CNI Sport News

၂၀၂၃ ခုနှစ်၊ ဇန်နဝါရီ ၁၀

ရော်နယ်ဒိုဟာ အယ်လ်နာဆာ အသင်းကနေရမယ့် ယူရိုသန်း ၂၀၀ အပြင် ဆော်ဒီနိုင်ငံရဲ့ ကမ္ဘာ့ဖလား ပူးတွဲ အိမ်ရှင်အဖြစ် ရရှိအောင် လုပ်ဆောင်တာမှာ ပါဝင်ဖို့အတွက် ယူရိုသန်း ၂၀၀ ထပ်မံ ရရှိမှာဖြစ်တယ်လို့ ကလပ်နဲ့ နီးစပ်သူက AFP သတင်းဌာနကို ဇန်နဝါရီ ၉ ရက်က ပြောခဲ့ပါတယ်။

“ရော်နယ်ဒိုဟာ စာချုပ်အတွက် ယူရိုသန်း ၂၀၀ ရရှိမှာ ဖြစ်သလို၊ ဆော်ဒီနိုင်ငံရဲ့ ၂၀၃၀ ကမ္ဘာ့ဖလား အိမ်ရှင်အဖြစ် လုပ်ဆောင်မှုမှာ သံတမန်အဖြစ် နောက်ထပ် ယူရိုသန်း ၂၀၀ ရရှိမှာ”လို့ အမည်မဖော်လိုတဲ့ ကလပ်နဲ့ နီးစပ်သူက ပြောခဲ့တာပါ။

ရော်နယ်ဒိုဟာ အယ်လ်နာဆာအသင်းရဲ့ ကစားသမားသစ်အဖြစ် မကြာသေးခင်က မိတ်ဆက်ထားတာဖြစ်ပြီး သူဟာ ဆော်ဒီနိုင်ငံ ဒါမှမဟုတ် အခြားပင်လယ်ကွေ့ နိုင်ငံမှာရှိတဲ့ အသင်းတစ်သင်းက ခေါ်ယူတဲ့ အကျော်ကြား ဆုံး ကစားသမားဖြစ်ခဲ့ပါတယ်။

ရေနံကြွယ်ဝတဲ့ ဆော်ဒီနိုင်ငံဟာ အီဂျစ်၊ ဂရိတို့နဲ့အတူ ၂၀၃၀ ကမ္ဘာ့ဖလားပြိုင်ပွဲကို ပူးတွဲအိမ်ရှင်အဖြစ် ကျင်းပဖို့ အခုကတည်းက ပြင်ဆင်မှုတွေ ပြုလုပ်နေတာပါ။

ရော်နယ်ဒိုနဲ့ သူ၏ မိသားစုကိုတွေ့ရစဉ်

အဲ့ဒါကြောင့် ရော်နယ်ဒိုကို သံတမန်အခန်းကဏ္ဍကနေ ထားပြီး အိမ်ရှင်အဖြစ် ကျင်းပခွင့် ရနိုင်အောင် ငွေကြေး အများအပြား ပေးမှာဖြစ်တာကြောင့် ပေါ်တူဂီကစားသမားဟာ ဆော်ဒီနိုင်ငံမှာ ဝင်ငွေယူရိုသန်း ၄၀၀ ရရှိမှာ ဖြစ်ပါတယ်။

ကာတာနိုင်ငံဟာ ကမ္ဘာ့ဖလားပြိုင်ပွဲကို ပထမဆုံးအကြိမ် ကျင်းပနိုင်ခဲ့တဲ့ အာရပ်နိုင်ငံဖြစ်ပြီးနောက် ဆော်ဒီ နိုင်ငံကလည်း ကမ္ဘာ့ဖလား ကျင်းပခွင့်ရဖို့ မျှော်လင့်နေတာပါ။

ရော်နယ်ဒိုကတော့ လက်ရှိအချိန်ထိ အက်ဖ်အေရဲ့ ပွဲပယ်ပြစ်ဒဏ်ကြောင့် အယ်လ်နာဆာ အသင်းအတွက် ပွဲမထွက်နိုင်သေးပေမယ့် ပီအက်စ်ဂျီနဲ့ ကစားမယ့် ခြေစမ်းပွဲမှာတော့ သူ့ရဲ့ ဆော်ဒီပွဲဦးထွက်အဖြစ် ပါဝင်မှာ ဖြစ်ပါတယ်။

အယ်လ်နာဆာနဲ့ အယ်လ်ဟီလယ်တို့ ပေါင်းစပ်ထားတဲ့ အသင်းဟာ ဇန်နဝါရီ ၁၉ ရက်မှာ ခြေစမ်းပွဲအဖြစ် ယှဉ်ပြိုင်ဖို့ စီစဉ်ထားတာပါ။

ရော်နယ်ဒိုရဲ့ အယ်လ်နာဆာ ပွဲဦးထွက်ကတော့ ဇန်နဝါရီ ၂၂ ရက်မှာ ကစားမယ့် အက်တီဖတ်နဲ့ ပွဲစဉ်ဖြစ်တယ်လို့ သိရပါတယ်။

Source:CNA

CNI Sport News

၂၀၂၃ ခုနှစ်၊ ဇန်နဝါရီ ၉

ပွဲပယ်ပြစ်ဒဏ်ကြောင့် အသင်းသစ် အယ်လ်နာဆာအတွက် ပွဲထွက်ခွင့် မရသေးတဲ့ ရော်နယ်ဒိုဟာ ပီအက်စ်ဂျီ အသင်းနဲ့ ခြေစမ်းပွဲမှာ ပါဝင်ကစားနိုင်တယ်လို့ နည်းပြဖြစ်သူ ရုဒီဂါစီယာက ပြောလိုက်ပါတယ်။

ရူဒီဂါစီယာက “ ရော်နယ်ဒို ပွဲဦးထွက်က အယ်လ်နာဆာဂျာစီနဲ့ မဟုတ်ပါဘူး။ အယ်လ်ဟီလယ်နဲ့ အယ်လ်နာဆာ ရောထားတဲ့ အသင်းနဲ့ ဖြစ်နိုင်ပါတယ်။ နည်းပြတစ်ဦး အနေနဲ့ဆိုရင် ဒီပွဲကို ကျနော်ပျော်ရွှင်နိုင်မှာ မဟုတ်ပါဘူး။ ဒါပေမယ့် တိုးတက်မှု၊ ပီအက်စ်ဂျီကို မြင်ဖို့နဲ့ သူတို့အသင်း ကစားသမားကောင်းတွေကို မြင်တွေ့ရတာက တကယ်ကို ကောင်းပါတယ်။ ဒါပေမယ့် နောက် ၃ ရက် အကြာမှာတော့ ချန်ပီယံရှစ်ပွဲစဉ်ကို ကျနော်တို့ ရောက်နေပါပြီ”လို့ L'Equipe ကို ပြောခဲ့တာပါ။

ရော်နယ်ဒိုဟာ ယူနိုက်တက်မှာ ရှိချိန်က ပွဲပယ်ခံရတဲ့ ပြစ်ဒဏ်ကြောင့် အယ်လ်နာဆာအသင်းရဲ့ ပွဲစဉ် ၂ ပွဲကို ပါဝင်နိုင်မှာ မဟုတ်ပါဘူး။ အဲ့ဒါကြောင့် ပေါ်တူဂီအသင်းခေါင်းဆောင်ဟာ အယ်လ်ရှာဘတ်နဲ့ ပွဲစဉ်မှာလည်း ပါဝင်နိုင်မှာ မဟုတ်ဘဲ ဇန်နဝါရီ ၂၂ ရက်မှာ ကစားမယ့် အက်တီဖတ်နဲ့ ပွဲစဉ်မှ အယ်လ်နာဆာအတွက် ပွဲထွက်နိုင်မှာ ဖြစ်ပါတယ်။

 ရော်နယ်ဒိုကိုတွေ့ရစဉ်

အယ်လ်နာဆာ အသင်းနည်းပြ ရူဒီဂါစီယာက ဆော်ဒီကို ရော်နယ်ဒို ရောက်လာတာဟာ ပီလီ နယူးယော့ခ် ကော့စ်မို့စ်ကို ရောက်ရှိလာတာနဲ့ ဆင်တူပြီး လူသိနည်းတဲ့ ဆော်ဒီကလပ်ကို မီးမောင်းထိုးပြလိုက်တာလို့ ပြောခဲ့တာပါ၊

ရူဒီဂါစီယာက “ရော်နယ်ဒိုဟာ မကြာသေးခင်လတွေမှာ ယူနိုက်တက်အသင်း၊ လက်ရွေးစင်အသင်းတို့နဲ့ သီးသန့်ရှိနေတဲ့ အချိန်တွေဟာ လွယ်ကူခဲ့တာတော့ မဟုတ်ပါဘူး။ သူဟာ ပြန်ကစားနေရတာကို ပျော်ရွှင် နေမယ်ဆိုရင် အောင်မြင်မှု ပန်းတိုင်ကို ရောက်ရှိမယ့် အရာတွေ ဖြစ်တယ်”လို့ ပြောခဲ့တာ ဖြစ်ပါတယ်။

အယ်လ်နာဆာ အသင်းဟာ အစောပိုင်းက နိုင်ငံခြားသား ကစားသမား အရေအတွက် ပြည့်နေလို့ ရော်နယ်ဒိုကို အသင်းလူစာရင်းထဲ မထည့်သွင်းနိုင်ခဲ့ပေမယ့် အခုအချိန်မှာတော့ တိုက်စစ်မှူး အဘူဘာကာရဲ့ စာချုပ်ကို ဖျက်သိမ်းခဲ့လို့ ထည့်သွင်းလို့ ရပြီလို့ သိရပါတယ်။

Source: CNA

CNI Sport News

၂၀၂၃ ခုနှစ်၊ ဇန်နဝါရီ ၉

ကစားသမားဘဝကို ရှုံးပွဲမရှိဖြတ်သန်ခဲ့ပြီး နည်းပြအဖြစ် ဆောင်ရွက်နေတဲ့ ရုရှားဖိုက်တာ ခါဘစ်နာမဂိုမက်ဒေါ့ဗ် ဟာ MMA လောကကနေ ထွက်ခွာတော့မှာဖြစ်ပါတယ်။

၂၀၂၀ က ကစားသမားဘ၀ နောက်ဆုံးပွဲစဉ်အဖြစ် ဂျတ်စတင်ဂေချီကို အနိုင်ရပြီးနောက် ခါဘစ်ဟာ Eagle FC Fight ဆိုပြီး တည်ထောင်ကာ အောင်မြင်တဲ့ နည်းပြတစ်ဦးအဖြစ် ဆက်လက်ရပ်တည်နိုင်ခဲ့တာပါ။ဒါပေမယ့် လိုက်ဝိတ်ချန်ပီယံဟောင်းဟာ MMA ကနေ ထွက်ခွာဖို့ ဆုံးဖြတ်ထားပြီး တိုက်ခိုက်ရတဲ့ အားကစားနည်းနဲ့ ဝေးကွာတဲ့ စီးပွားရေးလုပ်နိုင်ဖို့ ရည်မှန်းထားတာဖြစ်ပါတယ်။

ခါဘစ်ရဲ့ဇာတိ ရုရှားကနေ ထွက်ပေါ်လာတဲ့ သတင်းတွေအရ ရုရှားဖိုက်တာဟာ ထွက်ခွာတော့မယ်ဆိုတာကို အတည်ပြုခဲ့တယ်လို့ ဖော်ပြထားတာပါ။ခါဘစ်ဟာ ဖော်လိုဝါ ၃၄ သန်းရှိတဲ့ သူ့ရဲ့အင်စတာဂရမ်မှာ သူတို့ရဲ့ အသင်းလိုက်ပုံကို တင်ကာ ဒီနှစ်ကို နိဂုံးချုပ်လိုက်တယ်လို့ ရေးသားခဲ့တာဖြစ်ပါတယ်။

ခါဘစ်က “ဒီနှစ်ဟာ အလုပ်အရမ်းများပြီး အောင်မြင်တဲ့နှစ်ဖြစ်မယ်ဆိုတာ သေချာပါတယ်။ညီအစ်ကိုတို့ ကိုယ့်ကိုကိုယ်ဂရုစိုက်ပါ။ကျနော့်ရဲ့ဆုံးဖြတ်ချက်က အကောင်းဆုံးအတွက်ပဲလို့ မျှော်လင့်ပါတယ်။ ကျေးဇူးတင် ပါတယ်။ခင်ဗျားတို့က ကျနော်အားကစားလောကမှာ အောင်မြင်ရတဲ့ အဓိကအကြောင်းရင်းပါပဲ”လို့ ရေးသား ထားတာပါ။

ခါဘစ်ဟာ နည်းပြဘဝမှာ မာခါချက်ဗ်နဲ့ သူ့ရဲ့ ညီဝမ်းကွဲ အူစမန်နာမဂိုမက်ဒေါ့ဗ်တို့ကို ချန်ပီယံဖြစ်အောင် လုပ်နိုင်ခဲ့တာအပါအဝင် ၁၉ ပွဲနိုင်ပြီး ၂ ပွဲသာ ရှံးနိမ့်ခဲ့တာဖြစ်ပါတယ်။ခါဘစ်ဟာ ကစားသမားဘဝမှာလည်း ပွဲပေါင်း ၂၉ ပွဲထိုးသတ်ခဲ့တာမှာ ၂၉ ပွဲစလုံးအနိုင်ရခဲ့တာဖြစ်ပြီး ဒီထဲမှာ အိုင်ယာလန်ဖိုက်တာ မက်ဂရီဂေါလည်း ပါဝင်ခဲ့တာဖြစ်ပါတယ်။

ဒါပေမယ့် ခါဘစ်ဟာ ဖခင်ဖြစ်သူ ကွယ်လွန်ပြီးနောက်မှာ ကစားသမားဘဝကနေ အနားယူကြောင်း ကြေညာ ခဲ့တာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဇန်နဝါရီ ၉

ရိုးမားအသင်းကို ကိုင်တွယ်နေတဲ့ မော်ရင်ဟိုဟာ ဘရာဇီးလ် လက်ရွေးစင်အသင်းရဲ့ နည်းပြသစ် ဖြစ်လာနိုင်တယ် လို့ ပေါ်တိုအသင်း ကြယ်ပွင့်ကစားသမားဟောင်း ကားလို့စ်အယ်လ်ဘာတိုက ပြောလိုက်ပါတယ်။

ကားလို့စ်အယ်လ်ဘာတိုက “မော်ရင်ဟိုက ဘရာဇီးလ်အသင်းရဲ့ နည်းပြ ဖြစ်လာနိုင်တဲ့သူပါ။ သတင်း အချက် အလက်တွေက ဘယ်ကနေ လာတယ်ဆိုတာ အရေးမကြီးပါဘူး။ ခင်ဗျားတို့ကို ကျနော် သတင်း အချက်အလက် တွေ ပေးနေတာပါ။

ဘာကြောင့်လဲဆိုရင် သူက ကျနော့်ကို သူ့ရဲ့ လက်ထောက်အဖြစ် လုပ်ဖို့ ဖိတ်ခေါ်ထားလို့ပါ။ ကျနော့် အမြင်မှာတော့ သူဟာ ခေါင်းဆောင်ဖြစ်ပြီး မာနနဲ့ဘဝင် မြင့်တာတွေ မရှိပါဘူး။ လူတွေက သူပုံတွေ ကြည့်ပြီး မာနကြီးတယ်လို့ ထင်ကြမှာပါ။ ဒါပေမယ့် သူက အဲ့လို လူမျိုးမဟုတ်ဘူး”လို့ Mundo GV podcast နဲ့ အင်တာဗျူးမှာ ပြောခဲ့တာပါ။

ဘရာဇီးလ်အသင်းဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ ခရိုအေးရှားအသင်းကို အရေးနိမ့်ပြီး ကွာတားဖိုင်နယ် ကနေ ထွက်ခွာရပြီးနောက် နည်းပြဖြစ်သူ တိုင်ထီဟာ ရာထူးကနေ ထွက်ခွာခဲ့တာ ဖြစ်ပါတယ်။

ဘရာဇီးလ်အသင်းကိုတွေ့ရစဉ်

အခုဆိုရင် ဘရာဇီးလ်အသင်းဟာ နည်းပြသစ်ရှာဖွေနေပြီး မော်ရင်ဟိုဟာ နည်းပြလောင်း စာရင်းထဲမှာ ပါဝင်နေ တာပါ။ မော်ရင်ဟို ပေါ်တိုအသင်းကို ကိုင်တွယ်ချိန် ၂၀၀၃-၀၄ ရာသီက ချန်ပီယံလိဂ် ရခဲ့တဲ့ အသင်းမှာ ပါဝင်ခဲ့တဲ့ အယ်လ်ဘာတိုက သူ့ရဲ့ နည်းပြဟောင်းနဲ့ ပတ်သက်ပြီး ပြောခဲ့တာ ဖြစ်ပါတယ်။

ကမ္ဘာ့ဖလားပြိုင်ပွဲ ပြီးကတည်းက မော်ရင်ဟိုဟာ ပေါ်တူဂီအသင်းနည်းပြ ရာထူး အပါအဝင် လက်ရွေးစင်အသင်း နည်းပြရာထူးတွေနဲ့ ချိတ်ဆက် ခံခဲ့ရတာပါ။

ပေါ်တူဂီအသင်းနည်းပြ ဖာနန်ဒိုဆန်းတို့စ် ထွက်ခွာသွားပြီးနောက် ဒီရာထူးကို ရယူဖို့ ရေပန်းစားခဲ့ပေမယ့် ဘယ်လ်ဂျီယံ နည်းပြဟောင်း မာတီးနတ်စ်ကို ခန့်အပ်ဖို့ နှုတ်နဲ့ သဘောတူညီမှု ရရှိထားတယ်လို့ သိရပါတယ်။

မော်ရင်ဟိုဟာ လက်ရှိအချိန်မှာ စီးရီးအေကလပ် ရိုးမားအသင်းကို ကိုင်တွယ်နေတာဖြစ်ပြီး လက်ရွေးစင်နည်းပြ ရာထူးတွေနဲ့ ပတ်သက်ပြီး တုန့်ပြန်မှု မရှိသေးပါဘူး။

ရိုးမားအသင်းဟာ ဒီရာသီ စီးရီးအေပြိုင်ပွဲမှာ အဆင့် ၆ နေရာမှာ ရပ်တည်နေပြီး ချန်ပီယံလိဂ် ဝင်ခွင့်ရ အဆင့် ၄ နေရာမှာရှိနေတဲ့ အင်တာမီလန်အသင်းနဲ့ ၃ မှတ် ကွာဟနေတာ ဖြစ်ပါတယ်။

Source: Goal

CNI International News

၂၀၂၃ ခုနှစ်၊ ဇန်နဝါရီ ၉

ချယ်လ်ဆီးအသင်းကို အက်ဖ်အေဖလားပွဲစဉ်မှာ ၄ ဂိုးပြတ်နဲ့ အနိုင်ရပြီးနောက် ဂရေဟမ်ပေါ်တာအနေနဲ့ သူ့ရဲ့ အသင်းကို တိုးတက်အောင်လုပ်ဖို့အတွက် အချိန်ပိုပေးသင့်တယ်လို့ မန်စီးတီးနည်းပြ ဂွာဒီယိုလာက ပြောလိုက် ပါတယ်။

ဂွာဒီယိုလာက “ကျနော် တောဒ့်ဘိုလီကို ပြောချင်တာက ဂရေဟမ်ပေါ်တာကို အချိန်ပိုပေးဖို့ပါ။သူ့ကို အချိန် ပေးရပါမယ်။နည်းပြတိုင်းအတွက် အချိန်လိုအပ်ပါတယ်။အသင်းကြီးတွေအတွက် ရလဒ်ကောင်းရဖို့ အရေးကြီး တယ်ဆိုတာ ကျနော်သိပါတယ်။ဒါပေမယ့်လည်း သူ့ကိုတော့ အချိန်ပေးရပါမယ်။ဘရိုက်တန်မှာ သူဟာ ထူးချွန်စွာ လုပ်နိုင်ခဲ့ပြီး အချိန်ပေးလိုက်မယ်ဆိုရင် သူဟာ ကောင်းမွန်လာမှာပါ” လို့ ပွဲအပြီး သတင်းစာရှင်းလင်းပွဲမှာ ပြောခဲ့ တာပါ။

မန်စီးတီးအသင်းဟာ ချယ်လ်ဆီးအသင်းကို ၄ ရက်အတွင်း ၂ ပွဲအနိုင်ရပြီး အက်ဖ်အေဖလားကနေ ထွက်ခွာအောင် လုပ်ခဲ့တာဖြစ်ပါတယ်။ချယ်လ်ဆီးအသင်းဟာ နောက်ဆုံးကစားထားတဲ့ ပြိုင်ပွဲစုံ ၇ ပွဲမှာ ၁ ပွဲသာ အနိုင်ရထားပြီး ပရီးမီးယားလိဂ်မှာ အဆင့် ၁၀ နေရာရောက်ရှိနေသလို ကာရာဘောင်းနဲ့ အက်ဖ်အေဖလားပြိုင်ပွဲတွေကလည်း ထွက်ခွာခဲ့ရတာပါ။အဲဒါကြောင့် ပရိသတ်တွေက နည်းပြ ဂရေဟမ်ပေါ်တာကို ထုတ်ပယ်ဖို့ တောင်းဆိုနေကြတာ ဖြစ်ပါတယ်။

ချယ်လ်ဆီးပရိသတ်တွေဟာ အသင်းရလဒ်တွေအပေါ် စိတ်ပျက်နေပြီး ပွဲချိန်အတွင်းမှာ နည်းပြဟောင်း တူချယ်လ် ရဲ့ နာမည်ကိုအော်ဟစ်ခဲ့ကြတာပါ။တူချယ်လ်ဟာ ချယ်လ်ဆီးအသင်းကို ချန်ပီယံလိဂ်ဖလား ရရှိအောင် ကိုင်တွယ် နိုင်ခဲ့ပေမယ့် အခုရာသီအစ ရလဒ်ဆိုးတွေကြောင့် ထုတ်ပယ်ခံခဲ့ရပြီး သူ့နေရာမှာ ဂရေဟမ်ပေါ်တာကို အစားထိုး ခန့်အပ်ခဲ့တာဖြစ်ပါတယ်။

ဂရေဟမ်ပေါ်တာက “အားပေးတဲ့သူတွေရဲ့ စိတ်ပျက်မှုကို ကျနော်နားလည်ပါတယ်။ဒါပေမယ့် ကျနော်တို့ အလုပ်က ကျနော်တို့ရဲ့ အလုပ်ပါပဲ။ထင်မြင်မှုတွေ၊ ဝေဖန်မှုတွေနဲ့ အဆိုးမြင်တဲ့အရာတွေက အမြဲတမ်း ရှိနေပေမယ့် ဒါက စိန်ခေါ်မှုရဲ့ အစိတ်အပိုင်းပါပဲ။ကျနော်တို့ ဘာမှလုပ်လို့ မရခဲ့ပေမယ့် အလုပ်ကို ကြိုးကြိုး စားစားလုပ်ပြီး ပိုကောင်းအောင်လုပ်ဖို့ပဲ ရှိပါတယ်” လို့ ပြောခဲ့တာပါ။

ချယ်လ်ဆီးအသင်းဟာ ကြားရက်မှာ ပရီးမီးယားလိဂ်ပွဲစဉ်အဖြစ် ဖူလ်ဟမ်အသင်းနဲ့ အဝေးကွင်းမှာ ကစားရမှာ ဖြစ်ပြီး နိုင်ပွဲပြန်လည်ရယူနိုင်ဖို့ လိုအပ်နေတာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ ဇန်နဝါရီ ၈

စပါးအသင်းကြယ်ပွင့် ကစားသမား ဆွန်ဟောင်မင်က အကာအကွယ်ပါတဲ့ မျက်နှာဖုံးကို ဝတ်ဆင်ရတာဟာ ဘောလုံးကို ကောင်းမွန်စွာ မမြင်ရပေမယ့် မိဘတွေရဲ့ စိုးရိမ်မှုကြောင့် ဝတ်ဆင်နေရတာလို့ ပြောလိုက်ပါတယ်။

ဆွန်ဟောင်မင်က “မျက်နှာဖုံးနဲ့ ကစားရတာနဲ့ မပါဘဲ ကစားရတာက လုံးဝမတူဘူးဆိုတာ ရှင်းပါတယ်။ ကျနော့် အမြင်က အဆင်ပြေနေပေမယ့် ဘောလုံးရောက်လာတဲ့ အချိန်မှာ မမြင်နိုင်လို့ တစ်ခါတစ်ရံမှာ စိတ်အနှောင့် အယှက် ဖြစ်ရပါတယ်။ ဗီလာနဲ့ ပွဲမှာဆိုရင် ဘောလုံးရတဲ့ အချိန်မှာ မမြင်ခဲ့လို့ ဘောလုံးဆုံးရှုံးသွားခဲ့ ရပါတယ်။ အလွန်စိတ်ပျက် ခဲ့ရပါတယ်။ ကျနော့် တစ်ဦးတည်း ဆိုရင်တော့ မျက်နှာဖုံးမပါဘဲ ကစားတော့မှာပါ။ ဒါပေမယ့် မိဘတွေ၊ မိသားစုတွေနဲ့ သူငယ်ချင်းတွေက စိုးရိမ်နေကြပါတယ်။ နောက်တစ်ခါ ထိမိမယ်ဆိုရင် အန္တရာယ်ရှိ နိုင် တာကြောင့်ပါ”လို့ ပြောခဲ့တာပါ။

ဆွန်ဟောင်မင်ဟာ စပါးအသင်းက ပဲလေ့စ်အသင်းကို ၄ ဂိုး- ဂိုးမရှိနဲ့ အနိုင်ရခဲ့တဲ့ ပွဲမှာ ဂိုးသွင်းပြီးနောက် မျက်နှာ ဖုံးကို လွှင့်ပစ်ပြီး အောင်ပွဲခံခဲ့တာ ဖြစ်ပါတယ်။

မျက်နှာဖုံးကို လွှင့်ပစ်ပြီး အောင်ပွဲခံနေတဲ့ ဆွန်ဟောင်မင်ကို တွေ့ရစဉ်

ကမ္ဘာ့ဖလားပြိုင်ပွဲမတိုင်ခင် မျက်လုံးနားမှာ ရခဲ့တဲ့ ဒဏ်ရာကြောင့် ဆွန်ဟောင်မင်ဟာ မျက်နှာဖုံး တပ်ဆင်ပြီး ကစားနေရတာပါ။ အခုအချိန်ထိ ပွဲစဉ်တိုင်းမှာလည်း ဆွန်ဟောင်မင်ဟာ မျက်နှာဖုံး တပ်ဆင်ပြီး ကစားနေတာ ဖြစ်ပါတယ်။

ဆွန်ဟောင်မင်က “မိဘတွေက ကျနော့်ကို တပ်ပါဆိုပြီးတော့ မပြောပေမယ့် သူတို့ စိုးရိမ်နေကြပါတယ်။ ဆရာ ဝန်တွေကလည်း မင်းရဲ့ ဆုံးဖြတ်ချက်ပဲလို့ ပြောခဲ့ပါတယ်။ ဒါပေမယ့် ခွဲစိတ်ပြီး ၇ ပတ်ပဲ ရှိသေးလို့ အန္တရာယ်ရှိ နိုင်တာကြောင့် မျက်နှာဖုံးဆက်ပြီး တပ်ဆင်ထားသင့်တယ်လို့တော့ အကြံပြုထားပါတယ်”လို့ ပြောခဲ့တာပါ။

ဆွန်ဟောင်မင်ဟာ ပြီးခဲ့တဲ့ရာသီက ပရီးမီးယားလိဂ် ပြိုင်ပွဲမှာ ခြေစွမ်းပြပြီး ဂိုးသွင်းရွှေဖိနပ်ဆုကို ရယူနိုင်ခဲ့တဲ့ ပထမဆုံး အာရှကစားသမားအဖြစ် မှတ်တမ်းတင်နိုင်ခဲ့ပါတယ်။ အခုနှစ် ရာသီမှာတော့ တောင်ကိုရီးယား ကစားသမားဟာ ခြေစွမ်းပြနိုင်ဖို့ အနည်းငယ် ရုန်းကန်နေရပြီး ၂၂ ပွဲ ကစားအပြီးမှာ ၆ ဂိုးသာ သွင်းယူထား နိုင်တာ ဖြစ်ပါတယ်။

Source: The Sun

CNI Sport News

၂၀၂၃ ခုနှစ်၊ ဇန်နဝါရီ ၇

နာမည်ကျော် ဘောလုံးသမားကြီး ဒေးဗစ်ဘက်ခမ်းရဲ့ သားဖြစ်သူ ရိုမီယိုဘက်ခမ်းဟာ အင်တာမိုင်ယာမီ(၂) အသင်းကနေ ဘရန်ဖို့ဒ်ဘီ အသင်းထံ အခုနှစ် ရာသီအကုန်ထိ အငှားစာချုပ်နဲ့ ပြောင်းရွှေ့ခဲ့ပြီ ဖြစ်ပါတယ်။

ရိုမီယိုဘက်ခမ်းဟာ မေဂျာလိဂ်ရာသီ ပြီးဆုံးချိန်ကတည်းက ပရီးမီးယားလိဂ် ကလပ်အသင်းနဲ့ လေ့ကျင့်မှုတွေ ပြုလုပ်ခဲ့တာပါ။ ဘရန်ဖို့ဒ်အသင်းက ရိုမီယိုဟာ ဘီအသင်းနဲ့ ရာသီအကုန်ထိ ရှိမယ်လို့ အတည် ပြုခဲ့တာ ဖြစ်ပါ တယ်။

ရိုမီယိုဘက်ခမ်းဟာ ပြီးခဲ့တဲ့ မေဂျာလိဂ်ရာသီမှာ အင်တာမိုင်ယာမီ(၂) အသင်းအတွက် ပွဲ ၂၀ ပါဝင်ကစားခဲ့ပြီး ၂ ဂိုး သွင်းယူကာ ဂိုးဖန်တီးမှု ၁၀ ကြိမ်အထိ ပြုလုပ်ခဲ့တာပါ။

ရိုမီယိုဘက်ခမ်းက “ဒီမှာ ရှိရတာကို အလွန်ဂုဏ်ယူပြီး အလွန်ပျော်ရွှင်ပါတယ်။ အမေရိကန်မှာတော့ ပျော်စရာ ရာသီတစ်ခုအဖြစ် ရှိခဲ့ပြီး အတက်အကျတွေ အများကြီး ရှိခဲ့ပေမယ့် ဒီကိုလာရတာ စိတ်လှုပ်ရှားပြီး ဘာတွေ လုပ်နိုင်လဲဆိုတာ မြင်ရပါတယ်။ ကျနော်ဟာ ရာသီပြီးကတည်းက ကြံ့ခိုင်မှုပိုင်း ကောင်းနေဖို့ ဒီမှာ ရှိနေ ခဲ့တာပါ။ အခုတော့ အငှားနဲ့ ကစားဖို့ အခွင့်အလမ်းရောက်လို့ အလွန်စိတ်လှုပ်ရှားနေပါတယ်”လို့ ပြောခဲ့တာ ဖြစ်ပါတယ်။

ရိုမီယိုဘက်ခမ်းကိုတွေ့ရစဉ်

ရိုမီယိုဘက်ခမ်းဟာ ၂၀၁၄ က အာဆင်နယ် အကယ်ဒမီကနေ ထွက်ခွာခဲ့ပြီးနောက် တင်းနစ်ကစားခဲ့ပေမယ့် နောက်ပိုင်းမှာ ဘောလုံးပြန်ကစားဖို့ ဆုံးဖြတ်ခဲ့ကာ ဖခင်ဖြစ်သူ ပူးတွဲပိုင်ရှင်အဖြစ် ပိုင်ဆိုင်တဲ့ မေဂျာလိဂ်ကလပ် အင်တာမိုင်ယာမီအသင်းမှာ ကစားခဲ့တာပါ။

ရိုမီယိုဘက်ခမ်းရဲ့ အင်တာမိုင်ယာမီ(၂) အသင်းဟာ ပြီးခဲ့တဲ့ရာသီက အမှတ်ပေးဇယား အဆင့် ၆ နေရာမှာ ရပ်တည်ခဲ့ပါတယ်။ အသက် ၂၀ အရွယ်ရှိ ရိုမီယိုဟာ ပြီးခဲတဲ့ ဘာစီလိုနာအသင်းနဲ့ ခြေစမ်းပွဲမှာ အင်တာမိုင်ယာမီ အသင်းကြီးအတွက် ပါဝင်ကစားခဲ့သေးတာပါ။

ဘရန်ဖို့ဒ်ဘီ အသင်းနည်းပြ မက်ဖာလိန်းက “ကျနော်တို့ဆီကို ရိုမီယို ရောက်လာကတည်းက ကျနော်တို့ဟာ အလွန်ဝမ်းမြောက်နေကြတာပါ။ သူ့ရဲ့ စံနှုန်းတွေ၊ ကွင်းတွင်း ကွင်းပြင်မှာ သူ့ရဲ့ ပြုမူနေထိုင်ပုံတွေကို သဘောကျ တယ်”လို့ ပြောခဲ့တာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇန်နဝါရီ ၇

ဘောလုံးပွဲ ဝေဖန်သုံးသပ်သူအဖြစ် ဆောင်ရွက်နေတဲ့ ရွိုင်ကိန်းက အဲဗာတန်နဲ့ပွဲမှာ အမှားအယွင်း ပြုလုပ်ခဲ့တဲ့ ဒီဂီယာကို ဝေဖန်လိုက်ပြီး ယူနိုက်တက် ဂိုးသမားဟာ အရက်အနည်းငယ် သောက်ထားပုံရတယ်လို့ ပြောလိုက် ပါတယ်။

ရွိုင်ကိန်းက “နားထောင်ပါ၊ ဒါက နိုင်ငံတကာ ဂိုးသမားတစ်ဦးရဲ့ အံ့သြဖွယ်ကောင်းတဲ့ အမှားအယွင်းပါပဲ။ ဒီဂီယာ က Carry On ဟာသကားထဲကနဲ့ တူပါတယ်။ သူဟာ အရက်အနည်းငယ် သောက်ထားတဲ့ပုံပါပဲ။ အံ့သြစရာ ကောင်းတဲ့ အမှားကို ပြုလုပ်ခဲ့ပါတယ်။ သူဟာ ဘာလုပ်ရမှန်း မသိဘူး ဖြစ်နေပါတယ်။ ဒါဟာ ကြောက်စရာ ကောင်းတဲ့ အမှားမျိုးပါပဲ”လို့ ITV မှာ ပြောခဲ့တာပါ။

ဒီဂီယာဟာ အဲဗာတန်ကစားသမား မော်ပေး ဂိုးဧရိယာထဲ ပေးပို့ခဲ့တဲ့ ဘောလုံးကို ထိန်းဖို့ ကြိုးစားခဲ့ပေမယ့် ဘောလုံးဟာ သူ့ရဲ့ ပေါင်ကြားထဲကနေ ထွက်သွားခဲ့တာ ဖြစ်ပါတယ်။

မန်ယူအသင်း အဲဗာတန်ဘက်ကို ဂိုးသွင်းနေစဉ်

ဒီဂီယာဟာ ဘောလုံးထွက်သွားပြီးနောက် ဘာလုပ်ရမှန်းမသိ ဖြစ်နေချိန်မှာ ဂိုးအရှေ့မှာ အသင့်ရှိနေတဲ့ ကိုအာဒီက အဲဗာတန်အတွက် ချေပဂိုး သွင်းယူသွားခဲ့တာပါ။ အဲ့ဒါကြောင့် ရွိုင်ကိန်းက ဗြိတိန်ဟာသ စီးရီးဖြစ်တဲ့ Carry On ကားထဲက အဖြစ်အပျက်နဲ့ နှိုင်းယှဉ်ပြီး ပြောသွားခဲ့တာ ဖြစ်ပါတယ်။

အာဆင်နယ် ကစားသမားဟောင်း လီဒီဇွန်က “ကျနော်မြင်ခဲ့ရတာကို မယုံနိုင်ဘူး ဖြစ်ခဲ့ပါတယ်။ ဒီဂီယာအတွက် တော့ လုံးဝအိပ်မက်ဆိုးတစ်ခုလို ဖြစ်ခဲ့ပါတယ်။ သူက ဘောလုံးဘယ်ကို သွားနေတယ်ထင်လဲတော့ မသိပါဘူး။ သူလုပ်ခဲ့တဲ့ ပုံစံကို တွေ့ရတာ မယုံနိုင်ဘူး ဖြစ်နေပါတယ်”လို့ ပြောခဲ့တာပါ။

ဒီဂီယာရဲ့ အမှားကနေ သွင်းဂိုးခွင့် ပြုခဲ့ရပေမယ့် ယူနိုက်တက်အသင်းဟာ အဲဗာတန်အသင်းကို ၃ ဂိုး- ၁ ဂိုးနဲ့ အနိုင်ရပြီး အက်ဖ်အေဖလားပြိုင်ပွဲမှာ နောက်တစ်ဆင့် တက်နိုင်ခဲ့တာ ဖြစ်ပါတယ်။

ယူနိုက်တက်အတွက် ဂိုးတွေကို အန်တိုနီ၊ ရက်ရှ်ဖို့ဒ်နဲ့ အဲဗာတန်ကစားသမား ကိုအာဒီက ကိုယ့်ဂိုးကိုယ် သွင်းယူခဲ့ တာပါ။ ယူနိုက်တက်အသင်းဟာ ဒီနိုင်ပွဲကြောင့် ပြိုင်ပွဲစုံ ၇ ပွဲဆက် နိုင်ပွဲရယူနိုင်ခဲ့တာပါ။

ယူနိုက်တက်အသင်းဟာ ဇန်နဝါရီ ၁၁ ရက်မှာတော့ ကာရာဘောင်းဖလား ကွာတားဖိုင်နယ်ပွဲအဖြစ် ချာလ်တန် အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဇန်နဝါရီ ၆

ဂျိတ်ပေါလ်က ပရော်ဖက်ရှင်နယ် ဖိုက်တာလိဂ်နဲ့ လက်မှတ်ထိုးပြီးနောက် နိတ်ဒီယတ်ဇ်ကို လက်ဝှေ့နဲ့ MMA ၂ ပွဲ ထိုးသတ်ဖို့ ကမ်းလှမ်းခဲ့တာ ဖြစ်ပါတယ်။

ဂျိတ်ပေါလ်က “ကျနော်ဟာ လက်ဝှေ့ကို ဖြိုခွဲပြီးနောက် အခု MMA ကို ဖြိုခွဲဖို့ ရောက်ရှိလာခဲ့ပါပြီ။ ဒါက ခက်ခဲတဲ့ အားကစားနည်းလို့ သိထားပါတယ်။ လွယ်မှာ မဟုတ်ပေမယ့် လက်ဝှေ့မှာလုပ်နိုင်ရင် MMA မှာလည်းလုပ်နိုင်မှာ ပါ။ ကျနော် နိတ်ဒီယတ်ဇ်ကို ၂ ပွဲထိုးဖို့ ကမ်းလှမ်းထားပါတယ်။ ပထမပွဲက လက်ဝှေ့ထိုးမှာဖြစ်ပြီး နောက်ထပ် ၆ လ အကြာမှာ MMA ထိုးသတ်မှာပါ။ ၂ ပွဲပဲထိုးမှာပါ။ ဒါကို လုပ်ရအောင်”လို့ သူ့ရဲ့ Youtube Channel မှာပြော သွားခဲ့ပါတယ်။

ဂျိတ်ပေါလ်ဟာ MMA ပရိုမိုးရှင်း ပရော်ဖက်ရှင်နယ် ဖိုက်တာလိဂ်နဲ့ လက်မှတ်ထိုးပြီးနောက် လှောင်အိမ်ထဲမှာ ပွဲဦးထွက်အဖြစ် ထိုးသတ်ဖို့ စီစဉ်နေတာပါ။ ဂျိတ်ပေါလ်ဟာ ပြီးခဲ့တဲ့နှစ်ကမှ UFC ကနေ ထွက်ခွာခဲ့တဲ့ နိတ်ဒီယတ်ဇ်နဲ့ ထိုးသတ်ဖို့ စိတ်ဆန္ဒ ပြင်းပြနေတာ ဖြစ်ပါတယ်။

ဂျိတ်ပေါလ် ထိုးသတ်နေစဉ်

ပရော်ဖက်ရှင်နယ် ဖိုက်တာလိဂ်ဟာ MMA ရဲ့ တစ်ခုတည်းသော လိဂ်ပုံစံဖြစ်ပြီး ပလေးအော့ဖ် ပွဲစဉ်တွေလည်း ပါဝင်မှာပါ။

Youtube စတားတစ်ဦးဖြစ်တဲ့ ဂျိတ်ပေါလ်ဟာ ပ‌ရော်ဖက်ရှင်နယ် လက်ဝှေ့ပွဲပေါင်း ၆ ပွဲ ထိုးသတ်ထားပြီး ၆ ပွဲ စလုံး နိုင်ပွဲရရှိထားတာ ဖြစ်ပါတယ်။

ဂျိတ်ပေါလ်ဟာ ပြီးခဲ့တဲ့နှစ် အောက်တိုဘာလက နောက်ဆုံးပွဲ ထိုးသတ်ထားပြီး အန်ဒါဆန်ဆေးလ်ဗားကို အနိုင်ရထားခဲ့တာပါ။ နိတ်ဒီယတ်ဇ်ကတော့ စက်တင်ဘာလက တိုနီဖာဂူဆန်နဲ့ UFC 279 ပွဲစဉ် အဖြစ် ထိုးသတ် ခဲ့တာမှာ အနိုင်ရပြီးနောက် ဒီပြိုင်ပွဲနဲ့ ချုပ်ဆိုထားတဲ့ စာချုပ်ကုန်ဆုံးသွားခဲ့တာ ဖြစ်ပါတယ်။

နိတ်ဒီယတ်ဇ်ဟာ MMA ပွဲပေါင်း ၃၄ ပွဲ ထိုးသတ်ခဲ့တာမှာ ၂၁ ပွဲ အနိုင်ရပြီး ၁၃ ပွဲ ရှုံးနိမ့်ခဲ့ကာ လိုက်ဝိတ်နဲ့ ဝယ်လ် တာဝိတ်တန်းမှာ အောင်မြင်မှုတွေ ရယူနိုင်ခဲ့တဲ့သူ ဖြစ်ပါတယ်။

Source: The Sun