CNI Sport News
၂၀၂၅ ခုနှစ်၊ စက်တင်ဘာ ၁၉
မန်စီးတီးအသင်း တိုက်စစ်မှူး ဟာလန်းဟာ ချန်ပီယံလိဂ်ပြိုင်ပွဲ သမိုင်းမှာ ပွဲအရေအတွက် အနည်းငယ်နဲ့ သွင်းဂိုး ၅၀ အမြန်ဆုံး ပြည့်တဲ့သူအဖြစ် စံချိန်သစ် တင်နိုင်ခဲ့ပါတယ်။
မန်စီးတီးအသင်းက နာပိုလီအသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ချန်ပီယံလိဂ် League Phase အဖွင့်ပွဲစဉ်မှာ မန်စီးတီးအသင်းအတွက် ၁ ဂိုး သွင်းယူခဲ့ပြီးနောက် ဟာလန်းက ဒီစံချိန်မှတ်တမ်းကို ရယူနိုင်ခဲ့တာပါ။
ဟာလန်းဟာ ချန်ပီယံလိဂ်ပွဲပေါင်း ၄၉ ပွဲ ကစားအပြီးမှာ သွင်းဂိုး ၅၀ ပြည့်ခဲ့တာဖြစ်ပြီး အရင်က စံချိန်တင်ထားတဲ့ ယူနိုက်တက်အသင်း တိုက်စစ်မှူးဟောင်း နစ္စတယ်ရွိုင်းရဲ့ စံချိန်ကို ကျော်ဖြတ်နိုင်ခဲ့တာ ဖြစ်ပါတယ်။
နစ္စတယ်ရွိုင်းဟာ ချန်ပီယံလိဂ် ပွဲပေါင်း ၆၂ ပွဲ ကစားအပြီးမှာ သွင်းဂိုး ၅၀ ပြည့်ခဲ့တာပါ။
ဟာလန်းဟာ လက်ရှိအချိန်မှာ ချန်ပီယံလိဂ်နဲ့ ဥရောပဖလားတွေရဲ့ ဂိုးသွင်းအများဆုံး ကစားသမားစာရင်းရဲ့ နေရာမှာ ဥရောပဘောလုံးလောကရဲ့ နာမည်ကြီး ကစားသမားအချို့ကို ကျော်ဖြတ်နိုင်ခဲ့ပြီလည်း ဖြစ်ပါတယ်။
ရီးရယ်လ်အသင်းအိုင်ကွန် ဒီစတီဖာနိုနဲ့ ဆွီဒင်တိုက်စစ်မှူးဟောင်း အီဘရာဟီမိုဗစ်တို့ရဲ့ အထက်မှာ ဟာလန်းက ရပ်တည်နိုင်ခဲ့ပါတယ်။
ဟာလန်းကို တွေ့ရစဉ်
ဂွာဒီယိုလာက “ဒါဟာ ကိန်းဂဏန်းတွေက သူတို့ဘာသာ သူတို့ ပြောနေတာဖြစ်ပြီး သူ့ကိုရရှိထားလို့ ကျနော်တို့ ကံကောင်းပါတယ်။ ဟာလန်းဟာ မယုံနိုင်စရာကောင်းတဲ့ ကစားသမားဖြစ်ပြီး သူ့အနေနဲ့ ဒီပုံစံကို ဆက်ထိန်းနိုင် ရင် ချန်ပီယံလိဂ်ပြိုင်ပွဲမှာ စံချိန်တင် ဂိုးသွင်းရှင် ဖြစ်လာနိုင်ပါတယ်။ လွယ်တော့ မလွယ်ပေမယ့် သူဟာ နောက်ထပ် ၁၀ နှစ်လောက်အထိ ကစားနိုင်ပါသေးတယ်”လို့ ပြောခဲ့တာပါ။
ချန်ပီယံလိဂ်ပြိုင်ပွဲမှာ ဂိုးအများဆုံး သွင်းယူထားတဲ့သူကတော့ ပေါ်တူဂီအသင်း ခေါင်းဆောင် ရော်နယ်ဒိုဖြစ်ပြီး ၁၄၁ ဂိုးသွင်းယူထားကာ အာဂျင်တီးနားအသင်း ခေါင်းဆောင် မက်ဆီက ၁၂၉ ဂိုး သွင်းယူထားပါတယ်။
အသက် ၂၅ နှစ်အရွယ်ရှိ ဟာလန်းဟာ ဒီရာသီမှာ မန်စီးတီးအသင်းအတွက် ခြေစွမ်းပြသနေတာဖြစ်ပြီး ပြိုင်ပွဲစုံ ၅ ပွဲကစားအပြီးမှာ ၆ ဂိုးသွင်းယူထားတာပါ။
မန်စီးတီးအသင်းဖော် ဖိုဒန်က ဟာလန်းဟာ စံချိန်တိုင်းကို ချိုးဖျက်နေတဲ့ ပုံရတယ်လို့ ချီးကျူးမှု ပြုလုပ်ခဲ့ပါတယ်။
မန်စီးတီးအသင်းဟာ လာမယ့် ပရီးမီးယားလိဂ် ပွဲစဉ်အဖြစ် အာဆင်နယ်၊ ချန်ပီယံလိဂ်ပွဲစဉ်အဖြစ် မိုနာကို အသင်းတို့နဲ့ အဝေးကွင်းသွားရောက်ပြီး ယှဉ်ပြိုင်ရမှာဖြစ်ပါတယ်။
Source: ESPN
