CNI News

၂၀၂၃ ခုနှစ်၊ ဇူလိုင် ၅

ပြည်တွင်းမှာ ဖြစ်ပေါ်နေသည့် နိုင်ငံရေးပြဿနာများကို ဖြေရှင်းနိုင်ရေး ပင်လုံစာချုပ်အား အကောင်အထည် ဖော်ရမည်ဟု ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

မြန်မာပြည် လွတ်လပ်ရေးယူခဲ့သည်မှာ ရဲဘော်သုံးကျိပ်ဖြင့် တိုက်ခိုက်ပြီး ယူခဲ့ခြင်း မဟုတ်ကြောင်း၊ တောင်တန်းနှင့် ပြည်မ အတူတကွ လွတ်လပ်ရေး ယူခဲ့ခြင်းဖြစ်ကြောင်း ၎င်းက ပြောသည်။

ဦးကွမ်ဂေါင်အောင်ခမ်းက “ဗမာစစ်တပ်က ဘယ်ရှိမလဲ သူက နောက်ဆုတ်မယ့်ဟာလည်း မဟုတ်ပါဘူး။ သူက တော့ အမြဲတမ်း လက်နက်နဲ့ ဖြေရှင်းတဲ့ဟာမျိုး ဖြစ်တယ်၊ ဒါကြောင့် ဒီလက်နက်နဲ့ ဖြေရှင်းဖို့ဆိုတာထက် ပင်လုံ စာချုပ်ကို နိုင်ငံရေး ပင်လုံစာချုပ်ဆိုတာ နိုင်ငံရေးကိုပြောတာ နိုင်ငံရေးအရ ဖြေရှင်းသွားမှဘဲ ဖြစ်မယ်ဆိုတဲ့ဟာ မျိုးကို ပြောပြတာ၊ ခုနက ကျနော် ကနဦးထဲက ပြောပြီးပြီ။ လွတ်လပ်ရေးယူတာက စစ်တိုက်ပြီးမှ ယူတာ မဟုတ်ဘူး။ ဗိုလ်ချုပ်အောင်ဆန်း စစ်တိုက်ပြီး ယူတာမှ မဟုတ်တာ၊ ခင်ဗျားတို့ သိတယ်၊ စာဖတ်ကြည့်ပါ၊ ပင်လုံ စာချုပ်အရ ဗြိတိန်မှာ တောင်တန်းနဲ့ ပြည်မ အတူတကွ လွတ်လပ်ရေး ယူမယ်ဆိုပြီးမှ စာချုပ်ချုပ်ပြီးမှ ယူသွားတာ ဘယ်က ရဲဘော်သုံးကျိပ်တိုက်ပြီးမှ ယူတာမှ မဟုတ်တာ” ဟု ပြောသည်။

ပင်လုံစာချုပ်အရ ပူးပေါင်းပြီး အသစ်ဖွဲ့စည်းထူထောင်မည့် ပြည်ထောင်စုတွင် ရှမ်းပြည်နယ်၊ ကချင်ပြည်နယ်၊ ကယားပြည်နယ်နှင့် ချင်းတောင်တန်းဒေသများတွင် မိမိတို့နယ်မြေအတွင်း အုပ်ချုပ်ရေး၊ ကိုယ်ပိုင်ပြဋ္ဌာန်းခွင့် အခွင့်အရေးများ အပြည့်အဝရှိစေရန် “မူ” အားဖြင့် သဘောတူကြသည်။

ထို့အတူ ပြည်မဗမာလူမျိုးတို့နှင့် အဆင့်အတန်းတူ၊ အခွင့်အရေးတူ၊ ရပိုင်ခွင့်တူ၊ ဒီမိုကရေစီကျကျ ခံစားခွင့် ရှိရ မည်ဟုလည်း ပါရှိသည်။

 ၁၉၄၇ ခုနှစ်က ပင်လုံစာချုပ် လက်မှတ်ထိုးခဲ့ကြသည့် ခေါင်းဆောင်များ

ပင်လုံစာချုပ် ချုပ်ဆိုခဲ့စဉ်က နိုင်ငံရေးအခင်းအကျင်းနှင့် လက်ရှိ နိုင်ငံရေးအခင်းအကျင်းမှာ မတူညီကြတော့ ကြောင်း၊ ၎င်းကိစ္စအား ညှိနှိုင်းရန် အချိန်အများအပြား ယူရမည်ဖြစ်ကြောင်း ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) မှ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။

ဗိုလ်မှူးကြီးစောကျော်ညွန့်က “ဒါကလည်း ပင်လုံစာချုပ် ချုပ်ဆိုခဲ့တာလည်း ၁၉၄၇ ခုဆိုတော့ အချိန်ကာလတော့ တော်တော်လေး ကြာညောင်းခဲ့ပြီ။ ပင်လုံစာချုပ်ကနေ ကျ‌နော်တို့ ရရှိလာတဲ့ ကျနော်တို့ နိုင်ငံရဲ့ လွတ်လပ်ရေး ဖြစ်တည်မှု တစ်ဆက်တစ်စပ်တည်း ကျနော်တို့ တိုင်းရင်းသားလက်နက်ကိုင် နယ်မြေတွေက ကျနော်တို့ တိုင်းရင်းသားတွေနဲ့ ပြည်မကြားမှာ ဖြစ်ပေါ်လာတဲ့ ပြည်တွင်းစစ်လို့ပဲ ပြောမလား လက်နက်ကိုင်ပဋိပက္ခလို့ပဲ ပြောမလား ဒါတွေကလည်းပဲ နှစ်ပေါင်း ၇၀ ကျော် အချိန်အတွင်းမှာပေါ့လေ တော်တော်လေးလည်း အချိန်ကြာ ညောင်းနေပြီ သို့သော်လည်းပဲ ပင်လုံစာချုပ်မှာပါတဲ့ အချက်အလက်တွေ အားလုံးအတွက်ကတော့ အရင်တုန်းက ချုပ်ဆိုခဲ့တဲ့ နိုင်ငံရေးအခြေအနေ အရင်တုန်းက ပင်လုံစာချုပ် ချုပ်ဆိုခဲ့တုန်းက ကျနော်တို့ ရှိနေတဲ့ မြန်မာ့နိုင်ငံ ရေး အခင်းအကျင်းနဲ့ နှစ်ပေါင်း ၇၀ ကျော် ကာလအတွင်းမှာ ပြောင်းလဲဖြစ်ပေါ်နေတဲ့ နိုင်ငံရေးအခြေအနေ အခင်း အကျင်းတွေ တိုင်းရင်းသားတွေရဲ့ ရုန်းကန်မှုလည်း ကျနော်စိတ်ထင်တော့ ဒါက တစ်ထပ်တည်း ရှိဖို့တော့ အများ ကြီး ကျနော်တို့ကြားမှာ ညှိနှိုင်းဆောင်ရွက်ဖို့ အများကြီး အချိန်ယူရမယ်လို့ ထင်ပါတယ်၊ အများကြီးလည်း စကား ပြောဖို့ လိုအပ်မယ်လို့ ထင်ပါတယ်” ဟု ပြောသည်။
ပင်လုံစာချုပ်ကို တတ်နိုင်သမျှ အကောင်အထည် ဖော်မည်ဆိုပါက တိုင်းပြည်မှာ အေးချမ်းသွားမည်ဟု မြန်မာ့နိုင်ငံ‌ရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၂၁ ရာစု ပင်လုံညီလာခံ ကျင်းပနေစဉ်

၎င်းက “တကယ့်တကယ်ကလည်း ပင်လုံစာချုပ်ကိုတော့ အကောင်အထည်ဖော်ရမယ်၊ အကောင်အထည်ဖော်တဲ့ အခါမှာ ကျ‌နော်ကလည်း အမြဲပြောနေတာ ကျ‌နော်တို့က ပင်လုံစာချုပ်ကို ဖောက်ဖျက်ခဲ့တာကိုး ဖောက်ဖျက်ခဲ့ တာ ဒါက ပြောရလို့ရှိရင် ဦးနေဝင်းက စပြီးတော့ ဖောက်ဖျက်ခဲ့တာ ကျန်တဲ့လူနဲ့ မဆိုင်ဘူး။ တကယ်တော့လေ ၁၉၅၈ ခုနှစ်၊ စော်ဘွားတွေ၊ ဒူဝါတွေ၊ ကယား စောကရာတွေကို အာဏာစွန့်ခိုင်းတာက စတာကိုး။ ဒါက လုံးဝ ပင်လုံစာချုပ်ကို ဖောက်ဖျက်တဲ့ ကိစ္စကြီးပဲ၊ အဲဒီတော့ ပင်လုံစာချုပ်အတိုင်း ပြန်သွားမယ်ဆိုရင် တကယ်လို့ အေးသွားမှာပဲ၊ အချင်းချင်း သူတို့ ပြည်နယ်ဖက်မှာ အာဏာဘယ်လို ခွဲဝေမလဲဆိုတာ လာဦးမှာ၊ အဲဒီပြဿနာ တစ်ခုက ကျန်သေးတယ်ဗျ၊ ဒါကတော့ နောက်အဆင့်ပေါ်ဗျာ၊ လောလောဆယ်တော့ ကျနော်တို့ ပင်လုံစာချုပ် အတိုင်း တတ်နိုင်သမျှပေါ့နော်၊ တတ်နိုင်သမျှ ပင်လုံမူကို ထိကပ်ပြီးတော့ ပင်လုံမူလို ဖြစ်နိုင်သမျှ ကျနော်တို့ စိတ်ကောင်း စေတနာကောင်းနဲ့ အကောင်အထည်‌ ဖော်မယ်ဆိုရင်တော့ တော်တော် အေးသွားမှာပေါ့နော်” ဟု ပြောသည်။

လက်ရှိတွင် ပင်လုံစာချုပ်အရ ပြည်ထောင်စုတစ်ခုကို တည်ထောင်ခဲ့သည်မှာ ၇၆ နှစ် ပြည့်ခဲ့ပြီဖြစ်သော်လည်း လက်နက်ကိုင်ပဋိပက္ခမှာ ချုပ်ငြိမ်းနိုင်ခြင်း မရှိသေးဘဲ ပြည်တွင်းစစ်များ ဖြစ်ပွားလျက်ရှိသည်။

CNI News

၂၀၂၃ ခုနှစ်၊ ဇူလိုင် ၄

မြောက်ပိုင်းမဟာမိတ်သုံးဖွဲ့(AA-MNDAA-TNLA)တို့၏ နိုင်ငံတကာရင်းနှီးမြှုပ်နှံမှုစီမံကိန်းများကို နှောင့်ယှက်သူ အား ထိရောက်စွာ အရေးယူသွားမည်ဟု ထုတ်ပြန်ချက်ကို ကြည့်ပါက မြန်မာနိုင်ငံအပေါ် တရုတ်နိုင်ငံ၏ ဩဇာ လွှမ်းမိုးမှုမှာ ယခင်ကထက် ပိုမိုကြီးမားလာကြောင်း မြန်မာ့နိုင်ငံရေး သမားများက ပြောသည်။

လက်ရှိ ပြည်တွင်းတွင် တရုတ်နိုင်ငံအနေဖြင့် ရင်းနှီးမြှုပ်နှံမှု ပိုမိုလုပ်ဆောင်လာကြောင်း၊ မြန်မာနိုင်ငံအတွင်းရှိ လက်နက်ကိုင် အဖွဲ့အစည်းများအပေါ် ဩဇာလွမ်းမိုးမှု အတိုင်းအတာတစ်ခုအထိ ရှိလာကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “တရုတ်နိုင်ငံခြားရေးဝန်ကြီးတွေ၊ ကိုယ်စားလှယ်တွေလွှတ် ဆွေးနွေးဘာညာတွေလုပ်၊ ဒါပေမဲ့ သူတို့ မအောင်မြင်ဘူးဗျ။ ဒီကောင်တွေ ဘယ်လောက်တောင် ခြေလှမ်းတွေ ကျဲလာပြန်သလဲဆိုရင် နောက်ထပ် ထပ်ပြီး မြောက်ပိုင်းမဟာမိတ် ၃ ဖွဲ့က အမိန့်ထုတ်တယ်၊ သူတို့နယ်မြေတွေမှာ နိုင်ငံခြားအရင်းအနှီးမျိုးတွေကို နှောင့်ယှက်တဲ့ ဘယ်သူမဆိုကို အရေးယူမယ်ဆိုပြီး သူကအဲဒီလို ကြေညာတယ်၊ တနည်းအားဖြင့် တရုတ်အရင်း အနှီးကို မထိနဲ့ သူပိုင်တဲ့ မြောက်ပိုင်း ၃ ဖွဲ့ကို ကြေညာခိုင်းလိုက်တယ်ဗျာ၊ “ဝ” တို့၊ မိုင်းလားတို့ကတော့ ဘယ်သူမှ သွားလို့ မရဘူးလေ၊ အဲဒီလိုဆိုတဲ့ အခါကြတော့ ဘယ်လောက် ဩဇာလွမ်းသလဲဆိုတော့ အဲဒါကြည့်ပေါ့ဗျာ၊ မြောက်ပိုင်း ၃ ဖွဲ့ကနေပြီးတော့ အရေးယူမယ်ဆိုတော့ စကစက အရေးမယူနိုင်တော့လို့ သူက ဝင်ပြီး အရေးယူ တော့မယ့် သဘောဖြစ်တာပေါ့၊ အဲဒီသဘောဖြစ်တယ်၊ တရုတ်က မင်းမယူနိုင်လည်းရတယ် ငါ့လူတွေရှိတယ်၊ ငါ့ပိုက်လိုင်းနဲ့ ငါ့အရင်းအနှီးတွေတော့ မထိနဲ့ သေဖို့သာပြင်ဆိုပြီးတော့ အဲဒီလို တရုတ်က တစ်ဖက်လှည့်နဲ့ စကစ ကိုလည်း ကြပ်တယ်၊ နောက်တစ်ခါ PDF တွေနဲ့ လက်နက်ကိုင် တပ်ဖွဲ့တွေကိုလည်း လှမ်းပြီးတော့ ဟန့်လိုက်တာ ပေါ့ဗျာ” ဟု ပြောသည်။  

မြောက်ပိုင်းမဟာမိတ် သုံးဖွဲ့ရဲ့ ထုတ်ပြန်ချက်ကိုတွေ့ရစဉ်

နိုင်ငံတကာမှ လာရောက်ရင်းနှီးမြှုပ်နှံသော စီမံကိန်းများအား နှောင့်ယှက်ဖျက်ဆီးသူများကို ထိရောက်စွာ အရေး ယူသွားမည်ဖြစ်ကြောင်း ရက္ခိုင့်တပ်တော် (ULA/AA)၊ ပလောင်ပြည်လွတ်မြောက်ရေးတပ်ဦး (PSLF/TNLA)နှင့် မြန်မာနိုင်ငံအမှန်တရားနှင့် တရားမျှတသော အမျိုးသားပါတီ (MNTJP/ MNDAA)တို့က ၂၀၂၃ ခုနှစ်၊ ဇူလိုင် ၁ ရက်နေ့စွဲဖြင့် ထုတ်ပြန်ခဲ့သည်။

မြန်မာ - တရုတ် နယ်စပ်တစ်လျှောက် လှုပ်ရှားကြသည့် တိုင်းရင်းသားလက်နက်ကိုင် အဖွဲ့အစည်းများအပေါ် တရုတ်က တစ်စုံတစ်ရာ လွမ်းမိုးမှုရှိသော်လည်း တရုတ်ပြောသည့်အတိုင်း လိုက်လုပ်သည့် အဖွဲ့အစည်းမရှိ ကြောင်း နိုင်ငံရေးသမားအချို့က ပြောဆိုမှုများလည်း ရှိနေသည်။

တရုတ်နယ်စပ်တစ်လျှောက် လှုပ်ရှားသည့် တိုင်းရင်းသား လက်နက်ကိုင်များ အပေါ်တွင် တရုတ်အနေဖြင့် ဩဇာ သက်ရောက်မှုရှိကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြော သည်။

၂၀၂၃ ခုနှစ်၊ မေလ ၃၀ ရက်နေ့က မိုင်းလားမြို့မှာ မြောက်ပိုင်းမဟာမိတ် ၃ ဖွဲ့နဲ့ တရုတ်ကိုယ်စားလှယ် တွေ့ဆုံစဉ်

၎င်းက “ဩဇာလွမ်းမိုးမှုကတော့ အများကြီး ဖြစ်နေတာပေါ့နော်၊ ဒါပေမဲ့ တရုတ်နိုင်ငံရဲ့ ဩဇာလွမ်းမိုးမှုကတော့ ရှိတယ်၊ ဘာဖြစ်လို့လဲဆိုတော့ AA ဆိုတာလည်း တရုတ်နဲ့ ပတ်သက်သွားတယ်၊ နောက် TNLA ဆိုတာလည်း တရုတ်နဲ့ ပတ်သက်သွားတယ်၊ နောက်ပြီးတော့ UWSA ဆိုတာလည်း “ဝ”ဆိုတာလည်း တရုတ်နဲ့ ပတ်သက်သွား တယ်ပေါ့နော်၊ တရုတ်ကနေပြီးတော့ လုံးဝ ဖြူရင် ဖြူ၊ မဲရင် မဲဆိုတာမျိုးတော့ လုပ်လို့မရဘူးပေါ့၊ သို့သော် အတိုင်းအတာ တစ်ရပ်အထိတော့ တရုတ်ရဲ့ လွမ်းမိုးမှုက အများကြီး ရှိနေတာပေါ့နော်” ဟု ပြောသည်။

တရုတ် - မြန်မာ နှစ်နိုင်ငံနယ်နိမိတ်မှာ မိုင်ပေါင်း ၁၃၀၀ ကျော် ထိစပ်လျက်ရှိပြီး နယ်စပ်အနီးတွင် ရှမ်းပြည် ပြန်လည် ထူထောင်ရေး ကောင်စီ (RCSS/SSA)၊ ကချင်လွတ်လပ်ရေးတပ်မတော် (KIA)၊ ရှမ်းပြည်တိုးတက် ရေးပါတီ (SSPP/SSA)၊ ‘ဝ’ ပြည်သွေးစည်းညီညွတ်ရေးပါတီ (UWSA)၊ အမျိုးသားဒီမိုကရေစီ မဟာမိတ် တပ်မတော် (NDAA)၊ MNDAA၊ TNLA နှင့် AA စသည့် လက်နက်ကိုင် အဖွဲ့အစည်းများ လှုပ်ရှားလျက်ရှိသည်။

CNI News

၂၀၂၃ ခုနှစ်၊ ဇူလိုင် ၃

ရက္ခိုင့်တပ်တော်(AA)၏ အရာရှိ လေ့ကျင့်ရေးသင်တန်း အမှတ်စဉ်(၃)မှ သင်တန်းသားများကို အရာရှိလောင်းများ အဖြစ် အသိအမှတ်ပြုခြင်း အခမ်းအနားကို ရခိုင်ပြည်နယ် ကျင်းပခဲ့သည်ဟု ၂၀၂၃ ခုနှစ်၊ ဇူလိုင် ၃ ရက်နေ့တွင် ကျင်းပခဲ့သည် ဟု AA က ထုတ်ပြန်ခဲ့သည်။

ရက္ခိုင့်တပ်တော်၊ အရာရှိ လေ့ကျင့်ရေးသင်တန်း အမှတ်စဉ် (၃) အား ၂၀၂၂ ခုနှစ်၊ နိုဝင်ဘာလ ၁ ရက်နေ့မှစ၍ သင်တန်းသူ၊ သင်တန်းသား ၃၂၆ ယောက်ဖြင့် ရခိုင်ပြည်နယ်တွင် စတင်ဖွင့်လှစ်ခဲ့ပြီး ၂၀၂၃ ခုနှစ်၊ ဇွန်လ ၁၉ ရက် နေ့တွင် အရာရှိလောင်းအဖြစ် အသိအမှတ်ပြု အခမ်းအနားကို ပြုလုပ်ခဲ့ခြင်း ဖြစ်သည်ဟု AA မှ ထုတ်ပြန်ခဲ့သည်။

ရက္ခိုင့်တပ်တော်၊ အရာရှိလောင်း လေ့ကျင့်ရေး သင်တန်း အမှတ်စဉ် (၁) နှင့် အမှတ်စဉ် (၂) တိုအား မဟာမိတ် ကချင်ပြည်တွင် လေ့ကျင့်ပြုလုပ်နိုင်ခဲ့ပြီး အမှတ်စဉ် (၃) အား ရခိုင်ပြည်နယ်တွင် ဖွင့်လှစ်နိုင်ခဲ့ခြင်း ဖြစ်သည်။ 

ထိုကြောင့် အမှတ်စဉ် (၃) သင်တန်းသည် ရခိုင်ပြည်နယ်တွင် ပထမဆုံးပြုလုပ်သော အရာရှိလေ့ကျင့်ရေး သင်တန်းဖြစ်သည်။

ထို့နောက် အရာရှိဖြစ်သင်တန်း၊ အမှတ်စဉ် (၄) ကိုလည်း ၂၀၂၄ ခုနှစ်၊ နှစ်ဆန်းပိုင်းတွင် ဖွင့်လှစ်သွားရန် လျာတားထားကြောင်း AA ဘက်က ပြောသည်။

အရာရှိလေ့ကျင့်ရေး သင်တန်းကျောင်းအား (၉) နှစ်မြောက်၊ ရက္ခိုင့်တပ်တော်နေ့ဖြစ်သော ၂၀၁၈ ခုနှစ်၊ ဧပြီ ၁၀ ရက်နေ့တွင် သင်တန်းသူ၊ သင်တန်းသား ၁၃၈ ဦးဖြင့် ကချင်ပြည်နယ်၌ ပထမဦးဆုံး စတင် ဖွင့်လှစ်ခဲ့ကြောင်း သိရသည်။

CNI News

၂၀၂၃ ခုနှစ်၊ ဇူလိုင် ၃

နိုင်ငံတကာမှ လာရောက်ရင်းနှီးမြှုပ်နှံသော စီမံကိန်းများအား နှောင့်ယှက်ဖျက်ဆီးသူများကို ထိရောက်စွာ အရေးယူဆောင်ရွက်သွားမည်ဟု မြောက်ပိုင်းမဟာမိတ်သုံးဖွဲ့(AA-MNDAA-TNLA)က ၂၀၂၃ ခုနှစ်၊ ဇူလိုင် ၁ ရက်နေ့စွဲဖြင့် ပူးတွဲထုတ်ပြန် ကြေညာခဲ့သည်။

ထိန်းချုပ်နယ်မြေအတွင်း တည်ငြိမ်အေးချမ်းရေးအတွက် ပူးတွဲထုတ်ပြန်ကြေညာချက်ဟုဆိုကာ ထုတ်ပြန်ခဲ့ခြင်း ဖြစ်သည်။

AA-MNDAA-TNLA တို့က “ ဒေသတည်ငြိမ် အေးချမ်းရေးနှင့် ပြည်သူလူထု တစ်ရပ်လုံး၏ အသက်အိုးအိမ် စည်းစိမ်များကို ကာကွယ်စောင့်ရှောက်ရေးဟူသည့် မွန်မြတ်သော တာဝန်ဝတ္တရားကို ကျေပွန်စွာ ထမ်း ဆောင်ရွန်အတွက် မိမိတို့ ညီနောင်မဟာမိတ် (၃)ဖွဲ့အနေဖြင့် မိမိတို့၏ ထိန်းချုပ်နယ်မြေများနှင့် လှုပ်ရှား နယ်မြေများအတွင်း၌ အကြမ်းဖက်တိုက်ဖျက်ရေးနှင့် ရာဇဝတ်မှု ကျူးလွန်သည့်လုပ်ရပ်များအား ချေမှုန်းရေး လုပ်ငန်းများကို ပိုမိုတိုးတက်ကောင်းမွန်ရန်အတွက် တက်တက်ကြွကြွနှင့်အတူတကွ ပူးပေါင်းဆောင်ရွက်သွား နိုင်ရန် အောက်ပါအတိုင်း သဘောထားထုတ်ပြန်အပ်ပါသည်”ဟု ပြောသည်။

ထို့နောက် ဒေသတည်ငြိမ်အေးချမ်းရေး၊ လုံခြုံရေးနှင့် သူတစ်ပါး၏ အသက်အိုးအိမ်စည်စိမ်များကို ထိခိုက်စေ နိုင်သော အကြမ်းဖက်လုပ်ရပ်များနှင့် ကျူးလွန်သူများကို မည်သည့်အခါတွင်မျှ အားမပေးဘဲ တားဆီးကာ တိုက်ဖျက်ချေမှုန်းသွားပါမည်၊ ရာဇဝတ်မှုကျူးလွန်သည့် လုပ်ရပ်များနှင့် ပတ်သက်သော ပစ္စည်းဥစ္စာများကို ဥပဒေနှင့်အညီ ထိန်းသိမ်းပြီး စစ်ဆေးကာ နည်းမှန်လမ်းမှန် အရေးယူသွားမည်ဟု ပူးတွဲထုတ်ပြန်ချက်တွင် ဖော်ပြထားသည်။AA-MNDAA-TNLA တို့က “ နိုင်ငံတကာမှ လာရောက်ရင်းနှီးမြှုပ်နှံသော စီမံကိန်းများအား နှောင့်ယှက်ဖျက်ဆီး သူများကို ထိရောက်စွာ အရေးယူ ဆောင်ရွက်သွားမည်၊ နိုင်ငံတကာ ရင်းနှီးမြှုုပ်နှံမှုကုမ္ပဏီ (သို့မဟုတ်) ပုဂ္ဂိုလ် များအပေါ် အနှောင့်အယှက်ပေးခြင်း၊ ဆက်ကြေးတောင်းခြင်း စသည့် ပြစ်မှုများ ကျူးလွန်သူ မည်သည့ကိုမဆို ဥပဒေအရ အရေးယူဆောင်ရွက်သွားမည်။

အကြမ်းဖက်လုပ်ရပ်အား ကျူးလွန်သူများ၊ ရာဇဝတ်မှု ကျူးလွန်သူ များအား အာအကွယ်ပေးနေသူများကို ဖြိုခွင်းတိုက်ဖျက် အရေးယူသွားပါမည်”ဟု ပြောသည်။

မြောက်ပိုင်းမဟာမိတ် ၃ ဖွဲ့ထုတ်ပြန်ချက်ကိုတွေ့ရစဉ်

အလားတူ အကြမ်းဖက်လုပ်ရပ်များအား ကျူးလွန်သောသူများကို တွေ့ရှိပါက မိမိတို့ထံ အချိန်မီ သတင်းပို့ကြပါ ရန် မေတ္တာရပ်ခံပါကြောင်း၊ မြန်မာပြည်သူလူထု တစ်ရပ်လုံးနှင့် မိမိတို့ တော်လှန်ရေးအဖွဲ့အစည်းများအပေါ် အားပေးထောက်ခံကြသော သူများအနေဖြင့် ကမ္ဘာ့ငြိမ်းချမ်းရေး၊ အကြမ်းဖက် တိုက်ဖျက်ရေးနှင့် ရာဇဝတ်မှု ကျူးလွန်သည့် လုပ်ရပ်များအား ချေမှုန်းရေးလုပ်ငန်းများတွင် အတူတကွ တက်ကြွစွာ ပူးပေါင်းဆောင်ရွက်ကြ ပါရန် မိမိတို့ ညီနောင်မဟာမိတ် (၃)ဖွဲ့က အထူးတိုက်တွန်းပါကြောင်း ပူးတွဲထုတ်ပြန်ခဲ့သည်။

AA သည် ရခိုင်ပြည်နယ်နှင့် ချင်းပြည်နယ်၊ ပလက်ဝမြို့နယ်တို့တွင် အဓိက လှုပ်ရှား၍ ထိန်းချုပ်နယ်မြေ တည် ဆောက်လျက်ရှိသည်။ အဆိုပါ ဒေသများတွင် အိန္ဒိယနိုင်ငံ၏ ကုလားတန်မြစ်စီမံကိန်းနှင့် တရုတ်နိုင်ငံ၏ ကျောက်ဖြူရေနက်ဆိပ်ကမ်းစီမံကိန်း အပါအဝင် တခြားသော ရင်းနှီးမြှုပ်နှံမှု စီမံကိန်းများ ရှိသည်။

ထို့နောက် AA သည် ကုလားတန်မြစ်စီမံကိန်းကို လုပ်ကိုင်နေသည့် အိန္ဒိယနိုင်ငံသား ၂ ဦးကို ၂၀၁၉ ခုနှစ်၊ နိုဝင်ဘာလက ဖမ်းဆီးခဲ့သလို ကုလားတန်မြစ်စီမံကိန်း ဖော်ဆောင်ရေး အသုံးပြုသည့် အရပ်ဖက်သုံး သင်္ဘော များကိုလည်း မီးရှို့ဖျက်ဆီးမှုများ ပြုလုပ်ခဲ့ဖူးသည်။

၂၀၁၉ ခုနှစ်က ကုလားတန်မြစ်စီမံကိန်း ဖော်ဆောင်ရေးအသုံးပြုသည့် အရပ်ဖက်သုံးသင်္ဘော တစ်စီး AA လက်နက်ကြီးဖြင့် ပစ်၍ မီးရှို့ခဲ့သည်ကို တွေ့ရစဉ်

TNLA နှင့် MNDAA တို့ကတော့ ရှမ်းပြည်နယ်မြောက်ပိုင်းတွင် အဓိက လှုပ်ရှားကာ ထိန်းချုပ်နယ်မြေများ တည်ဆောက်လျက်ရှိပြီး တရုတ်-မြန်မာ ကုန်သွယ်ရေးလမ်းကြောင်းများကို ပြီးခဲ့သည့် အရပ်သားအစိုးရ ၂ ဆက် လက်ထပ်တွင် တိုက်ခိုက်မှုများ ပြုလုပ်ခဲ့ဖူးသည်။

လက်ရှိတွင် AA-MNDAA-TNLA တို့ မြန်မာ့တပ်မတော်ကို ဖြုတ်ချရေး လက်နက်ကိုင် တိုက်ခိုက်နေကြသည့် ပြည်သူ့ကာကွယ်ရေးတပ်ဖွဲ့(PDF)၊ ဒေသခံကာကွယ်ရေးတပ်ဖွဲ့(LDF)၊ ဗမာပြည်သူ့လွတ်မြောက်ရေးတပ်တော် (BPLA)၊ ကရင်နီအမျိုးသားကာကွယ်ရေးတပ်ဖွဲ့(KNDF)တို့ကို စစ်သင်တန်းများပေးခြင်းနှင့် လက်နက်များ တပ် ဆင်ပေးခြင်းများ ပြုလုပ်လျက်ရှိသည်။

အဆိုပါ ညီနောင်မဟာမိတ်(၃) ဖွဲ့အပေါ် တရုတ်နိုင်ငံက သြဇာသက်ရောက်မှုရှိသည်ဟု လက်နက်ကိုင် တော်လှန်ရေးတွင် ပါဝင်နေသူများက ပြောသည်။

CNI News

၂၀၂၃ ခုနှစ်၊ ဇူလိုင် ၃

ရခိုင်လူမျိုးအချင်းချင်း သတ်ဖြတ်နေမှုသည် ရခိုင်ပြည်အတွက် ဆုတ်ယုတ်စေကြောင်း ရခိုင်ပြည်လွတ်မြောက် ရေးပါတီ (ALP)၏ အတွင်းရေးမှူးအဖွဲ့ဝင် ဗိုလ်မှူးခိုင်သူရိန်က CNI သတင်းဌာနသို့ ပြောသည်။

မိမိတို့ ရခိုင်လူမျိုးများ ဖွံ့ဖြိုးတိုးတက်ရေးအတွက် လက်နက်ကိုင်ခဲ့ကြကြောင်း၊ ရခိုင်လက်နက်ကိုင် အချင်းချင်း မသင့်မြတ်မှုက ရခိုင်လူမျိုးများကို ဆုံးရှုံးနစ်နာစေကြောင်း ၎င်းက‌ ပြောသည်။

ဗိုလ်မှူးခိုင်သူရိန်က “ရခိုင်လူမျိုးတွေအတွက်တော့ ဆုံးရှုံးနစ်နာမှု အကြီးဆုံးပေါ့ဗျာ၊ ဘာလို့ဆိုတော့ ကျနော်တို့ ရခိုင်တွေက လက်နက်ကိုင်ခဲ့ကြတဲ့ ရည်ရွယ်ချက်တွေ ကိုယ်စီရှိတယ်၊ ဘယ်လိုပဲဖြစ်ဖြစ် ကျနော်တို့က ရခိုင်ပြည် ဖွံ့ဖြိုးတိုးတက်စေချင်တယ်၊ ရခိုင်လူမျိုးတွေကို ဖွံ့ဖြိုးတိုးတက်စေချင်တယ်၊ ဒီရည်ရွယ်ချက်ကောင်းတွေနဲ့ ကျနော် တို့က လက်နက်ကိုင်ပြီး တော်လှန်ခဲ့ကြတာ၊ လက်နက်ကိုင် တော်လှန်တယ်ဆိုတာ အချိန်မရွေး သေတတ်တယ်၊ ဒါပေမဲ့ ကျနော်တို့က ဒီလိုမျိုး အသက်ကိုရင်းပြီးတော့  ကျနော်တို့က ရခိုင်ပြည်နယ်နဲ့ ရခိုင်လူမျိုးကို ကိုယ်စားပြု ပြီးတော့ လက်နက်ကိုင်ခဲ့ကြတာ ဖြစ်တယ်၊ အခုကြ‌တော့ ကျနော်တို့ ရခိုင်အချင်းချင်း သတ်ဖြတ်နေကြတယ်ဆို တာ ရခိုင်ပြည်အတွက် ဘယ်လောက် ဆုတ်ယုတ် စေသလဲဆိုတာ စဉ်းစားတတ်တဲ့ လူတိုင်းသိပါတယ်” ဟု ပြော သည်။

ရခိုင်ပြည်နယ်အတွင်းက လမ်းဆုံတစ်ခုကိုတွေ့ရစဉ်

ALP ဒုဥက္ကဋ္ဌ ခိုင်နီရောင်၊ အမှတ်(၁၀၁)တပ်ရင်းမှ တပ်ရင်းမှူးခိုင်ကျော်မင်းနှင့် တပ်သား ကျော်ကျော်နိုင်တို့ ၃ ဦး ကို ဇူလိုင် ၁ ရက်နေ့က ရခိုင်ပြည်နယ်၊ စစ်တွေမြို့ စစ်တွေတက္ကသိုလ် ကျောင်းရှေ့အရောက်မှာ ရက္ခိုင့်တပ်တော် (AA) က လုပ်ကြံပစ်ခတ် သတ်ဖြတ်သွားကြောင်း ALP မှ ထုတ်ပြန် ကြေညာခဲ့သည်။

အဆိုပါ ALP ပါတီဝင်များကို လုပ်ကြံသတ်ဖြတ်သည်ဟု ထုတ်ပြန်ချက်နှင့် ပတ်သက်ပြီး AA ၏ ပြောဆိုချက်အား သိရှိနိုင်ရန် AA ထံ CNI က ဖုန်းဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။

ထို့နောက် ရခိုင်နိုင်ငံရေးသမားများ၊ ရခိုင်ပါတီများ၊ ရခိုင်အရပ်ဖက်အဖွဲ့အစည်းများကို ဖုန်းဆက်၍ မေးမြန်းသော် လည်း တစ်စုံတစ်ရာ မှတ်ချက် မပေးလိုကြောင်း ပြောကြားခဲ့သည်။

မိမိတို့ ALP သည် လက်ရှိအချိန်တွင် ငြိမ်းချမ်းရေး လမ်းကြောင်းဖြင့် သွားနေကြောင်း၊ AA ကမူ လက်နက်ကိုင် လမ်းစဉ်ဖြင့် သွားနေကြောင်း၊ ထို့ကြောင့် မိမိတို့ အချင်းချင်းအကြား ဘာပြဿနာမှ ဖြစ်စရာမရှိကြောင်း ဗိုလ်မှူး ခိုင်သူရိန်က ပြောသည်။

ရခိုင်ပြည်နယ်ကိုတွေ့ရစဉ်

၎င်းက “ဖြေရှင်းလို့ရတဲ့ နည်းလမ်းတွေတော့ အများကြီးရှိတယ်၊ ဒါပေမဲ့ ကျနော်တို့ဖက်က လူတွေ သွေးမြေကျတဲ့ အပေါ်မှာ သူတို့ဖက်က ကျနော်တို့ကို ဘယ်လို ပြန်ပြီးဖြေရှင်းပေးမလဲ ကျေနပ်အောင် ဒါကို ကျနော်တို့ မေးခွန်း ထုတ်စရာ ဖြစ်လာပြီ။ ဘာလို့ဆိုတော့ သူတို့လည်း ရခိုင်လူမျိုး၊ ကျနော်တို့လည်း ရခိုင်လူမျိုး AA က သတ်လို့၊ ALP သေရင်လည်း ရခိုင်တစ်ယောက်သေတာပဲလေ၊ ALP က သတ်လို့ AA တစ်ယောက် သေရင်လည်း ရခိုင် တစ်ယောက် သေတာပဲ ဒါကို သူတို့ သိထားဖို့လိုတယ်၊ ဘယ်လိုပဲလုပ်လုပ် ဘယ်ဖက်လက်နဲ့ ညာဖက်လက် ဓါး တစ်ချောင်းစီကိုင်ပြီး ခုတ်နေတယ်လို့ပဲ ကျနော်က ဥပမာပေးချင်တယ်၊ ထိမှာသည် ရခိုင်လူမျိုးပဲထိမှာ အဲဒီတော့ စဉ်းစားပါ၊ ဆင်ခြင်ပါ၊ သူတို့မှာလည်း ခေါင်းဆောင်ပိုင်းတွေမှာ ဦးနှောက်ရှိတဲ့လူတွေ ရှိပါတယ်။ အဲဒီတော့ ကိုယ့် လူ ကိုယ်ထိန်းပါ။ ပြီးတော့ ဒီဖြစ်စဉ်တွေအတွက် သူတို့ ဖြေရှင်းဖို့အတွက် စဉ်းစားထားပါ ဒါပဲ ကျနော်ပြောချင် တယ်” ဟု ပြောသည်။

ပြီးခဲ့သည့် ၂၀၂၃ ခုနှစ်၊ ဇန်နဝါရီ ၄ ရက်နေ့ကလည်း  ALP ၏ စစ်ဦးစီးချုပ် ဗိုလ်ချုပ်ခိုင်စိုးမြ အပါအဝင် အမှတ် (၁၀၁)တပ်ရင်းမှူး ဒုတိယဗိုလ်မှူးကြီး ခိုင်ကျော်စိုးနှင့် ဗိုလ်ကြီးခိုင်သူရိန္ဒတို့ကို AA က လုပ်ကြံသတ်ဖြတ် သွားခဲ့ သည်ဟု ALP က ထုတ်ပြန်ခဲ့သည်။

ရက္ခိုင့်တပ်တော် (ULA/AA) နှင့် ရခိုင်ပြည်လွတ်မြောက်ရေးပါတီ (ALP) တို့သည် ရခိုင်လက်နက်ကိုင် အဖွဲ့အစည်း များဖြစ်ပြီး ALP သည် တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် (NCA) ထိုးထားသော အဖွဲ့ဖြစ်ကာ AA ကမူ မထိုးနိုင်သေးဘဲ ညှိနှိုင်းမှုများ ရှိနေသည့် အဖွဲ့ဖြစ်သည်။

CNI News
၂၀၂၃ ခုနှစ်၊ ဇူလိုင် ၂

ရခိုင်ပြည်လွတ်မြောက်ရေးပါတီ(ALP)ဒုဥက္ကဋ္ဌ ခိုင်နီရောင် အပါအဝင် ၃ ဦးကို ရက္ခိုင့်တပ်တော် (AA) က ရခိုင်ပြည်နယ်၊ စစ်တွေမြို့မှာ လုပ်ကြံပစ်ခတ် သတ်ဖြတ်သွားကြောင်း ALP မှ ထုတ်ပြန် ကြေညာခဲ့သည်။

ALP ဒုဥက္ကဋ္ဌ ခိုင်နီရောင်၊ အမှတ်(၁၀၁)တပ်ရင်းမှ တပ်ရင်းမှူး ခိုင်ကျော်မင်းနှင့် တပ်သား ကျော်ကျော်နိုင်တို့ ၃ ဦးကို ဇူလိုင် ၁ ရက်နေ့က ရခိုင်ပြည်နယ်၊ စစ်တွေမြို့ စစ်တွေတက္ကသိုလ် ကျောင်းရှေ့အရောက်မှာ AA က ပစ်ခတ် လုပ်ကြံ သတ်ဖြတ်သွားကြောင်း ALP မှ ထုတ်ပြန်ခဲ့သည်။

အဆိုပါ ၃ ဦးသည် ALP ဥက္ကဋ္ဌ ဒေါ်စောမြရာဇာလင်း၏ နေအိမ်မှာ မိုခါမုန်တိုင်းကယ်ဆယ်ရေးကိစ္စများအတွက် အစည်းအဝေးလုပ်ပြီး အပြန်မှာ လုပ်ကြံခံရခြင်း ဖြစ်သည်ဟု ALP က ပြောသည်။

ရခိုင်ပြည်နယ်၊ ရခိုင်လူမျိုးများအတွက် လက်နက်ကိုင်ခဲ့ကြသော အဖွဲ့အစည်းများ အချင်းချင်း ကြားတွင် AA မှ စဉ်ဆက်မပြတ် ပြုမူခဲ့သော ဤအပြုအမူမျိုးသည် အလွန်ယုတ်ညံ့သည့် မလုပ်သင့်  မလုပ်အပ်သော အပြုအမူဖြစ်သည်ဟု မိမိတို့မှ ပြင်းထန်စွာ ရှုတ်ချပါသည်ဟု ALP က ထုတ်ပြန်ခဲ့သည်။

CNI News

၂၀၂၃ ခုနှစ်၊ ဇူလိုင် ၁

ထိုင်း-မြန်မာ နှစ်နိုင်ငံ အဆင့်မြင့် အရာရှိကြီးများ ပါဝင်သည့် (၃၅)ကြိမ်မြောက် ထိုင်း-မြန်မာ နယ်စပ်ဒေသရေးရာ ကော်မတီ(Thai- Myanmar regional border committee) အစည်းအဝေးကို ၂၀၂၃ ခုနှစ်၊ ဇွန်လ ၂၈ ရက်မှ ၃၀ ရက်နေ့အထိ ကျင်းပခဲ့သည်။

အဆိုပါ အစည်းအဝေးကို ထိုင်းနိုင်င၊ ချင်းမိုင်မြို့ရှိ Green Lake Hotel တွင် ကျင်းပခဲ့ခြင်း ဖြစ်သည်။

ထိုင်း-မြန်မာ တပ်မတော် အရာရှိကြီးများကိုတွေ့ရစဉ်

မြန်မာဘက်က အမှတ်(၄)စစ်ဆင်ရေးအထူးအဖွဲ့မှူး ဒုတိယဗိုလ်ချုပ်ကြီးညွန့်ဝင်းဆွေ ဦးဆောင်သည့် တပ်မတော်အရာရှိများ တက်ရောက်ခဲ့သည်။

လက်ရှိတွင် ထိုင်း-မြန်မာ နယ်စပ်တွင် လက်နက်ကိုင်ပဋိပက္ခများကြောင့် နယ်မြေတည်ငြိမ်အေးချမ်းမှု အားနည်းလျက်ရှိသလို နေရပ်စွန့်ခွာ ထွက်ပြေးတိမ်းရှောင်လာသူများအရေးလည်း ကြုံတွေ့နေရသည်။

CNI News

၂၀၂၃ ခုနှစ်၊ ဇူလိုင် ၁

ကရင်နီပြည်လူမျိုးပေါင်းစုံပြည်သူ့လွတ်မြောက်ရေးတပ်ဦး(က.လ.လ.တ)ကနေ ခွဲထွက်၍ KNPP-KNDF တို့နှင့် ပူးပေါင်းသွားသည့် ခွဲထွက်ရေးအဖွဲ့က မြန်မာ့တပ်မတော်ကို တိုက်ခိုက်သွားမည်ဟု ထုတ်ပြန်ကြေညာခဲ့စဉ်မှာပဲ ကလလတ ဗဟိုက ပြည်သူလူထုအကျိုးပြု လုပ်ငန်းများကို အစိုးရ၊ တပ်မတော်နှင့်အတူ လက်တွဲဆောင်ရွက် သွားမည်ဟု ဇူလိုင် ၁ ရက်နေ့တွင် ထုတ်ပြန်ခဲ့သည်။

ကယားပြည်နယ်အတွင်း အခြေစိုက်ထားသည့် ကလလတ၏ မယ်စဲ့၊ ရွာသစ်၊ စွပ်ပိုင်နှင့် ဘီပီ-၁၄ စခန်းများကို ကလလတ အဖွဲ့ဝင်များဖြစ် အသွင်ပြောင်းဖွဲ့စည်းထားသည့် အမှတ်(၁၀၀၄)နှင့် အမှတ်(၁၀၀၅) နယ်ခြားစောင့် တပ်ဖွဲ့များက တောခို၍ တိုက်ခိုက်သိမ်းပိုက်သွားခဲ့သည်။

ထို့နောက် မြန်မာ့တပ်မတော် ဇွန်လ ၁၆- ၁၇ ရက်နေ့များနှင့် ဇွန်လ ၂၇ ရက်တို့တွင် ပြန်လည် တိုက်ခိုက်၍ သိမ်းပိုက်ခဲ့သည်။

ခွဲထွက် ကလလတအဖွဲ့က “ စစ်အုပ်စု၊ စစ်အာဏာရှင်စနစ်၊ စစ်အစိုးရနှင့် ၂၀၀၈ အခြေခံဥပဒေ အကုန်အစင် တိုက်ဖျက်ရေး ရည်မှန်းချက်ထားရှိပြီး ထိုသို့ တိုက်ဖျက်နိုင်မှသာ အားလုံးမျှော်မှန်းတောင့်တ လိုလားကြသည့် ဒီမိုကရေစီရေး၊ တန်းတူရေးနှင့် ကိုယ်ပိုင်ပြဋ္ဌာန်းခွင့် အပြည့်အဝရှိသော ဖက်ဒရယ်ပြည်ထောင်စု(သို့) စစ်မှန်သည့် ပြည်ထောင်စုအား တည်ဆောက်နိုင်ရန် အခြေခံကောင်းများ ပေါ်ပေါက်လာနိုင်မှာဖြစ်တယ်”ဟု ထုတ်ပြန် ခဲ့သည်။

၂၀၂၁ ခုနှစ်က လွိုင်ကော်မှာ ဆန္ဒပြသူများနှင့်အတူ တွေ့ရသည့် ကလလတ (အသွင်းပြောင်း BGF )ကို တွေ့ရစဉ်

ထို့နောက် ကလလတ ဗဟိုက ကရင်နီပြည်လူမျိုးပေါင်းစုံ ပြည်သူ့လွတ်မြောက်ရေးတပ်ဦး(ကလလတ) ငြိမ်းချမ်း ရေးအဖွဲ့(လွိုင်ကော်ခရိုင်)သည် ပြည်သူလူထု၏ အကျိုးကိုသာ အစဉ်ဦးထိပ် ပန်ဆင်ပြီး ယနေ့အချိန်ထိ နိုင်ငံတော် အစိုးရ၊ တပ်မတော်၊ ပြည်နယ်အုပ်ချုပ်ရေးအဖွဲ့များနှင့် အတူယှဉ်တွဲစွာ ငြိမ်းချမ်းရေး တည်ဆောက်ခဲ့ ပြီးဖြစ်၍ ပြည်သူလူထုအတွက် အကျိုးပြု လုပ်ငန်းများကိုသာ အတူပူးပေါင်း ဆောင်ရွက်သွားမည်ဖြစ်ကြောင်းနှင့် ဗဟို ကော်မတီ၏ သဘောထားမပါဘဲ ထုတ်ပြန် ကြေညာချက်များသည် အဖွဲ့အစည်း၏ တရားဝင် ထုတ်ပြန် ကြေညာ ချက်များ မဟုတ်ကြောင်း ထုတ်ပြန်လိုက်ပါသည်ဟု ဆိုသည်။

က.လ.လ.တ သည် ကရင်နီအမျိုးသားတိုးတက်ရေးပါတီ(KNPP)ကနေ ၁၉၇၈ ခုနှစ်တွင် ခွဲထွက်ခဲ့ပြီး ၁၉၉၄ ခုနှစ်၌ နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီ(နယက)နှင့် ငြိမ်းချမ်းရေး ယူခဲ့သည်။

ထို့နောက် ၂၀၀၉ ခုနှစ်တွင် နယ်ခြားစောင့်တပ်(BGF)အဖြစ် အသွင်းပြောင်း ဖွဲ့စည်းခဲ့သည်။

CNI News

၂၀၂၃ ခုနှစ်၊ ဇူလိုင် ၁

နိုင်ငံတော်ပိုင် ဘဏ်နှစ်ခုဖြစ်သည့် မြန်မာ့နိုင်ငံခြားကုန်သွယ်မှုဘဏ်(MFTB)၊ မြန်မာ့ရင်းနှီးမြှုပ်နှံမှုနှင့် ကူးသန်း ရောင်းဝယ်ရေးဘဏ် (MICB)တို့ကို အမေရိကန် ပိတ်ဆို့အရေးယူမှုသည် နစကကို ထိခိုက်စေသလား သို့မဟုတ် မည်သည့် လူတန်းစားအလွှာများကို ထိခိုက်စေသလဲ စီးပွားရေးနှင့် နိုင်ငံရေး အသိုင်းအဝိုင်းကြား ဆွေးနွေးလျက် ရှိနေသည်။

အဆိုပါ ပိတ်ဆို့မှုကြောင့် ပြည်သူလူထုများအပေါ် များစွာ ရိုက်ခတ်မှုရှိကြောင်း၊ မြန်မာ့တပ်မတော်သည် Institution ကို ခိုင်မာစွာ တည်ဆောက်ထားခြင်းကြောင့် ၎င်းတို့အပေါ် သက်ရောက်မှု များစွာမရှိကြောင်း ရခိုင့်ဦး‌ဆောင်ပါတီ (AFP) ပါတီမှ ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

မြန်မာ့နိုင်ငံခြားကုန်သွယ်မှုဘဏ် (MFTB)ကိုတွေ့ရစဉ်

ဒေါက်တာအေးမောင်က “လူထုပိုထိခိုက်တာပေါ့၊ နစက-ကတော့ နယကလိုပဲ သွားမှာပဲလေ၊ နဝတ၊ နယကလိုပဲ သွားမှာပဲ၊ ခင်းဗျားတို့ သတိထားမိလားမသိဘူး။ ဦးသန်းရွှေတို့ စတက်ကတည်းကလေ ဆိုပါတော့ ဦးနေဝင်း ခေတ်နဲ့ ဦးသန်းရွှေခေတ်က မတူဘူးဗျ၊ ဦးနေဝင်းက မြန်မာ့ဆိုရှယ်လစ်လမ်းစဉ်ဆိုတာနဲ့ အဲဒီကာလ တက်ကြွတဲ့ ဘက်မလိုက်ဝါဒဆိုတာနဲ့ ဦး‌ဆောင်ကြတာကိုး၊ ဒီဖက်ခေတ်ရောက်တဲ့ အခါမှ သိတဲ့အတိုင်းပဲ ပြည်တွင်းစစ်က လည်း အကြောင်းကြောင်းတွေကြောင့် ရှည်ကြတာပေါ့ဗျာ၊ ဖန်တီးထားတာလား ပြီးပြတ်အောင် မလုပ်နိုင်တာ လား။ ဒါကတော့ သူတို့ အချင်းချင်းပဲ သိကြလိမ့်မယ်၊ အဲဒီလိုနဲ့ မြန်မာ့တပ်မတော်ရဲ့ အင်္ဂါရုပ်၊ အင်္ဂါရပ်တွေကို ပြန်ကြည့်ရင် သူ့မှာ လိုအပ်တဲ့ဟာ အကုန်လုံးကို ပြန်တည်ဆောက်တယ်ဗျ၊ တနည်းအားဖြင့် Institution အကြီး ကြီး ဖြစ်အောင် သူတို့ တည်ဆောက်လာတယ်၊ နဝတ အလွန်ပေါ့ဗျာ၊ နယက ခေတ်ကနေစပြီး ပြည်တွင်းမှာ ပညာရေးနယ်ပယ်မှာ ပြန်ကြည့်လေ ဟိုတုန်းကဆိုရင် RIT တို့ ဘာတို့ဘက်က တချို့တပ်မတော်ထဲကို သွင်းရတာ ကိုး ‌ဆေးတက္ကသိုလ်က သွင်းရတာရှိတယ်၊ အဲဒါမျိုးတွေကို OTS ခေါ်တာပေါ့၊ ဟိုဖက်က စစ်တက္ကသိုလ်က DSA ပေးတာကိုး၊ အဲဒီအစား တပ်မတော်ထဲမှာ နည်းပညာတက္ကသိုလ်တို့၊ ဆေးတက္ကသိုလ်တို့ လိုအပ်တဲ့ ဥစ္စာအကုန်လုံး ကို ပြန်တည်ဆောက်တယ်၊ ဒါတပ်တွင်း တည်ဆောက်ရေးနဲ့ ပတ်သက်လို့ တဖြည်းဖြည်း တည်‌ဆောက်လာတာ ပါ။ ထူးချွန်တဲ့ ကျောင်းသားတွေကို နိုင်ငံခြားပို့တယ်ပေါ့ဗျာ၊ အထူးသဖြင့် ရုရှားတို့၊ တရုတ်တို့ အဲဒီလိုနဲ့ သူ့ရဲ့ Institution ကို သူတည်ဆောက်တယ်လေ၊ အဲဒီလိုပဲ။ ခင်ဗျား ဦးပိုင်တို့ ဟိုတုန်းကဆိုရင် ရွှေအုန်းပင်တို့၊ ဘာတို့ နပခဖက်မှာဆိုရင် ဗိုလ်ချုပ်ဝင်းမြင့်တို့ အဲဒီကာလတုန်းက ကြိုးစားခဲ့ကြတာပဲလေ” ဟု ပြောသည်။

မြန်မာ့တပ်မတော်ကို တွေ့ရစဉ်

တပ်မတော်အနေဖြင့် ယခင်ကတည်းက စတင်ကာ ပြည်ထောင်စုမြန်မာနိုင်ငံ စီးပွားရေး ဦးပိုင်လီမိတက်နှင့် အခြားသော လုပ်ငန်းများကို ဖန်းတီးခဲ့ကြောင်း ၎င်းက ပြောသည်။

အမေရိကန်အစိုးရသည် မြန်မာ့နိုင်ငံခြားကုန်သွယ်မှုဘဏ် (MFTB)၊ မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ် ရေးဘဏ် (MICB) တို့ အပါအဝင် ကာကွယ်ရေးဝန်ကြီးဌာနကို အရေးယူပိတ်ဆို့ကြောင်း ၂၀၂၃ ခုနှစ်၊ ဇွန်လ ၂၁ ရက်နေ့က ထုတ်ပြန်ခဲ့သည်။

ထို့နောက် ပြည်တွင်းငွေကြေး ဈေးကွက်တွင် အမေရိကန် တစ်ဒေါ်လာလျှင် ကျပ် ၃၀၀၀ အထိ မြင့်တက်သွားခဲ့သည်။

အမေရိကန်၏ ပိတ်ဆို့မှုသည် ဘဏ်နှစ်ခု သာမက တစ်နိုင်ငံလုံး စုပြုံခံရသည့် သဘောဖြစ်နေကြောင်း မြန်မာ့ စီးပွားရေးလေ့လာသုံးသပ်သူ ဦးသီဟပိုင်က CNI သတင်းဌာနသို့ ပြောသည်။

ဦးသီဟပိုင်က “ကျနော်တို့က ဘက်ကို မျှမြင်ရမှာပေါ့နော်၊ နိုင်ငံတော်မှာကြတော့ ဘဏ်တွေဆိုတာက ကျနော် ပြောတာ ပိတ်ချင်ပိတ်နေတာပဲလေ အခုမဟုတ်ရင် ပိတ်ချင်ပိတ်ပေါ့၊ ကျ‌နော်ပြောတာ နာမည်‌တော့ ထုတ်မပြော တော့ပါဘူး။ ဟုတ်တယ်မလား အဖွဲ့အစည်းတွေရှိတာပဲ။ အဲဒါက သူတို့အကောင့်ကိုပိတ်လေ ဥပမာ ငွေမလွှဲခိုင်း လည်းရတယ်၊ ဒီဟာတွေကြ‌တော့ ဘယ်လိုထိန်းမလဲ မြန်မာပြည်က အဲဒါဆိုရင် ငွေမဝင်ခိုင်းတော့ဘူးလား။ ငွေ မဝင်ရတော့ဘူးဆိုရင် ကျနော်တို့က တနိုင်ငံလုံးခံရမယ့် ဟာတွေဖြစ်သွားတာလေ၊ သိလား ကောင်းသူရော၊ ဆိုးသူ ရော အကုန်လာထား သွား။ ဒါပေမဲ့ အမေရိကန်က ပိတ်တာပေါ့လေ၊ ထွက်ပေါက်တွေက မရှိဘူး မဟုတ်လားဆို တော့ ရှိတယ်၊ ကျနော်တို့လည်း အခုလက်ရှိ အမေရိကန်ဒေါ်လာနဲ့ပဲ သုံးနေရတာပဲလေ နိုင်ငံခြားငွေ စီးဆင်းမှုဆို တာဆိုတော့ ပြောရမယ်ဆိုရင် ခုတ်ရာတခြား၊ ရှရာတစ်လွဲ မဆိုင်တဲ့သူတွေပါ အကုန်ပေါ့၊ စုပြုံခံရတဲ့ သဘော တော့ ဖြစ်သွားတယ်” ဟု ပြောသည်။

နိုင်ငံပိုင် MFTB နှင့် MICB ဘဏ်နှစ်ခုကို ပိတ်ဆို့လိုက်ခြင်းကြောင့် မြန်မာ့တပ်မတော်၏ လက်နက်ဝယ်ယူမှု  လမ်းကြောင်းများလည်း ထိခိုက်မှုများ ရှိနိုင်ကြောင်း တချို့က သုံးသပ်နေကြသည်။ 

သို့သော်လည်း အခြားတစ်ဖက်တွင် မြန်မာ့တပ်မတော်သည် ယခင်ကတည်းက နိုင်ငံတကာ၏ ပိတ်ဆို့ အရေးယူမှု များကို ခံခဲ့ရကြောင်း၊ ထို့ကြောင့် ၎င်းတို့တွင် ထွက်ပေါက်များ ရှိနေမည်ဖြစ်ကြောင်း  နိုင်ငံရေးအသိုင်းအဝိုင်းကြား သုံးသပ်မှုများလည်း ရှိနေသည်။