CNI Sport News

၂၀၂၄ ခုနှစ်၊ ဧပြီ ၂၃

ကိုဗင်ထရီအသင်းကို အနိုင်ရခဲ့တဲ့ FA ဖလားဆီမီးဖိုင်နယ်ပွဲစဉ်အပြီးမှာ နည်းပြ အဲရစ်တန်ဟတ်အပေါ် ဖိအား တွေပိုပြီးတိုးလာခဲ့ပေမယ့် ယူနိုက်တက်အသင်းကတော့ ရာသီမကုန်ခင်အထိ နည်းပြကိုထုတ်ပယ်ဖို့ မရှိဘူးလို့ ဗြိတိန်မီဒီယာတွေက ဖော်ပြထားပါတယ်။

ယူနိုက်တက်အသင်းဟာ ကိုဗင်ထရီအသင်းကို ပင်နယ်တီအဆုံးအဖြတ်နဲ့ အနိုင်ရပြီး FA ဖလားဗိုလ်လုပွဲကို ၂ နှစ်ဆက်တိုက်တက်နိုင်ခဲ့ပေမယ့် အသင်းရဲ့ ဆိုးရွားတဲ့ ကစားပုံတွေကြောင့် နည်းပြ အဲရစ်တန်ဟတ်ကို ထုတ်ပယ် ဖို့ ပရိသတ်တွေက တောင်းဆိုမှုတွေရှိလာခဲ့တာပါ။ ယူနိုက်တက်အသင်းဟာ ဒီရာသီ ပရီးမီးယားလိဂ် ပြိုင်ပွဲမှာ အဆင့် ၄ အတွင်းဝင်ရောက်နိုင်ဖို့ မရှိတော့တာကြောင့် နည်းပြ အဲရစ်တန်ဟတ်ဟာ ထုတ်ပယ်ခံရမယ့် ဖိအား ဒဏ်တွေကို ပိုပြီးခံစားနေရတာဖြစ်ပါတယ်။

ဒါပေမယ့် The Guardian က ယူနိုက်တက်အသင်းဟာ မန်စီးတီးအသင်းနဲ့ ကစားမယ့် FA ဖလားဗိုလ်လုပွဲ မတိုင်ခင်အထိ နည်းပြ အဲရစ်တန်ဟတ်ကို ထုတ်ပယ်ဖို့ အစီအစဉ်မရှိဘူးလို့ ဖော်ပြခဲ့တာပါ။ ယူနိုက်တက် အသင်းပူးတွဲပိုင်ရှင် ဆာဂျင်ရက်ကလစ်ဖ်နဲ့ အသင်းအကြီးအကဲတို့ဟာ ဒီရာသီမှာ ကစားသမား အများအပြား ဒဏ်ရာရရှိနေတာကြောင့် အသင်းရလဒ်မကောင်းဖြစ်နေတာကို နားလည်လက်ခံထားတာ ဖြစ်ပါတယ်။

အဲရစ်တန်ဟတ်နဲ့ ယူနိုက်တက်အသင်းတို့ဟာ ၃ နှစ်စာချုပ်ချုပ်ဆိုထားတာကြောင့် ဒီနွေရာသီမှာ သူ့ရဲ့ စာချုပ် ဟာ နောက်ဆုံးနှစ်ထဲကို ရောက်ရှိလာပြီဖြစ်ပါတယ်။ လက်ရှိအချိန်မှာ ယူနိုက်တက်အသင်းနည်းပြသစ်ဖြစ်လာဖို့ အင်္ဂလန်အသင်းနည်းပြ ဆောက်ဂိတ်၊ဘိုင်ယန်မြူးနစ်အသင်းနည်းပြ တူချယ်လ်နဲ့ ရီးရယ်လ်အသင်း နည်းပြ ဟောင်း ဇီဒန်းတို့ သတင်းထွက်ပေါ်နေတာဖြစ်ပါတယ်။ တူချယ်လ်ဟာ ဒီရာသီအကုန်မှာ ဘိုင်ယန်မြူးနစ် အသင်း ကနေ ထွက်ခွာတော့မှာဖြစ်လို့ ယူနိုက်တက်အသင်းနည်းပြသစ် ဖြစ်လာဖို့ ပိုပြီးရေပန်းစားနေတာပါ။

ချယ်လ်ဆီးအသင်းကို ကိုင်တွယ်ခဲ့ဖူးတဲ့ တူချယ်လ်ဟာ အခြားထိပ်သီးကလပ်အချို့ရဲ့ စိတ်ဝင်စားမှုကို ခံနေရ ပေမယ့် ပရီးမီးယားလိဂ်ကလပ်အသင်းတွေကို ကိုင်တွယ်ချင်နေတာဖြစ်ပါတယ်။

Source:Metro

CNI Sport News

၂၀၂၄ ခုနှစ်၊ ဧပြီ ၂၃

ဘာစီလိုနာအသင်းဥက္ကဋ္ဌ လာပေါ်တာက ခွင့်ပြုခြင်းမခံခဲ့ရတဲ့ ယာမဲလ်ရဲ့သွင်းဂိုးမှာ VAR အမှားလုပ်ခဲ့ကြောင်း ပြသနိုင်ခဲ့ရင် ရီးရယ်လ်အသင်းနဲ့ပွဲစဉ်ကို ပြန်ကစားသင့်တယ်လို့ ပြောလိုက်ပါတယ်။

လာပေါ်တာက “ဒီပွဲမှာ ပြောစရာတွေ အများကြီးရှိခဲ့ပေမယ့် အားလုံးထဲမှာ အရေးကြီးပြီး ပွဲရဲ့ရလဒ်ကို အပြောင်းအလဲ ပေးနိုင်တဲ့တစ်ခုရှိပါတယ်။ ဒါက ယာမဲလ်ရဲ့ သွင်းဂိုးကို ရည်ညွှန်းပြီး ပြောနေတာပါ။ ဒါကြောင့် ဂိုးအဖြစ် ခွင့်မပြုခဲ့တဲ့ ယာမဲလ်ရဲ့ဂိုးနဲ့ပတ်သက်ပြီး အသံဖိုင်၊ ရုပ်ပုံတွေအားလုံးကို ကျနော်တို့တောင်းဆို ထားပါ တယ်။ ဒါက တရားဝင်သွင်းဂိုး ဖြစ်တယ်ဆိုတာကို အတည်ပြုနိုင်ခဲ့ရင် VAR အမှားကြောင့် ဥရောပမှာဖြစ်ခဲ့တဲ့ အခြားပွဲစဉ်တစ်ပွဲလိုပဲ ပွဲကိုပြန်ကစားဖို့ ကျနော်တို့တောင်းဆိုသွားမယ်”လို့ ပြောပါတယ်။

ရီးရယ်လ်အသင်းက ဘာစီလိုနာအသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ပွဲစဉ်မှာ ဘာစီလိုနာအသင်း ကစားသမား ယာမဲလ်ရဲ့ သွင်းဂိုးကို ရီးရယ်လ်အသင်းဂိုးသမား လူနင်က ဂိုးစည်းပေါ်ကနေ ကာကွယ်သွားခဲ့တာ ဖြစ်ပါတယ်။ 

လာလီဂါပြိုင်ပွဲမှာ ဂိုးလိုင်းနည်းပညာ မရှိတဲ့အတွက် ဂိုးဝင်၊မဝင်ကို ချက်ခြင်းဆုံးဖြတ်လို့ မရတာကြောင့် VAR မော်နီတာကို သွားရောက်ကြည့်ရှုပြီး ဆုံးဖြတ်ခဲ့ရတာပါ။ 

ဘာစီလိုနာဘက်က သွင်းလိုက်တဲ့ဂိုး အငြင်းပွားနေစဉ်

ကွင်းလယ်ဒိုင်လူကြီးက VAR ကို ကြည့်ရှုစစ်ဆေးအပြီးမှာ ဘောလုံးဟာ ဂိုးစည်းမကျော်ဘူးလို့ ဆုံးဖြတ်ခဲ့တာ ကြောင့် ဘာစီလိုနာအသင်းဟာ ဒေါသထွက်နေခဲ့တာ ဖြစ်ပါတယ်။

ဘာစီလိုနာအသင်းကတော့ သေချာပေါက် သူတို့သွင်းဂိုး ရရှိသင့်တယ်လို့ ယူဆခဲ့ပြီး နည်းပြ ဇာဗီနဲ့ ဂိုးသမား တာစတီဂျန်တို့က လာလီဂါပြိုင်ပွဲမှာ ဂိုးလိုင်းနည်းပညာမရှိတာက ရှက်ဖို့ကောင်းတယ်လို့ ပွဲအပြီးမှာ ဝေဖန်ခဲ့ တာပါ။ 

အခုဆိုရင် ဘာစီလိုနာအသင်း အကြီးအကဲ လာပေါ်တာကပါ ဒီအဖြစ်အပျက်မှာ VAR ဘက်က အမှားလုပ်ခဲ့ ကြောင်း တွေ့ခဲ့ရင် ဒီပွဲကို ပြန်ကစားဖို့အထိပါ ပြောလာခဲ့တာ ဖြစ်ပါတယ်။ 

ဘာစီလိုနာအသင်းဟာ ဒီရှုံးပွဲကြောင့် စပိန်လာလီဂါပြိုင်ပွဲမှာ ထိပ်ဆုံးနေရာက ရီးရယ်လ်အသင်းနဲ့ ၁၁ မှတ်အထိ ကွာဟသွားခဲ့တာပါ။

အဲဒါကြောင့် ရီးရယ်လ်အသင်းဟာ ဒီရာသီ လာလီဂါ အမှတ်ပေးဖလားကို ရယူနိုင်ဖို့ နီးစပ်ခဲ့ပြီး ဘာစီလိုနာအသင်း ကတော့ ဆုဖလားလက်မဲ့ ရာသီကို ဖြတ်သန်းရဖို့ ရှိနေတာဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဧပြီ ၂၃

အင်တာမီလန်အသင်းဟာ မြို့ခံပြိုင်ဘက် အေစီမီလန်အသင်းကို ၂ ဂိုး-၁ ဂိုးနဲ့ အနိုင်ယူပြီး စီးရီးအေဖလားကို အကြိမ် ၂၀ မြောက် ရရှိသွားခဲ့ပါတယ်။

ဒီရာသီ စီးရီးအေပြိုင်ပွဲပြီးဆုံးဖို့ ၅ ပွဲ ကျန်ရှိနေသေးပေမယ့် အင်တာမီလန်အသင်းဟာ အဆင့် ၂ နေရာက အေစီမီလန်အသင်းကို ၁၇ မှတ်အထိ ဖြတ်ထားနိုင်ခဲ့တာကြောင့် ရာသီမကုန်ခင်မှာ ချန်ပီယံဆုကို ရယူနိုင်ခဲ့ တာပါ။ 

ဒီပွဲမှာ အင်တာမီလန် အသင်းအတွက် ဂိုးတွေကို အေချာဘီနဲ့ သူရမ်တို့က သွင်းယူခဲ့တာဖြစ်ပြီး အေစီမီလန် အသင်းအတွက် ချေပဂိုးကို တိုမိုရီက သွင်းယူခဲ့တာ ဖြစ်ပါတယ်။ 

မီလန်ဒါဘီပွဲစဉ် ဖြစ်တာကြောင့် ပွဲကြမ်းတစ်ပွဲဖြစ်ခဲ့ပြီး နာကျင်အချိန်ပိုမှာ အေစီမီလန်အသင်းက ဟာနန်ဒက်ဇ်နဲ့ ကာလာဘရီယာ၊ အင်တာမီလန်အသင်းက ဒွန်ဖရိုင်းစ်တို့ တိုက်ရိုက်အနီကတ်နဲ့ ထုတ်ပယ်ခံခဲ့ရတာပါ။

အင်တာမီလန်အသင်းဟာ စီးရီးအေချန်ပီယံဆုကို အကြိမ် ၂၀ မြောက် ရရှိခဲ့တာကြောင့် လာမယ့်ရာသီကစပြီး ရင်ဘတ်တံဆိပ်မှာ ကြယ်တစ်လုံး ထပ်တိုး ဝတ်ဆင်လာတော့မှာ ဖြစ်ပါတယ်။ 

အင်တာမီလန်အသင်း စီးရီးအေဖလားရရှိလို့ အောင်ပွဲခံနေကြစဉ်

အင်တာမီလန်အသင်းဟာ ပြီးခဲ့တဲ့နှစ် စက်တင်ဘာက ဆက်ဆူအိုလိုအသင်းကို အရေးနိမ့်ပြီးနောက်ပိုင်း စီးရီးအေ ပြိုင်ပွဲမှာ ၂၇ ပွဲဆက်တိုက် ရှုံးပွဲမရှိအောင် ကစားနိုင်ခဲ့တာပါ။ 

စီးရီးအေပွဲစဉ် ၃၃ ပွဲ ကစားအပြီးမှာ အင်တာမီလန်အသင်းဟာ ၇၉ ဂိုး သွင်းယူထားပြီး ပေးဂိုး ၁၈ ဂိုးသာ ပေးခဲ့ရတာ ဖြစ်ပါတယ်။

အင်တာမီလန် အသင်းခေါင်းဆောင် လောတရိုမာတီနက်ဇ်က “ကျနော်တို့ဟာ အလုပ်ကို ကြိုးကြိုးစားစား လုပ်ခဲ့တာကြောင့် ဒီလိုအောင်ပွဲခံမှုမျိုးနဲ့ ထိုက်တန်ပါတယ်။ ဒါက အံ့သြစရာကောင်းပေမယ့် ကျနော်တို့ ဆက်သွားရမှာပါ။ ကျနော်တို့ဟာ ဆုဖလားတွေ အများကြီး ရယူထားနိုင်ခဲ့ပေမယ့် နောက်ထပ် အများကြီး ရယူချင်ပါတယ် “လို့ ပြောပါတယ်။

လောတရိုမာတီနက်ဇ်ဟာ ဒီရာသီ စီးရီးအေပြိုင်ပွဲမှာ အင်တာမီလန် အသင်းအတွက် ၂၃ ဂိုး သွင်းယူထားပြီး ဂိုးသွင်း အများဆုံး ကစားသမားအဖြစ် ဦးဆောင်နေတာ ဖြစ်ပါတယ်။

စီးရီးအေပြိုင်ပွဲမှာ ဂျူဗင်တပ်စ်အသင်းက ချန်ပီယံဆုကို ၃၆ ကြိမ် ရရှိထားပြီး အအောင်မြင်ဆုံး အသင်းအဖြစ် ရပ်တည်နေကာ အင်တာမီလန်အသင်းက အကြိမ် ၂၀ နဲ့ ဒုတိယ၊ အေစီမီလန်အသင်းက ၁၉ ကြိမ်နဲ့ တတိယ နေရာမှာ ရပ်တည်နေတာပါ။

အင်တာမီလန်အသင်းဟာ ဒီတစ်ပတ် စီးရီးအေပွဲစဉ်အဖြစ် တိုရီနိုအသင်းနဲ့ ယှဉ်ပြိုင်ရမှာဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဧပြီ ၂၂

ရီးရယ်လ်အသင်းနည်းပြ အန်ဆယ်လော့တီက ဘာစီလိုနာအသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ပွဲစဉ်အပြီးမှာ အသင်းအတွက် မမေ့နိုင်တဲ့ ရက်သတ္တပတ်လို့ ပြောခဲ့ပါတယ်။

အန်ဆယ်လော့တီက “ကျနော်တို့ဟာ အခြေအနေတွေကို ကောင်းမွန်စွာ ကိုင်တွယ်နိုင်ခဲ့ပြီး နှစ်ကြိမ်တိုင်တိုင် အနောက်ကနေ လိုက်ကစားခဲ့ရပါတယ်။ ဒါပေမယ့် ကျနော်တို့ လုပ်နိုင်ခဲ့ပြီး အသင်းအတွက် မမေ့နိုင်တဲ့ ရက်သတ္တပတ် ဖြစ်ခဲ့ပါတယ်။ ကျနော်တို့ဟာ နောက်ဆုံး ၂ ပွဲကို အကောင်းဆုံး လုပ်နိုင်ခဲ့ပြီး အခုဆိုရင် လာလီဂါ ဖလားရဖို့ နီးစပ်လာပါပြီ”လို့ ပြောပါတယ်။

ရီးရယ်လ်အသင်းဟာ ဒီရာသီ ဘာစီလိုနာအသင်းနဲ့ ကစားခဲ့တဲ့ ပွဲစဉ် ၃ ပွဲစလုံး နိုင်ပွဲရယူနိုင်ခဲ့တာ ဖြစ်ပါတယ်။ 

ရီးရယ်လ်အသင်းဟာ ပြီးခဲ့တဲ့ ကြားရက်က မန်စီးတီးအသင်းကို ချန်ပီယံလိဂ် ကွာတားဖိုင်နယ် ဒုတိယအကျော့ ပွဲစဉ်မှာ ပင်နယ်တီ အဆုံးအဖြတ်နဲ့ အနိုင်ရပြီး ဆီမီးဖိုင်နယ် တက်နိုင်ခဲ့တာပါ။ 

 ရီးရယ်လ်နဲ့ ဘာစီလိုနာ ယှဉ်ပြိုင်နေစဉ်

အခု ဘာစီလိုနာ အသင်းကိုပါ ထပ်ပြီး အနိုင်ယူခဲ့တာကြောင့် ရီးရယ်လ်အသင်းအတွက် မမေ့နိုင်တဲ့ ရက်သတ္တပတ် ဖြစ်ခဲ့ရပါတယ်။

ရီးရယ်လ်အသင်းဟာ ဘာစီလိုနာအသင်းကို အနိုင်ရခဲ့တာကြောင့် ဒီရာသီ စပိန်လာလီဂါ ပွဲစဉ်ပြီးဆုံးဖို့ ၆ ပွဲသာ ကျန်ရှိတော့ချိန်မှာ ဘာစီလိုနာအသင်းကို ရမှတ် ၁၁ မှတ်အထိဖြတ်ပြီး အမှတ်ပေးဇယားကို ဦးဆောင်နေတာပါ။ 

အဲဒါကြောင့် ရီးရယ်လ်အသင်းဟာ ဒီရာသီ စပိန်လာလီဂါ ဆုဖလားကို ရယူဖို့ နီးစပ်နေပြီဖြစ်ပါတယ်။

ရီးရယ်လ်အသင်းဟာ ဒီတစ်ပတ် လာလီဂါပွဲစဉ်အဖြစ် ဆိုစီဒက်အသင်းနဲ့ ယှဉ်ပြိုင်ရမှာဖြစ်ပြီး ဘာစီလိုနာ အသင်းက ဗလင်စီယာအသင်းနဲ့ ယှဉ်ပြိုင်ရမှာဖြစ်ပါတယ်။

Source: besoccer

CNI Sport News

၂၀၂၄ ခုနှစ်၊ ဧပြီ ၂၂

ဂီတာဖေးအသင်းတိုက်စစ်မှူး ဂရင်းဝုဒ်ဟာ လာလီဂါ ပရိသတ်တွေရဲ့ ပစ်မှတ်ထားခြင်းကို ထပ်မံခံခဲ့ရပြီး ဆိုစီဒက် အသင်း ပရိသတ်တွေက သူ့ကို မုဒိမ်းကောင်လို့ တံဆိပ်ကပ်ပြီး ကိုယ့်ကိုယ်ကို သတ်သေဖို့ ပြောခဲ့တာဖြစ်ပါတယ်။

ယူနိုက်တက်အသင်းကနေ အငှားနဲ လာရောက်ကစားနေတဲ့ ဂရင်းဝုဒ်ဟာ ဒီရာသီမှာ ဒီလိုပြောဆိုမှုတွေကို အကြိမ်ကြိမ် ခံနေရတာဖြစ်ပြီး ဆိုစီဒက်နဲ့ ဂီတာဖေးအသင်းတို့ ၁ ဂိုးစီ သရေကျတဲ့ပွဲမှာ ပြိုင်ဘက်ပရိသတ်တွေရဲ့ အော်ဟစ်မှုတွေကို ခံခဲ့ရတာပါ။ 

ဒီပွဲမှာ ဂရင်းဝုဒ်ဟာ ဂီတာဖေးအသင်း သွင်းယူခဲ့တဲ့ဂိုးကို ဖန်တီးပေးခဲ့တာ ဖြစ်ပါတယ်။

ဂီတာဖေးအသင်းနည်းပြ ဘော်ဒါလက်စ်ကတော့ ဂရင်းဝုဒ်အပေါ် ပြုမူပုံတွေဟာ လက်ခံနိုင်စရာ မရှိတဲ့အတွက် အရေးယူမှုပြုလုပ်ဖို့ ပြောခဲ့ပါတယ်။

ဂရင်းဝုဒ်ကို တွေ့ရစဉ်

ဘော်ဒါလက်စ်က “ကျနော့်မှာ ပြောစရာစကားတွေ အများကြီးမရှိပါဘူး။ ဒါက လက်ခံနိုင်စရာ မရှိသလို ကျနော်တို့ ကြုံတွေ့ခဲ့ရတဲ့ ပထမဆုံးအကြိမ်လည်း မဟုတ်ပါဘူး။ ဒါကို အရေးယူမှု ပြုလုပ်ရမှာပါ။ ဆီ‌ဗီလာနဲ့ ပွဲကဖြစ်ခဲ့တဲ့အတိုင်းပါပဲ”လို့ ပြောခဲ့တာပါ။

ဂရင်းဝုဒ်ဟာ မုဒိမ်းမှု အပါအဝင် စွဲချက်တွေအားလုံးကနေ လွတ်မြောက်ပြီးနောက် ပြီးခဲ့တဲ့ နွေရာသီက ယူနိုက်တက်အသင်းကနေ ဂီတာဖေးအသင်းထံ ရာသီအကုန်ထိ အငှားနဲ့ ပြောင်းရွှေ့ခဲ့တာ ဖြစ်ပါတယ်။ 

ဂရင်းဝုဒ်ဟာ ဒီရာသီမှာ ဂီတာဖေးအသင်းအတွက် ပွဲပေါင်း ၃၀ ပါဝင်ကစားထားပြီး ၈ ဂိုးသွင်းယူကာ ၅ ဂိုး ဖန်တီးထားတာပါ။

ဂီတာဖေးအသင်းဟာ အငှားစာချုပ် ကုန်ဆုံးမယ့် ဒီရာသီအကုန်မှာ ဂရင်းဝုဒ်ကို အပြီးသတ်ခေါ်ဖို့ စိတ်ဝင် စားနေတာ ဖြစ်ပါတယ်။ 

Source: Dailymail

CNI Sport News

၂၀၂၄ ခုနှစ်၊ ဧပြီ ၂၂

လီဗာပူးလ်အသင်းနည်းပြ ကလော့ပ်က ဖူလ်ဟမ်အသင်းကို အနိုင်ရပြီးနောက် သူတို့ဟာ ပရီးမီးယားလိဂ် ချန်ပီယံဆုအတွက် ပြိုင်ပွဲမှာ ဆက်ရှိချင်တယ်လို့ ပြောကာ အာဆင်နယ်နဲ့ မန်စီးတီးအသင်းကို သတိပေး လိုက်ပါတယ်။

ကလော့ပ်က “ကျနော်တို့ ဒီပြိုင်ပွဲမှာ ဆက်ရှိချင်တယ်ဆိုတာ ရှင်းပါတယ်။ အာဆင်နယ်အသင်းဟာ မနေ့က အနိုင်ရခဲ့ပြီး မန်စီးတီးအသင်းဆိုရင် သူတို့လက်ထဲမှာရှိနေတဲ့ ပွဲကိုအနိုင်ယူပါလိမ့်မယ်။ ဒါကြောင့် ကျနော်တို့ လည်း ပွဲတွေကို အနိုင်ယူရမှာဖြစ်ပြီး ဒီလိုလုပ်နိုင်ဖို့ ကြိုးစားသွားရမှာပါ။ ကျနော်တို့ဟာ မိနစ် ၈၀ လုံး အလွန် ကောင်းမွန်တဲ့ပွဲကို ကစားနိုင်ခဲ့ပေမယ့် ပထမပိုင်းရဲ့ နောက်ဆုံး ၁၀ မိနစ်ကိုတော့ ကျနော်မကြိုက်ပါဘူး။ ဂိုး လည်း ပေးခဲ့ရပေမယ့် ဒုတိယပိုင်းကိုတော့ အလွန်နှစ်သက်ပါတယ်” လို့ BBC Match of the Day ကို ပြောပါ တယ်။

လီဗာပူးလ်အသင်းဟာ ဖူလ်ဟမ်အသင်းနဲ့ကစားခဲ့တဲ့ ပရီးမီးယားလိဂ်ပွဲစဉ်မှာ ၃ ဂိုး-၁ ဂိုးနဲ့ အနိုင်ရရှိခဲ့တာပါ။ 

လီဗာပူးလ်အသင်းအတွက် ဂိုးတွေကို အာနိုးလ်၊ ဂရာဗန်ဘာချ်နဲ့ ဂျိုတာတို့က သွင်းယူခဲ့ပြီး ဖူလ်ဟမ်အသင်း အတွက် ချေပဂိုးကို ကာစတာနီက သွင်းယူခဲ့တာ ဖြစ်ပါတယ်။ 

လီဗာပူးလ်နဲ့ ဖူလ်ဟမ်အသင်း ယှဉ်ပြိုင်နေစဉ်

လီဗာပူးလ်အသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ ပဲလေ့စ်အသင်းကို အရေးနိမ့်ခဲ့ပေမယ့် ဖူလ်ဟမ်အသင်းကို အနိုင်ရခဲ့တာကြောင့် ချန်ပီယံဆုအတွက်ပြိုင်ပွဲမှာ ဆက်ပြီးရှိနေခဲ့တာပါ။

အန်ဖီးလ်ကလပ်ဟာ ဒီနိုင်ပွဲကြောင့် ပရီးမီးယားလိဂ်အဆင့် ၁ နေရာက အာဆင်နယ်အသင်းနဲ့ ရမှတ်တူ ဂိုး ကွာခြားချက်ကြောင့် အဆင့် ၂ နေရာမှာ ရပ်တည်နေပြီး မန်စီးတီးအသင်းက တစ်ပွဲလျော့ ၁ မှတ်အကွာနဲ့ အဆင့် ၃ နေရာမှာ ရပ်တည်နေတာ ဖြစ်ပါတယ်။ 

လီဗာပူးလ်အသင်းဟာ ဖူလ်ဟမ်အသင်းနဲ့ပွဲစဉ်မှာ ဆာလက်၊ မက်အယ်လစ္စတာတို့ကို ပွဲထွက်လူစာရင်းမှာ အနား ပေးခဲ့ပြီး ဒုတိယပိုင်းရောက်မှသာ လူစားဝင်အဖြစ် အသုံးပြုခဲ့တာပါ။

ကလော့ပ်ကတော့ သူတို့ဟာ လာမယ့် ရက်တွေမှာလည်း ပရီးမီးယားလိဂ်ပွဲတွေ ကစားဖို့ရှိနေတာကြောင့် လူစာရင်း အပြောင်းအလဲ ပြုလုပ်ဖို့ လိုအပ်တယ်လို့ ပွဲအပြီးအင်တာဗျူးမှာ ပြောခဲ့ပါတယ်။

လီဗာပူးလ်အသင်းဟာ ဧပြီ ၂၅ ရက်မှာ ပရီးမီးယားလိဂ်ပွဲစဉ်အဖြစ် အဲဗာတန်အသင်းနဲ့ ယှဉ်ပြိုင်ရမှာဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဧပြီ ၂၂

ကိုဗင်ထရီအသင်းကို ပင်နယ်တီ အဆုံးအဖြတ်မှာ အနိုင်ရပြီး FA ဖလားဗိုလ်လုပွဲ တက်နိုင်ခဲ့ပြီးနောက် ယူနိုက်တက် အသင်းနည်းပြ အဲရစ်တန်ဟတ်က FA ဖလားဗိုလ်လုပွဲကို ၂ ကြိမ်ဆက် တက်နိုင်တာက အောင်မြင်မှုလို့ ပြောခဲ့ပါတယ်။

အဲရစ်တန်ဟတ်က “ခံစားချက်တွေ ရောထွေးနေတယ်ဆိုတာ ရှင်းပါတယ်။ ဒါပေမယ့် ၂ နှစ်အတွင်း FA ဖလား ဗိုလ်လုပွဲကို ၂ ကြိမ် တက်နိုင်တာက အောင်မြင်မှုပါပဲ။ ကျနော်တို့ဟာ ပွဲကိုထိန်းချုပ်နိုင်ခဲ့ပြီး ၃ ဂိုး- ဂိုးမရှိနဲ့ ဦးဆောင်ခဲ့တာကြောင့် အနိုင်ရသင့်ပါတယ်။ ကျနော်တို့ဟာ မိနစ် ၇၀ ကနေ ပွဲပြီးတဲ့အထိ အမှားတွေလုပ်ခဲ့ ကြပါတယ်။ ကျနော်တို့လုပ်ခဲ့တဲ့ အမှားတွေကို မြင်ပေမယ့် ဒါက ရှက်စရာတော့ မဟုတ်ပါဘူး။ ကျနော်တို့ အောင်မြင်မှုတွေ အများကြီးရယူချင်တယ်”လို့ ပြောပါတယ်။

FA ဖလားဆီမီးဖိုင်နယ် ပွဲစဉ်အဖြစ် ကစားခဲ့တဲ့ ယူနိုက်တက်အသင်းနဲ့ ကိုဗင်ထရီအသင်းတို့ပွဲစဉ်မှာ ယူနိုက်တက် အသင်းက ပင်နယ်တီ အဆုံးအဖြတ်မှာ အနိုင်ရပြီး ဗိုလ်လုပွဲတက်နိုင်ခဲ့တာ ဖြစ်ပါတယ်။

ဒီပွဲစဉ်မှာ ယူနိုက်တက်အသင်းဟာ ပွဲချိန်မိနစ် ၇၀ အထိ ကိုဗင်ထရီအသင်းကို ၃ ဂိုး- ဂိုးမရှိနဲ့ ဦးဆောင်နိုင် ခဲ့ပေမယ့် ဒီနောက်ပိုင်းမှာ ချေပဂိုးတွေ ဆက်တိုက် ခွင့်ပြုခဲ့ရတာကြောင့် ၃ ဂိုးစီသရေကျပြီး အချိန်ပို ဆက်လက် ယှဉ်ပြိုင်ခဲ့ရတာပါ။ 

အဲရစ်တန်ဟတ်ကို တွေ့ရစဉ်

အချိန်ပို နောက်ဆုံးမိနစ်မှာ ကိုဗင်ထရီအသင်း အနိုင်ဂိုးရခဲ့ပေမယ့် လူကျွံနေတာကြောင့် ပင်နယ်တီ အဆုံးအဖြတ် ခံယူခဲ့ရတာ ဖြစ်ပါတယ်။

ပင်နယ်တီ အဆုံးအဖြတ်မှာ ယူနိုက်တက်အသင်းက ၄ ဂိုး-၂ ဂိုးနဲ့ အနိုင်ရပြီး FA ဖလားဗိုလ်လုပွဲကို ၂ နှစ် ဆက်တိုက် တက်နိုင်ခဲ့တာပါ။

ယူနိုက်တက်အသင်း ခေါင်းဆောင် ဘရူနိုဖာနန်ဒက်စ်က သူတို့အနေနဲ့ အသင်းရဲ့ အဆင့်အတန်းအတွက် ဒီထက် ပိုကောင်းအောင် လုပ်ရမယ်လို့ ပွဲအပြီးမှာ ပြောခဲ့ပါတယ်။

ဘရူနိုဖာနန်ဒက်စ်က “FA ဖလားတစ်ခု ရခဲ့ရင်တောင် ကျနော်တို့အောင်မြင်မှာ မဟုတ်ပါဘူး။ ကလပ်ရဲ့ အဆင့်အတန်းက ကျနော်တို့ လုပ်ခဲ့တာထက် အများကြီး ပိုမြင့်ပါတယ်။ ကျနော်တို့ဟာ ပရီးမီးယားလိဂ်၊ ကာရာဘောင်းဖလားနဲ့ ဥရောပပြိုင်ပွဲတွေမှာ ဒီထက်ပိုပြီး ကောင်းအောင်လုပ်ရမှာပါ”လို့ ပြောပါတယ်။

FA ဖလားဗိုလ်လုပွဲအဖြစ် မန်စီးတီးအသင်းနဲ့ ယူနိုက်တက်အသင်းတို့ဟာ မေလ ၂၅ ရက် ဝင်ဘာလေကွင်းမှာ ယှဉ်ပြိုင်သွားမှာ ဖြစ်ပါတယ်။

Source: ESPN

CNI Sport News
၂၀၂၄ ခုနှစ်၊ ဧပြီ ၁၉

လီဗာပူးလ်အသင်းဟာ ယူရိုပါလိဂ်ကွာတားဖိုင်နယ် ဒုတိယအကျော့ပွဲစဉ်မှာ အတ္တလန်တာအသင်းကို ၁ ဂိုး-ဂိုးမရှိနဲ့ အနိုင်ရခဲ့ပေမယ့် ပထမအကျော့က ဂိုးပြတ် အရေးနိမ့်ခဲ့တာကြောင့် ပြိုင်ပွဲကနေ ထွက်ခွာခဲ့ရပြီဖြစ်ပါတယ်။

ဒီပွဲမှာ လီဗာပူးလ်အသင်းဟာ အတ္တလန်တာအသင်းကို တစ်ပွဲလုံးဖိကစားနိုင်ခဲ့ပြီး ပွဲချိန် ၇ မိနစ်မှာကတည်းက ဆာလက်က ပင်နယ်တီကနေ ဂိုးသွင်းယူနိုင်ခဲ့ပေမယ့် နောက်ထပ် သွင်းဂိုးတွေကိုတော့ ရယူနိုင်ခဲ့ခြင်းမရှိတာပါ။ 

ဒီနှစ်သင်းရဲ့ ပထမအကျော့ပွဲစဉ်မှာ အတ္တလန်တာအသင်းက ၃ ဂိုး- ဂိုးမရှိနဲ့ အနိုင်ရခဲ့တာကြောင့် နှစ်ကျော့ပေါင်း ရလဒ် ၃ ဂိုး-၁ ဂိုးနဲ့ အတ္တလန်တာအသင်း အနိုင်ရပြီး ယူရိုပါလိဂ် ဆီမီးဖိုင်နယ်ကို တက်နိုင်ခဲ့တာ ဖြစ်ပါတယ်။

လီဗာပူးလ်အသင်းဟာ ဒီရာသီအကုန်မှာ ထွက်ခွာမယ့် နည်းပြ ကလော့ပ်ကို ဆုဖလား ၄ လုံး ရယူပေးပြီး နှုတ်ဆက်ဖို့ ရည်မှန်းထားပေမယ့် ကာရာဘောင်းဖလား တစ်လုံးသာ ရယူထားနိုင်ခဲ့သလို ပရီးမီးယားလိဂ် ရယူဖို့လည်း သေချာမှုမရှိတာပါ။ 

ကလော့ပ်ဟာ လီဗာပူးလ်အသင်း နည်းပြဘဝမှာ ယူရိုပါလိဂ်ဖလားက လွဲပြီး ဆုဖလားအားလုံး ရယူပေးနိုင်ခဲ့တာ ဖြစ်ပါတယ်။

အတ္တလန်တာအသင်းအပြင် ယူရိုပါလိဂ်ဆီမီးဖိုင်နယ်ကို ရိုးမား၊ လေဗာကူဆင်နဲ့ မာဆေးလ်အသင်းတို့လည်း တက်နိုင်ခဲ့တာပါ။ 

အဲဒါကြောင့် ယူရိုပါလိဂ် ဆီမီးဖိုင်နယ် ပွဲစဉ်တွေအဖြစ် မာဆေးလ်နဲ့ အတ္တလန်တာ၊ ရိုးမားနဲ့လေဗာကူဆင် အသင်းတို့ လာမယ့် မေလထဲ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News
၂၀၂၄ ခုနှစ်၊ ဧပြီ ၁၇

ဧပြီ ၁၇ ရက် မနက်ပိုင်းက ကစားခဲ့တဲ့ ချန်ပီယံလိဂ် ကွာတားဖိုင်နယ် ဒုတိယအကျော့ ပွဲစဉ်တွေအပြီးမှာ ပီအက်စ်ဂျီနဲ့ ဒေါ့မွန်အသင်းတို့ ဆီမီးဖိုင်နယ်ကို တက်နိုင်ခဲ့ပါတယ်။

ပီအက်စ်ဂျီအသင်းနဲ့ ဘာစီလိုနာအသင်းတို့ပွဲမှာ ပီအက်စ်ဂျီအသင်းက ၄ ဂိုး-၁ ဂိုးနဲ့ အနိုင်ရရှိခဲ့တာပါ။ 

ဒီပွဲမှာ ရာဖင်ဟာက ဘာစီလိုနာအသင်းအတွက် ဦးဆောင်ဂိုး သွင်းယူခဲ့ပေမယ့် နောက်ခံလူ အာရူဟို အနီကတ်ပြ ထုတ်ပယ်ခံခဲ့ရတာက ပွဲကို အလှည့်အပြောင်း ဖြစ်သွားစေခဲ့ပါတယ်။

ပီအက်စ်ဂျီအသင်းအတွက် ချေပဂိုးနဲ့ အနိုင်ဂိုးတွေကို ဒမ်ဘီလီ၊ ဗီတင်ဟာနဲ့ ဘတ်ပီက ၂ ဂိုးသွင်းယူခဲ့တာပါ။

ဒေါ့မွန်အသင်းကို တွေ့ရစဉ်

ဒီနှစ်သင်းရဲ့ကွာတားဖိုင်နယ် ပထမအကျော့ပွဲစဉ်မှာ ဘာစီလိုနာအသင်းက ၃ ဂိုး-၂ ဂိုးနဲ့ အနိုင်ရခဲ့ပေမယ့် နှစ်ကျော့ ပေါင်းရလဒ် ၆ ဂိုး- ၄ ဂိုးနဲ့ ပီအက်စ်ဂျီအသင်း အနိုင်ရပြီး ချန်ပီယံလိဂ် ဆီမီးဖိုင်နယ်ကို ၂၀၂၁ ခုနှစ်နောက်ပိုင်း ပထမဆုံးအကြိမ် တက်နိုင်ခဲ့တာ ဖြစ်ပါတယ်။

နောက်ထပ် ချန်ပီယံလိဂ် ကွာတားဖိုင်နယ် ဒုတိယအကျော့ ပွဲစဉ်မှာတော့ ဒေါ့မွန်အသင်းက အသလက်တီကို အသင်းကို ၄ ဂိုး-၂ ဂိုးနဲ့ အနိုင်ရရှိခဲ့တာပါ။

ဒီပွဲမှာ ဒေါ့မွန်အသင်းအတွက် ဂိုးတွေကို ဘရန့်၊ မက်ဆန်၊ ဖူလ်ခရက်ချ်နဲ့ ဆာဘစ်ဇာတို့က သွင်းယူခဲ့ပြီး အက်သလက်တီကို အသင်းအတွက် ဂိုးတွေကို ကော်ရီယာနဲ့ ဒေါ့မွန်အသင်းနောက်ခံလူ ဟမ်းမဲလ်ကိုယ့်ဂိုးကိုယ် သွင်းယူခဲ့တာ ဖြစ်ပါတယ်။ 

ဒီနှစ်သင်းရဲ့ ပထမအကျော့ပွဲစဉ်မှာ အသလက်တီကိုအသင်းက ၂ ဂိုး-၁ ဂိုးနဲ့ အနိုင်ရခဲ့ပေမယ့် နှစ်ကျော့ပေါင်း ရလဒ် ၅ ဂိုး-၄ ဂိုးနဲ့ ဒေါ့မွန်အသင်း အနိုင်ရပြီး ဆီမီးဖိုင်နယ်တက်နိုင်ခဲ့တာပါ။

ဒီပွဲစဉ်တွေမှာ အနိုင်ရခဲ့တဲ့ ပီအက်စ်ဂျီနဲ့ ဒေါ့မွန်အသင်းတို့ဟာ ချန်ပီယံလိဂ် ဆီမီးဖိုင်နယ်မှာ တွေ့ဆုံကြရမှာ ဖြစ်ပါတယ်။

Source: ESPN