CNI News

၂၀၂၄ ခုနှစ်၊ ဇွန်လ ၁၇

အာရက္ခတပ်တော် (AA) က မောင်တောမြို့မှ ပြည်သူများအနေဖြင့် မြို့မှထွက်ခွာရန် သတိပေးမှုမှာ ဘင်္ဂါလီအရေးကို ဖြေရှင်းလိုက်ခြင်းဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

မောင်တောမြို့နှင့် မြို့ပတ်ဝန်းကျင်တွင်ရှိနေသော မြန်မာ့တပ်မတော်၏ စခန်းများအားလုံးကို မိမိတို့မှ ဝိုင်းရံ ပိတ်ဆို့ထားကြောင်း၊ မောင်တောမြို့ ပြည်သူများ၏ အသက်အန္တရာယ်ကို စိုးရိမ်သောကြောင့် ၂၀၂၄ ခုနှစ်၊ ဇွန်လ ၁၆ ရက်၊ ည (၉) နာရီအချိန်မှစတင်ပြီး မောင်တောမြိုအတွင်းမှ အမြန်ဆုံး ချက်ချင်းထွက်ခွာကြရန် AA က ထုတ်ပြန်ခဲ့သည်။

ဦးကြီးမြင့်က “အဲဒီမှာဖြစ်နေတဲ့ ရိုဟင်ဂျာပြဿနာရှိတယ်။ ရိုဟင်ဂျာ အများစုနေထိုင်တဲ့လူတွေကို သတိပေးတာ၊ AA က သူတို့ အလွန်မဖြစ်အောင် သူတို့ သတိပေးတယ်။ ဘာဖြစ်လို့ဆို အဲဒီမှာ ရှုပ်နေတယ်။ ဘာတွေရှုပ်နေလဲ ဆိုတော့ အာဆာ (ARSA) နဲ့ ARSU လား အဲဒီအဖွဲ့တွေက ၃ ဖွဲ့ရှိတယ်။ သူတို့က ဟိုတုန်းကတစ်ဖွဲ့က AA နဲ့ နားလည်မှုရှိတယ်။ အခုက ပျက်သွားပြီ၊ ပျက်သွားတဲ့အခါကြတော့ သူတို့က ဘာလုပ်နေလဲဆိုတော့ လက်နက်ရ ပြီးရော၊ နောက်မှ ကြည့်ရှင်းမယ့် ပေါ်လစီ၊ စစ်တပ်နဲ့ပေါင်းရင် လက်နက်ရမယ်၊ စစ်တပ်နဲ့ပေါင်းပြီး လက်နက်ယူ မယ်၊ သူတို့ခိုင်းတာလုပ်မယ်၊ အဲဒီလိုဖြစ်လာတဲ့ အခါကြတော့ AA ကလည်း ဒီမူဝါဒတော့ လက်မခံနိုင်ဘူး။ သူ့ ပေါ်လစီက အရှင်ကြီးလေ၊ လက်နက်ရပြီးရောဆိုတဲ့ အခါကြတော့ ယာယီပေါင်းတာပေါ့၊ အာဆာနဲ့အဖွဲ့က လုပ်မယ်ဆိုတဲ့ သဘောရှိတယ်၊ ပြီးတော့ ဘင်္ဂလားဒေ့ရှ်က ဒုက္ခသည်စခန်းတွေထဲမှာလည်း အဲဒီထဲက လူတွေကို အတင်းစုပြီး ဗမာပြည်ထဲ ပြန်ပို့တယ်။ ပြန်ပို့ပြီးတော့ လက်နက်ရအောင် လုပ်ခိုင်းတယ်။ AA က ဒီကိစ္စကြီးဟာ မဖြစ်တော့ဘူး အပြတ်တိုက်မှ ရတော့မယ်ဆိုပြီး တိုက်တယ်၊ တိုက်တဲ့အခါမှာ နိုင်ငံတကာက ၁၉၅ ဖွဲ့အပါအဝင် ပိုက်ဆံတောင့်တဲ့ မူဆလင်အဖွဲ့အစည်းတွေရဲ့ OIC အဖွဲ့တွေရဲ့ အပြောမခံရအောင်လို့ သတိပေးတယ်လို့ ကျနော် ကတော့ ဒီလိုသဘောထား ရိုးရိုးသားသား မြင်ပါတယ်။ ဒါက သူ့အလုပ်သူလုပ်တာကို တိုက်တော့မယ် နောင်ကျ အလွန်မဆိုနဲ့ အဲဒါကို သူတို့ ရှင်းလိုက်တာပေါ့နော်” ဟု ပြောသည်။

AA ရဲ့ ထုတ်ပြန်ချက်ကိုတွေ့ရစဉ်

မြန်မာ့တပ်မတော်သည် မောင်တောမြို့ကို စစ်စခန်းများသဖွယ် အသုံးပြုပြီး မြို့ပြစစ်ဆင်ရေးကို ပြုလုပ်ရန် ကြိုတင်ပြင်ဆင်ထားသည်မှာ ကာလအတန် ကြာမြင့်ခဲ့ပြီဖြစ်ကြောင်း၊ မောင်တောရှိ လက်ကျန်စခန်းများ အားလုံးကို မိမိတို့မှ ဆက်လက် ထိုးစစ်ဆင် တိုက်ခိုက်တော့မည် ဖြစ်သောကြောင့် သတိပေးခြင်းဖြစ်ကြောင်း ဇွန်လ ၁၆ ရက်နေ့ AA ၏ ထုတ်ပြန်ချက်တွင် ဖော်ပြထားသည်။

မောင်တောမြို့မှာ မြန်မာ - ဘင်္ဂါလားဒေ့ရှ် နယ်စပ်မြို့ဖြစ်ပြီး နှစ်နိုင်ငံဆက်ဆံရေး၊ ကုန်သွယ်ရေးမှာ အလွန်အရေး ပါသော မြို့ဖြစ်ကြောင်း စည်းလုံးညီညွတ်သော တိုင်းရင်းသားလူမျိုးများ မဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

၎င်းက “ရခိုင်ပြည်ရဲ့ နယ်စပ် ဘင်္ဂါလားဒေ့ရှ်နဲ့ နယ်စပ်မြို့လည်းဖြစ်တယ်။ နောက်မြန်မာနိုင်ငံရဲ့ အနောက်ဖက် တံခါးပေါက်လည်း ဖြစ်တယ်ပေါ့ဗျာ၊ အဓိကတော့ အဲဒီဘင်္ဂါလားဒေ့ရှ်နဲ့ ကုန်သွယ်မယ်ဆိုရင် အဲဒီမောင်တောဟာ မပါမဖြစ်ပါရမယ့် နေရာဖြစ်တယ်လေ၊ အဲဒီနယ်နိမိတ်ချင်း ဆက်စပ်နေတဲ့ စီးပွားရေး၊ ကုန်သွယ်ရေး နှစ်နိုင်ငံ ဆက်ဆံရေးကအစ အဲဒီနေရာက အရမ်းအရေးပါတယ်လို့ ပြောချင်ပါတယ်” ဟု ပြောသည်။

မောင်တောမြို့အ၀င်ကိုတွေ့ရစဉ်

ရခိုင်ပြည်နယ်မြောက်ပိုင်းတွင် ယခုနှစ် အစောပိုင်းကာလမှ စတင်ကာ ဘင်္ဂါလီအရေး ကျယ်ကျယ်ပြန့်ပြန့် ဖြစ်ပေါ်လာခဲ့သည်။

ထို့နောက် ၂၀၂၄ ခုနှစ်၊ မေလ ၁၈ ရက်နေ့တွင် ဘူးသီးတောင်မြို့ကို AA က တိုက်ခိုက်သိမ်းပိုက်ပြီးနောက် ဘင်္ဂါလီအရေးနှင့် ပတ်သက်၍ AA အား အနောက်အုပ်စုနှင့် အရပ်ဖက်အဖွဲ့အစည်းများက ဝေဖန်မှုများ ရှိခဲ့သည်။

လက်ရှိတွင် AA က ချင်းပြည်နယ်၊ ပလက်ဝမြို့နယ် အပါအဝင် ရခိုင်ပြည်နယ်အတွင်းရှိ ပေါက်တော၊ မင်းပြား၊ ကျောက်တော်၊ မြောက်ဦး၊ မြေပုံ၊ ပုဏ္ဏားကျွန်း၊ ရသေ့တောင်၊ ရမ်းဗြဲနှင့် ဘူးသီးတောင်စသည့် မြို့နယ်များကို သိမ်းပိုက်ထားသည်။

CNI News 
၂၀၂၄ ခုနှစ်၊ ဇွန်လ ၁၆

လာမည့်နှစ်(၂၀၂၅ ခုနှစ်)အတွင်း လွတ်လပ်၍ တရားမျှတသည့် ပါတီစုံဒီမိုကရေစီ အထွေထွေရွေးကောက်ပွဲ ကျင်းပနိုင်ရေး ကြိုတင်ပြင်ဆင်ဆောင်ရွက်လျက်ရှိကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် မိတ္ထီလာခရိုင်အတွင်းရှိ ခရိုင်၊ မြို့နယ်အဆင့်ဌာနဆိုင်ရာ တာဝန်ရှိသူများ၊ မြို့မိမြို့ဖများနှင့်တွေ့ဆုံစဉ် ၂၀၂၄ ခုနှစ်၊ ဇွန်လ ၁၅ ရက်နေ့က အထက်ပါအတိုင်း  ပြောကြား ခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “မိမိတို့အနေဖြင့် လာမည့် အောက်တိုဘာလအတွင်း လူဦးရေနှင့် သန်းခေါင် စာရင်း ကောက်ယူနိုင်ရေး ဆောင်ရွက်လျက်ရှိပြီး လာမည့်နှစ်(၂၀၂၅ ခုနှစ်)အတွင်း လွတ်လပ်၍ တရားမျှတသည့် ပါတီစုံ ဒီမိုကရေစီ အထွေထွေရွေးကောက်ပွဲ ကျင်းပနိုင်ရေး ကြိုတင်ပြင်ဆင် ဆောင်ရွက်လျက်ရှိ သည်”ဟု ပြောသည်။

နိုင်ငံရေးကို အကြောင်းပြုပြီး မိမိတို့ ဆောင်ရွက်ရမည့် လုပ်ငန်းများကို ဆောင်ရွက်ခြင်းမရှိပါက မိမိတို့၏ တိုးတက်မှုများ နောက်ကျနေခဲ့မည်ဖြစ်ကြောင်း ၎င်းက ပြောသည်။

နစကသည် ၂၀၂၄ ခုနှစ်၊ အောက်တိုဘာလအတွင်းမှာ နိုင်ငံတစ်ဝှမ်း သန်းခေါင်စာရင်း ကောက်မည်ဖြစ်ပြီး ၂၀၂၅ ခုနှစ်အတွင်းမှာ ရွေးကောက်ပွဲကျင်းပ၍ ၂၀၂၆ ခုနှစ်မှာ အနိုင်ရသည့် နိုင်ငံရေးပါတီအား နိုင်ငံတော် အာဏာလွှဲပြောင်းပေးရန် စီစဉ်ထားပုံရသည်ဟု နိုင်ငံရေးလေ့လာသူများက သုံးသပ်လျက်ရှိသည်။

လက်ရှိတွင် နိုင်ငံတစ်ဝှမ်း လက်နက်ကိုင် ပဋိပက္ခများ ဖြစ်ပွားနေသလို နယ်မြေမတည်ငြိမ်ခြင်းနှင့် တရားဥပဒေ စိုးမိုးမှု အားနည်းနေခြင်းကြောင့် လက်တွေ့မှာ ဖြစ်နိုင်ခြေအလွန်နည်းသည်ဟုလည်း ထောက်ပြမှုများရှိနေသည်။

ထို့ကြောင့် နစကသည် ရွေးကောက်ပွဲ ကျင်းပနိုင်ရေးအတွက် လက်နက်ကိုင်ပဋိပက္ခများ ချုပ်ငြိမ်းရေး ကြိုးပမ်း ရန်လိုအပ်သလို နယ်မြေတည်ငြိမ်ရေးနှင့် တရားဥပဒေစိုးမိုးရေး ရရှိအောင်လည်း အကောင်အထည်ဖော်ရန် လိုအပ်သည်ဟု နိုင်ငံရေးပါတီများက ပြောသည်။

CNI News
၂၀၂၄ ခုနှစ်၊ ဇွန်လ ၁၄

ကချင်ပြည်နယ်၊ ဆော့လော်မြို့နယ်၊ ချီဖွေမြို့နယ်၊ ကံပိုက်တည်ဒေသတွင် တာဝန်ထမ်းဆောင်နေသည့် နယ်ခြားစောင့်တပ်၊ ပြည်သူ့စစ်များသည် ကချင်လွတ်လပ်ရေးတပ်မတော်(KIA)နှင့် KPDF တို့ကို တိုက်ခိုက် ချေမှုန်းရန် ဦးဇခုန်တိန့်ယိန်းက ၂၀၂၄ ခုနှစ်၊ ဇွန်လ ၇ ရက်နေ့စွဲဖြင့် စာတစ်စောင့် ထုတ်ပြန်၍ အမိန့်ပေးခဲ့သည်။

နယ်ခြားစောင့်တပ်ဖွဲ့ ၁၀၀၁၊ ၁၀၀၂၊ ၁၀၀၃ တပ်ဖွဲ့မှူးများနှင့် ဒေသလက်နက်ကိုင် ပြည်သူ့စစ်ရဲဘော်များအား မိမိတို့ ဒေသကို တိုက်ခိုက်သတ်ဖြတ် ဖျက်ဆီးရန် ဝင်ရောက်တိုက်ခိုက်လာသည့် KIA နှင့် PDF ပူးပေါင်းအဖွဲ့ များအား ယတိပြတ် ခုခံချေမှုန်းရန် “စစ်မိန့်”ပေးအပ်လိုက်သည်ဟု ကချင်ပြည်နယ်အထူးဒေသ(၁)ဥက္ကဋ္ဌ ဦးဇခုန်တိန့်ယိန်းက ထုတ်ပြန်ခဲ့သည်။

ဦးဇခုန်တိန့်ယိန်းက “ ငြိမ်းချမ်းရေးကို ဖျက်ဆီးရန်၊ နိုင်ငံတော်ကို ဖျက်ဆီးရန်၊ တိုင်းရင်းသားလူမျိုး ပြည်သူများ ၏ဘဝ သာယာအေးချမ်းမှုကို ဖျက်ဆီးရန် KIA နှင့် PDF ကျူးကျော်လာပြီဖြစ်သဖြင့် ကျနော်တို့ ဆော့လော်မြို့ နယ်၊ ချီဖွေမြို့နယ်၊ ကံပိုက်တည်ဒေသတွင် တာဝန်ထမ်းဆောင်နေသည့် နယ်ခြားစောင့်တပ်(နခစ)၊ ပြည်သူ့စစ် (ပသစ)များသည် မြေတစ်လက်မတိုင်းကို ကာကွယ်သည့် ခုခံစစ်ဆင် တိုက်ခိုက်ချေမှုန်းကြရန် အမိန့်ပေး သည်”ဟု ပြောသည်။

ထို့နောက် မိမိတို့ ဒေသကို ဝင်ရောက်လာသည့် ရန်သူမှန်သမျှကို တားဆီးချေမှုန်းကြရမည်၊ အိမ်အတွင်း ဝင်ရောက်လာသော ရန်သူများ ပြန်မထွက်သွားရန် တိုက်ခိုက်ချေမှုန်းကြပါ၊ ရှေ့-နောက် ပိတ်ပြီး တိုက်ခိုက် ချေမှုန်းကြပါ၊ ပြန်လည်ထွက်သွားခွင့်မပေးကြပါနှင့်ဟု ၎င်း၏ စစ်မိန့်ပေးခြင်း စာတွင် ဖော်ပြထားသည်။

လက်ရှိတွင် KIA နှင့် KPDF ပူးပေါင်း၍ ဦးစခုန်တိန့်ယိန်း၏ နယ်မြေများကို ဝင်ရောက်တိုက်ခိုက်လျက်ရှိပြီး ကံပိုက်တည် နယ်စပ်ကုန်သွယ်ရေးကို ထိန်းချုပ်ရန် ကြိုးပမ်းလျက်ရှိနေသည်။

ထို့နောက် ဦးစခုန်တိန့်ယိန်း လက်အောက်ရှိ နယ်ခြားစောင့်တပ်နှင့် ပြည်သူ့စစ်များသည် KIA-KPDF တို့ကို ခုခံ တိုက်ခိုက်လျက်ရှိသည်။

ဦးစခုန်တိန့်ယိန်းသည် ၁၉၈၉ ခုနှစ်က ဗမာပြည်ကွန်မြူနစ်ပါတီ ခွဲထွက်၍ တပ်မတော်နှင့်ငြိမ်းချမ်းရေး ရယူကာ ကချင်ဒီမိုကရေစီသစ်တပ်မတော်(NDA-K)ဟုဆိုကာ လှုပ်ရှားခဲ့ပြီးနောက် ၂၀၀၉ ခုနှစ်တွင် နယ်ခြားစောင့်တပ် အဖြစ် ပြောင်းလဲခဲ့သည်။

အလားတူ ဦးစခုန်တိန့်ယိန်း ထိန်းချုပ်ထားသည့် ဆော့လော်မြို့နယ်၊ ကံပိုက်တည် (ကန်ပိုက်တည်)မြို့နယ်၊ ပန်ဝါမြို့နယ်၊ ဆဒုံးမြို့နယ်တို့ကို ကချင်ပြည်နယ်အထူးဒေသ(၁)အဖြစ် တပ်မတော်က ၁၉၈၉ ခုနှစ်က သတ်မှတ်ပေးထားသည်။

CNI News

၂၀၂၄ ခုနှစ်၊ ဇွန်လ ၁၄

ရှမ်းပြည်နယ်မြောက်ပိုင်းမှာ မြန်မာ့တပ်မတော် အပါအဝင် တိုင်းရင်းသားလက်နက်ကိုင် အဖွဲ့အစည်းများပါ စစ်ရေးပြင်ဆင်မှု ပိုမိုလုပ်ဆောင်လာခြင်းကြောင့် တိုက်ပွဲပြန်လည်ဖြစ်ပွားလာမှာကို ရှမ်းပြည်နယ်မြောက်ပိုင်းရှိ ဒေသခံများက စိုးရိမ်နေ ကြသည်။

မိမိတို့ ရှမ်းမြောက်တွင် စစ်ပွဲပြန်လည်ဖြစ်ပွားရန် အခြေအနေ ရှိနေကြောင်း၊ တိမ်းရှောင်နိုင်သည့် ဒေသခံများက တိမ်းရှောင်ကြပြီဖြစ်ကြောင်း ကျောက်မဲမြို့ ဒေသခံတစ်ဦးက CNI သတင်းဌာနသို့ ပြောသည်။

၎င်းက “ခုတော့ ရှမ်းနယ်တစ်နယ်လုံးက မကောင်းဘူးဗျ၊ ကျနော်တို့ ကြားရတာပေါ့နော်၊ နိုင်ငံရေး မိုးလေဝသ၊ စစ်ရေး မိုးလေဝသ မကောင်းဘူးလို့ပဲ ပြောရမှာပေါ့။ အဓိက စစ်ရေးလမ်းကြောင်းပေါ် ရောက်နေတဲ့အခါ ဘယ်လို နေလဲဆိုတော့ စစ်ဖြစ်မှာပေါ့။ ကျနော်တို့ဖက်ခြမ်းမှာတော့ လူတွေအားလုံးကတော့ ပြေးနိုင်တဲ့လူ ပြေးပေါ့ဗျာ၊ ရှောင်နိုင်တဲ့သူရှောင်ကြပေါ့၊ မရှောင်နိုင်တဲ့သူတွေလည်း ဒီလိုပဲ ငုတ်တုတ်ကလေး နေကြရတာပေါ့။ စိုးရိမ် ထိတ်လန့် မှုရှိတာပေါ့၊ ဒီကြားထဲ ကုန်ဈေးနှုန်းကလည်း နှိပ်စက်သေးတယ်လေ” ဟု ပြောသည်။

ယခုရက်ပိုင်းအတွင်း မြန်မာ့တပ်မတော်မှ ရှမ်းပြည်နယ်မြောက်ပိုင်းသို့ အင်အားဖြည့်တင်းမှု လုပ်ဆောင်နေသလို ပလောင်ပြည်လွတ်မြောက်ရေးတပ်ဦး (PSLF/TNLA) ကလည်း စစ်ရေးအတွက် ပြင်ဆင်မှု လုပ်ဆောင်နေကြောင်း သိရသည်။

TNLA တပ်ဖွဲ့ကိုတွေ့ရစဉ်

TNLA ဘက်က ထိုးစစ်ဆင် တိုက်ခိုက်လာပါက ကိုးကန့်တပ် (MNDAA) က ၎င်းတို့နှင့်အတူ ပါလာနိုင်ကြောင်း၊ လက်ရှိ အနေအထားအရ မြန်မာ့တပ်မတော်က ခံစစ်အခြေအနေဖြစ်ကြောင်း မြန်မာ့နိုင်ငံရေး လေ့လာသုံးသပ်သူ တစ်ဦးက CNI သတင်းဌာနသို့ ပြောသည်။

၎င်းက “ဒီနေရာမှာ ပြောချင်တာကတော့ တပ်ရဲ့ လှုပ်ရှားမှုကတော့ Defensive Action ပဲရှိတယ်။ ခုခံကာကွယ်ဖို့ ပြင်ဆင်တာပဲ ရှိမယ်။ Offensive Action ပေါ့နော်၊ ထိုးစစ်အတွက် ပြင်ဆင်တာကတော့ ကြားရပြီး မြင်တော့ မမြင်ရဘူးပေါ့နော်၊ သုံးသပ်ကြည့်သရွေ့တော့ တိုင်းရင်းသား အထူးသဖြင့် TNLA ပေါ့နော်၊ TNLA ဘက်က ဖြစ်နေ တယ်။ ဒါပေမဲ့ TNLA ဖြစ်လာပြီဆိုရင် မလွဲမသွေ MNDAA တို့ ဘာတို့ ပါလာနိုင်တာပေါ့ဗျာ၊ အဲဒီတော့ ပြောချင် တာတော့ ဖြစ်နိုင်တဲ့ အလားအလာရှိတယ်။ စစ်တပ်ဘက်ကတော့ သူထိုးစစ်အတွက်တော့ မဟုတ်ဘူး။ စစ်တပ်က တော့ အမှန်တိုင်းပြောရရင် ခုခံကာကွယ်ဖို့သာလျှင်ဖြစ်တယ်။ ထိုးစစ်အသွင်ဖက်ကို တိုက်ခိုက်မယ့် သူကတော့ TNLA၊ MNDAA အဓိကလို့ ကျနော်တို့ သွားတွေ့တယ်ပေါ့နော်” ဟု ပြောသည်။

လက်ရှိတွင် နိုင်ငံတစ်ဝှမ်း ဖြစ်ပွားနေသော လက်နက်ကိုင်ပဋိပက္ခများကြောင့် ပြည်သူလူထုများကို အကူအညီ ပေးမှု နည်းပါးနေကြောင်း၊ အချိန်မရွေး တိုက်ပွဲဖြစ်ပွားနိုင်သည့် အနေအထားဖြစ်နေကြောင်း ရှမ်းပြည်နယ် မြောက်ပိုင်း ကျောက်မဲမြို့ဒေသခံတစ်ဦးက ပြောသည်။

MNDAA တပ်ဖွဲ့ကိုတွေ့ရစဉ်

၎င်းက “တောင်မင်း၊ မြောက်မင်း မကယ်နိုင်သလိုပေါ့ဗျာ၊ သူတို့ ဒုက္ခဖြစ်နေရင်လည်း အချင်းချင်းတောင် မကယ် နိုင်ဘူးဗျ၊ ခက်နေတာပေါ့။ ကျနော်ဆိုလို့ရှိရင်လည်း ကျနော်တို့ဖက်မှာ စစ်ဖြစ်ပြီး‌တော့ ပြေးတဲ့ စစ်ရှောင်တွေ ရာထောင်ချီ ဆင်းလာတဲ့အချိန် ကျနော်တို့က သွားဆွဲထုတ်တယ်ဗျ၊ စစ်ဘေးဒုက္ခသည်တွေကို ကျနော်တို့က သွားဆွဲထုတ် ကူညီစောင့်ရှောက်ကျွေးမွေး အများကြီးလုပ်ပေးခဲ့တယ်။ အခုကျနော်တို့ မြို့ပေါ် ဧရိယာတွေ တစ်နိုင်ငံလုံးပါပဲ နေရာအနှံ ဒီလို မတည်မငြိမ် ဖြစ်လာတဲ့အခါကြတော့ ကိုယ့်ကြတော့ ပြေးစရာ မြေမရှိဘူးလေ။ တောရွာက လူတွေ မြို့ကိုပြေးလာတယ်ဆိုတာ သူတို့မှာ အားကိုးရာရှိသေးတယ်။ ကယ်တင်စောင့်ရှောက်မယ့်သူ ရှိခဲ့သေးတယ်။ ကယ်တင်စောင့်ရှောက်ခြင်း ခံရတယ်။ ခုကျနော်တို့က ဘယ်ပြေးမှာတုန်း ကျနော်တို့ကို ဘယ်သူ လာကယ်မှာတုန်း၊ အဲဒီလိုတွေ ဖြစ်နေတာလေ၊ တစ်နိုင်ငံလုံးမှာ စစ်ရှောင်ရမယ့် နေရာဆိုတာ လုံခြုံမှု မရှိဘူးပေါ့။ ကိုယ့်ဒေသမှာ ကိုယ်နေရာ လုံခြုံသေးတယ်လို့ ပြောရမယ်ဆိုရင်လည်း နေ့နေ့ညည ဘယ်နေ့လဲ၊ ဘယ်အချိန်လဲ ထပေါက်ကွဲနိုင်တော့ ခက်တယ်လေ” ဟု ပြောသည်။ 

ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ညီနောင်မဟာမိတ်သုံးဖွဲ့၏ ၁၀၂၇ စစ်ဆင်ရေး အတွင်း ရှမ်းပြည်နယ်မြောက်ပိုင်းရှိ မြို့နယ်အများအပြားကို TNLA နှင့် MNDAA တို့က သိမ်းပိုက်ရရှိခဲ့သည်။

ထို့နောက် တရုတ်နိုင်ငံ၏ ကြားဝင်စေ့စပ်မှုအရ ဟိုင်ဂင်သဘောတူညီချက်ရရှိကာ ရှမ်းမြောက်မှာ အပစ်အခတ် ရပ်စဲခဲ့ပြီး လက်ရှိတွင် နှစ်ဖက်စစ်ရေး တင်းမာလာခဲ့သည်။

လက်ရှိတွင် TNLA က လားရှိုးစစ်ဌာနချုပ်အနီးသို့ အင်အား အလုံးအရင်းဖြင့် ချဉ်းကပ်၍ စစ်ရေးပြင်ဆင်နေသလို မြန်မာ့တပ်မတော်ကလည်း မန္တလေး-နမ္မတူသွား ကာလမ်းကို မြေတူး၍ ဖြတ်တောက်ထားကြောင်း သိရသည်။

CNI News

၂၀၂၄ ခုနှစ်၊ ဇွန်လ ၁၃

ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး ကိုကိုဦးနှင့် အိန္ဒိယတပ်မတော်မှ တွဲဖက်ထောက်လှမ်း ရေးညွှန်ကြားရေးမှူးချုပ် Major General Charanjeet Singh Dewgun, YSM, ADG MI(A) ဦးဆောင်သည့် ကိုယ်စားလှယ်အဖွဲ့တို့ ဇွန်လ ၁၃ ရက်နေ့က တွေ့ဆုံဆွေးနွေးခဲ့ကြသည်။

အလားတူ ဇွန်လ ၁၂ ရက်နေ့ကလည်း တပ်မတော် ညှိနှိုင်းကွပ်ကဲရေးမှူး(ကြည်း၊ ရေ၊ လေ) ဗိုလ်ချုပ်ကြီးမောင်မောင်အေးနှင့် အိန္ဒိယတပ်မတော် တွဲဖက်ထောက်လှမ်းရေးညွှန်ကြားရေးမှူးချုပ်တို့ နှစ်နိုင်ငံနယ်စပ် ဒေသတည်ငြိမ်အေးချမ်း ရေးကိစ္စများကို ဆွေးနွေးခဲ့ကြကြောင်း သိရသည်။

အိန္ဒိယနိုင်ငံသည် မြန်မာနိုင်ငံ၏ ချင်းပြည်နယ်နှင့် စစ်ကိုင်းတိုင်းဒေသကြီးတို့ဖြင့် ကီလိုမီတာ ၁၀၀၀ ကျော် နယ်နိမိတ်ထိစပ်လျက် ရှိပြီး နှစ်နိုင်ငံနယ်စပ်တစ် လျှောက်မှာ လက်နက်ကိုင် ပဋိပက္ခများ ဖြစ်ပွားလျက်ရှိနေ သည်။

၂၀၂၄ ခုနှစ်၊ ဇွန်လ ၁၃ ရက်နေ့က ညှိနှိုင်းကွပ်ကဲရေးမှူး(ကြည်း၊ရေ၊လေ) ဗိုလ်ချုပ်ကြီးမောင်မောင်အေး နှင့် အိန္ဒိယတပ်မတော် တွဲဖက်ထောက်လှမ်းရေးညွှန်ကြားရေးမှူးတို့တွေ့ဆုံဆွေးနွေးနေစဉ်

အဆိုပါ လက်နက်ကိုင် ပဋိပက္ခများ ချုပ်ငြိမ်းရေးနှင့် နယ်စပ်ဒေသ ကုန်သွယ်ရေးများ ပြန်လည် ဆောင်ရွက်နိုင် ရေး အိန္ဒိယဘက်က လိုလာလျက်ရှိနေသည်။

ဒုတိယဗိုလ်ချုပ်ကြီး ကိုကိုဦးသည် အနောက်မြောက်ပိုင်းတိုင်းစစ်ဌာနချုပ်၊ မြောက်ပိုင်းတိုင်းစစ်ဌာနချုပ်၊ အလယ်ပိုင်းတိုင်းစစ်ဌာနချုပ် စသည့် စစ်တိုင်း ၃ တိုင်းကို ကွပ်ကဲရသည့် ကစထ-၁ မှူး တာဝန်ကို ယူထားသူဖြစ်သည်။

အဆိုပါ ကစထ-၁ သည် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ကချင် ပြည်နယ်၊ ချင်းပြည်နယ် တို့ကို တည်ငြိမ်အေးချမ်းအောင် ကွပ်ကဲရခြင်းဖြစ်သည်။

CNI News

၂၀၂၄ ခုနှစ်၊ ဇွန်လ ၁၃

ကချင်လွတ်လပ်ရေးတပ်မတော် (KIA) နှင့် ပလောင်ပြည်လွတ်မြောက်ရေးတပ်ဦး (PLSF/TNLA) တို့အကြား ပြဿနာကြီးထွားလာမှုကို ကြားဝင်ဖြေရှင်းပေးရန် TNLA ၏တောင်းဆိုမှုနှင့်ပတ်သက်ပြီး မိမိတို့ထံ ညွှန်ကြားချက် မရှိသေးကြောင်း KIA မှ ပြန်ကြားရေးတာဝန်ခံ ဗိုလ်မှူးကြီးနော်ဘူက CNI သတင်းဌာနသို့ ပြောသည်။

ရှမ်းပြည်နယ်မြောက်ပိုင်းမှာ KIA နှင့် TNLA တို့ကြား ဖြစ်ပွားနေသော နယ်မြေအငြင်းပွားမှုနှင့် အုပ်ချုပ်ရေး အငြင်း ပွားမှု ပြဿနာများကို ကြားဝင်ဖြေရှင်းပေးရန် ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ (FPNCC) ထံ ပေးပို့သည့် စာတစ်စောင်ထွက်ပေါ်ခဲ့သည်။

အဆိုပါ ကိစ္စနှင့်ပတ်သက်၍ အထက်က ညွှန်ကြားချက် မရှိသေးသလို မိမိတို့ အနေဖြင့်လည်း မကြားသိရသေး ကြောင်း KIA မှ ဗိုလ်မှူးကြီးနော်ဘူက ပြောသည်။

၎င်းက “ကျနော်တို့ သတင်းဌာန အနေနဲ့ ဘာမှမကြားသိရပါဘူး။ ကျနော်တို့ ဗဟိုကော်မတီ လူကြီးတွေဆီမှာ စာတွေရောက်တာလား။ အချင်းချင်း ညှိနှိုင်းဆွေးနွေးတာ ရှိတာလားတော့ ကျနော် မပြောတတ်ဘူးပေါ့နော်၊ ကျနော်တို့ ညွှန်ကြားတာလည်း မတွေ့ဘူး။ အသိပေးတာလည်း မရှိဘူး။ ကျနော်တို့ သတင်းဌာနအနေနဲ့ ကြားသိ ရတာတော့ မရှိသေးပါဘူး” ဟု ပြောသည်။

TNLA စီမံခန့်ခွဲမှုအောက်ရှိ မန်တုံမြို့နယ် အွည်လော-မိုင်းဘော်ဒေသမှ ဘော်ဟိုကျန့်သတ္ထုတွင်း လုပ်ငန်းများ ရှေ့ဆက်မလုပ်နိုင်ရန် KIA က အမျိုးမျိုးနှောင့်ယှက်နေကြောင်း၊ ထို့အတူ မန်တုံ၊ နမ္မတူ၊ ကွတ်ခိုင်ဒေသရှိ မိမိတို့ အုပ်ချုပ်ရေးလုပ်ငန်းများကို နှောင့်ယှက်သည့်အပြင် ဒေသခံလူထု၏ ပညာရေး၊ ကျန်းမာရေးလုပ်ငန်းများ လည်ပတ်နိုင်ရန် ကြိုးစားနေမှုကို ဟန့်တားလျက်ရှိကြောင်း TNLA ၏ စာထဲတွင် ဖော်ပြထားသည်။

TNLA နဲ့ UWSA ရဲဘော် ၂ ဦးကိုတွေ့ရစဉ်

ထိုလုပ်ဆောင်ချက်များကြောင့် TNLA အောက်ခြေတပ်ဖွဲ့များနှင့် မကြာခဏ ပွတ်တိုက်မှုများ ဖြစ်ပွားလျက်ရှိပြီး နှစ်ဖက်အဖွဲ့အစည်း၏ ပြဿနာမှာ ထိန်းသိမ်းရန် ခက်ခဲသည့်အခြေအနေကို ရောက်ရှိလာကြောင်း၊ ထို့ကြောင့် ပြဿနာများကို ကြားဝင်ဖြေရှင်းပေးပါရန် တောင်းခံကြောင်း FPNCC သို့ TNLA က ပေးပို့သည့်စာထဲတွင် ဖော်ပြ ထားသည်။

FPNCC တွင် ကိုးကန့်တပ်ဖွဲ့(MNDAA)၊ ‘ဝ’တပ်ဖွဲ့(UWSA)၊ ရှမ်းတပ်ဖွဲ့(SSPP)၊ ပလောင်တပ်ဖွဲ့(TNLA)၊ ကချင်တပ် ဖွဲ့(KIA)၊ ရခိုင်တပ်ဖွဲ့(AA)၊ မိုင်းလားအဖွဲ့(NDAA) စသည့် လက်နက်ကိုင် ၇ ဖွဲ့ပါဝင်ကြသည်။

အဆိုပါကိစ္စနှင့် ပတ်သက်၍ TNLA ထံ ဆက်သွယ်ခဲ့သော်လည်း ဖုန်းလက်ခံဖြေကြားခြင်း မရှိပေ။ 

သို့သော်လည်း မိမိတို့အနေဖြင့် မဟာမိတ် အဖွဲ့အစည်းအကြားလည်းကောင်း၊ အခြားသော လက်နက်ကိုင် အဖွဲ့အစည်းအကြားလည်းကောင်း နိုင်ငံရေးအရ တွေ့ဆုံဆွေးနွေး၍ ပြေလည်ပြီဖြစ်ကြောင်း TNLA မှ ပြန်ကြားရေးတာဝန်ခံ လွေးယေဦးက မေလကုန်ပိုင်းမှာ CNI သတင်းဌာနသို့ ပြောကြားထားသည်။

ပဋိပက္ခမဖြစ်ပွားရန် ညှိနှိုင်းအဖြေရှာရမှာဖြစ်ကြောင်း၊ နှစ်ဖက်အဖွဲ့အစည်းအနေဖြင့် ထိန်းထိန်းသိမ်းသိမ်း လုပ်ရမှာဖြစ်ကြောင်း တအာင်း(ပလောင်) အမျိုးသားပါတီ (TNP) မှ ဦးအေးမောင်က CNI သတင်းဌာနသို့ ပြောသည်။

TNLA ရဲဘော် ၂ ဦးကိုတွေ့ရစဉ်

၎င်းက “ဒီကိစ္စနဲ့ ပတ်သက်ပြီးမှ ကျနော်အမြင်ပေါ့နော်၊ TNLA နဲ့ ဆွေးနွေးတာ ကောင်းတယ်လေ၊ ကျနော်တို့ လွှတ်တော်ကိုယ်စားလှယ်အနေနဲ့ စစ်ရေးစစ်ရာနဲ့ ပတ်သက်ပြီးတော့ ကျနော်တို့ ဘာမှပြောစရာတော့ မရှိဘူးပေါ့။ ကျနော်တို့အမြင်ပေါ့နော် ညှိနှိုင်းပြီးမှ အဖြေရှာတာ အကောင်းဆုံးပေါ့နော်၊ ပဋိပက္ခ မဖြစ်အောင်တော့ နှစ်ဖက် စလုံးတော့ ထိန်းထိန်းသိမ်းသိမ်းတော့ လုပ်ရမှာပေါ့နော်၊ ဒါပေမဲ့ ကျနော်ခုနက ပြောသလိုပေါ့ လွှတ်တော် ကိုယ်စားလှယ် အနေနဲ့သည် ဝင်ပြီးမှလည်း ထည်ထည်ဝင်ဝင်လည်း မပြောချင်ဘူး။ ပြောလို့လည်း မကောင်းဘူး ပေါ့ ကျနော်တို့ နိုင်ငံရေးသမားတွေပေါ့၊ စစ်ရေးစစ်ရာနဲ့ ပတ်သက်လို့ ကျနော်တို့ နည်းနည်းတော့ လက်ရှောင်ထား တယ်ပေါ့နော်” ဟု ပြောသည်။

ညီနောင်မဟာမိတ်သုံးဖွဲ့က ဖော်ဆောင်ခဲ့သည့် ၁၀၂၇ စစ်ဆင်ရေးနောက်ပိုင်း ရှမ်းပြည်နယ်မြောက်ပိုင်းရှိ မန်တုံ၊ နမ့်ဆန်၊ နမ့်ခမ်း၊ နမ္မတူ၊ ကွတ်ခိုင်၊ မိုင်းငေါ့နှင့် မိုင်းလုံမြို့တို့ကို TNLA က သိမ်းပိုက်ထားပြီး အုပ်ချုပ်ရေးကို ထူထောင်လျက်ရှိနေသည်။ 

ထို့နောက် ရှမ်းပြည်နယ်မြောက်ပိုင်းတွင် လှုပ်ရှားကြသည့် လက်နက်ကိုင်တပ်ဖွဲ့ အချင်းချင်းအကြား နယ်မြေ အငြင်းပွားမှုများနှင့် အုပ်ချုပ်ရေး အငြင်းပွားမှုများ ကျယ်ကျယ်ပြန့်ပြန့် ဖြစ်ပေါ်လာခဲ့ပြီး ထိတွေ့တိုက်ပွဲများ ဖြစ်ပွားမှု ရှိလာခဲ့သည်။

ရှမ်းပြည်နယ်မြောက်ပိုင်းတွင် ကိုးကန့်တပ်(MNDAA)၊ TNLA၊ KIA၊ AA၊ SSPP၊ UWSA၊ PDF၊ ပြည်သူ့စစ်၊ မြန်မာ့တပ်မတော်၊ နယ်ခြားစောင့်တပ် စသည့် လက်နက်တပ်ဆင်ထားသော အဖွဲ့အစည်းများ လှုပ်ရှား လျက်ရှိသည်။

CNI News

၂၀၂၄ ခုနှစ်၊ ဇွန် ၁၂

ပြည်တွင်းရွှေဈေးနှုန်းနှင့် နိုင်ငံခြားငွေဈေးနှုန်း တည်ငြိမ်ရေးမှာ နိုင်ငံရေးကောင်းရန် လိုအပ်ကြောင်း ရွှေဈေးကွက်နှင့် စီးပွားရေး လေ့လာသုံးသပ်သူများက ထောက်ပြကြသည်။

နစကအနေဖြင့် ပြည်တွင်း ရွှေဈေးနှုန်းနှင့် နိုင်ငံခြားငွေ ဈေးနှုန်းများ မတည်မငြိမ်ဖြစ်အောင် လုပ်ဆောင်သည် ဟုဆိုကာ ရွှေလုပ်ငန်းရှင်အချို့နှင့် နိုင်ငံခြားငွေ လဲ/လှယ်သူများကို ဖမ်းဆီးအရေးယူမှု လုပ်ဆောင်လျက် ရှိနေ သည်။

ထိုသို့ အရေးယူမှုမှာ ယာယီအားဖြင့် တည်ငြိမ်နိုင်သော်လည်း ရေရှည်တွင် အဆင်မပြေနိုင်ကြောင်း၊ စီးပွားရေး တည်ငြိမ်ရန် နိုင်ငံရေးကောင်းဖို့ လိုအပ်ကြောင်း၊ ပို့ကုန်တင်ပို့မှု မရှိဘဲ သွင်းကုန်များနေကြောင်း ရွှေဈေးကွက် လေ့လာသုံးသပ်သူတစ်ဦးက CNI သတင်းဌာနသို့ ပြောသည်။

၎င်းက “နိုင်ငံရေး ရှု့ထောင့်က မကြည့်ဘဲနဲ့ တခြားစီးပွားရေး ရှု့ထောင့်က ပြောင်းကြည့်၊ အခုလောလောဆယ်က နစကမှာက ဒေါ်လာလိုအပ်ချက်က များနေတာ အဲဒီဟာကို မဖြည့်ပေးနိုင်တာ၊ အဲဒီဟာကို ဖြည့်ပေးနိုင်ရင် အဆင်ပြေကောင်း ပြေလိမ့်မယ်လေ၊ ဒီဟာက ဇာတ်လမ်းဦးတည်ခဲ့တာက နိုင်ငံရေးကနေ ဦးတည်ခဲ့တာလေ၊ နိုင်ငံရေးကြောင့် ဖြစ်လာတဲ့ ဇာတ်လမ်းဆိုပါတော့ နိုင်ငံရေးကောင်းမှပဲကိုရမှာ၊ နိုင်ငံရေး မကောင်းဘဲနဲ့ ရှင်းရှင်း ပြောရရင် သူတို့အနေနဲ့ လုပ်ရကိုင်ရတာ ဘယ်လိုမှ လွယ်မှာမဟုတ်ဘူး။ တခြားနည်းလမ်းတွေ ရှိသလားဆိုတော့ ရှိပါတယ်၊ ဒါပေမဲ့ နိုင်ငံရေး မကောင်းဘူးဖြစ်တဲ့အတွက် လောလောဆယ်က export (ပို့ကုန်) မရှိဘူး။ import (သွင်းကုန်) တွေများနေတယ်၊ အဲဒီလိုပေါ့၊ export က မရှိသလောက်ကို နည်းပါးနေတယ်၊ နောက်ပြီးတော့ နိုင်ငံခြားရင်းနှီးမြှုပ်နှံမှုက အကုန်ထွက်တယ်၊ နောက်တစ်ခုက ဒေါ်လာအစားထိုး၊ ဒေါ်လာအစားထိုးနဲ့က ပြောသလောက် မလွယ်ပါဘူး။ နောက်တစ်ခု သွားကြည့်တော့ Border Trading ( နယ်စပ်ကုန်သွယ်ရေးမှာလည်း အဆင်ပြေတာမျိုးရှိလားဆိုတော့ အခုလောလောဆယ် နယ်စပ်ကုန်သွယ်ရေး ဘယ်လောက်မှ မရှိတော့ဘူး။ အခု မြဝတီ ကျန်မယ်၊ မူဆယ်ရှိမယ်၊ ဒီလောက်ပါပဲ၊ ပြီးရင် ရနောင်းဖက်မှာ ရှိမယ်။ ဒါပဲ အရမ်းကြီး များများစားစား တော့ မရှိတော့ဘူးပေါ့” ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ နိုင်ငံရေးပါတီများတွေ့ဆုံစဉ်

နစကသည် ရွှေဈေးနှုန်း မတည်မငြိမ်ဖြစ်အောင် ဆောင်ရွက်လျက်ရှိသည်ဟုဆိုကာ ဝိန့်စိန်ရွှေဆိုင်၊ အောင်သမာဓိ ရွှေဆိုင်၊ ဇွဲထက်ရွှေဆိုင်တို့မှ သူဋ္ဌေးများ အပါအဝင် လူ ၁၀ ဦးကို ၂၀၂၄ ခုနှစ်၊ ဇွန်လ ၂ ရက်က ဖမ်းဆီးရန် ဝရမ်း ထုတ်ထားသည်။

ထို့အတူ ရွှေဈေးနှုန်း မတည်မငြိမ်ဖြစ်အောင် ဆောင်ရွက်လျက်ရှိပြီး တရားမဝင် ရွှေအရောင်းအဝယ် ပြုလုပ်နေ သည့် ပွဲစားများ အပါအဝင် စုစုပေါင်း တရားခံ ၂၁ ဦးအား ဖော်ထုတ် ဖမ်းဆီး စစ်ဆေးလျက်ရှိကြောင်း ထုတ်ပြန် ခဲ့သည်။

စီးပွားရေး တည်ငြိမ်သည့် အနေအထားမရှိပါက ငွေတန်ဖိုး ကျဆင်းသည့် အပိုင်းများဖြစ်လာပြီး ပြည်သူလူထု အပေါ် သက်ရောက်မှု ရှိလာမှာဖြစ်ကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

၎င်းက “ဒီဟာကတော့ စီးပွားရေးနဲ့ သက်ဆိုင်တဲ့ အပိုင်းဖြစ်ပါတယ်။ ဒါတွေက စီးပွားရေးတွေ ကမောက်ကမ ဖြစ်တဲ့အချိန်မှာ ဘာမဆို ဖြစ်လာနိုင်တာပေါ့ဗျာ၊ ဒါကြောင့်လည်း စီးပွားရေးတည်ငြိမ်ဖို့ ပထမဦးဆုံး အရေးတဲ့ အချက်ဆိုတဲ့ဟာမျိုး ပြောလိုပါတယ်။ ဘယ်လိုပဲဖြစ်နေဖြစ်နေ စီးပွားရေးက တည်ငြိမ်ပြီးမှ တည်ငြိမ်မှု မရှိဘူး ဆိုရင် ဒီဟာတွေက နောက်ဆက်တွဲကတော့ ဖြစ်လာတော့မှာပဲ ဒီဟာတော့ ငွေတန်ဖိုးကျတဲ့ အပိုင်းတွေလည်း ဖြစ်လာလိမ့်မယ်၊ စီးပွားရေးကျတဲ့ အပိုင်းတွေလည်း ဖြစ်လာမယ်၊ ဒါကတော့ အောက်ခြေ ကျနော်တို့ ပြည်သူလူထုတွေကပဲ အဓိက သက်ရောက်မှုကတော့ ပြည်သူလူထုတွေ အပေါ်မှာပဲ မူတည်ပါလိမ့်မယ်” ဟု ပြောသည်။

မြ၀တီကုန်သွယ်ရေးဇုန်ကိုတွေ့ရစဉ်

တိုင်းပြည်၏စီးပွားရေး ပြန်လည်ကောင်းမွန်ရန် ကုန်ထုတ်လုပ်မှုကို အများအပြား လုပ်ဆောင်သင့်ကြောင်း ပြည်သူ့လွှတ်တော်ကိုယ်စားလှယ်ဟောင်း ဦးစိန်ဝင်းက CNI သတင်းဌာနသို့ ပြောသည်။

၎င်းက “ဒီလိုအချိန်မျိုးမှာ တိုင်းပြည်တိုးတက်ဖို့ဆိုရင် တိုးတက်နိုင်ဖို့က အခြေခံအကျဆုံးက ကျနော့်အမြင် ကတော့ ကျန်တဲ့အချက်တွေ လုပ်ရင်းနဲ့ တောင်သူလယ်သမားတွေ စိုက်ရေးပျိုးရေးကို ကုန်ထုတ်လုပ်မှုကို တကယ်ကို ထည်ထည်ဝင်ဝင်နဲ့ လက်တွေ့ကျကျ အကောင်အထည်ဖော်ရင် တစ်ဖက်က စားနပ်ရိက္ခာနဲ့ အခြေခံ ပြည်သူလူထုကို ထိန်းနိုင်တာပေါ့၊ အခုဟာက တောင်သူလယ်သမားတွေကလည်း စိုက်တာစိုက်နေရတယ် သင့်သင့်တဲ့ ဈေးကလည်း မရ၊ ပြီးတော့လည်း ပို့တာ ပြုတာကလည်း တော်ကြာ ပိတ်လိုက်၊ တော်ကြာဖွင့်လိုက် ဆိုတော့ တောင်သူလယ်သမားတွေမှာလည်း ရည်မှန်းချက်၊ ယုံကြည်ချက်မရှိဘဲ စိုက်ပျိုး‌ရေး ကုန်ထုတ်လုပ်မှုကို မျှော်လင့်ချက်ကြီးကြီးနဲ့ ဆောင်ရွက်လို့ မရဘူး။ တဖြည်းဖြည်းနဲ့ တိုင်းပြည်မငြိမ်သက်မှုက နောက်ဆုံးမှာ စားနပ် ရိက္ခာပြဿနာ ဖြစ်သွားနိုင်တဲ့ အခြေအနေမှာ ရှိတယ်” ဟု ပြောသည်။

လက်ရှိ မြန်မာနိုင်ငံအနှံ့အပြားတွင် မြန်မာ့တပ်မတော်နှင့် လက်နက်ကိုင်အဖွဲ့များကြား တိုက်ပွဲများ ဖြစ်ပွားနေပြီး နယ်စပ် ကုန်သွယ်ရေးများလည်း မကြာခဏပိတ်နေရခြင်းကြောင့် စီးပွားရေးကျဆင်းမှု၊ ကျပ်ငွေတန်ဖိုးကျဆင်းမှု၊ ကုန်ဈေးနှုန်းကြီးမြင့်မှုတို့ဖြင့်  ပြည်သူလူထုမှာ ရင်ဆိုင်နေရသည်။

CNI News

၂၀၂၄ ခုနှစ်၊ ဇွန်လ ၁၂

အာရက္ခတပ်တော်(AA)သည် အတင်းအကြပ် အုပ်ချုပ်ရေးယန္တရားများ ဖော်ဆောင်ပြီး လွတ်လပ်ခွင့်များကို တားဆီးပိတ်ပင်နေသလို လူ့အခွင့်အရေးများကို ချိုးဖောက်နေသည်ဟု ချင်းပြည်ကောင်စီက ၂၀၂၄ ခုနှစ်၊ ဇွန် လ ၁၀ ရက်နေ့တွင် ထုတ်ပြန်ခဲ့သည်။

ULA/AA သည် ချင်းပြည်နယ်အတွင်း အပြစ်မဲ့ ချင်းပြည်သူများအပေါ် အတင်းအဓမ္မ တပ်သားများ စုဆောင်း၍ စစ်သင်တန်းများ သင်ယူစေခြင်း၊ အတင်းအကြပ် အုပ်ချုပ်ရေးယန္တရားများ ဖော်ဆောင်ခြင်းများကို ဆောင်ရွက် နေသည့်အပြင် တိုင်းရင်းသားလူမျိုးနွယ်စု အချင်းချင်း အပြန်အလှန် လေးစားအသိအမှတ်ပြုမှုကို လစ်လျူရှု၍ လွတ်လပ်စွာ ပညာသင်ကြားခွင့်၊ ဘာသာရေး လွတ်လပ်ခွင့်များကို တားဆီးပိတ်ပင်ပြီး အခြေခံ လူ့အခွင့်အရေး များကို ချိုးဖောက်နေသည့်အတွက် များစွာ စိတ်မကောင်းဖြစ်ရပါသည်ဟု ချင်းပြည်ကောင်စီက ထုတ်ပြန်ခဲ့ သည်။

ထိုလုပ်ရပ်များသည် တိုင်းရင်းသားလူမျိုးနွယ်စုများအကြား ချစ်ကြည်ရင်းနှီးမှု၊ အပြန်အလှန် ယုံကြည်မှုကို ထိခိုက်ပျက်ပြားစေသည့်အပြင် တစ်မျိုးသားလုံး လွတ်မြောက်ရေးအတွက် ဖော်ဆောင်နေသည့် တော်လှန်ရေး လမ်းစဉ်များကိုလည်း နှောင့်နှေးစေသည်ကို တွေ့ရှိရသည်ဟု ၎င်းက ပြောသည်။

ချင်းပြည်ကောင်စီရဲ့ ထုတ်ပြန်ချက်ကို တွေ့ရစဉ်

ထို့နောက် ချင်းပြည်နယ်၏ အချုပ်အခြာ အာဏာသည် ချင်းပြည်နယ်အတွင်းရှိ ပြည်သူလူထုများဖြစ်သည့် အလျောက် ULA/AA အနေဖြင့် ချင်းပြည်နယ်အတွင်း စစ်ရေးလှုပ်ရှားမှုများ၊ စစ်ရေးဖော်ဆောင်မှုများကို ရှောင် ရှားရန် ချင်းပြည်ကောင်စီက ထုတ်ပြန် ပြောကြားသည်။

ထို့အပြင် ချင်းအမျိုးသားပိုင်နက် နယ်မြေအတွင်း မိမိတို့ ပြည်သူလူထုများ၏ သဘောထားဆန္ဒမပါဘဲ အတင်းအကြပ် အုပ်ချုပ်ရေးဖော်ဆောင်ခြင်း၊ လူ့အခွင့်အရေး ချိုးဖောက်ခြင်းများ လုပ်ဆောင်နေမှုများသည် တိုင်းရင်းသားလူမျိုးနွယ်စုများ အချင်းချင်းကြား မလိုလားအပ်သော လူမျိုးရေးပဋိပက္ခ၊ စစ်ရေးပဋိပက္ခများ ဖြစ်ပေါ်လာစေနိုင်သည့်အတွက် အထက်ပါ လုပ်ဆောင်နေမှုများကို ရပ်တန့်ပေးရန် ချင်းပြည်ကောင်စီက တိုက် တွန်းထားသည်။

AA သည် ချင်းပြည်နယ်၊ ပလက်ဝမြို့နယ်အတွင်းရှိ မြန်မာ့တပ်မတော် စစ်စခန်းများတိုက်ခိုက်ပြီးနောက် ပလက်ဝမြို့နယ်ကို ထိန်းချုပ်ထားသလို တခြားသော ချင်းပြည်နယ်အတွင်းရှိ မြို့နယ်များမှာလည်း ချင်း PDF တချို့ကို စစ်သင်တန်းများပေးခြင်းနှင့် လက်နက်ခဲယမ်းများ တပ်ဆင်ခြင်း အပါအဝင် မြန်မာ့တပ်မတော် စစ် စခန်းများကို ပူးပေါင်း တိုက်ခိုက်ပေးလျက်ရှိနေသည်။

လက်ရှိ AA ထိန်းချုပ်ထားသော ချင်းပြည်နယ်၊ ပလက်ဝမြို့နယ်အတွင်းမှာ နေထိုင်ကြသည့် ချင်းမျိုးနွယ်စုများ သည် စားနပ်ရိက္ခာ ပြတ်လပ်မှုနှင့် AA ၏ ဖိနှိပ်မှုများကြောင့် နေရပ်စွန့်ခွာထွက်ပြေး တိမ်းရှောင်နေကြရသည်ဟု ပလက်ဝမြို့နယ်ဒေသခံများက ပြောသည်။

CNI News

၂၀၂၄ ခုနှစ်၊ ဇွန်လ ၁၁

ရန်ကုန်တိုင်းဒေသကြီးအတွင်း အကြမ်းဖက်မှု အငွေ့အသက်များကင်းစင်အောင် မိမိတို့အနေဖြင့် ဆောင်ရွက် ရန်လိုကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၄ ခုနှစ်၊ ဇွန်လ ၁၀ ရက်နေ့က ပြုလုပ်ခဲ့ သည့် ရန်ကုန်တိုင်းဒေသကြီး တည်ငြိမ်အေးချမ်းရေးနှင့်ဖွံ့ဖြိုးတိုးတက်ရေး အစည်းအဝေးမှာ ပြောသည်။

ရန်ကုန်တိုင်းဒေသကြီးအတွင်း ဆူပူဆန္ဒပြမှုများ ဖြစ်ပေါ်ခဲ့ပြီး ထိုမှတဆင့် လက်နက်ကိုင်အကြမ်းဖက် ဖျက်ဆီး မှုများအထိ ဖြစ်ပေါ်လာခဲ့သဖြင့် အချို့သော မြို့နယ်များကို စစ်အုပ်ချုပ်ရေးကြေညာ၍ ထိန်းထိန်းသိမ်းသိမ်းဖြင့် ဆောင်ရွက်ခဲ့ရကြောင်း၊ လက်ရှိအချိန်တွင် နိုင်ငံအတွင်းရှိ အချို့သော ဒေသများ၌ အကြမ်းဖက်မှုများဖြစ်ပေါ် နေဆဲဖြစ်ပြီး ရန်ကုန်တိုင်းဒေသကြီးအတွင်း၌ မည်သည့်နေရာ၌မဆို လွတ်လပ်စွာဖြင့် သွားလာ၍ ရသည်ကို တွေ့မြင်ရကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “ အကြမ်းဖက်သမားများအနေဖြင့် လုံခြုံရေးတပ်ဖွဲ့ဝင်များ၏ အလစ်အငိုက် ကို ရယူ၍ အကြမ်းဖက်လုပ်ရပ်များကို လုပ်ဆောင်ရန်ကြံစည်ဆောင်ရွက်လျက်ရှိသဖြင့် တည်ငြိမ်အေးချမ်းရေး အတွက် လုံခြုံရေးအသိ၊ လုံခြုံရေးသတိဖြင့် အမြဲမပြတ် စောင့်ကြည့်နေရမည်ဖြစ်ကြောင်း၊ ရန်ကုန်တိုင်းဒေသ ကြီးအတွင်း အကြမ်းဖက်သမားများ၏ အငွေ့အသက်များ ကင်းစင်အောင် မိမိတို့အနေဖြင့် ဆောင်ရွက်ရန်လို ကြောင်း၊ တည်ငြိမ်အေးချမ်းရေးနှင့်ဖွံ့ဖြိုးတိုးတက်ရေးကို တိုင်းစစ်ဌာနချုပ်နှင့် တိုင်းဒေသကြီး အစိုးရအဖွဲ့တို့က ပေါင်းစပ်ညှိနှိုင်းပူးပေါင်းဆောင်ရွက်ရမည်”ဟု ပြောသည်။

သန်လျင်တံတားဖွင့်ပွဲကို ၁၀၇ မမရှော့တိုက်ဒုံးဖြင့် ပစ်ရန် ကြိုးပမ်းသူများ ဖမ်းဆီးခံရစဉ်

ထို့နောက် ရန်ကုန်တိုင်းဒေသကြီးအတွင်း တည်ငြိမ်အေးချမ်းရေးနှင့် ပတ်သက်၍ ဆက်လက်ဆောင်ရွက် သွားရမည်ဖြစ်ကြောင်း၊ ဒီမိုကရေစီလမ်းကြောင်းပေါ်တွင် လျှောက်လှမ်းနေချိန်တွင် လုံခြုံမှုနှင့်တည်ငြိမ်မှု ရှိရန် လိုကြောင်း ၎င်းက ပြောသည်။

နစက၏ တွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦးကတော့ တိုင်းဒေသကြီးအတွင်း တည်ငြိမ်အေး ချမ်းရေး၊ လုံခြုံရေးဆိုင်ရာများနှင့် ပတ်သက်၍ ဂရုပြုဆောင်ရွက်ရန်လိုအပ်မှုနှင့် စစ်ဆေးရေးဂိတ်များ စနစ် တကျဖြစ်ရန်လိုအပ်မှု အခြေအနေများကို ဆွေးနွေးသွားခဲ့ကြောင်း သိရသည်။

ရန်ကုန်တိုင်းဒေသကြီးအတွင်းရှိ သာကေတမြို့နယ်နှင့် သန်လျင်မြို့နယ်ကို ဆက်သွယ်ထားသော သန်လျင်တံ တား အမှတ်(၃)ကို ၂၀၂၄ ခုနှစ်၊ ဇွန်လ ၈ ရက်နေ့က နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် တက်ရောက် ဖွင့်လှစ်ခဲ့ရာ ရန်ကုန် UG အဖွဲ့က ၁၀၇ မမ ရှော့တိုက်ဒုံးဖြင့် ပစ်ခတ်တိုက်ခိုက်ရန် ကြိုးပမ်းမှုများ ရှိခဲ့သည်။

အဆိုပါ ၁၀၇ မမ ရှော့တိုက်ဒုံးဖြင့် သန်လျင်တံတား အမှတ်(၃) ဖွင့်ပွဲ အခမ်းအနားကို တိုက်ခိုက်ရန် ကြိုးပမ်း သည့် ၉ ဦးကို ဖမ်းဆီးရမိခဲ့ပြီး ညွန်ကြားသူနှင့် သင်တန်းပေးသူ ၂ ဦးမှာ ထွက်ပြေးတိမ်းရှောင်နေဆဲဖြစ်သည် ဟု နစက-က ၂၀၂၄ ခုနှစ်၊ ဇွန်လ ၁၀ ရက်တွင် ထုတ်ပြန်ခဲ့သည်။