CNI Sport News

၂၀၂၄ ခုနှစ်၊ ဇူလိုင် ၂၉

ယူနိုက်တက်အသင်း နောက်ခံလူဟောင်း ဗာရန်းဟာ စီးရီးအေတန်းတက်ကလပ် ကိုမိုအသင်းထံ နောက်ထပ် တစ်နှစ်သက်တမ်းတိုးခွင့် အပါအဝင် ၂ နှစ်စာချုပ်နဲ့ ပြောင်းရွှေ့ခဲ့ပါတယ်။ 

အသက် ၃၁ နှစ်အရွယ်ရှိ ဗာရန်းဟာ ပြီးခဲ့တဲ့ရာသီအကုန်မှာ ၃ ရာသီကြာ ကစားခဲ့တဲ့ ယူနိုက်တက်အသင်းနဲ့ စာချုပ် ကုန်ဆုံးပြီးနောက် ထွက်ခွာခဲ့တာပါ။

ဗာရန်းကို ခေါ်ယူဖို့ မေဂျာလိဂ်ကလပ် အင်တာမိုင်ယာမီအသင်း အပါအဝင် ကမ်းလှမ်းမှုအချို့ရှိခဲ့ပေမယ့် ကစားသမားကတော့ ကိုမိုအသင်းထံ ပြောင်းရွှေ့ဖို့ ဆုံးဖြတ်ခဲ့တာ ဖြစ်ပါတယ်။ 

ကိုမိုအသင်း နည်းပြအဖြစ် ခန့်အပ်ခံထားရတဲ့ ဖာဘရီဂတ်စ်က ဗာရန်းကို ခေါ်ယူခဲ့တာဟာ ကလပ်အတွက် သူတို့မှာ ရှိနေတဲ့ ရည်မှန်းချက်ရဲ့ သက်သေ ဖြစ်တယ်လို့ ပြောခဲ့ပါတယ်။

ဗာရန်းနဲ့ ဖာဘရီဂတ်စ်တို့ဟာ ရီးရယ်လ်နဲ့ ဘာစီလိုနာအသင်းတို့မှာ ပြိုင်ဘက်တွေအဖြစ် ထိပ်တိုက်တွေ့ဆုံ ခဲ့ပေမယ့် အခုအချိန်မှာတော့ တစ်သင်းထဲမှာ အတူလက်တွဲ လုပ်ဆောင်ရတော့မှာပါ။ 

ဗာရန်းကို တွေ့ရစဉ်

ဗာရန်းကလည်း ကိုမိုအသင်းထံ ပြောင်းရွှေ့နိုင်ခဲ့လို့ ပျော်ရွှင်ပြီး ဖာဘရီဂတ်စ်ရဲ့ ဘောလုံးအပေါ် စိတ်အား ထက်သန်မှုနဲ့ ကစားပုံ အယူအဆတွေကို နှစ်သက်တယ်လို့ ပြောင်းရွှေ့အပြီးမှာ ပြောခဲ့ပါတယ်။ 

ကိုမိုအသင်းဟာ စီးရီးအေထိပ်တန်းလိဂ်နဲ့ ၂၁ နှစ်အကြာ ဝေးကွာပြီးမှ ဒီရာသီ ပြန်လည်ယှဉ်ပြိုင်ခွင့် ရရှိခဲ့တာပါ။

ကိုမိုအသင်းဟာ ဒီအပြောင်းအရွှေ့မှာ ဗာရန်းအပြင် ဝါရင့်ဂိုးသမား ရေနာ၊ ဘယ်လော့တီ၊ ကိုနေး၊ ဒေါ့ဆီနာ၊ မိုရီနို တို့ကို ခေါ်ယူအားဖြည့်ထားတာ ဖြစ်ပါတယ်။

ကိုမိုအသင်းနည်းပြ ဖာဘရီဂတ်စ်နဲ့ သူ့ရဲ့ အာဆင်နယ် အသင်းဖော်ဟောင်း အွန်နရီတို့ဟာ ဒီအသင်းရဲ့ အစုရှယ်ယာတွေကို ပိုင်ဆိုင်ထားကြတာပါ။ 

ရာသီကြို ခြေစမ်းပွဲမှာ ရလဒ်ကောင်း ရရှိနေတဲ့ ကိုမိုအသင်းဟာ သြဂုတ် ၁၁ ရက်မှာ ကိုပါအီတာလီယာဖလား ၃၂ သင်း အဆင့်ပွဲစဉ်အဖြစ် ဆမ်ဒိုးရီးယားအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဇူလိုင် ၂၉

ကနေဒါအမျိုးသမီးအသင်းနည်းပြ ပရီးစ်မန်းက ဒရုန်းအရှုပ်တော်ပုံကြောင့် နိုင်ငံအသင်းရဲ့ အိုလံပစ်ချန်ပီယံဆု ကာကွယ်မှုကို ထိခိုက်နိုင်တဲ့အတွက် ကြေကွဲရတယ်လို့ ပြောခဲ့ပါတယ်။

ပရီးစ်မန်းက “ကစားသမားတွေအတွက် လုံးဝကို ကြေကွဲရပါတယ်။ ဒီအခြေအနေဟာ အားလုံးအပေါ် သက်ရောက်မှု ရှိခဲ့တဲ့အတွက် တောင်းပန်ပါတယ်။ ဒီအစုအဖွဲ့ဟာ အောင်မြင်မှုကို ရယူနိုင်ဖို့ ခက်ခက်ခဲခဲ ကြိုးစားထားတာပါ။ ဒီအဖြစ်အပျက်တွေအတွက် တာဝန်ယူပြီး စုံစမ်းစစ်ဆေးရေးအဖွဲ့နဲ့ အပြည့်အဝ ပူးပေါင်း ဖို့လည်း စီစဉ်ထားတယ်”လို့ ပြောခဲ့တာပါ။

ကနေဒါအသင်းဟာ သူတို့ရဲ့ အုပ်စုတွင်း ပြိုင်ဘက်ဖြစ်တဲ့ နယူးဇီလန်အသင်းရဲ့ လေ့ကျင့်ခန်း အစီအစဉ်ကို ဒရုန်း အသုံးပြုပြီး ထောက်လှမ်းခဲ့တဲ့အတွက် ကမ္ဘာ့ဘောလုံးအဖွဲ့ချုပ်(ဖီဖာ)ရဲ့ အရေးယူမှုကို ခံခဲ့ရတာဖြစ်ပါတယ်။ 

ဖီဖာဟာ ကနေဒါအသင်းကို ၆ မှတ်လျှော့ ပြစ်ဒဏ်ချမှတ်ခဲ့ပြီး နည်းပြ ပရီးစ်မန်းနဲ့ ကနေဒါဘောလုံးအဖွဲ့ချုပ် တာဝန်ရှိသူ ၂ ဦးကို ၁ နှစ်ပွဲပယ်ခဲ့တာပါ။ ကနေဒါအစိုးရက ဖီဖာရဲ့ ပွဲပယ်ခြင်းခံခဲ့ရတဲ့ အမျိုးသမီးအသင်း တာဝန်ရှိသူတွေအတွက် ရန်ပုံငွေတွေကို ဆိုင်းငံ့မယ်လို့ ကြေညာခဲ့ပါတယ်။

ကနေဒါအမျိုးသမီးအသင်းကို တွေ့ရစဉ်

ကနေဒါအသင်းဟာ အိုလံပစ်အမျိုးသမီး ဘောလုံးပြိုင်ပွဲ အုပ်စုပွဲစဉ်တွေအဖြစ် နယူးဇီလန်၊ အိမ်ရှင်ပြင်သစ် အသင်းတို့နဲ့ ယှဉ်ပြိုင်ထားပြီး ၂ ပွဲစလုံး အနိုင်ရရှိထားတာပါ။ 

ဒါပေမယ့် ကနေဒါအသင်းဟာ ရမှတ် ၆ မှတ် လျှော့ခံထားရတာကြောင့် ရမှတ်မရရှိသေးဘဲ အုပ်စုတွင်း တတိယ နေရာမှာ ရပ်တည်နေတာ ဖြစ်ပါတယ်။ 

ကနေဒါအသင်းဟာ အုပ်စုနောက်ဆုံးပွဲစဉ်အဖြစ် ကိုလံဘီယာအသင်းနဲ့ ယှဉ်ပြိုင်ရမှာဖြစ်ပြီး အနိုင်ရခဲ့ရင် နောက်တစ်ဆင့်တက်ဖို့ မျှော်လင့်ချက် ရှိနေသေးတာပါ။

ကနေဒါအသင်းဟာ အိုလံပစ်ပြိုင်ပွဲကို ၄ ကြိမ် ယှဉ်ပြိုင်ထားပြီး နောက်ဆုံးကျင်းပခဲ့တဲ့ တိုကျိုအိုလံပစ်ပြိုင်ပွဲမှာ ရွှေတံဆိပ်ရရှိခဲ့တာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇူလိုင် ၂၉

ယူနိုက်တက်အသင်း ဂိုးသမားဟောင်း ဒီဂီယာရဲ့ စီးရီးအေကလပ် ဂျီနိုအာအသင်းထံ အပြောင်းအရွှေ့ဟာ ကစားသမားရဲ့ လစာတောင်းဆိုမှုကြောင့် ပျက်ပြယ်သွားခဲ့ပါတယ်။

Sky Sports က ဂျီနိုအာအသင်းဟာ နောက်ထပ် ဂိုးသမား ပစ်မှတ်တွေကို ရှာဖွေသွားမယ်လို့ ဖော်ပြထားတာပါ။ 

ဒီဂီယာဟာ ယူနိုက်တက်အသင်းကနေ ထွက်ခွာပြီးနောက် တစ်နှစ်ကြာ အသင်းလက်မဲ့ ဖြစ်နေတာကို အဆုံးသတ်ဖို့အတွက် ဂျီနိုအာအသင်းထံ ပြောင်းရွှေ့ဖို့ စဉ်းစားခဲ့တာ ဖြစ်ပါတယ်။ 

ယူနိုက်တက်အသင်းမှာ ၁၂ နှစ်ကြာ ပွဲပေါင်း ၅၄၅ ပွဲကစားခဲ့တဲ့ ဒီဂီယာဟာ ပြီးခဲ့တဲ့နွေရာသီက စာချုပ်ကုန်ဆုံး ပြီးနောက် ထွက်ခွာခဲ့တာပါ။

ဒီဂီယာဟာ ပြီးခဲ့တဲ့ရာသီအတွင်းမှာ ကမ်းလှမ်းမှုအချို့ ရခဲ့ပေမယ့် ဘယ်အသင်းကိုမှ မပြောင်းရွှေ့ဖြစ်ခဲ့ဘဲ အသင်းလက်မဲ့ ဖြစ်နေခဲ့ပါတယ်။

စပိန်ဂိုးသမားဟောင်းဟာ ဒီနှစ်ဘောလုံးရာသီ မစတင်ခင်မှာ အသင်းသစ် ရှာဖွေနေပြီး ဂျီနိုအာအသင်းနဲ့ အပြောင်းအရွှေ့ ဆွေးနွေးမှုတွေရှိခဲ့တာပါ။

ဂျီနိုအာအသင်းကလည်း ဂိုးသမား မာတီနက်ဇ်ကို အင်တာမီလန်အသင်းထံ ရောင်းချခဲ့တဲ့အတွက် ဂိုးသမား ရှာဖွေနေပြီး ဒီဂီယာနဲ့ အပြောင်းအရွှေ့ဖြစ်ဖို့ မျှော်လင့်ခဲ့ကြတာ ဖြစ်ပါတယ်။

ဒီဂီယာကို တွေ့ရစဉ်

ဒါပေမယ့် ဒီဂီယာရဲ့ လက်တွေ့မကျတဲ့ လစာတောင်းဆိုမှုကြောင့် ဒီအပြောင်းအရွှေ့ဟာ ပျက်ပြယ်သွားခဲ့တာပါ။

ဒီဂီယာဟာ နည်းပြ အဲရစ်တန်ဟတ်သာ ယူနိုက်တက်အသင်းက ထွက်ခွာခဲ့ရင် အသင်းဟောင်းထံ ပြန်လာဖို့ လည်း စိတ်ကူးရှိခဲ့တာ ဖြစ်ပါတယ်။ 

ဒါပေမယ့် ယူနိုက်တက်အသင်းဟာ အဲရစ်တန်ဟတ်ကို ၂၀၂၆ ခုနှစ်အထိ စာချုပ်သက်တမ်းတိုးပြီးနောက် ဒီဂီယာရဲ့ မျှော်လင့်ချက် အဆုံးသတ်သွားခဲ့တာပါ။

ဒီဂီယာဟာ ဂျီနိုအာအသင်းနဲ့ အပြောင်းအရွှေ့ ပျက်ပြယ်သွားခဲ့တာကြောင့် အသင်းသစ် ရှာဖွေမှုတွေကို ဆက်ပြီး လုပ်ဆောင်ရတော့မှာ ဖြစ်ပါတယ်။ 

ဒီဂီယာကို ခေါ်ယူဖို့ ဆော်ဒီပရိုလိဂ် ကလပ်တွေနဲ့ မေဂျာလိဂ်ကလပ် အသင်းအချို့က ချိတ်ဆက်မှုတွေ ရှိနေတာ ပါ။ 

ဒါပေမယ့် ဒီဂီယာအနေနဲ့ အသင်းသစ်ရဖို့ဆိုရင် သူ့ရဲ့လုပ်ခလစာ တောင်းဆိုမှုကို လျှော့ချဖို့ စဉ်းစားရမယ်လို့ သတင်းမှာ ဖော်ပြထားပါတယ်။ 

Source: Dailymail

CNI Sport News

၂၀၂၄ ခုနှစ်၊ ဇူလိုင် ၂၇

မန်စီးတီးအသင်းဟာ ကွင်းလယ်လူ ဒီဘရိုင်းရဲ့နေရာမှာ အစားထိုးဖို့အတွက် ဘိုင်ယန်မြူးနစ်အသင်း ကြယ်ပွင့် မူစီယာလာကို ပစ်မှတ်ထားနေတယ်လို့ သတင်းတွေ ထွက်ပေါ်နေပါတယ်။

မန်စီးတီးအသင်းနဲ့ စာချုပ် ၁ နှစ်ပဲ ကျန်ရှိတော့တဲ့ ဒီဘရိုင်းကို ခေါ်ယူဖို့ ဆော်ဒီပရိုလိဂ် ကလပ်အသင်းတွေက အပြင်းအထန် ချိတ်ဆက်မှု ပြုလုပ်နေကြတာပါ။

မန်စီးတီးအသင်းနည်းပြ ဂွာဒီယိုလာက ဒီဘရိုင်းဟာ လာမယ့် ရာသီအသင်းမှာ ဆက်ရှိမယ်လို့ ပြောထားပေမယ့် မန်ချက်စတာကလပ်ကတော့ သူ့ရဲ့နေရာမှာ အစားထိုးဖို့ ကစားသမားသစ်တွေ ရှာဖွေမှုပြုလုပ်နေတာ ဖြစ်ပါ တယ်။ 

ဒီအချိန်မှာ မန်စီးတီးအသင်းဟာ မူစီယာလာကို ဒီဘရိုင်းရဲ့နေရာမှာ အစားထိုးဖို့ ပစ်မှတ်ထားနေတယ်လို့ သတင်း ထွက်ပေါ်ခဲ့တာပါ။

မူစီယာလာဟာ ဘိုင်ယန်မြူးနစ်အသင်းအတွက် ပွဲဦးထွက်ခွင့်ရတဲ့ အချိန်ကနေ အခုအချိန်ထိ အကောင်းဆုံးပုံစံ ပြသနေပြီး ဥရောပအသင်းကြီးအချို့က သူ့ကို ခေါ်ယူဖို့ စိတ်ဝင်စားနေတာ ဖြစ်ပါတယ်။ 

အခု မန်စီးတီးအသင်းကပါ မူစီယာလာကို ခေါ်ယူချင်တဲ့ အသင်းတွေထဲမှာ ပါဝင်လာခဲ့တာ ဖြစ်ပါတယ်။ 

 ဒီဘရိုင်းကို တွေ့ရစဉ်

မူစီယာလာနဲ့ ဘိုင်ယန်မြူးနစ်အသင်းတို့ဟာ ပြီးခဲ့တဲ့နွေရာသီက စာချုပ်သက်တမ်းတိုးဖို့ ဆွေးနွေးမှုတွေ ပြုလုပ်ခဲ့ ပေမယ့် ဒီနွေရာသီမှာ ဆွေးနွေးမှုတွေဟာ ရပ်တန့်နေခဲ့တာပါ။

ပြီးခဲ့တဲ့ ယူရို ၂၀၂၄ ပြိုင်ပွဲမှာ ဂျာမနီအသင်းအတွက် ခြေစွမ်းပြသနိုင်ခဲ့တဲ့ မူစီယာလာနဲ့ ဘိုင်ယန်မြူးနစ်အသင်း တို့ရဲ့ စာချုပ်ဟာ ၂၀၂၆ ခုနှစ်အထိ သက်တမ်းရှိနေတာ ဖြစ်ပါတယ်။

မူစီယာလာဟာ ဘိုင်ယန်မြူးနစ်အသင်းအတွက် ၁၆၃ ပွဲ ကစားထားပြီး ၄၃ ဂိုးသွင်းယူထားကာ ဘွန်ဒက်လီဂါ ဖလား ၄ ကြိမ် အပါအဝင် ဆုဖလား ၉ ခု ရယူထားနိုင်ခဲ့တာပါ။ 

မန်စီးတီးအသင်းဟာ လက်ရှိအချိန်မှာ ဒီဘရိုင်းနဲ့ အနာဂတ်အတွက် ဆွေးနွေးမှုတွေ ပြုလုပ်ဖို့ စီစဉ်နေပါတယ်။

မန်စီးတီးအသင်းရဲ့ ဦးစားပေးက ဒီဘရိုင်းကို ဆက်ထိန်းထားဖို့ဖြစ်ပြီး အဆင်မပြေခဲ့ရင် မူစီယာလာကို ခေါ်ယူနိုင်ဖို့ ကြိုးပမ်းသွားမှာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇူလိုင် ၂၇

မေဂျာလိဂ်ကလပ် LAFC အသင်းဟာ အသလက်တီကိုအသင်း တိုက်စစ်မှူး ဂရစ်ဇ်မန်းကို ခေါ်ယူနိုင်ဖို့ စိတ်ဝင် စားနေတယ်လို့ L'Equipe က ဖော်ပြထားပါတယ်။

LAFC အသင်းဟာ ဂရစ်ဇ်မန်းရဲ့ ပြင်သစ်လက်ရွေးစင် အသင်းဖော်ဟောင်းတွေဖြစ်တဲ့ ဟူဂိုလိုရစ်နဲ့ ဂီရော့ဒ်တို့ကို ခေါ်ယူထားအပြီးမှာ ဂရစ်ဇ်မန်းကိုပါ ခေါ်ယူဖို့ စိတ်ဝင်စားလာတာပါ။ 

ဂရစ်ဇ်မန်းကလည်း ဒီအပြောင်းအရွှေ့ကို စဉ်းစားနေတယ်လို့ သိရပါတယ်။

ဂရစ်ဇ်မန်းဟာ ၂၀၂၃ ခုနှစ်၊ ဇွန်လက ကျင်းပခဲ့တဲ့ ပွဲတစ်ခုမှာ အမေရိကန်ကို သွားရောက်ကစားဖို့က သူ့အတွက် အိပ်မက်ဖြစ်ပြီး အနာဂတ်ရည်မှန်းချက်လို့ ပြောခဲ့တာပါ။

ဂရစ်ဇ်မန်းဟာ မေဂျာလိဂ်အပြင် ဆော်ဒီပရိုလိဂ်ရဲ့ ကမ်းလှမ်းမှုအချို့ကို ရရှိခဲ့ပေမယ့် မေဂျာလိဂ်မှာ သွားရောက် ကစားဖို့က သူ့အတွက် ရည်မှန်းချက်ဖြစ်တယ်လို့ သတင်းစာ ရှင်းလင်းပွဲတစ်ခုမှာ ထပ်ပြီး ပြောခဲ့ပါတယ်။ 

ဂရစ်ဇ်မန်းကို တွေ့ရစဉ်

အခုအချိန်မှာတော့ ဂရစ်ဇ်မန်းဟာ ဒီအိပ်မက်ကို အကောင်အထည်ဖော်ဖို့ နီးစပ်လာပြီလို့ L'Equipe က ဖော်ပြ ထားတာပါ။ 

အသလက်တီကိုနဲ့ ဂရစ်ဇ်မန်းတို့ရဲ့ စာချုပ်ဟာ ၂၀၂၅ ဆိုရင် ကုန်ဆုံးမှာဖြစ်ပေမယ့် နောက်ထပ်တစ်နှစ် သက်တမ်းတိုးခွင့်ရှိနေပါတယ်။

ဂရစ်ဇ်မန်းကို ခေါ်ယူချင်တဲ့ အသင်းတွေဟာ ဒီနွေရာသီမှာ စာချုပ်ဖျက်သိမ်းကြေး ယူရို ၁၀ သန်းဝန်းကျင်နဲ့ အသလက်တီကိုအသင်းကနေ ခေါ်ယူခွင့်ရှိနေတယ်လို့လည်း သိရပါတယ်။ 

အခုအချိန်မှာ ဂရစ်ဇ်မန်းနဲ့ သူ့ရဲ့မိသားစုဟာ အနာဂတ်အတွက် စဉ်းစားနေပြီး LAFC အသင်းကတော့ အခု အပြောင်းအရွှေ့ မဟုတ်ရင်တောင် လာမယ့် အပြောင်းအရွှေ့မှာ ခေါ်ယူနိုင်ဖို့ မျှော်လင့်နေတာပါ။

အသက် ၃၃ နှစ်အရွယ်ရှိ ဂရစ်ဇ်မန်းဟာ အသလက်တီကိုအသင်းအတွက် ဒုတိယအကြိမ် ကစားတာမှာ ၁၃၂ ပွဲ ကစားထားပြီး ၄၈ ဂိုးသွင်းယူထားတာ ဖြစ်ပါတယ်။

Source: besoccer

CNI Sport News

၂၀၂၄ ခုနှစ်၊ ဇူလိုင် ၂၇

စပိန်လူမျိုးနည်းပြ ဂွာဒီယိုလာက မန်စီးတီးအသင်းနဲ့ နောက်ထပ်စာချုပ် သက်တမ်းတိုးဖို့ကို သူ့ဘက်က ငြင်းဆန်ထားတာ မရှိဘူးလို့ ပြောခဲ့ပါတယ်။

ဂွာဒီယိုလာက "ကျနော်ဟာ မန်စီးတီးမှာ ၈ နှစ်ကြာရှိခဲ့ပြီးဖြစ်လို့ နောက်ထပ် ၈ နှစ်တော့ ဒီမှာရှိမှာ မဟုတ်ပါဘူး။ အဲဒါကြောင့် ဆက်ရှိဖို့ထက် ထွက်ခွာဖို့က ပိုပြီးနီးစပ်လာပါပြီ။ ဒါပေမယ့် ထွက်ခွာမယ်ဆိုပြီး ကျနော် မပြောခဲ့ပါ ဘူး။ ကျနော် ထွက်မယ်ဆိုရင် ထွက်မယ်လို့ပြောမှာ ဖြစ်ပေမယ့် ဒါကို ကျနော် မပြောခဲ့ပါဘူး။ စာချုပ်သက်တမ်း တိုးဖို့ကိုလည်း ငြင်းဆန်ထားခြင်းမရှိဘူး"လို့ ပြောခဲ့တာပါ။

ဂွာဒီယိုလာဟာ မန်စီးတီးအသင်းနဲ့ စာချုပ်ကုန်ဆုံးမယ့် လာမယ့်ရာသီအကုန်မှာ သူထွက်ခွာနိုင်တယ်လို့ ပြီးခဲ့တဲ့ ရာသီက ပြောခဲ့တာဖြစ်ပါတယ်။ 

ဒါပေမယ့် မန်စီးတီးအသင်းရဲ့ အမေရိကန် ရာသီကြို ခရီးစဉ်မှာတော့ ဂွာဒီယိုလာက သူဒီမှာ ဆက်နေဖို့ ဆုံးဖြတ်နိုင်တယ်လို့ ပြောခဲ့တာပါ။ 

ဂွာဒီယိုလာကို တွေ့ရစဉ်

ဂွာဒီယိုလာဟာ ဘာစီလိုနာအသင်းကို ၄ ရာသီ၊ ဘိုင်ယန်မြူးနစ်အသင်းကို ၃ ရာသီ ကိုင်တွယ်ခဲ့ပေမယ့် မန်စီးတီး အသင်းနဲ့ ၉ ရာသီမြောက်အတွက် ပြင်ဆင်မှုတွေ ပြုလုပ်နေတာ ဖြစ်ပါတယ်။

၂၀၁၆ ခုနှစ်က မန်စီးတီးအသင်းကို ရောက်ရှိခဲ့တဲ့ ဂွာဒီယိုလာဟာ ပရီးမီးယားလိဂ်ဖလား ၆ ကြိမ်၊ ချန်ပီယံလိဂ် ဖလား အပါအဝင် ဆုဖလား အများအပြား ရယူပေးထားနိုင်ခဲ့တာပါ။ 

ဂွာဒီယိုလာဟာ နိုင်ငံအသင်းတစ်သင်းကို ကိုင်တွယ်ချင်တယ်လို့ ပြောထားတာကြောင့် အင်္ဂလန်အသင်းဟာ သူ့ကို မန်စီးတီးအသင်းနဲ့ စာချုပ်ကုန်ဆုံးချိန်မှာ နည်းပြအဖြစ် ခန့်အပ်နိုင်ဖို့ စောင့်ဆိုင်းနေတယ်လို့ ဗြိတိန်မီဒီယာတွေက ဖော်ပြထားပါတယ်။

ဒါပေမယ့် ဂွာဒီယိုလာဟာ မန်စီးတီးအသင်းနဲ့ စာချုပ်သက်တမ်း တိုးနိုင်တာကြောင့် အင်္ဂလန်အသင်းရဲ့ မျှော်လင့် ချက်တွေ ထိခိုက်လာနိုင်တာပါ။

မန်စီးတီးအသင်းဟာ ဇူလိုင် ၂၈ ရက်မှာ အေစီမီလန်အသင်းနဲ့ ရာသီကြိုခြေစမ်းပွဲ ယှဉ်ပြိုင်မှာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဇူလိုင် ၂၇

နောက်ခံလူ မက်ဂွဲယားက နည်းပြ အဲရစ်တန်ဟတ်ရဲ့ အနာဂတ်ထင်ကြေးတွေက ပြီးခဲ့တဲ့ရာသီက ယူနိုက်တက် အသင်းရဲ့ စွမ်းဆောင်ရည်ပုံစံကို ထိခိုက်ခဲ့တယ်လို့ ပြောခဲ့ပါတယ်။

မက်ဂွဲယားက "ဒါက ရာသီတစ်လျှောက်လုံး ကျနော်တို့ရဲ့ စွမ်းဆောင်ရည်နဲ့ ရလဒ်ကို အနည်းငယ် ထိခိုက်စေခဲ့ တာ ဖြစ်နိုင်ပါတယ်။ ခရစ္စမတ် ကာလဝန်းကျင်မှာ ဒါကဖြစ်ပျက်ခဲ့ပါတယ်။ ဒါပေမယ့် ဒါကိုကိုင်တွယ်သွားခဲ့တဲ့ နည်းပြကို အသိအမှတ်ပြုချင်ပါတယ်။ သူဟာ လက်ရှိဥရောပရဲ့ အကောင်းဆုံးအသင်းကို အနိုင်ရအောင် ကိုင်တွယ်သွားနိုင်ခဲ့ပါတယ်"လို့ အမေရိကန်ခရီးစဉ်အစ အင်တာဗျူးမှာ ပြောခဲ့တာပါ။

ယူနိုက်တက်အသင်းဟာ ပြီးခဲ့တဲ့ရာသီက ပရီးမီးယားလိဂ်ပြိုင်ပွဲမှာ ရလဒ်ဆိုးရွားခဲ့ပြီး အဆင့် ၈ နေရာနဲ့ ရာသီ အဆုံးသတ်နိုင်ခဲ့ပေမယ့် FA ဖလားဗိုလ်လုပွဲမှာ မန်စီးတီးအသင်းကို အနိုင်ရပြီး ချန်ပီယံဆုကို ရယူနိုင်ခဲ့တာ ဖြစ်ပါတယ်။ 

ဒါဟာ အဲရစ်တန်ဟတ်အတွက် ယူနိုက်တက်အသင်းနည်းပြဘဝ ဒုတိယရာသီမှာ ရရှိခဲ့တဲ့ ဒုတိယမြောက် ဆုဖလားလည်း ဖြစ်ပါတယ်။

ဒါပေမယ့် အဲရစ်တန်ဟတ်ဟာ ရာသီတစ်လျှောက်လုံးအပြင် ရာသီကုန်ဆုံးချိန်မှာလည်း ထုတ်ပယ်ခံရမယ့် သတင်းတွေ ထွက်ပေါ်ခဲ့ပါတယ်။

မက်ဂွဲယားကိုတွေ့ရစဉ်

ယူနိုက်တက်အသင်းဟာ အဲရစ်တန်ဟတ်ရဲ့ နေရာမှာ အစားထိုးဖို့ တူချယ်လ် အပါအဝင် နည်းပြအချို့နဲ့ စကားပြောဆိုမှုတွေရှိခဲ့ပေမယ့် နောက်ဆုံးမှာ ဒတ်ချ်လူမျိုးကိုပဲ အသင်းမှာ ဆက်ထားရှိဖို့ ဆုံးဖြတ်ခဲ့တာပါ။ 

ယူနိုက်တက်အသင်းဟာ အဲရစ်တန်ဟတ်ကို ၂၀၂၆ ခုနှစ်အထိရှိမယ့် စာချုပ်သက်တမ်းတိုးခဲ့ပြီး ဒါဟာ မှန်ကန်တဲ့ ဆုံးဖြတ်ချက်ဖြစ်တယ်လို့ မက်ဂွဲယားက ယုံကြည်ခဲ့ပါတယ်။ 

မက်ဂွဲယားဟာ ဒဏ်ရာတွေကြောင့် FA ဖလားဗိုလ်လုပွဲနဲ့ ယူရို ၂၀၂၄ ပြိုင်ပွဲကို လွဲချော်ခဲ့ရတာပါ။ 

ကြံ့ခိုင်မှုပြည့်ဝနေပြီဖြစ်တဲ့ အင်္ဂလန်နောက်ခံလူဟာ ဒီနွေရာသီမှာ ယူနိုက်တက်အသင်းကနေ ထွက်ခွာရဖွယ် ရှိတယ်လို့ သတင်းထွက် နေပေမယ့် သူကတော့ ဒီမှာဆက်ပြီးရှိကာ ဆုဖလားအောင်မြင်မှုတွေ ထပ်ပြီး ရယူချင် တယ်လို့ ပြောခဲ့ပါတယ်။

မက်ဂွဲယားနဲ့ ယူနိုက်တက်အသင်းတို့ရဲ့ စာချုပ်ဟာ ၂၀၂၅ ခုနှစ်မှာ ကုန်ဆုံးမှာ ဖြစ်ပေမယ့် ၁ နှစ် သက်တမ်း တိုးခွင့်ရှိနေတာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဇူလိုင် ၂၆

မန်ချက်စတာ ယူနိုက်တက်အသင်းရဲ့ တောင်ပံကစားသမား ဆန်ချိုက အသင်းနည်းပြ အဲရစ်တန်ဟတ် ရာထူးကနေ ထုတ်ပယ်ခံရဖို့ မျှော်လင့်ခဲ့လိမ့်မယ်လို့ ယူနိုက်တက် ကစားသမား‌ဟောင်း မိုက်ကယ်အိုဝင်က မှတ်ချက်ပြု ပြောကြားသွားခဲ့ပါတယ်။

ဆန်ချိုနဲ့ တန်ဟတ်တို့ နှစ်ဦးဟာ ပြီးခဲ့တဲ့ ဘောလုံးရာသီတုန်းက ဆက်ဆံရေး အဆင်မပြေခဲ့ကြပါဘူး။

ဒါကြောင့် ဆန်ချိုဟာ လက်ကျန်ရာသီဝက်မှာ အသင်းဟောင်း ဒေါ့မွန်အသင်းဆီ အငှားနဲ့ ပြောင်း‌ရွှေ့ခဲ့ပေမဲ့ ဒီရာသီ အစပိုင်းမှာတော့ သူတို့နှစ်ဦးကြား ပြန်လည်အဆင်ပြေခဲ့ပြီးတော့ ယူနိုက်တက်အသင်းဆီ ပြန်လာခဲ့ ပါတယ်။

ဒီနောက်မှာတော့ ဆန်ချိုဟာ ယူနိုက်တက်အသင်းရဲ့ ရာသီကြို ခြေစမ်းပွဲစဉ်အဖြစ် ရိန်းဂျားစ်နဲ့ ခြေစမ်းပွဲမှာပါ ပါဝင် ကစားခဲ့ပါတယ်။

တန်ဟတ်က သူနဲ့ ဆန်ချိုတို့အကြား အရာအားလုံး ပြည်ဖုံးကာ ချလိုက်ပြီဖြစ်ပြီး အကောင်းဆုံး ရှေ့ဆက် သွားတော့မှာလို့ ထုတ်ပြောခဲ့သလို ရိန်းဂျားစ်နဲ့ ပွဲမှာလည်း ဆန်ချိုကို ထည့်သွင်းခဲ့ပါတယ်။

 မိုက်ကယ် အိုဝင် ကို တွေ့ရစဥ်

ဒီအခြေအနေတွေအရ တန်ဟတ်နဲ့ ဆန်ချိုကြားမှာ ပြေလည်မှု ရရှိသွားပြီလို့ ထင်ရပေမဲ့ ဆန်ချိုဟာ တန်ဟတ်ကို နည်းပြရာထူးကနေ ထုတ်ပယ်ခံရဖို့ ဆန္ဒရှိနေနိုင်တယ်လို့ အိုဝင်က ပြောပါတယ်။

အိုဝင်က "အိုးထရက်ဖို့ဒ်မှာ နည်းပြအပြောင်းအလဲ ဖြစ်သွားတာမျိုး သူမျှော်လင့်ခဲ့လိမ့်မယ်ဆိုတာ ကျနော် သေချာ ပေါက် ပြောနိုင်ပါတယ်။ ဒီလိုဖြစ်သွားမှပဲ သူနဲ့ပတ်သတ်တဲ့ အရာအားလုံး ရှင်းလင်းပြီးသားလည်း ဖြစ်သွားနိုင် မယ်။ ပြီးရင် ဒီအသင်းဆီကိုလည်း ပြန်လာပြီးတော့ အသင်းမှာ ပြန်ကစားဖြစ်ဖို့ မျှော်လင့်ခဲ့ပုံပါပဲ။ 

သူ့ရဲ့ အနာဂတ် ဟာ ဘာဖြစ်လာမလဲဆိုတာ ကျနော် မသိပေမဲ့ သူသေချာပေါက် ဒီအသင်းကနေ ဝေးရာဆီ ထွက်သွား နိုင်ပြီးတော့ ထိပ်တန်းအဆင့်မှာ ဆက်ရှိနေနိုင်တယ်ဆိုတာ သက်သေပြပါလိမ့်မယ်"လို့ မှတ်ချက်ပြု ပြောကြားခဲ့ပါတယ်။

လက်ရှိမှာတော့ ဆန်ချိုကို ပီအက်စ်ဂျီ အသင်းက ခေါ်ယူသွားဖို့ စိတ်ဝင်စားလျက်ရှိနေပါတယ်။

CNI Sport News

၂၀၂၄ ခုနှစ်၊ ဇူလိုင် ၂၆

မန်စီးတီးအသင်းဟာ တိုက်စစ်မှူး အယ်လ်ဗာရက်ဇ်အတွက် ထပ်မံပေးချေရမယ့် ပြောင်းရွှေ့ကြေး မပါဝင်ခင်မှာ အနိမ့်ဆုံး ပေါင်သန်း ၆၀ တောင်းဆိုထားတယ်လို့ The Athletic က ဖော်ပြထားပါတယ်။

အယ်လ်ဗာရက်ဇ်ဟာ မန်စီးတီးအသင်းမှာ ၂ ရာသီကြာ ပွဲပေါင်း ၁၀၀ ကျော် ပါဝင်ကစားပြီး ပရီးမီးယားလိဂ်၊ ချန်ပီယံလိဂ် အပါအဝင် ဆုဖလား အများအပြား ရယူနိုင်ခဲ့တာပါ။

ဒါပေမယ့် အယ်လ်ဗာရက်ဇ်ဟာ ပွဲကစားချိန် ပိုပြီးလိုချင်တာကြောင့် နွေရာသီ အပြောင်းအရွှေ့မှာ မန်စီးတီး အသင်းကနေ ထွက်ခွာချင်နေတာ ဖြစ်ပါတယ်။

မန်စီးတီးအသင်းကတော့ အယ်လ်ဗာရက်ဇ်ကို ထွက်ခွာခွင့်ပေးဖို့ အစီအစဉ် မရှိပေမယ့် ကစားသမားအတွက် အနိမ့်ဆုံး ပြောင်းရွှေ့ကြေး သတ်မှတ်ခဲ့တာပါ။

The Athletic က မန်စီးတီးအသင်းဟာ အယ်လ်ဗာရက်ဇ်အတွက် ပြောင်းရွှေ့ကြေး ပေါင်သန်း ၆၀ နဲ့ ထပ်မံ ပေးချေဖို့ ပေါင် ၁၇ သန်း တောင်းဆိုခဲ့တာ ဖြစ်ပါတယ်။

အယ်လ်ဗာရက်ဇ်ကို ခေါ်ယူဖို့ အသလက်တီကိုအသင်းက စိတ်ဝင်စားနေပေမယ့် မန်စီးတီးအသင်း တောင်းဆို ထားတဲ့ ဈေးနှုန်းကိုတော့ ပေးချေနိုင်ဖို့ မရှိပါဘူး။ 

အယ်လ်ဗာရက်ဇ်ကိုတွေ့ရစဉ်

အာဂျင်တီးနား ကစားသမားကို ခေါ်ယူဖို့ ချယ်လ်ဆီးနဲ့ အာဆင်နယ်အသင်းတို့ကလည်း စိတ်ဝင်စားပြီး ချိတ်ဆက် မှုတွေ ရှိခဲ့ပါတယ်။

အယ်လ်ဗာရက်ဇ်ဟာ ပြီးခဲ့တဲ့ ကိုပါအမေရိကဖလား ပြိုင်ပွဲမှာ အာဂျင်တီးနားအသင်းနဲ့ ချန်ပီယံဆုကို ရယူနိုင်ပြီး နောက် လက်ရှိအချိန်မှာ အာဂျင်တီးနား အိုလံပစ်အသင်းနဲ့ ဆက်ပြီး ပါဝင်နေတာပါ။ 

အဲဒါကြောင့် အယ်လ်ဗာရက်ဇ်ဟာ အိုလံပစ်ပြိုင်ပွဲအပြီးမှာ အနားယူမှာဖြစ်လို့ မန်စီးတီးအသင်းရဲ့ ရာသီအစ ပွဲစဉ် အချို့ကို လွဲချော်မှာ ဖြစ်ပါတယ်။ 

အယ်လ်ဗာရက်ဇ်ဟာ မကြာသေးခင်က အင်တာဗျူးတစ်ခုမှာ သူ့ရဲ့အနာဂတ်နဲ့ ပတ်သက်ပြီး အေးအေးဆေးဆေး ဖြစ်နေတယ်လို့ ပြောထားတာပါ။

အယ်လ်ဗာရက်ဇ်ရဲ့ အာဂျင်တီးနားအသင်းဟာ အိုလံပစ်အုပ်စု အဖွင့်ပွဲစဉ်မှာ မော်ရိုကိုအသင်းကို အရေးနိမ့်ခဲ့ပြီး ဒုတိယပွဲစဉ်အဖြစ် ဇူလိုင် ၂၇ ရက်မှာ အီရတ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Metro