CNI Sport News

၂၀၂၄ ခုနှစ်၊ ဇန်နဝါရီ ၂၆

ယူနီယံဘာလင်အသင်းနည်းပြ ဘီရယ်လီကာဟာ ဘိုင်ယန်မြူးနစ်အသင်း တောင်ပံကစားသမား ဆာနေးရဲ့ မျက်နှာကို လက်နဲ့တွန်းခဲ့တာကြောင့် ၃ ပွဲပယ်ပြစ်ဒဏ်ချခံခဲ့ရပါတယ်။

ဘိုင်ယန်မြူးနစ်အသင်းက ယူနီယံဘာလင်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ဘွန်ဒစ်လီဂါပွဲစဉ်ရဲ့ ပွဲချိန် ၇၄ မိနစ်မှာ ဆာနေးဟာ ဘီရယ်လီကာဆီကနေ ဘောလုံးရယူဖို့ ကြိုးစားခဲ့တာမှာ ဒီအဖြစ်အပျက်ဖြစ်ခဲ့တာပါ။

ဘီရယ်လီကာဟာ ဆာနေးရဲ့ မျက်နှာကို ၂ ကြိမ်တိုင်တိုင်လက်နဲ့တွန်းခဲ့သလို လူကိုလည်း အဝေးရောက်အောင် တွန်းထုတ်ခဲ့တာဖြစ်ပါတယ်။ 

ဆာနေးရဲ့မျက်နှာကို လက်နဲ့တွန်းခဲ့တဲ့ ယူနီယံဘာလင်နည်းပြ

အဲ့ဒါကြောင့် ဘီရယ်လီကာဟာ တိုက်ရိုက်အနီကတ်ပြထုတ်ပယ်ခံခဲ့ရသလို ၃ ပွဲပယ်ပြစ်ဒဏ်နဲ့ ဒဏ်ကြေးငွေ ယူရို ၂၅,၀၀၀ ချမှတ်ခံခဲ့ရတာပါ။

ဂျာမနီဘောလုံးအဖွဲ့ချုပ်က ဘီရယ်လီကာဟာ အားကစားစိတ်ဓါတ်ကင်းမဲ့တဲ့အပြုအမူကို ပြုလုပ်ခဲ့တယ်လို့ ထုတ်ပြန်ခဲ့ပါတယ်။ 

အသက် ၅၂ နှစ်အရွယ်ရှိ ခရိုအေးရှားလူမျိုး ဘီရယ်လီကာဟာ ပြီးခဲ့တဲ့ ၂၀၂၃ ခုနှစ်၊ နိုဝင်ဘာလမှာ ယူနီယံဘာလင်အသင်းနည်းပြအဖြစ်ခန့်အပ်ခံခဲ့ရတာဖြစ်ပြီး ၃ ပွဲပယ်ပြစ်ဒဏ်ကြောင့် လာမယ့် ဒမ်စတက်၊ လိုက်ပ်ဇစ်နဲ့ မိန့်ဇ်အသင်းတို့ရဲ့ ဘွန်ဒစ်လီဂါပွဲစဉ်တွေကို ကွင်းအတွင်းကြီးကြပ်ခွင့်ရမှာ မဟုတ်တော့ပါဘူး။ 

ဆာနေးရဲ့မျက်နှာကို လက်နဲ့တွန်းခဲ့တဲ့ ယူနီယံဘာလင်နည်းပြ

ပြီးခဲ့တဲ့ရာသီက ဘွန်ဒစ်လီဂါပြိုင်ပွဲမှာ အဆင့် ၄ နေရာရပ်တည်ပြီး ချန်ပီယံလိဂ်ပြိုင်ပွဲယှဉ်ပြိုင်ခွင့်ရခဲ့တဲ့ ယူနီယံဘာလင်အသင်းဟာ ဒီရာသီမှာ ရလဒ်တွေဆိုးရွားနေပြီး တန်းဆင်းဇုန်ပလေးအောဖ့်နေရာမှာ ရှိနေတဲ့ မိန့်ဇ်အသင်းနဲ့ ၃ မှတ်အကွာ အဆင့် ၁၅ နေရာမှာရပ်တည်နေတာပါ။ 

ဘိုင်ယန်မြူးနစ်အသင်းကတော့ ဘွန်ဒစ်လီဂါထိပ်ဆုံးနေရာမှာရှိနေတဲ့ လေဗာကူဆင်အသင်းနဲ့ ၄ မှတ် အကွာ အဆင့် ၂ နေရာမှာ ရပ်တည်နေတာဖြစ်ပါတယ်။

Source:BBC

CNI Sport News

၂၀၂၄ ခုနှစ်၊ ဇန်နဝါရီ ၂၆

တံကောက်ကြော ဒဏ်ရာကြောင့် ပြန်လည်ထူထောင်ရေးလုပ်ငန်းစဉ်တွေကို စတင်နေပြီဖြစ်တဲ့ လီဗာပူးလ်အသင်း တိုက်စစ်မှူး ဆာလက်ဟာ အီဂျစ်အသင်းထံ ပြန်ပူးပေါင်းနိုင်ဖို့အတွက် အရာအားလုံး လုပ်ဆောင်သွားမယ်လို့ ပြောလိုက်ပါတယ်။

ဆာလက်က “ကျနော်ဟာ မနေ့က ကုသမှုနဲ့ ပြန်လည်ထူထောင်ရေး အစီအစဉ်တွေကို စတင်နေပြီဖြစ်ပါတယ်။ ကျနော်တတ်နိုင်သမျှ အရာအားလုံးကိုအစွမ်းကုန်ကြိုးစားလုပ်ဆောင်ပြီး အစကတည်းက သဘောတူထားတဲ့ အတိုင်း နိုင်ငံအသင်းဆီပြန်သွားမှာပါ”လို့ သူ့ရဲ့ဆိုရှယ်မီဒီယာမှာ ရေးသားခဲ့တာပါ။

ဆာလက်ဟာ အီဂျစ်နဲ့ ဂါနာအသင်းတို့ ၂ ဂိုးစီသရေကျခဲ့တဲ့ အာဖရိကဖလားအုပ်စုပွဲစဉ်မှာ တံကောက်ကြော ဒဏ်ရာရရှိခဲ့တာကြောင့် ပြီးခဲ့တဲ့ရက်က လီဗာပူးလ်အသင်းထံ ပြန်လာပြီး ကုသမှုခံယူနေတာဖြစ်ပါတယ်။

လီဗာပူးလ်အသင်းနည်းပြ ကလောပ့်က ဆာလက်အနေနဲ့ ဒဏ်ရာကနေ အပြည့်အဝသက်သာပြီး အီဂျစ်အသင်း လည်း အာဖရိကဖလားပြိုင်ပွဲ ဗိုလ်လုပွဲတက်နိုင်ခဲ့ရင် ဒီပြိုင်ပွဲဆီ ပြန်ပို့ပေးမယ်လို့ ကတိပေးထားတာပါ။ 

ကလောပ့်က “ကျနော်တို့ဟာ ဆာလက်ကို အမြန်ဆုံးပြန်ပြီး ကြံ့ခိုင်မှုရစေချင်ပါတယ်။ သူဟာ အာဖရိကမှာ ဆက်နေပြီး သင့်တော်တဲ့ကုသမှုကို မခံယူဘူးဆိုရင် အရာအားလုံးက နှောင့်နှေးသွားပါလိမ့်မယ်။ အဲ့ဒါကြောင့် ကျနော်တို့ဟာ သူ့ကို အကောင်းဆုံးဆေးကုသမှုတွေပေးချင်လို့ ပြန်ပြီးခေါ်ခဲ့တာပါ။ ကျနော်တို့ အားလုံး သဘောတူပြီးသားပါ။ ဆာလက် ကြံ့ခိုင်မှုအပြည့်အဝရှိပြီး အီဂျစ်လည်း ဗိုလ်လုပွဲကိုတက်ရင် သူ့ကို ဒီပြိုင်ပွဲဆီပြန်ပို့ပေးမယ်ဆိုတာ သေချာပါတယ်”လို့ beIN SPORTS ကိုပြောခဲ့ပါတယ်။

အာဖရိကဖလားချန်ပီယံဆုကို စံချိန်တင် ၇ ကြိမ်ရရှိထားတဲ့ အီဂျစ်အသင်းဟာ ဒီပြိုင်ပွဲရဲ့ ၁၆ သင်းအဆင့်မှာ ကွန်ဂိုအသင်းနဲ့ ယှဉ်ပြိုင်ရမှာပါ။ အာဖရိကဖလားပြိုင်ပွဲဗိုလ်လုပွဲကို ဖေဖော်ဝါရီ ၁၁ ရက်မှာကျင်းပသွားမှာဖြစ်ပါတယ်။

Source:ESPN

CNI Sport News

၂၀၂၄ ခုနှစ်၊ ဇန်နဝါရီ ၂၆

ပြင်သစ်တိုက်စစ်မှူး ဘတ်ပီဟာ ရီးရယ်လ်နဲ့ ပီအက်စ်ဂျီအသင်းတို့ဆီက ရရှိထားတဲ့ ကမ်းလှမ်းမှုတွေကို စဉ်းစားနေပေမယ့် အနာဂတ်ကို မဆုံးဖြတ်ရသေးဘူးလို့ ESPN က ဖော်ပြထားပါတယ်။

ရီးရယ်လ်အသင်းဟာ ဘတ်ပီကို လာမယ့်နွေရာသီမှာ အလွတ် ပြောင်းရွှေ့ကြေးနဲ့ ခေါ်ယူဖို့ ကြိုးစားနေသလို ပီအက်စ်ဂျီအသင်းကတော့ စာချုပ်သစ်ချုပ်ပြီး အသင်းမှာဆက်ထိန်းဖို့ ပစ်မှတ်ထားနေတာပါ။ 

ရီးရယ်လ်အသင်းဟာ လာမယ့် ၂၀၂၄-၂၀၂၅ ရာသီသစ် အစီအစဉ်တွေကို ရေးဆွဲနိုင်ဖို့အတွက် လာမယ့် ရက်သတ္တပတ်တွေ အတွင်းမှာ တိကျတဲ့အဖြေတစ်ခုပေးဖို့ ဘတ်ပီကို တောင်းဆိုထားတာဖြစ်ပါတယ်။

ဒါပေမယ့် ဘတ်ပီဟာ သူ့ရဲ့ အနာဂတ်ကိုဆုံးဖြတ်ဖို့ နောက်ဆုံးရက်သတ်မှတ်ထားခြင်းမရှိသေးပါဘူး။

ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့စာချုပ်ဟာ အခုရာသီအကုန်မှာ ကုန်ဆုံးမှာဖြစ်လို့ ကစားသမားဟာ အခုအပြောင်းအရွှေ့မှာ ပြင်သစ်ပြင်ပ ကလပ်အသင်းတွေနဲ့ အပြောင်းအရွှေ့ဆွေးနွေးညှိနှိုင်းမှုတွေ ပြုလုပ်လို့ ရပြီဖြစ်ပါတယ်။ 

ပြင်သစ်တိုက်စစ်မှူး ဘတ်ပီ

ရီးရယ်လ်အသင်းဟာ သူတို့ရဲ့ ကာလရှည်ကြာ ပစ်မှတ်ဖြစ်တဲ့ ဘတ်ပီကို လုပ်ခလစာအများကြီးပေးပြီး ကမ်းလှမ်းဖို့အထိ ရှိနေတယ်လို့ သတင်းရင်းမြစ်တွေက ဖော်ပြထားတာပါ။ 

ဘတ်ပီဟာ လက်ရှိ ပီအက်စ်ဂျီအသင်းမှာ တစ်ရာသီ ယူရို ၃၇ သန်း ရရှိနေပြီး ပြင်သစ်ကလပ်ဟာ ဒီလိုတူညီတဲ့လစာနဲ့ စာချုပ်သစ်ကမ်းလှမ်းထားတာဖြစ်ပါတယ်။

ဘတ်ပီကို ခေါ်ယူဖို့ လီဗာပူးလ်အသင်းကလည်း စိတ်ဝင်စားနေပြီး ကစားသမားကတော့ ပရီးမီးယားလိဂ်ကို ပြောင်းရွှေ့ဖို့ ငြင်းဆန်ထားခြင်းမရှိတာပါ။ 

ရီးရယ်လ်အသင်းရဲ့ ကစားသမားအချို့ကတော့ ဘတ်ပီဟာ အသင်းထံကို လာရောက်မယ်လို့ အကောင်းမြင်နေ ပေမယ့် ၂၀၂၂ ခုနှစ် ကလိုမျိုး ပီအက်စ်ဂျီအသင်းနဲ့ စာချုပ်သက်တမ်းတိုးသွားနိုင်လို့ ထင်မြင်မှုတွေလည်း ရှိနေပါတယ်။ 

ဘတ်ပီဟာ အခုရာသီအစပိုင်းမှာ ပီအက်စ်ဂျီအသင်းနဲ့ အဆင်မပြေမှုတွေရှိခဲ့ပေမယ့် အခုအချိန်မှာတော့ အကောင်းဆုံးပုံစံကို ပြသနေတာပါ။

အသက် ၂၅ နှစ်အရွယ်ရှိ ဘတ်ပီဟာ ဒီရာသီမှာ ပီအက်စ်ဂျီအသင်းအတွက် ၂၆ ပွဲ ပါဝင်ကစားထားပြီး ၂၈ ဂိုးသွင်းယူကာ အသင်းကို လီဂူးဝမ်းပြိုင်ပွဲ ထိပ်ဆုံးနေရာရပ်တည်နိုင်အောင် ဦးဆောင်ပေးထားတာဖြစ်ပါတယ်။

Source:ESPN

CNI Sport News

၂၀၂၄ ခုနှစ်၊ ဇန်နဝါရီ ၂၆

တိုက်စစ်မှူး ဟာလန်းဟာ စပါးအသင်းနဲ့ ကစားမယ့် FA ဖလား စတုတ္တအဆင့်ပွဲစဉ်မှာ မန်စီးတီးအသင်းအတွက် ပါဝင်နိုင်မှာမဟုတ်ဘူးလို့ နည်းပြ ဂွာဒီယိုလာက အတည်ပြုခဲ့ပါတယ်။

ဂွာဒီယိုလာက “ဟာလန်းပြန်ပါဝင်နိုင်ဖို့နီးစပ်နေပါပြီ။ စပါးနဲ့ပွဲမှာတော့ သူပါဝင်နိုင်ဖို့အဆင်သင့်မဖြစ်သေး ပေမယ့် နီးစပ်နေပြီလို့ပြောရမှာပါ။ စခန်းသွင်းလေ့ကျင့်တာကောင်းမွန်ခဲ့သလို ပြီးခဲ့တဲ့ ၂ ရက်ကလည်း သူဟာ လေ့ကျင့်ခန်း အစီအစဉ်အချို့ကို ပြုလုပ်ခဲ့ပါတယ်။ ဒါပေမယ့် သူဟာ ပြီးပြည့်စုံခြင်းမရှိသေးတဲ့အတွက် ကျနော်တို့ အနည်းငယ် စောင့်ဆိုင်းရဦးမှာပါ”လို့ ပြောခဲ့တာပါ။

ဟာလန်းဟာ အက်စတွန်ဗီလာအသင်းကို အရေးနိမ့်ခဲ့တဲ့ ပရီးမီးယားလိဂ်ပွဲစဉ်မှာ ခြေထောက်ဒဏ်ရာရရှိပြီး ကတည်းက မန်စီးတီးအသင်းနောက်ဆုံးကစားခဲ့တဲ့ ပြိုင်ပွဲစုံ ၉ ပွဲစလုံးမှာ မပါဝင်နိုင်ခဲ့ပါဘူး။ 

ဒါပေမယ့် ဟာလန်းဟာ ပြီးခဲ့တဲ့ရက်ပိုင်းက မန်စီးတီးအသင်းဖော်တွေနဲ့ လေ့ကျင့်မှုတွေ ပြန်လည်ပြုလုပ်နိုင်ခဲ့ ပေမယ့် စပါးအသင်းနဲ့ပွဲမှာ ပါဝင်ဖို့အတွက် အဆင်သင့်မဖြစ်သေးတာပါ။ 

တိုက်စစ်မှူး ဟာလန်း

မန်စီးတီးအသင်းကတော့ ဇန်နဝါရီ ၃၁ ရက်မှာ ကစားမယ့် ဘန်လေအသင်းနဲ့ ပွဲမှာ ဟာလန်း ကြံ့ခိုင်မှုအပြည့်နဲ့ ပါဝင်နိုင်ဖို့ မျှော်လင့်နေတာဖြစ်ပါတယ်။

မန်စီးတီးအသင်းဟာ စပါးအသင်းအိမ်ကွင်းမှာကစားခဲ့တဲ့ နောက်ဆုံး ၅ ပွဲစလုံးဂိုးမသွင်းနိုင်ခဲ့ဘဲ အရေးနိမ့်ခဲ့တာ ကြောင့် ဒီမှတ်တမ်းဆိုးကြီးကို ချိုးဖျက်သွားမယ်လို့ ဂွာဒီယိုလာက ထပ်ပြီးပြောခဲ့တာပါ။

ဂွာဒီယိုလာက “စပါးအသင်းရဲ့ အိမ်ကွင်းဟာ ကျနော်တို့အတွက် ဘယ်လောက်ခက်ခဲနေလဲဆိုတာကို ပြသနေပါတယ်။ ဒီပွဲက ရှုံးထွက်ဖြစ်တဲ့အတွက် နောက်တစ်ဆင့်တက်ချင်ရင် ဂိုးတွေသွင်းယူရပါမယ်။ ကျနော်တို့အတွက်တော့ ဒါကိုချိုးဖျက်နိုင်ဖို့ အခွင့်အရေးသစ်တစ်ခုပါပဲ”လို့ ပြောခဲ့ပါတယ်။

စပါးအသင်းနဲ့ပွဲမှာ နောက်ခံလူ ဂျွန်စတုန်းစ်နဲ့ ဂိုးသမား အီဒါဆန်တို့ ပါဝင်နိုင်မှာဖြစ်ပေမယ့် နောက်ခံလူ အကန်ဂျီက ဒဏ်ရာကြောင့်လွဲချော်မယ်လို့ ဂွာဒီယိုလာက ပြောထားတာဖြစ်ပါတယ်။

Source:Besoccer

CNI Sport News

၂၀၂၄ ခုနှစ်၊ ဇန်နဝါရီ ၂၅

အာဂျင်တီးနားအသင်းခေါင်းဆောင် မက်ဆီဟာ Last Dance ပွဲစဉ်အတွက် အဆင်သင့်ဖြစ်နေပြီး အင်တာမိုင်ယာမီ အသင်းရဲ့ အာရှခရီးစဉ် လူစာရင်းမှာ ပါဝင်လာခဲ့ပေမယ့် ရော်နယ်ဒိုကတော့ ဒဏ်ရာကြောင့် ပါဝင်ဖို့ မသေချာဘူးဖြစ်နေတယ်လို့ Goal က ဖော်ပြထားပါတယ်။

မက်ဆီဟာ ၂၀၂၄ မေဂျာလိဂ်ပြိုင်ပွဲရာသီသစ်မစတင်ခင်ပြင်ဆင်နေတဲ့ အင်တာမိုင်ယာမီအသင်းနဲ့ လေ့ကျင့်မှုတွေ ပြုလုပ်နေပြီး ခြေစမ်းပွဲတွေမှာ စတင်ပါဝင်ကစားနေပြီဖြစ်တာပါ။ 

အင်တာမိုင်ယာမီအသင်းဟာ အယ်လ်ဆာဗေးဒိုး၊ ဒါလက်စ်အသင်းတို့နဲ့ ခြေစမ်းပွဲကစားထားပြီး ၁ ပွဲသရေ ၁ ပွဲရှုံး ရလဒ်ထွက်ပေါ်ထားကာ သွင်းဂိုးတော့ ရယူနိုင်ခြင်းမရှိသေးပါဘူး။ 

အင်တာမိုင်ယာမိုင်ယာမီအသင်းဟာ နောက်ထပ်ခြေစမ်းပွဲအဖြစ် ဆော်ဒီမှာကစားမယ့် ရီယက်ဒ်ဖလား ပွဲစဉ်အတွက် မိုင်ယာမီကနေ ထွက်ခွာလာခဲ့ပြီဖြစ်ပါတယ်။

အင်တာမိုင်ယာမီအသင်းဟာ ဇန်နဝါရီ ၂၉ ရက်မှာ အယ်လ်ဟီလယ်အသင်းနဲ့ ကစားမှာဖြစ်ပြီး ဖေဖော်ဝါရီ ၁ ရက်မှာ ရော်နယ်ဒိုရဲ့ အယ်လ်နာဆာအသင်းနဲ့ ယှဉ်ပြိုင်ဖို့ စီစဉ်ထားတာပါ။ 

ဒီပြိုင်ပွဲမှာ ပြိုင်ဘက်ကြီး ၂ ဦးဖြစ်တဲ့ ရော်နယ်ဒိုနဲ့ မက်ဆီတို့ နောက်ဆုံးထိပ်တိုက် တွေ့ဆုံမယ့်ပွဲ ဖြစ်လာနိုင် တယ်ဆိုပြီး Last Dance လို့ သတ်မှတ်ထားတာဖြစ်ပါတယ်။ 

မက်ဆီအားတွေ့ရစဉ်

အင်တာမိုင်ယာမီအသင်းဟာ ဆော်ဒီကို ထွက်ခွာလာတဲ့ သူတို့ရဲ့ လူစာရင်းမှာ မက်ဆီ၊ ဆွာရက်ဇ်၊ ဘတ်စ်ကွက်စ်နဲ့ အယ်လ်ဘာတို့အပါအဝင် အဓိက ကစားသမားတွေကို ခေါ်ဆောင်လာခဲ့တာပါ။

ဒါပေမယ့် ပေါ်တူဂီအသင်းခေါင်းဆောင် ရော်နယ်ဒိုဟာ ဒဏ်ရာရရှိနေပြီး မကြာသေးခင်က သူ့ရဲ့ ဒဏ်ရာကြောင့် တရုတ်မှာခြေစမ်းပွဲကစားဖို့ စီစဉ်ထားတာကို အယ်လ်နာဆာအသင်းဟာ ရွှေ့ဆိုင်းခဲ့ပါတယ်။ 

ရော်နယ်ဒိုဟာ ဒဏ်ရာကြောင့် အနားယူရဦးမယ်ဆိုရင် မက်ဆီနဲ့ တွေ့ဆုံရမယ့်ပွဲစဉ်ကို လွဲချော်တော့မှာပါ။

ဒါပေမယ့် ရော်နယ်ဒိုရဲ့ ဒဏ်ရာအတိအကျကို မသိရသေးတာကြောင့် ပရိသတ်တွေက ရော်နယ်ဒိုနဲ့ မက်ဆီရဲ့ ပွဲစဉ်ကို ထပ်ပြီးကြည့်ရဖို့ မျှော်လင့်နေတာဖြစ်ပါတယ်။

အင်တာမိုင်ယာမီအသင်းဟာ ဒီပွဲတွေပြီးရင် ဟောင်ကောင်နဲ့ ဂျပန်ကိုထွက်ခွာကာ ခြေစမ်းပွဲတွေထပ်ပြီး ယှဉ်ပြိုင်သွားဖို့ ရှိနေတာပါ။ 

ရာသီသစ်မေဂျာလိဂ်ပြိုင်ပွဲကို ဖေဖော်ဝါရီ ၂၁ ရက်မှာ စတင်ကျင်းပသွားမှာဖြစ်ပြီး အင်တာမိုင်ယာမီအသင်းဟာ အဖွင့်ပွဲစဉ်အဖြစ် ရီးရယ်လ်ဆော့လိခ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၄ ခုနှစ်၊ ဇန်နဝါရီ ၂၅

ရီးရယ်လ်အသင်းဟာ မန်စီးတီးအသင်းကို ကျော်ဖြတ်ပြီး ဘောလုံးလောကရဲ့ဝင်ငွေ အများဆုံးအသင်း ဖြစ်လာတယ်လို့ Deloitte က ဖော်ပြထားပါတယ်။

ရီးရယ်လ်အသင်းဟာ ပြီးခဲ့တဲ့ ၂၀၂၂-၂၀၂၃ ရာသီမှာ စံချိန်တင်ဝင်ငွေ ယူရို ၈၃၁ သန်းရရှိခဲ့ပြီး Deloitte Money League စာရင်းရဲ့ ထိပ်ဆုံးနေရာမှာ ရပ်တည်နေတာပါ။ 

မန်စီးတီးအသင်းဟာ ပြီးခဲ့တဲ့ရာသီက ပရီးမီးယားလိဂ်၊ FA ဖလားနဲ့ ချန်ပီယံလိဂ်ဖလားတို့ကို ရယူနိုင်ခဲ့တာကြောင့် စံချိန်တင်ဝင်ငွေ ယူရို ၈၂၆ သန်းရရှိခဲ့ပေမယ့် ဒုတိယနေရာကို ရောက်ရှိသွားခဲ့တာဖြစ်ပါတယ်။ 

ဒီစာရင်းရဲ့ ထိပ်ဆုံး ကလပ်အသင်း ၂၀ ရဲ့ဝင်ငွေဟာ စံချိန်တင် ၁၄ ရာခိုင်နှုန်းအထိ မြင့်တက်လာခဲ့ပြီး ယူရို ၁၀.၅ ဘီလီယံအထိ ရှိလာခဲ့တာပါ။

ရီးရယ်လ်အသင်းဟာ ပြီးခဲ့တဲ့ရာသီက ချန်ပီယံလိဂ်ပြိုင်ပွဲမှာ မန်စီးတီးအသင်းကို ဆီမီးဖိုင်နယ်မှာ အရေးနိမ့်ခဲ့သလို စပိန်လာလီဂါပြိုင်ပွဲမှာ ဘာစီလိုနာအသင်းရဲ့ နောက် ဒုတိယနေရာမှာ ရပ်တည်ခဲ့တာဖြစ်ပါတယ်။ 

ရီးရယ်လ်အသင်းသမားများအား တွေ့ရစဉ်

ဒါပေမယ့် စပိန်ကိုပါဒယ်ရေး၊ ဖီဖာကလပ်ကမ္ဘာ့ဖလားနဲ့ ဥရောပစူပါဖလားတို့ကို ရယူနိုင်ခဲ့တာကြောင့် ၂၀၁၇-၁၈ ရာသီနောက်ပိုင်း ပထမဆုံးအကြိမ် Deloitte Money League ရဲ့ ထိပ်ဆုံးနေရာကို ရောက်ရှိခဲ့တာပါ။

ပီအက်စ်ဂျီအသင်းက ယူရို ၈၀၂ သန်းနဲ့ တတိယ၊ ဘာစီလိုနာအသင်းက ယူရိုသန်း ၈၀၀ နဲ့ စတုတ္ထ၊ ယူနိုက်တက်အသင်းက ယူရို ၇၄၆ သန်းနဲ့ ပဉ္စမနေရာတွေမှာ ရပ်တည်ခဲ့တာဖြစ်ပါတယ်။ 

လီဗာပူးလ်အသင်းဟာ ပြီးခဲ့တဲ့ရာသီက ဆုဖလားအောင်မြင်မှုတွေနဲ့ ဝေးကွာခဲ့တာကြောင့် ယူရို ၆၈၃ သန်းနဲ့ တတိယနေရာကနေ သတ္တမနေရာအထိ ကျဆင်းသွားခဲ့တာပါ။ 

Deloitte Money League စာရင်း

ပရီးမီးယားလိဂ် ကလပ်တွေဖြစ်တဲ့ စပါး၊ ချယ်လ်ဆီး၊ အာဆင်နယ်အသင်းတို့ဟာ ထိပ်ဆုံး ၁၀ သင်းစာရင်းဝင်ခဲ့ပြီး နယူးကာဆယ်၊ ဝက်စ်ဟမ်းနဲ့ စပါးအသင်းတို့က ထိပ်ဆုံးအသင်း ၂၀ စာရင်းထဲဝင်ခဲ့တယ်လို့ သိရပါတယ်။

လက်စတာ၊ လိဒ်စ်နဲ့ အဲဗာတန်အသင်းတို့ဟာ ထိပ်ဆုံးအသင်း ၂၀ ပြင်ပကို ရောက်ရှိသွားခဲ့ပြီး ဝက်စ်ဟမ်း၊ လီဗာပူးလ်နဲ့ အသလက်တီကို အသင်းတို့ဟာ ထိပ်ဆုံးအသင်း ၂၀ ထဲမှာဝင်ငွေအများအပြားလျှော့ကျသွားတဲ့ အသင်းအဖြစ်ရှိခဲ့တယ်လို့ Deloitte Money League ရဲ့ အချက်အလက်တွေမှာ ဖော်ပြထားတာဖြစ်ပါတယ်။

Source:BBC

CNI Sport News

၂၀၂၄ ခုနှစ်၊ ဇန်နဝါရီ ၂၅

ဘာစီလိုနာအသင်းဟာ ဘီလ်ဘာအိုအသင်းကို အချိန်ပိုမှာ အရေးနိမ့်ပြီး ကိုပါဒယ်ရေးဖလားပြိုင်ပွဲ ကွာတားဖိုင် နယ် အဆင့်ကနေ ထွက်ခွာခဲ့ရပါတယ်။

ဒီပွဲရဲ့ မိနစ် ၉၀ အတွင်းမှာ ၂ ဂိုးစီ သရေကျခဲ့တာကြောင့် အချိန်ပိုဆက်ကစားခဲ့တာမှာ ဘီလ်ဘာအိုအသင်းက ၄ ဂိုး-၂ ဂိုးနဲ့ အနိုင်ရပြီး ဆီမီးဖိုင်နယ်အဆင့်ကို တက်နိုင်ခဲ့တာပါ။ 

ဘာစီလိုနာအသင်းဟာ ဒီပွဲမှာ ဘီလ်ဘာအိုအသင်းကို ဘောလုံးပိုင်ဆိုင်မှုသာ အသာစီးရယူနိုင်ခဲ့တာဖြစ်ပြီး ဂိုးပေါက် ကန်သွင်းမှုနဲ့ ဂိုးပေါက်တည့်မှု အပိုင်းတွေမှာ ဘီလ်ဘာအိုအသင်းက အပြတ်အသာရခဲ့တာ ဖြစ်ပါတယ်။ 

ဘာစီလိုနာအသင်းဟာ မကြာသေးခင်ကလည်း စပိန်စူပါဖလားဗိုလ်လုပွဲမှာ ရီးရယ်လ်အသင်းကို အရေးနိမ့်ခဲ့ပြီး စပိန်လာလီဂါပြိုင်ပွဲမှာလည်း ထိပ်ဆုံးနေရာကအသင်းနဲ့ ၈ မှတ်ကွာဟနေတာပါ။

အဲ့ဒါကြောင့် ဘာစီလိုနာအသင်း အတွက်တော့ ဒီရာသီမှာ ရယူနိုင်စရာ ဆုဖလားအဖြစ် ချန်ပီယံလိဂ်ဖလားသာ ရှိတော့တာ ဖြစ်ပါတယ်။ 

 ဘာစီလိုနာနည်းပြ ဇာဗီကိုတွေ့ရစဉ်

ဘာစီလိုနာအသင်းဟာ ချန်ပီယံလိဂ် ၁၆ သင်းအဆင့်မှာ နာပိုလီအသင်းနဲ့ ယှဉ်ပြိုင်ရမှာပါ။ ဘာစီလိုနာအသင်းဟာ ကိုပါဒယ်ရေးဖလားပြိုင်ပွဲကနေ ထွက်ခွာခဲ့ရပေမယ့် အသင်းဟာ တောက်ပတဲ့အနာဂတ်ကို ပိုင်ဆိုင်ထားတယ်လို့ နည်းပြဇာဗီက ပွဲအပြီးမှာ ပြောခဲ့ပါတယ်။

ဇာဗီက “ကလပ်အသင်းကြီးတွေမှာရှိတဲ့ နည်းပြတွေအားလုံးက ဆုဖလားတွေအပေါ်မှာ မူတည်ပါတယ်။ ဒါပေ မယ့် ကျနော်တို့ဟာ လူငယ်တွေကို အသုံးပြုပြီး အသင်းကောင်းတစ်သင်းနဲ့ ယှဉ်ပြိုင်နိုင်ခဲ့တဲ့အတွက် ဂုဏ်ယူ ပါတယ်။ ကျနော်တို့ဟာ ကလေးတွေကို အသုံးပြုပြီး ကစားနေတာပါ။ ကျနော်ဒီမှာ ရှိရှိ၊ မရှိရှိ ဘာစီလိုနာအသင်း မှာ ကြီးမားတဲ့ အနာဂတ်ရှိပါတယ်။ ကျနော်တို့ဟာ အလွန်ကောင်းမွန်တဲ့ မျိုးဆက်သစ်တွေကို ပိုင်ဆိုင်ထားပေ မယ့် အလုပ်ကြိုးစားပြီး အနိုင်ရဖို့လိုပါတယ်”လို့ ပြောခဲ့တာပါ။

ဒီပွဲမှာ ဘာစီလိုနာအသင်းအတွက် ဂိုးသွင်းယူနိုင်ခဲ့တဲ့ အသက် ၁၆ နှစ်အရွယ်ရှိ ယာမဲလ်ဟာ ကိုပါဒယ်ရေးဖလား ပြိုင်ပွဲရဲ့ အသက်အငယ်ဆုံး ဂိုးသွင်းရှင်အဖြစ် မှတ်တမ်းဝင်ခဲ့ပါတယ်။ 

ဒါပေမယ့် ယာမဲလ်ဟာ ဘာစီလိုနာအသင်း ဂိုးရနိုင်မယ့် အခွင့်အရေး ၂ ကြိမ်ကို လွဲချော်ခဲ့တာကြောင့် သူ့အတွက် စိတ်ပျက်စရာဖြစ်ခဲ့ပေမယ့် နည်းပြ ဇာဗီကတော့ ဆယ်ကျော်သက် ကစားသမားကို အပြစ်တင်သွားမှာ မဟုတ်ဘူးလို့ ပြောခဲ့တာပါ။

ဘာစီလိုနာအသင်းဟာ ဇန်နဝါရီ ၂၇ ရက်မှာ စပိန်လာလီဂါပွဲစဉ်အဖြစ် ဗီလာရီးရယ်လ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇန်နဝါရီ ၂၅

ဖူလ်ဟမ်အသင်းကို နှစ်ကျော့ပေါင်းရလဒ်နဲ့ အနိုင်ရပြီး ကာရာဘောင်းလိဂ်ဖလား ဗိုလ်လုပွဲ တက်နိုင်ခဲ့ပြီးနောက် နည်းပြ ကလောပ့်က လီဗာပူးလ်အသင်းရဲ့ ပြီးပြည့်စုံတဲ့ ကာရာဘောင်းခရီးစဉ်ကို ချီးကျူးမှုပြုလုပ်ခဲ့ပါတယ်။

ကလော့ပ်က “ကာရာဘောင်းလိဂ်ဖလား ဗိုလ်လုပွဲနဲ့ ပတ်သက်တဲ့ အရာအားလုံးက ကောင်းပါတယ်။ ကျနော်တို့ ဟာ ဒီပြိုင်ပွဲအပြင် တခြားပြိုင်ပွဲတွေ အားလုံးကိုလည်း အာရုံစိုက်သွားမှာပါ။ ဗိုလ်လုပွဲတက်နိုင်တာဟာ ကျနော်တို့ အတွက် ပြီးပြည့်စုံခဲ့ပါတယ်။ ဝင်ဘာလေဟာ ထူးခြားကောင်းမွန်တဲ့နေရာဖြစ်ပြီး ဒီမှာပါဝင်တဲ့သူတိုင်းဟာ ဒီ အတွေ့အကြုံကို ထပ်ပြီးရမှာဖြစ်တဲ့အတွက် ကျနော်အလွန်ပျော်ရွှင်ပါတယ်”လို့ ပြောခဲ့ပါတယ်။

လီဗာပူးလ်အသင်းဟာ ကာရာဘောင်းလိဂ်ဖလား ဆီမီးဖိုင်နယ်ဒုတိယအကျော့ ပွဲစဉ်အဖြစ် ဖူလ်ဟမ်အသင်းနဲ့ ကစားခဲ့တာမှာ ၁ ဂိုးစီ သရေကျခဲ့တာ ဖြစ်ပါတယ်။ 

ဒီပွဲမှာ လီဗာပူးလ်အသင်းအတွက် ဦးဆောင်ဂိုးကို လူးဝစ်ဒီယက်ဇ်က သွင်းယူခဲ့ပြီး ဒီအော့ပ်က ဖူလ်ဟမ်အသင်း အတွက် ချေပဂိုးသွင်းယူခဲ့တာပါ။

 ကလော့ပ်ကို တွေ့ရစဉ် 

ဆီမီးဖိုင်နယ် ပထမအကျော့အဖြစ် ကစားခဲ့တုန်းက လီဗာပူးလ်အသင်းက ဖူလ်ဟမ်အသင်းကို ၂ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။ အဲ့ဒါကြောင့် နှစ်ကျော့ပေါင်းရလဒ် ၃ ဂိုး-၂ ဂိုးနဲ့ လီဗာပူးလ်အသင်းအနိုင်ရပြီး ကာရာဘောင်းလိဂ်ဖလားဗိုလ်လုပွဲကို တက်နိုင်ခဲ့တာပါ။

လီဗာပူးလ်အသင်းဟာ ဗိုလ်လုပွဲအဖြစ် ဖေဖော်ဝါရီ ၂၅ ရက်မှာ ချယ်လ်ဆီးအသင်းနဲ့ ယှဉ်ပြိုင်ရမှာ ဖြစ်ပါတယ်။ 

လီဗာပူးလ်နဲ့ ချယ်လ်ဆီးအသင်းတို့ဟာ နောက်ဆုံး ၂ နှစ်အတွင်း ၃ ကြိမ်မြောက် ပြည်တွင်းဖလားဗိုလ်လုပွဲကို ယှဉ်ပြိုင်ရမှာဖြစ်ပြီး အရင် ၂ ကြိမ်စလုံးမှာ လီဗာပူးလ်အသင်းက ပင်နယ်တီအဆုံးအဖြတ်နဲ့ အနိုင်ရရှိခဲ့တာပါ။  

လီဗာပူးလ်အသင်းဟာ ကာရာဘောင်းလိဂ်ဖလားပြိုင်ပွဲမှာ ချန်ပီယံဆုကို ၉ ကြိမ်ရရှိထားပြီး အအောင်မြင်ဆုံး အသင်းအဖြစ် ရပ်တည်နေတာ ဖြစ်ပါတယ်။

အန်ဖီးလ်ကလပ်ဟာ ဒီရာသီမှာ ရလဒ်ကောင်းတွေ ရရှိနေပြီး ဆုဖလား ၄ လုံး စလုံးရယူနိုင်ဖို့ ပစ်မှတ်ထားနေ တာပါ။ 

လီဗာပူးလ်အသင်းဟာ ဇန်နဝါရီ ၂၈ ရက်မှာ FA ဖလားစတုတ္တအဆင့်ပွဲစဉ်အဖြစ် နော်ဝစ်ချ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၄ ခုနှစ်၊ ဇန်နဝါရီ ၂၄

စူပါအေးဂျင့်ဂျောချ်မန်ဒက်စ်က ဘာစီလိုနာအသင်းဟာ အငှားနဲ့ ခေါ်ယူထားတဲ့ နောက်ခံလူ ကန်ဆယ်လိုနဲ့ တိုက်စစ်မှူး ဂျာအိုဖီးလစ်တို့ကို အပြီးသတ်ခေါ်ယူမယ်လို့ ပြောလိုက်ပါတယ်။

ဂျော့ချ်မန်ဒက်စ်က “ဘာစီလိုနာအသင်းဟာ ကန်ဆယ်လိုနဲ့ ဂျာအိုဖီးလစ်တို့ကို အပြီးသတ်ခေါ်ယူဖို့ စီစဉ် ထားပါတယ်။ ဒီနွေရာသီကို ကျော်လွန်ပြီး သူတို့နဲ့ ဆက်သွားဖို့ ဘာစီလိုနာအသင်းစီစဉ်နေတယ်” လို့ Record ရဲ့မေးမြန်းမှုကို ဖြေဆိုခဲ့တာပါ။

ဘာစီလိုနာအသင်းဟာ ပြီးခဲ့တဲ့နွေရာသီအပြောင်းအရွှေ့နောက်ဆုံးနေ့မှာ ပေါ်တူဂီကစားသမား ၂ ဦးကို အခု ရာသီအကုန်ထိ အငှားစာချုပ်နဲ့ ခေါ်ယူနိုင်ခဲ့တာဖြစ်ပါတယ်။ ဒီအပြောင်းအရွှေ့ပြီးကတည်းက ကန်ဆယ်လိုနဲ့ ဂျာအိုဖီးလစ်တို့ဟာ လာမယ့်ရာသီ ဘာစီလိုနာအသင်းမှာ ဆက်ရှိဖို့ရှိ၊မရှိဆိုပြီး ထင်ကြေးပေးမှုတွေ အများကြီး ရှိခဲ့တာပါ။ သူတို့နှစ်ဦးစလုံးဟာ မန်စီးတီးနဲ့ အသလက်တီကိုအသင်းထံ ပြန်မသွားချင်တာကြောင့် ဘာစီလိုနာ အသင်းထံ အပြီးသတ်ပြောင်းရွှေ့ချင်နေတာဖြစ်ပါတယ်။

အဲဒါကြောင့် သူတို့နှစ်ဦးရဲ့ အေးဂျင့်အဖြစ်ဆောင်ရွက်နေတဲ့ ဂျော့ချ်မန်ဒက်စ်ဟာ ဒီကစားသမားတွေရဲ့ ဘာစီလိုနာအသင်း အနာဂတ်နဲ့ပတ်သက်ပြီး မေးမြန်းခံခဲ့ရတာပါ။ ဘာစီလိုနာအသင်းအကြီးအကဲ လာပေါ်တာ ကိုယ်တိုင်က ဒီကစားသမားနှစ်ဦးစလုံးကို အပြီးသတ်ခေါ်ယူနိုင်ဖို့ ကြိုးစားသွားမယ်လို့ ပြောထားပါတယ်။ ဒါပေမယ့် ဘာစီလိုနာအသင်းဟာ ဘဏ္ဍာရေးအခက်အခဲကြုံတွေ့နေရတာကြောင့် မန်စီးတီးနဲ့ အသလက်တီကို အသင်းတို့တောင်းဆိုတဲ့ ပြောင်းရွှေ့ကြေးကို ပေးချေနိုင်ဖွယ်ရှိမလားဆိုတာ စောင့်ကြည့်ရမှာပါ။

ကန်ဆယ်လိုဟာ ဒီရာသီမှာ ဘာစီလိုနာအသင်းအတွက် ၂၂ ပွဲပါဝင်ကစားထားပြီး ၃ ဂိုးသွင်းယူထားကာ ဂျာအို ဂျာအိုဖီးလစ်ဖီးလစ်က ၂၆ ပွဲကစားထားပြီး ၇ ဂိုးသွင်းယူထားတာဖြစ်ပါတယ်။

Source:Goal