CNI Sport News

၂၀၂၃ ခုနှစ်၊ ဖေဖော်ဝါရီ ၂၃

မန်စီးတီးအသင်းနည်းပြ ဂွာဒီယိုလာက လိုက်ပ်ဇစ်အသင်းနဲ့ ၁ ဂိုးစီသရေကျခဲ့တဲ့ ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်အပြီး လိုက်ပ်ဇစ်အသင်းအိမ်ကွင်းမှာ ဂိုးပြတ်အနိုင်ရဖို့ မျှော်လင့်နေတာလားလို့ ပြောသွားခဲ့ ပါတယ်။

ဂွာဒီယိုလာက “တချို့လူတွေက ကျနော်တို့ ဒီပွဲမှာ ၅ ဂိုးပြတ်နဲ့ ဂိုးပြတ်အနိုင်ရမယ်လို့ မျှော်လင့်နေကြပါတယ်။ ဒါက လက်တွေ့မကျပါဘူး။ ဒီပြိုင်ပွဲမှာဆို နာမည်ကြီးအသင်းအများအပြားက အုပ်စုကနေ ထွက်ခဲ့ရပါတယ်။ အဲဒါကြောင့် ဒါကခက်ခဲတယ်ဆိုတာ ကျနော်တို့သိပါတယ်။ဒီပွဲက ၁၀ ရက်အတွင်း ကျနော်တို့ရဲ့ ၄ ပွဲမြောက် အဝေးကွင်းပွဲစဉ်ပါ။ကျနော်တို့က အသင်းကောင်းဖြစ်ပြီး ကောင်းမွန်တဲ့အရာတွေကို ဆက်ပြီးလုပ်ဆောင် သွားမှာပါ။ဒါပေမယ့် တချို့လူတွေက ကျနော်တို့ ဒီကိုလာပြီး ၄ ဂိုးပြတ်နဲ့ အနိုင်ရဖို့ မျှော်လင့်နေကြပါတယ်။ ကျနော်တို့ ဒါကိုမလုပ်နိုင်ခဲ့တဲ့အတွက် စိတ်မကောင်းပါဘူး” လို့ BT Sport ကို ပြောခဲ့တာပါ။

ဒီပွဲမှာ မန်စီးတီးအသင်းဟာ ပွဲချိန် ၂၇ မိနစ်မှာကတည်းက မာရတ်ဇ်ရဲ့သွင်းဂိုးနဲ့ ဦးဆောင်နိုင်ခဲ့ပေမယ့် ပွဲချိန်မိနစ် ၇၀ မှာ ဂျီဗာဒီရယ်လ်က လိုက်ပ်ဇစ်အတွက် ချေပဂိုးပြန်သွင်းခဲ့လို့ ၁ ဂိုးစီ သရေရလဒ်နဲ့ ပြီးဆုံးခဲ့တာ ဖြစ်ပါတယ်။ မန်စီးတီးအသင်းဟာ ပြီးခဲ့တဲ့အပတ်က ပရီးမီးယားလိဂ်ပွဲမှာလည်း နော်တင်ဟမ်ဖောရက်စ်အသင်းကို ဦးဆောင်ဂိုး သွင်းယူနိုင်ခဲ့ပေမယ့် ပွဲပြီးခါနီးမှာ ဂိုးပြန်ပေးခဲ့ရလို့ ရမှတ် ၂ မှတ်ဆုံးရှုံးခဲ့ရတာပါ။မန်စီးတီးအသင်းဟာ အခုလည်း ဒီလိုမျိုးအလားတူ ထပ်မံကြုံတွေ့ခဲ့ရတာဖြစ်ပါတယ်။

မန်စီးတီးအသင်းတိုက်စစ်မှူး ဟာလန်းဟာ ဒီပွဲမှာ ခြေစွမ်းပြသနိုင်ဖို့ ရုန်းကန်ခဲ့ရပြီး ဘောလုံးထိချက် အကြိမ် ၂၀ နဲ့ ဂိုးပေါက်ကန်သွင်းမှု ၁ ကြိမ်သာ ရှိခဲ့တာပါ။ဒီပွဲမှာ မန်စီးတီးအတွက် ဂိုးသွင်းပေးခဲ့တဲ့ မာရတ်ဇ်ကတော့ ဟာလန်းကို ကာကွယ်ပေးမှုတွေ ပြုလုပ်ခဲ့တာဖြစ်ပါတယ်။

မာရတ်ဇ်က “သူဟာ လျင်မြန်ပြီး အားကောင်းတဲ့ တိုက်စစ်မှူးဖြစ်သလို သူ့ရဲ့အရည်အသွေးတွေကို ကျနော်တို့ သိပါတယ်။အနိုင်ရဖို့နဲ့ ဘောလုံးရယူဖို့က သူ့အပေါ်မူတည်မနေပါဘူး။သူဟာ ပွဲတိုင်းကို ဘောလုံးအကြိမ် ၇၀ ထိ နေဖို့လည်း မလိုပါဘူး” လို့ ပြောခဲ့တာပါ။

ဒီနှစ်သင်းရဲ့ ဒုတိယအကျော့ပွဲစဉ်ကို မတ်လ ၁၅ ရက် အီးတီဟတ်ကွင်းမှာ ယှဉ်ပြိုင်သွားမှာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ ဖေဖော်ဝါရီ ၂၂

ရုရှားနဲ့အမေရိကန်ကြား အကျဉ်းသား လဲလှယ်မှုကြောင့် ပြီးခဲ့တဲ့ ဒီဇင်ဘာလက ရုရှားအကျဉ်းထောင်ကနေ လွတ်မြောက်လာခဲ့တဲ့ ဘရစ်တနီဂရိုင်နာဟာ WNBA ပြိုင်ပွဲဝင် ဖီးနစ်မာကျူရီအသင်းမှာ ကစားဖို့အတွက် ၁ နှစ် စာချုပ်ချုပ်ခဲ့တယ်လို့ အသင်းက ပြောလိုက်ပါတယ်။

ဖီးနစ်မာကျူရီအသင်း အထွေထွေမန်နေဂျာ ဂျင်မ်ပစ်မန်းက “ ဘရစ်တနီဂရိုင်နာကို ၂၀၂၃ ရာသီ မာကျူရီမှာ ကစားဖို့ တရားဝင် လက်မှတ် ရေးထိုးလိုက်ပြီဆိုတာ ကြေညာချင်ပါတယ်။ ဒါဟာ အားလုံးအတွက် ကောင်းတဲ့ နေ့ပါပဲ။ သူမ မရှိတော့တဲ့ အချိန်ကတည်းက အသင်းဟာ နေ့တိုင်း သတိရနေတာပါ။ သူမကို ဆက်လက် ကူညီမှု တွေ ပြုလုပ်ပေးနိုင်ဖို့အတွက် အသင်းအဖွဲ့အစည်းရဲ့ အရင်းအမြစ်တွေကို ဆက်ပြီး အသုံးပြုသွားမှာပါ။ သူမ ချစ်မြတ်နိုးတဲ့ ဘတ်စကတ်ဘောကို ပြန်ကစားရမှာဖြစ်လို့ သူမအတွက် ဝမ်းသာပီတိ ဖြစ်ရပါတယ်။ ဒီနေ့ဟာ အားလုံးအတွက် အထူးနေ့ တစ်နေ့ပါပဲ”လို့ အသင်းရဲ့ ထုတ်ပြန်ချက်မှာ ပြောထားတာပါ။

အမေရိကန် လက်ရွေးစင်အသင်းနဲ့ အိုလံပစ် ရွှေတံဆိပ်ဆု ၂ ကြိမ် ရရှိထားတဲ့ ဘရစ်တနီဂရိုင်နာဟာ ၂၀၂၂ ခုနှစ်၊ ဖေဖော်ဝါရီလက မော်စကိုမြို့ အပြင်ဘက်ရှိ လေဆိပ်မှာ ဆေးခြောက်ဆီတွေ သယ်ဆောင်လာတာကို တွေ့ရှိခဲ့ တာကြောင့် ဖမ်းဆီးခံခဲ့ရတာ ဖြစ်ပါတယ်။

ဘရစ်တနီဂရိုင်နာကို တွေ့ရစဉ်

နောက်ပိုင်းမှာ ဘရစ်တနီဂရိုင်နာဟာ မူးယစ်ဆေး မှောင်ခိုမှုနဲ့ ပြစ်ဒဏ် ချမှတ်ခံခဲ့ရပြီး ရုရှားရဲ့ နာမည်ဆိုးနဲ့ ကျော်ကြားတဲ့ နေရာဆီ လွှဲပြောင်းခံခဲ့ရတာပါ။

အမေရိကန်ဟာ ဘရစ်တနီဂရိုင်နာကို လွှတ်ပေးဖို့ ရုရှားနဲ့ ဆွေးနွေးမှုတွေ လအတန်ကြာ ပြုလုပ်ခဲ့ပြီးနောက် ဒီဇင်ဘာလက လက်နက်ရောင်းဝယ်သူ ဗစ်တာဘောက်နဲ့ လဲလှယ်ဖို့ သဘောတူညီမှုရခဲ့ပြီး လွတ်မြောက်ခဲ့တာ ဖြစ်ပါတယ်။

ဘရစ်တနီဂရိုင်နာဟာ ၂၀၂၁ WNBA ရာသီမှာ ဖီးနစ်မာကျူရီ အသင်းအတွက် နောက်ဆုံး ပါဝင်ကစားခဲ့တာဖြစ်ပြီး အဲဒီအချိန်ရာသီဟာ သူမရဲ့ ကစားသမားဘဝ အကောင်းဆုံး ရာသီတွေထဲက တစ်ခုလည်း ဖြစ်ခဲ့တာပါ။

ဘရစ်တနီဂရိုင်နာဟာ WNBA ရာသီရဲ့ အော်စတားအသင်းမှာ ၈ ရာသီအထိ ပါဝင်ခဲ့သလို စံချိန်မှတ်တမ်းတွေ လည်း အများကြီး ရယူနိုင်ခဲ့ ပါတယ်။ ဘရစ်တနီဂရိုင်နာဟာ အမေရိကန် လက်ရွေးစင်အသင်းနဲ့ အိုလံပစ် ရွှေ တံဆိပ် ၂ ကြိမ်အပြင် ကမ္ဘာ့ဖလား ချန်ပီယံဆုလည်း ၂ ကြိမ် ရယူနိုင်ခဲ့တာပါ။

ဘရစ်တနီဂရိုင်နာ ပါဝင်မယ့် ဖီးနစ်မာကျူရီ အသင်းဟာ ၂၀၂၃ WNBA ရာသီအဖွင့် ပွဲစဉ်အဖြစ် မေလ ၁၉ ရက်မှာ လော့စ်အိန်ဂျလိစ်စပါ့ခ်စ်အသင်းနဲ့ စတင်ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဖေဖော်ဝါရီ ၂၂

ယူနိုက်တက် အသင်းဟာ ဒီတစ်ပတ်ထဲမှာ ဘာစီလိုနာ အသင်းနဲ့ ယူရိုပါလိဂ် ပလေးအော့ဖ် ဒုတိယအကျော့ ပွဲစဉ်အဖြစ် ယှဉ်ပြိုင်ဖို့ ရှိနေသလို နယူးကာဆယ် အသင်းနဲ့လည်း ကာရာဘောင်းဖလား ဗိုလ်လုပွဲ ကစားဖို့ ရှိ နေတဲ့အချိန်မှာပဲ ဂန္တဝင်နည်းပြကြီး ဖာဂူဆန်နဲ့ ယူနိုက်တက်အသင်းနည်းပြ အဲရစ်တန်ဟတ်တို့ဟာ စားသောက် ဆိုင် တစ်ဆိုင်မှာ တွေ့ဆုံခဲ့ကြပါတယ်။

သူတို့နှစ်ဦးဟာ ချက်ရှိုင်းယားရှိ အီတလီစားသောက်ဆိုင် စီဘိုမှာ ညစာစားရင်း စကားစမြည် ပြောနေတဲ့ပုံကို မြင်တွေ့ခဲ့ရတာပါ။

အဲရစ်တန်ဟတ်ဟာ ယူနိုက်တက်နည်းပြဘဝ သူ့ရဲ့ ပထမဆုံးရာသီမှာ ဆုဖလားတွေ ရယူနိုင်ဖို့ ပစ်မှတ်ထား နေတာ ဖြစ်ပါတယ်။

ဖာဂူဆန်ဟာ ယူနိုက်တက်အသင်းကို ကိုင်တွယ်ခဲ့တုန်းက ၁၉၉၉ ခုနှစ်မှာ တစ်ရာသီအတွင်းမှာ ဆုဖလား ၃ လုံး ရယူနိုင်အောင် ကိုင်တွယ်နိုင်ခဲ့တာကြောင့် ဒတ်ချ်လူမျိုးနည်းပြဟာ ဒီတွေ့ဆုံမှုကနေ အကြံဉာဏ်တွေ ရယူနေပါတယ်။

ယူနိုက်တက်နဲ့ ဘာစီလိုနာ ယှဉ်ပြိုင်နေစဉ်

ယူနိုက်တက်အသင်းဟာ တနင်္ဂနွေနေ့မှာ နယူးကာဆယ်အသင်းနဲ့ ကာရာဘောင်းဖလား ဗိုလ်လုပွဲကစားဖို့ ရှိနေပြီး ၂၀၁၇ နောက်ပိုင်း ဆုဖလားလက်မဲ့ ဖြစ်နေတာကို အဆုံးသတ်ဖို့ မျှော်လင့်နေတာပါ။

ဒီပွဲ မတိုင်ခင်မှာတော့ ယူနိုက်တက်အသင်းဟာ ယူရိုပါလိဂ် ပလေးအော့ဖ် ဒုတိယအကျော့ ပွဲစဉ်အဖြစ် ဘာစီလိုနာ အသင်းနဲ့ ယှဉ်ပြိုင်ရမှာ ဖြစ်ပါတယ်။ ဒီနှစ်သင်း ပထမအကျော့အဖြစ် ကစားခဲ့တုန်းက ၂ ဂိုးစီ သရေကျခဲ့တာပါ။

ဖာဂူဆန်ဟာ ၂၀၀၈ တုန်းက အိုးထရက်ဖို့ဒ်မှာ ကစားခဲ့တဲ့ ချန်ပီယံလိဂ် ဆီမီးဖိုင်နယ် ဒုတိယအကျော့ပွဲစဉ်မှာ ဘာစီလိုနာအသင်းကို ၁ ဂိုး- ဂိုးမရှိနဲ့ အနိုင်ရအောင် ကစားခဲ့ပြီး ယူနိုက်တက်အသင်းကို ဗိုလ်လုပွဲ တက်နိုင်အောင် ကိုင်တွယ် ပေးနိုင်ခဲ့ပါတယ်။

အဲဒီနှစ်မှာပဲ ယူနိုက်တက်အသင်းဟာ ချယ်လ်ဆီးအသင်းကို ပင်နယ်တီ အဆုံးအဖြတ်မှာ အနိုင်ရပြီး ချန်ပီယံလိဂ် ဖလား ရယူနိုင်ခဲ့တာပါ။ ဖာဂူဆန်ဟာ အရင်က ယူနိုက်တက်ပွဲတွေကို အိမ်ကွင်းပွဲတွေသာ လာရောက် ကြည့်ရှုတာ များပေမယ့် အခုဆို အဝေးကွင်းပွဲတွေပါ ကြည့်ရှုတာကို မြင်တွေ့ရပါတယ်။

ယူနိုက်တက်အသင်းဟာ အခုနှစ်ရာသီမှာ ကာရာဘောင်းဖလား၊ အက်ဖ်အေဖလားနဲ့ ယူရိုပါလိဂ် ဆုဖလား ရယူနိုင် ဖို့ လမ်းကြောင်းပေါ်မှာ ရှိနေတာကြောင့် နည်းပြ အဲရစ်တန်ဟတ်ဟာ ပြိုင်ပွဲတိုင်းကို အာရုံစူးစိုက်မှု အပြည့်နဲ့ ကစားဖို့ ပြောထားပါတယ်။

ယူနိုက်တက်အသင်းဟာ အိမ်ကွင်းအိုးထရက်ဖို့ဒ်မှာ ကစားတဲ့ ပြိုင်ပွဲစုံ နောက်ဆုံး ၁၇ ပွဲဆက် ရှုံးပွဲမရှိဘဲ ၁၅ ပွဲ အနိုင်ရရှိကာ ၂ ပွဲ သရေကျထားတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဖေဖော်ဝါရီ ၂၂

ဘာစီလိုနာအသင်းဥက္ကဋ္ဌ လာပေါ်တာဟာ ဒိုင်လူကြီးတွေကို ငွေပေးချေမှု အရှုပ်တော်ပုံတွေနဲ့ ပတ်သက်ပြီး ရာထူးကနေ နုတ်ထွက်မှာ မဟုတ်ဘူးလို့ ပြောလိုက်ပါတယ်။

လာပေါ်တာက “ဒါက ကလပ်အသင်းအဖွဲ့ဝင်တွေ ဆုံးဖြတ်ဖို့ပါ။ ဘာစီလိုနာရဲ့သမိုင်းကြောင်းနဲ့ ပုံရိပ်ကို ညှိုးနွမ်း သွားအောင် လုပ်ဖို့ ကြိုးစားတဲ့သူတိုင်းဟာ ပြင်းထန်တဲ့ တုန့်ပြန်မှုကို ရရှိမှာပါ” လို့ အင်္ဂါနေ့က ပြောခဲ့တာပါ။

စပိန်ဒိုင်လူကြီးများကော်မတီရဲ့ ဒုဥက္ကဋ္ဌဟောင်းတစ်ဦးဖြစ်တဲ့ ဟိုဆေးမာရီယာထံ ဘာစီလိုနာအသင်းက ငွေပေး ချေမှုနဲ့ပတ်သက်ပြီး လာပေါ်တာအနေနဲ့ မရှင်းပြနိုင်ဘူးဆိုရင် ရာထူးကနေ နုတ်ထွက်ဖို့ လာလီဂါ အကြီးအကဲ တီဘတ်စ်က ပြောထားတာပါ။လာပေါ်တာကတော့ တီဘတ်စ်ဟာ သူတို့အသင်းအပေါ်ကို အစွဲအလန်းကြီးနေ တယ်လို့ ပြောခဲ့ပါတယ်။ငွေပေးချေမှု အရှုပ်တော်ပုံတွေဟာ အင်္ဂါနေ့မှာ ကြီးထွားလာခဲ့ပြီး လာလီဂါအသင်း ၂၀ ထဲက ၁၈ သင်းဟာ ဒီအခြေအနေနဲ့ ပတ်သက်တဲ့ သူတိုရဲ့ စိုးရိမ်မှုကြီးမားမှုကို ဖော်ပြဖို့ ကြေညာချက် ထုတ်ပြန် ခဲ့ပါတယ်။

ပြီးခဲ့တဲ့အပတ်က ဘာစီလိုနာအသင်းဟာ ၂၀၁၆ ကနေ ၂၀၁၈ ကြားမှာ ဟိုဆေးမာရီယာ ပိုင်ဆိုင်တဲ့ ကုမ္ပဏီတစ်ခု ကို ယူရို ၁.၄ သန်းပေးချေခဲ့တယ်လို့ သတင်းထွက်ခဲ့တာပါ။ဒါ့အပြင် စပိန်ကလပ်ဟာ ဟိုဆေးမာရီယာကို ၂၀၀၁ ကနေ ၂၀၀၈ ကြားမှာ ယူရို ၇ သန်းခန့်ပေးချေခဲ့တယ်လို့ နောက်ပိုင်းသတင်းတွေမှာ ဖော်ပြထားတာ ဖြစ်ပါတယ်။ ဘာစီလိုနာအသင်းဟာ ဒီရာသီမှာ ဒုတိယနေရာက ရီးရယ်လ်အသင်းကို ၈ မှတ်ဖြတ်ပြီး ၄ နှစ်အတွင်း ပထမဆုံး အကြိမ် လာလီဂါဖလားကို ပြန်လည်ရယူနိုင်ဖို့ ပစ်မှတ်ထားနေပေမယ့် ဒီ အခြေအနေတွေက သူတို့ကို စိတ်ပျက် စရာ ဖြစ်ခဲ့ရတာပါ။

လာပေါ်တာက ငွေပေးချေမှုနဲ့ ပတ်သက်ပြီး ကလပ်အတွင်းပိုင်း စုံစမ်းစစ်ဆေးမှုတွေကို စတင်မှာဖြစ်ပြီး ရရှိထား တဲ့ အချက်အလက်တွေ အားလုံးကို ချပြမယ်လို့ ပြောခဲ့ပါတယ်။ဘာစီလိုနာအသင်းဟာ သောကြာနေ့ မနက်ပိုင်း မှာ ယူရိုပါလိဂ် ပလေးအောဖ့် ဒုတိယအကျော့ပွဲစဉ်အဖြစ် ယူနိုက်တက်အသင်းနဲ့ ယှဉ်ပြိုင်ရမှာပါ။ ပထမအကျော့ အဖြစ်ကစားခဲ့တုန်းက ၂ ဂိုးစီသရေကျခဲ့တာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဖေဖော်ဝါရီ ၂၂

ရီးရယ်လ်အသင်းနည်းပြ အန်ဆယ်လော့တီက ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်မှာ အိမ်ရှင် လီဗာပူးလ်အသင်းကို ၅ ဂိုး- ၂ ဂိုးနဲ့ ဂိုးပြတ်အနိုင်ရခဲ့ပေမယ့် အလုပ်တွေ ဆက်လုပ်စရာရှိသေးတာကြောင့် ပွဲမပြီး သေးဘူးလို့ ပြောလိုက်ပါတယ်။

အန်ဆယ်လော့တီက “ဒီပွဲမှာ ကျနော်တို့ဟာ ၂ ဂိုးပေးပြီး အနောက်ကနေ လိုက်ကစားခဲ့ရတာကြောင့် သမိုင်းဝင် နိုင်ပွဲပါ။ ဒါပေမယ့် ကျနော်တို့ဟာ ဘယ်တော့မှ နောက်ကိုပြန်မဆုတ်ဘဲ စိတ်ကို အေးအေးထားခဲ့ပါတယ်။ အထိတ်တလန့်တွေလည်းမဖြစ်ဘဲ ခက်ခဲတဲ့ပွဲကို ပြန်လာနိုင်အောင် လုပ်နိုင်ခဲ့ပါတယ်။ကျနော်တို့ ပွဲစတင်ခဲ့ရတဲ့ အရာကြောင့် ဒီလိုနိုင်ပွဲရဖို့က မလွယ်ကူခဲ့ပါဘူး။ကျနော်တို့ ယုံကြည်မှုတွေဟာ ဘယ်တော့မှ မဆုံးရှုံးခဲ့သလို ဘောလုံးကို တဖြည်းဖြည်းထိန်းချုပ်နိုင်ခဲ့ပါတယ်။ ကျနော်တို့ ရှေ့တန်းက ထိရောက်မှုရှိခဲ့ပြီး ဗီနီစီးယက်ဆိုရင် မယုံကြည်နိုင်လောက်တဲ့ စွမ်းဆောင်ရည်ကို ပြသသွားခဲ့ပါတယ်။ဒါက ရှုံးထွက်ရဲ့ပထမပိုင်းပဲရှိပါသေးတယ်။ ဒုတိယအကျော့မှာ ဒုက္ခမရောက်အောင် ကြိုးစားဖို့လိုတယ်ဆိုတာ တွေးထားရလိမ့်မယ်”လို့ ပြောခဲ့တာပါ။

ဒီပွဲစဉ်မှာ လီဗာပူးလ်အသင်းဟာ ဒါဝင်နူနက်ဇ်၊ ဆာလတ်တို့ရဲ့ သွင်းဂိုးတွေနဲ့ ပွဲချိန် ၁၄ မိနစ်မှာ ရီးရယ်လ် အသင်း ကို ၂ ဂိုး- ဂိုးမရှိနဲ့ ဦးဆောင်နိုင်ခဲ့တာဖြစ်ပါတယ်။ဒါပေမယ့် ရီးရယ်လ်အသင်းဟာ ချေပဂိုးနဲ့ အနိုင်ဂိုးတွေသွင်းပြီး ဂိုးပြတ်နိုင်ပွဲကို ရယူနိုင်ခဲ့တာပါ။ရီးရယ်လ်အတွက် ဂိုးတွေကို ဗီနီစီးယက်စ်နဲ့ ဘန်ဇီမာက ၂ ဂိုးစီ သွင်းယူပြီး မီလီတာအိုက ၁ ဂိုးသွင်းယူခဲ့တာဖြစ်ပါတယ်။

လီဗာပူးလ်အသင်းဟာ အရင်က အန်ဖီးလ်မှာ ကစားခဲ့တဲ့ ဥရောပပြိုင်ပွဲတွေမှာ ၃ ဂိုးထက်ပိုပြီး ခွင့်ပြုမခံခဲ့ရပေ မယ့် အခုအချိန်မှာတော့ ပထမဆုံးအကြိမ် ၅ ဂိုးခွင့်ပြုခဲ့ရတာပါ။ရီးရယ်လ်အသင်းခေါင်းဆောင် ဘန်ဇီမာကတော့ လီဗာပူးလ်အသင်းကို အနိုင်ရခဲ့တဲ့ ပွဲအပြီးမှာ ချန်ပီယံလိဂ်ဆုဖလားကို ထပ်မံရယူချင်တယ်လို့ ပြောသွားခဲ့တာ ဖြစ်ပါတယ်။

ဘန်ဇီမာက “ကျနော်တို့ဟာ ပင်ကိုယ်စရိုက်နဲ့ ကစားခဲ့တာဖြစ်ပြီး ဂိုးတွေသွင်းယူနိုင်ခဲ့ပြီး ချန်ပီယံလိဂ်ဆုဖလားကို ထပ်ပြီးရယူချင်ပါတယ်။ဒီပွဲက ကြည့်တဲ့သူတွေအတွက် အလွန်နှစ်သက်ဖို့ကောင်းတဲ့ ပွဲတစ်ပွဲကို ဖန်တီးပေးခဲ့ ပါတယ်။ပွဲအစ ၁၅ မိနစ်အပြီးမှာ ကျနော်တို့ ရီးရယ်လ်အစစ်အမှန်ကို မြင်တွေ့ခဲ့ရပါတယ်။ဒီအဆင့်မှာ ဘောလုံးက ခက်ခဲပါတယ်။သူတို့ဟာ ပွဲအစပိုင်းမှာ ကျနော်တို့ထက် ပိုကောင်းခဲ့ပေမယ့် ဒါက ပွဲကြီးဖြစ်ပြီး ကျနော်တို့က အဆင်သင့်ပါပဲ”လို့ ပြောခဲ့တာပါ။

ဒီနှစ်သင်းရဲ့ ၁၆ သင်းအဆင့် ဒုတိယအကျော့ပွဲစဉ်ကို မတ်လ ၁၅ ရက် ဘာနေဗျူးမှာ ယှဉ်ပြိုင်သွားမှာ ဖြစ်ပါ တယ်။

Source:DailyMail

CNI Sport News

၂၀၂၃ ခုနှစ်၊ ဖေဖော်ဝါရီ ၂၁

ပီအက်စ်ဂျီအသင်းဟာ တူချယ်လ်ကို နည်းပြသစ်အဖြစ် ပြန်လည်ခန့်အပ်ပြီး ထုတ်ပယ်ခဲ့တုန်းက အမှားလုပ်ခဲ့ တာကို ဝန်ခံဖို့ ပြင်ဆင်နေတယ်လို့ သိရပါတယ်။

ပြင်သစ်လီဂူးဝမ်းချန်ပီယံ ပီအက်စ်ဂျီအသင်းဟာ လက်ရှိနည်းပြ ဂယ်လ်တီယာကို စိတ်ပျက်နေပြီး ၂၀၂၀ ခုနှစ်၊ ဒီဇင်ဘာလက ထုတ်ပယ်ခဲ့တဲ့ နည်းပြဟောင်း တူချယ်လ်နဲ့ ပြန်လည်လက်တွဲဖို့ ပြင်ဆင်နေပါတယ်။

ပီအက်စ်ဂျီအသင်းဟာ လိုင်လီအသင်းကို အနိုင်ရခဲ့တဲ့ ပွဲမတိုင်ခင် ကစားခဲ့တဲ့ နောက်ဆုံး ၃ ပွဲဆက် အရေးနိမ့် ခဲ့တာကြောင့် နည်းပြ ဂယ်လ်တီယာဟာ ပြင်းထန်တဲ့ ဖိအားတွေအောက်မှာ ရှိနေခဲ့တာ ဖြစ်ပါတယ်။

ဂျာမန်လူမျိုးနည်းပြ တူချယ်လ်ဟာ ချယ်လ်ဆီးအသင်းကနေ ထုတ်ပယ်ခံရတဲ့ ပြီးခဲ့တဲ့နှစ် စက်တင်ဘာလက ကတည်းက အသင်းလက်မဲ့အဖြစ် ရှိနေတာပါ။

Evening Standard ကတော့ ပီအက်စ်ဂျီအသင်းဟာ တူချယ်လ်ကို မထုတ်ပယ်သင့်ဘူးဆိုတာ ဝန်ခံချင်နေတယ် လို့ ဖော်ပြထားပါတယ်။

တူချယ်လ်ဟာ အဲဒီတုန်းက အားကစားဒါရိုက်တာ လီယိုနာဒိုနဲ့ အဆင်မပြေ ဖြစ်ခဲ့တာဖြစ်ပြီး အခုအချိန်မှာတော့ အားကစားဒါရိုက်တာ လူးဝစ်ကမ်ပို့စ်နဲ့ ပြန်လည် စတင်နိုင်မှာပါ။

ချယ်လ်ဆီးအသင်း နည်းပြဟောင်းဟာ ဂယ်လ်တီယာနေရာမှာ အစားထိုးဖို့ ထိပ်ဆုံးကနေလျာထားခံရတဲ့သူ ဖြစ်ပေမယ့် တူချယ်လ်ဟာ နည်းပြအလုပ်ကိုပဲ အာရုံစိုက်ချင်လို့ နာမည်ကြီး ကစားသမားတွေ ဆီကနေ အကာ အကွယ်ပေးမယ့် အာမခံချက်ကို ရယူချင်နေတာ ဖြစ်ပါတယ်။

ချယ်လ်ဆီးအသင်းမှာ နည်းပြလုပ်ခဲ့စဉ်က တူချယ်လ်ကိုတွေ့ရစဉ်

တူချယ်လ်ဟာ ပီအက်စ်ဂျီအသင်းကို ကိုင်တွယ်ခဲ့တာမှာ ချန်ပီယံလိဂ် ဗိုလ်လုပွဲ တက်နိုင်အောင် ပထမဆုံးအကြိမ် စွမ်းဆောင်ပေးနိုင်ခဲ့ပြီး ဒီပွဲမှာ ဘိုင်ယန်မြူးနစ်အသင်းကို အရေးနိမ့်ခဲ့လို့ ဒုတိယနဲ့သာ ကျေနပ်ခဲ့ရတာပါ။

တူချယ်လ်ဟာ ပီအက်စ်ဂျီကနေ ထွက်ခွာအပြီးမှာ ချယ်လ်ဆီးနည်းပြအဖြစ် ခန့်အပ်ခံခဲ့ရကာ ချန်ပီယံလိဂ်၊ ဥရောပ စူပါဖလားနဲ့ ကလပ်ကမ္ဘာ့ဖလားတို့ကို ရယူနိုင်ခဲ့တာ ဖြစ်ပါတယ်။

တူချယ်လ်ဟာ မကြာသေးခင်က ဘိုင်ယန်မြူးနစ် နည်းပြရာထူးအတွက် ချိတ်ဆက်မှုတွေခံခဲ့ရပါတယ်။

ပီအက်စ်ဂျီအသင်းဟာ လာမယ့် ပွဲစဉ်တွေမှာ မာဆေးလ်၊ နန့်တက်စ်တို့နဲ့ လီဂူးဝမ်းပွဲတွေ ယှဉ်ပြိုင်ရမှာဖြစ်ပြီး ဒီပွဲတွေပြီးရင်တော့ ဘိုင်ယန်မြူးနစ်နဲ့ ချန်ပီယံလိဂ် ၁၆ သင်းအဆင့် ဒုတိယအကျော့ ပွဲစဉ်ယှဉ်ပြိုင်ရမှာ ဖြစ်ပါ တယ်။

ဒီပွဲတွေမှာ ရလဒ်တွေ မကောင်းခဲ့ဘူးဆိုရင် နည်းပြ ဂယ်လ်တီယာဟာ ရာထူးကနေ ထုတ်ပယ် ခံရဖွယ်ရှိတယ်လို့ သိရပါတယ်။

Source: Goal

CNI Sport News

၂၀၂၃ ခုနှစ်၊ ဖေဖော်ဝါရီ ၂၁

လီဗာပူးလ်အသင်းပိုင်ရှင် ဂျွန်ဟင်နရီက အသင်းကို ရောင်းချသွားမှာ မဟုတ်ပေမယ့် ရင်းနှီးမြှုပ်နှံမှုအချို့ကို မျှော်လင့်တယ်လို့ ပြောလိုက်ပါတယ်။

ဂျွန်ဟင်နရီက “လီဗာပူးလ်အသင်းနဲ့ ပတ်သက်ပြီး ပြောဆိုတာနဲ့ ကိုးကားတဲ့ အကြောင်းအရာတွေ အများကြီး ရှိတယ်ဆိုတာ ကျနော်သိပါတယ်။ ဒါပေမယ့် ကျနော်တို့ကတော့ အဖြစ်အမှန်အတိုင်းကိုပဲ ဆက်ထိန်းသိမ်းထား ပါတယ်။ ကျနော်တို့လုပ်နေတဲ့ လုပ်ငန်းစဉ်တွေကို တရားဝင် လုပ်လိုက်ရုံပါပဲ။ အင်္ဂလန်မှာ အမြဲတမ်း ရှိနေမလား ဆိုရင် မရှိနိုင်ပါဘူး။ လီဗာပူးလ်ကို ရောင်းမလားဆိုရင်လည်း မရောင်းပါဘူး။ လီဗာပူးလ်အသင်းကို ရင်းနှီးမြှုပ်နှံ မယ့် သူတွေနဲ့ စကားပြောနေလားဆိုရင်တော့ ဟုတ်ပါတယ်။ ဒီကနေ တစ်ခုခု ဖြစ်သွားနိုင်မလားဆိုတာကို ယုံကြည်ပေမယ့် အသင်းကိုရောင်းမှာ မဟုတ်ဘူး”လို့ ဘော်စတွန်အားကစားဂျာနယ်ကို ပြောခဲ့တာပါ။

ဂျွန်ဟင်နရီရဲ့ FSG အစုအဖွဲ့ဟာ လီဗာပူးလ်အသင်းကို ၂၀၁၀ ခုနှစ်က ဝယ်ယူခဲ့တာဖြစ်ပြီး သူတိုဟာ လီဗာပူးလ် အသင်းမှာ ရှယ်ယာရှင် အသစ်တွေကို ထည့်သွင်းစဉ်းစားမယ်လို့ ပြီးခဲ့တဲ့ နိုဝင်ဘာလက ပြောထားတာ ဖြစ်ပါ တယ်။

FSG ဟာ လီဗာပူးလ်အသင်းကို ပေါင်သန်း ၃၀၀ နဲ့ ဝယ်ယူခဲ့တာဖြစ်ပြီး အမေရိကန် ဘတ်စကတ်ဘောကြယ်ပွင့် လီဘရွန်ဂျိမ်းစ်ဟာ ၂၀၁၁ ခုနှစ်ကတည်းက အသင်းရဲ့ ပိုင်ရှင် အစိတ်အပိုင်း ဖြစ်ခဲ့တာပါ။

လီဗာပူးလ်အသင်းကိုတွေ့ရစဉ်

လီဘရွန်ဂျိမ်းစ်ဟာ လီဗာပူးလ်အသင်းမှာ ပေါင် ၄.၇ သန်း ကုန်ကျတဲ့ ရှယ်ယာ ၂ ရာခိုင်နှုန်း ပိုင်ဆိုင်ထားပြီး အဲဒီ အချိန်ကတည်းက FSG ရဲ့ အသေးစား လုပ်ဖော်ကိုင်ဖက် ဖြစ်လာခဲ့တာ ဖြစ်ပါတယ်။

၂၀၂၁ ခုနှစ်၊ မတ်လမှာ ပုဂ္ဂလိက ရင်းနှီးမြှုပ်နှံမှု ကုမ္ပဏီဖြစ်တဲ့ RedBird Capital Partners ဟာ FSG ကနေ ပေါင် ၅၃၃ သန်းခန့်နဲ့ အစုရှယ်ယာတစ်ခုကို ဝယ်ယူခဲ့တာပါ။ လီဗာပူးလ်အသင်းဟာ FSG ရဲ့လက်ထက်မှာ ပရီးမီးယား လိဂ်၊ ချန်ပီယံလိဂ်၊ အက်ဖ်အေဖလား၊ ကာရာဘောင်း၊ ဥရောပစူပါဖလားနဲ့ ကလပ်ကမ္ဘာ့ဖလားတို့ကို ရယူနိုင်ခဲ့တာ ဖြစ်ပါတယ်။

လီဗာပူးလ်အသင်းဟာ ဒီရာသီမှာတော့ ရလဒ်တွေ အနည်းငယ် ဆိုးရွားနေခဲ့ပြီး ပရီးမီးယားလိဂ်မှာ အဆင့် ၈ နဲ့ ချန်ပီယံလိဂ်ပြိုင်ပွဲမှာ ၁၆ သင်းအဆင့် ရောက်ရှိနေတာ ဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဖေဖော်ဝါရီ ၂၁

အမေရိကန်၊ ဗြိတိန်နဲ့ ပြင်သစ်တို့ အပါအဝင် နိုင်ငံပေါင်း ၃၀ ကျော်ဟာ ရုရှားနဲ့ ဘယ်လာရုစ် အားကစားသမား တွေကို နိုင်ငံတကာ အားကစားပြိုင်ပွဲတွေမှာ ဝင်ရောက် ယှဉ်ပြိုင်တာကို ပိတ်ပင်ဖို့ ဖေဖော်ဝါရီ ၂၀ ရက်က ကတိ ပြုခဲ့ကြောင်း ဗြိတိန်အစိုးရရဲ့ ထုတ်ပြန်ချက်မှာ ဖော်ပြထားပါတယ်။

ဗြိတိန်ယဉ်ကျေးမှု အတွင်းဝန် လူဇီဖရေဇာက “ဒီမဟာမိတ်အဖွဲ့ဟာ ယူကရိန်းကို ဘက်ပေါင်းစုံကနေ ပံ့ပိုးပေးခဲ့ ပြီး ဆက်ပြီးတော့လည်း ဒါကို လုပ်ဆောင်သွားမှာပါ။ ရုရှားနဲ့ ဘယ်လာရုစ်တို့ နိုင်ငံတကာ အားကစားနည်းတွေ ဆီ ပြန်သွားနိုင်တဲ့ လမ်းကြောင်းကို မြင်တွေ့ရတဲ့ နိုင်ငံတကာ အိုလံပစ်ကော်မတီရဲ့ အစီအစဉ်တွေနဲ့ ပတ်သက်ပြီး စိုးရိမ်မှုတွေကို ဖော်ထုတ်နေပါတယ်။ ရုရှားနဲ့ ဘယ်လာရုစ် အားကစားသမားတွေကို ပဲရစ်အိုလံပစ်မှာ ပါဝင်ခွင့် ပြု မယ့် ဘယ်လိုအစီအစဉ်ကိုမှ မယုံကြည်နိုင်ပါဘူး။ IOC အနေနဲ့ ဒါကို ပြန်စဉ်းစားဖို့ တိုက်တွန်းထားပါတယ်”လို့ ပြောခဲ့တာပါ။

နိုင်ငံတကာအိုလံပစ်ကော်မတီဟာ လာမယ့် ၂၀၂၄ အိုလံပစ်ပြိုင်ပွဲမှာ အဲဒီ နှစ်နိုင်ငံ အားကစားသမားတွေကို ကြားနေအဖြစ် ဝင်ရောက် ယှဉ်ပြိုင်ခွင့်ပြုနိုင်ဖို့ လမ်းကြောင်းတစ်ခု ရှာဖွေနေတယ်လို့ ပြောခဲ့ပါတယ်။

ယူကရိန်း အပါအဝင် နိုင်ငံအချို့ကတော့ အိုလံပစ်ပြိုင်ပွဲမှာ ရုရှားနဲ့ ဘယ်လာရုစ် အားကစားသမားတွေကို ယှဉ်ပြိုင်ခွင့် ပြုခဲ့ရင် အိုလံပစ်ပြိုင်ပွဲကို သပိတ်မှောက်မယ်လို့ ခြိမ်းခြောက်ထားတာပါ။

 ပြင်သစ်အိုလံပစ်ပွဲတော် ပြင်ဆင်နေမှုကိုတွေ့ရစဉ်

နိုင်ငံတကာ အိုလံပစ်ကော်မတီဟာ ရုရှားက ယူကရိန်းကို ကျူးကျော်ပြီးနောက် ဒီနှစ်နိုင်ငံက အားကစားသမား တွေကို ယှဉ်ပြိုင်ခွင့်ပိတ်ပင်ဖို့ အားကစားအဖွဲ့ချုပ်တွေထံ တောင်းဆိုခဲ့ပေမယ့် အခုအချိန်မှာတော့ ဆုံးဖြတ်ချက် ပြန်ပြောင်းသွားခဲ့တာ ဖြစ်ပါတယ်။

ယူကရိန်းသမ္မတ ဇာလန်းစကီးက ရုရှားအားကစားသမားတွေကို ပဲရစ်အိုလံပစ်မှာ ယှဉ်ပြိုင်ခွင့် ပြုတာဟာ အကြမ်းဖက်မှုကို တစ်နည်းနည်းနဲ့ လက်ခံနိုင်ဖွယ်ရှိကြောင်း ပြသတာ ဖြစ်တယ်လို့ ပြောထားတာပါ။

တနင်္လာနေ့က ထုတ်ပြန်ခဲ့တဲ့ စုပေါင်းထုတ်ပြန်ချက်မှာ IOC အနေနဲ့ ရုရှားနဲ့ ဘယ်လာရုစ် အားကစားသမားတွေကို ပြိုင်ပွဲဝင်ခွင့် ပိတ်ပင်ဖို့နဲ့ ပြီးခဲ့တဲ့နှစ်က ဆုံးဖြတ်ချက် ချထားတဲ့အရာကို ပြန်ပြောင်းစရာ အကြောင်းပြချက် မရှိဘူးလို့ ပြောထားတာ ဖြစ်ပါတယ်။

IOC ကတော့ သပိတ်မှောက်တာဟာ အိုလံပစ်ပဋိညာဉ်ကို ချိုးဖောက်ရာ ရောက်ကြောင်းနဲ့ ရုရှားနဲ့ ဘယ်လာရုစ် ပါဝင်တာဟာ အိုလံပစ် လှုပ်ရှားမှုအတွင်း ခွဲခြားမှုကိုဆန့်ကျင်တဲ့ ကုလသမဂ္ဂရဲ့ ဆုံးဖြတ်ချက်အပေါ် အခြေခံထားတယ်လို့ မကြာသေးခင်က ထုတ်ပြောထားတာ ဖြစ်ပါတယ်။

Source: BBC/CNA

CNI Sport News

၂၀၂၃ ခုနှစ်၊ ဖေဖော်ဝါရီ ၂၁

ပရီးမီးယားလိဂ် ထိပ်သီးကလပ်ဖြစ်တဲ့ ယူနိုက်တက်အသင်းဟာ ၁၁ နှစ်အတွင်း ပထမဆုံးအကြိမ်အဖြစ် ဘောလုံး ပွဲကြည့်ခွင့် လက်မှတ် ဈေးနှုန်းတွေကို တိုးမြှင့်လိုက်ပြီလို့ အသင်းရဲ့ တရားဝင်ဝက်ဘ်ဆိုက်ကနေ ထုတ်ပြန်လိုက် ပါတယ်။

ယူနိုက်တက်အသင်းဟာ တစ်ရာသီစာ လက်မှတ် ကိုင်ဆောင်ထားတဲ့ သူတွေထံ ပေးပို့ခဲ့တဲ့ အီမေးလ်မှာ ၂၀၂၃-၂၄ ရာသီအတွက် ၅ ရာခိုင်နှုန်း တိုးလာတယ်လို့ ပြောခဲ့တာပါ။

မန်ချက်စတာကလပ်ဟာ ပြီးခဲ့တဲ့ ၁၁ ရာသီမှာ ဈေးနှုန်းတွေ တိုးမြှင့်ခဲ့ခြင်း မရှိပေမယ့် ပွဲနေ့မှာ ကုန်ကျစရိတ်တွေ မြင့်တက်လာတာကြောင့် တိုးမြှင့်ဖို့ လုပ်ဆောင်လာခဲ့ရတာ ဖြစ်ပါတယ်။

လွန်ခဲ့တဲ့ ၅ နှစ်အတွင်း ပွဲစဉ်တွေ ယှဉ်ပြိုင်တာမှာ ကုန်ကျစရိတ်ဟာ ၄၀ ရာခိုင်နှုန်းနဲ့ ပြီးခဲ့တဲ့ ၁၂ လအတွင်းမှာ ၁၁ ရာခိုင်နှုန်းအထိ မြင့်တက်လာခဲ့တယ်လို့ ယူနိုက်တက်က ရှင်းပြထားတာပါ။

ယူနိုက်တက် ပရိသတ်တွေကတော့ ကလပ်အတွက် လွှဲပြောင်းရေး လုပ်ငန်းစဉ်တွေ လုပ်ဆောင်နေချိန်မှာ လက်ရှိ ပိုင်ရှင် ဂလေဇာမိသားစုက ဈေးနှုန်းတက်ဖို့ လုပ်ဆောင်ခဲ့တယ်ဆိုပြီး စိတ်ပျက်နေကြတာ ဖြစ်ပါတယ်။

ယူနိုက်တက် ပရိသတ်များကိုတွေ့ရစဉ်

လက်ရှိအချိန်မှာ ကာတာလုပ်ငန်းစုနဲ့ ရက်ကလစ်ဖ်တို့က ယူနိုက်တက်ကို ဝယ်ယူနိုင်ဖို့အတွက် အပြိုင်လေလံဆွဲဖို့ တရားဝင် ကမ်းလှမ်းထားတာပါ။

ရာသီအလိုက် လက်မှတ် ဈေးနှုန်းတွေကို ၅ ရာခိုင်နှုန်း တိုးမြှင့်မှာဖြစ်လို့ လက်မှတ်တစ်စောင် ဈေးနှုန်းအပေါ် မူတည်ပြီး ပွဲတစ်ပွဲမှာ လက်မှတ်တစ်စောင်ဟာ ပေါင် ၁ ပေါင် ဒါမှမဟုတ် ပေါင် ၂ ပေါင်အထိ တိုးလာနိုင်တာ ဖြစ်ပါတယ်။

“အသင်းကို ရေရှည်တည်တံ့ပြီး ခိုင်မာတဲ့ အခြေခံနဲ့ လည်ပတ်ခွင့် ပြုနိုင်ဖို့အတွက် ၂၀၂၃-၂၄ ရာသီအတွက် လက်မှတ်ခတွေကို ဈေးနှုန်းအနည်းငယ် တိုးဖို့လိုအပ်တယ်”လို့ ယူနိုက်တက်အသင်းရဲ့ ဝက်ဘ်ဆိုက်မှာ ရေးသားထားတာပါ။

အသက် ၁၆ နှစ်နဲ့ လူငယ်တွေအတွက် ရာသီဈေးနှုန်းတွေကို ပြောင်းလဲခဲ့ခြင်း မရှိသလို အသက် ၆၅ နှစ်နဲ့အထက် တစ်ရာသီစာ လက်မှတ်ကိုင်ဆောင်ထားတဲ့ သူတွေအတွက် ၅၀ ရာခိုင်နှုန်း လျှော့ဈေးကို ကလပ်အသင်းက ဆက်လက် ထားရှိသွားမယ်လို့ သိရပါတယ်။

အခုလ အစောပိုင်းကလည်း အမှတ်ပေးဇယား ထိပ်ဆုံးနေရာမှာ ရှိနေတဲ့ အာဆင်နယ်အသင်းဟာ သူတို့ရဲ့ ဘောလုံးပွဲကြည့်ခွင့် လက်မှတ်ဈေးနှုန်းတွေကို လာမယ့် ရာသီက စတင်ပြီး ၅ ရာခိုင်နှုန်း တိုးမြှင့်မယ်လို့ အတည်ပြုထားတာ ဖြစ်ပါတယ်။

Source: Daily Mail