CNI Sport News

၂၀၂၃ ခုနှစ်၊ ဇန်နဝါရီ ၆

ယူနိုက်တက်အသင်းဟာ သူ့ရဲ့အမြင်အတိုင်း အပြည့်အဝ အကောင်အထည်ဖော် လုပ်ဆောင်နေပေမယ့် ဆုဖလား ရယူဖို့ အကြောင်းပြောဖို့တော့ အဆင်သင့် မဖြစ်သေးဘူးလို့ နည်းပြ အဲရစ်တန်ဟတ်က ပြောခဲ့ပါတယ်။

အဲရစ်တန်ဟတ်က “အခုရာသီရဲ့ ဒီအချိန်မှာ ဆုဖလားတွေရယူဖို့ အကြောင်းနဲ့ ပတ်သက်ပြီး မစဉ်းစားထားပါဘူး။ အခုက ကျနော်တို့ ဖြစ်ချင်တဲ့ နေရာကို ရောက်နေပေမယ့် တစ်ပွဲပြီးတစ်ပွဲ သွားနေရတုန်းပါ။ ကျနော်တို့ဟာ ပြိုင်ပွဲတွေ အများကြီး ကစားရမှာပါ။ အဲ့ဒါကြောင့် တစ်ပွဲပြီးတစ်ပွဲပဲ အာရုံစိုက် သွားမှာဖြစ်ပြီး ကြိုပြီး တွေးတော နေမှာ မဟုတ်ဘူး”လို့ ဆုဖလားရယူနိုင်တာနဲ့ ပတ်သက်ပြီး မေးမြန်းချိန်မှာ ပြောခဲ့တာပါ။

ယူနိုက်တက်အသင်းဟာ၂၀၁၆-၁၇ ရာသီက ယူရိုပါလိဂ်ဖလား ရယူပြီးနောက်ပိုင်း ၅ နှစ်ကြာ ဆုဖလားလက်မဲ့နဲ့ ဖြတ်သန်းခဲ့ရတာဖြစ်ပါတယ်။

နည်းပြ တန်ဟတ် လက်အောက်မှာမှ ဆုဖလားရအောင် ယှဉ်ပြိုင်ဖို့ မျှော်လင့်ချက်တွေ ရှိလာခဲ့တာ ဖြစ်ပါတယ်။

နည်းပြ အဲရစ်တန်ဟတ်ကိုတွေ့ရစဉ်

ယူနိုက်တက်အသင်းဟာ လက်ရှိ ပရီးမီးယားလိဂ် ပြိုင်ပွဲမှာ အဆင့် ၄ နေရာမှာ ရပ်တည်နေပြီး ကာရာဘောင်း ဖလားမှာ ကွာတားဖိုင်နယ်အဆင့်ကို ရောက်ရှိနေတာပါ။ ဒါ့အပြင် ယူရိုပါလိဂ်နဲ့ အက်ဖ်အေဖလား ယှဉ်ပြိုင်ဖို့ လည်း ရှိနေတာ ဖြစ်ပါတယ်။

အဲရစ်တန်ဟတ်က “ကျနော်တို့ဟာ ပွဲတွေမှာ တိုးတက်အောင် လုပ်ရမယ့် အချက်တွေ အများကြီးရှိပါတယ်။ ကောင်းတာလောက်နဲ့ မလုံလောက်တဲ့အတွက် ကစားသမားတွေကို တွန်းအားပေးရမှာပါ။ အဖွဲ့ထဲမှာလည်း အချင်းချင်း တွန်းအားပေးပြီး ထိပ်တန်းအဆင့်အတွက် အခွင့်အရေးရလာရင် အဆင်သင့် ဖြစ်နေရပါမယ်။ ကျနော် အဓိက အာရုံစိုက်တာက အသင်းတိုးတက်အောင် လုပ်ဆောင်ဖို့ပါ”လို့ ပြောခဲ့တာပါ။

ယူနိုက်တက်အသင်းဟာ လက်ရှိ ပရီးမီးယားလိဂ် အမှတ်ပေးဇယားကို ဦးဆောင်နေတဲ့ အာဆင်နယ်အသင်းနဲ့ ၉ မှတ် ကွာဟနေတာကြောင့် ဆုဖလားရယူနိုင်ဖို့ မျှော်လင့်ချက်ရှိနေတာ ဖြစ်ပါတယ်။ ယူနိုက်တက်အသင်းဟာ အက်ဖ်အေဖလား ပွဲစဉ်အဖြစ် အဲဗာတန်အသင်းနဲ့ ကစားအပြီးမှာ ကာရာဘောင်းဖလား ပွဲစဉ်အဖြစ် ချာလ်တန် အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ ဇန်နဝါရီ ၆

ပေါ်တူဂီစူပါစတား ရော်နယ်ဒိုဟာ ဆော်ဒီကလပ်ရဲ့ နိုင်ငံခြားသားကစားသမား ခွဲတမ်းကျော်လွန်နေတာကြောင့် ပွဲထွက်ခွင့်ရဖို့ စောင့်ဆိုင်းနေရဦးမယ်လို့ ကလပ်သတင်းရင်းမြစ်တွေက ဇန်နဝါရီ ၅ ရက်က AFP သတင်းဌာနကို ပြောခဲ့တာဖြစ်ပါတယ်။

အယ်လ်နာဆာအသင်းတာဝန်ရှိသူတစ်ဦးက “နိုင်ငံခြားသားကစားသမားနေရာအတွက် လစ်လပ်မှုမရှိတာကြောင့် အယ်လ်နာဆာအသင်းဟာ ရော်နယ်ဒိုကို စာရင်းမသွင်းရသေးပါဘူး။ နိုင်ငံခြားသားကစားသမားတစ်ဦးကို ရောင်းချတာ ဒါမှမဟုတ်၊ နှစ်ဦးသဘောတူစာချုပ်ဖျက်သိမ်းပြီး ထွက်ခွာသွားမှသာ ရော်နယ်ဒိုကို စာရင်းသွင်း မှတ်ပုံတင်လို့ရမှာ” လို့ AFP သတင်းဌာနကို ပြောခဲ့တာပါ။

ရော်နယ်ဒိုဟာ အယ်လ်နာဆာအသင်းရဲ့ ကစားသမားသစ်အဖြစ် တရားဝင်မိတ်ဆက်ခဲ့ပြီးနောက် ကြာသပတေး နေ့မှာ ကစားရမယ့် အယ်လ်တာအီအသင်းနဲ့ ပွဲစဉ်ကစတင်ကာ အမြန်ဆုံးပွဲထွက်ကစားဖို့ မျှော်လင့်နေတာ ဖြစ်ပါတယ်။ဆော်ဒီကလပ်နဲ့ ၂၀၂၅ အထိ စာချုပ်ချုပ်ဆိုထားတဲ့ ရော်နယ်ဒိုဟာ အယ်လ်နာဆာအသင်းရဲ့ ၉ ဦး မြောက် နိုင်ငံခြားသားကစားသမား ဖြစ်လာခဲ့တာပါ။

ဆော်ဒီဘောလုံးအာဏာပိုင်တွေက အသင်းတစ်သင်းမှာ နိုင်ငံခြားသားကစားသမား ၈ ဦးအထိ ခွင့်ပြုထားတာ ကြောင့် အယ်လ်နာဆာအသင်းဟာ ၁ ဦးပိုနေခဲ့တာဖြစ်ပါတယ်။အယ်လ်နာဆာအသင်း ပွဲစဉ်ဟာ ဇန်နဝါရီ ၅ ရက် မှာ ကစားဖို့ ရှိခဲ့ပေမယ့် မိုးသည်းထန်စွာရွာသွန်းတဲ့အတွက် လျှပ်စစ်ပြတ်တောက်မှုတွေဖြစ်ခဲ့လို့ ပွဲကို သောကြာ နေ့မှာ ကစားဖို့ ရွှေ့ဆိုင်းခဲ့တာပါ။

အယ်လ်နာဆာအသင်းရဲ့ နိုင်ငံခြားသားကစားသမားတွေထဲမှာ ကိုလံဘီယာဂိုးသမား အော်စပီနာ၊ ဘရာဇီးလ်က ဂူစတာဗိုနဲ့ တယ်လီစကာ၊ ကင်မရွန်းတိုက်စစ်မှူး အဘူဘာကာတို့လို နာမည်ကြီးကစားသမားတွေ ပါဝင်နေတာ ဖြစ်ပါတယ်။ဆော်ဒီသတင်းတွေမှာ ဥဇဘတ်ကစ္စတန်ကစားသမား မာရှာရီပေါ့ဗ်က အသင်းကထွက်ရဖို့ အလား အလာအများဆုံးကစားသမားလို့ ဖော်ပြခဲ့တာပါ။ရော်နယ်ဒိုကို ကြာသပတေးနေ့အထိ ကလပ်အသင်းရဲ့ လူစာရင်း မှာ စာရင်းမသွင်းရသေးဘူးလို့ ဒုတိယမြောက်ကလပ်အသင်း အရင်းအမြစ်က ပြောခဲ့တာပါ။

ရော်နယ်ဒိုဟာ ယူနိုက်တက်အသင်းမှာကစားခဲ့တုန်းက အဲဗာတန်ပရိသတ်လက်ထဲက ဖုန်းကို လက်နဲ့ ရိုက်ချ ခဲ့တာကြောင့် ၂ ပွဲပယ်ပြစ်ဒဏ်ချမှတ်ခံထားရတာဖြစ်ပါတယ်။ဒီပြစ်ဒဏ်ဟာ ဆော်ဒီကလပ်မှာလည်း ဆက်ပြီး သက်ရောက်မှုရှိတယ်လို့ နိုင်ငံတကာသတင်းတွေအများအပြားက ဖော်ပြထားတာဖြစ်ပါတယ်။

Source:ChannelNewsAsia

CNI Sport News

၂၀၂၃ ခုနှစ်၊ ဇန်နဝါရီ ၅

လက်ချီအသင်းနောက်ခံလူ အမ်တီတီဟာ လာဇီယိုအသင်းပရိသတ်တွေရဲ့ လူမျိုးရေးခွဲခြားခံခဲ့ရပြီးနောက် ကွင်းထဲကနေ ငိုကြွေးပြီး ထွက်ခွာသွားခဲ့တယ်လို့ သိရပါတယ်။

ဒီပွဲမှာ လက်ချီအသင်းဟာ အရေးနိမ့်နေတာကနေ ချေပဂိုးနဲ့ အနိုင်ဂိုးသွင်းပြီး လာဇီယိုအသင်းကို ၂ ဂိုး- ၁ ဂိုးနဲ့ အနိုင်ရခဲ့တာဖြစ်ပါတယ်။ဒါပေမယ့် ပြီးခဲ့တဲ့နွေရာသီက ဘာစီလိုနာအသင်းဆီကနေ ရောက်ရှိလာတဲ့ အမ်တီတီ အပါအဝင် လက်ချီကစားသမားတွေကို လာဇီယိုပရိသတ်တွေရဲ့ လူမျိုးရေးခွဲခြားမှုက ပွဲကို လွှမ်းမိုးသွားခဲ့တာပါ။ အမ်တီတီနဲ့ အသင်းဖော် ဘန်ဒါတို့ကို အဓိကပစ်မှတ်ထားပြီး လာဇီယိုပရိသတ်တွေက လူမျိုးရေးခွဲခြားခဲ့တာ ဖြစ်ပါတယ်။

အမ်တီတီဟာ ပွဲအပြီးမှာ လက်ချီပရိသတ်တွေက သူ့နာမည်ကို အော်ဟစ်ခဲ့ကြပေမယ့် ကစားသမားကတော့ ငိုကြွေးပြီး ကွင်းထဲကနေ ထွက်ခွာခဲ့တာပါ။ဒီပွဲမှာ ပွဲစဉ်ကို ကြေညာတဲ့သူဟာ အဝေးကွင်းပရိသတ်တွေရဲ့ အော်ဟစ်မှုကို ရပ်ပေးဖို့ တောင်းဆိုပြီး ဝင်ရောက်စွက်ဖက်မှုတွေပြုလုပ်ခဲ့တာကြောင့် ကွင်းလယ်ဒိုင်လူကြီးက ပွဲကို မိနစ်အတော်ကြာအောင် ရပ်တန့်ခဲ့ရတာဖြစ်ပါတယ်။ အဲဒါကြောင့်လည်း အိမ်ကွင်းပရိသတ်တွေဟာ အမ်တီတီရဲ့နာမည်ကို အော်ဟစ်ခဲ့ကြတာပါ။လက်ချီအသင်းဥက္ကဋ္ဌကတော့ အမ်တီတီဟာ ပွဲကိုပြန်လည်စတင် ပေးဖို့ နောက်ဆုံးမှာ တောင်းဆိုခဲ့တယ်လို့ ပြောခဲ့ပါတယ်။

“ကျနော်က အမ်တီတီနဲ့အတူ သူ့ရဲ့ အသင်းဖော်တွေအားလုံးကို ပွေ့ဖက်ထားချင်ပါတယ်။ပွဲရလဒ်က ဘယ်လိုပဲ ဖြစ်ပါစေ။ကျနော်ကတော့ ကောင်လေးတွေနဲ့ နည်းပြအဖွဲ့ဝင်တွေကို နှုတ်ဆက်ချင်ပါတယ်။ ဒိုင်လူကြီးက ပွဲကို ရပ်ခဲ့ပြီး အစီအစဉ်ကြေညာသူက လူမျိုးရေးခွဲခြားတဲ့ အော်ဟစ်မှုတွေကို အဆုံးသတ်ဖို့ စောင့်ဆိုင်းနေခဲ့ပါတယ်။ အမ်တီတီကတော့ ဒါကို ပြန်တုန့်ပြန်နိုင်ဖို့ ပွဲကိုပြန်စဖို့ တောင်းဆိုခဲ့ပါတယ်။သူ့ရဲ့ တုန့်ပြန်မှုက တကယ့်ချန်ပီယံ တစ်ဦးလိုပါပဲ”လို့ လက်ချီအသင်းဥက္ကဋ္ဌက ပြောခဲ့တာဖြစ်ပါတယ်။

အမ်တီတီဟာ ဘာစီလိုနာအသင်းကနေ အငှားနဲ့ လာရောက်ကစားနေတာဖြစ်ပြီး လာဇီယိုနဲ့ပွဲဟာ သူ့ရဲ့ ဒီရာသီ စီးရီးအေ ၆ ပွဲမြောက်ပွဲစဉ်လည်း ဖြစ်ခဲ့ပါတယ်။

Source:Mirror

CNI Sport News

၂၀၂၃ ခုနှစ်၊ ဇန်နဝါရီ ၅

အဲဗာတန်အသင်းနည်းပြ လမ်းပတ်ဟာ ရာထူးကနေ ထုတ်ပယ်ခံရဖို့အတွက် ဖိအားတွေမြင့်တက်လာချိန်မှာ ဝိန်းရွန်နီဟာ မာဆေးဆိုဒ်ကလပ်ရဲ့ နည်းပြသစ်ဆန်ကာတင်စာရင်းမှာ ပါဝင်လာခဲ့တာဖြစ်ပါတယ်။

အဲဗာတန်အသင်းဟာ အိမ်ကွင်းပွဲစဉ်မှာ ဘရိုက်တန်အသင်းကို ၄ ဂိုး- ၁ ဂိုးနဲ့ အရေးနိမ့်ပြီးနောက် နည်းပြ လမ်းပတ်ရဲ့ ရာထူးဟာ မတည်မငြိမ်ဖြစ်လာခဲ့တာပါ။အဲဗာတန်အသင်းဟာ ပရီးမီးယားလိဂ် ၁၈ ပွဲကစားအပြီးမှာ ရမှတ် ၁၅ မှတ်နဲ့ တန်းဆင်းဇုန်အဆင့် ၁၈ နေရာမှာ ရောက်ရှိနေတာဖြစ်ပါတယ်။အဲဒါကြောင့် မာဆေးဆိုဒ် ကလပ်ဟာ လမ်းပတ်နေရာအစားထိုးဖို့ နည်းပြသစ်ရှာဖွေနေပြီး ဝိန်းရွန်နီဟာ ဘယ်လ်ဂျီယံနည်းပြဟောင်း မာတီးနတ်ဇ်နဲ့အတူ နည်းပြ ဆန်ကာတင်စာရင်းမှာ ပါဝင်နေခဲ့တာပါ။

ဘန်လေအသင်းနည်းပြဟောင်း ရှောင်ဒိုက်နဲ့ ဆဲလ်တစ်အသင်းနည်းပြ ပိုစတီကိုဂလူးတို့လည်း ဒီစာရင်းထဲမှာ ပါဝင်နေတာဖြစ်ပါတယ်။အဲဗာတန်အသင်းမှာ ၂ ကြိမ်ကစားခဲ့တဲ့ ဝိန်းရွန်နီဟာ လက်ရှိအချိန်မှာ မေဂျာလိဂ်ကလပ် ဒီစီယူနိုက်တက်အသင်းမှာ နည်းပြအဖြစ် ဆောင်ရွက်နေပြီး အဲဗာတန်ပရိသတ်တွေ သဘောကျနှစ်သက်တဲ့ သူလည်း ဖြစ်ပါတယ်။ဝိန်းရွန်နီဟာ လွန်ခဲ့တဲ့ ၁၂ လတုန်းက အဲဗာတန်အသင်းနည်းပြသစ် ဖြစ်လာဖို့ အခွင့်အရေး ရခဲ့ပေမယ့် ဒါဘီအသင်းမှာပဲ ဆက်ရှိခဲ့တာဖြစ်ပါတယ်။

အဲဗာတန်အသင်းပရိသတ်တွေဟာ အသင်းရလဒ်တွေကို စိတ်ပျက်နေတာဖြစ်ပေမယ့် လမ်းပတ်ကတော့ သူ့ရဲ့ နည်းပြရာထူးအတွက် ဆက်ပြီးတိုက်ပွဲဝင်သွားမယ်လို့ ပြောထားခဲ့တာပါ။လမ်းပတ်အနေနဲ့ အခုတစ်ပတ် ယူနိုက်တက်အသင်းနဲ့ကစားမယ့် အက်ဖ်အေဖလား တတိယအဆင့်ပွဲစဉ်မှာ အဲဗာတန်အသင်းကို ဆက်လက် ကိုင်တွယ်ခွင့်ရဖို့ ရှိနေတာဖြစ်ပါတယ်။

လမ်းပတ်ဟာ အဲဗာတန်အသင်းကို ပြီးခဲ့တဲ့နှစ် ဇန်နဝါရီက စတင်ကိုင်တွယ်ခဲ့တာဖြစ်ပြီး ပွဲပေါင်း ၄၁ ပွဲကိုင်တွယ် ထားတာမှာ ၁၂ ပွဲနိုင်၊ ၈ ပွဲသရေ၊ ၂၁ ပွဲအထိ ရှုံးနိမ့်ထားပြီး မနှစ်ကရာသီက တန်းဆင်းဇုန်ကနေ လွတ်မြောက် အောင် ကိုင်တွယ်ထားခဲ့တာဖြစ်ပါတယ်။

Source:The Sun

CNI Sport News

၂၀၂၂ ခုနှစ်၊ ဇန်နဝါရီ ၅

ပရီးမီးယားလိဂ် လက်ရှိချန်ပီယံ မန်စီးတီးအသင်း အနေနဲ့ အာဆင်နယ်ကို လိုက်မှီဖို့အတွက် ရုန်းကန်ရဖို့ ရှိပေမယ့် အကောင်းဆုံး လုပ်ဆောင်သွားမယ်လို့ နည်းပြ ဂွာဒီယိုလာက ပြောပါတယ်။

ဂွာဒီယိုလာက “ကျနော်တို့ဟာ ကောင်းမွန်စွာ ကစားပြီး ပွဲတွေ အများအပြား အနိုင်ရခဲ့ရင် အမှတ်ကွာဟမှုကို လျှော့ချနိုင်မှာ ဖြစ်ပါတယ်။ ဒါပေမယ့် အာဆင်နယ်အနေနဲ့ ဒီလိုပုံစံကို ဆက်ထိန်းပြီး ရမှတ် ၁၀၀ ထက်ပိုပြီး ရသွားမယ်ဆိုရင်တော့ ကျနော်တို့ သူတို့ကို လိုက်မှီနိုင်မှာ မဟုတ်ဘူး။ ကျနော်တို့ ဘက်ကလည်း ပြီးပြည့်စုံလု နီးပါးဖြစ်ဖို့ လိုအပ်ပြီး သူတို့ အမှတ်လျော့နိုင်ဖို့ မျှော်လင့်ပါတယ်”လို့ ဗုဒ္ဓဟူးနေ့က ပြုလုပ်တဲ့ သတင်းစာ ရှင်းလင်း ပွဲမှာ ပြောခဲ့တာပါ။

အာဆင်နယ်အသင်းဟာ နောက်ဆုံး ကစားထားတဲ့ ပရီးမီးယားလိဂ်ပွဲစဉ်မှာ နယူးကာဆယ်အသင်းနဲ့ ဂိုးမရှိ သရေကျခဲ့ပြီးနောက် ဒုတိယနေရာက မန်စီးတီးအသင်းကို ၈ မှတ်အထိ ဖြတ်ပြီး အမှတ်ပေးဇယား ထိပ်ဆုံး နေရာမှာ ဦးဆောင်နေတာ ဖြစ်ပါတယ်။

မန်စီးတီးအသင်း နည်းပြ ဂွာဒီယိုလာနဲ့ အာဆင်နယ်အသင်း နည်းပြ အာတီတာကိုတွေ့ရစဉ်

မန်စီးတီးအသင်း အနေနဲ့ ချယ်လ်ဆီးအသင်းနဲ့ ကစားမယ့်ပွဲမှာ အနိုင်ရခဲ့ရင်တော့ အမှတ်ကွာဟမှု ၅ မှတ်အထိ ပြန်လည် လျှော့ချနိုင်မှာပါ။

အာတီတာ ကိုင်တွယ်နေတဲ့ အာဆင်နယ်အသင်းဟာ ဒီရာသီမှာ အကောင်းဆုံးပုံစံကို ရရှိနေပြီး ၂၀၀၃-၀၄ နောက်ပိုင်း ပထမဆုံးအကြိမ် ပရီးမီးယားလိဂ် ချန်ပီယံဆုကို ပြန်လည် ရယူနိုင်ဖို့ စိတ်အားထက်သန်နေတာ ဖြစ်ပါတယ်။

အာဆင်နယ်အသင်းဟာ ပရီးမီးယားလိဂ် ၁၇ ပွဲ ကစားအပြီးမှာ အမြင့်ဆုံးရနိုင်တဲ့ ရမှတ် ၅၁ မှတ်ထဲကနေ ၄၄ မှတ်အထိ ရယူထားနိုင်ခဲ့တာပါ။

ဂွာဒီယိုလာက “ ဒါက ပရီးမီးယားလိဂ် ပြိုင်ပွဲဖြစ်ပြီး ပွဲတိုင်းခက်ခဲပါတယ်။ ကျနော့်ဆီ ခန့်မှန်းမှုတွေ တောင်းရင် မသိဘူးလို့ပဲ ပြောရမှာပါ။ အဆုံးထိ ဘာဖြစ်မလဲဆိုတာ ကျနော်တို့ မြင်တွေ့ရပါလိမ့်မယ်။ ကမ္ဘာ့လည်းပြီးပြီ ဆို တော့ အများကြီး ဖြစ်လာနိုင်တာတွေ ရှိပါတယ်။ ရက်သတ္တပတ်ပေါင်းများစွာလည်း ကျန်ရှိနေလို့ ဖြစ်နိုင်တဲ့ အရာတွေ အများကြီးပါ။ အခုထိ ပထမအကျော့ မပြီးသေးပါဘူး။ ဘာတွေဖြစ်လာမလဲဆိုတာ မြင်တွေ့ရ ပါလိမ့် မယ်”လို့ ပြောခဲ့ပါတယ်။

Source: CNA

CNI Sport News

၂၀၂၃ ခုနှစ်၊ ဇန်နဝါရီ ၅

ပေါ်တူဂီအသင်းခေါင်းဆောင် ရော်နယ်ဒိုအနေနဲ့ ဆော်ဒီနိုင်ငံရဲ့ လူ့အခွင့်အရေးကိစ္စရပ်တွေကို ဖြေရှင်းဖို့ သူ့ရဲ့ ပလက်ဖောင်းကို အသုံးပြုသင့်တယ်လို့ လူ့အခွင့်အရေးဆိုင်ရာအဖွဲ့အစည်းတစ်ခုဖြစ်တဲ့ Amnesty International က ပြောပါတယ်။

Amnesty ရဲ့ အရှေ့အလယ်ပိုင်းဆိုင်ရာ သုတေသီ ဒါနာအာမတ်က “ရော်နယ်ဒိုအနေနဲ့ နိုင်ငံတွင်း လူ့အခွင့်အရေး ကိစ္စရပ်တွေကို အာရုံစိုက်ဖို့ သူ့ရဲ့ပလက်ဖောင်းကို အသုံးပြုသင့်တယ်လို့ ထင်ပါတယ်။ဆော်ဒီအာရေဗျက လူသတ်မှု၊မုဒိမ်းမှု၊မူးယစ်ဆေးဝါးမှောင်ခိုမှုတွေနဲ့ လူတွေကို သေဒဏ်ပေးပါတယ်။အများစုက မျှတမှုမရှိတဲ့ စစ်ဆေးမှုတွေနဲ့ စီရင်ခံခဲ့ရပါတယ်။အာဏာပိုင်တွေက လွတ်လပ်စွာပြောဆိုမှုတွေကိုလည်း ဖြိုခွင်းခဲ့ပါတယ်။ လူ့အခွင့်အရေးကာကွယ်တဲ့သူတွေ၊ အမျိုးသမီးအခွင့်အရေးလှုပ်ရှားတဲ့သူတွေနဲ့ အခြားနိုင်ငံရေး တက်ကြွတဲ့သူ တွေကို ကြီးလေးတဲ့ ထောင်ဒဏ်တွေချမှတ်တယ်” လို့ ပြောခဲ့တာပါ။

အသက် ၃၇ နှစ်အရွယ်ရှိ ရော်နယ်ဒိုဟာ ဆော်ဒီကလပ် အယ်လ်နာဆာအသင်းနဲ့ တစ်နှစ်လုပ်ခ ယူရိုသန်း ၂၀၀ နဲ့ ၂၀၂၅ အထိ စာချုပ်ချုပ်ဆိုခဲ့ပြီး ကမ္ဘာ့လုပ်ခလစာ အများဆုံးကစားသမားဖြစ်ခဲ့ပါတယ်။ရော်နယ်ဒိုဟာ အယ်လ်နာဆာအသင်း ကစားသမားသစ်အဖြစ် မိတ်ဆက်ချိန်မှာ ဆော်ဒီနိုင်ငံကို အံသြဖွယ်ကောင်းတဲ့နိုင်ငံလို့ ပြောခဲ့တာပါ။Amnesty ကတော့ ရော်နယ်ဒိုကို ခေါ်ယူမှုဟာ အားကစားဆေးကြောခြင်းရဲ့ ကြီးမားတဲ့ အစိတ် အပိုင်းလို့ ပြောခဲ့တာဖြစ်ပါတယ်။

ဒါနာအာမတ်က “ရော်နယ်ဒိုအနေနဲ့ သူ့ရဲ့ ကျော်ကြားမှုအဆင့်အတန်းကို ဆော်ဒီနိုင်ငံရဲ့ အားကစား ဆေးကြော ခြင်း ကိရိယာတစ်ခုအဖြစ် ခွင့်ပြုမခံသင့်ပါဘူး။သူ့အနေနဲ့ နိုင်ငံတွင်း လူ့အခွင့်အရေး ကိစ္စရပ်အများအပြားကို ထုတ်ဖော်ပြောဆိုဖို့အတွက် အယ်လ်နာဆာမှာရှိနေတဲ့ သူ့အချိန်တွေကို အသုံးပြုသင့်ပါတယ်”လို့ ပြောခဲ့တာပါ။

ဆော်ဒီနိုင်ငံဟာ ဂေါ့ဖ်စီးရီးပြိုင်ပွဲ၊ လက်ဝှေ့ပွဲတွေနဲ့ ဖော်မြူလာဝမ်းပြိုင်ပွဲစတဲ့ အားကစားပွဲတွေကို လက်ခံကျင်းပ နိုင်ဖို့အတွက် ကြီးကြီးမားမား ရင်းနှီးမြှုပ်နှံထားတာဖြစ်ပါတယ်။ဒါ့အပြင် ၂၀၂၁ က နယူးကာဆယ်အသင်းကို ဝယ်ယူတာမှာလည်း ကြီးမားတဲ့နောက်ခံအဖြစ် ရှိခဲ့တာပါ။ဆော်ဒီနိုင်ငံဟာ အိမ်ရှေ့မင်းသား မိုဟာမက် ဘင်ဆယ်လ်မန်လက်ထက်မှာ အမျိုးသမီးတွေကို ကားမောင်းခွင့်ကို ပြန်လည်ခွင့်ပြုတာအပါအဝင် ပြုပြင် ပြောင်းလဲမှုအချို့ကို ပြုလုပ်ခဲ့တာဖြစ်ပါတယ်။

ဒါပေမယ့် ဆော်ဒီနိုင်ငံဟာ လူ့အခွင့်အရေးချိုးဖောက်မှုတွေနဲ့ စွပ်စွဲခံထားရပြီး အမျိုးသမီးအခွင့်အရေး လှုပ်ရှားသူ တွေကို ထောင်ချခဲ့တာမျိုးလည်း ပြုလုပ်ခဲ့ပါတယ်။ဒါ့အပြင် အိမ်ရှေ့မင်းသားက သတင်းထောက် ခါရှိုဂီကို ၂၀၁၈ က သတ်ပစ်ဖို့ အမိန့်ပေးခဲ့တယ်ဆိုပြီး သတင်းတွေထွက်ခဲ့ပေမယ့် သူကတော့ ငြင်းဆန်ထားတာပါတယ်။

Source:BBC

CNI Sport News

၂၀၂၃ ခုနှစ်၊ ဇန်နဝါရီ ၃

ဒေါ့မွန်အသင်း တိုက်စစ်မှူး ဟော်လာဟာ ဇူလိုင်လမှာ တွေ့ရှိခဲ့တဲ့ ဝှေးစေ့ အကျိတ်ကို ကုသဖို့အတွက် ခွဲစိတ်မှု တွေနဲ့ ဓါတုကုထုံး ခံယူပြီးနောက် လေ့ကျင့်ခန်း ပြန်ဆင်းနေပြီ ဖြစ်ပါတယ်။

ဟော်လာက “အားလုံးပဲ နှစ်သစ်မှာ ပျော်ရွှင်ကြပါစေ။ ဒါဟာ ကျနော့်အတွက် ကောင်းမွန်တဲ့ စတင်မှုပါ၊ ဘာလို့လဲ ဆိုရင် ကွင်းထဲကို ပြန်ပြီး ဝင်နိုင်တာကြောင့်ပါ။ ၂၀၂၂ က ကျနော့်အတွက် အလွယ်ကူဆုံးနှစ် မဟုတ်ပေမယ့် ၂၀၂၃ မှာ ရောက်လာမယ့် စိန်ခေါ်မှုအသစ်တွေကို ယူဆောင်ဖို့ ပြင်ဆင်နေပါတယ်”လို့ အားကစားခန်းမမှာ လေ့ကျင့်မှု တွေ ပြုလုပ်နေတဲ့ ပုံနဲ့အတူ တွစ်တာမှာ ရေးသားခဲ့တာပါ။

ပြီးခဲ့တဲ့ နှစ်ရာသီက အေဂျတ်စ် အသင်းအတွက် ၃၄ ဂိုး သွင်းယူနိုင်ခဲ့တဲ့ အိုင်ဗရီကို့စ်နိုင်ငံရဲ့ လက်ရွေးစင်အသင်း တိုက်စစ်မှူးဟာ နွေရာသီက ကနဦးပြောင်းရွှေ့ကြေး ယူရို ၃၁ သန်းနဲ့ ဒေါ့မွန်အသင်းထံ ပြောင်းရွှေ့လာခဲ့တာ ဖြစ်ပါတယ်။

ဟော်လာဟာ အသင်းနဲ့အတူ ရာသီကြို လေ့ကျင့်မှုတွေ ပြုလုပ်ချိန်မှာ နေမကောင်းသလို ခံစားခဲ့ရတဲ့အတွက် စမ်းသပ်စစ်ဆေးမှုတွေ ပြုလုပ်ခဲ့တာမှာ ဝှေးစေ့ အကျိတ် ရှိနေတာကို တွေ့ခဲ့ရတာပါ။ အဲ့ဒါကြောင့် ခွဲစိတ်မှုတွေ ပြုလုပ်ပြီး အနားယူနေရတာ ဖြစ်ပါတယ်။

 ဟော်လာ ဆေးကုသမှုခံယူနေစဉ်

ဟော်လာဟာ လေ့ကျင့်ခန်း ပြန်ဆင်းနေပေမယ့် ဘယ်အချိန်မှာ ပြန်ကစားနိုင်မလဲဆိုတာကိုတော့ မသိရသေး ပါဘူး။ ဒေါ့မွန်အသင်းဟာ မန်စီးတီးကို ပြောင်းသွားတဲ့ ဟာလန်းနေရာမှာ အစားထိုးဖို့ ဟော်လာကို ခေါ်ယူခဲ့တာ ဖြစ်ပါတယ်။

ဒါပေမယ့် ဟော်လာရဲ့ အခြေအနေကြောင့် ဂျာမန်ကလပ်ဟာ ကိုလုံးတိုက်စစ်မှူး မိုဒီစတီကို ခေါ်ယူခဲ့ရပါတယ်။

ဒေါ့မွန်အသင်းဟာ အခုနှစ်ရာသီ ဘွန်ဒစ်လီဂါပြိုင်ပွဲမှာ ထိပ်ဆုံးက ဦးဆောင်နေတဲ့ ဘိုင်ယန်မြူးနစ် အသင်းနဲ့ ၉ မှတ်အကွာ အဆင့် ၆ နေရာမှာ ရပ်တည်နေတာပါ။

ကမ္ဘာ့ဖလားယှဉ်ပြိုင်လို့ ရပ်နားထားတဲ့ ဘွန်ဒစ်လီဂါပြိုင်ပွဲကို အခုလကုန်ပိုင်းမှာ ပြန်လည် စတင်မှာဖြစ်ပြီး ဒေါ့မွန်အသင်းဟာ ဇန်နဝါရီ ၂၂ ရက်မှာ အော့စ်ဘတ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဇန်နဝါရီ ၃

ဖီဖာအကြီးအကဲ အင်ဖန်တီနိုက ကွယ်လွန်သွားခဲ့ပြီဖြစ်တဲ့ ဘရာဇီးလ်ဂန္တဝင်ကြီး ပီလီအတွက် အားကစားကွင်း နာမည်ပေးဖို့ ကမ္ဘာ့နိုင်ငံအားလုံးကို ဖီဖာက တောင်းဆိုတယ်လို့ ပြောလိုက်ပါတယ်။

အင်ဖန်တီနိုက “ကမ္ဘာ့နိုင်ငံတိုင်းမှာရှိတဲ့ ဘောလုံးအားကစားကွင်းတွေထဲက တစ်ကွင်းကို ပီလီရဲ့ နာမည်ပေးဖို့ ကျနော်တို့ တောင်းဆိုသွားမှာဖြစ်တယ်”လို့ ဗီလာဘယ်မီရိုမှာ သတင်းထောက်တွေကို ပြောခဲ့တာပါ။

ကမ္ဘာ့ဘောလုံးလောကရဲ့ အကြီးကျယ်ဆုံး ကစားသမားအဖြစ် သတ်မှတ်ခံထားရတဲ့ ပီလီဟာ ဒီဇင်ဘာ ၂၉ ရက် က ကွယ်လွန်ခဲ့တာဖြစ်ပြီး ကွယ်လွန်ချိန်မှာ အသက် ၈၂ နှစ်ရှိပြီ ဖြစ်ပါတယ်။ အင်ဖန်တီနိုဟာ ဗီလာဘယ်မီရို အားကစားကွင်းမှာ ပြသထားတဲ့ ပီလီရဲ့ ရုပ်အလောင်းကို ပထမဆုံး ဂါရဝပြုတဲ့ သူတွေထဲမှာ ပါဝင်ခဲ့တာပါ။

ပီလီရဲ့ ရုပ်ကလာပ်ကို တွေ့ရစဉ် 

အင်ဖန်တီနိုက “ကျနော်တို့ဟာ ဒီကို အလွန်ဝမ်းနည်းစွာနဲ့ ရောက်ရှိနေတာပါ။ ပီလီက ထာဝရပါပဲ။ သူဟာ ကမ္ဘာ့ဘောလုံးလောကရဲ့ အိုင်ကွန်ပါပဲ”လို့ ပြောခဲ့တာ ဖြစ်ပါတယ်။

ကမ္ဘာ့ဘောလုံးအဖွဲ့ချုပ်(ဖီဖာ)ဟာ ပီလီကို ၂၀ ရာစု အကောင်းဆုံး ကစားသမားအဖြစ် သတ်မှတ်ထားတာဖြစ်ပြီး ဘရာဇီးလ် ဂန္တဝင် ကွယ်လွန်ပြီးနောက် ဇူးရစ်မြို့ရှိ ရုံးချုပ်အပြင်ဘက်မှာ အလံကို တစ်ဝက်အထိ လျှော့ချပြီးလွှင့်ထူထားတာပါ။

ကမ္ဘာ့ဖလားချန်ပီယံဆုကို ၃ ကြိမ် ရယူထားတဲ့ တစ်ဦးတည်းသော ကစားသမား ပီလီဟာ ကင်ဆာရောဂါကို ကာလကြာရှည် တိုက်ပွဲဝင်ပြီးနောက် ဆော်ပေါ်လိုရှိ ဆေးရုံမှာ ကွယ်လွန်သွားခဲ့တာ ဖြစ်ပါတယ်။

ပီလီဟာ ကလပ် ကစားသမားဘဝမှာ ဆန်းတို့စ်နဲ့ နယူးယော့ခ်ကော့စ်မိုစ် အသင်းတွေမှာသာ ကစားခဲ့တာဖြစ်ပြီး ဘရာဇီးလ်ကလပ် ဆန်းတို့စ်အသင်းအတွက် ၁၉၅၆ ကနေ ၁၉၇၄ အထိ ကစားခဲ့ပြီး အမေရိကန်ကလပ်မှာတော့ ၁၉၇၅ ကနေ ၁၉၇၇ အထိ ကစားခဲ့ကာ ဆုဖလား အောင်မြင်မှု အများအပြား ရယူနိုင်ခဲ့တာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဇန်နဝါရီ ၃

လီဗာပူးလ်အသင်းနည်းပြ ကလော့ပ်က ဘရန်ဖို့ဒ်အသင်းကို ၃ ဂိုး- ၁ ဂိုးနဲ့ အရေးနိမ့်တဲ့ပွဲမှာ ဒိုင်လူကြီးတွေရဲ့ ဆုံးဖြတ်ချက်ကို ဝေဖန်လိုက်ပြီး သူတို့ကို ပြောနေရတာက အိမ်မှာရှိတဲ့ မိုက်ခရိုဝေ့ဖ်ကို ပြောနေရသလိုပဲလို့ ပြောလိုက်ပါတယ်။

ကလော့ပ်က “တတိယဂိုးဆိုရင် လုံးဝခွင့်မပြုသင့်ပါဘူး။ တကယ်ကို လွယ်ပါတယ်။ ဒါနဲ့ ပတ်သက်ပြီး ဒိုင်လူကြီးနဲ့ စကားပြောဖို့ လုပ်ခဲ့ပေမယ့် ဒါက ကျနော့်အိမ်မှာရှိတဲ့ မိုက်ခရိုဝေ့ဖ်နဲ့ စကားပြောတာနဲ့ အတူတူပါပဲ။ တကယ်ကို ဘာမှ တုန့်ပြန်မှု မရှိပါဘူး။ အမြဲတမ်း အတူတူပါပဲ”လို့ ပြောခဲ့တာပါ။

ဒီပွဲစဉ်မှာ ဘရန်ဖို့ဒ် အသင်းဘက်က ဝီဆာသွင်းယူတဲ့ ၂ ဂိုးဟာ လူကျွံဘောအဖြစ် သတ်မှတ်ခံခဲ့ရသလို လီဗာပူးလ်တိုက်စစ်မှူး ဒါဝင်နူနက်စ် သွင်းယူတဲ့ ဂိုးကိုလည်း လူကျွံဘောအဖြစ် သတ်မှတ်ခဲ့တာပါ။

လီဗာပူးလ်အသင်းကိုတွေ့ရစဉ်

ဘရန်ဖို့ဒ်အသင်းဘက်က သွင်းယူတဲ့ တတိယဂိုးမှာ အမ်ဘူမိုက ဂိုးမသွင်းခင် ကိုနာတေးကို တွန်းတိုက်ခဲ့တယ် ဆိုပြီး လီဗာပူးလ်နည်းပြ ကလော့ပ်က ပွဲအပြီးမှာ ဒေါသထွက်နေခဲ့တာ ဖြစ်ပါတယ်။

ဘရန်ဖို့ဒ်အသင်းဟာ လီဗာပူးလ်အသင်းကို ၁၉၃၈ က နောက်ဆုံး အနိုင်ရခဲ့ပြီးနောက် နှစ်ပေါင်း ၈၅ နှစ်အကြာမှ ပထမဆုံး နိုင်ပွဲပြန်လည် ရယူနိုင်ခဲ့တာပါ။

ဘရန်ဖို့ဒ်အသင်းဟာ ဒီနိုင်ပွဲကြောင့် ပရီးမီးယားလိဂ် အမှတ်ပေးဇယား အဆင့် ၇ နေရာအထိ တက်လှမ်းနိုင်ခဲ့ပြီး အဆင့် ၄ နေရာက ယူနိုက်တက်အသင်းနဲ့ ၆ မှတ်အကွာမှာ ရှိနေခဲ့ပါတယ်။ ဘရန်ဖို့ဒ်နည်းပြ သော်မတ်စ်ဖရန့်ခ်က လီဗာပူးလ်ကို အနိုင်ရယူနိုင်ခဲ့တဲ့ သူ့ကစားသမားတွေကို ချီးကျူးသွားခဲ့တာပါ။

သော်မတ်ဖရန့်ခ်က “ဘယ်လိုညမျိုးလဲ၊ ကစားသမားတွေကို ချီးကျူးစကားပြောဖို့တောင် မလုံလောက် နိုင်ပါဘူး။ သူတို့က မယုံနိုင်လောက်အောင် ကောင်းတဲ့သူတွေပါ။ သူတို့ရဲ့ စိတ်နေသဘောထား၊ ကြိုးစားအားထုတ်မှုတွေနဲ့ စည်းလုံးညီညွတ်မှုတွေက လီဗာပူးလ်ကို အနိုင်ရယူဖို့ အရာအားလုံးကို အတူတကွ ပေါင်းစည်း နိုင်ခဲ့ပါတယ်” လို့ ပြောခဲ့ပါတယ်။

Source: Goal