CNI Sport News

၂၀၂၄ ခုနှစ်၊ မတ်လ ၁၃

ဘာစီလိုနာအသင်းနည်းပြ ဇာဗီဟာ အသင်းကို ချန်ပီယံလိဂ်ပြိုင်ပွဲ ကွာတားဖိုင်နယ် တက်နိုင်အောင် ကိုင်တွယ် ပေးနိုင်ခဲ့ပြီးနောက် ဝေဖန်မှုတွေကို ပြန်ပြီးတုန့်ပြန် သွားခဲ့ပါတယ်။

ဇာဗီက “လူတွေက ကျနော့်ကို မယုံကြည်ကြပါဘူး။ သူတို့က ကျနော် အဝတ်လဲခန်းကို ဆုံးရှုံးတော့မယ်လို့ ပြောကြပါတယ်။ ကျနော်တို့ မျှတမှုမရှိတဲ့ ဝေဖန်မှုတွေအများကြီး ခံခဲ့ရပါတယ်။ ဒီပွဲမှာတော့ ဥရောပမှာ ယှဉ်ပြိုင်နိုင်ဖို့အတွက် ပြင်ဆင်ထားတဲ့အသင်းကို ကျနော်တို့ ပြသခဲ့ပါတယ်။ အသင်းဟာ ဘောလုံးရှိတဲ့ အချိန်ရော ဘောလုံးမရှိတဲ့အချိန်ရော အလွန်ကောင်းမွန်ခဲ့ပါတယ်။ ဒီပွဲမှာ ကျနော်တို့ ပွဲကောင်းတစ်ပွဲ ကစားနိုင်ခဲ့ပြီး ဒီအတွက် ကျနော်ဂုဏ်ယူတယ်”လို့ ပြောခဲ့တာပါ။

ဘာစီလိုနာအသင်းဟာ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ နာပိုလီအသင်းကို ၃ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။ 

ပထမအကျော့က ၁ ဂိုးစီ သရေကျခဲ့တာကြောင့် နှစ်ကျော့ပေါင်းရလဒ် ၄ ဂိုး-၂ ဂိုးနဲ့ ဘာစီလိုနာအသင်း အနိုင်ရပြီး ချန်ပီယံလိဂ် ကွာတားဖိုင်နယ်ကို ၄ နှစ်အတွင်း ပထမဆုံးအကြိမ် တက်နိုင်ခဲ့တာပါ။

ဘာစီလိုနာကစားသမားကိုတွေ့ရစဉ်

ဒီပွဲမှာ ဘာစီလိုနာအသင်းအတွက် ဂိုးတွေကို လိုပက်ဇ်၊ ကန်ဆယ်လိုနဲ့ လီဝန်ဒေါစကီးတို့က သွင်းယူခဲ့ပြီး နာပိုလီ အသင်းအတွက် ချေပဂိုးကို ရာမာနီက သွင်းယူခဲ့တာ ဖြစ်ပါတယ်။ 

ဘာစီလိုနာအသင်းဟာ ဒီပွဲမှာအဓိက ကစားသမားအချို့ မပါဝင်နိုင်ခဲ့ပေမယ့် ချန်ပီယံလိဂ် နောက်တစ်ဆင့်ကို တက်နိုင်ခဲ့တာပါ။

ဘာစီလိုနာအသင်းနည်းပြ ဇာဗီဟာ ဒီရာသီအကုန်မှာ အသင်းကနေ ထွက်ခွာတော့မှာဖြစ်ပြီး ချန်ပီယံလိဂ် ဖလားကို ရယူနိုင်ရင်တောင် သူ့ဆုံးဖြတ်ချက်က ပြောင်းမှာ မဟုတ်တော့ဘူးလို့ ပြောခဲ့ပါတယ်။

ဇာဗီက “ချန်ပီယံလိဂ်ဖလား ရရင်လည်း လာမယ့်ရာသီ ဘာစီလိုနာမှာ ကျနော်ရှိနေမှာ မဟုတ်ပါဘူး။ ကျနော့် အနာဂတ်က မပြောင်းလဲသလို အဖြေကလည်း မပြောင်းလဲပါဘူး။ ရာသီအကုန်မှာ ဘာစီလိုနာကနေ ကျနော် ထွက်ခွာမှာပါ”လို့ ပြောကြားခဲ့ပါတယ်။

ဘာစီလိုနာအသင်းဟာ ဒီတစ်ပတ်မှာ စပိန်လာလီဂါ ပွဲစဉ်အဖြစ် အသလက်တီကိုအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Goal

CNI News

၂၀၂၄ ခုနှစ်၊ မတ်လ ၁၃

အာဆင်နယ်အသင်းဟာ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ပေါ်တိုအသင်းကို ပင်နယ်တီ အဆုံးအဖြတ်နဲ့ အနိုင်ရပြီး ကွာတားဖိုင်နယ်ကို ၁၄ နှစ်အကြာမှ ပထမဆုံးအကြိမ် တက်ရောက်နိုင်ခဲ့ပါတယ်။

အာဆင်နယ်အသင်းဟာ ဒုတိယအကျော့ပွဲစဉ်မှာ ပေါ်တိုအသင်းကို ၁ ဂိုး- ဂိုးမရှိနဲ့ အနိုင်ရရှိခဲ့တာပါ။ 

ဒါပေမယ့် ပထမအကျော့ ပွဲစဉ်တုန်းက ပေါ်တိုအသင်းက ၁ ဂိုး- ဂိုးမရှိနဲ့ အနိုင်ရထားတဲ့အတွက် နှစ်ကျော့ပေါင်း ရလဒ် ၁ ဂိုးစီ သရေကျနေလို့ အချိန်ပို ဆက်ပြီးကစားခဲ့ရတာ ဖြစ်ပါတယ်။ 

အချိန်ပိုမှာ ဘယ်အသင်းမှ ဂိုးမသွင်းနိုင်တာကြောင့် ပင်နယ်တီ အဆုံးအဖြတ်ခံယူခဲ့ရပြီး အာဆင်နယ်အသင်းက ဂိုးသမား ဒေးဗစ်ရာယာရဲ့ လက်စွမ်းပြ ကာကွယ်မှုတွေကြောင့် ၄ ဂိုး-၂ ဂိုးနဲ့ အနိုင်ရပြီး ကွာတားဖိုင်နယ်ကို တက်နိုင်ခဲ့တာပါ။
 
အာဆင်နယ်အသင်းဟာ ချန်ပီယံလိဂ် ကွာတားဖိုင်နယ်ကို ၂၀၁၀ ခုနှစ်က နောက်ဆုံးအကြိမ် တက်ရောက်နိုင်ခဲ့ တာကြောင့် ဒီအဆင့်ကို ပြန်တက်နိုင်ဖို့ ၁၄ နှစ်ကြာ စောင့်ဆိုင်းခဲ့ရတာ ဖြစ်ပါတယ်။

အာဆင်နယ်အသင်းကို တွေ့ရစဉ်

အာဆင်နယ်အသင်းနည်းပြ အာတီတာကတော့ သူတို့ရောက်ချင်တဲ့ နေရာကို ရောက်ရှိလာအောင် စွမ်းဆောင် ပေးနိုင်ခဲ့တဲ့ ကစားသမားတွေကို ချီးကျူးခဲ့သလို ပရိသတ်တွေရဲ့ အားပေးမှုတွေကို ကျေးဇူးတင်ကြောင်း ပြောခဲ့ပါတယ်။

အာတီတာက “၁၄ နှစ်တောင် ကြာခဲ့ပါပြီ။ ဒါဟာ အာဆင်နယ်လို အသင်းအတွက် အချိန်အတော်ကြာခဲ့ပြီး ဘယ်လောက် ခက်ခဲတယ်ဆိုတာ ပြသနေပါတယ်။ အဆုံးထိ မှော်ဆန်တဲ့ အခိုက်အတန့်တွေကို ရှာဖွေဖို့ ကျနော်တို့ လုပ်ဆောင်ခဲ့ရတာပါ။ အာဆင်နယ်ပရိသတ်တွေကို ကျေးဇူးတင်ပြီး သူတို့ကို ကျနော်တို့ အလွန် ချစ်ပါတယ်။ သူတို့က ကျနော်တို့ဆီ ယူဆောင်လာခဲ့တဲ့ စွမ်းအင်တွေက ထူးခြားပါတယ်။ ကျနော်တို့ အတူတူ လုပ်ဆောင်နိုင်ခဲ့ပါတယ်”လို့ TNT Sports ကို ပြောကြားခဲ့ပါတယ်။

ပင်နယ်တီ အဆုံးအဖြတ်မှာ ပေါ်တိုအသင်းရဲ့ ပင်နယ်တီ ၂ လုံးကို ကာကွယ်နိုင်ခဲ့တဲ့ အာဆင်နယ်အသင်း ဂိုးသမား ဒေးဗစ်ရာယာဟာ ဒီပွဲရဲ့ အကောင်းဆုံး ကစားသမားဆုကို ရရှိခဲ့ပါတယ်။ 

ဒေးဗစ်ရာယာကတော့ အာဆင်နယ်အသင်းကို နှစ်ပေါင်းများစွာကြာ ဝေးကွာနေတဲ့ ချန်ပီယံလိဂ်ကွာတား ဖိုင်နယ်ကို ပို့ဆောင်ပေးနိုင်ခဲ့တာကြောင့် အလွန်ပျော်ရွှင်တယ်လို့ ပြောခဲ့တာပါ။ 

အာဆင်နယ်အသင်းဟာ လက်ရှိအချိန်မှာ အကောင်းဆုံးပုံစံ ရရှိနေပြီး ချန်ပီယံလိဂ်ပြိုင်ပွဲမှာ ကွာတားဖိုင်နယ် တက်နိုင်ခဲ့သလို ပရီးမီးယားလိဂ်ပြိုင်ပွဲမှာလည်း အမှတ်ပေးဇယားကို ဦးဆောင်နေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မတ်လ ၁၂

၂၀၂၆ ကမ္ဘာ့ဖလားခြေစစ်ပွဲ(အာရှဇုန်) အုပ်စုပွဲစဉ်အဖြစ် အခုလကုန်ပိုင်းမှာ ယှဉ်ပြိုင်မယ့် မြောက်ကိုရီးယားနဲ့ ဂျပန်အသင်းတို့ရဲ့ ပွဲစဉ်ကို စီစဉ်ထားတဲ့အတိုင်း ပြုံယမ်းမှာ ကစားမယ်လို့ ဂျပန်ဘောလုံးအဖွဲ့ချုပ်က အတည် ပြုခဲ့ပါတယ်။

ပြီးခဲ့တဲ့လက ပဲရစ်အိုလံပစ်ပြိုင်ပွဲ အမျိုးသမီး ခြေစစ်ပွဲ ပလေးအော့ဖ် ပထမအကျော့ပွဲစဉ်ကို မြောက်ကိုရီးယားမှာ မကစားဘဲ ကြားကွင်းအဖြစ် ဆော်ဒီနိုင်ငံမှာ ပြောင်းရွှေ့ကျင်းပခဲ့တာပါ။ 

ဂျပန်ဘောလုံးအဖွဲ့ချုပ်က အမျိုးသမီးပွဲကို ပြုံယမ်းကနေ ပြောင်းရွှေ့ပြီး ကျင်းပဖို့ တောင်းဆိုခဲ့ပေမယ့် မတ်လ ၂၆ ရက်မှာ ကစားမယ့် အမျိုးသားပွဲကိုတော့ ပရိသတ်ဦးရေ ၅၀,၀၀၀ ဝင်ဆံ့တဲ့ Kim Il Sung အားကစားကွင်းမှာ ယှဉ်ပြိုင်မယ်လို့  အကြောင်းကြားထားတာ ဖြစ်ပါတယ်။ 

ဂျပန်နဲ့ မြောက်ကိုရီးယား အသင်းတို့ဟာ ပြုံယမ်းပွဲစဉ် မတိုင်ခင် မတ်လ ၂၁ ရက်မှာ ကမ္ဘာ့ဖလားခြေစစ်ပွဲအဖြစ် တိုကျိုအားကစားကွင်းမှာ ယှဉ်ပြိုင်သွားမှာပါ။

ဂျပန်အသင်းနဲ့ မြောက်ကိုရီးယားအသင်း ယှဉ်ပြိုင်နေစဉ်

ဂျပန်အသင်းဟာ လက်ရှိအချိန်မှာ ခြေစစ်ပွဲ ၂ ပွဲ ကစားထားပြီး မြန်မာနဲ့ ဆီးရီးယားအသင်းတို့ကို အနိုင်ရရှိ ထားတာ ဖြစ်ပါတယ်။

မြောက်ကိုရီးယား အသင်းကတော့ ခြေစစ်ပွဲ ၂ ပွဲ ကစားအပြီးမှာ ဆီးရီးယားအသင်းကို အရေးနိမ့်ကာ မြန်မာ အသင်းကို ဂိုးပြတ်အနိုင်ရရှိထားတာပါ။ 

ဂျပန်နဲ့ မြောက်ကိုရီးယား အသင်းတို့ဟာ ၂၀၁၇ က အရှေ့အာရှ ချန်ပီယံရှစ်ပြိုင်ပွဲမှာ နောက်ဆုံး တွေ့ဆုံထားပြီး ဂျပန်အသင်းက ၁ ဂိုး- ဂိုးမရှိနဲ့ အနိုင်ရရှိထားတာ ဖြစ်ပါတယ်။

မြောက်ကိုရီးယားနဲ့ ဂျပန်အသင်းတို့ဟာ ၂၀၁၁ ခုနှစ်၊ ဒီဇင်ဘာလက ပြုံယမ်းမှာ နောက်ဆုံးအကြိမ် တွေ့ဆုံခဲ့ပြီး မြောက်ကိုရီးယားအသင်းက ၁ ဂိုး- ဂိုးမရှိနဲ့ အနိုင်ရရှိခဲ့တာပါ။ 

မြောက်ကိုရီးယားအသင်းဟာ ပြီးခဲ့တဲ့လတွေမှာ ကမ္ဘာ့ဖလား ခြေစစ်ပွဲအတွက် ပြင်ဆင်မှုအဖြစ် တရုတ်ကလပ် တွေနဲ့ ခြေစမ်းပွဲ ၃ ပွဲ ကစားခဲ့တာမှာ ၂ ပွဲနိုင် ၁ ပွဲ သရေရလဒ် ထွက်ပေါ်ခဲ့ပါတယ်။ 

ဂျပန်အသင်းကတော့ ပြီးခဲ့တဲ့ အာရှဖလားပြိုင်ပွဲမှာ ကွာတားဖိုင်နယ်အထိ တက်ရောက်နိုင်ခဲ့တာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ မတ်လ ၁၂

မန်စီးတီးအသင်းဂိုးသမား အီဒါဆန်ဟာ လီဗာပူးလ်အသင်းနဲ့ပွဲမှာ ရရှိခဲ့တဲ့ ကြွက်သားဒဏ်ရာကြောင့် ၄ ပတ်ကြာ အနားယူရတော့မှာ ဖြစ်ပါတယ်။

အီဒါဆန်ဟာ လီဗာပူးလ်အသင်း တိုက်စစ်မှူး ဒါဝင်နူနက်စ်ကို ဂိုးဧရိယာအတွင်း ပြစ်ဒဏ်ကျူးလွန်ခဲ့တာမှာ ဒဏ်ရာ ရရှိသွားခဲ့တာဖြစ်ပြီး ကုသမှုခံယူခဲ့ပေမယ့် မိနစ်အနည်းငယ်အကြာမှာ ဂိုးသမား အော်တီဂါနဲ့ လူစားလဲ ခဲ့ရတာပါ။ 

အီဒါဆန်ဟာ ဒဏ်ရာကြောင့် အနားယူရမှာဖြစ်လို့ ဒီအပတ်ထဲ ကစားမယ့် နယူးကာဆယ်အသင်းနဲ့ပွဲမှာ မန်စီးတီး အသင်းအတွက် ပါဝင်နိုင်တော့မှာ မဟုတ်သလို မတ်လ ၃၁ ရက်မှာ ကစားမယ့် အာဆင်နယ်နဲ့ ပရီးမီးယားလိဂ် ပွဲစဉ်ကိုလည်း လွဲချော်နိုင်တာ ဖြစ်ပါတယ်။

ဒါအပြင် အီဒါဆန်ဟာ ဒီလထဲ အင်္ဂလန်၊ စပိန်အသင်းတို့နဲ့ ကစားမယ့် ခြေစမ်းပွဲမှာ ဘရာဇီးလ်အသင်းအတွက် မပါဝင်နိုင်တော့တာပါ။ 

အီဒါဆန်အပြင် လီဗာပူးလ်အသင်း ဂိုးသမား အလီဆန်ဟာ ဒဏ်ရာကြောင့် ဘရာဇီးလ်အသင်းအတွက် ပါဝင် နိုင်မှာ မဟုတ်လို့ ဘရာဇီးလ်အသင်း နည်းပြသစ် ဒိုရီဗယ်လ်ဂျူနီယာ အနေနဲ့ ဂိုးသမား နေရာအတွက် ခေါင်းခဲရနိုင်တာ ဖြစ်ပါတယ်။ 

 အီဒါဆန်ကို တွေ့ရစဉ်

ဘရာဇီးလ်အသင်း လူစာရင်းမှာ ပါဝင်နေတဲ့ မာကွင်ဟိုစ်နဲ့ မာတင်နယ်လီတို့လည်း ဒဏ်ရာရရှိနေတာကြောင့် သူတို့နေရာမှာ ဖာဘရီဇီယိုဘရူနိုနဲ့ ဂါလီနိုတို့ကို အစားထိုး ရွေးချယ်ခဲ့တာပါ။

ဘရာဇီးလ်အသင်းဟာ မတ် ၂၃ ရက်မှာ အင်္ဂလန်၊ ၂၆ ရက်မှာ စပိန်အသင်းတို့နဲ့ ယှဉ်ပြိုင်မှာဖြစ်ပြီး ဇွန်ထဲမှာ မက္ကဆီကို၊ အမေရိကန်အသင်းတို့နဲ့ ခြေစမ်းပွဲ ဆက်လက် ယှဉ်ပြိုင်မှာ ဖြစ်ပါတယ်။

ဘရာဇီးလ်အသင်းဟာ ဇွန်ထဲမှာ ကိုပါအမေရိကဖလားပြိုင်ပွဲအဖြစ် အုပ်စု D မှာ ကိုလံဘီယာ၊ ပါရာဂွေး၊ ကွန်ကာကပ်ဖ်ပလေးအော့ဖ်ဇုန်က အနိုင်ရတဲ့အသင်းနဲ့ ကျရောက်နေတာပါ။ 

ဘရာဇီးလ်အသင်းဟာ ကိုပါအမေရိကဖလားပြိုင်ပွဲမှာ ချန်ပီယံဆုကို ၉ ကြိမ်အထိ ရရှိထားတာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ မတ်လ ၁၂

ချယ်လ်ဆီးအသင်းဟာ နယူးကာဆယ်အသင်းကို အနိုင်ရခဲ့ပေမယ့် နည်းပြ ပိုချက်တီနိုက ကစားသမားတွေကို ရင့်ကျက်ဖို့ တိုက်တွန်းခဲ့ပါတယ်။

ပိုချက်တီနိုက “ဒီနိုင်ပွဲဟာ ကျနော်တို့အတွက် ကြီးမားတဲ့ ၃ မှတ်ဖြစ်ပြီး အလွန်ကောင်းမွန်တဲ့အသင်း တစ်သင်းကို အနိုင်ယူခဲ့ပါတယ်။ ဂိုးတွေပေးရတဲ့အတွက်တော့ ကျနော်စိတ်ပျက်မိပါတယ်။ ကျနော်တို့ဟာ အနည်းဆုံးတော့ ပိုရင့်ကျက်ဖို့လိုသလို ဒီလိုအခြေအနေတွေထက် ပိုကောင်းတဲ့ စွမ်းရည်ကိုပြသရမှာပါ။ တိုက်စစ်ကစားသမား တွေလည်း ယုံကြည်မှုရှိဖို့ အရေးကြီးပြီး ဂိုးသွင်းနိုင်ရင် နိုင်ပွဲတွေရမယ်ဆိုတာ သိပါတယ်။ ဒါတွေကို ခြုံငုံပြီး ပြောရရင်တော့ ကျနော်ပျော်ရွှင်တယ်”လို့ ပြောကြားခဲ့ပါတယ်။

ချယ်လ်ဆီးအသင်းဟာ ပရီးမီးယားလိဂ်ပွဲစဉ် ၂၈ နောက်ဆုံးပွဲစဉ်အဖြစ် နယူးကာဆယ်အသင်းနဲ့ ကစားခဲ့တာမှာ ၃ ဂိုး- ၂ ဂိုးနဲ့ အနိုင်ရရှိခဲ့တာပါ။

ဒီပွဲမှာ ချယ်လ်ဆီးအသင်းအတွက် ဂိုးတွေကို ဂျက်ဆန်၊ ပါလ်မာနဲ့ မူဒရစ်တို့က သွင်းယူခဲ့ပြီး နယူးကာဆယ်အသင်း အတွက် ဂိုးတွေကို အိုင်ဆက်ခ်နဲ့ မာဖီတို့က သွင်းယူခဲ့တာ ဖြစ်ပါတယ်။ 

ဒီပွဲမှာ ချယ်လ်ဆီးအသင်းအတွက် ၁ ဂိုးသွင်း ၁ ဂိုး ဖန်တီးပေးခဲ့တဲ့ ပါလ်မာဟာ ပြီးခဲ့တဲ့နွေရာသီက မန်စီးတီး အသင်းကနေ ရောက်ရှိလာပြီးကတည်းက အသင်းအတွက် ၁၁ ဂိုးသွင်းပြီး ၈ ဂိုးဖန်တီးထားတာပါ။

ပိုချက်တီနိုကို တွေ့ရစဉ်

နည်းပြ ပိုချက်တီနိုကတော့ ချယ်လ်ဆီးအသင်း နိုင်ပွဲရယူနိုင်လို့ ပျော်ရွှင်နေပေမယ့် ဂိုးတွေပြန်ပေးရတာကို စိတ်ပျက်နေတာ ဖြစ်ပါတယ်။

ချယ်လ်ဆီးအသင်းဟာ ဒီနိုင်ပွဲကြောင့် ပရီးမီးယားလိဂ်အဆင့် ၁၁ နေရာမှာ ဆက်လက် ရပ်တည်နေပေမယ့် အဆင့် ၇ နေရာက ဝက်စ်ဟမ်းအသင်းနဲ့ ၄ မှတ်သာ ကွာဟတော့တာကြောင့် ဥရောပဝင်ခွင့် နေရာအတွက် မျှော်လင့်ချက်တွေ ရှင်သန်နေတာပါ။

ဒါအပြင် ချယ်လ်ဆီးအသင်းဟာ လက်ကျန်ပွဲ တစ်ပွဲကစားဖို့ ကျန်ရှိနေသေးတာ ဖြစ်ပါတယ်။ 

နယူးကာဆယ်အသင်းကတော့ ပြီးခဲ့တဲ့ရာသီက ချန်ပီယံလိဂ်ဝင်ခွင့် ရယူနိုင်ခဲ့ပေမယ့် ဒီရာသီမှာ ကစားသမား တွေရဲ့ ဒဏ်ရာတွေကြောင့် ရလဒ်တွေဆိုးနေပြီး အဆင့် ၁၀ နေရာမှာ ရပ်တည်နေတာပါ။ 

အခုလာမယ့် အပတ်မှာတော့ ချယ်လ်ဆီးအသင်းဟာ FA ဖလား ကွာတားဖိုင်နယ်ပွဲစဉ်အဖြစ် လက်စတာအသင်းနဲ့ ယှဉ်ပြိုင်ရမှာဖြစ်ပြီး နယူးကာဆယ်အသင်းက မန်စီးတီးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source:Express

CNI Sport News

၂၀၂၄ ခုနှစ်၊ မတ်လ ၁၂

အယ်လ်နာဆာအသင်းဟာ အာရှချန်ပီယံလိဂ်ပြိုင်ပွဲ ကွာတားဖိုင်နယ်ပွဲစဉ်မှာ အယ်လ်အိန်းအသင်းကို ပင်နယ်တီ အဆုံးအဖြတ်နဲ့ အရေးနိမ့်ပြီး ပြိုင်ပွဲကနေ ထွက်ခွာခဲ့ရပြီဖြစ်ပါတယ်။

အာရှချန်ပီယံလိဂ် ကွာတားဖိုင်နယ် ဒုတိယအကျော့ပွဲစဉ်အဖြစ် ကစားခဲ့တဲ့ဒီပွဲမှာ အယ်လ်နာဆာအသင်းဟာ အယ်လ်အိန်းအသင်းကို ပွဲချိန်အတွင်း ၃ ဂိုး-၂ ဂိုးနဲ့ အနိုင်ရရှိခဲ့တာပါ။

ပထမအကျော့အဖြစ် ကစားခဲ့တုန်းက အယ်လ်အိန်းအသင်းက ၁ ဂိုး- ဂိုးမရှိနဲ့ အနိုင်ရခဲ့တာကြောင့် နှစ်ကျော့ ပေါင်းရလဒ် ၃ ဂိုးစီ သရေကျနေလို့ အချိန်ပိုဆက်ပြီး ကစားခဲ့ရတာဖြစ်ပါတယ်။ 

အချိန်ပိုမှာ အယ်လ်အိန်းအသင်းက ဦးဆောင်ဂိုး သွင်းယူခဲ့ပေမယ့် ရော်နယ်ဒိုက အယ်လ်နာဆာအသင်းအတွက် ချေပဂိုးပြန်သွင်းခဲ့လို့ ၄ ဂိုးစီသရေနဲ့ ပင်နယ်တီ အဆုံးအဖြတ်ခံယူ ခဲ့ရတာပါ။

ပင်နယ်တီမှာ အယ်လ်နာဆာအသင်းက ရော်နယ်ဒို တစ်ဦးတည်းသာ ဂိုးဝင်ခဲ့ပြီး ဘရိုဇိုဗစ်၊ တဲလက်စ်နဲ့ အော်တာဗီယိုတို့ လွဲချော်ခဲ့တာ ဖြစ်ပါတယ်။

အယ်လ်အိန်းအသင်းကတော့ ပင်နယ်တီ ၃ ဂိုးစလုံး ဂိုးဝင်ခဲ့တာကြောင့် ပင်နယ်တီ အဆုံးအဖြတ် ၃ ဂိုး-၁ ဂိုးနဲ့ အနိုင်ရပြီး အာရှချန်ပီယံလိဂ်ပြိုင်ပွဲ ဆီမီးဖိုင်နယ်အဆင့်ကို တက်နိုင်ခဲ့တာပါ။

 ရော်နယ်ဒို ဂိုးမသွင်းနိုင်ခဲ့တဲ့အနီးကပ် မြင်ကွင်းကို တွေ့ရစဉ်

အယ်လ်အိန်းအသင်းဟာ ဆီမီးဖိုင်နယ်မှာ အယ်လ်ဟီလယ်နဲ့ အယ်လ်အစ်တီဟတ်အသင်းတို့က ပွဲစဉ်က အနိုင်ရတဲ့အသင်းနဲ့ ယှဉ်ပြိုင်ရမှာဖြစ်ပါတယ်။

အယ်လ်နာဆာ အသင်းခေါင်းဆောင် ရော်နယ်ဒိုဟာ ဒီပွဲမှာ ဂိုးပေါက်နဲ့ ၃ ကိုက် အကွာသာရှိတဲ့ အခွင့်အရေး ကောင်းကို လွဲချော်ခဲ့တဲ့အတွက် သူ့ကိုယ်သူတောင် မယုံကြည်နိုင်ဖြစ်နေခဲ့တာပါ။

အယ်လ်နာဆာအသင်းဟာ ဆော်ဒီပရိုလိဂ်ပြိုင်ပွဲမှာ အဆင့် ၁ နေရာက အယ်လ်ဟီလယ်အသင်းနဲ့ ၁၂ မှတ် ကွာဟနေတာကြောင့် အမှတ်ပေးလိဂ်ကို လက်လွှတ်ရဖို့ သေချာနေသလို အခု အာရှချန်ပီယံလိဂ်ပြိုင်ပွဲကပါ ထွက်ခွာခဲ့ရတာ ဖြစ်ပါတယ်။ 

အဲဒါကြောင့် အယ်လ်နာဆာအသင်း အနေနဲ့ ဆော်ဒီဘုရင့်ဖလားပြိုင်ပွဲနဲ့ ဆော်ဒီစူပါဖလားပြိုင်ပွဲမှာ ချန်ပီယံဆု ရယူနိုင်ဖို့သာ အာရုံစိုက်ရတော့မှာပါ။

အယ်လ်နာဆာအသင်းဟာ မတ်လ ၁၅ ရက်မှာ ဆော်ဒီပရိုလိဂ်ပွဲစဉ်အဖြစ် အယ်လ်အာလီအသင်းနဲ့ ယှဉ်ပြိုင်ရမှာ ဖြစ်ပါတယ်။  

CNI Sport News

၂၀၂၄ ခုနှစ်၊ မတ်လ ၁၁

လီဗာပူးလ်အသင်း တိုက်စစ်မှူး ဆာလက်ဟာ အခုလထဲ ယှဉ်ပြိုင်မယ့် ခြေစမ်းပွဲပြိုင်ပွဲအတွက် အီဂျစ် လူစာရင်းကနေ ထွက်ခွာခဲ့ပါတယ်။

ဆာလက်ဟာ ဒီရာသီမှာ ဒဏ်ရာတွေနဲ့ ရုန်းကန်နေရတာကြောင့် UAE မှာကျင်းပမယ့် ပြိုင်ပွဲမှာ မရွေးချယ်ဘဲ အနားပေးဖို့ လီဗာပူးလ်အသင်းက အီဂျစ်ဘောလုံးအဖွဲ့ချုပ်ကို တောင်းဆိုခဲ့တာပါ။ 

လီဗာပူးလ်အသင်းရဲ့ တောင်းဆိုမှုကို လျစ်လျူရှုပြီး အီဂျစ်အသင်းဟာ ဆာလက်ကို သူတို့ရဲ့ ကနဦး လူစာရင်းမှာ ရွေးချယ်ခဲ့တာ ဖြစ်ပါတယ်။ 

ဒါပေမယ့် အီဂျစ်အသင်းရဲ့ အပြီးသတ် ၂၅ ဦး လူစာရင်းမှာတော့ ဆာလက် ပါဝင်လာခဲ့ခြင်းမရှိတော့တာပါ။ 

ဆာလက်ဟာ ပြီးခဲ့တဲ့ အာဖရိကဖလားပြိုင်ပွဲမှာ အီဂျစ်အသင်းအတွက် ပါဝင်ကစားရင်း ဒဏ်ရာရရှိခဲ့တာကြောင့် လီဗာပူးလ်အသင်းထံ ပြန်လာပြီး ကုသမှုတွေခံယူခဲ့ရတာ ဖြစ်ပါတယ်။

ဆာလက်ကို တွေ့ရစဉ်

ဆာလက်ဟာ ဖေဖော်ဝါရီ ၁၇ ရက်မှာ ကစားတဲ့ ဘရန်ဖို့ဒ်အသင်းနဲ့ပွဲမှာ လီဗာပူးလ်အသင်းအတွက် ပါဝင်ကစား နိုင်ခဲ့ပေမယ့် ဒဏ်ရာထပ်ပြီး ရခဲ့တာကြောင့် အနားယူခဲ့ရပြီး စပါတာပရက်နဲ့ ယူရိုပါလိဂ်ပွဲစဉ်မှ ပြန်လည်ပါဝင် ကစားနိုင်ခဲ့တာပါ။ 

ဆာလက်ဟာ ပြီးခဲ့တဲ့ လီဗာပူးလ်နဲ့ မန်စီးတီးအသင်းတို့ ပွဲစဉ်မှာလည်း လူစားဝင်ကစားသမားအဖြစ်သာ ပါဝင်နိုင်ခဲ့တာ ဖြစ်ပါတယ်။ 

အီဂျစ်အသင်းပါဝင်မယ့် Winsunited Cup ပြိုင်ပွဲကို အဘူဒါဘီမှာ မတ် ၂၂ ရက်ကနေ ၂၆ ရက်အထိ ကျင်းပ သွားမှာဖြစ်ပြီး နယူးဇီလန်အသင်းနဲ့ ယှဉ်ပြိုင်ရမှာပါ။

ဒီပွဲရဲ့ ရလဒ်ပေါ်မူတည်ပြီး အီဂျစ်အသင်းဟာ ခရိုအေးရှား ဒါမှမဟုတ် တူနီးရှားအသင်းတို့ပွဲစဉ်က အသင်းနဲ့ ယှဉ်ပြိုင်ရမှာဖြစ်ပါတယ်။ 

ဆာလက်ဟာ နိုင်ငံတကာပွဲစဉ် အချိန်အတွင်းမှာ လီဗာပူးလ်အသင်းနဲ့ လေ့ကျင့်မှုတွေဆက်ပြီး ပြုလုပ်ဖို့ ရှိနေတာပါ။

ဆာလက်ဟာ ဒီရာသီမှာ ဒဏ်ရာကြောင့် ပွဲစဉ်တွေ အများအပြားကို လွဲချော်ခဲ့ပေမယ့် ၁၉ ဂိုး သွင်းယူပြီး အသင်းရဲ့ ထိပ်တန်းဂိုးသွင်းရှင်အဖြစ် ရပ်တည်နေတာဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ မတ်လ ၁၁

တားမြစ်ဆေးသုံးစွဲမှုကြောင့် ဘောလုံးကစားခွင့် ၄ နှစ်ကြာပိတ်ပင်ခံထားရတဲ့ ဂျူဗင်တပ်စ်အသင်းကွင်းလယ်လူ ပေါ့ဘာဟာ ရုရှားမှာကစားဖို့ ကမ်းလှမ်းမှုရရှိထားတယ်လို့ Tuttosport က ဖော်ပြထားပါတယ်။

၄ နှစ်ကြာပိတ်ပင်မှုကို အယူခံဝင်ထားတဲ့ ပေါ့ဘာဟာ ဒဏ်ရာတွေ၊ကံဆိုးမှုတွေကြောင့် ဒုတိယမြောက် ဂျူဗင်တပ်စ်အသင်းကစားသမားဘဝကို အဆုံးသတ်ရဖို့ရှိနေတာပါ။ Tuttosport က ရုရှားနိုင်ငံရဲ့ Celebrity football league ကလပ် Broke Boys အသင်းဟာ ပေါ့ဘာကို ခေါ်ယူဖို့ စိတ်ဝင်စားနေတယ်လို့ ဖော်ပြခဲ့တာ ဖြစ်ပါတယ်။ ဒီအပြောင်းအရွှေ့သာဖြစ်ခဲ့ရင် ပေါ့ဘာအနေနဲ့ သူ့ရဲ့ဘောလုံးအပေါ် ယုံကြည်မှုတွေကို ပြန်လည် ရရှိလာနိုင်တာပါ။ 

ရုရှားနိုင်ငံမှာ မီဒီယာဘောလုံးလိဂ်ကို ၂၀၂၂ ခုနှစ်မှာ တည်ထောင်ခဲ့ပြီး ဒီပြိုင်ပွဲမှာ နာမည်ကြီး သရုပ်ဆောင် တွေပါတဲ့ အသင်းတွေပါဝင်တာဖြစ်ပါတယ်။ Broke Boys အသင်းရဲ့ အားကစားဒါရိုက်တာဖြစ်သူ အာတ့်ဂျွန်က ပေါ့ဘာနဲ့ အဆက်အသွယ်ရှိတယ်လို့ ပြောခဲ့တာပါ။ 

အာတ့်ဂျွန်က “ဟာသတစ်ခုလိုထင်ရပေမယ့် ကျနော်တို့ သူ့ကိုခေါ်ခဲ့ပါတယ်။ အခုအချိန်ထိ သူဟာ ယဉ်ယဉ် ကျေးကျေးနဲ့ ငြင်းဆန်ခဲ့ပါတယ်။ စိတ်ပျက်နေတဲ့အချိန်မှာ သူ့အတွက်လက်ခံဖို့ အချိန်လိုပါတယ်။ ပေါ့ဘာဟာ ကမ္ဘာ့အကောင်းဆုံးဘောလုံးသမားတွေထဲက တစ်ဦးဖြစ်ပြီး အချိန်အကြာကြီးမကစားဘဲ နေနိုင်မှာ မဟုတ်ပါဘူး” လို့ ပြောခဲ့တာပါ။

Broke Boys အသင်း ဥက္ကဋ္ဌဟာ ပေါ့ဘာနဲ့ သူ့ရဲ့အေးဂျင့် ပီမန်တာထံ စာပေးပို့ခဲ့ပြီး ပေါ့ဘာသာ သူ့အသင်းနဲ့ ပူးပေါင်းဖို့ ရုရှားကိုလာဖို့ ဆုံးဖြတ်ခဲ့ရင် လစာနဲ့ ခံစားခွင့်အချို့ကိုပေးမယ်လို့ အဆိုပြုထားပါတယ်။ လက်ရှိ အချိန်မှာတော့ ပေါ့ဘာဟာ အသက် ၃၅ နှစ်အရွယ်ထိ ဘောလုံးနဲ့ဝေးကွာရဖို့ ရှိနေတာဖြစ်ပါတယ်။ 

Source:DailyMail

CNI Sport News

၂၀၂၄ ခုနှစ်၊ မတ်လ ၁၁ 

စပါးအသင်းဟာ ဗီလာအသင်းကို အဝေးကွင်းမှာ ဂိုးပြတ်အနိုင်ရပြီး ချန်ပီယံလိဂ်ဝင်ခွင့် မျှော်လင့်ချက်တွေ မြှင့်တက်လာပြီးနောက် ပရိသတ်တွေ စိတ်လှုပ်ရှားနိုင်တယ်လို့ နည်းပြ ပိုစတီကိုဂလူးက ပြောခဲ့ပါတယ်။

ပိုစတီကိုဂလူးက “ဒါက အလွန်အရေးကြီးတဲ့ ပွဲကြီးတစ်ပွဲဖြစ်ခဲ့ပါတယ်။ ကျနော်တို့ ဒီလိုမျိုး စွမ်းဆောင်နိုင်ခဲ့တာ ဟာ လူတိုင်းအတွက် ဂုဏ်ယူစရာပါပဲ။ ဒါဟာ ကျနော်တို့အတွက် အလွန်ကောင်းမွန်တဲ့ ပွဲတစ်ပွဲဖြစ်ခဲ့ပြီး ပရိသတ်တွေလည်း ပျော်ရွှင်ရမှာပါ။ ကျနော်တို့အတွက် တစ်ပွဲပိုနီးနေပြီဖြစ်သလို ကစားဖို့လည်း ၁၁ ပွဲပဲကျန်ပါ တော့တယ်။ ကျနော်တို့ မသေသေးဘူးလို့ထင်ကြောင်း” ပြောခဲ့တာပါ။

စပါးအသင်းဟာ ဗီလာအသင်းကို ၄ ဂိုး- ဂိုးမရှိနဲ့ ဂိုးပြတ် အနိုင်ရပြီးနောက် အဆင့် ၄ နေရာမှာ ဆက်လက် ရပ်တည်နေတဲ့ ဗီလာအသင်းနဲ့ ၂ မှတ်အကွာ အဆင့် ၅ နေရာမှာ ရပ်တည်နေတာ ဖြစ်ပါတယ်။ 

ဒါပေမယ့် စပါးအသင်းဟာ လက်ကျန်ပွဲ တစ်ပွဲကစားဖို့ ကျန်ရှိနေသေးတာကြောင့် အဆင့် ၄ နေရာကို တက်လှမ်း နိုင်ဖို့ အခွင့်အရေးကောင်းတွေ ရှိနေတာပါ။ ဗီလာအသင်းနဲ့ပွဲမှာ စပါးအသင်းအတွက် ဂိုးတွေကို မက်ဒီဆင်၊ ဘရီနန်ဂျွန်ဆင်၊ဆွန်ဟောင်မင်နဲ့ တီမိုဝါနာတို့က သွင်းယူခဲ့တာ ဖြစ်ပါတယ်။

စပါးအသင်းကို တွေ့ရစဉ်

ဗီလာအသင်းနည်းပြ အူနှိုင်းအမ်မရီကတော့ ရလဒ်ဆိုးတွေကနေ အမြန်ဆုံး ရလဒ်ကောင်းတွေ ပြန်ရယူဖို့ ကစားသမားတွေကို တိုက်တွန်းထားပါတယ်။

ဗီလာအသင်းဟာ ပြီးခဲ့တဲ့ကြားရက်က ယူရိုပါကွန်းဖရန့်လိဂ် ၁၆ သင်းအဆင့် ပထမကျော့ပွဲစဉ်မှာလည်း အေဂျက်စ်အသင်းနဲ့ ဂိုးမရှိသရေကျခဲ့တာ ဖြစ်ပါတယ်။

အူနှိုင်းအမ်မရီက “ကျနော် ကစားသမားတွေနဲ့ စကားတွေ အများကြီး မပြောခဲ့ပါဘူး။ ကျနော်တို့ ဆက်သွားမယ်၊ ကြာသာပတေးပွဲစဉ်နဲ့ ဝက်စ်ဟမ်းပွဲစဉ်ကိုတွေးဖို့ပဲ ပြောခဲ့ပါတယ်။ ဒီပွဲမှာ အနီကတ်ထိခဲ့တဲ့ မက်ဂင်းဟာ မကောင်းတဲ့ ရည်ရွယ်ချက်တွေနဲ့ လုပ်နေတဲ့ ကစားသမားတော့ မဟုတ်ပါဘူး။ အနီကတ်ကတော့ ဖြစ်သင့်ပေမယ့် မကောင်းတဲ့ ရည်ရွယ်ချက်တော့ မဟုတ်ဘူး”လို့ ပြောခဲ့တာပါ။

အချက်အလက် ကျွမ်းကျင်သူ Opta က စပါးအသင်းဟာ ဗီလာအသင်းကို အနိုင်ရခဲ့တာကြောင့် ရာသီအကုန်မှာ ထိပ်ဆုံး ၄ သင်းနဲ့ အဆုံးသတ်နိုင်ဖို့ ၅၄ ရာခိုင်နှုန်း အခွင့်အရေးရှိနေပြီး ဗီလာအသင်းက ၄၀ ရာခိုင်နှုန်းနဲ့ အဆင့် ၆ နေရာက ယူနိုက်တက်အသင်းက ၂ ရာခိုင်နှုန်းသာရှိတယ်လို့ ဖော်ပြထားတာဖြစ်ပါတယ်။

Source: BBC