- By CNI
- Category: အားကစား
- Hits: 502
CNI Sport News
၂၀၂၃ ခုနှစ်၊ သြဂုတ် ၁၁
စပါးအသင်း တိုက်စစ်မှူး ဟာရီကိန်းဟာ ဘိုင်ယန်မြူးနစ်အသင်းထံ ပြောင်းရွှေ့ဖို့ သဘောတူလိုက်ပြီး ဘွန်ဒစ်လီဂါ ချန်ပီယံအသင်းနဲ့ ၄ နှစ် စာချုပ်ချုပ်ဆိုမယ်လို့ The Athletic က ဖော်ပြခဲ့ပါတယ်။
အင်္ဂလန်အသင်းခေါင်းဆောင် ဟာရီကိန်းဟာ လက်ရှိအချိန်မှာ ဆေးစစ်မှုခံယူဖို့နဲ့ အပြောင်းအရွှေ့ အပြီးသတ် နိုင်အောင် ဂျာမနီမြေကို သွားရောက်ဖို့ စပါးအသင်းရဲ့ မီးစိမ်းပြမှုကို စောင့်ဆိုင်းနေတယ်လို့ သိရပါတယ်။
ဘိုင်ယန်မြူးနစ်အသင်းဟာ ဟာရီကိန်းအတွက် ယူရိုသန်း ၁၀၀ ကျော်နဲ့ နောက်ဆုံးအကြိမ် ကမ်းလှမ်းခဲ့တာကို စပါးအသင်းက လက်ခံခဲ့တာကြောင့် အပြောင်းအရွှေ့ဖြစ်မြောက်ဖို့ နီးစပ်ခဲ့တာပါ။
အသက် ၃၀ နှစ်အရွယ်ရှိ ဟာရီကိန်းဟာ ဘရန်ဖို့ဒ်အသင်းနဲ့ ကစားမယ့် ပရီးမီးယားလိဂ် အဖွင့်ပွဲမတိုင်ခင်မှာ ဒီအခြေအနေကို အမြန်ဆုံး ပြေလည်စေချင်နေတယ်လို့ သတင်းမှာ ဖော်ပြထားပါတယ်။
ဟာရီကိန်းကို တွေ့ရစဉ်
အင်္ဂလန်အသင်း ခေါင်းဆောင်ဟာ စပါးအသင်းနည်းပြသစ် ပိုစတီကိုဂလူး လက်အောက်မှာ ပျော်ရွှင်နေပြီး အသင်းမှာ ဆက်နေချင်ခဲ့ပေမယ့် နောက်ဆုံးမှာတော့ ငယ်ဘဝကလပ်ကနေ ထွက်ခွာဖို့ ဆုံးဖြတ်ခဲ့တာပါ။
ဟာရီကိန်းနဲ့ စပါးအသင်းတို့ ချုပ်ဆိုထားတဲ့ စာချုပ်ဟာ နောက်ဆုံးနှစ်ထဲကို ရောက်ရှိနေပြီး အသင်းဘက်က သူ့ကိုဆက်ထိန်းကာ စာချုပ်သစ် ချုပ်ဆိုနိုင်ဖို့ မျှော်လင့်ခဲ့တာ ဖြစ်ပါတယ်။
ဒါပေမယ့် စာချုပ်သစ်အတွက် ဆွေးနွေးမှုတွေဟာ တိုးတက်မှု မရှိတာကြောင့် စပါးအသင်းဟာ တိုက်စစ်မှူး ဟာရီကိန်းကို ရောင်းချဖို့အတွက် ခက်ခဲတဲ့ ဆုံးဖြတ်ချက်ကို ချခဲ့ရတာပါ။
အဲ့ဒါကြောင့် စပါးအသင်းဟာ ဈေးကွက်ထဲမှာ တိုက်စစ်မှူးသစ်တစ်ဦးကို အမြန်ဆုံး ရှာဖွေရတော့မှာ ဖြစ်ပါတယ်။
ရာသီကြို ခြေစမ်းပွဲတွေမှာ စပါးအသင်းအတွက် ခြေစွမ်းပြသနိုင်ခဲ့တဲ့ ဟာရီကိန်းဟာ လန်ဒန်ကလပ်အတွက် ၄၃၅ ပွဲ ပါဝင်ကစားခဲ့ပြီး ၂၈၀ ဂိုးသွင်းယူကာ ကလပ်အသင်းရဲ့ ဂိုးသွင်းအများဆုံး ကစားသမားအဖြစ် ရပ်တည်နေတာ ဖြစ်ပါတယ်။
Source: theathletic
- By CNI
- Category: အားကစား
- Hits: 484
CNI Sport News
၂၀၂၃ ခုနှစ်၊ သြဂုတ် ၁၀
ပီအက်စ်ဂျီအသင်းကနေ ထွက်ခွာချင်နေတဲ့ တိုက်စစ်မှူးနေမာကို အခုအပြောင်းအရွှေ့မှာ ပြန်လည်ခေါ်ယူနိုင်ဖို့ ဘာစီလိုနာအသင်း ကြိုးစားနေတယ်လို့ သတင်းတွေ ထွက်ပေါ်လာခဲ့ပါတယ်။
ပီအက်စ်ဂျီအသင်းဟာ နေမာကို ၂၀၁၇ ခုနှစ်က စာချုပ်ဖျက်သိမ်းကြေး ပေါင်သန်း ၂၀၀ ပေးပြီး ဘာစီလိုနာ အသင်းကနေ ခေါ်ယူထားတာပါ။
ဒီပြောင်းရွှေ့ကြေးဟာ ကမ္ဘာ့စံချိန်တင် ပြောင်းရွှေ့ကြေးနဲ့ သမိုင်းတစ်လျှောက် အကြီးမားဆုံး အပြောင်းအရွှေ့ အဖြစ် အခုအချိန်ထိ ရှိနေတာ ဖြစ်ပါတယ်။
ပီအက်စ်ဂျီအသင်းဟာ အောင်မြင်မှုတွေ ရယူနိုင်ဖို့အတွက် နေမာကို ငွေကြေး အများအပြား သုံးစွဲပြီး ခေါ်ယူခဲ့ ပေမယ့် ကစားသမားဟာ ပီအက်စ်ဂျီအသင်းမှာ ရှိခဲ့တဲ့ ၆ နှစ်အတွင်း ဒဏ်ရာတွေနဲ့ အချိန်တွေကုန်ခဲ့ပြီး အသင်း လိုချင်နေတဲ့ ချန်ပီယံလိဂ်ဖလားကို ရယူနိုင်ခဲ့ခြင်း မရှိပါဘူး။
နေမာကို တွေ့ရစဉ်
အခုအချိန်မှာ ပီအက်စ်ဂျီအသင်းဟာ အသင်းကို ကစားသမား အသစ်တွေနဲ့ ပြန်လည်တည်ဆောက်ဖို့ ပြင်ဆင် နေတာကြောင့် နေမာကို ထွက်ခွာခွင့်ပေးဖို့ ရှိနေပါတယ်။
ကစားသမား ကိုယ်တိုင်ကလည်း ပီအက်စ်ဂျီအသင်းကနေ ထွက်ခွာချင်တယ်လို့ ပြောထားပါတယ်။
အဲ့ဒါကြောင့် အသင်းဟောင်း ဘာစီလိုနာအသင်းက နေမာကို ပြန်လည်ခေါ်ယူဖို့ ကြိုးစားနေတယ်လို့ The Independent က ဖော်ပြခဲ့တာပါ။
ဘရာဇီးလ် ကစားသမားဟာ စပိန်မှာ ပိုင်ဆိုင်ထားတဲ့ အရာတွေရှိနေတာကြောင့် ဘာစီလိုနာအသင်းထံ ပြန်လာချင်နေတာ ဖြစ်ပါတယ်။
ဘာစီလိုနာအသင်းရဲ့ ဘဏ္ဍာရေး အခက်အခဲတွေက ဒီအပြောင်းအရွှေ့ကို တားဆီးနိုင်ဖွယ် ရှိပေမယ့် စပိန်ကလပ် ဟာ တစ်နှစ်အငှားစာချုပ်နဲ့ခေါ်ပြီး စာချုပ်ကုန်ဆုံးချိန်မှာ အပြီးသတ်ဝယ်ယူဖို့ စီစဉ်နေတာပါ။
နေမာဟာ ဆော်ဒီကလပ် အသင်းတွေရဲ့ ကြီးမားတဲ့ ကမ်းလှမ်းမှုပမာဏကို ရရှိခဲ့ပေမယ့် ချန်ပီယံလိဂ်ပြိုင်ပွဲ ယှဉ်ပြိုင်နိုင်တဲ့ ကလပ်အသင်းမှာ ကစားချင်နေတာ ဖြစ်ပါတယ်။
Source: Metro
- By cni
- Category: အားကစား
- Hits: 523
CNI Sport News
၂၀၂၃ ခုနှစ်၊ သြဂုတ် ၁၀
ဂျူဗင်တပ်စ်အသင်း ပရိသတ်တွေဟာ လူငယ်အသင်းနဲ့ ကစားခဲ့တဲ့ လေ့ကျင့်ရေးပွဲမှာ ကွင်းထဲအထိ ဝင်ရောက်ပြီး လူကာကူကို မခေါ်ဖို့ ဆန္ဒပြခဲ့သလို၊ လူကာကူကို မလိုချင်ဘူးလို့လည်း အော်ဟစ်ခဲ့ကြတာ ဖြစ်ပါတယ်။
ဂျူဗင်တပ်စ်အသင်းဟာ ချယ်လ်ဆီးအသင်း တိုက်စစ်မှူး လူကာကူကို ခေါ်ယူဖို့ စိတ်ဝင်စားနေပြီး အသင်း တိုက်စစ်မှူး ဗလာဟိုဗစ်နဲ့ အလဲအလှယ် ပြုလုပ်ချင်နေတာပါ။
စီးရီးအေကလပ်ကို အားပေးတဲ့ ပရိသတ်တွေဟာ ဒီလေ့ကျင့်ရေးပွဲမှာ တိုက်စစ်မှူး ဗလာဟိုဗစ်ကို ချီးကျူးမှုတွေ ပြုလုပ်ခဲ့ပြီး လူကာကူကို ခေါ်ယူမယ့် အစီအစဉ်ကို ကန့်ကွက်ခဲ့တာ ဖြစ်ပါတယ်။
လူကာကူဟာ ပြီးခဲ့တဲ့ရာသီက အငှားသွားရောက် ကစားခဲ့တဲ့ အင်တာမီလန်အသင်းထံ အပြီးသတ် ပြောင်းချင်ပေ မယ့် အီတလီကလပ်ဟာ ဘယ်လ်ဂျီယံ တိုက်စစ်မှူးအတွက် ချယ်လ်ဆီးအသင်း သတ်မှတ်ထားတဲ့ ပြောင်းရွှေ့ ကြေးကို ပေးချေနိုင်ခြင်း မရှိပါဘူး။
ချယ်လ်ဆီးအသင်းဟာ လူကာကူအတွက် ပေါင်သန်း ၄၀ သတ်မှတ်ထားပေမယ့် အင်တာမီလန်အသင်းက ပေါင် ၂၅ သန်းနဲ့ ကမ်းလှမ်းခဲ့တာဖြစ်ပြီး ဒီကမ်းလှမ်းမှုကို ချယ်လ်ဆီးအသင်းက ပယ်ချခဲ့တာပါ။
ပုံ - လူကာကူကို မခေါ်ဖို့ ဂျူဗင်တပ်စ်အသင်း ပရိသတ်တွေ ကွင်းထဲ၀င်ဆန္ဒပြနေကြစဉ်
လူကာကူဟာ ပြီးခဲ့တဲ့ ချန်ပီယံလိဂ် ဗိုလ်လုပွဲမှာ သူ့ကို လူစားဝင် ကစားသမားအဖြစ် အသုံးပြုခဲ့တဲ့ အင်တာမီလန် အသင်းရဲ့ ဆုံးဖြတ်ချက်ကို စိတ်ပျက်ခဲ့တဲ့အတွက် ပြိုင်ဘက် ဂျူဗင်တပ်စ်အသင်းထံ ပြောင်းရွှေ့ဖို့ ချိတ်ဆက်ခဲ့တာ ဖြစ်ပါတယ်။
ဂျူဗင်တပ်စ်နဲ့ လူကာကူတို့ဟာ အပြောင်းအရွှေ့အတွက် ပုဂ္ဂိုလ်ရေး သဘောတူညီမှု ရရှိထားပြီး ၃ နှစ် စာချုပ် ချုပ်ဖို့တောင် စီစဉ်ထားတာ ဖြစ်ပါတယ်။
ဒါပေမယ့် ချယ်လ်ဆီးအသင်းဘက်က ဒီလိုအလဲအလှယ်မျိုးကို စိတ်မဝင်စားသလို ဂျူဗင်တပ်စ်အသင်း ပရိသတ် တွေကလည်း လူကာကူအပေါ် ခါးခါးသီးသီး ဖြစ်နေတာကြောင့် ကစားသမားရဲ့ အနာဂတ်ဟာ စိုးရိမ်စရာတွေ ရှိလာတာပါ။
လူကာကူဟာ အခုအချိန်ထိ ချယ်လ်ဆီးအသင်းနဲ့ လေ့ကျင့်မှုတွေ ပြုလုပ်ဖို့ ပူးပေါင်းခြင်း မရှိသေးသလို အသင်း ဘက်ကလည်း ရာသီသစ်အတွက် ကစားသမားတွေရဲ့ ကျောနံပါတ်စာရင်း ထုတ်ပြန်တာမှာ လူကာကူအတွက် လောလောဆယ် နံပါတ်သတ်မှတ်ပေးခြင်း မရှိတာတွေ့ရပါတယ်။
ချယ်လ်ဆီးအသင်းဟာ လူကာကူကို ရောင်းချဖို့ ဆုံးဖြတ်ထားတာကြောင့် ကစားသမားအနေနဲ့ မကြာခင် ရက်ပိုင်း အတွင်းမှာ အနာဂတ်နဲ့ ပတ်သက်ပြီး အမြန်ဆုံးဖြေရှင်းဖို့ လိုအပ်နေပြီလို့ သတင်းမှာ ဖော်ပြထားပါတယ်။
Source: Daily Mail
- By cni
- Category: အားကစား
- Hits: 490
CNI Sport News
၂၀၂၃ ခုနှစ်၊ သြဂုတ် ၁၀
ချယ်လ်ဆီးအသင်းဟာ အက်စ်ပီလီကွီတာ အသင်းကနေ ထွက်ခွာသွားပြီးနောက် အကယ်ဒမီထွက် ရီစီဂျိမ်းစ်ကို အသင်းခေါင်းဆောင်သစ်အဖြစ် ခန့်အပ်လိုက်ပါတယ်။
ချယ်လ်ဆီးအသင်းနည်းပြ ပိုချက်တီနိုဟာ ဝါရင့်ဗဟိုနောက်ခံလူ သီယာဂိုဆေးလ်ဗားကို ကျော်ပြီး အသက် ၂၃ နှစ် အရွယ်သာရှိသေးတဲ့ ရီစီဂျိမ်းစ်ကို အသင်းခေါင်းဆောင်သစ်အဖြစ် ရွေးချယ်ခဲ့တာပါ။
သီယာဂိုဆေးလ်ဗားဟာ ပြီးခဲ့တဲ့ရာသီတွေမှာ အသင်းခေါင်းဆောင်အဖြစ် ပွဲအများအပြား တာဝန်ယူခဲ့ပေမယ့် နည်းပြကတော့ အကယ်ဒမီထွက် ကစားသမားကိုသာ လက်ပတ်ပေးဝတ်ဖို့ ဆုံးဖြတ်ခဲ့တာလို့ သတင်းမှာ ဖော်ပြ ထားပါတယ်။
ရီစီဂျိမ်းစ်ကို တွေ့ရစဉ်
ရီစီဂျိမ်းစ်ဟာ ပြီးခဲ့တဲ့ရာသီက ဒဏ်ရာတွေကြောင့် ချယ်လ်ဆီးအသင်းအတွက် ၂၄ ပွဲသာ ပါဝင်ကစားနိုင်ခဲ့ပေမယ့် ရာသီသစ်မှာ ကြံ့ခိုင်မှုပိုင်း အကောင်းဆုံးဖြစ်အောင် လုပ်ဆောင်နေတာ ဖြစ်ပါတယ်။
ချယ်လ်ဆီးအသင်းရဲ့ အသင်းခေါင်းဆောင်အဖြစ် တာဝန်ယူရမှာက သူနဲ့ သူ့ရဲ့မိသားစုအတွက် အလွန်ကောင်းမွန် တဲ့ ခံစားချက်လို့ ရီစီဂျိမ်းစ်က ပြောခဲ့ပါတယ်။
ရီစီဂျိမ်းစ်က “အသက် ၆ နှစ်အရွယ်ထဲက ဒီမှာစတင်ခဲ့ပြီး ဘဝတစ်ခုလုံး ချယ်လ်ဆီးမှာပဲ ရှိနေခဲ့တာပါ။ အကယ်ဒမီကနေ ကျော်ဖြတ်နိုင်ဖို့ဆိုတာ ခက်ခဲပြီး အသင်းခေါင်းဆောင် ဖြစ်လာတာက ကျနော်နဲ့ ကျနော့် မိသားစုအတွက် အလွန်ကောင်းမွန်တဲ့ ခံစားချက်ပါပဲ”လို့ Chelsea's official website ကို ပြောခဲ့တာပါ။
ချယ်လ်ဆီးအသင်းအတွက် ၁၄၇ ပွဲ ပါဝင်ကစားထားပြီး ၁၁ ဂိုး သွင်းယူထားတဲ့ ရီစီဂျိမ်းစ်ဟာ လီဗာပူးလ်အသင်းနဲ့ ပရီးမီးယားလိဂ် အဖွင့်ပွဲစဉ်မှာ အသင်းခေါင်းဆောင် လက်ပတ်ကို ဝတ်ဆင်ပြီး အသင်းကို ဦးဆောင်မှာဖြစ် ပါ တယ်။
Source: Goal
- By cni
- Category: အားကစား
- Hits: 641
CNI Sport News
ဆော်ဒီကလပ် အယ်လ်နာဆာအသင်းဟာ ဆီမီးဖိုင်နယ်အဖြစ် အီရတ်ကလပ် အယ်လ်ရှော်တာအသင်းနဲ့ ကစားခဲ့ တာမှာ ၁ ဂိုး- ဂိုးမရှိနဲ့ အနိုင်ရပြီး အာရပ်ကလပ် ချန်ပီယံများဖလား ဗိုလ်လုပွဲသို့ ရောက်ရှိသွားခဲ့ပါတယ်။
အယ်လ်နာဆာအသင်းအတွက် တစ်လုံးထဲသောဂိုးကို အသင်းခေါင်းဆောင် ရော်နယ်ဒိုက ပွဲချိန် ၇၅ မိနစ်မှာ ရရှိတဲ့ ပင်နယ်တီကို အမှားအယွင်းမရှိ ကန်သွင်းနိုင်ခဲ့တာပါ။
အဲ့ဒါကြောင့် ရော်နယ်ဒိုဟာ အယ်လ်နာဆာအသင်းကို ဖလားဗိုလ်လုပွဲ ပို့ဆောင်ပေးနိုင်ခဲ့ပြီး ဆော်ဒီကလပ် ကစားသမားဘဝ ပထမဆုံးဆုဖလား ရယူနိုင်ဖို့ နီးစပ်လာခဲ့ပြီ ဖြစ်ပါတယ်။
ရော်နယ်ဒိုဟာ ဒီပြိုင်ပွဲမှာ သွင်းဂိုး ၄ ဂိုးသွင်းယူထားပြီး ဂိုးသွင်းအများဆုံး ကစားသမားအဖြစ် ရပ်တည်နေတာပါ။
အယ်လ်နာဆာအသင်း ယှဉ်ပြိုင်နေစဉ်
အာရပ်ကလပ် ချန်ပီယံများဖလားပြိုင်ပွဲဟာ ဗိုလ်လုပွဲကစားဖို့ ကျန်ရှိနေသေးပေမယ့် ပြိုင်ပွဲတာဝန်ရှိသူတွေဟာ ရော်နယ်ဒိုကို ဂိုးသွင်းအများဆုံး ကစားသမားဆု ချီးမြှင့်သွားခဲ့ပါတယ်။
၃ ဂိုး သွင်းယူထားပြီး ဂိုးသွင်းအများဆုံး ဒုတိယနေရာမှာ ရပ်တည်နေတဲ့ ဘန်ဇီမာရဲ့ အယ်လ်အီတီဟတ် အသင်း ဟာ ပြိုင်ပွဲကနေ ထွက်ခွာသွားခဲ့သလို ၂ ဂိုး သွင်းယူထားတဲ့ ကစားသမားအများစုရဲ့ အသင်းတွေကလည်း ပြိုင်ပွဲ က ထွက်ခွာသွားခဲ့ပြီဖြစ်တာကြောင့် ရော်နယ်ဒိုဟာ ဒီဆုကို စောစီးစွာ ရရှိခဲ့တာပါ။
ရော်နယ်ဒိုက “အသင်းသားတွေရဲ့ အကောင်းဆုံး လုပ်ဆောင်မှုနဲ့ ဗိုလ်လုပွဲ ရောက်ရှိသွားပါပြီ။ အံ့အားသင့်ဖွယ် ကောင်းတဲ့ အားပေးမှုတွေနဲ့အတူ ကျနော်တို့ အရှေ့ကိုသွားနိုင်အောင် အမြဲတမ်းတွန်းအားပေးတဲ့ ပရိသတ်တွေကို အထူးကျေးဇူးတင်ရှိပါတယ်”လို့ တွစ်တာမှာ ရေးသားခဲ့ပါတယ်။
အယ်လ်နာဆာအသင်းဟာ အာရပ်ကလပ် ချန်ပီယံများဖလား ဗိုလ်လုပွဲအဖြစ် ဆော်ဒီကလပ် အယ်လ်ဟီလယ် အသင်းနဲ့ ယှဉ်ပြိုင်ရမှာပါ။
အယ်လ်ဟီလယ်အသင်းဟာ အယ်လ်ရှာဘတ်အသင်းကို ဆီမီးဖိုင်နယ်မှာ ၃ ဂိုး- ၁ ဂိုးနဲ့ အနိုင်ရရှိခဲ့ပါတယ်။
အယ်လ်နာဆာနဲ့ အယ်လ်ဟီလယ်အသင်းတို့ရဲ့ ဗိုလ်လုပွဲကို သြဂုတ် ၁၂ ရက်မှာ ကျင်းပသွားမှာပါ။
အယ်လ်နာဆာအသင်းဟာ ဒီပွဲအပြီးမှာ ရာသီသစ် ဆော်ဒီပရိုလိဂ် အဖွင့်ပွဲစဉ်အဖြစ် အယ်လ်အီတီဖတ်အသင်းနဲ့ သြဂုတ် ၁၄ ရက်မှာ ယှဉ်ပြိုင်ရမှာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 483
CNI Sport News
၂၀၂၃ ခုနှစ်၊ ဩဂုတ် ၉
ဘိုင်ယန်မြူးနစ်အသင်းရဲ့ အဓိကဂိုးသမား နူအာဟာ ရက်သတ္တပတ် အနည်းငယ်ထပ်ပြီး အနားယူရမှာဖြစ်လို့ နည်းပြ တူချယ်လ်ဟာ ချယ်လ်ဆီးအသင်းမှာ လက်တွဲခဲ့တဲ့ ဂိုးသမား ကီပါကို အသင်းထံ ခေါ်ယူချင်နေ ပါတယ်။
ဂျာမန်ချန်ပီယံအသင်းဟာ ဂိုးသမား ရွေးချယ်ဖို့အတွက် အခက်အခဲဖြစ်နေပြီး လက်ရှိအသင်းမှာ အယ်လ်ရစ်ရှ် တစ်ဦးတည်းသာ ကြံ့ခိုင်မှု အပြည့်အဝ ရှိနေတာပါ။
ဆွစ်ဇာလန်ဂိုးသမား ဆွန်မားဟာ အသင်းမှာ ပွဲထွက်ခွင့်ရဖို့ မသေချာတာကြောင့် အခုအပြောင်းအရွှေ့မှာ အင်တာမီလန်အသင်းထံ ပြောင်းရွှေ့သွားခဲ့တာ ဖြစ်ပါတယ်။
ဂျာမန်ဂိုးသမား နူအာကတော့ ပြီးခဲ့တဲ့ ဒီဇင်ဘာလက စကိတ်စီးခရီးတစ်ခုမှာ ခြေထောက်ကျိုးသွားခဲ့လို့ အနားယူနေရပြီး ပွဲကစားနိုင်ဖို့ မသေချာသေးပါဘူး။
အဲ့ဒါကြောင့် ဘိုင်ယန်မြူးနစ်အသင်းဟာ ဂိုးသမားအသစ် တစ်ဦးကို ရှာဖွေနေပြီး နည်းပြ တူချယ်လ်က ကီပါကို ချယ်လ်ဆီးအသင်းကနေ ခေါ်ယူပေးဖို့ တောင်းဆိုထားတာပါ။
နူအာကိုတွေ့ရစဉ်
ဘိုင်ယန်မြူးနစ်အသင်းဟာ ကီပါရဲ့ အပြောင်းအရွှေ့အတွက် ကစားသမားရဲ့ ကိုယ်စားလှယ်တွေ၊ ပရီးမီးယားလိဂ် ကလပ်အသင်းနဲ့ ဆွေးနွေးမှုတွေ စတင်နေပြီဖြစ်တယ်လို့ Sport-1 က ဖော်ပြထားပါတယ်။
တူချယ်လ်ဟာ ချယ်လ်ဆီးအသင်းကို ကိုင်တွယ်ခဲ့ချိန်က မန်ဒီကို ပိုပြီးအသုံးပြုခဲ့ပေမယ့် အခုအချိန်မှာတော့ ကီပါကို သူ့ရဲ့ အသင်းထံ ခေါ်ယူချင်နေတာပါ။
ဘိုင်ယန်မြူးနစ်အသင်းဟာ ကီပါကို အပြီးသတ် ဝယ်ယူခွင့် အပါအဝင် ကနဦးအငှားနဲ့ ခေါ်ယူချင်နေတာ ဖြစ်ပါ တယ်။ ချယ်လ်ဆီးအသင်းဟာ အခုအပြောင်းအရွှေ့မှာ ဘရိုက်တန် အသင်းဂိုးသမား ရောဘတ်ဆန်းချက်ဇ်ကို ပေါင် ၂၅ သန်းနဲ့ ခေါ်ယူထားတာကြောင့် ကီပါဟာ ပွဲထွက်နေရာအတွက် အပြိုင်အဆိုင်ကြိုးစားရမှာပါ။
စပိန်ဂိုးသမားနဲ့ ချယ်လ်ဆီးအသင်းတို့ ချုပ်ဆိုထားတဲ့စာချုပ်ဟာ ၂ နှစ် ကျန်ရှိနေပါသေးတယ်။
၂၀၁၈ ခုနှစ်က ဘီလ်ဘာအို အသင်းကနေ ကလပ်စံချိန်တင် ပြောင်းရွှေ့ကြေး ပေါင် ၇၁ သန်းနဲ့ ချယ်လ်ဆီး အသင်းကို ရောက်ရှိလာခဲ့တဲ့ ကီပါဟာ အသင်းနဲ့အတူ ချန်ပီယံလိဂ်၊ ယူရိုပါလိဂ်၊ ကလပ်ကမ္ဘာ့ဖလားနဲ့ ဥရောပ စူပါဖလားတို့ကို ရယူနိုင်ခဲ့ပါတယ်။
Source: Goal
- By CNI
- Category: အားကစား
- Hits: 518
CNI Sport News
၂၀၂၃ ခုနှစ်၊ သြဂုတ် ၉
၂၀၂၃-၂၄ ရာသီသစ် မစတင်ခင်မှာ လီဗာပူးလ်အသင်းရဲ့ အလားအလာနဲ့ ပတ်သက်ပြီး သံသယရှိနေတာကို နားလည်တယ်လို့ အသင်းခေါင်းဆောင် ဗန်ဒိုက်က ပြောလိုက်ပါတယ်။
ဗန်ဒိုက်က “ပရိသတ်တွေရဲ့ အဆိုးမြင်နေတဲ့အပေါ် သေချာပေါက် နားလည်နိုင်ပေမယ့် ကျနော်ကတော့ အရမ်းကြီး အဆိုးမြင်နေတဲ့သူ မဟုတ်ပါဘူး။ အားလုံးသိတဲ့အတိုင်းပဲ ကျနော်တို့အသင်းမှာ ကစားသမားတွေ အများကြီး ထွက်ခွာသွားကြပါတယ်။ အသင်းခေါင်းဆောင်ရော၊ ဒုအသင်းခေါင်းဆောင်ပါ ထွက်ခွာသွားခဲ့သလို ကစားသမားသစ် ခေါ်ယူမှု ၂ ဦးပဲ ရှိပါသေးတယ်။ ကျနော်တို့ရဲ့ ကစားပုံတွေက ကောင်းပေမယ့် ခံစစ်ပိုင်းကတော့ ဂိုးတွေခွင့်ပြုနေရလို့ မကောင်းပါဘူး။ အဲ့ဒါကြောင့် လူတချို့ရဲ့ သံသယဖြစ်တာကို ကျနော်နားလည်နိုင်ပါတယ်”လို့ ပြောပါတယ်။
လီဗာပူးလ်အသင်းဟာ အခုရာသီသစ် မစတင်ခင်မှာ ဟန်ဒါဆန်၊ ဖာဘင်ဟို၊ မီလ်နာ၊ ဖာမီနို၊ ကီတာနဲ့ ချိန်ဘာလိန် တို့ ထွက်ခွာသွားခဲ့ပေမယ့် မက်အယ်လစ္စတာနဲ့ ဆာဘော့ဇ်လိုင်းတို့ကိုသာ ခေါ်ယူထားတာ ဖြစ်ပါတယ်။
အန်ဖီးလ်ကလပ်ဟာ ကွင်းလယ်ပိုင်း လိုအပ်ချက်တွေအတွက် ဆောက်သမ်တန်အသင်းက လာဗီးယားကို ခေါ်ယူဖို့ ၃ ကြိမ်အထိ ကမ်းလှမ်းခဲ့ပေမယ့် ချန်ပီယံရှစ်ကလပ်က ပယ်ချခဲ့တာပါ။ လီဗာပူးလ်အသင်းဟာ အပြောင်းအရွှေ့ မပိတ်ခင်မှာ လာဗီးယားအတွက် နောက်ထပ်ကမ်းလှမ်းမှု ပြုလုပ်သွားဖို့ ရှိနေတာဖြစ်ပါတယ်။
အသက် ၃၂ နှစ်အရွယ်ရှိ ဗန်ဒိုက်က လီဗာပူးလ် ကစားသမားတွေဟာ ဒီရာသီမှာ ဆုဖလားတွေ ရယူနိုင်ဖို့အတွက် စိတ်ပိုင်းဖြတ်ထားတယ်လို့လည်း ပြောခဲ့ပါတယ်။
ဗန်ဒိုက်က “ကျနော်တို့ အနားမှာရှိတဲ့ အသင်းတွေကို ကြည့်လိုက်မယ်ဆိုရင် အလွန်ခက်ခဲမှာ ဖြစ်ပေမယ့် ကျနော် တို့ဟာ ချန်ပီယံဆုအတွက် စိန်ခေါ်မှုတွေကို ထပ်ပြီး ပြုလုပ်ချင်ပါတယ်။ ဒီလိုလုပ်နိုင်ဖို့ အတွက်လည်း ကျနော်တို့ ဟာ ယုံကြည်မှု အပြည့်ရှိရမှာပါ။ ဒါက အလွန်ကောင်းမွန်တဲ့ စိန်ခေါ်မှုဖြစ်တဲ့အတွက် ကျနော် စိတ်လှုပ်ရှားနေပါ တယ်”လို့ ပြောခဲ့တာပါ။
လီဗာပူးလ်အသင်းဟာ ပရီးမီးယားလိဂ် အဖွင့်ပွဲစဉ်အဖြစ် ချယ်လ်ဆီးအသင်းနဲ့ သြဂုတ် ၁၃ ရက် စတမ်းဖို့ဒ် ဘရစ်ချ်မှာ ယှဉ်ပြိုင်သွားမှာ ဖြစ်ပါတယ်။
Source: BBC
- By CNI
- Category: အားကစား
- Hits: 505
CNI Sport News
၂၀၂၃ ခုနှစ်၊ သြဂုတ် ၉
အာဆင်နယ်အသင်းဟာ စပိန်လက်ရွေးစင်ဂိုးသမား ဒေးဗစ်ရာယာကို ခေါ်ယူဖို့ ဘရန်ဖို့ဒ်အသင်းနဲ့ ပြောင်းရွှေ့ ကြေး သဘောတူညီမှု ရရှိသွားပြီ ဖြစ်ပါတယ်။
ဘရန်ဖို့ဒ်အသင်းဟာ ဒေးဗစ်ရာယာအတွက် ပေါင်သန်း ၄၀ တန်ကြေး သတ်မှတ်ထားပေမယ့် အခုအချိန်မှာ နှစ်သင်းကြား ပေါင်သန်း ၃၀၊ အပိုဆုကြေးတွေနဲ့ သဘောတူညီမှု ရရှိခဲ့တာပါ။
စပိန်ဂိုးသမားဟာ အာဆင်နယ်အသင်းထံ ပြောင်းရွှေ့ချင်တဲ့ သူ့ရဲ့ဆန္ဒကို အသိပေးထားပြီး ဖြစ်သလို လန်ဒန် ကလပ်နဲ့ ပုဂ္ဂိုလ်ရေးဆိုင်ရာ သဘောတူညီမှု ရရှိထားပါတယ်။
ဒေးဗစ်ရာယာဟာ မကြာခင်မှာ အာဆင်နယ်အသင်းနဲ့ ဆေးစစ်မှုတွေ ပြုလုပ်တော့မှာဖြစ်ပြီး ပရီးမီးယားလိဂ် အဖွင့်ပွဲစဉ်ဖြစ်တဲ့ နော်တင်ဟမ်ဖောရက်စ်အသင်းနဲ့ ပွဲမှာပါဝင်နိုင်ဖို့ မျှော်လင့်နေတာပါ။
ဒေးဗစ်ရာယာကိုတွေ့ရစဉ်
ဘရန်ဖို့ဒ် ဂိုးသမားဟာ အာဆင်နယ်အသင်းရဲ့ နံပတ်တစ် ဂိုးသမားနေရာအတွက် အင်္ဂလန်ဂိုးသမား ရမ်စဒေးလ် ကို စိန်ခေါ်ဖို့ အဆင်သင့် ဖြစ်နေတယ်လို့ သတင်းမှာ ဖော်ပြထားပါတယ်။
ဒေးဗစ်ရာယာကို ခေါ်ယူဖို့ ဘိုင်ယန်မြူးနစ်အသင်းက စိတ်ဝင်စားခဲ့ပေမယ့် ကစားသမားက အာဆင်နယ်အသင်း ထံ လာဖို့ကို ရွေးချယ်ခဲ့တာပါ။
အာဆင်နယ်အသင်းနည်းပြ အာတီတာက အသင်းမှာရှိတဲ့ နေရာအားလုံးအတွက် ပြိုင်ဆိုင်မှုရှိဖို့ လိုအပ်တယ်လို့ မန်စီးတီးအသင်းကို အနိုင်ရခဲ့တဲ့ ကွန်မြူနတီဒိုင်း ပွဲစဉ်အပြီးမှာ ပြောခဲ့ပါတယ်။
အာတီတာက “ဒီနေရာမှာ ပြိုင်ဆိုင်မှုတွေက အမြဲတမ်း ရှိနေရာမှာပါ၊ ဘယ်သူ့နေရာပဲ ဖြစ်ဖြစ်ပါ။ ကျနော်တို့ အနေနဲ့ ဒီလိုမခံစားရဘူးဆိုရင် ကစားသမားတိုင်းရဲ့ အကောင်းဆုံးကို ရမှာမဟုတ်ပါဘူး။ ဒီလိုမျိုးခံစားနေရမှ အသင်းအနေနဲ့ ပိုပြီးတော့ ကောင်းမွန်လာမှာပါ”လို့ ပြောခဲ့တာပါ။
အသက် ၂၇ နှစ်အရွယ်ရှိ ဒေးဗစ်ရာယာဟာ ဘရန်ဖို့ဒ်အသင်းကို ၂၀၁၉ ခုနှစ်ကတည်းက ရောက်ရှိလာခဲ့တာဖြစ်ပြီး ပရီးမီးယားလိဂ် တန်းတက်နိုင်အောင် လက်စွမ်းပြသနိုင်ခဲ့တာ ဖြစ်ပါတယ်။ ဒေးဗစ်ရာယာဟာ စပိန်လက်ရွေးစင် အသင်းအတွက် ၂ ပွဲ ပါဝင်ကစားထားပါတယ်။
Source: Metro
- By CNI
- Category: အားကစား
- Hits: 453
CNI Sport News
၂၀၂၃ ခုနှစ်၊ သြဂုတ် ၈
ချယ်လ်ဆီးအသင်းရဲ့ ရှေ့တန်ကစားသမား အန်ကွန်ကူဟာ ဒူးဒဏ်ရာကြောင့် ရက်သတ္တပတ် အနည်းငယ် အနား ယူရမှာဖြစ်လို့ ရာသီအစ ပွဲစဉ်တွေကို ပါဝင်နိုင်ဖွယ် မရှိဘူးလို့ သိရပါတယ်။
အန်ကွန်ကူဟာ ချယ်လ်ဆီးအသင်းရဲ့ ရာသီကြို ခြေစမ်းပွဲ နောက်ဆုံးပွဲစဉ်ဖြစ်တဲ့ ဒေါ့မွန်အသင်းနဲ့ပွဲမှာ ရရှိခဲ့တဲ့ ဒဏ်ရာကြောင့် ပွဲချိန် ၂၂ မိနစ်မှာ လူစားလဲခံခဲ့ရတာပါ။
အခုအပြောင်းအရွှေ့ကမှ လိုက်ပ်ဇစ် အသင်းကနေ ပေါင် ၅၈ သန်းနဲ့ ရောက်ရှိလာခဲ့တဲ့ အန်ကွန်ကူဟာ ဘယ် ဘက် ဒူးဒဏ်ရာကြောင့် ရက်သတ္တပတ် အနည်းငယ်အကြာထိ အနားယူရတော့မှာ ဖြစ်ပါတယ်။
အဲ့ဒါကြောင့် အသက် ၂၅ နှစ်အရွယ်ရှိ ကစားသမားဟာ သြဂုတ် ၁၃ ရက်မှာ ကစားမယ့် လီဗာပူးလ်အသင်းနဲ့ ပရီးမီးယားလိဂ် အဖွင့်ပွဲစဉ်ကို သေချာပေါက် ပါဝင်နိုင်တော့မှာ မဟုတ်ပါဘူး။
အန်ကွန်ကူဟာ ရာသီကြို ခြေစမ်းပွဲတွေမှာ ချယ်လ်ဆီး အသင်းအတွက် ခြေစွမ်းပြသ နိုင်ခဲ့တာကြောင့် ကစား သမား အနားယူရမယ့် သတင်းဟာ နည်းပြ ပိုချက်တီနိုအတွက် ကြီးမားတဲ့ ထိုးနှက်ချက် ဖြစ်လာခဲ့ပါတယ်။
အန်ကွန်ကူကို တွေ့ရစဉ်
ချယ်လ်ဆီးအသင်းဟာ တိုက်စစ်ပိုင်းအတွက် ပဲလေ့စ်အသင်းက အိုလီဆီကို ချိတ်ဆက်နေသလို ပီအက်စ်ဂျီ အသင်းကနေ ထွက်ခွာချင်နေတဲ့ နေမာနဲ့လည်း သတင်းတွေ ထွက်ပေါ်နေခဲ့တာပါ။
လန်ဒန်ကလပ်ဟာ ပြီးခဲ့တဲ့ရာသီက ပရီးမီးယားလိဂ်ပြိုင်ပွဲမှာ အဆင့် ၁၂ နေရာနဲ့ ရာသီအဆုံးသတ်ခဲ့သလို ရဂိုး ကလည်း ၃၈ ဂိုးသာရခဲ့လို့ တိုက်စစ်ပိုင်း လိုအပ်ချက်တွေကို အားဖြည့်ပြီး ထိပ်ဆုံး ၄ သင်းထဲ ပြန်ဝင်ရောက်နိုင်ဖို့ နည်းပြ ပိုချက်တီနိုက ကြိုးစားနေတာ ဖြစ်ပါတယ်။
ချယ်လ်ဆီးအသင်းဟာ အခုအပြောင်းအရွှေ့မှာ တိုက်စစ်မှူး ဂျက်ဆန်ကို ဗီလာရီးရယ်လ် အသင်းကနေ ခေါ်ယူ ထားပေမယ့် အပြောင်းအရွှေ့ မပိတ်ခင်မှာ နောက်ထပ် တိုက်စစ်မှူးတစ်ဦးကို ခေါ်ယူနိုင်ဖို့ ဈေးကွက်ထဲမှာ ရှာဖွေ နေတာပါ။
ချယ်လ်ဆီးအသင်းဟာ တိုက်စစ်မှူး ရှာဖွေနေသလို အန်ကွန်ကူ အမြန်ဆုံး ပြန်လာနိုင်ဖို့လည်း မျှော်လင့်နေတယ် လို့ သတင်းမှာ ဖော်ပြထားပါတယ်။
Source: Goal
- By CNI
- Category: အားကစား
- Hits: 527
CNI Sport News
၂၀၂၃ ခုနှစ်၊ သြဂုတ် ၈
ဟာရီကိန်းက ဘိုင်ယန်မြူးနစ် အသင်းအနေနဲ့ အခုရက်သတ္တပတ်အကုန်မှာ အပြောင်းအရွှေ့အတွက် သဘောတူညီမှု မရခဲ့ရင် စပါးအသင်းမှာပဲ ဆက်ရှိတော့မယ်လို့ အပြောင်းအရွှေ့ နောက်ဆုံးရက် သတ်မှတ်ပေး ခဲ့ပါတယ်။
စပါးအသင်းဟာ တိုက်စစ်မှူး ဟာရီကိန်းအတွက် ဘိုင်ယန်မြူးနစ်အသင်းရဲ့ ပေါင် ၈၆ သန်းနဲ့ နောက်ဆုံး ကမ်းလှမ်းမှု အပါအဝင် ကမ်းလှမ်းမှု အများအပြားကို ပယ်ချခဲ့တာပါ။
လန်ဒန်ကလပ်ဟာ လာမယ့်နှစ် နွေရာသီမှာ အလွတ်နဲ့ ထွက်ခွာခွင့်ပြုရမယ့် တိုက်စစ်မှူးအတွက် ပြောင်းရွှေ့ ကြေး ပေါင်သန်း ၁၀၀ လိုချင်နေတာ ဖြစ်ပါတယ်။
ဘိုင်ယန်မြူးနစ် အသင်းအနေနဲ့ စပါးအသင်း တောင်းဆိုတဲ့ မြင့်မားတဲ့ ပမာဏကို ပေးချေနိုင်ဖို့ မသေချာပေမယ့် နောက်ထပ် ကမ်းလှမ်းမှုအသစ် ပြုလုပ်ဖို့ ပြင်ဆင်နေတာပါ။
ဒါပေမယ့် အင်္ဂလန်အသင်း ခေါင်းဆောင်ကတော့ ပရီးမီးယားလိဂ် ရာသီသစ် စတင်ပြီးတာနဲ့ စပါးအသင်းကနေ ထွက်ခွာမှာ မဟုတ်ဘူးလို့ ဆုံးဖြတ်ခဲ့ကြောင်း The Telegraph က ဖော်ပြထားပါတယ်။
ဟာရီကိန်းကိုတွေ့ရစဉ်
စပါးအသင်းဟာ သြဂုတ် ၁၃ ရက်မှာ ပရီးမီးယားလိဂ် အဖွင့်ပွဲစဉ်အဖြစ် ဘရန်ဖို့ဒ်အသင်းနဲ့ ယှဉ်ပြိုင်မှာဖြစ်ပြီး ဘိုင်ယန်မြူးနစ်အသင်းကတော့ သြဂုတ် ၁၂ ရက်မှာ ဂျာမန်စူပါဖလားပွဲစဉ်အဖြစ် လိုက်ပ်ဇစ်အသင်းနဲ့ ယှဉ်ပြိုင် ရမှာပါ။
စပါးအသင်းဟာ တစ်ပတ်လုပ်ခပေါင် ၄ သိန်းနဲ့ ဟာရီကိန်းကို စာချုပ်သစ် ကမ်းလှမ်းထားပေမယ့် ကစားသမား ကတော့ စာချုပ်သစ်နဲ့ ပတ်သက်ပြီး ဘာအရိပ်အယောင်မှ ပြသထားခြင်း မရှိပါဘူး။
စပါးအသင်းဟာ လာမယ့် ရက်ပိုင်းအတွင်းမှာ အာဂျင်တီးနား ရှေ့တန်းကစားသမား အလီဂျိုနဲ့ ဝုလ်ဖ်ဘတ် ဗဟို နောက်ခံလူ ဗန်ဒီဗန်တို့ကို ခေါ်ယူနိုင်ကြောင်း ကြေညာဖို့ စီစဉ်ထားတယ်လို့ သတင်းမှာ ဖော်ပြထားပါတယ်။
ဘိုင်ယန်မြူးနစ်အသင်းဟာ ပြီးခဲ့တဲ့နှစ် နွေရာသီက ဘာစီလိုနာအသင်းထံ ပြောင်းရွှေ့သွားခဲ့တဲ့ တိုက်စစ်မှူး လီဝန်ဒေါစကီး နေရာမှာ အစားထိုးဖို့ ဟာရီကိန်းကို အဓိကပစ်မှတ်အဖြစ် သတ်မှတ်ထားတာပါ။
ဒါပေမယ့် အပြောင်းအရွှေ့ အဆင်မပြေခဲ့ရင် နောက်ထပ် တိုက်စစ် ကစားသမားတွေကို ရှာဖွေသွားမှာဖြစ်ပြီး ဂျူဗင်တပ်စ်တိုက်စစ်မှူး ဗလာဟိုဗစ်ကို စိတ်ဝင်စားနေတယ်လို့ သိရပါတယ်။
Source: Metro
Page 217 of 373
Connect with us
