CNI Sport News

၂၀၂၃ ခုနှစ်၊ ဩဂုတ် ၂၉

ချယ်လ်ဆီးအသင်းဟာ တိုက်စစ်မှူး လူကာကူအတွက် ရိုးမားအသင်းက ကမ်းလှမ်းတဲ့ အငှားခေါ်ယူကြေး ပေါင် ၅ သန်းကို လက်ခံလိုက်တဲ့အတွက် အပြောင်းအရွှေ့ဖြစ်ဖို့ သဘောတူညီမှုရရှိသွားပြီလို့ The Telegraph က ဖော်ပြ ထားပါတယ်။

လူကာကူဟာ ရိုးမားအသင်းထံ အခုရာသီအကုန်ထိ အငှားနဲ့ ပြောင်းရွှေ့မှာဖြစ်ပြီး လုပ်ခလစာအဖြစ် ပေါင် ၆ သန်းရရှိမှာပါ။ ချယ်လ်ဆီးအသင်းဟာ နည်းပြ ပိုချက်တီနိုရဲ့ အစီအစဉ်မှာ ပါဝင်ခြင်းမရှိတော့တဲ့ လူကာကူကို ရောင်းချဖို့ လုပ်ဆောင်ခဲ့ပေမယ့် အပြောင်းအရွှေ့ပြီးဆုံးဖို့ နီးကပ်လာတဲ့အတွက် အငှားချဖို့သာ ဆုံးဖြတ်ခဲ့ရတာ ဖြစ်ပါတယ်။ ဘယ်လ်ဂျီယံတိုက်စစ်မှူးဟာ အင်တာမီလန်၊ဂျူဗင်တပ်စ်၊ ဆော်ဒီကလပ် အယ်လ်ဟီလယ် အသင်း တွေနဲ့ သတင်းတွေထွက်ခဲ့ပေမယ့် အပြောင်းအရွှေ့ဖြစ်မလာခဲ့ပါဘူး။

အဲဒါကြောင့် တိုက်စစ်ကစားသမားလိုအပ်ချက်ရှိနေတဲ့ ရိုးမားအသင်းက လူကာကူကို ခေါ်ယူဖို့ ချယ်လ်ဆီး အသင်းထံ ချိတ်ဆက်မှုပြုလုပ်ခဲ့သလို ကစားသမားကိုယ်တိုင်ကလည်း ဆရာဟောင်း မော်ရင်ဟိုရှိတဲ့အသင်းထံ ပြောင်းရွှေ့ချင်ခဲ့တာပါ။ ချယ်လ်ဆီးနဲ့ ရိုးမားအသင်းတို့ဟာ လူကာကူရဲ့ အငှားအပြောင်းအရွှေ့အတွက် ဆွေးနွေးမှု တွေပြုလုပ်အပြီးမှာ သဘောတူညီမှုရရှိသွားခဲ့တာဖြစ်ပါတယ်။ ရိုးမားအသင်းဟာ အငှားခေါ်ယူကြေးအပြင် လူကာကူရဲ့ လုပ်ခလစာကိုပါ ပေးချေရမှာပါ။

လူကာကူဟာ ရိုးမားအသင်းနဲ့ အငှားစာချုပ်ပြည့်ပြီး ချယ်လ်ဆီးအသင်းထံ ပြန်ရောက်လာခဲ့မယ်ဆိုရင် သူ့ရဲ့ လုပ်ခလစာကိုလျှော့ပြီးယူဖို့လည်း သဘောတူညီမှုရရှိခဲ့တာဖြစ်ပါတယ်။ ဘယ်လ်ဂျီယံတိုက်စစ်မှူးဟာ နည်းပြ မော်ရင်ဟိုရဲ့ လက်အောက် ယူနိုက်တက်နဲ့ ချယ်လ်ဆီးအသင်းတွေမှာ ကစားခဲ့တုန်းက ၇၆ ပွဲမှာ ၃၃ ဂိုးသွင်းပြီး ၁၁ ဂိုးဖန်တီးနိုင်ခဲ့တာကြောင့် ပေါ်တူဂီလူမျိုးနည်းပြက သူ့ရဲ့ အကောင်းဆုံးပုံစံတွေကို ပြန်လည်ရရှိအောင် ကူညီပေးနိုင်ဖို့ မျှော်လင့်နေတာပါ။

ရိုးမားအသင်းဟာ အခုရာသီ စီးရီးအေ ၂ ပွဲကစားအပြီးမှာ ရမှတ် ၁ မှတ်သာရရှိထားပြီး ရလဒ်ဆိုးနေတာကြောင့် လာမယ့် အေစီမီလန်အသင်းနဲ့ ပွဲစဉ်မှာ နိုင်ပွဲရယူနိုင်ဖို့ ပစ်မှတ်ထားနေတာဖြစ်ပါတယ်။

Source:Goal

CNI Sport News

 ၂၀၂၃ ခုနှစ်၊ ဩဂုတ် ၂၉

စပိန်ကွင်းလယ်လူ ဟာမိုဆိုကို နမ်းခဲ့တဲ့ဖြစ်ရပ်နဲ့ ပတ်သက်ပြီး စပိန်ဘောလုံးအဖွဲ့ချုပ်က ရူဘီယာလက်စ်ကို ဥက္ကဋ္ဌရာထူးကနေ နုတ်ထွက်ဖို့တောင်းဆိုပြီးနောက် ဖီဖာကလည်း ဘောလုံးနဲ့ ပတ်သက်ခွင့် ၁၅ နှစ်ကြာပိတ်ပင်ဖို့ စီစဉ်နေပါတယ်။

စပိန်ဘောလုံးအဖွဲ့ချုပ်အကြီးအကဲတွေဟာ ရူဘီယာလက်စ်ကို ရာထူးကနေ ချက်ချင်းနုတ်ထွက်ဖို့ တောင်းဆိုခဲ့ တာဖြစ်ပြီး သူ့ရဲ့ လက်ခံနိုင်စရာမရှိတဲ့ အပြုအမူဟာ စပိန်ဘောလုံးလောကကို ဆိုးရွားစွာထိခိုက်နိုင်စေတယ်လို့ ပြောခဲ့တာပါ။ အစောပိုင်းက စပိန်ဘောလုံးအဖွဲ့ချုပ်ဟာ ရူဘီယာလက်စ်ဘက်ကနေ ရပ်တည်ခဲ့ပေမယ့် ဖီဖာက စပိန်လက်ရွေးစင်တွေနဲ့ ကလပ်အသင်းတွေကို ပြိုင်ပွဲယှဉ်ပြိုင်ခွင့်ပိတ်ပင်နိုင်တယ်လို့ ပြောခဲ့တာကြောင့် ဆုံးဖြတ်ချက် ပြန်ပြောင်းခဲ့တာဖြစ်ပါတယ်။

ဖီဖာဟာ ရူဘီယာလက်စ်ကို ၁၅ နှစ်ကြာအထိ ပိတ်ပင်ဖို့ စီစဉ်နေတယ်လို့ စည်းကမ်းထိန်းသိမ်းရေးလုပ်ငန်းစဉ်မှာ ပါဝင်တဲ့ သတင်းရင်းမြစ်က Mail Sport ကို ပြောခဲ့တာပါ။ ဖီဖာဟာ ပြီးခဲ့တဲ့အပတ်ကမှ ရူဘီယာလက်စ်ကို ရက်ပေါင်း ၉၀ ကြာဘောလုံးနဲ့ ပတ်သက်ခွင့်ပိတ်ပင်တဲ့ ဆုံးဖြတ်ချက်ချမှတ်ထားတာဖြစ်ပါတယ်။ စပိန် ဘောလုံး အဖွဲ့ချုပ်ဟာ စပိန်အစိုးရရဲ့ ဝင်ရောက်စွက်ဖက်မှုတွေကြောင့် ကလပ်အသင်းတွေကို ဥရောပပြိုင်ပွဲ ဝင်ရောက် ယှဉ်ပြိုင်ခွင့်ပိတ်ပင်ဖို့အတွက် ဥရောပဘောလုံးအဖွဲ့ချုပ်ထံ တောင်းဆိုမှုပြုလုပ်ခဲ့ပါတယ်။

ဒါပေမယ့် ဖီဖာက စည်းကမ်းထိန်းသိမ်းရေးလုပ်ငန်းစဉ်တွေကို ဆောင်ရွက်နေခဲ့တာကြောင့် စပိန် ဘောလုံး အဖွဲ့ချုပ်ရဲ့တောင်းဆိုမှုကို ဥရောပဘောလုံးအဖွဲ့ချုပ်က ပယ်ချခဲ့တာပါ။ အဲဒါကြောင့် စပိန်ဘောလုံး အဖွဲ့ချုပ် အကြီးအကဲတွေဟာ သြဂုတ် ၂၈ ရက်က ၅ နာရီကျော်ကြာအစည်းအဝေးပြုလုပ်ပြီးနောက် ရူဘီယာလက်စ်ကို ရာထူးက နုတ်ထွက်ပေးဖို့ တောင်းဆိုခဲ့တယ်လို့ အတည်ပြုခဲ့တာဖြစ်ပါတယ်။

ဖီဖာရဲ့ ဥပဒေတွေကို စပိန်ဘောလုံးအဖွဲ့ချုပ်က လက်မခံဘူးဆိုရင်တော့ ဖီဖာနဲ့ ဆက်စပ်တဲ့ ပြိုင်ပွဲတွေမှာ စပိန်လက်ရွေးစင်အသင်းတွေနဲ့ ကလပ်တွေအားလုံးယှဉ်ပြိုင်ခွင့်ပိတ်ပင်ခံရနိုင်တာပါ။ ဒီလိုပိတ်ပင်မယ်ဆိုရင် ဥရောပဘောလုံးအဖွဲ့ချုပ်အတွက်လည်း ကြီးမားတဲ့ထိုးနှက်ချက် ဖြစ်လာနိုင်ပါတယ်။ 

ရူဘီယာလက်စ်ရဲ့ မိခင်ကတော့ သားဖြစ်သူအပေါ်စွပ်စွဲချက်တွေကို ဘုရားကျောင်းတစ်ခုမှာ အစာငတ်ခံ ဆန္ဒပြနေတယ်လို့ သတင်းတွေမှာ ဖော်ပြထားပါတယ်။

Source:DailyMail

CNI Sport News

၂၀၂၃ ခုနှစ်၊ သြဂုတ် ၂၈

ဒဏ်ရာအိပ်မက်ဆိုးတွေကနေ ပွဲပြန်ကစားနိုင်ခဲ့ပြီးနောက် ပေါ့ဘာက ဂျူဗင်တပ်စ်အသင်းကို ဆုဖလားတွေ ရရှိအောင် ကူညီပေးချင်တယ်လို့ ပြောခဲ့ပါတယ်။

ပေါ့ဘာက “ကျနော့်ရဲ့ ရုပ်ပိုင်းဆိုင်ရာ ကောင်းမွန်လာပြီး ထိပ်ဆုံးရောက်အောင် ပြန်သွားချင်ပါတယ်။ ကျနော်ဟာ ဒီမှာရှိခဲ့တဲ့ အရင်တုန်းကလို ဆာလောင်နေတုန်းပါပဲ။ ကျနော်ဟာ အသက် ၃၀ ပဲရှိသေးပြီး ပရိသတ်တွေကို ဆုဖလားတွေ ရယူပေးချင်ကာ ကွင်းထဲကို လာချင်တဲ့ဆန္ဒရှိအောင် လုပ်ပေးချင်ပါတယ်”လို့ DAZN ကို ပြောခဲ့ တာပါ။

ပေါ့ဘာဟာ ဘိုလော့ဂ်နာအသင်းနဲ့ ၁ ဂိုးစီ သရေကျခဲ့တဲ့ စီးရီးအေပွဲစဉ်မှာ အခုနှစ် ဘောလုံးရာသီ ဂျူဗင်တပ်စ် အသင်းရဲ့ ပထမဆုံးပွဲစဉ်အဖြစ် လူစားဝင်ရောက်ပြီး ကစားသွားခဲ့တာ ဖြစ်ပါတယ်။

ပေါ့ဘာကို တွေ့ရစဉ်

ပေါ့ဘာဟာ ပြီးခဲ့တဲ့ရာသီက ဒဏ်ရာနှိပ်စက်မှုကြောင့် ပွဲအများအပြား လွဲချော်ခဲ့ရတဲ့အတွက် အခုရာသီမှာ အကောင်းဆုံးပုံစံနဲ့ ဂျူဗင်တပ်စ်အသင်းကို ဆုဖလားတွေ ရယူပေးနိုင်ဖို့ စိတ်ပိုင်းဖြတ်ထားတာပါ။

ယူနိုက်တက်အသင်းနဲ့ စာချုပ်ကုန်ဆုံးပြီးနောက် ဂျူဗင်တပ်စ်အသင်းကို ဒုတိယအကြိမ်မြောက် ရောက်ရှိလာခဲ့တဲ့ ပြင်သစ်ကစားသမားဟာ ပြီးခဲ့တဲ့ရာသီက ၁၀ ပွဲသာ ပါဝင်ကစားနိုင်ခဲ့တာ ဖြစ်ပါတယ်။ 

ပေါ့ဘာဟာ ဒဏ်ရာကြောင့် အမေရိကန်ကို သွားရောက်တဲ့ အသင်းရဲ့ ရာသီကြိုခရီးစဉ်မှာ တစ်ပွဲမှ ပါဝင်ကစား နိုင်ခြင်း မရှိခဲ့ပေမယ့် နည်းပြ အယ်လီဂရီက ဘိုလော့ဂ်နာနဲ့ စီးရီးအေပွဲစဉ်မှာ လူစားဝင် ကစားသမားအဖြစ် စတင် အသုံးပြုခဲ့တာပါ။

ဂျူဗင်တပ်စ်အသင်းဟာ လာမယ့်အပတ်မှာ အမ်ပိုလီအသင်းနဲ့ စီးရီးအေပွဲစဉ် ယှဉ်ပြိုင်ရမှာဖြစ်ပြီး ဒီပွဲမှာ ပေါ့ဘာဟာ ပွဲထွက်လူစာရင်းမှာ ပါဝင်နိုင်ဖို့ မျှော်လင့်နေတာ ဖြစ်ပါတယ်။ 

ဂျူဗင်တပ်စ်အသင်းဟာ ဒီရာသီ စီးရီးအေ၂ ပွဲကစားအပြီးမှာ ၁ ပွဲနိုင်၊၁ ပွဲသရေ ရမှတ် ၄ မှတ်ရရှိထားပါတယ်။

Source: Goal

CNI Sport News

၂၀၂၃ ခုနှစ်၊ သြဂုတ် ၂၈

ဆော်ဒီအသင်းဟာ အီတလီအသင်း နည်းပြရာထူးကနေ နုတ်ထွက်ခဲ့တာ နှစ်ပတ်ကြာသာရှိသေးတဲ့ မန်ချီနီကို နည်းပြသစ်အဖြစ် ခန့်အပ်လိုက်ပါတယ်။

မန်ချီနီဟာ အီတလီအသင်းကို ယူရို ၂၀၂၀ ပြိုင်ပွဲမှာ ချန်ပီယံဆုရရှိအောင် ကိုင်တွယ်နိုင်ခဲ့သလို ပြိုင်ပွဲစုံ ၃၇ ပွဲ ဆက်တိုက် ရှုံးပွဲမရှိတဲ့ ကမ္ဘာ့စံချိန်တင် နိုင်ခဲ့ပေမယ့် ၂၀၂၂ ကမ္ဘာ့ဖလားပြိုင်ပွဲ ယှဉ်ပြိုင်ခွင့် ရရှိအောင်တော့ မစွမ်းဆောင် ပေးနိုင်ခဲ့ပါဘူး။ 

မန်ချီနီဟာ ဆော်ဒီအသင်းရဲ့ နည်းပြအဖြစ် ၂၀၂၇ အထိ စာချုပ်ချုပ်ဆိုမှာဖြစ်ပြီး တစ်နှစ်ကို ယူရိုသန်း ၃၀ ရရှိမယ်လို့ သိရပါတယ်။

 မန်ချီနီကို တွေ့ရစဉ်

မန်ချီနီက “အာရှမှာ ဘောလုံးရဲ့ ရေပန်းစားမှုက ကြီးထွားလာသလို နိုင်ငံသစ်မှာ ဘောလုံး အတွေ့အကြုံရဖို့ အတွက် ဒါက ကောင်းမွန်တဲ့ အခွင့်အလမ်းတစ်ခုလို့ ကျနော်ယုံကြည်ပါတယ်။ ဆော်ဒီပရိုလိဂ်မှာ ထိပ်တန်း ကစားသမားတွေ ရှိနေတာက နိုင်ငံရဲ့ဘောလုံး တိုးတက်မှု အလားအလာကို ညွှန်ပြနေပါတယ်။ ကျနော်ဟာ ဥရောပမှာ သမိုင်းကို ဖန်တီးနိုင်ခဲ့သလို အခုဆော်ဒီမှာ သမိုင်းကိုဖန်တီးဖို့ အချိန်ရောက်ပြီ”လို့ ပြောခဲ့ပါတယ်။

ဆော်ဒီအသင်းဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ ချန်ပီယံဖြစ်ခဲ့တဲ့ အာဂျင်တီးနားအသင်းကို အံ့အားသင့် ဖွယ် အနိုင်ရခဲ့ပေမယ့် အုပ်စုအဆင့်ကနေတော့ ကျော်ဖြတ်နိုင်ခဲ့ခြင်း မရှိပါဘူး။

မန်ချီနီဟာ ဆော်ဒီအသင်းကို ၂၀၂၄ ခုနှစ်၊ ဇန်နဝါရီလမှာ ကျင်းပမယ့် အာရှဖလားပြိုင်ပွဲမှာ ချန်ပီယံဖြစ်အောင် ကိုင်တွယ်ရဖို့ ရှိနေပါတယ်။ ဆော်ဒီအသင်းဟာ အာရှဖလားပြိုင်ပွဲမှာ ထိုင်း၊ ကာဂျစ္စတန်၊ အိုမန်တို့နဲ့ တစ်အုပ်စုထဲ ကျရောက်နေပြီး ချန်ပီယံဖြစ်ဖို့ ရေပန်းစားနေတဲ့ အသင်းတွေထဲမှာ ပါဝင်နေတာပါ။

ဆော်ဒီအသင်းဟာ စက်တင်ဘာ ၈ ရက်မှာ ကော်စတာရီကာ အသင်းနဲ့ ခြေစမ်းပွဲယှဉ်ပြိုင်မှာဖြစ်ပြီး ဒီပွဲကို မန်ချီနီက သူ့ရဲ့ပထမဆုံးပွဲစဉ်အဖြစ် စတင်ကိုင်တွယ်သွားမှာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ သြဂုတ် ၂၈

အင်္ဂလန်အသင်းခေါင်းဆောင် ဟာရီကိန်းဟာ အော့စ်ဘတ်အသင်းကို အနိုင်ရခဲ့တဲ့ ဘွန်ဒစ်လီဂါပွဲမှာ ဘိုင်ယန်မြူး နစ် အသင်းအတွက် ခြေစွမ်းပြ ဂိုးသွင်းယူပြီးနောက် အသင်းပရိတ်တွေရှေ့မှာ ဂိုးသွင်းယူနိုင်တာက ထူးခြားတဲ့ ခံစားချက်လို့ ပြောခဲ့ပါတယ်။

ဟာရီကိန်းက “ဒီနေ့က အလွန်ကောင်းတဲ့ပွဲပါ။ ပရိသတ်တွေရှေ့မှာ ဂိုးသွင်းယူနိုင်ခဲ့တာက ထူးခြားတဲ့ ခံစားချက် ပါ။ တိုးတက်မှုတွေ အများကြီးရှိသေးပေမယ့် နိုင်ပွဲ ၂ ပွဲနဲ့ ရာသီကို စတင်ရတာက အလွန်ကောင်းမွန်တဲ့ စတင်မှု တစ်ခုပါပဲ။ ပရိသတ်တွေရဲ့အားပေးမှုကို အမြဲတမ်း ကျေးဇူးတင်ပါတယ်။ ကွင်းထဲမှာ ကျနော့်နာမည်ကို သီဆိုနေ တဲ့ တစ်ယောက်ချင်းစီတိုင်းကို တန်ဖိုးထားတယ်ဆိုတာ ခင်ဗျားတို့သိပါတယ်”လို့ ပြောခဲ့တာပါ။

ဘိုင်ယန်မြူးနစ်အသင်းဟာ ရာသီသစ် ဘွန်ဒစ်လီဂါပွဲစဉ် ၂ အဖြစ် အော့စ်ဘတ်အသင်းနဲ့ ကစားခဲ့တာမှာ ၃ ဂိုး- ၁ ဂိုးနဲ့ အနိုင်ရခဲ့ပြီး ဟာရီကိန်းဟာ ဒီပွဲမှာ ဂျာမန်ချန်ပီယံအသင်းအတွက် ၂ ဂိုးသွင်းယူခဲ့တာ ဖြစ်ပါတယ်။ 

ဘိုင်ယန်မြူးနစ် အသင်းသားများကိုတွေ့ရစဉ်

ဟာရီကိန်းဟာ ဘွန်ဒစ်လီဂါ အဖွင့်ပွဲစဉ်မှာလည်း ဘိုင်ယန်မြူးနစ်အသင်းအတွက် ဂိုးသွင်း ယူနိုင်ခဲ့တာကြောင့် ဘွန်ဒစ်လီဂါ အဖွင့်ပွဲစဉ် ၂ ပွဲစလုံး ဂိုးသွင်းယူနိုင်ခဲ့တဲ့ ပထမဆုံး အင်္ဂလန်ကစားသမားအဖြစ် မှတ်တမ်း တင်နိုင်ခဲ့ တာပါ။

ဘိုင်ယန်မြူးနစ် အသင်းနည်းပြ တူချယ်လ်က အသင်းဟာ သူလိုချင်တဲ့ ပုံစံအတိုင်း မရောက်သေးပေမယ့် အနိုင်  ရလဒ်နဲ့ ထိုက်တန်တယ်လို့ ပွဲအပြီးမှာ ပြောခဲ့ပါတယ်။

တူချယ်လ်က “ကျနော်တို့ဟာ လေ့ကျင့်ရေးကွင်းမှာ လုပ်ခဲ့တဲ့ စွမ်းဆောင်ရည် အဆင့်မျိုးကို ရောက်ရှိအောင် မလုပ်နိုင်ခဲ့ပါဘူး။ ဒါကြောင့် ဒီပွဲမှာ ကျနော်တို့ ပထမဆုံး သွင်းယူခဲ့တဲ့ဂိုးလို ကံကောင်းခြင်းနဲ့ ဂိုးအချို့ လိုအပ်ပါ တယ်။ ဒုတိယပိုင်းမှာတော့ ကျနော်တို့ ပိုပြီးတည်ငြိမ်လာပြီး ပိုပြီးလည်း တိကျလာပါတယ်။ ကျနော်တို့ဟာ အခွင့် အရေးတွေ အများကြီး ဖန်တီးနိုင်ခဲ့တဲ့အတွက် ဒီထက်ပိုပြီး ဂိုးသွင်းယူနိုင်ခဲ့သင့်ပါတယ်”လို့ ပြောခဲ့တာပါ။

ဘိုင်ယန်မြူးနစ်အသင်းဟာ ဘွန်ဒစ်လီဂါပွဲစဉ် ၃ အဖြစ် မိုချန်ဂလာဘတ် အသင်းနဲ့ အဝေးကွင်းမှာ ယှဉ်ပြိုင်ရ မယ်လို့ သိရပါတယ်။

Source: BBC

CNI Sport News

၂၀၂၃ ခုနှစ်၊ သြဂုတ် ၂၈

လီဗာပူးလ်အသင်းနည်းပြ ကလော့ပ်က နယူးကာဆယ်အသင်းကို အရှုံးကနေ အနိုင်ရအောင် ကစားနိုင်ခဲ့ပြီး နောက် ဒီပွဲဟာ သူ့ရဲ့နည်းပြဘဝ အကောင်းဆုံးပွဲတွေထဲက တစ်ပွဲဖြစ်တယ်လို့ ပြောလိုက်ပါတယ်။

ကလော့ပ်က “ကျနော့်ရဲ့ နည်းပြဘဝ အကောင်းဆုံးပွဲ တစ်ပွဲဆိုတာ သေချာပါတယ်။ နည်းပြအနေနဲ့ ကျနော့်ရဲ့ ပွဲပေါင်း ၁,၀၀၀ မှာ ဒီလိုမျိုးပွဲကို တစ်ကြိမ်မှ မကစားခဲ့ဖူးပါဘူး။ ဒီလို အခိုက်အတန့်တွေဟာ ရှားပါးပြီး အလွန် ထူးခြားပါတယ်။ ကျနော်တို့ဟာ ဒုတိယသွင်းဂိုး ထပ်ပြီးမပေးဖို့၊ အာနိုးလ်အနေနဲ့ နောက်ထပ် အဝါကတ် မရခဲ့ဘူး ဆိုရင် ကျနော်တို့မှာ အခွင့်အရေး ရှိတယ်ဆိုတဲ့ အကြောင်းကို ပထမပိုင်းအပြီးမှာ ကစားသမားတွေကို ပြောခဲ့ပါ တယ်”လို့ ပွဲအပြီး သတင်းထောက်တွေကို ပြောခဲ့တာပါ။

ဒီပွဲမှာ လီဗာပူးလ်အသင်းဟာ နယူးကာဆယ်အသင်းကို ဦးဆောင်ဂိုး ခွင့်ပြုခဲ့ရသလို အသင်းခေါင်းဆောင် ဗန်ဒိုက် ကလည်း တိုက်ရိုက်အနီကတ်နဲ့ ထုတ်ပယ်ခံခဲ့ရတာကြောင့် မိနစ် ၇၀ နီးပါး တစ်ယောက်လျော့နဲ့ ကစားခဲ့ရတာ ဖြစ်ပါတယ်။ 

ဒါပေမယ့် လီဗာပူးလ်အသင်းဟာ နယူးကာဆယ်အသင်းကို အကောင်းဆုံး ကစားသွားနိုင်ခဲ့ပြီး လူစားဝင်လာတဲ့ တိုက်စစ်မှူး ဒါဝင်နူနက်ဇ်က ချေပဂိုးနဲ့ အနိုင်ဂိုးတွေ သွင်းယူပေးခဲ့တာကြောင့် လီဗာပူးလ်အသင်းက နယူးကာ ဆယ် အသင်းကို ၂ ဂိုး- ၁ ဂိုးနဲ့ အနိုင်ရရှိသွားခဲ့တာပါ။

လီဗာပူးလ်နဲ့ နယူးကာဆယ်အသင်း ယှဉ်ပြိုင်နေစဉ်

လီဗာပူးလ်အသင်းဟာ နယူးကာဆယ်အသင်းနဲ့ ပွဲအပါအဝင် ပရီးမီးယားလိဂ် ၂ ပွဲ ဆက်တိုက် တစ်ယောက်လျော့ နဲ့ ကစားခဲ့ရပေမယ့် နိုင်ပွဲရယူနိုင်ခဲ့တာ ဖြစ်ပါတယ်။ လီဗာပူးလ်အသင်းနည်းပြ ကလော့ပ်က ဗန်ဒိုက်ကို အနီကတ် မပြသင့်ဘူးလို့လည်း ပြောခဲ့ပါတယ်။

ကလော့ပ်က “ကျနော်ကတော့ ဒါကို အနီကတ်လို့ မထင်ပါဘူး။ ပြင်းထန်တဲ့ ထိတွေ့မှုလည်း မရှိပေမယ့် ဆုံးဖြတ် ချပြီး ပြောင်းလဲလို့ မရတဲ့အတွက် ကျနော် ဘာပြောလို့ရမှာလဲ။ ဒီအတွက် ၃ ပွဲပယ် ပြစ်ဒဏ်ကျခံရမယ်ဆိုရင် တော့ စိတ်ပျက်စရာပါပဲ”လို့ ပြောခဲ့တာပါ။

လီဗာပူးလ်အသင်းဟာ ပရီးမီးယားလိဂ် ၃ ပွဲ ကစားအပြီးမှာ ရမှတ် ၇ မှတ်နဲ့ အမှတ်ပေးဇယားအဆင့် ၄ နေရာမှာ ရပ်တည်နေပြီး ပွဲစဉ် ၄ အဖြစ် အက်စတွန်ဗီလာအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ သြဂုတ် ၂၆

ချယ်လ်ဆီးအသင်း တိုက်စစ်မှူး ဂျက်ဆန်ဟာ ပရီးမီးယားလိဂ်ရဲ့ အကောင်းဆုံး တိုက်စစ်မှူးတွေထဲက တစ်ဦး ဖြစ်လာနိုင်တယ်လို့ နည်းပြ ပိုချက်တီနိုက ပြောလိုက်ပါတယ်။

ပိုချက်တီနိုက “ဂျက်ဆန်ဟာ ငယ်ရွယ်တဲ့ ကစားသမားဖြစ်ပြီး မတူညီတဲ့ လိဂ်ကနေလာတာပါ။ ပရီးမီးယားလိဂ် ဟာ လိုက်လျောညီထွေဖြစ်အောင် လုပ်ဖို့အတွက် အမြဲတမ်း ခက်ခဲပါတယ်။ သူဟာ ဘောလုံးနဲ့အတူ ပြေးပြီး အသင်းဖော်တွေနဲ့ ချိတ်ဆက်မှုတွေ ပြုလုပ်တာမှာ ကောင်းမွန်ပါတယ်။ သူဟာ အချိန်ကြာတာနဲ့ အမျှ ပရီးမီးယားလိဂ်ရဲ့ အကောင်းဆုံး တိုက်စစ်မှူးတွေထဲက တစ်ဦးဖြစ်လာနိုင်ပါတယ်”လို့ Sky Sports ကို ပြောခဲ့ တာပါ။

ဂျက်ဆန်ဟာ အခုနွေရာသီ အပြောင်းအရွှေ့မှာ ဗီလာရီးရယ်လ် အသင်းကနေ ပေါင် ၃၂ သန်းနဲ့ ချယ်လ်ဆီး အသင်းထံ ပြောင်းရွှေ့လာခဲ့တာ ဖြစ်ပါတယ်။ 

ဂျက်ဆန်ဟာ ချယ်လ်ဆီးအသင်းရဲ့ ပရီးမီးယားလိဂ် ပွဲဦးထွက် ၂ ပွဲမှာ ခြေစွမ်းပြသ နိုင်ခဲ့ပေမယ့် ဂိုးပေါက် ပျောက်ဆုံး နေခဲ့တာပါ။ 

ပိုချက်တီနိုကိုတွေ့ရစဉ်

ဒါပေမယ့် လူတန်အသင်းကို ၃ ဂိုး- ဂိုးမရှိနဲ့ ဂိုးပြတ်အနိုင်ရခဲ့တဲ့ ပရီးမီးယားလိဂ် ပွဲမှာတော့ ဂျက်ဆန်ဟာ ချယ်လ်ဆီး အသင်းကစားသမားဘဝ ပထမဆုံးသွင်းဂိုးကို ရရှိသွားခဲ့ပါတယ်။

ဆီနီဂေါလက်ရွေးစင် အသင်းတိုက်စစ်မှူး ဂျက်ဆန်ကတော့ စတမ်းဖို့ဒ်ဘရစ်ချ်မှာ ဂိုးသွင်းယူနိုင်ခဲ့တာက အလွန် ကောင်းမွန်တဲ့ ခံစားချက်ဖြစ်တယ်လို့ ပြောခဲ့တာပါ။

ဂျက်ဆန်က “စတမ်းဖို့ဒ်ဘရစ်ချ် အိမ်ကွင်းမှာရှိတဲ့ ချယ်လ်ဆီးအသင်း ပရိသတ်တွေရဲ့ ရှေ့မှာ ဂိုးသွင်းယူနိုင်ခဲ့တာ က အလွန်ကောင်းမွန်တဲ့ ခံစားချက်ဖြစ်ပြီး ပျော်ရွှင်စရာလည်း ကောင်းပါတယ်။ နောက်ထပ် သွင်းဂိုးတွေ ထပ်ပြီး သွင်းယူကာ အသင်းကို အကူအညီပေးနိုင်ဖို့ မျှော်လင့်ထားပါတယ်”လို့ ပြောခဲ့ပါတယ်။

ချယ်လ်ဆီးအသင်းဟာ ရာသီသစ် ပရီးမီးယားလိဂ်ပြိုင်ပွဲ ၃ ပွဲ ကစားပြီးအချိန်မှာ ၁ ပွဲနိုင်၊ ၁ ပွဲသရေ၊ ၁ ပွဲရှုံးဆိုတဲ့ ရလဒ်ရရှိထားတာပါ။ 

လန်ဒန်ကလပ်ဟာ ကြားရက်ထဲမှာ ကာရာဘောင်းဖလား ဒုတိယအဆင့်အဖြစ် ဝင်ဘယ်လ်ဒန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ သြဂုတ် ၂၇

တောင်ပံကစားသမား ဗီနီစီးယက်စ်ဟာ ဆဲလ်တာဗီဂိုအသင်းနဲ့ စပိန်လာလီဂါပွဲစဉ်မှာ ရရှိခဲ့တဲ့ ခြေထောက်ကြွက် သား ပြဿနာကြောင့် လာမယ့် ဂီတာဖေးအသင်းနဲ့ အိမ်ကွင်းပွဲစဉ်ကို လွဲချော်မယ်လို့ နည်းပြ အန်ဆယ်လော့တီ က ပြောခဲ့ပါတယ်။

အန်ဆယ်လော့တီက “ဗီနီစီးယက်စ်ဟာ သူ့ခြေထောက်ရဲ့ ကြွက်သားတွေ နာကျင်နေသလို ခံစားနေရပါတယ်။ ဒါက အရမ်းကြီး စိုးရိမ်ရမယ့် အရာတော့ မဟုတ်ပါဘူး။ သူဟာ ဒီပွဲမှာ ဆက်ပြီးကစားဖို့ ကြိုးစားနေခဲ့ပေမယ့် သူ့ကိုယ်သူ စိတ်ပျက်စေခဲ့တာကြောင့် ကျနော်တို့က လူစားလဲဖို့ လုပ်ဆောင်ခဲ့ရတာ”လို့ သတင်းထောက်တွေကို ပြောခဲ့တာပါ။

ဗီနီစီးယက်စ်ဟာ ရီးရယ်လ်အသင်းက ဆယ်လ်တာဗီဂို အသင်းကို ၁ ဂိုး- ဂိုးရှိနဲ့ အနိုင်ရခဲ့တဲ့ပွဲစဉ်ရဲ့ ပွဲချိန် ၁၅ မိနစ် မှာ လူစားလဲခံခဲ့ရတာ ဖြစ်ပါတယ်။ ဗီနီစီးယက်စ်ဟာ ဒဏ်ရာကြောင့် ဂီတာဖေးအသင်းနဲ့ လာလီဂါပွဲစဉ်အပြင် ဘရာဇီးလ်အသင်းရဲ့ ၂၀၂၆ ကမ္ဘာ့ဖလား ခြေစစ်ပွဲတွေဖြစ်တဲ့ ပီရူး၊ ဘိုလီဗီးယားအသင်းတို့နဲ့ ပွဲစဉ်တွေကိုလည်း လွဲချော်နိုင်ဖွယ် ရှိနေတာပါ။ 

အန်ဆယ်လော့တီကို တွေ့ရစဉ်

ရီးရယ်လ်အသင်းဟာ ရာသီအစပိုင်းမှာတင် ဂိုးသမား ကော့တွိုက်စ်နဲ့ နောက်ခံလူ မီလီတာအိုတို့ကို ဒဏ်ရာ ကြောင့် ကာလကြာရှည် ဆုံးရှုံးခဲ့ရတာ ဖြစ်ပါတယ်။

ရီးရယ်လ်အသင်းနည်းပြ အန်ဆယ်လော့တီကတော့ ဒဏ်ရာရ ကစားသမားတွေ ရှိနေပေမယ့် အသင်းလူ စာရင်း အင်အားက တောင့်တင်းပြီးသားဖြစ်တဲ့အတွက် နောက်ထပ် ကစားသမားသစ်တွေ ခေါ်ယူသွားမှာ မဟုတ်ဘူးလို့ ပြောခဲ့ပါတယ်။

အန်ဆယ်လော့တီက “ဒါက ပြီးပြည့်စုံတဲ့ လူစာရင်းပါ။ ကျနော်တို့ဟာ ကောင်းမွန်စွာ စုစည်းထားတာကြောင့် ဗီနီစီးယက်စ်၊ ကော့တွိုက်စ်၊ မီလီတာအိုတို့ မပါဘဲ အနိုင်ယူနိုင်စွမ်း ရှိပါတယ်။ သူတို့တွေဟာ ကောင်းမွန်စွာ လုပ်နိုင်တဲ့သူတွေပါ”လို့ ပြောခဲ့တာပါ။

ရီးရယ်လ်အသင်းဟာ ရာသီသစ်လာလီဂါ အဖွင့်ပွဲစဉ် ၃ ပွဲစလုံး အနိုင်ရထားပြီး စပိန်လာလီဂါ အမှတ်ပေးဇယားကို ဦးဆောင်နေတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ သြဂုတ် ၂၆

အယ်လ်နာဆာအသင်းဟာ ရော်နယ်ဒိုရဲ့ ဟတ်ထရစ်ဂိုး အပါအဝင် အယ်လ်ဖာတက်ချ်အသင်းကို အဝေးကွင်းမှာ ၅ ဂိုး- ဂိုးမရှိနဲ့ ဂိုးပြတ်အနိုင်ရပြီး ရာသီသစ် ဆော်ဒီပရိုလိဂ်ပြိုင်ပွဲမှာ ပထမဆုံးနိုင်ပွဲ ရရှိသွားခဲ့ပါတယ်။

အယ်လ်နာဆာအသင်းအတွက် နောက်ထပ် သွင်းဂိုး ၂ ဂိုးကို မာနေးက သွင်းယူခဲ့ပြီး ရော်နယ်ဒိုဟာ ဟတ်ထရစ်ဂိုး အပြင် မာနေးရဲ့ သွင်းဂိုးကိုပါ ဖန်တီးပေးသွားခဲ့ပါတယ်။

အယ်လ်နာဆာအသင်းဟာ ရာသီသစ် ဆော်ဒီပရိုလိဂ် အဖွင့်ပွဲစဉ် ၂ ပွဲစလုံးမှာ အရေးနိမ့် ထားခဲ့တာကြောင့် ဒီပွဲမှာ အနိုင်ရဖို့ လိုအပ်ခဲ့လို့ အဓိက ကစားသမား အစုံအလင်နဲ့ ပွဲထွက်ခဲ့ပြီး ဂိုးပြတ် နိုင်ပွဲရရှိသွားခဲ့တာ ဖြစ်ပါတယ်။

ရော်နယ်ဒိုဟာ ဒီပွဲမှာ သွင်းယူခဲ့တဲ့ ဟတ်ထရစ်ကြောင့် ကစားသမားဘဝမှာ ဟတ်ထရစ် ရယူနိုင်ခဲ့တဲ့ အရေ အတွက် ၆၃ ကြိမ်အထိ ရှိလာခဲ့သလို လိဂ်ပြိုင်ပွဲမှာ ၂၁ ရာသီဆက်တိုက် ဂိုးသွင်းနိုင်တဲ့ မှတ်တမ်းကောင်းကိုလည်း ဆက်ပြီး ထိန်းသိမ်းနိုင်ခဲ့တာပါ။ 

ရော်နယ်ဒိုနဲ့ မာနေးကို တွေ့ရစဉ်

အယ်လ်နာဆာအသင်းဟာ ဒီပွဲမတိုင်ခင် ကြားရက်က ကစားခဲ့တဲ့ အာရှချန်ပီယံလိဂ် ပြိုင်ပွဲမှာလည်း နိုင်ပွဲရယူခဲ့ ပြီး အုပ်စုအဆင့် ယှဉ်ပြိုင်ခွင့် ရရှိခဲ့တာ ဖြစ်ပါတယ်။

ရော်နယ်ဒိုရဲ့ ဦးဆောင်မှုနဲ့အတူ အယ်လ်နာဆာအသင်းဟာ ဆော်ဒီပရိုလိဂ် ပြိုင်ပွဲ မစတင်ခင်က အာရပ်ကလပ် ချန်ပီယံများဖလားပြိုင်ပွဲမှာ ချန်ပီယံဆု ရယူထားနိုင်ခဲ့တာပါ။ 

ရော်နယ်ဒိုဟာ ပြီးခဲ့တဲ့ရာသီက အယ်လ်နာဆာအသင်းနဲ့ ဆုဖလားအောင်မြင်မှု မရယူနိုင်ခဲ့တာကြောင့် အခုရာသီ သစ်မှာတော့ ရယူနိုင်တဲ့ ဆုဖလားအားလုံးကို ရယူသွားဖို့ ပစ်မှတ်ထားနေတာ ဖြစ်ပါတယ်။ 

အခုဆိုရင် ရော်နယ်ဒိုဟာ အခုရာသီသစ်မှာ အယ်လ်နာဆာအသင်းအတွက် ၉ ပွဲ ပါဝင်ကစားထားပြီး ၉ ဂိုး သွင်းယူထားပါတယ်။

အယ်လ်နာဆာအသင်းဟာ သြဂုတ် ၂၉ ရက်မှာ ဆော်ဒီပရိုလိဂ်ပွဲစဉ်အဖြစ် အယ်လ်ရှာဘတ်အသင်းနဲ့ အိမ်ကွင်းမှာ ယှဉ်ပြိုင်ရမှာ ဖြစ်ပါတယ်။

Source: Daily Mail