CNI Sport News
၂၀၂၄ ခုနှစ်၊ ဇူလိုင် ၂၂
ယူနိုက်တက်အသင်းဟာ တိုက်စစ်မှူး ဂရင်းဝုဒ်ကို မာဆေးလ်အသင်းထံ ရောင်းချလို့ ရရှိတဲ့ ပြောင်းရွှေ့ကြေးကို အမျိုးသမီးပရဟိတအဖွဲ့တွေထံ လှူဒါန်းဖို့ တိုက်တွန်းခံနေရပါတယ်။
ဂရင်းဝုဒ်ဟာ ပြီးခဲ့တဲ့ရက်ပိုင်းကမှ မာဆေးလ်အသင်းထံ ပေါင်သန်း ၃၀ နဲ့ ၅ နှစ် စာချုပ်ချုပ်ဆိုကာ ပြောင်းရွှေ့ခဲ့ ပြီး ယူနိုက်တက်အသင်းမှာ နှစ်ကာလရှည်ကြာရှိခဲ့တာကို အဆုံးသတ်ခဲ့တာပါ။
ဂရင်းဝုဒ်ဟာ ၂၀၂၂ ခုနှစ်၊ ဇန်နဝါရီက ဖမ်းဆီးခံခဲ့ရပြီးနောက် ယူနိုက်တက်အသင်းအတွက် ပါဝင်ကစားရခြင်း မရှိတော့ဘဲ ပြီးခဲ့တဲ့ရာသီက လာလီဂါကလပ် ဂီတာဖေးအသင်းမှာ အငှားသွားရောက် ကစားခဲ့တာ ဖြစ်ပါတယ်။
ဂရင်းဝုဒ်ရဲ့ မာဆေးလ်အသင်း အပြောင်းအရွှေ့အပေါ် မာဆေးလ်မြို့တော်ဝန် အပါအဝင် ပရိသတ်အချို့က ဝေဖန်မှုတွေ ပြုလုပ်ခဲ့ကြတာပါ။
အိမ်တွင်း အကြမ်းဖက်မှု ဖြစ်ရပ်တွေအပေါ် ကာကွယ်ပေးသူဖြစ်တဲ့ ဒေးဗစ်ချဲလ်လန်ကလည်း ဒီအပြောင်းအရွှေ့ ကို ပြစ်တင်ရှုတ်ချခဲ့ပြီး ဒီရောင်းချမှုကနေ ရရှိတဲ့ ငွေကြေးတွေကို အမျိုးသမီးပရဟိတအဖွဲ့တွေထံ လှူဒါန်းဖို့ တိုက်တွန်းခဲ့ပါတယ်။
ဂရင်းဝုဒ်ကို တွေ့ရစဉ်
ဒေးဗစ်ချဲလ်လန်က “သူတို့ဟာ လွယ်လွယ်ကူကူနဲ့ ပြုလုပ်လို့ရတဲ့ အရာဖြစ်တဲ့ ကစားသမားကို ထွက်ခွာခွင့် မပေးခဲ့ပါဘူး။ သူတို့ဟာ ကိုယ်ပိုင်ဘဏ္ဍာရေး လိုအပ်ချက်တွေအတွက် ကစားသမားကို ဆက်ထိန်းသိမ်းခဲ့ပြီး အမျိုးသမီးတွေထက် သူတို့အတွက်ကိုပဲ ဦးစားပေးခဲ့ပါတယ်။ သူတို့ဟာ အမျိုးသမီးပရဟိတအဖွဲ့တွေထံလည်း လှူဒါန်းမှု မပြုလုပ်သေးပါဘူး။ ဒါက ယူနိုက်တက်လို ကလပ်အတွက် ဆိုးရွားပါတယ်”လို့ ပြောခဲ့တာပါ။
ဂရင်းဝုဒ်ကတော့ မာဆေးလ်အသင်းရဲ့ ကစားသမားသစ်အဖြစ် မိတ်ဆက်ခံရအပြီးမှာ သူ့ရဲ့အတိတ်ကိုထားခဲ့ကာ သူ့ရဲ့လက်တွဲဖော်၊ သမီးဖြစ်သူနဲ့အတူ အနာဂတ်အတွက် ရှေ့ဆက်မယ်လို့ ပြောခဲ့ပါတယ်။
မာဆေးလ်အသင်းနဲ့အတူ လေ့ကျင့်မှုတွေ ပြုလုပ်နေတဲ့ ဂရင်းဝုဒ်ဟာ သူ့အတွက်၂ နှစ်အကြာမှ ပထမဆုံး အင်္ဂလန်မှာ ကစားမယ့်ပွဲစဉ်ဖြစ်တဲ့ ဆန်းဒါးလန်းအသင်းနဲ့ ခြေစမ်းပွဲစဉ်မှာ မာဆေးလ်အသင်းအတွက် ပါဝင်ဖွယ်ရှိနေတာ ဖြစ်ပါတယ်။
Source: Dailymail
