CNI Sport News
၂၀၂၅ ခုနှစ်၊ စက်တင်ဘာ ၁၉
ကိုလံဘီယာကြယ်ပွင့် လူးဝစ်ဒီယက်ဇ်က သူဟာ ဘိုင်ယန်မြူးနစ်အသင်းထံ မပြောင်းရွှေ့မီ ဘာစီလိုနာအသင်းနဲ့ အပြောင်းအရွှေ့အတွက် ဆွေးနွေးမှုတွေ ပြုလုပ်ခဲ့တယ်လို့ ဝန်ခံခဲ့ပါတယ်။
လူးဝစ်ဒီယက်ဇ်က “ဒီအသင်းကြီးမှာ ရှိရတာကို ကျနော် အလွန်ပျော်ရွှင်ပါတယ်။ ဘာစီလိုနာအသင်းနဲ့ ဆွေးနွေးမှု တွေရှိခဲ့ပြီး ဒါဟာ ဈေးကွက်ထဲမှာ အသင်း အများအပြားနဲ့အတူ ပုံမှန်ပါပဲ။ ကျနော်ဟာ ကျနော့် အနာဂတ်အတွက် ရည်မှန်းချက်ထားပြီး ဆုံးဖြတ်ချက်ချခဲ့ကာ အရေးကြီးဆုံးက ကျနော်ဟာ ကြီးကျယ်ခမ်းနားတဲ့ ကလပ်အသင်းကို ရောက်နေပါတယ်။ ဒါကြောင့် ကျနော် အစွမ်းကုန်ကြိုးစားသွားမယ်”လို့ Movistar ကို ပြောခဲ့တာပါ။
လူးဝစ်ဒီယက်ဇ်ဟာ ပြီးခဲ့တဲ့ နွေရာသီအပြောင်းအရွှေ့က ဘာစီလိုနာအသင်းရဲ့ စိတ်ဝင်စားမှုကို ရခဲ့ပေမယ့် ဘိုင်ယန်မြူးနစ်ကို ပြောင်းရွှေ့ဖို့ ရွေးချယ်ခဲ့ပြီး လီဗာပူးလ်အသင်းကနေ ပေါင်သန်း ၆၀ နဲ့ ၄ နှစ်စာချုပ်ချုပ်ဆိုကာ ပြောင်းရွှေ့ခဲ့ပါတယ်။
ဘာစီလိုနာအသင်းဟာ နွေရာသီ အပြောင်းအရွှေ့မှာ လူးဝစ်ဒီယက်ဇ်ကို အဓိကပစ်မှတ်အဖြစ် သတ်မှတ်ပြီး ကြိုးပမ်းခဲ့ပေမယ့် လီဗာပူးလ်အသင်းက ဆွေးနွေးမှုပြုလုပ်ဖို့ ဆန္ဒမရှိလို့ အပြောင်းအရွှေ့ ဖြစ်ခဲ့ခြင်းမရှိတာပါ။
ဘာစီလိုနာအသင်းဟာ လူးဝစ်ဒီယက်ဇ်ကို မရခဲ့တာကြောင့် ဘီလ်ဘာအိုအသင်းက နီကိုဝီလီယံစ်ကို ခေါ်ယူဖို့ အာရုံစိုက်ခဲ့ပေမယ့် အဆင်မပြေခဲ့ဘဲ သူဟာ ဘီလ်ဘာအိုအသင်းမှာ ဆက်နေပြီး စာချုပ်သက်တမ်း တိုးခဲ့ပါတယ်။
အဲဒါကြောင့် ဘာစီလိုနာအသင်းဟာ အသင်းထံ လာရောက်ချင်နေတဲ့ ရက်ရှ်ဖို့ဒ်ကို ယူနိုက်တက်အသင်းကနေ အငှားနဲ့ ခေါ်ယူခဲ့ပြီး ရာသီကုန်ချိန်မှာ အပြီးသတ်ဝယ်ယူဖို့ ရွေးချယ်ခွင့်ရှိနေတာပါ။
လူးဝစ်ဒီယက်ဇ်ကတော့ ဘိုင်ယန်မြူးနစ်အသင်းကို ရောက်ရှိလာပြီးကတည်းက ခြေစွမ်းပြသနေပြီး ပါဝင်ကစား ထားတဲ့ ၆ ပွဲမှာ ၄ ဂိုးသွင်းယူကာ ဂိုးဖန်တီးမှု ၂ ကြိမ် ပြုလုပ်ထားပါတယ်။
ဘိုင်ယန်မြူးနစ်အသင်းဟာ လာမယ့် ပွဲစဉ်တွေအဖြစ် ဟော်ဖန်ဟိမ်းအသင်းနဲ့ ဘွန်ဒက်လီဂါ၊ ပါဖို့စ်နဲ့ ချန်ပီယံလိဂ် ပွဲစဉ် ယှဉ်ပြိုင်ရမှာဖြစ်ပါတယ်။
Source: Goal
