- By CNI
- Category: အားကစား
- Hits: 467
CNI Sport News
၂၀၂၅ ခုနှစ်၊ ဧပြီ ၁
တံကောက်ကြောဒဏ်ရာကြောင့် ပွဲကစားနိုင်ဖို့ ကာလရှည်ကြာ စောင့်ဆိုင်းနေရတဲ့ ဆာကာဟာ အာဆင်နယ် အသင်းအတွက် ပါဝင်ဖို့အဆင်သင့် ဖြစ်နေပြီလို့ နည်းပြအာတီတာက ပြောခဲ့ပါတယ်။
အာတီတာက “ဆာကာအတွက် သတိထားစရာတွေ အားလုံးပြီးသွားပြီဖြစ်လို့ သူ့ကိုမြက်ခင်းပြင်ပေါ်မှာ အသုံးပြု ရမယ့် အချိန်ရောက်ပါပြီ။ သူကလည်း ပါဝင်ကစားချင်နေတာကြောင့် တွန်းအားပေးနေပါတယ်။ ဆာကာဟာ ကျနော်တို့မှာရှိနေတဲ့ ကြီးမားတဲ့ လက်နက်တစ်ခုပါ။ အသင်းအပေါ်သူ့ရဲ့ သက်ရောက်မှုတွေ၊ သူ့ရဲ့အခန်းကဏ္ဍနဲ့ ပံ့ပိုးပေးမှုတွေက ဘယ်လောက်အထိ အရေးပါလဲဆိုတာ ကျနော်တို့သိပါတယ်”လို့ ပြောခဲ့တာပါ။
ဒီရာသီမှာ အာဆင်နယ်အသင်းအတွက် ပြိုင်ပွဲစုံ ၂၄ ပွဲ ပါဝင်ကစားထားပြီး ဂိုးပါဝင်ပတ်သက်မှု ၂၃ ဂိုး ပြုလုပ် ထားတဲ့ ဆာကာဟာ တံကောက်ကြော ဒဏ်ရာကြောင့် ပြီးခဲ့တဲ့နှစ် ဒီဇင်ဘာကတည်းက အနားယူနေခဲ့ရတာ ဖြစ်ပါတယ်။
အာဆင်နယ်အသင်းဟာ ပရီးမီးယားလိဂ်ပြိုင်ပွဲမှာ အမှတ်ပေးဇယား အဆင့် ၁ နေရာက လီဗာပူးလ်အသင်းနဲ့ ၁၂ မှတ် အကွာအဆင့် ၂ နေရာမှာ ရပ်တည်နေတာပါ။
ဆာကာကို တွေ့ရစဉ်
ဒါပေမယ့် အာဆင်နယ်အသင်းဟာ ချန်ပီယံလိဂ်ပြိုင်ပွဲမှာ ကွာတားဖိုင်နယ်ကို ရောက်ရှိနေပြီး လက်ရှိချန်ပီယံ ရီးရယ်လ်အသင်းနဲ့ ယှဉ်ပြိုင်ရမှာဖြစ်ပါတယ်။
အဲဒါကြောင့် ဆာကာအသင်းအတွက် ပြန်ပါဝင်နိုင်မှာက ရာသီရဲ့ အရေးကြီးတဲ့ အစိတ်အပိုင်းအတွက် အားကောင်းမှုကို ဖြစ်စေတယ်လို့ နည်းပြအာတီတာက ပြောခဲ့ပါတယ်။
ဆာကာ ပြန်ပါဝင်နိုင်မှာ ဖြစ်ပေမယ့် ပြီးခဲ့တဲ့ နိုင်ငံတကာပွဲစဉ်မှာ အီတလီအသင်းအတွက် ပါဝင်ကစားရင်း ဒဏ်ရာရရှိခဲ့တဲ့ နောက်ခံလူ ကာလာဖီအိုရီဟာ ရက်သတ္တပတ် အနည်းငယ်ကြာ အနားယူရဦးမှာပါ။
အာဆင်နယ်အသင်းဟာ ဧပြီ ၂ ရက်မှာ ပရီးမီးယားလိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပြီး ဖူလ်ဟမ်အသင်း အိမ်ကွင်းမှာ ကစားခဲ့တုန်းက ၁ ဂိုးစီ သရေရလဒ် ထွက်ပေါ်ခဲ့တာဖြစ်ပါတယ်။
Source: CNA
- By CNI
- Category: အားကစား
- Hits: 522
CNI Sport News
၂၀၂၅ ခုနှစ်၊ မတ်လ ၃၁
အာဆင်နယ်အသင်း အပါအဝင် ပရီးမီးယားလိဂ် ထိပ်သီးတွေရဲ့ စိတ်ဝင်စားမှုကိုခံနေရတဲ့ ဘရာဇီးလ်ကြယ်ပွင့် ကွန်ညာက နွေရာသီမှာ ဝုလ်ဗ်စ်အသင်းကနေ ထွက်ခွာဖွယ်ရှိတယ်လို့ အရိပ်အမြွက် ပြောခဲ့ပါတယ်။
ကွန်ညာက “ကျနော် ကမ်းလှမ်းမှုတွေ အများကြီးရရှိခဲ့ပါတယ်။ အချို့အရာတွေကို ထိန်းချုပ်လို့ မရပေမယ့် ရာသီအလယ်၊ ခက်ခဲတဲ့ အခြေအနေမှာ တန်းဆင်းဇုန် အနားမှာရှိတဲ့ ကလပ်ကိုထားပြီး ကျနော် မထွက်ခွာ နိုင်ပါဘူး။ အခုအချိန်မှာ ကျနော်တို့လိုချင်တဲ့ ပရီးမီးယားလိဂ်မှာ ဆက်ရှိဖို့ကို ပြီးမြောက်နိုင်ဖို့နီးစပ်နေပါပြီ။ ကျနော်ဟာ နောက်တဆင့်သွားဖို့ လိုတယ်ဆိုတာ ရှင်းရှင်းလင်းလင်း ပြောပြီးသားပါ။ ဆုဖလားတွေ၊ ကြီးမားတဲ့ အရာတွေအတွက် ကျနော် တိုက်ပွဲဝင်ချင်ပါတယ်။ ကျနော့်မှာ အလားအလာရှိတယ်”လို့ The Guardian ကို ပြောခဲ့တာပါ။
ကွန်ညာဟာ ပြီးခဲ့တဲ့ ဇန်နဝါရီက အာဆင်နယ်အသင်းရဲ့ ချိတ်ဆက်မှုတွေ ခံခဲ့ရပေမယ့် ဝုလ်ဗ်စ်အသင်းနဲ့ စာချုပ်သစ် ချုပ်ဆိုခဲ့တာဖြစ်ပါတယ်။
ဒီစာချုပ်ထဲမှာ ပေါင် ၆၂ သန်းနဲ့ ထွက်ခွာခွင့်ပေးမယ့် အချက်ပါဝင်နေတာကြောင့် အာဆင်နယ်၊ လီဗာပူးလ်၊ ယူနိုက်တက်၊ ချယ်လ်ဆီး၊ နော်တင်ဟမ်ဖောရက်စ်အသင်းတို့က ဒီပြောင်းရွှေ့ကြေးပေးပြီး ခေါ်ယူချင်နေတာပါ။
ကွန်ညာ ကိုယ်တိုင်ကလည်း သူဟာ နွေရာသီမှာ ထွက်ခွာဖို့ အဆင်သင့် ဖြစ်နေပြီလို့ ပြောခဲ့ပါတယ်။
ကွန်ညာကို တွေ့ရစဉ်
ဝုလ်ဗ်စ်အသင်းဟာ ပြီးခဲ့တဲ့ဇန်နဝါရီက တန်းဆင်းဇုန်ထဲ ကျရောက်နေပေမယ့် အခုအမှတ်ပေးဇယား အဆင့် ၁၇ နေရာမှာ ရပ်တည်နေကာ အဆင့် ၁၈ နေရာက အစ်စဝှစ်ခ်ျအသင်းကို ရမှတ် ၉ မှတ်အထိ ဖြတ်ထားနိုင်ခဲ့တာပါ။
ကွန်ညာဟာ ဒီရာသီမှာ ဝုလ်ဗ်စ်အသင်းအတွက် ၂၆ ပွဲ ကစားထားထားမှာ လိဂ်သွင်းဂိုး ၁၃ ဂိုးအထိ သွင်းယူထား ပါတယ်။
ဝုလ်ဗ်စ်အသင်းဟာ ကြားရက်ထဲမှာ ပရီးမီးယားလိဂ် ပွဲစဉ်အဖြစ် ဝက်စ်ဟမ်းအသင်းနဲ့ ယှဉ်ပြိုင်ရမှာဖြစ်ပြီး ကွန်ညာဟာ ပွဲပယ်ကြောင့် ဒီပွဲကို လွဲချော်မှာဖြစ်ပါတယ်။
Source: Goal
ပုံ - ကွန်ညာကို တွေ့ရစဉ်
- By CNI
- Category: အားကစား
- Hits: 578
CNI Sport News
၂၀၂၅ ခုနှစ်၊ မတ်လ ၃၁
ဥရောပထိပ်သီး ကလပ်တွေရဲ့ ပစ်မှတ်အဖြစ်ရှိနေတဲ့ လိုက်ပ်ဇစ်အသင်းကြယ်ပွင့် ဆက်စ်ကိုဟာ ဘိုင်ယန်မြူးနစ် အသင်းမှာ ဟာရီကိန်းရဲ့ အရန်အဖြစ် မရှိချင်တာကြောင့် ပရီးမီးယားလိဂ်ထံ ပြောင်းရွှေ့ဖို့ ဆန္ဒရှိနေပါတယ်။
ဆက်စ်ကိုဟာ ဆဲလ်ဘတ်အသင်းမှာ ကစားချိန်ကတည်းက ဥရောပရဲ့ အလားအလာ အရှိဆုံး လူငယ်တိုက်စစ် ကစားသမားတွေထဲက တစ်ဦးအဖြစ် သတ်မှတ်ခြင်းခံခဲ့ရတာပါ။
ဆက်စ်ကိုဟာ လိုက်ပ်ဇစ်အသင်းထံ ပြောင်းရွှေ့ပြီးနောက်မှာ ပိုမို အထင်ကြီးဖွယ်ကောင်းတဲ့ စွမ်းဆောင်ရည် တွေကို ပြသနိုင်ခဲ့ပြီး ဂျာမန်ကလပ်အတွက် ပြိုင်ပွဲစုံ ၇၉ ပွဲ ပါဝင်ကစားထားတာမှာ ၃၅ ဂိုးသွင်းပြီး ဂိုးဖန်တီးမှု ၈ ကြိမ် ပြုလုပ်နိုင်ခဲ့တာ ဖြစ်ပါတယ်။
အဲဒါကြောင့် ဆက်စ်ကို,ကို ခေါ်ယူဖို့ ယူနိုက်တက်၊ အာဆင်နယ်၊ အေစီမီလန်နဲ့ ဘိုင်ယန်မြူးနစ်အသင်းတို့ အပါအဝင် ဥရောပထိပ်သီး အချို့က သူ့ရဲ့အခြေအနေကို စောင့်ကြည့်မှုတွေ ပြုလုပ်ခဲ့ကြတာပါ။
ဂျာမန်သတင်း Bild က ဆက်စ်ကိုဟာ သူ့ကို ပုံမှန်ပွဲထွက်ခွင့် ပေးနိုင်မယ့် အသင်းကို ရှာဖွေနေတယ်လို့ ဖော်ပြထားပါတယ်။
ဘိုင်ယန်မြူးနစ်အသင်းဟာ ဆက်စ်ကို,ကို ဟာရီကိန်းရဲ့ အရန်အဖြစ် ခေါ်ယူချင်နေပေမယ့် သူကတော့ အရန်ခုံပေါ်မှာထိုင်ဖို့ စိတ်မဝင်စားတာပါ။
ဆက်စ်ကိုနဲ့ လိုက်ပ်ဇစ်အသင်းတို့ရဲ့ လက်ရှိစာချုပ်ထဲမှာ ယူရိုသန်း ၇၀ နဲ့ ထွက်ခွာခွင့်ပြုမယ့် အချက် ပါဝင်နေ ပေမယ့် သူ့ရဲ့စွမ်းဆောင်ရည်အရ ယူရိုသန်း ၈၀ အထိ တိုးသွားနိုင်ပါတယ်။
လိုက်ပ်ဇစ်အသင်းဟာ ဆက်စ်ကိုအတွက် ပြောင်းရွှေ့ကြေး ယူရိုသန်း ၇၀ ဝန်းကျင်နဲ့ ညှိနှိုင်းမှုပြုလုပ်ဖို့ ဆန္ဒရှိ နေတယ်လို့လည်း သိရပါတယ်။
ဆက်စ်ကိုဟာ ဥရောပထိပ်တန်း ကလပ်တွေကို ဆွဲဆောင်နိုင်တဲ့ တစ်ဦးတည်းသော တိုက်စစ်မှူးတော့ မဟုတ်ပါဘူး။
ဆက်စ်ကိုဟာ လက်ရှိအချိန်မှာတော့ လိုက်ပ်ဇစ်အသင်းအတွက် ရာသီကုန်အထိ အကောင်းဆုံး စွမ်းဆောင်နိုင်ဖို့ အာရုံစိုက်နေပြီး နွေရာသီမှ အနာဂတ်ကို ဆုံးဖြတ်ဖို့ရှိနေတာပါ။
လိုက်ပ်ဇစ်အသင်းဟာ ဧပြီ ၂ ရက်မှာ ပိုကယ်လ်ဖလား ဆီမီးဖိုင်နယ် ပွဲစဉ်အဖြစ် စတုဂတ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: Goal
- By CNI
- Category: အားကစား
- Hits: 422
CNI Sport News
၂၀၂၅ ခုနှစ်၊ မတ်လ ၃၁
မန်စီးတီးအသင်းက ဘုန်းမောက်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ FA ဖလား ကွာတားဖိုင်နယ်ပွဲစဉ်မှာ တိုက်စစ်မှူး ဟာလန်းဟာ ခြေချင်းဝတ်ဒဏ်ရာကြောင့် ပွဲချိန်မိနစ် ၆၀ မှာ လူစားလဲခံခဲ့ရပါတယ်။
ဟာလန်းဟာ ဒီပွဲစဉ်ရဲ့ ပွဲချိန် ၅၆ မိနစ်မှာ ဘုန်းမောက်အသင်း ကစားသမား လူးဝစ်ကွတ်နဲ့ ထိခိုက်မိခဲ့ပြီးနောက် ဆေးကုသမှုခံယူကာ ပြန်ကစားခဲ့တာပါ။
ဒါပေမယ့် ဟာလန်းဟာ နာကျင်နေတဲ့အတွက် ကွင်းထဲလဲကျသွားခဲ့ပြီးနောက် လူစားလဲခံခဲ့ရတာ ဖြစ်ပါတယ်။
ဟာလန်းဟာ ဒီပွဲစဉ်ရဲ့ ပထမပိုင်းမှာ ပင်နယ်တီ လွဲချော်ခဲ့ပေမယ့် ဒုတိယပိုင်းမှာ မန်စီးတီးအသင်းအတွက် အဖိုးတန် ချေပဂိုးကို သွင်းယူနိုင်ခဲ့တာပါ။
ဟာလန်းဟာ ဒီပွဲအပြီးမှာ ချိုင်းထောက်၊ အကာအကွယ်ပါတဲ့ ဖိနပ်ဝတ်ဆင်ကာ ကွင်းထဲကနေ ထွက်ခွာခဲ့တာ ဖြစ်ပါတယ်။
ဟာလန်းကို တွေ့ရစဉ်
မန်စီးတီးအသင်းနည်းပြ ဂွာဒီယိုလာဟာ ပွဲအပြီး မီဒီယာတွေ့ဆုံမှုမှာ ဟာလန်းရဲ့ ဒဏ်ရာ အခြေအနေနဲ့ ပတ်သက်ပြီး သူ့မှာ နောက်ဆုံးရ အချက်အလက်တွေ မရှိဘူးလို့ ပြောခဲ့တာပါ။
မန်စီးတီးအသင်းဟာ ဒီပွဲမှာ ဟာလန်းရဲ့နေရာ လူစားလဲ ဝင်ရောက်လာခဲ့တဲ့ အိုမာမာမွတ်ရှ်ရဲ့ သွင်းဂိုးနဲ့ ဘုန်းမောက်အသင်းကို အနိုင်ရပြီး FA ဖလားပြိုင်ပွဲ ဆီမီးဖိုင်နယ်ကို ၇ ရာသီ ဆက်တိုက် တက်နိုင်ခဲ့တာ ဖြစ်ပါတယ်။
မန်စီးတီးအသင်းဟာ ဆီမီးဖိုင်နယ်အဖြစ် နော်တင်ဟမ်ဖောရက်စ်အသင်းနဲ့ ယှဉ်ပြိုင်ရမှာပါ။
ဒီရာသီမှာ ရလဒ်တွေဆိုးရွားနေတဲ့ မန်စီးတီးအသင်းအတွက် FA ဖလားဟာ သူတို့အတွက် တစ်ခုတည်းသော ဆုဖလား မျှော်လင့်ချက်လည်း ဖြစ်ပါတယ်။
မန်စီးတီးအသင်းဟာ ပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့် ၅ နေရာ ရပ်တည်နေတာကြောင့် လာမယ့်ရာသီ ချန်ပီယံလိဂ်ဝင်ခွင့်ရဖို့အတွက် လက်ကျန် ၉ ပွဲစလုံးမှာ ရလဒ်ကောင်း ရယူနိုင်ဖို့ မျှော်လင့်နေ တာပါ။
မန်စီးတီးအသင်းဟာ လာမယ့် ကြားရက်ထဲမှာ ပရီးမီးယားလိဂ်ပွဲစဉ်အဖြစ် လက်စတာအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: ESPN
- By CNI
- Category: အားကစား
- Hits: 703
CNI Sport News
၂၀၂၅ ခုနှစ်၊ မတ်လ ၃၁
အက်စတွန်ဗီလာအသင်းက ပရက်စတန်အသင်းကို ၃ ဂိုး-ဂိုးမရှိနဲ့ အနိုင်ရခဲ့တဲ့ FA ဖလား ကွာတားဖိုင်နယ်ပွဲစဉ်မှာ ၂ ဂိုးသွင်းခဲ့တဲ့ တိုက်စစ်မှူး ရက်ရှ်ဖို့ဒ်က အက်စတွန်ဗီလာအသင်းအတွက် ပထမဆုံးဂိုးတွေ သွင်းယူနိုင်တဲ့ ခံစားချက်က ကြီးမားတယ်လို့ ပြောခဲ့ပါတယ်။
ရက်ရှ်ဖို့ဒ်က “ဒီခံစားချက်က ကြီးမားပါတယ်။ ကျနော် ဒီကိုရောက်ရှိလာကတည်းက တဖြေးဖြေးချင်း ကြံ့ခိုင်မှုပိုင်း ပိုကောင်းလာသလို ဘောလုံးကစားတာလည်း ပိုပြီးကောင်းလာတယ်လို့ ခံစားရပါတယ်။ ရှေ့တန်းကစားသမား တွေအတွက် အမြဲတမ်း ဂိုးသွင်းယူနိုင်တာက ကောင်းပါတယ်။ ဒါကြောင့် ဒီလိုမျိုးဆက်ပြီး လုပ်နိုင်ဖို့မျှော်လင့် တယ်”လို့ ပြောခဲ့တာပါ။
ရက်ရှ်ဖို့ဒ်ဟာ ယူနိုက်တက်အသင်းမှာ နည်းပြအာမိုရင်နဲ့ အဆင်မပြေမှုတွေ ရှိခဲ့တာကြောင့် ပြီးခဲ့တဲ့ ဇန်နဝါရီက အက်စတွန်ဗီလာအသင်းထံ ရာသီကုန်အထိ အငှားနဲ့ ပြောင်းရွှေ့လာခဲ့တာ ဖြစ်ပါတယ်။
ရက်ရှ်ဖို့ဒ်ကို တွေ့ရစဉ်
ရက်ရှ်ဖို့ဒ်ဟာ အက်စတွန်ဗီလာအသင်းမှာ ပြသနေတဲ့ ခြေစွမ်းတွေကြောင့် ပြီးခဲ့တဲ့ နိုင်ငံတကာ ရက်သတ္တပတ်မှာ နည်းပြတူချယ်လ်က သူ့ကို အင်္ဂလန်အသင်း လူစာရင်းထဲ ရွေးချယ်ပြီး ပွဲထွက်လူစာရင်းထဲ အသုံးပြုခဲ့တာပါ။
ရက်ရှ်ဖို့ဒ်က သူဟာ တဆင့်ပြီးတဆင့် သွားနေပြီး ဘောလုံးကစားရင်း ပျော်ရွှင်နေတာကြောင့် အခုအချိန်မှာ အားလုံးအဆင်ပြေတယ်လို့ ပြောခဲ့ပါတယ်။
ဒါအပြင် ရက်ရှ်ဖို့ဒ်က အက်စတွန်ဗီလာအသင်းဟာ ပြိုင်ပွဲတိုင်းမှာ အနိုင်ရချင်တာကြောင့် အနိုင်ရဖို့ကြိုးစား သွားမယ်လို့လည်း ပြောခဲ့တာပါ။
အက်စတွန်ဗီလာအသင်းဟာ FA ဖလားပြိုင်ပွဲမှာ ဆီမီးဖိုင်နယ်ကို တက်ရောက်နိုင်ခဲ့သလို ချန်ပီယံလိဂ်ပြိုင်ပွဲမှာ ကွာတားဖိုင်နယ်နဲ့ ပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့် ၄ နေရာက ချယ်လ်ဆီးအသင်းနဲ့ ၄ မှတ် ကွာဟနေတာဖြစ်ပါတယ်။
Source: ESPN
- By CNI
- Category: အားကစား
- Hits: 506
CNI Sport News
၂၀၂၅ ခုနှစ်၊ မတ်လ ၂၈
အာဂျင်တီးနားအသင်းဖော် တချို့ဟာ အန်ဇိုဖာနန်ဒက်ဇ်ကို ချယ်လ်ဆီး အသင်းကနေ ထွက်ခွာပြီး အသလက်တီကိုအသင်းထံ ပြောင်းရွှေ့ဖို့ တိုက်တွန်းမှုတွေ ရှိနေပေမယ့် သူကတော့ ဒီအပြောင်းအရွှေ့ကို ငြင်းပယ်ခဲ့ပါတယ်။
အန်ဇိုဖာနန်ဒက်ဇ်ဟာ ချယ်လ်ဆီးအသင်းကို ၂၀၂၃ ခုနှစ်က ဘင်ဖီကာအသင်းကနေ ဗြိတိန်စံချိန်တင် ပြောင်းရွှေ့ ကြေး ပေါင် ၁၀၆.၈ သန်းနဲ့ ပြောင်းရွှေ့လာခဲ့ပြီး ၂၀၃၁ ခုနှစ်အထိ ကာလရှည် စာချုပ်ချုပ်ဆိုထားတာပါ။
အန်ဇိုဖာနန်ဒက်ဇ်ဟာ ဒီရာသီမှာ ချယ်လ်ဆီးအသင်းအတွက် အကောင်းဆုံး စွမ်းဆောင်ရည်တွေ ပြသနေ တာကြောင့် အသလက်တီကိုနဲ့ ရီးရယ်လ်အသင်းတို့က သူ့ကိုခေါ်ယူဖို့ စိတ်ဝင်စားနေကြတာ ဖြစ်ပါတယ်။
အသလက်တီကိုအသင်းမှာ ကစားနေတဲ့ အန်ဇိုဖာနန်ဒက်ဇ်ရဲ့ အာဂျင်တီးနား အသင်းဖော်တွေဖြစ်တဲ့ ဒီပေါလ်၊ မိုလီနာ၊ အယ်လ်ဗားရက်ဇ်၊ ကော်ရီယာနဲ့ ဆီမြွန်နီတို့ဟာ သူ့ကို စပိန်ကလပ်ထံ ပြောင်းရွှေ့လာဖို့ တိုက်တွန်းမှုတွေ ပြုလုပ်ခဲ့ကြတာပါ။
အန်ဇိုဖာနန်ဒက်ဇ်ကို တွေ့ရစဉ်
ဒါပေမယ့် အန်ဇိုဖာနန်ဒက်ဇ်ဟာ လက်ရှိအချိန်မှာ ချယ်လ်ဆီး အသင်းကနေ ထွက်ခွာဖို့ ရည်ရွယ်ထားခြင်း မရှိတာ ကြောင့် အသလက်တီကိုအသင်းထံ ပြောင်းရွှေ့ဖို့ ငြင်းပယ်ခဲ့တာဖြစ်ပါတယ်။
အန်ဇိုဖာနန်ဒက်ဇ်ဟာ အနာဂတ်မှာတော့ စပိန်ထံပြောင်းရွှေ့ဖို့ အပါအဝင် သူ့ရဲ့ရွေးချယ်မှုတွေကို လမ်းဖွင့်ထားဆဲ ဖြစ်တယ်လို့ သိရပါတယ်။
အာဂျင်တီးနား ကွင်းလယ်လူဟာ ဒီရာသီ ချယ်လ်ဆီးအသင်းရဲ့ ပွဲအများအပြားကို အသင်းခေါင်းဆောင်အဖြစ် တာဝန်ယူခဲ့ရပြီး ပြိုင်ပွဲစုံ ၃၅ ပွဲ ပါဝင်ကစားထားတာမှာ ၅ ဂိုးသွင်းပြီး ဂိုးဖန်တီးမှု ၉ ကြိမ်ပြုလုပ်ထားတာပါ။
ချယ်လ်ဆီးအသင်းဟာ လာမယ့် ပရီးမီးယားလိဂ် ပွဲစဉ်အဖြစ် စပါးအသင်းကို အိမ်ကွင်းယှဉ်ပြိုင်ရမှာ ဖြစ်ပါတယ်။
Source: besoccer
- By CNI
- Category: အားကစား
- Hits: 648
CNI Sport News
၂၀၂၅ ခုနှစ်၊ မတ်လ ၂၈
ဂျာအိုဖီးလစ်ရဲ့အေးဂျင့် ဂျော့ချ်မန်ဒက်စ်ဟာ သူ့ရဲ့ကစားသမားအတွက် အသင်းသစ်ရှာဖွေဖို့ ဆွေးနွေးမှု တွေစတင်နေတာကြောင့် ပေါ်တူဂီကြယ်ပွင့်ဟာ နွေရာသီမှာ ဂါလာတာစာရေးအသင်းထံ ပြောင်းရွှေ့ဖွယ် ရှိနေတာဖြစ်ပါတယ်။
ဂျာအိုဖီးလစ်ဟာ ပြီးခဲ့တဲ့နွေရာသီက ချယ်လ်ဆီးအသင်းထံ ဒုတိယအကြိမ်မြောက်ပြောင်းရွှေ့ပြီးနောက် ခက်ခဲတဲ့ရာသီနဲ့ ရင်ဆိုင်နေရတာပါ။ ဂျာအိုဖီးလစ်ဟာ ပြီးခဲ့တဲ့ဇန်နဝါရီက အေစီမီလန်အသင်းထံ အငှားနဲ့ မပြောင်းရွှေ့ခင် ချယ်လ်ဆီးအသင်းအတွက် ပြိုင်ပွဲစုံပွဲပေါင်း ၂၀ ပါဝင်ကစားခဲ့တာဖြစ်ပါတယ်။ ပေါ်တူဂီ ကစားသမားဟာ အီတလီမှာလည်း ရုန်းကန်နေရတာကြောင့် အေးဂျင့်ဖြစ်သူ ဂျော့ချ်မန်ဒက်စ်က သူ့ရဲ့ ကစားသမားကို ဂါလာတာစာရေးအသင်းထံ ပြောင်းရွှေ့နိုင်အောင် ကြိုးပမ်းနေတယ်လို့ တူရကီသတင်းတွေမှာ ဖော်ပြထားတာပါ။
ဂျာအိုဖီးလစ်ကလည်း ဂါလာတာစာရေးအသင်းထံ ပြောင်းရွှေ့ဖို့ စိတ်အားထက်သန်နေတယ်လို့ သိရပါတယ်။ ဂါလာတာစာရေးအသင်းရဲ့တိုက်စစ်မှူးတွေဖြစ်တဲ့ အိုဆင်ဟမ်၊အိုင်ကာဒီနဲ့ မိုရာတာတို့ဟာ ကလပ်ကနေ ထွက်ခွာနိုင်တဲ့အတွက် တူရကီကလပ်ဟာ ဂျာအိုဖီးလစ်နဲ့ အပြောင်းအရွှေ့အတွက် ဆွေးနွေးညှိနှိုင်းမှုတွေ ပြုလုပ်နိုင်တာပါ။ ဂါလာတာစာရေးအသင်းဟာ ဂျာအိုဖီးလစ်အတွက် ချယ်လ်ဆီးအသင်းကို အပြီးသတ် ဝယ်ယူခွင့်ပါဝင်တဲ့ အငှားစာချုပ် ဒါမှမဟုတ် အခြားကမ်းလှမ်းမှုတွေ ပြုလုပ်လာဖို့ ရှိနေတာဖြစ်ပါတယ်။
အသက် ၂၅ နှစ်အရွယ်ရှိ ဂျာအိုဖီးလစ်ဟာ ချယ်လ်ဆီးအသင်းအတွက် ၂ ကြိမ်ကစားခဲ့တဲ့အချိန်အတွင်း ပွဲပေါင်း ၄၀ ပါဝင်ကစားပြီး ၁၁ ဂိုးသွင်းယူကာ ဂိုးဖန်တီးမှု ၂ ကြိမ်ပြုလုပ်ထားတာပါ။ ဂါလာတာစာရေးအသင်းဟာ ဂျာအိုဖီးလစ်ရဲ့အပြောင်းအရွှေ့မတိုင်ခင် လက်ရှိအချိန်မှာ တူရကီစူပါလိဂ်ဖလားကို ရယူနိုင်ဖို့ အာရုံစိုက် နေပါတယ်။
ဂါလာတာစာရေးအသင်းဟာ ဒီရာသီတူရကီစူပါလိဂ်ပြိုင်ပွဲမှာ ပေါ်တူဂီလူမျိုးနည်းပြ မော်ရင်ဟိုကိုင်တွယ်နေတဲ့ ဖီနာဘာချီအသင်းထက် ၁ ပွဲပိုကစားထားပြီး ရမှတ် ၉ မှတ်အသာနဲ့ အမှတ်ပေးဇယားထိပ်ဆုံးနေရာမှာ ရပ်တည် နေတာဖြစ်ပါတယ်။
Source:Goal
- By CNI
- Category: အားကစား
- Hits: 507
CNI Sport News
၂၀၂၅ ခုနှစ်၊ မတ်လ ၂၈
ပရီးမီးယားလိဂ်ဟာ လာမယ့် ကလပ်ကမ္ဘာ့ဖလား ပြိုင်ပွဲမတိုင်ခင် မန်စီးတီးနဲ့ ချယ်လ်ဆီးအသင်းတို့ ကစားသမား တွေ ခေါ်ယူနိုင်ဖို့အတွက် နွေရာသီ အပြောင်းအရွှေ့ကာလ ၂ ခုရှိမယ်လို့ ကြေညာခဲ့ပါတယ်။
ပထမ အပြောင်းအရွှေ့ ကာလကို ဇွန်လ ၁ ရက်ကနေ ၁၀ ရက်အထိ ဖွင့်သွားမှာဖြစ်ပြီး ဒုတိယအပြောင်းအရွှေ့ ကာလကို ဇွန်လ ၁၆ ရက်ကနေ စက်တင်ဘာ ၁ ရက်အထိ ဖွင့်လှစ်သွားမှာပါ။
လာမယ့် နွေရာသီမှာ အသင်းပေါင်း ၃၂ သင်းနဲ့ ပထမဆုံးအကြိမ် ဖီဖာကလပ် ကမ္ဘာ့ဖလားပြိုင်ပွဲကို ကျင်းပသွားမှာ ဖြစ်ပါတယ်။
ချယ်လ်ဆီးနဲ့ မန်စီးတီးအသင်းတို့ဟာ ဒီပြိုင်ပွဲကို ဝင်ရောက်ယှဉ်ပြိုင်မယ့် ပရီးမီးယားလိဂ် အသင်းတွေပါ။
ကမ္ဘာ့ဘောလုံးအဖွဲ့ချုပ်(ဖီဖာ)ဟာ ဇွန်လ ၁ ရက်ကနေ ၁၀ ရက်အထိ ကလပ်ကမ္ဘာ့ဖလား ပြိုင်ပွဲအတွက် ကစားသမားသစ်တွေကို စာရင်းသွင်း မှတ်ပုံတင်ခွင့် ပြုထားတာဖြစ်ပါတယ်။
ရှုံးထွက်အဆင့်တွေအတွက် ဇွန်လ ၂၇ ရက်နေ ဇူလိုင် ၃ ရက်အထိ နောက်ထပ် စာရင်းသွင်း မှတ်ပုံတင်ခွင့် ပြုသွားမှာပါ။
ကလပ်ကမ္ဘာ့ဖလားပြိုင်ပွဲ ပွဲစဉ်ဇယားကိုတွေ့ရစဉ်
ကလပ်ကမ္ဘာ့ဖလားပြိုင်ပွဲကို မန်စီးတီး၊ ချယ်လ်ဆီးအသင်းအပြင် ဥရောပထိပ်သီးတွေဖြစ်တဲ့ ရီးရယ်လ်၊ အသလက်တီကို၊ အင်တာမီလန်၊ ဂျူဗင်တပ်စ်၊ ပီအက်စ်ဂျီ၊ ဘိုင်ယန်မြူးနစ်၊ ဒေါ့မွန်အသင်းတို့လည်း ပါဝင် ယှဉ်ပြိုင်ကြမှာဖြစ်ပါတယ်။
မန်စီးတီးအသင်းဟာ ဒီပြိုင်ပွဲရဲ့ အုပ်စု G မှာ ဝိုင်ဒတ်၊ အယ်လ်အိန်း၊ ဂျူဗင်တပ်စ်အသင်းတို့နဲ့ တစ်အုပ်စုတည်း ကျရောက်နေပါတယ်။
ချယ်လ်ဆီးအသင်းကတော့ အုပ်စု D မှာ ဖလာမင်ဂို၊ တူနစ်တို့နဲ့ တစ်အုပ်စုတည်း ကျရောက်နေပြီး နောက်ထပ် အသင်းတစ်သင်းကို အစားမထိုးရသေးတာပါ။
အမေရိကန်နိုင်ငံက အိမ်ရှင် ပြုလုပ်မယ့် ဒီပြိုင်ပွဲကို ဇွန်လ ၁၄ ရက်ကနေ ဇူလိုင် ၁၃ ရက်အထိ ကျင်းပသွားမှာ ဖြစ်ပါတယ်။
Source: BBC
- By CNI
- Category: အားကစား
- Hits: 537
CNI Sport News
၂၀၂၅ ခုနှစ်၊ မတ်လ ၂၈
ဥရောပဘောလုံးအဖွဲ့ချုပ်(UEFA)ဟာ အာဆင်နယ်အသင်းနဲ့ ယှဉ်ပြိုင်ရမယ့် ချန်ပီယံလိဂ် ကွာတားဖိုင်နယ်ပွဲစဉ် မတိုင်မီ ရီးရယ်လ်ကစားသမား ၄ ဦးကို စုံစမ်းစစ်ဆေးမှုတွေ ပြုလုပ်နေပါတယ်။
ရီးရယ်လ်အသင်းက အသလက်တီကိုအသင်းကို ပင်နယ်တီ အဆုံးအဖြတ်နဲ့ အနိုင်ရရှိခဲ့တဲ့ ချန်ပီယံလိဂ် ၁၆ သင်း အဆင့် ဒုတိယအကျော့ ပွဲစဉ်အပြီးမှာ ဘတ်ပီ၊ ဗီနီစီးယက်စ်၊ ရူဒီဂါနဲ့ ဆီဘယ်လော့စ်တို့ဟာ မဖွယ်မရာ ပြုလုပ်ခဲ့ တယ်ဆိုတဲ့ စွပ်စွဲချက်တွေနဲ့ UEFA က စုံစမ်းစစ်ဆေးမှုတွေ စတင်နေခဲ့တာပါ။
သူတို့တွေအနေနဲ့ အပြစ်ရှိကြောင်း တွေ့ရမယ်ဆိုရင် ပွဲပယ်ပြစ်ဒဏ် ချမှတ်ခံရဖွယ်ရှိနေတာ ဖြစ်ပါတယ်။
စုံစမ်းစစ်ဆေးမှုအတွက် အချိန်ကန့်သတ်ချက် မရှိပေမယ့် အသလက်တီကိုအသင်းဟာ သူတို့စွပ်စွဲထားတဲ့ အရာတွေအတွက် UEFA ထံ သီးခြားဗွီဒီယို ၄ ခုပေးပို့ခဲ့တယ်လို့ သိရပါတယ်။
ရီးရယ်လ်အသင်း နောက်ခံလူ ရူဒီဂါဟာ ပင်နယ်တီ အဆုံးအဖြတ် အနိုင်ဂိုးသွင်းယူအပြီးမှာ သူ့ရဲ့လည်ပင်းကို လှီးဖြတ်တဲ့ပုံစံ ပြုလုပ်ခဲ့ပြီး ဘတ်ပီဟာ သူ့ရဲ့လိင်အင်္ဂါကို ကိုင်ပြခဲ့တယ်လို့ စွပ်စွဲခံထားရတာပါ။
ရီးရယ်လ်နဲ့ အသလက်တီကိုအသင်း ယှဉ်ပြိုင်နေစဉ်
ဗီနီစီးယက်စ်ကတော့ ပွဲချိန်အတွင်းမှာရော ပွဲအပြီးမှာပါ အသလက်တီကိုအသင်း ပရိသတ်တွေနဲ့ အကြိမ်ကြိမ် ပြဿနာဖြစ်ခဲ့ကြပါတယ်။
ဆီဘယ်လော့စ်ဟာ ဒီပွဲမှာ မပါဝင်ခဲ့ပေမယ့် စော်ကားတဲ့ အမူအရာ ပြုလုပ်ခဲ့တယ်လို့ စွပ်စွဲခံထားရတာ ဖြစ်ပါတယ်။
အဲဒါကြောင့် ဘတ်ပီ၊ ဗီနီစီးယက်စ်၊ ရူဒီဂါနဲ့ ဆီဘယ်လော့စ်တို့ဟာ အာဆင်နယ်အသင်းနဲ့ ချန်ပီယံလိဂ် ကွာတား ဖိုင်နယ်ပွဲစဉ်ကို လွဲချော်လာနိုင်တာပါ။
UEFA က ဒီစုံစမ်းစစ်ဆေးမှုနဲ့ ပတ်သက်ပြီး နောက်ထပ် အချက်အလက်တွေကို ထုတ်ပြန်ပေးသွားမယ်လို့ သူတို့ရဲ့ ထုတ်ပြန်ချက်ထဲမှာ ဖော်ပြထားပါတယ်။
အာဆင်နယ်နဲ့ ရီးရယ်လ်အသင်းတို့ရဲ့ ချန်ပီယံလိဂ် ကွာတားဖိုင်နယ် ပထမအကျော့ပွဲစဉ်ကို ဧပြီ ၈ ရက်၊ ဒုတိယ အကျော့ပွဲစဉ်ကို ဧပြီ ၁၆ ရက်မှာ ယှဉ်ပြိုင်သွားမှာပါ။
အာဆင်နယ်အသင်းဟာ လာမယ့်ဧပြီ ၁ ရက်မှ ပရီးမီးယားလိဂ် ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာ ဖြစ်ပြီး ရီးရယ်လ်အသင်းကတော့ မတ် ၂၉ ရက်မှာ လီဂါနက်စ်အသင်းနဲ့ လာလီဂါပွဲစဉ် ယှဉ်ပြိုင်ရမှာဖြစ်ပါတယ်။
Source: Dailymail
- By CNI
- Category: အားကစား
- Hits: 603
CNI Sport News
၂၀၂၅ ခုနှစ်၊ မတ်လ ၂၈
ကမ္ဘာ့ဘောလုံးအဖွဲ့ချုပ်(ဖီဖာ)က ၂၀၂၅ ကလပ်ကမ္ဘာ့ဖလားပြိုင်ပွဲမှာ ချန်ပီယံဆုကို ရယူနိုင်မယ့် အသင်းဟာ ဆုကြေးငွေ ဒေါ်လာ ၁၂၅ သန်းအထိ ရရှိနိုင်တယ်လို့ အတည်ပြုခဲ့ပါတယ်။
ဖီဖာဟာ ဒီပြိုင်ပွဲ တစ်ခုစလုံးအတွက် ဒေါ်လာ ၁ ဘီလီယံ ဆုကြေးပေးသွားမှာဖြစ်ပြီး ပြိုင်ပွဲဝင်မယ့် အသင်းတိုင်း ဟာ များပြားတဲ့ ငွေကြေးပမာဏကို ရရှိမှာပါ။
ဒေါ်လာ ၁ ဘီလီယံထဲက ထက်ဝက်ခန့်ကို အသင်းပေါင်း ၃၂ သင်းကြားထဲ ခွဲဝေပေးသွားမှာဖြစ်ပြီး အားကစားနဲ့ စီးပွားရေးဆိုင်ရာ စံနှုန်းတွေအပေါ် အခြေခံကာ ကလပ်အသင်းတွေဟာ မတူညီတဲ့ ပမာဏတွေကို ရရှိမှာဖြစ်ပါ တယ်။
ဥရောပကလပ်အဖွဲ့ချုပ်နဲ့ ဖီဖာက တီထွင်ထားတဲ့ ဒီပုံစံကြောင့် ချယ်လ်ဆီးနဲ့ ရီးရယ်လ်အသင်းတို့လို ဥရောပ ထိပ်သီးအသင်းတွေဟာ တောင်အာဖရိကကလပ် မာမီလိုဒီတို့လို အသင်းငယ်တွေထက် ရာခိုင်နှုန်း အများအပြား ကို ပိုပြီးရရှိမှာပါ။
ဒါအပြင် ဖီဖာဟာ စွမ်းဆောင်ရည်အပေါ် မူတည်ပြီး ဒေါ်လာ ၄၇၅ သန်း ချီးမြှင့်မယ်လို့ ပြောထားပါတယ်။
ဒီအချက်ကတော့ ပွဲအများအပြားကို အနိုင်ရရှိအောင် ကစားနိုင်တဲ့အသင်းက ဆုကြေးငွေ အများဆုံး ရရှိမှာ ဖြစ်ပါတယ်။
အဲဒါကြောင့် ဒီပြိုင်ပွဲမှာ ချန်ပီယံဖြစ်မယ့် အသင်းဟာ ဒေါ်လာ ၁၂၅ သန်းအထိ ရရှိနိုင်ပါတယ်။
ပုံစံအသစ်နဲ့ ပထမဆုံးအကြိမ် ကျင်းပတဲ့ ဖီဖာကလပ် ကမ္ဘာ့ဖလားပြိုင်ပွဲကို အမေရိကန်နိုင်ငံက အိမ်ရှင်အဖြစ် ကျင်းပသွားမှာပါ။
ဒီပြိုင်ပွဲကို ဇွန်လ ၁၄ ရက်ကနေ ဇူလိုင် ၁၃ ရက်အထိ ကျင်းပမှာဖြစ်ပြီး အဖွင့်ပွဲစဉ်အဖြစ် အင်တာမိုင်ယာမီ အသင်းနဲ့ အယ်လ်အာလီအသင်းတို့ စတင်ယှဉ်ပြိုင်သွားမှာ ဖြစ်ပါတယ်။
Page 87 of 432
Connect with us
