CNI Sport News
၂၀၂၅ ခုနှစ်၊ ဩဂုတ် ၂၃
ချယ်လ်ဆီးအသင်းနည်းပြ မာရက်စ်ကာက ဝက်စ်ဟမ်းအသင်းကို ၅ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ် ပွဲစဉ်မှာ အမှားအယွင်း ပြုလုပ်ခဲ့ပေမယ့် အထင်ကြီးစရာကောင်းတဲ့ စွမ်းဆောင်ရည် ပြသနိုင်ခဲ့တဲ့ ဘရာဇီးလ် ဆယ်ကျော်သက် အက်စ်တီဗာအိုကို ချီးကျူးမှုပြုလုပ်ခဲ့ပါတယ်။
မာရက်စ်ကာက “သူ့ကြောင့် ကျနော်တို့ သွင်းဂိုးပေးခဲ့ရတဲ့အတွက် သူဟာ ဒီအမှားတွေကနေ သင်ယူတက်ဖို့ လိုပါတယ်။ ဒါပေမယ့် တစ်ပွဲလုံးခြုံပြီးပြောရရင် စွမ်းဆောင်ရည်က အလွန်ကောင်းမွန်ပါတယ်။ သူ့ရဲ့တုံ့ပြန်မှုက ဘယ်လောက်အထိ ကောင်းမွန်လဲဆိုတာ ပြသနိုင်ခဲ့ပါတယ်။ အဲဒါက ကျနော်တို့နဲ့အတူ သူရှိနေရတဲ့ အကြောင်း ရင်းပါ”လို့ ပြောခဲ့တာပါ။
ဒီပွဲမတိုင်မီ ပြုလုပ်ခဲ့တဲ့ သွေးပူလေ့ကျင့်ခန်းမှာ ကိုးလ်ပါလ်မာ ဒဏ်ရာရရှိသွားခဲ့တာကြောင့် အက်စ်တီဗာအိုဟာ သူ့ရဲ့နေရာမှာ အစားထိုး ဝင်ရောက်ပြီး ချယ်လ်ဆီးအသင်းရဲ့ ပွဲထွက်လူစာရင်းထဲ ပါဝင်ခွင့်ရခဲ့တာ ဖြစ်ပါတယ်။
အက်စ်တီဗာအိုဟာ ပြီးခဲ့တဲ့ ခရစ္စတယ်ပဲလေ့စ်အသင်းနဲ့ ဂိုးမရှိ သရေကျခဲ့တဲ့ ပရီးမီးယားလိဂ် အဖွင့်ပွဲစဉ်မှာ ချယ်လ်ဆီးအသင်းအတွက် လူစားဝင်အဖြစ်သာ ပါဝင်ခဲ့ရတာပါ။
ချယ်လ်ဆီးအသင်း ယှဉ်ပြိုင်နေစဉ်
ဒီပွဲရဲ့ပွဲချိန် ၆ မိနစ်မှာ ဝက်စ်ဟမ်းအသင်း ဦးဆောင်ဂိုးရခဲ့ပြီး အက်စ်တီဗာအိုရဲ့ အမှားကနေ ပါကယ်တာက သွင်းယူခဲ့တာ ဖြစ်ပါတယ်။
အက်စ်တီဗာအိုဟာ အမှားအယွင်း ပြုလုပ်ခဲ့ပြီးနောက် အကောင်းဆုံး စွမ်းဆောင်ရည်တွေပြသကာ ဒီပွဲမှာ ချယ်လ်ဆီးအသင်း သွင်းယူတဲ့ တတိယဂိုးကို ဂိုးဖန်တီးမှု ပြုလုပ်ပေးနိုင်ခဲ့တာပါ။
အက်စ်တီဗာအိုဟာ ဒီပွဲရဲ့ အကောင်းဆုံး ကစားသမားအဖြစ် သတ်မှတ်ခံခဲ့ရပြီး ချယ်လ်ဆီးအသင်း နည်းပြ မာရက်စ်ကာရဲ့ ချီးကျူးမှုကိုလည်း ရရှိခဲ့ပါတယ်။
ချယ်လ်ဆီးအသင်း နောက်ခံလူ ကူကူရယ်လာက အက်စ်တီဗာအိုဟာ အံ့သြစရာကောင်းတဲ့ပွဲကို ကစားနိုင်ခဲ့ တယ်လို့ မှတ်ချက်ပေးခဲ့ပါတယ်။
ဝက်စ်ဟမ်းအသင်းကတော့ ပရီးမီးယားလိဂ် အဖွင့်ပွဲစဉ် ၂ ပွဲစလုံး ဂိုးပြတ်ရှုံးနိမ့်မှုတွေနဲ့ ကြုံတွေ့ရပြီးနောက် နည်းပြ ဂရေဟမ်ပေါ်တာဟာ အသင်းပရိသတ်တွေရဲ့ လှောင်ပြောင်မှုတွေ ခံခဲ့ရပါတယ်။
ဂရေဟမ်ပေါ်တာက ဒီရလဒ်တွေအတွက် သူ့မှာတာဝန်ရှိပြီး အသင်းအနေနဲ့ ပိုပြီးကောင်းမွန်အောင် လုပ်ရမယ်လို့ ပြောခဲ့ပါတယ်။
Source: ESPN
