- By CNI
- Category: အားကစား
- Hits: 597
CNI Sport News
၂၀၂၅ ခုနှစ်၊ မေလ ၂၃
ယူနိုက်တက်အသင်းဟာ အာဂျင်တီးနား တောင်ပံကစားသမား ဂါနာချိုကို ပြောင်းရွှေ့ကြေး ပေါင်သန်း ၆၀ ရရင် နွေရာသီမှာ ရောင်းချသွားဖွယ်ရှိနေတယ်လို့ The Telegraph က ဖော်ပြထားပါတယ်။
ဂါနာချိုဟာ ယူနိုက်တက်အသင်းက စပါးအသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တဲ့ ယူရိုပါလိဂ်ဗိုလ်လုပွဲမှာ ပွဲထွက် လူစာရင်းကနေ ချန်လှပ်ခံခဲ့ရပြီးနောက် အသင်းမှာ သူ့ရဲ့အနာဂတ် မရေမရာဖြစ်လာခဲ့တာပါ။
ဂါနာချို ကိုယ်တိုင်က ဗိုလ်လုပွဲမှာ မိနစ် ၂၀ ပဲ ကစားခွင့်ရတဲ့အတွက် စိတ်ပျက်မိကြောင်းနဲ့ နွေရာသီကို ပျော်ရွှင်စွာ ဖြတ်သန်းဖို့ ကြိုးစားပြီးရင် ဘာတွေဖြစ်မလဲဆိုတာ ကြည့်တာပေါ့လို့ ပွဲအပြီးအင်တာဗျူးမှာ ပြောထားခဲ့တာဖြစ်ပါတယ်။
ဂါနာချိုကို ခေါ်ယူဖို့ ပြီးခဲ့တဲ့ ဇန်နဝါရီက ချယ်လ်ဆီးနဲ့ နာပိုလီအသင်းတို့က စိတ်ဝင်စားခဲ့ကြပေမယ့် သူ့အတွက် ယူနိုက်တက်အသင်း သတ်မှတ်ထားတဲ့ ပြောင်းရွှေ့ကြေးကို ပေးချေနိုင်ခြင်းမရှိလို့ အပြောင်းအရွှေ့ မဖြစ်ခဲ့တာပါ။
နာပိုလီအသင်းဟာ နွေရာသီမှာ တောင်ပံကစားသမားသစ်တစ်ဦး ခေါ်ယူဖို့ ရှာဖွေနေပြီး ဂါနာချိုက သူတို့ရဲ့ ပစ်မှတ်စာရင်းထဲမှာ ပါဝင်နေတာဖြစ်ပါတယ်။
ဂါနာချိုကိုတွေ့ရစဉ်
The Telegraph က ယူနိုက်တက်အသင်းဟာ ဂါနာချိုအတွက် နွေရာသီမှာ ကမ်းလှမ်းမှုတွေကို နားထောင်သွားဖို့ ဆန္ဒရှိနေပြီး ပြောင်းရွှေ့ကြေး ပေါင်သန်း ၆၀ ရရင် ရောင်းချဖို့ သဘောတူညီထားတယ်လို့ ဖော်ပြထားတာပါ။
ယူနိုက်တက်အသင်းဟာ လာမယ့်ရာသီမှာ ဥရောပဘောလုံးပြိုင်ပွဲ ယှဉ်ပြိုင်ခွင့် မရတဲ့အတွက် ပြောင်းရွှေ့ကြေး အကန့်အသတ်နဲ့သာ ရရှိမှာဖြစ်လို့ နွေရာသီမှာ ကစားသမားအချို့ကို ရောင်းချပြီး ပြောင်းရွှေ့ကြေးရှာဖွေဖို့ ရှိနေပါတယ်။
ယူနိုက်တက်အသင်းဟာ အငှားချထားတဲ့ ရက်ရှ်ဖို့ဒ်၊ ဆန်ချိုနဲ့ အန်တိုနီတို့ကို ရောင်းချပြီး ပေါင်သန်း ၁၀၀ ဝန်းကျင်ရရှိနိုင်ဖို့ မျှော်လင့်နေတာပါ။
ဂါနာချိုနဲ့ ယူနိုက်တက်အသင်းတို့ရဲ့ စာချုပ်ဟာ နောက်ထပ် ၃ နှစ် ကျန်ရှိနေသေးပါတယ်။
ယူနိုက်တက်အသင်းဟာ ဒီရာသီ ပရီးမီးယားလိဂ် နောက်ဆုံးပွဲစဉ်အဖြစ် အက်စတွန်ဗီလာ အသင်းကို အိမ်ကွင်း လက်ခံယှဉ်ပြိုင်ရမှာ ဖြစ်ပါတယ်။
Source: metro
- By CNI
- Category: အားကစား
- Hits: 450
CNI Sport News
၂၀၂၅ ခုနှစ်၊ မေလ ၂၃
ရီးရယ်လ်အသင်းရဲ့ ဂန္ထဝင်ကစားသမားဖြစ်တဲ့ ကွင်းလယ်လူ မိုဒရစ်ဟာ နွေရာသီမှာ ကျင်းပမယ့် ဖီဖာကလပ် ကမ္ဘာ့ဖလားပြိုင်ပွဲပြီးရင် အသင်းကနေ ထွက်ခွာမယ်လို့ ကြေညာခဲ့ပါတယ်။
မိုဒရစ်က “ဒီလိုအချိန်မျိုးကို ဘယ်တော့မှ မရောက်ရှိချင်ခဲ့ပေမယ့် အခုရောက်ရှိလာခဲ့ပါပြီ။ ဒါပေမယ့် ဒါက ဘောလုံးပါ။ ဘဝမှာ အရာအားလုံးက အစနဲ့အဆုံးရှိပါတယ်။ ရီးရယ်လ်အသင်းမှာ ကစားခဲ့တာက ဘောလုံး သမားတစ်ဦး အနေနဲ့ရော၊ လူပုဂ္ဂိုလ်တစ်ဦး အနေနဲ့ပါ ကျနော့်ရဲ့ဘဝကို ပြောင်းလဲစေခဲ့ပါတယ်။ သမိုင်း တစ်လျှောက် အကောင်းဆုံးကလပ်ရဲ့ အအောင်မြင်ဆုံး ခေတ်တွေထဲက တစ်ခုမှာ အစိတ်အပိုင်း ဖြစ်ခဲ့ရတဲ့ အတွက် ဂုဏ်ယူပါတယ်။ ကလပ်ကမ္ဘာ့ဖလားပြိုင်ပွဲပြီးရင် ထွက်ခွာမှာဖြစ်ပေမယ့် ကျနော်ဟာ အမြဲတမ်း အသင်းပရိသတ်ဖြစ်နေမှာပါ”လို့ သူ့ရဲ့ဆိုရှယ်မီဒီယာမှာ ရေးသားခဲ့တာပါ။
မိုဒရစ်နဲ့ ရီးရယ်လ်အသင်းတို့ရဲ့ စာချုပ်ဟာ ဇွန်လ ၃၀ ရက်ဆိုရင် ကုန်ဆုံးမှာဖြစ်ပေမယ့် ဖီဖာကလပ်ကမ္ဘာ့ဖလား ပြိုင်ပွဲအပြီးမှာ ထွက်ခွာဖို့ သဘောတူညီမှု ရရှိခဲ့တယ်လို့ ကလပ်အသင်းရဲ့ ထုတ်ပြန်ချက်ထဲမှာ ဖော်ပြထားပါ တယ်။
၂၀၁၂ ခုနှစ်ကတည်းက ရီးရယ်လ်အသင်းမှာရှိခဲ့တဲ့ မိုဒရစ်ဟာ မေလ ၂၄ ရက်မှာ ကစားမယ့် ဆိုစီဒက်အသင်းနဲ့ လာလီဂါ ရာသီပိတ်ပွဲစဉ်မှာ ရီးရယ်လ်အသင်း ကစားသမားဘဝ နောက်ဆုံးအိမ်ကွင်းပွဲစဉ်အဖြစ် ပါဝင်ကစား သွားမှာဖြစ်ပါတယ်။
မိုဒရစ်ကို တွေ့ရစဉ်
ရီးရယ်လ်အသင်းဟာ ဒီပွဲစဉ်မှာ မိုဒရစ်ကို နှုတ်ဆက်ဂုဏ်ပြုမှုတွေ ပြုလုပ်သွားမှာပါ။
၂၀၁၈ ဘောလွန်းဒီအောဆုကို ရရှိခဲ့တဲ့ မိုဒရစ်ဟာ ရီးရယ်လ်အသင်းနဲ့အတူ ချန်ပီယံလိဂ်ဖလား ၆ ကြိမ်၊ လာလီဂါဖလား ၄ ကြိမ် အပါအဝင် ဆုဖလားပေါင်း ၂၈ ခု ရယူနိုင်ခဲ့ပြီး အသင်းရဲ့သမိုင်းမှာ အအောင်မြင်ဆုံး ကစားသမားဖြစ်ခဲ့ပါတယ်။
ရီးရယ်လ်အသင်း အကြီးအကဲ ပီရက်ဇ်က မိုဒရစ်ဟာ အသင်းနဲ့ အသင်းပရိသတ်တွေရဲ့ နှလုံးသားထဲမှာ အမြဲတမ်း ရှိနေမှာဖြစ်သလို သူ့ရဲ့အမွေအနှစ်ဟာ အမြဲတမ်းရှင်သန်နေမယ်လို့ ပြောခဲ့ပါတယ်။
မိုဒရစ်ဟာ ရီးရယ်လ်အသင်းအတွက် ဒီရာသီမှာ ပြိုင်ပွဲစုံ ၅၆ ပွဲ ပါဝင်ကစားထားပြီး ၄ ဂိုး သွင်းယူနိုင်တာ အပါအဝင် အသင်းအတွက် ကစားခဲ့တဲ့ ၁၃ ရာသီမှာ ပြိုင်ပွဲစုံ ၅၉၀ ပါဝင်ကစားပြီး ၄၃ ဂိုး သွင်းယူနိုင်ခဲ့တာ ဖြစ်ပါတယ်။
Source: ESPN
- By CNI
- Category: အားကစား
- Hits: 561
CNI Sport News
၂၀၂၅ ခုနှစ်၊ မေလ ၂၂
ဆီဗီလာအသင်းကို အနိုင်ရခဲ့တဲ့ လာလီဂါပွဲစဉ်မှာ တံကောက်ကြောဒဏ်ရာ ရရှိခဲ့တဲ့ ရီးရယ်လ်အသင်း တိုက်စစ်မှူး အန်းဒရစ်ဟာ နွေရာသီမှာ ကျင်းပမယ့် ဖီဖာကလပ်ကမ္ဘာ့ဖလားပြိုင်ပွဲကို လွဲချော်သွားပြီ ဖြစ်ပါတယ်။
ရီးရယ်လ်အသင်းဟာ အန်းဒရစ် ပြန်လာနိုင်မယ့် အချိန်ကို သတ်မှတ်ထားခြင်း မရှိပေမယ့် စပိန်မီဒီယာတွေက ဘရာဇီးလ် ကစားသမားဟာ အနည်းဆုံး ၂ လကြာ အနားယူရနိုင်တယ်လို့ ဖော်ပြထားတာပါ။
အဲဒါကြောင့် အန်းဒရစ်ဟာ ဖီဖာကလပ် ကမ္ဘာ့ဖလားပြိုင်ပွဲကို သေချာပေါက် လွဲချော်သွားတာ ဖြစ်ပါတယ်။
အသက် ၁၈ နှစ်အရွယ်ရှိ အန်းဒရစ်ဟာ အီကွေဒေါ၊ ပါရာဂွေးအသင်းတို့နဲ့ ယှဉ်ပြိုင်မယ့် ဘရာဇီးလ်အသင်းရဲ့ ၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)ပွဲစဉ်တွေကိုလည်း ပါဝင်နိုင်ဖို့ မရှိတော့ပါဘူး။
ရီးရယ်လ်အသင်းဟာ ဗီနီစီးယက်စ်၊ ဗက်ဇ်ကွက်ဇ်၊ ကာဗာဂျဲလ်၊ မီလီတာအို၊ ကာမာဗင်ဂါ၊ ရူဒီဂါ၊ ဖာလန်းမန်ဒီနဲ့ အလာဘာတို့ကိုလည်း ဒဏ်ရာကြောင့် အနားပေးထားရပြီး အခုဒဏ်ရာ ရစာရင်းထဲမှာ အန်းဒရစ်ကိုပါ ထပ်ပြီး ထည့်ခဲ့ရတာပါ။
အန်းဒရစ်ကိုတွေ့ရစဉ်
ရီးရယ်လ်အသင်းရဲ့ ကွင်းလယ်လူ တစ်ဦးဖြစ်တဲ့ ဘယ်လင်ဂမ်ဟာ ကာလရှည် ခံစားနေရတဲ့ ပခုံးဒဏ်ရာကို ဖီဖာကလပ် ကမ္ဘာ့ဖလားပြိုင်ပွဲအပြီးမှာ ခွဲစိတ်ကုသမှုခံယူဖို့ စီစဉ်ထားပါတယ်။
အဲဒါကြောင့် ဘယ်လင်ဂမ်ဟာ ရီးရယ်လ်အသင်းရဲ့ လာမယ့်ရာသီအစ ပွဲစဉ်အချို့ကို လွဲချော်မှာပါ။
ရီးရယ်လ်အသင်းဟာ ဒီရာသီ လာလီဂါ နောက်ဆုံးပွဲစဉ်အဖြစ် ဆိုစီဒက်အသင်းနဲ့ ယှဉ်ပြိုင်ရမှာဖြစ်ပြီး နည်းပြ အန်ဆယ်လော့တီဟာ ရီးရယ်လ်အသင်း နည်းပြဘဝ နောက်ဆုံးပွဲစဉ်အဖြစ် တာဝန်ယူ ကိုင်တွယ်သွားမှာ ဖြစ်ပါတယ်။
ရီးရယ်လ်အသင်းဟာ လေဗာကူဆင်အသင်းနည်းပြ ဇာဘီအလွန်ဆိုကို နည်းပြသစ်အဖြစ် ခန့်အပ်ဖို့ သဘောတူညီမှု ရရှိထားပြီး မကြာခင် ရက်ပိုင်းအတွင်းမှာ တရားဝင် ကြေညာသွားဖို့ ရှိနေတာပါ။
ရီးရယ်လ်အသင်းဟာ ဇွန်လထဲမှာ ကျင်းပမယ့် ဖီဖာကလပ် ကမ္ဘာ့ဖလားပြိုင်ပွဲ အုပ်စုအဖွင့်ပွဲစဉ်အဖြစ် ဆော်ဒီပရိုလိဂ်ကလပ် အယ်လ်ဟီလယ်အသင်းနဲ့ စတင်ယှဉ်ပြိုင်သွားမှာ ဖြစ်ပါတယ်။
Source:CNA
- By CNI
- Category: အားကစား
- Hits: 472
CNI Sport News
၂၀၂၅ ခုနှစ်၊ မေလ ၂၂
ဘာစီလိုနာအသင်း ခေါင်းဆောင်တွေထဲက တစ်ဦးဖြစ်တဲ့ ကွင်းလယ်လူ ဒီဂျောင်ဟာ အသင်းမှာ ဆက်ရှိဖို့အတွက် လုပ်ခလစာလျှော့ပြီး ယူသွားဖို့ ဆန္ဒရှိနေတယ်လို့ Catalunya Radio က ဖော်ပြထားပါတယ်။
ဒီဂျောင်နဲ့ ဘာစီလိုနာအသင်းတို့ရဲ့ စာချုပ်ဟာ နောက်ဆုံးနှစ်ထဲကို ရောက်ရှိနေပြီး အသင်းဘက်က သူ့ကို ဆက်ထိန်းသိမ်းချင်တာကြောင့် စာချုပ်သစ်ကမ်းလှမ်းဖို့ အစီအစဉ်ရှိနေတာပါ။
ဒီဂျောင်ဟာ ဒဏ်ရာမှတ်တမ်းတွေကြောင့် ဘာစီလိုနာအသင်း ကစားသမားဘဝကို အဆုံးသတ်ဖို့ အချိန်ရောက် ရှိလာတော့မယ်လို့ အရင်ကသတင်းတွေမှာ ဖော်ပြခဲ့ပါတယ်။
ဒါပေမယ့် ဘာစီလိုနာအသင်းနည်းပြ ဟန်ဆီဖလစ်က သူ့ကိုယုံကြည်မှုရှိကြောင်း ပြသခဲ့ပြီး သူ့ရဲ့ပုံစံပြန်ရဖို့ အတွက် လူစားဝင်အဖြစ် အသုံးပြုမှုတွေ ပြုလုပ်ခဲ့တာပါ။
နည်းပြ ဟန်ဆီဖလစ်ဟာ နောက်ပိုင်းမှာ ဒီဂျောင်ကို ပုံမှန်ပွဲထွက် လူစာရင်းထဲ အသုံးပြုခဲ့ပြီး ပက်ဒရီနဲ့ ကွင်းလယ် မှာ တွဲဖက်ကာ အသင်းကို ရလဒ်ကောင်းတွေ ရရှိစေခဲ့တာဖြစ်ပါတယ်။
အဲဒါကြောင့် ဒီဂျောင်ကို စာချုပ်သက်တမ်းတိုးဖို့က ဘာစီလိုနာအသင်းအတွက် အရေးကြီးတဲ့ လုပ်ငန်းစဉ်အဖြစ် ရှိနေတာပါ။
ဒီဂျောင်ကိုတွေ့ရစဉ်
ပြီးခဲ့တဲ့ ဧပြီတုန်းက ဒီဂျောင်ဟာ ဘာစီလိုနာအသင်းမှာ ဆက်ရှိဖွယ် ရှိ/မရှိကို အတည်ပြုဖို့ ငြင်းဆန်ထားတာ ဖြစ်ပါတယ်။
ဒါပေမယ့် ဘာစီလိုနာအသင်းဥက္ကဋ္ဌ လာပေါ်တာက ဒီဂျောင်ဟာ အသင်းမှာ ဆက်ရှိချင်နေပြီး သူတို့ဘက်ကလည်း ဆက်နေချင်စေချင်သလို သူဟာ ဒီပရောဂျက်ရဲ့အဓိက ကစားသမားတစ်ဦး ဖြစ်တယ်လို့ မကြာသေးမီက မှတ်ချက်ပေးခဲ့တာပါ။
နယ်သာလန် ကွင်းလယ်လူဟာ လာလီဂါမှာ လုပ်ခလစာ အများဆုံးရရှိနေတဲ့ ကစားသမားတွေထဲက တစ်ဦး ဖြစ်ပြီး ဘာစီလိုနာအသင်းမှာတော့ ဒုတိယမြောက် လုပ်ခလစာ အများဆုံးရရှိတဲ့သူ ဖြစ်ပါတယ်။
ဒီဂျောင်ဟာ ဘာစီလိုနာအသင်းမှာ တစ်နှစ်ကို ယူရို ၁၉ သန်း ရရှိနေပြီး တိုက်စစ်မှူး လီဝန်ဒေါစကီးက တစ်နှစ်ကို ယူရို ၃၃ သန်းရရှိနေတာပါ။
၂၀၁၉ ခုနှစ်က အေဂျက်စ်အသင်းကနေ ရောက်ရှိလာခဲ့တဲ့ ဒီဂျောင်ဟာ ဘာစီလိုနာအသင်းအတွက် ၂၅၈ ပွဲ ပါဝင် ကစားထားပြီး ၁၉ ဂိုးသွင်းယူကာ လာလီဂါဖလား ၂ ကြိမ် အပါအဝင် ဆုဖလားပေါင်း ၆ ခု ရရှိထားတာဖြစ်ပါ တယ်။
Source: Goal
- By CNI
- Category: အားကစား
- Hits: 429
CNI Sport News
၂၀၂၅ ခုနှစ်၊ မေလ ၂၂
ယူနိုက်တက်အသင်းနည်းပြ အာမိုရင်က အသင်းဘက်က သူ့ကို ထုတ်ပယ်ဖို့ ဆုံးဖြတ်ခဲ့ရင် လက်ခံသွားမယ်လို့ စပါးအသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တဲ့ ယူရိုပါလိဂ် ဗိုလ်လုပွဲအပြီးမှာ ပြောခဲ့ပါတယ်။
အာမိုရင်က “ဘုတ်အဖွဲ့နဲ့ ပရိသတ်က ကျနော်ဟာ အသင်းကို ကိုင်တွယ်ဖို့ မှန်ကန်တဲ့သူ မဟုတ်ဘူးလို့ ဆုံးဖြတ်ခဲ့ ရင် ဘာလျော်ကြေးမှ မယူဘဲ မနက်ဖြန် ထွက်ခွာသွားမှာပါ။ ဒါပေမယ့် ကျနော် ရာထူးကနေ နုတ်ထွက်မှာ မဟုတ် ပါဘူး။ ဒီရှုံးနိမ့်မှုကို ရင်ဆိုင်ရမှာပါ။ ကျနော်ဟာ ကျနော့်ရဲ့ အလုပ်အပေါ်မှာ အလွန်ယုံကြည်မှုရှိပါတယ်။ ခင်ဗျားတို့ မြင်တွေ့တဲ့အတိုင်း ကျနော်လုပ်တဲ့ပုံစံကို ဘာမှပြောင်းလဲမှာ မဟုတ်ပါဘူး”လို့ ပြောခဲ့တာပါ။
ပေါ်တူဂီလူမျိုးနည်းပြ အာမိုရင်ဟာ ယူနိုက်တက်အသင်းကို ရောက်ရှိလာခဲ့တဲ့ ၂၀၂၄ ခုနှစ်၊ နိုဝင်ဘာကတည်းက အသင်းကို ရလဒ်ကောင်းတွေ ရယူပေးနိုင်ဖို့ ရုန်းကန်နေရပြီး ယူရိုပါလိဂ်ဖလားလည်း လက်လွှတ်ခဲ့ရတဲ့အတွက် ဒီရာသီကို အဆိုးရွားဆုံးရာသီအဖြစ် အဆုံးသတ်ရတော့မှာပါ။
ယူနိုက်တက်အသင်းဟာ ယူရိုပါလိဂ် ဗိုလ်လုပွဲမှာ အရေးနိမ့်ခဲ့တာကြောင့် ၂၀၁၃-၁၄ ရာသီနောက်ပိုင်း ပထမဆုံး အကြိမ် လာမယ့်ရာသီမှာ ဥရောပဘောလုံးပြိုင်ပွဲ ယှဉ်ပြိုင်ခွင့် ဆုံးရှုံးခဲ့ရတာဖြစ်ပါတယ်။
ယူနိုက်တက်အသင်းရဲ့ ရလဒ်ဆိုးတွေကြောင့် နည်းပြအာမိုရင်ရဲ့ အနာဂတ်ကလည်း မေးခွန်းထုတ်စရာတွေ ရှိလာခဲ့တာပါ။
ယူနိုက်တက်အသင်းကို တွေ့ရစဉ်
အာမိုရင်ကတော့ အသင်းဘက်က သူ့ကိုထုတ်ပယ်ဖို့ ဆုံးဖြတ်ခဲ့ရင် ဘာလျော်ကြေးမှ မယူဘဲ ထွက်ခွာသွားမယ်လို့ ပြောခဲ့တာဖြစ်ပါတယ်။
ဒါပေမယ့် ယူနိုက်တက်အသင်း တာဝန်ရှိသူတွေဟာ နည်းပြအာမိုရင်ကို ထုတ်ပယ်ဖို့ အစီအစဉ်မရှိဘဲ လာမယ့် ရာသီအသင်းကို ဆက်ပြီး ကိုင်တွယ်စေဖို့ စီစဉ်ထားတာပါ။
ပေါ်တူဂီလူမျိုးနည်းပြ အာမိုရင်က စပါးအသင်းနဲ့ပွဲမှာ သူတို့ဟာ ပိုပြီးကောင်းခဲ့ပေမယ့် သွင်းဂိုး မသွင်းနိုင်ခဲ့တာ ကြောင့် အရေးနိမ့်ခဲ့တယ်လို့ ပြောခဲ့ပါတယ်။
ယူနိုက်တက်အသင်းဟာ ဒီပွဲမှာ ဂိုးပေါက်ကန်သွင်းမှု ၁၆ ကြိမ်နဲ့ ဂိုးပေါက်တည့်မှု ၆ ကြိမ်အထိ ရှိခဲ့ပေမယ့် ဂိုးမသွင်းယူနိုင်ခဲ့ဘဲ စပါးအသင်းကတော့ ဂိုးပေါက်ကန်သွင်းမှု ၃ ကြိမ်၊ ဂိုးပေါက်တည့်မှု ၁ ကြိမ်မှာ သွင်းဂိုး ရယူနိုင်ခဲ့တာပါ။
ပြိုင်ပွဲစုံ ၃ ပွဲဆက်တိုက် အရေးနိမ့်ထားတဲ့ ယူနိုက်တက်အသင်းဟာ လာမယ့် ပရီးမီးယားလိဂ် နောက်ဆုံးပွဲစဉ် အဖြစ် အက်စတွန်ဗီလာအသင်းကို အိမ်ကွင်းယှဉ်ပြိုင်ရမှာ ဖြစ်ပါတယ်။
Source: Goal
- By CNI
- Category: အားကစား
- Hits: 541
CNI Sport News
၂၀၂၅ ခုနှစ်၊ မေလ ၂၂
စပါးအသင်းဟာ ယူရိုပါလိဂ်ဗိုလ်လုပွဲအဖြစ် ယှဉ်ပြိုင်ခဲ့တဲ့ ယူနိုက်တက်အသင်းနဲ့ပွဲစဉ်မှာ ၁ ဂိုး-ဂိုးမရှိနဲ့ အနိုင်ရပြီး ချန်ပီယံဖလားရရှိကာ လာမယ့်ရာသီ ချန်ပီယံလိဂ်ဝင်ခွင့် ရရှိသွားခဲ့ပါတယ်။
ဒီပွဲမှာ စပါးအသင်းအတွက် တစ်လုံးတည်းသော အနိုင်ဂိုးကို ပွဲချိန် ၄၂ မိနစ်မှာ ဘရီနန်ဂျွန်ဆင်က သွင်းယူခဲ့တာ ပါ။
ဒုတိယပိုင်းမှာ ယူနိုက်တက်အသင်းဟာ ချေပဂိုးရရှိနိုင်ဖို့ ကြိုးစားခဲ့ပေမယ့် စပါးအသင်းရဲ့ခံစစ်ကို ကျော်ဖြတ်နိုင်ခဲ့ ခြင်း မရှိတာကြောင့် ရှုံးပွဲကြုံတွေ့ခဲ့ရတာ ဖြစ်ပါတယ်။
စပါးအသင်းအတွက် ဒီရာသီ ယူရိုပါလိဂ်ဖလားဟာ ၂၀၀၈ ခုနှစ်နောက်ပိုင်း သူတို့အတွက် ပထမဆုံး ဆုဖလား ဖြစ်ပြီး ၁၇ နှစ်ကြာ ဆုဖလားရရှိဖို့ စောင့်ဆိုင်းခဲ့ရတာကို အဆုံးသတ်နိုင်ခဲ့တာပါ
စပါးအသင်းနည်းပြ ပိုစတီကိုဂလူးဟာ သူကိုင်တွယ်တဲ့ အသင်းတိုင်းကို ဒုတိယမြောက်ရာသီမှာ ဆုဖလား ရယူပေးနိုင်တဲ့ မှတ်တမ်းကောင်းကို ဆက်ထိန်းသိမ်းနိုင်ခဲ့ပြီး သူ့ရဲ့ကတိစကားကို တည်နိုင်ခဲ့တာဖြစ်ပါတယ်။
စပါးအသင်းနည်းပြ ပိုစတီကိုဂလူးဟာ ပြီးခဲ့တဲ့ရက်ပိုင်းက သူ့ရဲ့အနာဂတ်နဲ့ ပတ်သက်ပြီး သတင်းတွေ ထွက်နေခဲ့ ပေမယ့် သူကတော့ အသင်းအကြီးအကဲတွေနဲ့ အစည်းအဝေး ပြုလုပ်ဖို့ အစီအစဉ်မရှိသလို ဆွေးနွေးမှုပြု လုပ်ထား တာလည်းမရှိဘူးလို့ ပွဲအပြီးမှာ ပြောခဲ့တာပါ။
စပါးနဲ့ယူနိုက်တက် ယှဉ်ပြိုင်နေစဉ်
ဒါအပြင် စပါးအသင်းနဲ့ ၂ နှစ်စာချုပ် ကျန်ရှိနေတဲ့ နည်းပြပိုစတီကိုဂလူးဟာ ဒီအစုအဖွဲ့နဲ့ ဆက်ပြီးလက်တွဲ အလုပ်လုပ် ချင်တယ်လို့ ပြောခဲ့ပါတယ်။
၂၀၁၅ ခုနှစ်က လေဗာကူဆင်အသင်းကနေ ရောက်ရှိလာခဲ့တဲ့ စပါးအသင်း ခေါင်းဆောင် ဆွန်ဟောင်မင်အတွက် ယူရိုပါလိဂ်ဖလားဟာ သူ့ရဲ့လန်ဒန်ကလပ် ကစားသမားဘဝမှာ ပထမဆုံးဆုဖလားလည်း ဖြစ်ခဲ့တာပါ။
ဆွန်ဟောင်မင်က အိပ်မက်က အမှန်တကယ် ဖြစ်လာတဲ့အတွက် ပျော်ရွှင်ပြီး သူဟာ ကမ္ဘာပေါ်မှာ အပျော်ရွှင်ဆုံး လူသားဖြစ်တယ်လို့ ပြောခဲ့ပါတယ်။
ဒါအပြင် ဆွန်ဟောင်မင်က သူဟာ စပါးအသင်းရဲ့ ဂန္ထဝင်တစ်ဦးဖြစ်တယ်လို့ ပြောနိုင်ကြောင်း ပွဲအပြီး အင်တာဗျူး မှာ ပြောခဲ့တာပါ။
စပါးအသင်းဟာ ယူရိုပါလိဂ်ဖလားကို အခုတစ်ကြိမ် အပါအဝင် ၃ ကြိမ်မြောက်ရယူနိုင်ခဲ့ပါတယ်။
ပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့် ၁၇ နေရာ ရပ်တည်နေတဲ့ စပါးအသင်းဟာ ဒီရာသီလိဂ် နောက်ဆုံးပွဲစဉ်အဖြစ် ဘရိုက်တန်အသင်းကို အိမ်ကွင်းယှဉ်ပြိုင်ရမှာ ဖြစ်ပါတယ်။
Source: CNA
- By CNI
- Category: အားကစား
- Hits: 487
CNI Sport News
၂၀၂၅ ခုနှစ်၊ မေလ ၂၁
လီဗာပူးလ်အသင်းဂန္ထဝင် စတီဗင်ဂျရတ်ဟာ လာမယ့် ၄၈ နာရီအတွင်း အသင်းဟောင်း ရိန်းဂျားစ်အသင်းနဲ့ နည်းပြရာထူးအတွက် ဆွေးနွေးမှုပြုလုပ်ဖို့ စီစဉ်ထားပါတယ်။
အသက် ၄၄ နှစ်အရွယ်ရှိ စတီဗင်ဂျရတ်ဟာ ရိန်းဂျားစ်အသင်းကို ဒုတိယအကြိမ်မြောက် ကိုင်တွယ်ဖို့ ရေပန်း အစားဆုံး ဖြစ်လာခဲ့တယ်လို့ သတင်းမှာ ဖော်ပြထားတာပါ။
စတီဗင်ဂျရတ်ဟာ ပရော်ဖက်ရှင်နယ် အကြောင်းပြချက်နဲ့ ပြင်သစ်မှာ လာမယ့် ရက်သတ္တပတ် ကျင်းပမယ့် ပရဟိတပွဲကနေ နုတ်ထွက်ထားပါတယ်။
ဆောက်သမ်တန်အသင်း နည်းပြဟောင်း ရပ်ဆဲလ်မာတင်လည်း ရိန်းဂျားစ်အသင်း နည်းပြသစ် ဖြစ်လာနိုင်တဲ့ စာရင်းထဲမှာ ပါဝင်နေတာပါ။
ဒါပေမယ့် စတီဗင်ဂျရတ်ဟာ ရိန်းဂျားစ်အသင်း အကြီးအကဲတွေရဲ့ ထောက်ခံမှုကို ရရှိနေတာဖြစ်ပါတယ်။
စတီဗင်ဂျရတ်ကို တွေ့ရစဉ်
အင်္ဂလန်ကစားသမားဟောင်းဟာ ဆော်ဒီပရိုလိဂ်ကလပ် အယ်လ်အက်တီဖတ်အသင်းကို နောက်ဆုံး ကိုင်တွယ် ထားပြီး အသင်းရဲ့ ရလဒ်ဆိုးတွေကြောင့် ဇန်နဝါရီမှာ နည်းပြရာထူးကနေ ထွက်ခွာခဲ့ရတာပါ။
စတီဗင်ဂျရတ်ဟာ ရိန်းဂျားစ်အသင်းကို ၂၀၁၈ ကနေ ၂၀၂၁ ခုနှစ်အထိ ကိုင်တွယ်ခဲ့ပြီး ၂၀၂၀-၂၁ ရာသီမှာ တစ်ရာသီလုံး ရှုံးပွဲမရှိနဲ့ အမှတ်ပေးဖလား ရရှိအောင် ဦးဆောင်ပေးနိုင်ခဲ့ပါတယ်။
စတီဗင်ဂျရတ်ဟာ ရိန်းဂျားစ်အသင်းကနေ ထွက်ခွာပြီးနောက်မှာ အက်စတွန်ဗီလာနဲ့ အယ်လ်အက်တီဖတ် အသင်းတွေကို ကိုင်တွယ်ခဲ့ပေမယ့် ရလဒ်ဆိုးတွေနဲ့ ကြုံတွေ့ခဲ့ရတာပါ။
ရိန်းဂျားစ်အသင်းဟာ ဒီရာသီ စကော့တလန် ချန်ပီယံရှစ်ပြိုင်ပွဲမှာ အမှတ်ပေးဇယားအဆင့် ၂ နေရာနဲ့ ရာသီ အဆုံးသတ်ခဲ့သလို ပြည်တွင်းပြိုင်ပွဲတွေနဲ့ ဥရောပပြိုင်ပွဲမှာ အောင်မြင်မှုရယူနိုင်ခဲ့ခြင်း မရှိတာဖြစ်ပါတယ်။
ရိန်းဂျားစ်အသင်းဟာ ကစားသမား ၆ ဦးကို ထွက်ခွာခွင့်ပေးခဲ့ပြီး နွေရာသီမှာ ကစားသမားသစ်တွေ အားဖြည့်မှာ ဖြစ်သလို နည်းပြသစ်ကိုလည်း ခန့်အပ်နိုင်ဖို့ ပြင်ဆင်နေတာပါ။
ရိန်းဂျားစ်အသင်းဟာ လာမယ့်ရာသီမှာ ချန်ပီယံလိဂ်ပြိုင်ပွဲ ယှဉ်ပြိုင်ခွင့်ရရှိဖို့အတွက် ဒုတိယအဆင့် ခြေစစ်ပွဲ ကနေ စတင်ယှဉ်ပြိုင်ရမှာ ဖြစ်ပါတယ်။
Source: Dailymail
- By CNI
- Category: အားကစား
- Hits: 622
CNI Sport News
၂၀၂၅ ခုနှစ်၊ မေလ ၂၁
ပေါ်တူဂီအသင်းနည်းပြ မာတီနက်ဇ်ဟာ လာမယ့်နေးရှင်းလိဂ် နောက်ဆုံးအဆင့် ပွဲတွေအတွက် ကစားသမား၂၇ ဦးစာရင်း ထုတ်ပြန်ခဲ့တာမှာ အသင်းခေါင်းဆောင် ရော်နယ်ဒို ပါဝင်ခဲ့ပါတယ်။
ရော်နယ်ဒိုဟာ ဆော်ဒီပရိုလိဂ်ကလပ် အယ်လ်နာဆာအသင်း ကစားခဲ့တဲ့ နောက်ဆုံး ၃ ပွဲမှာ ပါဝင်ကစားထားခြင်း မရှိတဲ့အတွက် သူ့ရဲ့ကြံ့ခိုင်မှု အခြေအနေနဲ့ ပတ်သက်ပြီး စိုးရိမ်မှုတွေရှိနေတာပါ။
အသက် ၄၀ နှစ်အရွယ်ရှိ ရော်နယ်ဒိုဟာ အယ်လ်နာဆာအသင်းနဲ့ စာချုပ်သစ် ချုပ်ဆိုရခြင်းမရှိသေးဘဲ လက်ရှိ စာချုပ်ဟာ ဇွန် ၃၀ ရက်ဆိုရင် ကုန်ဆုံးပြီဖြစ်ပါတယ်။
ပြီးခဲ့တဲ့ရက်ပိုင်းက သတင်းတွေမှာ ရော်နယ်ဒိုဟာ ရာသီကုန်ရင် အယ်လ်နာဆာအသင်းကနေ ထွက်ခွာဖွယ် ရှိတယ်လို့ ဖော်ပြထားတာပါ။
ရော်နယ်ဒိုကို တွေ့ရစဉ်
ပေါ်တူဂီအသင်းနည်းပြ မာတီနက်ဇ်က ရော်နယ်ဒိုဟာ ဘာပြဿနာမှ မရှိဘဲ ဒီပွဲတွေမှာ ပါဝင်ကစားနိုင်မယ်လို့ ပြောထားပါတယ်။
ပေါ်တူဂီဘောလုံးအဖွဲ့ချုပ်ဟာ နေးရှင်းလိဂ်ပြိုင်ပွဲ အပြီးမှာ မော်ရင်ဟိုကို နည်းပြသစ်အဖြစ် အစားထိုးဖွယ် ရှိနေတယ်လို့ သတင်းတွေ ထွက်နေပေမယ့် မာတီနက်ဇ်ကတော့ သူဟာ ၂၀၂၆ ကမ္ဘာ့ဖလားပြိုင်ပွဲအပေါ် အပြည့်အဝ အာရုံစိုက်ထားတယ်လို့ ပြောခဲ့တာပါ။
ပေါ်တူဂီအသင်းဟာ ပေါ်တိုအသင်းရဲ့ ဆယ်ကျော်သက် တိုက်စစ်မှူး မိုရာကို အသင်းကြီး လူစာရင်းထဲ ပထမဆုံး အကြိမ် ရွေးချယ်ခဲ့ပါတယ်။
ဒါအပြင် ပေါ်တူဂီအသင်းဟာ အေစီမီလန်နဲ့ ဘိုင်ယန်မြူးနစ်အသင်းတွေမှာ ပွဲကစားချိန်နည်းနေတဲ့ ဂျာအိုဖီးလစ်နဲ့ ပယ်လ်ဟင်ညာတို့ကိုလည်း လူစာရင်းထဲ ရွေးချယ်ခဲ့တာပါ။
ပေါ်တူဂီအသင်းနည်းပြ မာတီနက်ဇ်က သူတို့တွေဟာ အသင်းနေးရှင်းလိဂ် နောက်ဆုံးအဆင့်ကို ရောက်ရှိခဲ့တာမှာ အရေးပါတဲ့ ကစားသမားတွေ ဖြစ်ခဲ့တယ်လို့ ပြောခဲ့ပါတယ်။
ပေါ်တူဂီအသင်း လူစာရင်းထဲမှာ ချန်ပီယံလိဂ် ဗိုလ်လုပွဲ ရောက်ရှိနေတဲ့ PSG အသင်းက နူနိုမန်ဒက်စ်၊ ဗီတင်ညာ၊ ဂွန်ကာလိုရာမို့စ်နဲ့ ဂျာအိုနေးဗက်စ်တို့လည်း ပါဝင်နေတာပါ။
ပေါ်တူဂီအသင်းဟာ ဇွန်လ ၄ ရက်မှာ နေးရှင်းလိဂ် ဆီမီးဖိုင်နယ်ပွဲစဉ်အဖြစ် ဂျာမနီအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: ESPN
- By CNI
- Category: အားကစား
- Hits: 524
CNI Sport News
၂၀၂၅ ခုနှစ်၊ မေလ ၂၁
မန်စီးတီးအသင်းဟာ အသင်းကစားသမားဘဝ နောက်ဆုံးအိမ်ကွင်းပွဲစဉ်ကို ပါဝင်ကစားခဲ့ပြီး ရာသီကုန်မှာ ထွက်ခွာမယ့် ကွင်းလယ်လူ ဒီဘရိုင်းရဲ့ ရုပ်တုကို အီးတီဟတ်ကွင်းအပြင်ဘက်မှာ ထားရှိမယ်လို့ ကြေညာခဲ့ ပါတယ်။
ဒီဘရိုင်းဟာ မန်စီးတီးအသင်းက ဘုန်းမောက်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ မန်ချက်စတာကလပ် ကစားသမားဘဝ နောက်ဆုံးအိမ်ကွင်းပွဲစဉ်ကို ပါဝင်ကစားခဲ့တာပါ။
မန်စီးတီးအသင်းဟာ ဒီဘရိုင်းကို အိမ်ကွင်းမှာ နှုတ်ဆက်မှုပြုလုပ်ခဲ့ပြီး ကွန်ပနီ၊ အဂွေရို၊ စတာလင် အပါအဝင် အသင်းဖော်ဟောင်းတွေက ဗွီဒီယိုကနေတဆင့် ပါဝင်ခဲ့ကြပါတယ်။
မန်စီးတီးအသင်းနည်းပြ ဂွာဒီယိုလာဟာ ဒီဘရိုင်းကို နှုတ်ဆက်မှု ပြုလုပ်နေချိန်မှာ ငိုကြွေးနေခဲ့တာပါ။
၂၀၁၅ ခုနှစ်က ဝုလ်ဖ်ဘတ်အသင်းကနေ ရောက်ရှိလာခဲ့တဲ့ ဒီဘရိုင်းဟာ မန်စီးတီးအသင်းမှာ ဆယ်စုနှစ်တစ်ခုကြာ ကစားခဲ့ပြီး ပရီးမီးယားလိဂ်ဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလားပေါင်း ၁၆ ခု ရယူနိုင် ခဲ့ပါတယ်။
ဒီဘရိုင်းကို တွေ့ရစဉ်
ဒီဘရိုင်းဟာ ပြီးခဲ့တဲ့နှစ်တွေအတွင်း ဒဏ်ရာတွေနဲ့ ရုန်းကန်ခဲ့ရတာကြောင့် မန်စီးတီးအသင်းက သူ့ကိုစာချုပ်သစ် မကမ်းလှမ်းဘဲ ထွက်ခွာခွင့် ပေးခဲ့တာပါ။
အသက် ၃၃ နှစ်အရွယ်ရှိ ဒီဘရိုင်းဟာ မန်စီးတီးအသင်းအတွက် ၄၂၁ ပွဲ ကစားထားပြီး ၁၀၈ ဂိုး သွင်းယူ ထားပါတယ်။
ဒီဘရိုင်းက “အနည်းငယ်တော့ ထူးဆန်းသလို ခံစားရပါတယ်။ ကျနော့်မိသားစုနဲ့ ကျနော့်ကို အားပေးဖို့ အားကစားကွင်း အပြည့်နီးပါးရှိတာက အရာအားလုံးကို ပြောနေတာပါ။ ကျနော့်ရဲ့ရုပ်တုကို ထားရှိမယ်ဆိုတာက ကျနော်ဟာ ဒီကလပ်အသင်းမှာ အမြဲတမ်းရှိနေမယ်ကို ဆိုလိုတာ”လို့ ပြောခဲ့ပါတယ်။
ဒီပွဲမှာ ဒူးအရွတ်ဒဏ်ရာကြောင့် ပြီးခဲ့တဲ့နှစ် စက်တင်ဘာကတည်းက အနားယူနေခဲ့ရတဲ့ ကွင်းလယ်လူ ရိုဒရီဟာ ၈ လအကြာမှာ သူ့ရဲ့ပထမဆုံးပွဲစဉ်အဖြစ် လူစားလဲ ဝင်ရောက်ကစားသွားခဲ့တာပါ။
မန်စီးတီးအသင်းဟာ ဘုန်းမောက်အသင်းကို အနိုင်ရရှိခဲ့တာကြောင့် ပရီးမီးယားလိ ဂ်အမှတ်ပေးဇယား အဆင့် ၃ နေရာကို တက်နိုင်ခဲ့ပြီး လာမယ့်ရာသီ ချန်ပီယံလိဂ်ဝင်ခွင့်ရရှိဖို့ နီးစပ်သွားခဲ့ပါတယ်။
မန်စီးတီးအသင်းဟာ ဒီရာသီ ပရီးမီးယားလိဂ် နောက်ဆုံးပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: ESPN
- By CNI
- Category: အားကစား
- Hits: 566
CNI Sport News
၂၀၂၅ ခုနှစ်၊ မေလ ၂၁
ယူနိုက်တက်အသင်းနည်းပြ အာမိုရင်ဟာ စပါးအသင်းနဲ့ ယှဉ်ပြိုင်ရမယ့် ယူရိုပါလိဂ် ဗိုလ်လုပွဲ မတိုင်မီမှာ ဒီဆုဖလားကို ရယူတာက ကြီးမားတဲ့ အရာမဟုတ်ဘူးလို့ ပြောခဲ့ပါတယ်။
အာမိုရင်က “ပတ်ဝန်းကျင်က လုံးဝကွဲပြားခြားနားနေတာကို ခင်ဗျားတို့ မြင်တွေ့ရမှာပါ။ ကျနော်ဟာ အသင်း အတွက် အရေးကြီးဆုံး အရာမဟုတ်ဘူးလို့ ပြောတာက ကျနော်တကယ် ပြောနေတာပါ။ ယူနိုက်တက်အသင်းဟာ ယူရိုပါလိဂ်ဖလား ရယူနိုင်ခဲ့ရင် ဒါက ကြီးမားတဲ့အရာမဟုတ်ပါဘူး။ ပရီးမီးယားလိဂ်နဲ့ ချန်ပီယံလိဂ်ကို သွားဖို့လို အပ်ပြီး ကျနော်တို့ဟာ ဒီပြိုင်ပွဲတွေနဲ့ အဝေးကြီးမှာ ရှိနေပါတယ်။ ဒါက ကျနော့်ရဲ့ခံစားချက်ပါ။ ဥရောပဖလားကို ရယူနိုင်ခဲ့ရင်တောင် မလုံလောက်ဘူးဆိုတာ ကျနော်တစ်ချိန်လုံး ခံစားနေရတယ်”လို့ ပြောခဲ့တာပါ။
ယူနိုက်တက်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ရလဒ်တွေ အလွန်ဆိုးရွားနေပေမယ့် ဥရောပရဲ့ ဒုတိတတန်းပြိုင်ပွဲဖြစ်တဲ့ ယူရိုပါလိဂ်ဗိုလ်လုပွဲကို တက်ရောက်နိုင်ခဲ့တာ ဖြစ်ပါတယ်။
ယူရိုပါလိဂ်ပြိုင်ပွဲမှာ ဗိုလ်စွဲခဲ့ရင် လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ခွင့်ရမှာဖြစ်သလို အပြောင်းအရွှေ့ ဈေးကွက်အတွင်း လှုပ်ရှားမှုတွေကလည်း ပိုပြီးလွယ်ကူစေနိုင်တာပါ။
ယူနိုက်တက်အသင်း ကစားသမားတွေကိုတွေ့ရစဉ်
ယူနိုက်တက်အသင်းနည်းပြ အာမိုရင်ဟာ ယူရိုပါလိဂ်ဖလားဟာ အသင်းရဲ့ ဒီရာသီကို ကယ်တင်နိုင်မှာ မဟုတ်ဘူးလို့ အကြိမ်ကြိမ် ပြောနေခဲ့တာ ဖြစ်ပါတယ်။
အခုလည်း အာမိုရင်ဟာ ယူနိုက်တက်အသင်းအတွက် ပိုပြီးကြီးမားတဲ့ ပစ်မှတ်တွေကို ထားရှိကြောင်း ပြောခဲ့ တာပါ။
အာမိုရင်ဟာ ယူနိုက်တက်အသင်းရဲ့ ပရီးမီးယားလိဂ် ရလဒ်ဆိုးတွေကြောင့် ဖိအားအချို့ ရှိနေပေမယ့် လာမယ့် ရာသီအသင်းကို ဆက်ပြီးကိုင်တွယ်ဖို့ အသင်းအကြီးအကဲတွေရဲ့ ထောက်ခံမှုကို ရရှိထားတာဖြစ်ပါတယ်။
ဒဏ်ရာကြောင့် အသင်းရဲ့ပွဲစဉ်အချို့ကို လွဲချော်ခဲ့တဲ့ တိုက်စစ်မှူး ဇက်ခ်ဇီ၊ နောက်ခံလူ ဒါလော့နဲ့ ယိုရိုတို့ဟာ ယူရိုပါလိဂ်ဗိုလ်လုပွဲအတွက် ယူနိုက်တက်အသင်းရဲ့ လေကျင့်ခန်းအစီအစဉ်မှာ ပြန်ပါဝင်ခဲ့ကြတာပါ။
ယူနိုက်တက်နဲ့ စပါးအသင်းတို့ရဲ့ ယူရိုပါလိဂ်ဗိုလ်လုပွဲကို မေလ ၂၂ ရက် မနက်ပိုင်း ဘီလ်ဘာအိုအသင်း အိမ်ကွင်းမှာ ကျင်းပသွားမှာ ဖြစ်ပါတယ်။
Source: Dailymail
Page 71 of 432
Connect with us
