CNI News

၂၀၂၃ ခုနှစ်၊ ဇွန်လ ၁၅

မေလ ၁၄ ရက်နေ့က အားအလွန်ပြင်းသော မိုခါမုန်တိုင်း တိုက်ခိုက်မှုကြောင့် သဘာဝဘေးအန္တရာယ်ကျရောက် သော ဒေသအဖြစ် ကြေညာခဲ့ရသော ရခိုင်ပြည်နယ်သို့ နစကဒုဥက္ကဋ္ဌ ဒုတိယဗိုလ်ချုပ်မှူးကြီးစိုးဝင်း ရောက်ရှိနေ ပြီး ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ဆောင်ရွက်နေခြင်းကို စစ်ဆေး နေကြောင်း သိရသည်။

ထို့နောက် ရသေ့တောင်မြို့နယ်ရှိ ဌာနဆိုင်ရာ ဝန်ထမ်းများ၊ ရပ်မိရပ်ဖများ၊ ကူညီကယ်ဆယ်ရေးအဖွဲ့များနှင့် ပရဟိတအဖွဲ့များကို တွေ့ဆုံခဲ့သလို စစ်တွေမြို့ရှိ ရှင်မာကုကသီဒြယ် ခရစ်ယာန်ဘုရားရှိခိုးကျောင်းနှင့် သက္ကေယ်ပြင် IDP Camp သွားရောက်၍ စားသောက်ဖွယ်ရာများ၊ ဟင်းသီးဟင်းရွက်မျိုးစေ့များနှင့် ထောက်ပံ့ ပစ္စည်းများ ပေးအပ်ခဲ့သည်။

ဒုတိယဗိုလ်ချုပ်မှူးကြီးစိုးဝင်းက “မုန်တိုင်းအန္တရာယ် ထိခိုက်မှုပြင်းထန်သော မြို့များ၏ ပြန်လည် ထူထောင်ရေး လုပ်ငန်းများ ဆောင်ရွက်နေသည့် အခြေအနေများကို ၁ လတာ ကာလအတွင်း ပြီးစီးမှု အခြေအနေများအား မျက်မြင်သိလို၍ လာရောက်ခြင်းဖြစ်ပြီး မေလ ၁၈ ရက်နေ့တွင် လာရောက်မှုနှင့် ယခုလာရောက် ကြည့်ရှုခဲ့သ သည့် မြင်ကွင်းမှာများစွာ တိုးတက်လာမှုကို တွေ့ရတယ်”ဟု ပြောသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ရခိုင်ပြည်နယ်ရှိ မြို့နယ် ၁၇ မြို့နယ်ကို သဘာဝဘေးအန္တရာ ယ် ကျရောက်သော ဒေသအဖြစ် ကြေညာ၍ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို လုပ်ဆောင်လျက်ရှိသည်။

ထို့နောက် မုန်တိုင်းသင့် ရခိုင်ပြည်နယ် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများအတွက် ကျပ်သိန်းပေါင်း ၇၀၀၀၀ (ခုနှစ်သောင်း) ထောက်ပံ့ပေးခဲ့သလို စားနပ်ရိက္ခာများ၊ အိမ်ဆောက်ပစ္စည်းများ၊ လူသုံးကုန်ပစ္စည်းများ အပါအဝင် သောက်သုံးရေများ သန့်ရှင်းရေးနှင့် ဆက်သွယ်ရေး ကွန်ရက်များ ရရှိရေး ဆောင်ရွက်ပေးလျက်ရှိသည်။

အလားတူ မြို့တွင်း လမ်းများနှင့် မြို့နယ်ချင်းဆက် လမ်းများတွင် လဲကျနေသော သစ်ပင်များနှင့် ဓာတ်မီးတိုင် များ ရှင်းလင်းပေးလျက်ရှိသလို ဈေးနှုန်းသက်သာစွာဖြင့် ရခိုင်ပြည်နယ်အတွင်းရှိ ပြည်သူများ ဝယ်ယူနိုင်ရေး စားသောက်ကုန်များ ရောင်းချပေးလျက်ရှိကြောင်း သိရသည်။

CNI News

၂၀၂၃ ခုနှစ်၊ ဇွန်လ ၁၅ 

မွန်လူမျိုးနှင့် မွန်ပြည်နယ်သူ ပြည်နယ်သားများကို အမျိုးသားလုံခြုံရေး (National Security)အကာအကွယ် ပေးနိုင်ဖို့အတွက် နွေဦးတော်လှန်ရေး အောင်မြင်ပြီးရင်တောင်မှ တပ်ဖွဲ့ကို မဖျက်သိမ်းဘဲ တောင့်တင်းခိုင်မာ သည့် လက်နက်ကိုင်အဖွဲ့ဖြစ် ရပ်တည်သွားမည်ဟု မွန်ပြည်ကာကွယ်ရေးတပ်(MSDF)က ပြောသည်။

မွန်ပြည်ကာကွယ်ရေးတပ်(MSDF)ဥက္ကဋ္ဌ ဒေါက်တာသီရိမွန်ချမ်း၊ အတွင်းရေးမှူး နိုင်ရည်မွန်ဋ္ဌေးနှင့် တွဲဘက် အတွင်းရေးမှူး နိုင်ကိုသူတို့သည် မွန်ရဟန်းသံဃာတော်များ၊ မွန်လူမျိုးများနှင့် ၂၀၂၃ ခုနှစ်၊ ဇွန်လဆန်းပိုင်းက တွေ့ဆုံစဉ် အထက်ပါအတိုင်း ပြောကြားခဲ့ခြင်းဖြစ်သည်။

MSDF က “ ကျနော်တို့ မွန်ပြည်ကာကွယ်ရေးတပ်(MSDF) ဖွဲ့စည်းရခြင်း အခြေခံရည်ရွယ်ချက် (၂)ခုကို ပြန် ပြောရမှာပါ။ MSDF ရဲ့ပင်မ ရည်ရွယ်ချက်က မျက်မှောက်ကာလမှာရော အနာဂတ် ကာလအတွက်ပါ မွန်လူမျိုး နှင့် မွန်ပြည်နယ်သူ ပြည်နယ်သားများကို အမျိုးသားလုံခြုံရေး(National Security) အကာအကွယ် ပေးနိုင်ဖို့ ဖွဲ့ စည်းတာ ဖြစ်တယ်။ ဒါကြောင့်မို့ နွေဦးတော်လှန်ရေး အောင်မြင်သွားပြီး ဖက်ဒရယ် ဒီမိုကရေစီနိုင်ငံ တည် ဆောက်နိုင်ခဲ့ရင်တောင်မှ မွန်ပြည်နယ်နှင့် မွန်တိုင်းရင်းသားတွေကို ကိုယ်စားပြုတဲ့ တောင့်တင်း ခိုင်မာတဲ့ မွန် လက်နက်ကိုင် တပ်ဖွဲ့ တစ်ဖွဲ့ရှိဖို့အတွက် MSDF က ဆက်လက် တည်ရှိသွားမှာပါ”ဟု ပြောသည်။

နွေဦးတော်လှန်ရေး အောင်မြင်သွားပါက အခြား PDF အဖွဲ့အစည်း တချို့ကဲ့သို့ လက်နက်ကိုင် တော်လှန်ရေး လမ်းစဉ်ကို စွန့်ပြီး တပ်ဖွဲ့ကို ပြန်လည် ရုပ်သိမ်းဖို့ရှိလားဆိုသည့် မေးခွန်းအပေါ် MSDF က ခေါင်းဆောင်များက ပြန်လည် ဖြေကြားခဲ့ခြင်း ဖြစ်သည်။

ထို့နောက် မွန်ပြည်သစ်ပါတီ(NMSP) ရှိနေရက်နှင့် မည်သည့်အတွက်ကြောင့် မွန်လက်နက်ကိုင် တပ်ဖွဲ့အသစ် တစ်ဖွဲ့ ဖြစ်သည့် MSDF ကို ဖွဲ့စည်းရသလဲဟု တွေ့ဆုံပွဲ တက်ရောက်သူ တစ်ဦးက မေးခဲ့သည်။

၂၀၂၂ ခုနှစ်၊ မေလက မွန်ပြည်သစ်ပါတီ(NMSP) ဒုဥက္ကဋ္ဌ နိုင်အောင်မင်းနှင့် ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

MSDF က “ အားလုံး သိကြတဲ့အတိုင်းပဲ စစ်ကောင်စီက မတရား အာဏာသိမ်းပြီးစ ကာလနဲ့ ယခုအချိန်အထိ မွန်ပြည်သစ်ပါတီက NCA သဘောတူညီချက်အတိုင်း စစ်ကောင်စီနဲ့ တွေ့ဆုံ ဆွေးနွေး ညှိနှိုှု်င်းရေးမူကို လက် ကိုင်ထားဆဲပါ။ ကျနော်တို့ MSDF တပ်ဖွဲ့ရဲ့ သဘောထားနဲ့  နိုင်ငံရေး၊ စစ်ရေး အခြေခံမူဝါဒက စစ်ကောင်စီကို ဖြုတ်ချဖို့ လက်နက်ကိုင် နည်းလမ်းမှ တစ်ပါး တခြားနည်းလမ်း မရှိဘူးလို့ ယုံကြည်လို့ MSDF တပ်ဖွဲ့ဖွဲ့စည်းပြီး တခြား တိုင်းရင်းသာ ညီအစ်ကို မောင်နှမတွေဖြစ်တဲ့ ကချင်၊ ကရင်၊ ကယား(ကရင်နီ)၊ ပအိုဝ်း အစရှိတဲ့ တိုင်းရင်းသား လက်နက်ကိုင် တပ်ဖွဲ့တွေနဲ့ PDF တွေကဲ့သို့ လက်နက်ကိုင် တော်လှန်ရေး လမ်းစဉ်ကို ကိုင်စွဲ လာခဲ့ရတယ်။ အကယ်လို့ NMSP ကသာ စစ်ကောင်စီကို လက်နက်ကိုင် တော်လှန်မည်ဆိုလျှင် ကျနော်တို့ MSDF တပ်ဖွဲ့အသစ်တွေ ထပ်ဖွဲ့ဖို့ မလိုဘဲ အစကတည်းက မွန်လူမငယ်တွေ၊ မွန်နိုင်ငံရေး တက်ကြွသူတွေက မွန်ပြည်သစ်ထဲ ဝင်ပြီးပုကန်တော်လှန်ရုံပဲပေါ့။ အခုတော့ မွန်ပြည်သစ်က ဘာမှမလုပ်လို့ မွန်လက်နက်ကိုင် တပ်ဖွဲ့ အသစ်တွေ ဖြစ်တဲ့ MSDF ကို ဖွဲ့စည်းခြင်းဖြစ်တယ်”ဟု ပြောသည်။

မွန်လူမျိုးများသည် တော်လှန်ရေးကို ၁၉၅၈ ခုနှစ်က စတင်ခဲ့ပြီးနောက် မွန်အဖွဲ့အစည်းများ အမျိုးမျိုး ကွဲသွားခဲ့ ရာ လက်ရှိတွင် မွန်ပြည်သစ်ပါတီ(NMSP)က ဆက်လက် အမွေဆက်ခံထားသည်။

 MSDF ခေါင်းဆောင် ဒေါက်တာသီရိမွန်ချမ်းနှင့် လူထုတွေ့ဆုံနေစဉ်

ထို့နောက် မွန်ပြည်သစ်ပါတီ(NMSP)သည် ၂၀၁၈ ခုနှစ်၊ ဖေဖော်ဝါရီ ၁၃ ရက်တွင် တစ်နိုင်ငံလုံး ပစ်ခတ်တိုက် ခိုက်မှု ရပ်စဲရေးသဘောတူစာချုပ် (NCA)ကို လက်မှတ်ရေးထိုးခဲ့သည်။

မွန်ပြည်ကာကွယ်ရေးတပ်ဖွဲ့(MSDF)ကတော့ ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်က အမျိုးသားဒီမိုကရေစီအဖွဲ့ချုပ်(NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချခဲ့ပြီးနောက် ပေါ်ပေါက်လာသော လက်နက်ကိုင် ဆန့်ကျင်မှုတွင် ပေါ်ပေါက်လာခဲ့သည့် မွန်လက်နက်ကိုင်အဖွဲ့ဖြစ်သည်။

ထို့နောက် မွန်ပြည်သစ်ပါတီသည် ၎င်းလှုပ်ရှားရာ ဒေသများဖြစ်သည့် မွန်ပြည်နယ်၊ ကရင်ပြည်နယ်၊ တနင်္လာရီ တိုင်းဒေသကြီးများအတွင်း KNU ၊ KTLA (နယ်ဒါးမြအဖွဲ့)၊ PDF များ၏ စစ်ရေးလှုပ်ရှားမှုများကြောင့် စစ်ရေး-နိုင်ငံ ရေးကို သတိကြီးကြီးထား ရပ်တည်နေရချိန်မှာ မွန်လက်နက်ကိုင် တစ်ဖွဲ့ (MSDF)ပေါ်ပေါက်လာခြင်းက အကျပ် အတည်း တစ်ခုကို ကြုံတွေ့လာနေရသည်ဟု မွန်ပြည်သစ်ပါတီနှင့်နီးစပ်သူများက ပြောသည်။

CNI News

၂၀၂၃ ခုနှစ်၊ ဇွန်လ ၁၅

လက်ရှိ မြန်မာနိုင်ငံအတွင်းမှာ ဖြစ်ပွားနေသော လက်နက်ကိုင် ပဋိပက္ခများအကြားမှာ အရပ်သားများ ထိခိုက် သေဆုံးမှုများ ရှိနေခြင်းကြောင့် ဘယ်လိုဖြေရှင်းသင့်လဲဆိုပြီး နိုင်ငံရေး အသိုင်းအဝိုင်းကြား သုံးသပ်ဆွေးနွေးလာ နေကြသည်။

မြန်မာ့တပ်မတော်နှင့် ပြည်သူ့ကာကွယ်ရေးတပ် (PDF) တို့အကြား လည်းကောင်း၊ မြန်မာ့တပ်မတော်နှင့် တိုင်းရင်းသား လက်နက်ကိုင်များအကြား လည်းကောင်း တိုက်ပွဲများဖြစ်ပွားနေပြီး အပြန်အလှန်စွပ်စွဲ သတ်ဖြတ်မှု၊ ဖမ်းဆီးမှုများမှ အချိန်ကြာလာသည်နှင့်အမျှ ပိုမိုများပြားလာခဲ့သည်။

အရပ်သားများ သေဆုံးနေသည့် ပြဿနာကို ဖြေရှင်းနိုင်ဖို့မှာ ဘက်မလိုက် အဖွဲ့အစည်းမှ ကြားဝင်ဖြေရှင်းသင့် ကြောင်း ပြည်သူ့လွှတ်တော် ကိုယ်စားလှယ်ဟောင်း ဦးစိန်ဝင်းက CNI သတင်းဌာနသို့ ပြောသည်။

မြိုင်တောင်ပိုင်းမှာ PDF ၅ ဦးနဲ့ အရပ်သား ၁ ဦး သတ်ဖြတ်ခံရစဉ်

၎င်းက “ဒီဟာကို ကျနော်တို့က ဘယ်လိုဖြေရှင်းမလဲဆိုတော့ ကျ‌နော်ကတော့ ဒါကို ရည်ရွယ်ချက်လေး၊ ဆန္ဒလေး ရှိတဲ့အတွက် ကျနော် လွှတ်တော်ကိုယ်စားလှယ်ဟောင်းတွေကို Alarm လုပ်ထားတယ်ဗျ၊ Alarm လုပ်ပြီးတော့ ကျ‌နော်တို့ ဖွဲ့၊ ဖွဲ့ပြီးတော့ စီမံချက်ဆွဲ ဆွဲပြီးတော့ နစကနဲ့ တွေ့ခွင့်တောင်း တောင်းပြီးတော့ ကျနော်တို့ ကျနော် တို့ရဲ့ Plan ကို ချပြလို့ သူတို့လည်း ဒီဟာကိုလက်ခံတယ်၊ ပြုတယ်ဆိုရင် ကျနော်တို့က ဟိုဖက်လည်း လှမ်းဆက် သွယ်မှာပေါ့ဗျာ၊ ဆက်သွယ်ပြီးတော့ တစ်ဖက်နဲ့ တစ်ဖက် ညှိနှိုင်းအောင် ကြားထဲက ဆောင်ရွက်ချင်တဲ့စိတ်တော့ ကျနော်မှာ ရှိတယ်ဗျ၊ သို့သော်လည်း အခြေအနေတွေက ပြည်တွင်းမှာက စဖို့တောင် ခက်နေတဲ့ အနေအထားမှာ ရှိနေတာ” ဟု ပြောသည်။

ပြီးခဲ့သည့် မေလ ၃၀ ရက် ညပိုင်းက အဆိုတော် လီလီနိုင်ကျော်သည် ၎င်း၏ နေအိမ်တိုက်ခန်းရှေ့တွင် လုပ်ကြံခံရပြီးနောက် ဇွန်လ ၆ ရက်နေ့တွင် သေဆုံးသွားခဲ့သည်။

ထို့နောက် လီလီနိုင်ကျော်အား လုပ်ကြံသတ်ဖြတ်ခဲ့သူ ကောင်းဇာနည်ဟိန်း(ခ)လပြည့်နှင့် ကျော်သူရ(ခ)အီးတီ တို့နှစ်ဦးထဲမှ ကောင်းဇာနည်ဟိန်း၏ မိခင်ဖြစ်သူနှင့် အစ်မဖြစ်သူတို့ သတ်ဖြတ်ခံခဲ့ရသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့နောက်ပိုင်း ပြောင်းလဲခဲ့သည့် နိုင်ငံရေး အခင်းအကျင်းနှင့် အတူ လက်နက်ကိုင် ပဋိပက္ခများ ပိုမို ပြင်းထန်လာခဲ့သလို နိုင်ငံတစ်ဝှမ်းမှာလည်း သူလျှို ဒလန်စွပ်စွဲမှုများဖြင့် အရပ်သားများ သတ် ဖြတ် ခံနေရသလို အကြမ်းဖက်မှု အားပေအားမြောက်သူဟု စွပ်စွဲမှုများဖြင့်လည်း အရပ်သားများ သတ်ဖြတ်ခံနေရ သည်။

အဆိုပါ ပဋိပက္ခများအကြား အရပ်သားများမှာ မြေစာပင် ဖြစ်ပွားရကြောင်း၊ ပင်လုံစာချုပ်ကို အကောင်အထည် မဖော်သည့် နောက်ဆက်တွဲ ပြဿနာများဖြစ်ကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

ဒေသခံကာကွယ်ရေးတပ်ဖွဲ့ဝင်များကို တောတွင်းတစ်နေရာ၌ တွေ့ရစဉ်(အင်းတော် PDF)

၎င်းက “စစ်ဖြစ်ပြီဆိုတော့ ကမ္ဘောဒီးယားပဲ ကြည့်ကြည့်၊ ယူဂိုဆလားဗီးယားပဲ ကြည့်ကြည့်၊ စစ်ဖြစ်ပြီဆို‌တော့ နှစ်ဖက်ကြားမှာတော့ ပြည်သူလူထုတွေကတော့ မြေစာပင် ဖြစ်တာတော့ သဘာဝဖြစ်တယ်၊ ဘာကြောင့်လဲ ဆို‌‌တော့ စစ်ကိုကြတော့ ဒါမျိုးကြတော့ မဖြစ်စေချင်ဘူး။ ဒါကြောင့်လဲ စစ်ကို ဘယ်သူက စတင်သလဲ၊ ဘယ်သူက လုပ်သလဲ၊ အဲဒီအပေါ်မှာပဲ မူတည်ပါတယ်၊ စစ်မဖြစ်ရင်တော့ ပိုကောင်းတာပေါ့၊ ကျနော်တို့ နိုင်ငံကတော့ စစ်ဖြစ် တာတော့ ကြာပြီပေါ့၊ နှစ်ပေါင်း ၇၀ ကျော်သွားပြီပေါ့၊ အဓိက-ကတော့ ပင်လုံစာချုပ် အကောင်အထည် မဖော်တဲ့ ‌နောက်ဆက်တွဲ ပြဿနာ၊ ပင်လုံစာချုပ်ကို အကောင်အထည် ဖော်လိုက်ရင်တော့ စစ်တွေက သူ့ဟာနဲ့သူ ရပ်နား သွားပါလိမ့်မယ်၊ ပထမဦးဆုံး ပင်လုံစာချုပ်ကို အကောင်အထည်ဖော်၊ စစ်မှန်တဲ့ ဖက်ဒရယ်ပြည်ထောင်စုကို တည်‌ ဆောက်သွားမယ်ဆိုရင်တော့ ဒီစစ်တွေက ငြိမ်းချမ်းသွားမယ်လို့ ကျနော်က ဒီလိုပဲ မြင်ပါတယ်” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်း ပြောင်းလဲခဲ့သည့် နိုင်ငံရေး အခင်းအကျင်း နှစ်နှစ်ကျော်အတွင်းမှာ သေဆုံးခဲ့သည့် အရပ်သား ၈,၆၄၀ ဦးထက် မနည်းရှိခဲ့ကြောင်း၊ ယခု ၂၀၂၃ ခုနှစ် ပထမ ငါးလတာအတွင်း လက်နက်ကိုင် ပဋိပက္ခနှင့် တိုက်ပွဲများကြောင့် အရပ်သား ၇၄၈ ဦးထက်မနည်း စံချိန်တင် သေဆုံးခဲ့ကြောင်း ISP Myanmar က ထုတ်ပြန်ထားသည်။

CNI News

၂၀၂၃ ခုနှစ်၊ ဇွန်လ ၁၅

မိုခါမုန်တိုင်းဒဏ်သင့် ရခိုင်ပြည်နယ်တွင် လက်ရှိ၌ မူလအခြေအနေ နီးပါးသို့ ပြန်လည်ရောက်နေပြီ ဖြစ်ကြောင်း ရခိုင်ပြည်နယ်စီမံအုပ်ချုပ်ရေးကောင်စီ၏ ပြောရေးဆိုခွင့်ရှိသူ ပြည်နယ်ဥပဒေချုပ် ဦးလှသိန်းက CNI သတင်းဌာန သို့ ပြောသည်။

မိုခါမုန်တိုင်းသည် ရခိုင်ပြည်နယ်သို့ မေလ ၁၄ ရက်နေ့တွင် ဝင်ရောက် တိုက်ခတ်ခဲ့ရာ ဇွန်လ ၁၄ ရက်နေ့တွင် တစ်လပြည့်ခဲ့ပြီ ဖြစ်သောကြောင့် ရခိုင်ပြည်နယ်၏ ပြန်လည်ထူထောင်ရေးခရီးစဉ် အတိုင်းအတာ နှင့်ပတ်သက်၍ CNI သတင်းဌာနမှ မေးမြန်းမှုအား ယခုကဲ့သို့ ပြန်လည် ဖြေကြားခြင်း ဖြစ်သည်။

ရခိုင်ပြည်နယ်ဥပဒေချုပ် ဦးလှသိန်းက “မိုခါတစ်လပြည့်တဲ့ အခြေအနေမှာတော့ စစ်တွေမြို့ဆိုရင် ပုံမှန် အခြေ အနေ နီးပါးလောက် ပြန်ရောက်တယ် ပြောလို့ရတာပေါ့။ ဘာကြောင့် ပြောရလဲဆိုရင် လူတိုင်း လမ်းတွေသွားလို့ ရတယ်။ လမ်းသန့်ရှင်းရေးတွေ အကုန်ရှင်းပြီ ဖြစ်တယ်။ လျှပ်စစ်မီးရပြီ ဖြစ်တယ်။ national grid က လျှပ်စစ် ဓာတ်အား ရပြီဖြစ်တယ်။ တယ်လီဖုန်း ဆက်သွယ်ရေးတွေလည်း အကုန်ရပြီးလည်း ဖြစ်တယ်။ ဆက်သွယ်ရေးနဲ့ ပတ်သက်ပြီး လိုနေတာ တစ်ခုက ကေဘယ်တွေပေါ့နော် မြေအောက်ကေဘယ်တို့ ဘာတို့နဲ့လုပ်တဲ့ Wifi တွေ တော့ မရသေးဘူးပေါ့။ ဒါကတော့ ပုဂ္ဂလိကကုမ္ပဏီတွေက လုပ်နေတာတွေ့ရပါတယ်။ ကုန်သွယ်မှုပိုင်းကို ကြည့် ရင်လည်း စစ်တွေမြို့မှာဆိုင်တွေ အားလုံးဖွင့်နိုင်တယ်။ ဌာနဆိုင်ရာတွေကို ပြန်ကြည့်ရင် စာသင်ကျောင်းတွေ အားလုံးဖွင့်နိုင်တယ်။ နယ်တွေမှာလည်း ဖွင့်တယ်။ စစ်တွေမြို့ပေါ်မှာလည်း အကုန်လုံး စာသင်ကျောင်းတွေဖွင့် တယ်။ ဆေးရုံတွေ ပုံမှန် အနေအထား အလုပ်လုပ်ကိုင်နေကြတာပေါ့။ ပြောရမယ်ဆိုရင် ရခိုင်ပြည်နယ်ရဲ့ တစ်လ တာ ကာလမှာတော့ မူလ အခြေအနေ နီးပါးလောက် ရောက်နေပြီလို့ ပြောနိုင်ပါတယ်။ ဒီလိုဖြစ်ဖို့အတွက်လည်း ကျနော်တို့ကိုယ်တိုင် ပါဝင်လို့ သိနေရတာတွေက မေလ ၁၄ ရက်နေ့ မုန်တိုင်းတိုက်ပြီးတဲ့ အချိန်ကစလို့ အခုထိ မနားရဘူး။ နေ့တိုင်း စီမံခန့်ခွဲရေးကိစ္စတွေ လုပ်ရတယ်၊ ဆုံးဖြတ်ဖို့အတွက် Decision တွေချဖို့ အစည်းအဝေးတွေ လုပ်ရတယ်။ ဆုံးဖြတ်ချက်တွေကို ပြည်ထောင်စုကို တင်ပြတယ်” ဟု CNI သတင်းဌာနသို့ ပြောသည်။

မိုခါမုန်တိုင်းကြောင့် ရခိုင်က တဲအိမ်များ ပျက်စီးနေစဉ်

ယခုကဲ့သို့ အနေအထားအား ရောက်ရှိရခြင်းမှာ လူမှုရေး အဖွဲ့အစည်းများနှင့် ဒေသခံ ရခိုင်ပြည်သူလူထုတို့၏ ပူးပေါင်း ပါဝင်မှုများကြောင့် ဖြစ်ကြောင်း၊ ဆက်လက်၍ ကယ်ဆယ်ရေးနှင့် ပြန်လည်ထူထောင်ရေးများတွင် သွားရေး၊ လာရေး လမ်းများဖွင့်ထားပြီး ဖြစ်သည့်အတွက် အစဉ်မပြတ် ဆောင်ရွက်လျက်ရှိကြောင်းလည်း ၎င်းက ဆက်ပြောသည်။

ကူညီကယ်ဆယ် ထောက်ပံ့ရေးနှင့် ပြန်လည်ထူထောင်ရေး လုပ်ငန်းစဉ်များသည် မြို့ပေါ်နေ ရပ်ကွက်များကိုသာ ရောက်ရှိပြီး ဝေးလံခေါင်ဖျားသည့် ကျေးလက်ဒေသများသို့ အရောက်အပေါက် နည်းပါးကြောင်းလည်း တိုက်ပွဲ ရှောင်စခန်း တာဝန်ရှိသူများထံက သိရသည်။

လက်ရှိတွင် တိုက်ပွဲရှောင်စခန်းများ၌ အမျိုးသမီး လစဉ်သုံး ပစ္စည်းများအပြင် ပတ်ဝန်းကျင် မသန့်ရှင်းမှုများ ကြောင့် အသက်အရွယ် ကြီးရင့်သူများတွင် ကျန်းမာရေး ချို့ယွင်းမှုများ ဖြစ်နေကြောင်း ကျောက်တော်မြို့ရှိ တိုက်ပွဲရှောင်စခန်းမှ တာဝန်ရှိသူ မမြင့်(အမည်လွှဲ)က CNI သတင်းဌာနသို့ ပြောသည်။

စစ်တွေမြို့မှာ လမ်းမီးတိုင်များ ပြန်လည်ထူထောင်နေစဉ်

၎င်းက “အခြေအနေကတော့ အိမ်တွေ အကုန်ပြိုတယ်၊ အိမ်သာတွေ အကုန်ပြိုတယ်။ စားနပ်ရိက္ခာတွေလည်း အကုန်စိုကုန်တယ်။ ရေတွေလည်း ရှားတယ်။ ဝါးတွေလည်း မရှိတဲ့အချိန်မှာ အဆောင်လေးရှိတာနဲ့ တာလဘတ် သေးသေးလေးတွေရှိတာနဲ့ ဖုံးပြီး ကပ်သီးကပ်သပ်ပဲ နေကြတော့တယ်။ ချက်စရာလည်း ဒီနားမှာပဲ ချက်တယ်၊ အိပ်စရာလည်း ဒီနားမှာပဲ အိပ်တယ်။ တိုက်အိမ်တောင်မှ မခံနိုင်ဘူးလေ ကျမတို့က ဝါးနဲ့လုပ်တာဆိုတော့ ဝါးတွေ လည်း ဟောင်းနေပြီလေ အကုန်လုံးပါသွားတယ်။ ရေတွေလည်း ရေချိုးလို့ရှိရင် တအားယားကြတယ်။ 

ဘာဖြစ်လို့ လဲမသိဘူး။ အခုလောလောဆယ်ကတော့ ကိုယ်တို့နေတဲ့ နေရာဘေးမှာပဲ သွားတဲ့အချိန်မှာ အနံ့တွေ တအားဆိုး တယ်။ နေပူလိုက် မိုးရွာလိုက်နဲ့ အချိန်မှာတော့ လုံးဝ အနံ့တွေက ထွက်လာတာပေါ့။ နေလို့မကောင်း ကြဘူး။ လူကြီးတွေ ခဏခဏ သွေးပေါင်ချိန် ကျလိုက်၊ တက်လိုက်။ အခုက အမျိုးသမီးလစဉ်သုံး ပစ္စည်းတွေလည်း မရှိ ကြတော့ဘူးလေ။ ဒါလည်း အခက်အခဲပေါ့နော်” ဟု ပြောသည်။

လက်ရှိတွင် မိုးရာသီ ရောက်ပြီဖြစ်သည့်အတွက် နေအိမ် ပျက်စီးဆုံးရှုံး သွားသူများအနေဖြင့် မိုးလုံလေလုံ ဖြစ်အောင် ကြိုးစားနေကြသော်လည်း မိုးလုံလေလုံနေရာ ရောက်ရှိရန် အခက်အခဲ ဖြစ်နေကြသူ အများအပြား ရှိနေသေးကြောင်း ပရဟိတအသင်းအဖွဲ့များထံက သိရသည်။

မုန်တိုင်းသင့် ပြည်သူများအတွက် နစက-က ကျပ်သိန်းပေါင်း ၇၀၀၀၀ လှူဒါန်းစဉ်

ထို့အပြင် ရေပြဿနာနှင့် မိုခါမုန်တိုင်း နောက်ဆက်တွဲ အနေဖြင့် စားနပ်ရိက္ခာ ဈေးနှုန်းများ ကြီးမြင့်လာသည့် အခက်အခဲကိုပါ ဒေသခံပြည်သူလူထုအနေဖြင့် တွေ့ကြုံခံစားနေကြရကြောင်း ရသေ့တောင်မြို့နယ်ရှိ ပရဟိတ လူငယ်အသင်းအဖွဲ့တစ်ခုမှ တာဝန်ရှိသူတစ်ဦးက CNI သတင်းဌာနသို့ ပြောသည်။

၎င်းက “ရေက နဂိုကတည်းက ခမ်းခြောက်နေတာ။ အခုက မိုးကလည်း ပုံမှန် အနေအထား မရွာဘဲနဲ့ ရေက မရှိတဲ့ အနေအထား မှာတော့ ရေတွေက အကုန်လုံး နောက်ပြီး အဲဒါတွေသုံးနေရတဲ့ အနေအထားမှာလည်း ရှိနေတယ် အခု မိုခါမုန်တိုင်း နောက်ပိုင်းမှာ။ စိုးရိမ်မှုက ကျန်းမာရေး အပိုင်းရှိတယ်။ နောက်ပြီးတော့ မိုခါမုန်တိုင်း နောက်ပိုင်း မှာ ဖြစ်လာတာက စားနပ်ရိက္ခာ တစ်ဟုန်ထိုး ထိုးတက်တာ။ ကျနော်တို့ဆီမှာ ဆန်က ပထမက ကိုးသောင်း လောက်ကနေ အခုဆို တစ်သိန်း လေးသောင်းအထိ ထိုးတက်သွားတယ်။ အဲဒီမှာ စားနပ်ရိက္ခာတွေလည်း အခြေခံ လူတန်းစားတွေအတွက် အခက်အခဲ တော်တော်လေး ဖြစ်နေတယ်။ အဲဒီတော့ အမိုးအကာအောက်ကို မရောက် နေတဲ့ လူတွေလည်း အများကြီး ရှိသေးတယ်အခုက” ဟု ပြောသည်။

မိုခါမုန်တိုင်းဒဏ်သင့် ရခိုင်ပြည်နယ်၏ အရေးပေါ် ကယ်ဆယ်နိုင်ရေးအတွက် နစက မှ ငွေကျပ်သိန်းပေါင်း ခုနှစ်သောင်း ပေးအပ်ခဲ့ပြီး ကူညီကယ်ဆယ်ရေးနှင့် ထောက်ပံ့ရေး လုပ်ငန်းစဉ်များလည်း လုပ်ဆောင်နေသည်ကို မြင်တွေ့ရသည်။

ထို့အပြင် ရက္ခိုင့်တပ်တော် ULA/AA ကလည်း အာရက္ခအရေးပေါ် ကယ်ဆယ်ရေးနှင့် ပြန်လည်နေရာ ချထားရေး ကော်မတီ(ERRCA) အား ဖွဲ့စည်းပြီး AA ၏ ဒုတိယစစ်ဦးစီးချုပ် ဒေါက်တာညိုထွန်းအောင်မှ ဥက္ကဋ္ဌအဖြစ် တာဝန် ယူ ဆောင်ရွက်ကာ ကူညီကယ်ဆယ်ရေး လုပ်ငန်းများ ဆောင်ရွက်လျက် ရှိသည်။

ထို့နောက် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ(FPNCC) နှင့် “ဝ” ပြည်သွေးစည်းညီညွတ်ရေး တပ်မတော် UWSA တို့က ကျပ်သိန်း ၁၀၀၀၀(ကျပ်သိန်းတစ်သောင်း)အား ရခိုင်ပြည်နယ်အတွင်း မိုခါမုန်တိုင်းသင့် ပြည်သူများ ကူညီကယ်ဆယ်ရေး လုပ်ငန်းအတွက် လှူဒါန်းခဲ့သည်။

အမျိုးသားညီညွတ်ရေးအစိုးရ NUG အနေဖြင့်လည်း မိုခါမုန်တိုင်းဒဏ် ခံခဲ့ရသူများအတွက် ငွေကျပ် သိန်းပေါင်း ၂၃၀၀ ကျော်ကို မုန်တိုင်းမကျရောက်ခင်မှ စတင်ကာ ဇွန်လ ၂ ရက်နေ့အထိ ရခိုင်၊ ချင်းပြည်နယ်၊ စစ်ကိုင်း၊ မကွေး၊ ရန်ကုန်တိုင်း၊ အိန္ဒိယနယ်စပ်နှင့် ဘင်္ဂလားဒေ့ရှ်နိုင်ငံ ဒုက္ခသည်စခန်းများသို့ ပေးပို့ကူညီထားကြောင်း ထုတ်ပြန် ထားသည်။

CNI News

၂၀၂၃ ခုနှစ်၊ ဇွန်လ ၁၄

ဖမ်းဆီးထိန်းသိမ်းခံထားရသည်ဟု ရေးသားထုတ်လွှင့်ခံရသည့် အနောက်မြောက်တိုင်းစစ်ဌာနချုပ် တိုင်းမှူး ဗိုလ်ချုပ်သန်းထိုက်သည် ယနေ့ (ဇွန်လ ၁၄ ရက်)တွင် လက်နက်များဖြင့် အလင်းဝင်လာသည့် ပြည်သူ့ ကာကွယ်ရေးတပ်ဖွဲ့(PDF) အဖွဲ့ဝင် ၁၁ ဦးကို ဆုကြေးငွေများ ထောက်ပံ့ပေးအပ်ခဲ့သည်။

မကွေးတိုင်းဒေသကြီး၊ ပခုက္ကူမြို့နယ်၊ စစ်ကိုင်းတိုင်းဒေသကြီး စစ်ကိုင်းမြို့နယ်နှင့် ကလေးမြို့နယ်တို့မှ PDF အဖွဲ့ဝင် အမျိုးသား ၁၁ ဦးတို့သည် မြောင်းပြန်သေနတ် ၅ လက်၊ ပစ္စတိုသေနတ် ၁ လက်နှင့်အတူ အလင်း ဝင်ရောက်လာခဲ့ရာ ဇွန်လ ၁၄ ရက်နေ့က တိုင်းမှူး ဗိုလ်ချုပ်သန်းထိုက်နှင့် စစ်ကိုင်းတိုင်းဒေသကြီးဝန်ကြီးချုပ် ဦးမြတ် ကျော်တို့ထံ လက်နက်များ အပ်နှံမှု ပြုလုပ်ခဲ့သည်။

ထို့နောက် မောင်းပြန်သေနတ်ဖြင့် အလင်းဝင်ရောက်လာသူ ၅ ဦးအား ၁ ဦးလျှင် ဆုကြေးငွေ သိန်း ၅၀ ၊ ပစ္စတို သေနတ်ဖြင့် အလင်းဝင်ရောက်လာသူ ၁ ဦးအား ဆုကြေးငွေ ၂၅ သိန်း၊ လက်နက်မဲ့ အလင်းဝင်ရောက်လာသူ ၅ ဥိးအား ၁ ဦးလျှင် သိန်း ၂၀  စသဖြင့် ဆုကြေးငွေများ ပေးအပ်ခဲ့ကြောင်း ထုတ်ပြန်သွားသည်။

အဆိုပါ အလင်းဝင်ရောက်လာသူများကို ဝန်ခံကတိ လက်မှတ်ရေးထိုးခိုင်းပြီးနောက် မိဘအုပ်ထိန်းသူများထံသို့ လွှဲပြောင်းပေးအပ်ခဲ့သည်။

နစကသည် PDF အပါအဝင် အဖွဲ့အစည်း အမျိုးမျိုး အမည်ခံ၍ လက်နက်ကိုင် ဆန့်ကျင်လျက်ရှိသည် အဖွဲ့ အစည်းများအတွင်း ရောက်ရှိနေသူများအား ဥပဒေဘောင်အတွင်းသို့ ပြန်လည်ဝင်ရောက်ရန်နှင့် လက်နက်/ခဲ ယမ်းများဖြင့် ဝင်ရောက်လာသူများကိုလည်း ဆုကြေးငွေများ ပေးအပ်သွားမည်ဖြစ်ကြောင်း ၂၀၂၃ ခုနှစ်၊ မေလ ၉ ရက်မှ ၁၆ ရက်နေ့ထိ ဖိတ်ခေါ်ခဲ့သည်။

အလင်းဝင်ရောက်လာသည့် PDF အဖွဲ့ဝင် ၁၁ ဦးကို ဆုကြေးငွေများ ပေးအပ်ခဲ့သည့် နမခ တိုင်းမှူး ဗိုလ်ချုပ် သန်းထိုက်သည် နေပြည်တော်သို့ အရေးပေါ် သွားရောက်စဉ် ဖမ်းဆီးခံထားရသည်ဟု ဇွန်လ ၁၃ ရက်နေ့က သတင်းမီဒီယာတချို့က ရေးသားခဲ့သေးသည်။

CNI News

၂၀၂၃ ခုနှစ်၊ ဇွန်လ ၁၄

အိန္ဒိယနိုင်ငံအနေဖြင့် မြန်မာ့နိုင်ငံရေးထဲသို့ ယခင်ကထက် ပိုမို ပါဝင်လာနေခြင်းက မည်သည့် အခြေအနေကြောင့် ဖြစ်နိုင်သလဲဆိုသည့်အပေါ် မြန်မာ့နိုင်ငံရေး အသိုင်းအဝိုင်းကြား သုံးသပ် ဆွေးနွေးမှုများ ပြုလုပ်နေကြသည်။ 

ပြီးခဲ့သည့် ဇွန်လ ၆ ရက်နှင့် ၈ ရက်နေ့များက ရန်ကုန်၊ နေပြည်တော်တို့မှာ နစက၏ အမျိုးသား စည်းလုံး ညီညွတ် ရေးနှင့် ငြိမ်းချမ်းရေးဆွေးနွေးမှု ညှိနှိုင်းရေးကော်မတီ (NSPNC)၊ အပစ်ရပ် တိုင်းရင်းသား လက်နက်ကိုင် ၇ ဖွဲ့၊ အိန္ဒိယနိုင်မှ ဖက်ဒရယ်ပညာရှင်များနှင့် အိန္ဒိယသံအမတ်တို့ တွေ့ဆုံကာ ဖက်ဒရယ်အရေး အလုပ်ရုံ ဆွေးနွေးပွဲ ကျင်းပခဲ့ ကြသည်။

ထိုအခင်းအကျင်းသည် တရုတ်နိုင်ငံ၏ ကြားဝင် စေ့စပ်ပေးမှုဖြင့် မြောက်ပိုင်းမဟာမိတ်အဖွဲ့(AA-MNDAA-TNLA) နှင့် NSPNC တို့ ဇွန်လ ၁ ရက်နှင့် ၂ ရက်နေ့များက ရှမ်းပြည်နယ်(အရှေ့ပိုင်း) မိုင်းလားမြို့မှာ တွေ့ဆုံ၍ ငြိမ်းချမ်း ရေး လုပ်ငန်းစဉ်များ ဆွေးနွေးပွဲ အပြီး ပေါ်ပေါက်လာခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်နဲ့ အိန္ဒိယသံအမတ်ကြီးကိုတွေ့ရစဉ်

အိန္ဒိယနိုင်ငံအနေဖြင့် အစိုးရပိုင်းနှင့်လည်း ရင်းနှီးသလို အတိုက်အခံ အင်အားစုနှင့်လည်း ရင်းနှီးကြောင်း၊ နှစ်ဖက် စလုံးကို မျှမျှတတ ဆက်ဆံသည့် သဘောရှိနေကြောင်း ရခိုင်ပြည်လွတ်မြောက်ရေးပါတီ(ALP)မှဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

၎င်းက “ကျမ ထင်တာက အိန္ဒိယနိုင်ငံက မြန်မာနိုင်ငံရဲ့ အိမ်နီးချင်း နိုင်ငံဖြစ်တယ်၊ ပြီးလို့ရှိရင် နှစ်ရှည်လများ ကျမတို့နဲ့ မြန်မာနိုင်ငံနဲ့ အမြဲတမ်း လက်တွဲလာတဲ့ နိုင်ငံဖြစ်တာပေါ့၊ အစိုးရပိုင်းနဲ့လည်း ရင်းနှီးသလို အတိုက်အခံ တွေနဲ့လည်း အများကြီး ရင်းနှီးခဲ့ပါတယ်၊ ၁၉၈၈ ရဲ့ နောက်ပိုင်းမှာလည်းပဲ၊ နှစ်ဖက်စလုံးနဲ့လည်း သူက မျှမျှတတ ဆက်ဆံခဲ့တဲ့ သဘော‌တွေ ရှိပါတယ်၊ အဲဒါကြောင့်မို့လို့ ကျမတို့က ဒီဖက်က အစည်းအဝေးတွေ စီစဉ်တဲ့ အခါမှာ အိန္ဒိယနိုင်ငံရဲ့ အကြီးအကဲ တာဝန်ကို ထမ်းဆောင်နေရတဲ့ သံအမတ်ကြီးကိုယ်တိုင် ဒီပွဲကို လာခဲ့တာလို့ ကျမ နားလည်ပါတယ်” ဟု ပြောသည်။

အိန္ဒိယနိုင်ငံသည် နစက အာဏာရယူပြီးနောက်ပိုင်း နစက အပြင် နစကမှ ဖွဲ့စည်းပေးထားသည့် အဖွဲ့အစည်းများ နှင့် ထိ‌တွေ့ဆက်ဆံမှု ပိုမိုများပြားလာသလို မြန်မာပြည်၏ နိုင်ငံရေး၊ ငြိမ်းချမ်းရေး၊ စီးပွားရေး စသည့် ကဏ္ဍများ တွင် ပိုမို ပါဝင်လာနေကြောင်း သိရသည်။

ပြီးခဲ့သည့် မေလ ၁၄ ရက်က ရခိုင်ကမ်းရိုးတန်းမှ တဆင့် ဝင်ရောက်တိုက်ခတ်ခဲ့သည့် မိုခါမုန်တိုင်းကြောင့် ပျက်စီး ဆုံးရှုံးမှုများ ဖြစ်ခဲ့သည့် ရခိုင်ပြည်နယ်အတွင်းသို့ လူသားချင်းစာနာထောက်ထားမှုအရ အိန္ဒိယအစိုးရမှ ကူညီ ထောက်ပံ့မှုများ ရှိခဲ့သည်။

အလားတူ အိန္ဒိယအစိုးရသည် ကုလားတန်မြစ် စီမံကိန်းကိုလည်း ပြန်လည် စတင်၍ အကောင်အထည် ဖော်နိုင် ရန် ကြိုးပမ်းနေသလို မြန်မာ့တပ်မတော်နှင့် နယ်စပ်ဒေသ တည်ငြိမ်အေးချမ်းရေး လုပ်ငန်းများကို ပူးပေါင်း ဆောင်ရွက်လျက်ရှိသည်။

မိုခါမုန်တိုင်းသင့် ပြည်သူများအတွက် အိန္ဒိယ လှူဒါန်း

မြန်မာပြည်တွင် ဖြစ်ပွားနေသည့် လက်နက်ကိုင်ပဋိပက္ခနှင့် ပတ်သက်၍ အိန္ဒိယနိုင်ငံအပေါ် ရိုက်ခတ်မှု ရှိနေ ကြောင်း လီဆူအမျိုးသားဖွံ့ဖြိုးတိုးတက်ရေးပါတီ (ဒူးလေးပါတီ) မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

၎င်းက “အိန္ဒိယကတော့ ကျနော်တို့ မြင်တာကတော့ အခုလက်ရှိ ကျနော်တို့ ဒီလိုဖြစ်နေတဲ့ အချိန်မှာ သူတို့နိုင်ငံ လည်း နည်းနည်း ရိုက်ခတ်မှု ရှိတယ်လေ၊ ဘာလို့လဲဆိုတော့ ကျနော်တို့ဆီကနေ ဒုက္ခသည်တွေ သူတို့ဆီ ရောက် သွားတာလည်း ရှိတယ်၊ ပြီးရင် သူတို့နိုင်ငံသားတွေလည်း တချို့ အဲဒီမှာ လွန်ခဲ့တဲ့ ကာလမှာ ဘယ်အဖွဲ့က ဘယ်လို လုပ်ကြံမှမသိ လုပ်ကြံခံရတာတွေ ရှိတယ်၊ အဲဒါလည်း ပါတာပေါ့၊ နောက်ပြီးတော့ ရှင်းရှင်းပြောရရင် တော့ မြန်မာနိုင်ငံနဲ့ သူတို့နဲ့ စီးပွားရေးအရ ဆက်ဆံရတဲ့ လမ်းကြောင်းတွေလည်း ရှိတယ်လေ‌၊ ဒါတွေလည်း တချို့ တွေက မဖွင့်သေးတာလည်း ရှိတာကိုး။ အဲဒီတော့ သူတို့အနေနဲ့တော့ မြန်မာနိုင်ငံကို အဆင်ပြေစေချင်တဲ့ ဆန္ဒ တော့ ရှိတယ်လေ၊ ဒါကြောင့် သူတို့ ကြိုးစားတာ ဖြစ်နိုင်တယ်လို့ ကျနော်တော့ အဲဒီလို ယူဆတယ်” ဟု ပြော သည်။

လက်ရှိ ချင်းပြည်နယ်အတွင်း ဖြစ်ပွားနေသော လက်နက်ကိုင် ပဋိပက္ခများကြောင့် အိန္ဒိယနိုင်ငံ မီဇိုရမ်ပြည်နယ် အတွင်း မြန်မာတိုက်ပွဲရှောင် ၅၀၀၀၀ ကျော် ထွက်ပြေး တိမ်းရှောင် ခဲ့ကြကြောင်း သိရသည်။

အိန္ဒိယနိုင်ငံနှင့် မြန်မာနိုင်ငံသည် မိုင်ပေါင်း ၁၀၀၀ ခန့် နယ်နိမိတ် ထိစပ်လျက်ရှိသည်။

အဆိုပါ ထိစပ်နယ်နိမိတ်အတွင်း ချင်းအမျိးသားတပ်ဦး (CNF)၊ ရက္ခိုင့်တပ်တော် (ULA/AA)၊ ရခိုင်ပြည် လွတ် မြောက်ရေးပါတီ (ALP)၊ နာဂအမျိုးသားဆိုရှယ်လစ်ကောင်စီ (NSCN-K/YA)၊ ဒေသကာကွယ်ရေးတပ် (PDF)၊ ဇိုမီတော်လှန်ရေးတပ်မတော်(ZRA) အပါအဝင် အိန္ဒိယနိုင်ငံကို ဆန့်ကျင်တိုက်ခိုက်နေသည့် မဏိပူရ(ကသည်း) သူပုန်များနှင့် နာဂသူပုန်များလည်း ရှိနေသည်။

CNI News

၂၀၂၃ ခုနှစ်၊ ဇွန်လ ၁၃

အကြမ်းဖက်မှု ကျူးလွန်သည့် ငှားရမ်းနေထိုင်သူများနှင့် CRPH ၊ NUG ၊ PDF တို့နှင့်ဆက်စပ်သူများကို အကြမ်းဖက်မှုတိုက်ဖျက်ရေးဥပဒေအရ အရေးယူ ဆောင်ရွက်သည့်ခါ ငှားရမ်းထားသော နေအိမ်တိုက်ခန်းများအား အမှုနှင့်ဆက်စပ်၍ သက်သေခံအဖြစ် သိမ်းဆည်းမည်ဟု အကြမ်းဖက်မှုတိုက်ဖျက်ရေးဗဟိုအဖွဲ့က ဇွန်လ ၁၃ ရက်တွင် ထုတ်ပြန်ခဲ့သည်။

CRPH ၊ NUG ၊ PDF အမည်ခံ အဖွဲ့အစည်း အမျိုးမျိုး အပါအဝင် ထိုအဖွဲ့များနှင့် ဆက်စပ်ပတ်သက်သော အဖွဲ့အစည်းများသည် အလွယ်တကူ ခြေရာခံနိုင်ခြင်းမရှိစေရန်အတွက် အဆောင်များနှင့် နေအိမ် တိုက်ခန်းများတွင် ငှားရမ်း နေထိုင်လျက်ရှိကြောင်း ဖမ်းဆီးရမိသည့် ဖြစ်စဉ်များအရ တွေ့ရှိရသည်ဟု အကြမ်းဖက်မှုတိုက်ဖျက်ရေးဗဟိုအဖွဲ့က ထုတ်ပြန်ခဲ့သည်။

ထို့ကြောင့် အဆောင်၊ နေအိမ် တိုက်ခန်းပိုင်ရှင်များ အနေဖြင့် ငှားရမ်းသူများ၏ ကိုယ်ရေး အချက်အလက်၊ အထောက်အထား ပြည့်စုံစွာ ရရှိမှသာ ငှားရမ်းခြင်းနှင့် ယင်းအချက်အလက် အထောက်အထားများဖြင့် သက်ဆိုင်ရာရပ်ကွက် သို့မဟုတ် ကျေးရွာအုပ်ချုပ်ရေးမှူးရုံးများသို့ ဧည့်စာရင်းတိုင်ကြားခြင်းကို ဆောင်ရွက် ရမည်ဟု အကြမ်းဖက်မှုတိုက်ဖျက်ရေးဗဟိုအဖွဲ့က ပြောသည်။

၎င်းက “ အကြမ်းဖက်မှု ကျူးလွန်သည့် ငှားရမ်းနေထိုင်သူများကို အကြမ်းဖက်မှု တိုက်ဖျက်ရေးဥပဒေအရ အရေးယူဆောင်ရွက်သည့်ခါ ငှားရမ်းထားသည့် နေအိမ်တိုက်ခန်းများကို အမှုနှင့်ဆက်စပ်၍ သက်သေခံအဖြစ် သိမ်းဆည်းခံရမည်ဖြစ်ပြီး တရားရုံးတွင် စစ်ဆေးပေါ်ပေါက်ချက်အရ နိုင်ငံတော်ဘဏ္ဍာအဖြစ် သိမ်းဆည်းခံရ မည်ဖြစ်သည်ကို အကြမ်းဖက်မှုတိုက်ဖျက်ရေးဗဟိုအဖွဲ့က အသိပေးထုတ်ပြန်ထားခဲ့ပြီး ဖြစ်ပါသည် ”ဟု ပြော သည်။

ထိုသို့ အသိပေးထုတ်ပြန်ခဲ့သော်လည်း နေအိမ်တိုက်ခန်း ပိုင်ရှင်အချို့သည် မသိကျိုးကျွန်ပြု၍ ဆက်လက် ငှားရမ်းပေးနေခြင်းသည် အကြမ်းဖက်မှုများကို ဆက်လက်ကျူးလွန်နိုင်အောင် အားပေးကူညီရာရောက်သကဲ့ သို့ ဖြစ်စေပါကြောင်း ထုတ်ပြန်ခဲ့သည်။

သို့ဖြစ်ပါ၍ ဖြစ်စဉ် ပေါ်ပေါက်သည့်အခါတွင် နေအိမ်တိုက်ခန်း ပိုင်ရှင်များအနေဖြင့် စနစ် တကျ စိစစ်၍ ငှားရမ်းခြင်း၊ ဧည့်စာရင်းတိုင်ကြားထားခြင်း မရှိကြောင်း တွေ့ရှိရပါက အဆိုပါ ငှားရမ်းထားသည့် နေအိမ် တိုက်ခန်းများကို သက်သေခံအဖြစ် သိမ်းဆည်းခံရမည်ဖြစ်ပြီး တရားရုံးတွင် စစ်ဆေးပေါ်ပေါက်ချက် အရ နိုင်ငံတော်ဘဏ္ဍာအဖြစ် သိမ်းဆည်းခံရမည်ဖြစ်သည့်အပြင် အကြမ်းဖက်မှုအား အားပေးကူညီသူ အဖြစ် အရေးယူခံရနိုင်ကြောင်း ထပ်မံ အသိပေး ထုတ်ပြန်ပါသည်ဟု အကြမ်းဖက်မှု တိုက်ဖျက်ရေးဗဟိုအဖွဲ့က ထုတ်ပြန်ခဲ့သည်။

CNI News

၂၀၂၃ ခုနှစ်၊ ဇွန်လ ၁၃

ပြီးခဲ့သည့် ၂၀၂၃ ခုနှစ်၊ မေလအတွင်း မြန်မာ့တပ်မတော်နှင့် တိုင်းရင်းသားတော်လှန်ရေးအင်အားစုများ (EROs)၊ ပြည်သူ့ကာကွယ်ရေးတပ် (PDF) ပူးပေါင်းတပ်တို့အကြား တိုက်ပွဲပေါင်း ၅၀၀ ကြိမ် ဖြစ်ပွားခဲ့ပြီး နှစ်ဖက်သေဆုံးမှု များ ရှိခဲ့ကြောင်း အမျိုးသားညီညွတ်ရေးအစိုးရ (NUG)၏ ကာကွယ်ရေးဝန်ကြီးဌာနက ထုတ်ပြန်ခဲ့သည်။ 

အဆိုပါ တိုက်ပွဲ အကြိမ်ရေ ၅၀၀ မှာ NUG ၏ အမှတ်(၁) စစ်ဒေသ၊ စစ်ကိုင်းတိုင်းဒေသကြီး၊ မကွေးတိုင်းဒေသ ကြီး၊ မန္တလေးတိုင်းဒေသကြီးနှင့် ရှမ်းပြည်နယ် မြောက်ပိုင်းတို့တွင် ဖြစ်ပွားခဲ့ခြင်း ဖြစ်ကြောင်း ဖော်ပြထားသည်။

NUG က “မေလအတွင်း တိုက်ပွဲပေါင်း (၅၀၀) ကြိမ် ဖြစ်ပွားခဲ့ပြီး ရန်သူ (၄၄၉) ဦး သေဆုံး၍ (၆၈၁) ဦး ထိခိုက် ဒဏ်ရာ ရရှိခဲ့ပါတယ်။ မိမိရဲဘော် (၄၁) ဦး သေဆုံးခဲ့ပြီး (၁၁၃) ဦး ထိခိုက် ဒဏ်ရာ ရရှိခဲ့ပါတယ်။ ရန်သူ့ထံမှ လက်နက်မျိုးစုံ(၂၄)လက် အပါအဝင် ခဲယမ်းမီးကျောက် အမြောက်အမြား သိမ်းဆည်းရမိခဲ့တယ်” ဟု ပြောသည်။

နှစ်ဖက်သေဆုံးမှု ကိန်းဂဏန်း အများအပြား ကွာဟနေသည့်အတွက် ထုတ်ပြန်ချက်နှင့် ပတ်သက်၍ သံသယ ဖြစ်စရာရှိကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

မြန်မာ့တပ်မတော်ကို တွေ့ရစဉ်

၎င်းက “နံပါတ် ၁ ကတော့ အဲဒီ အချက်အလက်ကို ဘယ်အ‌ပေါ်ကနေ အခြေခံပြီး ယူထားသလဲပေါ့၊ အဲဒီတော့ သေချာတာက ကိန်းဂဏန်း အရမ်းဖောင်းပွနေတာတော့ သေချာတာ အဲဒါတော့ ယုံမှားစရာမရှိဘူး။ ဘာကြောင့် လဲဆို‌တော့ ဟိုးအရင်တုန်းက ဖြစ်ခဲ့ဖူးတဲ့ တကယ့် ကြီးကြီးမားမားဖြစ်ခဲ့တဲ့ တိုက်ပွဲကြီးတွေနဲ့ ယှဉ်ရင်တောင်မှ ကိန်းဂဏန်းက ယုံကြည်နိုင်စရာ အခြေအနေ မဟုတ်ဘူး ဖြစ်နေတာပေါ့၊ အဲဒီတော့ ဘယ်လိုဟာ ဖြစ်လို့ သူတို့ ထုတ်သလဲတော့ ကျနော် မသိဘူး။ ဒါပေမဲ့ သေချာတာက ဒီကိန်းဂဏန်းတွေနဲ့ ပတ်သက်ပြီးတော့ သံသယ ဖြစ် စရာ အများကြီး ဖြစ်နေတယ်၊ အဓိကကတော့ ထုံးစံအတိုင်းပေါ့ ဒါသူတို့ဖက်ကလည်း လုပ်လေ့လုပ်ထားရှိတဲ့ နည်းစနစ်တစ်ခုပါပဲ၊ ပြောရရင်တော့ ဆိုက်ဝါးထည့်ဖြစ်တော့ တစ်ဖက်က အများကြီးကျတယ်၊ ကိုယ်ကတော့ မကျဘူး။ ဒါကြောင့်မို့လို့ သူတို့ လုပ်နေတဲ့ လက်နက်ကိုင်လမ်းစဉ် အောင်မြင်မယ်ဆိုတဲ့ တစ်ဖက်သူတို့ကို ထောက်ခံတဲ့သူကို ဆွဲပြီးတော့ အဓိက စိတ်ဓါတ်တက်အောင် လုပ်ချင်တဲ့ သဘောပါပဲ၊ ဒီထက်ပိုပြီးတော့ တွက်လို့ မရဘူး၊ အဓိက ဘယ်အချက်အလက်တွေပေါ် ယူထားသလဲဆိုတဲ့ တိကျတဲ့ ဒေတာက ကျနော်တို့မှ မရနိုင်တာကိုး။ စာရွက်ပေါ်မှာ ရေးထားတာပဲရှိတယ် မြေပြင်မှာ တကယ်ဖြစ်မဖြစ် ဘာမှသက်သေ အထောက်အထား မရှိရင် တော့ ဒီလိုမျိုး အချက်အလက်က ယုံဖို့ ခဲယဉ်းပါတယ်” ဟု ပြောသည်။

မေလအတွင်း တိုက်ပွဲပေါင်း ၅၀၀ ကြိမ်မှာ ထိတွေ့တိုက်ပွဲ ၁၅၀ ကြိမ်၊ မိုင်းဆွဲတိုက်ခိုက်မှု ၁၀၀ ကြိမ်၊ မိမိတို့မှ ပစ်ခတ်တိုက်ခိုက်မှု ၁၅၆ ကြိမ်၊ မိမိတို့မှ ဒရုန်းဖြင့် တိုက်ခိုက်မှု ၇၁ ကြိမ်၊ ရန်သူ့လေကြောင်း တိုက်ခိုက်မှု ၂၃ ကြိမ် ရှိကြောင်း NUG ၏ ကာကွယ်ရေးဝန်ကြီးဌာနမှ ထုတ်ပြန်ချက်တွင် ဖော်ပြထားသည်။

နှစ်ဖက် တိုက်ပွဲကြား သေဆုံးမှု အခြေအနေကို မိမိအနေဖြင့် အတည်မပြုနိုင်ကြောင်း၊ သို့သော်လည်း ပြည်သူ လူထုက တပ်မတော်ဘက်သို့ မရပ်တည်တော့သလို သတင်းအချက်အလက် ကူညီမှုကအစ မရှိတော့ကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

မြန်မာ့တပ်မတော်ကို တွေ့ရစဉ်

၎င်းက “ EAO တွေ ရော၊ PDF တွေရော သူတို့ဘက်မှာ ပူးပေါင်းပြီး ဆောင်ရွက်လာတာတွေလည်း ရှိတယ်၊ ပြည်သူတွေရဲ့ သတင်း ပေးမှု၊ ကူညီပံ့ပို့မှုကလည်း များလာတယ်၊ စစ်ကောင်စီက တစ်ဖက်မှာလည်း သူတို့အနေနဲ့ စိတ်ဓါတ်ကျမှု တွေ ရှိလာတယ်၊ ထွက်ပြေးမှုတွေ ရှိလာတယ်၊ နိုင်ငံရေးအားဖြင့် ဂုဏ်သိက္ခာမရှိတဲ့ တပ်မတော် တစ်ခု တဖြည်း ဖြည်း ဖြစ်လာတဲ့အခါမှာ အဲဒီမှာ တပ်ဖွဲ့ဝင်တွေလည်း စိတ်ဓါတ်ကျတာတွေ အရင်တုန်းက ပြည်သူတွေရဲ့ ဝမ်းပန်း တသာ ကြိုဆိုမှုတွေ အဲဒီလို သူတို့ဖက်မှာ မရှိတဲ့ အခါမှာ စိတ်အားငယ်မှုတွေ ဖြစ်လာ တယ်၊ အဲဒါနဲ့ပဲ ဒီလို သူတို့ ဟာ သူတို့ ယုံကြည်မှု အားနည်းလာပြီးတော့ သူတို့ဖက်မှာ ပြည်သူတွေ မရပ်တည်ဘူး ဆိုတာ တစ်ဖက်ကလည်း သိလာသလို၊ သူတို့မှာလည်း သွားရေးလာရေးကအစ ဘယ်နေရာမှ အဆင်မပြေတော့ ဘူး။ အထူးသဖြင့် ကြည်း ကြောင်းတပ်တွေပေါ့၊ သူတို့သွားတဲ့အခါမှာ တော်‌တော်ကို အထိနာတယ်၊ အထိနာတဲ့ အခါမှာ လမ်းတွေ ပိတ်ဆို့ပြီး မိုင်းထောင်တာတွေ ရှိတယ်၊ ဖြတ်တိုက်တာ‌ရှိတယ်၊ ပြောက်ကြားစစ်ကနေပြီးတော့ တက်သိမ်းတဲ့အဆင့်ထိတွေ ရောက်လာတယ်၊ အဲဒါကြောင့် လေကြောင်းကိုပဲ သူတို့ အားကိုးပြီး လုပ်လာတဲ့ အတွက်နဲ့ ပိုပိုပြီးတော့ အထိနာ လာတယ်လို့ ကျနော်တော့ မြင်ပါတယ်ခင်ဗျ” ဟု ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီလက စတင်၍ ပြောင်းလဲခဲ့သော နိုင်ငံရေး အခင်းအကျင်းအရ တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းအချို့၊ ဒေသကာကွယ်ရေးတပ် (PDF) ပူးပေါင်းတပ်တို့အကြား ကရင် ပြည်နယ်၊ ကယား(ကရင်နီ) ပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့တွင် တိုက်ပွဲများ ဖြစ်ပွားခဲ့သည်။

အဆိုပါ တိုက်ပွဲများကြောင့် ပြည်တွင်းမှာ တိုက်ပွဲ‌ရှောင် လူဦးရေ ၂ သန်းကျော် ရှိလာကြောင်း ISP Myanmar ၏ ထုတ်ပြန်ချက်အရ သိရသည်။

CNI News

၂၀၂၃ ခုနှစ်၊ ဇွန်လ ၁၃ 

နေပြည်တော်၊ ဇမ္ဗူသီရိမြို့နယ်ရှိ နိုင်ငံတော်အဆင့် အခမ်းအနားပွဲများ ကျင်းပသည့် မြန်မာ အပြည်ပြည်ဆိုင်ရာ ကွန်ဗင်းရှင်းဗဟိုဌာန-၂ ဂိတ် ၂ ရှိ ရဲကင်းတစ်ခုသည် ဇွန်လ ၁၂ ရက်နေ့က လက်ပစ်ဗုံးဖြင့် ပစ်ခတ်တိုက်ခိုက်ခံ ခဲ့ရကြောင်း သိရသည်။

ဇွန်လ ၁၂ ရက်နေ့ ည ၈ နာရီခန့်က တိုက်ခိုက်ခံခဲ့ရခြင်း ဖြစ်ကြောင်း၊ သို့သော် တစ်စုံတစ်ရာ ထိခိုက်မှု မရှိ ကြောင်း နီးစပ်သူများထံမှ သိရသည်။

၂၀၁၅ ခုနှစ်၊ အောက်တိုဘာ ၁၅ ရက်နေ့က MICC-2 မှာ NCA လက်မှတ်ထိုးပွဲ ကျင်းပစဉ်

အဆိုပါ MICC-2 သည် နိုင်ငံတော် အဆင့်အခမ်းအနား ဖြစ်သည့် ပြည်ထောင်စု ငြိမ်းချမ်းရေး ညီလာခံ၊ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA)လက်မှတ်ထိုးခြင်းနှင့် နှစ်ပတ်လည် အခမ်းအနားများ ကျင်းပလေ့ရှိသည်။

အလားတူ နိုင်ငံတကာနှင့် မြန်မာနိုင်ငံအတွင်းရှိ လအလိုက် ကျရောက်သည့် အထိမ်းအမှတ်များ ဂုဏ်ပြုပွဲများ ကျင်းပလေ့ရှိသည်။