CNI Sport News

၂၀၂၃ ခုနှစ်၊ စက်တင်ဘာ ၁

မန်စီးတီးအသင်းတိုက်စစ်မှူး ဟာလန်းဟာ ယူအီးအက်ဖ်အေရဲ့ တစ်နှစ်တာအကောင်းဆုံးအမျိုးသား ကစား သမားဆုကို ရရှိသွားခဲ့ပါတယ်။ 

အသက် ၂၂ နှစ်အရွယ်ရှိ ဟာလန်းဟာ မန်စီးတီးအသင်းနဲ့အတူ ပြီးခဲ့တဲ့ဘောလုံးရာသီက ပရီးမီးယားလိဂ်၊ FA ဖလားနဲ့ ချန်ပီယံလိဂ်ဖလားတို့ကို ရယူနိုင်ခဲ့တာပါ။ အဲဒါကြောင့် ဟာလန်းဟာ ယူအက်ဖ်အေရဲ့ဆုပေးပွဲမှာ တစ်နှစ်တာအကောင်းဆုံးအမျိုးသားကစားသမားဆုကို မန်စီးတီးအသင်းဖော် ဒီဘရိုင်းနဲ့ အာဂျင်တီးနား အသင်း ခေါင်းဆောင် မက်ဆီတို့ကို ကျော်ဖြတ်ပြီး ရရှိသွားခဲ့တာဖြစ်ပါတယ်။ ဟာလန်းဟာ ပြီးခဲ့တဲ့ရက်ပိုင်းကမှ PFA တစ်နှစ်တာအကောင်းဆုံးကစားသမားဆုကို ရရှိထားတာပါ။

ဟာလန်းက “ကျနော်ဟာ အသက် ၂၂ နှစ်အရွယ်မှာ ဆုဖလား ၃ လုံးရယူနိုင်ခဲ့ပါတယ်။ ကျနော်ဟာ အိပ်မက်ထဲမှာ ရှင်သန်နေရတာပါ။ ချန်ပီယံလိဂ်ဆုဖလားကို ရယူပြီးနောက်မှာ ကျနော်နဲ့ အသင်းကို ပိုပြီးတော့ မျက်စိတွေကျ လာပါလိမ့်မယ်။ ကျနော်တို့ဟာ ဒီထက်ပိုပြီးကောင်းဖို့အတွက် ပိုပြီးပြင်ဆင်ရမယ်” လို့ ဆုပေးပွဲအခမ်းအနားမှာ ပြောခဲ့ပါတယ်။

အမျိုးသမီးတစ်နှစ်တာအကောင်းဆုံးကစားသမားဆုကို စပိန်အသင်းနဲ့အတူ ၂၀၂၃ အမျိုးသမီး ကမ္ဘာ့ဖလား ချန်ပီယံဆုရယူနိုင်ခဲ့တဲ့ ဘွန်မာတီက ရရှိသွားခဲ့တာပါ။ ဘွန်မာတီဟာ အမျိုးသမီးကမ္ဘာ့ဖလားပြိုင်ပွဲရဲ့ အကောင်းဆုံးကစားသမားဆုကိုရရှိခဲ့တဲ့အပြင် ကလပ်အသင်းဖြစ်တဲ့ ဘာစီလိုနာအသင်းနဲ့ စပိန်လိဂ်၊ ချန်ပီယံ လိဂ်ပြိုင်ပွဲတွေမှာ ချန်ပီယံဆုရရှိနိုင်ခဲ့တာဖြစ်ပါတယ်။

တစ်နှစ်တာအကောင်းဆုံးအမျိုးသားနည်းပြဆုကို မန်စီးတီးအသင်းနဲ့အတူ ဆုဖလား ၃ လုံးရယူနိုင်ခဲ့တဲ့ နည်းပြ ဂွာဒီယိုလာက ရရှိခဲ့တာပါ။ စပိန်လူမျိုးနည်းပြဟာ ခွဲစိတ်ကုသမှုခံယူထားတဲ့အတွက် ဒီဆုပေးပွဲကို တက်ရောက်ခဲ့ ခြင်းမရှိပါဘူး။ တစ်နှစ်တာအကောင်းဆုံးအမျိုးသမီးနည်းပြဆုကိုတော့ အင်္ဂလန်အမျိုးသမီးအသင်းနည်းပြ ဝီဂ်မန်း က ရရှိသွားခဲ့တာပါ။ ဝီဂ်မန်းဟာ အင်္ဂလန်အမျိုးသမီးအသင်းကို အမျိုးသမီးကမ္ဘာ့ဖလားပြိုင်ပွဲ ဗိုလ်လုပွဲ ရောက်ရှိ အောင် ပို့ဆောင်ပေးနိုင်ခဲ့တာကြောင့် ရရှိခဲ့တာဖြစ်ပါတယ်။

ယူအီးအက်ဖ်အေဥက္ကဋ္ဌက ချီးမြှင့်တဲ့အထူးဆုကိုတော့ ဂျာမနီတိုက်စစ်မှူးဟောင်း ကလိုဆေးက ရရှိသွားခဲ့ပါ တယ်။ 

Source:ChannelNewsAsia

CNI Sport News

၂၀၂၃ ခုနှစ်၊ ဩဂုတ် ၃၁

အင်္ဂလိပ်ဘောလုံးပြိုင်ပွဲတွေမှာ အချိန်ဆွဲကစားတာကို ရှောင်ရှားနိုင်ဖို့အတွက် အခုနှစ်ဘောလုံးရာသီက စတင်ပြီး နာကျင်အချိန်ပိုစည်းမျဉ်းအသစ်တွေကို အသုံးပြုနေတာက အဓိပ္ပါယ်မဲ့ပြီး ယူအီးအက်ဖ်အေပြိုင်ပွဲတွေမှာ အသုံးမပြုဘူးလို့ အကြီးအကဲတစ်ဦးဖြစ်သူ ဘိုဘန်က ပြောလိုက်ပါတယ်။

ဘိုဘန်က “ဒါက လုံးဝကို အဓိပ္ပါယ်မဲ့ပါတယ်။ ကျနော်တို့ဟာ အချိန်ပို ၁၂ မိနစ်၊ ၁၃ မိနစ်နဲ့ ၁၄ မိနစ်ပေးလိုက်ရင် ကစားသမားတွေအတွက် ကြီးမားတဲ့ ကြေကွဲစရာတွေဖြစ်နိုင်ပါတယ်။ ပွဲချိန် ၆၅ မိနစ်လောက်ကစားပြီးရင် ကွင်းလယ်ကစားသမားတစ်ဦးအနေနဲ့ ကျနော့်ရဲ့ အတွေအကြုံအရ ပြောရရင် ပင်ပန်းလာတဲ့အချိန်မှာ နောက်ထပ် ကစားဖို့က မိနစ် ၃၀ ပဲရှိတော့တယ်။ အခုအချိန်ပိုထပ်ပြီး ပေးတဲ့အပေါ် ဝေဖန်နေကြတဲ့ ကစားသမားတွေနဲ့ နည်းပြတွေရဲ့ စကားကို သူတို့နားမထောင်ကြပါဘူး။ ကျနော်တို့ကတော့ ဒီလိုမျိုးမလုပ်ဘူး” လို့ ပြောခဲ့တာပါ။

ဖီဖာက ပြီးခဲ့တဲ့ အမျိုးသားနဲ့ အမျိုးသမီးကမ္ဘာ့ဖလားပြိုင်ပွဲတွေမှာ နာကျင်အချိန်ပိုမိနစ်တွေ အများကြီး ပေးပြီး နောက် အင်္ဂလန်ဒိုင်လူကြီးများအဖွဲ့ကလည်း လူစားလဲတာ၊ ဂိုးသွင်းပြီးအောင်ပွဲခံတာနဲ့ ဒဏ်ရာရတဲ့ အချိန်တွေမှာ ဆုံးရှုံးသွားတဲ့ အချိန်အတိအကျကို နာကျင်အချိန်ပိုမှာ ပေါင်းထည့်ပေးဖို့ ဆုံးဖြတ်ခဲ့တာဖြစ်ပါတယ်။ အဲဒါကြောင့် အခုနှစ်ရာသီ အင်္ဂလန်ဘောလုံးပွဲတွေရဲ့ ကစားချိန်ဟာ မိနစ် ၁၀၀ ကျော်လွန်နေခဲ့တာပါ။

မန်စီးတီးအသင်းကွင်းလယ်လူ ဒီဘရိုင်း၊ ယူနိုက်တက်အသင်းနောက်ခံလူ ဗာရန်းတို့အပါအဝင် နည်းပြတွေနဲ့ ကစားသမားတွေဟာ ဒီစည်းမျဉ်းအသစ်ကြောင့် ကစားသမားတွေအနေနဲ့ ပိုပြီးထိခိုက်နိုင်စေတယ်လို့ ဝေဖန်မှုတွေ ပြုလုပ်ခဲ့တာဖြစ်ပါတယ်။ ယူအီးအက်ဖ်အေကတော့ သူတို့လက်အောက်မှာရှိတဲ့ ပြိုင်ပွဲတွေမှာ ကစားသမားတွေကို ထိခိုက်စေမယ့် နာကျင်အချိန်ပို မိနစ်အများကြီးပေးတာကို အသုံးပြုသွားမှာ မဟုတ်ဘူးလို့ ပြောခဲ့တာပါ။

ယူအီးအက်ဖ်အေရဲ့ ဒိုင်လူကြီးအကြီးအကဲ ရိုဆက်တီက “နာကျင်အချိန်ပိုတွေရဲ့ တိကျမှုထက် ပိုပြီး အရေးကြီး တာရှိပါတယ်။ ချန်ပီယံလိဂ်ကို လူတွေက ဘာကြောင့် အရမ်းကြိုက်ကြတာလဲ။ ပွဲတွေက တကယ်ကို အကြိတ် အနယ်ရှိပြီး ကစားသမားတွေကလည်း ဘယ်တော့မှရပ်မနေကြပါဘူး။ နာကျင်အချိန်ပိုကို အာရုံစိုက်နေမယ့်အစား ပွဲကို အမြန်ဆုံးပြန်စတင်နိုင်ဖို့ကို ဒိုင်လူကြီးတွေထံ ကျနော်တို့ ပြောထားပါတယ်”လို့ ပြောခဲ့ပါတယ်။ 

Source:ChannelNewsAsia

CNI Sport News

၂၀၂၃ ခုနှစ်၊ ဩဂုတ် ၃၁

ဘရိုက်တန်အသင်းဟာ ဘာစီလိုနာအသင်းရဲ့ လူငယ်ကြယ်ပွင့် အန်ဆုဖာတီကို အခုနှစ်ရာသီအကုန်ထိ အံ့အားသင့်ဖွယ်အငှားဖြင့် ခေါ်ယူလိုက်ပါတယ်။

အခုနွေရာသီအပြောင်းအရွှေ့မှာ အန်ဆုဖာတီကို ခေါ်ယူဖို့ ချယ်လ်ဆီးအသင်းနဲ့ စပါးအသင်းတို့ကလည်း စိတ်ဝင်စားခဲ့ပေမယ့် ကစားသမားက ဘရိုက်တန်အသင်းထံ အငှားပြောင်းရွှေ့ဖို့ ရွေးချယ်ခဲ့တာပါ။ ဘရိုက်တန်နဲ့ ဘာစီလိုနာအသင်းတို့ဟာ အန်ဆုဖာတီအတွက် အငှားသဘောတူညီမှုမှာ အပြီးသတ်ဝယ်ယူခွင့် မပါဝင်တာ ကြောင့် ကစားသမားဟာ စာချုပ်ကုန်ဆုံးချိန်မှာ ဘာစီလိုနာအသင်းထံ ပြန်လည်သွားရောက်ရမှာဖြစ်ပါတယ်။

အန်ဆုဖာတီဟာ နည်းပြ ဒီဇာဘီလက်ထက် ဘရိုက်တန်အသင်းကစားတဲ့ပုံစံကို နှစ်သက်တာကြောင့် အခြား အသင်းတွေရဲ့ ကမ်းလှမ်းမှုကို ပယ်ချခဲ့တာပါ။ လာမာစီယာအကယ်ဒမီထွက် အန်ဆုဖာတီဟာ ဘာစီလိုနာ အသင်းမှာ ပုံမှန်ကစားခွင့်ရဖို့ ခက်ခဲနေတာကြောင့် သူ့ရဲ့ ခြေစွမ်းတွေကို အခြားတစ်သင်းမှာ သွားရောက် သက်သေပြဖို့အတွက် အငှားထွက်ခွာခဲ့တာဖြစ်ပါတယ်။ 

အစောပိုင်းက အန်ဆုဖာတီဟာ ဘာစီလိုနာအသင်းမှာ ပွဲထွက်ခွင့်တစ်နေရာရဖို့အတွက် တိုက်ပွဲဝင်ဖို့ ဆုံးဖြတ် ခဲ့ပေမယ့် ဆုံးဖြတ်ချက် ပြန်ပြောင်းသွားခဲ့တာပါ။ ဘာစီလိုနာအသင်းနဲ့ အန်ဆုဖာတီတို့ ချုပ်ဆိုထားတဲ့စာချုပ်ဟာ ၂၀၂၇ ခုနှစ်အထိ သက်တမ်းရှိနေပြီး စာချုပ်ထဲမှာ စာချုပ်ဖျက်သိမ်းကြေး ယူရို ၁ ဘီလီယံပါဝင်နေတာ ဖြစ်ပါ တယ်။

စပိန်ကစားသမားဟာ ဘာစီလိုနာအသင်းမှာ တောက်ပလာမယ့် ကြယ်ပွင့်ကစားသမားအဖြစ် သတ်မှတ်ခံခဲ့ ရပေမယ့် ဒဏ်ရာတွေကြောင့် အနားယူခဲ့ရပြီး ပြန်ကစားချိန်မှာ ခြေစွမ်းပြသနိုင်ဖို့ ရုန်းကန်ခဲ့ရလို့ ပွဲထွက်လူ စာရင်းမှာ ပါဝင်နိုင်ဖို့ ခက်ခဲခဲ့တာပါ။

ဘရိုက်တန်အသင်းဟာ အခုနှစ်ဘောလုံးရာသီမှာ ယူရိုပါလိဂ်ပြိုင်ပွဲကို ပထမဆုံးအကြိမ် ယှဉ်ပြိုင်ရမှာဖြစ်လို့ ကစားသမားသစ်တွေအားဖြည့်နေပြီး အန်ဆုဖာတီကို အငှားနဲ့ ခေါ်ယူနိုင်ခဲ့တာဖြစ်ပါတယ်။ 

ဘရိုက်တန်အသင်းဟာ ဒီရာသီ ပရီးမီးယားလိဂ် ၃ ပွဲကစားအပြီးမှာ ၂ ပွဲနိုင်၊ ၁ ပွဲရှုံး၊ ရမှတ် ၆ မှတ်နဲ့ အမှတ်ပေး ဇယားအဆင့် ၆ နေရာမှာ ရပ်တည်နေပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၃၁

ဟာရီကိန်းဟာ ဘိုင်ယန်မြူးနစ်အသင်းထံ ပြောင်းရွှေ့မယ့်နေ့မှာ အသင်းဖော်ဟောင်းတွေကို နှုတ်ဆက်ခွင့်ပြုဖို့ကို စပါးအသင်းက ငြင်းဆန်ခဲ့တယ်လို့ The Telegraph က ဖော်ပြထားပါတယ်။

အင်္ဂလန်အသင်းခေါင်းဆောင်ဟာ စပါးအသင်းမှာ ၁၉ နှစ်ကြာရှိခဲ့တာကို အဆုံးသတ်ပြီး ပေါင်သန်း ၁၀၀ နဲ့ ဘိုင်ယန်မြူးနစ်အသင်းထံ အခုနွေရာသီအပြောင်းအရွှေ့မှာ ပြောင်းရွှေ့ခဲ့တာပါ။ ဟာရီကိန်းဟာ ဘိုင်ယန်မြူးနစ် အသင်းထံ အပြီးသတ်ပြောင်းရွှေ့ဖို့အတွက် ထွက်ခွာမယ့်နေ့မှာ စပါးအသင်းဖော်ဟောင်းတွေကို နှုတ်ဆက်ချင် ခဲ့ပေမယ့် ငြင်းဆန်ခံခဲ့ရတာဖြစ်ပါတယ်။

ဟာရီကိန်းရဲ့ ကိုယ်စားလှယ်တွေကတော့ ဘိုင်ယန်မြူးနစ်အသင်းထံ ပြောင်းရွှေ့မယ့်နေ့မှာ စပါးအသင်း လေ့ကျင့်ရေးကွင်းထံ လာရောက်ဖို့ ပိတ်ပင်ခဲ့တဲ့အပေါ် မှတ်ချက်ပေးခဲ့ခြင်းတော့မရှိပါဘူး။ The Telegraph က ဟာရီကိန်းအနေနဲ့ ဘိုင်ယန်မြူးနစ်အသင်းထံ မပြောင်းရွှေ့ခင်မှာ စပါးအသင်းလေ့ကျင့်ရေးကွင်းထဲကို ပြန်ရောက် လာမှာက မသင့်တော်ဘူးဆိုပြီး ကလပ်အသင်းက အီမေးလ်ပေးပို့ခဲ့တယ်လို့ ဖော်ပြခဲ့ပါတယ်။

စပါးအသင်းဟာ စံချိန်တင်ဂိုးသွင်းရှင် ဟာရီကိန်းကို အသင်းမှာ ဆက်ပြီးထားဖို့ စီစဉ်ခဲ့ပေမယ့် ဘိုင်ယန်မြူးနစ် အသင်းက သူတို့လိုချင်တဲ့ ပြောင်းရွှေ့ကြေးပမာဏကို ပေးခဲ့သလို ကစားသမားကလည်း ပြောင်းရွှေ့ချင်နေတာ ကြောင့် အပြောင်းအရွှေ့ဖြစ်ဖို့ သဘောတူခဲ့တာပါ။ ဟာရီကိန်းကတော့ ဒီရာသီမှာ စပါးအသင်းက သူ့ကို မရောင်းချဘူးဆိုရင် စာချုပ်ကုန်ဆုံးမယ့်ရာသီအကုန်မှာ အလွတ်နဲ့ ထွက်ခွာဖို့ ဆုံးဖြတ်ထားတာဖြစ်ပါတယ်။

အသက် ၃၀ နှစ်အရွယ်ရှိ တိုက်စစ်မှူးဟာ အသင်းသစ် ဘိုင်ယန်မြူးနစ်အတွက် ၃ ပွဲပါဝင်ကစားအပြီးမှာ ၃ ဂိုး သွင်းယူကာ ခြေစွမ်းပြသနေပြီး ဒီအပတ်မှာ ဂျာမန်ချန်ပီယံအသင်းဟာ မိုချန်ဂလာဘတ်အသင်းနဲ့ ဘွန်ဒစ်လီဂါ ပွဲစဉ်ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ ဩဂုတ် ၃၁

စပိန်ဘောလုံးအဖွဲ့ချုပ်ဥက္ကဋ္ဌ ရူဘီယာလက်စ်ရဲ့ မိခင်ဟာ သားဖြစ်သူကို ပြင်းပြင်းထန်ထန်ဝေဖန်နေတဲ့အပေါ် ကန့်ကွက်တဲ့အနေနဲ့ အစာငတ်ခံဆန္ဒပြပြီးနောက် လက်ရှိအချိန်မှာ ဆေးရုံတင်ထားရတာဖြစ်ပါတယ်။

ရူဘီယာလက်စ်ရဲ့ မိခင် ဘီဂျာဟာ သြဂုတ် ၂၈ ရက်ကစပြီး မိုထရေလ်ရှိ ဘုရားကျောင်းတစ်ခုမှာ အစာငတ်ခံ ဆန္ဒပြနေတာပါ။ ရူဘီယာလက်စ်ဟာ ၂၀၂၃ အမျိုးသမီးကမ္ဘာ့ဖလားပြိုင်ပွဲဗိုလ်လုပွဲအပြီးမှာ စပိန်အမျိုးသမီး အသင်းကွင်းလယ်လူ ဟာမိုဆိုရဲ့ နှုတ်ခမ်းကို နမ်းခဲ့တဲ့အတွက် ပြင်းပြင်းထန်ထန်ဝေဖန်မှုတွေကို ခံခဲ့ရတာ ဖြစ်ပါတယ်။ အဲဒါကြောင့် မိခင်ဖြစ်သူ ဘီဂျာက သားဖြစ်သူအတွက် နေ့ရော၊ညပါ အစာငတ်ခံဆန္ဒပြမယ်လို့ စပိန်သတင်းဌာန EFE ကို ပြောခဲ့တာပါ။

ဘီဂျာဟာ အစာငတ်ခံဆန္ဒပြမှု တတိယမြောက်နေ့မှာတော့ ဆေးရုံတင်ခဲ့ရတယ်လို့ ခရစ်ယာန်ဘုန်းကြီး အန်တိုနီယိုက Reuters သတင်းဌာနကို ပြောခဲ့တာဖြစ်ပါတယ်။ အဲဒါကြောင့် သတင်းစာရှင်းလင်းပွဲပြုလုပ်ဖို့ စီစဉ်ထားတာကို ဖျက်သိမ်းခဲ့ရတာပါ။

အန်တိုနီယိုက “အပူနဲ့ အခြားအရာတွေကြောင့် သူမ နေမကောင်းဘူးဖြစ်နေပါတယ်။ ခြေဖဝါးတွေလည်း ရောင်နေပြီး သူမကို ကြည့်ရတာ အလွန်ပင်ပန်းနေပါတယ်။ သူမလည်းအလွန်ထိတ်လန့်နေတယ်” လို့ ဘုရားကျောင်းအပြင်ဘက်မှာရှိတဲ့ သတင်းထောက်တွေကို ပြောခဲ့တာဖြစ်ပါတယ်။

ခရစ်ယာန်ဘုန်းကြီး အန်တိုနီယိုက ရူဘီယာလက်စ်နဲ့ သူ့ရဲ့ မိခင်တို့ဟာ အဆက်အသွယ်ရှိတယ်လို့ အတည်ပြု ခဲ့တာပါ။ ရူဘီယာလက်စ်ဟာ စပိန်ဘောလုံးအဖွဲ့ချုပ်ဥက္ကဋ္ဌ ရာထူးကနေ နုတ်ထွက်မှာမဟုတ်ဘူးလို့ ပြောခဲ့ပြီး နောက် ဖီဖာက သူ့ကို ဘောလုံးလောကနဲ့ ပတ်သက်ခွင့်ဆိုင်းငံ့ထားတာဖြစ်ပါတယ်။ 

စပိန်ဘောလုံးအဖွဲ့ချုပ်အကြီးအကဲတွေဟာ ရူဘီယာလက်စ်ကို ရာထူးကနေ ချက်ချင်းနုတ်ထွက်ဖို့ တောင်းဆို ထားတာဖြစ်ပါတယ်။

ယူအီးအက်ဖ်အေအကြီးအကဲ ဆက်ဖာရင်က ရူဘီယာလက်စ်ရဲ့လုပ်ရပ်ဟာ မသင့်လျော်ဘူးလို့ ပြောထားတာပါ။

ဆက်ဖာရင်က “ကျနော်က ရှေ့နေဖြစ်သလို ဖီဖာဒုဥက္ကဋ္ဌတွေထဲက တစ်ဦးလည်းဖြစ်ပါတယ်။ ဒီလိုမျိုးအရာက စပိန်အသင်းရဲ့အောင်ပွဲခံမှုကို လွှမ်းမိုးသွားခဲ့တဲ့အတွက် စိတ်မကောင်းဖြစ်မိတယ်လို့ ပြောချင်ပါတယ်။ ကျနော်တို့ ဟာ အရာတွေကို ပြောင်းလဲသင့်ပါတယ်”လို့ ပြောခဲ့ပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၃၀

ချယ်လ်ဆီးနဲ့ စပါးအသင်းတို့ဟာ ဘာစီလိုနာအသင်းကြယ်ပွင့်ကစားသမား အန်ဆုဖာတီကို ခေါ်ယူဖို့ စိတ်ဝင်စား နေတယ်လို့ ဗြိတိန်မီဒီယာတွေက ဖော်ပြထားပါတယ်။

ဘာစီလိုနာအသင်းနည်းပြ ဇာဗီဟာ အန်ဆုဖာတီနဲ့ ပတ်သက်တဲ့အစီအစဉ်တွေကို သိသိသာသာ ပြောင်းလဲ သွားခဲ့ပြီးနောက် စပိန်ကစားသမားဟာ အသင်းကနေ ထွက်ခွာဖို့ စဉ်းစားလာခဲ့တာပါ။

အန်ဆုဖာတီရဲ့ အေးဂျင့် ဂျော့ချ်မန်ဒက်စ်ဟာ ကစားသမားရဲ့ လက်ရှိအခြေအနေတွေနဲ့ပတ်သက်ပြီး စပါးနဲ့ ချယ်လ်ဆီးအသင်းတို့ကို အသိပေးနေတာဖြစ်ပါတယ်။

လာမာစီယာအကယ်ဒမီထွက် အန်ဆုဖာတီဟာ ဒဏ်ရာတွေကြောင့် ပြီးခဲ့တဲ့ဘောလုံးရာသီမှာ စိတ်ပျက်စရာ တွေကို ကြုံတွေ့ခဲ့ရပေမယ့် နည်းပြ ဇာဗီလက်အောက်မှာ နေရာရဖို့အတွက် တိုက်ပွဲဝင်ချင်နေတယ်လို့ စပိန် သတင်းတွေက ဖော်ပြထားတာပါ။ ဒါပေမယ့် နွေရာသီအပြောင်းအရွှေ့ဈေးကွက်ပိတ်ဖို့ နီးကပ်လာချိန်မှာတော့ အန်ဆုဖာတီဟာ ဘာစီလိုနာအသင်းကနေ ထွက်ခွာဖွယ်ရှိနေတာဖြစ်ပါတယ်။

ချယ်လ်ဆီးနဲ့ စပါးအသင်းတို့ဟာ အပြောင်းအရွှေ့မပိတ်ခင်မှာ တိုက်စစ်ကစားသမားတစ်ဦးကို ခေါ်ယူနိုင်ဖို့ ရှာဖွေနေပြီး အန်ဆုဖာတီက သူတို့ရဲ့ ပစ်မှတ်ဖြစ်လာခဲ့ပါတယ်။ ဘာစီလိုနာအသင်းဟာ အန်ဆုဖာတီကို အသင်းရဲ့ အနာဂတ်ကစားသမားအဖြစ် သတ်မှတ်ထားပြီး မက်ဆီထွက်ခွာသွားချိန်မှာ ကျောနံပတ် ၁၀ ဂျာစီကိုပေး ဝတ်ဆင်ခဲ့တာပါ။ ဘာစီလိုနာအသင်းနဲ့ အန်ဆုဖာတီတို့ ချုပ်ဆိုထားတဲ့ စာချုပ်ဟာ ၂၀၂၇ ခုနှစ်အထိ သက်တမ်း ရှိနေတာဖြစ်ပါတယ်။

၂၀၁၉ ခုနှစ်က ဘာစီလိုနာအသင်းကြီးအတွက် စတင်ပွဲထွက်ခွင့်ရခဲ့တဲ့ အန်ဆုဖာတီဟာ စပိန်ကလပ်အတွက် ၁၁၂ ပွဲ ပါဝင်ကစားထားပြီး ၂၉ ဂိုးသွင်းယူထားကာ လာလီဂါ၊ကိုပါဒယ်လ်ရေးနဲ့ စပိန်စူပါဖလားတို့ကို ရယူထားနိုင်ခဲ့ တာပါ။ အန်ဆုဖာတီဟာ စပိန်လက်ရွေးစင်အသင်းအတွက်လည်း ၉ ပွဲပါဝင်ကစားထားပြီး ၂ ဂိုးသွင်းယူထားကာ ယူအီးအက်ဖ်အေနေးရှင်းလိဂ်ချန်ပီယံဆုကို ရရှိထားတာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ ဩဂုတ် ၃၀

ရာပီနိုးဟာ တောင်အာဖရိကအသင်းနဲ့ ခြေစမ်းပွဲမှာ အမေရိကန်အမျိုးသမီးအသင်းအတွက် နောက်ဆုံးပွဲစဉ်အဖြစ် ပါဝင်ကစားသွားမယ်လို့ နိုင်ငံရဲ့ ဘောလုံးအဖွဲ့ချုပ်က အတည်ပြုခဲ့ပါတယ်။ ဒီ ခြေစမ်းပွဲကို စက်တင်ဘာ ၂၄ ရက် ချီကာဂိုမှာ ကျင်းပသွားမှာပါ။

အသက် ၃၈ နှစ်အရွယ်ရှိ ရာပီနိုးဟာ NWSL လိဂ်ပြိုင်ပွဲပြီးဆုံးမယ့် နိုဝင်ဘာလမှာ ကစားသမားဘဝက အနားယူ တော့မယ်လို့ ပြီးခဲ့တဲ့ အမျိုးသမီးကမ္ဘာ့ဖလားပြိုင်ပွဲမတိုင်ခင်က ကြေညာခဲ့တာဖြစ်ပါတယ်။ ဝါရင့်ရှေ့တန်း ကစားသမားဟာ အမေရိကန်အမျိုးသမီးအသင်းအတွက် ကမ္ဘာ့ဖလားပြိုင်ပွဲ ၄ ကြိမ်ဝင်ရောက်ယှဉ်ပြိုင်ခဲ့ပြီး ၂၀၁၅ နဲ့ ၂၀၁၉ ခုနှစ်ကပြိုင်ပွဲတွေမှာ ချန်ပီယံဆုကို ရယူနိုင်ခဲ့တာပါ။ 

ရာပီနိုးဟာ အမေရိကန်အသင်းကို ၂၀၁၂ လန်ဒန်အိုလံပစ်ပြိုင်ပွဲမှာ ရွှေတံဆိပ်ဆုရရှိအောင်လည်း ကူညီပေးနိုင် ခဲ့ပါတယ်။ အမေရိကန်အသင်းဟာ ပြီးခဲ့တဲ့ အမျိုးသမီးကမ္ဘာ့ဖလားပြိုင်ပွဲမှာ ဆွီဒင်အသင်းကို ပင်နယ်တီ အဆုံးအဖြတ်မှာ အရေးနိမ့်ပြီး ၁၆ သင်းအဆင့်ကနေ ထွက်ခွာခဲ့ရတာပါ။ ရာပီနိုးဟာ ဆွီဒင်အသင်းနဲ့ပွဲမှာ ပင်နယ်တီလွဲချော်ခဲ့တဲ့ အမေရိကန်ကစားသမား ၃ ဦးထဲမှာ ၁ ဦးအပါအဝင်ဖြစ်ခဲ့ပါတယ်။

ရာပီနိုးက “လူတွေက ကျမကစားသမားဘဝကနေ အနားယူသွားလို့ ဝမ်းနည်းစရာကောင်းတယ်လို့ ထင်ကောင်းထင်ကြပေမယ့် ပွဲတွေကစားခဲ့တဲ့ နှစ်ပေါင်း ၃၀ ကို ပြန်ပြီးတွေးကြည့်ရင် ဝမ်းသာရပါတယ်။ ဒါဟာမယုံနိင်စရာခရီးစဉ်တစ်ခုပါပဲ။ ကျမနိုင်ငံအတွက် နောက်ဆုံးအခွင့်အရေးကို ရခဲ့တာကတော့ ထူးခြား ပါတယ်။ ကစားသမားတစ်ဦးအနေနဲ့ရော၊ လူပုဂ္ဂိုလ်တစ်ဦးအနေနဲ့ပါ နှစ်ပေါင်းများစွာလက်တွဲခဲ့တဲ့ အသင်းဖော် တွေနဲ့ အားလုံးကို ကျေးဇူးတင်ဖို့ အခွင့်အရေးရမှာပါ” လို့ ပြောခဲ့ပါတယ်။

ရာပီနိုးဟာ အမေရိကန်အသင်းအတွက် ၂၀၃ ပွဲ၊ သွင်းဂိုး ၆၃ ဂိုး၊ ဂိုးဖန်တီးမှု ၇၃ ဂိုးနဲ့ နိုင်ငံလက်ရွေးစင် ကစားသမားဘဝကို အဆုံးသတ်တော့မှာပါ။ ရာပီနိုးဟာ LGBT+ အခွင့်အရေးတွေနဲ့ အမျိုးသမီးဘောလုံး သမားတွေအတွက် လစာတန်းတူညီမျှရရှိဖို့အတွက် တိုက်ပွဲဝင်နေတဲ့သူအဖြစ်လည်း ရပ်တည်နေတာဖြစ်ပါတယ်။

Source:ChannelNewsAsia

CNI Sport News

၂၀၂၃ ခုနှစ်၊ ဩဂုတ် ၃၀

စပါးအသင်းဟာ ကာရာဘောင်းဖလားဒုတိယအဆင့်အဖြစ် ဖူလ်ဟမ်အသင်းနဲ့ ကစားခဲ့တာမှာ ပင်နယ်တီ အဆုံးအဖြတ်နဲ့ အရေးနိမ့်ပြီး ပြိုင်ပွဲကနေ ထွက်ခွာခဲ့ရပါတယ်။

ပွဲချိန်အတွင်းမှာ ဖူလ်ဟမ်အသင်းက စပါးအသင်းကစားသမား ဗန်ဒီဗန်ရဲ့ ကိုယ့်ဂိုးကိုယ်သွင်းယူမှုနဲ့ ဦးဆောင် နိုင်ခဲ့ပေမယ့် ရစ်ချာလီဆန်က စပါးအသင်းအတွက် ချေပဂိုးပြန်သွင်းခဲ့လို့ ၁ ဂိုးစီသရေနဲ့ ပင်နယ်တီ အဆုံး အဖြတ်ခံယူခဲ့ရတာပါ။ ပင်နယ်တီအဆုံးအဖြတ်မှာ ဖူလ်ဟမ်အသင်းက ၅ ဂိုးစလုံးဝင်ခဲ့ပြီး စပါးအသင်းဘက်က ဒါဗန်ဆန် ဆန်းချက်ဇ်ဂိုးမဝင်ခဲ့လို့ ဖူလ်ဟမ်အသင်း ၅ ဂိုး- ၃ ဂိုးနဲ့ အနိုင်ရပြီး နောက်တစ်ဆင့် တက်နိုင်ခဲ့တာ ဖြစ်ပါတယ်။

ပရီးမီးယားလိဂ်ပြိုင်ပွဲ ၃ ပွဲကစားအပြီးမှာ ရှုံးပွဲမရှိရလဒ်ကောင်းတွေရနေတဲ့ စပါးအသင်းဟာ ဒီရာသီ ပြည်တွင်း ဖလားပြိုင်ပွဲတစ်ခုဖြစ်တဲ့ ကာရာဘောင်းဖလားပြိုင်ပွဲကနေ စောစီးစွာထွက်ခွာခဲ့ရတာပါ။ စပါး အသင်းဟာ ဖူလ်ဟမ်အသင်းနဲ့ပွဲမှာ ကစားသမား ၉ ဦးအထိပြောင်းလဲပြီး ပွဲထွက်ခဲ့ပေမယ့် နည်းပြ ပိုစတီကိုဂလူးက သူ့ရဲ့ ဆုံးဖြတ်ချက်ကို ကာကွယ်သွားခဲ့ပါတယ်။

ပိုစတီကိုဂလူးက “ကျနော့်ကစားသမားတွေကို ကျနော်ဘယ်လိုရှာဖွေရမှာလဲ။ ကစားသမားတွေကို ပါဝင်နိုင်ဖို့ အတွက် အခွင့်အရေးပေးဖို့ လိုအပ်ပါတယ်။ ကျနော်လုပ်ခဲ့တဲ့ အပြောင်းအလဲတွေက အံ့သြစရာတော့ မဟုတ် ပေမယ့် ကျနော်တို့ အကောင်းဆုံးမလုပ်ဆောင်နိုင်ခဲ့ကြပါဘူး။ အသင်းဟာ ကြီးထွားလာနိုင်မယ့် နည်းလမ်းမျိုးစုံ ရှိသလို စရိုက်လက္ခဏာအစစ်အမှန်ကိုလည်း ကျနော်တို့ပြသခဲ့ပါတယ်။ ဒုတိယပိုင်းမှာ ကျနော်တို့ဟာ အနိုင်ရဖို့ အတွက် အချိန်တွေရှိခဲ့ပေမယ့် ပင်နယ်တီမှာ ရှုံးနိမ့်သွားခဲ့ပါတယ်”လို့ ပြောခဲ့တာပါ။

စပါးအသင်းဟာ ပရီးမီးယားလိဂ် ပွဲစဉ် ၄ အဖြစ် ဘန်လေအသင်းနဲ့ စက်တင်ဘာ ၂ ရက် အဝေးကွင်းမှာ ယှဉ်ပြိုင် ရမယ်လို့ သိရပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၃၀

ပရော်ဖက်ရှင်နယ်ဘောလုံးသမားများအစည်းအရုံး(PFA)ကပေးတဲ့ တစ်နှစ်တာအကောင်းဆုံးကစားသမားဆုကို မန်စီးတီးအသင်းတိုက်စစ်မှူး ဟာလန်းက ရရှိသွားခဲ့ပါတယ်။

အသက် ၂၃ နှစ်အရွယ်ရှိတိုက်စစ်မှူးဟာ မန်စီးတီးအသင်းအတွက် ပွဲဦးထွက်ခဲ့တဲ့ ပြီးခဲ့တဲ့ရာသီက ပြိုင်ပွဲစုံသွင်းဂိုး ၅၂ ဂိုးအထိ သွင်းယူနိုင်ခဲ့ပြီး အသင်းနဲ့အတူ ဆုဖလား ၃ လုံးရယူနိုင်ခဲ့တာပါ။ ဟာလန်းဟာ PFA တစ်နှစ်တာ အကောင်းဆုံးကစားသမားဆုကို မန်စီးတီးအသင်းဖော်တွေဖြစ်တဲ့ ဒီဘရိုင်းနဲ့ဂျွန်စတုန်းစ်၊ အာဆင်နယ်အသင်းက ဆာကာနဲ့ အိုဒီဂတ်၊ စပါးအသင်းကစားသမားဟောင်း ဟာရီကိန်းတို့ကို ကျော်ဖြတ်ပြီး ရရှိခဲ့တာဖြစ်ပါတယ်။

ဟာလန်းက “ဒီလိုဂုဏ်ထူးဆောင်ဆုကို ရယူနိုင်ခဲ့တာက ဂုဏ်ယူစရာပါပဲ။ ပြိုင်ဘက်တွေရဲ့ အသိအမှတ်ပြု ခံရတာက အလွန်ကောင်းမွန်တဲ့ခံစားချက်ဖြစ်ပြီး ကျနော့်ကို မဲပေးခဲ့တဲ့သူတွေအားလုံးကို ကျေးဇူးတင်တယ်လို့ ပြောချင်ပါတယ်။ ပြီးခဲ့တဲ့ရာသီဟာ ကျနော့်အတွက်ရော အသင်းအတွက်ပါ မမေ့နိုင်တဲ့ရာသီပါ။ ဆုဖလား ၃ လုံး ကိုရယူနိုင်ဖို့က ကျနော်ဘယ်တုန်းကမှ စိတ်ကူးထဲတောင် မတွေးဖူးတဲ့အရာဖြစ်ပါတယ်။ အခုနှစ်မှာလည်း မနှစ်ကလိုပဲ ထပ်ပြီးလုပ်ချင်ပါတယ်” လို့ ဆုယူအပြီးမှာ ပြောခဲ့တာပါ။

တစ်နှစ်တာအကောင်းဆုံးလူငယ်ကစားသမားဆုကိုတော့ အာဆင်နယ်အသင်းတောင်ပံကစားသမား ဆာကာက ရရှိခဲ့ပါတယ်။ အသက် ၂၁ နှစ်အရွယ်ရှိကစားသမားဟာ ပြီးခဲ့တဲ့ရာသီက ပြိုင်ပွဲစုံ ၁၅ ဂိုးအထိ သွင်းယူပြီး အာဆင်နယ်အသင်းကို ပရီးမီးယားလိဂ်ချန်ပီယံဆုရယူနိုင်ဖို့အတွက် အနီးစပ်ဆုံးအခြေအနေအထိ ရောက်ရှိ အောင် စွမ်းဆောင်ပေးနိုင်ခဲ့တာပါ။ 

အဲဒါကြောင့်လည်း ဆာကာဟာ ဟာလန်း၊ ကိုင်စီဒို၊ ရမ်ဆေး၊မာတင်နယ်လီနဲ့ အီဗန်ဖာဂူဆန်တို့ကို အနိုင်ရပြီး ဒီဆုကို ရယူနိုင်ခဲ့တာဖြစ်ပါတယ်။ ပရိသတ်တွေကပေးတဲ့ တစ်နှစ်တာအကောင်းဆုံးကစားသမားဆုကို ယူနိုက်တက်တိုက်စစ်မှူး ရက်ရှ်ဖိုဒ့်က ရရှိသွားခဲ့တာပါ။

PFA ရဲ့တစ်နှစ်တာအကောင်းဆုံးအသင်းမှာတော့ မန်စီးတီးနဲ့ အာဆင်နယ်အသင်းတို့ရဲ့ ကစားသမားတွေကသာ လွှမ်းမိုးထားနိုင်ခဲ့ပါတယ်။ ဂိုးသမားအဖြစ် ရမ်စဒေးလ်၊နောက်တန်းမှာ ထရစ်ပီယာ၊ ရူဘင်ဒီယက်ဇ်၊ဂျွန်စတုန်းစ်နဲ့ ဆာလီဘာ၊ ကွင်းလယ်မှာ ဒီဘရိုင်း၊ရိုဒရီနဲ့ အိုဒီဂတ်၊ ရှေ့တန်းမှာ ဆာကာ၊ ဟာလန်းနဲ့ ဟာရီကိန်းတို့ ပါဝင်ခဲ့ ကြတာဖြစ်ပါတယ်။

PFA အမျိုးသမီးတစ်နှစ်တာအကောင်းဆုံးကစားသမားဆုကို အက်စတွန်ဗီလာအသင်းတိုက်စစ်မှူး ရီချယ်ဒါလီက ရရှိခဲ့ပြီး အကောင်းဆုံးလူငယ်ကစားသမားဆုကိုတော့ ချယ်လ်ဆီးအသင်းတောင်ပံကစားသမား လော်ရန်ဂျိမ်းစ်က ရရှိသွားခဲ့ပါတယ်။

Source:BBC