CNI News
၂၀၂၅ ခုနှစ်၊ ဇန်နဝါရီ ၁၇
အိန္ဒိယသံအမတ်ကြီး Mr. Abhay Thakur သည် ရခိုင်ပြည်နယ်၊ စစ်တွေမြို့သို့ သွားရောက်၍ ကုလားတန်မြစ်စီမံ ကိန်း ဆောင်ရွက်နေမှုကို ပြန်လည်သုံးသပ်လေ့လာခဲ့ကြောင်း အိန္ဒိယသံရုံးက ထုတ်ပြန်ခဲ့သည်။
သံအမတ်ကြီး၏ ရခိုင်ပြည်နယ်ခရီးစဉ်သည် ဇန်နဝါရီ ၁၆ ရက်မှ ၁၇ ရက်နေ့အထိ ဖြစ်ပြီး India Ports Global Ltd(IPGL)မှ မန်နေဂျင်းဒါရိုက်တာလည်း ပါဝင်ခဲ့ကြောင်း သိရသည်။
အိန္ဒိယသံရုံးက “ လက်ရှိ ဆောင်ရွက်လျှက်ရှိသော လုပ်ငန်းများအား ပြန်လည်သုံးသပ်ခြင်းအဖြစ် သံအမတ်ကြီး Abhay Thakur သည် စစ်တွေမြို့ ကုလားတန်ဆိပ်ကမ်း စီမံကိန်းသို့ India Ports Global Ltd (IPGL) မှ မန်နေဂျင်းဒါရိုက်တာနှင့်အတူ ယမန်နေ့က သွားရောက်ခဲ့သည်”ဟု ထုတ်ပြန်ခဲ့သည်။
ထို့နောက် ရခိုင်ပြည်နယ်ဝန်ကြီးချုပ် ဦးထိန်လင်းနှင့် တွေ့ဆုံ၍ ဒေသခံလူထု အသိုက်အဝန်း ထောက်ပံ့ရေး အစီအစဉ်နှင့် အနာဂတ်တွင် ချိတ်ဆက်ဆောင်ရွက်မှု တိုးတက်ရေးဆိုင်ရာများကို ဆွေးနွေးခဲ့ကြောင်း အိန္ဒိယ သံရုံးက ထုတ်ပြန်ခဲ့သည်။
ထို့ပြင် အိန္ဒိယနွယ်ဖွားများနှင့်လည်း တွေ့ဆုံပြီး India in Myanmar - Consulate General of India, Sittwe သို့ သွားရောက်ခဲ့သည်။
ကုလားတန်မြစ်စီမံကိန်းသည် အိန္ဒိယနိုင်ငံ၊ မီဇိုရမ်ပြည်နယ်မှ ချင်းပြည်နယ်၊ ပလက်ဝမြို့နယ်ကို ဖြတ်သန်း၍ ရခိုင်ပြည်နယ်၊ စစ်တွေမြို့အား ချိတ်ဆက်ထားသော စီမံကိန်းဖြစ်သည်။
အဆိုပါ စီမံကိန်းသည် ရခိုင်ပြည်နယ်နှင့် ချင်းပြည်နယ်အတွင်းမှာ မြန်မာ့တပ်မတော်နှင့် အာရက္ခတပ်တော်(AA) တို့ကြား ၂၀၂၃ ခုနှစ်၊ နိုဝင်ဘာလက စတင်ဖြစ်ပွားခဲ့သော တိုက်ပွဲများကြောင့် ရပ်တန့်လျက်ရှိနေသည်။
လက်ရှိတွင် AA သည် ချင်းပြည်နယ်၊ ပလက်ဝမြို့ အပါအဝင် ရခိုင်ပြည်နယ်အတွင်းရှိ စစ်တွေ၊ ကျောက်ဖြူ၊ မာန်အောင် စသည့်မြို့နယ်များကလွဲပြီး ကျန်မြို့နယ်များကို ထိန်းချုပ်သိမ်းပိုက်ထားသည်။
