CNI Sport News

၂၀၂၄ ခုနှစ်၊ မတ်လ ၂၉

နော်တင်ဟမ်ဖောရက်စ်အသင်းနည်းပြ နူနိုဆန်းတို့စ်က ကစားသမားတွေအနေနဲ့ ပရီးမီးယားလိဂ်က ရမှတ် လျှော့ခံထားရတာကို မေ့ပစ်ဖို့နဲ့ တန်းဆင်းဇုန်က လွတ်မြောက်ဖို့ကိုသာ အာရုံစိုက်ဖို့ ပြောခဲ့ပါတယ်။

နူနိုဆန်းတို့စ်က “ကျနော်တို့ဟာ ကိုယ်လုပ်စရာရှိတာကိုပဲ အာရုံစိုက်သွားမှာပါ။ ကျနော်တို့လုပ်ရမယ့်အရာက ကွင်းထဲမှာပဲရှိပါတယ်။ ဒါကြောင့် အရာအားလုံးကို မေ့ပစ်ပြီး ကိုယ့်လုပ်စရာရှိတာကို အာရုံစိုက်ကာ ဒီအခြေအနေ ကနေ ရုန်းထွက်ရမှာပါ”လို့ ပြောပါတယ်။

နော်တင်ဟမ်ဖောရက်စ်အသင်းဟာ ပရီးမီးယားလိဂ်က သတ်မှတ်ထားတဲ့ ဘဏ္ဍာရေးစည်းမျဉ်းတွေကို ချိုးဖောက်ခဲ့တာကြောင့် ရမှတ် ၄ မှတ်လျှော့ ပြစ်ဒဏ်ချမှတ်ခြင်းခံခဲ့ရတာ ဖြစ်ပါတယ်။ 

နော်တင်ဟမ်ဖောရက်စ်အသင်းဟာ ရမှတ်လျှော့ ပြစ်ဒဏ်ကြောင့် အဆင့် ၁၇ နေရာက လူတန်အသင်းနဲ့ ၁ မှတ် အကွာ တန်းဆင်းဇုန်အဆင့် ၁၈ နေရာကို ရောက်ရှိသွားခဲ့တာပါ။ 

နော်တင်ဟမ်ဖောရက်စ်အသင်းဟာ ရမှတ်လျှော့ ပြစ်ဒဏ်ချမှတ်တဲ့အပေါ် အယူခံဝင်ထားတာ ဖြစ်ပါတယ်။

နော်တင်ဟမ်ဖောရက်စ်အသင်းကို တွေ့ရစဉ်

ပရီးမီးယားလိဂ်ဟာ နော်တင်ဟမ်ဖောရက်စ်မတိုင်ခင် အဲဗာတန်အသင်းကိုလည်း ဘဏ္ဍာရေးစည်းမျဉ်း ချိုးဖောက် မှုကြောင့် ရမှတ် ၁၀ မှတ်လျှော့ ပြစ်ဒဏ်ချမှတ်ခဲ့တာပါ။ 

ဒါပေမယ့် အဲဗာတန်အသင်းဟာ ဒီပြစ်ဒဏ်အပေါ် အယူခံဝင်ပြီးနောက် ရမှတ် ၆ မှတ်သာ လျှော့ခံခဲ့ရတာ ဖြစ်ပါတယ်။

နော်တင်ဟမ်ဖောရက်စ်အသင်းဟာ ရမှတ်လျှော့ ပြစ်ဒဏ် ချမှတ်ခံရပြီးနောက် ပထမဆုံးပွဲစဉ်အဖြစ် မတ်လ ၃၀ ရက်မှာ ပဲလေ့စ်အသင်းနဲ့ ယှဉ်ပြိုင်ရမှာပါ။ 

နူနိုဆန်းတို့စ်က “ဒါက ကျနော်တို့ရဲ့ လက်ထဲမှာရှိပြီး ဒီအခြေအနေတွေကို ပြောင်းပြန်လှန်ဖို့ကလည်း ကျနော်တို့ အပေါ်မှာပဲ မူတည်ပါတယ်။ ဒါက ကွင်းထဲမှာ အမှတ်ရယူဖို့ဖြစ်ပြီး စနေနေ့မှာ ကျနော်တို့ ကြိုးစားသွားမှာပါ။ ကျနော်တို့ အတူလက်တွဲပြီး ပရိသတ်တွေရဲ့ အားပေးမှုတွေက ကြီးမားတဲ့အရာ ဖြစ်လာပါလိမ့်မယ်။ ကျနော်တို့ ဟာ စနေနေ့က စတင်ပြီး ပွဲတွေကို အနိုင်ရရှိအောင် ကစားသွားမှာပါ”လို့ ပြောခဲ့ပါတယ်။

နော်တင်ဟမ်ဖောရက်စ်အသင်းဟာ လက်ကျန် ပရီးမီးယားလိဂ်ပွဲစဉ်တွေမှာ စပါး၊ မန်စီးတီး၊ ချယ်လ်ဆီး၊ အဲဗာတန် အသင်းတို့နဲ့ တွေ့ဆုံမယ့်ပွဲစဉ်တွေ ပါဝင်နေတာ ဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ မတ်လ ၂၉

စပိန်လူမျိုးနည်းပြ ဇာဘီအလွန်ဆိုဟာ လေဗာကူဆင်အသင်းမှာပဲ ဆက်ရှိမယ်လို့ လီဗာပူးလ်အသင်းက မျှော်လင့်ထားတာကြောင့် နည်းပြ ကလော့ပ်နေရာမှာ အစားထိုးဖို့ အခြားနည်းပြတွေကို ပစ်မှတ်ထား စဉ်းစားနေပြီ ဖြစ်ပါတယ်။

လီဗာပူးလ်အသင်းဟာ ရာသီအကုန်မှာ အသင်းကနေ ထွက်ခွာမယ်လို့ နည်းပြ ကလော့ပ် ကြေညာပြီးကတည်းက ဇာဘီအလွန်ဆိုကို နည်းပြသစ်အဖြစ် ခန့်အပ်ဖို့ ချိတ်ဆက်မှုတွေ ပြုလုပ်နေခဲ့တာပါ။ 

လီဗာပူးလ်အသင်း ကစားသမားအဖြစ်နဲ့ ၂၀၀၅ ခုနှစ်က ချန်ပီယံလိဂ်ဖလားကို ကိုင်မြှောက်နိုင်ခဲ့တဲ့ ဇာဘီအလွန်ဆိုဟာ ဒီရာသီမှာ လေဗာကူဆင်အသင်းကို ပြိုင်ပွဲစုံ ရှုံးပွဲမရှိအောင် ကိုင်တွယ်ပေးထားတာ ဖြစ်ပါတယ်။ 

ဇာဘီအလွန်ဆိုကို နည်းပြသစ်အဖြစ် ခန့်အပ်ဖို့ အသင်းဟောင်း ဘိုင်ယန်မြူးနစ်အသင်းကလည်း ပစ်မှတ်ထား နေတာပါ။

ဘိုင်ယန်မြူးနစ်အသင်းနည်းပြ တူချယ်လ်ဟာ ဒီရာသီအကုန်မှာ အသင်းကနေ ထွက်ခွာတော့မှာဖြစ်လို့ ဂျာမန် ကလပ်ဟာ ဇာဘီအလွန်ဆိုကို နည်းပြသစ်အဖြစ် ခန့်အပ်ချင်နေတာ ဖြစ်ပါတယ်။ 

အလွန်ဆိုကို တွေ့ရစဉ်

ဘိုင်ယန်မြူးနစ်အသင်း ဂုဏ်ထူးဆောင်ဥက္ကဋ္ဌ အူလီဟိုးနက်စ်ကတော့ နွေရာသီမှာ ဇာဘီအလွန်ဆိုကို နည်းပြသစ် အဖြစ် ခန့်အပ်ဖို့ မဖြစ်နိုင်ဘူးလို့ ပြောလာပါတယ်။

စပိန်လူမျိုးနည်းပြဟာ လေဗာကူဆင်အသင်းမှာ အနည်းဆုံးနောက်ထပ် တစ်ရာသီအထိ ဆက်ပြီးရှိနေနိုင်တာ ကြောင့် ၂၀၂၆ ခုနှစ်မှာ အန်ဆယ်လော့တီနဲ့ စာချုပ်ကုန်ဆုံးမယ့် ရီးရယ်လ်အသင်းရဲ့ ပစ်မှတ်လည်း ဖြစ်လာနိုင်ပါတယ်။

လီဗာပူးလ်အသင်းကတော့ ရာသီအကုန်မှာ ကလော့ပ် နေရာကို အစားထိုးဖို့ ဘရိုက်တန်အသင်းနည်းပြ ဒီဇာဘီနဲ့ စပို့တင်းလစ္စဘွန်းအသင်းနည်းပြ အေမိုရင်မ်တို့ကို ချိတ်ဆက်မှုတွေ ပြုလုပ်နေတယ်လို့ ဗြိတိန်မီဒီယာတွေက ဖော်ပြလာပါတယ်။

ဒီတစ်ပတ် ပရီးမီးယားလိဂ် ပွဲစဉ်အဖြစ် ဘရိုက်တန်အသင်းနဲ့အတူ အန်ဖီးလ်ကို ရောက်ရှိလာမယ့် ဒီဇာဘီဟာ လီဗာပူးလ်အသင်း အကြီးအကဲတွေရဲ့ အခိုင်အမာ ထောက်ခံမှုကို ရရှိထားတာ ဖြစ်ပါတယ်။ 

ဒီဇာဘီဟာ ပြီးခဲ့တဲ့ရာသီက ဘရိုက်တန်အသင်းကို အသင်းသမိုင်းတစ်လျှောက် ပထမဆုံးအကြိမ် ဥရောပပြိုင်ပွဲ ယှဉ်ပြိုင်နိုင်အောင် ကိုင်တွယ်ပေးနိုင်ခဲ့ပါတယ်။

အေမိုရင်မ်ကလည်း စပို့တင်းလစ္စဘွန်းအသင်းကို ရလဒ်ကောင်းတွေ ရရှိအောင် ကိုင်တွယ်ထားတာကြောင့် လီဗာပူးလ်အသင်းနည်းပြသစ် ဖြစ်လာမယ့် စာရင်းထဲပါဝင်နေတာပါ။ 

လီဗာပူးလ်အသင်းဟာ သူတို့ ၂ ဦးအပြင် ကလော့ပ် နေရာမှာ အစားထိုးဖို့ အခြားနည်းပြတွေကိုလည်း ရှာဖွေမှုတွေ ပြုလုပ်နေတာ ဖြစ်ပါတယ်။ 

Source: BBC

CNI Sport News

 ၂၀၂၄ ခုနှစ်၊ မတ်လ ၂၈

ဘယ်လ်ဂျီယံအသင်းနဲ့ ခြေစမ်းပွဲမှာ အင်္ဂလန်အသင်းအတွက် ပါဝင်ကစားပြီး ကြွက်သားဒဏ်ရာရရှိခဲ့တဲ့ မန်စီးတီး အသင်း နောက်ခံလူ ဂျွန်စတုန်းစ်ဟာ အာဆင်နယ်အသင်းနဲ့ ကစားမယ့် ပွဲလွဲချော်မှာကို စိုးရိမ်နေတာဖြစ်ပါတယ်။

ဂျွန်စတုန်းစ်ဟာ ဘရာဇီးလ်အသင်းနဲ့ ခြေစမ်းပွဲမှာ အင်္ဂလန်အသင်းအတွက် ပွဲချိန်ပြည့် ပါဝင်ကစားခဲ့ရသလို ဘယ်လ်ဂျီယံ အသင်းနဲ့ပွဲမှာလည်း ပွဲထွက်လူစာရင်းမှာ ပါဝင်ခဲ့ပါတယ်။

ဒါပေမယ့် ဂျွန်စတုန်းစ်ဟာ ပွဲချိန် ၁၀ မိနစ်မှာ ဒဏ်ရာရရှိသွားခဲ့တာကြောင့် ဂိုးမက်ဇ်နဲ့ လူစားလဲခံခဲ့ရတာ ဖြစ်ပါတယ်။

အင်္ဂလန်အသင်းနည်းပြ ဆောက်ဂိတ်က ဂျွန်စတုန်းစ် ဒဏ်ရာရရှိတာကို အတည်ပြုခဲ့ပေမယ့် ကစားသမားရဲ့ ဒဏ်ရာအခြေအနေ ပြင်းထန်မှု ရှိ/မရှိကို ပြောဆိုခဲ့ခြင်းမရှိတာပါ။

ဂျွန်စတုန်းစ်ဟာ ဒီရာသီမှာ ဒဏ်ရာတွေနဲ့ ရုန်းကန်နေရပြီး တင်ပါးဒဏ်ရာကြောင့် ရာသီအစ ၁၁ ပွဲအထိ လွဲချော်ခဲ့တာ ဖြစ်ပါတယ်။ 

ဂျွန်စတုန်းစ်နဲ့ ဝေါလ်ကာကို တွေ့ရစဉ်

Daily Star က ဂျွန်စတုန်းစ်ဟာ အာဆင်နယ်အသင်းနဲ့ ပွဲစဉ်ကို ပါဝင်ဖို့အတွက် ကြံ့ခိုင်မှုပြည့်ဝဖွယ် မရှိဘူးလို့ ဖော်ပြထားတာကြောင့် မန်စီးတီးအသင်းအတွက် ကြီးမားတဲ့ထိုးနှက်ချက် ဖြစ်လာနိုင်တာပါ။ 

ဂျွန်စတုန်းစ်ကလည်း မန်ချက်စတာမှာ သူ့ရဲ့ဒဏ်ရာ အခြေအနေကို စကန်ဖတ် စစ်ဆေးမှုတွေ ပြုလုပ်ခံရအပြီးမှာ အာဆင်နယ်အသင်းနဲ့ပွဲစဉ် လွဲချော်မှာကို စိုးရိမ်မှုတွေရှိနေတာ ဖြစ်ပါတယ်။ 

ဘရာဇီးလ်အသင်းနဲ့ပွဲမှာ ဒဏ်ရာရရှိခဲ့တဲ့ ဝေါလ်ကာကတော့ အာဆင်နယ်အသင်းနဲ့ပွဲစဉ်မှာ ပါဝင်နိုင်ဖွယ် ရှိနေတာပါ။

ပေါင်ခြံဒဏ်ရာကြောင့် နိုင်ငံတကာ ပွဲစဉ်မတိုင်ခင် နယူးကာဆယ်အသင်းနဲ့ FA ဖလားပွဲကို လွဲချော်ခဲ့တဲ့ မန်စီးတီး အသင်း ကွင်းလယ်လူ ဒီဘရိုင်းဟာ အာဆင်နယ်အသင်းနဲ့ ပွဲစဉ်မှာ ပါဝင်နိုင်မယ်လို့ သိရပါတယ်။ 

အာဆင်နယ်အသင်း ဘက်မှာတော့ ကြံ့ခိုင်မှုပိုင်း စိုးရိမ်မှုတွေရှိနေတဲ့ ဆာကာ၊ မာတင်နယ်လီနဲ့ ဂါဘရီရယ်လ် တို့ဟာ မန်စီးတီးအသင်းနဲ့ ပွဲစဉ်မှာ ပါဝင်ကစားဖို့ အဆင်သင့် ဖြစ်နေပါတယ်။

ပြီးခဲ့တဲ့ ကျူပီအာအသင်းနဲ့ တံခါးပိတ်ပွဲစဉ်မှာ ပါဝင်ခဲ့ကြတဲ့ ပါတေးနဲ့ တိုမီယာဆုတို့ကတော့ မန်စီးတီးအသင်းနဲ့ ပွဲစဉ်မှာ အာဆင်နယ်အသင်းအတွက် ပါဝင်နိုင်ဖွယ် ရှိ/မရှိ စောင့်ကြည်ရဦးမှာပါ။

အာဆင်နယ်နဲ့ မန်စီးတီးအသင်းတို့ဟာ ပရီးမီးယားလိဂ် အမှတ်ပေးဇယားအဆင့် ၁ နဲ့ ၃ နေရာမှာ ရပ်တည်နေပေမယ့် ၂ သင်းကြား ရမှတ်ကွာဟမှုက ၁ မှတ်သာရှိတာ ဖြစ်ပါတယ်။

Source: Metro 

CNI Sport News

၂၀၂၄ ခုနှစ်၊မတ်လ ၂၈

အာဂျင်တီးနားအသင်းနည်းပြ စကာလိုနီက ၂၀၂၄ ကိုပါအမေရိကဖလားပြိုင်ပွဲအတွက် အသင်းလူစာရင်းမှာ အသင်းခေါင်းဆောင် မက်ဆီနဲ့ တောင်ပံကစားသမား ဒီမာရီယာတို့ ၂ ဦးသာ အာမခံချက်ရှိတယ်လို့ ပြောခဲ့ ပါတယ်။

စကာလိုနီက “ကိုပါအမေရိကပြိုင်ပွဲမှာ နေရာတစ်နေရာအတွက် ဘယ်သူ့ကိုမှ အာမခံချက်မပေးပါဘူး။ ဒီမှာ ရှိနေတဲ့သူတွေကိုလည်း အာမခံချက်ပေးလို့မရပါဘူး။ ဒါပေမယ့် ဒီမှာမရှိတဲ့သူတစ်ဦးကတော့ အာမခံချက် ရှိပါတယ်။ သူက မက်ဆီပါ။ ပြီးတော့ ဒီမာရီယာအတွက်လည်း အာမခံချက်ရှိပါတယ်”လို့ ပြောခဲ့တာပါ။

အာဂျင်တီးနားအသင်းဟာ ၂၀၂၁ ခုနှစ်က ချန်ပီယံဖြစ်ခဲ့တဲ့ ကိုပါအမေရိကဖလားကို ကာကွယ်ဖို့ လာမယ့် နွေရာသီမှာ အမေရိကန်နိုင်ငံကို သွားရောက်ပြီး ယှဉ်ပြိုင်ရမှာဖြစ်ပါတယ်။ ကိုပါအမေရိကဖလားပြိုင်ပွဲရဲ့ လက်ရှိချန်ပီယံ အာဂျင်တီးနားအသင်းဟာ ပြီးခဲ့တဲ့ ခြေစမ်းပွဲ ၂ ပွဲစလုံးကို အမေရိကန်နိုင်ငံမှာ သွားရောက် ကစားခဲ့ပြီး အယ်လ်ဆာဗေးဒိုးနဲ့ ကော်စတာရီကာအသင်းတို့ကို အနိုင်ရရှိခဲ့တာပါ။ အသင်းခေါင်းဆောင် မက်ဆီဟာ ဒဏ်ရာကြောင့် ဒီပွဲစဉ်တွေမှာ အာဂျင်တီးနားအသင်းအတွက် မပါဝင်နိုင်ခဲ့ပါဘူး။

ဒါပေမယ့် နည်းပြ စကာလိုနီကတော့ ကိုပါအမေရိကဖလားပြိုင်ပွဲဝင်မယ့် အာဂျင်တီးနားအသင်းလူစာရင်းမှာ မက်ဆီဲနဲ့ ဒီမာရီယာတို့အတွက်သာ အာမခံချက်ရှိတယ်လို့ ပြောခဲ့တာဖြစ်ပါတယ်။ အဲဒါကြောင့် တခြား ကစား သမားတွေအနေနဲ့ အာဂျင်တီးနားအသင်းလူစာရင်းမှာ ပါဝင်ခွင့်ရဖို့ ကလပ်အသင်းတွေမှာ အကောင်းဆုံး ခြေစွမ်းပြသနိုင်ဖို့ လိုအပ်နေတာပါ။ အာဂျင်တီးနားအသင်းနည်းပြ စကာလိုနီက ပြီးခဲ့တဲ့ ခြေစမ်းပွဲတွေမှာ အာဂျင်တီးနားအသင်းအတွက် ပွဲထွက်ခွင့်ရခဲ့တဲ့ ဂါနာချို၊ ဘင်နီတက်ဇ်နဲ့ ကာဘိုနီတို့ကို ချီးကျူးမှုတွေ ပြုလုပ်ခဲ့ပါတယ်။

ဇွန် ၂၀ ရက်ကနေ ဇူလိုင် ၁၄ ရက်အထိကျင်းပမယ့် ၂၀၂၄ ကိုပါအမေရိကဖလားပြိုင်ပွဲမှာ အာဂျင်တီးနား အသင်းဟာ ပီရူး၊ချီလီ၊ကနေဒါအသင်းတို့နဲ့ အုပ်စု A မှာကျရောက်နေတာဖြစ်ပါတယ်။

Source:Sportsmole

CNI Sport News

၂၀၂၄ ခုနှစ်၊ မတ်လ ၂၈

ဂျာမနီကွင်းလယ်လူ တိုနီကရူးစ်ဟာ ရီးရယ်လ်အသင်းမှာ သူ့ရဲ့ကစားသမားဘဝကို ဆက်ပြီးဖြတ်သန်းဖို့အတွက် စာချုပ်သစ်ချုပ်ဆိုဖို့ နီးစပ်နေပြီလို့ ဖာဘရီဇီယိုရိုမန်နိုက ဖော်ပြထားပါတယ်။

တိုနီကရူးစ်နဲ့ ရီးရယ်လ်အသင်းတို့ ချုပ်ဆိုထားတဲ့ စာချုပ်ဟာ ဒီရာသီအကုန်မှာ ကုန်ဆုံးမှာဖြစ်တာကြောင့် ကစားသမားဟာ စာချုပ်သစ်ချုပ်ဆိုဖို့ ရွေးချယ်ခဲ့တာပါ။ 

ဖာဘရီဇီယိုရိုမန်နိုက တိုနီကရူးစ်ဟာ ရီးရယ်လ်အသင်းမှာ ၂၀၂၅ ခုနှစ်အထိရှိမယ့် စာချုပ်သစ်ချုပ်ဆိုဖို့ နီးစပ်နေ ပြီလို့ ပြောပါတယ်။ 

၂၀၁၄ ခုနှစ်ကတည်းက ရီးရယ်လ်အသင်းကို ရောက်ရှိနေခဲ့တဲ့ ဝါရင့်ကွင်းလယ်လူ တိုနီကရူးစ်ဟာ ဒီရာသီမှာ လည်း အသင်းအတွက် ခြေစွမ်းပြကစားနေတာပါ။

ရီးရယ်လ်အသင်းနည်းပြ အန်ဆယ်လော့တီက တိုနီကရူးစ်ကို အသင်းမှာ ဆက်ရှိစေချင်တယ်လို့ ပြောခဲ့ပြီး အနာဂတ်ကို အမြန်ဆုံးဖြေရှင်းဖို့ ပြောခဲ့တာဖြစ်ပါတယ်။ 

အဲဒါကြောင့် တိုနီကရူးစ်ဟာ မကြာခင်မှာ ရီးရယ်လ်အသင်းနဲ့ စာချုပ်သစ်ချုပ်ဆိုဖို့ ရှိလာခဲ့တာပါ။ 

ဂျာမနီကွင်းလယ်လူဟာ ရီးရယ်လ်အသင်းအတွက် ပွဲပေါင်း ၄၅၅ ပွဲ ပါဝင်ကစားထားပြီး ၂၈ ဂိုးသွင်းယူကာ လာလီဂါဖလား ၃ ကြိမ်၊ ချန်ပီယံလိဂ်ဖလား ၄ ကြိမ် အပါအဝင် ဆုဖလားအောင်မြင်မှု အများအပြား ရယူထားတာ ဖြစ်ပါတယ်။

တိုနီကရူးစ်ကို တွေ့ရစဉ်

အသက် ၃၄ နှစ်အရွယ်ရှိ တိုနီကရူးစ်ဟာ ၃ နှစ်ကြာ ဝေးကွာခဲ့တဲ့ ဂျာမနီအသင်းအတွက် ပြီးခဲ့တဲ့ ခြေစမ်းပွဲတွေမှာ ပါဝင်ကစားပြီး ၂ ဂိုးဖန်တီးကာ နိုင်ငံအသင်းကို နိုင်ပွဲတွေပြန်လည် ရယူပေးနိုင်ခဲ့တာပါ။

တိုနီကရူးစ်ဟာ လက်ရှိအချိန်ထိ အကောင်းဆုံးပုံစံတွေကို ပြသနေတာကြောင့် လာမယ့် ယူရို ၂၀၂၄ ပြိုင်ပွဲဝင်မယ့် ဂျာမနီအသင်းလူစာရင်းမှာ ပါဝင်လာမယ်ဆိုတာ သေချာနေတာဖြစ်ပါတယ်။

နိုင်ငံပွဲစဉ်တွေ ပြီးဆုံးပြီဖြစ်တာကြောင့် တိုနီကရူးစ်ဟာ ရီးရယ်လ်အသင်းနဲ့ ပြန်လည်ပူးပေါင်းနေပြီး ရီးရယ်လ် အသင်းဟာ လာမယ့် လာလီဂါပွဲစဉ်အဖြစ် ဘီလ်ဘာအိုအသင်းနဲ့ ယှဉ်ပြိုင်ရမှာပါ။

ရီးရယ်လ်အသင်းဟာ ဒီရာသီ လာလီဂါပွဲစဉ် ၂၉ ပွဲ ကစားအပြီးမှာ အဆင့် ၂ နေရာက ဘာစီလိုနာအသင်းကို ၈ မှတ်အသာရပြီး အမှတ်ပေးဇယားကို ဦးဆောင်နေတာဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ မတ်လ ၂၈

အာဂျင်တီးနားနဲ့ အင်တာမိုင်ယာမီ အသင်းခေါင်းဆောင် မက်ဆီက ကစားသမားဘဝကနေ အနားယူမယ့် အစီအစဉ်မှာ သူ့အသက်အရွယ်ကို ဆုံးဖြတ်တဲ့အချက်အဖြစ် ထည့်သွင်းမစဉ်းစားဘူးလို့ ပြောလိုက်ပါတယ်။

မက်ဆီက “ကျနော်ကောင်းမွန်စွာ စွမ်းဆောင်နိုင်ခြင်း မရှိတော့ဘူး၊ မပျော်ရွှင်တော့ဘူး ဒါမှမဟုတ် အသင်းဖော် တွေကို အကူအညီ မပေးနိုင်တော့ဘူးလို့ ခံစားရတဲ့အချိန်မှာ ကစားသမားဘဝကနေ အနားယူမှာပါ။ ဘယ်အသက် အရွယ်မှာ အနားယူမယ်လို့ မတွေးထားပါဘူး။ ဘောလုံးကစားရတာ ကောင်းမွန်တယ်လို့ ခံစားရရင် ကျနော် ဆက်ပြီး ကစားနေဦးမှာပါ”လို့ ပြောပါတယ်။

ပီအက်စ်ဂျီအသင်းနဲ့ အင်တာမိုင်ယာမီအသင်းထံ မပြောင်းရွှေ့ခင် ဘာစီလိုနာအသင်းမှာ ၁၇ နှစ်ကြာ ကစားခဲ့တဲ့ မက်ဆီဟာ လာမယ့်ဇွန်ထဲမှာ အသက် ၃၇ နှစ်ပြည့်တော့မှာ ဖြစ်ပါတယ်။ 

အဲဒါကြောင့် မက်ဆီရဲ့ ကစားသမားဘဝ ကုန်ဆုံးချိန်ဟာ နီးကပ်လာပြီဖြစ်ပေမယ့် ကစားသမားကတော့ သူအနား ယူမယ့် အချိန်ကို အသက်အရွယ်နဲ့ ဆုံးဖြတ်သွားမှာ မဟုတ်ဘူးလို့ ပြောလာခဲ့တာပါ။ 

ဒါအပြင် မက်ဆီက သူဟာ ဘောလုံးလောကမှာ အောင်မြင်မှုအားလုံးကို ရယူခဲ့ပြီးပြီလို့ ပြောခဲ့ပါတယ်။

 မက်ဆီကို တွေ့ရစဉ်

မက်ဆီက “နောက်ထပ်အိပ်မက်က ဘာလဲဆိုတာ ကျနော်မသိပါဘူး။ ကျနော်ဟာ ဘောလုံးမှာ အောင်မြင်မှုတွေ အားလုံးကို ရယူပြီးပါပြီ။ ကျနော်ရဲ့ ကစားသမားဘဝမှာ အရာအားလုံးကို အောင်မြင်အောင် စွမ်းဆောင်နိုင်ခဲ့ပြီး အိပ်မက်တွေကို အကောင်အထည်ဖော်နိုင်ခဲ့တဲ့အတွက် ကျနော်ကံကောင်းခဲ့တယ်”လို့ ပြောပါတယ်။

မက်ဆီဟာ သူ့ရဲ့ ပရော်ဖက်ရှင်နယ် ကစားသမားဘဝမှာ ကလပ်အသင်းတွေနဲ့ ဆုဖလားအောင်မြင်မှု အများအပြား ရယူနိုင်ခဲ့ပြီး တစ်ဦးချင်းဆုတွေလည်း မရေမတွက်နိုင်အောင် ရရှိခဲ့ပါတယ်။ 

ဒါအပြင် မက်ဆီဟာ အာဂျင်တီးနား လက်ရွေးစင်အသင်းနဲ့ ကမ္ဘာ့ဖလား၊ ကိုပါအမေရိကဖလားတွေကိုလည်း ကိုင်မြှောက်နိုင်ခဲ့တာပါ။ 

မက်ဆီဟာ ဒဏ်ရာကြောင့် အာဂျင်တီးနားအသင်း နောက်ဆုံးကစားခဲ့တဲ့ ခြေစမ်းပွဲ ၂ ပွဲစလုံး မပါဝင်နိုင်ခဲ့ပေမယ့် နွေရာသီမှာကျင်းပမယ့် ကိုပါအမေရိကဖလားပြိုင်ပွဲမှာ နိုင်ငံအသင်းကို ဦးဆောင်ပြီး ပါဝင်မှာဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ မတ်လ ၂၆

လာဘ်ပေးလာဘ်ယူမှုနဲ့ တရုတ်အာဏာပိုင်တွေရဲ့ ဖမ်းဆီးထိန်းသိမ်းခံထားရတဲ့ တောင်ကိုရီးယားလက်ရွေးစင် ဆွန်ဂျွန်ဟိုဟာ လွတ်မြောက်ပြီး အိမ်ပြန်သွားပြီလို့ တောင်ကိုရီးယားနိုင်ငံခြားရေးဝန်ကြီးဌာနက ပြောခဲ့ပါတယ်။

ဆွန်ဂျွန်ဟိုဟာ ပြီးခဲ့တဲ့နှစ် မေလက တရုတ်နိုင်ငံအရှေ့မြောက်ပိုင်းမှာ လာဘ်ပေးလာဘ်ယူမှုသံသယနဲ့ ဖမ်းဆီး ထိန်းသိမ်းခံခဲ့ရတာဖြစ်ပြီး တရုတ်အစိုးရကတော့ သူ့ကိုဖမ်းဆီးထိန်းသိမ်းခဲ့တဲ့ အသေးစိတ်အချက်အလက်တွေကို ပြောဆိုခဲ့ခြင်းမရှိတာပါ။ ဆွန်ဂျွန်ဟိုကို ဖမ်းဆီးထိန်းသိမ်းမှုဟာ ၁၀ လအကြာမှာ အဆုံးသတ်သွားခဲ့ပြီး ကစား သမားဟာ တောင်ကိုရီးယားနိုင်ငံကို ပြန်လည်ရောက်ရှိနေပြီလို့ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားတာဖြစ်ပါတယ်။

တောင်ကိုရီးယားဘောလုံးအဖွဲ့ချုပ်ကလည်း ကွင်းလယ်ခံစစ်ကစားသမား လွတ်မြောက်လာပြီလို့ အတည်ပြု ခဲ့ပါတယ်။

 အသက် ၃၁ နှစ်အရွယ်ရှိ ဆွန်ဂျွန်ဟိုဟာ တရုတ်စူပါလိဂ်ကလပ် ရှန်ဒေါင်းတိုင်ရှန်အသင်းမှာ ၂၀၂၁ ခုနှစ်ကတည်းက ကစားခဲ့ပြီး ၂၀၂၂ ကမ္ဘာ့ဖလားပြိုင်ပွဲမှာ တောင်ကိုရီးယားအသင်းအတွက် ၃ ပွဲပါဝင် ကစားခဲ့ တာပါ။ 

တရုတ်အစိုးရဟာ ဘောလုံးအဖွဲ့ချုပ်အကြီးအကဲနဲ့ အခြားတာဝန်ရှိသူတွေကို ပစ်မှတ်ထားပြီး အကျင့်ပျက် ခြစားမှုအချို့ကို စုံစမ်းစစ်ဆေးမှုတွေပြုလုပ်ခဲ့ပြီးနောက် ဆွန်ဂျွန်ဟိုဟာ ဖမ်းဆီးထိန်းသိမ်းခံခဲ့ရတာ ဖြစ်ပါတယ်။

တောင်ကိုရီးယားကွင်းလယ်လူ လီဂျေးဆောင်ကတော့ ဆွန်ဂျွန်ဟို လွတ်မြောက်လာမှုအတွက် ဝမ်းသာမိပြီး မကြာခင်မှာ သူဘောလုံးပြန်ကစားနိုင်မယ်လို့ မျှော်လင့်ကြောင်း ပြောခဲ့တာပါ။ ဆွန်ဂျွန်ဟိုဟာ ရှန်ဒေါင်း တိုင်ရှန်အသင်းထံ မပြောင်းရွှေ့ခင် ကေလိဂ်အသင်းတွေဖြစ်တဲ့ ပိုဟန်စတီးလားနဲ့ ဂျီယွန်းဘွတ်အသင်းတွေမှာ ကစားခဲ့တာဖြစ်ပါတယ်။

 ဆွန်ဂျွန်ဟိုဟာ ရှန်ဒေါင်းတိုင်ရှန်အသင်းအတွက် ၅၇ ပွဲ ကစားထားပြီး ၅ ဂိုးသွင်းယူ ထားတာပါ။

၂၀၁၈ ခုနှစ်မှာ တောင်ကိုရီးယားအသင်းအတွက် စတင်ပွဲထွက်ခွင့်ရခဲ့တဲ့ ဆွန်ဂျွန်ဟိုဟာ နိုင်ငံအသင်းအတွက် ပွဲပေါင်း ၂၀ ပါဝင်ကစားထားတာဖြစ်ပါတယ်။

Source:ChannelNewsAsia

CNI Sport News

၂၀၂၄ ခုနှစ်၊ မတ်လ ၂၆

နော်တင်ဟမ်ဖောရက်စ်အသင်းဟာ ပရီးမီးယားလိဂ်ရဲ့ ဘဏ္ဍာရေးစည်းမျဉ်းတွေကို ချိုးဖောက်ခဲ့တာကြောင့် ပရီးမီးယားလိဂ်က ရမှတ် ၄ မှတ် လျှော့ခဲ့တဲ့ ပြစ်ဒဏ်အပေါ် အယူခံဝင်ခဲ့တယ်လို့ အတည်ပြုခဲ့ပါတယ်။

လွတ်လပ်တဲ့ ကော်မရှင်က နော်တင်ဟမ်ဖောရက်စ်အသင်းဟာ ပြီးခဲ့တဲ့ ၂၀၂၂-၂၃ ရာသီက ပေါင် ၆၁ သန်းအထိ အရှုံးပြခဲ့တာကြောင့် ပရီးမီးယားလိဂ်ရဲ့ ဘဏ္ဍာရေးစည်းမျဉ်းတွေကို ချိုးဖောက်ခဲ့ကြောင်း တွေ့ရှိခဲ့တာပါ။ 

အဲဒါကြောင့် နော်တင်ဟမ်ဖောရက်စ်အသင်းဟာ ရမှတ် ၄ မှတ် အလျှော့ခံလိုက်ရပြီး ပရီးမီးယားလိဂ် အမှတ်ပေး ဇယား အဆင့် ၁၈ နေရာကို ရောက်ရှိသွားခဲ့တာ ဖြစ်ပါတယ်။ 

နော်တင်ဟမ်ဖောရက်စ်အသင်းဟာ ရမှတ်လျှော့ ပြစ်ဒဏ်အတွက် အယူခံဝင်ကြောင်း အတည်ပြုခဲ့ပေမယ့် နောက်ထပ် မှတ်ချက်ပေးသွားမှာ မဟုတ်ဘူးလို့ ထုတ်ပြန်ချက်မှာ ဖော်ပြထားတာပါ။

ပရီးမီးယားလိဂ် ကလပ်အသင်းတွေဟာ တစ်ရာသီကို ပေါင် ၃၅ သန်းနဲ့ ၃ ရာသီအတွင်း ပေါင် ၁၀၅ သန်းအထိ အရှုံးပြခွင့်ရှိနေတာ ဖြစ်ပါတယ်။ 

နော်တင်ဟမ်ဖောရက်စ်အသင်းကို တွေ့ရစဉ်

နော်တင်ဟမ်ဖောရက်စ်အသင်းဟာ ပြီးခဲ့တဲ့ ၂ ရာသီက ချန်ပီယံရှစ်ပြိုင်ပွဲမှာ ကစားခဲ့တာကြောင့် ပရီးမီးယားလိဂ် မှာ ကစားခဲ့တဲ့ ၁ ရာသီကို တွက်ချက်ပြီး အရေးယူမှုပြုလုပ်ခံခဲ့ရတာပါ။ 

နော်တင်ဟမ်ဖောရက်စ်အသင်းကို အစောပိုင်းက ရမှတ် ၆ မှတ်အထိ လျှော့ချဖို့ရှိခဲ့ပေမယ့် အသနားခံ တောင်းဆို မှုကြောင့် ရမှတ် ၄ မှတ်သာ လျှော့ခဲ့တာ ဖြစ်ပါတယ်။ 

နော်တင်ဟမ်ဖောရက်စ်အသင်းဟာ ပရီးမီးယားလိဂ်ကို တန်းတက်ခဲ့တဲ့ ၂၀၂၂-၂၃ ရာသီမှာ ဗြိတိန်စံချိန်တင် ကစားသမားသစ် ၂၂ ဦးအထိ ခေါ်ယူခဲ့တာပါ။

နော်တင်ဟမ်ဖောရက်စ်အသင်းရဲ့ ပြီးခဲ့တဲ့ရာသီ အပြောင်းအရွှေ့ အသုံးစရိတ်က ပေါင် ၁၄၂.၈ သန်းအထိ ရှိခဲ့တာ ဖြစ်ပါတယ်။ 

နော်တင်ဟမ်ဖောရက်စ်အသင်းဟာ ၂၀၂၀ နဲ့ ၂၀၂၁ တွေမှာ ပျှမ်းမျှပေါင် ၃ သန်းအရှုံးပေါ်ခဲ့ပြီး ၂၀၂၂ မှာ ပေါင်သန်း ၄၀၊ ၂၀၂၃ မှာ ပေါင်သန်း ၅၂ နဲ့ စုစုပေါင်း ပေါင် ၉၅ သန်းအထိ အရှုံးပေါ်ခဲ့တာပါ။ 

နော်တင်ဟမ်ဖောရက်စ်အသင်း မတိုင်ခင် အဲဗာတန်အသင်းလည်း ဘဏ္ဍာရေးစည်းမျဉ်း ချိုးဖောက်မှုကြောင့် ပရီးမီးယားလိဂ်ရဲ့ ရမှတ် ၁၀ မှတ်လျှော့ ပြစ်ဒဏ်ချမှတ်ခြင်းခံခဲ့ရပါတယ်။

ဒါပေမယ့် အဲဗာတန်အသင်းဟာ အယူခံဝင်ပြီးနောက် ရမှတ် ၆ မှတ်သာ လျှော့ခံခဲ့ရတာပါ။

အဲဒါကြောင့် နော်တင်ဟမ်ဖောရက်စ်အသင်းဟာ သူတို့လည်း ရမှတ် ၄ မှတ်ကနေ ထပ်ပြီးလျှော့ချခံရဖို့ အယူခံ ဝင်လာခဲ့တာဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ မတ်လ ၂၆

ဘယ်လ်ဂျီယံအသင်းနဲ့ ကစားမယ့်ခြေစမ်းပွဲမှာ အင်္ဂလန်အသင်းခေါင်းဆောင်အဖြစ် တာဝန်ပေးခံရလို့ ဂုဏ်ယူမိ တယ်လို့ ကွင်းလယ်လူ ဒီကလန်ရိုက်စ်က ပြောခဲ့ပါတယ်။

ဒီကလန်ရိုက်စ်က “နည်းပြက ကျနော့်ကို အသင်းခေါင်းဆောင်အဖြစ် ဆောင်ရွက်ရမယ်လို့ ပြောခဲ့ပြီးနောက် ကျနော်သူ့ကို ပွေ့ဖက်နှုတ်ဆက်ကာ ကျေးဇူးတင်တယ်လို့ ပြောခဲ့ပါတယ်။ ကျနော်သူ့ကို အများကြီး ပေးစရာ ရှိပါတယ်။ ဒါက ကျနော့်အတွက် ဂုဏ်ယူစရာပါပဲ။ ကျနော်ဟာ ဒီ အစုအဖွဲ့ထဲကို စတင်ပြီး ဝင်ရောက်လာ ကတည်းက ကစားသမားတစ်ဦးအနေနဲ့ရော လူပုဂ္ဂိုလ်တစ်ဦးအနေနဲ့ပါ ကြီးပြင်းလာခဲ့တာပါ။ ကျနော်ဟာ ဒီမှာရှိတဲ့အချိန်တိုင်းကို နှစ်သက်တယ်” လို့ ပြောခဲ့တာပါ။

ဝင်ဘာလေမှာ ကစားမယ့် အင်္ဂလန်နဲ့ ဘယ်လ်ဂျီယံခြေစမ်းပွဲဟာ အာဆင်နယ်အသင်းကွင်းလယ်လူ ဒီကလန် ရိုက်စ်အတွက် အင်္ဂလန်ကစားသမားဘဝ ပွဲပေါင်း ၅၀ ပြည့်မှာဖြစ်ပါတယ်။ 

အင်္ဂလန်အသင်းရဲ့ အသင်း ခေါင်းဆောင်တွေဖြစ်တဲ့ ဟာရီကိန်း၊ဝေါလ်ကာနဲ့ မက်ဂွဲယားတို့ဟာ ဒဏ်ရာကြောင့် ဒီပွဲကို လွဲချော်ကြမှာပါ။ 

အဲဒါကြောင့် နည်းပြ ဆောက်ဂိတ်ဟာ ဒီကလန်ရိုက်စ်ကို အသင်းခေါင်းဆောင်အဖြစ် တာဝန်ပေးခဲ့တာ ဖြစ်ပါတယ်။ ဒီကလန်ရိုက်စ်ဟာ အင်္ဂလန်အသင်းကို ကိုယ်စားမပြုခင် အိုင်ယာလန်အသင်းအတွက် ၃ ပွဲ ပါဝင်ကစားခဲ့သေးတာပါ။

ဒါပေမယ့် ဒီကလန်ရိုက်စ်ဟာ ၂၀၁၉ ခုနှစ်မှာ အင်္ဂလန်အသင်းအတွက် ကစားပေးဖို့ ရွေးချယ်ခဲ့ပြီး ချက်အသင်းနဲ့ ပွဲမှာ ပွဲဦးထွက်အဖြစ် စတင်ပါဝင်ခဲ့တာဖြစ်ပါတယ်။ 

အသက် ၂၅ နှစ်အရွယ်ရှိ ဒီကလန်ရိုက်စ်ဟာ အင်္ဂလန်အသင်း ကို ယူရို ၂၀၂၀ ပြိုင်ပွဲမှာ ဗိုလ်လုပွဲနဲ့ ၂၀၂၂ ကမ္ဘာ့ဖလားပြိုင်ပွဲမှာ ကွာတားဖိုင်နယ် ရောက်ရှိအောင် ကူညီပေးနိုင်ခဲ့ တာပါ။ ဒီကလန်ရိုက်စ်ဟာ အင်္ဂလန်အသင်းအတွက် ကစားထားတဲ့ ၄၉ ပွဲမှာ ၃ ဂိုးသွင်းယူထားတာဖြစ်ပါတယ်။

အင်္ဂလန်အသင်းဟာ ဒီလထဲကစားတဲ့ နိုင်ငံတကာခြေစမ်းပွဲတွေမှာ အဓိက ကစားသမားအချို့ကို ဒဏ်ရာတွေ ကြောင့် အနားပေးထားရတာပါ။ ဘယ်လ်ဂျီယံအသင်းနဲ့ ခြေစမ်းပွဲမှာ တိုက်စစ်မှူး အိုင်ဗန်တိုနေး၊ ကွင်းလယ်လူ မက်ဒီဆင်၊ကိုးလ်ပါလ်မာနဲ့ နောက်ခံလူ ဘရန်ဝိတ်တို့ ပါဝင်လာနိုင်တယ်လို့ နည်းပြ ဆောက်ဂိတ်က ပြောခဲ့တာ ဖြစ်ပါတယ်။

Source:ESPN