CNI Sport News
၂၀၂၄ ခုနှစ်၊ ဖေဖော်ဝါရီ ၃

တောင်ကိုရီးယားအသင်းဟာ အာရှဖလား ကွာတားဖိုင်နယ်ပွဲစဉ်မှာ သြစတြေးလျအသင်းကို အချိန်ပိုမှာ ၂ ဂိုး-၁ ဂိုး နဲ့ အနိုင်ရပြီး ဆီမီးဖိုင်နယ်ကို တက်ရောက်နိုင်ခဲ့ပြီ ဖြစ်ပါတယ်။

ဒီပွဲစဉ်မှာ သြစတြေးလျအသင်းဟာ ပွဲချိန် ၄၂ မိနစ်မှာ ဂွတ်ဝင်ရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် မိနစ် ၉၀ ပြည့် အပြီး နာကျင်အချိန်ပို ၆ မိနစ်မှာ ဟွမ်ဟီချန်းက တောင်ကိုရီးယားအသင်းအတွက် ပင်နယ်တီကနေ ချေပဂိုး သွင်းယူခဲ့တာကြောင့် ၁ ဂိုးစီသရေနဲ့ ပွဲပြီးဆုံးခဲ့တာပါ။ 

အဲဒါကြောင့် အချိန်ပိုမိနစ် ၃၀ ထပ်မံ ယှဉ်ပြိုင်ကစားခဲ့တာမှာ တောင်ကိုရီးယားအသင်းက အဖိုးတန် အနိုင်ဂိုး ရရှိသွားခဲ့တာ ဖြစ်ပါတယ်။ 

ဒီဂိုးကို အသင်းခေါင်းဆောင် ဆွန်ဟောင်မင်က ပွဲချိန် ၁၀၄ မိနစ်မှာ ပြစ်ဒဏ်ဘော ကန်ချက်ကနေ သွင်းယူခဲ့တာပါ။

တောင်ကိုရီးယားအသင်းဟာ ပြီးခဲ့တဲ့ ၁၆ သင်းအဆင့် ဆော်ဒီအသင်းနဲ့ ပွဲစဉ်တုန်းကလည်း မိနစ် ၉၀ အထိ ၁ ဂိုး-ဂိုးမရှိနဲ့ အရေးနိမ့်နေခဲ့ပေမယ့် နာကျင်အချိန်ပို ၉ မိနစ်မှာ သွင်းယူခဲ့တဲ့ ချေပဂိုးကြောင့် အချိန်ပို၊ ပင်နယ်တီအထိ ကစားခဲ့ရပြီး နိုင်ပွဲရယူနိုင်ခဲ့တာ ဖြစ်ပါတယ်။ 

တောင်ကိုရီးယားအသင်းနည်းပြ ကလင်းစမန်းက ကစားသမားတွေမှာရှိနေတဲ့ တိုက်ပွဲစိတ်ဓါတ်ကို အလွန်ဂုဏ်ယူ တယ်လို့ ပွဲအပြီး သတင်းစာ ရှင်းလင်းပွဲမှာ ပြောခဲ့တာပါ။

ကလင်းစမန်းက “နောက်ထပ် ဒရာမာတစ်ခုပါပဲ။ နောက်တစ်ဆင့်ကို တက်နိုင်ခဲ့တဲ့အတွက် ကျနော်တို့ အလွန် ပျော်ရွှင်ပါတယ်။ ဒီပွဲက ခက်ခဲမယ်ဆိုတာ ကျနော်တို့ မျှော်လင့်ထားပြီးသားပါ။ အသင်းသားတွေမှာရှိနေတဲ့ တိုက်ပွဲဝင် စိတ်ဓါတ်ကို ကျနော်အလွန်ဂုဏ်ယူပါတယ်။ အခု ကျနော်တို့ ဆီမီးဖိုင်နယ်ကို ရောက်ရှိနေပါပြီ။ ကစားသမားတွေဟာ ဆုဖလားကို အိမ်ကိုယူဆောင်သွားချင်နေကြပါတယ်”လို့ ပြောခဲ့ပါတယ်။

တောင်ကိုရီးယားအသင်းဟာ အာရှဖလား ဆီမီးဖိုင်နယ်ပွဲစဉ်အဖြစ် ဂျော်ဒန်အသင်းနဲ့ ယှဉ်ပြိုင်ရမှာပါ။ 

တောင်ကိုရီးယားအသင်းဟာ အာရှဖလားချန်ပီယံဆုကို ၁၉၆၀ ခုနှစ်က နောက်ဆုံးအကြိမ် ရယူထားနိုင်တာ ကြောင့် နှစ်ပေါင်းများစွာ ဝေးကွာနေတဲ့ ဒီဆုဖလားကို အခုနှစ်ပြိုင်ပွဲမှာ အရယူဖို့ ပစ်မှတ်ထားနေတာ ဖြစ်ပါတယ်။

Source: National

CNI Sport News

၂၀၂၄ ခုနှစ်၊ ဖေဖော်ဝါရီ ၂

ဖော်မြူလာဝမ်းပြိုင်ပွဲရဲ့ နာမည်ကြီး ကားမောင်းသမား ဟာမီလ်တန်ဟာ ၂၀၂၄ ခုနှစ် ရာသီအကုန်မှာ မာစီဒီးစ် အသင်းကနေ ထွက်ခွာပြီး ၂၀၂၅ ခုနှစ်မှာ နှစ်ရှည်စာချုပ်နဲ့ ဖာရာရီအသင်းထံ ပြောင်းရွှေ့တော့မှာ ဖြစ်ပါတယ်။

အသက် ၃၉ နှစ်အရွယ်ရှိ ဟာမီလ်တန်ဟာ ပြီးခဲ့တဲ့နွေရာသီကမှ မာစီဒီးစ်အသင်းနဲ့ ၂ နှစ် စာချုပ်သစ် ချုပ်ဆိုခဲ့တာပါ။

ဒါပေမယ့် ၁ နှစ်အကြာမှာ အသင်းကနေ ထွက်ခွာနိုင်တယ်ဆိုတဲ့ အချက်ကို ဟာမီလ်တန်က အသက်သွင်းဖို့ ရွေးချယ်ခဲ့တယ်လို့ သတင်းမှာ ဖော်ပြထားပါတယ်။

၂၀၁၃ ခုနှစ်ကတည်းက မာစီဒီးစ်အသင်းမှာရှိခဲ့တဲ့ ဗြိတိန်ကားမောင်းသမား ဟာမီလ်တန်က ၁၁ နှစ်တာ ကာလ အတွင်း အသင်းနဲ့အတူ ရရှိခဲ့တဲ့ အောင်မြင်မှုတွေအတွက် အလွန်ဂုဏ်ယူတယ်လို့ ပြောခဲ့ပါတယ်။

ဟာမီလ်တန်က “ကျနော် အသက် ၁၃ နှစ်ကတည်းက မာစီဒီးစ်ဟာ ကျနော့်ဘဝရဲ့ အစိတ်အပိုင်းဖြစ်ခဲ့ပါတယ်။ ဒီနေရာဟာ ကျနော်ကြီးပြင်းလာခဲ့တဲ့နေရာပါ။ အဲဒါကြောင့် ထွက်ခွာဖို့ ဆုံးဖြတ်ချက်ချရတာဟာ ကျနော်အတွက် အခက်အခဲ ဆုံးဖြတ်ချက်တွေထဲက တစ်ခုဖြစ်ပါတယ်။ ဒါပေမယ့် ဒီလိုပြုလုပ်ခဲ့တာက ကျနော့်အတွက် မှန်ကန်ခဲ့ ပြီး စိန်ခေါ်မှုအသစ်တစ်ခုအတွက် စိတ်လှုပ်ရှားမိပါတယ်”လို့ ပြောခဲ့တာပါ။

ဟာမီလ်တန်ကို တွေ့ရစဉ်

ဟာမီလ်တန်ရဲ့ ဖာရာရီအသင်းထံ ပြောင်းရွှေ့မှုဟာ ဖော်မြူလာဝမ်းသမိုင်းမှာ အကြီးမားဆုံး အပြောင်းအရွှေ့ တွေထဲက တစ်ခုဖြစ်ခဲ့ပါတယ်။ 

ဟာမီလ်တန်ဟာ ၂၀၂၅ ခုနှစ်မှာ ချာလက်စ်နဲ့အတူ တွဲဖက်ပြီး ဖာရာရီအသင်းအတွက် ပြိုင်ပွဲတွေကို ယှဉ်ပြိုင်သွား ဖို့ ရှိနေတာပါ။ 

ဗြိတိန်ကားမောင်းသမားဟာ ၂၀၁၃ ခုနှစ်က မက္ကလာရင်အသင်းကနေ မာစီဒီးစ်အသင်းထံ ပြောင်းရွှေ့လာခဲ့ တာဖြစ်ပြီး သူရရှိထားတဲ့ ကမ္ဘာ့ချန်ပီယံဆု ၇ ကြိမ်ထဲက ၆ ကြိမ်ကို ဒီအသင်းနဲ့အတူ ရယူနိုင်ခဲ့တာဖြစ်ပါတယ်။ 

ဟာမီလ်တန်ဟာ ပြီးခဲ့တဲ့ ၂၀၂၃ ခုနှစ်က ဖော်မြူလာဝမ်းပြိုင်ပွဲမှာ အဆင့် ၃ နေရာ ရပ်တည်နိုင်ခဲ့တာပါ။ ၂၀၂၄ ခုနှစ် ဖော်မြူလာဝမ်းပြိုင်ပွဲကို မတ်လ ၂ ရက် ဘာရိန်းဂရမ်းပရီနဲ့ စတင်ကျင်းပသွားမယ်လို့ သိရပါတယ်။

Source: BBC

CNI Sport News

၂၀၂၄ ခုနှစ်၊ ဖေဖော်ဝါရီ ၂

ယူနိုက်တက် ကစားသမားဟောင်း လင်ဂတ်ဟာ FC ဆိုးလ်အသင်းနဲ့ ၂ နှစ် စာချုပ်ချုပ်ဆိုဖို့ နှုတ်နဲ့ သဘောတူညီမှု ရယူနိုင်ခဲ့ပြီးနောက် တောင်ကိုရီးယားကလပ်ထံ ပြောင်းရွှေ့ဖို့ နီးစပ်နေပြီ ဖြစ်ပါတယ်။

လင်ဂတ်ဟာ ပြီးခဲ့တဲ့ရာသီအကုန်က နော်တင်ဟမ်ဖောရက်စ် အသင်းကနေ ထွက်ခွာပြီးကတည်းက အခုထိ အသင်းလက်မဲ့ ဖြစ်နေတာပါ။

လင်ဂတ်ဟာ ပြီးခဲ့တဲ့နွေရာသီက အသင်းဟောင်း ဝက်စ်ဟမ်းနဲ့ ဆော်ဒီပရိုလိဂ်ကလပ် အယ်လ်အက်တီဖတ် အသင်းတွေမှာ လေ့ကျင့်မှုတွေ ပြုလုပ်ခဲ့ပေမယ့် အပြောင်းအရွှေ့ မဖြစ်ခဲ့တာဖြစ်ပါတယ်။ 

ယူနိုက်တက် ကစားသမားဟောင်းဟာ မကြာသေးခင်က မေဂျာလိဂ်ကလပ် ပေါ့တ်လန်းတင်ဘာအသင်းထံ ပြောင်းဖို့ ချိတ်ဆက်နေတယ်လို့ သတင်းတွေ ထွက်ခဲ့သေးတာပါ။

Sky Sports က လင်ဂတ်ဟာ FC ဆိုးလ်အသင်းနဲ့ နောက်ထပ် တစ်နှစ်သက်တမ်းတိုးခွင့် အပါအဝင် ၂ နှစ် စာချုပ်ချုပ်ဆိုဖို့ သဘောတူညီမှုရရှိခဲ့တာလို့ ဖော်ပြထားတာ ဖြစ်ပါတယ်။ 

လင်ဂတ်ကို တွေ့ရစဉ်

လင်ဂတ်ဟာ ပြီးခဲ့တဲ့ရာသီက နော်တင်ဟမ်ဖောရက်စ် အသင်းအတွက် ပွဲပေါင်း ၂၀ ပါဝင် ကစားခဲ့ပြီး ၂ ဂိုး သွင်းယူ နိုင်ခဲ့ကာ အသင်းက သူ့ကို စာချုပ်ထပ်ပြီး သက်တမ်းမတိုးတာကြောင့် ထွက်ခွာခဲ့ရတာပါ။ 

ယူနိုက်တက် အကယ်ဒမီထွက် လင်ဂတ်ဟာ မန်ချက်စတာကလပ်အတွက် ပွဲပေါင်း ၂၃၂ ပွဲ ကစားခဲ့ပြီး ယူရိုပါလိဂ်၊ FA ဖလားနဲ့ ကာရာဘောင်းဖလားတို့ကို ရယူနိုင်ခဲ့တာ ဖြစ်ပါတယ်။

အသက် ၃၁ နှစ်အရွယ်ရှိ လင်ဂတ်ဟာ ဝက်စ်ဟမ်းအသင်းမှာ ၂၀၂၁ ခုနှစ်က အငှားနဲ့ သွားရောက်ကစားခဲ့ပြီး ၁၆ ပွဲ ပါဝင်ကစားကာ ၉ ဂိုးသွင်းယူနိုင်ခဲ့တာပါ။ 

လင်ဂတ်ဟာ အင်္ဂလန်လက်ရွေးစင် အသင်းအတွက် ၃၂ ပွဲ ကစားခဲ့ပြီး ၆ ဂိုးသွင်းယူကာ ၂၀၂၁ ခုနှစ်က နောက်ဆုံး ပါဝင်ကစားခဲ့တာ ဖြစ်ပါတယ်။ 

ကေလိဂ်ကလပ် FC ဆိုးလ်အသင်းဟာ ပြီးခဲ့တဲ့ရာသီက ၁၂ သင်းရှိတဲ့ လိဂ်ပြိုင်ပွဲမှာ အဆင့် ၇ နေရာနဲ့ ရာသီ အဆုံးသတ်နိုင်ခဲ့တာပါ။

၂၀၂၄ ခုနှစ်ရာသီသစ် ကေလိဂ် ပြိုင်ပွဲကို မတ်လကနေ နိုဝင်ဘာလအထိ ကျင်းပသွားမယ်လို့ သိရပါတယ်။

Source: Daily Mail

CNI Sport News

၂၀၂၄ ခုနှစ်၊ ဖေဖော်ဝါရီ ၂

ဝုလ်ဗ်စ်အသင်းကို အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ယူနိုက်တက်အသင်းအတွက် အဖိုးတန် အနိုင်ဂိုးသွင်း ယူပေးခဲ့ပြီး ပထမဆုံးလိဂ်သွင်းဂိုးရယူနိုင်ခဲ့တဲ့ ကိုဘီမိုင်နူးက သူ့ရဲ့အိပ်မက်တစ်ခု အမှန်တကယ်ဖြစ်လာပြီလို့ ပြောလိုက်ပါတယ်။

ကိုဘီမိုင်နူးက “ကျနော့်ရဲ့ အိပ်မက်တစ်ခုအမှန်တကယ်ဖြစ်လာပါပြီ။ ဝုလ်ဗ်စ်အသင်းရဲ့ အိမ်ကွင်းက လာရောက် ကစားဖို့ ခက်ခဲတဲ့နေရာဖြစ်ပေမယ့် ကျနော်တို့ နိုင်ပွဲရယူနိုင်ခဲ့ပါတယ်။ ရိုးရိုးသားသားပြောရရင် အိပ်မက်မက် နေတုန်းပဲလို့ ခံစားရပါတယ်။ ကျနော့်ရဲ့ ငယ်ဘဝကလပ်အတွက် ပရီးမီးယားလိဂ်မှာ စတင်ကစားနေရတာက မယုံနိုင်လောက်အောင်ပါပဲ။ လာမယ့်ပွဲတွေကိုလည်း အနိုင်ယူဖို့ ကြိုးစားသွားမှာပါ”လို့ TNT Sports ကို ပြောခဲ့တာပါ။

ယူနိုက်တက်အသင်းက ဝုလ်ဗ်စ်အသင်းကို ၄ ဂိုး- ၃ ဂိုးနဲ့ အနိုင်ရတဲ့ပွဲစဉ်မှာ ကွင်းလယ်လူ ကိုဘီမိုင်နူးဟာ ပွဲချိန် ၉၇ မိနစ်မှာ အသင်းအတွက် အဖိုးတန်အနိုင်ဂိုးကို သွင်းယူပေးခဲ့တာဖြစ်ပါတယ်။ ယူနိုက်တက်အသင်းဟာ ဒီပွဲမှာ ဝုလ်ဗ်စ်အသင်းကို ဦးဆောင်ဂိုးတွေသွင်းယူနိုင်ခဲ့ပေမယ့် ချေပဂိုးတွေပြန်ပေးခဲ့ရတာကြောင့် သရေနဲ့ ပွဲပြီးဆုံးသွား နိုင်တဲ့အချိန်မှာ ကိုဘီမိုင်နူးက အနိုင်ဂိုးသွင်းယူပေးနိုင်ခဲ့တာပါ။ အသက် ၁၈ နှစ်အရွယ်ရှိ ကိုဘီမိုင်နူးဟာ ဒီရာသီ မှာ ယူနိုက်တက်အသင်းအတွက် ၁၅ ပွဲပါဝင်ကစားထားပြီး ၂ ဂိုးသွင်းယူထားပါတယ်။

ယူနိုက်တက်အသင်းနည်းပြ အဲရစ်တန်ဟတ်နဲ့ အသင်းခေါင်းဆောင် ဘရူနိုဖာနန်ဒက်စ်တို့က ကိုဘီမိုင်နူးရဲ့ စွမ်းဆောင်ရည်တွေကို ချီးကျူးမှုပြုလုပ်ခဲ့ပါတယ်။ ဝုလ်ဗ်စ်အသင်းနဲ့ ပွဲမှာ ယူနိုက်တက်အသင်းအတွက် ဂိုးတွေကို ကိုဘီမိုင်နူးအပြင် ရက်ရှ်ဖိုဒ့်၊ဟော့ဂျ်လန်းနဲ့ တော်မီနေးတို့က သွင်းယူခဲ့တာဖြစ်ပြီး ဝုလ်ဗ်စ်အသင်းအတွက် ချေပဂိုး တွေကိုတော့ ဆာရာဘီယာ၊ကေးလ်မန်းနဲ့ နီတိုတို့က သွင်းယူခဲ့တာပါ။ ယူနိုက်တက်အသင်းဟာ ဒီနိုင်ပွဲကြောင့် ပရီးမီးယားလိဂ်အမှတ်ပေးဇယားအဆင့် ၇ နေရာမှာ ရပ်တည်နေပြီး အဆင့် ၄ နေရာက စပါးအသင်းနဲ့ ၈ မှတ် ကွာဟနေပါတယ်။

ယူနိုက်တက်အသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် ဝက်စ်ဟမ်းအသင်းနဲ့ ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၄ ခုနှစ်၊ ဖေဖော်ဝါရီ ၂

ဆော်ဒီနိုင်ငံမှာ ကျင်းပခဲ့တဲ့ Riyadh Season Cup ခြေစမ်းပွဲအဖြစ် အယ်လ်နာဆာနဲ့ အင်တာမိုင်ယာမီအသင်းတို့ ကစားခဲ့တာမှာ အယ်လ်နာဆာအသင်းက ၆ ဂိုး- ဂိုးမရှိနဲ့ ဂိုးပြတ် အနိုင်ရရှိသွားခဲ့ပါတယ်။

ရော်နယ်ဒိုနဲ့ မက်ဆီတို့ရဲ့ Last Dance ပွဲစဉ်အဖြစ် သတ်မှတ်ထားတဲ့ ဒီပွဲမှာ ရော်နယ်ဒိုဟာ ဒဏ်ရာကြောင့် ပါဝင် ကစားနိုင်ခဲ့ခြင်းမရှိဘဲ ပွဲကြည့်စင်ပေါ်ကနေသာ အယ်လ်နာဆာအသင်းကို အားပေးခဲ့ပါတယ်။

မက်ဆီကလည်း အင်တာမိုင်ယာမီအသင်းရဲ့ ပွဲထွက်လူစာရင်းမှာ မပါဝင်ခဲ့ဘဲ ပွဲချိန် ၈၃ မိနစ်မှ လူစားဝင် ကစားသမားအဖြစ် ပါဝင်ခဲ့တာဖြစ်ပါတယ်။ 

မက်ဆီဟာ ဒီပွဲမှာ ပွဲကစားချိန် ၇ မိနစ်သာ ကစားခဲ့ရတဲ့အတွက် အင်တာမိုင်ယာမီအသင်းကို ရလဒ်ကောင်း ရရှိအောင် လုပ်ဆောင်ပေးနိုင်ခဲ့ခြင်း မရှိခဲ့ပါဘူး။

အယ်လ်နာဆာအသင်းအတွက် ဂိုးတွေကို တာလီစကာက ဟက်ထရစ်၊ အော်တာဗီယို၊ လာပေါ့တ်နဲ့ မာရန်တို့က ၁ ဂိုးစီ သွင်းယူခဲ့တာ ဖြစ်ပါတယ်။ 

ရော်နယ်ဒိုကို တွေ့ရစဉ်

အင်တာမိုင်ယာမီအသင်းဟာ ဒီပွဲမတိုင် ဆော်ဒီမှာပဲ ကစားခဲ့တဲ့ ခြေစမ်းပွဲမှာ အယ်လ်ဟီလယ်အသင်းကို ၄ ဂိုး- ၃ ဂိုးနဲ့ အရေးနိမ့်ခဲ့တာပါ။ 

အင်တာမိုင်ယာမီအသင်းဟာ ၂၀၂၄ ခုနှစ် မေဂျာလိဂ်ရာသီသစ် မစတင်ခင် ခြေစမ်းပွဲတွေ ဆက်တိုက် ယှဉ်ပြိုင်နေ တာဖြစ်ပြီး ၄ ပွဲ ကစားထားတာမှာ ၁ ပွဲသရေ ၃ ပွဲရှုံးနိမ့်ထားတာ ဖြစ်ပါတယ်။

အင်တာမိုင်ယာမီအသင်းဟာ အယ်လ်နာဆာ အသင်းနဲ့ပွဲအပြီးမှာ ဟောင်ကောင်နဲ့ ဂျပန်နိုင်ငံကို သွားရောက်ကာ ခြေစမ်းပွဲတွေ ကစားဖို့စီစဉ်ထားတာပါ။ 

အယ်လ်နာဆာအသင်းကတော့ ဆော်ဒီပရိုလိဂ်ပြိုင်ပွဲ ပြန်မစခင်မှာ စခန်းသွင်း လေ့ကျင့်ကာ ခြေစမ်းပွဲတွေ ယှဉ်ပြိုင်နေတာ ဖြစ်ပါတယ်။ 

အယ်လ်နာဆာအသင်းဟာ မကြာသေးခင်က ရော်နယ်ဒိုရဲ့ ဒဏ်ရာကြောင့် တရုတ်ခရီးစဉ်ကို ရွှေ့ဆိုင်းခဲ့ရပါသေး တယ်။

ရော်နယ်ဒိုကတော့ ဒဏ်ရာကြောင့် တစ်ဦးတည်း လေ့ကျင့်မှုတွေ ပြုလုပ်နေပြီး မကြာခင်မှာ အသင်းဖော်တွေနဲ့ ပူးပေါင်းကာ လေ့ကျင့်မှုတွေ ပြုလုပ်နိုင်မယ်လို့ အယ်လ်နာဆာအသင်းနည်းပြ လူးဝစ်ကတ်စထရိုက အင်တာမိုင်ယာမီအသင်းနဲ့ ပွဲစဉ်မတိုင်ခင် ပြောကြားခဲ့ပါတယ်။

Source: BBC

CNI Sport News

၂၀၂၄ ခုနှစ်၊ ဖေဖော်ဝါရီ ၁

ဘာစီလိုနာအသင်းဥက္ကဋ္ဌ လာပေါ်တာဟာ နည်းပြဟောင်း ဂွာဒီယိုလာကို အသင်းရဲ့နည်းပြသစ်အဖြစ် ပြန်လည် ခန့်အပ်ဖို့ စိတ်အားထက်သန်နေတယ်လို့ စပိန်မီဒီယာတွေက ဖော်ပြထားပါတယ်။

ဘာစီလိုနာအသင်းနည်းပြ ဇာဗီဟာ ဒီရာသီအကုန်မှာ အသင်းကနေ ထွက်ခွာတော့မယ်လို့ ကြေညာခဲ့တာကြောင့် စပိန်ကလပ်ဟာ နွေရာသီမှာ နည်းပြသစ်တစ်ဦးကို ခန့်အပ်ရတော့မှာပါ။ 

အဲဒါကြောင့် ဇာဗီရဲ့ နေရာ အစားထိုးဝင်ရောက်ပြီး ဘာစီလိုနာအသင်း နည်းပြသစ်ဖြစ်လာဖို့ ဘာစီလိုနာ(ဘီ) အသင်းနည်းပြ မားကွက်ဇ်၊ ဘိုလော့ဂ်နာအသင်းနည်းပြ သီယာဂိုမော့တာနဲ့ အာဆင်နယ်အသင်းနည်းပြ အာတီတာတို့ အပါအဝင် နည်းပြအချို့ဟာ ချိတ်ဆက်မှုတွေ ခံနေရပါတယ်။

အာတီတာကတော့ ဘာစီလိုနာအသင်း နည်းပြအဖြစ် ဇာဗီနေရာမှာ ဆက်ခံမယ့် သတင်းတွေကို ငြင်းဆန်ထားပြီး အာဆင်နယ်အသင်းမှာသာ ဆက်ရှိမယ်လို့ တုန့်ပြန်ထားတာပါ။ 

ဒီအချိန်မှာ El Chiringuito TV က ဘာစီလိုနာအသင်း အကြီးအကဲ လာပေါ်တာက ဂွာဒီယိုလာကို နည်းပြအဖြစ် ပြန်ခန့်အပ်ဖို့ စိတ်အားထက်သန်နေတယ်လို့ ဖော်ပြခဲ့ပါတယ်။

လာပေါ်တာအနေနဲ့ ဂွာဒီယိုလာကို ပြန်ခန့်အပ်နိုင်ဖို့အတွက် မန်စီးတီးအသင်းကနေ ခေါ်ယူနိုင်ဖို့ ကြိုးပမ်းရမှာပါ။

ဂွာဒီယိုလာကို တွေ့ရစဉ်

အသက် ၅၃ နှစ်အရွယ်ရှိ ဂွာဒီယိုလာဟာ ဘာစီလိုနာအသင်းမှာ ကစားသမားအဖြစ် ၁၉၈၄ ကနေ ၂၀၀၁ ခုနှစ် အထိ ကစားခဲ့ပြီး ၂၀၀၇ ခုနှစ်မှာ နည်းပြအဖြစ် ကိုင်တွယ်ခဲ့တာ ဖြစ်ပါတယ်။ 

ဂွာဒီယိုလာဟာ အစောပိုင်းက ဘာစီလိုနာ(ဘီ)အသင်းကို ကိုင်တွယ်ခဲ့ပြီး ၂၀၀၈ ခုနှစ်မှာ အသင်းကြီးကို စတင် ကိုင်တွယ်ခဲ့ကာ ၂၀၁၂ ခုနှစ်အထိ တာဝန်ယူခဲ့တာပါ။

ဂွာဒီယိုလာ လက်ထက်မှာ ဘာစီလိုနာအသင်းဟာ လာလီဂါဖလား ၃ ကြိမ်၊ ချန်ပီယံလိဂ်ဖလား ၂ ကြိမ် အပါအဝင် ဆုဖလား အများအပြား ရယူပေးနိုင်ခဲ့ပါတယ်။

ဂွာဒီယိုလာဟာ ဘာစီလိုနာအသင်းကနေ ထွက်ခွာအပြီးမှာ ဘိုင်ယန်မြူးနစ်နဲ့ အခုလက်ရှိ မန်စီးတီးအသင်းတို့ကို ကိုင်တွယ်ကာ ဒီအသင်းတွေမှာလည်း အောင်မြင်မှု ရယူနိုင်ခဲ့တာပါ။

ဂွာဒီယိုလာနဲ့ မန်စီးတီးအသင်းတို့ ချုပ်ဆိုထားတဲ့ စာချုပ်ဟာ လာမယ့်ရာသီအကုန်မှ ကုန်ဆုံးမှာဖြစ်ပေမယ့် စပိန် လူမျိုး နည်းပြကတော့ နောက်ထပ် တစ်ရာသီ စာချုပ်သက်တမ်း တိုးချင်နေတယ်လို့ မကြာသေးခင်က ပြောထား ပါတယ်။ 

Source: Sportsmole

CNI Sport News

၂၀၂၄ ခုနှစ်၊ ဖေဖော်ဝါရီ ၁

ဘာရိန်းအသင်းကို အနိုင်ရခဲ့တဲ့ အာရှဖလား ၁၆ သင်းအဆင့်ပွဲမှာ ပေးဂိုးပေးခဲ့ရပြီးနောက် ဂျပန်အသင်းအနေနဲ့ ဒီပြိုင်ပွဲမှာ ပွဲကိုအပြတ်ဖြတ်ဖို့ သင်ယူရမယ်လို့ နောက်ခံလူ တိုမီယာဆုက ပြောလိုက်ပါတယ်။

တိုမီယာဆုက “ကျနော်တို့ဟာ ဒီပွဲမှာ ပေးဂိုးမပေးချင်ခဲ့ဘူးဆိုတာ သိသာခဲ့ပါတယ်။ ဒါပေမယ့်လည်း ကျနော်တို့ ဘာရိန်းအသင်းကို ဂိုးပေးခဲ့ရပါတယ်။ အဲဒါကြောင့် လာမယ့်ပွဲမှာ ပေးဂိုးမပေးရအောင် ထိန်းထားနိုင်ဖို့ ကျနော်တို့ ကြိုးစားသွားမှာပါ။ နောက်ခံလူတစ်ဦးအနေနဲ့ ကွင်းထဲမှာအချိန်တိုင်း ပေးဂိုးမပေးချင်ပါဘူး။ ပေးဂိုးပေးခဲ့ရတဲ့ အတွက် ကျနော်မပျော်ရွှင်ဘူး” လို့ သတင်းထောက်တွေကို ပြောခဲ့တာပါ။

ဂျပန်အသင်းဟာ အာရှဖလား ၁၆ သင်းအဆင့်ပွဲစဉ်မှာ ဘာရိန်းအသင်းကို ၃ ဂိုး-၁ ဂိုးနဲ့ အနိုင်ရခဲ့ပေမယ့် ပေးဂိုး ပေးခဲ့ရတာကို နောက်ခံလူ တိုမီယာဆုက စိတ်ပျက်နေတာဖြစ်ပါတယ်။ အာရှဖလားပြိုင်ပွဲမှာ ဗိုလ်စွဲဖို့ ရေပန်း အစားဆုံးဖြစ်နေတဲ့ ဂျပန်အသင်းဟာ ယှဉ်ပြိုင်ကစားခဲ့ပြီးတဲ့ ၄ ပွဲစလုံးပေးဂိုးပေးခဲ့ရတာပါ။ ဂျပန်အသင်းနည်းပြ မိုရီယာဆုကတော့ ကစားသမားတွေရဲ့ စွမ်းဆောင်ရည်ကို ကျေနပ်ပေမယ့် ၁၀၀ ရာခိုင်နှုန်း မကစားနိုင်ခဲ့ဘူးလို့ ပြောခဲ့တာကို တိုမီယာဆုက သဘောတူခဲ့ပါတယ်။

တိုမီယာဆုက “ကျနော်တို့ဟာ အခုအချိန်မှာ အကောင်းဆုံးပုံစံမဟုတ်သေးဘူးလို့ထင်ပါတယ်။ ကျနော်တို့ဟာ ဒီထက်ပိုကောင်းအောင်လုပ်သင့်ပါတယ်။ ၂ ဂိုးပြတ်နဲ့ ဦးဆောင်နေတဲ့အချိန်မှာ ပွဲကိုဖြတ်ပစ်ဖို့ လိုအပ်ပါတယ်။ ဒီလိုမလုပ်နိုင်တဲ့အတွက် သူတို့ကို ဂိုးပေးပြီး မျှော်လင့်ချက်တွေပေးခဲ့ပါတယ်။ အဲဒါကြောင့် ပွဲကိုကောင်းမွန်စွာ စီမံခန့်ခွဲပြီး ပွဲကိုဖြတ်ပစ်ဖို့လိုပါတယ်” လို့ ပြောခဲ့တာပါ။

ဂျပန်အသင်းဟာ အာရှဖလားပြိုင်ပွဲရဲ့ ကွာတားဖိုင်နယ်မှာ အီရန်အသင်းနဲ့ ယှဉ်ပြိုင်ရမှာဖြစ်ပါတယ်။ 

CNI Sport News

၂၀၂၄ ခုနှစ်၊ ဖေဖော်ဝါရီ ၁

ပေါ်တူဂီလူမျိုးနည်းပြ မော်ရင်ဟိုဟာ ယူနိုက်တက်အသင်းမှာ မပြီးပြတ်သေးတဲ့ လုပ်ငန်းတွေ ရှိသေးတယ်လို့ ခံစားနေရတာကြောင့် အသင်းဟောင်းကို ပြန်လည်ကိုင်တွယ်ဖို့ ဆန္ဒရှိနေတယ်လို့ ဗြိတိန်မီဒီယာတွေက ဖော်ပြ ထားပါတယ်။

ဒေးလီးမေးလ်က မော်ရင်ဟိုဟာ ယူနိုက်တက်အသင်း ပူးတွဲပိုင်ရှင်အသစ် ဆာဂျင်ရက်ကလစ်ဖ်နဲ့ သူ့ရဲ့ အဖွဲ့အစည်း INEOS တို့နဲ့ အတူလက်တွဲပြီး အလုပ်လုပ်ဖို့ မျှော်လင့်နေတယ်လို့ ဖော်ပြထားတာပါ။ 

မော်ရင်ဟိုဟာ ယူနိုက်တက်အသင်းထံ ပြန်လာချင်နေပေမယ့် အသင်းဘက်က လက်ရှိအချိန်မှာ နည်းပြသစ် ရှာဖွေဖို့ အစီအစဉ်မရှိသေးတာ ဖြစ်ပါတယ်။ 

ယူနိုက်တက်အသင်းနဲ့ လက်ရှိနည်းပြ အဲရစ်တန်ဟတ်တို့ ချုပ်ဆိုထားတဲ့ စာချုပ်ဟာ ၂၀၂၅ ခုနှစ်အထိ သက်တမ်း ရှိနေတာပါ။

မော်ရင်ဟိုဟာ ယူနိုက်တက်အသင်းကို ကိုင်တွယ်ခဲ့တုန်းက သူဝေဖန်မှုလုပ်ခဲ့တဲ့ မာရှယ်၊ ရက်ရှ်ဖို့ဒ်၊ လုပ်ခ်ရှောနဲ့ တိုမီနေးတို့ဟာ အသင်းမှာ ဆက်ပြီးရှိနေသေးတာ ဖြစ်ပါတယ်။ 

မော်ရင်ဟိုနဲ့ ရက်ရှ်ဖို့ဒ်ကို တွေ့ရစဉ်

ပေါ်တူဂီလူမျိုးနည်းပြဟာ ယူနိုက်တက်အသင်းကို ၂ နှစ်ခွဲနီးပါး တာဝန်ယူခဲ့ပြီး ၂၀၁၈ ခုနှစ်၊ ဒီဇင်ဘာလမှာ ရာထူးက ထုတ်ပယ်ခံခဲ့ရတာပါ။ 

သူဟာ ယူနိုက်တက်အသင်းကို ယူရိုပါလိဂ်၊ ကာရာဘောင်းလိဂ်ဖလားနဲ့ ကွန်မြူနတီဒိုင်းတို့ကို ရယူပေးနိုင်ခဲ့ ပါတယ်။

မော်ရင်ဟိုဟာ ပြီးခဲ့တဲ့ ဇန်နဝါရီကမှ ရိုးမားအသင်းနည်းပြ ရာထူးကနေ ထုတ်ပယ်ခံခဲ့ရတာဖြစ်ပြီး ကလပ်အသင်း အချို့နဲ့ သတင်းတွေ ထွက်ပေါ်နေပါတယ်။

မော်ရင်ဟိုဟာ သူ့ကိုခေါ်ယူဖို့ ဆော်ဒီကလပ် အယ်လ်ရှာဘတ်အသင်းက ကမ်းလှမ်းမှု ပြုလုပ်ခဲ့တာကို ပယ်ချခဲ့ပြီး ဥရောပမှာ နည်းပြ ဆက်လက် လုပ်ကိုင်ချင်နေတာ ဖြစ်ပါတယ်။ 

မော်ရင်ဟိုဟာ ပရီးမီးယားလိဂ်ကလပ် နယူးကာဆယ်အသင်းကို ကိုင်တွယ်ဖို့လည်း သတင်းတွေ ထွက်နေပါ သေးတယ်။

ယူနိုက်တက်အသင်းကတော့ ဒီရာသီမှာ ချန်ပီယံလိဂ်နဲ့ ကာရာဘောင်း လိဂ်ဖလားကနေ ထွက်ခွာခဲ့ရပြီးဖြစ်သလို ပရီးမီးယားလိဂ်ပြိုင်ပွဲမှာလည်း အဆင့် ၉ နေရာ ရပ်တည်နေပါတယ်။ 

အဲဒါကြောင့် ယူနိုက်တက်အသင်းအတွက် ဒီရာသီမှာ ရယူနိုင်စရာ ဆုဖလားအဖြစ် FA ဖလားသာရှိတော့တာ ဖြစ်ပါတယ်။  

Source:Goal

CNI Sport News

၂၀၂၄ ခုနှစ်၊ ဖေဖော်ဝါရီ ၁

လီဗာပူးလ်အသင်းနည်းပြ ကလော့ပ်က ချယ်လ်ဆီးအသင်းကို အနိုင်ရရှိခဲ့တဲ့ ပရီးမီးယားလိဂ်ပွဲစဉ်မှာ အသင်း အတွက် ခြေစွမ်းပြသပြီး ဂိုးသွင်း၊ ဂိုးဖန်တီးနိုင်ခဲ့တဲ့ လူငယ်ကစားသမား ကော်နာဘရက်ဒလေကို ချီးကျူးသွားခဲ့ ပါတယ်။

ကလော့ပ်က “သူကအံ့သြဖွယ်ကောင်းတဲ့ ကလေးပါ။ အလွန်ကောင်းမွန်တဲ့ အဆုံးသတ်၊ ဂိုးဖန်တီးမှုတွေနဲ့ တစ်ပွဲလုံး ခြေစွမ်းပြသနိုင်ခဲ့ပါတယ်။ စတာလင်နဲ့ ရင်ဆိုင်ကစားရတာဟာ မလွယ်ကူတာကြောင့် သူ့အတွက် ကျနော် ပျော်ရွှင်မိပါတယ်။ သူဟာ အလွန်အောင်မြင်ချင်တဲ့ လူငယ်တစ်ဦးဖြစ်ပြီး ဒါက ထူးခြားတယ်လို့ ပြောရမှာပါ။ ရာသီကြိုမှာကတည်းက သူဟာ အလွန်ကောင်းမွန်စွာ အလုပ်လုပ်ခဲ့ပါတယ်”လို့ ပြောကြားခဲ့ပါတယ်။

လီဗာပူးလ်အသင်းက ချယ်လ်ဆီးအသင်းကို ၄ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အသက် ၂၀ နှစ် အရွယ်ရှိ ကော်နာဘရက်ဒလေဟာ လီဗာပူးလ်အသင်း ကစားသမားဘဝ ပထမဆုံးဂိုးကို သွင်းယူနိုင်ခဲ့သလို ဂျိုတာနဲ့ ဆိုဘော့ဇ်လိုင်း သွင်းယူတဲ့ဂိုးတွေကို ဖန်တီးနိုင်ခဲ့တာ ဖြစ်ပါတယ်။ 

ပြီးခဲ့တဲ့ရာသီက လိဂ်ဝမ်းကလပ် ဘောလ်တန်အသင်းမှာ အငှားသွားရောက်ကစားခဲ့တဲ့ ကော်နာဘရက်ဒလေဟာ အသင်းဖော်နောက်ခံလူ အာနိုးလ် မပါဝင်နိုင်တဲ့ အချိန်တွေမှာ လီဗာပူးလ်အသင်းအတွက် ခြေစွမ်းပြသနေတာ ဖြစ်ပါတယ်။

ချယ်လ်ဆီးအသင်းကို အနိုင်ရတဲ့ပွဲဟာ လီဗာပူးလ်အသင်းနည်းပြ ကလော့ပ်အတွက် ပရီးမီးယားလိဂ်နိုင်ပွဲ ၂၀၀ ပြည့် သွားခဲ့တာလည်း ဖြစ်ပါတယ်။

ကလော့ပ်ဟာ ပရီးမီးယားလိဂ်ပြိုင်ပွဲမှာ နိုင်ပွဲ ၂၀၀ အမြန်ဆုံး ရယူနိုင်တဲ့နည်းပြအဖြစ် မန်စီးတီးအသင်းနည်းပြ ဂွာဒီယိုလာရဲ့ အနောက် ဒုတိယနေရာမှာ ရပ်တည်နေပါတယ်။

ဂွာဒီယိုလာဟာ ပရီးမီးယားလိဂ်ပွဲပေါင်း ၂၆၉ ပွဲနဲ့ နိုင်ပွဲ ၂၀၀ ပြည့်ခဲ့တာဖြစ်ပြီး ကလော့ပ်က ၃၁၈ ပွဲမှာ နိုင်ပွဲ ၂၀၀ ပြည့်ခဲ့တယ်လို့ ပရီးမီးယားလိဂ်က တရားဝင် ဖော်ပြထားတာ ဖြစ်ပါတယ်။

လီဗာပူးလ်အသင်းဟာ ချယ်လ်ဆီးအသင်းကို အနိုင်ရပြီးနောက် ပရီးမီးယားလိဂ် အမှတ်ပေးဇယားကို ဆက်လက် ဦးဆောင်နေပြီး ဒုတိယနေရာက မန်စီးတီးအသင်းထက် ၁ ပွဲပို ကစားထားကာ ရမှတ် ၅ မှတ် အသာရထားတာပါ။ 

လီဗာပူးလ်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် တတိယနေရာက အာဆင်နယ်အသင်းနဲ့ ယှဉ်ပြိုင်ရ မှာဖြစ်ပါတယ်။ 

Source: Daily Mail