CNI Sport News
၂၀၂၅ ခုနှစ်၊ ဩဂုတ် ၂၅
နာပိုလီအသင်း ကွင်းလယ်လူ တော်မီနေးက သူဟာ အသင်းဖော် ဒီဘရိုင်းဆီကနေ အကြံဉာဏ်တွေ ရယူဖို့ လိုအပ်တယ်လို့ ဆက်ဆူအိုလိုအသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ စီးရီးအေရာသီ အဖွင့်ပွဲစဉ်အပြီးမှာ ပြောခဲ့ ပါတယ်။
တော်မီနေးက “ဒီဘရိုင်းဟာ ဘယ်လိုအကြံဉာဏ်မှ မလိုပေမယ့် ကျနော်ကတော့ သူ့ဆီကနေ အကြံဉာဏ်တွေ လိုအပ်ပါတယ်။ သူဟာ ဘယ်လိုကစားသမား၊ ဘယ်လိုလူလဲဆိုတာ အားလုံးသိကြပါတယ်။ သူအသင်းမှာ ရှိနေတဲ့ အတွက် ကျနော်တို့ ပျော်ရွှင်ပြီး သူဟာ အရည်အသွေးတွေ အားလုံးကို ယူဆောင်လာပါတယ်။ သူဟာ အလွန် တော်တဲ့ သူဖြစ်ပြီး ကျနော်တို့အားလုံး အတူလက်တွဲကာ အသင်းလိုက် စိတ်ဓါတ်က အရေးကြီးတဲ့ အရာဖြစ်သလို နှိမ့်ချပြီးနေရမယ်”လို့ DAZN ကို ပြောခဲ့တာပါ။
၁၀ နှစ်ကြာ ကစားခဲ့တဲ့ မန်စီးတီးအသင်းနဲ့ စာချုပ်ကုန်ဆုံးပြီးနောက် နာပိုလီအသင်းထံ ပြောင်းရွှေ့လာခဲ့တဲ့ ဒီဘရိုင်းဟာ ဆက်ဆူအိုလို အသင်းနဲ့ပွဲစဉ်မှာ ဖရီးကစ် ကန်ချက်ကနေ လှပတဲ့ သွင်းဂိုးသွင်းယူနိုင်ခဲ့ပါတယ်။
ပြီးခဲ့တဲ့ရာသီက နာပိုလီအသင်းကို စီးရီးအေ ချန်ပီယံဖြစ်အောင် ကူညီပေးနိုင်ခဲ့ပြီး လိဂ်ပြိုင်ပွဲရဲ့ အကောင်းဆုံး ကစားသမားဆုကို ရရှိခဲ့တဲ့ တော်မီနေးဟာ ဆက်ဆူအိုလိုအသင်းနဲ့ ပွဲစဉ်မှာ အသင်းအတွက် အဖွင့်ဂိုးသွင်း ယူပေး နိုင်ခဲ့တာပါ။
ဒီဘရိုင်းကို တွေ့ရစဉ်
ပွဲအပြီးမှာ တော်မီနေးက သူဟာ ဒီဘရိုင်းဆီကနေ အကြံဉာဏ်တွေ ရယူဖို့ လိုအပ်တယ်လို့ ပြောလာခဲ့တာ ဖြစ်ပါတယ်။
ဒါအပြင် တော်မီနေးက သူတို့ဟာ ဒီနှစ်မှာလည်း အောင်မြင်မှုတွေ ရယူနိုင်ဖို့ ဆာလောင်နေပြီး နှိမ့်ချပြီး နေရ မယ်လို့ ပြောခဲ့တာပါ။
နာပိုလီအသင်းဟာ ဒီရာသီမှာ စီးရီးအေဖလားကို ဆက်ထိန်းသိမ်းနိုင်ဖို့ ကြိုးပမ်းသွားမှာ ဖြစ်သလို ချန်ပီယံလိဂ် ပြိုင်ပွဲမှာလည်း ရလဒ်ကောင်းတွေ ရရှိအောင် လုပ်ဆောင်ဖို့ ပစ်မှတ်ထားနေပါတယ်။
မန်စီးတီးအသင်းနဲ့အတူ ဆုဖလား အောင်မြင်မှု အများအပြား ရယူနိုင်ခဲ့တဲ့ ဒီဘရိုင်းဟာ နာပိုလီအသင်းရဲ့ ကွင်းလယ်မှာ တော်မီနေးနဲ့အတူ တွဲဖက်ကာ အဓိက အခန်းကဏ္ဍကနေ ပါဝင်ရဖို့ရှိနေတာပါ။
နာပိုလီအသင်းဟာ သြဂုတ် ၃၀ ရက်မှာ စီးရီးအေ ပွဲစဉ်အဖြစ် ကာဂလီယာရီအသင်းကို အဝေးကွင်း ယှဉ်ပြိုင်ရမှာ ဖြစ်ပါတယ်။
Source: Goal
