CNI Sport News

၂၀၂၃ ခုနှစ်၊ မေလ ၂၇

စထရာဘောင်းအသင်းနည်းပြ အန်တိုနက်တီက ပီအက်စ်ဂျီအသင်းတိုက်စစ်မှူး မက်ဆီရဲ့ စွမ်းဆောင်ရည်တွေကို ချီးကျူးခဲ့ပြီး အာဂျင်တီးနားအသင်းခေါင်းဆောင်ဟာ လမ်းလျှောက်တာတောင် ဘောလုံးကို လူတိုင်းထက် ပိုနားလည်တယ်လို့ ပြောခဲ့ပါတယ်။

အန်တိုနက်တီက “မက်ဆီက ဘောလုံးပါ၊သူက မစ္စတာဘောလုံး။ သူက ဘောလုံးနဲ့ အသက်ရှူတယ်။ သူက အနည်းငယ်လမ်းလျှောက်တယ်ဆိုတာတော့ မှန်ပါတယ်။ ဒါပေမယ့် လမ်းလျှောက်တာတောင် မက်ဆီဟာ ဘောလုံးကို လူတိုင်းထက် ပိုပြီးနားလည်ပါတယ်”လို့ ပြောခဲ့တာပါ။

စထရာဘောင်းနဲ့ ပီအက်စ်ဂျီအသင်းတို့ဟာ တနင်္ဂနွေနေ့ မနက်ပိုင်းမှာ အခုနှစ်ရာသီ ပြင်သစ်လီဂူးဝမ်း ပွဲစဉ် ၃၇ အဖြစ် ယှဉ်ပြိုင်မှာဖြစ်ပြီး ၂ သင်းစလုံးအတွက် ရမှတ် ၁ မှတ်စီရယူနိုင်ဖို့ လိုအပ်နေတာဖြစ်ပါတယ်။ ဒီပွဲမှာ သရေရလဒ်ထွက်ပေါ်ခဲ့မယ်ဆိုရင် ပီအက်စ်ဂျီအသင်းဟာ လီဂူးဝမ်းချန်ပီယံဆုကို ရယူနိုင်မှာဖြစ်ပြီး စထရာဘောင်းအသင်းက တန်းဆင်းဇုန်က လွတ်မြောက်သွားမှာပါ။

စထရာဘောင်းအသင်းနည်းပြ အန်တိုနက်တီ ကိုတွေ့ရစဉ်

ဒီပွဲမတိုင်ခင် ပြုလုပ်ခဲ့တဲ့ ပွဲကြိုသတင်းစာရှင်းလင်းပွဲမှာ စထရာဘောင်းနည်းပြ အန်တိုနက်တီဟာ ဝေဖန်မှုတွေခံနေရတဲ့ မက်ဆီရဲ့ ဘက်ကနေ ကာကွယ်ပြီးပြောသွားခဲ့တာဖြစ်ပါတယ်။ ပီအက်စ်ဂျီအသင်းဟာ ချန်ပီယံလိဂ်ပြိုင်ပွဲကနေ ထွက်ခွာရပြီးကတည်းက မက်ဆီဟာ အသင်းပရိသတ်တွေရဲ့ ပစ်မှတ်ထားခြင်းကို ခံခဲ့ရတာပါ။ ပီအက်စ်ဂျီအသင်းအိမ်ကွင်းမှာ ကစားခဲ့တဲ့ ပွဲစဉ်တွေမှာ မက်ဆီဟာ ပရိသတ်တွေရဲ့ လှောင်ပြောင်ခြင်းကို ခံခဲ့ရတာဖြစ်ပါတယ်။

မက်ဆီဟာ ပီအက်စ်ဂျီပရိသတ်တွေ သူ့အပေါ်ပြုမူဆက်ဆံတဲ့ပုံစံတွေကို စိတ်ပျက်နေပြီး စာချုပ်ကုန်ဆုံးမယ့် အခုရာသီအကုန်မှာ ပြင်သစ်ကလပ်ကနေ ထွက်ခွာသွားဖို့ ရှိနေတာပါ။ အာဂျင်တီးနားအသင်းခေါင်းဆောင်ကို ခေါ်ယူဖို့ အသင်းဟောင်း ဘာစီလိုနာအသင်းအပြင် ဆော်ဒီကလပ်တွေနဲ့ မေဂျာလိဂ်ကလပ် အင်တာမိုင်ယာမီအသင်းတို့က စိတ်ဝင်စားနေပြီး ချိတ်ဆက်မှုတွေပြုလုပ်နေတာဖြစ်ပါတယ်။

မက်ဆီကတော့ အခုရာသီအကုန်မှသာ သူ့အနာဂတ်ကို ဆုံးဖြတ်မယ်လို့ ဖခင်ဖြစ်သူက မကြာသေးခင်က ပြောထားတာပါ။ အာဂျင်တီးနားအသင်းခေါင်းဆောင်ဟာ အခုရာသီမှာ ပီအက်စ်ဂျီအသင်းအတွက် ၃၉ ပွဲပါဝင်ကစားထားပြီး ဂိုး ၂၀ သွင်းယူကာ ဂိုး ၂၀ ဖန်တီးထားတာဖြစ်ပါတယ်။

Source: BeSoccer

CNI Sport News

၂၀၂၃ ခုနှစ်၊ မေလ ၂၇

ချယ်လ်ဆီးအသင်းဟာ ပြီးခဲ့တဲ့ အပြောင်းအရွှေ့ ၂ ခုမှာ ပေါင်သန်း ၆၀၀ ဝန်းကျင်သုံးစွဲခဲ့ပေမယ့် အသင်းအနေနဲ့ ပြန်လည်တည်ဆောက်ဖို့လိုတယ်လို့ ယာယီနည်းပြ လမ်းပတ်က ပြောခဲ့ပါတယ်။

လမ်းပတ်က “ကလပ်အတွက် ဆိုးရွားတဲ့နှစ်ပါ။ အရေးကြီးတာက ဘယ်လိုတိုးတက်အောင်လုပ်မလဲ ဆိုတာပါ။ အသင်းဟာ ပြန်လည်တည်ဆောက်ဖို့ လိုအပ်ပါတယ်၊ နွေရာသီမှာ အသင်းရဲ့လူစာရင်းကို ပြောင်းလဲမှုတွေပြုလုပ်ရမှာဖြစ်ပါတယ်။ အဆင့်တစ်ဆင့်ရောက်အောင်မြှင့်တင်နိုင်ဖို့လိုအပ်ပါတယ်”လို့ ပြောခဲ့တာပါ။

ချယ်လ်ဆီးအသင်းကို တောဒ့်ဘိုလီဦးဆောင်တဲ့ အစုအဖွဲ့က ပြီးခဲ့တဲ့နှစ်က ဝယ်ယူအပြီးမှာ အန်ဇိုဖာနန်ဒက်ဇ်ကို ဗြိတိန်စံချိန်တင်ပြောင်းရွှေ့ကြေး ပေါင် ၁၀၆ သန်းနဲ့ ခေါ်ယူပေးခဲ့တာအပါအဝင် ကစားသမားသစ်အများအပြားကို အသင်းအတွက် ဖြည့်တင်းပေးခဲ့တာဖြစ်ပါတယ်။ ဒါပေမယ့် ချယ်လ်ဆီးအသင်းဟာ ရလဒ်ဆိုးတွေနဲ့အတူ နည်းပြအပြောင်းအလဲတွေဖြစ်ခဲ့ပြီး အခုနှစ်ရာသီ ပရီးမီးယားလိဂ်ပြိုင်ပွဲမှာ အဆင့် ၁၀ ပြင်ပရပ်တည်ပြီး အဆုံးသတ်ဖို့ သေချာခဲ့တာပါ။

ချယ်လ်ဆီးအသင်းဟာ အခုရာသီအကုန်မှာ စပါးနဲ့ ပီအက်စ်ဂျီအသင်းနည်းပြဟောင်း ပိုချက်တီနိုကို နည်းပြသစ်အဖြစ် ခန့်အပ်ဖို့ လုပ်ဆောင်နေတာပါ။ ပိုချက်တီနိုကတော့ အသင်းရဲ့ လူစာရင်းကို အပြောင်းအလဲပြုလုပ်ပြီး ကစားသမားသစ်တွေ ထပ်မံခေါ်ယူသွားဖို့ စီစဉ်နေတာဖြစ်ပါတယ်။ လန်ဒန်ကလပ်ဟာ အသင်းမှာရှိနေတဲ့ ကစားသမားတွေကိုလည်း ရောင်းချသွားဖို့ရှိနေပြီး အူဘာမီယန်း၊ မေဆန်မောင့်တို့ဟာ အသင်းကနေ ထွက်ခွာသွားဖို့ ရှိနေတာပါ။

ချယ်လ်ဆီးအသင်းဟာ အခုနှစ်ရာသီ ပရီးမီးယားလိဂ်နောက်ဆုံးပွဲစဉ်အဖြစ် နယူးကာဆယ်အသင်းကို အိမ်ကွင်းမှာ ယှဉ်ပြိုင်ရမှာဖြစ်ပြီး နိုင်ပွဲနဲ့အတူ ရာသီကို အဆုံးသတ်နိုင်ဖို့ မျှော်လင့်နေတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မေလ ၂၇

ဒဏ်ရာပြဿနာရှိနေတဲ့ တိုက်စစ်မှူး ဒိုင်ဘားလားဟာ ဆီဗီလာအသင်းနဲ့ ကစားမယ့် ယူရိုပါလိဂ်ဗိုလ်လုပွဲမှာ ပါဝင်ဖို့ မသေချာဘူးလို့ ရိုးမားအသင်းနည်းပြ မော်ရင်ဟိုက ပြောလိုက်ပါတယ်။

မော်ရင်ဟိုက”သူကစားနိုင်မယ်လို့ ကျနော်မထင်ပါဘူး။ ရိုးရိုးသားသားပြောရရင် သူ့ကို အရန်ခုံမှာထားနိုင်မယ်လို့ ကျနော်မျှော်လင့်ပါတယ်။ ဗိုလ်လုပွဲပြီးရင် စပီဇီယာနဲ့ပွဲကစားဖို့တော့ ရှိပါတယ်။ ဒါပေမယ့် ဒိုင်ဘားလား အတွက်တော့ ဒီပွဲက နောက်ဆုံးပွဲဖြစ်သွားနိုင်ပါတယ်။ သူက အရန်ခုံပေါ်မှာရှိပြီး ၁၅ မိနစ်၊ မိနစ် ၂၀ လောက်ကစားနိုင်မယ်ဆိုရင်တော့ ကျနော်ပျော်ရွှင်မိမှာပါ။ ဒိုင်ဘားလားက ဆရာဝန်တွေနဲ့အတူ ရှိနေပါသေးတယ်”လို့ သတင်းထောက်တွေကို ပြောခဲ့တာပါ။

ပြီးခဲ့တဲ့နွေရာသီအပြောင်းအရွှေ့က ရိုးမားအသင်းကို အလွတ်ပြောင်းရွှေ့ကြေးနဲ့ရောက်ရှိလာခဲ့တဲ့ ဒိုင်ဘားလားဟာ အသင်းအတွက် ၁၆ ဂိုးသွင်းယူထားပြီး ၈ ဂိုးဖန်တီးထားတာဖြစ်ပေမယ့် ပြီးခဲ့တဲ့လကုန်ပိုင်းက ရရှိခဲ့တဲ့ ခြေကျင်းဝတ်ဒဏ်ရာကြောင့် ကြံ့ခိုင်မှုအပြည့်အ၀ ပြန်လည်ရရှိခြင်းမရှိသေးပါဘူး။

ဒဏ်ရာကြောင့် ပြီးခဲ့တဲ့ ၂ ပွဲမှာ ပါဝင်နိုင်ခဲ့တဲ့ ကွင်းလယ်ကစားသမား ပယ်လီဂရီနီကတော့ ယူရိုပါလိဂ်ဗိုလ်လုပွဲမှာ ပြန်လည်ပါဝင်နိုင်မယ်လို့ နည်းပြ မော်ရင်ဟိုက ပြောခဲ့ပါတယ်။

မော်ရင်ဟိုဟာ ဥရောပပြိုင်ပွဲတွေရဲ့ ဗိုလ်လုပွဲတွေမှာ စံချိန်မှတ်တမ်းကောင်းတွေကို ပိုင်ဆိုင်ထားတာဖြစ်ပြီး ပေါ်တို၊ အင်တာမီလန်၊ ယူနိုက်တက်၊ ရိုးမားအသင်းတွေနဲ့အတူ ဗိုလ်လုပွဲ ၅ ကြိမ်ကစားထားခဲ့တာမှာ ၅ ကြိမ်စလုံး အနိုင်ရထားတာပါ။ အခုယှဉ်ပြိုင်မယ့် ယူရိုပါလိဂ်ဗိုလ်လုပွဲကတော့ မော်ရင်ဟိုရဲ့နည်းပြဘဝမှာ ၆ ကြိမ်မြောက်ယှဉ်ပြိုင်မယ့် ဥရောပဗိုလ်လုပွဲလည်း ဖြစ်ပါတယ်။

စပိန်ကလပ် ဆီဗီလာအသင်းကတော့ ယူရိုပါလိဂ်ပြိုင်ပွဲမှာ ၆ ကြိမ်ဗိုလ်စွဲထားပြီး ဒီပြိုင်ပွဲရဲ့အအောင်မြင်ဆုံးအသင်းအဖြစ် ရပ်တည်နေတာဖြစ်ပါတယ်။

Source:CNA

CNI Sport News

၂၀၂၃ ခုနှစ်၊ မေလ ၂၆

လီဗာပူးလ်အသင်းဟာ ၂၀၁၆ နောက်ပိုင်း ပထမဆုံးအကြိမ် ချန်ပီယံလိဂ် ဝင်ခွင့် မရခဲ့ပြီးနောက် ဒီအတွက် ဆင်ခြေပေးစရာ မရှိဘူးလို့ တိုက်စစ်မှူး ဆာလတ်က ပြောပါတယ်။

ဆာလတ်က “ကျနော်လုံးဝကို စိတ်ပျက်မိပါတယ်။ ဒီအတွက်လည်း ဆင်ခြေပေးစရာ မရှိပါဘူး။ လာမယ့် နှစ် ချန်ပီယံလိဂ် ဝင်ခွင့်အတွက် ကျနော်တို့ လိုအပ်တာတွေ အားလုံးကို လုပ်ခဲ့ပေမယ့် ကျရှုံးခဲ့ပါတယ်။ ကျနော်တို့ဟာ လီဗာပူးလ်ဖြစ်တဲ့အတွက် ဒီပြိုင်ပွဲဝင်ရောက် ယှဉ်ပြိုင်ခွင့်ဟာ အနိမ့်ဆုံး ရည်မှန်းချက်ပါ။ ဒီအတွက် ဝမ်းနည်းမိပြီး၊ အကောင်းမြင်တဲ့ ပို့စ်ရေးဖို့အတွက်တော့ အခုအချိန်ဟာ စောလွန်းပါတယ်”လို့ သူ့ရဲ့ ဆိုရှယ်မီဒီယာမှာ ရေးသားခဲ့တာပါ။

လီဗာပူးလ်အသင်းဟာ ယူနိုက်တက်အသင်းက ချယ်လ်ဆီးအသင်းကို ၄ ဂိုး- ၁ ဂိုးနဲ့ ဂိုးပြတ်အနိုင်ရပြီး နောက် လာမယ့်နှစ်ရာသီ ချန်ပီယံလိဂ်ဝင်ခွင့် ဆုံးရှုံးခဲ့ရပြီး ယူရိုပါလိဂ်ပြိုင်ပွဲသာ ယှဉ်ပြိုင်ရတော့မှာပါ။ ယူနိုက်တက်အသင်းဟာ မန်စီးတီး၊ အာဆင်နယ်၊ နယူးကာဆယ် အသင်းတို့နဲ့အတူ လာမယ့်နှစ်ရာသီ ချန်ပီယံလိဂ် ပြိုင်ပွဲယှဉ်ပြိုင်ခွင့် ရရှိခဲ့တာ ဖြစ်ပါတယ်။

လီဗာပူးလ်အသင်းဟာ နည်းပြကလော့ပ် လက်ထက် ချန်ပီယံလိဂ်ပြိုင်ပွဲမှာ ၂၀၁၉ က ချန်ပီယံဖြစ်ခဲ့ပြီး၊ ၂၀၁၈ နဲ့ ၂၀၂၂ ပြိုင်ပွဲတွေမှာ ဗိုလ်လုပွဲ တက်နိုင်ခဲ့ပေမယ့် ၇ နှစ်အတွင်းမှာ ပထမဆုံးအကြိမ် ချန်ပီယံ လိဂ် ပြိုင်ပွဲကို ယှဉ်ပြိုင်ခွင့် မရရှိတော့ပါဘူး။

လီဗာပူးလ်အသင်းကိုတွေ့ရစဉ်

လီဗာပူးလ်အသင်းဟာ အခုနှစ်ရာသီ အစောပိုင်းပွဲစဉ်တွေမှာ ရလဒ်တွေ မကောင်းခဲ့ပေမယ့် နောက်ပိုင်း ပွဲစဉ်တွေမှာ နိုင်ပွဲတွေနဲ့အတူ ရလဒ်တွေ ပြန်ကောင်းခဲ့ပေမယ့် ချန်ပီယံလိဂ် ဝင်ခွင့်အတွက်တော့ မလုံလောက်ခဲ့ပါဘူး။

ဆာလတ်ဟာ ဒီရာသီမှာ လီဗာပူးလ်အသင်းရဲ့ အကောင်းဆုံး ကစားသမားဖြစ်ခဲ့ပြီး ပြိုင်ပွဲစုံ ပွဲပေါင်း ၅၀ ပါဝင်ကစားကာ ဂိုး ၃၀ သွင်းယူပြီး ၁၅ ဂိုး ဖန်တီးနိုင်ခဲ့ပါတယ်။

အီဂျစ်တိုက်စစ်မှူးဟာ ယူနိုက်တက်အသင်းရဲ့ ပွဲအပြီးမှာ ပရိသတ်တွေကို တောင်းပန်ကြောင်း သူ့ရဲ့ ဆိုရှယ်မီဒီယာမှာ စာရေးသားခဲ့ပါတယ်။ အန်ဖီးလ်ကလပ်ဟာ လာမယ့်နှစ်ရာသီ ယူရိုပါလိဂ်ပြိုင်ပွဲကို ဘရိုက်တန်အသင်းနဲ့အတူ ယှဉ်ပြိုင်ရမှာပါ။

လီဗာပူးလ်အသင်းဟာ အခုနှစ်ရာသီ ပရီးမီးယားလိဂ် နောက်ဆုံးပွဲအဖြစ် တန်းဆင်းသွားခဲ့ပြီဖြစ်တဲ့ ဆောက်သမ်တန် အသင်းအိမ်ကွင်းမှာ သွားရောက်ယှဉ်ပြိုင်ရမှာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ မေလ ၂၆

ချယ်လ်ဆီးအသင်းကို အနိုင်ရပြီး လာမယ့်နှစ်ရာသီ ချန်ပီယံလိဂ်ဝင်ခွင့် ရရှိသွားပြီးနောက် ချန်ပီယံလိဂ်က ယူနိုက်တက် ရှိရမယ့် နေရာလို့ နည်းပြ အဲရစ်တန်ဟတ်က ပြောလိုက်ပါတယ်။

အဲရစ်တန်ဟတ်က “ချန်ပီယံလိဂ်က ယူနိုက်တက်အသင်း ရှိရမယ့်နေရာပါ။ ထိပ်ဆုံး ၄ သင်းထဲ ဝင်ရောက်ပြီး အဆုံးသတ်ဖို့က ကျနော်တို့ရဲ့ အဓိကရည်မှန်းချက်ပါ။ ဒီပြိုင်ပွဲက တကယ်ကို ခက်ခဲပါတယ်၊ ကောင်းမွန်တဲ့ အသင်းတွေ အများကြီးရှိသလို၊ နည်းပြကောင်းတွေနဲ့ ဘတ်ဂျက် မြင့်မားတဲ့ အသင်းတွေ အများကြီးရှိပါတယ်။ ဒီအခိုက်အတန့်က အမြင့်ဆုံး ဖြစ်ပေမယ့် ကျနော်တို့ ဒီထက်ပိုလိုချင်ပါတယ်။ စံနှုန်းတွေလည်း မြင့်တက်နေရ ပါမယ်။ မန်စီးတီးက ဘောလုံးကစားတာမှာ ထူးချွန်နေပေမယ့် ကျနော်တို့ သွားစရာလမ်းရှိပါတယ်”လို့ ပြောပါတယ်။

ယူနိုက်တက်အသင်းဟာ ပရီးမီးယားလိဂ် ပွဲကျန်အဖြစ် ကစားခဲ့တဲ့ပွဲမှာ ချယ်လ်ဆီးအသင်းကို ၄ ဂိုး- ၁ ဂိုးနဲ့ ဂိုးပြတ် အနိုင်ရခဲ့ပြီး လာမယ့်နှစ်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ခွင့် ရရှိသွားပြီ ဖြစ်ပါတယ်။

ဒီပွဲမှာ ယူနိုက်တက်အတွက် ဂိုးတွေကို ကတ်စမဲရိုး၊ မာရှယ်၊ ဘရူနိုဖာနန်ဒက်စ်နဲ့ ရက်ရှ်ဖို့ဒ်တို့က သွင်းယူခဲ့ပြီး ချယ်လ်ဆီးအတွက် ချေပဂိုးကို ဂျာအိုဖီးလစ်က သွင်းယူခဲ့တာပါ။

အဲရစ်တန်ဟတ်ကိုတွေ့ရစဉ်

ချယ်လ်ဆီးအသင်းကတော့ ယာယီနည်းပြ လမ်းပတ် လက်ထက်မှာလည်း ရလဒ်တွေ ဆက်တိုက် ဆိုးနေခဲ့ပြီး အမှတ်ပေးဇယား အဆင့် ၁၂ နေရာမှာ ရပ်တည်ကာ အသင်းသမိုင်းတစ်လျှောက် အဆိုးရွားဆုံး မှတ်တမ်းတွေကို ပိုင်ဆိုင်ခဲ့တာ ဖြစ်ပါတယ်။
လမ်းပတ်ကတော့ ယူနိုက်တက်အသင်းမှာ အဲရစ်တန်ဟတ် လုပ်ဆောင်ခဲ့တဲ့ အရာတွေကို ချီးကျူးမှု ပြုလုပ်သွားခဲ့ပါတယ်။

လမ်းပတ်က “တန်ဟတ် ပထမဆုံး ရောက်လာတဲ့အချိန်မှာ လူတွေက စည်းကမ်းတွေ၊ ဒဏ်ကြေးတွေ အကြောင်း နဲ့ ပြီးတော့ ရော်နယ်ဒိုရဲ့ အခြေအနေတွေ၊ စံသတ်မှတ်ချက်တွေအကြောင်း ပြောခဲ့တာကို မှတ်မိပါတယ်။ အဲဒီ အရာတွေက ကလပ်အသင်းမှာ အပေါင်းလက္ခဏာဆောင်တဲ့ အပြောင်းအလဲတွေ ရှိခဲ့ပါတယ်”လို့ ပြောခဲ့ပါတယ်။

အခုနှစ်ရာသီ ပရီးမီးယားလိဂ် နောက်ဆုံးပွဲစဉ်အဖြစ် ယူနိုက်တက်အသင်းက ဖူလ်ဟမ်၊ ချယ်လ်ဆီးအသင်းက နယူးကာဆယ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မေလ ၂၆

စပါးအသင်းက နည်းပြသစ်အဖြစ် ခန့်အပ်ဖို့ ချဉ်းကပ်နေပေမယ့် အာနီစလော့က သူဟာ ဖီယင်နုအသင်းမှာပဲ နည်းပြအဖြစ် ဆက်ရှိမယ်လို့ အတည်ပြု လိုက်ပါတယ်။

အာနီစလော့က “ကျနော့်ကို တခြားကလပ်အသင်းတွေက စိတ်ဝင်စားနေတာ အများကြီး ကြားခဲ့ရပါတယ်။ ဒီလို စိတ်ဝင်စားမှုတွေအတွက် ကျေးဇူးတင်ပါတယ်။ ကျနော့်ရဲ့ ဆန္ဒကတော့ ဖီယင်နုနဲ့အတူ ဆက်ရှိချင်ပြီး ပြီးခဲ့တဲ့ ၂ ရာသီက ချမှတ်ထားတဲ့ အခြေခံ အုတ်မြစ်တွေပေါ်မှာ အသင်းကို ဆက်လက် တည်ဆောက်သွားချင်ပါတယ်။ စပါး အသင်းထံ ပြောင်းမယ့် အကြောင်းကို ဆွေးနွေးမှု မရှိခဲ့သလို ဆွေးနွေးခဲ့တဲ့ အရာကတော့ စာချုပ်သက်တမ်းတိုးဖို့ အကြောင်းသာ သီးသန့်ဖြစ်ပါတယ်။ ဖီယင်နုနဲ့ ဆွေးနွေးမှုအားလုံးက ဒါကို ရည်ရွယ်ပါတယ်။ ဖီယင်နုနဲ့အတူ ရာသီ သစ်ကို စောင့်မျှော်နေပါတယ်”လို့ Algemeen Dagblad ကို ပြောခဲ့တာပါ။

စပါးအသင်းဟာ နည်းပြ ကွန်တီကို ထုတ်ပယ်ပြီးကတည်းက နည်းပြသစ် ရှာဖွေနေတာဖြစ်ပြီး ရာသီအကုန်ထိ ရိုင်ယန်မေဆင်က ယာယီနည်းပြအဖြစ် တာဝန်ယူ ကိုင်တွယ်နေတာ ဖြစ်ပါတယ်။

လန်ဒန်ကလပ်ဟာ နာဂျယ်လ် စမန်း၊ လူးဝစ်အင်းနရစ်တို့နဲ့လည်း ချိတ်ဆက်မှုတွေရှိခဲ့ပြီး ဖီယင်နုကို ဒတ်ချ် အမှတ်ပေး ဖလားရအောင် ယူပေးနိုင်ခဲ့တဲ့ အာနီစလော့ဟာ နည်းပြသစ် ဖြစ်လာဖို့ ပိုပြီးရေပန်းစား လာခဲ့တာပါ။

မကြာသေးခင်က အာနီစလော့ဟာ စပါးအသင်းထံ ပြောင်းရွှေ့ဖို့ သဘောတူညီမှု ရခဲ့ပြီလို့ သတင်းတွေမှာ ဖော်ပြ ထားပါတယ်။

အာနီစလော့ကို တွေ့ရစဉ်

ဒါပေမယ့် အာနီစလော့ဟာ ဖီယင်နုမှာပဲ ဆက်ရှိမယ်လို့ အတည်ပြုခဲ့ပြီး စပါးရဲ့ မျှော်လင့်ချက်တွေကို ပျက်ပြယ် စေခဲ့တာပါ။ ဒတ်ချ်ကလပ်ကတော့ အာနီစလော့ကို တစ်ရာသီ ပေါင် ၂.၅ သန်း ဝန်းကျင် တန်ကြေးနဲ့ စာချုပ်သစ် ကမ်းလှမ်းဖို့ လုပ်ဆောင်နေတာ ဖြစ်ပါတယ်။

ဖီယင်နုဟာ လာမယ့်ရာသီမှာ ချန်ပီယံလိဂ်ပြိုင်ပွဲ ယှဉ်ပြိုင်ခွင့် ရမှာဖြစ်တဲ့အတွက် ဒီအချက်ကလည်း အာနီစလော့ အသင်းမှာ ဆက်ရှိတဲ့ ဆုံးဖြတ်ချက် ဖြစ်နိုင်ပါတယ်။

စပါးအသင်းဟာ လက်ရှိအချိန်မှာ ရာသီနောက်ဆုံး ပွဲစဉ်ကို အနိုင်ကစားပြီး လာမယ့်ရာသီ ယူရိုပါကွန်းဖရန့်စ်လိဂ် ပြိုင်ပွဲယှဉ်ပြိုင်နိုင်ဖို့ ပစ်မှတ်ထားနေတာ ဖြစ်ပါတယ်။

လန်ဒန်ကလပ်ဟာ ရာသီကုန်ချိန်မှာတော့ နည်းပြသစ် ရှာဖွေမယ့် လုပ်ငန်းစဉ်ကို အမြန်ဆုံး လုပ်ဆောင်မှာ ဖြစ်တယ်လို့ သတင်းမှာ ဖော်ပြထားပါတယ်။

Source: Metro

CNI Sport News

၂၀၂၃ ခုနှစ်၊ မေလ ၂၆

ဘာစီလိုနာနဲ့ စပိန်ကွင်းလယ်လူဟောင်း အင်နီယေစတာဟာ ဂျပန်ကလ် ဗစ်ဆဲလ်ကိုဘီအသင်းမှာ ၅ နှစ်ကြာ ကစားပြီးနောက် ထွက်ခွာတော့မှာ ဖြစ်ပါတယ်။

အသက် ၃၉ နှစ်အရွယ်ရှိ အင်နီယေစတာဟာ အခုနှစ် ဂျေလိဂ်ရာသီရဲ့ ရာသီဝက်ဖြစ်တဲ့ ဇူလိုင် ၁ ရက်မှာ ဗစ်ဆဲလ်ကိုဘီ အသင်းအတွက် နောက်ဆုံးပွဲစဉ်အဖြစ် ပါဝင်ကစားသွားမှာပါ။

အင်နီယေစတာဟာ အခုနှစ်ရာသီ ဂျေလိဂ် အမှတ်ပေးဇယားကို ဦးဆောင်နေတဲ့ ဗစ်ဆဲလ်ကိုဘီ အသင်းအတွက် လူစားဝင် ကစားသမားအဖြစ် ၃ ပွဲ ပါဝင်ကစားထားပြီး ကစားသမားဘဝကနေ ချက်ချင်းအနားယူဖို့ အစီအစဉ် မရှိသေးတာ ဖြစ်ပါတယ်။

အင်နီယေစတာက “ကျနော့်ရဲ့ အချိန်တွေကို ဒီမှာကောင်းမွန်စွာနဲ့ ပြီးဆုံးအောင် လုပ်ချင်ပြီး ကျနော့်အတွက် ဘယ်လို ရွေးချယ်စရာတွေ ရှိနိုင်လဲဆိုတာကို ကြည့်ချင်ပါတယ်။ ကစားသမားဘဝကနေ အနားမယူသေးဘဲ ဆက်ကစားချင်ပြီး နောက်ဆုံးမှာ အနားယူနိုင်တဲ့ နေရာကို ရှာဖွေချင်ပါတယ်”လို့ ပြောခဲ့ပါတယ်။

အင်နီယေစတာကို တွေ့ရစဉ်

ဘာစီလိုနာကနေ ထွက်ခွာပြီးနောက် ၂၀၁၈ မှာ ဂျပန်ကလပ်ကို ပြောင်းရွှေ့လာခဲ့တဲ့ ဗစ်ဆဲလ်ကိုဘီဟာ အသင်း အတွက် ပွဲပေါင်း ၁၃၃ ပွဲ ပါဝင်ကစားခဲ့ပြီး ပြည်တွင်း ဖလားတွေဖြစ်တဲ့ အင်ပါယာဖလားနဲ့ စူပါဖလားတို့ကို ရယူ နိုင်ခဲ့ပါတယ်။

အင်နီယေစတာဟာ ဘာစီလိုနာအသင်းမှာ ကစားသမားဘဝကို ၂၂ နှစ်ကြာ ဖြတ်သန်းခဲ့ပြီး ပွဲပေါင်း ၆၇၄ ပွဲ ပါဝင် ကစားခဲ့ကာ ဆုဖလားပေါင်း ၃၂ လုံး ရယူနိုင်ခဲ့ပါတယ်။

အင်နီယေစတာက “ဗစ်ဆဲလ်ကိုဘီကနေ ထွက်ခွာတာဟာ ကျနော့် ကစားသမားဘဝရဲ့ အခက်အခဲဆုံး ဆုံးဖြတ် ချက်တွေထဲက တစ်ခုဖြစ်ပါတယ်။ ကျနော်ဒီမှာ အနားယူမယ်လို့ အမြဲတွေးခဲ့ပေမယ့် လိုချင်တဲ့အတိုင်း ဖြစ်မလာ ခဲ့ပါဘူး။ ပြီးခဲ့တဲ့လ အနည်းငယ်အတွင်းမှာ ကျနော်ဟာ အသင်းကို ပံ့ပိုးကူညီနိုင်ဖို့အတွက် ပြင်းပြင်းထန်ထန် လေ့ကျင့်ခဲ့ပါတယ်။ ဒါပေမယ့် နည်းပြမှာ မတူညီတဲ့ ဦးစားပေးတွေ ရှိတယ်လို့ ခံစားမိလာကြောင်း” ပြောခဲ့ပါ တယ်။

Source: BBC

CNI Sport News

၂၀၂၃ ခုနှစ်၊ မေလ ၂၅

ဘရိုက်တန်အသင်းဟာ မန်စီးတီးအသင်းနဲ့ ၁ ဂိုးစီသရေကျပြီး လာမယ့်နှစ်ရာသီ ယူရိုပါလိဂ် ဝင်ခွင့်ရသွားခဲ့ ပြီးနောက် နည်းပြ ဒီဇာဘီက အသင်းဟာ ဥရောပပြိုင်ပွဲမှာ ကစားဖို့ ထိုက်တန်တယ်လို့ ပြောခဲ့ပါတယ်။

ဒီဇာဘီက “ဒီကို ပထမဆုံးအကြိမ်ရောက်လာခဲ့ချိန်မှာ ပစ်မှတ်တွေအကြောင်းကို ကျနော်မတွေးခဲ့ပါဘူး။ ဖေဖော်ဝါရီလမှာတော့ အမှတ်ပေးဇယား၊ နောက်ဆုံးရလဒ်တွေနဲ့ ရည်မှန်းချက်တွေအကြောင်းကို စတင်ပြီး တွေးမိခဲ့တာပါ။ ထူးချွန်တဲ့ ကစားသမားအစုအဖွဲ့ကို တွေ့ခဲ့ရတဲ့အတွက် ကျနော်ကံကောင်းပါတယ်။ ကျနော်က သာမန်နည်းပြကောင်းတစ်ဦးပါပဲ။ မန်စီးတီးနဲ့ ကစားရတာတော့ အမြဲတမ်းခက်ခဲမယ်ဆိုတာ ကျနော်သိပါတယ်။ ကျနော်တို့အလွန်ကောင်းမွန်စွာကစားခဲ့ပြီး အမှတ်ရယူနိုင်ဖို့ ထိုက်တန်ခဲ့ပါတယ်။ ကျနော်တို့ ဥရောပမှာ ကစား ဖို့လည်း ထိုက်တန်ပါတယ်”လို့ ပြောခဲ့တာပါ။

ဘရိုက်တန်အသင်းဟာ ဒီပွဲမှာ သရေကျခဲ့တဲ့အတွက် ကလပ်အသင်းရဲ့ နှစ်ပေါင်း ၁၂၂ နှစ်သမိုင်းကြောင်းမှာ ပထမဆုံးအကြိမ် ယူရိုပါလိဂ်ယှဉ်ပြိုင်ခွင့် ရရှိခဲ့တာဖြစ်ပါတယ်။ ဘရိုက်တန်အသင်းဟာ ဂရေဟမ်ပေါ်တာနေရာမှာ အစားထိုးဝင်ရောက်ခဲ့တဲ့ နည်းပြ ဒီဇာဘီလက်ထက်မှာ အသင်းကြီးတွေကို အနိုင်ယူပြီး ရလဒ်ကောင်းတွေ ရရှိခဲ့ ကာ မန်စီးတီးအသင်းနဲ့ ပွဲမှာဆိုရင် နိုင်ပွဲဆက်နေတဲ့ ပရီးမီးယားလိဂ်ချန်ပီယံရဲ့ နိုင်ပွဲဆက်မှုကို ရပ်တန့်နိုင်ခဲ့ပါ တယ်။

ဘရိုက်တန်အသင်းတိုက်စစ်မှူး ဝဲလ်ဘတ်က အသင်းဟာ နည်းပြ အပြောင်းအလဲတွေကြောင့် အခက်အခဲ တွေရှိခဲ့ပေမယ့် အားလုံးက အကောင်းဆုံးလုပ်ဆောင်နိုင်ခဲ့လို့ ယူရိုပါလိဂ် ဝင်ခွင့်ရရှိခဲ့တာလို့ ပြောခဲ့တာပါ။
ဝဲလ်ဘတ်က “ဒါက ခက်ခဲပါတယ်။ နည်းပြသစ်ရောက်လာပြီး အပြောင်းအလဲတွေဖြစ်ခဲ့ပေမယ့် လူတိုင်းက အကောင်းဆုံးပုံစံနဲ့ လုပ်ဆောင်နိုင်ခဲ့ပါတယ်။ ယူရိုပါလိဂ်ကစားရမှာက အံ့မခန်းပါပဲ။ အသင်းဟာ တိုးတက်ပြီးရင်း တိုးတက်လာပြီး လာမယ့်ရာသီ ယူရိုပါလိဂ်ပြိုင်ပွဲကို ကစားဖို့အတွက် ကျနော်တို့ မစောင့်ဆိုင်းနိုင်တော့ဘူး”လို့ ပြောခဲ့တာဖြစ်ပါတယ်။

ဘရိုက်တန်အသင်းဟာ ပရီးမီးယားလိဂ်ပွဲစဉ် ၃၇ ကစားအပြီးမှာ ရမှတ် ၆၂ မှတ်နဲ့ အဆင့် ၇ နေရာက အက်စတွန် ဗီလာအသင်းကို ၄ မှတ်အသာရကာ အဆင့် ၆ နေရာနဲ့ ရာသီအဆုံးသတ်တော့မှာပါ။ ဘရိုက်တန်အသင်းဟာ ပရီးမီးယားလိဂ် နောက်ဆုံးပွဲစဉ်အဖြစ် အက်စတွန်ဗီလာအသင်းနဲ့ အဝေးကွင်းပွဲစဉ် ယှဉ်ပြိုင်ရမှာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ မေလ ၂၅

ချယ်လ်ဆီးအသင်းရဲ့ အခုနှစ်ရာသီ ရုန်းကန်မှုတွေမှာ ပိုက်ဆံရှိတိုင်း အလုပ်မဖြစ်ဘူးဆိုတာကို ပြသနေခဲ့တယ်လို့ ယူနိုက်တက်အသင်းနည်းပြ အဲရစ်တန်ဟတ်က ပြောပါတယ်။

ပိုင်ရှင်သစ် အပြောင်းအလဲက ဘယ်လို အခက်အခဲတွေ ဖြစ်လာနိုင်လဲဆိုတာမှာ ချယ်လ်ဆီးက ဥပမာလားလို့ မေးမြန်း ခံခဲ့ရတာမှာ အဲရစ်တန်ဟတ်က “လုံးဝ ဟုတ်ပါတယ်။ နောက်ကွယ်မှာ ဗျူဟာမရှိပါဘူး၊ ဒါမှမဟုတ် မှန်ကန်တဲ့ ဗျူဟာမရှိရင်တော့ ပိုက်ဆံရှိတိုင်း အလုပ်မဖြစ်ပါဘူး။ ဒီအခိုက်အတန့်မှာ ကောင်းမွန်တဲ့ ကစားသမား တွေ အများကြီး၊ နည်းပြကောင်းတွေ အများကြီးနဲ့ ပိုက်ဆံတွေအများကြီးက ဗြိတိန်မှာ ရှိပါတယ်။ မှန်ကန်တဲ့ အရာတွေကို လုပ်ရပါမယ်။ ခင်ဗျားမှာ ပိုက်ဆံရှိပေမယ့် ဒါကို စမတ်ကျကျနဲ့ အသုံးပြုရပါမယ်”လို့ ဖြေခဲ့တာပါ။

ချယ်လ်ဆီးအသင်းကို တော့ဒ်ဘိုလီ ဦးဆောင်တဲ့ အစုအဖွဲ့က ပေါင် ၄ ဘီလီယံကျော်နဲ့ လွှဲပြောင်း ရယူပြီးနောက် ပထမဆုံး ရာသီဖြစ်တဲ့ အခုရာသီ အပြောင်းအရွှေ့ ၂ ခုမှာ ပေါင်သန်း ၆၀၀ နီးပါးသုံးစွဲပြီး ကစားသမားသစ်တွေကို ခေါ်ယူခဲ့တာ ဖြစ်ပါတယ်။

ဒါပေမယ့် အသင်းဟာ ရလဒ်တွေဆိုးပြီး နည်းပြ အပြောင်းအလဲတွေ ပြုလုပ်ခဲ့ရကာ အခုနှစ်ရာသီ ပရီးမီးယားလိဂ် ပြိုင်ပွဲမှာ အဆင့် ၁၀ ပြင်ပမှာ ရပ်တည်ပြီး ရာသီအဆုံးသတ်ဖို့ သေချာခဲ့ပါတယ်။

ယူနိုက်တက်အသင်းကလည်း လက်ရှိအချိန်မှာ အသင်းပိုင်ရှင် အပြောင်းအလဲဖြစ်ဖို့ ရှိနေပြီး လက်ရှိပိုင်ရှင် ဂလေဇာ မိသားစုက အသင်းကို ရောင်းချဖို့ လုပ်ဆောင်နေတာ ဖြစ်ပါတယ်။

ချယ်လ်ဆီးအသင်းကို တွေ့ရစဉ်

မန်ချက်စတာကလပ်ကို ဝယ်ယူဖို့ ကာတာဘဏ် လုပ်ငန်းရှင် ရှိတ်ဂျာဆင်မ်နဲ့ ဗြိတိန်ဘီလျံနာ ရက်ကလစ်ဖ်တို့က အပြိုင်အဆိုင် လေလံတင်သွင်းပြီး ကြိုးစားနေကြပါတယ်။

အဲဒါကြောင့် နည်းပြ အဲရစ်တန်ဟတ်က ပိုင်ရှင် အပြောင်းအလဲ ဖြစ်လာခဲ့မယ်ဆိုရင် အပြောင်းအရွှေ့ကို မှန်မှန် ကန်ကန်နဲ့ ချဉ်းကပ်ဖို့ လုပ်ဆောင်နေတာ ဖြစ်ပါတယ်။

ယူနိုက်တက်အသင်းကတော့ နည်းပြ အဲရစ်တန်ဟတ်ရဲ့ ပထမဆုံး ရာသီမှာတင် ကာရာဘောင်းဖလား ရယူပြီး ၆ နှစ်ကြာ ဆုဖလားလက်မဲ့ ဖြစ်တာကို အဆုံးသတ်နိုင်ခဲ့သလို ပရီးမီးယားလိဂ် လက်ကျန် ၂ ပွဲမှာလည်း ရမှတ် ၁ မှတ်ရယူနိုင်တာနဲ့ လာမယ့်နှစ်ရာသီ ချန်ပီယံလိဂ် ဝင်ခွင့်ရရှိမှာပါ။

ဒါအပြင် အက်ဖ်အေဖလား ဗိုလ်လုပွဲအဖြစ် မန်စီးတီးအသင်းနဲ့ ယှဉ်ပြိုင်ရမှာဖြစ်လို့ ဒီရာသီ ဆုဖလား ၂ လုံး ရယူ နိုင်ဖို့ မျှော်လင့်နေတာ ဖြစ်ပါတယ်။

အဲရစ်တန်ဟတ်က “ကျနော်တို့ဟာ လမ်းကြောင်း မှန်ပေါ် ရောက်နေတယ်လို့ ထင်ပေမယ့် ဒီရာသီကနေ သင်ယူ စရာတွေ ရှိပါတယ်။ ရာသီအပြီးမှာ ဒါတွေကို အကဲဖြတ်ကာ အနာဂတ်အတွက် မှန်ကန်တဲ့ အရာတွေ ကောက် ချက်ချရမှာ ဖြစ်ပါတယ်။ ကျနော်တို့ဟာ အကောင်းဆုံး ယှဉ်ပြိုင်ပြီး ချန်ပီယံလိဂ်မှာ ပါဝင်ချင်ပါတယ်။ ပရီးမီးယား လိဂ်မှာ ထိပ်ဆုံ ၄ သင်းထဲ ဝင်ရောက်နိုင်ဖို့ မလွယ်ပါဘူး။ ပထမဆုံးအနေနဲ့ ကျနော်တို့ဟာ ချယ်လ်ဆီးနဲ့ပွဲမှာ အနိုင်ကစားပြီး အလုပ်ကို ပြီးမြောက်အောင် လုပ်ရပါမယ်”လို့ ပြောခဲ့ပါတယ်။

Source: Goal