CNI Sport News
၂၀၂၅ ခုနှစ်၊ စက်တင်ဘာ ၁၉
ယူနိုက်တက်အသင်း ပူးတွဲပိုင်ရှင် ဆာဂျင်ရက်ကလစ်ဖ်ဟာ ကြာသပတေးနေ့က အသင်းရဲ့ ကာရင်တန် လေ့ကျင့် ရေးကွင်းမှာ နည်းပြဖြစ်သူ အာမိုရင်နဲ့ တွေ့ဆုံဆွေးနွေးမှု ပြုလုပ်ခဲ့ပါတယ်။
အသက် ၇၂ နှစ်အရွယ်ရှိ ရက်ကလစ်ဖ်ဟာ နည်းပြအာမိုရင် လက်ရှိရင်ဆိုင်နေရတဲ့ ပြဿနာတွေကို ကူညီဖြေရှင်း ပေးနိုင်ဖို့ စိတ်အားထက်သန်နေတာပါ။
ယူနိုက်တက်အသင်းရဲ့ ဒီရာသီအစပိုင်း ရလဒ်ဆိုးတွေကြောင့် နည်းပြအာမိုရင်ဟာ ဖိအားတွေ အများအပြား ခံစားနေရတာ ဖြစ်ပါတယ်။
ယူနိုက်တက်အသင်းဟာ ပြီးခဲ့တဲ့ နွေရာသီ အပြောင်းအရွှေ့မှာ ပေါင်သန်း ၂၀၀ ကျော် အသုံးပြုပြီး ကစားသမား သစ်တွေ အားဖြည့်ထားပေမယ့် အသင်းဟာ ပရီးမီးယားလိဂ်ပြိုင်ပွဲမှာ နိုင်ပွဲတစ်ပွဲသာ ရရှိထားပြီး ကာရာဘောင်း လိဂ်ဖလားပြိုင်ပွဲမှာလည်း အသင်းငယ် ဂရင်မ်စဘီအသင်းကို အရေးနိမ့်ကာ ထွက်ခွာခဲ့ရတာပါ။
ယူနိုက်တက်အသင်းဟာ လာမယ့် ပရီးမီးယားလိဂ်ပွဲတွေမှာ ရလဒ်မကောင်းဘူးဆိုရင် နည်းပြအာမိုရင်ကို ထုတ်ပယ်ဖွယ်ရှိတယ်လို့လည်း ဗြိတိန်မီဒီယာတွေက ဖော်ပြထားပါတယ်။
ယူနိုက်တက်အသင်းကို တွေ့ရစဉ်
ရက်ကလစ်ဖ်နဲ့ နီးစပ်တဲ့ သတင်းရင်းမြစ်တွေကတော့ သူဟာ နည်းပြအာမိုရင်ကို ဆက်ပြီးထောက်ခံမှုတွေ ပြုလုပ်နေဆဲ ဖြစ်တယ်လို့ ပြောထားတာပါ။
ယူနိုက်တက်အသင်းဟာ အသင်းကို ကိုင်တွယ်တာ ၁ နှစ် မပြည့်မီမှာ နည်းပြအာမိုရင်ကို ထုတ်ပယ်ခဲ့ရင် လျော်ကြေးပေါင် ၁၂ သန်း ပေးရမယ်လို့ သိရပါတယ်။
ယူနိုက်တက်အသင်းဟာ နည်းပြအာမိုရင် လက်ထက်မှာ ပရီးမီးယားလိဂ် မှတ်တမ်း အလွန်ဆိုးရွားနေပြီး လိဂ်ပွဲပေါင်း ၃၁ ပွဲ ကစားထားတာမှာ ၈ ပွဲသာအနိုင်ရပြီး ၇ ပွဲသရေနဲ့ ၁၆ ပွဲရှုံးနိမ့်ထားတာပါ။
အာမိုရင်ကတော့ ယူနိုက်တက်အသင်းမှာ သူအသုံးပြုနေတဲ့ ကစားကွက်ပုံစံကို ဆက်အသုံးပြုသွားမှာဖြစ်ပြီး ဒါကို ပြောင်းလဲချင်ရင် လူပြောင်းလဲမှရမယ်လို့ မန်စီးတီးအသင်းကို အရေးနိမ့်ခဲ့တဲ့ ပရီးမီးယားလိဂ်ပွဲစဉ်အပြီးမှာ ပြောခဲ့ ပါတယ်။
ယူနိုက်တက်အသင်းဟာ ပရီးမီးယားလိဂ် ပွဲစဉ် ၅ အဖြစ် ချယ်လ်ဆီးအသင်းကို အိမ်ကွင်းလက်ခံ ယှဉ်ပြိုင် ရမှာဖြစ်ပါတယ်။
Source: BBC
