CNI Sport News
၂၀၂၅ ခုနှစ်၊ ဩဂုတ် ၃၀
ယူနိုက်တက်အသင်းဟာ တောင်ပံကစားသမား အန်တိုနီကို ဘက်တစ်အသင်းထံ ရောင်းချဖို့ သဘောတူညီမှု ရရှိခဲ့ပြီလို့ သတင်းတွေ ထွက်ခဲ့ပေမယ့် ဘက်တစ်အသင်းကတော့ သူတို့ရဲ့ကမ်းလှမ်းမှု ရုပ်သိမ်းလိုက်ပြီလို့ ပြောခဲ့ပါတယ်။
ပြီးခဲ့တဲ့ရာသီရဲ့ ဒုတိယရာသီဝက်မှာ ဘက်တစ်အသင်းထံ အငှားသွားရောက်ကစားပြီး ခြေစွမ်းပြသနိုင်ခဲ့တဲ့ အန်တိုနီဟာ ဒီနွေရာသီ အပြောင်းအရွှေ့မှာ ဘက်တစ်အသင်းထံ ပြန်သွားဖို့ စိတ်ပိုင်းဖြတ်ထားတာပါ။
ဘက်တစ်အသင်းဟာ အန်တိုနီကို ဝယ်ယူဖို့ ရွေးချယ်ခွင့် အပါအဝင် တစ်ရာသီ အငှားစာချုပ်နဲ့ ခေါ်ယူနိုင်ဖို့ မျှော်လင့်ခဲ့ပေမယ့် ယူနိုက်တက်အသင်းက သူ့ကို အပြီးသတ်ရောင်းချဖို့ ဆွေးနွေးခဲ့ပါတယ်။
The Athletic က ယူနိုက်တက်အသင်းဟာ အန်တိုနီကို ဘက်တစ်အသင်းထံ ရောင်းချဖို့ ကနဦး ပြောင်းရွှေ့ကြေး ယူရို ၂၅ သန်း၊ add-ons ယူရို ၃ သန်းတို့နဲ့ သဘောတူညီမှု ရရှိခဲ့တယ်လို့ ဖော်ပြထားတာပါ။
ဒီအပြောင်းအရွှေ့ထဲမှာ ဘက်တစ်အသင်းဟာ အန်တိုနီကို ပြန်ရောင်းချခဲ့ရင် ပြောင်းရွှေ့ကြေးရဲ့ ၅၀ ရာခိုင်နှုန်းကို ယူနိုက်တက်အသင်းထံ ပေးချေရမယ့် အချက်ပါဝင်တယ်လို့ သိရပါတယ်။
အန်တိုနီကို တွေ့ရစဉ်
အန်တိုနီဟာ ဘက်တစ်အသင်းထံ ပြောင်းရွှေ့ခဲ့ရင် လုပ်ခလစာလျှော့ပြီး ယူရမှာဖြစ်တဲ့အတွက် ယူနိုက်တက် အသင်းနဲ့ ကျန်ရှိနေတဲ့ စာချုပ်သက်တမ်း ၂ နှစ်မှာ ရရှိမယ့် ယူရို ၆ သန်းကို ရယူချင်နေတယ်လို့ သတင်းမှာ ဖော်ပြထားတာပါ။
ယူနိုက်တက်အသင်းဟာ အန်တိုနီကို ဘက်တစ်အသင်းထံ သွားရောက်ပြီး ဆေးစစ်မှုခံယူဖို့ ခွင့်ပြုထားပေမယ့် စပိန်ကလပ်က မီးစိမ်းပြသခြင်းမရှိဘဲ နောက်ထပ် ပစ်မှတ်တွေကို ရှာဖွေနေတာဖြစ်ပါတယ်။
ဘက်တစ်အသင်းက အန်တိုနီအတွက် သဘောတူညီမှု မရရှိခဲ့သလို သူတို့ရဲ့ကမ်းလှမ်းမှုကို ရုပ်သိမ်းလိုက်ပြီလို့ ကြေညာချက် ထုတ်ပြန်ခဲ့ပါတယ်။
အန်တိုနီဟာ ဒီရာသီမှာ ယူနိုက်တက်အသင်းအတွက် ပွဲပါဝင်ကစားရခြင်း မရှိသေးသလို အသင်းနဲ့ အဝေးမှာ သီးခြား လေ့ကျင့်မှုတွေ ပြုလုပ်နေရတာပါ။
ဥရောပထိပ်တန်းလိဂ်တွေရဲ့ အပြောင်းအရွှေ့ ဈေးကွက်ဟာ စက်တင်ဘာ ၁ ရက်ဆိုရင် ပိတ်မှာဖြစ်တဲ့အတွက် အန်တိုနီအနေနဲ့ ယူနိုက်တက်အသင်းကနေ ထွက်ခွာဖို့ ထပ်ပြီးကြိုးပမ်းဖွယ် ရှိနေတာဖြစ်ပါတယ်။
Source: Metro
