CNI Sport News

 ၂၀၂၃ ခုနှစ်၊ ဇူလိုင် ၂၄

မန်စီးတီးအသင်းနည်းပြ ဂွာဒီယိုလာက တိုက်စစ်မှူး ဟာလန်းဟာ ပြီးခဲ့တဲ့နှစ် နွေရာသီက ဒေါ့မွန်အသင်းကနေ ရောက်ရှိလာခဲ့တာထက် အခုအချိန်မှာ ပိုမိုကောင်းမွန်တဲ့ပုံစံ ရနေပြီလို့ ပြောလိုက်ပါတယ်။

ဂွာဒီယိုလာက “ပြီးခဲ့တဲ့ရာသီနဲ့ နှိုင်းယှဉ်ရင် သူက ပိုပြီးတော့ ကြံ့ခိုင်မှုရော၊ အရာအားလုံး အဆင်ပြေလာပါပြီ။ ပြီးခဲ့တဲ့ရာသီက သူရောက်လာခဲ့တုန်းကထက် အများကြီး ပိုပြီးကောင်းလာပါပြီ။ ကျနော်သူ့ကို ပြီးခဲ့တဲ့ရာသီက လိုပဲ ဖြစ်စေချင်တာပါ။ ဟာလန်း ဒဏ်ရာမရတာ ကောင်းပေမယ့် အချိန်မှာတော့ သူဟာ လူတိုင်းနဲ့ ဝေးကွာနေပါ သေးတယ်။ လာမယ့် ရက်သတ္တပတ် အနည်းငယ်အတွင်းမှာ သူ့အခြေအနေက အခုထက်ပိုပြီး ကောင်းလာပါ လိမ့် မယ်”လို့ ပြောခဲ့တာပါ။

နော်ဝေတိုက်စစ်မှူးဟာ မန်စီးတီးအသင်းက ယိုကိုဟားမားမာရီနိုစ်အသင်းနဲ့ တိုကျိုမှာကစားခဲ့တဲ့ ခြေစမ်းပွဲမှာ ဒုတိယပိုင်းမှ လူစားလဲ ဝင်ရောက်ခဲ့ပေမယ့် ၂ ဂိုး သွင်းယူနိုင်ခဲ့တာ ဖြစ်ပါတယ်။
 
ဒီပွဲမှာ မန်စီးတီးအသင်းက ဂျပန်ကလပ်ကို ၅ ဂိုး- ၃ ဂိုးနဲ့ အနိုင်ရရှိခဲ့တာပါ။ ဟာလန်းဟာ ပြီးခဲ့တဲ့ရာသီက မန်စီးတီးအသင်း ပရီးမီးယားလိဂ်၊ FA ဖလားနဲ့ ချန်ပီယံလိဂ် ဖလားတို့ကို ရယူနိုင်ခဲ့တာမှာ အဓိကအရေးပါတဲ့ သူဖြစ်ခဲ့ပြီး သွင်းဂိုး အများအပြားကို သွင်းယူနိုင်ခဲ့တာ ဖြစ်ပါတယ်။

 ဂွာဒီယိုလာကိုတွေ့ရစဉ်

အသက် ၂၃ နှစ်အရွယ်ရှိ ဟာလန်းဟာ ၂၀၂၂-၂၃ ရာသီက မန်စီးတီးအသင်းအတွက် ၅၃ ပွဲ ပါဝင်ကစားပြီး ၅၂ ဂိုး သွင်းယူနိုင်ခဲ့ကာ စံချိန်သစ်တွေ တင်နိုင်ခဲ့တာပါ။ မန်စီးတီးအသင်းနည်းပြ ဂွာဒီယိုလာက ဂျပန်ကလပ်နဲ့ ခြေစမ်းပွဲ အပြီးမှာ အသင်းဟာ တိုးတက်လာနိုင်တဲ့ အရာတွေ အများကြီး ရှိသေးတယ်လို့ ပြောခဲ့ပါတယ်။

ဂွာဒီယိုလာက “ကျနော်တို့ဟာ လုံလောက်တဲ့ ပြင်ဆင်မှု မရှိသေးတဲ့အတွက် ဒါဟာ ကောင်းမွန်တဲ့ စမ်းသပ်မှုပါ။ ယိုကိုဟားမားရဲ့ ကစားပုံကောင်းမွန်မှုတွေက ကျနော်တို့အတွက် ကောင်းပါတယ်။ ကျနော်တို့ တိုးတက်လာနိုင်တဲ့ အရာတွေ အများကြီးရှိပြီး၊ ဘယ်သူမှ ဒဏ်ရာ မရသွားတာကလည်း အရေးကြီးဆုံး အရာပါပဲ။ အခုတော့ ကျနော် တို့ အနားယူပြီး လာမယ့်ပွဲအတွက် ပြင်ဆင်ရမယ်”လို့ ပြောခဲ့တာ ဖြစ်ပါတယ်။

မန်စီးတီးအသင်းဟာ ဇူလိုင် ၂၆ ရက်မှာ ရာသီကြို ခြေစမ်းပွဲအဖြစ် ဘိုင်ယန်မြူးနစ်၊ ဇူလိုင် ၃၀ ရက်မှာ အသလက်တီကို မက်ဒရစ်အသင်းတို့နဲ့ ယှဉ်ပြိုင်မှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇူလိုင် ၂၄

စပါးအသင်းပိုင်ရှင် ဂျိုလူးဝစ်က တိုက်စစ်မှူး ဟာရီကိန်းအနေနဲ့ စာချုပ်သစ်ချုပ်ဖို့ ငြင်းဆန်ခဲ့မယ်ဆိုရင် အခု နွေရာသီအပြောင်းအရွှေ့မှာ ရောင်းချဖို့ အသင်းဥက္ကဋ္ဌ လီဗိုင်းကို ပြောထားတယ်လို့ ဒေးလီးမေးလ်က ဖော်ပြ ခဲ့ပါတယ်။

စပါးအသင်းပိုင်ရှင်က ဟာရီကိန်းကို စာချုပ်ကုန်ဆုံးမယ့် လာမယ့်ရာသီအကုန်မှာ အလွတ်နဲ့ ထွက်ခွာခွင့်မပေးဖို့ ဆုံးဖြတ်ထားတာပါ။ လီဗိုင်းဟာ တိုက်စစ်မှူး ဟာရီကိန်းကို ပေါင်သန်း ၁၀၀ တန်ကြေး သတ်မှတ်ထားပေမယ့် တစ်ပတ်လုပ်ခပေါင် ၄ သိန်းအထိရရှိမယ့် စာချုပ်သစ်ကို ငြင်းဆန်ခဲ့မယ်ဆိုရင် နွေရာသီအပြောင်းအရွှေ့ နောက်ဆုံးရက်မတိုင်ခင် ရောင်းချဖို့ ဖိအားပေးခံရဖို့ ရှိနေပါတယ်။

ဟာရီကိန်းကို ခေါ်ယူနိုင်ဖို့ ဘိုင်ယန်မြူးနစ်အသင်းက ကမ်းလှမ်းမှုနှစ်ကြိမ်ပြုလုပ်ထားတာကို စပါးအသင်းက ပယ်ချခဲ့ပေမယ့် ဂျာမန်ကလပ်က တတိယအကြိမ် ကမ်းလှမ်းမှုပြုလုပ်ဖို့ ပြင်ဆင်နေတာပါ။ ဟာရီကိန်းရဲ့ဇနီး ဖြစ်သူဟာ မြူးနစ်မှာ အိမ်ရှာဖွေနေတာကြောင့် ဘိုင်ယန်မြူးနစ်အသင်းဟာ ဒီအပြောင်းအရွှေ့ကို အပြီးသတ် နိုင်မယ်လို့ ယုံကြည်မှုရှိနေတာဖြစ်ပါတယ်။ 

အင်္ဂလန်အသင်းခေါင်းဆောင်ကို ခေါ်ယူဖို့ ယူနိုက်တက်အသင်းကလည်း စိတ်ဝင်စားနေပေမယ့် စပါးအသင်း သတ်မှတ်ထားတဲ့ ပြောင်းရွှေ့ကြေးကများတယ်ဆိုပြီး စိတ်ဝင်စားမှုကို အဆုံးသတ်ခဲ့တာပါ။ စပါးအသင်းဘက်က ဟာရီကိန်းကို ရောင်းချဖို့ မဖြစ်မနေလုပ်ဆောင်မယ်ဆိုရင် ယူနိုက်တက်အသင်းဟာ ဒီပြိုင်ဆိုင်မှုမှာ ပါဝင်လာ နိုင်ဖွယ်ရှိပေမယ့် ကစားသမားအတွက် သတ်မှတ်ထားတဲ့ ပြောင်းရွှေ့ကြေးကို ပေးချေဖို့ ဆန္ဒမရှိပါဘူး။ 

ဟာရီကိန်းဟာ လက်ရှိအချိန်မှာ အနာဂတ်နဲ့ပတ်သက်ပြီး သတင်းတွေထွက်ပေါ်နေပေမယ့် စပါးအသင်းနဲ့အတူ ရာသီကြိုခရီးစဉ်ကို လိုက်ပါသွားပြီး ခြေစမ်းပွဲမှာ ပါဝင်ကစားခဲ့ပါတယ်။ စပါးအသင်းနည်းပြ ပိုစတီကိုဂလူး ကတော့ ရာသီသစ်မစတင်ခင်မှာ ဟာရီကိန်းရဲ့အပြောင်းအရွှေ့ကိစ္စရပ်ကို အမြန်ဆုံးဖြေရှင်းပေးဖို့ မျှော်လင့် နေတာပါ။ စပါးအသင်းကသာ ဟာရီကိန်းကို ရောင်းချခဲ့မယ်ဆိုရင် တိုက်စစ်မှူးသစ်တစ်ဦးကို အမြန်ဆုံးအစားထိုး ခေါ်ယူနိုင်ဖို့ နည်းပြကစီစဉ်နေတာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဇူလိုင် ၂၄

အယ်လ်နာဆာအသင်းခေါင်းဆောင် ရော်နယ်ဒိုက အသင်းဟာ ရာသီကြိုခြေစမ်းပွဲမှာ ရလဒ်တွေဆိုးနေပေမယ့် ရာသီသစ်မှာ အသင်းနဲ့အတူ ဆုဖလားအောင်မြင်မှုတွေ ရယူချင်တယ်လို့ ဂျပန်ခရီးစဉ်မှာ ပြောလိုက်ပါတယ်။

ရော်နယ်ဒိုက “ကျနော်တို့ ဆုဖလားအားလုံးကို အနိုင်ရဖို့ မျှော်လင့်ထားပါတယ်။ ကျနော်တို့အတွက် ဒါက ခက်ခဲ လိမ့်မယ်ဆိုတာ သိပေမယ့် ကျနော်တို့မှာ ကောင်းမွန်တဲ့အသင်း၊ နည်းပြသစ်၊ ကစားသမားသစ်တွေ ရှိပါတယ်။ ကျနော်တို့ရဲ့ ရည်မှန်းချက်က ပြီးခဲ့တဲ့နှစ်ကနဲ့ အတူတူပါပဲ။ ကျနော်တို့ဟာ အံ့သြဖွယ်ကောင်းတဲ့ ရာသီဖြစ်အောင် လုပ်နိုင်ဖို့ မျှော်လင့်ပြီး ဒီနှစ်မှာ ဆုဖလားအနည်းငယ်ရယူချင်ပါတယ်”လို့ သတင်းထောက်တွေကို ပြောခဲ့တာပါ။

အယ်လ်နာဆာအသင်းဟာ ဂျပန်ခရီးစဉ်မတိုင်ခင် ရာသီကြိုခြေစမ်းပွဲ နောက်ဆုံးနှစ်ပွဲအဖြစ် ဆယ်လ်တာဗီဂိုနဲ့ ဘင်ဖီကာအသင်းတို့နဲ့ ကစားခဲ့တာမှာ ဂိုးပြတ်အရေးနိမ့်ခဲ့တာဖြစ်ပါတယ်။ ဆယ်လ်တာဗီဂိုအသင်းကို ၅ ဂိုး- ဂိုး- ဂိုးမရှိနဲ့ အရေးနိမ့်ခဲ့ပြီး၊ ဘင်ဖီကာအသင်းကို ၄ ဂိုး- ၁ ဂိုးနဲ့ အရေးနိမ့်ခဲ့တာပါ။ ဆော်ဒီပရိုလိဂ်ကလပ်ဟာ ဂျပန် ခရီးစဉ်မှာ ဥရောပထိပ်သီးအသင်းတွေဖြစ်တဲ့ ပီအက်စ်ဂျီ၊ အင်တာမီလန်အသင်းတို့နဲ့ ယှဉ်ပြိုင်မှာဖြစ်ပါတယ်။

ရော်နယ်ဒိုက “အယ်လ်နာဆာနဲ့ ပထမဆုံး ဂျပန်ခရီးစဉ်အတွက် အလွန်ပျော်ရွှင်ပါတယ်။ ကျနော်တို့မှာ အလွန် ကောင်းမွန်တဲ့ ပွဲနှစ်ပွဲ ကစားဖို့ရှိပြီး၊ ဒီအတွက် စိတ်လှုပ်ရှားနေပါတယ်။ ဂျပန်လူမျိုးတွေဟာ ဘောလုံးနဲ့ ပတ်သက် ရင် အလွန်စိတ်အားထက်သန်ကြတဲ့သူတွေဖြစ်လို့ ကောင်းမွန်တဲ့ပွဲပေးနိုင်ဖို့ ဒီကို ရောက်ရှိလာတာလို့” ပြောခဲ့ပါ တယ်။

အယ်လ်နာဆာအသင်းဟာ အခုနွေရာသီအပြောင်းအရွှေ့မှာ ဘရိုဇိုဗစ်၊ ဖိုဖာနာ၊ တဲလက်စ်တို့ကို ခေါ်ယူထားပြီး နောက်ထပ်ကြယ်ပွင့်ကစားသမားတွေဖြစ်တဲ့ မာနေး၊ ဘိုင်လီနဲ့ ဒမ်ဘီလီတို့ကို ခေါ်ယူနိုင်ဖို့လည်း ကြိုးစားနေ တယ်လို့ သိရပါတယ်။ အယ်လ်နာဆာအသင်းဟာ ပြီးခဲ့တဲ့နှစ်က ဆုဖလားတွေနဲ့ လွဲချော်ခဲ့လို့ ရာသီသစ်မှာ ဆု ဖလားတွေ ရယူနိုင်ဖို့ အဓိကပစ်မှတ်ထားနေတာဖြစ်ပါတယ်။

Source:Besoccer

CNI Sport News

၂၀၂၃ ခုနှစ်၊ ဇူလိုင် ၂၂ 

အာဆင်နယ်အသင်းဟာ ဒီကလန်ရိုက်စ်ကို ခေါ်ယူနိုင်ခဲ့ပေမယ့် ကွင်းလယ်ကစားသမား ပါတေးအသင်းမှာ ဆက်ရှိမယ်လို့ နည်းပြဖြစ်သူ အာတီတာက ပြောလိုက်ပါတယ်။

အာတီတာက “ကျနော်သူနဲ့ စကားပြောတိုင်း သူ့ရဲ့ဆန္ဒက ကျနော်တို့နဲ့အတူ ဆက်ရှိဖို့ပါ။ ကျနော့်အတွက်တော့ ဒီထက်ပိုပြီး ပြောစရာဘာမှမရှိပါဘူး။ ပါတေးနဲ့ ဒီကလန်ရိုက်စ်တို့ဟာ အတူတွဲကစားနိုင်ပြီး ဒါက ကျနော့်ရဲ့ အစီအစဉ်မှာ ပါဝင်ပါတယ်။ ကျနော်ဟာ အသင်းကို ပိုပြီးကောင်းမွန် စေချင်တာကြောင့် အရည်အသွေးရှိတဲ့သူတွေ ပိုပြီး လိုအပ်ပါတယ်။ ကျနော်တို့ဟာ လွန်ခဲ့တဲ့နှစ်တွေက မရှိခဲ့တဲ့အရာတွေကို ပိုကောင်းအောင် လုပ်ချင်တာ ကြောင့် ဒီကလန်ရိုက်စ်ကို ဝယ်ယူခဲ့တာ”လို့ ပြောခဲ့တာပါ။

ဂါနာလက်ရွေးစင် ကစားသမားဟာ နွေရာသီ အပြောင်းအရွှေ့ စပြီးဖွင့်ကတည်းက အပြောင်းအရွှေ့ သတင်းတွေ ထွက်ပေါ်ခဲ့တာဖြစ်ပြီး ပါတေးကို ခေါ်ယူဖို့ စီးရီးအေကလပ် ဂျူဗင်တပ်စ်နဲ့ ဆော်ဒီကလပ် အသင်းတွေက စိတ်ဝင် စားနေတာ ဖြစ်ပါတယ်။ 

အာဆင်နယ်အသင်းက ဝက်စ်ဟမ်းအသင်း ကွင်းလယ်လူ ဒီကလန်ရိုက်စ်ကို စံချိန်တင် ပြောင်းရွှေ့ကြေး ပေါင် ၁၀၅ သန်းနဲ့ ဝယ်ယူပြီးနောက် ပါတေးရဲ့ အပြောင်းအရွှေ့ သတင်းတွေဟာ ပိုပြီး ထွက်ပေါ်လာခဲ့တာပါ။

ပါတေးကို တွေ့ရစဉ် 

ဒါပေမယ့် အာဆင်နယ် အသင်းနည်းပြ အာတီတာကတော့ ပါတေးဟာ လန်ဒန်မှာ ပျော်ရွှင်နေပြီး ဒီကလန်ရိုက်စ် နဲ့အတူ ကွင်းလယ်မှာ အတူတွဲ ကစားနိုင်တယ်လို့ ပြောခဲ့ပါတယ်။ 

အသက် ၃၀ နှစ်အရွယ်ရှိ ပါတေးဟာ အာဆင်နယ်အသင်းကို ၂၀၂၀ ခုနှစ်က စပိန်ကလပ် အက်သလက်တီကို အသင်းကနေ ရောက်ရှိလာခဲ့တာဖြစ်ပြီး အသင်းအတွက် ပွဲပေါင်း ၉၉ ပွဲ ပါဝင်ကစားကာ ၅ ဂိုးသွင်း ယူနိုင်ခဲ့တာ ဖြစ်ပါတယ်။

အာဆင်နယ်အသင်းဟာ အမေရိကန်နိုင်ငံမှာ ရာသီသစ်အတွက် ပြင်ဆင်နေတာဖြစ်ပြီး မေဂျာလိဂ် အောလ်စတား၊ ယူနိုက်တက်အသင်းတို့နဲ့ ခြေစမ်းပွဲတွေ ယှဉ်ပြိုင်ခဲ့ပြီး ဖြစ်ပါတယ်။

လန်ဒန်ကလပ်ဟာ ဘာစီလိုနာ၊ မိုနာကိုတို့နဲ့ ခြေစမ်းပွဲ ဆက်လက် ယှဉ်ပြိုင်ပြီး သြဂုတ် ၆ ရက်မှာ မန်စီးတီး အသင်းနဲ့ ကွန်မြူနတီဒိုင်း ပွဲစဉ်ယှဉ်ပြိုင်သွားမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဇူလိုင် ၂၂

ချယ်လ်ဆီးအသင်းနဲ့ ပွဲဦးထွက်ရာသီမှာ ခက်ခဲမှုတွေနဲ့ ကြုံတွေ့ခဲ့ရတဲ့ တိုက်စစ်မှူး စတာလင် ဆီကနေ အကောင်းဆုံး ပုံစံတွေကို ရယူနိုင်မယ်လို့ ယုံကြည်မှုရှိကြောင်း နည်းပြ ပိုချက်တီနိုက ပြောခဲ့ပါတယ်။

ပိုချက်တီနိုက “သူက ကျနော်တို့အတွက် အရေးပါတဲ့ ကစားသမား တစ်ဦးဖြစ်ပြီး သူက ကျနော့်ရဲ့ အစီအစဉ်မှာ ပါဝင်ပါတယ်။ သူဟာ အသင်းအတွက် မတူညီတဲ့ အရာတွေအများကြီးကို ပေးနိုင်ပါတယ်။ ကျနော်တို့ လိုချင်နေ တဲ့ အောင်မြင်မှုတွေရရှိအောင် ကူညီပေးနိုင်ဖို့ သူ့ဆီကနေ အကောင်းဆုံးပုံစံတွေကို ရယူနိုင်မယ်ဆိုတာ ယုံကြည် ပါတယ်”လို့ ပြောခဲ့တာပါ။

စတာလင်ဟာ ပြီးခဲ့တဲ့နှစ် နွေရာသီ အပြောင်းအရွှေ့က မန်စီးတီး အသင်းကနေ ပေါင်သန်း ၅၀ နဲ့ ချယ်လ်ဆီး အသင်းထံ ရောက်ရှိလာခဲ့ပြီး ပွဲပေါင်း ၃၈ ပွဲ ပါဝင်ကစားခဲ့ပေမယ့် ၉ ဂိုးသာ သွင်းယူနိုင်ခဲ့တာ ဖြစ်ပါတယ်။

စတာလင်ဟာ ချယ်လ်ဆီးအသင်းမှာ ပုံစံကောင်းတွေ မပြသနိုင်ခဲ့တာကြောင့် နောက်ဆုံး ကစားခဲ့တဲ့ ယူရို ၂၀၂၄ ခြေစစ်ပွဲမှာ အင်္ဂလန်အသင်းအတွက် ရွေးချယ်ခံရခြင်း မရှိတော့ပါဘူး။ 

နည်းပြ ဆောက်ဂိတ်က စတာလင်ကို ရွေးချယ်သင့်တယ်လို့ မခံစားရကြောင်း ပြောခဲ့တာပါ။

ချယ်လ်ဆီးအသင်းဟာ ပြီးခဲ့တဲ့ရာသီက နည်းပြ အပြောင်းအလဲ ၃ ဦးအထိ ပြုလုပ်ခဲ့ပေမယ့် ရလဒ်ဆိုးတွေကနေ မရုန်းထွက်နိုင်ခဲ့ဘဲ ပရီးမီးယားလိဂ်မှာ အဆင့် ၁၂ နေရာနဲ့ ရာသီအဆုံးသတ်ကာ ၂၅ နှစ်အတွင်း အသင်းရဲ့ အနိမ့် ဆုံး လိဂ်အဆင့် ရပ်တည်မှု ဖြစ်ခဲ့ပါတယ်။

ချယ်လ်ဆီးမှာ စတာလင်ကစားစဉ်

ချယ်လ်ဆီးအသင်းဟာ ရာသီသစ်မှာ ရလဒ်ကောင်းတွေ ရယူနိုင်ဖို့ ပြင်ဆင်မှုတွေ ပြုလုပ်နေပြီး အမေရိကန် ရာသီ ကြို ခရီးစဉ်အဖွင့်ပွဲမှာ ရက်စ်ဟမ်းအသင်းကို ၅ ဂိုး- ဂိုးမရှိနဲ့ အနိုင်ရရှိခဲ့တာပါ။

ချယ်လ်ဆီးအသင်းဟာ အခုနွေရာသီ အပြောင်းအရွှေ့မှာ အဓိက ကစားသမား အများအပြား အသင်းက ထွက်ခွာ သွားခဲ့ပြီး အန်ကန်ကူနဲ့ ဂျက်ဆန်တို့ကိုသာ ပြန်လည် အားဖြည့်နိုင်ခဲ့တာ ဖြစ်ပါတယ်။ 

လန်ဒန်ကလပ်ဟာ လက်ရှိအချိန်မှာ ဘရိုက်တန် အသင်းကွင်းလယ်လူ ကိုင်စီဒိုကို ခေါ်ယူနိုင်ဖို့ ကြိုးစားနေပြီး အရင် ကမ်းလှမ်းထားတဲ့ ၂ ကြိမ်ကို ဘရိုက်တန်အသင်းက ပယ်ချထားတာပါ။

အဲ့ဒါကြောင့် ပြောင်းရွှေ့ကြေးတိုးပြီး နောက်ထပ် ကမ်းလှမ်းဖို့ ပြင်ဆင်နေတာ ဖြစ်ပါတယ်။

ချယ်လ်ဆီး အသင်းဟာ ရာသီသစ် ပရီးမီးယားလိဂ် ပွဲစဉ်မတိုင်ခင် ပရီးမီးယားလိဂ် ကလပ်တွေဖြစ်တဲ့ ဘရိုက်တန်၊ နယူးကာဆယ်၊ ဖူလ်ဟမ်အသင်းတို့နဲ့ ခြေစမ်းပွဲ ယှဉ်ပြိုင်ကစားသွားမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇူလိုင် ၂၂

ပီအက်စ်ဂျီအသင်းဟာ အာရှကို သွားရောက်မယ့် အသင်းရဲ့ ရာသီကြိုခရီးစဉ်မှာ တိုက်စစ်မှူး ဘတ်ပီကို ချန်လှပ် ခဲ့ပြီး ကစားသမားကို ရောင်းချဖို့ ဆုံးဖြတ်လိုက်ပြီလို့ သတင်းတွေမှာ ဖော်ပြထားပါတယ်။

ဘတ်ပီဟာ ပီအက်စ်ဂျီ အသင်းကနေ ထွက်ခွာဖို့ ဆုံးဖြတ်ထားတာကြောင့် ပြင်သစ်ကလပ်ဟာ တိုက်စစ်မှူးကို အခုအပြောင်းအရွှေ့မှာ အသင်းရောင်းချမယ့် ကစားသမားစာရင်းထဲ ထည့်သွင်းခဲ့တယ်လို့ The Athletic က ဖော်ပြခဲ့တာပါ။ 

ပီအက်စ်ဂျီအသင်းဟာ ဘတ်ပီကို ခေါ်ယူမယ့် ကမ်းလှမ်းမှုတွေကို နားထောင်သွားမှာဖြစ်ပြီး အခုအပြောင်းအရွှေ့ မှာ မရောင်းချဖြစ်ခဲ့ရင် တစ်ရာသီလုံး အရန်ခုံမှာ ထားသွားဖို့အထိ ပြင်ဆင်နေတာ ဖြစ်ပါတယ်။

ပြင်သစ်ကလပ်ဟာ ဘတ်ပီကို သူတို့ဝယ်ယူခဲ့တုန်းက ပေးခဲ့ရတဲ့ ပြောင်းရွှေ့ကြေးထက် အများကြီး လျှော့ပြီး ကမ်းလှမ်းမယ့် ကမ်းလှမ်းမှုတွေကိုတောင် လက်ခံသွားနိုင်တယ်လို့ သတင်းမှာ ဖော်ပြထားတာပါ။ 

ဘတ်ပီကို တွေ့ရစဉ် 

အသက် ၂၄ နှစ်အရွယ်ရှိ ဘတ်ပီဟာ စာချုပ်ကုန်ဆုံးမယ့် လာမယ့်ရာသီအကုန်မှာ ပီအက်စ်ဂျီကနေ ထွက်ခွာဖို့ ဆုံးဖြတ်ထားတာဖြစ်လို့ အသင်းဟာ အခုအပြောင်းအရွှေ့မှာ မရောင်းချနိုင်ရင် ရာသီအကုန်မှာ အလွတ်နဲ့ ဆုံးရှုံးရတော့မှာ ဖြစ်ပါတယ်။

ပီအက်စ်ဂျီအသင်းက ဘတ်ပီဟာ ရီးရယ်လ်အသင်းထံ ပြောင်းဖို့အတွက် သဘောတူညီမှု ရရှိထားတယ်လို့ ယုံကြည်နေပြီး အသင်းအပေါ် သစ္စာဖောက်တယ်လို့ ခံစားရကာ အမြန်ဆုံး ရောင်းချနိုင်ဖို့ စီစဉ်နေတာပါ။

ဘတ်ပီဟာ ဇူလိုင် ၂၁ ရက်က လီဟာဗရီအသင်းကို အနိုင်ရခဲ့တဲ့ ခြေစမ်းပွဲမှာ ပီအက်စ်ဂျီ အသင်းအတွက် လူစားဝင် ကစားသမားအဖြစ် ပါဝင်ခဲ့ပြီး ဂိုးသွင်းယူနိုင်ခဲ့ပေမယ့် ရာသီကြိုခရီးစဉ်အတွက် လူစာရင်းမှာတော့ ချန်လှပ်ခံခဲ့ရတာ ဖြစ်ပါတယ်။

ပီအက်စ်ဂျီအသင်းဟာ အာရှခရီးစဉ်မှာ ရော်နယ်ဒိုရဲ့ အယ်လ်နာဆာ၊ ဆီရီဇိုအိုဆာကာ၊ အင်တာမီလန်၊ ဂျောင်ဘွတ်ဟွန်ဒိုင်းအသင်းတို့နဲ့ ခြေစမ်းပွဲ ယှဉ်ပြိုင်သွားမယ်လို့ သိရပါတယ်။

Source: Daily Mail

CNI Sport News

၂၀၂၃ ခုနှစ်၊ ဇူလိုင် ၂၂

အာဂျင်တီးနားအသင်းခေါင်းဆောင် မက်ဆီဟာ အင်တာမိုင်ယာမီအသင်းက ခရုဇ်အဇူလ်အသင်းကို ၂ ဂိုး- ၁ ဂိုးနဲ့ အနိုင်ရခဲ့တဲ့ လိဂ်ဖလားပွဲမှာ မေဂျာလိဂ်ကလပ်ကစားသမားဘ၀ ပွဲဦးထွက်အဖြစ် ပါဝင်ခဲ့ပြီး အနိုင်ဂိုးသွင်းယူ ပေးနိုင်ခဲ့ပါတယ်။

မက်ဆီဟာ ဒီပွဲမှာ အင်တာမိုင်ယာမီအသင်းရဲ့ ပွဲထွက်လူစာရင်းမှာ မပါဝင်ခဲ့ပေမယ့် ပွဲချိန် ၅၄ မိနစ်မှာ လူစားဝင် ကစားသမားအဖြစ် ပါဝင်ခဲ့တာပါ။ မက်ဆီဟာ လူစားဝင်ရောက်လာချိန်မှာ အင်တာမိုင်ယာမီအသင်းရဲ့ အသင်း ခေါင်းဆောင် လက်ပတ်ကို ဝတ်ဆင်ခွင့်ရခဲ့ပါတယ်။ မက္ကဆီကိုကလပ် ခရုဇ်အဇူလ်နဲ့ အင်တာမိုင်ယာမီ အသင်း တို့ဟာ ပွဲချိန် မိနစ် ၉၀ ပြည့်တဲ့အချိန်ထိ ၁ ဂိုးစီသရေကျနေခဲ့ပေမယ့် နာကျင်အချိန်ပို ၄ မိနစ်မှာ အမေရိကန် ကလပ်ဟာ ပြစ်ဒဏ်ဘောကန်သွင်းခွင့်ရခဲ့တာပါ။

ဒီပြစ်ဒဏ်ဘောကို မက်ဆီက လှပတဲ့ကန်သွင်းချက်နဲ့ အဖိုးတန်အနိုင်ဂိုး သွင်းယူပေးနိုင်ခဲ့တာ ဖြစ်ပါတယ်။ မက်ဆီရဲ့ အနိုင်ဂိုးကြောင့် အင်တာမိုင်ယာမီအသင်းဟာ ၅ ပွဲဆက်တိုက်နိုင်ပွဲပျောက်ဆုံးခဲ့တဲ့ ရလဒ်ဆိုးနေမှုကို ဒီပွဲမှာ အဆုံးသတ်နိုင်ခဲ့တာပါ။ အသက် ၃၆ နှစ်အရွယ်ရှိ မက်ဆီဟာ ဒီပွဲအနိုင်ရဖို့က အသင်းအတွက် အလွန် အရေးကြီးတယ်လို့ ပွဲအပြီးမှာ ပြောခဲ့ပါတယ်။

မက်ဆီက “ကျနော် ဂိုးသွင်းရမယ်ဆိုတာကို သိပါတယ်။ ဒါက ဒီပွဲရဲ့နောက်ဆုံးကစားနည်းပါ။ ဒီပွဲအနိုင်ရဖို့က ကျနော်တို့အတွက် အလွန်အရေးကြီးပါတယ်။ ဒါက ပြိုင်ပွဲအသစ်တစ်ခုဖြစ်ပြီး ကျနော်တို့ကို ယုံကြည်မှုအပြည့်နဲ့ ရှေ့ဆက်သွားစေမှာဖြစ်တယ်” လို့ Apple TV ကို ပြောခဲ့တာပါ။

ပွဲအပြီးမှာ အင်တာမိုင်ယာမီအသင်း ပူးတွဲပိုင်ရှင် ဒေးဗစ်ဘက်ခမ်းဟာ မက်ဆီနဲ့အတူ အောင်ပွဲခံနေခဲ့တာဖြစ်ပြီး အာဂျင်တီးနားအသင်းခေါင်းဆောင်ကိုလည်း ချီးကျူးသွားခဲ့ပါတယ်။

ဒေးဗစ်ဘက်ခမ်းက “ပြစ်ဒဏ်ဘောကန်သွင်းမှာကို မြင်ထဲက ဒါက အဆုံးသတ်နိုင်မယ့် နည်းလမ်းလို့ ကျနော် ထင်ခဲ့တာပါ။ ဒါက ဒီနိုင်ငံအတွက်ရော လိဂ်အတွက်ရော အကောင်းမွန်ဆုံးအခိုက်အတန့်ပါပဲ။ လီယိုလုပ်ပြနိုင်ခဲ့တဲ့ အရာကိုကွင်းထဲမှာ လူတိုင်းမြင်တွေ့ခဲ့ရတာက အိပ်မက်တစ်ခုပါပဲ”လို့ ပြောခဲ့ပါတယ်။

အင်တာမိုင်ယာမီအသင်းဟာ ဇူလိုင် ၂၆ ရက်မှာ လိဂ်ဖလားပွဲစဉ်အဖြစ် မေဂျာလိဂ်ကလပ် အတ္တလန္တာ ယူနိုက် တက်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Foxsports

CNI Sport News

၂၀၂၃ ခုနှစ်၊ ဇူလိုင် ၂၁ 

အီတလီနဲ့ ပီအက်စ်ဂျီအသင်း ဂိုးသမား ဒွန်နာရမ်မာနဲ့ သူ့ရဲ့လက်တွဲဖော်တို့ဟာ ပဲရစ်ရှိ သူတို့ရဲ့ နေအိမ်မှာ လုယက် တိုက်ခိုက်ခံခဲ့ရတယ်လို့ သတင်းတွေမှာ ဖော်ပြထားပါတယ်။

လူအများအပြားဟာ သူတို့စုံတွဲကို ပစ်မှတ်ထားခဲ့တာဖြစ်ပြီး နေအိမ်မှာ ချည်နှောင်ထားခြင်း ခံခဲ့ရတယ်လို့ ရဲသတင်းရင်းမြစ်တွေက ပြင်သစ်မီဒီယာတွေကို ပြောခဲ့တာပါ။

သူတို့နှစ်ဦးဟာ နောက်ပိုင်းမှာ အိမ်နဲ့ အနီးနားမှာရှိတဲ့ ဟိုတယ်ကို ထွက်ပြေး လွတ်မြောက် သွားခဲ့တယ်လို့ ပြောထားပါတယ်။ 

ဟိုတယ် ဝန်ထမ်းတွေဟာ ဒေသခံရဲတွေကို အကြောင်းကြားခဲ့ပြီး တုန်လှုပ်နေတဲ့ ဒွန်နာရမ်မာတို့ စုံတွဲကို ဆေးရုံသို့ ပို့ဆောင်ခဲ့တယ်လို့ သိရပါတယ်။

အတည်မပြုနိုင်တဲ့ သတင်းတွေအရ လုယက်တိုက်ခိုက်တဲ့ သူတွေဟာ ငွေကြေး အများအပြားယူပြီး ထွက်ခွာ သွားခဲ့တယ်လို့ ဖော်ပြထားပြီး သတင်းအချို့မှာတော့ ယူရို ၅၀၀,၀၀၀ ဝန်းကျင် ပါသွားခဲ့တယ်လို့ ဖော်ပြထား တာပါ။ 
ပြင်သစ်အထူးရဲတပ်ဖွဲ့ကတော့ လက်ရှိအချိန်မှာ လက်နက်ကိုင် လုယက်မှုနဲ့ ဖောက်ထွင်းမှုအတွက် စုံစမ်း စစ်ဆေးမှုကို စတင်နေပြီ ဖြစ်ပါတယ်။

ဒွန်နာရမ်မာနဲ့ ချစ်သူကိုတွေ့ရစဉ်

အီတလီလက်ရွေးစင် ဂိုးသမားဟာ ၂၀၂၁ ခုနှစ်က အေစီမီလန်အသင်းကနေ ပီအက်စ်ဂျီအသင်းထံ ရောက်ရှိလာခဲ့ တာဖြစ်ပြီး နိုင်ငံအသင်းကို ယူရို ၂၀၂၀ ပြိုင်ပွဲမှာ ချန်ပီယံဆု ရယူနိုင်အောင် လက်စွမ်း ပြသနိုင်ခဲ့တာပါ။ 

ဒွန်နာရမ်မာဟာ ပီအက်စ်ဂျီအသင်းအတွက် ၇၂ ပွဲ ပါဝင်ကစားထားပြီး လီဂူးဝမ်းဖလား ၂ ကြိမ် အပါအဝင် ဆုဖလား အောင်မြင်မှုတွေကို ရယူပေးထားနိုင်ခဲ့တာ ဖြစ်ပါတယ်။

ဒါပေမယ့် ဒွန်နာရမ်မာဟာ အခုနွေရာသီ အပြောင်းအရွှေ့မှာ ပီအက်စ်ဂျီအသင်းကနေ ထွက်ခွာသွားနိုင်တယ်လို့ သတင်းတွေလည်း ထွက်ပေါ်နေတာပါ။ 

အသက် ၂၄ နှစ်အရွယ်ရှိ ဒွန်နာရမ်မာနဲ့ ပြင်သစ်ကလပ်တို့ ချုပ်ဆိုထားတဲ့ စာချုပ်ဟာ ၂၀၂၆ ခုနှစ်အထိ သက်တမ်း ကျန်ရှိနေသေးပေမယ့် စီးရီးအေကလပ် ဂျူဗင်တပ်စ်အသင်းရဲ့ ခေါ်ယူဖို့ ချိတ်ဆက်မှု ပြုလုပ်ခြင်းကို ခံနေရတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇူလိုင် ၂၁

ရီးရယ်လ်အသင်းနည်းပြ အန်ဆယ်လော့တီက ဘရာဇီးလ် လက်ရွေးစင် အသင်းအကြောင်းကို ပြောမှာမဟုတ်ဘဲ စာချုပ်ရှိနေတဲ့ စပိန်ထိပ်သီး ကလပ်အတွက်သာ အာရုံစိုက်မယ်လို့ ပြောခဲ့ပါတယ်။

အန်ဆယ်လော့တီက “ကျနော် ဘရာဇီးလ်အကြောင်းကို ဘယ်တော့မှ ပြောမှာမဟုတ်ပါဘူး။ ကျနော်က ရီးရယ်လ် အသင်းရဲ့ နည်းပြဖြစ်ပြီး ဒီမှာဆက်ရှိမှာပါ။ ဒီကိစ္စကို ကျနော် ဆက်မပြောတော့ပါဘူး။ ကျနော့်မှာ စာချုပ်ရှိပြီး စာချုပ်အတိုင်းပဲ သွားမှာပါ။ လာမယ့်နှစ်မှာတော့ ဘာတွေဖြစ်မလဲဆိုတာ မြင်တွေ့ရမှာပါ”လို့ သတင်းထောက် တွေကို ပြောခဲ့တာပါ။ 

ဘရာဇီးလ်ဘောလုံးအဖွဲ့ချုပ်ဟာ အန်ဆယ်လော့တီကို ရီးရယ်လ်အသင်းနဲ့ စာချုပ်ကုန်ဆုံးမယ့် ၂၀၂၄ ခုနှစ်မှာ လက်ရွေးစင် အသင်းနည်းပြသစ်အဖြစ် ခန့်အပ်မယ်လို့ အတည်ပြုထားပါတယ်။ 

ရီးရဲလ်အသင်းကို တွေ့ရစဉ်

အီတလီလူမျိုးနည်းပြဟာ ဘရာဇီးလ်အသင်းကို ၂၀၂၄ ကိုပါအမေရိက ဖလားပြိုင်ပွဲမှာ စတင်ကိုင်တွယ်ရမယ်လို့ သတင်းတွေ ထွက်ပေါ်နေခဲ့ပေမယ့် သူကတော့ ဒါကို အခုအချိန်ထိ အတည်ပြုခြင်း မရှိသေးပါဘူး။

အန်ဆယ်လော့တီဟာ လက်ရှိအချိန်မှာ ရီးရယ်လ်အသင်းကို ရာသီသစ်အတွက် ပြင်ဆင်ဖို့ အာရုံစိုက်နေပြီး အသင်းဟာ ခြေစမ်းပွဲကစားဖို့ အမေရိကန်နိုင်ငံကို ရောက်ရှိနေတာပါ။ 

လော့စ်အိန်ဂျလိစ်မှာ သတင်းထောက်တွေနဲ့ တွေ့ဆုံခဲ့ချိန် ပီအက်စ်ဂျီ အသင်းတိုက်စစ်မှူး ဘတ်ပီကို ခေါ်ယူနိုင် မယ့် အခြေအနေတွေနဲ့ ပတ်သက်ပြီး အန်ဆယ်လော့တီကို မေးမြန်းခဲ့ကြပါတယ်။

အန်ဆယ်လော့တီက “ဘတ်ပီဟာ ရီးရယ်လ်အသင်းမှာ မရှိတဲ့ ကစားသမားတစ်ဦးပါ။ ဒီမှာမရှိတဲ့ ကစားသမား တွေအကြောင်း ပြောရတာ ကျနော့်အတွက် အဆင်မပြေဘူး”လို့ ပြန်လည် ဖြေခဲ့ပါတယ်။

ရီးရယ်လ်အသင်းဟာ အမေရိကန်ခရီးစဉ်မှာ ခြေစမ်းပွဲ ၄ ပွဲ ကစားသွားမှာဖြစ်ပြီး ဇူလိုင် ၂၃ ရက်မှာ အေစီမီလန်၊ ၂၆ ရက်မှာ ယူနိုက်တက်၊ ၂၉ ရက်မှာ ဘာစီလိုနာနဲ့ သြဂုတ်လ ၂ ရက်မှာ ဂျူဗင်တပ်စ်အသင်းတို့နဲ့ ယှဉ်ပြိုင်သွားမှာ ဖြစ်ပါတယ်။

Source: besoccer