- By cni
- Category: အားကစား
- Hits: 667
CNI Sport News
၂၀၂၃ ခုနှစ်၊ စက်တင်ဘာ ၄
ယူနိုက်တက်အသင်းနည်းပြ အဲရစ်တန်ဟတ်က အာဆင်နယ်အသင်းနဲ့ ပွဲမှာ ဆန်ချိုကို ချန်လှပ်ခဲ့တာဟာ လေ့ကျင့်ရေးကွင်းမှာ ညံ့ဖျင်းတဲ့ စွမ်းဆောင်ရည်တွေကြောင့်လို့ ပြောခဲ့တဲ့အပေါ် ကစားသမားဖြစ်သူက ပြန်လည်တုံ့ပြန်ခဲ့ပါတယ်။
ဆန်ချိုက “လူတွေရဲ့ လုံးဝမှန်ကန်မှုမရှိတဲ့ စကားတွေပြောနေတာကို ကျနော်ခွင့်မပြုပါဘူး။ ကျနော်ဟာ လေ့ကျင့် ရေးကွင်းမှာ ကောင်းမွန်စွာ လုပ်ဆောင်ခဲ့ပေမယ့် ကျနော် မပါဝင်ခဲ့တဲ့ကိစ္စက တခြား အကြောင်းပြချက်တွေ ရှိမယ်လို့ ယုံကြည်ပါတယ်။ ကျနော်ဟာ မျက်နှာပေါ်မှာ အပြုံးတွေနဲ့ ဘောလုံးကစားပြီး အသင်းအတွက် အကျိုး ပြုချင်တာပါ။ နည်းပြအဖွဲ့ဝင်တွေရဲ့ ဆုံးဖြတ်ချက်တွေကို ကျနော်လေးစားပါတယ်။ ဘယ်လိုကိစ္စတွေပဲဖြစ်ဖြစ်ပါ ကျနော်ကတော့ ယူနိုက်တက်လိုဂိုအတွက် ဆက်ပြီးတိုက်ပွဲဝင်နေဦးမှာပါ”လို့ ထုတ်ပြန်ခဲ့ပါတယ်။
ဆန်ချိုဟာ အာဆင်နယ်အသင်းကို အရေးနိမ့်ခဲ့တဲ့ ပွဲစဉ်အတွက် ယူနိုက်တက်အသင်းရဲ့ ကစားသမား အယောက် (၂၀)စာရင်းထဲမှာ ချန်လှပ်ခြင်း ခံခဲ့ရတာ ဖြစ်ပါတယ်။
ဆန်ချိုနဲ့အဲရစ်တန်ဟတ်ကို တွေ့ရစဉ်
နည်းပြ အဲရစ်တန်ဟတ်က ဆန်ချိုဟာ လေ့ကျင့်ရေးကွင်းမှာ ကောင်းမွန်စွာ မစွမ်းဆောင်နိုင်ခဲ့တာကြောင့် အာဆင်နယ်အသင်းနဲ့ ပွဲအတွက် မရွေးခဲ့တာလို့ ပွဲအပြီးမှာ ပြောခဲ့တာပါ။
အဲရစ်တန်ဟတ်က “လေ့ကျင့်ရေးကွင်းက သူ့ရဲ့ စွမ်းဆောင်ရည်ကြောင့် ကျနော်တို့ ဆန်ချိုကို မရွေးချယ်ခဲ့ပါဘူး။ ယူနိုက်တက်အသင်းမှာ နေ့တိုင်းအဆင့်တစ်ခု ရောက်နေဖို့ လိုအပ်ပါတယ်။ ရှေ့တန်းအတွက် ရွေးချယ်မှုတွေ လုပ်လို့ရတာကြောင့် ဒီပွဲမှာ ကျနော်တို့ သူ့ကို မရွေးချယ်ခဲ့ပါဘူး”လို့ ပြောခဲ့ပါတယ်။
ဆန်ချိုဟာ ယူနိုက်တက်အသင်းအတွက် ကစားခဲ့တဲ့ ပထမဆုံးနှစ်ရာသီမှာ ဂိုးပါဝင်ပတ်သက်မှု ၁၈ ဂိုး ပြုလုပ် နိုင်ခဲ့ပေမယ့် အခုနှစ်ဘောလုံးရာသီ ပရီးမီးယားလိဂ် ၃ ပွဲမှာ ပွဲကစားချိန် ၇၆ မိနစ်သာ ရရှိထားပါတယ်။
ဆန်ချိုဟာ ရက်ရှ်ဖို့ဒ်၊ ဂါနာချို၊ အန်တိုနီတို့ရဲ့ နောက်မှာသာ ပွဲကစားခွင့် ရနေတဲ့အပေါ် စိတ်ပျက်နေတာလည်း ဖြစ်ပါတယ်။
ဆန်ချိုအနေနဲ့ နည်းပြ အဲရစ်တန်ဟတ်ရဲ့ ဝေဖန်မှုကို တုံ့ပြန်ခဲ့တာကြောင့် အသင်းက သူ့ကို စည်းကမ်းပိုင်းအရ အရေးယူဖွယ် ရှိ/မရှိတော့ စောင့်ကြည့်ရဦးမှာပါ။
အင်္ဂလန်ကစားသမားဟာ ပြီးခဲ့တဲ့ နွေရာသီ အပြောင်းအရွှေ့က သူ့ကို ခေါ်ယူဖို့အတွက် စိတ်ဝင်စားနေတဲ့ ကလပ်အသင်းတွေ ရှိခဲ့ပေမယ့် ယူနိုက်တက်အသင်းမှာသာ ဆက်ပြီးရှိနေခဲ့တာ ဖြစ်ပါတယ်။
Source: Goal
- By cni
- Category: အားကစား
- Hits: 595
CNI Sport News
၂၀၂၃ ခုနှစ်၊ စက်တင်ဘာ ၄
လီဗာပူးလ်အသင်းနည်းပြ ကလော့ပ်က အနာဂတ်နဲ့ ပတ်သက်ပြီး ထင်ကြေးတွေ ထွက်ပေါ်နေတဲ့ တိုက်စစ်မှူး ဆာလတ် အသင်းမှာ ဆက်ရှိမှာကို သံသယမရှိဘူးလို့ ပြောလိုက်ပါတယ်။
ကလော့ပ်က “ကလပ်အတွက် ဆာလတ်ရဲ့ ကတိကဝတ်နဲ့ ပတ်သက်ပြီး ကျနော်ဘယ်တုန်းကမှ သံသယမရှိခဲ့ပါ ဘူး။ ဆာလတ်နဲ့ ပတ်သက်ပြီး ကျနော်တို့က အေးဆေးပါပဲ။ သူက ကျနော်တို့ရဲ့ ကစားသမားဖြစ်ပြီး သူကလည်း ဒီမှာကစားချင်ပါတယ်”လို့ အက်စတွန်ဗီလာ အသင်းနဲ့ပွဲအပြီး သတင်းထောက်တွေကို ပြောခဲ့ပါတယ်။
ဆော်ဒီပရိုလိဂ်ကလပ် အယ်လ်အစ်တီဟတ်အသင်းဟာ ပြီးခဲ့တဲ့အပတ်က ဆာလတ်အတွက် ပေါင်သန်း ၁၅၀ နဲ့ ကမ်းလှမ်းခဲ့တာကို လီဗာပူးလ်အသင်းက ပယ်ချထားခဲ့ပြီး အီဂျစ်တိုက်စစ်မှူးကို ရောင်းချမှာ မဟုတ်ဘူးလို့ အခိုင် အမာ ပြောထားပါတယ်။
ဆော်ဒီပရိုလိဂ်ရဲ့ အပြောင်းအရွှေ့ဟာ စက်တင်ဘာ ၇ ရက်မှ ပိတ်မှာဖြစ်လို့ လီဗာပူးလ်အသင်းဟာ ဆာလတ် အတွက် အယ်လ်အစ်တီဟတ်အသင်းရဲ့ နောက်ထပ် ကမ်းလှမ်းမှုတွေ ခံရဖွယ်ရှိနေတာပါ။
ဆာလတ်ကို တွေ့ရစဉ်
လီဗာပူးလ်အသင်းက အက်စတွန်ဗီလာအသင်းကို ၃ ဂိုး- ဂိုးမရှိနဲ့ အနိုင်ရခဲ့တဲ့ပွဲမှာ ဆာလတ်က ၁ ဂိုး သွင်းယူခဲ့ပြီး အသင်းအတွက် ခြေစွမ်းပြသနိုင်ခဲ့ပါတယ်။
လီဗာပူးလ်အသင်းနည်းပြ ကလော့ပ်က ဆာလတ်ဟာ အသင်းအတွက် အကောင်းဆုံး လုပ်ဆောင်နိုင်ဖို့ကိုသာ အာရုံစိုက်ထားတယ်လို့ ပြောခဲ့ပါတယ်။
အက်စတွန်ဗီလာ အသင်းနဲ့ပွဲမှာ လီဗာပူးလ်အသင်း ကစားသမားဘဝ ပထမဆုံး ဂိုးသွင်းယူခဲ့တဲ့ ကွင်းလယ်လူ ဆိုဘော့စ်လိုင်းကလည်း ဆာလတ်အသင်းမှာ ဆက်ရှိမယ်လို့ ပြောခဲ့တာပါ။
ဆိုဘော့စ်လိုင်းက “ဆာလတ် ဒီမှာရှိနေတဲ့အတွက် ကျနော်တို့ တကယ်ပျော်ရွှင်ပါတယ်။ ဆာလတ်ကိုယ်တိုင် ကလည်း လီဗာပူးလ်အသင်းမှာပဲ ဆက်ရှိချင်နေတာပါ။ ဆာလတ်လို ကစားသမားမျိုးက ကျနော်တို့ အသင်း အတွက် တကယ်ကို လိုအပ်တဲ့သူပါ”လို့ ပြောခဲ့ပါတယ်။
အသက် ၃၁ နှစ်အရွယ်ရှိ ဆာလတ်ဟာ အခုနှစ် ဘောလုံးရာသီမှာ လီဗာပူးလ်အသင်းအတွက် ပရီးမီးယားလိဂ် ၄ ပွဲစလုံး ပါဝင်ကစားခဲ့ပြီး ၂ ဂိုး သွင်းယူထားတာပါ။
၂၀၁၇ ခုနှစ်က ရိုးမားအသင်းကနေ ရောက်ရှိလာခဲ့တဲ့ ဆာလတ်ဟာ လီဗာပူးလ်အသင်းအတွက် ၁၈၈ ဂိုး သွင်းယူ ထားပြီး ကလပ်အသင်းရဲ့ ဂိုးသွင်းအများဆုံး နံပါတ် ၅ နေရာမှာ ရပ်တည်နေတာ ဖြစ်ပါတယ်။
Source: BBC
- By CNI
- Category: အားကစား
- Hits: 440
CNI Sport News
၂၀၂၃ ခုနှစ်၊ စက်တင်ဘာ ၄
ယူနိုက်တက်အသင်းနည်းပြ အဲရစ်တန်ဟတ်က အာဆင်နယ်အသင်းကို အရေးနိမ့်ခဲ့တဲ့ပွဲမှာ ဒိုင်လူကြီးရဲ့ ဆုံးဖြတ်ချက်တွေနဲ့ ပတ်သက်ပြီးမေးခွန်းထုတ်ခဲ့ကာ အရာအားလုံးက သူတို့ကို ဆန့်ကျင်ခဲ့တယ်လို့ ပြောလိုက်ပါတယ်။
အဲရစ်တန်ဟတ်က “စွမ်းဆောင်ရည်လည်းကောင်းသလို ကစားတာလည်းကောင်းပါတယ်။ ဒါပေမယ့် အရာ အားလုံးက ကျနော်တို့ကို ဆန့်ကျင်နေတဲ့အတွက် ဒီပွဲကို အနိုင်မရတော့ပါဘူး။ ခင်ဗျားတို့လည်း မြင်မှာပါ၊ ဂါနာချိုရဲ့ဂိုးက လူကျွံဘောမဟုတ်ဘူးဆိုတာကို။ ဟော့ဂျ်လန်းကို ပြစ်ဒဏ်ကျူးလွန်တာလည်း ပင်နယ်တီ ပေးရမှာပါ။ သူတို့ရသွားတဲ့ဂိုးမှာဆိုလည်း ဂျွန်နီအီဗန်စ်ကို ပြစ်ဒဏ်ကျူးလွန်ပြီးမှရရှိသွားတာပါ” လို့ ပွဲအပြီး Sky Sports နဲ့ အင်တာဗျူးမှာ ပြောသွားခဲ့တာပါ။
ယူနိုက်တက်အသင်းဟာ ဒီပွဲမှာ အာဆင်နယ်အသင်းကို နာကျင်အချိန်ပိုမှာ ပေးခဲ့ရတဲ့ဂိုးတွေကြောင့် ၃ ဂိုး- ၁ ဂိုးနဲ့ အရေးနိမ့်သွားခဲ့တာဖြစ်ပါတယ်။ ယူနိုက်တက်အသင်းဟာ ရက်ရှ်ဖိုဒ့်ရဲ့သွင်းဂိုးနဲ့ ဦးဆောင်နိုင်ခဲ့ပေမယ့် အိုဒီဂတ် က ချေပဂိုးသွင်းပြီး ဒီကလန်ရိုက်စ်နဲ့ ဂျီးဆပ်စ်တို့က အာဆင်နယ်အသင်းအတွက် အနိုင်ဂိုးတွေ သွင်းယူပေးခဲ့တာပါ။
အဲရစ်တန်ဟတ်က ယူနိုက်တက်အသင်းဦးဆောင်ဂိုးဖြစ်စေနိုင်မယ့် ဂါနာချိုရဲ့ သွင်းဂိုးကို လူကျွံဘောဆိုပြီး ပယ်ချ ခဲ့တာဟာ VAR ဒိုင်လူကြီးက မှားယွင်းတဲ့ထောင့်ကနေ ကြည့်မိခဲ့တာကြောင့်လို့ ယုံကြည်နေတာ ဖြစ်ပါတယ်။ ဒတ်ချ်လူမျိုးနည်းပြဟာ အာဆင်နယ်အသင်းကို ရှုံးနိမ့်ခဲ့ပေမယ့် ယူနိုက်တက်အသင်းရဲ့ စွမ်းဆောင်ရည်ကို ကျေနပ်နေတာပါ။
အဲရစ်တန်ဟတ်က “အသင်းရဲ့စွမ်းဆောင်ရည်အတွက် ကျနော်ပျော်ရွှင်ပါတယ်။ ဟော့ဂျ်လန်းလည်း ကောင်းမွန် စွာ ကစားနိုင်ခဲ့သလို မာရှယ်ရဲ့ စွမ်းဆောင်ရည်ကလည်း ကောင်းမွန်ခဲ့ပါတယ်။ ကျနော်တို့ တိုးတက်အောင်လုပ်ဖို့ လိုအပ်ပါတယ်။ ကျနော်တို့ဟာ မနှစ်ကတုန်းက လူတိုင်းကို အနိုင်ရခဲ့တယ်ဆိုတာကို ခင်ဗျားတို့ မြင်တွေ့ခဲ့ ရပါတယ်”လို့ ပြောခဲ့တာဖြစ်ပါတယ်။
ယူနိုက်တက်အသင်းဟာ အခုနှစ်ဘောလုံးရာသီ ပရီးမီးယားလိဂ်ပွဲစဉ် ၄ ပွဲကစားအပြီးမှာ ၂ ပွဲနိုင်၊ ၂ ပွဲရှုံးရလဒ် ရရှိထားပြီး အဆင့် ၁၁ နေရာမှာ ရပ်တည်နေတာပါ။ ယူနိုက်တက်အသင်းဟာ နိုင်ငံတကာပွဲစဉ်အပြီးမှာ ပရီးမီးယားလိဂ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာဖြစ်ပါတယ်။
Source:DailyMail
- By CNI
- Category: အားကစား
- Hits: 532
CNI Sport News
၂၀၂၃ ခုနှစ်၊ စက်တင်ဘာ ၂
စပိန်အသင်းဟာ စက်တင်ဘာလထဲမှာကစားမယ့် ဂျော်ဂျီယာ၊ဆိုက်ပရပ်စ်အသင်းတို့နဲ့ ယူရို ၂၀၂၄ ခြေစစ်ပွဲ အတွက် ဘာစီလိုနာအသင်းရဲ့ အသက် ၁၆ နှစ်အရွယ်ရှိ ယာမဲလ်ကို လူစာရင်းမှာ ရွေးချယ်ခဲ့ပါတယ်။
ယာမဲလ်ဟာ စပိန်သက်တမ်းလိုက်အသင်းတွေဖြစ်တဲ့ ယူ-၁၅၊ ယူ-၁၆၊ယူ-၁၇ နဲ့ ယူ-၁၉ အသင်းတွေမှာ ပါဝင်ကစားခဲ့ပြီး လက်ရွေးစင်အသင်းလူစာရင်းမှာ ပထမဆုံးအကြိမ်ရွေးချယ်ခြင်းခံခဲ့ရတာပါ။ ဆယ်ကျော်သက် ကစားသမားဟာ ဒီရာသီမှာ ဘာစီလိုနာအသင်းကြီးအတွက် လာလီဂါပွဲစဉ် ၃ ပွဲစလုံးပါဝင် ကစားခွင့်ရထားတာ ဖြစ်ပါတယ်။ ယာမဲလ်ဟာ ပွဲစဉ် ၂ ပွဲကို ပွဲထွက်ခွင့်ရခဲ့ပြီး ဗီလာရီးရယ်လ်အသင်းကို အနိုင်ရခဲ့တဲ့ပွဲမှာ အကောင်းဆုံးကစားသမားဆုကို ရရှိခဲ့တာပါ။
ယာမဲလ်ရဲ့ဖခင်ဟာ မော်ရိုကိုနိုင်ငံသားဖြစ်တဲ့အတွက် ကစားသမားဟာ မော်ရိုကိုလက်ရွေးစင်အသင်းအတွက် ပါဝင်ကစားလို့ရတာဖြစ်ပါတယ်။ ဒါပေမယ့် စပိန်လက်ရွေးစင်အသင်းနည်းပြ ဒီလာဖူအန်တီက ယာမဲလ်ဟာ လာမယ့်နှစ်အနည်းငယ်အတွင်းမှာ စပိန်အသင်းရဲ့ အဓိက ကစားသမားဖြစ်လာမယ်လို့ ယုံကြည်နေတာပါ။
ဒီလာဖူအန်တီက “သူဟာ လူငယ်အသင်းတွေမှာ ကစားခဲ့တုန်းကလည်း ကောင်းမွန်သလို ထူးခြားတဲ့ စွမ်းရည် ရှိတဲ့သူပါ။ ကျနော် ဘာစီလိုနာမှာ သူနဲ့တွေ့ဆုံခဲ့ပြီး သူဟာ ကွဲပြားခြားနားပါတယ်။ ကျနော်တို့ဟာ ကစားသမား တွေကို ရွေးချယ်တာမှာ အသက်အရွယ်ကိုမကြည့်ဘဲ စွမ်းဆောင်ရည်ကိုပဲ ကြည့်ပါတယ်။ သူဟာ အမြင့်ဆုံး အဆင့်မှာ ယှဉ်ပြိုင်နိုင်ဖို့ အဆင်သင့်ဖြစ်နေပါပြီ” လို့ပြောခဲ့ပါတယ်။
ယာမဲလ်ဟာ ဂျော်ဂျီယာ ဒါမှမဟုတ် ဆိုက်ပရပ်စ်အသင်းနဲ့ ပွဲစဉ်မှာ စပိန်အသင်းအတွက် ပါဝင်ကစားခွင့်ရမယ် ဆိုရင် လက်ရွေးစင်အသင်းရဲ့ အသက်အငယ်ဆုံးကစားသမားအဖြစ် မှတ်တမ်းတင်နိုင်မှာပါ။ အရင်က ယာမဲလ်ရဲ့ ဘာစီလိုနာအသင်းဖော် ဂါဗီက အသက် ၁၇ နှစ်၊ ၆၂ ရက်နဲ့ ဒီစံချိန်မှတ်တမ်းကို တင်ထားတာဖြစ်ပါတယ်။
စပိန်အသင်းဟာ ယူရို ၂၀၂၄ ခြေစစ်ပွဲအဖြစ် ၂ ပွဲကစားအပြီးမှာ ၁ ပွဲနိုင်၊ ၁ ပွဲရှုံး ရမှတ် ၃ မှတ်နဲ့ အုပ်စုတွင်းအဆင့် ၄ နေရာမှာ ရပ်တည်နေတာဖြစ်ပါတယ်။
Source:BBC
- By CNI
- Category: အားကစား
- Hits: 619
CNI Sport News
၂၀၂၃ ခုနှစ်၊ စက်တင်ဘာ ၂
တိုက်စစ်မှူးသစ် ဟော့ဂျ်လန်းဟာ ယူနိုက်တက်ကစားသမားဘဝပွဲဦးထွက်အဖြစ် အာဆင်နယ်အသင်းနဲ့ ပရီးမီးယားလိဂ်ပွဲမှာ ပါဝင်ဖို့အဆင်သင့်ဖြစ်နေပြီလို့ နည်းပြ အဲရစ်တန်ဟတ်က ပြောခဲ့ပါတယ်။
အဲရစ်တန်ဟတ်က “သူဟာ ရက်သတ္တပတ်လောက် ကောင်းမွန်တဲ့လေ့ကျင့်ရေး ရှိခဲ့ပြီး ကောင်းမွန်စွာ လုပ်ဆောင်နိုင်ခဲ့သလို တုံ့ပြန်မှုတွေကလည်း ကောင်းမွန်တဲ့အတွက် အာဆင်နယ်အသင်းနဲ့ပွဲမှာ ပါဝင်မှာပါ”လို့ ဟော့ဂျ်လန်းနဲ့ ပတ်သက်ပြီး သတင်းထောက်တွေရဲ့မေးမြန်းမှုကို ဖြေခဲ့တာပါ။
ဒိန်းမတ်လက်ရွေးစင်တိုက်စစ်မှူးဟာ အခုနှစ်ဘောလုံးရာသီ ပရီးမီးယားလိဂ်ပြိုင်ပွဲတွေ မစတင်ခင်က အတ္တလန်တာအသင်းကနေ ပေါင် ၇၂ သန်းနဲ့ ရောက်ရှိလာခဲ့ပေမယ့် နောက်ကျောဒဏ်ရာကြောင့် ယူနိုက်တက်အသင်းအတွက် ပါဝင်ကစားရခြင်းမရှိသေးပါဘူး။ ဟော့ဂျ်လန်းဟာ လက်ရှိအချိန်မှာဒဏ်ရာကနေ သက်သာလာပြီဖြစ်သလို လေ့ကျင့်ရေးကွင်းမှာလည်း အကောင်းဆုံးလုပ်ဆောင်နိုင်တဲ့အတွက် အာဆင်နယ် အသင်းနဲ့ပွဲမှာ ယူနိုက်တက်အတွက် စတင်ပါဝင်ခွင့်ရရှိတော့မှာဖြစ်ပါတယ်။
ဒါ့အပြင် နွေရာသီအပြောင်းအရွှေ့နောက်ဆုံးနေ့ရက်မှာ ခေါ်ယူထားတဲ့ နောက်ခံလူ ရယ်ဂီလွန်နဲ့ ဂိုးသမား ဘာယင်းဒယ်တို့ဟာ အာဆင်နယ်အသင်းနဲ့ ပွဲအတွက် အသင်းလူစာရင်းမှာပါဝင်မယ်လို့ နည်းပြ အဲရစ်တန် ဟတ်က ပြောခဲ့တာပါ။
အဲရစ်တန်ဟတ်က “ရယ်ဂီလွန်က အတွေ့အကြုံရှိတဲ့ကစားသမားဖြစ်ပြီး အသင်းကြီးတွေမှာ ကစားခဲ့တာပါ။ သူ့မှာ အလွန်ကောင်းမွန်တဲ့ မှတ်တမ်းတွေရှိပြီး သူ့ကို ရရှိခဲ့တဲ့အတွက် ကျနော်ပျော်ရွှင်ပါတယ်။ ဂိုးသမား ဘာယင်းဒယ်ကလည်း အသင်းရဲ့လူစာရင်းမှာ ပါဝင်မှာပါ။ အခုကျနော်တို့မှာ တောင့်တင်းတဲ့ ဂိုးသမား အစုအဖွဲ့ရှိနေပြီဖြစ်ပြီး သူရောက်လာတာက ကျနော်တို့အတွက် ကောင်းပါတယ်”လို့ ပြောခဲ့တာဖြစ်ပါတယ်။
ယူနိုက်တက်အသင်းဟာ နွေရာသီအပြောင်းအရွှေ့နောက်ဆုံးနေ့မှာ ရယ်ဂီလွန်၊ဘာယင်းဒယ်တို့အပြင် အမ်ရာဘတ်နဲ့ နောက်ခံလူဟောင်း အီဗန်စ်တို့ကိုလည်း ခေါ်ယူနိုင်ခဲ့တာပါ။ ယူနိုက်တက်အသင်းဟာ အာဆင်နယ်အသင်းနဲ့ပွဲမတိုင်ခင် ပရီးမီးယားလိဂ် ၃ ပွဲကစားအပြီးမှာ ၂ ပွဲနိုင်၊ ၁ ပွဲရှုံးရလဒ် ထွက်ပေါ်ထားပါတယ်။
Source:ChannelNewsAsia
- By CNI
- Category: အားကစား
- Hits: 720
CNI Sport News
၂၀၂၃ ခုနှစ်၊ စက်တင်ဘာ ၂
ဘာစီလိုနာအသင်းဟာ အသလက်တီကိုအသင်း တိုက်စစ်မှူး ဂျာအိုဖီးလစ်ကို အခုနှစ် ဘောလုံးရာသီအကုန်ထိ အငှားနဲ့ ခေါ်ယူလိုက်ပြီး အပြီးသတ် ဝယ်ယူခွင့် မပါဝင်ဘူးလို့ သိရပါတယ်။
ပြီးခဲ့တဲ့ ဇန်နဝါရီလ အပြောင်းအရွှေ့က ချယ်လ်ဆီးအသင်းမှာ အငှားလာရောက်ကစားခဲ့တဲ့ ဂျာအိုဖီးလစ်ဟာ သူ့ကို လန်ဒန်ကလပ်က အပြီးသတ် မခေါ်ယူခဲ့တာကြောင့် အသလက်တီကိုအသင်းထံ ပြန်လာရတာပါ။
ပေါ်တူဂီကစားသမားဟာ အသလက်တီကိုအသင်းမှာ နည်းပြ ဆီမြွန်နီနဲ့ ဆက်ဆံရေး အဆင်မပြေတဲ့အတွက် အခုနှစ် ဘောလုံးရာသီမှာ အသင်းအတွက် တစ်ပွဲမှ ပါဝင်မကစားခဲ့ရဘဲ အရန်ကစားသမားအဖြစ်သာ ရှိခဲ့တာ ဖြစ်ပါတယ်။
အဲ့ဒါကြောင့် ဂျာအိုဖီးလစ်ဟာ နွေရာသီ အပြောင်းအရွှေ့ နောက်ဆုံးနေ့မှာ သူကစားချင်နေတဲ့ ဘာစီလိုနာ အသင်း ထံ အငှားနဲ့ ပြောင်းရွှေ့လာခဲ့တာပါ။
ဂျာအိုဖီးလစ်ဟာ အခုရာသီ အစောပိုင်းက ဖာဘရီဇီယိုရိုမန်နိုနဲ့ ပြုလုပ်ခဲ့တဲ့ အင်တာဗျူးမှာ ဘာစီလိုနာက သူ့ရဲ့ ပထမဆုံး ရွေးချယ်မှုဖြစ်ပြီး ဒီအသင်းထံ ပြောင်းရွှေ့ချင်တယ်လို့ ပြောထားခဲ့တာ ဖြစ်ပါတယ်။
အသလက်တီကိုမှာ ဂျာအိုဖီးလစ် ကစားနေစဉ်
အဲ့ဒါကြောင့် ဘာစီလိုနာအသင်းဟာ ဂျာအိုဖီးလစ်ရဲ့ အပြောင်းအရွှေ့ကို ကြေညာချိန်မှာ သူ့အိပ်မက်တွေ အမှန် တကယ် ဖြစ်လာပြီလို့ ရေးသားခဲ့တာပါ။
၂၀၁၉ ခုနှစ်က ဘင်ဖီကာအသင်းကနေ ပေါင် ၁၁၄ သန်းနဲ့ ရောက်ရှိလာခဲ့တဲ့ ဂျာအိုဖီးလစ်ဟာ အသလက်တီကို အသင်းအတွက် ၁၃၁ ပွဲ ပါဝင်ကစားခဲ့ပြီး ၃၄ ဂိုးသွင်းယူကာ ၁၈ ဂိုးဖန်တီးနိုင်ခဲ့ပါတယ်။
ဘာစီလိုနာအသင်းဟာ အပြောင်းအရွှေ့ နောက်ဆုံးနေ့မှာ ဂျာအိုဖီးလစ်နဲ့အတူ မန်စီးတီး အသင်းနောက်ခံလူ ကန်ဆယ်လိုကိုလည်း ရာသီအကုန်ထိ အငှားနဲ့ ခေါ်ယူနိုင်ခဲ့တယ်လို့ ကြေညာခဲ့ပါတယ်။
ဘာစီလိုနာအသင်းဟာ စက်တင်ဘာ ၃ ရက်မှာ စပိန်လာလီဂါပွဲစဉ်အဖြစ် အိုဆာဆူနာအသင်းနဲ့ ယှဉ်ပြိုင်ရမှာ ဖြစ်ပြီး ဒီပွဲမှာ ဂျာအိုဖီးလစ်နဲ့ ကန်ဆယ်လိုတို့ ပွဲဦးထွက်အဖြစ် ပါဝင်ဖွယ်ရှိနေတာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 328
CNI Sport News
၂၀၂၃ ခုနှစ်၊ စက်တင်ဘာ ၂
ယူနိုက်တက်အသင်းတိုက်စစ်မှူး ဂရင်းဝုဒ်ဟာ စပိန်လာလီဂါကလပ် ဂီတာဖေးအသင်းထံ အခုနှစ် ဘောလုံးရာသီအကုန်ထိ အငှားနဲ့ ပြောင်းရွှေ့ခဲ့ပြီဖြစ်ပါတယ်။
ဂရင်းဝုဒ်ဟာ နွေရာသီအပြောင်းအရွှေ့နောက်ဆုံးနေ့မှာ လာဇီယိုအသင်းထံ ပြောင်းရွှေ့ဖို့ နီးစပ်ခဲ့ပေမယ့် အပြောင်းအရွှေ့ပျက်ပြယ်ခဲ့တာကြောင့် ဂီတာဖေးအသင်းထံ ပြောင်းရွှေ့ဖို့ ဖြစ်လာခဲ့ရတာပါ။ ဂရင်းဝုဒ်ရဲ့ အပြောင်းအရွှေ့ကို ကြေညာချိန်မှာ ဂီတာဖေးအသင်းပရိသတ်တွေဟာ အားကစားကွင်းအပြင်ဘက်မှာ အောင်ပွဲခံနေကြတာလည်းဖြစ်ပါတယ်။ ဂရင်းဝုဒ်ဟာ ဂီတာဖေးအသင်းနဲ့ စာချုပ်ကုန်ဆုံးချိန်မှာတော့ ယူနိုက်တက်အသင်းထံ ပြန်လာရမယ်လို့ သတင်းတွေမှာ ဖော်ပြထားတာပါ။
အသက် ၂၁ နှစ်အရွယ်ရှိ ကစားသမားဟာ စွဲချက်တင်ခံထားရတဲ့ အမှုတွေအားလုံးကနေ ဖေဖော်ဝါရီလက လွတ်မြောက်ခဲ့ပေမယ့် အသင်းအတွင်းပိုင်းမှာ စုံစမ်းစစ်ဆေးမှုတွေပြုလုပ်ခံရပြီးနောက်(၆)လအကြာမှာ နှစ်ဦးသဘောတူညီမှုနဲ့ ထွက်ခွာမယ်လို့ ယူနိုက်တက်အသင်းက ကြေညာချက်ထုတ်ပြန်ခဲ့ပါတယ်။ ယူနိုက်တက် အသင်းရဲ့ကြေညာချက်ထွက်လာအပြီးမှာ ဂရင်းဝုဒ်ကို ခေါ်ယူနိုင်ဖို့အတွက် အသင်းအများအပြားက ချိတ်ဆက်မှု တွေပြုလုပ်ခဲ့ပေမယ့် အပြောင်းအရွှေ့မဖြစ်ခဲ့ပါဘူး။
ဒါပေမယ့် အပြောင်းအရွှေ့နောက်ဆုံးနေ့မှာ ဂီတာဖေးအသင်းက အငှားစာချုပ်နဲ့ ခေါ်ယူနိုင်ခဲ့တာပါ။ ဂီတာဖေး အသင်းဟာ ဂရင်းဝုဒ်အတွက် ယူနိုက်တက်အသင်းကို အငှားခေါ်ယူကြေးပေးရမှာမဟုတ်ပေမယ့် ကစားသမားရဲ့ လုပ်အားခအနည်းငယ်ကိုတော့ ပေးချေရမှာဖြစ်ပါတယ်။
ယူနိုက်တက်အသင်းက “ဒီအပြောင်းအရွှေ့က ဂရင်းဝုဒ်ရဲ့ ကစားသမားဘဝကို ပြန်ပြီးတည်ဆောက်နိုင်မှာပါ။ ဒီ အကူးအပြောင်းကာလအတွင်းမှာ ကလပ်အနေနဲ့ ဂရင်းဝုဒ်နဲ့ သူ့ရဲ့မိသားစုကို ဆက်လက်ပြီး ထောက်ပံ့ပေးသွား ဦးမှာပါ” လို့ ပြောခဲ့တာပါ။
အသက် ၁၇ နှစ်အရွယ် ၂၀၁၉ ခုနှစ်မှာ ယူနိုက်တက်အသင်းကြီးအတွက် စတင်ပွဲထွက်ခွင့်ရခဲ့တဲ့ ဂရင်းဝုဒ်ဟာ ပွဲပေါင်း ၁၂၉ ပွဲပါဝင်ကစားခဲ့ပြီး ၃၅ ဂိုးသွင်းယူခဲ့တာပါ။ ဂရင်းဝုဒ်နဲ့ ယူနိုက်တက်အသင်းတို့ ချုပ်ဆိုထားတဲ့ စာချုပ် ဟာ ၂၀၂၅ ခုနှစ်အထိ သက်တမ်းရှိနေတာဖြစ်ပါတယ်။
Source:BBC
- By cni
- Category: အားကစား
- Hits: 619
CNI Sport News
၂၀၂၃ ခုနှစ်၊ စက်တင်ဘာ ၁
ဥရောပဘောလုံးအဖွဲ့ချုပ်(UEFA) ဥက္ကဋ္ဌ ဆက်ဖာရင်က ဥရောပပြိုင်ပွဲတွေမှာ ဆော်ဒီကလပ်အသင်းတွေ ဝင်ရောက်ယှဉ်ပြိုင်နိုင်တယ်ဆိုပြီး ထွက်ပေါ်နေတဲ့ ထင်ကြေးတွေကို ငြင်းပယ်သွားခဲ့ပါတယ်။
ဆက်ဖာရင်က “ဥရောပအသင်းတွေသာ ချန်ပီယံလိဂ်၊ယူရိုပါလိဂ်နဲ့ ယူရိုပါကွန်းဖရန့်လိဂ်ပြိုင်ပွဲတွေမှာ ဝင်ရောက် ယှဉ်ပြိုင်နိုင်ပါတယ်။ ပြီးတော့ ဥရောပဘောလုံးအဖွဲ့ချုပ်တွေပဲ အိမ်ရှင်အဖြစ်လျှောက်ထားနိုင်ပါတယ်။ ကျနော် တို့ဟာ စည်းမျဉ်းတွေအားလုံးပြောင်းရမယ့် အရာကိုလုပ်သွားမှာမဟုတ်ပါဘူး” လို့ L'Equipe ကို ပြောခဲ့တာပါ။
ဆော်ဒီကလပ်အသင်းတွေဟာ နွေရာသီအပြောင်းအရွှေ့မှာ နေမာ၊ဘန်ဇီမာ၊မာနေး၊ မာရက်ဇ်အစရှိတဲ့ ကစားသမားတွေကို ခေါ်ယူပြီး လိဂ်ကို ကမ္ဘာ့အဆင့်ဝင်နိုင်ဖို့ ပစ်မှတ်ထားနေတာဖြစ်ပါတယ်။
အဲဒါကြောင့် ဆော်ဒီကလပ်အသင်းတွေဟာ အနာဂတ်မှာ ချန်ပီယံလိဂ်ဝင်ရောက်ယှဉ်ပြိုင်ခွင့်ရဖို့အတွက် မျှော်လင့်နေကြ ပေမယ့် ဆက်ဖာရင်ကတော့ ဒါတွေကို ပယ်ချသွားခဲ့တာပါ။ ဒါ့အပြင် ဆော်ဒီလိဂ်ဟာ တရုတ်နဲ့ ပုံစံချင်း တူညီတယ်လို့လည်း ပြောခဲ့ပါတယ်။
ဆက်ဖာရင်က “ဆော်ဒီလိဂ်ရဲ့လုပ်ဆောင်မှုတွေဟာ ကျနော်တို့ကို ခြိမ်းခြောက်နေတာမဟုတ်ပါဘူး။ တရုတ် နိုင်ငံတုန်းကလည်း ဒီလိုမျိုးပုံစံချင်းတူညီတဲ့ ချဉ်းကပ်မှုမျိုးကို မြင်တွေ့ခဲ့ရပါတယ်။ သူတို့ဟာ ကစားသမား ဘဝအဆုံးသတ်တော့မယ့်သူတွေကို ငွေကြေးအများကြီးပေးပြီး ခေါ်ယူခဲ့ပါတယ်။ ဒီလိုတွေကြောင့် တရုတ် ဘောလုံးလောကဟာ ဖွံ့ဖြိုးလာခြင်းမရှိသလို ကမ္ဘာ့ဖလားခြေစစ်ပွဲတောင် မအောင်မြင်တော့ပါဘူး။ ဒါတွေက မှန်ကန်တဲ့နည်းလမ်းမဟုတ်ပါဘူး” လို့ ပြောခဲ့တာပါ။
တရုတ်စူပါလိဂ်ဟာ အောင်မြင်ခြင်းမရှိခဲ့ပေမယ့် ဆော်ဒီပရိုလိဂ်ကတော့ သူတို့နဲ့ပုံစံချင်းမတူဘဲ ရေရှည် ရင်းနှီး မြှုပ်နှံနိုင်ဖို့ စီစဉ်ထားတာကြောင့် ကွဲပြားခြားနားမှုရှိတယ်လို့ ဆော်ဒီလိဂ်အကြီးအကဲတွေက ပြောထားပါတယ်။
- By CNI
- Category: အားကစား
- Hits: 540
CNI Sport News
၂၀၂၃ ခုနှစ်၊ စက်တင်ဘာ ၁
အာဂျင်တီးနားအသင်းဟာ ၂၀၂၆ ကမ္ဘာ့ဖလားပြိုင်ပွဲ(တောင်အမေရိကဇုန်)ခြေစစ်ပွဲကစားမယ့် လူစာရင်းမှာ မက်ဆီကို ရွေးချယ်ခဲ့တဲ့အတွက် အင်တာမိုင်ယာမီအသင်းဟာ မေဂျာလိဂ် အဓိကပွဲစဉ်တွေကို သူတို့ရဲ့ အသင်း ခေါင်းဆောင် မပါဝင်ဘဲ ကစားရတော့မှာ ဖြစ်ပါတယ်။
မက်ဆီဟာ အင်တာမိုင်ယာမီ အသင်းကို အလွတ်နဲ့ ပြောင်းရွှေ့လာပြီးကတည်းက ခြေစွမ်းပြသနေတာဖြစ်ပြီး အသင်းအတွက် ကစားခဲ့တဲ့ ၉ ပွဲမှာ ၁၁ ဂိုး သွင်းယူထားတာပါ။
အသက် ၃၆ နှစ်အရွယ်ရှိ တိုက်စစ်မှူးဟာ အင်တာမိုင်ယာမီ အသင်းကို လိဂ်ဖလား ချန်ပီယံဆု ရရှိအောင် ဦးဆောင်နိုင်ခဲ့ပြီးနောက် မေဂျာလိဂ် ပလေးအော့ဖ်အဆင့် ယှဉ်ပြိုင်ခွင့်ရရှိအောင် ဦးဆောင်ပေးနိုင်ဖို့ မျှော်လင့်နေတာ ဖြစ်ပါတယ်။
ဒါပေမယ့် အင်တာမိုင်ယာမီ အသင်းဟာ မက်ဆီ မပါဝင်ဘဲ လာမယ့်ပွဲ အနည်းငယ်ကို ကစားရတော့မှာပါ။
အာဂျင်တီးနားအသင်းဟာ ၂၀၂၆ ကမ္ဘာ့ဖလား ခြေစစ်ပွဲတွေအဖြစ် အီကွေဒေါ၊ ဘိုလီးဗီးယား အသင်းတို့နဲ့ ကစားရမှာဖြစ်ပြီး ဒီပွဲတွေအတွက် အသင်းခေါင်းဆောင် မက်ဆီကို ရွေးချယ်ခဲ့တာ ဖြစ်ပါတယ်။
အာဂျင်တီးနားအသင်း လူစာရင်းကို တွေ့ရစဉ်
မက်ဆီဟာ မကြာခင်မှာ အာဂျင်တီးနားအသင်းနဲ့ သွားရောက် ပူးပေါင်းရမှာ ဖြစ်တဲ့အတွက် စက်တင်ဘာ ၄ ရက်မှာ ကစားမယ့် လော့စ်အိန်ဂျလိစ်အသင်းနဲ့ ပွဲစဉ်မှာ အင်တာမိုင်ယာမီအသင်းအတွက် ပါဝင်နိုင်တော့မှာ မဟုတ်ပါဘူး။
ဒါ့အပြင် စပို့တင်းကန်ဆပ်အသင်းနဲ့ စက်တင်ဘာ ၁၀ ရက်မှာ ကစားမယ့်ပွဲကိုလည်း လွဲချော်နိုင်ဖွယ် ရှိတယ်လို့ သိရတာပါ။
ဒါပေမယ့် မက်ဆီဟာ အတ္တလန်တာအသင်းနဲ့ ကစားမယ့်ပွဲမှာတော့ အင်တာမိုင်ယာမီ အသင်းအတွက် ပြန်လည် ပါဝင်နိုင်မှာ ဖြစ်ပါတယ်။ အင်တာမိုင်ယာမီ အသင်းဟာ နောက်ဆုံး ကစားခဲ့တဲ့ မေဂျာလိဂ် ၂ ပွဲမှာ ၁ ပွဲနိုင်၊ ၁ ပွဲ သရေကျခဲ့ပြီး ရှုံးပွဲဆက်နေမှုကို ရပ်တန့်နိုင်ခဲ့တာပါ။
အင်တာမိုင်ယာမီအသင်းဟာ မေဂျာလိဂ်ပြိုင်ပွဲ အရှေ့ပိုင်းဇုန်မှာ ရမှတ် ၂၂ မှတ်နဲ့ အဆင့် ၁၄ နေရာမှာ ရပ်တည် နေပြီး လက်ကျန်ပွဲတွေမှာ နိုင်ပွဲရယူနိုင်မှသာ ပလေးအော့ဖ်အဆင့် ယှဉ်ပြိုင်နိုင်ဖို့အတွက် မျှော်လင့်လို့ရမှာ ဖြစ်ပါတယ်။
Source: Goal
- By CNI
- Category: အားကစား
- Hits: 448
၂၀၂၃ စက်တင်ဘာ ၁
CNI Sport News
လီဗာပူးလ်အသင်းဟာ ဘိုင်ယန်မြူးနစ်အသင်းရဲ့ ကွင်းလယ်ကစားသမား ဂရာဗန်ဘတ်ချ်ကို ယူရိုသန်း ၄၀ နဲ့ ခေါ်ယူဖို့ သဘောတူညီမှုရရှိသွားပြီဖြစ်ပါတယ်။
အသက် ၂၁ နှစ်အရွယ်ရှိ နယ်သာလန်ကစားသမားဟာ ပြီးခဲ့တဲ့နှစ်ကမှ အေဂျတ်စ်အသင်းကနေ ဘိုင်ယန် မြူးနစ်အသင်းထံ ပြောင်းရွှေ့လာခဲ့ပေမယ့် ပွဲကစားခွင့်ရဖို့ ရုန်းကန်ခဲ့ရတာပါ။
ဂရာဗန်ဘတ်ချ်ဟာ အခုနှစ် ဘောလုံးရာသီမှာလည်း ဘိုင်ယန်မြူးနစ်အသင်းအတွက် လူစားဝင်ကစားသမားအဖြစ် ၁ ပွဲသာ ပါဝင် ကစား ခဲ့ရတာဖြစ်ပါတယ်။ လီဗာပူးလ်အသင်းဟာ နွေရာသီအပြောင်းအရွှေ့ကာလတစ်လျှောက် ဂရာဗန်ဘတ်ချ်ကို ချိတ်ဆက်ခဲ့ပြီး အပြောင်းအရွှေ့နောက်ဆုံးနေ့မှ ခေါ်ယူဖို့ သဘောတူညီမှုရရှိခဲ့တာပါ။
လီဗာပူးလ်အသင်းဟာ အခုနှစ်ဘောလုံးရာသီမှာ အဓိက ကွင်းလယ်ကစားသမားတွေဖြစ်တဲ့ ဟန်ဒါဆန်၊ ဖာဘင်ဟို၊ မီလ်နာ၊ကီတာနဲ့ ချိန်ဘာလိန်တို့ အသင်းကနေ ထွက်ခွာသွားပြီးနောက် ကွင်းလယ်ပိုင်းကို ဖြည့်တင်းနိုင်ဖို့အတွက် အဓိကထားလုပ်ဆောင်ခဲ့ပါတယ်။ အဲဒါကြောင့် အန်ဖီးလ်ကလပ်ဟာ အခု နွေရာသီ အပြောင်းအရွှေ့မှာ ကွင်းလယ်ကစားသမားတွေဖြစ်တဲ့ မက်အယ်လစ္စတာ၊ ဆိုဘော့စ်လိုင်းနဲ့ အန်ဒိုတို့ကို ခေါ်ယူခဲ့တာပါ။
ဂရာဗန်ဘတ်ချ်ဟာ အေဂျတ်စ်အကယ်ဒမီကနေ ထွက်ပေါ်လာတာဖြစ်ပြီး ၂၀၁၈ ခုနှစ်၊ စက်တင်ဘာလက PSV အသင်းနဲ့ ကစားခဲ့တဲ့ပွဲစဉ်မှာ ပွဲဦးထွက်အဖြစ် ပါဝင်ခဲ့ပါတယ်။ နယ်သာလန်ကစားသမားဟာ ပြီးခဲ့တဲ့နှစ်က ဘိုင်ယန်မြူးနစ်အသင်းထံ မပြောင်းရွှေ့ခင် အေဂျတ်စ်အသင်းအတွက် ၁၀၃ ပွဲကစားခဲ့ပြီး ၁၂ ဂိုးသွင်းယူကာ ဆုဖလားအောင်မြင်မှုတွေ အများအပြားရယူနိုင်ခဲ့ပါတယ်။ ဂရာဗန်ဘတ်ချ်ဟာ ဘိုင်ယန်မြူးနစ်အသင်းအတွက် ၃၄ ပွဲကစားခဲ့ပြီး ၁ ဂိုးသွင်းယူနိုင်ခဲ့တာပါ။
လီဗာပူးလ်အသင်းဟာ အခုနှစ် ပရီးမီးယားလိဂ်ပြိုင်ပွဲ ၃ ပွဲကစားအပြီးမှာ ရမှတ် ၇ မှတ်နဲ့ အဆင့် ၄ နေရာမှာ ရပ်တည်နေပြီး ပွဲစဉ် ၄ အဖြစ် အက်စတွန်ဗီလာအသင်းနဲ့ ယှဉ်ပြိုင်ရမှာဖြစ်ပါတယ်။
Source:BBC
Page 209 of 373
Connect with us
