- By CNI
- Category: အားကစား
- Hits: 772
CNI Sport News
၂၀၂၃ ခုနှစ်၊ ဇန်နဝါရီ ၁၆
အာဆင်နယ်အသင်းနည်းပြ အာတီတာက မြောက်လန်ဒန် ဒါဘီပြိုင်ဘက် စပါးအသင်းကို အနိုင်ရပြီး ပရီးမီးယား လိဂ်မှာ ၈ မှတ် ဖြတ်နိုင်ခဲ့ပြီးနောက် အချိန်တိုင်းကို ပျော်ရွှင်စွာ ဆင်နွှဲကြဖို့ အသင်းကို ပြောလိုက်ပါတယ်။
အာတီတာက “အကြောင်းပြချက် ၂ ခုကြောင့် ကျနော်အလွန်ပျော်ရွှင် နေပါတယ်။ တစ်ခုက စိတ်ပိုင်းဖြတ်ထားမှု တွေ၊ အရည်အသွေးတွေ အများကြီးကို တွေ့မြင်ခဲ့ရသလို ကျနော်တို့ဟာ ဒီကိုလာပြီး ပွဲကို အမှန်တကယ် အနိုင်ရ ချင်ခဲ့တာပါ။
နောက်တစ်ခုကတော့ ကျနော်တို့ရဲ့ လုပ်ဆောင်မှုတွေနဲ့ လူအများအပြားကို ပျော်ရွှင်အောင် လုပ်နိုင်ခဲ့ ပါတယ်။ ပရိသတ်တွေနဲ့ အောင်ပွဲခံရတာက တကယ်ကိုကောင်းမွန်တဲ့ ခံစားချက်ဖြစ်ပြီး ဒီလိုတွေခံစားရတာက အဓိပ္ပါယ် အများကြီးရှိပါတယ်။
အဝတ်လဲခန်းထဲ ရောက်သွားချိန်မှာ အသင်းသားတွေရဲ့ ပျော်ရွှင်မှု ခံစားခဲ့ရပါ တယ်”လို့ ပြောခဲ့တာပါ။
အာဆင်နယ်အသင်းဟာ ဒီပွဲမှာ စပါးအသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ဒါဟာ စပါးကွင်းမှာ ၂၀၁၄ ခုနှစ်၊ မတ်လ နောက်ပိုင်းမှာ ပထမဆုံး နိုင်ပွဲရယူနိုင်ခဲ့တာ ဖြစ်ပါတယ်။
အာဆင်နယ်အသင်းဟာ ဒီရာသီ ပရီးမီးယားလိဂ် ၁၈ ပွဲ ကစားအပြီးမှာ ၁၅ ပွဲထိ အနိုင်ရထားကာ ရမှတ် ၄၇ မှတ် အထိ ရယူထားနိုင်ခဲ့တာပါ။
စပါးအသင်းဘက်ကို အာဆင်နယ်အသင်းက ဂိုးသွင်းနေစဉ်
လန်ဒန်ကလပ်ဟာ အဆင့် ၂ နေရာက မန်စီးတီးအသင်းကို ၈ မှတ်အထိ ဖြတ်ထားနိုင်တာကြောင့် အခုနှစ်ရာသီ ပရီးမီးယားလိဂ်ဖလား ရနိုင်ဖို့ အခြေအနေ ကောင်းနေခဲ့တာ ဖြစ်ပါတယ်။
အာတီတာက “ကျနော်တို့ရဲ့ ကစားပုံ၊ ပြုမူနေထိုင်ပုံ၊ သွားနေတဲ့ပုံစံနဲ့ အတူလက်တွဲမှုတွေကြောင့် ဒီနေရာမှာ ရောက်နေတယ်ဆိုတာ သိပါတယ်။ မနက်ဖြန်မှာလည်း ဒီအတိုင်းပဲ ဆက်ပြီး ကြိုးစားရမယ်ဆိုတာကို ကျနော်တို့ မေ့ထားလို့ မရပါဘူး။ ဒီပွဲကို အနိုင်ရတာက ကျနော်တို့အတွက် အဓိပ္ပါယ်တွေ အများကြီး ရှိပါတယ်။ ၈ မှတ်ဆို တာက အလွန်ကောင်းမွန်တဲ့ အနေအထားပါ။ အဲ့ဒါကြောင့် ကျနော်တို့ဟာ အချိန်တိုင်းကို ပျော်ရွှင်စွာနဲ့ သွားကြ မယ်”လို့ ပြောခဲ့တာပါ။
အာဆင်နယ်နဲ့ စပါးအသင်းတို့ ပွဲစဉ်အပြီးမှာ အာဆင်နယ် ဂိုးသမား ရမ်စဒေးလ်ဟာ စပါးပရိသတ်ရဲ့ တိုက်ခိုက်မှုနဲ့ ကြုံတွေ့ခဲ့ရပါသေးတယ်။
ဒီပရိသတ်ဟာ ရမ်စဒေးလ် ဂိုးတိုင် အနောက်ဘက် ရောက်ရှိလာချိန်မှာ ကန်ကျောက်ခဲ့တာပါ။ စပါးအသင်း ကတော့ ဒီဖြစ်ရပ်နဲ့ ပတ်သက်ပြီး စုံစမ်းစစ်ဆေးမှုတွေ ပြုလုပ်ကာ ပြင်းပြင်းထန်ထန် အရေးယူသွားမယ်လို့ ထုတ်ပြန်ထားပါတယ်။
အာဆင်နယ်အသင်းဟာ အခုလာမယ့် အပတ်မှာတော့ ပရီးမီးယားလိဂ် ပွဲစဉ်အဖြစ် ယူနိုက်တက်အသင်းကို အိမ်ကွင်းမှာ လက်ခံယှဉ်ပြိုင်ရမှာ ဖြစ်ပါတယ်။
Source: CNA
- By CNI
- Category: အားကစား
- Hits: 439
CNI Sport News
၂၀၂၃ ခုနှစ်၊ ဇန်နဝါရီ ၁၆
ဘာစီလိုနာအသင်းဟာ စပိန်စူပါဖလားဗိုလ်လုပွဲအဖြစ် ရီးရယ်လ်အသင်းနဲ့ ကစားခဲ့တာမှာ ၃ ဂိုး- ၁ ဂိုးနဲ့ အနိုင်ရပြီး ချန်ပီယံဆုကို ရယူနိုင်ခဲ့တာဖြစ်ပါတယ်။
ဘာစီလိုနာအသင်းအတွက် ဂိုးတွေကို ဂါဗီ၊ လီဝန်ဒေါစကီးနဲ့ ပီဒရီတို့က သွင်းယူခဲ့တာဖြစ်ပြီး ရီးရယ်လ်အတွက် ချေပဂိုးကို ပွဲချိန်မိနစ် ၉၀ ပြည့်ပြီး နာကျင်အချိန်ပိုမှာ ဘန်ဇီမာက သွင်းယူခဲ့တာပါ။ စပိန်စူပါဖလားဟာ ဇာဗီ အတွက်တော့ ဘာစီလိုနာနည်းပြဘ၀ ပထမဆုံးရယူနိုင်ခဲ့တဲ့ ဆုဖလားလည်းဖြစ်ခဲ့ပါတယ်။ ဘာစီလိုနာအသင်း ဟာ စပိန်စူပါဖလားကို ၂၀၁၈ က နောက်ဆုံးရယူခဲ့တာကြောင့် ၅ နှစ်အကြာမှ ပထမဆုံးအကြိမ် ဒီဆုဖလားကို ပြန်လည်ရယူနိုင်ခဲ့တာပါ။
ဘာစီလိုနာအသင်းနည်းပြ ဇာဗီက ဒီပွဲအနိုင်ရခဲ့တာကြောင့် သူ့ရဲ့ ကစားသမားတွေဟာ မျှတမှုမရှိတဲ့ ဝေဖန်မှု တွေကနေ လွတ်မြောက်လာခဲ့ပြီလို့ ပြောခဲ့ပါတယ်။
ဇာဗီက “ကျနော်တို့မှာ တကယ်ကိုကောင်းမွန်တဲ့ မျိုးဆက်တွေရှိပြီး ဆုဖလားရဖို့အတွက် သူတို့ရဲ့ ဆာလောင်မှု တွေကို ခင်ဗျားတို့ မြင်တွေ့ရမှာပါ။ကစားသမားတွေအတွက် ကျနော်ပျော်ရွှင်ပါတယ်။ သူတို့တွေဟာ မျှတမှုမရှိတဲ့ ဝေဖန်မှုတွေ အများကြီး ခံထားရပြီးပါပြီ။ဒီနေ့မှာတော့ သူတို့တွေ လွတ်မြောက်သွားခဲ့ပါပြီ။ ဒီဆုဖလားဟာ ပရိသတ်တွေအတွက်လည်း အရေးပါတယ်။မကြာသေးခင်က နှစ်တွေမှာ မက်ဆီထွက်ခွာသွားမှု၊ ဘဏ္ဍာရေး အခက်အခဲစတာတွေကို မြင်တွေ့ခဲ့ရပါတယ်။ဒါက အားလုံးရဲ့ ပထမဆုဖလားဖြစ်မယ်လို့ ထင်ကြောင်း” ပြောခဲ့ တာပါ။
ဘာစီလိုနာအသင်းဟာ ပြီးခဲ့တဲ့နှစ်က ဆုဖလားလက်မဲ့ဖြစ်ခဲ့ပြီးနောက် ဒီရာသီမှာ လီဝန်ဒေါစကီးအပါအဝင် ကစားသမားတချို့ကို အားဖြည့်ခဲ့ပြီး အသင်းကို ပြန်လည်တည်ဆောက်ခဲ့တာဖြစ်ပါတယ်။ စပိန်ကလပ်ဟာ ချန်ပီယံလိဂ်ကနေ ထွက်ခွာခဲ့ရပေမယ့် နောက်ပိုင်းမှာ ရလဒ်ပိုင်းတွေ ပြန်လည်ကောင်းမွန်လာခဲ့ပြီး စပိန်လာလီဂါ အမှတ်ပေးဇယားမှာ ရီးရယ်လ်အသင်းထက် ၃ မှတ်အသာရကာ ရပ်တည်နေတာပါ။
ဘာစီလိုနာအသင်းဟာ ကြားရက်မှာ ကိုပါဒယ်ရေးဖလား ၁၆ သင်းအဆင့်ပွဲစဉ်အဖြစ် အေဒီဆူတာအသင်းနဲ့ ယှဉ်ပြိုင်ရမှာဖြစ်ပြီး ဒီပွဲပြီးရင်တော့ ဂီတာဖေးနဲ့ လာလီဂါပွဲစဉ် ယှဉ်ပြိုင်ရမှာ ဖြစ်ပါတယ်။
Source:Espn
- By CNI
- Category: အားကစား
- Hits: 480
CNI Sport News
၂၀၂၃ ခုနှစ်၊ ဇန်နဝါရီ ၁၄
စပါးအသင်းနည်းပြ ကွန်တီက တိုက်စစ်မှူး ဟာရီကိန်းဟာ အသင်းရဲ့ ဂိုးသွင်းအများဆုံးကစားသမားဆိုတဲ့ စံချိန်အပါအဝင် စံချိန်အားလုံးကို ချိုးဖျက်လိမ့်မယ်လို့ ပြောလိုက်ပါတယ်။
ကွန်တီက “ကျနော်တို့ဟာ ကမ္ဘာ့အဆင့်တိုက်စစ်မှူးတစ်ဦးအကြောင်းကို ပြောနေတာဖြစ်ပြီး သူဟာ စံချိန် တိုင်းကို ကျော်ဖြတ်နိုင်မယ်ဆိုတာ သေချာပါတယ်။သူနဲ့ ဒါက ထိုက်တန်တယ်လို့ ထင်ပါတယ်။သူဟာ စံချိန် တွေကို ကျော်ဖြတ်ဖို့အတွက် မယုံနိုင်စရာကောင်းတဲ့အရာတွေကို လုပ်ဆောင်နေတယ်ဆိုတာ သေချာပါတယ်” လို့ သောကြာနေ့က သတင်းထောက်တွေနဲ့ တွေ့ဆုံချိန်ပြောခဲ့တာပါ။
ဟာရီကိန်းဟာ စပါးအသင်းအတွက် ၂၆၅ ဂိုးသွင်းယူထားပြီး အသင်းရဲ့ ဂိုးသွင်းအများဆုံးကစားသမား ဖြစ်တဲ့ ဂျင်မီဂရေ့ဗ်ရဲ့ စံချိန်ကို လိုက်မှီဖို့ ၁ ဂိုးသာ လိုတော့တာ ဖြစ်ပါတယ်။ဟာရီကိန်းဟာ အာဆင်နယ်နဲ့ မြောက် လန်ဒန်ဒါဘီပွဲစဉ်မှာ ဂိုးသွင်းနိုင်ခဲ့မယ်ဆိုရင် စပါးအသင်းရဲ့ ဂိုးသွင်းအများဆုံးကစားသမားအဖြစ် ဂျင်မီဂရေ့ဗ်နဲ့ ပူးတွဲရပ်တည်တော့မှာပါ။ဒါ့အပြင် ဟာရီကိန်းဟာ အင်္ဂလန်အသင်းရဲ့ ဂိုးသွင်းအများဆုံး ဝိန်းရွန်နီနဲ့လည်း ၅၃ ဂိုး စီ တူညီသွားခဲ့ပြီဖြစ်ပါတယ်။
အသက် ၂၉ နှစ်အရွယ်ရှိ ဟာရီကိန်းဟာ ဒီရာသီမှာလည်း စပါးအသင်းရဲ့ တိုက်စစ်ကို ဦးဆောင်နေရတာဖြစ်ပြီး ၂၆ ပွဲ ကစားအပြီးမှာ ၁၇ ဂိုးသွင်းယူထားတာပါ။စပါးအသင်းရဲ့ တိုက်စစ်ကစားသမားတွေဖြစ်တဲ့ ကူလူဆက်ဗ်စကီးနဲ့ ရစ်ချာလီဆန်တို့ဟာ ဒဏ်ရာတွေကြောင့် အနားယူနေခဲ့ရသလို ဆွန်ဟောင်မင်ကလည်း ခြေစွမ်းပိုင်းကျဆင်းနေ တာကြောင့် အင်္ဂလန်အသင်းခေါင်းဆောင်ဟာ တိုက်စစ်ပိုင်းကို ပိုပြီးတာဝန်ယူနေရတာဖြစ်ပါတယ်။ ဒဏ်ရာ ကြောင့် အနားယူနေရတဲ့ ကူလူဆက်ဗ်စကီးဟာ အာဆင်နယ်နဲ့ ပွဲမှာ ပြန်လည်ပါဝင်နိုင်မယ်လို့ ကွန်တီက ပြောခဲ့တာပါ။
ကွန်တီက “ကူလူဆက်ဗ်စကီးဟာ ပြီးခဲ့တဲ့ရက်အနည်းငယ်က ကျနော်တို့နဲ့အတူ လေ့ကျင့်ရေးအစီအစဉ်ရှိခဲ့ပါ တယ်။သူကစားဖို့ အဆင်သင့်ဖြစ်နေပြီလို့ ထင်ပါတယ်။ရစ်ချာလီဆန်နဲ့ ဘန်တန်ကာတို့လည်း အခြေအနေ တိုးတက်လာပါပြီ။ကျနော်တို့ဘက်က စိတ်ရှည်ဖို့ အရေးကြီးပါတယ်”လို့ ပြောခဲ့တာဖြစ်ပါတယ်။
စပါးအသင်းဟာ လက်ရှိပရီးမီးယားလိဂ်ပြိုင်ပွဲမှာ ၁၈ ပွဲကစားထားပြီး ရမှတ် ၃၃ မှတ်နဲ့ အမှတ်ပေးဇယား အဆင့် ၅ နေရာမှာရပ်တည်နေတာဖြစ်ပါတယ်။
Source:ChannelNewsAsia
- By CNI
- Category: အားကစား
- Hits: 431
CNI Sport News
၂၀၂၃ ခုနှစ်၊ ဇန်နဝါရီ ၁၄
ရော်နယ်ဒိုဟာ စပိန်စူပါဖလားဗိုလ်လုပွဲမတိုင်ခင် ဆော်ဒီမှာ လေ့ကျင့်မှုတွေပြုလုပ်နေတဲ့ အသင်းဟောင်း ရီးရယ်လ်အသင်းဆီ သွားရောက်လည်ပတ်ခဲ့တာဖြစ်ပါတယ်။
ရီးရယ်လ်အသင်းဟာ ဆော်ဒီမှာ ကျင်းပနေတဲ့ စပိန်စူပါဖလားပြိုင်ပွဲကို ဝင်ရောက်ယှဉ်ပြိုင်နေတာဖြစ်ပြီး သူတို့ရဲ့ ဂန္တဝင်တိုက်စစ်မှူး ရော်နယ်ဒိုကလည်း ဆော်ဒီကလပ် အယ်လ်နာဆာအသင်းကို ပြောင်းရွှေ့ခဲ့တာပါ။ အဲဒါကြောင့် ရော်နယ်ဒိုဟာ သူ့ရဲ့ အသင်းဖော်ဟောင်းတချို့နဲ့ နည်းပြ အန်ဆယ်လော့တီတို့ကို လာရောက် နှုတ်ဆက်ခဲ့တာဖြစ်ပါတယ်။
ဗီနီစီးယတ်စ်၊ ရိုဒရီဂိုအပါအဝင် ရီးရယ်လ်ကစားသမားတချို့ကလည်း ရော်နယ်ဒိုရဲ့ အယ်လ်နာဆာအသင်းထံ လာရောက်လည်ပတ်ခဲ့တာပါ။ရော်နယ်ဒိုဟာ ရီးရယ်လ်အသင်းမှာ ၂၀၀၉ ကနေ ၂၀၁၈ အထိ ၉ ရာသီကြာ ကစား ခဲ့ပြီး ကစားသမားဘ၀ အောင်မြင်မှုအများအပြား ရယူနိုင်ခဲ့တာဖြစ်ပါတယ်။ပေါ်တူဂီအသင်း ခေါင်းဆောင်ဟာ ရီးရယ်လ်အသင်းအတွက် ၄၃၈ ပွဲကစားပြီး ၄၅၀ ဂိုးသွင်းယူကာ ချန်ပီယံလိဂ် ၄ ကြိမ်အပါအဝင် ဆုဖလား ၁၄ လုံး ရယူနိုင်ခဲ့တာပါ။
ရော်နယ်ဒိုဟာ အယ်လ်နာဆာအသင်းကို မပြောင်းခင်မှာလည်း ရီးရယ်လ်အသင်းမှာ လေ့ကျင့်မှုတွေပြုလုပ်ပြီး သူ့ရဲ့ ကြံ့ခိုင်မှုပိုင်းကို ထိန်းသိမ်းခဲ့တာဖြစ်ပါတယ်။ရော်နယ်ဒိုက ဘာစီလိုနာအသင်းနဲ့ ကစားမယ့် စပိန်စူပါဖလား ဗိုလ်လုပွဲမှာ ရီးရယ်လ်အသင်း ကံကောင်းစေဖို့ ဆန္ဒပြုခဲ့သေးတာပါ။ ရီးရယ်လ်အသင်းဟာ ဆီမီးဖိုင်နယ်မှာ ဗလင်စီယာအသင်းကို ပင်နယ်တီအဆုံးအဖြတ်နဲ့ အနိုင်ရခဲ့ပြီးနောက် ဗိုလ်လုပွဲအဖြစ် ဘာစီလိုနာအသင်းနဲ့ ဇန်နဝါရီ ၁၅ ရက်မှာ ယှဉ်ပြိုင်ရမှာဖြစ်ပါတယ်။
ရော်နယ်ဒိုကတော့ ဇန်နဝါရီ ၁၉ ရက် ပီအက်စ်ဂျီအသင်းနဲ့ ကစားမယ့် ခြေစမ်းပွဲမှာ ဆော်ဒီပွဲဦးထွက်အဖြစ် ပါဝင်ဖို့ ရှိနေတာပါ။ရော်နယ်ဒိုဟာ ဒီပွဲအပြီးရက်ပိုင်းမှာ ကစားမယ့် အယ်လ်အီတီဖတ်နဲ့ ပွဲမှသာ အယ်လ်နာဆာ အသင်းအတွက် ပွဲထွက်ပါဝင်မှာဖြစ်တယ်လို့ သိရပါတယ်။
Source:Gaol
- By CNI
- Category: အားကစား
- Hits: 457
CNI Sport News
၂၀၂၃ ခုနှစ်၊ ဇန်နဝါရီ ၁၄
မြန်မာပြည်ဖွား MMA တိုက်ခိုက်ရေးသမား အောင်လအန်ဆန်းဟာ ထိုင်းမှာ ထိုးသတ်ခဲ့တဲ့ ONE Fight Night 6 ပွဲစဉ်မှာ ဘရာဇီးလ်ဖိုက်တာ ဂျီဘာတိုဂယ်လ်ဗိုကို အနိုင်ရပြီးနောက် ငြိမ်းချမ်းရေးအတွက် အားလုံး ဆုတောင်းပေး ဖို့ ပွဲအပြီးမှာ ပြောသွားခဲ့ပါတယ်။
အောင်လအန်ဆန်းက “မြန်မာပရိသတ်တွေကို ကျနော်အမြဲတမ်း အရမ်းကျေးဇူးတင်တယ်။ အားလုံးကို အရမ်း ချစ်တယ်။ ဒီအရင်၂ နှစ်က ကျနော့်အတွက် အရမ်းခက်ခဲတယ်၊ စိတ်လည်း အရမ်းကျတယ်။ ဒါပေမယ့် ပြောချင်တာက အားလုံး စိတ်ကိုတင်းတင်းထားပါ။ ငြိမ်းချမ်းရေးက ကျနော်တို့အတွက် အရေးကြီးဆုံးပဲ။ ကျနော့်ရဲ့ အသက်တာထဲမှာ ငြိမ်းချမ်းရေးပေးတာ ဘုရားတစ်ဦးပဲ ပေးတယ်။ အဲ့ဒါကြောင့် အားလုံးဆက်ပြီးတော့ ဆုတောင်း ပါ။ ငြိမ်းချမ်းရေးအတွက် အားလုံးဆုတောင်းပေးပါလို့ တိုက်တွန်းချင်ကြောင်း” ပြောသွားခဲ့ပါတယ်။
ဇန်နဝါရီ ၁၄ ရက်နေ့ မနက်ပိုင်းက ထိုးသတ်ခဲ့တဲ့ ဒီပွဲမှာ အောင်လအန်ဆန်းက သူ့ရဲ့ အားပါတဲ့ လက်သီးချက် တွေနဲ့ ပြိုင်ဘက်ကို တရစပ်ထိုးပြီး ဒိုင်ပွဲရပ်နဲ့ ပွဲသိမ်းခဲ့တာ ဖြစ်ပါတယ်။
အောင်လအန်ဆန်းနဲ့ ဂျီဘာတိုဂယ်လ်ဗို ထိုးသတ်နေစဉ်
အောင်လအန်ဆန်းဟာ ဂျီဘာတိုဂယ်လ်ဗိုကို ပထမအချီ ၁ မိနစ် ၂၉ စက္ကန့်နဲ့ အနိုင်ရရှိခဲ့တာပါ။ ပြီးခဲ့တဲ့ နိုဝင်ဘာလမှာ ထိုးသတ်ခဲ့တဲ့ ပွဲမှာလည်း အောင်လအန်ဆန်းဟာ အနိုင်ရထားတာကြောင့် ၂ ပွဲဆက် အနိုင်နဲ့ မစ်ဒယ်ဝိတ် ချန်ပီယံဆုကို ပြန်လည်ရယူဖို့ စိတ်အားထက်သန်နေပြီ ဖြစ်ပါတယ်။
အောင်လအန်ဆန်းက ဒီပွဲအပြီးမှာ ဘယ်ပြိုင်ဘက်မဆို ထိုးသတ်ဖို့ အဆင်သင့် ဖြစ်နေပြီလို့လည်း ပြောသွားခဲ့ တာပါ။ ဒီနိုင်ပွဲဟာ အောင်လအန်ဆန်းအတွက် MMA ကစားသမားဘဝ ထိုးသတ်ခဲ့တဲ့ ပွဲပေါင်း ၄၃ ပွဲမှာ ၂၉ ပွဲ မြောက် အနိုင်ရတဲ့ပွဲ ဖြစ်ခဲ့ပါတယ်။
ဒါ့အပြင် ဒီပွဲဟာ အောင်လအန်ဆန်းအတွက် ပထမအချီနဲ့ အဆုံးသတ်နိုင်ခဲ့တဲ့ ပွဲ ၂၀ မြောက်ပွဲလည်း ဖြစ်လာခဲ့ တာပါ။
အောင်လအန်ဆန်းဟာ ONE Championship ပြိုင်ပွဲမှာ မစ်ဒယ်ဝိတ်နဲ့ လိုက်ဟဲဗီးဝိတ် ချန်ပီယံဆု ၂ ခုကို ရယူ ထားနိုင်ခဲ့တဲ့သူဖြစ်ပြီး ၂၀၂၀ နဲ့ ၂၀၂၁ မှာ ရိုင်နီယာကို အရေးနိမ့်ပြီး ချန်ပီယံခါးပတ်တွေကို လက်လွှတ်ခဲ့ရတာ ဖြစ်ပါတယ်။
- By CNI
- Category: အားကစား
- Hits: 452
CNI Sport News
၂၀၂၃ ခုနှစ်၊ ဇန်နဝါရီ ၁၃
အသင်းဟောင်း ယူနိုက်တက်ဟာ ဆုဖလားတွေရယူနိုင်ဖို့ အာမခံချက် မရှိတာကြောင့် ထိပ်တန်းကစားသမားတွေ အသင်းထံ လာမှာမဟုတ်ဘူးလို့ အဲရစ်ကန်တိုနာက သတိပေးလိုက်ပါတယ်။
အဲရစ်ကန်တိုနာက “ဖာဂူဆန် လက်ထက်တုန်းကဆိုရင် သူသာလိုချင်ရင် ကမ္ဘာ့အကောင်းဆုံး ကစားသမားလည်း ယူနိုက်တက်ဆီ လာတာပါပဲ။ ဘာလို့လဲဆိုရင် ယူနိုက်တက်က အင်္ဂလန်နဲ့ ဥရောပမှာ အောင်ပွဲတွေ ရယူနေလို့ပါ။ ယူနိုက်တက်က ကမ္ဘာ့အကြီးမားဆုံး အသင်းဖြစ်ပြီး ဘယ်လို ကစားသမားမဆိုဝယ်ဖို့ ငွေလည်းရှိပါတယ်။ ကမ္ဘာ့ အကောင်းဆုံး ကစားသမားတွေက အနိုင်ရချင်တဲ့ အသင်းမှာပဲ ကစားချင်တာကြောင့် အခုဆိုရင် ကွာခြားသွားပါ ပြီ”လို့ ပြောခဲ့တာပါ။
ယူနိုက်တက်အသင်းဟာ ဆုဖလားလက်မဲ့ ရာသီကို ၅ ရာသီလောက် ဖြတ်သန်းခဲ့တဲ့အပြင် ချန်ပီယံလိဂ် ဝင်ခွင့် အတွက်လည်း ကြိုးစားနေတဲ့ အခြေအနေတွေကြောင့် နာမည်ကျော် ကစားသမားတွေကို မဆွဲဆောင်နိုင်ခဲ့တာ ဖြစ်ပါတယ်။
အဲရစ်ကန်တိုနာကိုတွေ့ရစဉ်
အဲ့ဒါကြောင့် အောင်မြင်မှုတွေနဲ့ ဝေးကွာနေပြီး ဒီရာသီနည်းပြ အဲရစ်တန်ဟတ် လက်အောက်မှာ အသင်းဟာ လမ်းကြောင်းမှန်ပေါ် ပြန်လည်ရောက်စ ပြုနေတာပါ။
အဲရစ်ကန်တိုနာ ယူနိုက်တက်အနေနဲ့ လီဗာပူးလ်ရဲ့ နည်းလမ်းတွေကို ကူးယူပြီး အရည်အချင်းရှိတဲ့ ကစားသမား တွေကို ကမ္ဘာ့ချန်ပီယံဖြစ်အောင် ပြုစုပျိုးထောင်သင့်တယ်လို့ ပြောခဲ့ပါတယ်။
အဲရစ်ကန်တိုနာက “ လီဗာပူးလ်လို လိမ္မာပါးနပ်ရပါမယ်။ သူတို့ဟာ မာနေးနဲ့ ဆာလတ်ကို ခေါ်ယူခဲ့တယ်။ ဒါက ကမ္ဘာ့ အကောင်းဆုံး ကစားသမားတွေကို ခေါ်ယူခဲ့တာ မဟုတ်ဘူး။ ဒါပေမယ့် သူတို့ဟာ ကြီးကျယ်တဲ့အသင်း၊ ကောင်းမွန်တဲ့ အားပေးမှုတွေနဲ့ သူတို့ဟာ အရာရာကို အနိုင်ရယူခဲ့ပါတယ်။ ပြီးတော့ မာနေးနဲ့ ဆာလတ်က ကမ္ဘာ့ အကောင်းဆုံး ကစားသမား ဖြစ်လာခဲ့ပါတယ်။ ဒါက ယူနိုက်တက်အတွက် ကောင်းမွန်တဲ့ စံနမူနာပါပဲ”လို့ ပြောခဲ့ တာ ဖြစ်ပါတယ်။
ယူနိုက်တက်အသင်းဟာ လက်ရှိအချိန်မှာ ပြိုင်ပွဲစုံ ၈ ပွဲဆက် နိုင်ပွဲရနေပြီး ပရီးမီးယားလိဂ်မှာ အဆင့် ၄၊ ကာရာဘောင်းဖလား ဆီမီးဖိုင်နယ်၊ အက်ဖ်အေဖလားနဲ့ ယူရိုပါလိဂ်ပြိုင်ပွဲတွေရဲ့ လမ်းကြောင်းတွေပေါ်မှာ ရှိနေခဲ့တာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 453
CNI Sport News
၂၀၂၃ ခုနှစ်၊ ဇန်နဝါရီ ၁၃
ဘာစီလိုနာအသင်း ဂန္တဝင်ကစားသမား ရော်နယ်ဒင်ဟိုရဲ့ သားဖြစ်သူဟာ ဘာစီလိုနာယူ-၁၉ အသင်းနဲ့ ခြေစွမ်းပိုင်းစမ်းသပ်ခံနေတယ်လို့ သိရပါတယ်။
ရော်နယ်ဒင်ဟိုရဲ့ သားဖြစ်သူ မန်ဒက်ဇ်ဒီအဆစ်ဟာ ဘရာဇီးကလပ်ခရူဇီယိုအသင်းနဲ့ ချုပ်ဆိုထားတဲ့စာချုပ်ကို ဖျက်သိမ်းပြီး ဘာစီလိုနာအသင်းနဲ့ ခြေစွမ်းပိုင်းစမ်းသပ်မှုတွေပြုလုပ်နေတာလို့ ESPN က ဖော်ပြထားတာပါ။ မန်ဒက်ဇ်ဒီအဆစ်အနေနဲ့ နူးကမ့်ပ်မှာ အထင်ကြီးအောင်လုပ်နိုင်ခဲ့မယ်ဆိုရင် ဂျူဗီနေးလ်အေအသင်းနဲ့ လက်မှတ် ထိုးနိုင်တယ်လို့ သိရပါတယ်။
ရော်နယ်ဒင်ဟိုဟာ ဘာစီလိုနာအသင်းမှာ ကစားချိန်ပြသခဲ့တဲ့ ခြေစွမ်းတွေကြောင့် ကလပ်အသင်းရဲ့ ဂန္တဝင် ကစားသမားတစ်ဦးအဖြစ် သတ်မှတ်ခံထားရတာပါ။သူဟာ ဘာစီလိုနာအသင်းနဲ့ ချန်ပီယံလိဂ်၊ လာလီဂါဖလား ၂ ကြိမ်တို့ကို ရယူနိုင်ခဲ့သလို ဘောလွန်းဒီအောဆုကိုလည်း စပိန်မှာ ကစားချိန် ရရှိခဲ့တာ ဖြစ်ပါတယ်။ မန်ဒက်ဇ်ဒီ အဆစ်အနေနဲ့ ဘာစီလိုနာလူငယ်အသင်းနဲ့ လက်မှတ်ထိုးနိုင်ခဲ့မယ်ဆိုရင် ဖခင်ဖြစ်သူ ခြေရာကို လိုက်နင်းနိုင်မှာပါ။
ကမ္ဘာပေါ်မှာ လူသိများတဲ့ ဘာစီလိုနာအကယ်ဒမီဟာ ပါရမီရှိကြတဲ့ ဂါဗီ၊ အန်ဆုဖာတီ၊ ဘလိတ်တို့လို လူငယ် ကစားသမားတွေကို မွေးထုတ်နိုင်ခဲ့ပြီး အသင်းကြီးဆီပို့ဆောင်နိုင်ခဲ့တာဖြစ်ပါတယ်။ ရော်နယ်ဒင်ဟိုရဲ့သားဖြစ်သူ ဟာ ခရူဇီယိုအသင်းအပြင် ဘရာဇီးလ်ကလပ်တွေဖြစ်တဲ့ ဖလာမင်ဂို၊ ဗတ်စကိုဒဂါးမားနဲ့ ဘိုအာဗစ်စတာ လူငယ် အသင်းတွေမှာလည်း ကစားခဲ့တာပါ။
ဘာစီလိုနာအသင်းကြီးကတော့ ဒီရာသီမှာ ကစားသမားအင်အားဖြည့်တင်းမှုတွေနဲ့အတူ လာလီဂါ အမှတ်ပေး ဇယား ထိပ်ဆုံးနေရာမှာ ရပ်တည်နေတာဖြစ်ပါတယ်။ဒါ့အပြင် ဆော်ဒီမှာ ကစားနေတဲ့ စပိန်စူပါဖလားပြိုင်ပွဲ မှာလည်း ဗိုလ်လုပွဲအထိ တက်နိုင်ခဲ့ပြီး ရီးရယ်လ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source:Goal
- By CNI
- Category: အားကစား
- Hits: 587
CNI Sport News
၂၀၂၃ ခုနှစ်၊ ဇန်နဝါရီ ၁၃
ဖူလ်ဟမ်အသင်းကို အရေးနိမ့်ခဲ့တဲ့ ပရီးမီးယားလိဂ်ပွဲမှာ ကစားသမားသစ် ဂျာအိုဖိလစ် အနီကတ်နဲ့ ထုတ်ပယ် ခံရတာက အသင်းအတွက် အရမ်းစိတ်ပျက်စရာ ကောင်းတယ်လို့ ချယ်လ်ဆီးနည်းပြ ဂရေဟမ်ပေါ်တာက ပြော ပါတယ်။
ဂရေဟမ်ပေါ်တာက “ဒီဖျက်ထုတ်မှုက အန္တရာယ်ရှိစေလိုတဲ့ ရည်ရွယ်မျိုး မရှိပေမယ့် ဘာကြောင့် အနီကတ် ပြသ လဲဆိုတာ ကျနော်နားလည်ပါတယ်။ ဒါဟာ နောက်ထပ် ထိုးနှက်ချက် တစ်ခုပါပဲ။ ထိုးနှက်ချက်တွေက ဆက်တိုက် လာနေတာပါ။ ဂျာအိုဖိလစ်က တကယ်ကို ကောင်းခဲ့တာပါ။ ပွဲထဲမှာ သူ့ရဲ့ အရည်အချင်းကို ခင်ဗျားတို့ မြင်ရမှာပါ။ ဒါကြောင့် ကျနော်တို့အတွက် အရမ်းစိတ်ပျက်စရာ ဖြစ်ပါတယ်”လို့ ပြောခဲ့တာပါ။
ပြီးခဲ့တဲ့ ရက်ပိုင်းကမှ အသလက်တီကို အသင်းကနေ ရာသီအကုန်ထိ အငှားနဲ့ ပြောင်းရွှေ့လာခဲ့တဲ့ ဂျာအိုဖိလစ် ဟာ ဖူလ်ဟမ်နဲ့ ပွဲစဉ်မှာ ချယ်လ်ဆီးအသင်းရဲ့ ပွဲထွက် လူစာရင်းမှာ ပါဝင်ခဲ့တာ ဖြစ်ပါတယ်။
ပေါ်တူဂီ ကစားသမားဟာ ခြေစွမ်းပြသနိုင်ခဲ့ပေမယ့် ပွဲချိန် ၅၈ မိနစ်မှာ ဖူလ်ဟမ်ကစားသမား တီတီကို ဖျက်ထုတ် ပုံ ကြမ်းတမ်းခဲ့တာကြောင့် တိုက်ရိုက်အနီကတ်နဲ့ ထုတ်ပယ်ခံခဲ့ရတာပါ။ ဒီပွဲမှာ ဖူလ်ဟမ်က ချယ်လ်ဆီးကို ၂ ဂိုး- ၁ ဂိုးနဲ့ အနိုင်ရရှိခဲ့တာ ဖြစ်ပါတယ်။
ချယ်လ်ဆီးအသင်း နည်းပြ ဂရေဟမ်ပေါ်တာကိုတွေ့ရစဉ်
ချယ်လ်ဆီးအသင်းဟာ ၃ ပွဲဆက် ရှုံးပွဲ ကြုံတွေ့ခဲ့တာဖြစ်ပြီး ပြိုင်ပွဲစုံနောက်ဆုံး ၉ ပွဲမှာ ၁ ပွဲသာ အနိုင်ရတဲ့အထိ ရလဒ်ပိုင်းတွေ ဆိုးရွားနေခဲ့တာပါ။ ချယ်လ်ဆီးနည်းပြ ဂရေဟမ်ပေါ်တာဟာ ရလဒ်ဆိုးတွေကြောင့် ဖိအားတွေ ပိုမို တိုးလာနေခဲ့ပြီး ရာထူးက ထုတ်ပယ်ဖို့ တောင်းဆိုမှုတွေဟာ ပိုပြီးများလာခဲ့တာ ဖြစ်ပါတယ်။
ဒီပွဲမှာ အနီကတ်ထိခဲ့တဲ့ ဂျာအိုဖိလစ်ဟာ ၃ ပွဲပယ်ခံရမှာဖြစ်ပြီး ကွင်းလယ်ကစားသမား ဇာခါရီရာကလည်း ဒဏ်ရာ ရရှိသွားခဲ့တာပါ။
ဂရေဟမ်ပေါ်တာက “ကျနော်တို့ဟာ ပွဲအစပိုင်းမှာ ထိန်းချုပ်နိုင်ခဲ့သလို အခွင့်အရေးတွေလည်း ဖန်တီးနိုင်ခဲ့ပါ တယ်။ ကျနော်တို့ဟာ အမှားအယွင်းတွေနဲ့ သူတို့ရဲ့ ဂိုးတွေကို ခွင့်ပြုခဲ့ရပါတယ်။ ဒုတိယပိုင်းမှာ ကျနော်တို့ ကောင်းမွန်စွာ တုန့်ပြန်နိုင်ခဲ့ပေမယ့် အနီကတ်က အပြောင်းအလဲ ဖြစ်သွားခဲ့ပါတယ်။ အလုပ်ကို ဆက်လုပ်ဖို့ ကလွဲပြီး တခြား ဖြေရှင်းချက်တွေ မရှိဘူး”လို့ ပြောခဲ့တာ ဖြစ်ပါတယ်။
ချယ်လ်ဆီးအသင်းဟာ တနင်္ဂနွေနေ့မှာ ပရီးမီးယားလိဂ် ပွဲစဉ်အဖြစ် ပဲလေ့စ်အသင်းနဲ့ အိမ်ကွင်းပွဲစဉ် ယှဉ်ပြိုင်ရမှာ ဖြစ်ပါတယ်။
Source: Goal
- By CNI
- Category: အားကစား
- Hits: 337
CNI Sport News
၂၀၂၃ ခုနှစ်၊ ဇန်နဝါရီ ၁၃
၂၀၂၂ ဖီဖာအကောင်းဆုံးဆုတွေအတွက် ဆန်ကာတင်စာရင်းတွေ ထုတ်ပြန်လိုက်ရာမှာ အမျိုးသား အကောင်းဆုံးကစားသမားဆုစာရင်းမှာ မက်ဆီပါဝင်ခဲ့ပြီး ရော်နယ်ဒိုက ချန်လှပ်ခံခဲ့ရတာဖြစ်ပါတယ်။
ပြီးခဲ့တဲ့နှစ် ကာလတစ်လျှောက်မှာ အကောင်းဆုံးစွမ်းဆောင်နိုင်ခဲတဲ့ ကစားသမားတွေကို ရွေးချယ်ပြီး ဒီဆုအတွက် ဆန်ကာတင်စာရင်းကို ထုတ်ပြန်ခဲ့တာပါ။ရော်နယ်ဒိုဟာ ပြီးခဲ့တဲ့နှစ်က ယူနိုက်တက်အသင်းမှာ ကစားခွင့်ဆုံးရှုံးခဲ့ပြီး ပေါ်တူဂီအသင်းနဲ့လည်း အောင်မြင်မှုမရခဲ့တာကြောင့် အမျိုးသားအကောင်းဆုံး ကစား သမားဆုအတွက် ဆန်ကာတင် ၁၄ ဦးမှာ မပါဝင်ခဲ့တာဖြစ်ပါတယ်။ဒီစာရင်းမှာ ပါဝင်တဲ့သူတွေကတော့ မက်ဆီ၊ ဘတ်ပီ၊ ဘန်ဇီမာ၊ ဒီဘရိုင်း၊ ဟာလန်း၊ လီဝန်ဒေါစကီး၊ မာနေးနဲ့ ဆာလတ်တို့ဖြစ်ပါတယ်။
ဒါ့အပြင် အယ်လ်ဗားရတ်ဇ်၊ ဘယ်လင်ဂမ်၊ ဟာကီမီ၊ မိုဒရစ်၊ နေမာနဲ့ ဗီနီစီးယတ်စ်တို့လည်း ပါဝင်ခဲ့တာပါ။ ဒီ ဆန်ကာတင်စာရင်းကို တစ်ဦးချင်းနဲ့ အသင်းလိုက်စွမ်းဆောင်ရည်၊ အောင်မြင်မှုမှတ်တမ်း၊ ကွင်းတွင်း၊ ကွင်းပြင် အပြုအမူတွေပေါ်မူတည်ပြီး ရွေးချယ်ခဲ့တာဖြစ်ပါတယ်။ဒီဆုအတွက် မီဒီယာကိုယ်စားလှယ်တွေ၊ လက်ရွေးစင် အသင်းနည်းပြတွေ၊ လက်ရွေးစင်အသင်းခေါင်းဆောင်တွေနဲ့ ပြည်သူတွေက မဲပေးရွေးချယ်ကြမှာပါ။
အကောင်းဆုံးအမျိုးသမီးကစားသမားဆု၊ အကောင်းဆုံးအမျိုးသားနည်းပြဆု၊ အကောင်းဆုံးအမျိုးသမီး နည်းပြဆု၊အကောင်းဆုံးသွင်းဂိုးဆု၊ အကောင်းဆုံးအမျိုးသားဂိုးသမားနဲ့အမျိုးသမီး ဂိုးသမားဆုတွေအတွက်လည်း ဆန်ကာတင်စာရင်းတွေကို ဖီဖာက ထုတ်ပြန်ခဲ့ပါတယ်။
အကောင်းဆုံးအမျိုးသားနည်းပြဆုအတွက် ဆန်ကာတင် ၅ ဦးမှာ ရီးရယ်လ်နည်းပြ အန်ဆယ်လော့တီ၊ ပြင်သစ် နည်းပြ ဒက်ချမ့်ပ်စ်၊ မန်စီးတီးနည်းပြ ဂွာဒီယိုလာ၊ မော်ရိုကိုနည်းပြ ဝါလစ်ရီဂရာဂွီနဲ့ အာဂျင်တီးနားနည်းပြ စကာလိုနီတို့ ပါဝင်ခဲ့တာပါ။အမျိုးသားဂိုးသမားဆုအတွက် ဆန်ကာတင် ၅ ဦးစာရင်းမှာတော့ ဘရာဇီးလ်ဂိုးသမား အလီဆန်၊ မော်ရိုကိုဂိုးသမား ဘိုနို၊ ဘယ်လ်ဂျီယံဂိုးသမား ကော့တွိုက်စ်၊ ဘရာဇီးလ်ဂိုးသမား အီဒါဆန်နဲ့ အာဂျင် တီးနားဂိုးသမား မာတီးနတ်ဇ်တို့ ဖြစ်ပါတယ်။
မဲပေးမှုကို ဖေဖော်ဝါရီ ၃ ရက်မှာ ပိတ်မှာဖြစ်ပြီး ဆန်ကာတင် ၃ ဦးစာရင်းကို အခုလကုန်ပိုင်းမှာ ကြေညာသွားမှာ ဖြစ်ကာ ဆုပေးပွဲကိုတော့ ဖေဖော်ဝါရီ ၂၇ ရက်မှာ ကျင်းပသွားမှာဖြစ်ပါတယ်။
Source:Goal
- By CNI
- Category: အားကစား
- Hits: 457
CNI Sport News
၂၀၂၃ ခုနှစ်၊ ဇန်နဝါရီ ၁၂
ဥရုဂွေးတိုက်စစ်မှူး ကာဗာနီက VAR မော်နီတာကို တွန်းထိုးခဲ့လို့ အရေးယူခံရမယ်ဆိုရင် ဒိုင်လူကြီးဖြစ်သူ ဆီဘတ်ကိုလည်း ထောင်ထဲပို့ဖို့ ပြောလိုက်ပါတယ်။
ကာဗာနီက “ကျနော့်ကို VAR တွန်းထိုးခဲ့လို့ အရေးယူရင် ဒိုင်လူကြီးကို သူ့အမှားအတွက် ထောင်ဒဏ် ချမှတ်သင့် ပါတယ်။ VAR ကင်မရာတွေနဲ့ နောက်ကွယ်မှာရှိတဲ့ ဒိုင်လူကြီးတွေ မလုပ်သင့်တဲ့ အမှားတွေ ရှိပါတယ်။ အမှန် အတိုင်း ပြုမူနေထိုင် ရမယ်ဆိုပေမယ့် ကျနော်တို့ဟာ လူသားတွေဖြစ်ပြီး ကွင်းထဲမှာ အကြိမ်ပေါင်းများစွာ ဖြစ်ပျက်နေတာပါ။ ကျနော်တို့ဟာ စိတ်အားထက်သန်ပြီး အလုပ်ကို ကြိုးစားလုပ်နေတဲ့ အချိန်မှာ ဒီလိုမျိုးတော့ ကြုံတွေ့ရမှာပါ။ ဒါကို ရင်ဆိုင်ရတာ ပထမဆုံးအကြိမ်တော့ မဟုတ်ပါဘူး”လို့ El Pais ကို ပြောခဲ့ပါတယ်။
ဥရုဂွေးအသင်းဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ အုပ်စုတွင်း ၄ မှတ် ရခဲ့ပေမယ့် တောင်ကိုရီးယားနဲ့ ဂိုးကွာခြား ချက်ကြောင့် အုပ်စုကနေ ထွက်ခွာခဲ့ရတာ ဖြစ်ပါတယ်။ ဥရုဂွေးနဲ့ ဂါနာတို့ ကစားခဲ့တဲ့ နောက်ဆုံးပွဲအပြီးမှာ ကာဗာနီ အပါအဝင် ဥရုဂွေးကစားသမားတွေဟာ ဒိုင်လူကြီးရဲ့ ဆုံးဖြတ်ချက်ကို ဒေါသထွက်ပြီး ဝိုင်းဝန်း စောဒက တက်ခဲ့ကြတာပါ။
VAR ကို တွန်းထိုးလိုက်တဲ့ ကာဗာနီကိုတွေ့ရစဉ်
ကာဗာနီဆိုရင် ဥမင်ထဲသွားရာ လမ်းမှာရှိတဲ့ VAR မော်နီတာကို တွန်းထိုးပစ်ခဲ့ပါတယ်။ အဲ့ဒါကြောင့် ဖီဖာက ဥရုဂွေး ဘောလုံးအဖွဲ့ချုပ်နဲ့ ကစားသမား ၄ ဦးကို အရေးယူဖို့ လုပ်ဆောင်နေပါတယ်။
ဥရုဂွေး ကစားသမားတွေဖြစ်တဲ့ ကာဗာနီ၊ ဂျီမီနတ်ဇ်၊ မူဆလီယာနဲ့ ဂိုဒင်တို့ဟာ ပွဲပယ်ပြစ်ဒဏ် ချမှတ်ခံရဖို့နဲ့ ရင်ဆိုင်နေရတာ ဖြစ်ပါတယ်။ အဲ့ဒါကြောင့် ကာဗာနီက သူ့ကို အရေးယူရင် ဒိုင်လူကြီးကိုပါ ထောင်ထဲပို့ဖို့ ပြောလာခဲ့တာပါ။
ကာဗာနီဟာ ပွဲပယ်ပြစ်ဒဏ် ချမှတ်ခံရမယ်ဆိုရင် ကလပ်အသင်း ပွဲစဉ်တွေကိုပါ ထိခိုက်လာနိုင်တယ်လို့ သတင်း မှာ ဖော်ပြထားတာ ဖြစ်ပါတယ်။ အသက် ၃၅ နှစ် အရွယ်ရှိပြီဖြစ်တဲ့ ကာဗာနီဟာ လက်ရှိအချိန်မှာ စပိန်ကလပ် ဗလင်စီယာအသင်းမှာ ကစားနေတာဖြစ်ပြီး ၉ ပွဲ ပါဝင်ထားတာမှာ ၅ ဂိုး သွင်းယူထားပါတယ်။
ကာဗာနီဟာ ဥရုဂွေးလက်ရွေးစင်အသင်း အတွက်တော့ ၁၃၆ ပွဲ ပါဝင်ကစားထားပြီး ၅၈ ဂိုး သွင်းယူထားတာ ဖြစ်ပါတယ်။
Source: Goal
Page 211 of 307
Connect with us
