CNI Sport News
၂၀၂၅ ခုနှစ်၊ အောက်တိုဘာ ၉
ယူနိုက်တက်အသင်း ပူးတွဲပိုင်ရှင် ဆာဂျင်ရက်ကလစ်ဖ်က နည်းပြ အာမိုရင် အနေနဲ့ သူဟာ ကြီးမားတဲ့ နည်းပြ ဖြစ်တယ်ဆိုတာ သက်သေပြဖို့ အချိန် ၃ နှစ်လိုအပ်တယ်လို့ ပြောခဲ့ပါတယ်။
ဆာဂျင်ရက်ကလစ်ဖ်က “အာမိုရင်ဟာ သူ့ရဲ့အကောင်းဆုံးပုံစံ မပြသနိုင်သေးသလို အကောင်းဆုံး ရာသီလည်း မရရှိသေးပါဘူး။ သူဟာ ၃ နှစ်အတွင်းမှာ ကြီးမားတဲ့ နည်းပြတစ်ဦး ဖြစ်တယ်ဆိုတာ လုပ်ပြဖို့ လိုအပ်ပါတယ်။ မီဒီယာတွေကို တစ်ခါတစ်လေ ကျနော် နားမလည်နိုင်အောင်ဖြစ်မိပြီး သူတို့က နေ့ချင်းညချင်းကို အောင်မြင်မှု လိုချင်နေပါတယ်။ ဒီလိုမျိုးက ချက်ချင်းလုပ်လို့ မရတဲ့အတွက် အချိန်လိုအပ်တယ်”လို့ ပြောခဲ့ပါတယ်။
လာမယ့် နိုဝင်ဘာဆိုရင် ယူနိုက်တက်အသင်းကို ကိုင်တွယ်တာ ၁ နှစ်ပြည့်တော့မယ့် နည်းပြ အာမိုရင်ဟာ အသင်းကို ကိုင်တွယ်ဖို့ ရောက်ရှိလာပြီးကတည်းက ဆိုးရွားတဲ့ မှတ်တမ်းတွေကိုသာ ရရှိထားတာဖြစ်ပါတယ်။
ယူနိုက်တက်အသင်းဟာ ပြီးခဲ့တဲ့ရာသီက ပရီးမီးယားလိဂ်ပြိုင်ပွဲမှာ အဆင့် ၁၅ နေရာနဲ့ ရာသီအဆုံးသတ်ခဲ့ပြီး ဒီနွေရာသီမှာ ပေါင်သန်း ၂၀၀ ကျော်သုံးစွဲကာ ကစားသမားသစ်တွေ အားဖြည့်ထားပေမယ့် အသင်းဟာ ပရီးမီးယားလိဂ်ပြိုင်ပွဲမှာ ၃ ပွဲ ရှုံးနိမ့်ထားပါတယ်။
ယူနိုက်တက်အသင်းကို တွေ့ရစဉ်
ဒါအပြင် ယူနိုက်တက်အသင်းဟာ လိဂ်တူးကလပ် ဂရင်စဘီအသင်းကို အရေးနိမ့်ပြီး လိဂ်ဖလားပြိုင်ပွဲကနေ စောစီးစွာ ထွက်ခွာထားရတာပါ။
ယူနိုက်တက်အသင်းရဲ့ ရလဒ်ဆိုးတွေကြောင့် နည်းပြအာမိုရင်ဟာ ထုတ်ပယ်ခံရမယ့် ဖိအားတွေ ခံစားခဲ့ရပေမယ့် အသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ ဆန်းဒါးလန်းအသင်းကို ၂ ဂိုး-ဂိုးမရှိနဲ့ အနိုင်ရရှိခဲ့ပါ တယ်။
ယူနိုက်တက်အသင်း ပူးတွဲပိုင်ရှင် ဆာဂျင်ရက်ကလစ်ဖ်ဟာ နည်းပြအာမိုရင်ကို အမြဲတမ်း ထောက်ခံမှုပေးခဲ့သလို The Times' "The Business" podcast နဲ့ ပြုလုပ်ခဲ့တဲ့ အင်တာဗျူးမှာ နည်းပြ အာမိုရင် အနေနဲ့ သူ့ရဲ့အလုပ်ကို သက်သေပြဖို့ အချိန်လိုအပ်တယ်လို့ ပြောခဲ့ပါတယ်။
ဒီရာသီ ပရီးမီးယားလိဂ် အမှတ်ပေးဇယားအဆင့် ၁၀ နေရာ ရပ်တည်နေတဲ့ ယူနိုက်တက်အသင်းဟာ အောက်တိုဘာ နိုင်ငံတကာပွဲတွေအပြီးမှာ လိဂ်ပွဲစဉ်အဖြစ် လီဗာပူးလ်အသင်း အိမ်ကွင်းသွားရောက် ယှဉ်ပြိုင်ရမှာ ဖြစ်ပါတယ်။
Source: BBC
