- By CNI
- Category: အားကစား
- Hits: 726
CNI Sport News
၂၀၂၃ ခုနှစ်၊ ဇန်နဝါရီ ၃
ဖီဖာအကြီးအကဲ အင်ဖန်တီနိုက ကွယ်လွန်သွားခဲ့ပြီဖြစ်တဲ့ ဘရာဇီးလ်ဂန္တဝင်ကြီး ပီလီအတွက် အားကစားကွင်း နာမည်ပေးဖို့ ကမ္ဘာ့နိုင်ငံအားလုံးကို ဖီဖာက တောင်းဆိုတယ်လို့ ပြောလိုက်ပါတယ်။
အင်ဖန်တီနိုက “ကမ္ဘာ့နိုင်ငံတိုင်းမှာရှိတဲ့ ဘောလုံးအားကစားကွင်းတွေထဲက တစ်ကွင်းကို ပီလီရဲ့ နာမည်ပေးဖို့ ကျနော်တို့ တောင်းဆိုသွားမှာဖြစ်တယ်”လို့ ဗီလာဘယ်မီရိုမှာ သတင်းထောက်တွေကို ပြောခဲ့တာပါ။
ကမ္ဘာ့ဘောလုံးလောကရဲ့ အကြီးကျယ်ဆုံး ကစားသမားအဖြစ် သတ်မှတ်ခံထားရတဲ့ ပီလီဟာ ဒီဇင်ဘာ ၂၉ ရက် က ကွယ်လွန်ခဲ့တာဖြစ်ပြီး ကွယ်လွန်ချိန်မှာ အသက် ၈၂ နှစ်ရှိပြီ ဖြစ်ပါတယ်။ အင်ဖန်တီနိုဟာ ဗီလာဘယ်မီရို အားကစားကွင်းမှာ ပြသထားတဲ့ ပီလီရဲ့ ရုပ်အလောင်းကို ပထမဆုံး ဂါရဝပြုတဲ့ သူတွေထဲမှာ ပါဝင်ခဲ့တာပါ။
ပီလီရဲ့ ရုပ်ကလာပ်ကို တွေ့ရစဉ်
အင်ဖန်တီနိုက “ကျနော်တို့ဟာ ဒီကို အလွန်ဝမ်းနည်းစွာနဲ့ ရောက်ရှိနေတာပါ။ ပီလီက ထာဝရပါပဲ။ သူဟာ ကမ္ဘာ့ဘောလုံးလောကရဲ့ အိုင်ကွန်ပါပဲ”လို့ ပြောခဲ့တာ ဖြစ်ပါတယ်။
ကမ္ဘာ့ဘောလုံးအဖွဲ့ချုပ်(ဖီဖာ)ဟာ ပီလီကို ၂၀ ရာစု အကောင်းဆုံး ကစားသမားအဖြစ် သတ်မှတ်ထားတာဖြစ်ပြီး ဘရာဇီးလ် ဂန္တဝင် ကွယ်လွန်ပြီးနောက် ဇူးရစ်မြို့ရှိ ရုံးချုပ်အပြင်ဘက်မှာ အလံကို တစ်ဝက်အထိ လျှော့ချပြီးလွှင့်ထူထားတာပါ။
ကမ္ဘာ့ဖလားချန်ပီယံဆုကို ၃ ကြိမ် ရယူထားတဲ့ တစ်ဦးတည်းသော ကစားသမား ပီလီဟာ ကင်ဆာရောဂါကို ကာလကြာရှည် တိုက်ပွဲဝင်ပြီးနောက် ဆော်ပေါ်လိုရှိ ဆေးရုံမှာ ကွယ်လွန်သွားခဲ့တာ ဖြစ်ပါတယ်။
ပီလီဟာ ကလပ် ကစားသမားဘဝမှာ ဆန်းတို့စ်နဲ့ နယူးယော့ခ်ကော့စ်မိုစ် အသင်းတွေမှာသာ ကစားခဲ့တာဖြစ်ပြီး ဘရာဇီးလ်ကလပ် ဆန်းတို့စ်အသင်းအတွက် ၁၉၅၆ ကနေ ၁၉၇၄ အထိ ကစားခဲ့ပြီး အမေရိကန်ကလပ်မှာတော့ ၁၉၇၅ ကနေ ၁၉၇၇ အထိ ကစားခဲ့ကာ ဆုဖလား အောင်မြင်မှု အများအပြား ရယူနိုင်ခဲ့တာ ဖြစ်ပါတယ်။
Source: CNA
- By CNI
- Category: အားကစား
- Hits: 890
CNI Sport News
၂၀၂၃ ခုနှစ်၊ ဇန်နဝါရီ ၃
လီဗာပူးလ်အသင်းနည်းပြ ကလော့ပ်က ဘရန်ဖို့ဒ်အသင်းကို ၃ ဂိုး- ၁ ဂိုးနဲ့ အရေးနိမ့်တဲ့ပွဲမှာ ဒိုင်လူကြီးတွေရဲ့ ဆုံးဖြတ်ချက်ကို ဝေဖန်လိုက်ပြီး သူတို့ကို ပြောနေရတာက အိမ်မှာရှိတဲ့ မိုက်ခရိုဝေ့ဖ်ကို ပြောနေရသလိုပဲလို့ ပြောလိုက်ပါတယ်။
ကလော့ပ်က “တတိယဂိုးဆိုရင် လုံးဝခွင့်မပြုသင့်ပါဘူး။ တကယ်ကို လွယ်ပါတယ်။ ဒါနဲ့ ပတ်သက်ပြီး ဒိုင်လူကြီးနဲ့ စကားပြောဖို့ လုပ်ခဲ့ပေမယ့် ဒါက ကျနော့်အိမ်မှာရှိတဲ့ မိုက်ခရိုဝေ့ဖ်နဲ့ စကားပြောတာနဲ့ အတူတူပါပဲ။ တကယ်ကို ဘာမှ တုန့်ပြန်မှု မရှိပါဘူး။ အမြဲတမ်း အတူတူပါပဲ”လို့ ပြောခဲ့တာပါ။
ဒီပွဲစဉ်မှာ ဘရန်ဖို့ဒ် အသင်းဘက်က ဝီဆာသွင်းယူတဲ့ ၂ ဂိုးဟာ လူကျွံဘောအဖြစ် သတ်မှတ်ခံခဲ့ရသလို လီဗာပူးလ်တိုက်စစ်မှူး ဒါဝင်နူနက်စ် သွင်းယူတဲ့ ဂိုးကိုလည်း လူကျွံဘောအဖြစ် သတ်မှတ်ခဲ့တာပါ။
လီဗာပူးလ်အသင်းကိုတွေ့ရစဉ်
ဘရန်ဖို့ဒ်အသင်းဘက်က သွင်းယူတဲ့ တတိယဂိုးမှာ အမ်ဘူမိုက ဂိုးမသွင်းခင် ကိုနာတေးကို တွန်းတိုက်ခဲ့တယ် ဆိုပြီး လီဗာပူးလ်နည်းပြ ကလော့ပ်က ပွဲအပြီးမှာ ဒေါသထွက်နေခဲ့တာ ဖြစ်ပါတယ်။
ဘရန်ဖို့ဒ်အသင်းဟာ လီဗာပူးလ်အသင်းကို ၁၉၃၈ က နောက်ဆုံး အနိုင်ရခဲ့ပြီးနောက် နှစ်ပေါင်း ၈၅ နှစ်အကြာမှ ပထမဆုံး နိုင်ပွဲပြန်လည် ရယူနိုင်ခဲ့တာပါ။
ဘရန်ဖို့ဒ်အသင်းဟာ ဒီနိုင်ပွဲကြောင့် ပရီးမီးယားလိဂ် အမှတ်ပေးဇယား အဆင့် ၇ နေရာအထိ တက်လှမ်းနိုင်ခဲ့ပြီး အဆင့် ၄ နေရာက ယူနိုက်တက်အသင်းနဲ့ ၆ မှတ်အကွာမှာ ရှိနေခဲ့ပါတယ်။ ဘရန်ဖို့ဒ်နည်းပြ သော်မတ်စ်ဖရန့်ခ်က လီဗာပူးလ်ကို အနိုင်ရယူနိုင်ခဲ့တဲ့ သူ့ကစားသမားတွေကို ချီးကျူးသွားခဲ့တာပါ။
သော်မတ်ဖရန့်ခ်က “ဘယ်လိုညမျိုးလဲ၊ ကစားသမားတွေကို ချီးကျူးစကားပြောဖို့တောင် မလုံလောက် နိုင်ပါဘူး။ သူတို့က မယုံနိုင်လောက်အောင် ကောင်းတဲ့သူတွေပါ။ သူတို့ရဲ့ စိတ်နေသဘောထား၊ ကြိုးစားအားထုတ်မှုတွေနဲ့ စည်းလုံးညီညွတ်မှုတွေက လီဗာပူးလ်ကို အနိုင်ရယူဖို့ အရာအားလုံးကို အတူတကွ ပေါင်းစည်း နိုင်ခဲ့ပါတယ်” လို့ ပြောခဲ့ပါတယ်။
Source: Goal
- By CNI
- Category: အားကစား
- Hits: 1003
CNI Sport News
၂၀၂၂ ခုနှစ်၊ ဇန်နဝါရီ ၃
ယူနိုက်တက်တိုက်စစ်မှူးဟောင်း ရော်နယ်ဒိုနဲ့ ဆော်ဒီကလပ်အယ်လ်နာဆာအသင်းတို့ ချုပ်ဆိုထားတဲ့ စာချုပ်မှာ ပရီးမီးယားလိဂ်ကလပ် နယူးကာဆယ်အသင်းကို ပြောင်းနိုင်တဲ့အချက်ပါဝင်နေတယ်လို့ သိရပါတယ်။
ရော်နယ်ဒိုဟာ ချန်ပီယံလိဂ်ကစားချင်တဲ့ ဆန္ဒပြင်းပြနေပေမယ့် ဆော်ဒီကလပ်ကို ပြောင်းခဲ့တာကြောင့် ဒီ မျှော်လင့်ချက်တွေအဆုံးသတ်သွားနိုင်တယ်လို့ ထင်ခဲ့ကြပေမယ့် မာကာသတင်းစာမှာတော့ ရော်နယ်ဒိုဟာ ချန်ပီယံလိဂ်ကစားခွင့်ရနိုင်မယ့် ဥရောပတစ်သင်းဆီ အမြန်ဆုံးပြန်လာနိုင်တယ်လို့ ဖော်ပြခဲ့တာ ဖြစ်ပါတယ်။ ရော်နယ်ဒိုနဲ့ အယ်လ်နာဆာအသင်းဟာ ၂၀၂၅ အထိ စာချုပ်ချုပ်ဆိုထားတာပါ။
ဒါပေမယ့် ပရီးမီးယားလိဂ်ကလပ် နယူးကာဆယ်အသင်းအနေနဲ့ အခုရာသီမှာ ထိပ်ဆုံး ၄ သင်းထဲဝင်ပြီး လာမယ့်ရာသီ ချန်ပီယံလိဂ်ဝင်ခွင့်ရခဲ့မယ်ဆိုရင် ရော်နယ်ဒိုဟာ အငှားနဲ့ ပြောင်းခွင့်ရမယ်လို့ သိရပါတယ်။ နယူးကာဆယ်အသင်းကို ဆော်ဒီအများပိုင်ရင်းနှီးမြှုပ်နှံမှုလုပ်ငန်းစုက ၂၀၂၁ အောက်တိုဘာလက အပြီးသတ် ဝယ်ယူထားတာပါ။ပြီးခဲ့တဲ့ ၁၅ လအတွင်းမှာလည်း နယူးကာဆယ်အသင်းကို ငွေကြေးအများအပြားသုံးပြီး ကစားသမားသစ်တွေ ဖြည့်တင်းပေးခဲ့တာဖြစ်ပါတယ်။
နယူးကာဆယ်အသင်းဟာ ပြီးခဲ့တဲ့ရာသီက တန်းဆင်းဇုန်ကနေ လွတ်မြောက်အောင် ရုန်းထွက်နိုင်ခဲ့ပေမယ့် အခုဆိုရင် အသင်းဟာ ဥရောပဝင်ခွင့်တစ်နေရာအတွက်ပါ စိန်ခေါ်လာနိုင်ခဲ့တာပါ။နယူးကာဆယ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အာဆင်နယ်၊ မန်စီးတီးအသင်းတို့ရဲ့ နောက် အဆင့် ၃ နေရာမှာ ရပ်တည် နေတာဖြစ်ပါတယ်။ရော်နယ်ဒိုကတော့ လက်ရှိအချိန်မှာ အယ်လ်နာဆာအသင်းနဲ့ အပြောင်းအရွှေ့ အပြီးသတ် နိုင်ဖို့အတွက် ဆော်ဒီနိုင်ငံကို ရောက်ရှိနေတာပါ။
ရော်နယ်ဒိုဟာ ဆော်ဒီကလပ်နဲ့ အပြောင်းအရွှေ့ပြီးမြောက်ခဲ့ရင် ကြာသပတေးနေ့မှာ ကစားမယ့် အယ်လ်တာအီ အသင်းနဲ့ပွဲမှာ ပွဲဦးထွက်အဖြစ် ပါဝင်နိုင်တယ်လို့ စပေါ့မေးလ်က ဖော်ပြခဲ့တာဖြစ်ပါတယ်။ အယ်လ်နာဆာအသင်း ပရိသတ်တွေကတော့ မကြာသေးခင်က ပွဲစဉ်တစ်ပွဲမှာ ရော်နယ်ဒိုနာမည်နဲ့ သူ့ရဲ့ အောင်ပွဲခံဟန် Siuuu ဆိုတဲ့ အသံကို သီကြွေးခဲ့ကြသလို သူ့နာမည်ပါဝင်တဲ့ နံပတ် ၇ ဂျာစီကလည်း ရောင်းအားကောင်းနေတယ်လို့ သိရပါတယ်။
အယ်လ်နာဆာအသင်းဟာ အခုနှစ်ရာသီ ဆော်ဒီပရိုလိဂ်ပြိုင်ပွဲရဲ့ ထိပ်ဆုံးနေရာမှာရပ်တည်နေပြီး ဒုတိယနေရာက အယ်လ်ရှာဘတ်အသင်းထက် ၁ ပွဲပို ကစားကာ ၁ မှတ်အသာရနေတာဖြစ်ပါတယ်။
Source:DailMail
- By CNI
- Category: အားကစား
- Hits: 672
CNI Sport News
၂၀၂၂ ခုနှစ်၊ ဇန်နဝါရီ ၂
မြန်မာအသင်းဟာ အုပ်စုကနေ နောက်တဆင့် မတက်နိုင်ခဲ့ပေမယ့် အသင်းမှာ အားသာချက်တွေ အများကြီးရှိ တယ်လို့ နည်းပြ အန်တွမ်နီဟေးက ဗီယက်နမ်နဲ့ ပွဲကြို သတင်းစာ ရှင်းလင်းပွဲမှာ ပြောလိုက်ပါတယ်။
အန်တွမ်နီဟေးက “အုပ်စုတွင်းမှာ အသင်းတွေက သူ့အားသာချက် အားနည်းချက် ကိုယ်စီရှိကြပြီး ကွာခြားမှု ကြီးကြီးမားမား မရှိပါဘူး။ ဗီယက်နမ် အသင်းက အသင်းကောင်း တစ်သင်းဖြစ်ပြီး သူတို့အသင်းမှာ အားသာချက် ရှိသလို အားနည်းချက်လည်း ရှိပါတယ်။ ကျနော်တို့ အသင်းကလည်း ပြီးခဲ့တဲ့ ၃ ပွဲမှာ ဘောလုံးပိုင်ဆိုင်မှု အသာနဲ့ ဖန်တီးခွင့်တွေ အများကြီး လုပ်ခဲ့တာပါပဲ။ ကောင်းမွန်တဲ့ အချက်တွေ အများကြီး ရှိပါတယ်။ အလားတူပဲ နိုင်ပွဲ အတွက် လိုအပ်တဲ့ ဂိုးမရယူနိုင်ခဲ့သလို ဂိုးပေးခဲ့ရတဲ့ အားနည်းချက်တွေ ရှိပါတယ်။ အုပ်စုတက်ခွင့် မရတဲ့အတွက် ဝမ်းနည်းစရာပါ”လို့ ပြောခဲ့တာပါ။
မြန်မာအသင်း ယှဉ်ပြိုင်နေစဉ်
မြန်မာအသင်းဟာ ဗီယက်နမ်နဲ့ ပွဲမတိုင်ခင် အုပ်စုတွင်း ၃ ပွဲ ကစားထားခဲ့တာမှာ မလေးရှားနဲ့ စင်ကာပူအသင်းကို အရေးနိမ့်ပြီး လာအိုအသင်းနဲ့ သရေကျခဲ့ပါတယ်။
အဲ့ဒါကြောင့် အုပ်စုတွင်းမှာ ရမှတ် ၁ မှတ်သာ ရရှိထားပြီး အုပ်စုကနေ ထွက်ခွာခဲ့ရပြီ ဖြစ်ပါတယ်။ တိုက်စစ်မှူး အောင်ကောင်းမာန်ကတော့ အသင်းဟာ ရှေ့ပွဲစဉ် ၃ ပွဲကို ပြန်လည် သုံးသပ်ပြီးပြီလို့ သတင်းစာ ရှင်းလင်းပွဲမှာ ပြောခဲ့ပါတယ်။
အောင်ကောင်းမာန်က “ပြီးခဲ့တဲ့ ၃ ပွဲစလုံးမှာ ကျနော်တို့အသင်း ဘယ်လို ကစားခဲ့တယ်ဆိုတာကို အားလုံးအမြင်ပဲ ဖြစ်ပါတယ်။ ပွဲတိုင်းကို ကျနော်တို့ ဘောလုံးပိုင်ဆိုင်မှု အသာနဲ့ စိုးမိုးပြီး ကစားနိုင်ခဲ့ပါတယ်။ ဂိုးရဖို့ အခွင့်အရေး တွေလည်း ဖန်တီးနိုင်ခဲ့ပါတယ်။ ကံမကောင်းစွာနဲ့ပဲ ကျနော်တို့ ရသင့်သလောက် ဂိုးတွေမရဘဲ အသင်းရလဒ် မကောင်းဖြစ်ခဲ့ရပါတယ်။ ကျနော်တို့ ပြန်လည်သုံးသပ်ပြီးပါပြီ”လို့ ပြောခဲ့တာပါ။
ဗီယက်နမ်နဲ့ မြန်မာအသင်းတို့ဟာ ဇန်နဝါရီ ၃ ရက် မြန်မာစံတော်ချိန် ည ၇ နာရီ မိုင်ဒင်း အားကစားကွင်းမှာ ယှဉ်ပြိုင်သွားမှာ ဖြစ်ပါတယ်။
- By CNI
- Category: အားကစား
- Hits: 678
CNI Sport News
၂၀၂၂ ခုနှစ်၊ ဇန်နဝါရီ ၂
ယူနိုက်တက်အသင်းဟာ နှစ်စဉ်နှစ်တိုင်း ကလပ်ပြက္ခဒိန်ကို ထုတ်ဝေလေ့ရှိပြီး ၂၀၂၃ အတွက် ထုတ်ဝေခဲ့တာမှာ တိုက်စစ်မှူးဟောင်း ရော်နယ်ဒို ပါဝင်လာခဲ့တာဖြစ်ပါတယ်။
ရော်နယ်ဒိုဟာ ယူနိုက်တက်အသင်းနဲ့ နှစ်ဦးသဘောတူစာချုပ်ဖျက်သိမ်းထားပြီး မကြာသေးခင်ကမှ ဆော်ဒီ ကလပ် အယ်လ်နာဆာအသင်းကို ပြောင်းရွှေ့ခဲ့တာပါ။ရော်နယ်ဒိုဟာ အယ်လ်နာဆာအသင်းနဲ့ ၂၀၂၅ အထိ စာချုပ် ချုပ်ဆိုခဲ့ပြီး တစ်နှစ်လုပ်ခ ယူရိုသန်း ၂၀၀ ရရှိမှာဖြစ်တဲ့အတွက် ကမ္ဘာ့လုပ်ခလစာအများဆုံး ရရှိတဲ့ ကစားသမား ဖြစ်လာခဲ့ပါတယ်။
ရော်နယ်ဒိုဟာ နိုဝင်ဘာလကတည်းက ယူနိုက်တက်ကနေ ထွက်ခွာခဲ့ပေမယ့် ကလပ်ကတော့ ပေါ်တူဂီအသင်း ခေါင်းဆောင်နဲ့အတူ ၂၀၂၃ ပြက္ခဒိန်တွေကို ရောင်းချနေဆဲဖြစ်ပါတယ်။ရော်နယ်ဒိုဟာ ကလပ်ဂန္တဝင်တွေ ပါဝင်တဲ့ ပြက္ခဒိန်မှာလည်း ပါဝင်နေတယ်လို့ သိရပြီး ဒီ ပြက္ခဒိန် ၂ ခုစလုံးကို ယူနိုက်တက်အသင်းရဲ့ တရားဝင်ကလပ် စတိုး အွန်လိုင်းကနေ ဝယ်ယူလို့ ရပါတယ်။ရော်နယ်ဒိုဟာ ၂၀၂၃ ယူနိုက်တက်ပြက္ခဒိန်ရဲ့ ဇန်နဝါရီလမှာ ပါဝင်ခဲ့တာပါ။
နွေရာသီအပြောင်းအရွှေ့က ခေါ်ယူထားတဲ့ ကတ်စမဲရိုး၊ မာတီးနတ်စ်၊ အဲရစ်ဆန်၊ အန်တိုနီနဲ့ မာလာစီယာတို့ လည်း အသင်းရဲ့ပြက္ခဒိန်ထဲမှာ ပါဝင်နေတာဖြစ်ပါတယ်။ဒါ့အပြင် အဓိကကစားသမားတွေဖြစ်တဲ့ ရက်ရှ်ဖိုဒ့်၊ ဒီဂီယာ၊ မက်ဂွဲယား၊ ဗာရန်း၊ ဆန်ချိုနဲ့ ဘရူနိုဖာနန်ဒက်စ်တို့လည်း ပြက္ခဒိန်အသစ်ထဲမှာ ပါဝင်ခဲ့တာပါ။
ယူနိုက်တက်အသင်းကတော့ ပရီးမီးယားလိဂ်မှာ နိုင်ပွဲဆက်နေပြီး အမှတ်ပေးဇယား အဆင့် ၄ နေရာအထိ တက်လှမ်းနိုင်ခဲ့ကာ ဇန်နဝါရီလ ၄ ရက်မှာ ဘုန်းမောက်အသင်းနဲ့ ပရီးမီးယားလိဂ်ပွဲစဉ် ယှဉ်ပြိုင်ရမှာ ဖြစ်ပါတယ်။
Source:The Sun
- By CNI
- Category: အားကစား
- Hits: 857
CNI Sport News
၂၀၂၂ ခုနှစ်၊ ဇန်နဝါရီ ၂
ချယ်လ်ဆီးအသင်းနည်းပြ ဂရေဟမ်ပေါ်တာက နော်တင်ဟမ်ဖောရက်စ်အသင်းနဲ့ ၁ ဂိုးစီ သရေကျတဲ့ ပွဲမှာ သူတို့အနေနဲ့ သရေ ၁ မှတ်ထက်ပိုရရင် မျှတမှာ မဟုတ်ဘူးလို့ ပြောလိုက်ပါတယ်။
ဂရေဟမ်ပေါ်တာက “ကျနော်တို့ရဲ့ စွမ်းဆောင်ရည် အဆင့်အတန်းက ၃ မှတ်ရယူဖို့ မလုံလောက်ခဲ့ပါဘူး။ ပထမ ပိုင်းမှာ ပွဲကိုထိန်းချုပ် နိုင်ခဲ့တယ်ဆိုပေမယ့် ကျနော်တို့ ကောင်းမွန်စွာ လုပ်ဆောင်နိုင်ခြင်း မရှိပါဘူး။ ဒုတိယပိုင်း မှာ ကျနော်တို့ လုံးဝကို မထိန်းချုပ်နိုင်တော့သလို ဖောရက်စ်ကလည်း ပွဲကောင်းတစ်ပွဲ ကစားနိုင်ခဲ့ပါတယ်။ မိနစ် ၉၀ အတွင်း ကျနော်တို့ရဲ့ စွမ်းဆောင်ရည်အတွက် အလွန်စိတ်ပျက်မိပြီး ၃ မှတ် ရယူခဲ့မယ်ဆိုရင် မျှတမှာ မဟုတ် ဘူး”လို့ ပြောခဲ့တာပါ။
ချယ်လ်ဆီး အသင်းဟာ ဒီပွဲရဲ့ ပထမပိုင်းမှာ စတာလင်ရဲ့ ဂိုးနဲ့ ဦးဆောင်နိုင်ခဲ့ပေမယ့် ဒုတိယပိုင်းမှာ အော်ရီယာက နော်တင်ဟမ်ဖောရက်စ်အတွက် ချေပဂိုး သွင်းယူသွားခဲ့တာ ဖြစ်ပါတယ်။ ဒီပွဲမှာ ချယ်လ်ဆီးအသင်းက ဘောလုံး ပိုင်ဆိုင်မှု ၇၂ ရာခိုင်နှုန်းအထိ ရှိခဲ့ပေမယ့် ဂိုးပေါက် ကန်သွင်းမှုနဲ့ ဂိုးပေါက်တည့်မှုအပိုင်းမှာ နော်တင်ဟမ် ဖောရက်စ် အသင်းက အသာရခဲ့တာပါ။
နော်တင်ဟမ်ဖောရက်စ်အသင်းကိုတွေ့ရစဉ်
ချယ်လ်ဆီးအသင်းဟာ ဒီရလဒ်ကြောင့် အဆင့် ၄ နေရာက ယူနိုက်တက်အသင်းနဲ့ ၇ မှတ် ကွာဟနေပြီး အဆင့် ၈ နေရာမှာ ရှိနေတာဖြစ်ပါတယ်။ ချယ်လ်ဆီး အသင်းခေါင်းဆောင် အက်စ်ပီလီကွီတာက အသင်းဟာ ရမှတ်တွေ ဆုံးရှုံးတာများနေလို့ ရာသီကြို ပစ်မှတ်တွေနဲ့ ဝေးကွာနေပြီလို့ ဝန်ခံခဲ့တာပါ။
အက်စ်ပီလီကွီတာက “ရမှတ်တိုင်းက အရေးကြီးပြီး ဒီပွဲမှာ ၂ မှတ် ဆုံးရှုံးခဲ့ပါတယ်။ ရာသီ အစကတည်းက ကျနော် တို့ဟာ အမှတ်တွေ အများကြီး ဆုံးရှုံးခဲ့ပြီး အခု ကျနော်တို့ ရောက်ချင်နေတဲ့ နေရာနဲ့ တကယ်ကို ဝေးကွာနေပါပြီ။ လာမယ့်ရာသီ ချန်ပီယံလိဂ် ဝင်ခွင့်ရချင်တယ်ဆိုရင် ဒုတိယရာသီဝက်မှာ အလွန်ကောင်းဖို့ လိုအပ်ပါတယ်။ ဒီလို ခက်ခဲတဲ့ အချိန်မှာ တိုးတက်မှုရဖို့အတွက် လူတိုင်းက ကြိုးစားအားထုတ်ဖို့ လိုပါတယ်”လို့ ပြောခဲ့ပါတယ်။
ချယ်လ်ဆီးအသင်းဟာ ဇန်နဝါရီ ၅ ရက်မှာ ပရီးမီးယားလိဂ် ပွဲစဉ်အဖြစ် မန်စီးတီးအသင်းကို အိမ်ကွင်းမှာ လက်ခံ ယှဉ်ပြိုင်ရမှာ ဖြစ်ပါတယ်။
Source: Daily Mail/ Goal
- By CNI
- Category: အားကစား
- Hits: 819
CNI Sport News
၂၀၂၂ ခုနှစ်၊ ဇန်နဝါရီ ၂
အက်စတွန်ဗီလာအသင်းကို ၂ ဂိုး- ဂိုးမရှိနဲ့ အိမ်ကွင်းမှာ အရေးနိမ့်ပြီးနောက် စပါးအသင်းဟာ ထိပ်ဆုံး ၄ သင်းထဲ ဝင်ရောက်ပြီး ရာသီအဆုံးသတ်နိုင်မှာ မဟုတ်ဘူးလို့ နည်းပြဖြစ်သူ ကွန်တီက ပြောလိုက်ပါတယ်။
ကွန်တီက “ကျနော်တို့ဆီမှာ ဖန်တီးမှုတွေ ပြုလုပ်နိုင်တဲ့ ကစားသမားတွေ အများကြီး မရှိပါဘူး။ ဒီပွဲရဲ့ ပထမပိုင်း မှာဆိုရင် ကျနော်တို့ဟာ နေရာလွတ်တွေကို ရှာမဖွေနိုင်ခဲ့ပါဘူး။ ဂိုးသာ မပေးလိုက်ရဘူးဆိုရင် ကျနော်တို့ အနိုင် ရနိုင်တဲ့ အခြေအနေမှာ ရှိပါတယ်။ ကျနော်တို့ ပေးလိုက်ရတဲ့ ဂိုးတွေက ယုံကြည်မှုတွေနဲ့ အခြေအနေ အများ အပြားကို သေဆုံးသွားစေခဲ့ပါတယ်”လို့ ပြောခဲ့တာပါ။
စပါးအသင်းဟာ ဒီပွဲ အပါအဝင် ကမ္ဘာ့ဖလားအပြီး ပြန်ကစားခဲ့တဲ့ ၂ ပွဲစလုံး နိုင်ပွဲပျောက်ဆုံးနေပြီး ၇ ပွဲဆက်တိုက် ၂ ဂိုး ဒါမှမဟုတ် ၂ ဂိုးနဲ့အထက် သွင်းဂိုးတွေကို ခွင့်ပြုနေရတာ ဖြစ်ပါတယ်။ စပါးအသင်းဟာ ဒီရှုံးပွဲကြောင့် ယူနိုက် တက်အသင်းနဲ့ ၂ မှတ်အကွာ အဆင့် ၅ နေရာကို ရောက်ရှိသွားခဲ့တာပါ။
နည်းပြကွန်တီကိုတွေ့ရစဉ်
ဒါ့အပြင် လန်ဒန်ကလပ်ဟာ အဆင့် ၆ နေရာက လီဗာပူးလ်အသင်းထက် ၁ ပွဲ ပိုကစားထားပြီး ၂ မှတ်သာ ကွာဟ နေတဲ့ အခြေအနေမှာ ရှိနေတာ ဖြစ်ပါတယ်။
ကွန်တီက “လိဂ်ပြိုင်ပွဲက ကျနော်တို့အတွက် အလွန်ခက်ခဲပါလိမ့်မယ်။ ကျနော်ဟာ ရိုးသားချင်သလို ရှင်းရှင်း လင်းလင်းလည်း ဖြစ်ချင်ပါတယ်။ ကလပ်ကိုလည်း ပြောခဲ့ပြီးဖြစ်သလို ကျနော့်ရဲ့ အမြင်ကိုလည်း ပြောခဲ့ပါတယ်။ ပရိသတ်တွေက အကောင်းဆုံးဆိုတဲ့ အရာတွေနဲ့ ထိုက်တန်ပေမယ့် အဆင့် ၅ မှာပဲ ဆက်နေတာက အကောင်းဆုံး ဖြစ်နိုင်ပါတယ်။ အဆင့် ၆ ၊ ၇ ၊ ၅ ဒါမှမဟုတ် ၄ ကလည်း အကောင်းဆုံး ဖြစ်နိုင်တယ်”လို့ ပြောခဲ့တာပါ။
ဒီရာသီချန်ပီယံလိဂ် ဝင်ခွင့်ရဖို့အတွက် ယှဉ်ပြိုင်မှုဟာ ဒီနှစ်အတွင်းမှာ အပြင်းထန်ဆုံး ဖြစ်နိုင်ဖွယ်ရှိနေ ပါတယ်။ နယူးကာဆယ် အသင်းဟာ အကောင်းဆုံး ပုံစံတွေနဲ့ အဆင့် ၃ နေရာမှာ ရှိနေပြီး အဆင့် ၆ နေရာမှာ ရပ်တည်နေ တဲ့ လီဗာပူးလ်အသင်းကလည်း လက်ရှိအချိန်မှာ အကောင်းဆုံး ပုံစံတွေ ပြန်လည်ရရှိနေတာပါ။
စပါးအသင်းဟာ ဇန်နဝါရီ ၅ ရက်မှာ ပရီးမီးယားလိဂ် ပွဲစဉ်အဖြစ် ပဲလေ့စ်အသင်း အိမ်ကွင်းမှာ သွားရောက် ယှဉ်ပြိုင်ရမှာဖြစ်ပြီး စနေနေ့မှာတော့ အက်ဖ်အေဖလား ပွဲစဉ်အဖြစ် ပို့စ်မောက်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: Goal
- By CNI
- Category: အားကစား
- Hits: 453
CNI Sport News
၂၀၂၂ ခုနှစ်၊ ဒီဇင်ဘာ ၃၁
ဆန်းတို့စ်အသင်းဟာ အသင်းမှာ ပီလီ ကစားခဲ့ချိန် တလျှောက်လုံး ဝတ်ဆင်ခဲ့တဲ့ ကျောနံပါတ် ၁၀ ဂျာစီကို အပြီး တိုင် အနားပေးဖို့ စဉ်းစားနေတယ်လို့ သိရပါတယ်။
ဆန်းတို့စ်အသင်းဥက္ကဋ္ဌ ရူအီဒါက “နံပတ် ၁၀ ဂျာစီကို အနားပေးဖို့ ကောင်စီကို အဆိုပြုသွားမှာပါ။ ဗျူရိုကရေစီ လုပ်ထုံးလုပ်နည်းတွေအရ ကောင်စီ အစည်းအဝေးနဲ့ အတည်ပြုချက်ကို ရယူဖို့ လိုအပ်ပါတယ်။ ကျနော်တို့က တော့ ဇန်နဝါရီမှာ ကျောနံပါတ် ၁၀ ကို လုံးဝမဝတ်ဆင်တော့ဖို့ လုပ်ဆောင်နေပြီး ဘုတ်အဖွဲ့ရဲ့ နောက်ဆုံး ဆုံးဖြတ်ချက်ပဲ လိုအပ်တော့တာပါ။ ဒါဟာ ကောင်းမွန်တဲ့ ဂုဏ်ပြုမှု တစ်ခုဖြစ်လာမယ်လို့ ထင်ကြောင်း” ပြောခဲ့ တာပါ။
ကွယ်လွန်သွားခဲ့ပြီဖြစ်တဲ့ ဘရာဇီးလ် ဂန္တဝင်ကစားသမား ပီလီဟာ ဆန်းတို့စ်အသင်းမှာ ၁၉၅၆ ကနေ ၁၉၇၄ အထိ ပွဲပေါင်း ၆၅၉ ပွဲ ပါဝင်ကစားပြီး ၆၄၃ ဂိုး သွင်းယူနိုင်ခဲ့ကာ စီးရီးအေဖလား ၅ ကြိမ် အပါအဝင် အောင်မြင်မှု အများအပြားကို ရယူနိုင်ခဲ့တာ ဖြစ်ပါတယ်။
ကျောနံပါတ် ၁၀ ၀တ်ဆင်ပြီး ပီလီ ဘောလုံးကစားခဲ့စဉ်
ဘရာဇီးလ်ကလာတဲ့ သတင်းတွေမှာ ပီလီရဲ့ သမီးတွေဟာ ကျောနံပါတ် ၁၀ ကို အပြီးတိုင် အနားပေးဖို့ ဆန်းတို့စ် အသင်းထံ တောင်းဆိုခဲ့တယ်လို့ ဖော်ပြထားတာပါ။
ဆန်းတို့စ်အသင်းမှာ ကျောနံပါတ် ၁၀ ဝတ်ဆင်နေတဲ့ ဗင်နီဇွဲလား တိုက်စစ်မှူး ဆိုတယ်လ်ဒိုက “ခင်ဗျားရဲ့ ဂျာစီ ကို ချစ်ခင်လေးစားမှု အပြည့်နဲ့ ဝတ်ဆင်ရတာက တကယ်ကို ဂုဏ်ယူစရာကောင်းပါတယ်။ ဒီနေ့မှာ ခင်ဗျားက ကျနော်တို့ကို ထားခဲ့ပေမယ့် အမွေအနှစ်တွေနဲ့ အမှတ်တရတွေကတော့ ကျန်ရှိခဲ့ပါတယ်။ အရာအားလုံးအတွက် ကျေးဇူးတင်ပါတယ် ပီလီ”လို့ ရေးသားခဲ့တာပါ။
ဆန်းတို့စ်အသင်းကတော့ ပီလီကွယ်လွန်ပြီးနောက် ဝမ်းနည်းခြင်းကာလကို ၇ ရက်ကြာ ကြေညာခဲ့ပါတယ်။ ပီလီ ဟာ ဘရာဇီးလ်အသင်းအတွက် ၉၂ ပွဲ ကစားပြီး ၇၇ ဂိုး သွင်းယူကာ ကမ္ဘာ့ဖလား ချန်ပီယံဆုကို ၃ ကြိမ် ရယူနိုင် ခဲ့တာဖြစ်ပြီး အသက် ၈၂ နှစ်အရွယ်မှာ ကွယ်လွန်သွားခဲ့တာ ဖြစ်ပါတယ်။
Source: Sports Max
- By CNI
- Category: အားကစား
- Hits: 683
CNI Sport News
၂၀၂၂ ခုနှစ်၊ ဒီဇင်ဘာ ၃၁
အဲဗာတန်အသင်းနည်းပြ လမ်းပတ်က ချယ်လ်ဆီးအသင်းကို ကိုင်တွယ်ခဲ့စဉ်အချိန် ဟာလန်းကို ခေါ်ယူဖို့အတွက် ကြိုးစားခဲ့ဖူးတယ်လို့ ပြောလိုက်ပါတယ်။
လမ်းပတ်က “ဟာလန်းက အံ့သြဖွယ်ကောင်းတဲ့ ကစားသမားဖြစ်ပါတယ်။ ထိပ်တန်းအဆင့် ကစားသမားတွေဟာ ယေဘုယျဆိုရင် ထိပ်တန်းလိဂ်မှာ သူတို့လုပ်ဆောင်နိုင်တဲ့ အရာအားလုံးကို လုပ်ဆောင်နိုင်ပါတယ်။ ဆဲလ်ဘတ် မှာ ကစားခဲ့တုန်းက ရာသီကြိုခြေစမ်းပွဲမှာ ပြိုင်ဘက်နည်းပြအဖြစ်နဲ့ သူ့ကို ရင်ဆိုင်ခဲ့ရပါတယ်။ သူ့ကို ချယ်လ်ဆီး အတွက် ခေါ်ယူဖို့ ကြိုးစားခဲ့ပေမယ့် မဖြစ်ခဲ့ပါဘူး”လို့ ပြောခဲ့ပါတယ်။
ချယ်လ်ဆီးအသင်းဟာ ထိပ်တန်းအဆင့် တိုက်စစ်မှူး အများအပြားကို ခေါ်ယူခဲ့ပေမယ့် သူတို့ဟာ ရုန်းကန်ခဲ့ ရတာကြောင့် ဟာလန်းကို မခေါ်ယူနိုင်ခဲ့တာက အသင်းပရိသတ်တွေအတွက် စိတ်ပျက်စရာ ဖြစ်ခဲ့ပါတယ်။
ဟာလန်းဟာ နွေရာသီကမှ ဒေါ့မွန်အသင်းကနေ မန်စီးတီးအသင်းကို ရောက်ရှိလာခဲ့ပေမယ့် ပရီးမီးယားလိဂ် သွင်းဂိုး ၂၀ အမြန်ဆုံးပြည့်တဲ့ ကစားသမား ဖြစ်လာခဲ့တာပါ။
မန်စီးတီးအသင်းမှာ ခြေစွမ်းပြနေတဲ့ ဟာလန်းကိုတွေ့ရစဉ်
မန်စီးတီး တိုက်စစ်မှူးဟာ ပရီးမီးယားလိဂ်ကို ရောက်လာကတည်းက ခြေစွမ်းပြသနေတာဖြစ်ပြီး စံချိန်တွေလည်း အများအပြား ရယူထားတာ ဖြစ်ပါတယ်။
ချယ်လ်ဆီးအသင်းဟာ လမ်းပတ်ကို ထုတ်ပယ်ပြီး နောက်ပိုင်းမှာ လူကာကူ၊ အခု အူဘာမီယန်းတို့ကို အားဖြည့်ခဲ့ ပေမယ့် တိုက်စစ်ပိုင်းက ထင်သလောက် အလုပ်မဖြစ်ခဲ့ပါဘူး။
ဒီနောက် ချယ်လ်ဆီးအသင်းဟာ နောက်ဆုံး ကစားခဲ့တဲ့ပွဲမှာ ဘုန်းမောက်အသင်းကို အနိုင်ရခဲ့ပြီး ပရီးမီးယားလိဂ် မှာ ရှုံးပွဲဆက်နေတာကို ရပ်တန့်နိုင်ခဲ့တာ ဖြစ်ပါတယ်။
လမ်းပတ် လက်ရှိ ကိုင်တွယ်နေတဲ့ အဲဗာတန်အသင်းကတော့ လက်ရှိအချိန်မှာ ရုန်းကန်နေရပြီး မန်စီးတီးအသင်း နဲ့ ပွဲမကစားခင် အချိန်အထိ ရမှတ် ၁၄ မှတ်နဲ့ တန်းဆင်းဇုန်အထက် အဆင့် ၁၆ နေရာမှာ ရပ်တည်နေတာ ဖြစ်ပါတယ်။
Source: Goal
- By CNI
- Category: အားကစား
- Hits: 649
CNI Sport News
၂၀၂၂ ခုနှစ်၊ ဒီဇင်ဘာ ၃၁
လီဗာပူးလ်အသင်းနည်းပြ ကလော့ပ်က သူတို့အသင်း နိုင်ပွဲရရှိအောင် ကိုယ့်ဂိုးကိုယ် သွင်းယူပေးခဲ့တဲ့ လက်စတာ နောက်ခံလူ ဝုဒ်ဖေးစ်အတွက် ခံစားရတယ်လို့ ဝန်ခံလိုက်ပါတယ်။
ကလော့ပ်က “ကျနော့်ရဲ့ နည်းပြဘဝမှာ ဒီလိုမျိုးတော့ တစ်ကြိမ် တွေ့ခဲ့ဖူးပါတယ်။ ကျနော်သူ့အတွက် တကယ် ကို ခံစားရတာပါ။ ဘောလုံးမှာ ဒီလိုတွေဖြစ်ဖို့ နေရာလွတ်တွေ ရှိပါတယ်။ သူက ဘယ်လိုလုပ် ပိုပြီး ကံမကောင်း ခဲ့လည်း မသိဘူး။ နောက်ခံလူ တစ်ဦးအနေနဲ့ အရှိန်ပြင်းပြင်းနဲ့ သွားရတဲ့အချိန်မှာ ဘောလုံးက ဂိုးပိုက်ထဲကို ရောက်သွားမယ်လို့တော့ မျှော်လင့်ထားမှာ မဟုတ်ပါဘူး။ ဒါပေမယ့် ဒါကဖြစ်တက်ပါတယ်”လို့ ပြောခဲ့ပါတယ်။
လီဗာပူးလ်အသင်းဟာ ဒီပွဲမှာ လက်စတာအသင်းကို ၂ ဂိုး- ၁ ဂိုးနဲ့ အနိုင်ရပြီး ပရီးမီးယားလိဂ် ပြိုင်ပွဲမှာ ၄ ပွဲဆက် နိုင်ပွဲ ရယူနိုင်ခဲ့တာ ဖြစ်ပါတယ်။
ကလော့ပ်နဲ့ လီဗာပူးလ်အသင်းသားများကိုတွေ့ရစဉ်
ဒီပွဲမှာ ဘူရီဟောက လက်စတာအတွက် ဦးဆောင်ဂိုး သွင်းယူခဲ့ပေမယ့် ဝုဒ်ဖေးစ်က လီဗာပူးလ်အသင်း နိုင်ပွဲ ရရှိအောင် ချေပဂိုးနဲ့ အနိုင်ဂိုး ၂ ဂိုးစလုံးကို ကိုယ့်ဂိုးကိုယ် သွင်းယူခဲ့တာပါ။ ဝုဒ်ဖေးစ်ဟာ ပရီးမီးယားလိဂ် တစ်ပွဲတည်းမှာ ကိုယ့်ဂိုးကိုယ် ၂ ဂိုးသွင်းတဲ့ ၄ ဦးမြောက် ကစားသမား ဖြစ်လာခဲ့ပါတယ်။
လီဗာပူးလ်အသင်းဟာ ဒီနိုင်ပွဲကြောင့် အဆင့် ၄ နေရာက စပါးအသင်းနဲ့ ၂ မှတ်အကွာ အဆင့် ၆ နေရာမှာ ရပ်တည် နေတာပါ။
ကလော့ပ်က “ရလဒ်ကတော့ ကြီးကြီးမားမား ဖြစ်ပေမယ့် ဒါက ကျနော်တို့ရဲ့ အကောင်းဆုံးပွဲ မဟုတ်ဘူးဆိုတာ အားလုံးက မြင်တွေ့ခဲ့ရပါတယ်။ ၁ ဂိုး- ဂိုးမရှိနဲ့ အရေးနိမ့်နေတဲ့ အချိန်မှာ ခက်ခဲခဲ့ပြီး ကျနော်တို့မှာ ပြဿနာတွေ ရှိခဲ့ပါတယ်။ ကိုယ့်ဂိုးကိုယ် သွင်းယူတဲ့ ၂ ဂိုး ရခဲ့တယ်ဆိုပေမယ့် ဒုတိယဂိုးက ကျနော်တို့ ပြောင်မြောက်စွာ ရရှိခဲ့ပါ တယ်”လို့ ပြောခဲ့တာ ဖြစ်ပါတယ်။
လီဗာပူးလ်အသင်းဟာ ပရီးမီးယားလိဂ် ပွဲစဉ်အဖြစ် ဇန်နဝါရီ ၃ ရက်မှာ ဘရန်ဖို့ဒ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: Daily Mail
Page 215 of 307
Latest News
Connect with us
