CNI News

၂၀၂၄ ခုနှစ်၊ ဒီဇင်ဘာ ၅

အမျိုးသားစည်းလုံးညီညွတ်ရေးနှင့်ငြိမ်းချမ်းရေး ဖော်ဆောင်မှုညှိနှိုင်းရေးကော်မတီ(NSPNC)နှင့် နိုင်ငံရေးပါတီများ တွေ့ဆုံ၍ ဆွေးနွေးကြကြောင်း သိရသည်။ 

အဆိုပါ တွေ့ဆုံ ဆွေးနွေးပွဲကို နေပြည်တော်မှာ ကျင်းပနေခြင်းဖြစ်ပြီး ၂၀၂၄ ခုနှစ်၊ ဒီဇင်ဘာ ၅ ရက်မှ ၆ ရက်အထိ ဆွေးနွေးမည်ဖြစ်သည်။

ဆွေးနွေးပွဲသို့ နိုင်ငံရေးပါတီများဘက်က ပြည်ထောင်စုရွေးကောက်ပွဲကော်မရှင်(UEC)မှ မှတ်ပုံတင် ကျထားသော ပါတီများဖြစ်ပြီး ပါတီ ၅၁ ပါတီတက်ရောက်ခဲ့ကြောင်း သိရသည်။

ဒီဇင်ဘာ ၅ ရက်နေ့တွင် အိန္ဒိယဖက်ဒရယ်စနစ်၊ ဒီမိုကရေစီနှင့်ဖက်ဒရယ် အခြေခံသည့် ပြည်ထောင်စု တည်ဆောက်ရေး ဆိုသော အချက် ၂ ချက်ကို ဆွေးနွေးကြကြောင်း၊ ဒီဇင်ဘာ ၆ ရက်နေ့တွင် ရွေးကောက်ပွဲနှင့် လုံခြုံရေး၊ အထွေထွေ တို့ကို ဆွေးနွေးကြမည်ဖြစ်ကြောင်း သိရသည်။

CNI News

၂၀၂၄ ခုနှစ်၊ ဒီဇင်ဘာ ၅

မြန်မာ့ရေပိုင်နက်အတွင်းသို့ ဝင်ရောက်လာသည့် ထိုင်းငါးဖမ်းစက်လှေကို ဖမ်းဆီးထားခြင်းနှင့်ပတ်သက်၍ သေချာမဖြေရှင်းနိုင်ပါက ထိုင်းနှင့်မြန်မာကြား သံတမန်ဆက်ဆံရေး ဆိုးဝါးလာနိုင်သလားဆိုသည့်အပေါ် နိုင်ငံရေးအကဲခတ်များကြား မေးခွန်းထုတ်နေကြသည်။

မြန်မာရေပိုင်နက်ထဲ ဝင်ရောက်လာခြင်းကြောင့် မြန်မာရေတပ်မှ ဖမ်းဆီးထားသည့် ထိုင်းငါးဖမ်း စက်လှေသမား ၄ ဦးကို ပြန်လွှတ်ပေးရန် မြန်မာအာဏာပိုင်များနှင့် ညှိနှိုင်းနေပြီး ၎င်းတို့မှာ လုံခြုံဘေးကင်းစွာ ရှိနေသည်ဟု ထိုင်း ဝန်ကြီးချုပ် ပေတုန်တန်က ဒီဇင်ဘာ ၃ ရက်နေ့က သတင်းထောက်များကို ပြောကြားခဲ့သည်။

ထိုပြဿနာအား မြန်မာဘက်မှ သေချာစွာ မဖြေရှင်းနိုင်ပါက ထိုင်းနှင့် မြန်မာအကြား ပဋိပက္ခများ တဆင့် တိုးလာ နိုင်သည်ဟု ယူဆကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

၎င်းက “အခုကတော့ ထိုင်းမှာတက်လာတဲ့ အစိုးရသစ်နဲ့ မြန်မာစစ်ကောင်စီက ဆက်ဆံရေးကတော့ တော်တော် လေး အဖုအထစ်တွေ များလာတယ်။ တော်တော်လေးလည်း ပြောစရာဆိုစရာတွေ ရှိလာပါတယ်။ အဲဒီတော့ တလျှောက်လုံး စစ်ကောင်စီကို ထောက်ခံလာတဲ့ ထိုင်းစစ်အစိုးရနဲ့ အခုက သက်ဆင် မျိုးနွယ်စုရဲ့သမီး ဝန်ကြီးချုပ် ဖြစ်လာတဲ့အခါမှာ သိသာထင်ရှားတဲ့ အမြင်မတူမှုတွေ သဘောထား မတိုက်ဆိုင်မှုတွေ အဲဒီကနေ အခု ပဋိပက္ခ တွေ ဖြစ်လာတယ်လို့ ယူဆပါတယ်။ အဲဒါကြောင့် ဒါတွေနဲ့ပတ်သက်ပြီးတော့ သေချာစွာ မထိန်းချုပ်ရင်၊ တရား မျှတစွာ သင့်တင့်လျောက်ပတ်စွာ ဖြေရှင်းမှုမလုပ်ရင် ထိုင်းနဲ့ မြန်မာနိုင်ငံ စစ်ကောင်စီ ကြားထဲမှာ ပဋိပက္ခတွေက တဆင့် တိုးလာစရာရှိတယ်လို့ ယူဆပါတယ်”ဟု ပြောသည်။

နိုဝင်ဘာ ၃၀ ရက်နေ့က ထိုင်းငါးဖမ်းစက်လှေ တစ်စီးသည် မြန်မာနိုင်ငံ၊ ကော့သောင်းမြို့ မြန်မာ့ရေပိုင်နက် အတွင်းသို့ ရောက်ရှိလာသည်ကို မြန်မာစစ်ရေယာဉ်မှ စစ်ဆေးတွေ့ရှိသဖြင့် ဖမ်းဆီးခဲ့ခြင်းဖြစ်သည်။

ထိုစက်လှေအတွင်းမှာ မြန်မာနိုင်ငံသား ကျား ၂၇ ဦးနှင့် ထိုင်းနိုင်ငံသား ကျား ၄ ဦးတို့ကို ဖမ်းဆီးရမိခဲ့ကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဒီဇင်ဘာ ၂ ရက်နေ့က ထုတ်ပြန် ပြောကြားခဲ့သည်။

ယခုကိစ္စသည် နှစ်နိုင်ငံအကြား ဆက်ဆံရေး တင်းမာပျက်ပြားရန်အထိ မမြင်သေးကြောင်း ငြိမ်းချမ်းရေး လုပ်ငန်း စဉ်တွင် ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

နစက ပြောခွင့်ရ ဗိုလ်ချုပ်ဇော်မင်းထွန်းကို တွေ့ရစဉ်

၎င်းက “ဒီကိစ္စကတော့ တင်းမာပြီးတော့မှ ဆက်ဆံရေး ပျက်ပြားသွားဖို့တော့ အခုလောလောဆယ် မမြင်သေး ဘူး။ ထိုင်းဘက်ကလည်း ကိုယ်စားလှယ်တွေ လွှတ်ပြီးတော့မှ SAC နဲ့ ဆွေးနွေးတာရှိတယ်။ နောက် ဒီလအတွင်း မှာပဲ tringle plus ဆိုပြီးတော့မှ သုံးပွင့်ဆိုင် အပေါင်းဆိုပြီးမှ လုပ်ဖို့ သူက ကြိုးစားနေတယ်။ အဲဒီတော့ ဒီဥစ္စာကို တော့ အပျက်မခံသေးဘူးပေါ့။ သို့သော်လည်း တစ်ဖက်ကလည်း ပြည်သူတွေအတွက် သူတို့ တတ်နိုင်သလောက် ပြောပေးရမယ်ထင်တယ်။ ပြီးခဲ့တဲ့ မ‌နေ့တစ်နေ့ကလည်း သံအမတ်ကြီးနဲ့ တွေ့တယ်။ နောက် ထိုင်းသံအမတ် ကလည်း နိုင်ငံခြားရေးဝန်ကြီးဌာနနဲ့ တွေ့တယ်။ အဲဒီတော့ သူတို့ကြိုးစားနေတယ်ပေါ့။ ဒီဥစ္စာ အဖြေ ဘယ်လိုရ မလဲ မသိသေးဘူး” ဟု ပြောသည်။

အဆိုပါ ငါးဖမ်းစက်လှေသည် ထိုင်းနိုင်ငံ၊ ရနောင်းမြို့မှာ နေထိုင်သည့် ထိုင်းနိုင်ငံသား တစ်ဦးပိုင်ဆိုင်ကြောင်း၊ နိုဝင်ဘာ ၂၉ ရက်နေ့ ညနေ ၃ နာရီက ထွက်ခွာလာပြီး မြန်မာ့ရေပိုင်နက်အတွင်းသို ည ၉ နာရီမှာ ရောက်ရှိ၍ ငါးဖမ်းဆီးခဲ့ကြောင်း စစ်ဆေးတွေ့ရှိသည်ဟု ဗိုလ်ချုပ်ဇော်မင်းထွန်းက ပြောသည်။

ထိုနောက် ထိုင်းငါးဖမ်းစက်လှေတွင် လုပ်ကိုင်ကြသူများအနက် ထိုင်းလူမျိုး တစ်ဦးလျှင် တစ်လ လုပ်ခလစာ ထိုင်းဘတ်ငွေ ၁၅၀၀၀ ရပြီး မြန်မာနိုင်ငံသား တစ်ဦးလျှင် တစ်လလုပ်ခလစာ ထိုင်းဘတ်ငွေ ၁၂၀၀၀ ရရှိကြောင်း သိရသည်။

ထိုင်းသတင်းမီဒီယာများကတော့ ထိုင်းငါးဖမ်းစက်လှေ ဖမ်းဆီးခံရမှုတွင် တစ်ဦးသေဆုံးခဲ့ကြောင်း၊ ထိုင်းပိုင်နက် အတွင်း ဖမ်းဆီးခံရခြင်းဖြစ်ကြောင်း ဖော်ပြလျက်ရှိသည်။

သေဆုံးသူမှာ ထိုင်းငါးဖမ်းစက်လှေကို မြန်မာဘက်မှ ပစ်ခတ်ခဲ့ချိန် ရေထဲခုန်ချခဲ့သဖြင့် ရေနစ်သေဆုံးခဲ့ခြင်း ဖြစ်ကြောင်းနှင့် မြန်မာရေပိုင်နက်အတွင်း ဝင်ရောက်ခဲ့သည်မှာ မှန်ကန်ကြောင်း ထိုင်းရေတပ်မှ အတည်ပြုထား သည်။

CNI News

၂၀၂၄ ခုနှစ်၊ ဒီဇင်ဘာ ၅ 

ရခိုင်ပြည်နယ်အတွင်း ဖြစ်ပွားနေသော ပဋိပက္ခများအား ဖြေရှင်းရန်ဆောင်ရွက်ရာတွင် ရခိုင်အဖွဲ့အစည်းများ အနေဖြင့် အချင်းချင်း ပြဿနာများဖြစ်၍မရကြောင်း ရခိုင်ပြည်လွတ်မြောက်ရေးပါတီ (ALP) ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

ရခိုင်ပြည်နယ်သည် လူမျိုးရေးနှင့် ဘာသာရေး ပဋိပက္ခများ ထိလွယ်ရှလွယ်သော သမိုင်းကြောင်းများရှိခဲ့ပြီး ယခုတွင်လည်း စစ်ရေးပဋိပက္ခများ ပြင်းထန်လျက်ရှိနေသည်။

ရခိုင်ပြည်အရေးကို ဆောင်ရွက်ရာတွင် ရခိုင်အဖွဲ့အစည်းများ အချင်းချင်း ရန်ဖြစ်၍မရဘဲ အမြင်သဘောထားများ ကျယ်ပြန့်ရန်လိုအပ်ကြောင်း ရခိုင်ပြည်လွတ်မြောက်ရေးပါတီ(ALP) ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

၎င်းက “ဘယ်အဖွဲ့အစည်း တစ်ခုကမှ ဦးဆောင်ပြီးတော့မှ လုပ်မယ်၊ လုပ်လို့ရမယ်ဆိုတဲ့ စဥ်းစားချက်မျိုးကတော့ မမြင်ရသေးဘူးပေါ့နော်၊ ကိုယ်ကလည်း လုပ်နေတယ်၊ သူကလည်း လုပ်နေတယ် ပြန့်ကြဲပြီးတော့မှ ကိုယ်နိုင်တာ ကိုယ်လုပ်တယ်ဆိုတဲ့ အနေအထားမျိုးပဲရှိတယ်။ ဘယ်အဖွဲ့က စလုပ်မယ်၊ ဘယ်အဖွဲ့က ဦးစီးမယ် စသည်အားဖြင့် ပြောလို့ရတဲ့ အနေအထားမရှိဘူး။ ဒါပေမယ့် တစ်ချိန်ချိန် တစ်နေ့နေ့မှာတော့ အမျိုးသား တစ်ရပ်လုံးနဲ့ဆိုင်တဲ့ ကိစ္စက‌တော့ မပြောမဖြစ် ပြောလာရမှာဖြစ်တယ်၊ အားလုံးက ပါဝင်လာရမှာဖြစ်တယ်၊ အဲတာကြောင့်မို့လို့ ရခိုင် အချင်းချင်း ရန်ဖြစ်လို့မရဘူး၊ ရခိုင်ပြည်အရေးကို ဆွေးနွေးတဲ့အခါမှာ ရခိုင်တွေက မပြောမဖြစ် ပြောလာရမယ်၊ အမြင်သဘောထားတွေ ကျယ်ပြန့်ဖိုလိုတယ်၊ အဲလိုပဲ ကျမ ပြောချင်တယ်လေ၊ အဲလိုပဲ ဆန္ဒရှိတယ်။ အဲဒါကြောင့် မို့လို့ ရခိုင်အရေးကို ဆောင်ရွက်တဲ့အချိန်မှာ ကျမတို့ကတော့ ရခိုင်အချင်းချင်း ရန်မဖြစ်ချင်ဘူး”ဟု ပြောသည်။

ရခိုင်ပြည်နယ်က လမ်းဆုံတစ်နေရာကို တွေ့ရစဉ်

ရခိုင်ပြည်နယ် အကျပ်အတည်းအား ဖြေရှင်းရာတွင် တရုတ်နိုင်ငံသည် နိုင်ငံတကာ အသိုက်အဝန်းနှင့် ပူးပေါင်းဆောင်ရွက်လိုပြီး အပြုသဘောဆောင်သည့် အခန်းကဏ္ဍမှ ပါဝင်ဆောင်ရွက်မည်ဖြစ်ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်းက ၂၀၂၄ ခုနှစ်၊ နိုဝင်ဘာလ ၂၈ ရက်နေ့တွင် ဘေကျင်းမြို့၌ ပြုလုပ်သည့် ပုံမှန်သတင်းစာ ရှင်းလင်းပွဲတွင် ပြောကြားခဲ့သည်။

လက်ရှိ ရခိုင်ပြည်နယ်တွင် စစ်ရေးပဋိပက္ခများ ပြင်းထန်နေသောကြောင့် ပြည်သူလူထု ဒုက္ခရောက်နေကြပြီး ဘင်္ဂါလီများအား စစ်မှုထမ်းခိုင်းခြင်း၊ လက်နက်တပ်ဆင်ပေးခြင်းများ ရှိနေကြောင်း၊ ထိုအခြေအနေများသည် လူမျိုးရေး၊ ဘာသာရေး ပဋိပက္ခများအား ဖန်တီးသလိုဖြစ်နေကြောင်း ရခိုင်အမျိုးသားအဆင့် မူဝါဒရေးရာ ညှိနှိုင်းရေးဆွဲရေးအဖွဲ့ (ANPCC) ညှိနှိုင်းရေးမှူး ဦးခင်မောင်ထွန်းက CNI သတင်းဌာနသို့ ပြောသည်။

၎င်းက “လက်ရှိမှာက ကျနော်တို့ ရခိုင်ရဲ့ အနေအထားက ပြည်သူလူထုက ဒုက္ခတော်တော်ရောက်နေတဲ့ အခြေအနေ ဖြစ်နေပြီ၊ ဗိုလ်မင်းအောင်လှိုင်ရဲ့ စစ်တပ်ကလည်း သူတို့ရဲ့ ရခိုင်ဒေသကို ပြန်လည်သိမ်းပိုက် ရရှိရေးကိုပဲ ကြိုးစားနေတာ၊ ဖြစ်ချင်ရာဖြစ်ပေါ့ဗျာ၊ ကျန်တဲ့လုပ်ငန်း ဘယ်ဟာကိုမှ ထည့်မတွက် တော့ဘူး ပေါ့။ ပြည်သူရဲ့ အကျိုးစီးပွား ပျက်စီးမှာတွေ၊ ဘာတွေ ညာတွေ တစ်ခုမှထည့်မတွက်ဘဲနဲ့ သူတို့သွားချင်တဲ့ လမ်းကြောင်းကိုပဲ သူတို့သွားနေတာ။ တစ်ဖက်က ပြောမယ်ဆိုရင် အဲလမ်းကြောင်းပေါ်မှာ သွားနေတဲ့ အခါ ကျတော့ တစ်ဖက်က ပြန်ကြည့်မယ်ဆိုရင် ဘာသာရေး ပဋိပက္ခ၊ လူမျိုးရေး ပဋိပက္ခ ဆိုတာမျိုးက သူတို့ ကိုယ်တိုင် ဖန်တီးထားတယ်လေ။ ရှေ့မှာလည်း ကျနော်တို့ လုပ်ခဲ့တာတွေရှိတာပေါ့”ဟု ပြောသည်။

AA အလိုမရှိကြောင်း ဆန္ဒပြနေကြစဉ်

လက်ရှိ ရခိုင်ပြည်နယ်တွင် AA နှင့် မြန်မာ့တပ်မတော်တို့ကြား တိုက်ပွဲများ ပြင်းထန်စွာဖြစ်ပွားနေပြီး နေရပ် စွန့်ခွာ ထွက်ပြေးတိမ်းရှောင်နေကြရသူ အများအပြားလည်းရှိလာနေသည်။

ထို့အပြင် လူနေအိမ်များ အပါအဝင် စာသင်ကျောင်းများ၊ ဘုန်းကြီးကျောင်းများ၊ ဘာသာရေးကျောင်းများ၊ ဈေးများ၊ လမ်းတံတားများ ပျက်စီးဆုံးရှုံးနေရသလို စားနပ်ရိက္ခာ၊ ဆေးဝါး၊ စက်သုံးဆီ ပြတ်လပ်မှုများဖြင့် လည်း ရင်ဆိုင်နေကြရသည်။

အလားတူ ၂၀၁၇ ခုနှစ်က ဖြစ်ပွားခဲ့သော ဘင်္ဂါလီအရေးသည်လည်း မဖြေရှင်းနိုင်သေးဘဲ ဖြစ်နေသည်။

CNI News

၂၀၂၄ ခုနှစ်၊ ဒီဇင်ဘာ ၄

ICC ၏ ရှေ့နေချုပ် ကာရင်အေအေခန်က နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို ICC မှ ဖမ်းဝရမ်း ထုတ်ရန် လျှောက်ထားချက်သည် အာဏာကို ဆက်လက်ဆုပ်ကိုင် ထားရေးအတွက် တွန်းအားဖြစ်စေသလား ဆိုကာ စစ်ရေးနှင့်နိုင်ငံရေး အကဲခတ်များကြား မေးခွန်းထုတ်လျက်ရှိနေသည်။ 

ဘင်္ဂါလီများအပေါ် ကျုးလွန်သည့် ရာဇဝတ်မှုများအတွက် တာဝန်ရှိသည်ဟူသော စွပ်စွဲချက်ဖြင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ပေးရန် ICC ၏ ရှေ့နေချုပ် ကာရင်အေအေခန်(Karim Khan)က နိုဝင်ဘာ ၂၇ ရက်နေ့မှာ လျှောက်ထားခဲ့သည်။

ဗိုလ်ချုပ်မှူးကြီး မင်းအောင်လှိုင်အနေဖြင့် အာဏာကို ဆက်လက် ဆုပ်ကိုင်သွားနိုင်ကြောင်း နိုင်ငံရေးလေ့လာသုံး သပ်သူ ဦးသန်းစိုးနိုင်က CNI သတင်းဌာနသို့ ပြောသည်။

နိုင်ငံတကာ ရာဇဝတ်တရားရုံး ICC ၏ရှေ့နေချုပ် Karim Khan ကိုတွေ့ရစဥ်

၎င်းက “ပွင့်ပွင့်လင်းလင်း ပြောရလို့ရှိရှင် အာဏာဆိုတာ မက်မောစရာ ကောင်းတာကိုးဗျ၊ အဲတော့ ဒီဟာတွက် သူက သိက္ခာကျခံ၊ စွပ်စွဲခံပြီးတော့ လုပ်နေတဲ့အခါမှာ အခုလုပ်နေတဲ့ ဖိအားတွေကြောင့် ပိုပြီးတော့ ဖက်တွယ်လာ နိုင်သလား၊ ဘာလားဆိုတာကတော့ ကျနော် နားလည်ချက်ကတော့ ဒီအာဏာကို ဖက်တွယ်ထားမှာပဲ နောက်ဆုံး ချိန်ထိ သေတဲ့ချိန်ထိ သူကြိုးစင် မတက်ရမချင်း သူတော့ ဆုပ်ကိုင်ထားမှာပဲလို့ ကျနော်တော့ နားလည်တယ်။ သူကလည်းသေတဲ့ထိ ဖက်တွယ်သွားမှာပဲ၊ ကျနော်တို့ကလည်း သူ့ကိုဆွဲချနိုင်ဖို့အတွက် မသေမချင်း ကြိုးပမ်းသွား မှာပါပဲ၊ အဲဒီအဓိပ္ပါယ်ပါပဲ၊ အဲဒီအပေါ်မှာ ကျနော်တို့ ပြည်သူလူထု သဘောထားကတော့ မင်းအောင်လှိုင် ပြုတ် အောင် ဘယ်လိုလုပ်ရမလဲဆိုတာကို ဘက်ပေါင်းစုံက စဥ်းစားပြီးတော့ ကျနော်တို့က လုပ်မှာပဲ။ ခုနကလို သူ့ဟာ သူ ယူနီဖောင်းပြောင်းပြောင်း၊ တရုတ်က ‌ထောက်ခံတာ၊ မထောက်ခံတာ အရေးမကြီးဘူးတော့ မဟုတ်ဘူးပေါ့ ဗျာ၊ ဒါတွေကို ထည့်ပြီးတော့ စဥ်းစားမနေဘူးလို့  ကျနော်တို့ ဆိုလိုတဲ့ သဘောပါဗျ” ဟု ပြောသည်။

မြန်မာနိုင်ငံသည် ICC အဖွဲ့ဝင်နိုင်ငံ မဟုတ်သလို ICC ၏ ပြောကြားချက်များအပေါ် မည်သည့်အခါကမှ အသိအမှတ် ပြုခြင်းမရှိကြောင်း၊ မြန်မာနိုင်ငံအနေဖြင့် ဒေသတွင်းအပြင် ကမ္ဘာ့နိုင်ငံများနှင့် ဆက်ဆံရေးတွင် လွတ်လပ်၍ တက်ကြွပြီး ဘက်မလိုက်သော နိုင်ငံခြားရေးမူဝါဒကို ကျင့်သုံးလျက်ရှိကာ နိုင်ငံများအကြား ငြိမ်းချမ်းစွာ အတူယှဥ်တွဲ နေထိုင်ရေးမူကို ကျင့်သုံးလျက်ရှိကြောင်း နစက-က ထုတ်ပြန် ပြောကြားခဲ့သည်။

ICC မှ ဖမ်းဝရမ်း ထုတ်သည်၊ မထုတ်သည်ထက် ဗိုလ်ချုပ်မှူးကြီး မင်းအောင်လှိုင်အနေဖြင့် တိုက်ပွဲများ ဆက်လက် ဖော်ဆောင်သွားနိုင်ကြောင်း မြန်မာ-တရုတ်အရေး လေ့လာသုံးသပ်သူ ‌ဒေါက်တာလှကျော်ဇောက CNI သတင်းဌာနသို့ ပြောသည်။

ICC တရားသူကြီးများနဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “သူ့ဘက်ကတော့ ကျမ ကြည့်တယ်လေ၊ ICC က ထုတ်ထုတ် မထုတ်ထုတ် တအားဖိအားပေးဖို့ပဲ၊ သူ့မှာ အဲလမ်းကလွဲလို့ တခြားမရှိဘူး။ သူတို့သွားမဲ့လမ်းက တစ်ခုက ပြည်သူလူထုကို ပိုပြီးတော့ ဖိအားပေးဖို့ပေါ့နော်၊ အကြမ်းဖက်တဲ့ နည်းတွေပေါ့၊ လူတွေသတ်မယ်၊ မီးရှို့မယ်၊ ဗုံးကြဲမယ်၊ နောက်တစ်ခုက သူတို့ အခုလုပ်တာကလေ ထိုင်းနယ်စပ်ပြဿနာ၊ တရုတ်နဲ့ပြဿနာ ဒါမျိုးတွေပေါ့နော်၊ အမျိုးသားရေးတွေ၊ လူမျိုးရေးတွေ၊ အဲတာမျိုးတွေ အဓိကရုဏ်းတွေ ဖန်တီးဖို့လည်း သူတို့ကြိုးစားနေတယ်ဗျ။ နောက်ပြီးတော့ ကျမတို့ တော်လှန်ရေးအဖွဲ့တွေ ကြားထဲမှာ အကွဲကွဲအပြဲပြဲတွေ ဖြစ်အောင်လုပ်နေတယ်ဗျ။ သူကတော့ ဒီလမ်းပဲရှိတယ် တခြားလမ်းမရှိဘူး။ အဲတော့ ဆက်လုပ်မှာပါ၊ ဟုတ်တယ် ခင်ဗျားတို့ထင်တာ မှန်ပါတယ်၊ ဆက်လုပ်မှာပါ။ အဲတော့သူက ဒီ Do or die ပဲလေ၊ အဲတော့ သူလုပ်မှာပဲ၊ သူ့အတွက်က တခြားလမ်းမရှိဘူး” ဟု ပြောသည်။ 

တချို့သော နိုင်ငံရေးအကဲခတ်များကတော့ နိုင်ငံတကာနှင့် ICC ၏ ဖိအားပေးမှုများက ကာယကံရှင်အပေါ် လုံခြုံရေး အာမခံချက်ရှိဖို့လိုအပ်သည်ဟု သတိပေးကဲ့သို့ ဖြစ်စေပြီး အရပ်ဖက် အာဏာဖြစ်စေ စစ်ဘက်အာဏာ ဖြစ်စေ ဆက်လက် ဆုပ်ကိုင်ထားမှရမည်ဟု ယုံကြည်သွားစေနိုင်ကြောင်း ထောက်ပြကြသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကတော့ ၂၀၂၅ ခုနှစ်တွင် ရွေးကောက်ပွဲ ကျင်းပပေးသွားမည် ဖြစ်ကြောင်း၊ ရွေးကောက်ပွဲတွင် အနိုင်ရသည့် ပါတီကို နိုင်ငံတော်အာဏာ လွှဲပြောင်းပေးသွားမည် ဖြစ်ကြောင်း ပြောကြားထားသည်။

CNI News

၂၀၂၄ ခုနှစ်၊ ဒီဇင်ဘာ ၄

မြန်မာ့တပ်မတော်နှင့် တိုင်းရင်းသား လက်နက်ကိုင် နှစ်ဖက်စလုံးကို တရုတ်က ဆက်ကစားသွားနိုင်သော်လည်း စစ်တပ်ဘက်ကို ပိုပြီးယိမ်းသွားလိမ့်မည်ဟု ဆွီဒင်နိုင်ငံသား ဝါရင့်သတင်းစာဆရာ မြန်မာ့အရေး လေ့လာသူ ဘာတေးလ် လင့်တာနာက ပြောသည်။

DNA သတင်းဌာနက ဒီဇင်ဘာ ၄ ရက်နေ့တွင် ထုတ်လွှင့်ခဲ့သော ဘာတေးလ်လင့်တာနာနှင့် အင်တာဗျူး၌ ၎င်းက အထက်ပါအတိုင်း ဖြေကြားခဲ့ခြင်း ဖြစ်သည်။

ဘာတေးလ်လင့်တနာက “ တရုတ်က နှစ်ဖက်စလုံးကို ဆက်ပြီး ကစားသွားလိမ့်မယ်၊  လက်နက်ကိုင် တော်လှန် ရေး တပ်ဖွဲ့တွေဘက်ရော၊ စစ်ကောင်စီဘက်ကိုရော။ ဒါပေမယ့် စစ်ကောင်စီဘက်ကို ပိုပြီး ယိမ်းသွားလိမ့်မယ်။ တရုတ်က မြန်မာနိုင်ငံရဲ့ အစိုးရအပြောင်းအလဲကို စိတ်မဝင်စားဘူး ၊ တရုတ်အနေနဲ့ မြင်ချင်တာက အပစ်အခတ် ရပ်စဲရေး တစ်ရပ်နဲ့ ဆုပေးဒဏ်ပေးပုံစံနဲ့ သူဝင်ခြယ်လှယ်မယ့် ဆွေးနွေးပွဲတွေပေါ့”ဟု ပြောသည်။

MNDAA ခေါင်းဆောင် ဖုန်တာရွှန်းကို တွေ့ရစဉ်

နစကကို ဖြုတ်ချပြီး အာဏာရယူရန် ကြိုးပမ်းနေသည့် အတိုက်အခံ အမျိုးသားညီညွတ်ရေးအစိုးရ(NUG)သည် မြန်မာ့အခြေအနေကို ပြင်ပကမ္ဘာက သတိပြုမိအောင် လုပ်ဆောင်ခြင်းထက် ပိုပြီး မစွမ်းဆောင်နိုင်ခဲ့ကြောင်း၊ NUG ကို နစကနှင့် တရုတ်အကြား ဆက်ဆံရေးမှာ ကစားသမား တစ်ယောက်အနေဖြင့် မိမိမမြင်ကြောင်း ၎င်းက ပြောသည်။

ဘာတေးလ်လင့်တနာက “တရုတ်ဟာ မြန်မာနိုင်ငံရဲ့ ပြည်တွင်းရေးကို ပြတ်ပြတ်သားသား ဝင်ရောက်စွက်ဖက်ဖို့ နည်းလမ်းနဲ့ စိတ်ဝင်စားမှုရှိတဲ့ တစ်ခုတည်းသော ပြင်ပအင်အား ဖြစ်တယ်ဆိုတာကို မကြာသေးခင်က ဖြစ်ပေါ် တိုးထက်မှုတွေက ထပ်ပြီးပြသွားပါပြီ။ မြန်မာစစ်တပ်နဲ့ရော၊ တော်လှန်ရေး အင်အားစုတွေနဲ့ပါ သူ့လောက် ထိတွေ့ဆက်ဆံတဲ့ ပမာဏမျိုး ဘယ်သူ့မှာမှ မရှိပါဘူး”ဟု ပြောသည်။

တရုတ်သည် မြန်မာ့တပ်မတော်ကို တိုက်ခိုက်နေသည့် တအာင်းအမျိုးသားလွတ်မြောက်ရေးတပ်မတော်(TNLA)၊ မြန်မာအမျိုးသား ဒီမိုကရက်တစ် မဟာမိတ်တပ်မတော်(MNDAA)နှင့် ရင်းနှီးသော ဆက်ဆံရေးရှိကာ ၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ၁၀၂၇ စစ်ဆင်ရေးမှာ အထောက်အပံ့များ ပေးခဲ့သည်။

တရုတ်ဒရုန်းစက်ရုံကို ဗိုလ်ချုပ်မှူးကြီးမင်းအောင်လှိုင် လေ့လာနေစဉ်

ထို့နောက် နစကနှင့် သံတမန် ဆက်ဆံရေး တင်းမာမှုဖြစ်ကာ ပြန်လည် ကောင်းမွန်စေရန်အတွက် တရုတ်သည် MNDAA နှင့် TNLA ကို တိုက်ပွဲများ ရပ်တန့်ရန်၊ တွေ့ဆုံဆွေးနွေးရန်၊ လားရှိုးမြို့မှ ပြန်လည် ဆုတ်ခွာရန် တိုက် တွန်းနေသကဲ့သို့ နယ်စပ်ကုန်သွယ်ရေးဂိတ်များ ပိတ်ဆို့ခြင်းဖြင့်လည်း ဖိအားပေးလျက်ရှိနေသည်။

ထို့ကြောင့် TNLA နှင့် MNDAA တို့သည် အပစ်အခတ်ရပ်စဲကြောင်း၊ တရုတ်၏ ကြားဝင်စေ့စပ်မှုဖြင့် တွေ့ဆုံ ဆွေးနွေးမည်ဖြစ်ကြောင်း အသီးသီး ထုတ်ပြန်လျက်ရှိနေသည်။

တခြား တစ်ဖက်မှာတော့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၄ ခုနှစ်၊ နိုဝင်ဘာ ၅ ရက်မှ ၁၀ ရက်နေ့အထိ တရုတ်နိုင်ငံသို့ သွားရောက်ခဲ့ပြီး တရုတ်ဝန်ကြီးချုပ် လီချန် အပါအဝင် ယူနန်ပြည်နယ် ခေါင်းဆောင် များကို တွေ့ဆုံ၍ မြန်မာ့အရေး၊ ငြိမ်းချမ်းရေး၊ ကုန်သွယ်ရေးနှင့် ရွေးကောက်ပွဲ အခြေအနေများကို ဆွေးနွေးခဲ့ သည်။

အလားတူ တရုတ်နိုင်ငံရှိ ဒရုန်းစက်ရုံများကို သွားရောက်လေ့လာခဲ့သလို ဒရုန်းများလည်း ဝယ်ယူ၍ စစ်ဆင်ရေး များမှာ တရုတ်ထုတ် ဒရုန်းများ မြန်မာ့တပ်မတော်က ပိုမို သုံးစွဲလာနေကြောင်း သိရသည်။

CNI News 

၂၀၂၄ ခုနှစ်၊ ဒီဇင်ဘာ ၄

နစကနှင့် တွေ့ဆုံဆွေးနွေးရန် အဆင့်မြင့် ကိုယ်စားလှယ်အဖွဲ့ကို စေလွှတ်သွားမည်ဟု မြန်မာအမျိုးသား ဒီမိုကရက်တစ် မဟာမိတ်တပ်မတော်(MNDAA)က ၂၀၂၄ ခုနှစ်၊ ဒီဇင်ဘာ ၃ ရက်နေ့ ညပိုင်းက ထုတ်ပြန် ကြေညာ ခဲ့သည်။

ယနေ့ (ဒီဇင်ဘာ ၃ ရက်)မှစ၍ ရောက်ရာနေရာမှ မိမိတို့တပ်များသည် ချက်ချင်း အပစ်အခတ်ရပ်စဲပြီး မြန်မာ့ တပ်မတော်ကို အစပြုထိုးစစ်ဆင် တိုက်ခိုက်မည်မဟုတ်ကြောင်း၊ တရုတ်၏ ကြားဝင်စေ့စပ်ကြိုးပမ်း ဆောင်ရွက် မှုအောက်တွင် လားရှိုး အပါအဝင် သက်ဆိုင်ရာကိစ္စရပ်များကို တွေ့ဆုံဆွေးနွေးသော နည်းလမ်းဖြင့် ဖြေရှင်းနိုင် မည်ဟု မျှော်လင့်ကြောင်း ထုတ်ပြန်ချက်တွင် ဖော်ပြထားသည်။

ထို့နောက် မိမိတို့အနေဖြင့်လည်း တရုတ်၏ ကြားဝင်စေ့စပ် ကြိုးပမ်းဆောင်ရွက်ပေးမှုအတိုင်း တက်တက်ကြွကြွ ပူးပေါင်းဆောင်ရွက်သွားပါမည်ဟု MNDAA က ထုတ်ပြန်ခဲ့သည်။

MNDAA က “ တွေ့ဆုံ ဆွေးနွေးရာတွင် MNTJP/MNDAA မှ အဆင့်မြင့် ကိုယ်စားလှယ်အဖွဲ့ကို စေလွှတ်မည်ဖြစ် ပြီး နှစ်ဦးနှစ်ဖက်ကြားရှိ ပဋိပက္ခများနှင့် အမြင်သဘောထား ကွဲလွဲမှုများကို နိုင်ငံရေး နည်းလမ်းဖြင့် ဖြေရှင်းသွား နိုင်လိမ့်မည်ဟု မျှော်လင့်ပါသည်”ဟု ပြောသည်။

MNDAA ရဲ့ ထုတ်ပြန်ချက်ကို တွေ့ရစဉ်

ထို့ကြောင့် နစကမှ မြန်မာနိုင်ငံ နေရာအနှံ့တွင် ဖော်ဆောင်နေသော ဝေဟင်နှင့် မြေပြင်ထိုးစစ်ဆင် တိုက်ခိုက်နေ မှုများကို ရပ်ဆိုင်းပေးရမည်ဖြစ်ကြောင်း၊ MNDAA အနေဖြင့် နိုင်ငံရေးနည်းလမ်းကို အားပေး ထောက်ခံသော်လည်း မိမိကိုယ်ကို ခုခံကာကွယ်ခွင့်အား ယခင်နည်းတူ ဆက်လက်စွဲကိုင်သွားပါမည်ဟု ထုတ်ပြန်ခဲ့သည်။

မြန်မာ့တပ်မတော်နှင့် MNDAA-TNLA-AA ကြား ဖြစ်ပွားနေသော တိုက်ပွဲများ ရပ်တန့်ရေးအတွက် တရုတ်က ကြားဝင်စေ့စပ်မှုဖြင့် တရုတ်နိုင်ငံ၊ ကူမင်းမြို့၊ ဟိုင်ဂင်ဟိုတယ်မှာ ဟိုင်ဂင်ဆွေးနွေးပွဲစတင်ခဲ့ကြသည်။

၂၀၂၃ ခုနှစ်၊ ဒီဇင်ဘာ ၂၃ ရက်နေ့က တစ်ကြိမ်၊ ၂၀၂၄ ခုနှစ်၊ မတ်လ ၁ ရက်မှ ၃ ရက်အထိ တစ်ကြိမ် တွေ့ဆုံ ဆွေးနွေး၍ နှစ်ဖက် အပစ်အခတ်ရပ်စဲရေး သဘောတူညီခဲ့ကြသည်။

ထို့နောက် နှစ်ဖက် အပစ်ရပ်စဲမှု ပြန်လည် ပျက်ပြယ်သွားပြီးနောက် ၂၀၂၄ ခုနှစ်၊ ဇူလိုင်လမှာ လုပ်မည့် ၆ ကြိမ် မြောက် ဆွေးနွေးပွဲလည်း ပျက်သွားရာ ယနေ့အချိန်ထိ ပြန်လည် မဆွေးနွေးနိုင်ဘဲ ဖြစ်နေသည်။ 

CNI News

၂၀၂၄ ခုနှစ်၊ ဒီဇင်ဘာ ၄

ကိုးကန့်တပ် MNDAA သည် ဒီဇင်ဘာ ၃ ရက်နေ့မှစတင်ကာ တစ်ဖက်သတ် အပစ်ခတ်ရပ်စဲကြောင်း ကြေညာခဲ့ သည့်အတွက် နစကကိုလည်း အပစ်အခတ်ရပ်စဲရန် တရုတ်မှ ပြောသင့်ကြောင်း စစ်ရေးနှင့် နိုင်ငံရေး လေ့လာ သုံးသပ်သူများက CNI သတင်းဌာနသို့ ပြောသည်။

တရုတ်၏ ကြားဝင်စေ့စပ်မှုအောက်တွင် ‌နိုင်ငံရေးအရ တွေ့ဆုံဆွေးနွေးမှာဖြစ်ကြောင်း၊ ဒီဇင်ဘာ ၃ ရက်နေ့က စတင်ကာ တစ်ဖက်သတ် အပစ်အခတ်ရပ်စဲမည်ဟု ကိုးကန့်တပ်(MNDAA)က ထုတ်ပြန် ကြေညာခဲ့သည်။

ထို့အပြင် မြန်မာ့တပ်မတော်ကို အစပြု တိုက်ခိုက်မှာ မဟုတ်သလို၊ တပ်မတော်ဘက်ကလည်း ဝေဟင်နှင့်  မြေပြင်ထိုးစစ်များအား ရပ်စဲပေးရမည်ဟု MNDAA က တောင်းဆိုထားသည်။

ထိုသို့ တောင်းဆိုခြင်းသည် နှစ်ဦးနှစ်ဖက် မျှမျှတတ ဖြစ်စေရေး တရုတ်အနေဖြင့် နစကဘက်ကိုလည်း အပစ်အခတ်ရပ်စဲရန် ဖိအားပေးပြောဆိုခိုင်းသည့် သဘောဖြစ်ကြောင်း မြန်မာ-တရုတ်အရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

ကိုးကန့်တပ်ဖွဲ့က ရမခတိုင်းကို သိမ်းပိုက်ထားစဉ်

၎င်းက “တရုတ်နိုင်ငံခြားရေးဝန်ကြီးက ပြောထားတာရှိတယ် အပစ်ခတ်ရပ်စဲရေးနဲ့ တွေ့ဆုံဆွေးနွေးရေး လုပ်တဲ့အခါ ဘက်ပေါင်းစုံကို သူတို့ တရားမျှတစွာ ဆက်ဆံပါ့မယ်ဆိုပြီး ပြောထားတာလေ။ အဲဒီတော့ ကိုးကန့်ကလည်း သူ့ကို အပစ်ခတ်ရပ်စဲ ခိုင်းရင် စကစကလည်း အပစ်ခတ်ရပ်စဲရမယ်။ ဒါမှ တရားမှာပေါ့။ ကိုယ်က အပစ်ခတ်ရပ်စဲပြီး သူက အပစ်ခတ် မရပ်စဲရင် ခေါင်းငုံ့ပေးသလိုဖြစ်မှာပေါ့။ နှစ်ဖက်မျှမျှတတ ဖြစ်ဖို့အတွက် သူက တရုတ်ကိုလည်း ဈေးစစ်တဲ့ သဘောပေါ့ဗျာ။ ငါ့ကိုပဲ မပြောနဲ့ စစ်ကောင်စီကိုလည်း ပြောဦးဆိုပြီးတော့။ အဲဒါကြောင့် မို့လို့လည်း တရုတ်က စကစကို အလိုလိုက်ပြီး ဆက်ဆံနေရတာ။ သူ့အတွက်တော့ ဖိအားတွေ များလာတာပေါ့။ တစ်ဖက်က အပစ်ခတ် ရပ်စဲ တယ်ဆိုတာက အားလုံးက တရုတ်ရဲ့ ဖိအားကို ခံရတဲ့ အဖွဲ့အစည်းဖြစ်တာကို။  အဲဒီတော့ တရုတ်က ဒီဘက်ကို ဖိအားပေးရင်လည်း MNDAA လိုပေါ့ ဟိုဘက်လည်း ဖိအားပေးဆိုပြီး ပြောလာရင်တော့ တဖြေးဖြေး သူ့‌အပေါ်လည်း ဖိအားတွေ များလာမှာပဲ” ဟု ပြောသည်။

နစကအနေဖြင့် တွေ့ဆုံဆွေးနွေးမည်ဆိုပါက MNDAA ဘက်မှ အဆင်မြင့်ကိုယ်စားလှယ်အဖွဲ့များ စေလွှတ်ပြီး နှစ်ဖက် ပဋိပက္ခအမြင် ကွဲလွဲမှုများအား နိုင်ငံရေးနည်းအရ ဖြေရှင်းရန် မျှော်လင့်ထားကြောင်း၊ သို့သော် မိမိကိုယ်ကို ခုခံကာကွယ်ခွင့်ကိုမူ ကိုင်စွဲထားမည်ဟု ထုတ်ပြန်ချက်တွင် ဖော်ပြထားသည်။

ရှမ်းပြည်နယ်မြောက်ပိုင်းတွင် နစကဘက်မှ ဆုံးရှုံးထားသည့် နယ်မြေ အများအပြားရှိသည့်အတွက် ထိုးစစ်ဆင် နေမှုများအား ရပ်တန့်ပေးရန် တောင်းဆိုခြင်းက လိုက်လျောနိုင်ဖွယ် မရှိနိုင်ကြောင်းလည်း စစ်ရေးနှင့် နိုင်ငံရေး လေ့လာသုံးသပ်သူများက ထောက်ပြကြသည်။

ထို့အပြင် MNDAA ၏ ထုတ်ပြန်ချက်သည် ထူးခြားသည့် အချက်အလက်အသစ်များ မပါဝင်ဘဲ ယခင် ထုတ်ပြန် ချက်များ အတိုင်းသာဖြစ်ကြောင်း၊ ထိုသို့ ထုတ်လာခြင်းသည်လည်း နစကဘက်မှ ထိုးစစ်ဆင်မှုများကို မရပ်တန့် သေးသည့်အတွက် ဖြစ်နိုင်ကြောင်း  ငြိမ်းချမ်းရေးလုပ်ငန်းစဉ်မှာ ပါဝင်နေသူ ဦးခွန်းဆိုင်က CNI သတင်း ဌာနသို့ ပြောသည်။

လားရှိုးမြို့ကို ကိုးကန့်တပ်ဖွဲ့က ထိန်းချုပ်ထားစဉ်

၎င်းက “ဘာမှ အသစ်ဖြစ်ပုံမရဘူး။ သို့သော်လည်း SAC ဘက်က မရပ်သေးလို့လည်း ဖြစ်နိုင်ပါတယ်။ အဲဒါကြောင့် ထပ်ထုတ်တာ။ သို့သော်လည်း ဒီကိစ္စနဲ့ ပတ်သက်ရင် ထင်တာကတော့ ဒါကို တရုတ်က ကြားဝင်ပြီးတော့မှ မပြော လို့ရှိရင် မပြီးဘူးပေါ့။ MNDAA ဘက်က ကြေညာချက်ထုတ်၊ TNLA ဘက်က ကြေညာချက်ထုတ်ရုံနဲ့ မပြီးဘူး။ ကြားဝင်လုပ်ရမယ့် တရုတ်ဘက်ကလည်း ဒါကို SAC ကို ပြောရမှာဖြစ်ပါတယ်။ ကျနော်ထင်တယ် တရုတ်က လည်း ပြောပြီးပါပြီ။ သို့သော်လည်း SAC ဘက်က တုန့်ပြန်မှုကို စောင့်နေတယ်လို့ ထင်ပါတယ်။ ဘယ်နည်းနဲ့မဆို ဒီကိစ္စကိုတော့ သူတို့တွေ့ဆုံမှ ပြောနိုင်လိမ့်မယ် ထင်ပါတယ်။ ဒီလိုမတွေ့ဆုံခင်မှာ ပြောတယ်ဆိုရင် SAC ဘက်က မတွေ့ချင်တာလည်း မတွေ့ဖို့လည်း ဖြစ်နိုင်တယ်။ ကျနော်ကတော့ အဲဒီလိုမျိုး ဖြစ်မယ်လို့တော့ မမျှော်လင့်ဘူး ပေါ့” ဟု ပြောသည်။

MNDAA ဘက်မှ ယခုကဲ့သို့ ထုတ်ပြန်ချက် မထွက်ခင် TNLA ဘက်မှ ဦးစွာ ထုတ်ပြန်ခဲ့ခြင်းဖြစ်ပြီး နှစ်ဖွဲ့၏ ထုတ်ပြန်ချက်တွင် မိမိကိုယ်ကို ခုခံကာကွယ်ခွင့်ကို ကိုင်စွဲထားမည်ဆိုသည့်အချက် တူညီစွာ ပါဝင်နေသည်။

ထို့ကြောင့် နစကဘက်မှ ထိုးစစ်ဆင် တိုက်ခိုက်မှုများ ပြုလုပ်ပါက ၎င်းတို့ဘက်မှလည်း ပြန်လည် ခုခံတိုက်ခိုက် သွားမည်ဖြစ်ကြောင်း အဓိပ္ပါယ်မှတ်ယူနိုင်သည်။

တရုတ်နိုင်ငံအနေဖြင့် ရှမ်းမြောက်ဒေသ တိုက်ပွဲများ ရပ်စဲရန် သက်ဆိုင်ရာ အဖွဲ့အစည်းများအား  ဖိအားပေး တိုက်တွန်းနေသလို MNDAA နှင့် တအောင်းတပ်ဖွဲ့(TNLA)ကလည်း နိုင်ငံရေးဆွေးနွေးရန် တရုတ်နိုင်ငံ၏ ကြားဝင်စေ့စပ်မှုကို လက်ခံကြောင်း ပြောကြားထားသည်။

TNLA နှင့် MNDAA ဦးဆောင်၍ AA၊ PDFs များပူးပေါင်း၍ ၂၀၂၃ ခုနှစ်၊ အောက်တိုဘာ ၂၇ ရက်က ၁၀၂၇ စစ်ဆင် ရေးကို ရှမ်းပြည်နယ်မြောက်ပိုင်းမှာ ဖော်ဆောင်ခဲ့သလို ၂၀၂၄ ခုနှစ်၊ ဇွန်လမှာ ဒုတိယအကြိမ် ၁၀၂၇ စစ်ဆင်ရေး ကို ရှမ်းပြည်နယ်မြောက်ပိုင်းနှင့် မန္တလေးတိုင်းဒေသကြီးအတွင်းမှာ ဖော်ဆောင်ခဲ့သည်။

အဆိုပါ ၁၀၂၇ စစ်ဆင်ရေးအတွင်းမှာ နစကသည် မိုးကုတ်၊ မိုးမိတ်၊ သပိတ်ကျင်း၊ စဉ့်ကူး၊ မတ္တရာ၊ လားရှိုး၊ ကျောက်မဲ၊ နောင်ချို၊ သီပေါ၊ ကွတ်ခိုင်၊ သိန္နီ၊ နမ့်ခမ်း၊ နမ္မတူ၊ မိုင်းငေါ့၊ မန်တုံ၊ နမ့်ဆန်၊ ချင်းရွှေဟော်၊ ဖောင်းဆိုင်၊ ကုန်ကြမ်း၊ လောက်ကိုင်၊ မုံးကိုး စသည့် မြို့နယ်များကို လက်လွှတ် ဆုံးရှုံးခဲ့ရသည်။

CNI News

၂၀၂၄ ခုနှစ်၊ ဒီဇင်ဘာ ၄

ရှမ်းပြည်နယ်မြောက်ပိုင်း၊ လားရှိုးမြို့မှာ မြန်မာနိုင်ငံတော်အလံကို မြန်မာအမျိုးသားဒီမိုကရက်တစ် မဟာမိတ်တပ် မတော်(MNDAA)က ၂၀၂၄ ခုနှစ်၊ ဒီဇင်ဘာ ၄ ရက်နေ့မှာ ပြန်လည်လွှင့်ထူလိုက်သည်ကို တွေ့ရသည်။

လားရှိုးမြို့နှင့် အရှေ့မြောက်ပိုင်းတိုင်းစစ်ဌာနချုပ်(ရမခ)ကို MNDAA က ၁၀၂၇ ဒုတိယလှိုင်းမှာ တိုက်ခိုက်သိမ်း ပိုက်ခဲ့ပြီး နိုင်ငံတော်အလံများကို ဖြုတ်သိမ်းခဲ့သည်။

အလားတူ MNDAA တပ်ဖွဲ့သည် နိုင်ငံတော်အလံကို ခွေးတစ်ကောင်ပေါ်မှာ လွှမ်းခြုံ၍လည်း လှောင်ပြောင် သရော်ခဲ့သေးသည်။

သို့သော် ယခုအခါမှာတော့ နိုင်ငံတော်အလံကို MNDAA က လားရှိုးမြို့အတွင်းမှာ ပြန်လည်လွှင့်ထူလာသည်ကို တွေ့ရသည်။

ယနေ့(ဒီဇင်ဘာ ၃ ရက်)မှစ၍ ရောက်ရာနေရာမှ မိမိတို့တပ်များသည် ချက်ချင်း အပစ်အခတ်ရပ်စဲပြီး မြန်မာ့တပ် မတော်ကို အစပြုထိုးစစ်ဆင် တိုက်ခိုက်မည်မဟုတ်ကြောင်း၊ တရုတ်ပြည်သူ့သမ္မတနိုင်ငံ ကြားဝင်စေ့စပ်ကြိုးပမ်း ဆောင်ရွက်မှုအောက်တွင် လားရှိုး အပါအဝင် သက်ဆိုင်ရာကိစ္စရပ်များကို တွေ့ဆုံ ဆွေးနွေးသော နည်းလမ်းဖြင့် ဖြေရှင်းနိုင်မည်ဟု မျှော်လင့်ပါကြောင်း ၂၀၂၄ ခုနှစ်၊ ဒီဇင်ဘာ ၃ ရက်တွင် MNDAA က ထုတ်ပြန်ခဲ့သည်။

CNI News
၂၀၂၄ ခုနှစ်၊ ဒီဇင်ဘာ ၃

မြန်မာနိုင်ငံတွင် ကျင်းပမည့် ရွေးကောက်ပွဲကို လေ့လာနိုင်ဖို့ ရုရှားနိုင်ငံကို ဖိတ်ခေါ်သွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဒူးမားလွှတ်တော်ဒုဥက္ကဋ္ဌ H. E. Mr. Sholban Kara-Ool ကို တွေ့ဆုံ၍ ပြောကြားခဲ့သည်။

၂၀၂၄ ခုနှစ်၊ ဒီဇင်ဘာ ၃ ရက်က ဒူးမားလွှတ်တော်ဒုဥက္ကဋ္ဌ H. E. Mr. Sholban Kara-Ool ဦးဆောင်သည့် ကိုယ်စားလှယ်အဖွဲ့ကို နစကဥက္ကဋ္ဌက နေပြည်တော်မှာ လက်ခံတွေ့ဆုံစဉ် အထက်ပါအတိုင်း ပြောကြားခဲ့ခြင်း ဖြစ်သည်။

နစကဥက္ကဋ္ဌက မြန်မာနိုင်ငံ၌ လွှတ်လပ်၍ တရားမျှတသည့် ရွေးကောက်ပွဲ ကျင်းပနိုင်ရေး ကြိုတင်ပြင်ဆင် ဆောင်ရွက်လျက်ရှိမှုနှင့် ရွေးကောက်ပွဲ ကျင်းပချိန်တွင် ရုရှားနိုင်ငံမှ လေ့လာရေးအဖွဲ့များ ဖိတ်ခေါ်သွားမည့် အခြေအနေများကို ရှင်းပြခဲ့သည်။

ရွေးကောက်ပွဲကို ၂၀၂၅ ခုနှစ်တွင် ကျင်းပသွားမည်ဖြစ်ပြီး နိုင်ငံတကာမှ လေ့လာရေးအဖွဲ့များကို ဖိတ်ခေါ်၍ လေ့လာခွင့်ပြုသွားမည်ဖြစ်ကြောင်း၊ ရွေးကောက်ပွဲကို လုံခြုံရေးအရ အပိုင်းလိုက် ကျင်းပသွားရန်လည်း ရှိ‌ ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့နောက် မြန်မာနိုင်ငံ၏ နိုင်ငံရေးဖြစ်ပေါ် ပြောင်းလဲမှုများအပေါ် နိုင်ငံတကာမျက်နှာစာတွင် ရုရှားနိုင်ငံအနေဖြင့် ခိုင်ခိုင်မာမာ ရပ်တည်ပေးလျက်ရှိမှုနှင့် မြန်မာနိုင်ငံအနေဖြင့်လည်း ရုရှားနိုင်ငံ၏ နိုင်ငံရေးဖြစ်ပေါ်ပြောင်းလဲမှုများ အပေါ် ခိုင်ခိုင်မာမာ ရပ်တည်ပေးလျက်ရှိမှု အခြေအနေများကိုလည်း ဆွေးနွေးခဲ့သည်။

အလားတူ ခရီးသွားလုပ်ငန်းများ၊ အပြန်အလှန် ကုန်သွယ်မှု လုပ်ငန်းများ တိုးတက်စေရေး ဆက်လက် တိုးချဲ့ ဆောင်ရွက်သွားမည့် အခြေအနေများ၊ ကုန်ထုတ်လုပ်မှု လုပ်ငန်းများ၊ စိုက်ပျဒိးရေးလုပ်ငန်းများတွင် နည်းပညာ ပူးပေါင်းဆောင်ရွက်မှုများ တိုးမြှင့်ဆောင်ရွက်နိုင်သည့် အခြေအနေများ၊ စိုက်ပျိုးရေး လုပ်ငန်းများအတွက် လိုအပ် သည့် ဓာတ်မြေဩဇာများ ထုတ်လုပ်နိုင်ရေးနှင့် စက်မှုလုပ်ငန်းများ တိုးတက်စေရေး ပူးပေါင်းဆောင်ရွက်နိုင်သည့် အခြေအနေများကိုလည်း ဆွေးနွေးခဲ့ကြကြောင်း သိရသည်။