CNI Sport News

၂၀၂၄ ခုနှစ်၊ ဇူလိုင် ၉

စပိန်အသင်းပရိသတ်တွေရဲ့ ဝေဖန်မှုတွေခံနေရတဲ့ အသင်းခေါင်းဆောင် မိုရာတာက ယူရို ၂၀၂၄ ပြိုင်ပွဲအပြီးမှာ စပိန်လက်ရွေးစင်အသင်းက အနားယူဖွယ်ရှိတယ်လို့ ပြောလိုက်ပါတယ်။

မိုရာတာက “ဒီပြိုင်ပွဲက စပိန်အသင်းနဲ့အတူ ကျနော့်ရဲ့ နောက်ဆုံးပြိုင်ပွဲ ဖြစ်နိုင်ပါတယ်။ အများကြီး မပြောချင် ပေမယ့် ဖြစ်နိုင်ဖို့ရှိပါတယ်။ ကျနော့်အတွက် စပိန်မှာ ပျော်ရွှင်ဖို့က ခက်ခဲပါတယ်။ စပိန်ပြင်ပမှာ ကျနော် ပိုပြီး ပျော်ရွှင်တယ်ဆိုတာ သံသယယမရှိပါဘူး။ ဒါကို ကျနော် အကြိမ်ကြိမ် ပြောခဲ့တာပါ။ ဘာကြောင့်လဲဆိုရင် လူတွေ က ကျနော့်ကို လေးစားမှုရှိလို့ပါ။ စပိန်မှာတော့ ကျနော့်ကို လေးစားမှုမရှိဘူး”လို့ El Mundo နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

အသက် ၃၁ နှစ်အရွယ်ရှိ မိုရာတာဟာ စပိန်အသင်းကစားခဲ့တဲ့ ယူရို ၂၀၂၄ ပြိုင်ပွဲ ၅ ပွဲမှာ ၄ ပွဲကို ပွဲထွက်လူစာရင်း ပါဝင်ခဲ့ပြီး ခရိုအေးရှားအသင်းနဲ့ အုပ်စုအဖွင့်ပွဲစဉ်မှာ အသင်းအတွက် ဂိုးသွင်းယူနိုင်ခဲ့ပါတယ်။

ဒါပေမယ့် မိုရာတာဟာ စပိန်အသင်းပရိသတ်တွေရဲ့ ဝေဖန်မှုတွေခံနေရတဲ့ အပေါ် နားမလည်နိုင်အောင် ဖြစ်နေတာပါ။ 

စပိန်အသင်းကိုတွေ့ရစဉ်

မိုရာတာဟာ အရင်ကတည်းက စပိန်အသင်း ပရိသတ်တွေနဲ့ ဆက်ဆံရေး အဆင်ပြေမှုမရှိခဲ့ဘဲ ယူရို ၂၀၂၀ ပြိုင်ပွဲ တုန်းကလည်း လှောင်ပြောင်ခံခဲ့ရသလို ပြီးခဲ့တဲ့ မတ်က ဘရာဇီးလ်အသင်းနဲ့ ခြေစမ်းပွဲမှာလည်း လှောင်ပြောင် ခံခဲ့ရတာ ဖြစ်ပါတယ်။

မိုရာတာက “ကျနော်ဟာ အဝါကတ်ထိလို့ ကွင်းဘေးမှာ ငိုနေတယ်ဆိုပြီး လူတွေက ပြောခဲ့ကြပါတယ်။ ဒါဟာ ဘာအဓိပ္ပါယ်မှ မရှိပါဘူး။ အသင်းခေါင်းဆောင် အနေနဲ့ နိုင်ငံအသင်း ဆီမီးဖိုင်နယ်တက်သွားလို့ ကျနော်ငိုကြွေး ခဲ့တာပါ။ နိုင်ငံအသင်းနဲ့ နောက်ဆုံးပွဲဖြစ်လာမယ့် ဒီပြိုင်ပွဲအတွက် ကျနော် အကောင်းဆုံး ကြိုးစားသွားမှာပါ”လို့ ပြောခဲ့တာပါ။

စပိန်အသင်းနည်းပြ ဒယ်လာဖွန်တေက အသင်းခေါင်းဆောင် မိုရာတာဘက်ကနေ ရပ်တည်ခဲ့ပြီး သူဟာ အသင်းအတွက် ကွင်းအတွင်းရော ကွင်းအပြင်ပါ အကောင်းဆုံး လုပ်ဆောင်ခဲ့လို့ သူ့အပေါ် ဆက်ဆံပုံတွေဟာ မျှတမှုမရှိဘူးလို့ ပြောခဲ့ပါတယ်။

၂၀၁၄ ခုနှစ်ကတည်းက စပိန်အသင်းအတွက် ပွဲထွက်ခွင့်ရခဲ့တဲ့ မိုရာတာဟာ နိုင်ငံအသင်းအတွက် ၇၈ ပွဲ ကစားထားပြီး ၃၆ ဂိုး သွင်းယူထားတာ ဖြစ်ပါတယ်။ 

Source: besoccer

CNI Sport News

၂၀၂၄ ခုနှစ်၊ ဇူလိုင် ၉

အာဂျင်တီးနားအသင်းနည်းပြ စကာလိုနီက အသင်းခေါင်းဆောင် မက်ဆီဟာ ကနေဒါအသင်းနဲ့ ယှဉ်ပြိုင်ရမယ့် ကိုပါအမေရိကဖလားပြိုင်ပွဲ ဆီမီးဖိုင်နယ်ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်မယ်လို့ ပြောခဲ့ပါတယ်။

စကာလိုနီက “မက်ဆီဟာ ကြံ့ခိုင်မှုအပြည့်နဲ့ ဒီပွဲကို ပါဝင်မယ်ဆိုတာ သံသယမရှိပါဘူး။ ဒါဟာ ကျနော့်အတွက် အလွန်လွယ်ကူတဲ့ ဆုံးဖြတ်ချက်ပါ။ သူဟာ ကြံ့ခိုင်မှု အပြည့်ရှိတိုင်း အမြဲတမ်းကစားသလို ၁၀၀ ရာခိုင်နှုန်း ကြံ့ခိုင်မှု မရှိရင်တောင် ကစားတဲ့သူပါ။ သူဟာ ကျနော်တို့အတွက် မရှိမဖြစ်တဲ့သူပါ”လို့ ပွဲကြိုသတင်းစာ ရှင်းလင်းပွဲမှာ ပြောခဲ့တာပါ။

မက်ဆီဟာ ဒဏ်ရာကြောင့် ပီရူးအသင်းနဲ့ အုပ်စုနောက်ဆုံးပွဲစဉ်ကို လွဲချော်ခဲ့ပေမယ့် အီကွေဒေါအသင်းနဲ့ ကွာတားဖိုင်နယ်ပွဲစဉ်မှာ အာဂျင်တီးနားအသင်းအတွက် ပြန်လည်ပါဝင်နိုင်ခဲ့ပါတယ်။

မက်ဆီဟာ အီကွေဒေါအသင်းနဲ့ပွဲစဉ်ကို ပွဲချိန်ပြည့် ပါဝင်ကစားခဲ့ပေမယ့် ကြံ့ခိုင်မှု အပြည့်အဝ ရှိပုံမပေါ်တာပါ။ 

ဒါပေမယ့် နည်းပြ စကာလိုနီကတော့ မက်ဆီဟာ ကိုပါအမေရိကဖလား ဆီမီးဖိုင်နယ်ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်မယ်လို့ ပြောခဲ့တာဖြစ်ပါတယ်။

စကာလိုနီကို တွေ့ရစဉ်

အာဂျင်တီးနားနဲ့ ကနေဒါအသင်းတို့ဟာ အုပ်စုတွင်းမှာလည်း တွေ့ဆုံခဲ့တာကြောင့် ဒီပြိုင်ပွဲမှာ ဒုတိယအကြိမ် မြောက် တွေ့ဆုံမှုဖြစ်ပြီး အုပ်စုပွဲတုန်းက အာဂျင်တီးနားအသင်းက ၂ ဂိုး- ဂိုးမရှိနဲ့ အနိုင်ရရှိခဲ့တာပါ။ 

အာဂျင်တီးနားအသင်းနည်းပြ စကာလိုနီက ဆီမီးဖိုင်နယ်ပွဲစဉ်မှာ ကနေဒါအသင်းနည်းပြ ဂျက်ဆီမာ့ရှ်ဟာ ကွဲပြားခြားနားတဲ့အရာကို လုပ်နိုင်ဖို့ ကြိုးစားလိမ့်မယ်လို့ ပြောခဲ့ပါတယ်။

စကာလိုနီက “နည်းပြတွေ အားလုံးဟာ အမှားတွေပြင်ပြီး ပြိုင်ဘက်တွေကို နာကျင်အောင်လုပ်ဖို့ မှတ်သားထား ကြပါတယ်။ နည်းပြတိုင်းဟာ မတူညီတဲ့အရာတွေကို လုပ်ပါလိမ့်မယ်။ ကျနော်တို့ဟာ ဘောလုံးကို ရအောင်ယူပြီး သူတို့ရဲ့ပွဲကစားတာကို ရပ်တန့်အောင်လုပ်မှာပါ။ ရုပ်ပိုင်းဆိုင်ရာအရ သူတို့နဲ့ ယှဉ်ပြိုင်ရတာ ခက်ခဲပါတယ်။ ဒါပေမယ့် ကျနော်တို့ဟာ အသင်းရဲ့ အကောင်းဆုံးပုံစံနဲ့ ပွဲကို ကစားနိုင်ဖို့ မျှော်လင့်ပါတယ်”လို့ ပြောခဲ့တာပါ။

အာဂျင်တီးနားနဲ့ ကနေဒါအသင်းတို့ရဲ့ ကိုပါအမေရိကဖလား ဆီမီးဖိုင်နယ်ပွဲစဉ်ကို ဇူလိုင် ၁၀ ရက်မနက်ပိုင်းမှာ ယှဉ်ပြိုင်သွားမှာ ဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဇူလိုင် ၈

ပေါ်တူဂီလူမျိုးနည်းပြ မော်ရင်ဟိုဟာ ဘာစီလိုနာအသင်းကြယ်ပွင့် အန်ဆုဖာတီကို ဖီနာဘာချီအသင်းအတွက် ခေါ်ယူဖို့ စိတ်ဝင်စားနေတယ်လို့ သတင်းတွေ ထွက်ပေါ်နေပါတယ်။

မော်ရင်ဟိုဟာ ဖီနာဘာချီအသင်း နည်းပြသစ်အဖြစ် ခန့်အပ်ခံရပြီးနောက် သူ့ရဲ့ကိုယ်ပိုင် လူစာရင်းကို တည်ဆောက်ဖို့ ကြိုးစားနေပြီး နွေရာသီ အပြောင်းအရွှေ့မှာ အန်ဆုဖာတီကို ခေါ်ယူချင်နေတာပါ။ 

အန်ဆုဖာတီဟာ ပြီးခဲ့တဲ့ရာသီက ဘာစီလိုနာအသင်းကနေ ဘရိုက်တန်အသင်းထံ အငှားနဲ့ ကစားခဲ့ပေမယ့် ပရီးမီးယားလိဂ်ပြိုင်ပွဲမှာ ၃ ပွဲသာ ပွဲထွက်လူစာရင်း ပါဝင်ခွင့်ရခဲ့တာ ဖြစ်ပါတယ်။

ဘာစီလိုနာအသင်းဟာ အန်ဆုဖာတီကို ရောင်းချချင်ပေမယ့် စာချုပ်က ၂၀၂၇ ခုနှစ်အထိ ရှိနေတဲ့အတွက် အငှားအပြောင်းအရွှေ့က ပိုပြီးဖြစ်နိုင်ဖွယ်ရှိတာပါ။ 

ဒါပေမယ့် ဖီနာဘာချီအသင်းအနေနဲ့ အန်ဆုဖာတီကို ခေါ်ယူဖို့အတွက် ငွေကြေး အသုံးပြုနိုင်မလားဆိုတာ စောင့်ကြည့်ရဦးမှာ ဖြစ်ပါတယ်။ 

 အန်ဆုဖာတီကိုတွေ့ရစဉ်

ဘာစီလိုနာအသင်းဟာ မက်ဆီ ထွက်ခွာသွားပြီးနောက် သူ့ရဲ့ကျောနံပတ် ၁၀ ကို အန်ဆုဖာတီကို ပေးဝတ်ခဲ့ပြီး အများကြီး မျှော်လင့်ခဲ့တာပါ။ 

ဒါပေမယ့် အန်ဆုဖာတီဟာ ဒဏ်ရာကြောင့် ကာလရှည်ကြာ အနားယူခဲ့ရပြီးနောက် ပုံမှန်ခြေစွမ်းပါ ဆုံးရှုံးခဲ့ရတာ ဖြစ်ပါတယ်။

ဘာစီလိုနာအသင်းရဲ့ လူငယ်စီမံကိန်းက ထွက်ပေါ်လာခဲ့တဲ့ အန်ဆုဖာတီဟာ အသင်းကြီးအတွက် ၁၁၂ ပွဲ ပါဝင်ကစားထားပြီး ၂၉ ဂိုး သွင်းယူကာ လာလီဂါ၊ ကိုပါဒယ်ရေးနဲ့ စပိန်စူပါဖလားတို့ကို ၁ ကြိမ်စီရရှိထားတာပါ။ 

စပိန်အသင်းအတွက် ၁၀ ပွဲ ပါဝင်ကစားထားတဲ့ အန်ဆုဖာတီဟာ ၂၀၂၃ ခုနှစ်နောက်ပိုင်း လက်ရွေးစင်အသင်းနဲ့ ဝေးကွာနေတာ ဖြစ်ပါတယ်။ 

ဘာစီလိုနာအသင်းဟာ အန်ဆုဖာတီကို အနည်းဆုံး အမေရိကန် ရာသီကြို ခရီးစဉ်ပြီးဆုံးတဲ့ အချိန်အထိ ဆက်ပြီး ထားရှိဖို့ စီစဉ်နေတာပါ။ 

ဘာစီလိုနာအသင်းဟာ အမေရိကန်မှာ မန်စီးတီး၊ ရီးရယ်လ်၊ အေစီမီလန်အသင်းတို့နဲ့ ရာသီကြိုခြေစမ်းပွဲ ယှဉ်ပြိုင်သွားမှာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဇူလိုင် ၈

ချယ်လ်ဆီးအသင်း တိုက်စစ်မှူးဟောင်း မူတူးက ရော်နယ်ဒိုဟာ ကစားသမားဘဝက အနားမယူခင်မှာ သူ့ရဲ့သားဖြစ်သူ ဂျူနီယာနဲ့အတူ တွဲဖက်ပြီးကစားဖို့ ဆုံးဖြတ်ထားတယ်လို့ ပြောလိုက်ပါတယ်။

မူတူးက “ဒါက ရော်နယ်ဒိုအတွက် တကယ့်ကို တွန်းအားပါ။ သူဟာ သားဖြစ်သူနဲ့အတူ တရားဝင်ပွဲကို ကစားချင်နေတာကြောင့် ဒါကို သူလက်လျှော့ဦးမှာ မဟုတ်ပါဘူး။ ဒါက အယ်လ်နာဆာအသင်းမှာတော့ ဖြစ်နိုင်ပေမယ့် သူဟာ တခြားအသင်းမှာ ရှိနေရင်တော့ ကျနော် မသိပါဘူး။ ရီးရယ်လ်ဆိုရင် ပိုခက်ခဲပါတယ်။ ဒါပေမယ့် ကစားခဲ့ရင်လည်း အများကြီး ကစားနိုင်မယ်လို့ မထင်ကြောင်း”ပြောခဲ့တာပါ။

အသက် ၃၉ နှစ်အရွယ်ရှိ ရော်နယ်ဒိုနဲ့ အသက် ၁၄ နှစ်အရွယ်ရှိ ဂျူနီယာတို့ဟာ ဆော်ဒီပရိုလိဂ်ကလပ် အယ်လ်နာဆာအသင်းမှာ ကစားနေတာ ဖြစ်ပါတယ်။ 

ရော်နယ်ဒိုဟာ အယ်လ်နာဆာအသင်းကြီးမှာ အသင်းခေါင်းဆောင်အဖြစ် ပါဝင်နေပြီး ဂျူနီယာကတော့ ပြီးခဲ့တဲ့ ရာသီက ဆော်ဒီ ယူ-၁၃ ဖလားရရှိခဲ့တဲ့ လူငယ်အသင်းမှာ ပါဝင်ကစားနေတာပါ။

ဂျူနီယာဟာ အသက် ၁၄ နှစ်သာရှိသေးတာကြောင့် အသင်းကြီး လူစာရင်းထဲ ပါဝင်နိုင်ဖို့ အနည်းဆုံး ၂ နှစ်ခန့် စောင့်ဆိုင်းရဖို့ ရှိနေပါတယ်။

ရော်နယ်ဒိုကို တွေ့ရစဉ်

မူတူးကတော့ ရော်နယ်ဒိုဟာ သူ့ရဲ့သား အကြီးဆုံးဖြစ်သူနဲ့ အသင်းဖော်အဖြစ် ကစားနိုင်ဖို့အတွက် သူ့ရဲ့ ကစားသမားဘဝကို သက်တမ်းရှည်ကြာအောင် ကြိုးစားနိုင်တယ်လို့ ပြောခဲ့တာပါ။ 

ရော်နယ်ဒိုနဲ့ အယ်လ်နာဆာအသင်းတို့ ချုပ်ဆိုထားတဲ့ စာချုပ်ဟာ ၂၀၂၅ ခုနှစ်၊ ဇွန်လအထိ သက်တမ်းရှိနေပြီး နောက်ထပ် သက်တမ်းတိုး စာချုပ်ချုပ်ဆိုဖို့ ရှိနေပါတယ်။ ရော်

ရော်နယ်ဒိုဟာ ပေါ်တူဂီအသင်း ယူရို ၂၀၂၄ ပြိုင်ပွဲက ထွက်ခွာခဲ့ရပြီးနောက် သူ့ရဲ့နိုင်ငံအသင်း အနာဂတ်နဲ့ ပတ်သက် ပြီး မရေရာမှုတွေ ရှိနေတာပါ။

သတင်းတွေမှာတော့ ရော်နယ်ဒိုဟာ ၂၀၂၆ ကမ္ဘာ့ဖလားပြိုင်ပွဲအထိ ပေါ်တူဂီအသင်းအတွက် ပါဝင်ကစား ချင်နေတယ်လို့ ဖော်ပြထားတာ ဖြစ်ပါတယ်။ 

Source: Dailymail

CNI Sport News

၂၀၂၄ ခုနှစ်၊ ဇူလိုင် ၈

ဘိုင်ယန်မြူးနစ်အသင်းဟာ ချယ်လ်ဆီးနဲ့ ယူနိုက်တက်အသင်းတို့ရဲ့ ပစ်မှတ်ဖြစ်ခဲ့တဲ့ ပဲလေ့စ်အသင်းတောင်ပံ ကစားသမား အိုလီဆီကို ပေါင်သန်း ၅၀ နဲ့ ၅ နှစ် စာချုပ်ချုပ်ဆိုကာ ခေါ်ယူလိုက်ပါတယ်။

အသက် ၂၂ နှစ်အရွယ်ရှိ ပြင်သစ် ယူ-၂၁ ကစားသမား အိုလီဆီဟာ ပဲလေ့စ်အသင်းမှာ ကစားခဲ့တဲ့ ၃ ရာသီအတွင်း ပွဲပေါင်း ၉၀ ပါဝင်ကစားကာ ၁၆ ဂိုး သွင်းယူနိုင်ခဲ့တာပါ။ 

အိုလီဆီဟာ ပဲလေ့စ်အသင်းကို ၂၀၂၁ ခုနှစ်က ရီးဒင်းအသင်းကနေ ရောက်ရှိလာခဲ့တာဖြစ်ပြီး ခြေစွမ်းပြသနိုင်ခဲ့ တာကြောင့် ပရီးမီးယားလိဂ် အသင်းကြီးတွေရဲ့ ပစ်မှတ်ဖြစ်ခဲ့ပါတယ်။ 

ဒါပေမယ့် အိုလီဆီဟာ ကွန်ပနီကိုင်တွယ်မယ့် ဘိုင်ယန်မြူးနစ်အသင်းထံ ပြောင်းရွှေ့ဖို့ ရွေးချယ်ခဲ့တာပါ။

အိုလီဆီက “ဘိုင်ယန်မြူးနစ်အသင်းနဲ့ ဆွေးနွေးမှုတွေက အလွန် အပြုသဘောဆောင်ခဲ့ပြီး အခုလိုအသင်းကြီးမှာ ကစားခွင့်ရတဲ့အတွက် ကျနော် အလွန်ပျော်ရွှင်ပါတယ်။ ဒါဟာ ကြီးမားတဲ့ စိန်ခေါ်မှုဖြစ်ပြီး ကျနော် ရှာဖွေနေတာနဲ့ အတိအကျပါပဲ။ ဒီအဆင့်မှာ ကိုယ့်ကိုယ်ကို သက်သေပြပြီး လာမယ့်နှစ်တွေမှာ အသင်းနဲ့အတူ ဆုဖလားတွေ အများအပြား ရယူနိုင်ဖို့ လုပ်ဆောင်ပေးချင်ပါတယ်”လို့ စာချုပ်ချုပ်ဆိုအပြီးမှာ ပြောခဲ့ပါတယ်။

အိုလီဆီကို တွေ့ရစဉ်

ဘိုင်ယန်မြူးနစ်အသင်းဟာ အိုလီဆီကို ခေါ်ယူအပြီးမှာ ဖူလ်ဟမ်အသင်း ကွင်းလယ်လူ ပယ်လ်ဟင်ညာကိုလည်း ခေါ်ယူနိုင်ဖို့ နီးစပ်နေတာပါ။ 

ပယ်လ်ဟင်ညာဟာ ပြီးခဲ့တဲ့ရာသီက ဘိုင်ယန်မြူးနစ်အသင်းထံ ပြောင်းရွှေ့ဖို့ အလွန်နီးစပ်ခဲ့ပေမယ့် အပြောင်း အရွှေ့ နောက်ဆုံးနေ့မှာ အပြောင်းအရွှေ့ ပျက်ပြယ်ခဲ့တာ ဖြစ်ပါတယ်။

ဘိုင်ယန်မြူးနစ်အသင်းဟာ ပြီးခဲ့တဲ့ရာသီက ဘွန်ဒက်လီဂါဖလားကို လေဗာကူဆင်အသင်းထံ ပေးခဲ့ရလို့ ရာသီသစ်မှာ ဆုဖလား ပြန်လည်ရယူနိုင်ဖို့ ကွန်ပနီကို နည်းပြသစ်အဖြစ် ခန့်အပ်ကာ ကစားသမားသစ်တွေ ဖြည့်တင်းနေတာပါ။

အိုလီဆီဟာ အိုလံပစ်ပြိုင်ပွဲဝင်မယ့် ပြင်သစ်အသင်းမှာ ရွေးချယ်ခံထားရတာကြောင့် အိုလံပစ်ပြိုင်ပွဲအပြီးမှသာ ဘိုင်ယန်မြူးနစ်အသင်းနဲ့ ပူးပေါင်းပြီး လေ့ကျင့်မှုတွေကို စတင်နိုင်မှာဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ ဇူလိုင် ၈

ယူရို ၂၀၂၄ ပြိုင်ပွဲမှာ ပြသနေတဲ့ စွမ်းဆောင်ရည်တွေကြောင့် ဝေဖန်မှုတွေခံနေရတဲ့ ပြင်သစ်အသင်းခေါင်းဆောင် ဘတ်ပီကို နည်းပြ ဒက်ချမ့်စ်က ကာကွယ်မှုပြုလုပ်ခဲ့ပါတယ်။

ဒက်ချမ့်စ်က “အခုအချိန်ထိ သူလုပ်ထားတဲ့ အရာတွေက လုံလောက်တဲ့ သမိုင်းကြောင်းကို ရေးသားပြီးသားလို့ ခင်ဗျားတို့ မထင်ကြဘူးလား။ သူဟာ ဒီထက်ပိုပြီး သမိုင်းမှတ်တမ်းတွေကို ရေးထိုးချင်နေတာပါ။ သူဟာ ပြင်ဆင်မှုတွေ ပြုလုပ်ချိန်အတွင်း နောက်ကျောမှာ ပြဿနာရှိနေပေမယ့် ဒီနေရာမှာ ရှိနေပါတယ်။ ဘတ်ပီဟာ ၁၀၀ ရာခိုင်နှုန်း မဟုတ်ရင်တောင် သူပါဝင်တာဟာ ပြိုင်ဘက်တွေအတွက် အခက်အခဲ ဖြစ်စေတယ်ဆိုတာ ကျနော်သိတယ်”လို့ Telefoot ကို ပြောခဲ့တာပါ။

အသက် ၂၅ နှစ်အရွယ်ရှိ ဘတ်ပီဟာ ယူရို ၂၀၂၄ ပြိုင်ပွဲ ဆီမီးဖိုင်နယ်ကို ရောက်ရှိနေတဲ့ ပြင်သစ်အသင်းအတွက် ဒီပြိုင်ပွဲမှာ ၁ ဂိုးသာ သွင်းယူထားနိုင်တာ ဖြစ်ပါတယ်။ 

ဘတ်ပီဟာ ဒီသွင်းဂိုးကို ပိုလန်အသင်းနဲ့ ကစားခဲ့တဲ့ အုပ်စုနောက်ဆုံးပွဲစဉ်မှာ ပင်နယ်တီကနေ သွင်းယူခဲ့တာပါ။ 

ပြင်သစ်အသင်းဟာ ဒီပြိုင်ပွဲမှာ လက်ရှိအချိန်ထိ သွင်းဂိုး ၃ ဂိုးသာ သွင်းယူထားနိုင်ပြီး ၁ ဂိုးက ဘတ်ပီရဲ့သွင်းဂိုးနဲ့ နောက် ၂ ဂိုးက ပြိုင်ဘက်အသင်းတွေရဲ့ ကိုယ့်ဂိုးကိုယ် သွင်းယူမှုကနေ ရရှိခဲ့တာဖြစ်ပါတယ်။

ဘတ်ပီနဲ့ဒက်ချမ့်စ်ကို တွေ့ရစဉ်

သြစတြီးယားအသင်းနဲ့ ကစားခဲ့တဲ့ အုပ်စုအဖွင့်ပွဲစဉ်မှာ နှာခေါင်းရိုးကျိုးပြီးနောက် ဘတ်ပီဟာ မျက်နှာဖုံးဝတ်ဆင် ပြီး ပွဲတွေကစားနေခဲ့တာမှာ အခက်အခဲတွေ ဖြစ်နေခဲ့တာပါ။

ပြင်သစ်အသင်းက ပေါ်တူဂီအသင်းကို ပင်နယ်တီ အဆုံးအဖြတ်နဲ့ အနိုင်ရခဲ့တဲ့ ကွာတားဖိုင်နယ်ပွဲစဉ်ရဲ့ အချိန်ပိုမှာ ဘတ်ပီဟာ ပင်ပန်းနေတာကြောင့် သူ့ကို လူစားလဲပေးဖို့ နည်းပြကို တောင်းဆိုခဲ့တာ ဖြစ်ပါတယ်။ 

အဲဒါကြောင့် ပြင်သစ်အသင်းဟာ စပိန်အသင်းနဲ့ ဆီမီးဖိုင်နယ်ပွဲစဉ်မှာ ဘတ်ပီကို လူစားဝင် ကစားသမားအဖြစ် အသုံးပြုနိုင်တယ်လို့ သတင်းတွေ ထွက်ခဲ့တာပါ။

ဒါပေမယ့် ပြင်သစ်အသင်းနည်းပြ ဒက်ချမ့်စ်က ဘတ်ပီကို အရန်ခုံမှာထားဖို့ မစဉ်းစားဘဲ ပွဲထွက် ကစားသမား အဖြစ်သာ အသုံးပြုဖို့ ရှိနေပါတယ်။

ပြင်သစ်နဲ့ စပိန်အသင်းတို့ရဲ့ ယူရို ၂၀၂၄ ပြိုင်ပွဲ ဆီမီးဖိုင်နယ်ပွဲစဉ်ကို ဇူလိုင် ၁၀ ရက်မှာ ကျင်းပသွားမှာ ဖြစ်ပါ တယ်။ 

Source: ESPN

CNI Sport News

၂၀၂၄ ခုနှစ်၊ ဇူလိုင် ၆

ဂျာမနီဝါရင့်ကစားသမား သောမတ်စ်မူလာက လက်ရွေးစင်အသင်းက အနားယူဖွယ်ရှိတယ်လို့ စပိန်အသင်းကို အရေးနိမ့်ခဲ့တဲ့ ယူရို ၂၀၂၄ ပြိုင်ပွဲကွာတားဖိုင်နယ်ပွဲစဉ်အပြီးမှာ အရိပ်အမြွက်ပြောခဲ့ပါတယ်။

သောမတ်စ်မူလာက “ဒီပွဲက ဂျာမနီနဲ့ ကျနော်ရဲ့နောက်ဆုံးပွဲ ဖြစ်နိုင်ဖွယ်ရှိတယ်”လို့ Sky Sports ဂျာမနီကို ပြောခဲ့တာပါ။

ယူရို ၂၀၂၄ ပြိုင်ပွဲအိမ်ရှင် ဂျာမနီအသင်းဟာ ကွာတားဖိုင်နယ်မှာ စပိန်အသင်းကို အချိန်ပိုမှာ အရေးနိမ့်ပြီး ပြိုင်ပွဲက ထွက်ခွာခဲ့ရတာဖြစ်ပါတယ်။

 ၂၀၁၀ ခုနှစ်က ဂျာမနီအသင်းအတွက် စတင်ပွဲဦးထွက်ခဲ့တဲ့ သောမတ်စ်မူလာဟာ နိုင်ငံအသင်းအတွက် ၁၃၁ ပွဲ ပါဝင်ကစားထားပြီး ၄၅ ဂိုးသွင်းယူထားတာပါ။ 

အသက် ၃၄ နှစ်အရွယ်ရှိ သောမတ်စ်မူလာအတွက် ယူရို ၂၀၂၄ ပြိုင်ပွဲဟာ သူ့ရဲ့နောက်ဆုံးယူရိုပြိုင်ပွဲဖြစ်ပြီး လာမယ့် ၂၀၂၆ ကမ္ဘာ့ဖလားပြိုင်ပွဲမှာလည်း ပါဝင်နိုင်ဖို့ နည်းပါးတာကြောင့် လက်ရွေးစင်အသင်းက အနားယူဖို့ ရှိလာတာ ဖြစ်ပါတယ်။

ဂျာမနီအသင်းကိုတွေ့ရစဉ်

သောမတ်စ်မူလာဟာ ဂျာမနီအသင်းနဲ့ ၂၀၁၄ ကမ္ဘာ့ဖလားပြိုင်ပွဲမှာ ချန်ပီယံဆုရယူနိုင်ခဲ့ပြီး ၂၀၁၀ ကမ္ဘာ့ဖလားပြိုင်ပွဲမှာတော့ တတိယနေရာရရှိခဲ့တာပါ။ 

သောမတ်စ်မူလာ အနေနဲ့ လက်ရွေးစင်အသင်းက အနားယူခဲ့မယ်ဆိုရင် ယူရိုချန်ပီယံဆုကို ရယူချင်တဲ့ သူ့ရဲ့မျှော်လင့်ချက်ကို အဆုံးသတ်ရတော့မှာဖြစ်ပါတယ်။ 

ဝါရင့်ကစားသမားဟာ ရာသီသစ်အတွက် ဘိုင်ယန်မြူးနစ်အသင်းနဲ့ မပူးပေါင်းခင် အပန်းဖြေအနားယူသွားမှာဖြစ်ပြီး သူနဲ့ အသင်းတို့ချုပ်ဆိုထားတဲ့ စာချုပ်ဟာ လာမယ့်ရာသီအကုန်ကျရင် ကုန်ဆုံးတော့မှာပါ။

သောမတ်စ်မူလာဟာ ပရော်ဖက်ရှင်နယ်ကစားသမားဘဝတစ်လျှောက်လုံး ဘိုင်ယန်မြူးနစ်အသင်း တစ်သင်းတည်းမှာသာ ကစားခဲ့တာဖြစ်ပြီး ဘွန်ဒက်လီဂါဖလား ၁၂ ကြိမ်၊ချန်ပီယံလိဂ်ဖလား ၂ ကြိမ် အပါအဝင် ဆုဖလားအများအပြားရယူထားတာဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇူလိုင် ၆

ဘန်လေအသင်းဟာ အင်္ဂလန်ကွင်းလယ်လူဟောင်း စကော့ပါကားကို နည်းပြသစ်အဖြစ် ၃ နှစ် စာချုပ်ချုပ်ဆိုကာ ခန့်အပ်ကြောင်းအတည်ပြုခဲ့ပါတယ်။

ပြီးခဲ့တဲ့ရာသီက ပရီးမီးယားလိဂ်ကနေ ချန်ပီယံရှစ်ကို တန်းဆင်းခဲ့ရတဲ့ ဘန်လေအသင်းဟာ ဘိုင်ယန်မြူးနစ်အသင်းကို ကိုင်တွယ်ဖို့ ထွက်ခွာသွားတဲ့ နည်းပြဟောင်း ကွန်ပနီရဲ့နေရာမှာ စကော့ပါကားကို နည်းပြသစ်အဖြစ် အစားထိုးခန့်အပ်ခဲ့တာပါ။ 

စကော့ပါကားဟာ ၂၀၂၃ ခုနှစ်၊မတ်က ကလပ်ဘရုဂျ်အသင်းရဲ့နည်းပြရာထူးက ထုတ်ပယ်ခံရပြီးကတည်းက ဘယ်အသင်းကိုမှ ကိုင်တွယ်ရခြင်းမရှိသေးပါဘူး။ 

စကော့ပါကားဟာ ဖူလ်ဟမ်နဲ့ ဘုန်းမောက်အသင်းတို့ကို ကိုင်တွယ်ခဲ့တုန်းက ချန်ပီယံရှစ်ကနေ ပရီးမီးယားလိဂ်ကို တန်းတက်အောင်ကိုင်တွယ်ပေးနိုင်ခဲ့တာကြောင့် ဘန်လေအသင်းကိုလည်း ဒီလိုမျိုးလုပ်ဆောင်ပေးနိုင်ဖို့ ရည်မှန်းထားတာဖြစ်ပါတယ်။ 

ဘန်လေအသင်းကိုတွေ့ရစဉ်

စကော့ပါကားဟာ ဒီအပတ်ထဲမှာ ဘန်လေအသင်းတာဝန်ရှိသူတွေနဲ့ ဒုတိယအကြိမ်ဆွေးနွေးမှုတွေပြုလုပ်ခဲ့အပြီးမှာ နည်းပြသစ်ဖြစ်လာခဲ့တာပါ။ ဘန်လေအသင်းဟာ စကော့ပါကားကို နည်းပြသစ်အဖြစ် မခန့်အပ်ခင်က ယူနိုက်တက်အသင်း တိုက်စစ်မှူးဟောင်း နစ္စတယ်ရွိုင်း၊ချယ်လ်ဆီးအသင်းနည်းပြဟောင်း လမ်းပတ်တို့နဲ့ ဆွေးနွေးမှုတွေပြုလုပ်ခဲ့တာဖြစ်ပါတယ်။

ဘန်လေအသင်းကတော့ စကော့ပါကားရဲ့ အနာဂတ်မျှော်မှန်းချက်တွေဟာ သူတို့ရဲ့ရည်မှန်းချက်တွေနဲ့ ကိုက်ညီနေပြီး ပရီးမီးယားလိဂ်ကို အမြန်ဆုံးပြန်လာနိုင်ဖို့ ရည်မှန်းထားတယ်လို့ ပြောခဲ့တာပါ။ 

ချယ်လ်ဆီးနဲ့ စပါးအသင်းတွေမှာ ကစားခဲ့တဲ့ စကော့ပါကားဟာ နည်းပြဘဝမှာ ဖူလ်ဟမ်၊ဘုန်းမောက်နဲ့ ကလပ်ဘရုဂျ်အသင်းတွေကို ကိုင်တွယ်ထားခဲ့ပြီး အနိုင်က ၃၈.၉၅ ရာခိုင်နှုန်းသာ ရှိတယ်လို့ သိရပါတယ်။

ဘန်လေအသင်းဟာ ရာသီသစ် ချန်ပီယံရှစ်အဖွင့်ပွဲစဉ်အဖြစ် သြဂုတ် ၁၂ ရက် လူတန်အသင်းအိမ်ကွင်းမှာ သွားရောက်ယှဉ်ပြိုင်ရမှာဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ ဇူလိုင် ၆

စပိန်အသင်းနည်းပြ ဒယ်လာဖွန်တေက ယူရို ၂၀၂၄ ပြိုင်ပွဲ ကွာတားဖိုင်နယ်ပွဲစဉ်မှာ ဂျာမနီအသင်းကို အချိန်ပိုမှာ အနိုင်ရရှိအောင် ကြိုးစားအားထုတ်ခဲ့ကြတဲ့ ကစားသမားတွေရဲ့ တိုက်ပွဲဝင်စိတ်ဓါတ်ကို ဂုဏ်ယူကြောင်း ပြောခဲ့ပါတယ်။

ဒယ်လာဖွန်တေက “ဒီလိုမျိုးစိတ်ဓါတ်ရှိတဲ့ ကစားသမား အစုအဖွဲ့အတွက် ကျနော် ဂုဏ်ယူပါတယ်။ သူတို့တွေဟာ ကြိုးစားပြီး နေ့တိုင်းတိုးတက်မှုတွေ ရရှိချင်တဲ့သူတွေပါ။ သူတို့တွေဟာ ရည်မှန်းချက်ရှိပြီး နေ့တိုင်း ပိုကောင်းအောင်လုပ်ဖို့ကို စိတ်အားထက်သန်ကြပါတယ်။ သူတို့ကို နည်းပြရတဲ့အတွက် ကျနော်ဂုဏ်ယူပါတယ်”လို့ ပြောခဲ့တာပါ။

ယူရို ၂၀၂၄ ပြိုင်ပွဲ ကွာတားဖိုင်နယ်ပွဲစဉ်အဖြစ် ယှဉ်ပြိုင်ခဲ့တဲ့ စပိန်အသင်းနဲ့ ဂျာမနီအသင်းတို့ပွဲစဉ်မှာ စပိန်အသင်းဟာ အချိန်ပိုမှာ ၂ ဂိုး-၁ ဂိုးနဲ့ အနိုင်ရရှိပြီး ဆီမီးဖိုင်နယ်ကို တက်နိုင်ခဲ့ပါတယ်။ 

စပိန်နဲ့ဂျာမနီ ယှဉ်ပြိုင်နေစဉ်

ဒီ ၂ သင်းဟာ ပွဲချိန်အတွင်း ၁ ဂိုးစီ သရေကျခဲ့တာကြောင့် အချိန်ပိုဆက်ကစားခဲ့ရပြီး အချိန်ပိုနောက်ဆုံးမိနစ်မှာ မာရီနိုက စပိန်အသင်းအတွက် အဖိုးတန်အနိုင်ဂိုးကို သွင်းယူပေးခဲ့တာပါ။ 

စပိန်အသင်းဟာ ဒီပွဲအနိုင်ရရှိခဲ့ပေမယ့် ကွင်းလယ်လူ ပီဒရီ ဒဏ်ရာရရှိသွားခဲ့သလို နောက်ခံလူ ကာဗာဂျယ်လည်း ၂ ဝါ ၁ နီနဲ့ ထုတ်ပယ်ခံခဲ့ရပါတယ်။ 

စပိန်အသင်းနည်းပြ ဒယ်လာဖွန်တေက ဂျာမနီအသင်းကို အနိုင်ရရှိခဲ့လို့ ပျော်ရွှင်ပေမယ့် နောက်တစ်နေ့မှာတော့ ဆီမီးဖိုင်နယ်ပွဲစဉ်အတွက် ပြင်ဆင်မှုတွေကို ပြုလုပ်ရမယ်လို့ ပြောခဲ့တာပါ။ 

စပိန်အသင်းဟာ ယူရို ၂၀၂၄ ပြိုင်ပွဲဆီမီးဖိုင်နယ်ပွဲစဉ်အဖြစ် ပြင်သစ်အသင်းနဲ့ ယှဉ်ပြိုင်ရမှာဖြစ်ပြီး ဒီပွဲစဉ်ကို ဇူလိုင် ၁၀ ရက်မှာ ကျင်းပသွားမှာဖြစ်ပါတယ်။ 

Source:CNA