CNI Sport News

၂၀၂၄ ခုနှစ်၊ နိုဝင်ဘာ ၁၄

ဘာစီလိုနာအသင်း အားကစားဒါရိုက်တာ ဒေကိုက ကွင်းလယ်လူ ပက်ဒရီဟာ အသင်းနဲ့ စာချုပ်သစ်ချုပ်ပြီး နူးကမ့်မှာ အမွေအနှစ်တစ်ခု ဖန်တီးနိုင်မယ်ဆိုတာ ယုံကြည်တယ်လို့ ပြောခဲ့ပါတယ်။ 

ဒေကိုက “ပက်ဒရီဟာ ဘာစီလိုနာအသင်းမှာ သမိုင်းမှတ်တမ်း ဝင်ချင်တဲ့သူဖြစ်တဲ့အတွက် စာချုပ်သစ်ချုပ်ဆိုမှုက ဖြစ်လာမယ်လို့ ထင်ပါတယ်။ သူဟာ ဒီမှာ သက်တောင့်သက်သာ ခံစားနေရပြီး ပျော်ရွှင်နေသလို ဆုဖလားတွေ လည်း ရယူချင်ပါတယ်။ ပက်ဒရီဟာ ဒဏ်ရာတွေ အများကြီး ခံစားခဲ့ရတာကြောင့် အလုပ်ကိုကြိုးကြိုးစားစား လုပ်ခဲ့ရပြီး အခုအချိန်မှာ အကောင်းဆုံးပုံစံနဲ့ သူပြန်လာနေပါပြီ”လို့ Mundo Deportivo နဲ့ အင်တာဗျူးမှာ ပြောခဲ့တာပါ။ 

ဘာစီလိုနာအသင်းဟာ သူတို့ရဲ့ လူငယ်ကြယ်ပွင့် ကစားသမားတွေကို သက်တမ်းတိုး စာချုပ်ချုပ်ဆိုပြီး အသင်းမှာ ဆက်ထိန်းသိမ်းနိုင်ဖို့ လုပ်ဆောင်နေတာ ဖြစ်ပါတယ်။ 

ဒီကြယ်ပွင့် ကစားသမားတွေထဲက တစ်ဦးဖြစ်တဲ့ ပက်ဒရီကိုလည်း အသင်းမှာ ကာလကြာရှည်ရှိမယ့် စာချုပ်သစ် ချုပ်ဆိုနိုင်မယ်လို့ အားကစားဒါရိုက်တာ ဒေကိုက ယုံကြည်မှုရှိနေတာပါ။ 

အသက် ၂၁ နှစ်အရွယ်ရှိ ပက်ဒရီဟာ ပြီးခဲ့တဲ့ရာသီက ဒဏ်ရာတွေနဲ့ ရုန်းကန်ခဲ့ရပြီး ကလပ်နဲ့ နိုင်ငံအသင်းအတွက် ၂၅ ပွဲလွဲချော်ခဲ့ပါတယ်။ 

ပက်ဒရီကို တွေ့ရစဉ်

ဒါပေမယ့် ပက်ဒရီဟာ နည်းပြသစ် ဟန်ဆီဖလစ်လက်ထက်မှာ သူ့ရဲ့ဆိုးရွားတဲ့ ဒဏ်ရာမှတ်တမ်းတွေကို ဖယ်ရှား နိုင်ခဲ့ပြီး အသင်းအတွက် ခြေစွမ်းပြသနေတာပါ။ 

ပက်ဒရီနဲ့ ဘာစီလိုနာအသင်းတို့ ချုပ်ဆိုထားတဲ့ စာချုပ်ဟာ ၂၀၂၆ နွေရာသီမှ ကုန်ဆုံးမှာဖြစ်ပေမယ့် အသင်း ဘက်က သူ့ကို အမြန်ဆုံး စာချုပ်သစ် ချုပ်ချင်နေတာ ဖြစ်ပါတယ်။

ပက်ဒရီဟာ ဒီရာသီမှာ ဘာစီလိုနာအသင်းအတွက် ၁၇ ပွဲ ပါဝင်ကစားထားပြီး ၃ ဂိုးသွင်းယူကာ ဂိုးဖန်တီးမှု ၂ ကြိမ် ပြုလုပ်ထားတာပါ။ 

ပက်ဒရီဟာ လက်ရှိအချိန်မှာ နေးရှင်းလိဂ်ပွဲတွေကစားဖို့ စပိန်အသင်းနဲ့ ပူးပေါင်းပြီး လေ့ကျင့်ပြင်ဆင်မှုတွေ ပြုလုပ်နေပါတယ်။ 

စပိန်အသင်းဟာ နေးရှင်းလိဂ် အုပ်စုနောက်ဆုံးပွဲတွေအဖြစ် ဒိန်းမတ်၊ ဆွစ်ဇာလန်အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ နိုဝင်ဘာ ၁၄

နာမည်ကြီး ဘောလုံးသမားဟောင်း ဒီယေဂိုဖော်လန်ဟာ ပရော်ဖက်ရှင်နယ်တင်းနစ်ပွဲဦးထွက်အဖြစ် ကစားခဲ့တဲ့ ဥရုဂွေးအိုးပန်းနှစ်ယောက်တွဲပွဲစဉ်မှာ ရှုံးပွဲကြုံတွေ့ခဲ့တာဖြစ်ပါတယ်။

အသက် ၄၅ နှစ်အရွယ်ရှိ ဒီယေဂိုဖော်လန်ဟာ ကော်ရီယာနဲ့ တွဲဖက်ပြီး နှစ်ယောက်တွဲ ပြိုင်ပွဲဝင်ရောက် ယှဉ်ပြိုင် ခဲ့တာမှာ အာဂျင်တီးနား အတွဲအဖက်ကို ၁-၆၊၂-၆ နဲ့ အရေးနိမ့်ပြီး ပထမအဆင့်ကနေ ထွက်ခွာခဲ့ရတာပါ။ 

ဒီယေဂိုဖော်လန်နဲ့ ကော်ရီယာတို့ဟာ ဒီပြိုင်ပွဲအတွက် ခြေစစ်ပွဲ မယှဉ်ပြိုင်ရဘဲ တိုက်ရိုက်ယှဉ်ပြိုင်ခွင့် ရရှိခဲ့တာ ဖြစ်ပါတယ်။ 

ယူနိုက်တက်၊ အသလက်တီကိုနဲ့ အင်တာမီလန်အသင်းတွေမှာ ကစားခဲ့တဲ့ ဒီယေဂိုဖော်လန်ဟာ ၂၀၁၉ ခုနှစ်မှာ ဘောလုံးသမားဘဝကနေ အနားယူခဲ့တာပါ။ 

ဥရုဂွေးကစားသမားဟောင်း ဒီယေဂိုဖော်လန်ဟာ ၂၀၁၀ ကမ္ဘာ့ဖလားပြိုင်ပွဲမှာ အကောင်းဆုံး ကစားသမားဆုကို ရရှိခဲ့သလို ဒီပြိုင်ပွဲရဲ့ ဂိုးသွင်း အများဆုံးဆုကို ပူးတွဲရရှိခဲ့ပါတယ်။ 

ဒီယေဂိုဖော်လန်ကို တွေ့ရစဉ်

ယူနိုက်တက်အသင်းနဲ့ ပရီးမီးယားလိဂ်၊ အသလက်တီကိုအသင်းနဲ့ ယူရိုပါလိဂ်ဖလား ရရှိခဲ့တဲ့ ဒီယေဂိုဖော်လန်ဟာ ဥရုဂွေးနိုင်ငံအသင်းကို ၂၀၁၁ ကိုပါအမေရိကဖလား ရရှိအောင်လည်း စွမ်းဆောင်ပေးနိုင်ခဲ့တာပါ။ 

ဒီယေဂိုဖော်လန်ဟာ ဘောလုံးသမားဘဝကနေ အနားယူပြီးနောက် ပီနဲရိုးလ်နဲ့ အတီနက်စ်အသင်းတို့ကို နည်းပြ အဖြစ် ကိုင်တွယ်ခဲ့တာဖြစ်ပါတယ်။ 

ဒီယေဂိုဖော်လန်ဟာ ပြီးခဲ့တဲ့ ၅ နှစ်အတွင်းမှာ အပျော်တမ်း မာစတာတင်းနစ်ပြိုင်ပွဲတွေမှာ ပါဝင်ယှဉ်ပြိုင်ခဲ့ပြီး အောင်မြင်မှုအချို့ ရယူနိုင်ခဲ့တာပါ။ 

အဲဒါကြောင့် ဒီယေဂိုဖော်လန်ဟာ ဥရုဂွေးနိုင်ငံရဲ့ အကြီးမားဆုံး ပရော်ဖက်ရှင်နယ် တင်းနစ်ပြိုင်ပွဲမှာ ပါဝင်ကစား ဖို့ ဖိတ်ခေါ်ခြင်းခံခဲ့ရတာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ နိုဝင်ဘာ ၁၄

ပေါ်တူဂီအသင်းခေါင်းဆောင် ရော်နယ်ဒိုက သူဟာ ကစားသမားဘဝ သွင်းဂိုး ၁,၀၀၀ ပြည့်နိုင်ဖို့ ရည်မှန်းထားဆဲ ဖြစ်ပေမယ့် ဒီမှတ်တိုင် ရောက်ရှိဖို့အတွက် သူ့မှာ အချိန်အလုံအလောက် မရှိတော့ဘူးဆိုတာ လက်ခံခဲ့ပါတယ်။ 

ရော်နယ်ဒိုက “ကျနော်ဟာ လက်ရှိအခိုက်အတန့်ကိုပဲ တွေးနိုင်ပြီး ရေရှည် မတွေးနိုင်တော့ပါဘူး။ သွင်းဂိုး ၁,၀၀၀ ရောက်ချင်တယ်လို့ လူသိရှင်ကြား ပြောခဲ့တာကိုလည်း ကျနော် မတွေးနိုင်တော့ပါဘူး။ ကျနော်ဟာ လက်ရှိအချိန် မှာ ဒီအခိုက်အတန့်တွေကိုပဲ ပျော်ရွှင်စွာ ဖြတ်သန်းပြီး လာမယ့်နှစ် အနည်းငယ်အတွင်းမှာ ကျနော့် ခြေထောက် တွေကပေးမယ့် တုန့်ပြန်မှုကို မြင်တွေ့ရမှာပါ။ ဂိုး ၁,၀၀၀ ပြည့်ရင်တော့ အလွန်ကောင်းမှာဖြစ်ပေမယ့် ဒီလိုမဖြစ်ခဲ့ ရင်လည်း ကျနော်ဟာ သမိုင်းတစ်လျှောက် ဂိုးအများဆုံးသွင်းယူတဲ့သူ ဖြစ်နေပြီးပါပြီ”လို့ ပြောခဲ့တာပါ။ 

ကလပ်တွေနဲ့ နိုင်ငံအသင်းအတွက် ဂိုးပေါင်း ၉၀၈ ဂိုး သွင်းယူထားတဲ့ ရော်နယ်ဒိုဟာ လာမယ့်နှစ် ဖေဖော်ဝါရီမှာ အသက် ၄၀ နှစ်ပြည့်ပြီ ဖြစ်ပါတယ်။ 

ရော်နယ်ဒိုဟာ လက်ရှိအချိန်ထိ အမြင့်ဆုံးအဆင့်မှာ ကစားနိုင်ကြောင်းကို ပြသထားပေမယ့် ကစားသမားဘဝ အဆုံးသတ်ဖို့က နီးစပ်လာပြီဖြစ်တာပါ။

ရော်နယ်ဒိုဟာ ပြီးခဲ့တဲ့ရက်ပိုင်းမှာ ပေါ်တူဂီဘောလုံးအဖွဲ့ချုပ်က ကစားသမားတွေကို ပေးအပ်တဲ့ အမြင့်ဆုံးဆုကို ရရှိခဲ့တာဖြစ်ပါတယ်။ 

ရော်နယ်ဒိုကို တွေ့ရစဉ်

ရော်နယ်ဒိုနဲ့ အယ်လ်နာဆာအသင်းတို့ ချုပ်ဆိုထားတဲ့ စာချုပ်ဟာ ၂၀၂၅ ခုနှစ်၊ ဇွန်လဆိုရင် ကုန်ဆုံးပြီဖြစ်ပေမယ့် ဆော်ဒီပရိုလိဂ်ကလပ်က သူ့ကို စာချုပ်သက်တမ်းတိုးနိုင်ဖို့ စီစဉ်နေတာပါ။ 

ပေါ်တူဂီအသင်းနဲ့ နေးရှင်းလိဂ်ပွဲတွေကစားဖို့ ပြင်ဆင်နေတဲ့ ရော်နယ်ဒိုဟာ ၂၀၂၆ ကမ္ဘာ့ဖလားပြိုင်ပွဲအထိ ကစား ဖို့ ရည်ရွယ်ထားတာ ဖြစ်ပါတယ်။

ရော်နယ်ဒိုဟာ ပေါ်တူဂီအသင်းအတွက် ၂၀၀၃ ခုနှစ်မှာ စတင်ပွဲထွက်ခဲ့ပြီး လက်ရှိအချိန်ထိ ၂၁၆ ပွဲပါဝင်ကစားကာ ၁၃၃ ဂိုးသွင်းယူထားတာပါ။ 

ရော်နယ်ဒိုက နိုင်ငံအသင်းအတွက် ကစားပေးရတာထက် ပိုကောင်းတဲ့ အရာဘာမှမရှိဘူးလို့ ပြောခဲ့ပြီး ပေါ်တူဂီကို ကိုယ်စားမပြုချင်တဲ့ ကစားသမားအချို့ကို စိတ်ပျက်မိတယ်လို့လည်း ပြောထားပါတယ်။ 

ပေါ်တူဂီအသင်းဟာ နေးရှင်းလိဂ် A အုပ်စု နောက်ဆုံးပွဲစဉ်တွေအဖြစ် နိုဝင်ဘာ ၁၅ ရက်မှာ ပိုလန်၊ ၁၈ ရက်မှာ ခရိုအေးရှားအသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ နိုဝင်ဘာ ၁၄

အင်္ဂလန်အသင်းခေါင်းဆောင် ဟာရီကိန်းက နိုင်ငံအသင်းလူစာရင်းကနေ ကစားသမားတွေ နုတ်ထွက်တဲ့အပေါ် စိတ်ပျက်နေပြီး ကလပ်အသင်းထက် နိုင်ငံအသင်းကို ဦးစားပေးသင့်တယ်လို့ ပြောခဲ့ပါတယ်။ 

ဟာရီကိန်းက “အင်္ဂလန်က ကလပ်အသင်းတွေရဲ့အရှေ့မှာရှိတာပါ။ ပရော်ဖက်ရှင်နယ် ဘောလုံးသမား တစ်ဦး အတွက်ဆိုရင် အင်္ဂလန်က အရေးအကြီးဆုံးအရာပါ။ အခုက ရာသီရဲ့ခက်ခဲတဲ့ ကာလတစ်ခုလို့ ကျနော်ထင်ပေ မယ့် ဒါက အနည်းငယ်အခွင့်ကောင်းယူတာ ဖြစ်နိုင်ပါတယ်။ ရိုးရိုးသားသားပြောရရင် ဒီလိုမျိုးလုပ်တာကို ကျနော် တကယ်မကြိုက်ပါဘူး။ ဘယ်လိုပဲဖြစ်ဖြစ် အင်္ဂလန်ကို ဦးစားပေးရမယ်လို့ထင်တယ်”လို့ ITV Sports ကို ပြောခဲ့ တာပါ။ 

အင်္ဂလန်အသင်းကို ယာယီနည်းပြ လီကာစလေနောက်ဆုံးကိုင်တွယ်မယ့် ပွဲတွေမတိုင်ခင်မှာ ကစားသမား ၉ ဦး ဟာ လူစာရင်းကနေ နုတ်ထွက်ခဲ့တာဖြစ်ပါတယ်။ 

အဲဗာတန်အသင်းနောက်ခံလူ ဘရန်ဝိတ်ဟာ အင်္ဂလန်အသင်း  လူစာရင်းကနေ နောက်ဆုံးနုတ်ထွက်ခဲ့တဲ့သူဖြစ်ပြီး သူမတိုင်ခင်က အာနိုးလ်၊ ပါလ်မာ၊ ဖိုဒန်၊ ဒီကလန်ရိုက်စ်၊ ဂရီလစ်ရှ်၊ဆာကာ၊ရမ်စဒေးလ်နဲ့ ကိုဝဲလ်တို့ နုတ်ထွက်ခဲ့တာပါ။ 

အဲဒါကြောင့် အင်္ဂလန်အသင်းခေါင်းဆောင် ဟာရီကိန်းက နိုင်ငံအသင်းကနေ ကစားသမားအများအပြား ထွက်ခွာမှုအပေါ် စိတ်ပျက်နေတာဖြစ်ပါတယ်။ 

အင်္ဂလန်အသင်းယာယီနည်းပြ လီကာစလေကတော့ ကစားသမားအများအပြားနုတ်ထွက်ခဲ့တာက လူစာရင်းမှာ ကျန်ရှိနေတဲ့ ကစားသမားတွေအတွက် အခွင့်အရေးဖြစ်ပြီး နိုဝင်ဘာဟာ အမြဲတမ်းစိန်ခေါ်မှုရှိတဲ့ နိုင်ငံတကာ ရက်သတ္တပတ်ဖြစ်တယ်လို့ ပြောထားပါတယ်။ 

အင်္ဂလန်အသင်းအတွက် နေးရှင်းလိဂ်အုပ်စုနောက်ဆုံး ၂ ပွဲ စလုံး ဟာ အရေးပါတဲ့ပွဲတွေဖြစ်ပြီး နိုင်ပွဲရယူနိုင်မှသာ လိဂ် B ကနေ လိဂ် A ထံ တန်းတက်နိုင်မှာပါ။ 

အင်္ဂလန်အသင်းဟာ နေးရှင်းလိဂ်အုပ်စုနောက်ဆုံးပွဲတွေအဖြစ် နိုဝင်ဘာ ၁၅ ရက်မှာ ဂရိ၊ ၁၇ ရက်မှာ အိုင်ယာလန် အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source:BBC

CNI Sport News

၂၀၂၄ ခုနှစ်၊ နိုဝင်ဘာ ၁၃

ဆန်းတို့စ်အသင်းဟာ ဘရာဇီးလ်စီးရီးဘီကနေ စီးရီးအေကို တန်းတက်ပြီးနောက် သူတို့ရဲ့ တိုက်စစ်မှူးဟောင်း နေမာကို ပြန်ခေါ်ယူဖို့ စိတ်ဝင်စားနေပါတယ်။ 

၂၀၂၃ ခုနှစ်ရာသီက သမိုင်းတစ်လျှောက် ပထမဆုံးအကြိမ် စီးရီးဘီထံ တန်းဆင်းခဲ့ရတဲ့ ဆန်းတို့စ်အသင်းဟာ တစ်ရာသီအကြာမှာ စီးရီးအေကို တန်းပြန်တက်နိုင်ခဲ့တာပါ။

ဆန်းတို့စ်အသင်းဟာ ကော်ရီတီဘာအသင်းကို ၂ ဂိုး-ဂိုးမရှိနဲ့ အနိုင်ရခဲ့တာကြောင့် စီးရီးဘီပြိုင်ပွဲပြီးဆုံးဖို့ ၂ ပွဲ အလိုမှာ တန်းပြန်တက်ဖို့ သေချာသွားခဲ့တာ ဖြစ်ပါတယ်။

ဆန်းတို့စ်အသင်းဟာ ဘရာဇီးလ်စီးရီးဘီပွဲစဉ် ၃၆ ပွဲ ကစားအပြီးမှာ ရမှတ် ၆၈ မှတ်ရရှိကာ တန်းတက်မယ့် ၄ နေရာထဲက ၁ နေရာကို ရရှိခဲ့တာပါ။ 

ဆန်းတို့စ်အသင်းအကြီးအကဲ မာဆယ်လိုတိုင်ဇီရာက နေမာနဲ့ အယ်လ်ဟီလယ်အသင်းတို့ရဲ့ အနာဂတ် ဆုံးဖြတ် ချက်ကို စောင့်ဆိုင်းနေတယ်လို့ သူတို့တန်းပြန်တက်ပြီးနောက်မှာ ပြောခဲ့ပါတယ်။ 

ဆန်းစ်တို့အသင်းကို တွေ့ရစဉ်

နေမာနဲ့ အယ်လ်ဟီလယ်အသင်းရဲ့ စာချုပ်ဟာ ဒီရာသီကုန်ရင် ကုန်ဆုံးမှာဖြစ်ပြီး ဆော်ဒီကလပ်ဟာ သူ့ရဲ့ စာချုပ်ကို ဇန်နဝါရီလမှာ ဖျက်သိမ်းဖို့ စဉ်းစားနေတယ်လို့ သတင်းတွေ ထွက်နေပါတယ်။ 

ဆန်းတို့စ်အသင်း လူငယ်စီမံကိန်းကနေ ထွက်ပေါ်လာခဲ့တဲ့ နေမာဟာ ၂၀၁၃ ခုနှစ်မှာ ဘာစီလိုနာအသင်းထံ ပြောင်းခဲ့တာပါ။ 

မာဆယ်လိုတိုင်ဇီရာက “ကျနော်တို့ဟာ နေမာနဲ့ပတ်သက်ပြီး ရှင်းလင်းတဲ့ ရည်ရွယ်ချက်ရှိပါတယ်။ ဒါကို နေမာရဲ့ ဖခင်နဲ့ သူ့ရဲ့အဖွဲ့တွေက သိပါတယ်။ သူတို့က ကျနော့်ကိုလည်း သိသလို ဆန်းတို့စ်အသင်း အကြောင်းကိုလည်း သိပါတယ်။ သူ့မှာ စာချုပ်ရှိနေတဲ့အတွက် ကျနော်တို့ စောင့်ဆိုင်းရမှာပါ”လို့ သတင်းထောက်တွေနဲ့ တွေ့ဆုံချိန် ပြောခဲ့ပါတယ်။ 

နေမာဟာ တစ်နှစ်ကြာ အနားယူခဲ့ရတဲ့ ဒူးအရွတ်(ACL)ဒဏ်ရာကနေ ပြန်သက်သာပြီးနောက် အယ်လ်ဟီလယ် အသင်းအတွက် ၂ ပွဲ ပါဝင်ကစားအပြီးမှာ နောက်ထပ်ဒဏ်ရာ ရရှိခဲ့တာကြောင့် ရက်သတ္တပတ်အနည်းငယ် ထပ်ပြီး အနားယူရဦးမှာ ဖြစ်ပါတယ်။ 

Source: ESPN

CNI Sport News

 ၂၀၂၄ ခုနှစ်၊ နိုဝင်ဘာ ၁၃

ဒူးအရွတ်(ACL)ဒဏ်ရာ ခွဲစိတ်မှု ခံယူထားရတဲ့ စပိန်ကွင်းလယ်လူ ရိုဒရီဟာ ဒီရာသီမကုန်ခင်မှာ မန်စီးတီးအသင်း အတွက် ပြန်ကစားပေးနိုင်ဖို့ ရည်မှန်းထားတယ်လို့ ပြောခဲ့ပါတယ်။ 

ရိုဒရီက “ကျနော်ဒီရာသီမှာ ကစားနိုင်ဖို့ စိတ်ထဲရှိနေပါတယ်။ အခုအချိန်မှာ ရာသီက ပိုရှည်ကြာပြီး ကလပ် ကမ္ဘာ့ဖလားပြိုင်ပွဲက ဇူလိုင် ၁၃ ရက်မှ အဆုံးသတ်မှာပါ။ ဒီရာသီမှာ ပြန်ကစားနိုင်ဖို့က စိန်ခေါ်မှုအဖြစ် ရှိနေပါ တယ်။ ကျနော်ဟာ စတင် လမ်းလျှောက်ပြီးပြီဖြစ်သလို ထင်ထားတာထက် ပိုပြီးကောင်းတယ်ဆိုတဲ့ ခံစားချက် ရရှိနေပါတယ်”လို့ COPE ကို ပြောခဲ့တာပါ။ 

ပြီးခဲ့တဲ့လကမှ ဘောလွန်းဒီအောဆုကို ရရှိခဲ့တဲ့ ရိုဒရီဟာ စက်တင်ဘာက အာဆင်နယ်အသင်းနဲ့ ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ ဒူးအရွတ်ဒဏ်ရာ ရရှိခဲ့တာဖြစ်ပါတယ်။

အဲဒါကြောင့် အာဆင်နယ်အသင်းနဲ့ ပွဲစဉ်ဟာ ဒီရာသီ မန်စီးတီးအသင်းအတွက် ရိုဒရီ နောက်ဆုံး ကစားခဲ့တဲ့ ပွဲစဉ်ဖြစ်နိုင်တယ်လို့ သုံးသပ်ထားကြတာပါ။ 

ဒါပေမယ့် ရိုဒရီကတော့ ရာသီမကုန်ခင်မှာ မန်စီးတီးအသင်းအတွက် ပြန်ကစားပေးနိုင်ဖို့ မျှော်လင့်နေတာ ဖြစ်ပါတယ်။ 

ရိုဒရီကို တွေ့ရစဉ်

မန်စီးတီးအသင်းဟာ ရိုဒရီ မပါဝင်နိုင်တဲ့ပွဲတွေမှာ ရလဒ်တွေဆိုးနေပြီး နောက်ဆုံးကစားခဲ့တဲ့ ၄ ပွဲစလုံး ရှုံးပွဲ ကြုံတွေ့ခဲ့တာပါ။ 

မန်စီးတီးအသင်းနည်းပြ ဂွာဒီယိုလာအတွက်လည်း သူ့ရဲ့နည်းပြဘဝမှာ ပထမဆုံးအကြိမ် ၄ ပွဲဆက်တိုက် ရှုံးပွဲ ကြုံတွေ့ခဲ့တာ ဖြစ်ပါတယ်။

မန်စီးတီးအသင်းဟာ ရှုံးပွဲတွေကြောင့် ကာရာဘောင်းဖလား ပြိုင်ပွဲကနေ ထွက်ခွာခဲ့ရသလို ပရီးမီးယားလိဂ် ပြိုင်ပွဲမှာ အဆင့် ၁ နေရာက လီဗာပူးလ်အသင်းနဲ့ ၅ မှတ် ကွာဟသွားခဲ့တာပါ။ 

ဂွာဒီယိုလာကတော့ ဒဏ်ရာရ ကစားသမားတွေ ပြန်ကောင်းလာချိန်မှာ သူတို့ရလဒ်ကောင်းတွေ ရယူနိုင်မယ်ဆို တာ ယုံကြည်မှုရှိတယ်လို့ ပြောထားပါတယ်။ 

မန်စီးတီးအသင်းဟာ နိုဝင်ဘာနိုင်ငံတကာ ပွဲစဉ်အပြီးမှာ ပရီးမီးယားလိဂ် ပွဲကြီးပွဲကောင်းအဖြစ် စပါးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: goal

CNI Sport News

၂၀၂၄ ခုနှစ်၊ နိုဝင်ဘာ ၁၃

အာဆင်နယ်အသင်းခေါင်းဆောင် အိုဒီဂတ်ဟာ သူ့ခန္ဓာကိုယ်ရဲ့စကားကို နားထောင်ရမယ်လို့ပြောပြီး နော်ဝေ အသင်းရဲ့ နေးရှင်းလိဂ် လူစာရင်းကနေ နုတ်ထွက်ခဲ့ပါတယ်။ 

အိုဒီဂတ်ဟာ ပြီးခဲ့တဲ့ စက်တင်ဘာနိုင်ငံတကာပွဲစဉ်အတွင်းမှာ ခြေချင်းဝတ် အရွတ်ထိခိုက်ဒဏ်ရာ ရခဲ့တာကြောင့် ၇ ပတ်ကျော်ကြာ အနားယူခဲ့ရတာပါ။

အိုဒီဂတ်ဟာ ပြီးခဲ့တဲ့ အင်တာမီလန်အသင်းနဲ့ ချန်ပီယံလိဂ်ပွဲစဉ်၊ ချယ်လ်ဆီးအသင်းနဲ့ ပရီးမီးယားလိဂ်ပွဲစဉ်တွေ မှသာ အာဆင်နယ်အသင်းအတွက် ပါဝင်ကစားနိုင်ခဲ့တာ ဖြစ်ပါတယ်။ 

အိုဒီဂတ်ဟာ နော်ဝေအသင်း လူစာရင်းကနေ ထွက်ခွာခဲ့ပေမယ့် ဆေးအဖွဲ့ရဲ့ အကဲဖြတ်မှုတွေကို ခံယူဖို့ အော်စလိုကို သွားရောက်ခဲ့တာပါ။ 

အိုဒီဂတ်ကို တွေ့ရစဉ်

အိုဒီဂတ်က “နိုင်ငံအသင်း ဆေးအဖွဲ့တွေနဲ့ ဆွေးနွေးမှုတွေ ပြုလုပ်ပြီးနောက်မှာ ဒီပွဲတွေကို ကစားဖို့အတွက် အခြေအနေက လုံလောက်မှု မရှိပါဘူး။ ကျနော်ဟာ ၁၀၀ ရာခိုင်နှုန်း မဖြစ်သေးတဲ့အတွက် ခန္ဓာကိုယ်ရဲ့ ပြော စကားကို နားထောင်ရမှာပါ။ ပြန်လည်ထူထောင်ရေး လုပ်ငန်းစဉ်တွေကို ပြီးဆုံးအောင်လုပ်ပြီးရင် ကျနော့်ရဲ့ ခြေထောက်တွေဟာ ကောင်းမွန်တဲ့ပုံစံကို ပြန်ရမှာပါ”လို့ ပြောခဲ့တာပါ။ 

အိုဒီဂတ်ဟာ ဒဏ်ရာကြောင့် အာဆင်နယ်အသင်းရဲ့ ပွဲစဉ် ၁၂ ပွဲအထိ လွဲချော်ခဲ့ပြီး နော်ဝေအသင်းရဲ့ နေးရှင်းလိဂ် ပွဲစဉ် အချို့ကိုလည်း ပါဝင်နိုင်ခဲ့ခြင်းမရှိတာ ဖြစ်ပါတယ်။

အာဆင်နယ်အသင်းဟာ အိုဒီဂတ် မပါဝင်နိုင်တဲ့ပွဲတွေမှာ ရလဒ်တွေဆိုးခဲ့ပြီး ပရီးမီးယားလိဂ် အမှတ်ပေးဇယား အဆင့် ၁ နေရာက လီဗာပူးလ်အသင်းနဲ့ ၉ မှတ် ကွာဟနေတာပါ။ 

နော်ဝေအသင်းကတော့ နေးရှင်းလိဂ်ပွဲစဉ် ၄ ပွဲ ကစားအပြီးမှာ ရမှတ် ၇ မှတ်နဲ့ ထိပ်ဆုံးနေရာမှာ ရပ်တည်နေပါ တယ်။ 

နော်ဝေအသင်းဟာ နေးရှင်းလိဂ် B အုပ်စု နောက်ဆုံးပွဲစဉ်တွေအဖြစ် နိုဝင်ဘာ ၁၄ ရက်မှာ ဆလိုဗေးနီးယား၊ ၁၇ ရက်မှာ ကာဇက်စတန်အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ နိုဝင်ဘာ ၁၃

အင်္ဂလန်ဘောလုံးအဖွဲ့ချုပ်(FA)ဟာ လီဗာပူးအသင်းနဲ့ သူတို့ရဲ့နည်းပြဟောင်း ကလော့ပ်တို့အပေါ် စော်ကား ပြောဆိုမှုတွေ ပြုလုပ်ခဲ့တဲ့ ကွင်းလယ်ဒိုင်လူကြီး ဒေးဗစ်ကုရဲ့ ဗွီဒီယိုကို စုံစမ်းစစ်ဆေးမှုတွေ စတင်ပြုလုပ်နေပြီ ဖြစ်ပါတယ်။ 

ဒီဗွီဒီယို ထွက်ပေါ်လာပြီးနောက် အင်္ဂလန်ပရော်ဖက်ရှင်နယ် ဒိုင်လူကြီးများအဖွဲ့ချုပ်(PGMOL)က ဒေးဗစ်ကုကို တာဝန်ကနေ ဆိုင်းငံ့ခဲ့ပါတယ်။ 

ဒါအပြင် ဒေးဗစ်ကုဟာ ဒီအပတ်ထဲ နိုင်ငံပွဲစဉ်တွေကို ကွင်းလယ်ဒိုင်လူကြီးအဖြစ် ဆောင်ရွက်ရမှာကနေလည်း နုတ်ထွက်ခဲ့ရပါတယ်။

ဒေးဗစ်ကုဟာ ဗွီဒီယိုထဲမှာ လီဗာပူးလ်အသင်း နည်းပြဟောင်း ကလော့ပ်ရဲ့ ဂျာမနီနိုင်ငံသားဖြစ်မှုကို ပြောခဲ့တာ ကြောင့် FA ရဲ့ စည်းမျဉ်းတွေကို ပြင်းထန်စွာ ချိုးဖောက်မှုဆီ ဦးတည်သွားနိုင်ပါတယ်။

FA က သူတို့ဟာ ဒီအဖြစ်အပျက်ကို သိရှိပြီးဖြစ်တာကြောင့် စုံစမ်းစစ်ဆေးမှုတွေ စတင်ပြုလုပ်နေတယ်လို့ ထုတ်ပြန်ခဲ့ပါတယ်။ 

ဆိုရှယ်မီဒီယာပေါ်မှာ ပျံ့နှံ့ခဲ့တဲ့ ဒေးဗစ်ကုရဲ့ ဗွီဒီယိုကို ဘယ်အချိန်က ရိုက်ခဲ့လဲဆိုတာတော့ မသိရသေးပါဘူး။ 

ဒေးဗစ်ကုကို တွေ့ရစဉ်

ဒေးဗစ်ကုဟာ ပရီးမီးယားလိဂ်ပြိုင်ပွဲမှာ အတွေ့အကြုံအရှိဆုံး ဒိုင်လူကြီးတွေထဲက တစ်ဦးဖြစ်ပြီး ၂၀၁၈ ခုနှစ် ကတည်းက ဒီပြိုင်ပွဲမှာ ဒိုင်လူကြီးအဖြစ် တာဝန်ထမ်းဆောင်ခဲ့တာ ဖြစ်ပါတယ်။ 

ဒေးဗစ်ကုရဲ့ ဒီဗွီဒီယိုဟာ ၂၀၂၀ ခုနှစ်၊ ဇူလိုင်က လီဗာပူးလ်နဲ့ ဘန်လေအသင်းတို့ ၁ ဂိုးစီသရေကျခဲ့တဲ့ ပရီးမီးယားလိဂ် ပွဲစဉ်ကို ရည်ညွှန်းပုံရတယ်လို့ သတင်းမှာ ဖော်ပြထားတာပါ။ 

လီဗာပူးလ်အသင်း နည်းပြဟောင်း ကလော့ပ်ဟာ ဒီပွဲမှာ သူ့ရဲ့ ကစားသမားတွေကို ပြိုင်ဘက်အသင်းက ကြမ်းတမ်းစွာ ကစားနေတဲ့အပေါ် ပြစ်ဒဏ်ဘောပေးဖို့ ပျက်ကွက်ခဲ့တာကြောင့် ကွင်းလယ်ဒိုင်လူကြီး ဒေးဗစ်ကုကို ပွဲအပြီးမှာ ဝေဖန်မှုပြုလုပ်ခဲ့တာ ဖြစ်ပါတယ်။ 

PGMOL ကတော့ သူတို့ရဲ့ စုံစမ်းစစ်ဆေးမှု မပြီးမချင်း ဒီဖြစ်ရပ်အပေါ် နောက်ထပ် မှတ်ချက်ပေးမှာ မဟုတ်ဘူးလို့ ပြောထားပါတယ်။

ဗွီဒီယို ထွက်ပေါ်လာပြီးနောက် ဒေးဗစ်ကုဟာ လီဗာပူးလ်အသင်း ပွဲစဉ်တွေကို ဒိုင်လူကြီးအဖြစ် ဆောင်ရွက်ချိန်မှာ အငြင်းပွားဖွယ် ဆုံးဖြတ်ချက်တွေ ချခဲ့တယ်လို့ ဗြိတိန်မီဒီယာတွေက ဖော်ပြခဲ့ပါတယ်။ 

ဒေးဗစ်ကုဟာ လီဗာပူးလ်အသင်းက ဗီလာအသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ပြီးခဲ့တဲ့အပတ် ပရီးမီးယားလိဂ် ပွဲစဉ်ကို ကွင်းလယ်ဒိုင်လူကြီးအဖြစ် တာဝန်ယူခဲ့သေးတာ ဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ နိုဝင်ဘာ ၁၂

ဘာစီလိုနာအသင်းဟာ ဆိုစီဒက်အသင်းကို အရေးနိမ့်ခဲ့တဲ့ လာလီဂါပွဲစဉ်မှာ တိုက်စစ်မှူး လီဝန်ဒေါစကီးရဲ့ သွင်းဂိုးကို ခွင့်မပြုခဲ့တာနဲ့ ပတ်သက်ပြီး စပိန်ဘောလုံးအဖွဲ့ချုပ်(RFEF)ထံ ဖြေရှင်းချက် တောင်းဆိုထားပါတယ်။ 

ဘာစီလိုနာအသင်းဟာ ဆိုစီဒက်အသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တာကြောင့် ဒီရာသီ လာလီဂါပြိုင်ပွဲမှာ ဒုတိယမြောက် ရှုံးပွဲကြုံတွေ့ခဲ့တာပါ။ 

ဘာစီလိုနာအသင်းဟာ ဒီပွဲမှာ တိုက်စစ်မှူး လီဝန်ဒေါစကီးရဲ့ သွင်းဂိုးကို ခွင့်မပြုခဲ့တာနဲ့ ပတ်သက်ပြီး ဝေဖန်မှုတွေ ပြုလုပ်နေတာ ဖြစ်ပါတယ်။ 

လီဝန်ဒေါစကီး ဂိုးသွင်းယူချိန်မှာ သူ့ရဲ့ခြေချောင်းဟာ ပြိုင်ဘက်ကစားသမားရဲ့ ခြေထောက်ထက် စည်းကျော်နေ တယ်ဆိုပြီး VAR က လူကျွံဘောအဖြစ် သတ်မှတ်ကာ သွင်းဂိုးကို ခွင့်မပြုခဲ့တာပါ။ 

လီဝန်ဒေါစကီးကို တွေ့ရစဉ်

ဘာစီလိုနာအသင်းက VAR အမှားအယွင်း ပြုလုပ်ခဲ့တယ်လို့ ယူဆထားပြီး သွင်းဂိုး ခွင့်မပြုခဲ့တဲ့အပေါ် ဖြေရှင်း ချက် လိုချင်နေတယ်လို့ Relevo က ဖော်ပြထားပါတယ်။ 

ဘာစီလိုနာအသင်းနည်းပြ ဟန်ဆီဖလစ်က ဒါက မှားယွင်းတဲ့ ဆုံးဖြတ်ချက်ဖြစ်တယ်ဆိုတာ ပုံတွေမှာ ရှင်းရှင်းလင်းလင်း မြင်တွေ့ရတယ်လို့ ပွဲအပြီးမှာ ပြောခဲ့တာပါ။ 

ဘာစီလိုနာအသင်းဟာ ဒီရှုံးပွဲကြောင့် လာလီဂါ အမှတ်ပေးဇယားကို ၉ မှတ်ဖြတ်ပြီး ဦးဆောင်နိုင်မယ့် အခွင့်အရေး လက်လွှတ်ခဲ့ရတာ ဖြစ်ပါတယ်။

ဘာစီလိုနာအသင်းဟာ ဒီရာသီ လာလီဂါပွဲစဉ် ၁၃ ပွဲ ကစားအပြီးမှာ ရမှတ် ၃၃ မှတ်နဲ့ အဆင့် ၂ နေရာက ရီးရယ်လ်အသင်းထက် ၁ ပွဲပိုကစားကာ ၆ မှတ် အသာရထားတာပါ။ 

ဘာစီလိုနာအသင်းဟာ လာမယ့် လာလီဂါပွဲစဉ်အဖြစ် နိုဝင်ဘာ ၂၃ ရက်မှာ ဆဲလ်တာဗီဂိုအသင်းနဲ့ ယှဉ်ပြိုင်ရမှာ ဖြစ်ပါတယ်။  

Source: Goal