင်း တိုက်စစ်မှူး ဟာရီကိန်းကတော့ ရှုံးပွဲဆက်နေတာကြောင့် သူတို့အတွက် ခက်ခဲတဲ့ ရက်သတ္တပတ် ဖြစ်ခဲ့တယ်လို့ ပွဲအပြီးမှာ ဝန်ခံခဲ့ပါတယ်။

ဟာရီကိန်းက “တကယ်ကိုခက်ခဲတဲ့ ရက်သတ္တပတ် ဖြစ်ခဲ့ပါတယ်။ ဒုတိယပိုင်းကတော့ စိတ်ပျက်ဖို့ ကောင်းခဲ့ပါ တယ်။ စွမ်းအင်တွေရော ယုံကြည်မှုတွေရော နည်းပါးခဲ့ပါတယ်။ ဒါပေမယ့်လည်း ကျနော်တို့ဟာ ဒီပြိုင်ပွဲမှာ ရှိနေတုန်းဖြစ်ပြီး မြူးနစ်မှာ အကောင်းဆုံး လုပ်ပြနိုင်ဖို့ ကြိုးစားသွားမှာပါ”လို့ ပြောကြားခဲ့ပါတယ်။

ဘိုင်ယန်မြူးနစ်အသင်းဟာ ဖေဖော်ဝါရီ ၁၈ ရက်မှာ ဘွန်ဒစ်လီဂါပွဲစဉ်အဖြစ် ဘိုချန်အသင်းနဲ့ ယှဉ်ပြိုင်ရမှာဖြစ်ပြီး ရှုံးပွဲဆက်နေတာကို ရပ်တန့်ဖို့လိုအပ်နေပြီ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဖေဖော်ဝါရီ ၁၅

ပေါ်တူဂီအသင်းခေါင်းဆောင် ရော်နယ်ဒိုဟာ အယ်လ်နာဆာအသင်းက အယ်လ်ဖေဟာအသင်းကို အနိုင်ရခဲ့တဲ့ အာရှချန်ပီယံလိဂ် ၁၆ သင်းအဆင့် ပထမအကျော့ပွဲစဉ်မှာ ဂိုးသွင်းယူနိုင်ခဲ့ပြီးနောက် ပရော်ဖက်ရှင်နယ် ကစားသမားဘဝ ၂၂ နှစ်ဆက်တိုက် ဂိုးသွင်းယူနိုင်ခဲ့တာ ဖြစ်ပါတယ်။

ဒီပွဲမှာ အယ်လ်နာဆာအသင်းဟာ ဆော်ဒီကလပ် အသင်းပဲဖြစ်တဲ့ အယ်လ်ဖေဟာအသင်းကို ၁ ဂိုး- ဂိုးမရှိနဲ့ အနိုင် ရခဲ့တာဖြစ်ပြီး ရော်နယ်ဒိုက ပွဲချိန် ၈၁ မိနစ်မှာ အဖိုးတန် အနိုင်ဂိုး သွင်းယူပေးခဲ့တာပါ။

အဲ့ဒါကြောင့် ရော်နယ်ဒိုဟာ ၂၀၀၂ ကနေ ၂၀၂၄ ခုနှစ်အထိ ၂၂ နှစ်ဆက်တိုက်ဂိုးသွင်းယူနိုင်ခဲ့တဲ့ မှတ်တမ်းကို ပိုင်ဆိုင်ခဲ့ပါတယ်။ 

ဒီဂိုးဟာ အသက် ၃၉ နှစ်အရွယ်ရှိ ရော်နယ်ဒိုအတွက် ၂၀၂၄ ခုနှစ်ထဲမှာ ပထမဆုံး သွင်းယူနိုင်ခဲ့တဲ့ ဂိုးလည်း ဖြစ်ခဲ့တာပါ။

 အယ်လ်နာဆာအသင်းကို တွေ့ရစဉ်

ဒါအပြင် အယ်လ်ဖေဟာအသင်းနဲ့ပွဲဟာ ရော်နယ်ဒိုအတွက် ကလပ်ကစားသမားဘဝ ပွဲပေါင်း ၁၀၀၀ ပြည့် ခဲ့တာဖြစ်ပြီး စံချိန်ကောင်းတွေကို ပိုင်ဆိုင်ခဲ့တာ ဖြစ်ပါတယ်။

ပေါ်တူဂီကစားသမားဟာ ကလပ်ကစားသမားဘဝ ပွဲပေါင်း ၁၀၀၀ မှာ ၇၄၆ ဂိုး သွင်းယူထားတာပါ။ 

ရော်နယ်ဒိုဟာ ဒီရာသီမှာ အယ်လ်နာဆာအသင်းအတွက် ခြေစွမ်းပြသနေတာဖြစ်ပြီး ပြိုင်ပွဲစုံ ၃၂ ပွဲမှာ ၃၁ ဂိုးအထိ သွင်းယူထားတာ ဖြစ်ပါတယ်။ 

အယ်လ်နာဆာနဲ့ အယ်လ်ဖေဟာအသင်းတို့ရဲ့ အာရှချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်ကို ဖေဖော်ဝါရီ ၂၁ ရက် အယ်လ်နာအသင်း အိမ်ကွင်းမှာ ယှဉ်ပြိုင်ရမှာပါ။

အယ်လ်နာဆာအသင်းဟာ ဒီရာသီ ဆော်ဒီပရိုလိဂ်ပြိုင်ပွဲမှာ ထိပ်ဆုံးနေရာက အယ်လ်ဟီလယ်အသင်းနဲ့ ၇ မှတ် အကွာ အဆင့် ၂ နေရာမှာ ရပ်တည်နေတာ ဖြစ်ပါတယ်။ 

ဒါအပြင် အယ်လ်နာဆာအသင်းဟာ ဆော်ဒီဘုရင့်ဖလားပြိုင်ပွဲမှာလည်း ဆီမီးဖိုင်နယ်အဆင့်ကို ရောက်ရှိနေတာ ကြောင့် ဒီရာသီမှာ ဆုဖလားရယူနိုင်ဖို့ မျှော်လင့်ချက်တွေ ရှိနေတာပါ။

အယ်လ်နာဆာအသင်းဟာ ဖေဖော်ဝါရီ ၁၇ ရက်မှာ ဆော်ဒီပရိုလိဂ်ပွဲစဉ်အဖြစ် အယ်လ်ဖာတက်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဖေဖော်ဝါရီ ၁၄

ဒဏ်ရာကြောင့် အနားယူနေရတဲ့ တိုက်စစ်မှူး ဆာလက်ဟာ ဘရန်ဖို့ဒ်အသင်းနဲ့ ပရီးမီးယားလိဂ်ပွဲစဉ် မတိုင်ခင် လီဗာပူးလ်အသင်းရဲ့ လေ့ကျင့်ရေးကွင်းကို ရောက်ရှိလာခဲ့ပြီး လေ့ကျင့်မှုတွေ ပြန်လည်ပြုလုပ်နေပြီ ဖြစ်ပါတယ်။

ဆာလက်ဟာ ပြီးခဲ့တဲ့ အာဖရိကဖလားပြိုင်ပွဲမှာ အီဂျစ်အသင်းအတွက် ပါဝင်ကစားရင်း တံကောက်ကြောဒဏ်ရာ ရရှိခဲ့တာကြောင့် ပြိုင်ပွဲကနေ စောစီးစွာထွက်ခွာကာ လီဗာပူးလ်အသင်းမှာ ကုသမှုတွေ လာရောက်ခံယူခဲ့တာပါ။ 

ဆာလက်ဟာ ဒဏ်ရာရရှိတာနဲ့အတူ အာဖရိကဖလားပြိုင်ပွဲမှာ ပါဝင်ခဲ့တာကြောင့် လီဗာပူးလ်အသင်းရဲ့ ပရီးမီးယားလိဂ် ၄ ပွဲ၊ ကာရာဘောင်းလိဂ်ဖလား ဆီမီးဖိုင်နယ်နှစ်ကျော့နဲ့ FA ဖလား ၂ ပွဲတို့ကို ပါဝင်ကစား နိုင်ခဲ့ခြင်း မရှိပါဘူး။

ဒါပေမယ့် ဆာလက်ဟာ အသင်းရဲ့ လေ့ကျင့်ခန်း အစီအစဉ်မှာ ပြန်လည်ပါဝင်ခဲ့တာကြောင့် ဒီတစ်ပတ်ကစားမယ့် ပရီးမီးယားလိဂ်ပွဲစဉ်မှာ လီဗာပူးလ်အသင်းအတွက် ပါဝင်လာဖွယ်ရှိနေတာ ဖြစ်ပါတယ်။ 

ဆာလက်ကို တွေ့ရစဉ်

ပြီးခဲ့တဲ့ ဘန်လေအသင်းနဲ့ပွဲစဉ်မှာ ဖျားနာနေတာကြောင့် မပါဝင်နိုင်ခဲ့တဲ့ ဂိုးသမား အလီဆန်နဲ့ နောက်ခံလူ ဂျိုဂိုးမက်ဇ်တို့ကလည်း အသင်းနဲ့အတူ လေ့ကျင့်မှုတွေကို ပြုလုပ်နေပြီဖြစ်တာပါ။ 

ဖခင်သေဆုံးခဲ့တာကြောင့် ပြီးခဲ့တဲ့အပတ်က မြောက်အိုင်ယာလန်ကိုပြန်ခဲ့တဲ့ ညနောက်ခံလူ ဘရက်ဒလေလည်း အသင်းရဲ့လေ့ကျင့်ခန်း အစီအစဉ်မှာ ပါဝင်ခဲ့တာဖြစ်ပါတယ်။

ဒဏ်ရာရရှိနေတဲ့ နောက်ခံလူ အာနိုးလ်နဲ့ ကွင်းလယ်လူ ဆိုဘော့ဇ်လိုင်းတို့ကတော့ လီဗာပူးလ်အသင်းရဲ့ လေ့ကျင့်ခန်း အစီအစဉ်မှာ ပါဝင်ခဲ့ခြင်းမရှိပါဘူး။ 

အာနိုးလ်ဟာ ပြီးခဲ့တဲ့ ဘန်လေအသင်းနဲ့ပွဲမှာ ဒူးဒဏ်ရာ ပြန်ခံစားခဲ့ရလို့ ပထမပိုင်းအပြီးမှာ လူစားလဲခဲ့ရတာပါ။ 

အာနိုးလ်ဟာ ဘရန်ဖို့ဒ်အသင်းနဲ့ ပွဲစဉ်ကို လွဲချော်နိုင်ဖွယ်ရှိပေမယ့် ဘရက်ဒလေ ပြန်လာနိုင်ပြီဖြစ်လို့ လီဗာပူးလ် အသင်းအတွက် သတင်းကောင်း ဖြစ်ခဲ့ပါတယ်။ 

ဆာလက်ဟာ လီဗာပူးလ်အသင်းရဲ့ ပွဲစဉ်အချို့ကို လွဲချော်ထားပေမယ့် ဒီရာသီ ပရီးမီးယားလိဂ်ပြိုင်ပွဲမှာ ၁၄ ဂိုး သွင်းယူထားပြီး ၈ ဂိုးဖန်တီးထားတာပါ။ 

လီဗာပူးလ်အသင်းဟာ ဒီရာသီပရီးမီးယားလိဂ် ၂၄ ပွဲ ကစားအပြီးမှာ ရမှတ် ၅၄ မှတ်နဲ့ ဒုတိယနေရာက မန်စီးတီး အသင်းထက် ၁ ပွဲပို ကစားထားပြီး ရမှတ် ၂ မှတ်အသာရကာ အမှတ်ပေးဇယားကို ဦးဆောင်ထားတာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဖေဖော်ဝါရီ ၁၄

ချယ်လ်ဆီးအသင်း ကွင်းလယ်လူ အန်ဇိုဖာနန်ဒက်ဇ်က အသင်းဟာ အဆင့် ၄ နေရာက စပါးအသင်းနဲ့ ၁၃ မှတ် ကွာဟနေပေမယ့် ချန်ပီယံလိဂ်ဝင်ခွင့် ရယူနိုင်သေးတယ်လို့ ပြောလိုက်ပါတယ်။

အန်ဇိုဖာနန်ဒက်ဇ်က “နိုင်ပွဲတွေက ကျနော်တို့ကို ယုံကြည်မှုတွေပေးပါတယ်။ ကျနော်တို့ဟာ လိဂ်မှာ အတက် အကျတွေ ရှိပေမယ့် သွားရမယ့်လမ်းက ရှည်လျားနေပါသေးတယ်။ ကျနော်တို့ဟာ ကျနော်တို့ရဲ့ အလုပ်အပေါ် ယုံကြည်မှုတွေရှိပြီး ရည်မှန်းချက်တွေ ပြည့်မီနိုင်ဖို့ နေ့တိုင်းတိုးတက်အောင် လုပ်ဆောင်နေပါတယ်။ လာမယ့်နှစ် ချန်ပီယံလိဂ်ပြိုင်ပွဲမှာ ကျနော်တို့ကစားချင်ပါတယ်”လို့ ESPN နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

ချယ်လ်ဆီးအသင်းဟာ လီဗာပူးလ်နဲ့ ဝုလ်ဗ်စ်အသင်းတို့ကို ပရီးမီးယားလိဂ်ပြိုင်ပွဲမှာ ၂ ပွဲဆက်တိုက် အရေးနိမ့်ခဲ့ ပေမယ့် FA ဖလားမှာ အက်စတွန်ဗီလာနဲ့ ပရီးမီးယားလိဂ်ပြိုင်ပွဲမှာ ပဲလေ့စ်အသင်းတို့ကို ၃ ဂိုး-၁ ဂိုးနဲ့ နိုင်ပွဲ ပြန်လည် ရယူနိုင်ခဲ့တာ ဖြစ်ပါတယ်။

ချယ်လ်ဆီးအသင်းဟာ ပြီးခဲ့တဲ့ အပြောင်းအရွှေ့တွေမှာ ပေါင်သန်း ၄၀၀ ကျော် သုံးစွဲခဲ့ပေမယ့် အသင်းဟာ ရလဒ်တွေ မကောင်းခဲ့တာကြောင့် လာမယ့်ရာသီ ဥရောပဝင်ခွင့် ရရှိနိုင်မယ့် အခြေအနေအပေါ် စိုးရိမ်မှုတွေရှိနေ ကြတာပါ။

 အန်ဇိုဖာနန်ဒက်ဇ်ကို တွေ့ရစဉ်

ဒါပေမယ့် အာဂျင်တီးနားအသင်း ကွင်းလယ်လူ အန်ဇိုဖာနန်ဒက်ဇ်က ချယ်လ်ဆီးအသင်းဟာ ချန်ပီယံလိဂ် ဝင်ခွင့် ရယူနိုင်သေးတယ်လို့ ပြောခဲ့တာ ဖြစ်ပါတယ်။

ချယ်လ်ဆီးအသင်းဟာ ဒီရာသီမှာ ဆုဖလား ၂ လုံး ရယူနိုင်မယ့် လမ်းကြောင်းပေါ်မှာရှိနေပြီး ကာရာဘောင်းလိဂ် ဖလားပြိုင်ပွဲမှာ ဗိုလ်လုပွဲအဖြစ် လီဗာပူးလ်အသင်းနဲ့ ယှဉ်ပြိုင်ရမှာဖြစ်သလို FA ဖလားပြိုင်ပွဲမှာ ပဉ္စမအဆင့်အဖြစ် လိဒ်စ်ယူနိုက်တက်အသင်းနဲ့ ယှဉ်ပြိုင်ရမှာပါ။

ချယ်လ်ဆီးအသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာဖြစ်ပြီး ရလဒ်ကောင်း ရယူနိုင်ဖို့ မျှော်လင့်နေတာ ဖြစ်ပါတယ်။

CNI Sport News

၂၀၂၄ ခုနှစ်၊ ဖေဖော်ဝါရီ ၁၄

ပရီးမီးယားလိဂ်ဟာ ဗြိတိန်ဘီလျံနာ ဆာဂျင်ရက်ကလစ်ဖ်က ယူနိုက်တက်အသင်းရဲ့ အစုရှယ်ယာ ၂၅ ရာခိုင်နှုန်း ဝယ်ယူမှုကို အတည်ပြုပေးလိုက်ပြီဖြစ်ပါတယ်။

ဆာဂျင်ရက်ကလစ်ဖ်ဟာ ယူနိုက်တက်အသင်းရဲ့ အစုရှယ်ယာ ၂၅ ခိုင်နှုန်းကို ပေါင် ၁.၀၃ ဘီလီယံနဲ့ ဝယ်ယူခဲ့တာ ဖြစ်ပြီး အင်္ဂလန်ဘောလုံးအဖွဲ့ချုပ်(FA)ရဲ့ ခွင့်ပြုချက်ပေးမှုကို စောင့်ဆိုင်းနေရဆဲဖြစ်တာပါ။ ပိုင်ရှင်ဖြစ်တဲ့ ဂလေဇာမိသားစုကတော့ ယူနိုက်တက်အသင်းရဲ့ အစုရှယ်ယာအများစုကို ဆက်လက်ထိန်းသိမ်းထားတာ ဖြစ်ပေမယ့် ဆာဂျင်ရက်ကလစ်ဖ်ရဲ့ INEOS ဟာ အသင်းရဲ့ ဘောလုံးနဲ့ပတ်သက်တဲ့ လည်ပတ်မှုတွေကို ထိန်းချုပ် ကိုင်တွယ်သွားမှာဖြစ်ပါတယ်။

ဗြိတိန်ဘီလျံနာရဲ့ INEOS ဟာ ယူနိုက်တက်အသင်းရဲ့ အစုရှယ်ယာဝယ်ယူမှုကို ပြီးခဲ့တဲ့ ခရစ္စမတ်အကြိုမှာ ကလပ်အသင်းနဲ့ သဘောတူညီမှုရရှိခဲ့တာဖြစ်ပြီး အိုးထရက်ဖိုဒ့်အားကစားကွင်းရဲ့ အနာဂတ်ရင်းနှီးမြှုပ်နှံမှုအတွက် ပေါင် ၂၃၆ သန်းထပ်ပြီးပေးချေရမယ့် အချက်ပါဝင်နေတာပါ။ ဆာဂျင်ရက်ကလစ်ဖ်ဟာ သူ့ရဲ့ဝယ်ယူမှုကို အပြီး သတ်သဘောတူညီမှုရယူနိုင်ဖို့ စောင့်ဆိုင်းနေချိန်အတွင်းမှာ အိုးထရက်ဖိုဒ့်နဲ့ ကလပ်ရဲ့ လေ့ကျင့်ရေးကွင်းကို အကြိမ်ကြိမ်သွားရောက်လည်ပတ်ခဲ့တာ ဖြစ်ပါတယ်။

ဆာဂျင်ရက်ကလစ်ဖ်ဟာ ယူနိုက်တက်အသင်းနည်းပြ အဲရစ်တန်ဟတ်နဲ့လည်း တွေ့ဆုံဆွေးနွေးမှုတွေ ပြုလုပ် ခဲ့သေးတာပါ။ ဗြိတိန်ဘီလျံနာဟာ အစုရှယ်ယာ ၂၅ ရာခိုင်နှုန်းကနေ နောက်ပိုင်းမှာ ယူနိုက်တက်အသင်းရဲ့ ရှယ်ယာအားလုံးဝယ်ယူပြီး အသင်းကို အလုံးစုံထိန်းချုပ်နိုင်ဖို့အထိ ပစ်မှတ်ထားနေတာဖြစ်ပါတယ်။ ပိုင်ရှင်ဖြစ်တဲ့ ဂလေဇာမိသားစုဟာ ယူနိုက်တက်အသင်းကို ၂၀၀၅ ခုနှစ်က ပေါင်သန်း ၇၉၀ နဲ့ ဝယ်ယူခဲ့တာပါ။

ဒီရာသီအစပိုင်းမှာ ရလဒ်တွေဆိုးနေခဲ့တဲ့ ယူနိုက်တက်အသင်းဟာ ၂၀၂၄ ခုနှစ်ထဲမှာ ရှုံးပွဲမရှိ နိုင်ပွဲဆက်နေပြီး ပရီးမီးယားလိဂ်အမှတ်ပေးဇယား အဆင့် ၆ နေရာမှာ ရပ်တည်နေတာဖြစ်ပါတယ်။

Source:BBC

CNI Sport News

၂၀၂၄ ခုနှစ်၊ ဖေဖော်ဝါရီ ၁၄

မန်စီးတီးအသင်းနည်းပြ ဂွာဒီယိုလာက ကိုပင်ဟေဂင်အသင်းကို အနိုင်ရခဲ့တဲ့ ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်ရဲ့ ရလဒ်ကို ကျေနပ်တယ်လို့ ပြောလိုက်ပါတယ်။

ဂွာဒီယိုလာက “အကြီးကျယ်ဆုံးကစားသမားတွေဟာ အကြီးကျယ်ဆုံးအဆင့်တွေမှာ ထွက်ပေါ်လာပါတယ်။ ဒီနေ့ကစားပုံဟာ ပြီးပြည့်စုံခဲ့ပြီး ရလဒ်ကို အလွန်ကျေနပ်ပါတယ်။ အသင်းအတွက် ကျနော်ဂုဏ်ယူမိပြီး တတိယဂိုးက ကျနော်တို့ကို အများကြီးအကူအညီပေးနိုင်ခဲ့ပါတယ်။ ပွဲမပြီးသေးတဲ့အတွက် အိမ်ကွင်းမှာ ပြီးဆုံးအောင်လုပ်နိုင်မယ်လို့ မျှော်လင့်ပါတယ်”လို့ ပွဲအပြီး TNT Sports ကို ပြောခဲ့တာပါ။

မန်စီးတီးအသင်းဟာ အဝေးကွင်းမှာကစားခဲ့ရတဲ့ ဒီပွဲမှာ ကိုပင်ဟေဂင်အသင်းကို ၃ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။ မန်စီးတီးအသင်းအတွက် ဂိုးတွေကို ဒီဘရိုင်း၊ ဘာနာဒိုဆေးလ်ဗားနဲ့ ဖိုဒန်တို့က သွင်းယူခဲ့ပြီး ကိုပင်ဟေဂင်အသင်းအတွက် ချေပဂိုးကို မတ်ဆန်က သွင်းယူခဲ့တာပါ။ မန်စီးတီးအသင်းဟာ ဒီပွဲအနိုင်ရရှိခဲ့တာ ကြောင့် ချန်ပီယံလိဂ်ပြိုင်ပွဲမှာ ၉ ပွဲဆက်တိုက်အနိုင်ရခဲ့တာဖြစ်ပြီး ဒီပြိုင်ပွဲမှာနိုင်ပွဲအရှည်ကြာဆုံး ရယူနိုင်တဲ့ ပထမဆုံး အင်္ဂလန်ကလပ်အဖြစ်လည်း မှတ်တမ်းဝင်ခဲ့ပါတယ်။

ကိုပင်ဟေဂင်အသင်းနဲ့ပွဲမှာ မန်စီးတီးအသင်းရဲ့ အဓိက ကစားသမားတွေဖြစ်တဲ့ ဂရီလစ်ရှ်နဲ့ ဘာနာဒိုဆေးလ်ဗား တို့ ဒဏ်ရာရရှိသွားခဲ့တာကြောင့် နည်းပြ ဂွာဒီယိုလာအတွက် စိုးရိမ်စရာတွေဖြစ်ခဲ့ရပါတယ်။

ဂွာဒီယိုလာက “ကျနော် ဆရာဝန်နဲ့ စကားမပြောရသေးပေမယ့် ဂရီလစ်ရှ်ဟာ ကြွက်သားဒဏ်ရာရရှိသွားတယ်လို့ ထင်ပါတယ်။ သူဟာ ကျနော်တို့ အကောင်းဆုံးကစားနိုင်အောင် ကူညီပေးခဲ့ပေမယ့် ဒဏ်ရာရရှိသွားခဲ့ပါတယ်။ ဘာနာဒိုကတော့ ခြေကျင်းဝတ်ထိခိုက်မိခဲ့တာဖြစ်ပြီး အရမ်းကြီးမပြင်းထန်ဖို့ ကျနော်မျှော်လင့်တယ်” လို့ ပြောခဲ့တာပါ။

ပြိုင်ပွဲစုံနောက်ဆုံး ၁၁ ပွဲဆက်တိုက်နိုင်ပွဲရရှိထားတဲ့ မန်စီးတီးအသင်းဟာ ဖေဖော်ဝါရီ ၁၈ ရက်မှာ ပရီးမီးယား လိဂ်ပွဲစဉ်အဖြစ် ချယ်လ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။

Soure:ChannleNewsAsia

CNI Sport News

၂၀၂၄ ခုနှစ်၊ ဖေဖော်ဝါရီ ၁၃

ပြီးခဲ့တဲ့ရက်ပိုင်းက အင်ဒိုနီးရှားနိုင်ငံမှာ ကျင်းပခဲ့တဲ့ ဘောလုံးပွဲတစ်ပွဲမှာ ကွင်းအတွင်း ပစ်ချခဲ့တဲ့ မိုးကြိုးကို ထိမှန်ခဲ့တဲ့ ဘောလုံးသမားတစ်ဦးဟာ သေဆုံးသွားခဲ့ပါတယ်။

အသက် ၃၅ နှစ်အရွယ်ရှိ ဆူဘန်းကစားသမား ရာဟာဂျာဟာ မိုးကြိုးပစ်ခံခဲ့ရတာကြောင့် ကွင်းအတွင်း လဲကျသွား ခဲ့ပြီးနောက် သူ့ကို ဆေးရုံ အလျင်အမြန် ပို့ဆောင်ခဲ့ကြတာပါ။ 

ဒါပေမယ့် ရာဟာဂျာဟာ ဆေးရုံကို ရောက်အပြီးမှာ သေဆုံးသွားခဲ့တယ်လို့ ဝမ်းနည်းစွာ ကြေညာခဲ့တာ ဖြစ်ပါတယ်။

ဒီအဖြစ်အပျက်ဟာ ဘန်ဒေါင်းနဲ့ ဆူဘန်းအသင်းတို့ ဆီလီဝန်ဂီ အားကစားကွင်းအတွင်း ခြေစမ်းပွဲအဖြစ် ယှဉ်ပြိုင်ချိန် ပထမပိုင်းမှာ ဖြစ်ပျက်ခဲ့တာပါ။

ကလေး ၂ ဦးရဲ့ ဖခင် ရာဟာဂျာဟာ ဒီအဖြစ်အပျက်မှာ မိုးကြိုးထိမှန်ခဲ့တဲ့ တစ်ဦးတည်းသော ဘောလုံးသမား ဖြစ်တယ်လို့ ဆိုရှယ်မီဒီယာပေါ်မှာ ပျံ့နှံ့နေတဲ့ ဗွီဒီယိုဖိုင်မှာ မြင်တွေ့ခဲ့ရပါတယ်။ 

ရာဟာဂျာကို မိုးကြိုးထိမှန်စဉ်

ရာဟာဂျာဟာ ရင်ဘတ်နဲ့ ပေါင်တွေမှာ ပြင်းထန်တဲ့ လောင်ကျွမ်းဒဏ်ရာတွေရရှိခဲ့ပြီး ကစားသမားတွေဟာ သူ့ကို ဆေးကုသမှုခံယူနိုင်ဖို့အတွက် ကွင်းပြင်ကို ပို့ဆောင်ခဲ့ကြတာပါ။ 

ပြီးခဲ့တဲ့နှစ်ကလည်း အင်ဒိုနီးရှား ကစားသမားတစ်ဦးဟာ မိုးကြိုးထိမှန်ခဲ့ပြီးနောက် ဒီဖြစ်ရပ်ဟာ ဒုတိယအကြိမ် မြောက်ဖြစ်လာခဲ့တာ ဖြစ်ပါတယ်။

၂၀၂၃ ခုနှစ်က လူငယ်ဘောလုံးသမားတစ်ဦးဟာ ယူ-၁၃ ဖလားပြိုင်ပွဲမှာ မိုးကြိုးထိမှန်ခဲ့ပြီးနောက် နှလုံးခုန် ရပ်သွားခဲ့ပါတယ်။

ဒီဘောလုံးသမားကို ဆေးရုံကို အလျင်အမြန် ပို့ဆောင်ကာ ကုသမှုတွေ ခံယူခဲ့တာကြောင့် ပြန်လည် ရှင်သန်လာ ခဲ့တယ်လို့ သတင်းမှာ ဖော်ပြထားတာပါ။ 

အင်ဒိုနီးရှားနိုင်ငံရဲ့ ဘောလုံးပွဲတွေမှာ အသင်းတွေဟာ ရာဟာဂျာရဲ့ အဖြစ်အပျက်အတွက် ဝမ်းနည်းတဲ့အနေနဲ့ ၁ မိနစ်ကြာ ငြိမ်သက်ခဲ့ကြတာ ဖြစ်ပါတယ်။

Source: Metro