CNI Sport News

၂၀၂၂ ခုနှစ်၊ ဒီဇင်ဘာ ၂၁

ရော်နယ်ဒိုဟာ အခုနှစ် မကုန်ခင်မှာ ဆော်ဒီကလပ် အယ်လ်နာဆာအသင်းနဲ့ လက်မှတ်ရေးထိုးမှာ ဖြစ်တယ်လို့ စပိန်သတင်းစာ မာကာက ဖော်ပြလိုက်ပါတယ်။

ယူနိုက်တက်အသင်းနဲ့ စာချုပ်ဖျက်သိမ်းခဲ့ပြီးနောက် အသင်းလက်မဲ့ဖြစ်နေတဲ့ ရော်နယ်ဒိုဟာ အယ်လ်နာဆာ အသင်းမှာ တနှစ်လုပ်ခ ပေါင် ၁၇၅ သန်း ရရှိမယ်လို့ သိရပါတယ်။

လက်ရှိ ဒူဘိုင်းမှာ ရောက်ရှိနေတဲ့ ရော်နယ်ဒိုဟာ ကမ္ဘာ့ဖလားပြိုင်ပွဲ မတိုင်ခင် ကတည်းက အယ်လ်နာဆာ အသင်းနဲ့ ချိတ်ဆက်မှုတွေ ရှိခဲ့ပေမယ့် ပြိုင်ပွဲအပေါ် အာရုံစိုက်နေတာကြောင့် မှတ်ချက်ပေးဖို့ ငြင်းဆန်ခဲ့တာ ဖြစ်ပါတယ်။

မာကာက ဆော်ဒီကလပ်ဟာ အခုနှစ် မကုန်ခင်မှာ ရော်နယ်ဒိုကို စာချုပ်ချုပ်ဆိုနိုင်ဖို့ မျှော်လင့်နေတယ်လို့ ဖော်ပြထားတာပါ။

ရော်နယ်ဒိုကို တွေ့ရစဉ်

အယ်လ်နာဆာအသင်းဟာ ရော်နယ်ဒိုကို အနည်းဆုံး ၂၀၂၅ အထိ စာချုပ်ချုပ်မှာဖြစ်ပြီး စာချုပ်သက်တမ်းကို ထပ်ပြီး တိုးနိုင်တာ ဖြစ်ပါတယ်။

ရော်နယ်ဒိုနဲ့ ချုပ်ဆိုမယ့် စာချုပ်မှာ ကြော်ငြာ သဘောတူညီချက်တွေ ပါဝင်ပြီး ရော်နယ်ဒိုနဲ့သူ့ရဲ့ မိသားစုဟာ သဘောတူညီမှုရတဲ့ အချိန်အထိ ဒူဘိုင်းမှာ စောင့်ဆိုင်းနေတာလို့ သိရပါတယ်။

ရော်နယ်ဒိုဟာ ပြီးခဲ့တဲ့ နွေရာသီက ဆော်ဒီကလပ်ကို ပြောင်းရွှေဖို့ ငြင်းဆန်ခဲ့ပေမယ့် ဥရောပထိပ်သီး အသင်း တွေရဲ့ စိတ်ဝင်စားမှုကို မရတာကြောင့် ဒီအပြောင်းအရွှေ့ကို ပြုလုပ်ဖို့ အသင့်ရှိနေတာ ဖြစ်ပါတယ်။

အယ်လ်နာဆာအသင်းဟာ ဆော်ဒီနိုင်ငံရဲ့ အအောင်မြင်ဆုံး ကလပ်အသင်းတွေထဲက တသင်းဖြစ်ပြီး ထိပ်တန်း လိဂ်မှာ ချန်ပီယံဆုကို ၉ ကြိမ် ရရှိထားကာ နောက်ဆုံး ရယူနိုင်ခဲ့တာက ၂၀၁၉ က ဖြစ်တာပါ။

ပြီးခဲ့တဲ့ ၂၀၂၀ နဲ့ ၂၀၂၁ မှာ အမှတ်ပေးလိဂ်ကို မရခဲ့ပေမယ့် ဆော်ဒီစူပါဖလားကို ရယူနိုင်ခဲ့တာ ဖြစ်ပါတယ်။

အယ်လ်နာဆာအသင်းကို ရိုးမား၊ မာဆေးလ်နဲ့ လိုင်ယွန်အသင်း နည်းပြဟောင်း ရူဒီဂါစီယာက ကိုင်တွယ်နေတာ ဖြစ်ပြီး ရော်နယ်ဒိုကို ခေါ်ယူနိုင်ခဲ့မယ်ဆိုရင် ကလပ်အတွက် အကြီးကျယ်ဆုံးအရာ ဖြစ်လာမှာပါ။

ဆော်ဒီ အားကစားဝန်ကြီးက ရော်နယ်ဒိုဟာ သူတို့ရဲ့ လိဂ်မှာ လာရောက်ကစားရမှာကို ကြိုက်နှစ်သက်တယ်လို့ အရင်က ပြောခဲ့ဖူးပါတယ်။

Source: Daily Mail

CNI Sport News

၂၀၂၂ ခုနှစ်၊ ဒီဇင်ဘာ ၂၁

မော်ရိုကို ဘုရင် မိုဟာမက် VI ဟာ ကမ္ဘာ့ဖလားပြိုင်ပွဲမှာ ဆီမီးဖိုင်နယ်အထိ တက်နိုင်ခဲ့တဲ့ ပြိုင်ပွဲဝင်အသင်းကို ဆုချီးမြှင့်ခဲ့ပြီး ကစားသမားတွေရဲ့ မိခင်တွေနဲ့ တွေ့ဆုံခဲ့ပါတယ်။

မော်ရိုကိုအသင်းဟာ ကာတာကမ္ဘာ့ဖလားပြိုင်ပွဲမှာ ဆီမီးဖိုင်နယ်အထိ တက်နိုင်ခဲ့တာဖြစ်ပြီး ဒီအဆင့်ကို တက်နိုင် ခဲ့တဲ့ ပထမဆုံးအာရပ် ဒါမှမဟုတ် အာဖရိက အသင်းအဖြစ် စံချိန်သစ် တင်နိုင်ခဲ့တာပါ။

မော်ရိုကိုအသင်းရဲ့ အိမ်အပြန်ခရီးကို ပရိသတ်သောင်းချီက ကြိုဆိုခဲ့ကြပါတယ်။ မော်ရိုကိုအသင်းဟာ တော်ဝင် နန်းတော်ကို သွားရောက်ခဲ့ပြီး သူတို့ရဲ့ သမိုင်းဝင် အောင်မြင်မှုကို အသိအမှတ်ပြုတဲ့ အနေနဲ့ ဘုရင်ဖြစ်သူ မိုဟာမက် VI က လက်ခံ တွေ့ဆုံခဲ့တာပါ။

ဘုရင်နဲ့အတူ အိမ်ရှေ့မင်းသား မိုလေးဟာဆန်ဟာ မော်ရိုကိုဘောလုံးအဖွဲ့ချုပ်ဥက္ကဋ္ဌ၊ အသင်းနည်းပြနဲ့ ကစား သမားတွေကို ဆုတံဆိပ်တွေ ပေးအပ်ခဲ့တယ်လို့ နိုင်ငံပိုင် သတင်းအေဂျင်စီ (MAP)က ဖော်ပြခဲ့တာပါ။

 မော်ရိုကိုအသင်းကို ပရိသတ်တွေက ကြိုဆိုကြစဉ်

လက်ရွေးစင်အသင်းရဲ့ နည်းစနစ်ပိုင်းနဲ့ ဆေးဘက်ဆိုင်ရာ အဖွဲ့ဝင်တွေ အားလုံးကိုလည်း သူတို့ရဲ့ ကြိုးစား အားထုတ်မှုကို အသိအမှတ်ပြုတဲ့ အနေနဲ့ ဆုတံဆိပ်တွေ ပေးအပ်သွားမယ်လို့ သိရပါတယ်။

ကစားသမားတွေရဲ့ မိခင်တွေကလည်း တော်ဝင်နန်းတော်ကို လိုက်ပါသွားခဲ့ကြပြီး အနစ်နာခံမှုနဲ့ မျိုးချစ်စိတ်ဓါတ် ကို သားသမီးတွေ တန်ဖိုးထားတက်အောင် ကြိုးစားအားထုတ်ခဲ့တာကြောင့် အသိအမှတ်ပြုတယ်လို့ ဘုရင်ဖြစ်သူ က တွေ့ဆုံစဉ် ပြောခဲ့တာ ဖြစ်ပါတယ်။

မော်ရိုကိုအသင်းဟာ ကမ္ဘာ့ဖလားပြိုင်ပွဲမှာ ဘယ်လ်ဂျီယံ၊ စပိန်နဲ့ ပေါ်တူဂီတို့ကို ကျော်ဖြတ်ပြီး ဆီမီးဖိုင်နယ်ကို ရောက်ရှိခဲ့တာပါ။ ဆီမီးဖိုင်နယ်မှာတော့ ပြင်သစ်အသင်းကို အရေးနိမ့်ခဲ့ပြီး တတိယနေရာလုပွဲမှာ ခရိုအေးရှား အသင်းကို အရေးနိမ့်ခဲ့ပေမယ့် သူတို့ရဲ့ စွမ်းဆောင်မှုကို အားလုံးက အသိအမှတ်ပြုခဲ့ကြတာ ဖြစ်ပါတယ်။

Source: Khaleejtimes

CNI Sport News

၂၀၂၂ ခုနှစ်၊ ဒီဇင်ဘာ ၂၁

ပရိသတ်တွေဟာ တံတားပေါ်ကနေ ခုန်ချပြီး ကစားသမားတွေနဲ့ ဘတ်စ်ကားပေါ်မှာ ပူးပေါင်းဖို့ ကြိုးစားခဲ့တာ ကြောင့် အာဂျင်တီးနားအသင်းဟာ ကမ္ဘာ့ဖလားအောင်ပွဲခံ ချီတက်မှုကို ရပ်ဆိုင်းလိုက်ပါတယ်။

လူပေါင်း ၄ သန်းကျော်ဟာ အာဂျင်တီးနား ကစားသမားတွေ၊ ကမ္ဘာ့ဖလား ဆုဖလားနဲ့အတူ ဗျူနိုအေရိစ် လမ်းမပေါ်မှာ အောင်ပွဲခံခဲ့ကြတာပါ။

ဒါပေမယ့် ကားပေါ်ခုန်ချခဲ့တဲ့ အမျိုးသား ၂ ဦးဟာ ဒဏ်ရာပြင်းထန်စွာ ရခဲ့တာကြောင့် အာဂျင်တီးနားအသင်း ဘတ်စ်ကားဟာ အရေးပေါ် လမ်းလွှဲခိုင်းခဲ့ရတာ ဖြစ်ပါတယ်။

အာဂျင်တီးနား ကစားသမားတွေဟာ တံတားပေါ်မှာပဲနေဖို့ တိုက်တွန်းခဲ့ပေမယ့် ပထမလူက အောင်မြင်စွာ ခုန်ချနိုင်ခဲ့လို့ ဒုတိယလူက ထပ်မံခုန်ချခဲ့တာမှာ ကားအနောက်နဲ့တိုက်ကာ လမ်းမပေါ်ကို ကျသွားခဲ့ပါတယ်။

အဲ့ဒါကြောင့် လုံခြုံရေးတာဝန်ရှိသူတွေက ဒီချီတက်ပွဲကို စောစီးစွာရပ်နားဖို့ ဆုံးဖြတ်ခဲ့ပြီး ကစားသမားတွေကို ရဟတ်ယာဉ်နဲ့ ဗျူနိုအေရိစ်မြို့ပြင်ရှိ နိုင်ငံအသင်း လေ့ကျင့်ရေးစခန်းကို ခေါ်ဆောင်သွားခဲ့ပါတယ်။

အာဂျင်တီးနားအသင်းများကို ရဟတ်ယာဉ်နဲ့ ခေါ်ဆောင်သွားစဉ်

အာဂျင်တီးနားရဲ့ ချီတက်အောင်ပွဲခံတာကို ၁၈ မိုင်အထိသွားပြီး မြို့လယ်ရှိ Obelisco de ဗျူနိုအေရိစ်မှာ အဆုံးသတ်ဖို့ စီစဉ်ထားတာပါ။ ဗျူနိုအေရိစ်ရှိ အရေးပေါ် ဆေးကုသရေးဌာန အကြီးအကဲ အယ်ဘာတိုက အင်္ဂါနေ့မှာ ဒဏ်ရာရရှိသူ ၈ ဦးအထိ ရှိတယ်လို့ အတည်ပြု ထားပါတယ်။

အာဂျင်တီးနား ဘောလုံးအဖွဲ့ချုပ်ရဲ့ ထုတ်ပြန်ချက်မှာ “အာဂျင်တီးနားအသင်းက ကစားသမားတွေဟာ မြို့ထဲမှာ စုရုံးနေကြတဲ့ ပရိသတ်တွေရဲ့ အပေါ်ကနေ ရဟတ်ယာဉ်နဲ့ ပျံဝဲကာ ဒီအောင်ပွဲခံမှုကို အဆုံးသတ်ခဲ့ပါတယ်။ လူအုပ်ကြီး အလယ်ကို ဘတ်စ်ကားနဲ့ ဆက်ပြီး မသွားနိုင်ဘူးဆိုတာ သေချာစိစစ်ပြီးမှ ဒီဆုံးဖြတ်ချက်ကို ချခဲ့ရ တယ်”လို့ ဖော်ပြထားတာပါ။

အာဂျင်တီးနား ဘောလုံးအဖွဲ့ချုပ်ဥက္ကဋ္ဌ ကလော်ဒီယိုတာပီယာက “သူတို့တွေက Obelisk မှာရှိတဲ့လူတွေ အားလုံး ကို နှုတ်ဆက်ခွင့် မပြုခဲ့ပါဘူး။ ကျနော်တို့ကို အစောင့်အကြပ် ပေးနေတဲ့ သူတွေက ရှေ့ဆက်တိုးခွင့် မပေးတော့ပါ ဘူး။ ချန်ပီယံဖြစ်ခဲ့တဲ့ ကစားသမားတွေ အားလုံး ကိုယ်စား တောင်းပန်ပါတယ်”လို့ ပြောခဲ့တာ ဖြစ်ပါတယ်။

အာဂျင်တီးနားအသင်းဟာ ၂၀၂၂ ကမ္ဘာ့ဖလား ဗိုလ်လုပွဲမှာ ပြင်သစ်အသင်းကို အနိုင်ရပြီး ကမ္ဘာ့ဖလား ချန်ပီယံ ဆုကို ၃ ကြိမ်မြောက် ရယူနိုင်ခဲ့တာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ ဒီဇင်ဘာ ၂၀

စပို့တင်းလစ္စဘွန်း အသင်းနည်းပြ အေမိုရင်က ရော်နယ်ဒိုရဲ့ ဖြစ်နိုင်ဖွယ်ရှိတဲ့ အပြောင်းအရွှေ့နဲ့ ပတ်သက်တဲ့ မေးခွန်းကို ဒေါသတကြီး တုန့်ပြန်သွားခဲ့ပါတယ်။

အေမိုရင်က “ရော်နယ်ဒိုက ကာတာမှာ ရှိနေတယ်။ သူ့ကိုမေးဖို့ အခွင့်အရေး ရခဲ့ပေမယ့် ခင်ဗျားတို့ မလုပ်ခဲ့ပါဘူး။ ဒါနဲ့ ပတ်သက်ပြီး ကျနော့်ကို အကြိမ် ၅၀၀ လောက်မေးပြီးပါပြီ။ ကျနော်ဒါကို ဖြေပြီးသားပါ”လို့ ဘရာဂါကို အနိုင် ရတဲ့ ပွဲအပြီးမှာ ပြောခဲ့တာပါ။

စပို့တင်းလစ္စဘွန်းအသင်းမှာ ကစားသမားဘဝ စတင်ခဲ့တဲ့ ရော်နယ်ဒိုဟာ လက်ရှိအချိန်မှာ ယူနိုက်တက်အသင်းနဲ့ စာချုပ်ဖျက်သိမ်းပြီးနောက် အသင်းလက်မဲ့ ဖြစ်နေခဲ့ပါတယ်။

ရော်နယ်ဒိုဟာ စပို့တင်းလစ္စဘွန်းကို ပြန်လာနိုင်ဖွယ် ရှိတယ်လို့ သတင်းတွေ ထွက်နေခဲ့သလို အင်္ဂလန်၊ ဆော်ဒီ ကလပ် အသင်းတွေနဲ့လည်း သတင်းတွေ ထွက်ပေါ်နေခဲ့တာပါ။

ရော်နယ်ဒိုကိုတွေ့ရစဉ်

မကြာသေးခင်က ရော်နယ်ဒိုဟာ အသင်းဟောင်း ရီးရယ်လ်အသင်းနဲ့ လေ့ကျင့်မှုတွေ ပြုလုပ်ခဲ့ပါတယ်။

အေမိုရင်ဟာ အောက်တိုဘာလကလည်း “ စပို့တင်းမှာ ရှိတဲ့သူတွေအားလုံးက ရော်နယ်ဒို ပြန်လာဖို့အတွက် အိပ်မက်တွေ ရှိနေခဲ့ကြတာပါ။ ဒါပေမယ့် သူ့ရဲ့ လုပ်ခလစာ ပေးခြေဖို့ ကျနော်တို့မှာ ပိုက်ဆံမရှိပါဘူး”လို့ ပြောခဲ့တာပါ။

စပို့တင်းလစ္စဘွန်း ဒါရိုက်တာ ဟူဂိုဗီယာနာက “ ရော်နယ်ဒို ဘယ်ကိုသွားမလဲဆိုတာ သူဆုံးဖြတ်ရမှာပါ။ ဒါပေမယ့် အနာဂတ်ကို ခင်ဗျားတို့ ဘယ်တော့မှ သိမှာမဟုတ်ပါဘူး။ ဒါကြောင့် သူဆုံးဖြတ်တာကို ကျနော်တို့ ကြည့်ကြတာပေါ့”လို့ ပြောခဲ့ပါတယ်။

ရော်နယ်ဒိုဟာ ပေါ်တူဂီအသင်းနဲ့လည်း စိတ်ပျက်ဖွယ် ကမ္ဘာ့ဖလားရလဒ်ကို ရင်ဆိုင်ခဲ့ရပြီးနောက် လက်ရှိအချိန် မှာ တစ်ဦးတည်း လေ့ကျင့်မှုတွေ ပြုလုပ်ပြီး အနားယူနေပါတယ်။

Source: Goal

CNI Sport News

၂၀၂၂ ခုနှစ်၊ ဒီဇင်ဘာ ၂၀

ဖီဖာဥက္ကဋ္ဌ အင်ဖန်တီနိုဟာ ကမ္ဘာ့ဖလားပြိုင်ပွဲကို သုံးနှစ်တစ်ကြိမ် ကျင်းပချင်နေပြီး ဒါဟာ နိုင်ငံတကာဘောလုံး လောကကို လှုပ်ခတ်စေမယ့် သူ့ရဲ့ နောက်ဆုံး အစီအစဉ် ဖြစ်တယ်လို့ သိရပါတယ်။

ဖီဖာဟာ အရင်က နှစ်နှစ်တစ်ကြိမ် ကျင်းပဖို့ ကြိုးပမ်းခဲ့ပေမယ့် အောင်မြင်မှု မရခဲ့ပါဘူး။ ဒါပေမယ့် အင်ဖန်တီနို ဟာ လာမယ့် ဆယ်စုနှစ်အတွင်းမှာ သုံးနှစ်အချိန်ဇယားကို ရောက်ရှိဖို့ မျှော်လင့်နေတာ ဖြစ်ပါတယ်။

ဒီအစီအစဉ် အသစ်ကို အာရှနဲ့ အာဖရိကဆီကနေ အားပေးထောက်ခံမှုတွေ ရထားပေမယ့် အင်ဖန်တီနိုက ဒါကို လမ်းကြောင်းပေါ် ရောက်ရှိစေဖို့ ဥရောပနဲ့ တောင်အမေရိတို့က ထောက်ခံမှုတွေ ရယူနိုင်ဖို့ လိုအပ်နေတာပါ။

ပြီးခဲ့တဲ့ ကာတာကမ္ဘာ့ဖလား ပြိုင်ပွဲမှာ ကြီးမားတဲ့ စီးပွားဖြစ် အောင်မြင်မှုကို ရယူနိုင်ခဲ့ပြီးနောက် ဖီဖာအကြီးအကဲ ဖြစ်သူက အပြောင်းအလဲကို အကောင်အထည်ဖော်နိုင်ဖို့ ယုံကြည်မှု အပြည့်ရှိနေတာလည်း ဖြစ်ပါတယ်။

အင်ဖန်တီနိုကိုတွေ့ရစဉ် 

ကာတာကမ္ဘာ့ဖလားပြိုင်ပွဲမှာ စံချိန်တင်ဝင်ငွေ ပေါင် ၆.၂ ဘီလီယံ ရရှိခဲ့တာပါ။ ဒါ့အပြင် အင်ဖန်တီနိုက ဆောင်းရာသီမှာ ကမ္ဘာ့ဖလားပြိုင်ပွဲကို ထပ်မံကျင်းပချင်နေတာဖြစ်ပြီး ၂၀၃၀ ကမ္ဘာ့ဖလားပြိုင်ပွဲအပြီးမှာ အစီအစဉ်တွေကို ပြန်လည် ပြင်ဆင်ခြင်နေတာ ဖြစ်ပါတယ်။

အင်ဖန်တီနိုဟာ ၂၀၁၆ ကတည်းက ဖီဖာဥက္ကဋ္ဌအဖြစ် တာဝန်ဆောင်ရွက်ခဲ့တာဖြစ်ပြီး ပထမသက်တမ်း အပြီးမှာ ဒုတိယသက်တမ်းကို မတ်လမှာ ဆက်လက် တာဝန်ယူမှာပါ။ အင်ဖန်တီနိုဟာ တတိယ သက်တမ်းအထိ ဖီဖာ အကြီးအကဲအဖြစ် ဆက်လက် ရှိနေမယ်ဆိုရင် ၂၀၃၁ အထိ တာဝန်ယူနိုင်မှာ ဖြစ်ပါတယ်။

အင်ဖန်တီနိုက “ ကျနော့်ရဲ့ ရာထူးသက်တမ်းနဲ့ ပတ်သက်ပြီး ရှင်းပြချင်ပါတယ်။ လက်ရှိအချိန်မှာ ကျနော်ဟာ ပထမဆုံး ရာထူးသက်တမ်းမှာပဲ ရှိနေပြီး မတ်လ ၁၆ ရက်မှာ ကျနော့်ရဲ့ ဒုတိယသက်တမ်းကို စတင်မှာပါ။ တတိယ သက်တမ်းအထိသာ ကန့်သတ်ချက်ရှိပါတယ်”လို့ ပြောခဲ့ပါတယ်။

Source: Metro

CNI Sport News

၂၀၂၂ ခုနှစ်၊ ဒီဇင်ဘာ ၂၀

မက်ဆီဟာ ရော်နယ်ဒိုရဲ့ အင်စတာဂရမ် Like အများဆုံးရတဲ့ စံချိန်ကို ချိုးဖျက်ပြီး အားကစားသမားထဲမှာ Like အများဆုံးရတဲ့သူအဖြစ် စံချိန်သစ် တင်လိုက်ပါတယ်။

မက်ဆီဟာ အာဂျင်တီးနား အသင်းနဲ့အတူ ကမ္ဘာ့ဖလား ဆုရရှိခဲ့တဲ့ ပုံတွေကို အင်စတာဂရမ်မှာ တင်ခဲ့တာပါ။

ဒီပို့စ်ဟာ Likes ပေါင်း ၅၄ သန်းကျော် ရရှိနေပြီး အားကစားသမား တစ်ဦးရဲ့ ပို့စ်မှာ စံချိန်သစ် ဖြစ်ခဲ့ပါတယ်။

အရင်က စံချိန်တင်ခဲ့တဲ့ ပို့စ်ကတော့ ရော်နယ်ဒိုရဲ့ ပို့စ်ဖြစ်ပြီး သူနဲ့ မက်ဆီတို့ စစ်တုရင် ထိုးနေတဲ့ပုံကို တင်ထားခဲ့တာပါ။ ဒီပို့စ်ဟာ Likes ပေါင်း ၄၂ သန်းကျော် ရရှိခဲ့တာဖြစ်ပြီး အခုအချိန်မှာ မက်ဆီက ဒီစံချိန်ကို ကျော်ဖြတ်ပြီး စံချိန်သစ် တင်ခဲ့တာ ဖြစ်ပါတယ်။

မက်ဆီနဲ့ ရော်နယ်ဒို စစ်တုရင် ကစားနေစဉ် 

ရော်နယ်ဒိုနဲ့ မက်ဆီတို့ဟာ အရင်ကလည်း ဆိုရှယ်မီဒီယာပေါ်မှာ Likes အများဆုံး ရရှိတဲ့သူတွေအဖြစ် တစ်ဦးနဲ့ တစ်ဦး စံချိန်တွေကို ချိုးဖျက်ပြီး စံချိန်သစ်တွေကို တင်နေခဲ့တာပါ။

လွန်ခဲ့တဲ့ ၁၈ လနီးပါးကလည်း မက်ဆီဟာ ရော်နယ်ဒိုရဲ့ စံချိန်ကို ကိုပါအမေရိကဖလားရပြီး အောင်ပွဲခံတဲ့ ပို့စ်နဲ့ ချိုးဖျက်ခဲ့ပါသေးတယ်။ အဲ့ဒီတုန်းက မက်ဆီရဲ့ ပို့စ် Likes ဟာ ၂၂ သန်းကျော် ရရှိခဲ့တာ ဖြစ်ပါတယ်။

ရော်နယ်ဒိုနဲ့ မက်ဆီတို့ဟာ ကစားသမားဘဝ တလျှောက် ကြီးမားတဲ့ ပြိုင်ဘက်တွေအဖြစ် လွန်ခဲ့တဲ့ ၁၀ စုနှစ် ကျော် အတွင်းမှာ ယှဉ်ပြိုင်ခဲ့ကြတာဖြစ်ပြီး ဘောလွန်းဒီအောဆုကို ၁၂ ကြိမ်အထိ ရယူနိုင်ခဲ့တာပါ။

ကလပ်အသင်းတွေနဲ့လည်း ဆုဖလား အများအပြား ရယူနိုင်ခဲ့သလို နိုင်ငံအသင်းတွေနဲ့ အတူလည်း အောင်မြင် မှုတွေ ရယူနိုင်ခဲ့ကြတာ ဖြစ်ပါတယ်။

ဒါပေမယ့် နောက်ဆုံး ကမ္ဘာ့ဖလားပွဲစဉ်အဖြစ် ယှဉ်ပြိုင်ကစားခဲ့ကြတာမှာ ရော်နယ်ဒိုရဲ့ ပေါ်တူဂီအသင်းဟာ ကွာတားဖိုင်နယ် အဆင့်ကနေ ထွက်ခွာခဲ့ရပေမယ့် မက်ဆီကတော့ အာဂျင်တီးနားအသင်းကို ကမ္ဘာ့ဖလားချန်ပီယံဆု ရယူ နိုင်အောင် စွမ်းဆောင်နိုင်ခဲ့တာပါ။

ဒါ့အပြင် မကြာခင် အချိန်အတွင်းမှာ မက်ဆီဟာ ပီအက်စ်ဂျီအသင်းနဲ့ ပူးပေါင်းရမှာ ဖြစ်ပေမယ့် ရော်နယ်ဒို ကတော့ အသင်းသစ် ရှာဖွေနေရတာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ ဒီဇင်ဘာ ၂၀

အာဂျင်တီးနားအသင်းဟာ ဗျူနိုအေရိစ်မှာ ကမ္ဘာ့ဖလားအောင်ပွဲခံ အခမ်းအနားကျင်းပမှာ ဖြစ်တဲ့အတွက် အင်္ဂါနေ့(ဒီဇင်ဘာ ၂၀ ရက်)ကို နိုင်ငံတော်အားလပ်ရက်အဖြစ် ကြေညာလိုက်ပါတယ်။

အာဂျင်တီးနား ဘောလုံးအဖွဲ့ချုပ်က “ကမ္ဘာ့ချန်ပီယံအသင်းဟာ ပရိသတ်တွေနဲ့ အောင်ပွဲခံဖို့အတွက် အင်္ဂါနေ့ မွန်းတည့်ချိန်မှာ Obelisk ကို ထွက်ခွာမယ်”လို့ တွစ်တာမှာ ရေးထားပါတယ်။

ဒါ့အပြင် အာဂျင်တီးနား အစိုးရက အင်္ဂါနေ့ကို ဘဏ်အားလပ်ရက်အဖြစ် ကြေညာခဲ့တာကြောင့် တစ်တိုင်းပြည် လုံးဟာ နိုင်ငံအသင်းနဲ့အတူ အောင်ပွဲခံလို့ရမှာ ဖြစ်ပါတယ်။

အာဂျင်တီးနားအသင်းဟာ ၂၀၂၂ ကမ္ဘာ့ဖလား ဗိုလ်လုပွဲမှာ ပြင်သစ်အသင်းကို ပင်နယ်တီ အဆုံးအဖြတ်မှာ အနိုင်ရပြီး ၁၉၈၆ နောက်ပိုင်း ပထမဆုံးအကြိမ် ကမ္ဘာ့ဖလား ချန်ပီယံဆုကို ရယူနိုင်ခဲ့တာပါ။

အာဂျင်တီးနားအသင်းဟာ ဒီပွဲရဲ့ ပွဲချိန်အတွင်းမှာ ပြင်သစ်အသင်းနဲ့ ၂ ဂိုးစီသရေ၊ အချိန်ပိုမှာ ၃ ဂိုးစီ သရေကျခဲ့လို့ ပင်နယ်တီ အဆုံးအဖြတ် ခံယူခဲ့ရပြီး ၄ ဂိုး- ၂ ဂိုးနဲ့ အနိုင်ရကာ ကမ္ဘာ့ချန်ပီယံအဖြစ် အောင်ပွဲခံနိုင်ခဲ့တာ ဖြစ်ပါတယ်။

အာဂျင်တီးနားအသင်းဟာ နိုင်ငံပိုင် လေကြောင်းလိုင်းနဲ့ အင်္ဂါနေ့ အစောပိုင်းက နိုင်ငံအတွင်းကို ရောက်ရှိလာခဲ့ တာဖြစ်ပြီး လေဆိပ်အနီးရှိ အဖွဲ့ချုပ် လေ့ကျင့်ရေးစင်တာမှာ တညတာ အိပ်စက်ခဲ့တယ်လို့ ဒေသတွင်း မီဒီယာ တွေက ဖော်ပြခဲ့ပါတယ်။

မက်ဆီနဲ့ အသင်းဖော်များ ကမ္ဘာ့ဖလား ဆုရလို့ အောင်ပွဲခံနေကြစဉ် 

အာဂျင်တီးနား ဘောလုံးအဖွဲ့ချုပ် အကြီးအကဲ ကလော်ဒီယိုတာပီယာက အာဂျင်တီးနားကို သူတို့ ရောက်လာ ခဲ့ပြီလို့ တွစ်တာမှာ ရေးသားခဲ့တာ ဖြစ်ပါတယ်။

အာဂျင်တီးနားအသင်း ကမ္ဘာ့ဖလား ချန်ပီယံဆုကို တတိယအကြိမ်မြောက် ရရှိနိုင်ခဲ့ပြီးနောက် အာဂျင်တီးနား ပြည်သူတွေဟာ လမ်းမပေါ်တွေမှာ အောင်ပွဲခံမှုတွေကို ပြုလုပ်နေတာဖြစ်ပြီး လက်ရွေးစင်အသင်းနဲ့ ဆက်လက် အောင်ပွဲခံဖို့ စိတ်အားထက်သန်နေကြတာပါ။

မက်ဆီက “ ပရိသတ်တွေအနေနဲ့ ကျနော်တို့ကို စောင့်ဆိုင်းစေချင်ပါတယ်။ အဲဒီကို သွားပြီးသူတို့နဲ့ အောင်ပွဲခံဖို့ မစောင့်ဆိုင်းနိုင်တော့ဘူး”လို့ ‌ပြောခဲ့ပါတယ်။

မက်ဆီဟာ ကမ္ဘာ့ဖလားပြိုင်ပွဲမှာ အာဂျင်တီးနားအသင်းအတွက် ၇ ဂိုးသွင်းယူခဲ့ပြီး ပြိုင်ပွဲရဲ့ အကောင်းဆုံး ဘောလုံးသမားဆုကို ရယူနိုင်ခဲ့ပါတယ်။

Source: ESPN

CNI Sport News

၂၀၂၂ ခုနှစ်၊ ဒီဇင်ဘာ ၁၉

ပြင်သစ်သမ္မတ မက်ခရွန်က ကမ္ဘာ့ဖလား ဗိုလ်လုပွဲအပြီးမှာ စိတ်ထိခိုက် ခံစားနေရတဲ့ တိုက်စစ်မှူး ဘတ်ပီကို သူဘာပြောခဲ့လဲဆိုတာကို ပြန်လည်ရင်ဖွင့် ပြောသွားခဲ့ပါတယ်။

မက်ခရွန်က “ ကိုင်လီယန်က ထူးချွန်တဲ့ ကစားသမား ဖြစ်ပေမယ့် သူဟာ ငယ်ရွယ်သေးတယ်ဆိုတာကို ကျနော် သတိရမိပါတယ်။ မင်းက အသက် ၂၄ နှစ်ပဲရှိသေးပြီး ကမ္ဘာ့ဖလားပြိုင်ပွဲရဲ့ ဂိုးသွင်းအများဆုံး ကစားသမားပါ။ အခု ဗိုလ်လုပွဲ မတိုင်ခင်က မင်းက ကမ္ဘာ့ဖလားကို ရခဲ့တယ်လို့ ကျနော်သူ့ကို ပြောခဲ့ပါတယ်။ ကျနော်လည်း သူ့လိုပဲ ဝမ်းနည်းပေမယ့် သူက ကျနော်တို့အားလုံးကို ဂုဏ်ယူစေခဲ့ပါတယ်”လို့ RMC ကို ပြောခဲ့တာပါ။

ဘတ်ပီဟာ အာဂျင်တီးနားနဲ့ ဗိုလ်လုပွဲမှာ ပြင်သစ်အတွက် ဟတ်ထရစ် ဂိုးသွင်းယူခဲ့ပေမယ့် အသင်းဟာ ပင်နယ်တီ အဆုံးအဖြတ်မှာ အရေးနိမ့်ပြီး ဒုတိယနဲ့ ကျေနပ်ခဲ့ရတာ ဖြစ်ပါတယ်။

ဒီအရှုံးကြောင့် ဘတ်ပီဟာ အလွန်စိတ်ပျက်နေပြီး ဒီပွဲကို တက်ရောက်ကြည့်ရှုခဲ့တဲ့ ပြင်သစ်သမ္မတ မက်ခရွန်က ပီအက်စ်ဂျီ တိုက်စစ်မှူးကို နှစ်သိမ့်မှုတွေ ပြုလုပ်ပေးခဲ့တာပါ။

ရွှေဖိနပ်ဆုရခဲ့တဲ့ ဘတ်ပီကိုတွေ့ရစဉ်

ဘတ်ပီဟာဆိုရင် ကာတာကမ္ဘာ့ဖလားမှာ ၈ ဂိုးအထိသွင်းပြီး ဂိုးသွင်း ရွှေဖိနပ်ဆုကို ရယူနိုင်ခဲ့တာ ဖြစ်ပါတယ်။

၂၀၁၈ တုန်းက ဘတ်ပီဟာ ပြင်သစ်အသင်းနဲ့အတူ ကမ္ဘာ့ဖလားချန်ပီယံဆုကို ရယူနိုင်ခဲ့ပြီး ၂ ကြိမ်ဆက် ရယူနိုင်ဖို့ မျှော်လင့်ခဲ့တာပါ။ ပြင်သစ်အသင်းကလည်း ၁၉၆၂ ခုနှစ်က ဘရာဇီးလ်နောက်ပိုင်း ကမ္ဘာ့ဖလား ချန်ပီယံဆုကို ၂ ကြိမ်ဆက်ရယူဖို့ ပစ်မှတ်ထားခဲ့ပေမယ့် ပင်နယ်တီ အဆုံးအဖြတ်မှာ အရေးနိမ့်ခဲ့တာ ဖြစ်ပါတယ်။

မက်ခရွန်က “ ပထမပိုင်းအပြီးမှာ ကျနော်တို့ အလွန်ဝေးကွာနေခဲ့ပြီး ဒီလိုမျိုး ပြန်လာနိုင်တာတွေလည်း ရှိပေမယ့် ဘောလုံးသမိုင်းမှာတော့ အလွန်ရှားပါတယ်။ ဒါပေမယ့် အံ့ဩလောက်အောင် ပြန်လာနိုင်ခဲ့ပါတယ်။ ဘတ်ပီနဲ့ တသင်းလုံး လုပ်ခဲ့တာတွေက ထူးထူးခြားခြားပါပဲ။ ဆာလောင်မှုကို ပြန်တွေ့ခဲ့ပြီး လုပ်နိုင်မယ်လို့ ယုံကြည်ခဲ့ ပါတယ်။ ဒါပေမယ့်လည်း အံ့ဖွယ်ကောင်းတဲ့ ဒုတိယပိုင်းလိုမျိုး ပြန်မလာနိုင်တော့ဘူး”လို့ ပြောခဲ့ပါတယ်။

Source: Metro

CNI Sport News

၂၀၂၂ ခုနှစ်၊ ဒီဇင်ဘာ ၁၉

အာဂျင်တီးနားအသင်း နည်းပြ စကာလိုနီက မက်ဆီအနေနဲ့ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားဖို့ ဆုံးဖြတ်ခဲ့ တယ်ဆိုရင် သူ့ရဲ့ ဂျာစီက အဆင်သင့် ဖြစ်နေမှာပဲလို့ ပြောလိုက်ပါတယ်။

စတာလိုနီက “ မက်ဆီအနေနဲ့ ကစားချင်တယ်လို့ ခံစားရရင်တော့ လာမယ့် ကမ္ဘာ့ဖလားပြိုင်ပွဲအတွက် ပြင်ဆင် ထားတဲ့ နံပါတ် ၁၀ ဂျာစီကို ဆက်ပြီး ထားသင့်တယ်လို့ ထင်ပါတယ်။ သူ့ရဲ့ ကစားသမားဘဝနဲ့ သူလုပ်ချင်တဲ့ အရာမှန်သမျှကို လုပ်ပိုင်ခွင့် ရထားပါတယ်။ အသင်းဖော်တွေအတွက် သူပို့ဆောင်ပေးတဲ့ အရာတွေကလည်း မယုံနိုင်စရာပါပဲ။ အဝတ်လဲခန်းထဲမှာ ဒီလောက် ဩဇာကြီးမားတဲ့သူကို ကျနော်တစ်ခါမှ မတွေ့ဖူးပါဘူး”လို့ ပြောခဲ့တာပါ။

မက်ဆီဟာ ဒီပြိုင်ပွဲကြီး မစတင်ကတည်းကရော ဗိုလ်လုပွဲ မကစားခင်ကရော အခုကမ္ဘာ့ဖလားဟာ သူ့ရဲ့ နောက်ဆုံး ကမ္ဘာ့ဖလား ဖြစ်တယ်လို့ ပြောထားတာ ဖြစ်ပါတယ်။

 ကမ္ဘာ့ဖလားကို ကိုင်မြှောက်နေတဲ့ အာဂျင်တီးနားအသင်းကိုတွေ့ရစဉ်

ဒါပေမယ့် လက်ရွေးစင် အသင်းကနေ အနားမယူသေးတာကြောင့် ၂၀၂၆ ကမ္ဘာ့ဖလားပြိုင်ပွဲမှာ မက်ဆီ ပါဝင်နိုင်ဖို့ကို စကာလိုနီက မျှော်လင့်နေတာပါ။ အာဂျင်တီးနား အသင်းခေါင်းဆောင်ဟာ ကာတာကမ္ဘာ့ဖလားမှာ ရွှေဘောလုံးဆုကို ရယူနိုင်ခဲ့ပြီး သွင်းဂိုး ၇ ဂိုးအထိ ရယူနိုင်ခဲ့တာ ဖြစ်ပါတယ်။

စကာလိုနီက “ ကျနော်တို့ ကိုပါအမေရိကဖလားမှာ ဘရာဇီးလ်အသင်းကို အနိုင်ရပြီး မက်ဆီနဲ့ စကားပြောဆိုမှု တွေ ရှိခဲ့ပါတယ်။ ကျနော်တို့ ရှေ့မှာ ကြီးမားတဲ့ တာဝန်တစ်ခု ရှိလာခဲ့ပြီး နိုင်ငံက လူတွေကလည်း ကမ္ဘာ့ဖလား အခွင့်အရေးကို စတင်ပြီး ယုံကြည်လာခဲ့ပါတယ်။ ပြီးတော့ ဖိအားတွေက တိုးလာခဲ့တာပေါ့။ မက်ဆီကတော့ ကျနော်တို့ ဆက်သွားရမယ်၊ တခြားဘာမှ အရေးမကြီးဘူးလို့ ပြောခဲ့တယ်။ ဒါက ကျနော့်အတွက် ကြီးမားတဲ့ စိတ်ဓါတ်ခွန်အားကို ရခဲ့ပါတယ်။ ကျနော်တို့ ကြီးမားတဲ့ အရာတစ်ခုကို ရဖို့ နီးလာပြီဆိုတာကို သဘောပေါက် ခဲ့ပါတယ်”လို့ ကိုပါအမေရိကပွဲက အဖြစ်အပျက်ကို ပြောခဲ့တာပါ။

အာဂျင်တီးနားအသင်းဟာ ၂၀၂၁ က ကိုပါအမေရိကဖလားကို ရခဲ့ပြီး ၂၀၂၂ အစပိုင်းမှာ Finalissima ဆုဖလားကို ရရှိခဲ့ပါတယ်။ အခုအကြိမ်မှာတော့ နှစ်ပေါင်း ၃၆ နှစ်ကြာ ဝေးကွာနေခဲ့တဲ့ ကမ္ဘာ့ဖလားချန်ပီယံဆုကို ရယူ နိုင်ခဲ့တာ ဖြစ်ပါတယ်။
အာဂျင်တီးနားအသင်းဟာ ကမ္ဘာ့ဖလားချန်ပီယံဆုကို ၃ ကြိမ်မြောက် ရယူနိုင်ခဲ့တာ ဖြစ်ပါတယ်။

Source: CNA