CNI Sport News

၂၀၂၅ ခုနှစ်၊ မေလ ၁၂

ယူနိုက်တက်အသင်းနည်းပြ အာမိုရင်က အသင်းအနေနဲ့ ပရီးမီးယားလိဂ်ပြိုင်ပွဲမှာ ဆိုးရွားတဲ့ပုံစံ ဆက်ပြီးရှိနေရင် သူထွက်ခွာသွားနိုင်တယ်လို့ ဝက်စ်ဟမ်းအသင်းကို ၂ ဂိုး-ဂိုးမရှိနဲ့ အရေးနိမ့်တဲ့ ပွဲအပြီးမှာ ဝန်ခံခဲ့ပါတယ်။

အာမိုရင်က “လက်ရှိအခြေအနေက ရှက်ဖို့ကောင်းပြီး လက်ခံဖို့ခက်ခဲပါတယ်။ ယူနိုက်တက်လို အသင်းအနေနဲ့ ပွဲရှုံးရမှာကို ကြောက်ရွံ့မှု မရှိတော့ဘူးဆိုရင် ဒါက အသင်းကြီးတွေအတွက် အန္တရာယ်အရှိဆုံးအရာပါ။ ဒီမှာရှိတဲ့ လူတိုင်းအနေနဲ့ ကိစ္စအများအပြားကို လေးလေးနက်နက် စဉ်းစားဖို့လိုပါတယ်။ လူတိုင်းက ဗိုလ်လုပွဲအကြောင်းကို တွေးနေပေမယ့် ဒီထက်ပိုကြီးမားတဲ့ စဉ်းစားစရာတွေရှိပါတယ်။ ကျနော်တို့ဟာ ဒီလိုမျိုးတွေ နောက်ရာသီမှာရှိမှာ မဟုတ်တဲ့အတွက် နွေရာသီမှာ သန်မာပြီး သတ္တိရှိဖို့လိုပါတယ်။ ပြောင်းလဲမှု မလုပ်နိုင်ရင်တော့ မတူညီတဲ့လူတွေ ကို နေရာပေးသင့်ပါတယ်”လို့ ပြောခဲ့တာပါ။

ယူနိုက်တက်အသင်းဟာ ဝက်စ်ဟမ်းအသင်းကို အရေးနိမ့်ပြီးနောက် ဒီရာသီ ပရီးမီးယားလိဂ်ပွဲစဉ် ၃၆ ပွဲကစား အပြီးမှာ ၁၇ ပွဲအထိ ရှုံးပွဲကြုံတွေ့ကာ အမှတ်ပေးဇယားအဆင့် ၁၆ နေရာမှာ ရပ်တည်နေတာ ဖြစ်ပါတယ်။ 

နည်းပြအာမိုရင် လက်ထက်မှာ ပရီးမီးယားလိဂ်ရှုံးပွဲ ၁၃ ပွဲအထိ ကြုံတွေ့ထားတဲ့ ယူနိုက်တက်အသင်းဟာ ဇန်နဝါရီ ၂၆ ရက် နောက်ပိုင်း ကစားထားတဲ့ပွဲတွေမှာ လက်စတာနဲ့ အစ်စဝှစ်ချ်အသင်းတွေကိုသာ အနိုင်ရ ယူနိုင်ခဲ့တာပါ။ 

ယူနိုက်တက်အသင်းကို တွေ့ရစဉ်

ယူနိုက်တက်အသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၇ ပွဲစလုံး နိုင်ပွဲပျောက်ဆုံးနေခဲ့ပြီး အဆိုးရွားဆုံး အခြေအနေနဲ့ ကြုံတွေ့နေရတာ ဖြစ်ပါတယ်။ 

ယူနိုက်တက်အသင်းဟာ ၁၉၇၄ ခုနှစ်က ဒုတိယတန်းကို တန်းဆင်းပြီးနောက်ပိုင်း လက်ရှိရပ်တည်မှုဖြစ်တဲ့ အဆင့် ၁၆ က သူတို့ရဲ့လိဂ်မှာ အဆိုးရွားဆုံးအဆင့် ရပ်တည်မှုဖြစ်နေတာပါ။ 

မန်ချက်စတာကလပ်ဟာ ပရီးမီးယားလိဂ်မှာ ရလဒ်တွေ ဆိုးနေပေမယ့် ယူရိုပါလိဂ်ဗိုလ်လုပွဲကို တက်ရောက်ထား ပြီး စပါးအသင်းနဲ့ ယှဉ်ပြိုင်ရမှာဖြစ်ပါတယ်။ 

ယူနိုက်တက်အသင်းနည်းပြ အာမိုရင်က သူဟာ ဗိုလ်လုပွဲအတွက် စိုးရိမ်မှုမရှိဘဲ လာမယ့် ပရီးမီးယားလိဂ်ပွဲမှာ အများကြီး တိုးတက်မှုရှိအောင် လုပ်ဖို့လိုတယ်လို့ ပြောခဲ့တာပါ။ 

ယူနိုက်တက်အသင်းဟာ လာမယ့် ပရီးမီးယားလိဂ် ပွဲစဉ်အဖြစ် ချယ်လ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ မေလ ၁၀

ဥရောပကလပ် အများအပြားရဲ့ ပစ်မှတ်ဖြစ်နေတဲ့ လီဗာပူးလ်အသင်း တိုက်စစ်မှူး ဒါဝင်နူနက်ဇ်ကို ခေါ်ယူဖို့ နာပိုလီနဲ့ အသလက်တီကိုအသင်းတို့ စိတ်ဝင်စားနေပါတယ်။ 

ဒါဝင်နူနက်ဇ်ဟာ လီဗာပူးလ်အသင်းမှာ ပုံမှန်ခြေစွမ်းပြသနိုင်ဖို့ ရုန်းကန်နေရတာကြောင့် နွေရာသီမှာ အသင်း ကနေ ထွက်ခွာရဖွယ်ရှိနေတာပါ။

ဒါဝင်နူနက်ဇ်ကို  ခေါ်ယူဖို့ နာပိုလီနဲ့ အသလက်တီကိုအသင်းတို့ စိတ်ဝင်စားနေသလို ဆော်ဒီပရိုလိဂ်က သူ့ကို ခေါ်ယူဖို့ ချဉ်းကပ်မှုတွေ ပြုလုပ်နေတာ ဖြစ်ပါတယ်။

၂၀၂၂ ခုနှစ် နွေရာသီ အပြောင်းအရွှေ့က ဘင်ဖီကာအသင်းကနေ ရောက်ရှိလာခဲ့တဲ့ ဒါဝင်နူနက်ဇ်ဟာ လီဗာပူးလ် အသင်းအတွက် ပြိုင်ပွဲစုံ ၁၄၀ ပွဲ ပါဝင်ကစားထားပေမယ့် သွင်းဂိုး ၄၀ သာသွင်းယူနိုင်ခဲ့တာပါ။ 

ဒါဝင်နူနက်ဇ်ဟာ ဒီရာသီမှာဆိုရင် လီဗာပူးလ်အသင်းအတွက် ၄၄ ပွဲ ပါဝင်ကစားထားပြီး ၇ ဂိုးသွင်းယူထားတာ ဖြစ်ပါတယ်။ 

ဥရုဂွေးတိုက်စစ်မှူးဟာ နည်းပြအာနီဆလော့ လက်အောက်မှာ လီဗာပူးလ်အသင်းအတွက် ပွဲထွက် လူစာရင်း ပါဝင်ခွင့် နည်းပါးလာခဲ့ပြီး အသင်း ပရီးမီးယားလိဂ်ဖလား ရရှိအောင် ကူညီနိုင်မှုနည်းပါးခဲ့တာပါ။ 

ဒါဝင်နူနက်ဇ်ကို တွေ့ရစဉ်

အဲဒါကြောင့် လီဗာပူးလ်အသင်းဟာ ဒါဝင်နူနက်ဇ်ကို အရှုံးခံရောင်းပြီး တိုက်စစ်မှူးသစ်တစ်ဦး ခေါ်ယူနိုင်ဖို့ ပစ်မှတ်ထားနေတာဖြစ်ပါတယ်။

လီဗာပူးလ်အသင်းဟာ နယူးကာဆယ်အသင်း တိုက်စစ်မှူး အစ်ဆက်ကို အဓိကပစ်မှတ်အဖြစ် သတ်မှတ် ထားတာပါ။ 

နယူးကာဆယ်အသင်းဟာ အစ်ဆက်အတွက် ပြောင်းရွှေ့ကြေး အများအပြား သတ်မှတ်ထားတာကြောင့် ဒါဝင်နူနက်ဇ် အပါအဝင် ကစားသမားအချို့ကို ရောင်းချပြီး ပြောင်းရွှေ့ကြေး ရှာဖွေဖို့ရှိနေပါတယ်။ 

လီဗာပူးလ်အသင်းဟာ ရာသီကုန်မှာ ထွက်ခွာမယ့် ညာနောက်ခံလူ အာနိုးလ်ရဲ့နေရာမှာ အစားထိုးဖို့ ရှာဖွေနေပြီး လေဗာကူဆင်အသင်းကစားသမား ဖရင်ပေါင်ကို ပစ်မှတ်ထားနေတာပါ။ 

ပရီးမီးယားလိဂ် ချန်ပီယံ လီဗာပူးလ်အသင်းဟာ ဒီရာသီလိဂ် လက်ကျန် ပွဲစဉ်တွေအဖြစ် အာဆင်နယ်၊ ဘရိုက်တန်၊ ပဲလေ့စ်အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ မေလ ၁၀

အာဆင်နယ်အသင်း ကွင်းလယ်လူဟောင်း ဝီလ်ရှိုင်းယားဟာ ချန်ပီယံရှစ်ကလပ် နော်ဝစ်ချ်အသင်းက သူ့ကို ယာယီနည်းပြအဖြစ်ကနေ အမြဲတမ်းနည်းပြအဖြစ် မခန့်အပ်ဖို့ ဆုံးဖြတ်ခဲ့တာကြောင့် အသင်းကနေ ထွက်ခွာ ခဲ့ပါတယ်။ 

နော်ဝစ်ချ်အသင်းဟာ နည်းပြဖြစ်သူ ဂျိုဟာနက်စ်ကို ထုတ်ပယ်ခဲ့ပြီးနောက် အသင်းရဲ့ ဒီရာသီချန်ပီယံရှစ် နောက်ဆုံး ၂ ပွဲကို ကိုင်တွယ်ဖို့ ဝီလ်ရှိုင်းယားကို ယာယီနည်းပြအဖြစ် ခန့်အပ်ခဲ့တာပါ။

ဝီလ်ရှိုင်းယားဟာ ဒီ ၂ ပွဲမှာ ၁ ပွဲနိုင်၊ ၁ ပွဲသရေ ရလဒ်ရရှိအောင် ကိုင်တွယ်ပေးခဲ့ပြီး နော်ဝစ်ချ်အသင်းကို အမှတ်ပေး ဇယားအဆင့် ၁၃ နေရာမှာ ရပ်တည်ကာ ရာသီအဆုံးသတ်စေခဲ့ပါတယ်။ 

နော်ဝစ်ချ်အသင်း တာဝန်ရှိသူတွေဟာ အမြဲတမ်း နည်းပြသစ်တစ်ဦး ရှာဖွေခန့် အပ်ဖို့ဆုံးဖြတ်ခဲ့တာကြောင့် ဝီလ်ရှိုင်းယားဟာ အသင်းကနေ ထွက်ခွာမယ်လို့ The Athletic က ဖော်ပြထားတာပါ။ 

အာဆင်နယ် ယူ-၁၈ အသင်းရဲ့ နည်းပြချုပ်အဖြစ် တာဝန်ယူခဲ့တဲ့ ဝီလ်ရှိုင်းယားဟာ နော်ဝစ်ချ်အသင်းမှာ နည်းပြ အဖွဲ့ဝင်အဖြစ် တာဝန်ထမ်းဆောင်ဖို့ ပြီးခဲ့တဲ့နှစ် အောက်တိုဘာက အာဆင်နယ်အသင်းကနေ ထွက်ခွာခဲ့တာ ဖြစ်ပါတယ်။ 

ဝီလ်ရှိုင်းယားကို တွေ့ရစဉ်

ဝီလ်ရှိုင်းယားဟာ နော်ဝစ်ချ်အသင်း ယာယီနည်းပြအဖြစ် ကိုင်တွယ်ခဲ့တဲ့ ၂ ပွဲမှာ မယ်ဒယ်ဘရော့အသင်းနဲ့ ဂိုးမရှိ သရေ၊ ကာဒစ်ဖ်အသင်းကို ၄ ဂိုး-၂ ဂိုးနဲ့ အနိုင်ရရှိအောင် စွမ်းဆောင်ပေးနိုင်ခဲ့တာပါ။ 

အာဆင်နယ်အသင်းအတွက် ပွဲပေါင်း ၂၀၀ နီးပါး ပါဝင်ကစားခဲ့တဲ့ ဝီလ်ရှိုင်းယားဟာ ကစားသမားဘဝမှာ ဘောလ်တန်၊ ဘုန်းမောက်၊ ဝက်စ်ဟမ်းနဲ့ AGF အသင်းတွေမှာ ကစားခဲ့ပြီး အင်္ဂလန်လက်ရွေးစင်အသင်းအတွက် ပွဲပေါင်း ၃၄ ပွဲကစားခဲ့ပါတယ်။ 

၂၀၂၂ ခုနှစ်မှာ ကစားသမားဘဝကနေ အနားယူခဲ့တဲ့ ဝီလ်ရှိုင်းယားဟာ အသင်းဟောင်း အာဆင်နယ်အသင်းကို ပြန်ရောက်ရှိလာပြီး လူငယ်အသင်းတွေမှာ နည်းပြအဖြစ် တာဝန်ယူခဲ့တာပါ။ 

ဝီလ်ရှိုင်းယားဟာ လက်ရှိအချိန်မှာ အသင်းတစ်သင်းကို အမြဲတမ်းနည်းပြအဖြစ် ကိုင်တွယ်နိုင်ဖို့ ရှာဖွေနေပြီး ဘယ်အသင်းကို ကိုင်တွယ်မလဲဆိုတာ စောင့်ကြည့်ရမှာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ မေလ ၁၀

ဘောလုံးအားကစား ကလောင်ရှင်များအဖွဲ့(FWA)ရဲ့ ၂၀၂၄-၂၅ ရာသီ တစ်နှစ်တာ အကောင်းဆုံး ဘောလုံးသမား ဆုကို လီဗာပူးလ်အသင်း တောင်ပံကစားသမား ဆာလက်က ရရှိသွားခဲ့ပါတယ်။

လီဗာပူးလ်အသင်းအတွက် ဒီရာသီ ပရီးမီးယားလိဂ်ပြိုင်ပွဲမှာ ၂၈ ဂိုးအပါအဝင် ပြိုင်ပွဲစုံ ၃၃ ဂိုးသွင်းယူကာ ဂိုးဖန်တီးမှု ၂၃ ကြိမ် ပြုလုပ်ထားတဲ့ ဆာလက်ဟာ ဒီဆုအတွက် မဲ ၉၀ ရာခိုင်နှုန်းကျော် ရရှိခဲ့တာပါ။ 

ဆာလက်ဟာ ဒီရာသီလီဗာပူးလ်အသင်း ပရီးမီးယားလိဂ်ဖလား ရယူနိုင်ခဲ့တာမှာ အဓိကအခန်းကဏ္ဍကနေ ပါဝင်ခဲ့တာဖြစ်ပါတယ်။ 

ဆာလက်ဟာ FWA တစ်နှစ်တာ အကောင်းဆုံး ဘောလုံးသမားဆုကို ၂၀၁၇-၁၈ ရာသီနဲ့ ၂၀၂၁-၂၂ ရာသီတွေမှာ လည်း ရရှိခဲ့တာကြောင့် အခုတစ်ကြိမ်ဟာ သူ့အတွက် တတိယအကြိမ်မြောက် ရရှိခဲ့တာပါ။

FWA တစ်နှစ်တာ အကောင်းဆုံး ဘောလုံးသမားဆုကို အာဆင်နယ်အသင်းဂန္ထဝင် အွန်နရီက ၃ ကြိမ်နဲ့ အကြိမ် အများဆုံး ဆွတ်ခူးထားပြီး ဆာလက်က ဒီစံချိန်ကိုလိုက်မီခဲ့တာ ဖြစ်ပါတယ်။

ဆာလက်ကို တွေ့ရစဉ်

၂၀၂၄-၂၅ ရာသီ FWA ဆုအတွက် မဲပေးရွေးချယ်မှုမှာ လီဗာပူးလ်အသင်း နောက်ခံလူ ဗန်ဒိုက်က နံပါတ် ၂၊ နယူးကာဆယ်အသင်း တိုက်စစ်မှူး အစ်ဆက်က နံပါတ် ၃ ၊အာဆင်နယ်အသင်း ကွင်းလယ်လူ ဒီကလန်ရိုက်စ်က နံပါတ် ၄ နဲ့ ယူနိုက်တက်အသင်းခေါင်းဆောင် ဘရူနိုဖာနန်ဒက်စ်က နံပါတ် ၅ နေရာမှာ ရပ်တည်ခဲ့တာပါ။ 

FWA ဆုကို လီဗာပူးလ်အသင်း ကစားသမားတွေက ၁၆ ကြိမ်နဲ့ အကြိမ်အရေအတွက် အများဆုံး ရရှိထားပြီး စပါးနဲ့ ယူနိုက်တက်အသင်းတို့က ၉ ကြိမ်စီ၊ အာဆင်နယ်အသင်းက ၈ ကြိမ်နဲ့ မန်စီးတီးအသင်းက ၇ ကြိမ် ရရှိထားပါတယ်။ 

FWA အကြီးအကဲ ဂျွန်ခရော့စ်က ဆာလက်ဟာ မှတ်တမ်းစာအုပ်ကို ဆက်ရေးသားနေပြီး ဒီရာသီသူ့ရဲ့ စွမ်းဆောင်ရည်တွေက လီဗာပူးလ်အသင်း အကြိမ် ၂၀ မြောက် အမှတ်ပေးဖလား ရယူနိုင်ဖို့ အဓိကကျခဲ့တယ်လို့ ပြောခဲ့တာပါ။ 

လီဗာပူးလ်အသင်းဟာ မေလ ၁၁ ရက်မှာ ပရီးမီးယားလိဂ် ပွဲစဉ်အဖြစ် အာဆင်နယ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ မေလ ၁၀

စပိန်လူမျိုးနည်းပြ ဇာဘီအလွန်ဆိုက သူဟာ ဒီရာသီကုန်မှာ လေဗာကူဆင်အသင်းကနေ ထွက်ခွာမယ်လို့ အတည်ပြု ပြောခဲ့ပါတယ်။ 

ဇာဘီအလွန်ဆိုက “အခုလာမယ့် ၂ ပွဲဟာ လေဗာကူဆင်အသင်း နည်းပြအဖြစ် ကျနော့်ရဲ့ နောက်ဆုံးပွဲဖြစ်မယ် ဆိုတာ ဒီအပတ်ထဲမှာ ကလပ်အသင်းနဲ့ ကျနော်သဘောတူညီမှု ရရှိထားပါတယ်။ အခုအချိန်ဟာ ဒီအကြောင်းကို ကြေညာဖို့ မှန်ကန်တဲ့ အခိုက်အတန့်ပါ။ တနင်္ဂနွေနေ့ အိမ်ကွင်းကစားမယ့်ပွဲမှာ နှုတ်ဆက်ပွဲ ပြုလုပ်ချင်ပါတယ်။ မယုံနိုင်လောက်အောင် ၃ နှစ်ကြာခဲ့ပြီး ကျနော်တို့ အောင်မြင်ခဲ့တာတွေအတွက် ဂုဏ်ယူနိုင်မယ်လို့ ထင်ပါတယ်။ ကလပ်ဟာ လမ်းကြောင်းမှန်ပေါ်ကို ရောက်နေပါပြီ”လို့ ပြောခဲ့တာပါ။ 

လေဗာကူဆင်အသင်းကို ၃ နှစ်ကြာ ကိုင်တွယ်ခဲ့တဲ့ ဇာဘီအလွန်ဆိုဟာ ပြီးခဲ့တဲ့ရာသီက အသင်းကို ဘွန်ဒက်လီဂါ ပြိုင်ပွဲမှာ ရှုံးပွဲမရှိ ချန်ပီယံဖြစ်အောင် ဦးဆောင် ပေးနိုင်ခဲ့သလို ပိုကယ်ဖလားလည်း ရယူပေးနိုင်ခဲ့တာ ဖြစ်ပါတယ်။ 

ဇာဘီအလွန်ဆိုဟာ ရာသီကုန်မှာ ထွက်ခွာမယ့် အန်ဆယ်လော့တီရဲ့ နေရာမှာ အစားထိုးဝင်ရောက်ပြီး အသင်းဟောင်း ရီးရယ်လ်အသင်းကို နည်းပြသစ်အဖြစ် တာဝန်ယူမယ်လို့ သတင်းတွေ ထွက်နေတာပါ။ 

ဇာဘီအလွန်ဆိုကို တွေ့ရစဉ်

ဒါပေမယ့် ဇာဘီအလွန်ဆိုက အခုအချိန်က အနာဂတ်အကြောင်းကို ပြောရမယ့် အချိန်မဟုတ်ဘူးလို့ ပြောခဲ့ပါ တယ်။ 

ဆိုစီဒက်အရန်အသင်းကို စတင်ကိုင်တွယ်ခဲ့တဲ့ ဇာဘီအလွန်ဆိုဟာ ၂၀၂၂ ခုနှစ်၊ အောက်တိုဘာမှာ လေဗာကူဆင် အသင်းနည်းပြသစ်အဖြစ် ခန့်အပ်ခံခဲ့ရတာပါ။ 

အသက် ၄၃ နှစ်အရွယ်ရှိ ဇာဘီအလွန်ဆိုဟာ လေဗာကူဆင်အသင်းကို ပြိုင်ပွဲစုံ ၁၃၈ ပွဲကိုင်တွယ်ထားပြီး ၈၈ ပွဲအနိုင်၊ သရေ ၃၂ ပွဲနဲ့ ၁၈ ပွဲရှုံးနိမ့်ကာ အနိုင်ရာခိုင်နှုန်း ၆၃.၇၇ အထိရှိထားပါတယ်။

လေဗာကူဆင်အသင်းဟာ ဒီရာသီမှာတော့ ဆုဖလားလက်မဲ့ဖြစ်ခဲ့ပြီး ဘွန်ဒက်လီဂါပြိုင်ပွဲမှာ အမှတ်ပေးဇယား အဆင့် ၂ နေရာနဲ့ ရာသီအဆုံးသတ်မှာဖြစ်ပါတယ်။

Source: BBC

CNI Sport News

၂၀၂၅ ခုနှစ်၊ မေလ ၉

ယူနိုက်တက်နဲ့ နယူးကာဆယ်အသင်းတို့ရဲ့စိတ်ဝင်စားမှုကို ခံနေရတဲ့ ဝုလ်ဗ်စ်အသင်းတိုက်စစ်မှူးကွန်ညာဟာ အာဆင်နယ်အသင်းနဲ့တွေ့ဆုံဆွေးနွေးဖို့စီစဉ်နေတယ်လို့ သတင်းတွေထွက်ပေါ်လာခဲ့ပါတယ်။ 

ကွန်ညာဟာ အာဆင်နယ်အသင်းအပါအဝင် ပရီးမီးယားလိဂ်ကလပ်အများအပြားရဲ့ခေါ်ယူမယ့် ကစားသမား စာရင်းထဲမှာ ပါဝင်နေတာပါ။ 

ဒါပေမယ့် ယူနိုက်တက်အသင်းဟာ ကွန်ညာကို အဓိကပစ်မှတ်အဖြစ်သတ်မှတ်ကာ လာမယ့်နွေရာသီမတိုင်မီ သဘောတူညီမှုရယူနိုင်ဖို့လုပ်ဆောင်နေတာပါ။ 

ကွန်ညာဟာ ပြီးခဲ့တဲ့ ဖေဖော်ဝါရီကမှ ဝုလ်ဗ်စ်အသင်းနဲ့ ၂၀၂၉ ခုနှစ်နွေရာသီအထိ သက်တမ်းတိုးစာချုပ်ချုပ်ဆိုထားတာဖြစ်ပါတယ်။ 

ကွန်ညာဟာ ဝုလ်ဗ်စ်အသင်းနဲ့ စာချုပ်သက်တမ်းတိုးထားပေမယ့် စာချုပ်ထဲမှာ စာချုပ်ဖျက်သိမ်းကြေး ပေါင် ၆၂.၅ သန်းပေးရင် ခေါ်ယူလို့ရနိုင်မယ့် အချက်ရှိနေတာပါ။ 

ယူနိုက်တက်အသင်းဟာ ကွန်ညာကို ခေါ်ယူနိုင်မယ့် အပြောင်းအရွှေ့မှာ ဦးဆောင်နေပြီး သူ့ရဲ့ကိုယ်စားလှယ်တွေနဲ့ ဆွေးနွေးမှုပြုလုပ်ထားတာဖြစ်ပါတယ်။ 

ဒါပေမယ့် ကွန်ညာဟာ အခြားရွေးချယ်စရာတွေကို ရှာဖွေတဲ့အနေနဲ့ အပြောင်းအရွှေ့အတွက် အာဆင်နယ်အသင်းနဲ့ တွေ့ဆုံ ဆွေးနွေးဖို့စီစဉ်ထားတယ်လို့ talkSPORT က ဖော်ပြထားတာပါ။ 

အာဆင်နယ်အသင်းဟာ လာမယ့်ရာသီမှာ ဆုဖလားအောင်မြင်မှုတွေရယူနိုင်ဖို့အတွက် တိုက်စစ်ပိုင်းကို အားကောင်းအောင်လုပ်ဖို့ ပြင်ဆင်နေပြီး သူတို့ရဲ့တိုက်စစ်မှူးစာရင်းထဲမှာ စပို့တင်းလစ္စဘွန်းအသင်းတိုက်စစ်မှူး ယိုကီရက်စ်နဲ့ လိုက်ပ်ဇစ်အသင်းတိုက်စစ်မှူး ဆက်စ်ကိုတို့လည်း ပါဝင်နေပါတယ်။ 

ဘရာဇီးလ်တိုက်စစ်မှူး ကွန်ညာဟာ ဒီရာသီမပြီးဆုံးမီမှာ သူ့ရဲ့အနာဂတ်ကို ဆုံးဖြတ်လာဖို့ ရှိနေတာပါ။ 

အသက် ၂၅ နှစ်အရွယ်ရှိ ကွန်ညာဟာ ဒီရာသီမှာ ဝုလ်ဗ်စ်အသင်းအတွက် ၁၇ ဂိုးသွင်းယူထားပြီး ဂိုးဖန်တီးမှု ၆ ကြိမ်ပြုလုပ်ထားပါတယ်။

ပရီးမီးယားလိဂ်အမှတ်ပေးဇယားအဆင့် ၁၃ နေရာမှာရပ်တည်နေတဲ့ ဝုလ်ဗ်စ်အသင်းဟာ ဒီရာသီပရီးမီးယားလိဂ် လက်ကျန်ပွဲစဉ်တွေအဖြစ် ဘရိုက်တန်၊ပဲလေ့စ့်၊ဘရန်ဖိုဒ့်အသင်းတို့နဲ့ ယှဉ်ပြိုင်ရမှာဖြစ်ပါတယ်။

Source:Metro

CNI Sport News

၂၀၂၅ ခုနှစ်၊ မေလ ၉

အဲဗာတန်အသင်းရဲ့တိုက်စစ်မှူးတစ်ဦးဖြစ်တဲ့ ကယ်လ်ဗတ်လီဝန်ဟာ ထွက်ခွာဖွယ်ရှိနေတာကြောင့် အသင်းဟာ စပါးအသင်းမှာကစားနေတဲ့ တိုက်စစ်မှူးဟောင်း ရစ်ချာလီဆန်ကို ပြန်လည်ခေါ်ယူဖို့ စိတ်ဝင်စားနေပါတယ်။ 

အဲဗာတန်အသင်းနည်းပြဒေးဗစ်မိုယက်စ်ဟာ ရစ်ချာလီဆန်ကို အသင်းထံပြန်လည်ခေါ်ယူချင်နေတာကြောင့် ဘရာဇီးလ်ကစားသမားဟာ အဲဗာတန်အသင်းနဲ့ ချိတ်ဆက်မှုတွေရှိနေတာပါ။ 

အသက် ၂၇ နှစ်အရွယ်ရှိ ရစ်ချာလီဆန်ဟာ စပါးအသင်းကို ပြောင်းရွှေ့ပြီးကတည်းက ဒဏ်ရာတွေနဲ့ရုန်းကန်ခဲ့ရတာကြောင့် အသင်းဘက်ကလည်း သူ့ကိုရောင်းချဖို့ ပြင်ဆင်နေတာပါ။ 

Sky Sports က လာမယ့်နွေရာသီမှာ တိုက်စစ်မှူး သစ်တစ်ဦးကို ဦးစားပေးခေါ်ယူဖို့ စီစဉ်နေတဲ့ အဲဗာတန်အသင်းဟာ ရစ်ချာလီဆန်ကို ခေါ်ယူချင်နေတယ်လို့ ဖော်ပြထားတာပါ။ 

အင်္ဂလန်တိုက်စစ်မှူး ကယ်လ်ဗတ်လီဝန်ဟာ ပြီးခဲ့တဲ့နှစ်တွေအတွင်းမှာ အဲဗာတန်အသင်းရဲ့တိုက်စစ်ကို ဦးဆောင်နိုင်ခဲ့ပေမယ့် ဒီရာသီကုန်ရင်စာချုပ်ကုန်ဆုံးမှာဖြစ်လို့ အသင်းကနေ အလွတ်နဲ့ ထွက်ခွာဖွယ် ရှိနေတာဖြစ်ပါတယ်။ 

အသက် ၂၈ နှစ်အရွယ်ရှိ ကယ်လ်ဗတ်လီဝန်ဟာ ဒီရာသီမှာ အဲဗာတန်အသင်းအတွက် ၂၂ ပွဲသာ ကစားထားနိုင်ပြီး ၃ ဂိုးသွင်းယူထားတာပါ။ 

အဲဗာတန်အသင်းဟာ ဒီရာသီမှာ ဘီတိုကိုသာ အဓိက တိုက်စစ်မှူးအဖြစ်အသုံးပြုနေရပြီး သူဟာ ပြိုင်ပွဲစုံ ၃၁ ပွဲမှာ ၉ ဂိုးသွင်းယူထားပါတယ်။

ရစ်ချာလီဆန်ဟာ ပြီးခဲ့တဲ့ရာသီက စပါးအသင်းအတွက် ပြိုင်ပွဲစုံ ၁၂ ဂိုးသွင်းယူနိုင်ခဲ့ပေမယ့် ဒီရာသီမှာ ဒဏ်ရာတွေကြောင့် ပွဲပေါင်း ၃၀ ကျော်လွဲချော်ခဲ့ပြီး ၅ ဂိုးသာ သွင်းယူထားနိုင်တာပါ။ 

ရစ်ချာလီဆန်ကို ခေါ်ယူဖို့ ဆော်ဒီပရိုလိဂ်ကလပ်အသင်းတွေကလည်း စိတ်ဝင်စားနေပြီး စပါးအသင်းကတော့ ပေါင်သန်း ၃၀ ကျော်နဲ့ ကမ်းလှမ်းမှုပြုလုပ်ရင် သူ့ကိုရောင်းချသွားဖို့ရှိနေပါတယ်။ 

ရစ်ချာလီဆန်ဟာ အဲဗာတန်အသင်းမှာ ၂၀၁၈ ကနေ ၂၀၂၂ ခုနှစ်အထိ ပြိုင်ပွဲစုံ ၁၅၂ ပွဲကစားခဲ့တာမှာ ၅၃ ဂိုး သွင်းယူပြီး အသင်းကိုတန်းဆင်းဇုန်ကနေ လွတ်မြောက်အောင် ကူညီပေးနိုင်ခဲ့တာဖြစ်ပါတယ်။ 

Source:Goal

CNI Sport News

၂၀၂၅ ခုနှစ်၊ မေလ ၉

ချယ်လ်ဆီးအသင်းနည်းပြမာရက်စ်ကာက ဘက်တစ်အသင်းကို ကိုင်တွယ်နေတဲ့ နည်းပြပယ်လီဂရီနီနဲ့ ကွန်းဖရန့် လိဂ် ဗိုလ်လုပွဲမှာ ရင်ဆိုင်ရမှာကို စိတ်လှုပ်ရှားတယ်လို့ ပြောခဲ့ပါတယ်။ 

မာရက်စ်ကာက “ပယ်လီဂရီနီကြောင့် ဘက်တစ်နဲ့ရင်ဆိုင်ရမှာကို ကျနော်ပျော်ရွှင်ပါတယ်။ သူက ကျနော့်ရဲ့ ပရော်ဖက်ရှင်နယ်ဖခင်လိုပါပဲ။ အဲဒါကြောင့် ကျနော်တို့တွေ့ဆုံရမှာကို စိတ်လှုပ်ရှားပြီး ပျော်ရွှင်ပါတယ်။ သူနဲ့ ကျနော် ၄ နှစ်လက်တွဲခဲ့ပြီး ကစားသမားအဖြစ် ၂ နှစ်၊နည်းပြအဖြစ် ၂ နှစ်ပါ။ အဲဒါကြောင့် သူဟာ ကစားသမား တွေအပေါ် ဘယ်လိုထင်မြင်လဲဆိုတာကို ကျနော်အတိအကျသိပါတယ်။ အရေးကြီးဆုံးအရာက သူကရိုးသားပြီး လူကောင်းတစ်ဦးပါ”လို့ ပြောခဲ့တာပါ။ 

ချယ်လ်ဆီးအသင်းဟာ ကွန်းဖရန့်လိဂ်ဆီမီးဖိုင်နယ်ဒုတိယအကျော့ပွဲစဉ်မှာ ယာဂါးဒန်းအသင်းကို ၁ ဂိုး-ဂိုးမရှိနဲ့ အနိုင်ရခဲ့ပါတယ်။ 

ချယ်လ်ဆီးအသင်းဟာ ပထမအကျော့က ၄ ဂိုး-၁ ဂိုးနဲ့အနိုင်ရထားတဲ့အတွက် နှစ်ကျော့ပေါင်း ရလဒ် ၅ ဂိုး-၁ ဂိုးနဲ့အနိုင်ရပြီး ကွန်းဖရန့်လိဂ်ဗိုလ်လုပွဲကို တက်နိုင်ခဲ့တာပါ။ 

ပယ်လီဂရီနီကိုင်တွယ်နေတဲ့ ဘက်တစ်အသင်းကလည်း ဖီအိုရင်တီးနားအသင်းကို ကွန်းဖရန့်လိဂ်ဆီမီးဖိုင်နယ်အချိန်ပိုမှာ ၄ ဂိုး-၃ ဂိုးနဲ့ အနိုင်ရ ပြီး ဗိုလ်လုပွဲတက်နိုင်ခဲ့တာဖြစ်ပါတယ်။ 

အဲဒါကြောင့် ကွန်းဖရန့်လိဂ်ဗိုလ်လုပွဲအဖြစ် ချယ်လ်ဆီးနဲ့ ဘက်တစ်အသင်းတို့ယှဉ်ပြိုင်ရမှာပါ။ 

မာရက်စ်ကာဟာ ပယ်လီဂရီနီကိုင်တွယ်ခဲ့တဲ့ မာလာဂါအသင်းမှာ ကစားသမားအဖြစ်ကစားခဲ့သလို နည်းပြအဖွဲ့ဝင်အဖြစ်လည်း တာဝန်ယူခဲ့ပါတယ်။ 

ဒါ့အပြင် မာရက်စ်ကာဟာ ပယ်လီဂရီနီ ဝက်စ်ဟမ်အသင်းနည်းပြဖြစ်လာချိန်မှာ လန်ဒန် ကလပ်ရဲ့လက်ထောက်နည်းပြအဖြစ် ဆောင်ရွက်ခဲ့တာပါ။ 

မာရက်စ်ကာဟာ ဘက်တစ်အသင်းရဲ့ ပြိုင်ဘက် ကြီးဖြစ်တဲ့ ဆီဗီလာအသင်းမှာ ကစားခဲ့ဖူးပြီး ယူရိုပါလိဂ် ၂ ကြိမ်နဲ့ ဥရောပစူပါဖလားတို့ကို ရယူနိုင်ခဲ့ပါတယ်။

ချယ်လ်ဆီးအသင်းအနေနဲ့ ကွန်းဖရန့်လိဂ်ပြိုင်ပွဲမှာ ချန်ပီယံဆုကို ရယူနိုင်ခဲ့ရင် ဥရောပဆုဖလား ၃ ခုစလုံး ရယူနိုင်တဲ့ ပထမဆုံးအသင်းအဖြစ် မှတ်တမ်းတင်နိုင်မှာပါ။ 

ချယ်လ်ဆီးနဲ့ ဘက်တစ်အသင်းတို့ရဲ့ ကွန်းဖရန့်လိဂ် ဗိုလ်လုပွဲကို မေ ၂၈ ရက်ကျရင် ပိုလန်နိုင်ငံမှာ ကျင်းပသွားမှာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ မေလ ၉

ယူနိုက်တက်အသင်း နည်းပြအာမိုရင်က ပရီးမီးယားလိဂ်ပြိုင်ဘက် စပါးအသင်းနဲ့ ယှဉ်ပြိုင်ရမယ့် ယူရိုပါလိဂ် ဗိုလ်လုပွဲမှာ အသင်းအနိုင်ရရှိဖို့ လိုအပ်တယ်လို့ ပြောခဲ့ပါတယ်။

အာမိုရင်က “ဆုဖလားကို ရယူနိုင်ဖို့ဟာ ခက်ခဲတဲ့ရာသီမှာ ကျနော်တို့ကို အားပေးပံ့ပိုးမှုတွေ ပြုလုပ်ခဲ့တဲ့ ပရိသတ် တွေအတွက် ကျနော်တို့လုပ်နိုင်တဲ့ အနည်းဆုံးအရာပါ။ ဗိုလ်လုပွဲကြောင့် ကျနော် စိတ်ဖိစီးမှု ဖြစ်နေပါပြီ။ ဗိုလ်လု ပွဲမှာ အနိုင်ရအောင် မလုပ်နိုင်ခဲ့ရင် ဗိုလ်လုပွဲရောက်အောင် လုပ်ထားတဲ့အရာတွေဟာ ဘာမှမဟုတ်တော့ပါဘူး။ အဲဒါကြောင့် ကျနော်တို့ အနိုင်ရရှိအောင် လုပ်ဆောင်ဖို့လိုအပ်သလို အနိုင်ရဖို့လည်း ကြိုးစားသွားမှာပါ”လို့ ပြော ခဲ့တာပါ။ 

ယူနိုက်တက်အသင်းဟာ ယူရိုပါလိဂ် ဆီမီးဖိုင်နယ် ဒုတိယအကျော့မှာ ဘီလ်ဘာအိုအသင်းကို ၄ ဂိုး-၁ ဂိုးနဲ့ ဂိုးပြတ် အနိုင်ရရှိခဲ့တာ ဖြစ်ပါတယ်။

ဒီပွဲရဲ့ပထမပိုင်းမှာ ယူနိုက်တက်အသင်းဟာ ဘီလ်ဘာအိုအသင်းကို ၁ ဂိုး-ဂိုးမရှိနဲ့ အရေးနိမ့်နေခဲ့ပေမယ့် ဒုတိယပိုင်းမှာ မေဆန်မောင့်က ၂ ဂိုး၊ ကတ်စီမီရိုနဲ့ ဟော့ဂျ်လန်းတို့က ၁ ဂိုးစီသွင်းယူခဲ့တာကြောင့် အနိုင်ရလဒ် ပြတ်သားခဲ့တာပါ။

ယူနိုက်တက်အသင်း ယှဉ်ပြိုင်နေစဉ်

ယူနိုက်တက်အသင်းဟာ ပထမအကျော့ကလည်း ဘီလ်ဘာအိုအသင်းကို ၃ ဂိုး-ဂိုးမရှိနဲ့ အနိုင်ရထားတဲ့အတွက် နှစ်ကျော့ပေါင်းရလဒ် ၇ ဂိုး-၁ ဂိုးနဲ့ အနိုင်ရပြီး ယူရိုပါလိဂ်ဗိုလ်လုပွဲကို တက်နိုင်ခဲ့တာဖြစ်ပါတယ်။ 

ယူရိုပါလိဂ်ပြိုင်ပွဲမှာ ဗိုလ်စွဲမယ့်အသင်းဟာ လာမယ့်ရာသီ ချန်ပီယံလိဂ် ဝင်ခွင့်ရမှာဖြစ်လို့ ယူနိုက်တက်နဲ့ စပါး အသင်းထဲက တစ်သင်းဟာ ချန်ပီယံလိဂ် ယှဉ်ပြိုင်ခွင့်ရရှိမှာပါ။ 

၂ သင်းစလုံးဟာ ဒီရာသီ ပရီးမီးယားလိဂ်ပြိုင်ပွဲမှာ ရလဒ်တွေ ဆိုးနေပြီး ယူနိုက်တက်အသင်းက အဆင့် ၁၅၊ စပါး အသင်းက အဆင့် ၁၆ နေရာမှာ ရပ်တည်နေတာ ဖြစ်ပါတယ်။ 

ယူနိုက်တက်အသင်းဟာ ဒီရာသီမှာ စပါးအသင်းနဲ့ တွေ့ဆုံထားတဲ့ ၃ ပွဲစလုံး အရေးနိမ့်ထားတာပါ။

စပါးနဲ့ ယူနိုက်တက်အသင်းတို့ရဲ့ ယူရိုပါလိဂ် ဗိုလ်လုပွဲကို မေလ ၂၁ ရက် ဘီလ်ဘာအိုအသင်း အိမ်ကွင်းမှာ ကျင်းပ သွားမှာ ဖြစ်ပါတယ်။ 

Source: Metro