CNI News

၂၀၂၄ ခုနှစ်၊ ဒီဇင်ဘာ ၂၆

မြစ်ဝကျွန်းပေါ်ကို ထိုးဖောက်သည့် လှုပ်ရှားမှုများသည် မကြာခင် ၂၀၂၅ ခုနှစ်၏ အဖွင့်စစ်မျက်နှာများ ဖြစ်လာနိုင် သည်ဟု ပြသနေခြင်းဖြစ်နိုင်ကြောင်း စစ်ရေးနှင့်နိုင်ငံရေး အကဲခတ်များက ထောက်ပြနေကြသည်။

ယောဒေသလွတ်မြောက်ရေး မဟာမိတ်များဖြင့် ပူးပေါင်းပြီး စစ်ရေးအရှိန် မြှင့်သွားမည်ဟု ယောတပ်တော်(YA)က ၂၀၂၄ ခုနှစ်၊ ဒီဇင်ဘာ ၂၄ ရက်တွင် ထုတ်ပြန်ကြေညာခဲ့သည်။

ထို့ပြင် ယောတပ်တော်သည် ချင်းပြည်နယ်၊ မတူပီ မြို့သိမ်းတိုက်ပွဲမှ စတင်ကာ AA ၊ ချင်းညီနောင် ကာကွယ်ရေး အဖွဲ့များ အပါအဝင် မဟာမိတ်များနှင့်အတူ ပူးပေါင်းတိုက်ပွဲ ဝင်နေသည်ဟု ဖော်ပြခဲ့သည်။

မကွေးတိုင်းနှင့် ဆက်စပ်နေသည့် ယော၊ ဆောဒေသများအား လွတ်မြောက်သောဒေသ ဖြစ်လာရန် အစပြုချက် များဟု ယူဆနိုင်ကြောင်း၊ ဂွတိုက်ပွဲများ ပြီးသည့်နောက် မြစ်ဝကျွန်းပေါ် ထိုးဖောက်သည့် လှုပ်ရှားမှုသည် ၂၀၂၅ ခုနှစ်၏ အဖွင့်စစ်မျက်နှာများ ဖြစ်လာနိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာန သို့ ပြောသည်။

ယောတပ်တော်(YA)ကို တွေ့ရစဉ်

၎င်းက “အဲတော့ အမ်းဘက်ကနေပြီး ကျနော်တို့ အမ်း-ပဒါန်းလမ်းအတိုင်း ဆင်းလာမယ်ဆိုလို့ရှိရင် မ‌ကွေးတိုင်း ကို ရောက်မှာပါ၊ အဲတော့ အဲတိုင်းနဲ့ AA နဲ့ ပေါင်းစပ်ရေးအတွက် အမ်းဒေသ၊ အမ်းစစ်ဌာနချုပ် အောင်ပွဲရလိုက် တာဟာ တစ်နည်းအားဖြင့် ပြောရလို့ရှိရင် မ‌ကွေးတိုင်းနဲ့ ဆက်စပ်နေတဲ့ မကွေးတိုင်းကိုဝင်တဲ့ ယော၊ ဆောဒေသ တစ်ဝိုက်လုံး အဲတာတွေ ဒေသတွေမှာ တော်လှန်ရေးလှုပ်ရှားမှုတွေ ပေါ်လာပြီးတဲ့နောက် အဲဒီဒေသကြီး လွတ်မြောက်တဲ့ဒေသ ဖြစ်လာဖို့အတွက် အစပြုချက်လို့ ကျနော်တို့တော့ ယူဆပါတယ်ဗျ။ ဒါကြောင့်မို့ ကျနော်တို့ အဲဒီဒေသက လှုပ်ရှားမှုတွေက မကြာခင်မှာ ကျနော်တို့ နွေဦးတော်လှန်ရေးရဲ့ ၁၀၂၇ စီမံကိန်းတစ်ရပ် ဖြစ်လာလိမ့် မယ်လို့ ကျနော်တို့ မျှော်လင့်ကြိုဆိုလျက် ရှိပါတယ်ခင်ဗျ၊ အမ်း-ပဒါန်း လမ်းကြောင်းပါပဲ၊ အဲဒီလမ်းကြောင်းကနေ ပြီးတော့ မကွေးတိုင်းထဲကို ဝင်ရောက်လာနိုင်ပါတယ်၊ တိုက်ပွဲတွေ အဲဒီနေရာမှာ တော်တော်လေးကို မြိုင်မြိုင်ဆိုင် ဆိုင် ပေါ်ပေါက်လာနိုင်ပါတယ်၊ အခြားတစ်ဖက်ကတော့ ဂွပြီးလို့ရှိရင် အခုက ဆက်ပြီးတော့ ရှေ့ဆက်သွားမယ့် နေရာက မြစ်ဝကျွန်းပေါ်ဖြစ်ဖို့ များပါတယ်၊ အခုမြစ်ဝကျွန်းပေါ် ဘက်မှာတောင်မှ တချို့သော မြစ်ဝကျွန်းပေါ်က မြေအောက်ပြည်သူ့ကာကွယ်ရေး၊ ပလဖ တွေ၊ ပအဖတွေ ကြိုတင်ပြီးတော့ ပြင်ဆင်ထားတယ်လို့ ကြားရပါတယ်၊ အဲတော့ မြစ်ဝကျွန်းပေါ် ထိုးဖောက်တဲ့ လှုပ်ရှားမှုဟာ မကြာခင် ၂၀၂၅ ခုနှစ်ရဲ့ အဖွင့်စစ်မျက်နှာတွေ ဖြစ်လာနိုင် တယ်လို့ ကျနော်တို့ မျှော်လင့်ပါတယ်” ဟု ပြောသည်။ 

စစ်ရှိန်မြှင့်ခြင်းသည် ဇန်နဝါရီ ၂၀ ရက်နေ့ မတိုင်ခင် ထူးထူးခြားခြား လှုပ်ရှားဆောင်ရွက်ပြမှုများ ရှိနိုင်ကြောင်း၊ ULA/AA သည် မဟာမိတ်များ၏ ဒေသများသို့ ပူးပေါင်းစစ်ဆင်ရေးများ လုပ်လာနိုင်ခြေရှိကြောင်း ရခိုင့်ဦးဆောင် ပါတီ(AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

မြစ်ဝကျွန်းကိုတွေ့ရစဉ် (ဖရွန်းတီးယားမြန်မာ)

၎င်းက “စစ်ရှိန်မြှင့်မယ်ဆိုတာတွေကလည်း ဘာလို့ဆိုရင် ဇန်နဝါရီ ၂၀ သမ္မတအသစ်ဖြစ်လာမယ့် ထရမ့်ကလည်း သူရဲ့ကျမ်းကျိန် စတော့မယ့်ကာလဖြစ်တော့ အဲတော့ ဒီမတိုင်ခင်လေးမှာ မြန်မာ Burma Art လို့ခေါ်တာပေါ့၊ NDAA တို့ရဲ့ ဖြန့်ခွဲမှုပေါ့ဗျာ၊ ငွေကြေးအားဖြင့် ဘယ်လောက်ထိ ပံ့ပိုးပေးထားသလဲ မပြောတတ်ဘူး။ အဲတာနဲ့ ပတ်သက် လို့လည်း ငွေပေးမယ်ဆိုတာ CSO ကအစပေါ့၊ ပိုက်ဆံပေးရင်သူ့ရဲ့  implement ဘာလုပ်တယ်ဆိုတာ ပြန်ပြရ တာပေါ့၊ ဆိုတော့ အဲဒီဟာနဲ့ပတ်သက်လို့ တစ်ဖက်ကလုပ်ရင်၊ တစ်ဖက်က ဆောင်ရွက်မှုကိုပြတဲ့ အနေအထား ရှိကောင်းရှိနိုင်ပါတယ်။ ဒါကြောင့်လည်းပဲ အဲဒီကာလ ဇန်နဝါရီ မတိုင်ခင်လေးမှာ နည်းနည်း ထူးထူးခြားခြား လှုပ်ရှားပြတာတို့၊ ဆောင်ရွက်ပြတာတို့လည်း ရှိနိုင်ပါတယ်၊ ဆိုဒါကတစ်ပိုင်းပေါ့ဗျာ။ အဲတော့ ခုနကပြောတဲ့ ရခိုင်ဒေသရဲ့ ထိုးစစ်ကိုပြန်ကြည့်ရင် AA တစ်ခုထဲလား၊ AA + ရှမ်းမြောက်ဘက်က အင်းအားစုတွေ ပါသလား၊ မပါဘူးလား၊ သို့မဟုတ် ဒီဒရုန်းနည်းပညာနဲ့ ပတ်သက်လို့ တစ်ဖက်က ပြည်မဘက်က ပညာရှင် ခုန PDF တွေပါ လား၊ မပါဘူးလား မပြောတတ်ဘူး။ တကယ်လို့များပါခဲ့ရင် သူတို့ရဲ့နယ်မြေဖြစ်တဲ့ အညာဒေသ ပြန်ထိုးစစ်ဆင် တာတို့၊ မြေလတ်ပိုင်း ပြန်ထိုးစစ်ဆင်တာတို့မှာ တစ်ဖက်က အဲဒီဖက်မှာ ပူးပေါင်းကူညီခဲ့တဲ့ ဒီဖက်က မျက်နှာကို ထောက်ပြီးမှ ULA/AA သည် ဒီဖက်ကို စစ်ဆင်ရေး ပြန်လုပ်လာနိုင်ခြေရှိတာပေါ့” ဟု ပြောသည်။  

မကွေးတိုင်းဒေသကြီးနှင့် ဧရာဝတီတိုင်းဒေသကြီးတွင် စစ်ရှိန်များ မြင့်လာနိုင်ကြောင်း၊ ထိုဒေသများတွင် တော်လှန်ရေး တပ်ဖွဲ့များအနေဖြင့် အုံနှင့်ကျင်းနှင့် ပါဝင်တိုက်ခိုက်လာနိုင်သော စစ်မျက်နှာပြင်များအဖြစ် တွေ့မြင်ရလာနိုင်ကြောင်း စစ်ရေးနှင့်နိုင်ငံရေး အကဲခတ်များက သုံးသပ်နေကြသည်။

AA သိမ်းပိုက်ထားသည့် ရခိုင်ပြည်နယ် အမ်းမြို့ရှိ အနောက်ပိုင်းတိုင်းစစ်ဌာနချုပ်အား ပြန်လည်ထိုးစစ်ဆင်နိုင်ရန် မြန်မာ့တပ်မတော် စစ်ကြောင်းများသည် အမ်းမြို့နှင့် မိုင် ၂၀ အကွာ တောင်စောက် တရုတ်ရေနံပိုက်လိုင်း ထိန်းချုပ်ရေးစခန်းတွင် အထိုင်ချထားကြောင်း သိရသည်။

CNI News

၂၀၂၄ ခုနှစ်၊ ဒီဇင်ဘာ ၂၄

လာမည့် ၂၀၂၅ ခုနှစ်တွင် အလွတ်သဘော တွေ့ဆုံပွဲများ ဆက်တိုက်ပေါ်လာနိုင်ပြီး NCA ထိုးထားသည့် တိုင်းရင်းသားလက်နက်ကိုင်အဖွဲ့အစည်းများ၏ အခန်းကဏ္ဍမှာ အရေးပါလာနိုင်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO-NCA/S)မှဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

လက်ရှိတွင် NCA လက်မှတ် မရေးထိုးထားသည့် တိုင်းရင်းသားလက်နက်ကိုင် အဖွဲ့အစည်းများနှင့် အလွတ် သဘော တွေ့ဆုံဆွေးနွေးမှုများ စတင်နေပြီဖြစ်သောကြောင့် လာမည့်နှစ်တွင် NCA ထိုးထားသည့် အဖွဲ့အစည်း များ၏ အခန်းကဏ္ဍမှာလည်း အရေးပါလာနိုင်သည်ဟု ယူဆခြင်းဖြစ်ကြောင်း ၎င်းက ပြောသည်။

ဗိုလ်မှူးကြီးခွန်ဥက္ကာက “၂၀၂၅ ခုနှစ်ရဲ့ ထူးခြားချက်က ရွေးကောက်ပွဲဖြစ်တယ်။ ရွေးကောက်ပွဲ မတိုင်ခင် အလွတ် သဘော တွေ့ဆုံမှုတွေ ဖြစ်လာပြီ။ အခုဆိုရင် လက်နက်ကိုင်ထားတဲ့ တိုက်နေတဲ့ အဖွဲ့အစည်းတွေနဲ့ အလွတ် သဘော စတင်နေပြီ။ မကြာခင်မှာ NCA ကို လက်မှတ်ရေးထိုးထားတဲ့ အဖွဲ့အစည်းတွေရဲ့ အခန်းကဏ္ဍလည်း အရေးပါလာမယ်လို့ ယူဆပါတယ်။ အခု NCA မထိုးဘဲနဲ့ တိုက်နေတဲ့ အဖွဲ့တွေရှိတယ်။ NCA ထိုးပြီးမှ NCA ကို ဖျက်ပြီး ပြန်တိုက်နေတဲ့ အဖွဲ့တွေရှိတယ်။ ၂ မျိုး ၂ စားရှိတယ်။ လောလောဆယ် NCA မထိုးရသေးတဲ့ အဖွဲ့တွေနဲ့ စပြီး စကားပြောနေပြီ။ မကြာခင်မှာ NCA ထိုးထားတယ်။ သို့သော် ပြန်တိုက်တဲ့ ဥပမာ KNU တို့လို၊ CNF တို့လို NCA ထိုးပြီးတာကို ဖျက်ပြီး ပြန်တိုက်နေတော့ အဲဒီအဖွဲ့တွေကလည်း ဒုတိယအဆင့်မှာ ဆွေးနွေးသွားလိမ့်မယ်လို့ ယူဆတယ်။ အနိမ့်ဆုံး ကျနော်တို့ တရုတ်က ကြားမဝင်ရင်တောင် အိန္ဒိယတို့၊ ထိုင်းတို့ ကြားဝင်ပြီး စီစဉ်ပေးခြင်း အားဖြင့် အလွတ်သဘော တွေ့နိုင်ခြေရှိပါတယ်။ ဒါကြောင့် လာမယ့် ၂၀၂၅ က အလွတ်သဘော တွေ့ဖို့ပွဲတွေက တရုတ်မှာ သော်လည်းကောင်း၊ အိန္ဒိယမှာသော်လည်းကောင်း၊  ထိုင်းမှာသော်လည်းကောင်း ဆက်တိုက် ဖြစ်ပေါ် လာ နိုင်မယ်လို့ ယူဆပါတယ်” ဟု ပြောသည်။

NCA လက်မှတ်ထိုးခြင်း နှစ်ပတ်လည် အခမ်းအနားကျင်းပစဉ်

တရုတ်သည် NCA လက်မှတ် မရေးထိုးထားသည့် မြောက်ပိုင်း ၃ ဖွဲ့(TNLA-MNDAA-AA)အပါအဝင် KIA တို့ဖြင့် ဒီဇင်ဘာလအတွင်းက တွေ့ဆုံဆွေးနွေးခဲ့ကြသလို နစကဘက်မှလည်း ကိုးကန့်တပ်(MNDAA)နှင့် တွေ့ဆုံ ဆွေးနွေးခဲ့ကြသည်။

၂၀၂၁ ခုနှစ် နောက်ပိုင်းတွင် တိုင်းရင်းသား လက်နက်ကိုင်များအကြား NCA ပျက်ခြင်း၊ မပျက်ခြင်းအပေါ် ငြင်းခုန်မှုများရှိခဲ့ကြသည်။

သို့သော် NCA လက်မှတ် ရေးထိုးထားကြသည့် 7 EAO Alliance အနေဖြင့် လက်ရှိ ကြုံတွေ့နေရသည့် ၃ နှစ်ကျော် ကြာ နိုင်ငံရေးကြောင့် ဖြစ်ပေါ်လာသော အကြပ်အတည်းကို သက်ဆိုင်သူ အားလုံးပါဝင်သည့် နိုင်ငံရေး တွေ့ဆုံ ဆွေးနွေးပွဲဖြင့် အဖြေရှာခြင်းသည် အကောင်းဆုံးဖြစ်ကြောင်း 7 EAO Alliance ၏ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။

၂၀၁၅ ခုနှစ်၊ အောက်တိုဘာ ၁၅ ရက်က NCA ထိုးကြစဉ်

၎င်းက “တွေ့ဆုံဆွေးနွေး တယ်ဆိုတာကတော့ ဘယ်လိုပဲဖြစ်ဖြစ် ဒီအချိန်မှာ အမြင်ကတော့ အမျိုးမျိုးရှိမှာပဲ။ သို့သော်လည်း ဒီပြဿနာတွေ အခက်အခဲ အကြပ်အတည်းတွေ အားလုံးသည် နိုင်ငံရေးကြောင့် ဖြစ်ပေါ်လာတဲ့ အတွက်ကြောင့် နိုင်ငံရေးပြဿနာကို စစ်ရေးနည်းနဲ့ မရှင်းဘဲနဲ့ နိုင်ငံရေး တွေ့ဆုံဆွေးနွေးခြင်းနဲ့ အဖြေရှာတဲ့ နိုင်ငံရေး ယဉ်ကျေးမှုအသစ် တည်ဆောက်ပြီး ကြိုးပမ်းဆောင်ရွက်ခြင်းကသာ အခက်အခဲမျိုးစုံကြားက စတင်ပြီး စကားပြောဆိုလာနိုင်တယ်၊ ထိတွေ့ပြောဆိုလာနိုင်တယ်၊ ဆွေးနွေး လာနိုင်တယ်ဆိုတာကတော့ အစပြု ခြေလှမ်း ကောင်းတစ်ခုလို့ ရှုမြင်ချင်တယ်။ ကျနော်တို့ NCA လက်မှတ်ထိုးထားတဲ့အဖွဲ့လို့ ပြောတာထက် ဒီအချိန်မှာ‌တော့ အဲဒီလို မပြောချင်ပါဘူး။ NCA  ဆိုတာက ပြည်ထောင်စုသမ္မတ မြန်မာနိုင်ငံတော်အစိုးရနဲ့ တိုင်းရင်းသား လက်နက်ကိုင် အဖွဲ့အစည်းများကြား သဘောတူ လက်မှတ်ရေးထိုးထားတဲ့ စာချုပ်ဖြစ်တယ်။ ၂၀၂၁၊ ဖေဖော်ဝါရီ ၁ ရက် နောက်ပိုင်းက စပြီးတော့ NCA ရှိခြင်း၊ မရှိခြင်းက နောက်မှ အငြင်းအခုန်လုပ်” ဟု ပြောသည်။

NCA လက်မှတ်ထိုးထားသည့် လက်နက်ကိုင် ၁၀ ဖွဲ့ရှိခဲ့ပြီး ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) ဆို သည့် နာမည်ဖြင့် ငြိမ်းချမ်းရေးဆွေးနွေးမှုများကို နှစ်ပေါင်းများစွာ လုပ်ဆောင်ခဲ့ကြသည်။

သို့သော်  ၂၀၂၁ ခုနှစ်နောက်ပိုင်း အဖွဲ့ဝင်များအကြား သဘောထားကွဲလွဲမှုများ ဖြစ်ပေါ်လာပြီး ကရင်အမျိုးသား အစည်းအရုံး (KNU)၊ ချင်းအမျိုးသားတပ်ဦး (CNF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) တို့က NCA ပျက်သွားပြီဟုပြောကာ နစကကို လက်နက်ကိုင် ဆန့်ကျင်ရန်ဆုံးဖြတ်ပြီး ယနေ့ အထိ တိုက်ပွဲများ ဆင်နွှဲလျက်ရှိသည်။

CNI News

၂၀၂၄ ခုနှစ်၊ ဒီဇင်ဘာ ၂၄

ဗမာပြည်၏ အလယ်ပိုင်းဗဟိုဒေသအား သိမ်းယူမည့်အဆင့် မရောက်လောက်သေးကြောင်း NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO- NCA/S)မှဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

ရန်ကုန်-မန္တလေး အမြန်လမ်းမတွင် မကြာခင်တိုက်ပွဲများ ဖော်ဆောင်တော့မည်ဖြစ်၍ မလိုအပ်လျှင် ခရီးမထွက် ကြရန် နွားထိုးကြီးဒေသ ကာကွယ်ရေးတပ်ဖွဲ့က ၂၀၂၄ ခုနှစ်၊ ဒီဇင်ဘာ ၂၃ ရက်တွင် သတိပေး ထုတ်ပြန်ခဲ့သည်။

ဗမာပြည်၏ အလယ်ပိုင်း ဗဟိုဒေသအား ဆက်လက်ထိုးစစ်ဆင် သိမ်းယူနိုင်ရန် အဆင့်တော်တော် မြင့်မား ကြောင်း၊ စီမံကိန်းချပြီး ဗဟိုဒေသ တစ်ခုလုံးအား သိမ်းပိုက်မည်ဆိုသည့် အဆင့်တော့ မရောက်လောက် သေးကြောင်း NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO- NCA/S)မှဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

ရန်ကုန်-မန္တလေး အမြန်လမ်းပေါ်မှာ PDF တချို့ကို တွေ့ရစဉ်

၎င်းက “အဖွဲ့အစည်းများလာတယ်၊ လက်နက်တွေကလည်း ပြန့်ကျဲနေတယ်၊ အင်အားစုတွေကလည်း များလာတဲ့ အခါကျတော့ ဒီအလစ်အငိုက် လမ်းမကြီးပေါ် ဟိုက်ဝေးပေါ်တက်ပြီးတော့ လာပြီးတော့ ကိုယ်ယောင်ပြတာတော့ ရှိမှာပေါ့ဗျာ၊ အမြဲတလေတော့ ဖြစ်ဖို့မလွယ်ဘူး။ နောက်ပြီးတော့ အဲသလို လမ်းမကြီးကလည်း ရှည်တဲ့အခါကျ တော့ အလစ်ငိုက်ဝင်တဲ့ နေရာလည်း ရှိမှာပေါ့၊ သို့သော်လည်းပဲ မြို့ပြတွေကို ဆက်လက် သိမ်းယူဖို့နဲ့ ဗဟိုဒေသ ပေါ့ဗျာ၊ ဗမာပြည်ရဲ့ အလယ်ပိုင်း ဗဟိုဒေသကို ဆက်လက် ထိုးစစ်ဆင်ဖို့ သိမ်းယူဖို့အဆင့်ကတော့ တော်တော်မြင့် တယ်ဗျ၊ ဒါဒုတိယကမ္ဘာစစ်၊ ကမ္ဘာစစ်ကြီးတွေမှာပဲ ဖြစ်လေ့ဖြစ်ထရှိတော့ ကျနော်တို့ ပြည်တွင်းစစ်မှာက ဒီအရှိန် ကို ရောက်ပြီလားဆိုတာတော့ ကျနော်တို့ မပြောနိုင်ဘူး။ သို့သော် နှောင့်ယှက်လို့တော့ရတယ်၊ နှောင့်ယှက်တာ တို့၊ တစ်စုံတရာ ဒုက္ခပေးတာတို့တော့ရတယ်။ သို့သော်လည်းပဲ စီမံကိန်းချပြီး‌တော့ ဗဟိုဒေသတစ်ခုလုံးကို လုပ် မယ်ဆိုတဲ့ အဆင့်တော့ မရောက်လောက် သေးဘူးလို့တော့ ကျနော်ယူဆတယ်ဗျ” ဟု ပြောသည်။

၂၀၂၄ ခုနှစ်၊ ဒီဇင်ဘာ ၂၃ ရက်တွင် အမြန်လမ်းမက ခရီးသွားကားများတွင် လိုက်ပါလာသူများအား နွားထိုးကြီး PDF၊ မြင်းခြံခရိုင် အမှတ် (၄-၁ဝ) တပ်ရင်းက အသိပေးပြောဆိုနေသည့် ရုပ်သံဖိုင်တစ်ခု ထွက်ပေါ်လာခဲ့သည်။

ထိုရုပ်သံဖိုင်ထဲတွင် ခရီးသည်များအနေဖြင့် ဒီကာလတွင် မလိုအပ်ဘဲ အမြန်လမ်းမှ ခရီးမသွားရန်၊ ညပိုင်းများတွင် မသွားလာရန်၊ တိုက်ပွဲဖြစ်ပွားနေချိန်၌ ကားဆက်မမောင်းဘဲ နီးစပ်ရာ လုံခြုံသည့်နေရာများမှာသာ နေကြရန် သတိပေး ပြောကြားနေသည်ကို တွေ့ရသည်။

နိုင်ငံရေးအရ ‌တောင်းဆိုလိုမှုကို နိုင်ငံရေးနည်းလမ်းဖြင့်သာ ဖြေရှင်းရမည်ဖြစ်ကြောင်း၊ လက်နက်ကိုင် လမ်းစဥ် ဖြင့် တောင်းဆို၍ ရနိုင်မည်မဟုတ်ကြောင်း၊ ထိုကဲ့သို့ လက်နက်ကိုင် အကြမ်းဖက်မှု လမ်းစဥ်ကို မည်သည့် လူအဖွဲ့အစည်းကမျှ လက်မခံသလို မိမိတို့ အားလုံးကလည်း ဆန့်ကျင်ကြရန်လိုကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၄ ခုနှစ်၊ ဒီဇင်ဘာလ ၂၂ ရက်နေ့တွင် ခရစ်တော်မွေးနေ့ (ခရစ္စမတ်) ကျေးဇူးတော်ချီးမွမ်းခြင်း အခမ်းအနား၌ ပြောကြားခဲ့သည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

မြို့ငယ်များတွင်သာ စစ်ပွဲများ ဖြစ်ပွားနိုင်ပြီး မြို့ကြီးပြကြီးများပေါ်သို့ ကူးဦးမည် မဟုတ်ကြောင်း၊ လမ်းပန်း ဆက်သွယ်ရေး ဖြတ်တောက်ခြင်းဖြင့် ကုန်စည်များကို ပိတ်ဆို့လာနိုင်ကြောင်း နိုင်ငံရေးလေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “မြို့ပြတွေထိကတော့ မြန်မြန်ဆန်ဆန်ကြီးတော့ ကူးဦးမှာ မဟုတ်ပါဘူး၊ မြန်မြန်ဆန်ဆန်ဆိုတာ ဘယ်သူ တွေ မြို့ကိုပြောတာလဲဆိုတော့ မြို့အကြီးကြီးတွေကို ပြောတာပါ၊ မြို့အငယ်တွေကို ပြောတာ မဟုတ်ပါဘူး၊ မြို့ အငယ်တွေကတော့ ဖြစ်နိုင်ပါတယ်၊ မြို့အကြီးကြီးတွေကတော့ ဖြစ်နိုင်ဖို့နည်းနည်း ခက်ဦးမယ်ထင်ပါတယ်။ သူက လမ်းတွေကို ခြိမ်းခြောက်တာက လမ်းပန်းဆက်သွယ်ရေးရယ် ကုန်စည်ပေါ့၊ ပို့ဆောင်ရေးတွေ အဲဒီဟာတွေ ကို အဓိကထားမယ်လို့ ကျနော်ထင်တယ်လေ။ လမ်းပန်းဆက်သွယ်ရေး ဖြတ်တောက်ခြင်းအားဖြင့် ကုန်စည်တွေ ကို ပိတ်ဆို့တာပေါ့၊ အဲလိုဟာမျိုးတွေ ဖြစ်လာနိုင်စရာ ရှိပါတယ် အဲလိုတော့နော်” ဟု ပြောသည်။

ပြည်သူလူထုများ သုံးစွဲနေသည့် အဝေးပြေးလမ်းမပေါ်များတွင် လက်နက်ကိုင်ပဋိပက္ခများ ရောက်လာပါက ပြည်သူလူထုများ သွားလာရေး၊ ကုန်စည်စီးဆင်းမှု၊ ကူးသန်းရောင်းဝယ်‌ရေး၊ ကျန်းမာရေးကိစ္စဖြင့် သွားလာခြင်း၊ လူမှုရေးကိစ္စဖြင့် သွားလားခြင်းများ ရပ်တန့်သွားနိုင်ကြောင်း၊ ထိုသို့ သွားလာရေး ရပ်တန့်သွားပါက ပြည်သူလူထု အား ထိခိုက်လာနိုင်ကြောင်း နိုင်ငံရေး‌ လေ့လာသုံးသပ်သူများက ထောက်ပြသည်။

မြန်မာနိုင်ငံနေရာ အနှံ့အပြားတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများ အပြင်းအထန် ဖြစ်ပွားလျက်ရှိနေပြီး မြန်မာတစ်နိုင်ငံလုံးတွင် စစ်ပြေးဒုက္ခသည် ၄ သန်းကျော် ရှိသည်ဟု ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး၏ ၂၀၂၄ ခုနှစ်၊ ဒီဇင်ဘာ ၂ ရက် စာရင်းတွင် ဖော်ပြထားသည်။

CNI News

၂၀၂၄ ခုနှစ်၊ ဒီဇင်ဘာ ၂၃

နိုင်ငံရေးအရ တောင်းဆိုလိုမှုများကို လက်နက်ကိုင်လမ်းစဉ်ဖြင့် တောင်းဆို၍မရဘဲ တွေ့ဆုံဆွေးနွေးမှရမည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

၂၀၂၄ ခုနှစ်၊ ဒီဇင်ဘာ ၂၂ ရက်က ရန်ကုန်တိုင်းဒေသကြီး၊ ဗိုလ်တထောင်မြို့နယ်ရှိ St. Jary’s Cathedral Church ၌ ကျင်းပသည့် ခရစ်တော်မွေးနေ့(ခရစ္စမတ်) ကျေးဇူးတော်ချီးမွမ်းခြင်း အခမ်းအနားတွင် ၎င်းက ပြောကြားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ အတူယှဉ်တွဲနေထိုင်ကြသည့် လူအဖွဲ့အစည်းတစ်ခုအတွင်း၌ ကြုံတွေ့လာ သည့် ပြဿနာကို ဒီမိုကရေစီနည်းလမ်းဖြစ်သည့် တွေ့ဆုံဆွေးနွေး အဖြေရှာခြင်း နည်းလမ်းကသာ အောင်မြင် စေနိုင်မည်ဟု ယုံကြည်ပါကြောင်း၊ နိုင်ငံရေးပြဿနာ တစ်နည်းအားဖြင့် နိုင်ငံရေးအရ တောင်းဆိုလိုမှုကို နိုင်ငံရေး နည်းလမ်းဖြင့်သာ ဖြေရှင်းရမည်ဖြစ်ကြောင်း၊ လက်နက်ကိုင်လမ်းစဉ်ဖြင့် တောင်းဆို၍ ရနိုင်မည် မဟုတ်ကြောင်း” ပြောသည်။

ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

ထိုကဲ့သို့ လက်နက်ကိုင် အကြမ်းဖက်မှုလမ်းစဉ်ကို မည်သည့် လူ့အဖွဲ့အစည်းကမျှ လက်မခံသကဲ့သို့ မိမိတို့ အားလုံးကလည်း ဆန့်ကျင်ကြရန် လိုကြောင်း၊ မိမိတို့ အစိုးရအနေဖြင့်လည်း ပြည်သူအားလုံးလိုလားသည့် ပါတီစုံ ဒီမိုကရေစီစနစ် ခိုင်မာရေးနှင့် ဒီမိုကရေစီလမ်းကြောင်းမှန်ပေါ် ပြန်လည်ရောက်ရှိရေးအတွက် ရှေ့လုပ်ငန်းစဉ်များ အမျိုးသားရေးနှင့် နိုင်ငံရေးရည်မှန်းချက်များ ချမှတ်ပြီး ကြိုးစားဆောင်ရွက်ပေးနေကြောင်း ၎င်းက ပြောသည်။

နိုင်ငံရေးအရ တွေ့ဆုံဆွေးနွေးခြင်းကို အားလုံးက လက်ခံကြကြောင်း၊ သို့သော် တွေ့ဆုံဆွေးနွေးရန် အင်အားစု တချို့ကို လက်မခံခြင်းနှင့် ငြင်းပယ်ခံရမှုများခံရခြင်းများကြောင့်လည်း လက်နက်ကိုင် လမ်းစဉ်ကို ရွေးချယ်လာ ကြခြင်းဖြစ်သည်ဟု သတိထားသင့်ကြောင်း တိုင်းရင်းသားလက်နက်ကိုင် ခေါင်းဆောင်တစ်ဦးက ပြောသည်။

ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

၎င်းက “ တွေ့ဆုံ ဆွေးနွေးပြီးမှ အဖြေရှာရမယ်ဆိုတာ လူတိုင်း လက်ခံကြတယ်။ ဒါပေမဲ့ တွေ့ဆုံဆွေးနွေးကြည့် တယ် ဘာမှမရဘူး သူတို့တောင်းဆိုမှုကို ငြင်းပယ်ခံရတယ်။ မျက်ကွယ်ပြုခံရတယ်။ ဒီလိုမျိုးတွေဖြစ်လာတော့ လက်နက်ကိုင်မှ လူရာဝင်မယ်။ တန်းတူ ဆက်ဆံခံရမယ်လို့ အားလုံးက ခံယူလာကြတယ်။ လက်တွေ့လည်း အဲလိုဖြစ်လာနေတယ်။ နောက်တစ်ခုက အခု စစ်တပ်ရဲ့ ငြိမ်းချမ်းရေး ဖိတ်ခေါ်မှုအရ လက်ခံပြီး တွေ့ဆုံဆွေးနွေး လိုတဲ့ လက်နက်ကိုင်အင်အားစုတွေရှိတယ်။ အဲအဖွဲ့တွေကိုလည်း သူတို့က လက်မခံဘူး။ မျက်ကွယ်ပြုထား တယ်လို့ ကြားရတယ်။ သူတို့နဲ့ အဆင်ပြေတဲ့အဖွဲ့ ဒါမှမဟုတ် သူတို့ အရင်တုန်းက ဆွေးနွေးခဲ့ဖူးတဲ့ အဖွဲ့တွေ အဲလိုအဖွဲ့အစည်းတွေကိုပဲ လက်ခံမယ်။ အသစ်တွေ လက်မခံဘူးဆိုတာမျိုးတွေကလည်း ရှိနေတော့ ဘယ်လို အားလုံးပါဝင်ရေးဆိုတာ ဖြစ်တော့မှာလည်း။ ဘယ်လိုလို့ ဒီငြိမ်းချမ်းရေး အောင်မြင်တော့မှာလဲ။ အဲတော့ ငြင်း ခံရတဲ့အဖွဲ့ မျက်ကွယ်ပြုခံရတဲ့ အဖွဲ့တွေကလည်း ငါတို့ အင်အားကြီးအောင် လုပ်ရမယ်လို့ ယူဆသွားကြမှာပေါ့။ ဒါတွေကို စစ်တပ်ဘက်က သေချာ စဉ်းစားသင့်တယ်လို့ မြင်ပါတယ်”ဟု ပြောသည်။

လက်ရှိ မြန်မာနိုင်ငံတစ်ဝန်းတွင် လက်နက်ကိုင် ပဋိပက္ခများ ကျယ်ကျယ်ပြန့်ပြန့် ဖြစ်ပွားနေပြီး မြန်မာ့ တပ်မတော်၏ ငြိမ်းချမ်းရေး ဖိတ်ခေါ်မှုများအပေါ် စိတ်ဝင်စားမှု အားနည်းလျက်ရှိနေသည်။

အလားတူ NCA ထိုးထားသည့် လက်နက်ကိုင်အဖွဲ့များနှင့် မြန်မာ့တပ်မတော်ကြားက ငြိမ်းချမ်းရေး လုပ်ငန်းစဉ် များမှာလည်း ထိထိရောက်ရောက် အကောင်အထည် မဖော်နိုင်ဘဲ ဖြစ်ကာ တိုက်ပွဲများ ဖြစ်ပွားသည့် အနေအထား များပင် ရှိနေသည်။

CNI News

၂၀၂၄ ခုနှစ်၊ ဒီဇင်ဘာ ၂၃

ကချင်ပြည်နယ်၊ ဗန်းမော်မြို့သည် တရုတ်-အိန္ဒိယ လမ်းကြောင်းအတွက် အဓိကအချက်အချာကျသည့် နေရာတွင် ရှိကြောင်း စည်းလုံးညီညွတ်သော တိုင်းရင်းသားလူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

ကချင်လွတ်လပ်ရေးအဖွဲ့(KIO/KIA)၏ဥက္ကဋ္ဌ ဗိုလ်ချုပ်ကြီး အင်ဘန်လ ဦးဆောင်သည့်အဖွဲ့နှင့် တရုတ်ပြည်သူ့ နိုင်ငံရေး အတိုင်ပင်ခံ ကွန်ဖရင့်ဗဟိုအဖွဲ့ဝင် မစ္စတာဝူကန် ဦးဆောင်သည့်အဖွဲ့တို့ တရုတ်နိုင်ငံမှာ ဒီဇင်ဘာ ၁၂ ရက်က တွေ့ဆုံဆွေးနွေးခဲ့ကြခြင်း ဖြစ်သည်။

တရုတ်မှ ခေါ်တွေ့ခြင်းသည် သူ့အကျိုးစီးပွားအတွက်ဖြစ်ပြီး တိုက်ပွဲများ ဆက်လက် ဖြစ်ပွားနေမှုက အပေးအယူ မျှသော သဘောတူညီချက် မဖြစ်ခဲ့သည့် လက္ခဏာဟု စည်းလုံးညီညွတ်သော တိုင်းရင်းသားလူမျိုးများ မဟာမိတ် (UNA)မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

KIA ခေါင်းဆောင် ဗိုလ်ချုပ်ကြီးအင်ဘန်လကို တွေ့ရစဉ်

၎င်း “တခြားနေရာတော့ မသိဘူး။ ကချင်ပြည်နယ်အနေနဲ့ ဗန်းမော်ကလည်း အရေးပါတယ်။ ရေကြောင်းရော သွားလာနိုင်တဲ့ အနေအထားလည်း ရှိတယ်။ နောက်အနာဂတ်မှာ ဥပမာ တရုတ်-အိန္ဒိယ ဆက်ဆံရေး လမ်းကြောင်း ပေါ်လာမယ်ဆိုရင် ဗန်းမော်က အဲဒီနေရာမှာ အဓိကအချက်အချာကျတဲ့ နေရာတစ်ခုအနေနဲ့ မြင်ရ တယ်ပေါ့။ အဲဒီတော့ စစ်ရေး၊ နိုင်ငံရေး၊ စီးပွားရေးဟာ ဗန်းမော်က ပိုပြီး အချက်အချာကျတယ်လို့ ပြောရမှာပေါ့။ တိုက်ပွဲဖြစ်တာက စကစနဲ့ ဖြစ်တာလေ။ တရုတ်နဲ့ စကားပြောတာကြတော့ သူတို့နယ်စပ် တံခါးတွေ ဖွင့်တာလေ။ အကျိုးစီးပွားက မတူဘူးလေ။ ဟိုတုန်းကတော့ အထူးဒေသ(၁)တို့ ဘာတို့ ရှိတယ်။ အဲဒီဟာကိုလည်း KIO/KIA က တက်သိမ်းလိုက်တယ်။ အဲဒီနောက်ပိုင်း တရုတ်နဲ့လည်း တင်းမာပြီးတော့ တရုတ်ကလည်း ဂိတ်တွေဘာတွေ ပိတ်ပစ်လိုက်တော့ KIO အနေနဲ့လည်း ဂိတ်တွေ အကုန်လုံး ပိတ်လိုက်တယ်။ အဲဒီမှာ စကားပြောဖို့ ဖြစ်လာတယ်။ ပြောလိုက်တဲ့အချိန်မှာ တစ်ဖက်မှာ နယ်စပ်မှာရှိတဲ့ ဂိတ်တွေ ပြန်ဖွင့်သွားတယ်။ တစ်ဖက်မှာ ဗန်းမော်ပေါ့နော် ကချင်ပြည်နယ်ရဲ့ မြို့တော်ကို အသည်းအသန် တိုက်နေကြတယ်။ တွေးကြည့်ရင်တော့ တစ်ဖက်နဲ့ တစ်ဖက် တွေ့တယ်ဆိုပေမယ့် အကုန်လုံး ငြိမ်းချမ်းသွားတယ်။ အပေးအယူ မျှသွားတယ်ဆိုတဲ့ သဘောတူညီချက်က မဖြစ် ဘူးဆိုတဲ့ လက္ခဏာပေါ့” ဟု ပြောသည်။

အဆိုပါ တွေ့ဆုံမှုမှာ နယ်စပ်ဒေသတည်ငြိမ်ရေး၊ တရုတ်-မြန်မာ နယ်စပ်ဂိတ်များ ပြန်ဖွင့်ရေးနှင့် ကချင်မှာ အပစ်ရပ်ပြီး တပ်မတော်နှင့် ငြိမ်းချမ်းရေးဆွေးနွေးရန် တရုတ်ဘက်က တိုက်တွန်းခဲ့ပြီးနောက် နယ်စပ်ဂိတ်များ ပြန်ဖွင့်ခဲ့ကြသည်။

သို့သော် တိုက်ပွဲများမှာ ရပ်တန့်မသွားဘဲ ဆက်လက် ပြင်းထန်နေဆဲ ဖြစ်သည်။

KIA ကို တွေ့ရစဉ်

ထို့အပြင် KIA တိုက်ခိုက် သိမ်းပိုက်ထားသည့် မြို့များမှာ တရုတ်နယ်စပ်နှင့် ကပ်လျက်ရှိသည့် မြို့များဖြစ်သော ကြောင့် မြန်မာ့တပ်မတော်ဘက်မှ လေကြောင်းဖြင့် ပြန်လည် တိုက်ခိုက်နိုင်ရန်မှာလည်း မလွယ်ကူကြောင်း တရုတ်-မြန်မာအရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

၎င်းက “KIA တို့ဘာတို့ သူတို့က တိုက်ပြီး သိမ်းပြီးတာနဲ့ တစ်ပြိုင်နက်တည်း အခြေခံဒေသ တည်ဆောက်ရေး တစ်ခါတည်းလာတာ။ ဘာဖြစ်လို့လဲဆိုတော့ အစကတည်းက လိုင်ဇာတို့ဘာတို့မှာ မြစ်ကြီးနားတို့၊ ဗန်းမော်တို့ ဘာတို့ အဲဒီဘက်က CDM လုပ်ထားတဲ့ ဆရာကြီးတွေ၊ ဆရာဝန်ကြီးတွေ ရောက်နေတာ။ အဲဒါနဲ့အတူတူ အခြေခံ ဒေသတည်ဆောက်ရေး တစ်ခါတည်း တန်းလုပ်တာ။ KIA က MNDAA ထက်သာတာ ဘာလဲဆိုတော့ KIA သိမ်း ထားတာ မြေပုံကြည့် အကုန်လုံးတရုတ်နယ်စပ်မှာ၊ တရုတ်နဲ့ ကပ်နေတဲ့ နယ်စပ်တွေ ဖြစ်တယ်လေ။ အဲဒီဒေသ တွေက ဟိုဘက်ကမ်းကူးလိုက်တာနဲ့ တရုတ်ပြည်ပဲ။ အဲဒီတော့ လေယာဉ်ပျံတွေကလည်း လာဗုံးမကြဲနိုင်ဘူး။ အဲဒီ‌တော့ သူတို့ကောင်းကောင်း တည်ဆောက်နိုင်တယ်” ဟု ပြောသည်။

လက်ရှိ KIA သိမ်းပိုက်ရရှိထားသည့် မြို့များထဲတွင် တရုတ်နိုင်ငံအတွက် အင်မတန်လိုအပ်သည့် အမေရိကန် ဒေါ်လာ ဘီလီလျံချီတန်သော မြေရှားသတ္တုများ ထွက်ရှိရာ ချီဖွေ-ပန်ဝါမြို့အပြင် ကျောက်စိမ်းများ ထွက်ရှိသည့် ဖားကန့်မြို့မှ နေရာအများစု ပါဝင်ကြောင်း သိရသည်။

KIA သည် ၂၀၂၁ ခုနှစ်နောက်ပိုင်း ၃ နှစ်ကျော် ကာလအတွင်း ကချင်ပြည်နယ်နှင့် ရှမ်းပြည်နယ်အစပ်ရှိ မြို့နယ် ၁၃ မြို့နယ် အပါအဝင် တပ်စခန်း ကြီးငယ် ၃၀၀ နီးပါကို သိမ်းပိုက်နိုင်ခဲ့ကြောင်း သတင်းထုတ်ပြန်ထားသည်။

CNI News

၂၀၂၄ ခုနှစ်၊ ဒီဇင်ဘာ ၂၃

အာရက္ခတပ်တော်(AA)သည် မကွေးတိုင်းထဲသို့ ဝင်ရောက်ပြီး မြန်မာ့တပ်မတော်၏ လက်နက်စက်ရုံများ သိမ်းပိုက်နိုင်ရေးသည် ဒုတိယ အလေးထားပြီး ဝင်ရောက်ရမည့် စစ်မျက်နှာဖြစ်နိုင်ကြောင်း နိုင်ငံရေး ‌လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ရခိုင်ပြည်နယ်၊ အမ်းမြို့အခြေစိုက် မြန်မာ့တပ်မတော်၏ အနောက်ပိုင်းတိုင်းစစ်ဌာနချုပ်(နပခ)ကို ၂၀၂၄ ခုနှစ်၊ ဒီဇင်ဘာ ၂၀ ရက်တွင် အပြီးသတ် သိမ်းပိုက်လိုက်ပြီဖြစ်ကြောင်း AA က ထုတ်ပြန်ကြေညာခဲ့သည်။

ထို့ပြင် ရခိုင်ပြည်နယ်၊ ဂွမြို့သိမ်းတိုက်ပွဲအတွက် ထိုးစစ်အရှိန်မြှင့်နေသည်ဟု ဒီဇင်ဘာ ၂၁ ရက်တွင် AA က ထုတ်ပြန်ခဲ့သည်။

AA အနေဖြင့် ဧရာဝတီတိုင်းအောက်တွင် မြေအောက်လှုပ်ရှားနေသော တော်လှန်ရေးတပ်ဖွဲ့များနှင့် ပေါင်းစည်းမိ လျှင် ဧရာဝတီတိုင်းသည် ထူးခြားသည့် ပြောက်ကျားဒေသကြီး တစ်ခုအဖြစ် ပေါ်လွင်နိုင်ကြောင်း၊ မကွေးတိုင်း သည် AA ၏ ဒုတိယအလေးထားရမည့် စစ်မျက်နှာပြင်ဖြစ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ရခိုင်ပြည်နယ်က လမ်းဆုံ တစ်နေရာကို တွေ့ရစဉ်

၎င်းက “ကျနော်တော့ အခု‌ကတော့ ကြားရတဲ့သတင်းတွေအရ ငါးသိုင်းချောင်းတောင် ရောက်နေပြီလို့ ပြောပါ တယ်၊ အဲတော့ ငါးသိုင်းချောင်းဆိုတာ ဧရာဝတီတိုင်းပါပဲ၊ ဧရာဝတီတိုင်းမှာ ကျနော်တို့ AA တပ်ဖွဲ့ ဝင်လာပြီဆိုရင် တော့ ဧရာဝတီတိုင်းအောက်မှာ ရှိနေတဲ့ မြေအောက်လှုပ်ရှားနေတဲ့ တော်လှန်ရေးတပ်ဖွဲ့တွေနဲ့ ပေါင်းစည်း ဆက်စပ်မိလို့ ရှိရင်တော့ ဧရာဝတီတိုင်းဟာ ထူးခြားတဲ့ ပြောက်ကျားဒေသကြီး တစ်ခုအဖြစ် ကျနော်တို့ ပေါ်လွင် လာလိမ့်မယ်လို့ မျှော်လင့်ပါတယ်ခင်ဗျ၊ ဂွကတော့ မကြာခင်ကျတော့မှာပါ၊ အဲတော့ အခုအမ်းလည်း ကျသွားပြီး ဆိုတော့ ကျနော်တို့ ကျန်တာကတော့ အဓိကအားဖြင့် ကျောက်ဖြူနဲ့ စစ်တွေဖြစ်ပါတယ်။ စစ်ရေးအရ ပြောရလို့ရှိ ရင်တော့  ကျောက်ဖြူ ရေနက်ဆိပ်ကမ်းက နိုင်ငံတကာရင်းနှီးမြှုပ်နှံမှုတွေ၊ တရုတ်ရဲ့ ရင်းနှီးမြှုပ်နှံမှုတွေ အများ ဆုံးရှိတဲ့ အင်အားစုဖြစ်တဲ့အတွက် ကျောက်ဖြူကို သိမ်းစရာမလိုပါဘူး၊ ကျ‌နော်တို့ လိုအပ်တာတော့ အခုစစ်တွေပဲ ဖြစ်ပါတယ်။ တစ်ချိန်ထဲမှာ AA က အမ်းကိုလည်း ရပြီးပြီဆိုရင်တော့ ဒီကျနော်တို့ မကွေးတိုင်းထဲကို ဝင်ရောက်ပြီး တော့ စစ်ကောင်စီရဲ့ ထောက်ပို့၊ လက်နက်စက်ရုံတွေ သိမ်းပိုက်‌ရေးဘက်ဟာ သူဒုတိယ အလေးထားပြီးတော့ ဝင်ရောက်ရမဲ့ မျက်နှာပြင်လို့၊ စစ်မျက်နှာလို့ ယူဆပါတယ်ခင်ဗျ” ဟု ပြောသည်။ 

AA နှင့်အတူ မြန်မာပြည်သူတစ်ရပ်လုံး လွတ်မြောက်ရေး လက်တွဲ ပူးပေါင်းမည်ဟု အမျိုးသားညီညွတ်ရေး အစိုးရ(NUG)၏ ယာယီသမ္မတ ဒူဝါလရှီးလက ၂၀၂၄ ခုနှစ်၊ ဒီဇင်ဘာ ၂၂ ရက်တွင် AA ကိုပေးပို့သည့် သဝဏ်လွှာ၌ ဖော်ပြထားသည်။

ထို့ပြင် NUG က ဧရာဝတီတိုင်းစစ်ဌာနကို ၂၀၂၄ ခုနှစ်၊ ဒီဇင်ဘာ ၁၂ ရက်က ဖွဲ့စည်းခဲ့ပြီး ဧရာဝတီတိုင်းထဲသို့ ထိုးဖောက်ဝင်ရောက်ရန် တိုင်းရင်းသားလက်နက်ကိုင်တပ်ဖွဲ့များနှင့် ပူး‌ပေါင်း၍ တိုက်ပွဲဝင်နေသည်ဟုလည်း ထုတ်ချက်ပြန်ချက်တွင် ဖော်ပြထားသည်။

AA တပ်ဖွဲ့ကို တွေ့ရစဉ်

နှစ်ဖက် ဦးတည်ချက်များ မတူသောကြောင့် စစ်ပွဲကိုစစ်ပွဲဖြင့်ပဲ ပြန်အဆုံးသတ်နိုင်မည်ဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “အဓိက,က ကိုယ်ဘာလုပ်ရမလဲဆိုတဲ့ ကိုယ်စီတာဝန်က ရှိပြီးသားပဲလေ၊ အဲဒီအပိုင်းကို အောင်အောင်မြင် မြင်နဲ့ တိတိကျကျ လုပ်သွားမယ်ဆိုရင်တော့ အားလုံးအဆင်ချောသွားပါလိမ့်မယ်။ အဓိက အရေးအကြီးဆုံး အချက်က တစ်ဖက်က ဦးတည်တာက စစ်ပွဲကိုဦးတည်တာ နစကဘက်က ဘာကိုဦးတည်တာလဲဆိုတော့ ငြိမ်းချမ်းရေးအရ သွားလို့ရမယ်ဆိုတဲ့ ပုံစံကိုဦးတည်တာ။ အဲတော့ အဲဒီနေရာမှာ ပြဿနာက တစ်ဖက်က ဆုံပွိုင့် ပေါ့၊ ဆုံမှတ်သွားမတူတဲ့ အတွက်ကြောင့် ဘယ်တော့မှ ဒီဟာကို ညှိယူလို့ရမဲ့ အနေအထားမရှိဘူး။ အဲတာကြောင့် မို့လို့ ပွင့်ပွင့်လင်းလင်း‌ ပြောရရင်တော့ စစ်ပွဲကိုစစ်ပွဲနဲ့ပဲ ပြန်ပြီးတော့ အဆုံးသတ်နိုင်ပါလိမ့်မယ်၊ အဲတာက အဓိက အချက်ပါ၊ များသောအားဖြင့်တော့ စစ်ရေးမှာ အသာရပြီးတော့ စစ်ရေးကိုပဲ စဥ်းစားထားတဲ့သူတွေက ကိုယ့်ဘက် က အနိုင်ရပြီ၊ နိုင်ပွဲတွေ ဆက်လာပြီလို့ ခံစားတဲ့အချိန်ကြရင် နယ်မြေတွေ ဆက်ချဲ့လာတာ ထုံးစံပဲ၊ ဒါပေမယ့် အဓိက,က အဲလိုဝင်လာတဲ့အချိန်မှာ ဧရာဝတီတိုင်းမှာရှိတဲ့ ဒေသခံ ပြည်သူလူထုရဲ့ သ‌ဘောတရား၊ နောက် နစက ဘက်က ဘယ်လိုသွားမလဲ၊ နောက် တပ်မတော်ဘက်ကရော ဘယ်လိုဒါကို မဖြစ်အောင် ကာကွယ်မလဲပေါ့၊ အဲတာတွေက အဓိကအ‌ရေးကြီးပါတယ်၊ ပေါင်းစပ်ညှိနှိုင်းမှုကပဲ AA ဆင်းလာမဲ့ လမ်းကြောင်းကို တားဆီးနိုင်ပါ လိမ့်မယ်”ဟု ပြောသည်။ 

AA သည် ရခိုင်ပြည်နယ် ၁၇ မြို့နယ်အနက် ၁၃ မြို့နယ်အား သိမ်းပိုက်ထားပြီး ယခု ဂွမြို့အား သိမ်းနိုင်ရန် အပြင်းအထန် ထိုးစစ်ဆင်နေကြောင်း၊ ရခိုင်ပြည်နယ်၏မြို့တော် စစ်တွေ၊ ကျောက်ဖြူနှင့် မာန်အောင်မြို့ ၃ မြို့ကိုသာ သိမ်းပိုက်ရန် ကျန်တော့သည်ဟု AA က ထုတ်ပြန်ထားသည်။

ရခိုင်ပြည်နယ်တွင် AA နှင့် မြန်မာ့တပ်မတော်တို့ကြား တိုက်ပွဲများ ပြင်းထန်စွာ ဖြစ်ပွားနေပြီး နေရပ်စွန့်ခွာ ထွက်ပြေးတိမ်းရှောင်နေကြရသူ အများအပြားလည်း ရှိလာနေကြောင်း၊ မြန်မာတစ်နိုင်ငံလုံးတွင် စစ်ပြေး ဒုက္ခသည် ၄ သန်းကျော် ရှိသည်ဟု ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး၏ ၂၀၂၄ ခုနှစ်၊ ဒီဇင်ဘာ ၂ ရက် စာရင်းတွင် ဖော်ပြထားသည်။

CNI News
၂၀၂၄ ခုနှစ်၊ ဒီဇင်ဘာ ၂၁

ရခိုင်ပြည်နယ်၊ အမ်းမြို့အခြေစိုက် အနောက်ပိုင်းတိုင်းစစ်ဌာနချုပ်(နပခ) ဒုတိုင်းမှူး ဗိုလ်မှူးချုပ်သောင်းထွန်း၊ တိုင်းဦးစီးချုပ် ဗိုလ်မှူးချုပ်ကျော်ကျော်သန်းတို့ကို ဖမ်းဆီးရမိကြောင်း အာရက္ခတပ်တော်(AA)က ဒီဇင်ဘာ ၂၀ ရက် ညပိုင်းက ထုတ်ပြန်ခဲ့သည်။

အလားတူ အမ်းမြို့နယ် တစ်ခုလုံးနှင့် အမ်းမြို့အခြေစိုက် နပခတိုင်းစစ်ဌာနချုပ်ကိုလည်း အလုံးစုံ ထိန်းချုပ် လိုက်ပြီဖြစ်ကြောင်း ထုတ်ပြန်ခဲ့သည်။

ထိုကြောင့် AA သည် အမ်းမြို့နယ်ကို ထိန်းချုပ်လိုက်ပြီဖြစ်၍ ရခိုင်ပြည်နယ်အတွင်းမှာ စုစုပေါင်း ၁၄ မြို့ကို ထိန်းချုပ်ထားပြီဟု မှတ်ယူ၍ ရမည်ဖြစ်သည်။

ယခင် AA သိမ်းပိုက်ထားသော (၁၃) မြို့မှာ ပလက်ဝမြို့၊ ပေါက်တောမြို့၊ မင်းပြားမြို့၊ မြောက်ဦးမြို့၊ ကျောက်တော်မြို့၊ မြေပုံမြို့၊ ပုဏ္ဏားကျွန်းမြို့၊ ရမ်းဗြဲမြို့၊ ရသေ့တောင်မြို့၊ ဘူးသီးတောင်မြို့၊ သံတွဲမြို့၊ တောင်ကုတ်မြို့ နှင့် မောင်တောမြို့တို့ ဖြစ်ကြသည်။

ရခိုင်ပြည်နယ်အတွင်း တိုက်ပွဲတွင် မြန်မာ့တပ်မတော်ဘက်မှ ဗိုလ်မှူးချုပ်အဆင့်ရှိသူ ၃ ဦးအထိ ဖမ်းဆီးခံထားရ ကြောင်း သိရသည်။

CNI News

၂၀၂၄ ခုနှစ်၊ ဒီဇင်ဘာ ၂၀

ငြိမ်းချမ်းရေးနှင့် ဖက်ဒရယ်ဒီမိုကရေစီ ဖော်ဆောင်ရေးအစီအစဥ်(PPFD)သည် ငြိမ်းချမ်းရေးကိစ္စများအား နိုင်ငံရေး နည်းဖြင့် ဖြေရှင်းနိုင်ရန်အတွက် နိုင်ငံရေးဘောင်အား ကျယ်လာဖို့ လုပ်ဆောင်နေကြောင်း ပြည်သူ့ပါတီ(PP) ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

အပစ်ရပ် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်း(၇)ဖွဲ့၏ မဟာမိတ်အဖွဲ့၊ ပြည်တွင်းနိုင်ငံရေး ပါတီများနှင့် နိုင်ငံရေးအင်အားစုများ၊ CSOs Network For Peace and Federal Democracy တို့မှ ပူးပေါင်းကာ ငြိမ်းချမ်းရေးနှင့် ဖက်ဒရယ်ဒီမိုကရေစီ ဖော်ဆောင်ရေးအစီအစဥ် (PPFD) ကို ၂၀၂၄ ခုနှစ်၊ အောက်တိုဘာ ၁၃ ရက်နေ့တွင် စတင်ဖွဲ့စည်းခဲ့သည်။

မြန်မာနိုင်ငံ၏ ငြိမ်းချမ်း‌ရေးနှင့် ဖက်ဒရယ်ဒီမိုကရေစီ ဖော်ဆောင်ရေး နိုင်ငံရေးပြဿနာများကို နိုင်ငံရေး နည်းလမ်းဖြင့် ဖြေရှင်းကြရန် ရည်ရွယ်၍ ဖွဲ့စည်းခဲ့ကြောင်း သိရသည်။

ပြည်သူများ၏ လူနေမှုဘဝ အခက်အခဲများအား အမြန်ဆုံး ရပ်တန့်နိုင်ရန် နိုင်ငံရေးနည်းလမ်း ပြန်အားကောင်း လာစေဖို့ ကြိုးစားနေခြင်းဖြစ်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

PPFD အစီအစဉ် ညှိနှိုင်းကြစဉ်

၎င်းက “အခု ကျနော်တို့က စစ်ဘောင်ကျယ်လာတာနဲ့အမျှ နိုင်ငံရေးဘောင်က ကျဥ်းလာတာကိုး၊ အဲတော့ ကျနော် တို့က နိုင်ငံရေးဘောင် ပြန်ကျယ်လာမှ ငြိမ်းချမ်းရေးကိစ္စကို နိုင်ငံရေးနည်းနဲ့ ဖြေရှင်းတဲ့၊ ဆွေးနွေးညှိနှိုင်းတဲ့ ယဥ်ကျေးမှု ပြန်ပေါ်ထွက်လာမယ်လို့ မြင်တယ်လေ၊ အဲတော့ ဒါကြောင့်မို့လို့ ကျနော်တို့က လက်နက်ကိုင်ပဋိပက္ခ မြင့်မားနေတဲ့အချိန် ဆိုပေမယ့်လို့ တစ်ချိန်ချိန်မှာ ဒီဟာက နိုင်ငံရေးစားပွဲပေါ်ပဲ ပြန်ရောက်ရမှာ၊ အဲတော့ ရောက်တဲ့အခါမှာ ကျနော်တို့က တူညီနိုင်တဲ့ အချက်တွေက ဘယ်အချက်တွေရှိသလဲ၊ ကွာဟနေတာတွေက ဘယ်ဟာတွေ ရှိသလဲဆိုတာကို ကြိုတင်လေ့လာထားခြင်းအားဖြင့် တကယ့်ကို အားလုံး ကျယ်ကျယ်ပြန့်ပြန့် ဆွေးနွေးတဲ့ အခါကျရင်လည်း ပြည့်စုံတဲ့အခြေခံကောင်းတွေ ရရှိမယ်လို့ ကျနော်တို့ မျှော်လင့်ပါတယ်၊ အဲအတွက် လည်း ကျနော်တို့ကြိုးစားနေတာ ဖြစ်ပါတယ်၊ စစ်တိုက်တယ်ဆိုတာက စစ်ပွဲအတွက် လိုအပ်ချက်ကို နည်းမျိုးစုံနဲ့ ရှာဖွေရတာပဲ၊ အဲတော့ ပြည်သူတွေဆီကနေ အခွန်ကောက်မယ်၊ ဆက်ကြေးတောင်းမယ်၊ အဲတော့ အကုန်လုံး ပြည်သူတွေက ကြာလေကြာလေ ဝန်ထုပ်ဝန်ပိုး ပိုဖြစ်ပြီးတော့ စီးပွားရေးကလည်း မကောင်းရတဲ့ကြားထဲမှ ရာဇဝတ်မှုတွေ၊ ခိုးဆိုးလုယက်တာတွေကလည်း ပိုပိုများလာတော့ ဒီဟာကြီးကို ကျနော်တို့ အမြန်ဆုံးရပ်တန့် နိုင်ဖို့အတွက် နိုင်ငံရေးနည်းလမ်း ပြန်အားကောင်းလာဖို့အတွက် ကျနော်တို့ ဒါကြိုးစားနေတာ ဖြစ်ပါတယ်၊ ယုံလည်း ယုံကြည်ပါတယ်ခင်ဗျ” ဟု ပြောသည်။ 

ငြိမ်းချမ်းရေးနှင့် ဖက်ဒရယ်ဒီမိုကရေစီ ဖော်ဆောင်ရေးအစီအစဥ် (PPFD)က ၂၀၂၄ ခုနှစ်၊ ဒီဇင်ဘာ ၁၇ ရက်တွင် အစည်းအဝေးအား ကျင်းပခဲ့ပြီး၊ ထိုအစည်းအဝေးတွင် နိုင်ငံရေးအရ ဆွေးနွေးညှိနှိုင်းမှုများ ချဲ့ထွင်တိုးမြှင့် ဆောင်ရွက်သွားရေး သဘောထား စုစည်းချက်များ ရရှိခဲ့ကြောင်း သိရသည်။

ထို့အပြင် နိုင်ငံရေး၊ စစ်ရေး အခြေအနေများ၊ နိုင်ငံတကာရေးရာများနှင့် စီးပွားရေးဆိုင်ရာ ပုံမှန်သုံးသပ်ခြင်း အစီအစဥ်အား တိုးချဲ့ဆောင်ရွက်သွားရန် သဘောတူညီမှုများ ရရှိခဲ့ကြောင်း သိရသည်။

တိုင်းရင်းသား လက်နက်ကိုင်ကိုယ်စားလှယ်များကို တွေ့ရစဉ်

ငြိမ်းချမ်းရေးနှင့် ဖက်ဒရယ်ဒီမိုကရေစီသို့ သွားနိုင်ရန်၊ နိုင်ငံရေးလမ်းကြောင်းပေါ် ပြန်ရောက်ရန် လုပ်ဆောင်နေ ကြောင်း PPFD သတင်းပြန်ကြားရေးအဖွဲ့ခေါင်းဆောင် ဦးအောင်နေပိုင်က CNI သတင်းဌာနသို့ ပြောသည်။

၎င်းက “အဲတော့ ငြိမ်းချမ်းရေးနဲ့ ဖက်ဒရယ်ဒီမိုကရေစီ ဆိုတာကတော့ အားလုံးရဲ့ အမြင့်ဆုံး မျှော်မှန်းချက်ပါပဲ၊ အဲဒီမှာ အဲဒီကိုသွားနိုင်ဖို့အတွက် အဓိက,ကတော့ ဘယ်လိုပဲဖြစ်ဖြစ် ကျနော်တို့က ဒါစစ်ရေးပဋိပက္ခတွေက ပိုပြီး‌ တော့ မြင့်တက်လာတယ်၊ တစ်ဖက်မှာလည်း တိုက်ပွဲအခြေအနေက ပိုပြီးတော့ မြင့်လာတယ်ပေါ့နော်၊ အဲတော့ ဒီမှာ နိုင်ငံရေးအသံထွက်နိုင်ဖို့ နိုင်ငံရေးလမ်းကြောင်းကို ပြန်ရောက်ဖို့ဆိုတဲ့ အနေအထားမှာ ဒါကျနော်တို့ ကိုယ် တတ်နိုင်တဲ့ဘောင်၊ ဘောင်ကတကယ်တော့ ပြည်တွင်းမှာ အစုအဖွဲ့ဆိုတာက တကယ်တော့ ဘောင်အကန့် အသတ် ဖြစ်တယ်၊ ဘောင်လည်းကျဥ်းတယ်။ အဲတော့ ဘောင်ကျဥ်းကျဥ်းလေး ထဲပေမယ့် ကျနော်တို့လုပ်နိုင်တဲ့ ဟာကို တတ်နိုင်သလောက် စုဖွဲ့ပြီးတော့ ဒါဆောင်ရွက်တာမျိုးပေါ့နော်၊ အဲတော့ ဒီမှာအခြေခံအဆင့် တွေကတော့ ကျနော်တို့ ဒီနိုင်ငံရေးအသံတွေ ပြန်ထုတ်ဖို့၊ ပြီးတဲ့ခါကျတော့ အဓိကတော့ အနည်းဆုံးတော့ ကျနော်တို့ စစ်ရေး မြင့်တက်မှုကိုတော့ ကျနော်တို့ Balance ဖြစ်အောင်တော့ မလုပ်နိုင်ဘူး၊ ဒါပေမယ့် စစ်ရေးမြင့်တက်မှု အတတ်နိုင် ဆုံး ဒီနိုင်ငံရေးဘက်ကလည်း အသံပြန် ထွက်ပြီးတော့ ထိန်းနိုင်အောင် ဒါသွားတဲ့သဘောမျိုးပါပဲ”ဟု ပြောသည်။ 

ငြိမ်းချမ်းရေးနှင့် ဖက်ဒရယ်ဒီမိုကရေစီ ဖော်ဆောင်ရေးအစီအစဥ် (PPFD) သည် ပြည်တွင်း ပဋိပက္ခများ၏ နောက်ဆက်တွဲတွင် ပြည်သူလူထုများ အသံတိတ်သွားခြင်းကို ဖော်ထုတ်ရန် အပါအဝင် စစ်ရေးပဋိပက္ခများ မြင့်လာသည်နှင့်အမျှ ပြည်သူလူထုများ နစ်နာဆုံးရှုံးရသောကြောင့် စစ်ရေးပဋိပက္ခများအား နိုင်ငံရေးဘောင်ကို ချဲ့ခြင်းဖြင့် ထိန်းနိုင်ရန် စသည့်အချက်မျာအား အဓိက လုပ်ဆောင်သွားမည်ဖြစ်ကြောင်း သိရသည်။

CNI News

၂၀၂၄ ခုနှစ်၊ ဒီဇင်ဘာ ၁၉

KIA- NUG နှင့် မိတ်ဆွေဖွဲ့ရန် စဉ်းစားမည်မဟုတ်ဟု ဆိုသည့်စာကို ကသာမြို့အတွင်း ဖြန့်ဝေနေခြင်းက မိမိတို့ကို အပုတ်ချခြင်းဖြစ်သလို ပြည်သူလူထု အထင်မြင်လွဲမှားအောင် လုပ်ခြင်းဖြစ်သည်ဟု ရှမ်းနီအမျိုးသားများတပ်မ တော်(SNA)၏ ပြောရေးဆိုခွင့်ရှိသူက ပြောသည်။

စစ်ကိုင်းတိုင်းဒေသကြီး၊ ကသာမြို့အတွင်းမှာ KIA-NUG နှင့် မိတ်ဆွေဖွဲ့ရန် စဉ်းစားမည်မဟုတ်ကြောင်း စာများကို SNA အသွင်ယူ၍ ဖြန့်ဝေနေခြင်း ဖြစ်ကြောင်း ၎င်းက ပြောသည်။

SNA ပြောရေးဆိုခွင့်ရှိသူက “အခု လိုင်းပေါ်မှာ ပျံ့နေတဲ့စာက SNA က ဖြန့်ဝေတဲ့စာမဟုတ်ဘူး။ SNA ကို အပုတ်ချဖို့အတွက် တမင် အကွက်ဆင်ပြီး ဖြန့်ဝေနေတာဖြစ်ပါတယ်။ ဒီစာကို ဘယ်သူတွေက ဖြန့်ဝေနေတာလဲ ဆိုတာ လူထုက ခန့်မှန်းနိုင်ပါလိမ့်မယ်။ အခု ကျနော်တို့ SNA ကို ထိုးစစ်ဆင် တိုက်ခိုက်နေတဲ့ အင်အားစုတွေ ရှိတယ်။ ရှမ်းနီဒေသကို သိမ်းပိုက်ဖို့လုပ်နေကြတယ်။ အခုလိုမျိုး စာဖြန့်တာက SNA ဟာ စကစနဲ့ ပေါင်းနေလို့ ငါတို့ တိုက်ရတာ ဒါကြောင့် ငါတို့ ရှမ်းနီဒေသကို နယ်ချဲ့တာ မမှားဘူးဆိုတာမျိုး လူထုက ထင်အောင်လို့ တမင် အကွက်ဆင်ပြီး ဝါဒဖြန့်တာဖြစ်ပါတယ်။ SNA ဟာ ဒီမိုကရေစီလိုလားတဲ့ အဖွဲ့အစည်းဖြစ်သလို တိုင်းရင်းသား အားလုံးနဲ့လည်း ချစ်ချစ်ချင်ချင် အတူယှဉ်တွဲနေထိုင်ရေးကို လိုလားတဲ့ အဖွဲ့အစည်းဖြစ်ပါတယ်”ဟု ပြောသည်။

SNA က ဖြန့်ဝေနေတဲ့စာဆိုပြီး ပျံ့နှံ့နေတဲ့စာကို တွေ့ရစဉ်

၂၀၂၄ ခုနှစ်၊ ဒီဇင်ဘာ ၁၉ ရက်နေ့က ကသာမြို့အတွင်းမှာ SNA က KIA-NUG နှင့်မိတ်ဆွေဖွဲ့ရန် စဉ်းစားမည် မဟုတ်ဘူးဆိုသော စာများကို ဖြန့်ဝေနေကြောင်း သတင်းများ ထွက်ပေါ်လာသလို သတင်းဌာနတချို့ကလည်း ဖော်ပြလျက်ရှိကြသည်။

အဆိုပါ ပျံ့နှံ့နေသော စာသည် SNA မှ ဖြန့်ဝေခြင်းမဟုတ်ကြောင်း၊ SNA ကို အပုတ်ချရန်အတွက် ဝါဒဖြန့်ခြင်းဖြစ် ကြောင်း၊ SNA နှင့် ရှမ်းနီဒေသကို စစ်ရေးနယ်ချဲ့ရန် တမင်အကွက်ဆင်ခြင်းဖြစ်ကြောင်း၊ ရှမ်းနီလူမျိုးများ၏ ဂုဏ် သိက္ခာကို ကျဆင်းအောင် ဝါဒဖြန့်လုပ်ကြံခြင်းဖြစ်ကြောင်း SNA ၏ ပြောရေးဆိုခွင့်ရှိသူက ပြောသည်။

လက်ရှိတွင် SNA သည် ဒေသတည်ငြိမ်ရေးနှင့် ဒေသတွင်းနေ ပြည်သူလူထု၏ အသက်၊ အိုးအိမ်၊ စည်စိမ် လုံခြုံရေးအတွက် ဆောင်ရွက်နေသော်လည်း SNA ထိန်းချုပ်နယ်မြေများတွင် KIA/PDF က စစ်ရေးလှုပ်ရှား တိုက်ခိုက်လာခြင်းကြောင့် တိုက်ပွဲများ ဖြစ်ပွားလျက်ရှိနေသည်။

၂၀၂၄ ခုနှစ်၊ စက်တင်ဘာ ၃၀ ရက်နေ့က ဗန်းမောက်မြို့နယ်အတွင်းမှာ SNA က ကာကွယ်ဆေးထိုးပေးနေစဉ်

ရှမ်းနီအမျိုးသားများတပ်မတော်(SNA)သည် ၁၉၈၉ ခုနှစ်၊ ဇူလိုင်လက စတင်ထူထောင်ခဲ့ပြီး စစ်ကိုင်းတိုင်း ဒေသကြီးအတွင်း ပါဝင်သွားသော တမူးခရိုင်၊ ဟုမ္မလင်းခရိုင်၊ ခန္တီးခရိုင်၊ ကသာခရိုင်၊ ဗန်းမောက်ခရိုင်၊ မော်လိုက်ခရိုင်၊ ကလေးခရိုင်နှင့် ကချင်ပြည်နယ် အတွင်း ပါဝင်သွားသည့် မြစ်ကြီးနားခရိုင်၊ မိုးညှင်းခရိုင်၊ မိုးကောင်းခရိုင်၊ ဗန်းမော်ခရိုင်၊ ကားမိုင်း၊ အင်းတော်ကြီး ဒေသများကို စုစည်း၍ ရှမ်းနီပြည်နယ်ရရှိရေး ကြိုးပမ်းနေသော ရှမ်းနီလက်နက်ကိုင်ဖြစ်သည်။