CNI Sport News
၂၀၂၅ ခုနှစ်၊ အောက်တိုဘာ ၁
ဘရာဇီးလ်လက်ရွေးစင်အသင်းရဲ့ တောင်ပံကစားသမား အန်တိုနီက ပြီးခဲ့တဲ့ နွေရာသီ အပြောင်းအရွှေ့မှာ ဘက်တစ်အသင်းထံ အပြီးသတ် မပြောင်းရွှေ့မီ ယူနိုက်တက်အသင်းရဲ့ မလေးစားမှု ခံခဲ့ရတယ်လို့ El Desmarque နဲ့ အင်တာဗျူးမှာ ဖွင့်ဟခဲ့ပါတယ်။
အန်တိုနီက “အင်္ဂလန်မှာ အလွန်ခက်ခဲတဲ့လတွေ ဖြတ်သန်းခဲ့ရပြီး ရက်ပေါင်း ၄၀ ကြာ ဟိုတယ်မှာနေပြီးတော့ သီးခြား လေ့ကျင့်မှုတွေ လုပ်ခဲ့ရပါတယ်။ သူတို့က ကျနော့်ကို လေးစားမှု မရှိသလို ခံစားခဲ့ရပေမယ့် ဒါက အဓိက မဟုတ်ခဲ့ပါဘူး။ အငြင်းပွားမယ့် အရာတွေ မဖန်တီးချင်ဘူး ဒါက ဘဝပါပဲ။ ယူနိုက်တက်အသင်းကို ကျေးဇူးတင် ချင်ပြီး ဆုဖလား ၂ ခုနဲ့အတူ ဆိုးရွားတဲ့ အချိန်ရော၊ ကောင်းတဲ့အချိန်ရော ရှိခဲ့ပါတယ်”လို့ ပြောခဲ့ပါတယ်။
ယူနိုက်တက်အသင်းဟာ အန်တိုနီကို ၂၀၂၂ ခုနှစ် နွေရာသီမှာ အေဂျက်ဇ်အသင်းကနေ ပေါင် ၈၅ သန်းနဲ့ ဝယ်ယူခဲ့ ပေမယ့် သူဟာ ပုံမှန်ခြေစွမ်း ပြသနိုင်ဖို့ ရုန်းကန်ခဲ့ရပြီး အသင်းအတွက် ကစားခဲ့တဲ့ ၉၆ ပွဲမှာ ၁၂ ဂိုးသွင်း ယူနိုင်ခဲ့ ပါတယ်။
အန်တိုနီဟာ ပြီးခဲ့တဲ့ရာသီရဲ့ ဒုတိယရာသီဝက်မှာ ဘက်တစ်အသင်းထံ အငှားသွားရောက်ကစားပြီး ခြေစွမ်းပြသ နိုင်ခဲ့တာကြောင့် ဘက်တစ်အသင်းထံ အပြီးသတ် ပြောင်းရွှေ့ဖို့ ဆုံးဖြတ်ခဲ့တာပါ။
အန်တိုနီကို တွေ့ရစဉ်
ဒီအပြောင်းအရွှေ့ မဖြစ်မီမှာ ယူနိုက်တက်အသင်းဟာ အန်တိုနီကို အသင်းကြီးနဲ့ အဝေးမှာ သီးခြားလေ့ကျင့်မှု ပြုလုပ်ဖို့ ပြောခဲ့တာဖြစ်ပါတယ်။
အန်တိုနီဟာ ဘက်တစ်အသင်းထံ အပြီးသတ် ပြောင်းရွှေ့ဖို့ နွေရာသီ အပြောင်းအရွှေ့ နောက်ဆုံးနေ့အထိ စောင့်ဆိုင်းခဲ့ရပြီး ဒီရာသီမှာ စပိန်ကလပ်အတွက် ၄ ပွဲ ကစားထားပြီး ၁ ဂိုးသွင်းယူထားတာပါ။
အန်တိုနီဟာ ယူနိုက်တက်အသင်းမှာ နည်းပြဟောင်း အဲရစ်တန်ဟတ်ရဲ့ ဦးဆောင်မှုနဲ့ ကာရာဘောင်းဖလား၊ FA ဖလားတို့ကို ရယူနိုင်ခဲ့ပါတယ်။
အန်တိုနီဟာ ၂၀၂၆ ကမ္ဘာ့ဖလားပြိုင်ပွဲမှာ ဘရာဇီးလ်အသင်း လူစာရင်းထဲ ပါဝင်နိုင်ဖို့လည်း စိတ်ဆန္ဒ ပြင်းပြနေပါ တယ်။
၂၀၂၂ ကမ္ဘာ့ဖလားပြိုင်ပွဲမှာ ဘရာဇီးလ်အသင်းအတွက် ပါဝင်ခဲ့တဲ့ အန်တိုနီက ကြိုးစားပြီး အလုပ်လုပ်ကာ ကမ္ဘာ့ဖလားပြိုင်ပွဲမှာ ဒုတိယအကြိမ်မြောက် ပါဝင်နိုင်ဖို့ မျှော်လင့်တယ်လို့ ပြောခဲ့ပါတယ်။
Source: Goal
