- By CNI
- Category: အားကစား
- Hits: 858
CNI Sport News
၂၀၂၄ ခုနှစ်၊ မတ်လ ၈
မန်စီးတီးအသင်းတိုက်စစ်မှူး ဟာလန်းက လီဗာပူးလ်အသင်းနောက်ခံလူ အာနိုးလ်အနေနဲ့ ဆုဖလား ၃ လုံး ရယူနိုင်တဲ့ ခံစားချက်ကို သိမှာမဟုတ်ဘူးလို့ သူတို့ကို ထိုးနှက်ခဲ့တဲ့အပေါ် ပြန်လည် တုန့်ပြန်ခဲ့ပါတယ်။
ဟာလန်းက “အာနိုးလ်အနေနဲ့ သူပြောချင်တာကို ပြောလို့ရပါတယ်။ ကျနော် ဒီအသင်းမှာ တစ်နှစ်ရှိခဲ့ပြီး ဆုဖလား ၃ လုံး ရယူနိုင်ခဲ့ပါတယ်။ ဒါဟာ အလွန်ကောင်းမွန်တဲ့ ခံစားချက်ပါပဲ။ ဒီခံစားချက်ကို သူသိမှာ မဟုတ်ပါဘူး။ ပြီးခဲ့တဲ့ရာသီက ဆုဖလား ၃ လုံး ရယူနိုင်တာကို ခံစားရတာ အလွန်ကောင်းပါတယ်”လို့ Sky Sports ကို ပြောခဲ့ ပါတယ်။
မန်စီးတီးအသင်းဟာ ပြီးခဲ့တဲ့ရာသီက ပရီးမီးယားလိဂ်၊ FA ဖလားနဲ့ ချန်ပီယံလိဂ်ဖလားတို့ကို ရယူနိုင်ခဲ့တာဖြစ်ပြီး အင်္ဂလန်ကလပ်တွေထဲမှာ ယူနိုက်တက်အသင်းပြီးရင် ဒီလိုအောင်မြင်မှုမျိုး ရယူနိုင်တဲ့ ဒုတိယမြောက်အသင်း အဖြစ် မှတ်တမ်းဝင်ခဲ့ပါတယ်။
မန်စီးတီးနဲ့ လီဗာပူးလ်အသင်းတို့ဟာ ပြီးခဲ့တဲ့နှစ်တွေအတွင်းမှာ ပရီးမီးယားလိဂ် ချန်ပီယံဆုဖလားနဲ့ပတ်သက်ပြီး အပြိုင်အဆိုင်ဖြစ်ခဲ့ကြပြီး ဒီရာသီမှာလည်း အမှတ်ပေးလိဂ်အတွက် တိုက်ပွဲဝင်ချင်နေကြတာပါ။
မန်စီးတီးနဲ့ လီဗာပူးလ် ယှဉ်ပြိုင်နေစဉ်
လီဗာပူးလ်အသင်း နောက်ခံလူ အာနိုးလ်က မန်စီးတီးအသင်း ရယူနိုင်ခဲ့တဲ့ ဆုဖလားတွေထက် သူတို့ရယူနိုင်ခဲ့တဲ့ ဆုဖလားတွေက ပိုပြီးအဓိပ္ပါယ်ရှိတယ်လို့ Four Four Two မဂ္ဂဇင်းနဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာ ဖြစ်ပါတယ်။
အာနိုးလ်က “မန်စီးတီးက ကျနော်တို့ထက် ဆုဖလားတွေပိုရခဲ့ပြီး ပိုအောင်မြင်ခဲ့ပေမယ့် ကလပ် ၂ သင်းရဲ့ ဘဏ္ဍာရေး အခြေအနေတွေအရ ကျနော်တို့ရယူနိုင်ခဲ့တဲ့ ဆုဖလားတွေက ကျနော်တို့နဲ့ ပရိသတ်တွေအတွက် ပိုပြီး အဓိပ္ပါယ်ရှိပါတယ်။ အနိုင်ရဖို့ တည်ဆောက်ထားတဲ့ စက်တွေကို ကျနော်တို့ ဆန့်ကျင်ပါတယ်။ ဒါက မန်စီးတီးနဲ့ သူတို့ရဲ့ အဖွဲ့အစည်းကိုဖော်ပြဖို့ အရိုးရှင်းဆုံးနည်းလမ်းပါပဲ”လို့ ပြောကြားခဲ့ပါတယ်။
မန်စီးတီးအသင်းဟာ ဂွာဒီယိုလာ လက်ထက်မှာ ဆုဖလား ၁၄ ခု ရယူနိုင်ခဲ့ပြီး လီဗာပူးလ်အသင်းဟာ ကလော့ပ် လက်ထက်မှာ ဆုဖလား ၇ ခု ရယူနိုင်ခဲ့တာပါ။ လီဗာပူးလ်နဲ့ မန်စီးတီးအသင်းတို့ဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် ထိပ်တိုက်တွေ့ဆုံကြမှာ ဖြစ်ပါတယ်။
Source: ESPN
- By CNI
- Category: အားကစား
- Hits: 1001
CNI Sport News
၂၀၂၄ ခုနှစ်၊ မတ်လ ၇
အေဂျက်ဇ်ကွင်းလယ်လူ ဟန်ဒါဆန်က အသင်းမှာ ပြသနေတဲ့သူ့ရဲ့ ပုံစံတွေကြောင့် ဂျာမနီမှာ ကျင်းပမယ့် ယူရို ၂၀၂၄ ပြိုင်ပွဲဝင် အင်္ဂလန်အသင်း လူစာရင်းမှာ ပါဝင်နိုင်ဖို့ မျှော်လင့်ကြောင်း ပြောခဲ့ပါတယ်။
ဟန်ဒါဆန်က “နည်းပြ ဆောက်ဂိတ်က ကျနော့်ကို စောင့်ကြည့်နေတာကို မြင်တွေ့ရတာ အလွန်ကောင်း မွန်ပါ တယ်။ ကျနော်ဟာ ဒီမှာရှိတဲ့ အလုပ်အပေါ် အာရုံစိုက်မှာဖြစ်ပြီး ကောင်းမွန်စွာ စွမ်းဆောင်နိုင်ရင် အင်္ဂလန်အသင်း လူစာရင်းမှာ ပါဝင်နိုင်မယ့် အကောင်းဆုံး အခွင့်အရေးတွေ ကျနော်ရရှိမှာပါ။ နိုင်ငံအသင်းအတွက် တစ်ခုခု လုပ်ပေးနိုင်မယ်လို့ ကျနော်ခံစားမိပြီး လာမယ့် ယူရိုပြိုင်ပွဲမှာ နိုင်ငံအသင်းကို အကူအညီပေးနိုင်ဖို့ မျှော်လင့် ကြောင်း”ပြောခဲ့တာပါ။
ဟန်ဒါဆန်ဟာ ပြီးခဲ့တဲ့နွေရာသီ အပြောင်းအရွှေ့က လီဗာပူးလ်အသင်းကနေ ထွက်ခွာပြီး ဆော်ဒီပရိုလိဂ်ကလပ် အယ်လ်အက်တီဖတ်အသင်းထံ ပြောင်းရွှေ့ခဲ့ပါတယ်။
ဒါပေမယ့် ဟန်ဒါဆန်ဟာ အယ်လ်အက်တီဖတ်အသင်းနဲ့ နှစ်ဦးသဘောတူစာချုပ် ဖျက်သိမ်းပြီး ဇန်နဝါရီလ အပြောင်းအရွှေ့မှာ အေဂျက်ဇ်အသင်းထံ ပြောင်းရွှေ့လာခဲ့တာပါ။
အင်္ဂလန်အသင်းနည်းပြ ဆောက်ဂိတ်ဟာ ပြီးခဲ့တဲ့လက အေဂျက်ဇ်အသင်းအတွက် ဟန်ဒါဆန် ပွဲဦးထွက်အဖြစ် ယှဉ်ပြိုင်ခဲ့တဲ့ ပီအက်စ်ဗွီအသင်းနဲ့ပွဲကို တက်ရောက်ကြည့်ရှုခဲ့တာ ဖြစ်ပါတယ်။
ဟန်ဒါဆန်ကို တွေ့ရစဉ်
ဆောက်ဂိတ်ဟာ ဟန်ဒါဆန်ကို အင်္ဂလန်အသင်း လူစာရင်းမှာ ပုံမှန်ရွေးချယ်လေ့ရှိပေမယ့် ယူရို ၂၀၂၄ ပြိုင်ပွဲမှာ ရွေးချယ်ဖွယ် ရှိ/မရှိတော့ မသေချာသေးပါဘူး။
အဲဒါကြောင့် ဟန်ဒါဆန်ဟာ အေဂျက်ဇ်အသင်းမှာ ခြေစွမ်းပြပြီး အင်္ဂလန်လူစာရင်းမှာ ဆက်လက် ပါဝင်နိုင်ဖို့ မျှော်လင့်နေတာ ဖြစ်ပါတယ်။
အင်္ဂလန်အသင်းဟာ ယူရို ၂၀၂၄ ပြိုင်ပွဲမတိုင်ခင် အခုလထဲမှာ ဘရာဇီးလ်၊ ဘယ်လ်ဂျီယံအသင်းတို့နဲ့ ခြေစမ်းပွဲ ကစားဖို့ စီစဉ်ထားသလို ဇွန်မှာလည်း ဘော့စနီးယား၊ အိုက်စလန်အသင်းတို့နဲ့ ခြေစမ်းပွဲ ကစားဖို့ရှိနေတာပါ။
အင်္ဂလန်အသင်းဟာ ယူရို ၂၀၂၄ ပြိုင်ပွဲမှာတော့ ဆားဘီးယား၊ ဒိန်းမတ်၊ ဆလိုဗေးနီးယားအသင်းတို့နဲ့ တစ်အုပ်စုတည်း ကျရောက်နေတာဖြစ်ပါတယ်။
Source: CNA
- By CNI
- Category: အားကစား
- Hits: 801
CNI Sport News
၂၀၂၄ ခုနှစ်၊ မတ်လ ၇
ယူနိုက်တက်အသင်းနည်းပြဟောင်း ဆိုးလ်ရှားက ရော်နယ်ဒို အသင်းထံ ပြန်ရောက်လာချိန်မှာ ကာဗာနီ နစ်နာခဲ့ရတယ်လို့ Stick to Football podcast နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။
ဆိုးလ်ရှားက “ရော်နယ်ဒိုဟာ တိုက်စစ်မှာ ရက်ရှ်ဖို့ဒ်၊ မာရှယ်၊ ဂရင်းဝုဒ်တို့နဲ့ ကွဲပြားတဲ့ ကစားသမားပါ။ ရော်နယ်ဒို ရောက်ရှိလာချိန်မှာ အနစ်နာဆုံးသူကတော့ ကာဗာနီ ဖြစ်ပါတယ်။ ကာဗာနီဟာ ကျနော်တို့လိုချင်တဲ့ ကစားပုံကို နားလည်ထားပြီးသားပါ။ ရော်နယ်ဒိုကတော့ ၄ ပွဲမှာ ၃ ပွဲလောက် ပါဝင်ကစားချင်နေပေမယ့် သူဟာ အသက်ကြီး နေပြီဆိုတာ သူကိုယ်တိုင်လည်း သိရှိခဲ့ပါတယ်။ ဒါပေမယ့် သူဟာ အရန်ခုံပေါ်ထားရင် မပျော်ရွှင်ပါဘူး။ ရော်နယ်ဒို မရှိခင်တုန်းက ကျနော်တို့ဟာ ပရီးမီးယားလိဂ်မှာ ဖိအားပေးကစားနိုင်တဲ့ အသင်းတစ်သင်းဖြစ်ခဲ့ပါတယ်။ ရော်နယ်ဒို ရောက်လာချိန်မှာ ကျနော်တို့ဟာ ဒန်ဂျိမ်းစ်ကို လက်လွှတ်ခဲ့ရပါတယ်။ သူတို့နှစ်ဦးဟာ ခြားနားတဲ့ ကစားသမားတွေပါ”လို့ ပြောခဲ့တာပါ။
ရော်နယ်ဒိုဟာ ၂၀၂၁ ခုနှစ် နွေရာသီက ဂျူဗင်တပ်စ်အသင်းကနေ အသင်းဟောင်း ယူနိုက်တက်အသင်းထံ ပြန်ရောက်လာခဲ့တာ ဖြစ်ပါတယ်။
ရော်နယ်ဒို ရောက်ရှိလာတာကြောင့် နည်းပြ ဆိုးလ်ရှားအတွက် ကာဗာနီ၊ မာရှယ်၊ ရက်ရှ်ဖို့ဒ်နဲ့ ဂရင်းဝုဒ်တို့ရှိနေတဲ့ တိုက်စစ်ပိုင်းအတွက် ပိုပြီးရွေးချယ်ခွင့်ရှိလာခဲ့တာပါ။
ရော်နယ်ဒိုဟာ ယူနိုက်တက်အသင်းမှာ ၂၀၀၃ ကနေ ၂၀၀၉ ခုနှစ်အထိ ပထမအကြိမ် ကစားခဲ့တုန်းက အသင်းနဲ့ အတူ အောင်မြင်မှုတွေ ရယူနိုင်ခဲ့တာကြောင့် ဆိုးလ်ရှားဟာ ရော်နယ်ဒိုကို ပြန်လည်ခေါ်ယူခဲ့တဲ့ အသင်းရဲ့ ဆုံးဖြတ်ချက်ကို ထောက်ခံခဲ့ပါတယ်။
ရော်နယ်ဒိုနဲ့ ဆိုးရှားလ်ကို တွေ့ရစဉ်
ရော်နယ်ဒိုဟာ ယူနိုက်တက်အသင်းကို ဒုတိယအကြိမ် ပြန်လည်ရောက်ရှိလာချိန်မှာ သူ့အတွက် အဆင်မပြေ ခဲ့သလို ဆိုးလ်ရှားလည်း ၃ လအကြာမှာ နည်းပြရာထူးက ထုတ်ပယ်ခံခဲ့ရပါတယ်။
ဆိုးလ်ရှားဟာ ဒီဆုံးဖြတ်ချက်တွေအတွက် နောင်တမရပေမယ့် ရော်နယ်ဒို ရောက်ရှိလာခဲ့တာကြောင့် ကာဗာနီ နစ်နာခဲ့ရတယ်လို့ ပြောခဲ့ပါတယ်။
ကာဗာနီဟာ ရော်နယ်ဒို မရောက်ရှိလာခင်တုန်းက ယူနိုက်တက်အသင်းရဲ့ တိုက်စစ်မှာ ခြေစွမ်းပြသနိုင်ခဲ့ပေမယ့် ပေါ်တူဂီကစားသမား ရောက်ရှိလာပြီး အချိန်မှာ ပွဲကစားခွင့်ရဖို့ ရုန်းကန်ခဲ့ရတာပါ။
ကာဗာနီဟာ ယူနိုက်တက်အသင်းအတွက် ပထမရာသီမှာ ၃၉ ပွဲ ပါဝင်ကစားပြီး ၁၇ ဂိုး သွင်းယူနိုင်ခဲ့ပေမယ့် ဒုတိယရာသီမှာတော့ ပွဲ ၂၀ ကစားကာ ၂ ဂိုးသွင်းယူနိုင်ခဲ့ပါတယ်။
ရော်နယ်ဒိုဟာ ယူနိုက်တက်အသင်းအတွက် ဒုတိယအကြိမ်မြောက်ကစားတဲ့ ပထမရာသီမှာ ၃၈ ပွဲ ကစားကာ ၂၄ ဂိုး သွင်းယူနိုင်ခဲ့ပေမယ့် ဒုတိယရာသီမှာ နည်းပြ အဲရစ်တန်ဟတ်နဲ့ အဆင်မပြေဖြစ်ခဲ့သလို အသင်းအပေါ် ဝေဖန်မှု ပြုလုပ်ခဲ့ပြီးနောက် ထွက်ခွာခဲ့တာဖြစ်ပါတယ်။
Source: Mirror
- By CNI
- Category: အားကစား
- Hits: 947
CNI Sport News
၂၀၂၄ ခုနှစ်၊ မတ်လ ၇
လိုက်ပ်ဇစ်အသင်းနဲ့ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ရီးရယ်လ်အသင်းရဲ့ စွမ်းဆောင်ရည် ဟာ အားနည်းခဲ့တာကြောင့် အသင်းအနေနဲ့ တိုးတက်အောင် လုပ်ရမယ်လို့ နည်းပြ အန်ဆယ်လော့တီက ပြောခဲ့ ပါတယ်။
အန်ဆယ်လော့တီက “ပြင်းထန်မှုနည်းပြီး ဆိုးရွားတဲ့ တစ်ပွဲဖြစ်ခဲ့ပါတယ်။ ဒီပွဲက ကျနော်တို့အတွက် ကောင်းမွန် တဲ့ပွဲ မဟုတ်ဘူးဆိုတာ သိသာပါတယ်။ ဒါက ကျနော့်အမှားပါ။ တစ်ခါတစ်လေ ချန်ပီယံလိဂ်ပြိုင်ပွဲမှာ ဒီလိုမျိုး ဖြစ်နိုင်ပါတယ်။ ကျနော်တို့ဟာ ကိုယ့်ကိုယ်ကို ဝေဖန်ပိုင်းခြားပြီး တိုးတက်အောင် လုပ်ရပါမယ်။ ဒီနေ့ ဝေဖန်မှု တွေဟာ ကျနော်တို့အတွက် လုံးဝထိုက်တန်ပါတယ်။ ဒီလိုတွေကြုံတွေ့ရပေမယ့် အရေးကြီးတာက ကျနော်တို့ ကွာတားဖိုင်နယ်ကို ရောက်ရှိခဲ့တာပါ”လို့ Movistar ကိုပြောကြားခဲ့ပါတယ်။
ဒုတိယအကျော့အဖြစ် ကစားခဲ့တဲ့ပွဲမှာ ရီးရယ်လ်နဲ့ လိုက်ပ်ဇစ်အသင်းတို့ဟာ ၁ ဂိုးစီ သရေကျခဲ့တာ ဖြစ်ပါတယ်။
ဒီပွဲမှာ ရီးရယ်လ်အသင်းအတွက် ဗီနီစီးယက်စ်က ဦးဆောင်ဂိုး သွင်းယူခဲ့ပေမယ့် အော်ဘန်က ချေပဂိုး ပြန်သွင်း ယူခဲ့တာကြောင့် သရေကျခဲ့တာပါ။
ရီးရယ်လ်နည်းပြ အန်ဆယ်လော့တီကို တွေ့ရစဉ်
ဒါပေမယ့် ရီးရယ်လ်အသင်းဟာ ပထမအကျော့က ၁ ဂိုး- ဂိုးမရှိနဲ့ လိုက်ပ်ဇစ်အသင်းကို အနိုင်ရခဲ့တာကြောင့် နှစ်ကျော့ပေါင်းရလဒ် ၂ ဂိုး-၁ ဂိုးနဲ့ အနိုင်ရပြီး ကွာတားဖိုင်နယ်ကို တက်နိုင်ခဲ့တာဖြစ်ပါတယ်။
ရီးရယ်လ်အသင်း နောက်ခံလူ ရူဒီဂါက သူတို့ဟာ ဒီပွဲမှာ ကစားပုံ မကောင်းခဲ့တာကြောင့် ချန်ပီယံလိဂ်ပြိုင်ပွဲမှာ အပြစ်ပေး ခံရနိုင်တယ်လို့ အသင်းသားတွေကို သတိပေးခဲ့ပါတယ်။
ရူဒီဂါက “သူတို့ဟာ ကစားပုံကောင်းခဲ့ပေမယ့် ကျနော်တို့ ညံ့ဖျင်းခဲ့ပါတယ်၊ ဒါက ရိုးရှင်းပါတယ်။ ကျနော်တို့ဟာ နှေးကွေးပြီး ပြင်းထန်မှု လုံးဝကို မရှိတာပါ။ ဒီလိုပုံစံနဲ့ဆို ကျနော်တို့ဟာ ချန်ပီယံလိဂ်ပြိုင်ပွဲမှာ အပြစ်ပေးခံ ရနိုင်ပါ တယ်။ ဒီပွဲမှာ ကျနော်တို့ အဖြေမှန်ကို ရှာမတွေ့ခဲ့ပါဘူး။ ကျနော်တို့ ကောင်းမွန်တဲ့ စွမ်းဆောင်ရည် မပြသနိုင်ခဲ့ ပေမယ့် နောက်တစ်ဆင့်တက်နိုင်ခဲ့တယ်”လို့ ပြောကြားခဲ့ပါတယ်။
ရီးရယ်လ်အသင်းဟာ ဒီရာသီ လာလီဂါပြိုင်ပွဲမှာ ရမှတ် ၇ မှတ်ဖြတ်ပြီး ဦးဆောင်ထားသလို ချန်ပီယံလိဂ်ပြိုင်ပွဲမှာ ကွာတားဖိုင်နယ်ကို ရောက်ရှိခဲ့တာကြောင့် ဆုဖလား ၂ လုံးရယူနိုင်မယ့် လမ်းကြောင်းပေါ်မှာ ရှိနေတာဖြစ် ပါတယ်။
Source: ESPN
- By CNI
- Category: အားကစား
- Hits: 745
CNI Sport News
၂၀၂၄ ခုနှစ်၊ မတ်လ ၇
မန်စီးတီးအသင်းဟာ ကိုပင်ဟေဂင်အသင်းကို ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ၃ ဂိုး-၁ ဂိုးနဲ့ အနိုင်ရပြီးနောက် ချန်ပီယံလိဂ်ပြိုင်ပွဲမှာ ၁၀ ပွဲဆက်တိုက်အနိုင်ရတဲ့ ပထမဆုံးအင်္ဂလန် ကလပ်အသင်းအဖြစ် စံချိန်တင်နိုင်ခဲ့ပါတယ်။
ဒီပွဲမှာ မန်စီးတီးအသင်းဟာ ပြီးခဲ့တဲ့ ယူနိုက်တက်အသင်းနဲ့ပွဲစဉ်က ပွဲထွက်လူစာရင်းကို ၇ ဦးအထိ အပြောင်းအလဲ ပြုလုပ်ပြီး ပွဲထွက်လာခဲ့ပေမယ့် ကိုပင်ဟေဂင်အသင်းကို ဂိုးပြတ်အနိုင်ယူနိုင်ခဲ့တာပါ။
မန်စီးတီးအသင်းအတွက် ဂိုးတွေကို အကန်ဂျီ၊ အယ်လ်ဗားရက်စ်နဲ့ ဟာလန်းတို့က သွင်းယူခဲ့တာဖြစ်ပြီး ကိုပင်ဟေဂင်အသင်းအတွက် ချေပဂိုးကို အယ်လ်ယွန်နက်ဆီက သွင်းယူခဲ့တာ ဖြစ်ပါတယ်။
မန်စီးတီးအသင်းဟာ ပထမအကျော့ကလည်း ကိုပင်ဟေဂင်အသင်းကို ၃ ဂိုး-၁ ဂိုးနဲ့ အနိုင်ရခဲ့တာကြောင့် နှစ်ကျော့ပေါင်းရလဒ် ၆ ဂိုး-၂ ဂိုးနဲ့ အနိုင်ရပြီး ကွာတားဖိုင်နယ်ကို တက်နိုင်ခဲ့တာပါ။
မန်စီးတီးအသင်းဟာ ချန်ပီယံလိဂ်ပြိုင်ပွဲရဲ့ ကွာတားဖိုင်နယ်ကို ၇ နှစ်ဆက်တိုက် တက်နိုင်ခဲ့တာဖြစ်သလို ချန်ပီယံလိဂ်ပြိုင်ပွဲမှာ ၁၀ ပွဲဆက်နိုင်ပွဲ ရယူနိုင်ခဲ့တာ ဖြစ်ပါတယ်။
မန်စီးတီးအသင်းနဲ့ ကိုပင်ဟေဂင်အသင်း ယှဉ်ပြိုင်နေစဉ်
အဲဒါကြောင့် မန်စီးတီးအသင်းဟာ ချန်ပီယံလိဂ် ၁၀ ပွဲဆက်အနိုင်ရတဲ့ ပထမဆုံးအင်္ဂလန်ကလပ်ဖြစ်ခဲ့သလို ၂၀၁၅ ခုနှစ်က ရီးရယ်လ်၊ ၂၀၁၃ နဲ့ ၂၀၂၀ ခုနှစ်က ဘိုင်ယန်မြူးနစ်အသင်းတို့ရဲ့ စံချိန်နဲ့ တူညီသွားခဲ့တာပါ။
မန်စီးတီးအသင်းနည်းပြ ဂွာဒီယိုလာကတော့ သူတို့ဟာ လန်းဆန်းတဲ့ ခြေထောက်တွေ လိုအပ်တာကြောင့် လူစာရင်း အပြောင်းအလဲ ပြုလုပ်ခဲ့ရတယ်လို့ ပွဲအပြီးမှာ ပြောခဲ့ပါတယ်။
ဂွာဒီယိုလာက “ဒီပွဲမှာ ကျနော်တို့ဟာ စွမ်းအင်တွေနဲ့ လန်းဆန်းတဲ့ ခြေထောက်တွေ လိုအပ်ပါတယ်။ ကျနော့် ကစားသမားတွေ ဘယ်လောက်ပင်ပန်း၊ မောပန်းနေလဲဆိုတာကို ကျနော်သိပါတယ်။ ကျနော်တို့ တနင်္ဂနွေနေ့မှာ ပွဲကစားရမှာဖြစ်လို့ လန်းဆန်းတဲ့ ခြေထောက်တွေလိုပါတယ်။ ဆုဖလားတွေရဲ့ အစိတ်အပိုင်းဖြစ်ဖို့အတွက် လူတိုင်းလိုအပ်ပါတယ်။ ကျနော်တို့ဟာ ဥရောပရဲ့ အကောင်းဆုံး ၈ သင်းထဲမှာ နောက်ထပ်တစ်နှစ် ထပ်ပြီးရှိနေ ပါပြီ။ ကျနော်တို့ ပြိုင်ပွဲအားလုံးမှာ ရှိနေတဲ့အတွက် ဝမ်းသာတယ်”လို့ ပြောကြားခဲ့ပါတယ်။
မန်စီးတီးအသင်းဟာ ချန်ပီယံလိဂ်ပြိုင်ပွဲရဲ့ လက်ရှိချန်ပီယံဖြစ်သလို ဒီရာသီမှာလည်း ချန်ပီယံဆုကို ရယူနိုင်ဖို့ ရေပန်းစားနေတာ ဖြစ်ပါတယ်။
မန်စီးတီးအသင်း နောက်ခံလူ အကန်ဂျီကတော့ သူတို့ဟာ ချန်ပီယံဖြစ်ဖို့ ရေပန်းစားနေပေမယ့် ဒါကိုသက်သေပြဖို့ လိုအပ်တယ်လို့ ပြောခဲ့ပါတယ်။
လက်ရှိအချိန်မှာ ချန်ပီယံလိဂ် ကွာတားဖိုင်နယ်အဆင့်ကို မန်စီးတီးအသင်းအပြင် ဘိုင်ယန်မြူးနစ်၊ ရီးရယ်လ်နဲ့ ပီအက်စ်ဂျီအသင်းတို့ တက်ရောက်ထားတာပါ။
မန်စီးတီးအသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် လီဗာပူးလ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Daily Mail
- By CNI
- Category: အားကစား
- Hits: 740
CNI Sport News
၂၀၂၄ ခုနှစ်၊ မတ်လ ၆
အာဂျင်တီးနား ယူ-၂၃ အသင်းနည်းပြ မာရှေယာနိုက ပဲရစ်အိုလံပစ်ပြိုင်ပွဲမှာ မက်ဆီပါဝင်ဖို့နဲ့ ပတ်သက်ပြီး စကားပြောဆိုခဲ့ပေမယ့် လွယ်ကူတဲ့ အခြေအနေ မဟုတ်ဘူးလို့ပြောခဲ့ပါတယ်။
မာရှေယာနိုက “ကျနော် မက်ဆီနဲ့ စကားပြောခဲ့ပြီး ဆက်ပြောဖို့လည်း သဘောတူညီမှု ရရှိထားပါတယ်။ သူဟာ အင်တာမိုင်ယာမီနဲ့ ရာသီစတင်နေပြီး အိုလံပစ်ပြိုင်ပွဲ မတိုင်ခင်အထိ အချိန်အနည်းငယ် ကျန်ရှိနေပါသေးတယ်။ သူဟာ နွေရာသီမှာ ကိုပါအမေရိကပြိုင်ပွဲ ယှဉ်ပြိုင်ဦးမှာဖြစ်လို့ ကျနော်တို့ ပြန်စဉ်းစားရမှာဖြစ်ပြီး လွယ်ကူတဲ့ အခြေအနေ မဟုတ်ပါဘူး။ ပြီးတော့ အင်တာမိုင်ယာမီအတွက် မေဂျာလိဂ်ပြိုင်ပွဲကို လွဲမှာက သူ့အတွက် မလွယ်ကူ ပါဘူး။ အချိန်တန်ရင် ဒါကိုသူဆုံးဖြတ်မှာပါ”လို့ TyC Sports ကို ပြောခဲ့တာပါ။
အာဂျင်တီးနား ယူ-၂၃ အသင်းဟာ လာမယ့် အိုလံပစ်ပြိုင်ပွဲမှာ အသက် ၂၃ နှစ်အထက် ကစားသမား ၃ ဦထဲက ၁ ဦးအဖြစ် မက်ဆီကို ရွေးချယ်ဖို့ စဉ်းစားနေတာ ဖြစ်ပါတယ်။
မက်ဆီဟာ ကိုပါအမေရိကပြိုင်ပွဲမှာ အာဂျင်တီးနားအသင်းကို ဦးဆောင်ဖို့ ရှိနေတာကြောင့် အိုလံပစ်ပြိုင်ပွဲမှာ ပါဝင်နိုင်ဖို့က အခွင့်အရေးနည်းပါးနေတာပါ။
အိုလံပစ်ပြိုင်ပွဲကို ဇူလိုင် ၂၄ ရက်ကနေ သြဂုတ် ၁၀ ရက်အထိ ကျင်းပမှာဖြစ်ပြီး ကိုပါအမေရိကပြိုင်ပွဲကိုတော့ ဇွန် ၂၀ ရက်ကနေ ဇူလိုင် ၁၀ ရက်အထိ ကျင်းပသွားမှာ ဖြစ်ပါတယ်။
အာဂျင်တီးနားအသင်း ယူ-၂၃ ကိုတွေ့ရစဉ်
အင်တာမိုင်ယာမီအသင်းဟာ ဒီကာလတွေမှာ မေဂျာလိဂ်နဲ့ လိဂ်ဖလားပွဲစဉ်တွေ ယှဉ်ပြိုင်ရဖို့ရှိနေတာပါ။
အင်တာမိုင်ယာမီအသင်းနည်းပြ မာတီနိုကတော့ သူ့ရဲ့အသင်းမှာရှိတဲ့ တောင်အမေရိက ကစားသမားတွေအနေနဲ့ ပြိုင်ပွဲတစ်ခုကိုသာ ရွေးချယ်ပြီး ပါဝင်ရမယ်လို့ ပြီးခဲ့တဲ့လက ပြောထားပါတယ်။
မာရှေယာနိုကတော့ မက်ဆီအပြင် အက်စတွန်ဗီလာအသင်းဂိုးသမား မာတီနက်ဇ်ကို အိုလံပစ်ပြိုင်ပွဲဝင်မယ့် လူစာရင်းမှာ ရွေးချယ်ချင်နေတာပါ။
မာတီနက်ဇ်ဟာ အိုလံပစ်ပြိုင်ပွဲမှာ ပါဝင်ကစားဖို့ ဆန္ဒရှိတယ်လို့ ပြောထားပေမယ့် အာဂျင်တီးနား ယူ-၂၃ အသင်း က ရွေးချယ်ခံရင် အက်စတွန်ဗီလာအသင်းက သူတို့ရဲ့ဂိုးသမားကို လွှတ်ပေးဖို့ ရှိ၊မရှိတော့ မသိရသေးပါဘူး။
အာဂျင်တီးနားအသင်းဟာ ၂၀၀၄ အေသင် အိုလံပစ်ပြိုင်ပွဲနဲ့ ၂၀၀၈ ဘေဂျင်း အိုလံပစ်ပြိုင်ပွဲမှာ ရွှေတံဆိပ် ရယူပြီး နောက် အိုလံပစ်ပြိုင်ပွဲမှာ အောင်မြင်မှုတွေနဲ့ ဝေးကွာနေပြီး နောက်ဆုံးယှဉ်ပြိုင်ခဲ့တဲ့ ပြိုင်ပွဲ ၂ ခုမှာ အုပ်စုအဆင့်နဲ့ သာ ကျေနပ်ခဲ့ရတာ ဖြစ်ပါတယ်။
Source: ESPN
- By CNI
- Category: အားကစား
- Hits: 1037
CNI Sport News
၂၀၂၄ ခုနှစ်၊ မတ်လ ၆
ဒဏ်ရာကြောင့် အနားယူနေရတဲ့ တိုက်စစ်မှူး ဟော့ဂျ်လန်းဟာ အဲဗာတန်အသင်းနဲ့ ကစားမယ့် ပရီးမီးယားလိဂ်ပွဲစဉ်မှာ ယူနိုက်တက်အသင်းအတွက် ပြန်လည်ပါဝင်ဖွယ်ရှိတယ်လို့ သိရပါတယ်။
ဟော့ဂျ်လန်းဟာ ကြွက်သားဒဏ်ရာကြောင့် ယူနိုက်တက်အသင်း နောက်ဆုံးကစားခဲ့တဲ့ ၃ ပွဲစလုံး မပါဝင် နိုင်ခဲ့တာဖြစ်ပြီး အသင်းကလည်း သူမပါဝင်ခဲ့တဲ့ ဖူလ်ဟမ်၊ မန်စီးတီးအသင်းတို့နဲ့ ပရီးမီးယားလိဂ်ပွဲတွေမှာ ရှုံးပွဲကြုံတွေ့ခဲ့တာပါ။
ဖေဖော်ဝါရီ ၂၃ ရက်က ယူနိုက်တက်အသင်းရဲ့ ထုတ်ပြန်ချက်မှာ ဟော့ဂျ်လန်းဟာ ၂ ပတ်ကနေ ၃ ပတ်အထိ အနားယူရမယ်လို့ ဖော်ပြခဲ့ပြီး နည်းပြ အဲရစ်တန်ဟတ်က ကစားသမားဟာ ဒဏ်ရာအနည်းငယ်သာရရှိခဲ့တာလို့ ပြောခဲ့ပါတယ်။
အဲဒါကြောင့် ဒိန်းမတ်တိုက်စစ်မှူး ဟော့ဂျ်လန်းဟာ အိုးထရက်ဖို့ဒ်မှာ ကစားမယ့် အဲဗာတန်အသင်းနဲ့ ပရီးမီးယား လိဂ်ပွဲစဉ်မှာ ယူနိုက်တက်အသင်းအတွက် ပြန်လည်ပါဝင်လာနိုင်တာပါ။
ဒါပေမယ့် ကြံ့ခိုင်မှု အပြည့်အဝရမှ ပါဝင်နိုင်မယ်ဆိုရင်တော့ ဟော့ဂျ်လန်းဟာ မတ် ၁၇ ရက်မှာ ကစားမယ့် လီဗာပူးလ်အသင်းနဲ့ FA ဖလားကွာတားဖိုင်နယ် ပွဲစဉ်မှသာ ယူနိုက်တက်အသင်းအတွက် ပြန်လည်ပါဝင်နိုင်မှာ ဖြစ်ပါတယ်။
ဟော့ဂျ်လန်းကို တွေ့ရစဉ်
ဟော့ဂျ်လန်းဟာ ဒဏ်ရာကြောင့် အနားမယူခင်မှာ အကောင်းဆုံးပုံစံ တစ်ခုရရှိနေပြီး နောက်ဆုံးကစားခဲ့တဲ့ ပရီးမီးယားလိဂ် ၆ ပွဲမှာ ၇ ဂိုးသွင်းပြီး ၂ ဂိုးဖန်တီးနိုင်ခဲ့တာပါ။
ဟော့ဂျ်လန်းဟာ ဖေဖော်ဝါရီ ၁၈ ရက်က လူတန်အသင်းကို ၂ ဂိုး-၁ ဂိုးနဲ့ အနိုင်ရတဲ့ပွဲမှာ ယူနိုက်တက်အသင်း အတွက် နောက်ဆုံးပွဲစဉ်အဖြစ် ပါဝင်ကစားခဲ့ပြီး ဒီပွဲမှာ ၂ ဂိုးသွင်းယူခဲ့တာ ဖြစ်ပါတယ်။
ဟော့ဂျ်လန်း မပါဝင်နိုင်တဲ့အချိန် ယူနိုက်တက်အသင်းဟာ ရက်ရှ်ဖို့ဒ်ကို အထောင်တိုက်စစ်မှူးအဖြစ် အသုံးပြုခဲ့ ရပြီး ရက်ရှ်ဖို့ဒ်ဟာ မန်ချက်စတာဒါဘီပွဲစဉ်မှာ ဂိုးသွင်းယူနိုင်ခဲ့ပေမယ့် ဂိုးရနိုင်မယ့် အခွင့်အရေးတွေကို ဖြုန်းတီး နေခဲ့တာပါ။
ဟော့ဂျ်လန်းဟာ ယူနိုက်တက်အသင်းအတွက် ပထမဆုံး ပရီးမီးယားလိဂ်သွင်းဂိုးရဖို့ ဘောက်ဆင်ဒေးပွဲစဉ်အထိ စောင့်ဆိုင်းခဲ့ရပါတယ်။
ဟော့ဂျ်လန်းဟာ လက်ရှိအချိန်မှာ ယူနိုက်တက်အသင်းအတွက် ပွဲပေါင်း ၃၀ ပါဝင်ကစားထားပြီး ၁၃ ဂိုး သွင်းယူကာ ၂ ဂိုးဖန်တီးထားတာ ဖြစ်ပါတယ်။
Source: Sportsmole
- By CNI
- Category: အားကစား
- Hits: 943
CNI Sport News
၂၀၂၄ ခုနှစ်၊ မတ်လ ၆
ပီအက်စ်ဂျီအသင်း တိုက်စစ်မှူး ဘတ်ပီက ဆိုစီဒက်အသင်းကို အနိုင်ရပြီး ချန်ပီယံလိဂ်ပြိုင်ပွဲရဲ့ ကွာတားဖိုင်နယ် ကို ၃ ရာသီအတွင်း ပထမဆုံးအကြိမ် ပြန်တက်နိုင်ခဲ့ပြီးနောက် ပျော်ရွှင်တယ်လို့ ပြောခဲ့ပါတယ်။
ဘတ်ပီက “ကျနော်တို့မှာ ရှင်းလင်းတဲ့ ပွဲအစီအစဉ်ရှိခဲ့ပါတယ်။ ကျနော်တို့ဟာ စောစီးစွာ ဂိုးသွင်းယူနိုင်ခဲ့ပြီး ကြီးမားတဲ့ အခက်အခဲတွေကို ရှောင်နိုင်ခဲ့ပါတယ်။ ဒါကို ကျနော်တို့ လုပ်နိုင်ခဲ့ပြီး ကွာတားဖိုင်နယ်ကို ပြန်တက်နိုင် ခဲ့တဲ့အတွက် ပျော်ရွှင်ပါတယ်။ ကွာတားဖိုင်နယ်ကို တက်နိုင်ဖို့က ကျနော်တို့ရဲ့ ရည်ရွယ်ချက်ပါပဲလို့ ပွဲအပြီး Canal Plus ကိုပြောကြားခဲ့ပါတယ်။
ပီအက်စ်ဂျီအသင်းဟာ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ဆိုစီဒက်အသင်းကို ၂ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။
ပီအက်စ်ဂျီအသင်းအတွက် ၂ ဂိုးစလုံးကို ဘတ်ပီက သွင်းယူခဲ့တာဖြစ်ပြီး ဆိုစီဒက်အသင်းအတွက် ချေပဂိုးကို မီရီနို က သွင်းယူခဲ့တာပါ။
ပီအက်စ်ဂျီအသင်းဟာ ပထမအကျော့က ၂ ဂိုး- ဂိုးမရှိနဲ့ အနိုင်ရထားတဲ့အတွက် နှစ်ကျော့ပေါင်းရလဒ် ၄ ဂိုး-၁ ဂိုးနဲ့ ဆိုစီဒက်အသင်းကို အနိုင်ယူကာ ချန်ပီယံလိဂ် ကွာတားဖိုင်နယ်ကို တက်နိုင်ခဲ့တာဖြစ်ပါတယ်။
ဘတ်ပီကို တွေ့ရစဉ်
ပီအက်စ်ဂျီအသင်းဟာ ပြီးခဲ့တဲ့ ၂ ရာသီက ချန်ပီယံလိဂ်ပြိုင်ပွဲမှာ ၁၆ သင်း အဆင့်ကနေ ထွက်ခွာခဲ့ရတာကြောင့် ဒီရာသီမှာ ဒီအဆင့်ကို ကျော်ဖြတ်နိုင်ဖို့ ပစ်မှတ်ထားခဲ့တာပါ။
ဒီရာသီအကုန်မှာ ပီအက်စ်ဂျီ အသင်းကနေ ထွက်ခွာမှာဖြစ်လို့ ပြီးခဲ့တဲ့ လီဂူးဝမ်းပွဲစဉ် ၂ ပွဲမှာ ပွဲချိန်အစောကြီး လူစားလဲခံခဲ့ရတဲ့ ဘတ်ပီဟာ ဒီပွဲမှာ ပွဲချိန်ပြည့် ပါဝင်ကစားခဲ့ပြီး အကောင်းဆုံး ကစားသမားဆုကို ရရှိခဲ့ပါတယ်။
ဘတ်ပီကတော့ သူနဲ့ နည်းပြအကြားမှာ ပြဿနာမရှိဘူးလို့ ဝန်ခံခဲ့ပါတယ်။
ဘတ်ပီက “ကျနော့်နဲ့ နည်းပြ အင်းနရစ်တို့ဟာ ကောင်းမွန်တဲ့ ဆက်ဆံရေးရှိနေပြီး ဘာပြဿနာမှမရှိပါဘူး။ လူတွေက ဒါနဲ့ ပတ်သက်ပြီး အမျိုးမျိုးတွေးနိုင်ပေမယ့် အားလုံးက အလွန်ကောင်းပါတယ်။ ကျနော်ဟာ ချန်ပီယံလိဂ်ပြိုင်ပွဲမှာ အကောင်းဆုံး ကြိုးစားနေပါတယ်”လို့ ပြောခဲ့ပါတယ်။
ပီအက်စ်ဂျီအသင်းနည်းပြ လူးဝစ်အင်းနရစ်က ဘတ်ပီရဲ့ အနာဂတ်ဟာ အသင်းမှာရှိနေတာ မဟုတ်လို့ နည်းဗျူ တွေကို စမ်းသပ်ရမယ်လို့ ပြောထားတာပါ။
ဘတ်ပီဟာ ဒီရာသီမှာ ပီအက်စ်ဂျီအသင်းအတွက် ၃၄ ပွဲ ကစားထားပြီး ၃၄ ဂိုး သွင်းယူထားတာ ဖြစ်ပါတယ်။
Source: ESPN
- By CNI
- Category: အားကစား
- Hits: 886
CNI Sport News
၂၀၂၄ ခုနှစ်၊ မတ်လ ၆
ဘိုင်ယန်မြူးနစ်အသင်းဟာ လာဇီယိုအသင်းကို အနိုင်ရပြီး ချန်ပီယံလိဂ်ပြိုင်ပွဲ ကွာတားဖိုင်နယ်ကို တက်နိုင်ခဲ့ ပြီးနောက် တိုက်စစ်မှူး ဟာရီကိန်းက ဒီရလဒ်ဟာ သူတို့ရဲ့ ကံကြမ္မာကို ပြောင်းလဲပေးနိုင်ဖို့ မျှော်လင့်ကြောင်း ပြောခဲ့ပါတယ်။
ဟာရီကိန်းက “ဒါက ကျနော်တို့အတွက် ပြီးပြည့်စုံခဲ့သလို ပွဲကြီးပွဲကောင်း တစ်ပွဲဖြစ်ခဲ့ပါတယ်။ ကျနော်တို့ တိုးတက်ရမယ်ဆိုတာ သိပေမယ့် ဒီလိုညတွေက ဒီရာသီကို အမှန်တကယ် ပြောင်းလဲမှုတွေ ဖြစ်စေနိုင်ပါတယ်။ ကျနော်တို့ ဒီအရှိန်ကို ဆက်ထိန်းထားဖို့လိုပါတယ်။ ဒါက ကျနော်တို့ရဲ့ ရာသီအတွက် အလွန်အရေးကြီးတဲ့ အခိုက်အတန့်ပါ။ ပထမအကျော့အပြီးမှာ လူတိုင်းက ကျနော်တို့ ဘယ်လို တုန့်ပြန်မလဲဆိုတာကို စောင့်နေကြ တာပါ။ ဒါကို လက်ကျန်ရာသီ အတွက်အလှည့် အပြောင်းအနေနဲ့ အသုံးပြုနိုင်ဖို့ မျှော်လင့်ကြောင်း”ပြောခဲ့တာပါ။
ဘိုင်ယန်မြူးနစ်အသင်းဟာ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ လာဇီယိုအသင်းကို ၃ ဂိုး- ဂိုး မရှိနဲ့ အနိုင်ရခဲ့တာ ဖြစ်ပါတယ်။
ဒီပွဲမှာ ဘိုင်ယန်မြူးနစ်အသင်းအတွက် ဂိုးတွေကို ဟာရီကိန်းက ၂ ဂိုး၊ မူလာက ၁ ဂိုးသွင်းယူခဲ့တာပါ။
ဘိုင်ယန်မြူးနစ်အသင်းဟာ ပထမအကျော့က လာဇီယိုအသင်းကို ၁ ဂိုး- ဂိုးမရှိနဲ့ အရေးနိမ့်ခဲ့ပေမယ့် ဒုတိယ အကျော့ပွဲမှာ အနိုင်ရခဲ့တာကြောင့် နှစ်ကျော့ပေါင်း ရလဒ် ၃ ဂိုး-၁ ဂိုးနဲ့ အနိုင်ရပြီး ကွာတားဖိုင်နယ်ကို တက်နိုင်ခဲ့တာ ဖြစ်ပါတယ်။
ဟာရီကိန်းကို တွေ့ရစဉ်
ဘိုင်ယန်မြူးနစ်အသင်းဟာ လာဇီယိုအသင်းနဲ့ ဒုတိယအကျော့ ပွဲစဉ်မတိုင်ခင် နောက်ဆုံးကစားခဲ့တဲ့ ၅ ပွဲမှာ ၁ ပွဲ သာ အနိုင်ရတဲ့အထိ ရလဒ်တွေဆိုးနေပြီး ဘွန်ဒစ်လီဂါပြိုင်ပွဲမှာလည်း လေဗာကူဆင်အသင်းရဲ့ ၁၀ မှတ်ဖြတ် ဦးဆောင်ခြင်းကို ခံထားရတာပါ။
အဲဒါကြောင့် ဘိုင်ယန်မြူးနစ်အသင်းဟာ၂၀၁၁-၁၂ ရာသီနောက်ပိုင်း ပထမဆုံးအကြိမ် ဆုဖလားလက်မဲ့ရာသီနဲ့ အဆုံးသတ်ရဖို့ ရှိခဲ့ပေမယ့် လာဇီယိုအသင်းကို အနိုင်ရခဲ့တာကြောင့် ဆုဖလားရယူနိုင်ဖို့ မျှော်လင့်ချက်တွေ ရှင်သန်နေသေးတာ ဖြစ်ပါတယ်။
ပြီးခဲ့တဲ့နွေရာသီက စပါးအသင်းကနေ ရောက်ရှိလာခဲ့တဲ့ ဟာရီကိန်းဟာ ဒီရာသီမှာ ဘိုင်ယန်မြူးနစ်အသင်း အတွက် ၃၃ ပွဲ ပါဝင်ကစားထားအပြီးမှာ ၃၃ ဂိုး သွင်းယူထားကာ ဒီပွဲရဲ့အကောင်းဆုံး ကစားသမားဆုကို ရရှိခဲ့တာပါ။
ဘိုင်ယန်မြူးနစ်အသင်းဟာ ဒီတစ်ပတ် ဘွန်ဒစ်လီဂါပွဲစဉ်အဖြစ် မိန့်ဇ်အသင်းနဲ့ ယှဉ်ပြိုင်ရမှာဖြစ်ပြီး အနိုင်ရလဒ် ရယူကာ လေဗာကူဆင်အသင်းကို ဆက်ပြီး ဖိအားပေးဖို့လိုအပ်နေတာ ဖြစ်ပါတယ်။
Source: BBC
- By CNI
- Category: အားကစား
- Hits: 848
CNI Sport News
၂၀၂၄ ခုနှစ်၊ မတ်လ ၅
ပြင်သစ်အသင်းနဲ့ ယူရို ၂၀၀၀ ပြိုင်ပွဲမှာ ချန်ပီယံဆုကို ရယူနိုင်ခဲ့တဲ့ လီဘော့ဖ်က ပေါ်တူဂီအသင်းအနေနဲ့ အသင်း ခေါင်းဆောင် ရော်နယ်ဒိုကို အသုံးမပြုရင် ယူရို ၂၀၂၄ ပြိုင်ပွဲမှာ ချန်ပီယံဆုကို ရယူနိုင်တယ်လို့ ပြောခဲ့ပါတယ်။
လီဘော့ဖ်က “ပေါ်တူဂီအသင်းဟာ နွေရာသီမှာ ကျင်းပမယ့် ဥရောပ ချန်ပီယံရှစ်ပြိုင်ပွဲမှာ ဗိုလ်စွဲနိုင်မယ့် အသင်း တွေထဲက တစ်သင်းဖြစ်ပါတယ်။ အမှန်တကယ်လည်း သူတို့ဟာ ယူရိုချန်ပီယံဆုကို ရယူနိုင်မယ်လို့ ကျနော်ထင်ပါ တယ်။ ဒါပေမယ့် ရော်နယ်ဒို မကစားမှသာ ဒီလိုဖြစ်လာနိုင်မှာပါ”လို့ BetVictor ကိုပြောခဲ့တာပါ။
ရော်နယ်ဒို ဦးဆောင်တဲ့ ပေါ်တူဂီအသင်းဟာ ယူရို ၂၀၁၆ ပြိုင်ပွဲမှာ ချန်ပီယံဆုကို ပထမဆုံးအကြိမ် ရယူနိုင်ခဲ့ ပြီးနောက် လာမယ့် ယူရို ၂၀၂၄ ပြိုင်ပွဲမှာ ဒုတိယမြောက် ချန်ပီယံဆုကို ရယူနိုင်ဖို့ ပစ်မှတ်ထားနေတာ ဖြစ်ပါ တယ်။
ရော်နယ်ဒိုဟာ ပြီးခဲ့တဲ့ ယူရို ၂၀၂၄ ခြေစစ်ပွဲမှာ ပေါ်တူဂီအသင်းအတွက် ၁၀ ဂိုးသွင်းပြီး ခြေစစ်ပွဲ အောင်မြင်အောင် စွမ်းဆောင်ပေးထားနိုင်ခဲ့တာပါ။
ဒါပေမယ့် ပြင်သစ်နဲ့ ချယ်လ်ဆီး ကစားသမားဟောင်း လီဘော့ဖ်က ရော်နယ်ဒို မပါမှသာ ပေါ်တူဂီချန်ပီယံ ဖြစ်နိုင်မယ်လို့ ပြောထားခဲ့ပါတယ်။
ရော်နယ်ဒိုကို တွေ့ရစဉ်
ဒါအပြင် လီဘော့ဖ်ဟာ ဆော်ဒီပရိုလိဂ်က ပြင်သစ်လီဂူးဝမ်းထက် ပိုပြီးကောင်းတယ်လို့ ရော်နယ်ဒိုပြောခဲ့တဲ့ အပေါ် ပြန်ပြီတုန့်ပြန်ခဲ့သေးတာပါ။
လီဘော့ဖ်က “ဆော်ဒီပရိုလိဂ်က ပြင်သစ်လိဂ်ထက် ပိုကောင်းတယ်လို့ ရော်နယ်ဒို ပြောတာကို ကြားရတာဟာ ကျနော့်ကို စိတ်အနှောက်အယှက် ဖြစ်စေပါတယ်။ သူဟာ ပေါ်တူဂီလိဂ်ထက် ပြင်သစ်လိဂ်ကို မှတ်ချက်ပေးဖို့ ဘာကြောင့် ရွေးချယ်ခဲ့လဲဆိုရင် မက်ဆီ လီဂူးမှာ ကစားတာကြောင့်မို့လိုပါ။ ကျနော်သူ့ကို ကစားသမားတစ်ဦး အနေနဲ့ လေးစားမှုတွေ အများကြီးရှိပေမယ့် ပါးစပ်ပိတ်ထားလိုက်ပါ။ လီဂူးဝမ်းအတွက် ဒါက မျှတမှုမရှိဘူး”လို့ ပြောခဲ့ပါတယ်။
ယူရို ၂၀၂၄ ပြိုင်ပွဲဟာ ရော်နယ်ဒိုအတွက် နောက်ဆုံးယူရိုပြိုင်ပွဲ ဖြစ်မှာဖြစ်ပြီး ပေါ်တူဂီအသင်းဟာ ဒီပြိုင်ပွဲမှာ တူရကီ၊ ချက်၊ ပလေးအော့ဖ်က အနိုင်ရတဲ့ အသင်းတို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။
Source: Goal
Page 207 of 428
Connect with us
