CNI Sport News

၂၀၂၃ ခုနှစ်၊ ဖေဖော်ဝါရီ ၂၅

နယူးကာဆယ်အသင်းရဲ့ စံချိန်တင် ဂိုးသွင်းရှင်ဖြစ်တဲ့ အလန်ရှီးယားက အသင်းအတွက် ချန်ပီယံလိဂ် ဝင်ခွင့်ရဖို့ ထက် ဆုဖလားရဖို့က ပိုပြီးအရေးကြီးတယ်လို့ ကာရာဘောင်းဖလား ဗိုလ်လုပွဲမတိုင်ခင် ပြောကြားခဲ့ပါတယ်။

အလန်ရှီးယားက “ကျနော်ဟာ ဘောလုံးအသင်းနဲ့ အက်ဒီဟိုဝီ လုပ်ဆောင်နေတဲ့ အရာတွေကို သဘောကျပါ တယ်။ သူတို့ကို ပရိသတ်တွေအတွက် အနိုင်ရစေချင်ပါတယ်။ ဒီပွဲကို ကျနော် မစောင့်ဆိုင်း နိုင်တော့ပါဘူး။ ကျနော်ဟာ ဒီပွဲကို သူငယ်ချင်းတွေ၊ မိသားစုတွေနဲ့ သွားမှာဖြစ်ပြီး အနိုင်ရခဲ့ရင် ကောင်းမွန်တဲ့နေ့ ဖြစ်မှာပါ။ နယူးကာဆယ်ကသာ ဒီဆုဖလားကို ရယူနိုင်ခဲ့မယ်ဆိုရင် မြင်ကွင်းတွေကို ကျနော်ပုံဖော်လို့ ရပါတယ်”လို့ ပြောခဲ့ တာပါ။

နယူးကာဆယ်အသင်းဟာ တနင်္ဂနွေနေ့မှာ ကာရာဘောင်းဖလား ဗိုလ်လုပွဲအဖြစ် ယူနိုက်တက်အသင်းနဲ့ ယှဉ်ပြိုင် ရမှာ ဖြစ်ပါတယ်။

နယူးကာဆယ်အသင်း နောက်ဆုံးအကြိမ် ဆုဖလားရရှိခဲ့တာက ၁၉၆၉ ခုနှစ်က Inter-Cities Fairs ဆုဖလား ဖြစ်ပြီး အခုအချိန်မှာတော့ ယူရိုပါလိဂ်ဖလား ဖြစ်လာခဲ့တာပါ။

နယူးကာဆယ်အသင်းကိုတွေ့ရစဉ်

နယူးကာဆယ်အသင်းဟာ ဆုဖလားတွေနဲ့ ဝေးကွာနေတာကြောင့် တစ်သင်းလုံးကလည်း ကာရာဘောင်းဖလား ချန်ပီယံဆုကို ရယူနိုင်ဖို့ ပစ်မှတ်ထားနေတာ ဖြစ်ပါတယ်။ ဒါအပြင် နယူးကာဆယ် ကစားသမားတွေဟာ ဒီဆု ဖလားကို ရယူနိုင်ခဲ့ရင် အပိုဆုကြေး ပေါင် ၁ သန်း ရရှိမယ်လို့ သိရပါတယ်။

အလန်ရှီးယားက “ကျနော်တို့ကို ဆုဖလားပေးပါ။ နယူးကာဆယ် အနေနဲ့ ဆုဖလားကို ရယူနိုင်ခဲ့ရင် အမှတ်ပေး ဇယား အလယ်ရပ်တည်ပြီး ရာသီကို ကျေကျေနပ်နပ် ပြီးဆုံးမှာပါ။ ဆုဖလားနဲ့ ဝေးတာ တော်တော်ကြာနေပါပြီ။ ကျနော့်ဘဝမှာ နယူးကာဆယ်အသင်း ဆုဖလား ရယူတာကို လိုချင်ပါတယ်။ ကာရာဘောင်းဖလားသာ ရယူနိုင်ခဲ့ မယ်ဆိုရင် နယူးကာဆယ် အနေနဲ့ လာမယ့် ၁၀ နှစ်အတွင်းမှာ ဘယ်လိုဖြစ်လာမလဲဆိုတာ စိတ်ကူးကြည့်နိုင်ပါ တယ်”လို့ ပြောပါတယ်။

နယူးကာဆယ်အသင်းဟာ ကာရာဘောင်းဖလားပြိုင်ပွဲမှာ အမြင့်ဆုံး အောင်မြင်မှုအဖြစ် ၁၉၇၅-၇၆ ရာသီက ဒုတိယသာ ရရှိခဲ့တာ ဖြစ်ပါတယ်။

အခုဆိုရင် နယူးကာဆယ်အသင်းဟာ ဒီရာသီမှာ ရလဒ်ကောင်းတွေ ရရှိနေပြီး ပရီးမီးယားလိဂ် အမှတ်ပေးဇယား အဆင့် ၅ နေရာမှာ ရပ်တည်နေတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဖေဖော်ဝါရီ ၂၅

လီဗာပူးလ်အသင်းနည်းပြ ကလော့ပ်က ဒီရာသီမှာ ရုန်းကန်နေရတဲ့အသင်းကို နွေရာသီမှာ ပြုပြင်ပြောင်းလဲမှုတွေ လုပ်သွားမယ်လို့ ပြောလိုက်ပါတယ်။

ကလော့ပ်က “ကျနော်တို့ တိုးတက်အောင်လုပ်ရမယ်ဆိုတာကို သိပြီး အရာရာကို ပြောင်းလဲပြီး လုပ်ဆောင်ရမှာပါ။ကျနော်တို့ အခု မလုပ်နိုင်သေးပေမယ့် နွေရာသီမှာ တစ်ခုခုလုပ်ရမယ်ဆိုတာ ရှင်းလင်းနေပြီးသားပါ။ အခုအချိန်မှာတော့ ဒီအခြေအနေကို ကျော်ဖြတ်ပြီး ပြန်လည်တိုက်ပွဲဝင်ရမှာပါ” လို့ ပြောခဲ့တာပါ။

လီဗာပူးလ်အသင်းဟာ ဒီရာသီမှာ ရလဒ်တွေ မတည်မငြိမ်ဖြစ်နေပြီး နောက်ဆုံးကစားခဲ့တဲ့ ချန်ပီယံလိဂ်ပွဲမှာ ရီးရယ်လ်အသင်းကို ၅ ဂိုး- ၂ ဂိုးနဲ့ ဂိုးပြတ်အရေးနိမ့်ခဲ့သလို ပရီးမီးယားလိဂ်မှာလည်း အမှတ်ပေးဇယားအဆင့် ၈ နေရာမှာ ရပ်တည်နေတာဖြစ်ပါတယ်။လီဗာပူးလ်အသင်းရဲ့ အဓိကကစားသမားတွေဖြစ်တဲ့ မီလ်နာ၊ ချိန်ဘာလိန်၊ ဖာမီနိုနဲ့ ကီတာတို့ဟာ အခု ရာသီအကုန်မှာ အသင်းနဲ့စာချုပ်သက်တမ်း ကုန်ဆုံးတော့မှာပါ။အဲဒါကြောင့် အန် ဖီးလ်ကလပ်ဟာ နွေရာသီမှာ ကစားသမားသစ်တွေ အားဖြည့်ရဖို့ ရှိနေတာဖြစ်ပါတယ်။

လီဗာပူးလ်အသင်းဟာ ဒီရာသီမှာ အဓိကကစားသမားတွေ ဒဏ်ရာကြောင့် အနားယူနေရတာနဲ့အတူ ရလဒ် ကောင်းတွေရရှိဖို့ ရုန်းကန်ခဲ့ရပြီး အသင်းဟာ ချန်ပီယံလိဂ် ဝင်ခွင့်နေရာနဲ့ ၇ မှတ်ကွာဟနေတာပါ။ လီဗာပူးလ် အသင်းဟာ ပြီးခဲ့တဲ့အပြောင်းအရွှေ့တွေမှာ ဒါဝင်နူနက်ဇ်၊ ဂတ်ပိုတို့လို တိုက်စစ်ကစားသမားတွေကို အားဖြည့် ခဲ့တာဖြစ်ပါတယ်။

ကလော့ပ်က “ကျနော်တို့ဟာ ချန်ပီယံလိဂ်မှာ ၅ နှစ်ဆက်တိုက်ကစားခဲ့ပြီး ဗိုလ်လုပွဲကို ၃ ကြိမ်တက်နိုင်ခဲ့ပါတယ်။ ဒါတွေက ငွေကြေးအမြင်အရဆိုရင်တော့ ကြီးမားပါတယ်။ကျနော်တို့ဟာ မှန်ကန်တဲ့ ကစားသမားတွေကို ရှာဖွေဖို့ လိုအပ်ပါတယ်။အများကြီးခေါ်ယူသွားမှာမဟုတ်ဘဲ မှန်ကန်တဲ့ ကစားသမားတွေကိုပဲ ခေါ်ယူဖို့ လုပ်ဆောင်မှာပါ။ လီဗာပူးလ်အသင်းဟာ ငွေကြေးတွေကို အရမ်းကြီးသုံးစွဲမှာမဟုတ်ဘဲ ကျနော်တို့ရဲ့ အပြောင်းအရွှေ့တွေဟာ အမြဲတမ်းအမှတ်ရနေရပါမယ်” လို့ ပြောခဲ့တာပါ။

လီဗာပူးလ်အသင်းဟာ ပြီးခဲ့တဲ့ရာသီက အက်ဖ်အေဖလားနဲ့ ကာရာဘောင်းဖလားတို့ကို ရယူနိုင်ခဲ့ပေမယ့် ဒီရာသီမှာတော့ ဆုဖလားလက်မဲ့နဲ့ အဆုံးသတ်ရဖို့ရှိနေတာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဖေဖော်ဝါရီ ၂၅

ချယ်လ်ဆီးအသင်းရဲ့ ဆိုးရွားနေတဲ့ ရလဒ်တွေကြောင့် သူနဲ့သူ့မိသားစုဟာ အသက်အန္တရာယ်ခြိမ်းခြောက်မှုတွေကို ခံနေရတယ်လို့ နည်းပြဖြစ်သူ ဂရေဟမ်ပေါ်တာက ပြောလိုက်ပါတယ်။

ဂရေဟမ်ပေါ်တာက “ကျနော့် အီးမေးလ်ထဲကို သေစေချင်နေတယ်ဆိုတဲ့ စာတွေရောက်ရှိလာခဲ့ပြီး ကောင်းမွန်တဲ့ အရာတွေ မရောက်လာခဲ့ပါဘူး။ဒါတွေကို လက်ခံရတာ အဆင်မပြေပါဘူး၊။အခု ကျနော့်မိသားစုတွေ ဘယ်လို နေထိုင်နေရလဲဆိုတာကို မေးကြည့်လိုက်ပါ။ဒါက လုံးဝ သာယာမနေပါဘူး။ခင်ဗျားအလုပ်သွားတဲ့အချိန်မှာ တစ်စုံ တစ်ယောက်က ဆဲဆိုပြီး စော်ကားနေရင် အဆင်ပြေမှာမဟုတ်ပါဘူး။ဒါကို ဂရုမစိုက်ဘူးလို့ ပြောနိုင်ပေမယ့် ကျနော်လိမ်နေတယ်ဆိုတာ ခင်ဗျားသိပါတယ်” လို့ ပြောခဲ့တာပါ။

ချယ်လ်ဆီးအသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲမှာ ဆောက်သမ်တန်အသင်းနဲ့ ကြားရက်က ချန်ပီယံလိဂ်ပွဲမှာ ဒေါ့မွန်အသင်းတို့ကို အရေးနိမ့်ခဲ့ပြီးနောက် နောက်ဆုံးကစားခဲ့တဲ့ ၁၄ ပွဲမှာ ၂ ပွဲသာ အနိုင် ရထားတဲ့အထိ ရလဒ်တွေ ဆိုးနေခဲ့တာဖြစ်ပါတယ်။ဂရေဟမ်ပေါ်တာဟာ ချယ်လ်ဆီးအသင်းကို ကိုင်တွယ်ပြီးတဲ့ ၂၅ ပွဲမှာ ၉ ပွဲသာ အနိုင်ရခဲ့တာကြောင့် ရာထူးကနေ ထုတ်ပယ်ခံရဖို့ ဖိအားတွေအောက် ကျရောက်နေခဲ့တာပါ။

ချယ်လ်ဆီးအသင်းကတော့ ဂရေဟမ်ပေါ်တာနဲ့ သူ့ရဲ့မိသားစု လိုအပ်တဲ့အရာအားလုံးကို ပံ့ပိုးပေးသွားမှာ ဖြစ်ပေမယ့် ဒါက ကိုယ်ရေးကိုယ်တာကိစ္စလို့ ပြောခဲ့တာဖြစ်ပါတယ်။လန်ဒန်ကလပ်ဟာ ပြီးခဲ့တဲ့ ဇန်နဝါရီ အပြောင်းအရွှေ့မှာ ကစားသမားသစ်တွေ အများအပြားဖြည့်တင်းပေးခဲ့ပေမယ့် အသင်းဟာ ပရီးမီးယားလိဂ် အမှတ်ပေးဇယားအဆင့် ၁၀ နေရာမှာ ရပ်တည်နေပြီး ချန်ပီယံလိဂ် ဝင်ခွင့်ရနေရာနဲ့ ၁၁ မှတ်ကွာဟနေတာ ဖြစ်ပါတယ်။

ဂရေဟမ်ပေါ်တာက “ရလဒ်တွေနဲ့ ပတ်သက်ပြီးဝေဖန်တာကို လက်ခံပါတယ်။ဒါက လွယ်ကူတယ်လို့ ဆိုလိုတာ တော့မဟုတ်ပါဘူး။ခင်ဗျားရဲ့မိသားစုဘ၀ ဒုက္ခရောက်နေတယ်၊ခင်ဗျားစိတ်ပိုင်းဆိုင်ရာခံစားနေရတယ်၊ ခင်ဗျားရဲ့ ပင်ကိုယ်စရိုက်လက္ခဏာတွေ ဒါတွေက ခက်ပါတယ်။ပရိသတ်တွေ ဒေါသထွက်တာကို လက်ခံပါတယ်။ဒါပေမယ့် ဒီလိုမျိုးလုပ်ဆောင်တာတွေနဲ့ အပြီးသတ်နိုင်မှာမဟုတ်ပါဘူး”လို ပြောခဲ့တာပါ။

ချယ်လ်ဆီးအသင်းဟာ ပရီးမီးယားလိဂ်ပွဲစဉ် ၂၅ အဖြစ် တနင်္ဂနွေနေ့ စပါးအသင်းရဲ့ အိမ်ကွင်းမှာ သွားရောက် ယှဉ်ပြိုင်ရမှာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဖေဖော်ဝါရီ ၂၄

ယူနိုက်တက် ကွင်းလယ် ကစားသမားဟောင်း အန်ဒါဆန်က သူဟာ ရော်နယ်ဒိုကြောင့် အချိန်တိုင်း အံ့အားသင့် ခဲ့ရတဲ့ အကြောင်းရင်းကို ပြောသွားခဲ့ပါတယ်။

အန်ဒါဆန်က “ရော်နယ်ဒိုကြောင့် အချိန်တိုင်းကို အံ့အားသင့်နေရတာပါ။ သူဟာ ဘောလုံးအကြောင်းကို ၁၀၀ ရာခိုင်နှုန်း တွေးတယ်။ ပွဲပြီးတာနဲ့ အိမ်ပြန်ပြီး ပြန်လည် ကောင်းမွန်လာမယ့် လုပ်ငန်းစဉ်ကို လုပ်ဆောင်ပါတယ်။ သူဟာ အလွန်ကြီးကျယ်တဲ့ ပရော်ဖက်ရှင်နယ်နဲ့ သူငယ်ချင်းကောင်းပါ။ လူတွေကို အများကြီး ကူညီပေးတယ်ဆိုတာကို လူတော်တော်များများက မသိပါဘူး။ သူ့မှာ အလွန်ကောင်းမွန်တဲ့ စိတ်နှလုံးသား ရှိပါတယ်။ ကျနော်တို့ကို လေ့ကျင့်ပေးတယ်၊ ဂရုလည်း စိုက်တယ်။ အင်္ဂလန်မှာ သူက ကျနော့်အတွက် အလွန်အရေးကြီးပါတယ်”လို့ ပြောပါတယ်။

ရော်နယ်ဒိုနဲ့ အန်ဒါဆန်တို့ဟာ ၂၀၀၇ ကနေ ၂၀၀၉ အထိ အတူတွဲ ကစားခဲ့ကြပြီး ပေါ်တူဂီကစားသမားဟာ နောက်ပိုင်းမှာ ရီးရယ်လ်အသင်းထံ ပြောင်းရွှေ့သွားခဲ့တာ ဖြစ်ပါတယ်။

အန်ဒါဆန်ဟာ ရော်နယ်ဒိုနဲ့အတူ ပရီးမီးယားလိဂ်၊ ချန်ပီယံလိဂ်ဖလားကို ရယူနိုင်ခဲ့ပြီး ယူနိုက်တက်အသင်းနဲ့ အောင်မြင်မှု အများအပြား ရယူနိုင်ခဲ့တာပါ။

ရော်နယ်ဒိုနဲ့အတူ ယူနိုက်တက်မှာ ကစားစဉ်က အန်ဒါဆန် ဆုဖလားများ ရယူခဲ့စဉ်

အန်ဒါဆန်က သူ့ဆီမှာ ရော်နယ်ဒိုရဲ့ စိတ်ဓါတ် ၅ ရာခိုင်နှုန်းသာရှိခဲ့ရင် ကမ္ဘာ့အကောင်းဆုံး ကစားသမားတွေထဲက တစ်ဦးဖြစ်နိုင်တယ်လို့ ပြောခဲ့ပါတယ်။

အန်ဒါဆန်က “တကယ်လို့ ကျနော့်ဆီမှာသာ ရော်နယ်ဒိုရဲ့ စိတ်ဓါတ် ၅ ရာခိုင်နှုန်းသာရှိခဲ့ရင် ကျနော်ဟာကမ္ဘာ့ အကောင်းဆုံး ကစားသမားတွေထဲက တစ်ဦးဖြစ်နိုင်တယ်ဆိုတာ ကျနော်သိပါတယ်။ သူ့မှာ အရည်အသွေးရော၊ အရည်အချင်းရော ရှိပါတယ်။ ကျနော်ဟာ အရာများစွာကို ရယူနိုင်ခဲ့လို့ ကောင်းမွန်တဲ့ ကစားသမားဘဝကို ရရှိ ခဲ့ပါတယ်။ ရိုးရိုးသားသား ပြောရမယ်ဆိုရင် ရော်နယ်ဒိုရဲ့ ၅ ရာခိုင်နှုန်းနဲ့သာဆိုရင် ကျနော်အခုထိ ထိပ်တန်းအဆင့် မှာ လွယ်ကူစွာ ကစားနိုင်ပါသေးတယ်”လို့ ပြောခဲ့တာ ဖြစ်ပါတယ်။

၂၀၀၈ က Golden Boy ဆုကို ရရှိခဲ့တဲ့ အန်ဒါဆန်ဟာ လက်ရှိအချိန်မှာ ဘောလုံးကစားသမား ဘဝကနေ အနား ယူထားပြီ တူရကီကလပ် အဒမ်နာဒီမာစပေါ်အသင်းရဲ့ လက်ထောက်နည်းပြအဖြစ် ဆောင်ရွက်နေပါတယ်။

Source: Goal

CNI Sport News

၂၀၂၃ ခုနှစ်၊ ဖေဖော်ဝါရီ ၂၄

အွန်နရီက လူကာကူကို ချယ်လ်ဆီးအသင်းထံ မပြောင်းရွှေ့ခင်တုန်းက သတိပေးမှုတွေ ပြုလုပ်ခဲ့သလို အခုအချိန်မှာတော့ ကစားသမားဟာ စတမ်းဖို့ဒ်ဘရစ်ချ်ထံ ပြန်လာဖို့ စိတ်ဝင်စားမှု မရှိတော့ဘူးလို့ ပြောလိုက်ပါတယ်။

အွန်နရီက “လူကာကူ ချယ်လ်ဆီး အသင်းထံ သွားဖို့ လုပ်တုန်းက ကျနော်တို့ ဆွေးနွေးမှုတွေ ပြုလုပ်ခဲ့ကြပါတယ်။ ချယ်လ်ဆီးအသင်းမှာ ကစားရတာ ခက်ခဲလိမ့်မယ်ဆိုပြီး ကျနော်သူ့ကို ပြောခဲ့ပါတယ်။ ဘာကြောင့်လဲဆိုရင် တူချယ်လ်သွားချင်တဲ့ ကစားပုံကြောင့်ပါ။ လူကာကူဟာ တူချယ်လ် လိုချင်တဲ့ နံပါတ် ၉ ကစားသမားနဲ့ ကွဲပြား ခြားနားမှု ရှိပါတယ်”လို့ CBS Sports ကို ပြောခဲ့ပါတယ်။

လူကာကူဟာ ၂၀၂၁ နွေရာသီက အင်တာမီလန် အသင်းကနေ ပေါင် ၉၇.၅ သန်းနဲ့ ချယ်လ်ဆီးအသင်းထံ ပြန်လည် ရောက်ရှိလာခဲ့တာဖြစ်ပြီး ၄၄ ပွဲ ပါဝင်ကစားကာ ၁၅ ဂိုး သွင်းယူနိုင်ခဲ့တာနဲ့အတူ ခြေစွမ်းပြနိုင်ဖို့ ရုန်းကန်ခဲ့ရတာ ဖြစ်ပါတယ်။

လူကာကူဟာ ချယ်လ်ဆီးအသင်းကို ရောက်ရောက်ချင်းမှာ ခြေစွမ်းပြသနိုင်ပေမယ့် နောက်ပိုင်းမှာ ကိုဗစ်ကူးစက်မှုဒဏ်ရာတွေကြောင့် ပုံစံကောင်း ပျောက်ခဲ့ပြီး နည်းပြ တူချယ်လ်နဲ့ အဆင်မပြေမှုတွေ ရှိခဲ့တာပါ။

အဲဒါကြောင့် ပြီးခဲ့တဲ့နွေရာသီ အပြောင်းအရွှေ့မှာ ချယ်လ်ဆီးကနေ ထွက်ခွာခွင့်တောင်းပြီး အင်တာမီလန် အသင်းထံ အငှားနဲ့ ပြန်ပြောင်းရွှေ့ခဲ့တာ ဖြစ်ပါတယ်။

အွန်နရီဟာ ဘယ်လ်ဂျီယံအသင်းမှာ လက်ထောက်နည်းပြအဖြစ်လုပ်ကိုင်ခဲ့တာကြောင့် လူကာကူနဲ့ အတူတူအလုပ်လုပ်ကိုင်ခဲ့ဖူးပါတယ်။ အာဆင်နယ်ဂန္တဝင်ကစားသမားက လူကာကူ အနေနဲ့ တူချယ်လ်လက်အောက်မှာ ခက်ခဲမယ်ဆိုပြီး ပြောခဲ့ပေမယ့် ကစားသမားက ချယ်လ်ဆီးအသင်းထံ ပြောင်းခဲ့တာ ဖြစ်ပါတယ်။

လူကာကူကိုတွေ့ရစဉ်

အခု တူချယ်လ်နေရာမှာ ဂရေဟမ်ပေါ်တာက ချယ်လ်ဆီး နည်းပြအဖြစ် ရှိနေတာကြောင့် လူကာကူ လန်ဒန် ကလပ်ထံ ပြန်လာနိုင်တယ်လို့ ပြောဆိုမှုတွေလည်း ရှိနေပါတယ်။

အွန်နရီက “ကျနော်ကတော့ လူကာကူ ချယ်လ်ဆီးအသင်းထံ ပြန်သွားမယ်လို့ မထင်ပါဘူး။ သူဟာ အင်တာမီလန် မှာပဲ ဆက်နေချင်တယ်လို့ ထင်ပါတယ်။ သူက ဆက်နေချင်တဲ့အတွက် ချယ်လ်ဆီးဘက်က ပြန်လိုချင်တယ် ဆိုရင်တော့အနည်းငယ် ပြဿနာတော့ ရှိနိုင်ပါတယ်။ ဒါပေမယ့် သူ အင်တာမီလန်မှာပဲ ဆက်ရှိနေချင်တယ် ဆိုတာ အားလုံးသိပါတယ်”လို့ ပြောပါတယ်။

လူကာကူဟာ ပေါ်တိုအသင်းကို အနိုင်ရခဲ့တဲ့ ချန်ပီယံလိဂ် ၁၆ သင်းအဆင့် ပထမအကျော့ ပွဲစဉ်မှာ အင်တာမီလန် အသင်းအတွက် အနိုင်ဂိုး သွင်းယူပေးနိုင်ခဲ့ပါတယ်။

လူကာကူကတော့ သူဟာ အခုအချိန်မှာ အနာဂတ်ကို မကြည့်ချင်သေးဘူးလို့ ပြောပါတယ်။

လူကာကူက “ကျနော် ကိုယ့်ကိုယ်ကိုနဲ့ လက်ရှိကိုပဲ အာရုံစိုက်နေပါတယ်။ အနာဂတ်ကို မကြည့်ချင်သေးပါဘူး၊ အဓိပ္ပါယ် မရှိလို့ပါ။ ဘောလုံးဆိုတာ လက်ရှိပါ၊ ဒါက အရေးကြီးဆုံး အရာပါ။ လာမယ့် ပွဲစဉ်အတွက် ပြင်ဆင်ပြီး အကောင်းဆုံး လုပ်ပြချင်ပါတယ်”လို့ ချန်ပီယံလိဂ် ပွဲအပြီးမှာ ပြောခဲ့တာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ ဖေဖော်ဝါရီ ၂၄

စပိန်အသင်းဝါရင့်နောက်ခံလူ ရာမို့စ်က သူ့ကို နည်းပြသစ် ဖူအန်တီက ရွေးချယ်မှာမဟုတ်ဘူးလို့ ပြောခဲ့ပြီးနောက် လက်ရွေးစင်အသင်းကနေ အနားယူပြီဖြစ်တယ်လို့ ကြေညာလိုက်ပါတယ်။

ရာမို့စ်က “အနားယူမယ့်အချိန် ရောက်လာပါပြီ။ကျနော်တို့ ချစ်ရပြီး စိတ်လှုပ်ရှားစရာကောင်းတဲ့ နိုင်ငံအသင်းကို နှုတ်ဆက်ရမယ့်အချိန်ပါပဲ။ စပိန်လက်ရွေးစင်အသင်းနဲ့ ရရှိခဲ့တဲ့ အောင်မြင်မှုအားလုံးနဲ့အညီ ကျနော့်ရဲ့ ပါးစပ်ထဲ မှာ ပိုမိုကောင်းမွန်တဲ့အရသာနဲ့ အဆုံးသတ်မှာပါ။ဒါက ဒီထက်ပိုပြီး ချဲ့ထွင်နိုင်ဖို့ မျှော်လင့်ထားတဲ့ လမ်းရဲ့အဆုံးသတ်ပါပဲ။ဒီမနက်ပိုင်းက လက်ရှိနည်းပြက သူ့ရဲ့အစီအစဉ်ထဲမှာ ကျနော်မပါဝင်ဘူးဆိုတဲ့အကြောင်းကို အကြောင်းကြားတဲ့ ဖုန်းခေါ်ဆိုမှုကို ရရှိခဲ့ပါတယ်” လို့ သူ့ရဲ့ဆိုရှယ်မီဒီယာမှာ ရေးသားထားတာပါ။

ရာမို့စ်ဟာ စပိန်လက်ရွေးစင်အသင်းအတွက် ပွဲပေါင်း ၁၈၀ ပါဝင်ကစားထားပြီး လက်ရွေးစင်အသင်းရဲ့ ပွဲ အများဆုံးကစားထားတဲ့ ကစားသမားလည်းဖြစ်ပါတယ်။သူဟာ ၂၀၂၁ ခုနှစ်၊ မတ်လကတည်းက စပိန်အသင်းမှာ ပါဝင်ကစားခွင့်မရတော့ဘဲ ပြီးခဲ့တဲ့ ၂၀၂၂ ကမ္ဘာ့ဖလား လူစာရင်းမှာလည်း ချန်လှပ်ခြင်းခံခဲ့ရတာပါ။ရာမို့စ်ဟာ အင်းနရစ်နေရာအစား ဝင်ရောက်လာတဲ့ ဖူအန်တီလက်ထက်မှာ လက်ရွေးစင်အသင်းအတွက် ပါဝင်ကစားနိုင်ဖို့ မျှော်လင့်ခဲ့ပေမယ့် အခုအချိန်မှာတော့ အဆုံးသတ်သွားခဲ့ရတာ ဖြစ်ပါတယ်။

ရာမို့စ်က “ဒီခရီးဟာ ကျနော့်ရဲ့ရွေးချယ်မှုနဲ့ ပြီးဆုံးဖို့ ထိုက်တန်တယ်လို့ ရိုးသားစွာ ယုံကြည်သလို ဒါမှမဟုတ် ကျနော့်ရဲ့ စွမ်းဆောင်ရည်က ကျနော့်တို့နိုင်ငံအသင်းနဲ့ မထိုက်တန်တော့လို့လည်း ဖြစ်မှာပါ။ဒါဟာ အသက်အရွယ် နဲ့ တခြားအကြောင်းရင်းတွေကြောင့်တော့ မဟုတ်ပါဘူး။ကျနော်ဟာ မက်ဆီ၊မိုဒရစ်နဲ့ ပီပီတို့ကို လေးစားပါတယ်။ ကံမကောင်းစွာနဲ့ပဲ ဒါတွေက ကျနော့်အတွက်ဖြစ်မလာခဲ့ပါဘူး။ဘာကြောင့်လဲဆိုရင် ဘောလုံးဟာ အမြဲတမ်း မျှတမှုမရှိသလို၊ ဘောလုံးဟာ ဘယ်တော့မှ ဘောလုံးတစ်ခုတည်းအတွက် မဟုတ်လို့ပါ။ ဒီတံဆိပ်၊ဒီဂျာစီနဲ့ ပရိသတ်တွေအားလုံးက ကျနော့်ကို ပျော်ရွှင်စေပါတယ်။ကျနော့်ကို ယုံကြည်သူတွေ အားလုံးကို ကျေးဇူးတင်ပါတယ်” လို့ ရေးသားခဲ့တာပါ။

ရာမို့စ်ဟာ စပိန်လက်ရွေးစင်အသင်းအတွက် အသက် ၁၈ နှစ်အရွယ် ၂၀၀၅ ခုနှစ်မှာ စတင်ပွဲထွက်ခွင့်ရခဲ့တာ ဖြစ်ပြီး နောက်ဆုံးကစားခဲ့တာကတော့ ပြီးခဲ့တဲ့ ၂ နှစ်က ကိုဆိုဗိုနဲ့ ကမ္ဘာ့ဖလားခြေစစ်ပွဲဖြစ်ပါတယ်။ရာမို့စ်ဟာ စပိန်လက်ရွေးစင်အသင်းနဲ့အတူ ၂၀၁၀ ကမ္ဘာ့ဖလား၊ ၂၀၀၈ နဲ့ ၂၀၁၂ ယူရိုချန်ပီယံဆုတွေကို ရယူနိုင်ခဲ့တာ ဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဖေဖော်ဝါရီ ၂၄

ယူနိုက်တက်အသင်းနည်းပြ အဲရစ်တန်ဟတ်က ဘာစီလိုနာအသင်းကို အနိုင်ရပြီး ယူရိုပါလိဂ်ပြိုင်ပွဲမှာ နောက် တစ်ဆင့်တက်နိုင်ခဲ့ပြီးနောက် ဘာစီလိုနာကို အနိုင်ယူနိုင်ရင် ဘယ်အသင်းမဆို အနိုင်ယူနိုင်တယ်လို့ ပြောသွား ခဲ့ပါတယ်။

အဲရစ်တန်ဟတ်က “တည်ဆောက်ဖို့အတွက် ဗျူဟာတစ်ခုလိုပေမယ့် ခိုင်မာတဲ့ ယုံကြည်ချက်ကို ရဖို့အတွက် ရလဒ်တွေလည်း လိုအပ်ပါတယ်။ဥရောပမှာ အကောင်းဆုံးအသင်းတွေထဲက တစ်သင်းဖြစ်တဲ့ ဘာစီလိုနာကို အနိုင်ယူတဲ့အခါ ယုံကြည်ချက်က ခိုင်ခိုင်မာမာရှိနိုင်လို့ ဘယ်အသင်းကိုမဆို အနိုင်ယူနိုင်မယ်လို့ ထင်ပါတယ်။ ဒါဟာ ကြီးကျယ်ခမ်းနားတဲ့ ညတစ်ညပါ။လာလီဂါမှာ ရီးရယ်လ်ကို ၈ မှတ်ဖြတ်ထားတဲ့ ဘာစီလိုနာကို အနိုင်ရ ခဲ့တာက အလွန်ကောင်းပါတယ်။ရီးရယ်လ်အသင်းဆိုရင် လီဗာပူးလ်နဲ့ ကစားခဲ့ရတာကို မြင်တွေ့ခဲ့ရပါတယ်။ ကျနော်တို့ဟာ ကြီးကျယ်ခမ်းနားတဲ့ စွမ်းဆောင်ရည်ကို လုပ်ပြနိုင်ခဲ့ပါတယ်” လို့ ပြောခဲ့တာပါ။

ယူရိုပါလိဂ်ပလေးအောဖ့် ဒုတိယအကျော့ပွဲစဉ်အဖြစ် ကစားခဲ့တဲ့ဒီပွဲမှာ ယူနိုက်တက်အသင်းဟာ ဘာစီလိုနာ အသင်းကို ၂ ဂိုး- ၁ ဂိုးနဲ့ အနိုင်ရရှိခဲ့တာဖြစ်ပါတယ်။ဒီပွဲမှာ လီဝန်ဒေါစကီးက ဘာစီလိုနာအတွက် ပင်နယ်တီကနေ ဦးဆောင်ဂိုးသွင်းယူခဲ့ပေမယ့် ယူနိုက်တက်အတွက် ဖရက်ဒ်က ချေပဂိုးသွင်းပြီး အန်တိုနီက အနိုင်ဂိုးသွင်းယူပေး ခဲ့တာပါ။ပထမအကျော့အဖြစ် ကစားခဲ့တုန်းက ၂ ဂိုးစီ သရေကျခဲ့လို့ နှစ်ကျော့ပေါင်းရလဒ် ၄ ဂိုး- ၃ ဂိုးနဲ့ ယူနိုက်တက်အသင်း ယူရိုပါလိဂ် ၁၆ သင်းအဆင့် တက်နိုင်ခဲ့တာဖြစ်ပါတယ်။

အဲရစ်တန်ဟတ်က “ကျနော်တို့မှာ ဒီဂီယာ၊ ဗာရန်း၊ မာတီးနတ်ဇ်၊ကတ်စမဲရိုး၊ဘရူနိုတို့နဲ့အတူ အသင်းမှာ အလွန် ကောင်းမွန်တဲ့ ကိုယ်ရည်ကိုယ်သွေးတွေရှိပါတယ်။အဲဒါတွေကြောင့် ဒီလိုမျိုးနိုင်ပွဲတွေရယူနိုင်ခဲ့တာပါ။ လူတိုင်းဟာ ဒီအသင်းအပေါ် ခိုင်မာတဲ့ ယုံကြည်ချက်တွေရှိပြီး၊ အသင်းအတွက်တိုက်ပွဲဝင်ခဲ့ကြပါတယ်။ လူစားဝင်ကစားသမား တွေဆိုရင်လည်း စွမ်းအင်တွေ၊အရည်အသွေးတွေနဲ့ ကွဲပြားခြားနားတဲ့ တက်ကြွမှုတွေကို ယူဆောင်လာပါတယ်။ ဒါက ဒီတစ်ပွဲတည်းတင်မဟုတ်ပါဘူး” လို့ ပြောခဲ့တာပါ။

ဘာစီလိုနာအသင်းဟာ ယူနိုက်တက်အသင်းကို အရေးနိမ့်ပြီးနောက် အောက်တိုဘာလနောက်ပိုင်း ပထမဆုံး ရှုံးပွဲကြုံတွေ့ခဲ့တာဖြစ်ပြီး ၁၈ ပွဲဆက် ရှုံးပွဲမရှိစံချိန် ရပ်တန့်သွားခဲ့ရတာဖြစ်ပါတယ်။ ဘာစီလိုနာအသင်းနည်းပြ ဇာဗီကတော့ လာမယ့်ရာသီမှာ ပိုပြီးသန်မာစွာနဲ့ ပြန်လာမယ်လို့ ပြောခဲ့တာပါ။

ဇာဗီက “ပြီးခဲ့တဲ့နှစ်က ကျနော်တို့ဟာ ဥရောပမှာ မယှဉ်ပြိုင်နိုင်ခဲ့ပါဘူး။ဒီနှစ်မှာတော့ ဘိုင်ယန်မြူးနစ်၊ အင်တာ မီလန်တို့နဲ့ ယှဉ်ပြိုင်ခဲ့ရသလို ယူနိုက်တက်နဲ့လည်း ယှဉ်ပြိုင်ခဲ့ရပါတယ်။ကျနော်တို့ ပိုပြီး ကောင်းမွန်အောင် လုပ်ဖို့ လိုအပ်ပါတယ်။ဒါပေမယ့် ကျနော်တို့ ကောင်းမွန်စွာလုပ်နိုင်ခဲ့ပြီး လာမယ့်ရာသီမှာ ပိုပြီးသန်မာစွာနဲ့ ပြန်လာ ခဲ့မယ်”လို့ ပြောခဲ့ပါတယ်။

ယူနိုက်တက်အသင်းကတော့ တနင်္ဂနွေနေ့မှာ ကာရာဘောင်းဖလားဗိုလ်လုပွဲအဖြစ် နယူးကာဆယ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:ChannelNewsAsia

CNI Sport News

၂၀၂၃ ခုနှစ်၊ ဖေဖော်ဝါရီ ၂၃

ဘာစီလိုနာအသင်းနည်းပြ ဇာဗီက သူဟာ မက်ဆီနဲ့ အမြဲတမ်း အဆက်အသွယ်ရှိပြီး အာဂျင်တီးနား ကစားသမား အနေနဲ့ အသင်းထံ ပြန်လာမယ်ဆိုရင် တံခါးဖွင့်ထားမယ်လို့ ပြောခဲ့ပါတယ်။

ဇာဗီက “ဘာစီလိုနာက သူ့အိမ် ဖြစ်တယ်ဆိုတာကို ကျနော် အမြဲတမ်းပြောပြီးပါပြီ။ သူ့အတွက်ဆို တံခါးဖွင့် ထားပါတယ်။ ပြီးတော့ သူကကျနော့်ရဲ့ သူငယ်ချင်းပါ။ ကျနော်တို့ အမြဲတမ်း အဆက်အသွယ် ရှိပါတယ်။ အနာဂတ်မှာ သူဘာလုပ်ချင်လဲဆိုတာက သူ့အပေါ်မှာပဲ မူတည်ပါတယ်။ ဘာစီလိုနာက သူ့အိမ်ဆိုတာ သံသယ ဖြစ်စရာ မရှိပါဘူး။ သူက သမိုင်းရဲ့ အကောင်းဆုံး ဘောလုံးသမားဖြစ်တဲ့အတွက် အမြဲတမ်း အံဝင်နေမှာပါ”လို့ ပြောခဲ့တာပါ။

မက်ဆီဟာ အသင်းရဲ့ ဘဏ္ဍာရေး အခြေအနေတွေကြောင့် စာချုပ်သစ်မချုပ်နိုင်ခဲ့ဘဲ ၂၀၂၁ မှာ ဘာစီလိုနာကနေ ထွက်ခွာခဲ့ရတာ ဖြစ်ပါတယ်။

ဒီနောက်မှာတော့ မက်ဆီဟာ ပီအက်စ်ဂျီအသင်းထံ ပြောင်းရွှေ့ခဲ့ပြီး ပြိုင်ပွဲစုံ ၆၁ ပွဲ ပါဝင်ကစားထားကာ ဂိုး ပါဝင် ပတ်သက်မှု ၅၅ ဂိုးအထိ ရှိခဲ့တာပါ။

အခုရာသီ အကုန်မှာတော့ မက်ဆီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ ကုန်ဆုံးတော့မှာဖြစ်ပြီး စာချုပ်သစ်အတွက် အခုထိ သဘောတူညီမှု မရရှိသေးပါဘူး။

 မက်ဆီကိုတွေ့ရစဉ်

ပီအက်စ်ဂျီအသင်းက မက်ဆီကို စာချုပ်သစ် ချုပ်ဆိုနိုင်ဖို့ ကြိုးစားနေသလို ဘာစီလိုနာကလည်း ဒီအခြေအနေကို စောင့်ကြည့်နေပြီး အသင်းထံ ပြန်လည် ခေါ်ယူနိုင်ဖို့ စိတ်ဝင်စားနေတာပါ။

ဒါအပြင် မက်ဆီကို ခေါ်ယူဖို့ မေဂျာလိဂ်ကလပ် အင်တာမိုင်ယာမီ အသင်းကလည်း ချိတ်ဆက်မှုတွေ ပြုလုပ်နေ ပါတယ်။

မက်ဆီရဲ့ ဖခင်ဖြစ်သူကတော့ သူ့ရဲ့သားကို ခေါ်ယူဖို့ ဘာစီလိုနာအသင်းက ကမ်းလှမ်းမှု မရှိတာကြောင့် စပိန်ကလပ်ထံ ပြန်ဖို့ ဖြစ်နိုင်ဖွယ် မရှိဘူးလို့ မကြာသေးခင်က အင်တာဗျူးတစ်ခုမှာ ပြောထားတာပါ။

မက်ဆီကတော့ အခုအချိန်ထိ သူ့အနာဂတ်နဲ့ ပတ်သက်ပြီး ထုတ်ပြောထားခြင်း မရှိတာကြောင့် စာချုပ်ကုန်ဆုံးမယ့် ရာသီအကုန်ထိ စောင့်ကြည့်ရဖွယ် ရှိနေပါတယ်။

မက်ဆီဟာ ပြီးခဲ့တဲ့ ပီအက်စ်ဂျီအသင်းက လိုင်လီအသင်းကို ၄ ဂိုး- ၃ ဂိုးနဲ့အနိုင်ရခဲ့တဲ့ လီဂူးဝမ်းပွဲစဉ်မှာ အသင်း အတွက် နာကျင်အချိန်ပိုမှာ အနိုင်ဂိုး သွင်းယူပေးခဲ့ပြီး အသင်းရှုံးပွဲ ဆက်နေတာကို ရပ်တန့်ပေးခဲ့တာပါ။

ပီအက်စ်ဂျီအသင်းဟာ ဒီတစ်ပတ် လီဂူးဝမ်း ပွဲစဉ်အဖြစ် ဖေဖော်ဝါရီ ၂၆ ရက်မှာ မာဆေးလ်အသင်းနဲ့ အဝေးကွင်း ပွဲစဉ် ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဖေဖော်ဝါရီ ၂၃

ရော်နယ်ဒိုဟာ အယ်လ်နာဆာအသင်းနဲ့အတူ ဆော်ဒီနိုင်ငံတည်ထောင်တဲ့နေ့ အခမ်းအနားမှာ ပါဝင်ခဲ့ပြီး ဓါးကိုကိုင်ဆောင်ကာ ရိုးရာဝတ်စုံဝတ်ဆင်ထားတာဖြစ်ပါတယ်။

ရော်နယ်ဒိုဟာ ယူနိုက်တက်အသင်းနဲ့ နှစ်ဦးသဘောတူစာချုပ်ဖျက်သိမ်းပြီး ဆော်ဒီကလပ် အယ်လ်နာဆာ အသင်းထံ ဇန်နဝါရီကမှ ပြောင်းရွှေ့လာခဲ့တာပါ။ရော်နယ်ဒိုဟာ တစ်နှစ်လုပ်ခ ယူရိုသန်း ၂၀၀ နဲ့ ၂၀၂၅ ခုနှစ် အထိ စာချုပ်ချုပ်ဆိုခဲ့တာဖြစ်ပါတယ်။ဖေဖော်ဝါရီ ၂၂ ရက်ဟာ အီမာမ်မိုဟာမက်ဘင်ဆောဒ့်က ဆော်ဒီအာရေဗျကို ၁၇၂၇ ခုနှစ်က ရှာဖွေတွေ့ရှိခဲ့တဲ့ နေ့စွဲဖြစ်ပါတယ်။ဘုရင် ဆယ်လ်မန်က အဆိုပါနေ့ကို တော်ဝင်အမိန့်နဲ့ နိုင်ငံတော် အားလပ်ရက်အဖြစ် ပြီးခဲ့တဲ့နှစ်က ကြေညာခဲ့တာဖြစ်ပါတယ်။

လေးရက်ကြာ ကျင်းပနေတဲ့ အထိမ်းအမှတ်ပွဲတွေမှာ အယ်လ်နာဆာအသင်းရဲ့ အိမ်ကွင်းမှာ လုပ်ဆောင်နေတဲ့ ပွဲတွေလည်း ပါဝင်နေတာပါ။ ရော်နယ်ဒိုဟာ အယ်လ်နာဆာအသင်းဖော်တွေနဲ့အတူ အာရပ်အဖျော်ယမကာကို သောက်ရင်း ဆော်ဒီနိုင်ငံရဲ့ ရိုးရာဝတ်စုံနဲ့ ကြည့်ကောင်းနေခဲ့တာဖြစ်ပါတယ်။ရော်နယ်ဒိုဟာ ပြုံးရွှင်စွာနဲ့ လက်ထဲမှာ ကိုင်ဆောင်ထားတဲ့ ဓါးကို ဝှေ့ယမ်းတာတွေကိုပါ ပြုလုပ်နေခဲ့တာပါ။ပေါ်တူဂီကစားသမားဟာ အယ်လ်နာဆာအသင်းနဲ့အတူ ဆော်ဒီအထိမ်းအမှတ်ပွဲမှာပါဝင်ခဲ့တဲ့ ဗွီဒီယိုကို သူ့ရဲ့ တွစ်တာမှာ တင်ထားခဲ့တာ ဖြစ်ပါတယ်။

အယ်လ်နာဆာအသင်းခေါင်းဆောင်အဖြစ် ဆောင်ရွက်နေတဲ့ ရော်နယ်ဒိုဟာ အယ်လ်ဖာတက်ချ်အသင်းနဲ့ ၂ ဂိုးစီ သရေကျခဲ့တဲ့ပွဲမှာ အယ်လ်နာဆာကစားသမားဘ၀ ပထမဆုံးသွင်းဂိုးကို ရယူနိုင်ခဲ့တာပါ။အယ်လ်ဝါဒါအသင်းကို ၄ ဂိုး-ဂိုးမရှိနဲ့ ဂိုးပြတ်အနိုင်ရခဲ့တဲ့ပွဲမှာတော့ ရော်နယ်ဒိုဟာ အသင်းအတွက် ၄ ဂိုးစလုံးသွင်းယူ ပေးခဲ့တာ ဖြစ်ပါတယ်။ဒါ့အပြင် ရော်နယ်ဒိုဟာ အယ်လ်တာဝေါင်အသင်းကို ၂ ဂိုး- ၁ ဂိုးနဲ့အနိုင်ရတဲ့ပွဲမှာ အယ်လ်နာဆာ အသင်းသွင်းယူခဲ့တဲ့ ၂ ဂိုးစလုံးကို ဖန်တီးပေးခဲ့တာပါ။

အယ်လ်နာဆာအသင်းဟာ ဆော်ဒီပရိုလိဂ်ပွဲစဉ် ၁၇ ပွဲကစားအပြီးမှာ ဒုတိယနေရာက အယ်လ်အစ်တီဟတ် အသင်းနဲ့ ရမှတ်တူ၊ ဂိုးကွာခြားချက်အသာနဲ့ အမှတ်ပေးဇယားကို ဦးဆောင်နေတာဖြစ်ပါတယ်။ အယ်လ်နာဆာ အသင်းဟာ ဖေဖော်ဝါရီ ၂၅ ရက်မှာ လိဂ်ပွဲစဉ်အဖြစ် ဒါမတ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:The Sun