CNI Sport News

၂၀၂၃ ခုနှစ်၊ ဇွန်လ ၅

လာဘ်ပေးလာဘ်ယူမှုနဲ့ တရုတ်နိုင်ငံမှာ ဖမ်းဆီး ထိန်းသိမ်းခံထားရတဲ့ ကွင်းလယ်ကစားသမား ဆွန်ဂျွန်ဟိုကို ပီရူး၊ အယ်လ်ဆာဗေးဒိုးတို့နဲ့ ခြေစမ်းမယ့် တောင်ကိုရီးယား အသင်းလူစာရင်းမှာ နည်းပြ ကလင်းစမန်းက ထည့်သွင်း ထားခဲ့ပါတယ်။

တရုတ်စူပါလိဂ်ကလပ် ရှန်ဒေါင်းတိုင်ရှန်အသင်းမှာ ကစားနေတဲ့ ဆွန်ဂျွန်ဟိုဟာ တောင်ကိုရီးယားအသင်းရဲ့ ၂၃ ဦး လူစာရင်းမှာ ပါဝင်နေခဲ့တာပါ။

တောင်ကိုရီးယားအသင်းဟာ ဇွန်လ ၁၆ ရက်မှာ ပီရူး၊ ၂၀ ရက်မှာ အယ်လ်ဆာဗေးဒိုးအသင်းနဲ့ နိုင်ငံအတွင်းမှာ ခြေစမ်းပွဲ ယှဉ်ပြိုင်သွားမှာ ဖြစ်ပါတယ်။

ကလင်းစမန်းက “ဆွန်ဂျွန်ဟိုရဲ့ အခြေအနေကို ကျနော်တို့အားလုံး ထိတ်လန့်နေကြပြီး သူ့ကို ကျနော်တို့ အပြည့် အဝ ထောက်ခံပါတယ်။ နေ့တိုင်း တစ်ခုခု ဖြစ်မယ်လို့ မျှော်လင့်ထားပေမယ့် ဒါက ကျနော်တို့ရဲ့ လက်ထဲမှာ မဟုတ်ပါဘူး။ တောင်ကိုရီးယား ဘောလုံးအဖွဲ့ချုပ်နဲ့ ကျနော်တို့ လူတွေက တရုတ်ကို သွားရောက်ခဲ့တာ သိပါ တယ်။ ကျနော်တို့က သူ့ကို အိမ်ပြန်ရောက်လာနိုင်အောင် ကြိုးစားမှာပါ။ သူဟာ ပြီးခဲ့တဲ့ ကိုလံဘီယာ၊ ဥရုဂွေး ၂ ပွဲ စလုံးမှာ ထူးချွန်ခဲ့ပါတယ်။ သူ့ကို ပြန်လွှတ်ပေးဖို့ ကျနော်တို့ တကယ်ကို မျှော်လင့်နေပါတယ်”လို့ ပြောခဲ့ပါတယ်။

တောင်ကိုရီးယားအသင်း နည်းပြ ကလင်းစမန်းကိုတွေ့ရစဉ်

ဆွန်ဂျွန်ဟိုဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ တောင်ကိုရီးယား အသင်းအတွက် ၃ ပွဲ ပါဝင်ကစားခဲ့တာပါ။

ဆွန်ဂျွန်ဟိုဟာ နိုင်ငံ့ဝန်ထမ်း မဟုတ်တဲ့ အလုပ်သမားတွေဆီကနေ လာဘ်ယူတယ်လို့ သံသယရှိတာကြောင့် လျောင်နင်းပြည်နယ်ရှိ ပြည်သူ့လုံခြုံရေးဌာနက ဖမ်းဆီးထိန်းသိမ်းခဲ့တယ်လို့ တရုတ်နိုင်ငံခြားရေးဝန်ကြီးဌာနက ပြောခဲ့ပါတယ်။

ဆွန်ဂျွန်ဟိုဟာ ဂျာမနီလူမျိုးနည်းပြ ကလင်းစမန်း ပထမဆုံးကိုင်တွယ်တဲ့ ကိုလံဘီယာနဲ့ ဥရုဂွေး ၂ ပွဲစလုံးမှာ ရွေးချယ်ခံခဲ့ရပြီး ခြေစွမ်းပြသနိုင်ခဲ့တာကြောင့် အခုလိုမျိုးထပ်ပြီး ရွေးချယ်ခံခဲ့ရတာပါ။

အသက် ၃၁ နှစ်အရွယ်ရှိ ဆွန်ဂျွန်ဟိုဟာ တောင်ကိုရီးယား လက်ရွေးစင် အသင်းအတွက် ပွဲပေါင်း ၂၀ ပါဝင် ကစားထားတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဇွန်လ ၅

ဝါရင့်တိုက်စစ်မှူး အီဘရာဟီမိုဗစ်ဟာ ကစားသမားဘဝကနေ အနားယူတော့မယ်လို့ အေစီမီလန်အသင်းရဲ့ အခုနှစ်ရာသီ စီးရီးအေ နောက်ဆုံးပွဲစဉ်အပြီးမှာ မျက်ရည်တွေနဲ့ ကြေညာသွားခဲ့ပါတယ်။

အီဘရာဟီမိုဗစ်က “ပထမဆုံးအကြိမ် ရောက်လာတုန်းက ခင်ဗျားတို့က ကျနော့်ကို ပျော်ရွှင်မှုတွေ ပေးပါတယ်။ ဒုတိယအကြိမ်မှာလည်း အချစ်တွေပေးခဲ့ပါတယ်။ အသင်းမှာရှိတဲ့ တာဝန်ရှိသူတွေအားလုံးကို ကျေးဇူးတင်သလို၊ နောက်ဆုံးအနေနဲ့ နှလုံးသားထဲကနေ ချစ်ရတဲ့ ပရိသတ်တွေအားလုံးကို ကျေးဇူးတင်ပါတယ်။ ကျနော့်ဘဝရဲ့ ဘဝ တစ်ခုလုံး မီလန်ပရိသတ် ဖြစ်လာပါလိမ့်မယ်။ ဘောလုံးကို နှုတ်ဆက်ဖို့ အချိန်တန်ပါပြီ။ ဒါပေမယ့် ခင်ဗျားတို့ အတွက်တော့ မဟုတ်ပါဘူး။ ခက်ခဲလွန်းတယ်၊ ခံစားချက်တွေ များလွန်းတယ်။ နှုတ်ဆက်ပါတယ် မီလန်ရေ”လို့ ပြောခဲ့ပါတယ်။

ဆန်စီရိုမှာရှိတဲ့ ပရိသတ်တွေဟာ စီးရီးအေ နောက်ဆုံးပွဲမှာ အီဘရာဟီမိုဗစ်ကို နှုတ်ဆက်ဖို့ စီစဉ်ထားခဲ့ကြ ပါ တယ်။

အသက် ၄၁ နှစ်အရွယ်ရှိ အီဘရာဟီမိုဗစ်ဟာ အစောပိုင်းတုန်းက ဆက်ကစားဖို့ အစီအစဉ်ရှိတယ်လို့ ပြောခဲ့ပေ မယ့် ပွဲအပြီးမှာတော့ အေစီမီလန်အသင်းကနေတင် မဟုတ်ဘဲ ဘောလုံးလောက ကနေပါ နှုတ်ဆက်တယ်လို့ ပြောခဲ့တာပါ။
အေစီမီလန်နဲ့ အီဘရာဟီမိုဗစ်တို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးခဲ့တာ ဖြစ်ပါတယ်။

အီဘရာဟီမိုဗစ်ကို တွေ့ရစဉ်

အီဘရာဟီမိုဗစ်ဟာ အေစီမီလန်အသင်းကို ပြီးခဲ့တဲ့နှစ်ရာသီက ၂၀၁၁ နောက်ပိုင်း ပထမဆုံးအကြိမ် စီးရီးအေ ဖလား ရရှိအောင် စွမ်းဆောင်ပေးခဲ့ပေမယ့် ရာသီအကုန်မှာ ဒူးခွဲစိတ်မှု ပြုလုပ်ခဲ့ရပါတယ်။

အဲဒါကြောင့် ဆွီဒင်တိုက်စစ်မှူးကြီးဟာ ကာလကြာရှည် အနားယူခဲ့ရပြီး ဒီရာသီမှာ အေစီမီလန် အသင်းအတွက် ၄ ပွဲသာ ပါဝင်ကစားခဲ့ရကာ ၁ ဂိုး သွင်းယူနိုင်ခဲ့ပါတယ်။

အီဘရာဟီမိုဗစ်ဟာ ဒဏ်ရာကြောင့် ဗီရိုနာနဲ့ ကစားခဲ့တဲ့ စီးရီးအေ နောက်ဆုံးပွဲကို မပါဝင်နိုင်ခဲ့ဘဲ ပွဲကြည့်စင်ပေါ် ကနေသာ အသင်းကို အားပေးခဲ့တာပါ။

၁၉၉၉ မှာ မယ်လ်မိုအသင်းနဲ့ ပရော်ဖက်ရှင်နယ် ကစားသမားဘဝ စတင်ခဲ့တဲ့ အီဘရာဟီမိုဗစ်ဟာ အေဂျတ်စ်၊ ဂျူဗင်တပ်စ်၊ အင်တာမီလန်၊ ဘာစီလိုနာ၊ ပီအက်စ်ဂျီ၊ ယူနိုက်တက်၊ ဂလက်ဇီနဲ့ အေစီမီလန်အသင်းတွေမှာ ပွဲ ပေါင်း ၈၆၆ ပွဲ ပါဝင်ကစားပြီး ၅၁၁ ဂိုး သွင်းယူကာ ကစားခဲ့တဲ့ အသင်းတိုင်းမှာ ဆုဖလားအောင်မြင်မှု အများ အပြားကို ရယူနိုင်ခဲ့တာ ဖြစ်ပါတယ်။

အသက် ၄၁ နှစ်အရွယ်ရှိ အီဘရာဟီမိုဗစ်ဟာ ဆွီဒင်လက်ရွေးစင် အသင်းအတွက် ၂၀၀၁ မှာ စတင် ပွဲထွက်ခွင့် ရခဲ့ပြီး ၁၂၂ ပွဲ ပါဝင်ကစားကာ ၆၂ ဂိုး သွင်းယူနိုင်ခဲ့တာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဇွန်လ ၃

ဒဏ်ရာကြောင့် အခုနှစ်ရာသီ ပြင်သစ်အိုးပန်းပြိုင်ပွဲကို မပါဝင်နိုင်ခဲ့တဲ့ လက်ရှိချန်ပီယံ နာဒယ်လ်ဟာ တင်ပါးဆုံကြွက်သား ခွဲစိတ်မှုခံယူနေရတယ်လို့ ကစားသမားရဲ့ကိုယ်စားလှယ်တွေက ပြောခဲ့ပါတယ်။

ဂရမ်းဆလမ်းချန်ပီယံဆုကို ၂၂ ကြိမ်ရရှိထားပြီး အအောင်မြင်ဆုံး အမျိုးသားတင်းနစ်ကစားသမားအဖြစ် ဂျိုကိုဗစ်နဲ့ ပူးတွဲရပ်တည်နေတဲ့ နာဒယ်လ်ဟာ ပြင်သစ်အိုးပန်းပြိုင်ပွဲမှာ ချန်ပီယံဆုကို စံချိန်တင် ၁၄ ကြိမ်ရရှိထားတာပါ။ နာဒယ်လ်ဟာ ပြီးခဲ့တဲ့ သြစတြေးလျအိုးပန်းပြိုင်ပွဲရဲ့ ဒုတိယအဆင့်မှာ တင်ပါးဆုံရိုး နာကျင်ခဲ့မှုကြောင့် ဇန်နဝါရီလကတည်းက အနားယူနေခဲ့ရတာ ဖြစ်ပါတယ်။

နာဒယ်လ်ရဲ့ကိုယ်စားလှယ်ဖြစ်တဲ့ ဘန်နီတိုက ကစားသမားရဲ့ ခွဲစိတ်မှုရလဒ်ကို စနေနေ့မှာ ထွက်ပေါ် လာဖို့ မျှော်လင့်ထားတယ်လို့ ပြောထားပါတယ်။ အသက် ၃၆ နှစ်အရွယ်ရှိပြီဖြစ်တဲ့ နာဒယ်လ်က ၂၀၂၄ ဟာ သူ့ရဲ့ပရော်ဖက်ရှင်နယ်ကစားသမားဘ၀ နောက်ဆုံးနှစ်ဖြစ်လာနိုင်တယ်လို့ ပြောထားတာပါ။

နာဒယ်လ်ဟာ ဒဏ်ရာကြောင့် အခုနှစ်ရာသီ အစောပိုင်းပွဲစဉ်တွေဖြစ်တဲ့ အင်ဒီးယန်းဝဲလ်စ်၊ မိုင်ယာမီ၊ မွန်တီကာလိုနဲ့ ဘာစီလိုနာပွဲတွေကို မပါဝင်နိုင်ခဲ့သလို ဒဏ်ရာကြောင့် ၈ ပတ်ကြာအထိ အနားယူ ရနိုင် တယ်လို့ ကနဦးဖော်ပြချက်အရ သိရပါတယ်။

မတ်လတုန်းက နာဒယ်လ်ဟာ ၂၀၀၅ နောက်ပိုင်း ပထမဆုံးအကြိမ် ကမ္ဘာ့အဆင့် ၁၀ ပြင်ပမှာ ရပ်တည် ခဲ့ပြီး လက်ရှိအချိန်မှာတော့ ကမ္ဘာ့အဆင့် ၁၅ နေရာမှာ ရပ်တည်နေတာပါ။ မြေစေးကွင်းဘုရင်အဖြစ် သတ်မှတ်ခံထားရတဲ့ နာဒယ်လ်ဟာ ၁၉ နှစ်အတွင်း ပထမဆုံးအကြိမ် ပြင်သစ်အိုးပန်းပြိုင်ပွဲမှာ ပါဝင် ယှဉ်ပြိုင်မှာမဟုတ်ဘူးလို့ အတည်ပြုပြီးနောက် လာမယ့်နှစ် သူ့ရဲ့နောက်ဆုံး ယှဉ်ပြိုင်မှုတွေမှာတော့ အကောင်းဆုံးယှဉ်ပြိုင်နိုင်ဖို့အတွက် ရည်မှန်းထားတယ်လို့ ပြောခဲ့ပါတယ်။

Source:ChannelNewsAsia

CNI Sport News
၂၀၂၃ ခုနှစ်၊ ဇွန်လ ၃

FA ဖလားဗိုလ်လုပွဲအဖြစ် ယှဉ်ပြိုင်ခဲ့တဲ့ မန်စီးတီးနဲ့ ယူနိုက်တက် အသင်းတို့ပွဲမှာ မန်စီးတီးအသင်းက ၂ ဂိုး- ၁ ဂိုးနဲ့ အနိုင်ရပြီး ချန်ပီယံဆုကို ရယူနိုင်ခဲ့ပါတယ်။

နှစ်သင်းစလုံးဟာ တောင့်တင်းတဲ့ လူစာရင်းနဲ့ ပွဲထွက်လာခဲ့တာဖြစ်ပြီး ပွဲအစ ၁၆ စက္ကန့်မှာတင် ဂန်ဒိုဂန်က မန်စီးတီးအတွက် ဦးဆောင်ဂိုး စတင်သွင်းယူခဲ့ပါတယ်။

ယူနိုက်တက်အသင်းဟာ ချေပဂိုးရဖို့ ပြန်ပြီးကြိုးစားရင်းနဲ့ ဂရီလစ်ရှ် လက်ထိဘောကြောင့် ပင်နယ်တီ ကန်သွင်းခွင့် ရခဲ့ပါတယ်။

ဒီပင်နယ်တီကို ဘရူနိုဖာနန်ဒက်စ်က အမှားအယွင်းမရှိ ကန်သွင်းခဲ့လို့ ပထမပိုင်းမှာ ၁ ဂိုးစီသရေကျနေခဲ့ပါတယ်။

ဒုတိယပိုင်းမှာ နှစ်သင်းစလုံးဟာ ဂိုးရဖို့ ကြိုးစားရင်းနဲ့ မန်စီးတီးက ဦးဆောင်ဂိုး ရရှိသွားခဲ့ပါတယ်။ ဒီဂိုးကို အသင်းခေါင်းဆောင် ဂန်ဒိုဂန်ကပဲ သွင်းယူခဲ့တာပါ။

အဲဒီနောက်မှာ ယူနိုက်တက်အသင်းက ရက်ရှ်ဖို့ဒ်၊ ဂါနာချိုတို့ ဂိုးရနိုင်မယ့် အခွင့်အရေးတွေ ရခဲ့ပေမယ့် လွဲချော်ခဲ့လို့ ယူနိုက်တက်အသင်း နစ်နာခဲ့ရပါတယ်။

အဲဒီနောက်ပိုင်းမှာ မန်စီးတီးအသင်းက ပွဲကို ထိန်းချုပ်ပြီး ကစားသွားခဲ့ပါတယ်။

အဲဒါကြောင့် ပွဲအပြီးမှာ မန်စီးတီးအသင်းက ယူနိုက်တက်အသင်းကို အနိုင်ရပြီး FA ဖလားချန်ပီယံဆုကို ရရှိကာ ဒီရာသီ ဆုဖလား ၂ ခုကို ရယူနိုင်ခဲ့ပြီ ဖြစ်ပါတယ်။

CNI Sport News

၂၀၂၃ ခုနှစ်၊ ဇွန်လ ၄

အသက် ၄၁ နှစ် အရွယ်ရှိပြီဖြစ်တဲ့ အီဘရာဟီမိုဗစ်က သူဟာ စူပါမန်းလို ခံစားရပြီး လာမယ့် ရာသီမှာလည်း ဘောလုံးဆက်ပြီး ကစားဦးမယ်လို့ ပြောခဲ့ပါတယ်။

အီဘရာဟီမိုဗစ်က “ကျနော်က အရှုံးပေးမယ့်သူ မဟုတ်ပါဘူး။ ဒါပေမယ့် ခင်ဗျားလုပ်တဲ့ နေရာမှာတော့ ပျော်ရွှင်မှု ရှိရပါမယ်။ ကျနော်ပေးစရာ တစ်ခုခု ကျန်ရှိသေးတယ်လို့ ထင်ပြီး အနားယူမယ့် အကြောင်းကို မစဉ်းစားသေး ပါဘူး။
ဆက်ပြီး ကစားမယ့် အကြောင်းကိုပဲ စဉ်းစားထားပါတယ်။ ကျနော်ဟာ အဆင်ပြေပြီး အလုပ်တွေလည်း အများကြီး လုပ်ခဲ့ပါတယ်။ ကျနော့်ရဲ့ ဦးခေါင်းက သန်မာပြီး၊ ကျနော်ပြန်လာတိုင်းကို စူပါမန်းလို ခံစားရပါတယ်။ ဒါပေမယ့် ဟန်ချက်တော့ညီရမယ်”လို့ လာကာဇက်တာဒယ်လိုစပေါ့ကို ပြောခဲ့ပါတယ်။

ဝါရင့်တိုက်စစ်မှူးဟာ ဒီရာသီမှာ ဒဏ်ရာတွေကြောင့် အေစီမီလန် အသင်းအတွက် ၄ ပွဲသာ ပါဝင်ကစား နိုင်ခဲ့ပါ တယ်။

အီဘရာဟီမိုဗစ်ဟာ ၂၀၂၂ ခုနှစ်၊ မေလမှာ ဒူးခွဲစိတ်မှု ခံယူခဲ့ရပြီး အခုနှစ် ဖေဖော်ဝါရီလမှ အေစီမီလန်အသင်း အတွက် ကစားပေး နိုင်ခဲ့တာပါ။

အီဘရာဟီမိုဗစ်ကို တွေ့ရစဉ်

ဆွီဒင်တိုက်စစ်မှူးဟာ အခုနှစ်ရာသီ ပွဲအများစုကို မပါဝင်နိုင်ခဲ့ပေမယ့် လာမယ့်ရာသီမှာ ဆက်ပြီးကစားဖို့ စိတ်ပိုင်း ဖြတ်ထားပါတယ်။

အီဘရာဟီမိုဗစ်နဲ့ အေစီမီလန်အသင်းတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးမှာဖြစ်ပြီး သူ ဟာ အသင်းနဲ့ စာချုပ်သစ် မချုပ်ဆိုရသေးပါဘူး။

အီတလီထိပ်သီး ကလပ်ဟာ အီဘရာဟီမိုဗစ်ကို သက်တမ်းတိုး စာချုပ်ထပ်ပြီး ချုပ်ဆိုတော့မှာ မဟုတ်ဘူးလို့ သတင်းတွေမှာ ဖော်ပြထားပါတယ်။ အီဘရာဟီမိုဗစ်ဟာ ကြွက်သားဒဏ်ရာကြောင့် အခုနှစ်ရာသီ စီးရီးအေ နောက်ဆုံး ပွဲစဉ်ဖြစ်တဲ့ ဗီရိုနာနဲ့ ပွဲမှာ ပါဝင်နိုင်ဖွယ် မရှိပါဘူး။

အီဘရာဟီမိုဗစ်ဟာ အေစီမီလန်အသင်းအတွက် ဒုတိယအကြိမ်မြောက် ကစားခဲ့တဲ့ အချိန်အတွင်း ပွဲပေါင်း ၇၈ ပွဲ ပါဝင် ကစားခဲ့ပြီး ၃၇ ဂိုး သွင်းယူနိုင်ခဲ့ပါတယ်။

လက်ရှိအချိန်မှာ အီဘရာဟီမိုဗစ်ကို ခေါ်ယူဖို့ စီးရီးအေကလပ် တစ်သင်းဖြစ်တဲ့ မွန်ဇာအသင်းက စိတ်ဝင်စား နေတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဇွန်လ ၃

ဝါရင့်နောက်ခံလူ တစ်ဦးဖြစ်တဲ့ ရာမို့စ်ဟာ အခုရာသီအကုန်မှာ ပြင်သစ်ကလပ် ပီအက်စ်ဂျီကနေ ထွက်ခွာမယ်လို့ သူ့ရဲ့ ဆိုရှယ်မီဒီယာကနေ အတည်ပြု လိုက်ပါတယ်။

ရာမို့စ်က “မနက်ဖြန်က ထူးခြားတဲ့နေ့ပါ၊ ကျနော့်ဘဝရဲ့ နောက်ထပ် အဆင့်တစ်ခုကို နှုတ်ဆက်ရတော့မှာပါ။ နှုတ်ဆက်ပါတယ် ပီအက်စ်ဂျီ။ ပြိုင်ပွဲတိုင်းကို ပါဝင်ကစားနိုင်ခဲ့တဲ့ အထူး ၂ နှစ်တာအတွက် ကျေးဇူးတင်ပြီး အရာ အားလုံးကို ကျနော်ပေးခဲ့ပါတယ်”လို့ ရေးသားခဲ့တာ ဖြစ်ပါတယ်။

၂၀၂၁ က ရီးရယ်လ်အသင်းကနေ စာချုပ်ကုန်ဆုံးပြီးနောက် ရောက်ရှိလာခဲ့တဲ့ ရာမို့စ်နဲ့ ပီအက်စ်ဂျီအသင်းတို့ချုပ် ဆိုထားတဲ့ ၂ နှစ်စာချုပ်ဟာ အခုရာသီအကုန်မှာ ကုန်ဆုံးမှာပါ။

အဲဒါကြောင့် ရာမို့စ်ဟာ မက်ဆီပြီးနောက် ပီအက်စ်ဂျီကနေ ထွက်ခွာမယ့် နောက်ထပ် နာမည်ကြီး ကစားသမား ဖြစ်လာခဲ့ပါတယ်။

ရာမို့စ်ကိုတွေ့ရစဉ်

အသက် ၃၇ နှစ်အရွယ်ရှိ ရာမို့စ်ဟာ ပီအက်စ်ဂျီအသင်းကို ရောက်ရှိလာခဲ့တဲ့ ပထမရာသီမှာ ဒဏ်ရာတွေကြောင့် ၁၃ ပွဲသာ ပါဝင်ကစားနိုင်ခဲ့ပေမယ့် ဒုတိယရာသီမှာတော့ ၄၄ ပွဲအထိ ပါဝင်ကစားပေးနိုင်ခဲ့တာပါ။

ရာမို့စ်ဟာ ပီအက်စ်ဂျီ အသင်းနဲ့အတူ လီဂူးဝမ်းဆုဖလား ၂ ခု ရယူနိုင်ခဲ့ပေမယ့် အသင်းမျှော်လင့်ထားတဲ့ ချန်ပီယံ လိဂ်ဖလား ရရှိအောင်တော့ မကူညီပေးနိုင်ခဲ့တာ ဖြစ်ပါတယ်။

စပိန်ဝါရင့် နောက်ခံလူဟာ ကလဲယားမောင့်နဲ့ ကစားမယ့် အခုနှစ်ရာသီ ပြင်သစ်လီဂူးဝမ်း နောက်ဆုံးပွဲစဉ်မှာ ပီအက်စ်ဂျီအတွက် နောက်ဆုံးပွဲစဉ်အဖြစ် ပါဝင်ကစားမှာ ဖြစ်ပါတယ်။

ပီအက်စ်ဂျီအသင်းဥက္ကဋ္ဌ အယ်လ်ခီလိုင်ဖီက “ဆာဂျီယိုရဲ့ ခေါင်းဆောင်မှု၊ အသင်းလိုက် စိတ်ဓါတ်နဲ့ ပရော်ဖက်ရှင် နယ် ဆန်မှု၊ အမြင့်ဆုံးအဆင့်မှာ သူ့ရဲ့ အတွေ့အကြုံတွေနဲ့ ပေါင်းစပ်ထားပါတယ်။ ဒါတွေက သူ့ကို စစ်မှန်တဲ့ ဘောလုံး ဂန္တဝင်ဖြစ်စေခဲ့ပြီး သူ့ကို ပဲရစ်မှာရှိအောင် လုပ်ရတာကို ဂုဏ်ယူမိပါတယ်”လို့ ပြောခဲ့ပါတယ်။

ရာမို့စ်ကို ခေါ်ယူဖို့ ဆော်ဒီကလပ်တွေက လုပ်အားခ အများအပြားနဲ့ ကမ်းလှမ်းမှု ပြုလုပ်ထားတယ်လို့ နာမည်ကြီး ဂျာနယ်လစ် ဖာဘရီဇီယိုရိုမန်နိုက ဖော်ပြထားပေမယ့် ကစားသမားဘက်ကတော့ အနာဂတ်ကို ဆုံးဖြတ်ချက် မချ ရသေးပါဘူး။

Source: Goal

CNI Sport News

၂၀၂၃ ခုနှစ်၊ ဇွန်လ ၃

ရီးရယ်လ်နည်းပြ အန်ဆယ်လော့တီဟာ တိုက်စစ်မှူး ဘန်ဇီမာရဲ့ အနာဂတ်အပေါ် သံသယတွေ ရှိလာတာကြောင့် စပါးတိုက်စစ်မှူး ဟာရီကိန်းကို ခေါ်ယူပေးဖို့ အသင်းဘုတ်အဖွဲ့ကို ပြောခဲ့ပါတယ်။

ဟာရီကိန်းနဲ့ စပါးအသင်းတို့ ချုပ်ဆိုထားတဲ့စာချုပ်ဟာ နောက်ဆုံးနှစ်ထဲကို ရောက်ရှိလာခဲ့တာဖြစ်ပြီး အခုလာမယ့် နွေရာသီအပြောင်းအရွှေ့မှာ ယူနိုက်တက်အသင်းရဲ့ ဦးစားပေးပစ်မှတ်အဖြစ် ရှိနေခဲ့တာပါ။

စပါးအသင်းဥက္ကဋ္ဌ လီဗိုင်းက အင်္ဂလန်အသင်းခေါင်းဆောင်ကို ပရီးမီးယားလိဂ်ပြိုင်ဘက်အသင်းတွေထံ မရောင်းချချင်တာကြောင့် ဒီအပြောင်းအရွှေ့ဟာ ရီးရယ်လ်အတွက် ဖြစ်လာနိုင်ဖွယ်ရှိတယ်လို့ နည်းပြ အန်ဆယ်လော့တီက ယူဆနေတာဖြစ်ပါတယ်။

အီတလီလူမျိုးနည်းပြဟာ ကြာသပတေးနေ့က ပြုလုပ်ခဲ့တဲ့ အသင်းအကြီးအကဲတွေရဲ့ အစည်းအဝေးမှာ ဟာရီကိန်းကို ခေါ်ယူဖို့ ပြောခဲ့တာကြောင့် ရီးရယ်လ်အသင်းကလည်း နံပတ် ၉ အသစ်အတွက် ခေါ်ယူ မယ့် အစီအစဉ်တွေကို အရှိန်မြှင့်ပြီးလုပ်ဆောင်နေတယ်လို့ The Athletic က ဖော်ပြခဲ့တာပါ။

ဘောလွန်းဒီအောဆု ရရှိထားတဲ့ ဘန်ဇီမာဟာ ဆော်ဒီကလပ်အသင်းတွေရဲ့ ကြီးမားတဲ့ ကမ်းလှမ်းမှု ပမာဏတွေကြောင့် ပြောင်းရွှေ့သွားနိုင်တယ်လို့ သတင်းတွေထွက်ပေါ်နေပေမယ့် ကစားသမားဘက် ကတော့ အင်တာနက်ပေါ်က သတင်းတွေဟာ လက်တွေ့မကျဘူးလို့ ပြောထားပါတယ်။

စပါးအသင်းဟာ လက်ရှိအချိန်မှာ နည်းပြသစ် မခန့်အပ်ရသေးသလို လာမယ့်ရာသီ ဥရောပပြိုင်ပွဲ ယှဉ်ပြိုင်ခွင့် မရရှိထားပေမယ့်လည်း ဟာရီကိန်းကို ဆက်ပြီးထိန်းသိမ်းနိုင်ဖို့ ကြိုးစားနေတာပါ။ ပြီးခဲ့တဲ့ ရက်ပိုင်းက ထွက်ပေါ်ခဲ့တဲ့သတင်းတွေမှာ ဟာရီကိန်းဟာ ယူနိုက်တက်အသင်းကို ပြောင်းချင်တယ်လို့ ပြောထားခဲ့ပေမယ့် စပါးအသင်းဥက္ကဋ္ဌ လီဗိုင်းက ဒီအပြောင်းအရွှေ့ကို ငြင်းဆန်ထားတာဖြစ်ပါတယ်။ အဲဒါကြောင့် အင်္ဂလန်တိုက်စစ်မှူးဟာ ဒီရာသီမှာ အပြောင်းအရွှေ့မဖြစ်ခဲ့ရင် စာချုပ်ကုန်ဆုံးမယ့် လာမယ့် ရာသီအကုန်မှသာ အလွတ်နဲ့ ပြောင်းရွှေ့ဖို့ ဆုံးဖြတ်ထားတာပါ။

ရီးရယ်လ်အသင်းဘက်ကတော့ ဟာရီကိန်းကို ခေါ်ယူနိုင်ဖို့အတွက် ဘန်ဇီမာရဲ့ အနာဂတ်အပေါ် မူတည် ပြီး ဆုံးဖြတ်ဖို့ရှိနေကာ ပြင်သစ်တိုက်စစ်မှူးနဲ့ စပိန်ကလပ်တို့ ချုပ်ဆိုထားတဲ့ စာချုပ်ဟာ အခုရာသီ အကုန်မှာ ကုန်ဆုံးမှာဖြစ်ပါတယ်။ ဒါပေမယ့် ရီးရယ်လ်အသင်းဟာ ဘန်ဇီမာကို တစ်ရာသီ ယူရို ၂၄ သန်း နဲ့ အလိုအလျောက် ၁ နှစ် ထပ်မံသက်တမ်းတိုးဖို့ မျှော်လင့်နေတာပါ။

ဆော်ဒီကလပ် အယ်လ်အီးတီဟတ်အသင်းကတော့ ဘန်ဇီမာကို ၂၀၃၀ ကမ္ဘာ့ဖလားပြိုင်ပွဲ အိမ်ရှင် ပြုလုပ်ခွင့်ရနိုင်ဖို့အတွက် သံတမန်အဖြစ် ကမ်းလှမ်းတာအပါအဝင် တစ်ရာသီ ယူရိုသန်း ၂၀၀ နဲ့ ၂ နှစ် စာချုပ်ချုပ်ဆိုဖို့ ကမ်းလှမ်းထားတာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဇွန်လ ၂

မန်စီးတီးအသင်း တိုက်စစ်မှူး ဟာလန်းက ဒီရာသီမှာ အသင်းကို သမိုင်းဝင် ဆုဖလား ၃ လုံး ရအောင် ကူညီဖို့ အတွက် အရာအားလုံး လုပ်ဆောင်မယ်လို့ ပြောလိုက်ပါတယ်။

ဟာလန်းက “ဒီသမိုင်းကို ဖန်တီးဖို့က အစစ်အမှန် မဟုတ်ပါဘူး။ သူတို့ဟာ ဒီလိုမျိုး အောင်မြင်မှုကို ရယူနိုင် ဖို့အတွက် ကျနော်ကို ဝယ်ယူခဲ့တယ်ဆိုတာကို ဖုံးကွယ်ထားစရာ မလိုပါဘူး။ ဒါက အရာအားလုံးကို ဆိုလိုတာပါ။ ဒီလိုမျိုးအရာတွေ ဖြစ်လာဖို့အတွက်လည်း ကျနော်တက်နိုင်သမျှ အကောင်းဆုံး ကြိုးစားသွားမှာပါ။ ကျနော့်ရဲ့ အကြီးမားဆုံး အိပ်မက်တွေ အမှန်တကယ် ဖြစ်လာဖို့လည်း မျှော်လင့်ပါတယ်”လို့ BBC Sports ကို ပြောခဲ့တာပါ။

မန်စီးတီးအသင်းဟာ ပရီးမီးယားလိဂ်ဖလားကို ရရှိထားပြီး၊ FA ဖလားနဲ့ ချန်ပီယံလိဂ် ဗိုလ်လုပွဲလည်း ရောက်ရှိ ထားပြီးဖြစ်လို့ ဒီရာသီမှာ ဆုဖလား ၃ လုံး ရယူနိုင်ဖို့ မျှော်လင့်ချက်ရှိနေတာ ဖြစ်ပါတယ်။

ယူနိုက်တက်အသင်းဟာ ၁၉၉၉ က ဒီဆုဖလား ၃ လုံးစလုံးကို ရယူထားတာဖြစ်ပြီး အင်္ဂလန်မှာ ဒီလိုမျိုး အောင်မြင်မှုရခဲ့တဲ့ တစ်သင်းတည်းသော အသင်းအဖြစ် ရှိခဲ့တာပါ။

ဟာလန်းကို တွေ့ရစဉ်

အဲဒါကြောင့် မန်စီးတီးအသင်းဟာ အခုနှစ် ရာသီမှာ မြို့ခံပြိုင်ဘက်ရဲ့ အောင်မြင်မှုမျိုးကို ရယူနိုင်ဖို့ ပစ်မှတ်ထား နေတာ ဖြစ်ပါတယ်။

ဟာလန်းက “ ဒါပေမယ့် ဒါက မလွယ်ကူပါဘူး။ ကျနော်တို့ဟာ အသင်းကောင်း ၂ သင်းနဲ့ ဗိုလ်လုပွဲ ကစားရမှာ ဖြစ်ပြီး သူတို့ဟာ ဒါကို ဖျက်ဆီးနိုင်ဖို့ လုပ်ကြပါလိမ့်မယ်။ ကျနော်တို့က အကောင်းဆုံး ကစားခဲ့မယ်ဆိုရင် ဒါကို အောင်မြင်မှု ရယူနိုင်ဖို့အတွက် အခွင့်အရေးကောင်းတွေ ရှိပါတယ်။ အခုအချိန်မှာ ကျနော်တို့ဟာ အားလပ်ရက် မတိုင်ခင် ဒီဗိုလ်လုပွဲ ၂ ပွဲကို အာရုံစိုက်ရမှာပါ”လို့ ပြောခဲ့ပါတယ်။

အသက် ၂၂ နှစ်အရွယ်ရှိ ဟာလန်းဟာ ဒီရာသီ ပရီးမီးယားလိဂ် ပြိုင်ပွဲမှာ ၃၆ ဂိုးသွင်းပြီး ရွှေဖိနပ်ဆု ရယူနိုင်ခဲ့တာ အပါအဝင် ပြိုင်ပွဲစုံ ၅၁ ပွဲမှာ ၅၂ ဂိုး သွင်းယူနိုင်ခဲ့တာပါ။

မန်စီးတီးအသင်းဟာ ဇွန်လ ၃ ရက်မှာ FA ဖလား ဗိုလ်လုပွဲအဖြစ် ယူနိုက်တက်အသင်းနဲ့ ယှဉ်ပြိုင်မှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇွန်လ ၂

ပီအက်စ်ဂျီကနေ အခုရာသီအကုန်မှာ ထွက်ခွာတော့မယ့် တိုက်စစ်မှူး မက်ဆီရဲ့ အနာဂတ်ကို လာမယ့် အပတ်မှာ ဆုံးဖြတ်မယ်လို့ ဘာစီလိုနာအသင်းနည်းပြ ဇာဗီက ပြောလိုက်ပါတယ်။

ဇာဗီက “မက်ဆီနဲ့ ပတ်သက်ပြီး ကျနော် အကြိမ်ကြိမ် ပြောပြီးပါပြီ။ ဒီနေရာဟာ သူ့အတွက် တံခါးဖွင့် ထားပါတယ်။ သူလာဖို့ ဆုံးဖြတ်ခဲ့ရင် သူက ကျနော်တို့ကို ကူညီမယ်ဆိုတာ ကျနော်သိပါတယ်။ ကျနော် တို့ဟာ ပီအက်စ်ဂျီကို လေးစားပြီး အကောင်းဆုံးနည်းလမ်းနဲ့ပဲ ပြီးဆုံးသွားစေချင်ပါတယ်။ သူဟာ မြင့် မားတဲ့ အဆင့်မှာ ဘောလုံး ဆက်ကစားနိုင်တယ်လို့ ကျနော်တို့ထင်သလို အကောင်းဆုံး လုပ်နိုင်မယ်လို့ လည်း ယုံကြည်ပါတယ်။ လာမယ့်အပတ်မှာ သူဆုံးဖြတ်ချက် ချမယ်လို့ ကျနော့်ကို ပြောခဲ့ပါတယ်။ အဆုံးသတ်မှာ သူက အနာဂတ်ကို ဆုံးဖြတ်တော့မှာဖြစ်ပြီး ဒီမှာလည်း တံခါးတွေ ဖွင့်ထားတော့ ငြင်းခုံ စရာ မရှိတော့ပါဘူး”လို့ ပြောပါတယ်။

အာဂျင်တီးနား အသင်းခေါင်းဆောင်ဟာ အခုလအကုန်မှာ ပီအက်စ်ဂျီကနေ ထွက်ခွာမှာ ဖြစ်ပေမယ့် အနာဂတ်ကို မဆုံးဖြတ်ရသေးပါဘူး။

မက်ဆီကို ခေါ်ယူဖို့ ဆော်ဒီက လုပ်ခလစာ ယူရိုသန်း ၅၀၀ နဲ့ ကမ်းလှမ်းမှု ပြုလုပ်ထားတာ ဖြစ်ပေမယ့် ဘာစီလိုနာအသင်းကလည်း သူတို့ရဲ့ ကစားသမားဟောင်းကို အံ့မခန်း သဘောတူညီမှုတစ်ခုနဲ့ ပြန်လည် ခေါ်ယူနိုင်ဖို့ စိတ်အား ထက်သန်နေတာ ဖြစ်ပါတယ်။

မက်ဆီကို တွေ့ရစဉ်

စပိန်ကလပ်အနေနဲ့ မက်ဆီကို ပြန်လည် ခေါ်ယူဖို့ဆိုရင် သူတို့ရဲ့ ဘဏ္ဍာရေး အခြေအနေတွေကို ပြန်လည် ပြုပြင်ဖို့ လိုအပ်နေတာပါ။

ဇာဗီကတော့ ဘာစီလိုနာအနေနဲ့ မက်ဆီကို အမြဲတမ်း ကြိုဆိုနေမယ်လို့ ပြောခဲ့ပေမယ့် နောက်ဆုံး ဆုံးဖြတ်ချက်က အသင်းဖော်ဟောင်းပေါ်မှာပဲ မူတည်တယ်လို့ ပြောခဲ့တာ ဖြစ်ပါတယ်။

ပီအက်စ်ဂျီနည်းပြ ဂယ်လ်တီယာက လာမယ့် ကလားမောင့်နဲ့ပွဲဟာ မက်ဆီရဲ့ ပီအက်စ်ဂျီ ကစားသမား ဘဝ နောက်ဆုံးပွဲလို့ အတည်ပြု ထားပါတယ်။

အသက် ၃၅ နှစ်အရွယ်ရှိ မက်ဆီဟာ ပီအက်စ်ဂျီအသင်းမှာ ကစားခဲ့တဲ့ ၂ နှစ်အတွင်း ပွဲပေါင်း ၇၄ ပွဲ ပါဝင်ကစားခဲ့ပြီး ၃၂ ဂိုး သွင်းယူခဲ့ကာ လီဂူးဝမ်းဆုဖလား ၂ ကြိမ်နဲ့ ထရိုဖီဒတ်စ် ချန်ပီယံဆု ၁ ကြိမ် ရယူ နိုင်ခဲ့တာ ဖြစ်ပါတယ်။

Source: Goal