CNI News

၂၀၂၅ ခုနှစ်၊ ဇန်နဝါရီ ၈

အမျိုးသားညီညွတ်ရေးအစိုးရ NUG အနေဖြင့် တစ်ခုလုံးအသစ်လဲသင့်ပြီး လိုအပ်သည့် အပြောင်းအလဲသည် စစ်နိုင်အောင်သာ တိုက်ရမည် ဖြစ်ကာ ပြုပြင်ပြောင်းလဲမှုများလည်း လုပ်ရန်လိုအပ်ကြောင်း နိုင်ငံရေး လေ့လာ သုံးသပ်သူများက သုံးသပ်ပြောဆိုသည်။

၂၀၂၅ ခုနှစ်တွင် တော်လှန်ရေးအောင်မြင်ရန် လိုအပ်သည့် အပြောင်းအလဲများအား ရဲရဲဝံ့ဝံ့ ဆောင်ရွက်သွားမည်ဟု အမျိုးသားညီညွတ်ရေးအစိုးရ NUG ၏ ပြည်ထောင်စု ဝန်ကြီးချုပ် မန်းဝင်းခိုင်သန်းက ၂၀၂၅ ခုနှစ်၊ ဇန်နဝါရီ ၁ ရက်နေ့တွင် နှစ်သစ်ကူးမိန့်ခွန်း၌ ထည့်သွင်းပြောကြားခဲ့သည်။

နိုင်ငံရေးလေ့လာသုံးသပ်သူ ဦးကြီးမြင့်က “လိုအပ်ချက်တွေကတော့ NUG က တစ်ခုလုံး အသစ်လဲပစ်ရင် အကောင်းဆုံးပဲ၊ ဘာမှစစ်လည်း မနိုင်ဘူး၊ ပိုက်ဆံတွေလည်း မရှိဘူး၊ ‌ငွေရေးကြေးရေးလည်း မရှိဘူး၊ ဝန်ကြီးအဖွဲ့တွေကလည်း အကြီးကြီးပဲ၊ လစာတွေ လည်း အပြည့်ယူထားတယ်၊ တတိယနိုင်ငံကို သွားတဲ့အခါကျရင် ဒီ NUG ကပဲ အားလုံးကို စရိတ်ထောက်ပံ့တာ၊ ထောက်ပံ့တဲ့အခါကျတော့ အဲဒီစရိတ်တွေက မိသားစုလိုက်တွေပါ ထောက်ပံ့ထားတာ သောင်းနဲ့ချီရှိတယ်၊ အဲဒီဟာတွေတွက်က တော်လောက်ပြီ၊ အဲ့လို ပြင်ဆင်သင့်တယ်လို့ အဲ့လို ထင်တယ်လေ၊ ၄ နှစ်လုံးလုံး ပတ်ဝန်းကျင်က အကြံဥာဏ်ပေးတာတွေကျ မလုပ်ပါဘူး၊ သူတို့လုပ်ချင်ရာ လုပ်တာပဲ၊ အခု ဒီစကား ပြောတာကတော့ ဝမ်းသာပါတယ်နော်၊ လိုအပ်တဲ့ အပြောင်းအလဲကတော့ စစ်နိုင်အောင်တိုက်ပေါ့ ဒီတစ်ခုပါပဲ နော် သိပ်များများမရှိပါဘူး” ဟု CNI သတင်းဌာနသို့ ပြောသည်။

NUG အစိုးရအနေဖြင့် တော်လှန်ရေးတွင် ပိုမိုကောင်းမွန်ထိရောက်သော စုဖွဲ့လုပ်ဆောင်မှုများအား ပြုပြင်ပြောင်းလဲ ဆောင်ရွက်သွားမည်ဖြစ်သလို ဦးဆောင်မှုလိုအပ်ချက်ကြောင့် ဖြစ်ပေါ်လာသည့် အုပ်ချုပ်ရေးဆိုင်ရာ၊ စစ်ရေးဆိုင်ရာ အားနည်းချက်များအားလည်း ကြိုးစားပြင်ဆင်သွားရန် အသင့် ဖြစ်နေကြောင်း NUG ၏ ပြည်ထောင်စု ဝန်ကြီးချုပ်က ပြောကြားခဲ့သည်။

ထို့ပြင် ၂၀၂၄ ခုနှစ်အတွင်းတွင် သင်ခန်းစာယူရမည့် ပြုပြင်ပြောင်းလဲရမည့် ကိစ္စများရှိခဲ့ပြီး အုပ်ချုပ်ရေး၊ စစ်‌ရေးဆိုင်ရာ တာဝန်ရှိသူတစ်ချို့၏ ပြည်သူလူထုအပေါ် မျက်နှာမူမှု အားနည်းသည့် ဆောင်ရွက်ချက်များ၊ တော်လှန်ရေးတွင် ပါဝင်သော်လည်း တော်လှန်ရေးစံနှုန်းများအား သွေဖည်သွားသည့်လုပ်ရပ်များ၊ စိတ် ခံစားချက်များအပေါ် ရှေ့တန်းတင်ပြီး နားလည်မှု၊ စည်းလုံးမှုများအား ပျက်ပြားစေခဲ့သည့် ဖြစ်ရပ်များ ရှိခဲ့သည်ဟုလည်း ၎င်းက ဝန်ခံခဲ့သည်။

NUG အစိုးရ ပြည်ထောင်စု ဝန်ကြီးချုပ် မန်းဝင်းခိုင်သန်းနှင့် PDF ရဲဘော်များ တွေ့ဆုံစဉ်

NUG အနေဖြင့် ပြုပြင်ပြောင်းလဲမှု တော်တော်များများ လုပ်ရန်လိုအပ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “NUG အနေနဲ့ ပြုပြင်ပြောင်းလဲမှုတွေ တော်တော်များများ လုပ်ဖို့လိုပါတယ်၊ ဒီပထမဦးဆုံးလိုအပ်တဲ့ ပြုပြင်ပြောင်းလဲမှုကတော့ NUG အနေနဲ့ အခု စစ်‌ရေးအရ မဟာမိတ်ဖွဲ့မှုတွေကို တစ်ဆင့်တိုး လုပ်ဆောင်ရမယ်၊ နောက်တစ်ခုက နိုင်ငံရေးအရ ပူးပေါင်းဆောင်ရွက်မှုတွေကိုလည်း ပိုပြီးတော့ ပီပြင်အောင် လုပ်ရမယ်၊ ဆိုလိုတဲ့ သဘောကတော့ စစ်ရေးကို အလေးထားပြီး လုပ်ဆောင်တာနဲ့ တစ်ပြိုင်နက်ထဲမှာ နိုင်ငံရေးအရလည်း ဖက်ဒရယ် ဒီမိုကရေစီ တိုင်းပြည်ရဲ့ ကြားကာလ ဖွဲ့စည်းပုံအခြေခံဥပဒေ တစ်ရပ်ကို ခိုင်ခိုင်မာမာ တည်ဆောက်ရပါမယ်၊ အဲ့လိုလုပ်ခြင်းအားဖြင့် ဘာဖြစ်လာနိုင်လဲဆိုလို့ရှိရင် တိုင်းရင်းသားလက်နက်ကိုင် အဖွဲ့အစည်းတွေနဲ့ မြန်မာ လက်နက်ကိုင် အင်အားစုတွေရဲ့ ပေါင်းစည်းမှုဟာ ပိုပြီးတော့ ကျစ်လစ်ခိုင်မာလာလိမ့်မယ်၊ ပိုပြီးတော့ အားကောင်းလာလိမ့်မယ်လို့ ယူဆပါတယ်၊ နောက် ဒုတိယတစ်ချက်ကတော့ NUG အစိုးရအနေနဲ့ အာဏာရ အစိုးရတစ်ရပ် မဟုတ်ဘဲနဲ့ အာဏာရအစိုးရတစ်ရပ် အသွင်အပြင်ဆောင်နေတဲ့ အဆောက်အအုံတွေကို ဖျက်သိမ်းပြီးတော့ လုံးဝကျစ်လစ်တဲ့ တော်လှန်ရေးအစိုးရတစ်ရပ်အဖြစ် ဖွဲ့စည်းဖို့ လိုအပ်ပါတယ်၊ ဆိုလိုတာ ကတော့ ဝန်ကြီးဌာန ၁၇ ခု မလိုဘူး၊ ဝန်ကြီးဌာနတစ်ခုမှာလည်း ဝန်ကြီး ၄၊ ၅ ပါးလောက် အဲ့လောက်ထိ ဖောင်းပွနေစရာ မလိုဘူးလို့ ကျနော်တို့အနေနဲ့ ယူဆပါတယ်” ဟု ပြောသည်။

အမျိုးသားညီညွတ်ရေးအစိုးရ NUG တွင် တပ်ရင်းပေါင်း ၃၀၀ ကျော်၊ ကာကွယ်ရေးတပ် ၂၀၀ ကျော်ခန့် ရှိသော် လည်း တိုက်ပွဲများ ဖြစ်မြောက်အောင် မတိုက်ခိုက်နိုင်ခြင်းတို့ကြောင့် NUG ဦးဆောင်နေသည့် စစ်ရေး အင်အားစု များ အတွင်း၌ လက်တွေ့တိုက်ပွဲတောင်းဆိုချက်နှင့် ကိုက်ညီသည့် ဖွဲ့စည်းမှုမျိုး မရှိသေးသည်ကို တွေ့ရကြောင်း စစ်ရေးနှင့် နိုင်ငံရေး အကဲခတ်များက ထောက်ပြကြသည်။

တိုင်းရင်းသားလက်နက်ကိုင်တပ်ဖွဲ့များနှင့် ပြည်သူ့ကာကွယ်ရေးတပ်မတော် PDF တို့သည် နိုင်ငံတစ်ဝန်းတွင် မြို့နယ်ပေါင်း ၁၄၄ မြို့နယ်အား စိုးမိုးထိန်းချုပ်ထားကြောင်း အမျိုးသားညီညွတ်ရေးအစိုးရ NUG ၏ ကာကွယ်ရေး ဝန်ကြီးဌာနက ၂၀၂၅ ခုနှစ်၊ ဇန်နဝါရီလ ၄ ရက်နေ့တွင် ထုတ်ပြန်ခဲ့သည်။

နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကတော့ မြန်မာနိုင်ငံသားအားလုံး မြန်မာစိတ်မွေးပြီး (ငါတို့အားလုံးသည် မြန်မာ) ဟူသောစိတ်ဖြင့် လက်တွဲအကောင်အထည် ဖော်ကြရန် ၂၀၂၅ ခုနှစ်၊ ဇန်နဝါရီလ ၄ ရက်နေ့တွင် ကျရောက်သည့် ၇၇ နှစ်မြောက် လွတ်လပ်ရေးနေ့ အခမ်းအနားသို့ သဝဏ်လွှာ‌ပေးပို့ကာ တိုက်တွန်း ခဲ့သည်။

CNI News

၂၀၂၅ ခုနှစ်၊ ဇန်နဝါရီ ၇

လက်နက်ကိုင် လမ်းစဉ်ကိုစွန့်၍ နိုင်ငံရေးနည်းလမ်းဖြင့် ဖြေရှင်းရန် ဘယ်လောက်ပြောပြော လက်နက်စွန့်ခိုင်းနေ သရွေ့ နိုင်ငံရေးဆွေးနွေးမှုများ အောင်မြင်မည်မဟုတ်ကြောင်း စစ်ရေးနှင့်နိုင်ငံရေး အကဲခတ်များက ထောက်ပြ ကြသည်။

လက်နက်ကိုင် အကြမ်းဖက် တောင်းဆိုမှုများအပေါ် လိုက်လျောဖြေရှင်း ပေးသွားမည် မဟုတ်ကြောင်း၊ လက်နက် ကိုင်လမ်းစဉ်ကို စွန့်လွတ်၍ နိုင်ငံရေး နည်းလမ်းအရ တွေ့ဆုံဆွေးနွေးရမည်ဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားလျက်ရှိနေသည်။

နစကဥက္ကဋ္ဌသည် တိုင်းရင်းသားလက်နက်ကိုင်များအား လက်နက်စွန့်၊ နိုင်ငံရေးပါတီထောင်ပြီး ရွေးကောက်ပွဲ ဝင်ခိုင်းသည့် သဘောထားဖြစ်ကြောင်း၊ ထိုသို့ လက်နက်စွန့်ခိုင်းနေသရွေ့ နိုင်ငံရေးဆွေးနွေးမှုများ အောင်မြင်မည် မဟုတ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

 မြန်မာ့တပ်မတော်မှ ဒုဗိုလ်ချုပ်ကြီးကိုကိုဦးနဲ့ MNDAA ခေါင်းဆောင်များကို တွေ့ရစဉ်

၎င်းက “သူပြောနေတဲ့ နိုင်ငံရေးအရ ပြဿနာတွေကို ဖြေရှင်းဖို့ဆိုတာရဲ့ အဓိပ္ပါယ်က ဘာလဲဆိုတာ ရှင်းနေတာပဲ။ သူ့သဘော အဓိပ္ပါယ်ကတော့ နိုင်ငံရေးအရ ဆွေးနွေးမယ်၊ ဒါပေမယ့် လက်နက်ကိုင် ဖိအားပေးမှုတွေတော့ မလုပ် ဘူး။ လက်နက်ကိုင် ဖိအားပေးမှုတွေ လုပ်လို့ကတော့ တပ်မတော်ကတော့ အသင့်ရှိတယ်ပေါ့။ နိုင်ငံရေးအရ ဆွေးနွေးကြမယ်ဆိုရင်တော့ သူထည့်မပြောသွားတဲ့ ကိစ္စတစ်ခုရှိတာပေါ့။ လက်နက်စွန့်၊ ပါတီထောင် ရွေးကောက်ပွဲဝင်ဆိုတဲ့ လမ်းကြောင်းပေါ့။ အဲဒီလမ်းကြောင်းကို သူဖွင့်မပြောဘဲနဲ့ နိုင်ငံရေးအရ ဆွေးနွေးကြ ရအောင်လို့ ပြောနေတာပဲလေ။ အဲဒါရဲ့အဓိပ္ပါယ် အတွင်းသဘောက ခုနကပြောတဲ့အတိုင်းပဲ။ သူ့ကိုတော့ လက်နက်ကိုင်ပြီး ဖိအားပေးလို့ မရဘူးပေါ့။ သူကတော့ ‌ပေးမယ်ပေါ့။ ဘာကြောင့်ဆို သူက တပ်မတော်ကြီး ကိုင်ထားတဲ့သူ။ အဲဒီတော့ နိုင်ငံရေးအရ ဆွေးနွေးပွဲတွေက ဘယ်လိုလုပ်ပြီး အောင်မြင်မှာလဲဆိုတာ စဉ်းစားလို့ မရဘူး။ ဒါကြောင့် သူ့ရဲ့နိုင်ငံရေး ဆွေးနွေးပွဲတွေက အောင်မြင်မှာ မဟုတ်ဘူးလို့ပြောတာ အဲဒါပါ” ဟု ပြောသည်။

လက်နက်ကိုင် ပဋိပက္ခများနှင့် သဘောထား ကွဲလွဲမှုများကို ဥပဒေနှင့်အညီ ထိန်းသိမ်းဆောင်ရွက် သွားကြရန် လည်း နစကဥက္ကဋ္ဌက တိုက်တွန်းထားသည်။

တပ်မတော်သည်လည်း နိုင်ငံရေးကို နိုင်ငံရေးနည်းလမ်းဖြင့် ဖြေရှင်းခဲ့ခြင်း မဟုတ်သည့်အတွက် တိုင်းရင်းသား လက်နက်ကိုင်များအပေါ် နိုင်ငံရေးနည်းလမ်းဖြင့် ဖြေရှင်းရန် ပြောဆိုခြင်းသည် လက်တွေ့မကျကြောင်း မြန်မာ-တရုတ်အရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

AA ရဲဘော်ကို တွေ့ရစဉ်

၎င်းက “သိပ်သေချာတာက သူတို့မှာ အခုအချိန်အထိ တွေ့ဆုံဆွေးနွေးမှု ဆုံးဖြတ်မှုမရှိသေးဘူး။ အဲဒါတစ်အချက်။ နှစ်အချက်က သူတို့နောက်ဆုတ်ဖို့လည်း အစီအစဉ်မရှိဘူး။ သူတို့ဆက်သွားမှာပဲ။ ဆက်သွားဖို့အတွက် သူတို့ အတွက် တရားဝင်မှုရအောင် ကြိုးစားနေတာပဲ။ အဲဒီအတွက် ဟိုဟာတစ်မျိုးပြောလိုက်၊ ဒီဟာတစ်မျိုး ပြောလိုက် ပြောနေမှာပဲ။ လောလောဆယ်က သူတို့ထွက်ပေါက်က ‌ရွေးကောက်ပွဲလို့ ဟိုဒင်းပြုပုံရတယ်။ ခင်ဗျားတို့ရော နိုင်ငံရေးကို နိုင်ငံရေးနည်းလမ်းနဲ့ ဖြေရှင်းလို့လားလို့ ပြန်မေးလိုက်ရုံပဲ။ သူတို့က ဘာမဆို ထစ်ခနဲဆို စစ်တပ်နဲ့ အာဏာသိမ်း လက်နက်ကိုင်သုံးပြီး သူများကြတော့ နိုင်ငံရေးနည်းလမ်းနဲ့ ဖြေရှင်းပါဆိုတာ ဟုတ်မှ မဟုတ် နိုင်တာကြီး။ သူတစ်နေ့တစ်မျိုး အမျိုးမျိုးပြောနေတာပဲ။ ရွေးကောက်ပွဲလုပ်လည်း သူတို့မကြိုက်ရင် ပြန် အာဏာသိမ်းမှာပဲ”ဟု ပြောသည်။

လက်ရှိတွင် မြောက်ပိုင်းမဟာမိတ်သုံးဖွဲ့(TNLA-AA-MNDAA)နှင့် တရုတ်တို့ ၂၀၂၄ ခုနှစ်၊ ဒီဇင်ဘာလက တွေ့ဆုံ၍ ငြိမ်းချမ်းရေးလုပ်ငန်းစဉ်များ ဆွေးနွေးခဲ့ကြသလို နစက ကိုယ်စားလှယ်များနှင့် မြောက်ပိုင်းမဟာမိတ်များမှ ကိုယ်စားလှယ်များလည်း တွေ့ဆုံ၍ ဆွေးနွေးခဲ့ကြသည်။

သို့သော် ယနေ့အချိန်ထိ တစ်စုံတစ်ရာ တိကျခိုင်မာသော သဘောတူညီချက်များကို ရရှိခြင်းမရှိသေးဘဲ နှစ်ဖက် စစ်ရေး ပဋိပက္ခများ ဖြစ်ပွားနေဆဲ ဖြစ်သည်။

CNI News

၂၀၂၅ ခုနှစ်၊ ဇန်နဝါရီ ၇

အာရက္ခတပ်တော်(AA) အနေဖြင့် စစ်မျက်နှာ ထပ်ဖွင့်ခြင်းများ မပြုလုပ်နိုင်ရန် ARSA က အနှောင့်အယှက်ပေး သည့် စစ်ရေးလှုပ်ရှားမှု ပြုလုပ်လာခြင်း ဖြစ်နိုင်သည်ဟု NCA ထိုးထားသည့် ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

မောင်တောမြို့နယ်အတွင်း ARSA ၏ တိုက်ခိုက်မှုများ ရှိနေကြောင်း AA က ၂၀၂၄ ခုနှစ်၊ ဒီဇင်ဘာ ၂၆ ရက်တွင် ထုတ်ပြန်ခဲ့သည်။

ရခိုင်ပြည်နယ်၊ မောင်တောမြို့မြောက်ပိုင်း မီးဒိုင်းကျေးရွာအနီးတွင် AA ၏ စခန်းအား ARSA မှ တိုက်ခိုက်ခဲ့ ကြောင်း ARSA က ၂၀၂၅ ခုနှစ်၊ ဇန်နဝါရီ ၃ ရက်တွင် ထုတ်ပြန်ခဲ့သည်။

ရခိုင်ပြည်နယ်၊ ဘူးသီးတောင်နှင့် မောင်တောမြို့ ပတ်ဝန်းကျင်တွင် ARSA တပ်ဖွဲ့ဝင်များ အခိုင်အမာ စခန်းချထား သည့် နေရာ ၄ ခုအား သိမ်းဆည်းရမိခဲ့ကြောင်း AA က ၂၀၂၄ ခုနှစ်၊ အောက်တိုဘာ ၂၃ ရက်တွင် ထုတ်ပြန်ခဲ့သည်။

ARSA အဖွဲ့ကို တွေ့ရစဉ်

AA အား ARSA တပ်ဖွဲ့မှ တိုက်ခိုက်ခြင်းသည် AA အနေဖြင့် စစ်မျက်နှာ ထပ်ဖွင့်ခြင်း၊ ထပ်ချဲ့ခြင်းများ မလုပ်လာနိုင် အောင် ထိန်းညှိပေးနိုင်ရန် ဖြစ်နိုင်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “ကျနော် တွက်တာတော့ လက်ရှိ AA ရဲ့ စစ်ရေးအောင်ပွဲတွေက ပြည်မထဲကို မကွေးတို့၊ ဧရာဝတီတို့ထဲကို သိပ်မကျွံအောင်ပေါ့၊ နောက်ကြောင်းမလုံအောင် လုပ်တဲ့သဘောပဲလို့ ယူဆပါတယ်၊ နောက်ကြောင်းမလုံအောင် နောက်ကနေပြီးတော့ အနှောင့်ယှက် ဖော်ပေးတဲ့သဘောလို့ ယူဆပါတယ်၊ အဲသလို နောက်ကြောင်းမှာ ပဋိပက္ခ ထပ်ဖြစ်လာရင် AA ကရှေ့တိုးပြီးတော့ ထပ်ပြီးတော့ စစ်မျက်နှာ ထပ်ဖွင့်တာတို့၊ ထပ်ချဲ့တာတို့ ထိန်းညှိတာနဲ့ တူပါတယ်ဗျ၊ သူ့ဘာသူ ပြည်တွင်းမှာ ကျစ်ကျစ်လစ်လစ် ပြန်ထိန်းချုပ်နိုင်အောင် စစ်‌ရေးအရ ထပ်ပြီးတော့ အချိန် ပိုယူရမယ့်သဘောကို ညွှန်ပြတာပေါ့ဗျာ ကျနော်အဲလိုတွက်ပါတယ်၊ ကျ‌နော်ထင်တာတော့ ဒီကိစ္စက Locally (ဒေသတွင်း)ရှင်းလို့ မရဘူးထင်တယ်ဗျ၊ ဒါတွေက ကျနော်တို့ အိမ်နီးနားချင်းတွေနဲ့ အားလုံးပတ်သက်ရာ ပတ်သက်ကြောင်းတွေ ဖြစ်နေတော့ ကျ‌နော်တို့ ဒီအိန္ဒိယတို့၊ ဘင်္ဂလား‌ဒေ့ရှ်တို့ရဲ့ သဘောထားတွေ လိုလာမယ်၊ နောက်တစ်ခါ လက်ရှိနေပြည်တော်က အာဏာပိုင်ရဲ့ သဘောထား လိုလာမယ်၊ ဒါကြောင့် ဒါတွေကို အနည်းဆုံး တော့ ထိန်းထိန်းသိမ်းသိမ်း ဖြစ်ဖို့ကတော့ ဒီရခိုင် AA ကနောက်ဆုံး ကြွေးကြော်လိုက်တဲ့ တွေ့ဆုံဆွေးနွေးရေး၊ နိုင်ငံရေးလမ်းကြောင်းကို ဆွေးနွေးမယ်ဆိုတဲ့ အချက်ကတော့ ဒီပြဿနာတွေကို နည်းနည်းလေးတော့ ထိန်းထိန်းသိမ်းသိမ်း ဖြစ်သွားနိုင်တဲ့ သဘောလို့တော့ ယူဆပါတယ်” ဟု ပြောသည်။

ရခိုင်ပြည်နယ်တွင် မြို့နယ်ပေါင်း ၁၄ မြို့နယ်အား ထိန်းချုပ်ပြီး‌နောက် ပြည်တွင်းရေး အခြေအနေများအား နိုင်ငံရေးနည်းလမ်းဖြင့် ဆွေးနွေးဖြေရှင်းမည်ဟု ရက္ခိုင်အမျိုးသားအဖွဲ့ချုပ် (ULA/AA) က ၂၀၂၄ ခုနှစ်၊ ဒီဇင်ဘာ ၂၉ ရက်တွင် ထုတ်ပြန်ခဲ့သည်။

ရခိုင်ပြည်နယ်တွင်ဖြစ်နေသော အချို့အရာများသည် လူမျိုးရေး အသွင်သဏ္ဍာန် ဖြစ်သောကြောင့် သမိုင်းကြောင်း ဆိုင်ရာ ဖြေရှင်းရန်လိုကြောင်း စည်းလုံးညီညွတ်သော တိုင်းရင်းသားလူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

ရခိုင်ပြည်နယ်အတွင်းက လမ်းဆုံတစ်နေရာကိုတွေ့ရစဉ်

၎င်းက “တစ်ခုပြဿနာက ကျနော်တို့အခု ရခိုင်မှာဖြစ်နေတဲ့ ဒီရိုဟင်ဂျာ၊ ARSA စသည်ဖြင့်ပေါ့နော် ဒီဟာတွေ ပြောတဲ့ ဟာတွေက တချို့တချို့ဟာတွေက လူမျိုးရေး အသွင်သဏ္ဍာန်ဖြစ်တဲ့ထဲမှာ သမိုင်းကြောင်းဆိုင်ရာ ရှင်းလင်းဖို့ လိုပါလိမ့်မယ်၊ သမိုင်းကြောင်းဆိုင်ရာ မရှင်းလင်းဘဲနဲ့ ဒီကိစ္စကိုဆိုရင် ရှုပ်ထွေးသွားနိုင်တယ်၊ တစ်နည်းအားဖြင့် ပြောရင် ၂၀၁၀ နောက်ပိုင်းရောက်မှသာ ရိုဟင်ဂျာဆိုတဲ့ အိတ်ထုပ်ကြီးက အကြီးကြီး ဖြစ်လာပြီးတော့ ဟာ ဒီဟာ ငါ့ရဲ့ ပြဿနာပါလား၊ ငါ့အနားကပါလား ဆိုတဲ့ဟာမျိုး ကျနော်တို့က ကြီးကြီးကျယ်ကျယ်နဲ့ သိရတဲ့ဟာ၊ တချို့ တချို့ ပြဿနာတွေဟာ ကျနော်တို့ ဒေသမှာ အမှန်တကယ်ဖြစ်တာ မဟုတ်ဘဲနဲ့ ကမ္ဘာကြီးက ဖန်းတီးတာလည်း ဖြစ်နိုင်တယ်၊ အဲဒီလိုပြောလိုက်ရင် ဖန်တီးတာလို့ ဖြစ်တယ်ဆိုရင် ဇဝေဇဝါတွေ ဖြစ်နိုင်တယ်၊ ဘာဖြစ်လို့လဲဆို တော့ ကျနော်တို့ ရခိုင်ပြည်ရဲ့ ဖြစ်တည်မှု Geopolitical အနေထား၊ တရုတ်ရဲ့ သမုဒ္ဒရာ ၂ စင်း ထွက်ပေါက် ဒါတွေ အကုန်လုံးကို ချင့်ချိန်ပြန်စဥ်းစားပြီးမှ ဒီကိစ္စတွေကို ဆွေးနွေးရမယ်လို့ ကျနော့်အနေနဲ့ ထင်ပါတယ်” ဟု ပြော သည်။

ရခိုင်ပြည်နယ်တွင် AA နှင့် မြန်မာ့တပ်မတော်တို့ တိုက်ပွဲများ အပြင်းအထန် ဖြစ်ပွားခဲ့သလို ARSA၊ RSO၊ ARA စသည့် အဖွဲ့များနှင့်လည်း တိုက်ပွဲများ ဖြစ်ပွားနေသည်။

အဆိုပါ တိုက်ပွဲများကြောင့် ရခိုင်ပြည်သူလူထု အနေဖြင့် နစ်နာဆုံးရှုံးမှုများ၊ စိုးရိမ်မှုများ မြင့်တက်နေကြောင်း စစ်ရေးနှင့်နိုင်ငံရေး အကဲခတ်များက ထောက်ပြသည်။

ကုလသမဂ္ဂ ဖွံ့ဖြိုးရေးအစီအစဥ် (UNDP)က ရခိုင်ပြည်နယ်တွင် လူဦးရေ ၂ သန်းခန့် အငတ်ဘေးကျရောက် နိုင်မည့်အန္တရာယ်ကို ရင်ဆိုင်ရနိုင်ကြောင်း၊ ၂၀၂၅ နှစ်ဆန်းပိုင်းတွင် ပြည်နယ်တွင်း စားနပ်ရိက္ခာ ထုတ်လုပ်နိုင်မှု သည် လူဦးရေ လိုအပ်ချက်၏ ၂၀ ရာခိုင်နှုန်း အတွက်သာ ဖူလုံနိုင်မည်ဟု ခန့်မှန်းထားသည်။

CNI News

၂၀၂၅ ခုနှစ်၊ ဇန်နဝါရီ ၆

လက်နက်ကိုင်အဖွဲ့အစည်းများအား ဒီမိုကရေစီ လမ်းကြောင်းပေါ်သို့ ရောက်စေရန် ဆွေးနွေးပွဲများ ပြုလုပ်ရန်လို ကြောင်း NCA ထိုးထားသည့် ရခိုင်ပြည်လွတ်မြောက်ရေးပါတီ (ALP)ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

လက်နက်ကိုင်အဖွဲ့များအား ဒီမိုကရေစီလမ်းကြောင်းပေါ်သို့ ရောက်ရှိစေရန် တွန်းအားပေးဖို့ လိုအပ်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၅ ခုနှစ်၊ ဇန်နဝါရီ ၁ ရက်က နှစ်သစ်ကူးမိန့်ခွန်းတွင် ထည့်သွင်း ပြောကြားခဲ့သည်။

ဒီမိုကရေစီလမ်းကြောင်းသို့ ရောက်ရှိစေရန် ဆွေးနွေးပွဲများ လုပ်ရန်လိုကြောင်း၊ ထိုဆွေးနွေးပွဲများမှ အဖြေများ ရရှိလာမှသာ နိုင်ငံရေးစားပွဲဝိုင်းမှတဆင့် ဒီမိုကရေစီလမ်းကြောင်းပေါ်သို့ ရောက်ရန်သွားရမည်ဟု ရခိုင်ပြည် လွတ်မြောက်ရေးပါတီ (ALP) ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ နိုင်ငံရေးပါတီ ခေါင်းဆောင်တချို့ကို တွေ့ရစဉ်

၎င်းက “နိုင်ငံရေးကို သုံးသပ်တဲ့အခါမှာ ခေါင်းဆောင်တွေရဲ့ အသီးသီးအမြင်တွေလည်း ရှိနိုင်ပါတယ်၊ ဆိုတော့ ဒီလက်နက်ကိုင်ပြီးတော့မှ တော်လှန်တိုက်ခိုက်နေကြတဲ့ လူတွေကို ဒီမိုကရေစီ လမ်းကြောင်းပေါ်ကို ရောက် အောင် တွန်းအားပေးကြပါလို့ ဘယ်လောက်ပဲပြောပြော ဆုံးဖြတ်ချက် သေသေချာချာချနိုင်တဲ့ အဖြေတစ်ခု မပေါ် သမျှကတော့ လက်နက်ကိုင်လမ်းစဥ်ကို စွန့်လွှတ်ဖို့အတွက်တော့ ခက်ကြမယ်လို့ ထင်ပါတယ်။ ဘာကြောင့်လဲ ဆိုလို့ရှိရင် အခုကတိုက်ပွဲက အရပ် ၈ မျက်နှာစလုံးမှာ ဖြစ်နေတဲ့အခါမှာ တော်လှန်ရေးအင်အားစုတွေ ဘက်က လည်း အတိုင်းအတာ တစ်ခုထိကို ခရီးပေါက်ရောက်နေတဲ့ အနေအထား ဖြစ်နေတော့ တစ်ခါတည်းနဲ့ လက်နက် စွန့်ပြီးတော့မှ ဒီမိုကရေစီလမ်းကြောင်းပေါ်ကို ရောက်အောင်လုပ်မယ် ဆိုတာမျိုးကတော့ အတိုင်းအတာ တစ်ခု တော့ ခက်ပါလိမ့်မယ်၊ အခုက နိုင်ငံရေးဘောင်က တအားကျဥ်းသွား ပြီးတော့မှ စစ်ရေး‌ဘောင်က တအားကျယ် သွားတယ်၊ အဲလိုအနေအထားမှာ ဒီမိုကရေစီ လမ်းကြောင်းပေါ်ကို ရောက်အောင်တွန်းအားပေးပါလို့ ဆိုတဲ့ကိစ္စက တော့ သာမန်ပုဂ္ဂိုလ်တွေက လုပ်လို့ရနိုင်တဲ့ အနေအထား မရှိဘူးလို့ ကျမမြင်တယ်၊ ပဋိပက္ခဖြစ်နေတဲ့ ပုဂ္ဂိုလ် အချင်းချင်းက ညီညွတ်အောင်ထိ ဆွေးနွေးရမှာ ဖြစ်တယ်၊ ခဏလေး ဆွေးနွေးပြီး‌တော့ နားလိုက် အဲလိုပုံစံမျိုးနဲ့ တော့ မရဘူး၊ ဆွေးနွေးပွဲက တကယ့်ကို လိမ့်ပတ်လည်အောင် ဆွေးနွေးပြီးတော့မှ အဖြေရှာရမယ်၊ အဖြေရလာတဲ့ အခါမှပဲ နိုင်ငံရေးရဲ့ စားပွဲဝိုင်းကို၊ စားပွဲဝိုင်းကတဆင့် ဒီမိုကရေစီ လမ်းကြောင်းပေါ်ကို ရောက်အောင် သွားရလိမ့် မယ်လို့တော့ ကျမထင်တယ်” ဟု ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကတော့ လက်နက်ကိုင်အဖွဲ့များအနေဖြင့် ဖြစ်ချင်သည်များ၊ ဖြစ်သင့် သည်များအား ချင့်ချိန်စဥ်းစားပြီး ပြည်ထောင်စုအကျိုးအား မျှော်ကိုးကာ ဒီမိုကရေစီ နည်းလမ်းတကျ ဆောင်ရွက် သင့်သည်ဟု ပြောကြားခဲ့သည်။

နှစ်ဖက်အဖွဲ့အစည်းများအနေဖြင့် ရပ်တည်ချက်များအား ပုံသေမကိုင်ထားဘဲ ထပ်တူကျနိုင်သော လမ်းကြောင်း တစ်ခုသို့ ရောက်အောင်သွားရန် လိုအပ်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

ခရစ္စမတ်နေ့မှာ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “နစကဥက္ကဋ္ဌ မျှော်မှန်းတဲ့ ဒီမိုကရေစီကို အဲဒီလက်နက်ကိုင် အဖွဲ့အစည်းတွေ လိုက်ပါဖို့ လွယ်မလွယ် ဆိုတာကတော့ လက်ရှိ ပဋိပက္ခ ဘယ်လောက်မြင့်သလဲဆိုတာနဲ့ သုံးသပ်ရင် အဖြေရမယ်ထင်တယ်၊ အဲသလို ဆိုရင်တော့ဖြင့် နစကဥက္ကဋ္ဌ ပြောသလို လက်နက်ကိုင် အဖွဲ့အစည်းတိုင်းက လိုက်ပါလာကြမှာပေါ့၊ အခု မလိုက် ပါကြဘူးဆိုရင် သူမျှော်မှန်းတဲ့လမ်းစဥ်နဲ့ လက်နက်ကိုင်အဖွဲ့အစည်းတွေ မျှော်မှန်းတဲ့လမ်းစဥ် ထပ်တူမကျသေးလို့ ဖြစ်မှာပေါ့ဗျာ၊ လက်နက်ကိုင် အဖွဲ့အစည်းတွေက ဘာကိုမျှော်မှန်းနေကြတယ်၊ ဘာတွေကို ဖြတ်သန်းနေကြ တယ်၊ အဲတော့ သူတို့မျှော်မှန်းချက်နဲ့ ထပ်တူကြအောင် ကိုယ်က‌ ရွှေ့ပေးနိုင်မှာလား ဒါလေးကို ကိုယ့်ဘက်က စဥ်းစားရမှာပေါ့ဗျာ၊ အဲတော့ ကိုယ့်ရပ်တည်ချက်ကို အသေကိုင်လို့တော့ဖြင့် ဘယ်ဘက်ကမှ ရမှာမဟုတ်ဘူး၊ နစကဥက္ကဋ္ဌက သူ့ရပ်တည်ချက်ကို အသေပေါ့ဗျာ ပုံသေကိုင်ထားတယ်ဆိုရင် တစ်ဖက်ကလည်း သူ့ရဲ့ရပ်တည် ချက်၊ သူ့ရဲ့ မျှော်မှန်းချက်ကို ပုံသေပေါ့ဗျာ ကိုင်ထားတယ်ဆိုရင် ဘယ်လိုမှ ထပ်တူကျမှာ မဟုတ်ဘူး၊ နှစ်ဖက်လုံး က ထပ်တူကျနိုင်တဲ့ လမ်းကြောင်းတစ်ခုကို ရောက်အောင်သွားမှပဲ ထပ်တူကျမှာပေါ့၊ အဲတော့ ဒီမိုကရေစီလို့ ပြောတယ်ဆိုရင် ဒီမိုကရေစီဆိုတာကို ကိုယ့်ဘက်က ဘယ်လောက်ထိ ဒီမိုကရေစီ ယဥ်ကျေးမှုထဲကို ရောက်နေပြီ လဲ၊ အဲတာကိုယ့်ကိုယ်ကို သုံးသပ်ရမှာပေါ့” ဟု ပြောသည်။

အတူယှဉ်တွဲနေထိုင်ကြသည့် လူ့အဖွဲ့အစည်း တစ်ခုအတွင်းတွင် ကြုံတွေ့လာသည့် ပြဿနာများကို ဒီမိုကရေစီ နည်းလမ်းဖြစ်သည့် တွေ့ဆုံဆွေးနွေး အဖြေရှာခြင်း နည်းလမ်းကသာ အောင်မြင်စေနိုင်မည်ဟု ယုံကြည်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၄ ခုနှစ်၊ ဒီဇင်ဘာ ၂၂ ရက်တွင် ခရစ်တော်မွေးနေ့ (ခရစ္စမတ်) ကျေးဇူးတော် ချီးမွမ်းခြင်း အခမ်းအနား၌ ပြောကြားခဲ့သည်။

၂၀၂၅ ခုနှစ်တွင် တော်လှန်ရေးအောင်မြင်ရန် လိုအပ်သည့် အပြောင်းအလဲများအား ရဲရဲဝံ့ဝံ့ ဆောင်ရွက်သွားမည်ဟု အမျိုးသားညီညွတ်ရေးအစိုးရ (NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ၂၀၂၅ ခုနှစ်၊ ဇန်နဝါရီ ၁ ရက် တွင် ပြောကြားခဲ့သည်။

ထို့ပြင် မြန်မာနိုင်ငံသည် မြန်မာ့တပ်မတော် မရှိလျှင် အစိတ်စိတ်အမွှာမွှာ ပြိုကွဲသွားမည့် တိုင်းပြည်မဟုတ် ကြောင်း ၂၀၂၄ ခုနှစ်၊ သြဂုတ် ၂၁ ရက်တွင် ၎င်းက ပြောကြားခဲ့သည်။

CNI News

၂၀၂၅ ခုနှစ်၊ ဇန်နဝါရီ ၄

ရှမ်းတိုင်းရင်းသားများဒီမိုကရေစီအဖွဲ့ချုပ်(SNLD)မှ ဥက္ကဋ္ဌဟောင်းနှင့် ဥက္ကဋ္ဌများဖြစ်သည့် ခွန်ထွန်းဦးနှင့် စိုင်းညွန့်လွင်တို့ အပါအဝင် မွန်တိုင်းရင်းသားသာ နိုင်ချေမွန်တို့ကို နစက-က စွမ်း‌ဆောင်မှုဆိုင်ရာဂုဏ်ထူးဆောင် တံဆိပ် လူမှုထူးချွန်တံဆိပ်(ပထမဆင့်)ကို ဇန်နဝါရီ ၄ ရက်တွင် ချီးမြှင့်အပ်နှင်းလိုက်ကြောင်း ထုတ်ပြန်ခဲ့သည်။

၂၀၂၅ ခုနှစ်၊ ဇန်နဝါရီ ၄ ရက်တွင် ကျရောက်သည့် ၇၇ နှစ်မြောက် လွတ်လပ်ရေးနေ့မှာ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၀၈ ဖွဲ့စည်းပုံအခြေခံဥပဒေ ရေးဆွဲနိုင်ရန် အသေးစိတ်အခြေခံရမည့်မူများ ချမှတ်နိုင်ရေးအတွက် အမျိုးသားညီလာခံ၌ ပါဝင်ဆွေးနွေးခဲ့ကြသည့်သူများကို စွမ်းဆောင်မှုဆိုင်ရာ ဂုဏ်ထူး ဆောင် တံဆိပ်ချီးမြှင့်ခဲ့ခြင်းဖြစ်သည်။

အဆိုပါ လူမှုထူးချွန်တံဆိပ်(ပထမဆင့်) ရရှိခဲ့သူ ၂၄၉ ဦးရှိပြီး ထိုအထဲမှာ ရှမ်းတိုင်းရင်းသား ခေါင်းဆောင်များဖြစ် သည့် ခွန်ထွန်းဦး၊ စိုင်းညွန့်လွင်တို့အပြင် မွန်တိုင်းရင်းသားခေါင်းဆောင် နိုင်ချေမွန်လည်း ပါဝင်ခဲ့သည်။

ထို့အပြင် ဦးချန်ထွန်း၊ ဦးထွန်းရီ၊ နိုင်တလမွန်၊ နိုင်ဧကတို့လည်း ပါဝင်ခဲ့ကြသည်။

CNI News
၂၀၂၅ ခုနှစ်၊ ဇန်နဝါရီ ၄

နိုင်ငံတစ်ဝှမ်းရှိ အကျည်းထောင်/အချုပ်ထောင်/စခန်းအသီးသီးတွင် ပြစ်ဒဏ်ကျခံလျက်ရှိသော အကျဉ်းသူ/သား ၅၀၀၀ ကျော်ကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၅ ခုနှစ်၊ ဇန်နဝါရီ ၄ ရက်နေ့ လွတ်လပ်ရေး နေ့တွင် လွတ်ငြိမ်းပေးခဲ့သည်။

ဇန်နဝါရီ ၄ ရက်နေ့တွင် ကျရောက်သည့် (၇၇)နှစ်မြောက် လွတ်လပ်ရေးနေ့ အထိမ်းအမှတ်နေ့မှာ အကျဉ်းသူ/သား ၅၈၆၄ ဦးကို လွတ်ငြိမ်းချမ်းသာခွင့် ပေးခဲ့ခြင်းဖြစ်ပြီး အကျဉ်းသူ/သား ၁၄၄ ဦးကိုတော့ ထောင်ဒဏ်တစ်သက်မှ ထောင်ဒဏ် ၁၅ နှစ်သို့ လျှော့ပေါ့ပေးခဲ့သည်။

အလားတူ နိုင်ငံခြားသား အကျဉ်းသူ/သား ၁၈၀ ဦးကိုလည်း လွတ်ငြိမ်းချမ်းသာခွင့် ပေးလိုက်ကြောင်း နစက-က ထုတ်ပြန်ခဲ့သည်။

CNI News
၂၀၂၅ ခုနှစ်၊ ဇန်နဝါရီ ၄

အထွေထွေရွေးကောက်ပွဲ ဖြစ်စေရေးနှင့် ရွေးကောက်ပွဲမှ ထွက်ပေါ်လာသည့် အစိုးရအား အာဏာလွှဲပြောင်းပေး မည်ဟု ကတိပြုပါကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဇန်နဝါရီ ၄ ရက်က ကျရောက်သည့် (၇၇)နှစ်မြောက် လွတ်လပ်ရေးနေ့ အခမ်းအနားသို့ ပေးပို့သည့် သဝဏ်လွှာမှာ ၎င်းက ကတိပြုထားခြင်း ဖြစ်သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “နိုင်ငံတော်စီမံအုပ်ချုပ်ရေးကောင်စီရဲ့ အန္တိမ ရည်မှန်းချက်မှာ လွတ်လပ်ပြီး တရားမျှတတဲ့ ပါတီစုံဒီမိုကရေစီ အထွေထွေ ရွေးကောက်ပွဲကို အောင်မြင်စွာ ကျင်းပရန်ဖြစ်ကြောင်း၊ စည်းစနစ်ကျနတဲ့ တရားမျှတပြီး သိက္ခာရှိတဲ့ အထွေထွေ ရွေးကောက်ပွဲ ဖြစ်စေရေးနဲ့ ရွေးကောက်ပွဲမှ ထွက်ပေါ် လာတဲ့ အစိုးရအား နိုင်ငံတော်တာဝန် လွှဲအပ်သွားနိုင်ရေး ဆက်လက် ဆောင်ရွက်သွားမှာဖြစ်ကြောင်း ကတိပြု ပြောကြားလိုပါတယ်”ဟု ပြောသည်။

၂၀၂၅ ခုနှစ်အတွင်း ရွေးကောက်ပွဲ ကျင်းပသွားမည်ဖြစ်ကြောင်း၊ ရွေးကောက်ပွဲကို အပိုင်းလိုက် ကျင်းပသွားနိုင် ကြောင်း နစကဥက္ကဋ္ဌက ပြောကြားထားသည်။

လက်ရှိ မြန်မာနိုင်ငံတစ်ဝှမ်းတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများ အပြင်း အထန်ဖြစ်ပွားနေပြီး နေရပ်စွန့်ခွာ ထွက်ပြေးတိမ်းရှောင်နေရသူ ၃ သန်းကျော်ရှိပြီး လူနေအိမ်နှင့် အဆောက်အအုံ ပေါင်း သောင်းချီ မီးလောင်ပျက်စီးထားသည်။

ထို့ကြောင့် နစကသည် ရွေးကောက်ပွဲကို ကျင်းပခဲ့မည်ဆိုပါက နေပြည်တော်နယ်မြေ၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီးတို့တွင် ဖြစ်နိုင်ကြောင်း၊ သို့သော် ဧရာဝတီ တိုင်းဒေသကြီး၊ ပဲခူးတိုင်းဒေသကြီး၊ မန္တလေးတိုင်းဒေသကြီးများတွင် တိုက်ပွဲများ ဖော်ဆောင်လာနေခြင်းကြောင့် အပြည့်အဝ ကျင်းပနိုင်ရန် ခက်ခဲနိုင်ကြောင်း စစ်ရေးနှင့်နိုင်ငံရေး အကဲခတ်များက ထောက်ပြလျက်ရှိသည်။

နစကဥက္ကဋ္ဌကတော့ တပ်မတော်သည် ပြည်သူထဲက ပေါက်ဖွားလာသော တပ်မတော်ဖြစ်သည့်အတွက် နိုင်ငံတော်ကို အစွမ်းကုန် ကာကွယ်သွားမည်ဟု ဇန်နဝါရီ ၄ ရက်နေ့ လွတ်လပ်ရေးနေ့တွင် ပြောကြားခဲ့သည်။

CNI News

၂၀၂၅ ခုနှစ်၊ ဇန်နဝါရီ ၃ 

၂၀၂၅ ခုနှစ်တွင် စစ်‌ရေးနှင့် နိုင်ငံရေးသည် မည်ကဲ့သို့သော အခြေအနေမျိုး ဖြစ်လာနိုင်သလဲ ဆိုသည့်အပေါ် စစ်ရေးနှင့်နိုင်ငံရေး အကဲခတ်များကြား သုံးသပ်ဆွေးနွေးလျက် ရှိနေသည်။

၂၀၂၅ ခုနှစ်တွင် တချို့နေရာများ၌ စစ်ရေးများရှိနိုင်သလို တချို့နေရာများမှာတော့ ဆွေးနွေးမှုများ ရှိနိုင်ကြောင်း NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO- NCA/S)မှဥက္ကဋ္ဌဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “လာမယ့်နှစ်က စစ်ရေး တချို့ပြောက်ကျား ပြောက်ကျားပေါ့။ တချို့နေရာ ဖြစ်နိုင်တယ်၊ ထို့အတူပဲ တချို့ နေရာ ဆွေးနွေးတာတွေ ဖြစ်နိုင်တယ်၊ ဆွေးနွေးတစ်ဝက် အနှောင့်အယှက် စစ်ရေးနှောင့်ယှက်မှုတွေ ပြဿနာ တွေက တစ်ဝက်တော့ ဖြစ်နိုင်တယ်၊ သို့သော်လည်းပဲ နိုင်ငံတကာ အခြေအနေ၊ တိုင်းသူပြည်သားတွေ အခြေ အနေ၊ နောက်ပြီးတော့ ပြည်သူလူထုရဲ့ အခြေအနေကို ကြည့်တော့ စစ်ရေးအပေါ်မှာတော့ နည်းနည်းလေးတော့ ခြေကုန်လက်ပန်းကျနေတဲ့ သဘောရှိတယ်၊ ပြည်သူလူထုကတော့ ခံစားနေရတဲ့ဟာတွေက နည်းနည်းလေးတော့ မခံနိုင်တော့တဲ့ သဘောရှိတော့ ဒီဆွေးနွေးရေးဘက်ကို နည်းနည်းလေး ဇောင်းပေးသွား နိုင်တယ်လို့ ယူဆ တယ်ဗျ။ အဲဒီ ဆွေးနွေးရေးဘက်ကို ဇောင်းပေးတဲ့ အခြေအနေကနေ တည်ငြိမ်မှု တစ်စုံတရာ ရနိုင်တယ်၊ တည်ငြိမ်မှု တစ်စုံတရာ ရလို့ရှိရင် အဲတည်ငြိမ်မှုကနေ ကျနော်တို့ ရွေးကောက်ပွဲတို့ ဘာတို့လည်းပဲ ပုံစံတစ်မျိုးမျိုး နဲ့တော့ ဖြစ်ပေါ်သွားနိုင်တာပေါ့ဗျာ၊ အဲတာကတော့ ကျနော် အိမ်နီးနားချင်း နိုင်ငံတွေရယ်၊ ကမ္ဘ့အခင်းကျင်း ရယ်၊ အားလုံးက ပြောဆိုတိုက်တွန်းနေတဲ့ သဘောဖြစ်နေတော့ စစ်ရေးကိုတော့ ဒီနှစ်ထဲမှာ အားပေးမယ့် နိုင်ငံတကာ အခင်းအကျင်းတော့ မမြင်ဘူးဗျ၊ အဲတာကြောင့် လာမယ့်နှစ်ကတော့ ဒီတစ်ဝက်စီ တစ်ဝက်စီပေါ့ဗျာ၊ တချို့ဒေသမှာ စစ်ရေးရှိနိုင်တယ်၊ အများအားဖြင့်တော့ စစ်ရေးရှိပြီးသား နေရာတွေမှာ နည်းနည်းပြန်ငြိမ်သွား နိုင်တယ် ကျနော်အဲသလို အကဲခတ်ပါတယ်” ဟု ပြောသည်။ 

MNDAA ခေါင်းဆောင်များနဲ့ မြန်မာ့တပ်မတော်က ဒုဗိုလ်ချုပ်ကြီးကိုကိုဦးကို တွေ့ရစဉ်

တရုတ်နိုင်ငံ၏ ကြားဝင်စေ့စပ်မှုဖြင့် တရုတ်နိုင်ငံ၊ ကူမင်းမြို့တွင် နစကနှင့် MNDAA တို့ ၂၀၂၄ ခုနှစ်၊ ဒီဇင်ဘာ ၁၅ ရက်နှင့် ၁၆ ရက်များက တွေ့ဆုံဆွေးနွေးခဲ့ပြီး သဘောတူညီမှု တစ်စုံတရာ မရရှိဘဲ ဆွေးနွေးမှု ပြီးဆုံးသွားခဲ့ သည်။

ထို့အတူ ပြည်တွင်းရေး အခြေအနေများအား နိုင်ငံရေးနည်းလမ်းဖြင့် ဆွေးနွေးဖြေရှင်းမည်ဟု ရက္ခိုင်အမျိုးသား အဖွဲ့ချုပ် (ULA/AA) က ၂၀၂၄ ခုနှစ်၊ ဒီဇင်ဘာ ၂၉ ရက်တွင် ထုတ်ပြန်ခဲ့သော်လည်း AA နှင့် မြန်မာ့တပ်မတော်တို့ ဆွေးနွေးပွဲ ဖြစ်မြောက်ခဲ့ပါကလည်း မအောင်မြင်နိုင်ကြောင်း၊ စစ်ရေးအရသာ ပြန်လည်တင်းမာလာနိုင်ကြောင်း စစ်ရေးနှင့်နိုင်ငံရေး အကဲခတ်များကြား သုံးသပ်မှုများ ရှိနေသည်။

ထို့ပြင် ယောဒေသလွတ်မြောက်ရေးအတွက် မဟာမိတ်များဖြင့် ပူးပေါင်းပြီး စစ်ရေးအရှိန် မြှင့်သွားမည်ဟု ယောတပ်တော်(YA)က ၂၀၂၄ ခုနှစ်၊ ဒီဇင်ဘာ ၂၄ ရက်တွင် ထုတ်ပြန်ကြေညာခဲ့သလို မြန်မာပြည် အလယ်ပိုင်း အား ထိုးဖောက်ဝင်ရောက်နိုင်ရေးသည် ၂၀၂၅ ခုနှစ်၏ စစ်ဆင်ရေးရည်မှန်းချက်ဖြစ်သည်ဟု ၂၀၂၅ ခုနှစ်၊ ဇန်နဝါရီ ၁ ရက်၌ ကျောင်းသားလက်ရုံးတပ်တော် (SAF) က ထုတ်ပြန်ခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကတော့ ငြိမ်းချမ်းရေးအတွက် တွေ့ဆုံဆွေးနွေးမှုများအား ဖိတ်ခေါ် ကြိုဆိုလျက်ရှိကြောင်း ပြောကြားခဲ့သလို တိုင်းရင်းသား ခေါင်းဆောင်တချို့သည် ဖက်ဒရယ်နှင့် တိုင်းရင်းသား အခွင့်အရေးအား ပြောနေသော်လည်း လက်တွေ့တွင် ပြည်ထောင်စုပြိုကွဲစေရန် ဦးတည်ဆောင်ရွက်နေသည် ဟုလည်း ပြောကြားခဲ့သည်။

AA တပ်ဖွဲ့ကို တွေ့ရစဉ်

၂၀၂၅ ခုနှစ်တွင် စစ်ရေးတင်းမာမှုများ လျော့ကြစေရန် တွေ့ဆုံဆွေးနွေး အဖြေရှာသော လမ်းကြောင်းကိုပဲ သွားသင့်သည်ဟု ရခိုင်အမျိုးသားကွန်ရက်ဥက္ကဋ္ဌ ဦးတင်ထူးအောင်က CNI သတင်းဌာနသို့ ပြောသည်။

၎င်းက “ဒီ ၂၀၂၅ မှာတော့ စစ်ရေးဟာ ၂၀၂၄၊ ၂၃ ထက်ပေါ့နော် ပိုပြီးတော့တင်းမာတဲ့ အခြေအနေ ရောက်လာမှာ တော့ ကျနော်တို့ မလိုလားဘူး၊ အဲတော့ နိုင်ငံရေးအရ တွေ့ဆုံဆွေးနွေး အဖြေရှာတဲ့ လမ်းကြောင်းတစ်ခုကိုပဲ ကျနော်တို့ကတော့ သွားစေချင်တာပေါ့နော်၊ AA ကလည်း လက်ရှိထုတ်ပြန်ထားတယ်၊ ‌နောက် Non-State actors ကနေ State actors အဆင့်ကိုလည်း အသိအမှတ်ပြုပေးဖို့ တချို့နေရာ ပြည်နယ်နဲ့ ပတ်သက်ပြီးတော့ပေါ့နော်၊ တစ်ပြည်နယ်လုံး သိမ်းထားတဲ့ အချက်ပေါ်မှာ ကျနော်တို့ တွေ့ဆုံဆွေးနွေးရေးနဲ့ ဘယ်လိုညှိနှိုင်းမလဲဆိုတဲ့ အချက်ကို တပ်မတော်ဘက်ကလည်း စဥ်းစားဆောင်ရွက်ဖို့ လိုအပ်တယ်၊ ထို့အတူ တိုင်းရင်းသားတွေနဲ့ ဘယ်လို ညှိနှိုင်းကြမလဲ လက်ရှိအနေအထား မြေပြင်မှာ သိမ်းပိုက်ထားတဲ့ မြို့တွေရော ဘယ်လိုစီမံ ခန့်ခွဲကြမလဲ၊ လက်ရှိ တပ်မတော်က လေကြောင်းတွေ ဒီလိုဒီလိုပဲ ဆင်နေမလား၊ ဒါဆိုရင် တိုင်းပြည်ငြိမ်းချမ်းမှာ မဟုတ်ဘူးပေါ့နော်၊ ဒီလိုအချက်တွေပေါ်မှာ ကျနော်တို့က နိုင်ငံရေးအရ တွေ့ဆုံဆွေးနွေးမှု လမ်းကြောင်းကို အမြန်ဆုံးသွား စေချင် တယ်၊ ဒီအတွက် ကျနော်တို့ လက်ရှိနိုင်ငံရေး အကျဥ်းသားတွေကို လွှတ်ပေးစေချင်တယ်၊ ‌ဒေါ်အောင်ဆန်းစုကြည် အပါအဝင်ပေါ့နော်၊ ဒါတွေကို ကျနော်တို့ လုပ်စေချင်တယ် အဓိက တိုင်းပြည် စီးပွားရေးလည်း အလွန်တရာ အောက်ဆုံးကို ရောက်နေပြီ ဖြစ်လို့ပေါ့နော် ဒီအချက်တွေကို ကျနော်တို့ ပြောရတာဖြစ်တယ်ပေါ့” ဟု ပြောသည်။ 

မြန်မာနိုင်ငံတွင် ပြည်တွင်းပဋိပက္ခများသည် ယခုနှစ်ပိုင်းအတွင်း ပိုမိုဆိုးရွားလာသည့်အပြင် နေရပ်စွန့်ခွာ ထွက်ပြေး တိမ်းရှောင်နေရသူ ၃ သန်းကျော် ရှိနေကြောင်း၊ နိုင်ငံရေးအရ ဖြေရှင်းရန် လိုအပ်နေကြောင်း ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က ၂၀၂၄ ခုနှစ်၊ ဒီဇင်ဘာလ ၃၁ ရက်နေ့တွင် ပြောကြားခဲ့သည်။

CNI News

၂၀၂၅ ခုနှစ်၊ ဇန်နဝါရီ ၂

အာရက္ခတပ်တော်(AA)နှင့် မြန်မာ့တပ်မတော်တို့ ဆွေးနွေးပွဲ ဖြစ်မြောက်ခဲ့ပါကလည်း မအောင်မြင်နိုင်ကြောင်း စစ်ရေးနှင့်နိုင်ငံရေး အကဲခတ်များက ပြောသည်။

AA သည် ၂၀၂၃ ခုနှစ်၊ နိုဝင်ဘာ ၁၃ ရက်တွင် ရခိုင်ပြည်နယ်အတွင်းမှာ ထိုးစစ်စတင်ခဲ့ရာ မြို့နယ်ပေါင်း ၁၄ မြို့နယ်အား ထိန်းချုပ်ပြီးနောက် ပြည်တွင်းရေးကို နိုင်ငံရေးနည်းလမ်းဖြင့် ဆွေးနွေးဖြေရှင်းမည်ဟု ရက္ခိုင် အမျိုးသားအဖွဲ့ချုပ် (ULA/AA)က ၂၀၂၄ ခုနှစ်၊ ဒီဇင်ဘာ ၂၉ ရက်၌ ထုတ်ပြန်ခဲ့ သည်။

တရုတ်၏ သဘောဆန္ဒအရသာ ဆွေးနွေးခြင်းဖြစ်ကြောင်း၊ နိုင်ငံရေးဆွေးနွေးပွဲများသည် လက်တွေ့တွင် စစ်ပွဲ၏ အကျိုးစီပွားများနှင့် ဆက်စပ်နေသောကြောင့် အောင်မြင်မှုမရနိုင်ကြောင်း နိုင်ငံ‌ရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “အခုက စစ်ရေးကို အဓိကထားပြီး တိုက်တယ်ဆိုတာ ဒေသတွင်းမှာ စစ်ကောင်စီ ကင်းစင်ရေးအတွက် အဓိကထား ကြိုးပမ်းလာတာပါ၊ အဲလိုကြိုးပမ်းပြီးတော့ အဲဒီအစီအစဥ် တစ်စုံတရာ ပြီးမြောက်ပြီ ဆိုလို့ရှိရင် တရုတ်က ဖိအားပေးတောင်းဆိုနေတဲ့ ငြိမ်းချမ်းရေးကိုတော့ စကားပြောကြရမှာပဲ၊ နိုင်ငံ‌ရေးအရ ဖြေရှင်းဖို့ ပြောကြမယ်ဆိုတဲ့ ခေါင်းစီးတင်ပြီးတော့ နိုင်ငံရေးဆွေးနွေးပွဲတွေ လုပ်တာ၊ နိုင်ငံ‌ရေးဆွေးနွေးပွဲတွေကလည်း လက်တွေ့ကျတော့ စစ်ပွဲရဲ့ အကျိုးစီးပွားတွေနဲ့ ဆက်စပ်နေတဲ့အတွက် ဘယ်တစ်ခုမှ အောင်မြင်မှုမရှိပါဘူး။ ဒါကြောင့်မို့ မအောင်မြင်သော်လည်း စစ်ကောင်စီကို နေရာပေးချင်တဲ့ တရုတ်ကနေပြီးတော့ ဘယ်လိုဖြစ်ဖြစ် နိုင်ငံရေးအရ တွေ့ဆုံဆွေးနွေးကြပါ ဆိုတဲ့အခါကျတော့ ဆွေးနွေးပြလိုက်တာပေါ့ဗျာ၊ ဆွေးနွေးတော့လည်း လက်တွေ့က ဘာမှမဖြစ်ပါဘူး၊ အခုအရှေ့မြောက်ပိုင်းမှာလည်း ဒီ MNDAA နဲ့ဆွေးနွေးခဲ့တာ ဆွေးနွေးပွဲက ပျက်တာပါပဲ၊ အခုဒီ ရခိုင်နဲ့ ဆွေးနွေးမယ်လို့ပြောလည်း ဆွေးနွေးပွဲက ပျက်အုံးမှာပါပဲ” ဟု ပြောသည်။

ငြိမ်းချမ်းရေးအတွက် တွေ့ဆုံဆွေးနွေးမှုများအား ဖိတ်ခေါ်ကြိုဆိုကြောင်း၊ နိုင်ငံရေးပါတီ၊ တိုင်းရင်းသား လက်နက်ကိုင် အဖွဲ့အစည်းများနှင့် တွေ့ဆုံဆွေးနွေးနေပြီး ရလာသည့် သဘောထား မှတ်ချက်များအား နောက်လာမည့် လွှတ်တော်တွင် ဆွေးနွေး အတည်ပြုနိုင်ရန် မှတ်တမ်းတင် ထားသည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ၂၀၂၄ ခုနှစ်၊ ဒီဇင်ဘာလ ၃၀ ရက်နေ့တွင် ကျရောက်သည့် ကရင်အမျိုးသား နှစ်သစ်ကူးနေ့ သဝဏ်လွှာမိန့်ခွန်းတွင် ပြောကြားခဲ့သည်။

ဆွေးနွေးပွဲတွင် AA ၏ တောင်းဆိုချက်များသည် အမြင့်ပိုင်းများ ဖြစ်နိုင်သောကြောင့် စစ်ရေးအရသာ ပြန်လည် တင်းမာလာနိုင်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာန သို့ ပြောသည်။ 

AA ရဲဘော်ကိုတွေ့ရစဉ်

၎င်းက “ငြိမ်းချမ်းရေးသွားတဲ့ လမ်းကြောင်းမှာ ၂ နည်းပဲရှိတာကိုး၊ စားပွဲဝိုင်းသွားမလား၊ လက်နက်ကိုင်မလား အဲတော့ လက်နက်ကိုင်ဖို့ ၂ ဖက်လုံးကလည်း ဆန္ဒမရှိကြတော့ဘူး၊ စွန့်လွှတ်ရမယ့် အကြောင်းတွေလည်း ဖြစ်လာ တော့ စားပွဲဝိုင်းပေါ် ‌ရောက်တဲ့အခါကျရင် လက်နက်ကိုင်ပဋိပက္ခ အဆင့်ဆင့် လျှော့ကြတာပေါ့လေ၊ အဲဒီကနေ အဆင်ပြေသွားရင်တော့ ငြိမ်းချမ်းရေးလမ်းကြောင်းပေါ် ရောက်တာပေါ့၊ အဲလိုမှ မဟုတ်ဘဲနဲ့ လက်နက်ကိုင် ပဋိပက္ခကို လက်နက်ကိုင်မယ့် လမ်းစဥ်ကို ရွေးခဲ့တယ်ဆိုရင်တော့ တစ်ဖက်ဖက်က လုံးဝ မလှုပ်နိုင်တော့တဲ့ အချိန်ကျရင်တော့ ဒါငြိမ်းချမ်းမှုတစ်ခု ရသွားတာပါပဲ။ အဲတော့ ဒီအနေအထားမှာတော့ ဘယ်လိုပဲပြောပြော စစ်နိုင်တယ်လို့ ကိုယ့်ကိုယ်ကို ခံယူပြီးတော့ ရှေ့ဆက်တိုးဖို့ စဥ်းစားနေတဲ့ AA ဘက်ကတော့ သူလိုချင်တဲ့ဟာ မရနိုင်ဘူးဆိုတာ သူသိတာပဲ၊ ဒါပေမယ့် အဲတာကိုတွေးပြီးတော့ ဆွေးနွေးပွဲမှာတော့ တောင်းဆိုချက်ကတော့ အမြင့်ပိုင်းတွေ လာပါလိမ့်မယ်၊ လာပါလိမ့်မယ် ဒါမယ့် အဲတာရဖို့လည်း မဖြစ်တဲ့အခါကျတော့ အဲဒီကျရင်တော့ စစ်ရေးနဲ့ပတ်သက်တဲ့ လှုပ်ရှားမှုတစ်ခုခု ဖြစ်ကောင်းဖြစ်လာလိမ့်မယ်၊ ဆွေးနွေးပွဲကြာသွားလို့ အချိန်ကြာကြာ အတွင်းမှာ သူ့အနေနဲ့ ပြန်အနားယူရမယ်၊ ပြန်လည်စုဖွဲ့မယ်၊ အရင်းအမြစ်တွေ ပြန်လည်စုဆောင်းရမယ်ဆိုတဲ့ အချိန်မျိုး ဒီအားသာချက်တွေကိုပဲ သူကအဓိကယူမှာကိုး၊ အဲတော့ အဲလိုယူပြီးသွားရင်တော့ နောက်ပိုင်း စစ်ရေး နဲ့ပတ်သက်တဲ့ တင်းမာမှုကတော့ ပြန်ဖြစ်လာမှာပဲ” ဟု ပြောသည်။

ULA/AA ၏ ပြောရေးဆိုခွင့်ရှိသူ ဦးခိုင်သုခကတော့ ပြည်ထောင်စုမှ သီးခြားခွဲထွက်ရန် ဆန္ဒမရှိသော်လည်း ကွန်ဖက်ဒရေးရှင်းထက် မနိမ့်သောအဆင့်အားရလိုကြောင်း ၂၀၂၄ ခုနှစ်၊ မတ်လ ၄ ရက်တွင် ပြုလုပ်သော သတင်းစာရှင်းလင်းပွဲ၌ ပြောကြားခဲ့သည်။

ထို့နောက် တိုင်းရင်းသား ခေါင်းဆောင်အချို့သည် ဖက်ဒရယ်နှင့် တိုင်းရင်းသားအခွင့်အရေး ပြောနေသော်လည်း လက်တွေ့တွင် ပြည်ထောင်စုပြိုကွဲစေရန် ဦးတည်ဆောင်ရွက်နေကြောင်း နစကဥက္ကဋ္ဌက ၂၀၂၅ ခုနှစ်၊ ဇန်နဝါရီ ၁ ရက်က နှစ်သစ်ကူး မိန့်ခွန်းတွင် ပြောကြားခဲ့သည်။

ရခိုင်ပြည်နယ်တွင် တရုတ်စီမံကိန်း ၁၁ ခုရှိသည့်အနက် စီမံကိန်း ၁၀ ခုအား AA က ထိန်းချုပ်ထားကြောင်း မြန်မာ့မဟာဗျူဟာနဲ့ မူဝါဒရေးရာ လေ့လာရေးအဖွဲ့ (ISP-Myanmar) က ၂၀၂၄ ခုနှစ်၊ ဒီဇင်ဘာလ ၂၈ ရက်နေ့တွင် ထုတ်ပြန်ခဲ့သည်။