CNI Sport News

၂၀၂၃ ခုနှစ်၊ ဇူလိုင် ၁၀

ယူကရိန်းကလပ် ဒိုင်နမိုကိဗ်အသင်းဟာ ရုရှားမှာ ရာသီကြိုပြိုင်ပွဲကစားခဲ့တဲ့ တူရကီကလပ် ဖီနာဘာချီအသင်းကို ဂုဏ်သိက္ခာမရှိသလို အသိတရား ကင်းမဲ့တဲ့အသင်းလို့ ပြင်းထန်စွာ ဝေဖန်ခဲ့ပါတယ်။

ဒိုင်နမိုကိဗ်အသင်းက “ရုရှားစွမ်းအင်ကုမ္ပဏီကြီးရဲ့ သွေးစွန်းတဲ့ ငွေတွေက ခင်ဗျားတို့ကို အရာအားလုံး ဖြတ် တောက် ပစ်လိုက်ပါတယ်။ အဲဒါကြောင့် ခင်ဗျားတို့ဟာ ဂုဏ်သိက္ခာလည်း မရှိတော့သလို အသိတရားလည်း ကင်း မဲ့ သွားပါပြီ။ ဒီအဆင့်မှာ ဘယ်အရာကမှ မျှတမှုရှိအောင် လုပ်နိုင်မှာ မဟုတ်ပါဘူး။ ဒီလို ရှက်စရာကောင်းတဲ့ အပြု အမူ၊ ကိုယ်ကျင့်တရားနဲ့ လူ့အရည်အသွေးတွေမပါဘဲ လူသတ်သမားတွေဆီသွားတဲ့ ခရီးအတွက် ငွေကြေးက ခင်ဗျားတို့ကို လျော်ကြေး မပေးနိုင်ပါဘူး”လို့ ထုတ်ပြန်ချက်ထဲမှာ ဖော်ပြခဲ့ပါတယ်။

စိန့်ပီတာစဘတ်ရှိ Gazprom Arena မှာ ကျင်းပတဲ့ ရာသီကြိုပြိုင်ပွဲမှာ ဖီနာဘာချီအသင်းဟာ ဇင်းနစ်၊ ရက်ဒ် စတားဘဲလ်ဂရိတ်၊ နက်ဖ်ချီတို့နဲ့ ဝင်ရောက် ယှဉ်ပြိုင်နေပါတယ်။

ဖီနာဘာချီအသင်းကို တွေ့ရစဉ်

ဒီပွဲမှာ ပွဲချိန်အတွင်း ဂိုးမရှိသရေကျခဲ့ပြီး ပင်နယ်တီ အဆုံးအဖြတ်မှာ ဇင်းနစ်အသင်းက ၄ ဂိုး- ၃ ဂိုးနဲ့ အနိုင်ရရှိခဲ့ ပါတယ်။

ရုရှားနိုင်ငံက ယူကရိန်းနိုင်ငံကို ကျူးကျော်ပြီးကတည်းက ဒီနိုင်ငံက အသင်းတွေဟာ ယူအီးအက်ဖ်နဲ့ ဖီဖာ လက်အောက်ရှိ ပြိုင်ပွဲတွေမှာ ဝင်ရောက်ယှဉ်ပြိုင်ခွင့် ပိတ်ပင်ခံထားရတာပါ။

ဖီနာဘာချီအသင်း ပရိသတ်တွေဟာ ပြီးခဲ့တဲ့နှစ်က ကစားခဲ့တဲ့ ဒိုင်နမိုကိဗ်အသင်းနဲ့ ပွဲမှာ ရုရှားသမ္မတ ပူတင်ရဲ့ နာမည်ကို အော်ဟစ်ခဲ့ကြလို့ လာမယ့် ဥရောပပြိုင်ပွဲမှာ ၁ ပွဲ ပိတ်ပင်တဲ့ ပြစ်ဒဏ်ချမှတ်ခြင်း ခံခဲ့ရတာ ဖြစ်ပါတယ်။

ဒါအပြင် ယူအီးအက်ဖ်အေက ဖီနာဘာချီအသင်းကို ဒဏ်ကြေးငွေ ယူရို ၅၀,၀၀၀ ပေးချေဖို့ ပြစ်ဒဏ် ချမှတ်ခဲ့ပါ တယ်။

ဖီနာဘာချီအသင်းဟာ ဒိုင်နမိုကိဗ်အသင်းရဲ့ ပြောဆိုမှုတွေနဲ့ ပတ်သက်ပြီး ဘာမှပြောကြားထားခြင်း မရှိသေးဘူး လို့ သိရပါတယ်။ 

Source: ရိုက်တာ

CNI Sport News

၂၀၂၃ ခုနှစ်၊ ဇူလိုင် ၁၀

ပီအက်စ်ဂျီအသင်း အားကစားဒါရိုက်တာဟောင်း လီယိုနာဒိုက ဘတ်ပီဟာ အသင်းကို အောင်မြင်မှုတွေရရှိအောင် ဦးဆောင်ပေးနိုင်တဲ့သူမဟုတ်တဲ့အတွက် အခု နွေရာသီအပြောင်းအရွှေ့မှာ ထွက်ခွင့်ပေးလိုက်ဖို့ အသင်းဟောင်းကို တိုက်တွန်းခဲ့ပါတယ်။

လီယိုနာဒိုက “ပီအက်စ်ဂျီအသင်းကောင်းဖို့အတွက် ဘယ်လိုပဲဖြစ်ဖြစ် ဘတ်ပီအသင်းက ထွက်ခွာဖို့ အချိန် ရောက်လာပြီလို့ ထင်ပါတယ်။ ပီအက်စ်ဂျီက သူမရောက်ခင်ကရော၊ သူထွက်သွားပြီးချိန်မှာလည်း ရှိနေမှာပါ။ သူဒီမှာရှိနေတာ ၆ နှစ်ကြာရှိပြီဖြစ်ပြီး ဒီအချိန် ချန်ပီယံလိဂ်ပြိုင်ပွဲမှာ မတူညီတဲ့ အသင်း ၅ သင်းက ချန်ပီယံ ဖြစ်ခဲ့ပါတယ်။ ဒီအသင်းတွေမှာ ဘတ်ပီမပါဝင်ကြပါဘူး။ အဲဒါကြောင့် ဘတ်ပီမပါဝင်ဘဲ ကျနော်တို့ ဒီပြိုင်ပွဲမှာ ချန်ပီယံဖြစ်နိုင်တယ်” လို့ L'Equipe ကို ပြောခဲ့တာပါ။

ဘတ်ပီဟာ မကြာသေးခင်က ပြုလုပ်ခဲ့တဲ့ အင်တာဗျူးကြောင့် အသင်းနဲ့ ဆက်ဆံရေးတင်းမာနေပြီလည်း ဖြစ်ပါတယ်။ ပြင်သစ်အသင်းခေါင်းဆောင်က ပီအက်စ်ဂျီအသင်း ချန်ပီယံလိဂ်မရတာက သူ့ကို မေးရမယ့် မေးခွန်းမဟုတ်ဘဲ အသင်းနဲ့ သက်ဆိုင်တဲ့သူတွေကိုသာ မေးရမယ်လို့ မကြာသေးခင်က ပြောခဲ့တာပါ။ ဘတ်ပီဟာ ပီအက်စ်ဂျီအသင်းနဲ့ စာချုပ်သက်တမ်းတိုးမှာမဟုတ်ဘဲ စာချုပ်ကုန်ဆုံးမယ့် လာမယ့်ရာသီအကုန်မှာ ထွက်ခွာမယ် လို့ အတည်ပြုထားပါတယ်။

အဲဒါကြောင့် ပီအက်စ်ဂျီအသင်းဥက္ကဋ္ဌ အယ်လ်ခီလိုင်ဖီက ဘတ်ပီအနေနဲ့ အသင်းမှာဆက်ရှိဖို့အတွက် စာချုပ်သစ် ချုပ်ဖို့လိုပြီး ဒီလိုမှမဟုတ်ရင် အခုနွေရာသီအပြောင်းအရွှေ့မှာ ရောင်းချဖို့ တံခါးဖွင့်ထားတယ်လို့ သတိပေးထား တာပါ။ ဒီအချိန်မှာ အားကစားဒါရိုက်တာဟောင်း လီယိုနာဒိုကပါ ဘတ်ပီကို ထွက်ခွင့်ပေးလိုက်ဖို့နဲ့ သူက ခေါင်းဆောင်ကောင်းမဟုတ်ဘူးလို့ ပြောခဲ့တာဖြစ်ပါတယ်။

လီယိုနာဒိုက “ပြီးခဲ့တဲ့ ၂ နှစ်အတွင်း သူ့ရဲ့အပြုအမူကြောင့် ဘတ်ပီဟာ အသင်းကို အမှန်တကယ်ဦးဆောင်နိုင်တဲ့ ကစားသမားမဟုတ်သေးဘူးဆိုတာကို ပြသခဲ့ပါတယ်။ သူဟာ ကြီးကျယ်ခမ်းနားတဲ့ ကစားသမားတစ်ဦး ဖြစ်ပေ မယ့် ခေါင်းဆောင်ကောင်းတစ်ဦးတော့ မဟုတ်ပါဘူး။ သူက ဂိုးသွင်းကောင်းပေမယ့် ဂိုးဖန်တီးရှင် မဟုတ်ပါဘူး။ သူ့ဝန်းကျင်မှာ အသင်းတည်ဆောက်ရတာ ခက်ခဲပါတယ်” လို့ ပြောခဲ့တာပါ။

ဘတ်ပီဟာ စာချုပ်ကုန်ဆုံးချိန်မှာ ပီအက်စ်ဂျီကနေ အလွတ်နဲ့ ထွက်ခွာဖို့ မျှော်လင့်ထားပေမယ့် ပြင်သစ်ကလပ် ကတော့ ဒီအခြေအနေကို သိရှိနေတာကြောင့် အခုအပြောင်းအရွှေ့မှာ ရောင်းချဖို့ ပြင်ဆင်နေတယ်လို့ သိရပါ တယ်။

Source:DailyMail

CNI Sport News

၂၀၂၃ ခုနှစ်၊ ဇူလိုင် ၁၀

ဘယ်လာရုစ်တင်းနစ်မယ် အဇာရန်ကာဟာ ယူကရိန်းတင်းနစ်မယ် ဆဗီတိုလီနာကို အရေးနိမ့်ခဲ့တဲ့ ဝင်ဘယ်လ်ဒန် အိုးပန်းပြိုင်ပွဲမှာ ပရိသတ်တွေရဲ့ လှောင်ပြောင်မှုခံခဲ့ရတာ ဖြစ်ပါတယ်။

ဝင်ဘယ်လ်ဒန်အိုးပန်း စတုတ္တအဆင့်အဖြစ် ကစားခဲ့တဲ့ ဒီပွဲမှာ ဆဗီတိုလီနာက ၂-၆၊ ၆-၄၊ ၇-၆ နဲ့ အနိုင်ရပြီး ကွာတားဖိုင်နယ်အဆင့် ရောက်ရှိခဲ့တာပါ။ ဒီပွဲအပြီးမှာ အဇာရန်ကာဟာ ဆဗီတိုလီနာနဲ့ လက်ဆွဲ နှုတ်ဆက် ခဲ့ခြင်းမရှိဘဲ ထွက်ခွာသွားတာကြောင့် ပရိသတ်တွေက လှောင်ပြောင်မှုတွေ ပြုလုပ်ခဲ့တာဖြစ်ပါတယ်။ 

ယူကရိန်းတင်းနစ်မယ် ဆဗီတိုလီနာဟာ နိုင်ငံအတွင်းမှာ စစ်ပွဲစတင်ဖြစ်ပွားပြီးကတည်းက ရုရှား၊ ဘယ်လာရုစ် အားကစားသမားတွေနဲ့ လက်ဆွဲနှုတ်ဆက်ခြင်းမရှိတော့ပါဘူး။ ဆဗီတိုလီနာဟာ ဒီအကြောင်းကို အကြိမ်ပေါင်း များစွာပြောခဲ့ပေမယ့် တင်းနစ်ကွင်းက ထွက်သွားတဲ့အချိန်မှာ ဘယ်လာရုစ်တင်းနစ်မယ် အဇာရန်ကာဟာ လှောင်ပြောင်မှုခံခဲ့ရတာဖြစ်ပါတယ်။

အဇာရန်ကာက “ကျမ ဘာလုပ်သင့်လဲ၊ ဆက်ရှိပြီး၊ စောင့်နေရမှာလား။ သူမက ရုရှား၊ ဘယ်လာရုစ်က လူတွေနဲ့ လက်ဆွဲမနှုတ်ဆက်ချင်ပါဘူး။ သူမရဲ့ ဆုံးဖြတ်ချက်ကို ကျမလေးစားရမှာပါ။ ဒီပွဲက အလွန်ကောင်းတဲ့ပွဲလို့ ကျမ ထင်ပါတယ်။ ဒါပေမယ့် လူတွေက လက်ဆွဲနှုတ်ဆက်တာနဲ့ လူအုပ်ကြီးကိုပဲ အာရုံစိုက်နေပြီး အရက်တွေမူးနေတဲ့ လူအုပ်ကြီးက အဆုံးမှာ အော်ဟစ်လှောင်ပြောင်နေမယ်ဆိုရင်တော့ ဒါက ရှက်ဖို့ကောင်းပါတယ်။ ဒါက တင်းနစ်ပွဲ ဖြစ်ပြီး ဘယ်သူမှဘဝကို ပြောင်းလဲမှာမဟုတ်ပါဘူး။ ကျမတို့က တင်းနစ်ကစားပြီး ကိုယ့်အလုပ်ကိုယ်လုပ်နေတာ” လို့ ပွဲအပြီးမှာ ပြောခဲ့ပါတယ်။

ဆဗီတိုလီနာကတော့ ရုရှားတပ်တွေ ယူကရိန်းကနေ မထွက်ခွာမချင်းနဲ့ သူတို့သိမ်းပိုက်ထားတဲ့ နယ်မြေတွေကို ပြန်မပေးမချင်း ရုရှား၊ ဘယ်လာရုစ်အားကစားသမားတွေနဲ့ လက်ဆွဲနှုတ်ဆက်မှာ မဟုတ်ဘူးလို့ ပြောထား ခဲ့တာပါ။ ဒါ့အပြင် သူမက ဒါကို ရှင်းရှင်းလင်းလင်းပြောထားတာဖြစ်ပြီး ဒီထက်ပိုပြီး မရှင်းလင်းနိုင်တော့ဘူးလို့ ပြောခဲ့တာဖြစ်ပါတယ်။

ဆဗီတိုလီနာဟာ ဝင်ဘယ်လ်ဒန်အိုးပန်းကွာတားဖိုင်နယ်အဆင့်မှာ ပိုလန်တင်းနစ်မယ် ဆွီယာတက်ခ်နဲ့ ယှဉ်ပြိုင် ရမှာ ဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဇူလိုင် ၁၀

အာဂျင်တီးနားကြယ်ပွင့် ဒိုင်ဘားလားက အခုနွေရာသီ အပြောင်းအရွှေ့မှာ ချယ်လ်ဆီးအသင်းထံ ပြောင်းရွှေ့နိုင် တယ်ဆိုတဲ့ ထင်ကြေးတွေကို ငြင်းဆန်လိုက်ပြီး ရိုးမားအသင်းမှာပဲ ဆက်ရှိမယ်လို့ ပြောခဲ့ပါတယ်။

ဒိုင်ဘားလားက “ ဇူလိုင်လ ၁၀ ရက်မှာ စတင်မယ့် ရာသီကြိုအတွက် ကျနော်စိတ်အား ထက်သန်နေပါတယ်။ ကျနော့်ရဲ့ အနာဂတ်ကတော့ ရိုးမားအသင်းမှာ ပျော်ရွှင်နေပါတယ်။ ကျနော် ဒီမှာပဲ ဆက်ရှိမှာပါ”လို့ ပြောပါတယ်။ 

ဒိုင်ဘားလားနဲ့ ရိုးမားအသင်းတို့ ချုပ်ဆိုထားတဲ့ စာချုပ်ထဲမှာ အီတလီပြင်ပ ကလပ်အသင်းတွေက ခေါ်ယူမယ် ဆိုရင် စာချုပ်ဖျက်သိမ်းကြေး ယူရို ၁၂ သန်းနဲ့ ထွက်ခွာခွင့်ပေးမယ်ဆိုတဲ့ အချက်ပါဝင်နေတာ ဖြစ်ပါတယ်။

အဲဒါကြောင့် ချယ်လ်ဆီးအသင်းဟာ ဒိုင်ဘားလားကို ခေါ်ယူဖို့ အံ့အားသင့်ဖွယ် ချိတ်ဆက်နေတယ်လို့ သတင်းတွေ ထွက်ပေါ်လာခဲ့တာပါ။

ချယ်လ်ဆီးနည်းပြသစ် ပိုချက်တီနိုဟာ ဒိုင်ဘားလားကို အားပေးတဲ့ ပရိသတ်ဖြစ်ပြီး သူ့ကို ခေါ်ယူဖို့ ပီအက်စ်ဂျီနဲ့ စပါးအသင်းတွေကို ကိုင်တွယ်ချိန်က ကြိုးစားခဲ့ဖူးပါတယ်။

ပိုချက်တီနိုနဲ့ ဒိုင်ဘားလားကိုတွေ့ရစဉ်

အခု လန်ဒန်ကလပ်ကို ကိုင်တွယ်ချိန်မှာ ဒိုင်ဘားလားကို ခေါ်ယူနိုင်ဖို့ ထပ်ပြီး စိတ်ဝင်စားနေပါတယ်။ 

ဒါအပြင် ချယ်လ်ဆီးအသင်း နောက်ခံလူ သီယာဂိုဆေးလ်ဗားကလည်း ဗြိတိန်ဂရမ်းပရီ ဖော်မြူလာဝမ်းပြိုင်ပွဲမှာ ဒိုင်ဘားလားနဲ့ တွေ့ဆုံချိန် စတမ်းဖို့ဒ်ဘရစ်ချ်ထံ လာရောက်ဖို့ ပြောခဲ့တယ်လို့ သိရပါတယ်။

ဒိုင်ဘားလားဟာ အင်္ဂလန်မှာ ကျင်းပနေတဲ့ နာမည်ကြီး အားကစားပြိုင်ပွဲတွေကို ကြည့်ဖို့ ရောက်နေတာဖြစ်ပြီး လက်ရှိ အချိန်မှာတော့ ရာသီကြိုလေ့ကျင့်မှုတွေ ပြုလုပ်ဖို့ အီတလီကို ပြန်လည်ရောက်ရှိနေပြီ ဖြစ်ပါတယ်။

ချယ်လ်ဆီးအသင်းဟာ ရာသီသစ်အတွက် လိုက်ပ်ဇစ်အသင်းက အန်ကန်ကူနဲ့ ဗီလာရီးရယ်လ်အသင်းက ဂျက်ဆန် တို့ကို ခေါ်ယူခဲ့ပြီး တိုက်စစ်နေရာအတွက် အားဖြည့်မှုတွေကို ပြုလုပ်နေကာ ဒိုင်ဘားလားကို ခေါ်ယူဖို့ ပစ်မှတ် ထားနေတာ ဖြစ်ပါတယ်။

ဒိုင်ဘားလားဟာ ပြီးခဲ့တဲ့ရာသီက ရိုးမားအသင်းအတွက် ပြိုင်ပွဲစုံ ၃၈ ပွဲပါဝင်ကစားခဲ့ပြီး ၁၈ ဂိုးသွင်းယူကာ အသင်းကို ယူရိုပါလိဂ်ဗိုလ်လုပွဲ ရောက်ရှိအောင် ပို့ဆောင်ပေးနိုင်ခဲ့ပါတယ်။

Source: Metro

CNI Sport News

၂၀၂၃ ခုနှစ်၊ ဇူလိုင် ၈

ချယ်လ်ဆီး အသင်းခေါင်းဆောင်ဟောင်း ဂျွန်တယ်ရီဟာ လက်စတာအသင်းမှာ လက်ထောက်နည်းပြအဖြစ် တာဝန်ယူပြီး တစ်လမပြည့်ခင်မှာ အသင်းဟောင်းရဲ့ အကယ်ဒမီထံ ပြန်လည်ရောက်ရှိလာခဲ့တယ်လို့ အတည် ပြုခဲ့ပါတယ်။ 

အသက် ၄၂ နှစ်အရွယ်ရှိ အင်္ဂလန် အသင်းခေါင်းဆောင်ဟောင်းဟာ ဒိန်းစမစ် ကိုင်တွယ်ခဲ့တဲ့ လက်စတာအသင်း ထံ နည်းပြအဖွဲ့ဝင်အဖြစ် မပူးပေါင်းချိန် ၂၀၂၂ ခုနှစ်က ချယ်လ်ဆီးအသင်းမှာ နည်းပြအကြံပေးအဖြစ် ရှိနေခဲ့တာ ပါ။

ဂျွန်တယ်ရီဟာ လက်စတာအသင်း ပရီးမီးယားလိဂ် ပြိုင်ပွဲကနေ တန်းဆင်းသွားခဲ့ပြီးနောက် အသင်းနဲ့ သက်တမ်း တိုးခြင်းမရှိဘဲ ထွက်ခွာခဲ့တာ ဖြစ်ပါတယ်။

ဂျွန်တယ်ရီက “အသင်းအကယ်ဒမီမှာ အလုပ်လုပ်ကိုင်ပြီး အိမ်ကိုပြန်လာခဲ့ရတဲ့ အတွက်နဲ့ ကလပ်မှာ ကျနော့်ရဲ့ အခန်းကဏ္ဍကို ဆက်ပြီး လုပ်ကိုင်ခွင့်ရတဲ့အတွက် အလွန်ဝမ်းသာမိပါတယ်”လို့ အင်စတာဂရမ်မှာ ရေးသားခဲ့ပါ တယ်။

လက်စတာအသင်းမှာ ဂျွန်တယ်ရီ နည်းပြအဖွဲ့၀င်အဖြစ် အလုပ်လုပ်ခဲ့စဉ်

ဂျွန်တယ်ရီဟာ ချယ်လ်ဆီးအသင်းမှာ ကစားခဲ့တဲ့ ၁၉ နှစ်ကြာ ကာလအတွင်းမှာ ပရီးမီးယားလိဂ်ဖလား ၅ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလားပေါင်း ၁၇ လုံး ရယူနိုင်ခဲ့ပြီး အသင်းရဲ့ အအောင်မြင်ဆုံး အသင်း ခေါင်းဆောင်အဖြစ် မှတ်တမ်းရေးထိုးနိုင်ခဲ့ပါတယ်။ 

ချယ်လ်ဆီးပရိသတ်တွေဟာ ဂျွန်တယ်ရီအသင်းထံ ပြန်လာခဲ့တဲ့အတွက် ဝမ်းမြောက်ကြောင်းကို သူတို့ရဲ့ ဆိုရှယ် မီဒီယာတွေမှာ ရေးသားခဲ့ကြပါတယ်။

ချယ်လ်ဆီးအသင်းအတွက် ပွဲပေါင်း ၇၁၇ ပွဲ ပါဝင်ကစားပြီး ၆၇ ဂိုး သွင်းယူနိုင်ခဲ့တဲ့ ဂျွန်တယ်ရီဟာ လက်ထောက် နည်းပြအဖြစ် လက်စတာအသင်းမှာ တာဝန်မယူခင် အက်စတွန်ဗီလာအသင်းမှာ ၂၀၁၈ ခုနှစ်ကနေ ၂၀၂၁ ခုနှစ် အထိ ဆောင်ရွက်ခဲ့ပါတယ်။

Source: CNA

CNI Sport News

၂၀၂၃ ခုနှစ်၊ ဇူလိုင် ၈

ပိုချက်တီနိုဟာ ချယ်လ်ဆီးနည်းပြသစ်အဖြစ် ပထမဆုံးအကြိမ်ပြုလုပ်တဲ့ သတင်းစာရှင်းလင်းပွဲမှာ အသင်းအနေနဲ့ မန်စီးတီးကို ယှဉ်ပြိုင်နိုင်တယ်ဆိုတဲ့ ယုံကြည်မှုရှိဖို့လိုတယ်လို့ ပြောပါတယ်။

ပိုချက်တီနိုက “အခုအချိန်မှာ ကျနော်တို့ဟာ ကြီးကျယ်ခမ်းနားတဲ့ အရာတွေကို ဖန်တီးနိုင်တယ်လို့ ယုံကြည်မှုရှိရ မှာ ဖြစ်သလို မန်စီးတီးအသင်းနဲ့ ယှဉ်ပြိုင်နိုင်မယ်လို့လည်း ယုံကြည်မှုရှိရပါမယ်။ ကျနော့်ရဲ့ ပစ်မှတ်နဲ့ ရည်မှန်း ချက်က အနိုင်ရဖို့ပါပဲ။ ကောင်းမွန်စွာ ကစားတာက ကျနော်တို့ရဲ့ ပုံစံ၊ အတွေးအခေါ်နဲ့ ယဉ်ကျေးမှုပါပဲ။ ချယ်လ်ဆီးလို အသင်းမှာ အနိုင်မရဘူးဆိုရင်တော့ ခင်ဗျားရုန်းကန်ရမှာပါ။ စည်းလုံးညီညွတ်မှုကို ဖန်တီးဖို့က ခက်ခဲပေမယ့် အတူတူ လုပ်ဆောင်မယ်ဆိုရင်တော့ ပရီးမီးယားလိဂ်မှာ ကျနော်တို့ ဆုဖလားထပ်ပြီး ရယူနိုင်ဖို့ နီးစပ်နိုင်ပါတယ်”လို့ ပြောပါတယ်။

အာဂျင်တီးနား လူမျိုးနည်းပြဟာ ချယ်လ်ဆီးအသင်းကို နည်းပြသစ်အဖြစ် ကိုင်တွယ်နေပြီး ရာသီသစ်အတွက် ရာသီကြို လေ့ကျင့်မှု အစီအစဉ်တွေကို စတင်နေပြီလည်း ဖြစ်ပါတယ်။ 

ချယ်လ်ဆီးအသင်းဟာ ပြီးခဲ့တဲ့ရာသီက ရလဒ်ဆိုးတွေကြောင့် နည်းပြ အပြောင်းအလဲ ၃ ဦးအထိ ပြုလုပ်ခဲ့ရပြီး ပရီးမီးယားလိဂ်ပြိုင်ပွဲမှာ အဆင့် ၁၂ နေရာနဲ့ ရာသီအဆုံးသတ်ခဲ့တာပါ။ 

ချယ်လ်ဆီးအသင်းကိုတွေ့ရစဉ်

ပိုချက်တီနိုဟာ ချယ်လ်ဆီးအသင်း နည်းပြသစ်အဖြစ် မခန့်အပ်ခံရခင် စပါးအသင်းထံ ပြန်ဖို့ ချိတ်ဆက်ခံခဲ့ ရပေမယ့် လန်ဒန်မြို့ခံ ပြိုင်ဘက်ကိုသာ ရွေးချယ်ခဲ့တာ ဖြစ်ပါတယ်။

ချယ်လ်ဆီးအသင်းဟာ အခုနွေရာသီ အပြောင်းအရွှေ့မှာ အသင်းရဲ့ အဓိက ကစားသမား အများအပြား ထွက်ခွာ ခဲ့လို့ ခက်ခဲမှုတွေနဲ့ ရင်ဆိုင်ရနိုင်တယ်လို့ သုံးသပ်မှုတွေလည်း ရှိနေကြတာပါ။ 

ပိုချက်တီနိုကတော့ လက်ရှိရှိနေတဲ့ အစုအဖွဲ့နဲ့ အကောင်းဆုံး လုပ်ဆောင်ဖို့ မျှော်လင့်နေပါတယ်။

ပိုချက်တီနိုက “စိန်ခေါ်မှုတွေ ဘယ်လောက်များလဲ ဒါမှမဟုတ် အခက်အခဲဆုံးဆိုတဲ့ အရာတွေကို ကျနော်မတွေး ပါဘူး။ အရေးကြီးဆုံးက မျှတတဲ့ လူစာရင်းရရှိဖို့ပါ။ ကစားသမား အရေအတွက်တွေကို လျှော့ချပြီး လေ့ကျင့်ရေး ကွင်းမှာ ကောင်းမွန်တဲ့ ဖန်တီးမှုတွေကို လုပ်ဆောင်ဖို့ စီစဉ်ထားပါတယ်။ ကျနော်တို့ဟာ အစကတည်းက အကောင်းဆုံးပေးဖို့ လိုအပ်ပါတယ်”လို့ ပြောခဲ့ပါတယ်။

Source: BBC

CNI Sport News

၂၀၂၃ ခုနှစ်၊ ဇူလိုင် ၈

ယူနိုက်တက်နဲ့ အေဂျတ်စ်ဂိုးသမားဟောင်း ဗန်ဒါဆားဟာ ခရိုအေးရှားမှာရှိနေတဲ့ အားလပ်ရက်အတွင်းမှာ ဦးနှောက်သွေးယိုစီးမှုဖြစ်ပွားခဲ့တာကြောင့် အထူးကြပ်မတ်ကုသဆောင်မှာ ကုသမှု ခံယူနေရတာဖြစ်ပါတယ်။

အသက် ၅၂ နှစ်အရွယ်ရှိ ဗန်ဒါဆားကို ဇူလိုင်လ ၇ ရက်က ရဟတ်ယာဉ်နဲ့ ဆေးရုံကိုပို့ဆောင်ခဲ့ရတာဖြစ်ပေမယ့် တည်ငြိမ်တဲ့ အခြေအနေမှာရှိနေတယ်လို့ သူ့ရဲ့ အသင်းဟောင်း အေဂျတ်စ်အသင်းရဲ့ ထုတ်ပြန်ချက်အရ သိရတာ ပါ။ ဒီထက်ပိုမိုတိကျတဲ့ အချက်အလက်တွေရရှိရင် ဗန်ဒါဆားရဲ့ နောက်ဆုံးရအခြေအနေတွေကို ဆက်လက် ထုတ်ပြန်ပေးသွားမှာဖြစ်ပေမယ့် အေဂျတ်စ်မှာရှိတဲ့လူတိုင်းက သူအမြန်ဆုံးပြန်ကောင်းလာဖို့အတွက် ဆုတောင်း နေကြတယ်လို့ ဒတ်ချ်ကလပ်က ပြောခဲ့တာဖြစ်ပါတယ်။

ယူနိုက်တက်နဲ့ သူ့ရဲ့အသင်းဟောင်းတွေကလည်း ကစားသမားအမြန်ဆုံးပြန်ကောင်းလာဖို့အတွက် ဆုတောင်း နေကြတယ်လို့ ဆိုရှယ်မီဒီယာတွေပေါ်မှာ ရေးသားခဲ့ကြတာပါ။ ဗန်ဒါဆားဟာ ပြီးခဲ့တဲ့ မေလကမှ ၇ နှစ်ကြာ တာဝန်ထမ်းဆောင်ခဲ့တဲ့ အေဂျတ်စ်အသင်းရဲ့ အမှုဆောင်အရာရှိချုပ်ရာထူးကနေ နုတ်ထွက်ခဲ့တာဖြစ်ပါတယ်။ 

အေဂျတ်စ်အသင်းဟာ ပြီးခဲ့တဲ့ရာသီက အမှတ်ပေးလိဂ်ပြိုင်ပွဲမှာ တတိယနေရာသာ ရရှိခဲ့ပြီး ၁၄ နှစ်တာကာလ အတွင်း ပထမဆုံးအကြိမ် ချန်ပီယံလိဂ်ပြိုင်ပွဲယှဉ်ပြိုင်ခွင့် ဆုံးရှုံးခဲ့ရတာပါ။ အဲဒါကြောင့် ဗန်ဒါဆားဟာ ခက်ခဲတဲ့ ရာသီအဆုံးမှာ မောပန်းနေပြီလို့ ပြောကာ အေဂျတ်စ်အသင်းကနေ ထွက်ခွာခဲ့တာဖြစ်ပါတယ်။ 

နယ်သာလန်လက်ရွေးစင်အသင်းအတွက် ပွဲပေါင်း ၁၃၀ ပါဝင်ကစားခဲ့တဲ့ ဗန်ဒါဆားဟာ ဂျူဗင်တပ်စ်၊ ဖူလ်ဟမ်နဲ့ ယူနိုက်တက်အသင်းတွေထံ မပြောင်းရွှေ့ခင် အေဂျတ်စ်အသင်းမှာ ကြီးမားတဲ့ အောင်မြင်မှုတွေ ရယူနိုင်ခဲ့တာပါ။ ဗန်ဒါဆားဟာ ယူနိုက်တက်အသင်းနဲ့အတူ ပရီးမီးယားလိဂ်ဖလား ၄ ကြိမ်၊ ချန်ပီယံလိဂ်ဖလား ၁ ကြိမ်အပါအဝင် ဆုဖလားအောင်မြင်မှုအများအပြား ရယူနိုင်ခဲ့တာဖြစ်ပါတယ်။ 

ကစားသမားဘဝမှာ တစ်ဦးချင်းအောင်မြင်မှုတွေလည်း အများကြီးရယူနိုင်ခဲ့တဲ့ ဗန်ဒါဆားဟာ ၂၀၁၁ ခုနှစ်မှာ ကစားသမားဘဝကနေ အနားယူပြီးနောက် အသင်းဟောင်း အေဂျတ်စ်အသင်းမှာ ဘုတ်အဖွဲ့ဝင်နဲ့ အမှုဆောင် အရာရှိချုပ်ရာထူးတွေကို ရယူခဲ့တာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဇူလိုင် ၇

အသလက်တီကိုအသင်းက ကျောနံပါတ် ၇ ဂျာစီမှာ သူ့ရဲ့ နာမည်ကို ဖယ်ရှားလိုက်တာကြောင့် ပေါ်တူဂီကြယ်ပွင့် ဂျာအိုဖိလစ်ဟာ အခုနွေရာသီ အပြောင်းအရွှေ့မှာ ပီအက်စ်ဂျီအသင်းထံ ပြောင်းရွှေ့ဖို့ ရွေးချယ်ခဲ့တယ်လို့ ဒေးလီးမေးလ်က ဖော်ပြခဲ့ပါတယ်။

ပြီးခဲ့တဲ့ ရာသီရဲ့ ဒုတိယရာသီဝက်မှာ ချယ်လ်ဆီးအသင်းထံ အငှားသွားရောက် ကစားခဲ့တဲ့ ဂျာအိုဖိလစ်ဟာ အသင်းရဲ့ ရလဒ်ပိုင်းကို တိုးတက်မှုရရှိအောင် မလုပ်ဆောင်ပေးနိုင်ခဲ့တာကြောင့် နည်းပြသစ် ပိုချက်တီနိုက သူ့ကို အပြီးသတ် မခေါ်ယူဖို့ ဆုံးဖြတ်ခဲ့ပါတယ်။

အဲဒါကြောင့် ပေါ်တူဂီကစားသမားဟာ အသလက်တီကိုအသင်းထံ ပြန်ပြီး တခြားပစ်မှတ်တွေကို ရွေးချယ်ရမှာ ဖြစ်ပါတယ်။ စပိန်ကလပ်ကလည်း ဂျာအိုဖိလစ်ကို အခုအပြောင်းအရွှေ့မှာ ရောင်းချဖို့ ပြင်ဆင်ထားတာပါ။

အဲဒါကြောင့်လည်း အသလက်တီကိုအသင်းဟာ အသင်းမှာ သူဝတ်ဆင်ခဲ့တဲ့ ကျောနံပါတ် ၇ ကို တိုက်စစ်မှူး ဂရဇ်မန်းထံ လွှဲပြောင်းပေးဖို့ ဆုံးဖြတ်ခဲ့တာ ဖြစ်ပါတယ်။ 

ဂရစ်ဇ်မန်းဟာ အသလက်တီကိုအသင်းမှာ ပထမအကြိမ် ကစားခဲ့တုန်းက ကျောနံပါတ် ၇ ဂျာစီကို ဝတ်ဆင်ခဲ့ တာဖြစ်ပြီး ဘာစီလိုနာအသင်းထံ ပြောင်းရွှေ့သွားချိန်မှာ ဂျာအိုဖိလစ်က ဒီနံပါတ်ကို ဝတ်ဆင်ခဲ့ရတာပါ။

ဂရစ်ဇ်မန်းနဲ့ ဂျာအိုဖိလစ်ကို တွေ့ရစဉ်

အခုအချိန်မှာ အသလက်တီကိုအသင်းက ဂရစ်ဇ်မန်းကို ကျောနံပါတ် ၇ ပြန်ပေးခဲ့တာကြောင့် ဂျာအိုဖိလစ်ရဲ့ အနာဂတ်နဲ့ ပတ်သက်ပြီး သတင်းတွေ ထွက်ပေါ်လာခဲ့တာ ဖြစ်ပါတယ်။

အသလက်တီကိုနည်းပြ ဆီမြွန်နီနဲ့ ဂျာအိုဖိလစ်တို့ရဲ့ ဆက်ဆံရေးဟာ တင်းမာနေတာကြောင့် နှစ်ဦးသား အလုပ် အတူတူတွဲလုပ်ဖို့ မဖြစ်နိုင်တော့ဘူးလို့ Relevo သတင်းမှာ ဖော်ပြထားတာပါ။ 

အဲဒါကြောင့်လည်း ပီအက်စ်ဂျီအသင်းက ဂျာအိုဖိလစ်အတွက် ရွေးချယ်စရာ ဖြစ်လာခဲ့ပြီး ပြင်သစ်ကလပ် နည်းပြသစ် လူးဝစ်အင်းနရစ်ဟာ ပေါ်တူဂီကစားသမားကို အသင်းထံ ခေါ်ယူချင်နေတယ်လို့ သိရပါတယ်။

အသက် ၂၃ နှစ်အရွယ်ရှိ ဂျာအိုဖိလစ်နဲ့ အသလက်တီကို အသင်းတို့ ချုပ်ဆိုထားတဲ့ စာချုပ်ဟာ ၂၀၂၇ ခုနှစ်မှာ ကုန်ဆုံးမှာဖြစ်ပြီး စပိန်ကလပ်ကတော့ ကစားသမားအတွက် ကလပ်စံချိန်တင် ပြောင်းရွှေ့ကြေး ပေါင် ၈၅ သန်း လိုချင်နေတာ ဖြစ်ပါတယ်။ 

ဒီပြောင်းရွှေ့ကြေးနဲ့ နီးစပ်တဲ့ ပမာဏ မရဘူးဆိုရင်တော့ အသလက်တီကိုအသင်းဟာ ဂျာအိုဖိလစ်ကို အသင်းမှာ ဆက်ပြီးထားရှိမယ်လို့ သတင်းမှာ ဖော်ပြထားပါတယ်။

Source: Daily Mail

CNI Sport News

၂၀၂၃ ခုနှစ်၊ ဇူလိုင် ၇

ဟဲဗီးဝိတ်တန်းတွေဖြစ်တဲ့ အန်သိုနီဂျိုရွှာနဲ့ ဒီလီယန်ဝှိုက်တို့ရဲ့ မကျေပွဲကို သြဂုတ် ၁၂ ရက် လန်ဒန်မှာရှိတဲ့  O2 Arena မှာ ကျင်းပသွားဖို့ ရှိပါတယ်။

၂၀၁၅ ခုနှစ်က သူတို့နှစ်ဦး ထိုးသတ်ခဲ့တဲ့ပွဲမှာ အန်သိုနီဂျိုရွှာက ၇ ချီမြောက်မှာ ဒီလီယန်ဝှိုက်ကို အလဲထိုးနဲ့ အနိုင် ရရှိခဲ့တာပါ။ 

အိုလံပစ် ရွှေတံဆိပ်ဆုရှင်ဖြစ်တဲ့ အန်သိုနီဂျိုရွှာဟာ ကမ္ဘာ့ချန်ပီယံဆုကို ၂ ကြိမ်ရရှိထားပြီး ဒီလီယန်ဝှိုက်ကတော့ ၂၀၂၂ ခုနှစ်မှာ တိုင်ဆန်ဗျူရီကို အရေးနိမ့်ခဲ့တဲ့ပွဲက သူ့ရဲ့ တစ်ပွဲတည်းသော ချန်ပီယံဆုကို စိန်ခေါ်တဲ့ ပွဲအဖြစ် လည်း မှတ်တမ်းဝင်ထားတာ ဖြစ်ပါတယ်။

အန်သိုနီဂျိုရွှာက “ဒီနှစ်မှာ ကျနော့်ရဲ့ အစီအစဉ်က တက်ကြွနေမယ်ဆိုတာ ရှင်းပါတယ်။ သြဂုတ် ၁၂ ရက်မှာ ထိုးမယ့်ပွဲအတွက်လည်း ကျနော့်ဘက်က အဆင်သင့်ဖြစ်နေပါပြီ။ ဒီပွဲကို အကောင်းဆုံး ယှဉ်ပြိုင်နိုင်ဖို့လည်း မျှော်လင့်ထားပါတယ်”လို့ ပြောပါတယ်။

အန်သိုနီဂျိုရွှာဟာ အခုနှစ်ဧပြီလက ဖရန်ကလင်မ်ကို အနိုင်ရပြီးနောက် ဒီပွဲက အခုနှစ်ထဲမှာ ထိုးသတ်မယ့် ဒုတိယမြောက်ပွဲလည်း ဖြစ်တာပါ။ 

အန်သိုနီဂျိုရွှာကိုတွေ့ရစဉ်

ဒီလီယန်ဝှိုက်ကလည်း နောက်ဆုံးပွဲအဖြစ် ဖရန်ကလင်မ်နဲ့ ပြီးခဲ့တဲ့နှစ် နိုဝင်ဘာလက ထိုးသတ်ခဲ့ပြီး အနိုင်ရရှိခဲ့ တာ ဖြစ်ပါတယ်။ 

ဒီလီယန်ဝှိုက်ဟာ အပျော်တမ်း လက်ဝှေ့သမားအဖြစ် အန်သိုနီဂျိုရွှာကို အနိုင်ရပြီးနောက်မှာ သူတို့နှစ်ဦးရဲ့ ခါးသီးတဲ့ ပြိုင်ဆိုင်မှုကို ဖန်တီးခဲ့တာလို့ သိရပါတယ်။ ပရော်ဖက်ရှင်နယ်အဖြစ် ထိုးသတ်ခဲ့တဲ့ ၂၀၁၅ ခုနှစ်က ပွဲမှာတော့ အန်သိုနီဂျိုရွှာဟာ အပျော်တမ်းဘဝက ရှုံးပွဲကို ပြန်လက်စား ချေနိုင်ခဲ့တာပါ။

ဒီလီယန်ဝှိုက်က “သြဂုတ်လ ၁၂ ရက် လန်ဒန်မှာ ထိုးသတ်မယ့်ပွဲကို ပြန်လာပြီး တိုက်ပွဲဝင်ဖို့ ကျနော်စောင့်မျှော် နေပါတယ်။ အခုက ၁ ပွဲစီ အနိုင်ရထားပြီးပြီဆိုတော့ လာမယ့်ပွဲက အဆုံးအဖြတ်ဖြစ်လာမှာပါ”လို့ ပြောခဲ့ပါတယ်။

အန်သိုနီဂျိုရွှာနဲ့ ဒီလီယန်ဝှိုက်တို့ဟာ ပရော်ဖက်ရှင်နယ် လက်ဝှေ့သမားဘဝမှာ ရှုံးပွဲ ၃ ပွဲစီ ကြုံတွေ့ထားတယ်လို့ အချက်အလက်တွေမှာ ဖော်ပြထားပါတယ်။

Source:BBC